പ്രവച​ന​വ്യാ​ഖ്യാ​നം—ആർക്കു​ള്ളത്‌?

ഗോർഡിയൻ കെട്ട്‌—ആർക്കും അഴിക്കാൻ പറ്റാത്ത കുരുക്ക്‌ എന്ന്‌ ഗ്രീസി​ലെ പഴമക്കാർ കരുതി​​പ്പോ​ന്നു. എന്നാൽ ബുദ്ധി​മാ​നായ ഒരാൾ സങ്കീർണ​മായ ആ കുരു​ക്ക​ഴി​ക്കു​​മെ​ന്നും അയാൾ ദിഗ്‌വി​ജയം നേടു​​മെ​ന്നും ആയിരു​ന്നു വിശ്വാ​സം.a ഐതി​ഹ്യ​മ​നു​സ​രിച്ച്‌, മഹാനായ അലക്‌സാ​ണ്ടർ തന്റെ വാളു​​കൊണ്ട്‌ ഒരൊറ്റ വെട്ട്‌—ആ കുരുക്ക്‌ അഴിഞ്ഞു!

പ്രയാ​സ​​മേ​റിയ ഇത്തരം കുരു​ക്കു​കൾ അഴിക്കാൻ മാത്രമല്ല കടങ്കഥ​കൾക്ക്‌ ഉത്തരം കണ്ടെത്താ​നും പ്രവച​നങ്ങൾ വ്യാഖ്യാ​നി​ക്കാ​നും ഭാവി മുൻകൂ​ട്ടി​പ്പ​റ​യാ​നും പ്രതി​ഭാ​ശാ​ലി​ക​ളായ അനേകർ കാലങ്ങ​ളി​ലു​ട​നീ​ളം ശ്രമി​ച്ചി​ട്ടുണ്ട്‌.

പക്ഷേ, മിക്ക​പ്പോ​ഴും ഇതൊക്കെ തങ്ങളുടെ കഴിവി​ന​പ്പു​റ​മാ​​ണെന്ന്‌ ആളുകൾ തിരി​ച്ച​റി​ഞ്ഞി​രി​ക്കു​ന്നു. ഉദാഹ​ര​ണ​ത്തിന്‌, ബാബി​​ലോ​ണി​യൻ രാജാ​വാ​യി​രുന്ന ബേൽത്ത്‌ശസ്സർ നടത്തിയ വിരു​ന്നി​ന്റെ ആഘോ​ഷ​ത്തി​മിർപ്പി​നി​ട​യിൽ, കൊട്ടാ​ര​ച്ചു​വ​രിൽ അത്ഭുത​ക​ര​മാ​യി തെളി​ഞ്ഞു​വന്ന കയ്യെഴുത്ത്‌ വ്യാഖ്യാ​നി​ക്കാൻ അവിടു​ത്തെ വിദ്വാ​ന്മാർക്ക്‌ ആർക്കും കഴിഞ്ഞില്ല. ‘നൂലാ​മാ​ല​യു​ടെ തുമ്പ്‌’ കണ്ടെത്തു​ന്ന​തിൽ വിദഗ്‌ധ​നാ​യി​രുന്ന വൃദ്ധ​പ്ര​വാ​ച​ക​നായ ദാനീ​​യേ​ലിന്‌—യഹോ​വ​യാം​​​ദൈ​വ​ത്തി​ന്റെ പ്രവാ​ച​കന്‌—മാത്രമേ ഈ പ്രാവ​ച​നിക സന്ദേശ​ത്തി​ന്റെ പൊരുൾ വിശദീ​ക​രി​ക്കാൻ കഴിഞ്ഞു​ള്ളൂ. (ദാനീ​യേൽ 5:12, ഗുണ്ടർട്ട്‌ ബൈബിൾ) ബാബി​​ലോൺ സാമ്രാ​ജ്യ​ത്തി​ന്റെ പതനം മുൻകൂ​ട്ടി​പ്പറഞ്ഞ ആ പ്രവചനം ആ രാത്രി​യിൽത്തന്നെ നിവൃ​ത്തി​​യേറി!—ദാനീ​യേൽ 5:1, 4-8, 25-30.

എന്താണ്‌ പ്രവചനം?

ഭാവി വെളി​​പ്പെ​ടു​ത്തു​ന്നത്‌, അല്ലെങ്കിൽ സംഭവി​ക്കാ​നി​രി​ക്കു​ന്നത്‌ മുന്നമേ രേഖ​പ്പെ​ടു​ത്തു​ന്ന​താണ്‌ പ്രവചനം. ദൈവ​ത്തിൽനി​ന്നുള്ള സന്ദേശ​ങ്ങ​ളാണ്‌ യഥാർഥ പ്രവച​നങ്ങൾ; അവ വാമൊ​ഴി​യാ​യോ വരമൊ​ഴി​യാ​യോ ദൈവ​ത്തി​ന്റെ ഇഷ്ടവും ഉദ്ദേശ്യ​വും വെളി​​പ്പെ​ടു​ത്തു​ന്നു. ബൈബി​ളിൽ അനേകം പ്രവച​നങ്ങൾ കാണാം. മിശി​ഹാ​യു​ടെ വരവി​​നെ​ക്കു​റി​ച്ചും അവനെ എങ്ങനെ തിരി​ച്ച​റി​യാം എന്നതി​​നെ​ക്കു​റി​ച്ചും ‘യുഗസ​മാ​പ്‌തി​​യെ​ക്കു​റി​ച്ചും’ ദൈവ​ത്തിൽനി​ന്നുള്ള ന്യായ​വി​ധി സന്ദേശ​ങ്ങ​​ളെ​ക്കു​റി​ച്ചും എല്ലാം അതിൽ രേഖ​പ്പെ​ടു​ത്തി​യി​ട്ടുണ്ട്‌.—മത്തായി 24:3; ദാനീ​യേൽ 9:25.

ഇന്നത്തെ ‘വിദ്വാ​ന്മാർ’—ശാസ്‌ത്ര, സാമ്പത്തിക, ആരോഗ്യ, രാഷ്‌ട്രീയ, പാരി​സ്ഥി​തിക രംഗത്തും മറ്റുമുള്ള വിദഗ്‌ധർ—ഭാവി​യിൽ എന്തു സംഭവി​ക്കു​​മെന്ന്‌ പ്രവചി​ക്കാ​റുണ്ട്‌. അത്തരം പ്രവച​ന​ങ്ങ​ളിൽ മിക്കതും മാധ്യ​മങ്ങൾ കൊട്ടി​​ഘോ​ഷി​ക്കു​ക​യും ജനങ്ങൾ അതേപടി വിഴു​ങ്ങു​ക​യും ചെയ്യു​ന്നു​​ണ്ടെ​ങ്കി​ലും അവ ആളുക​ളു​ടെ അറിവിൽനിന്ന്‌ ഉരുത്തി​രിഞ്ഞ ആശയങ്ങ​ളും സ്വയം​കൃ​ത​മായ അഭി​പ്രാ​യ​ങ്ങ​ളും മാത്ര​മാണ്‌. എന്നുത​​ന്നെയല്ല, അങ്ങനെ​യുള്ള ഏതൊരു അഭി​പ്രാ​യ​ത്തി​നും എതിര​ഭി​​പ്രാ​യ​ങ്ങ​ളും എതിർവാ​ദ​ങ്ങ​ളും ഉണ്ട്‌. ചുരു​ക്കി​പ്പ​റ​ഞ്ഞാൽ, ഭാവി മുൻകൂ​ട്ടി​പ്പ​റ​യാ​നുള്ള മനുഷ്യ​​ശ്രമം ഒരു സാഹസി​​കോ​ദ്യ​മ​മാണ്‌.

യഥാർഥ പ്രവചനം—ആരിൽനിന്ന്‌?

അങ്ങനെ​​യെ​ങ്കിൽ, യഥാർഥ പ്രവചനം ആരിൽനി​ന്നു വരുന്നു? ആർക്ക്‌ അത്‌ വ്യാഖ്യാ​നി​ക്കാ​നാ​കും? അപ്പൊ​സ്‌ത​ല​നായ പത്രോസ്‌ പറഞ്ഞു: “തിരു​​വെ​ഴു​ത്തി​ലെ പ്രവച​ന​​മൊ​ന്നും ആരു​ടെ​യും സ്വന്തമായ വ്യാഖ്യാ​ന​ത്താൽ ഉളവാ​കു​ന്നതല്ല.” (2 പത്രോസ്‌ 1:20) ‘വ്യാഖ്യാ​നം’ എന്നതിന്റെ ഗ്രീക്ക്‌ പദത്തിന്‌ “പരിഹാ​രം,” “തുറക്കൽ” എന്നൊക്കെ അർഥമുണ്ട്‌. “കെട്ടി​​വെ​ച്ചി​രുന്ന ഒന്നിന്‌ അയവു​വ​രു​ത്തുക അല്ലെങ്കിൽ അതിനെ അഴിക്കുക” എന്ന ആശയമാണ്‌ അതിൽ ധ്വനി​ക്കു​ന്നത്‌. ഒരു ബൈബിൾഭാ​ഷാ​ന്തരം ഈ പദത്തെ “അയവു​വ​രു​ത്തുക” എന്ന്‌ പരിഭാ​ഷ​​പ്പെ​ടു​ത്തി​യി​ട്ടുണ്ട്‌.

പരിച​യ​സ​മ്പ​ന്ന​നാ​യ ഒരു കപ്പൽജോ​ലി​ക്കാ​രൻ അഴിഞ്ഞു​​പോ​കാ​ത്ത​വി​ധം കയറു​​കൊണ്ട്‌ ഒരു കെട്ടി​ടു​ന്നു എന്നു കരുതുക. ആ കെട്ട്‌ കാണുന്ന സാധാ​ര​ണ​ക്കാ​ര​നായ ഒരാൾക്ക്‌, ഇഴകൾ കെട്ടി​നു​ള്ളി​​ലേക്ക്‌ പോയി​രി​ക്കു​ന്നത്‌ കാണാ​നാ​കു​​മെ​ങ്കി​ലും അത്‌ എളുപ്പം അഴിക്കാൻ സാധി​ക്കു​മോ? സമാന​മാ​യി, ലോക​ത്തി​ന്റെ പോക്കു കാണു​​മ്പോൾ പ്രശ്‌ന​ങ്ങ​ളു​ടെ ഊരാ​ക്കു​ടു​ക്കി​​ലേ​ക്കാണ്‌ ഇതു കുതി​ക്കു​ന്ന​​തെന്ന്‌ ആളുകൾ മനസ്സി​ലാ​ക്കി​​യേ​ക്കാം. എന്നാൽ കാര്യങ്ങൾ എങ്ങനെ ഉരുത്തി​രി​യും, എവി​ടെ​​ച്ചെന്ന്‌ അവസാ​നി​ക്കും എന്നതിന്റെ വിശദാം​ശങ്ങൾ അവർക്ക്‌ വ്യക്തമല്ല.

ചുറ്റു​പാ​ടും നടക്കുന്ന കാര്യ​ങ്ങ​​ളെ​ക്കു​റിച്ച്‌ സ്വയം അപഗ്ര​ഥനം നടത്തി പ്രശ്‌നങ്ങൾ നിറഞ്ഞ ഒരു ഭാവി പ്രവചി​ക്കു​കയല്ല ദാനീ​​യേ​ലും പുരാ​ത​ന​കാ​ലത്തെ ദൈവ​ത്തി​ന്റെ മറ്റു പ്രവാ​ച​ക​ന്മാ​രും ചെയ്‌തത്‌. ഭാവി സംഭവ​ങ്ങളെ തങ്ങൾ പ്രവചിച്ച രീതി​യിൽ, തങ്ങളുടെ ഇംഗി​ത​ത്തി​​നൊത്ത്‌ കൊണ്ടു​വ​രാൻ ശ്രമി​ച്ചി​രു​​ന്നെ​ങ്കിൽ ആ പ്രവച​നങ്ങൾ അവരുടെ ഭാവനാ​സൃ​ഷ്ടി ആകുമാ​യി​രു​ന്നു; തികച്ചും മാനു​ഷി​ക​മായ ഒന്ന്‌. ഭാവി മുൻകൂ​ട്ടി​ക്കാ​ണാ​നുള്ള കഴിവ്‌ മനുഷ്യർക്ക്‌ ഇല്ലാത്ത​തി​നാൽ അതിൽ വിശ്വ​സി​ക്കാ​നും സാധി​ക്കു​ക​യി​ല്ലാ​യി​രു​ന്നു. മറിച്ച്‌, പത്രോസ്‌ അപ്പൊ​സ്‌തലൻ പറഞ്ഞത്‌ ഇങ്ങനെ​യാണ്‌: “പ്രവചനം ഒരിക്ക​ലും മനുഷ്യ​ന്റെ ഇഷ്ടത്താൽ ഉണ്ടായതല്ല; പിന്നെ​യോ പരിശു​ദ്ധാ​ത്മാ​വി​നാൽ പ്രചോ​ദി​ത​രാ​യി ദൈവ​ത്തിൽനി​ന്നുള്ള അരുള​പ്പാ​ടു​കൾ മനുഷ്യർ പ്രസ്‌താ​വി​ച്ച​ത​ത്രേ.”—2 പത്രോസ്‌ 1:21.

‘വ്യാഖ്യാ​നം ദൈവ​ത്തി​നു​ള്ളത്‌’

ഈ സംഭവം നടക്കു​ന്നത്‌ 3,700 വർഷം മുമ്പ്‌ ഈജി​പ്‌തിൽവെ​ച്ചാണ്‌. രണ്ടുപു​രു​ഷ​ന്മാർ കാരാ​ഗൃ​ഹ​ത്തിൽ അടയ്‌ക്ക​​പ്പെ​ടു​ന്നു. ഇരുവ​രും അമ്പരപ്പി​ക്കുന്ന ഓരോ സ്വപ്‌നം കണ്ടു. തങ്ങളെ കുഴപ്പിച്ച ഈ സ്വപ്‌ന​ങ്ങ​​ളെ​ക്കു​റിച്ച്‌ രാജ്യത്തെ വിദ്വാ​ന്മാ​​രോട്‌ ചോദി​ക്കാൻ കഴിയാ​ഞ്ഞ​തി​നാൽ, തങ്ങളോ​​ടൊ​പ്പം തടവി​ലു​ണ്ടാ​യി​രുന്ന യോ​സേ​ഫി​​നോട്‌, “ഞങ്ങൾ സ്വപ്‌നം കണ്ടു; വ്യാഖ്യാ​നി​ച്ചു​ത​രു​വാൻ ആരുമില്ല” എന്ന്‌ അവർ പറഞ്ഞു. “വ്യാഖ്യാ​നം ദൈവ​ത്തി​ന്നു​ള്ള​ത​ല്ല​യോ?” എന്നു പറഞ്ഞു​​കൊണ്ട്‌ ആ സ്വപ്‌നങ്ങൾ തന്നോടു പറയാൻ ആ ദൈവ​ദാ​സൻ ആവശ്യ​​പ്പെട്ടു. (ഉല്‌പത്തി 40:8) പ്രയാ​സ​മുള്ള ഒരു കുരു​ക്കി​ടാൻ കഴിയുന്ന ഒരു കപ്പൽജോ​ലി​ക്കാ​രന്‌ അത്‌ എളുപ്പം അഴിക്കാൻ കഴിയു​ന്ന​തു​​പോ​ലെ, യഹോ​വ​യാം​​​ദൈ​വ​ത്തി​നു മാത്രമേ പ്രവച​ന​ങ്ങ​ളു​ടെ അർഥം വിശദീ​ക​രി​ക്കാൻ കഴിയൂ. കാരണം പ്രവച​നങ്ങൾ അവനിൽനി​ന്നു വരുന്നു, അവനാണ്‌ അതിനെ ബന്ധിച്ചി​രി​ക്കു​ന്നത്‌. അതു​കൊ​ണ്ടു​തന്നെ പ്രവച​ന​ങ്ങ​ളു​ടെ അർഥം മനസ്സി​ലാ​ക്കാൻ നാം യഹോ​വ​യി​​ലേക്കു നോക്കണം. യോ​സേഫ്‌ പറഞ്ഞത്‌ ശരിയാ​യി​രു​ന്നു, വ്യാഖ്യാ​നം ദൈവ​ത്തി​നു​ള്ള​താണ്‌!

പല വിധങ്ങ​ളിൽ, ‘വ്യാഖ്യാ​നം ദൈവ​ത്തി​നു​ള്ള​താണ്‌’ എന്നു പറയാം. ചില ബൈബിൾ പ്രവച​ന​ങ്ങ​​ളോ​​ടൊ​പ്പം അവയുടെ നിവൃ​ത്തി​യും രേഖ​പ്പെ​ടു​ത്തി​യി​രി​ക്കു​ന്നു എന്നതാണ്‌ ഒരു കാരണം—കുരു​ക്കിട്ട ആൾതന്നെ അത്‌ അഴി​ക്കേ​ണ്ട​വി​ധം പറഞ്ഞു​ത​രു​ന്ന​തു​​പോ​ലെ. അത്തരം പ്രവച​ന​ങ്ങ​ളു​ടെ കെട്ടഴി​ക്കാൻ എളുപ്പ​മാണ്‌.—ഉല്‌പത്തി 18:14; 21:2.

മറ്റു ചില സാഹച​ര്യ​ങ്ങ​ളിൽ, പ്രവച​ന​ങ്ങ​ളു​ടെ അർഥം മനസ്സി​ലാ​ക്കാൻ അവയ്‌ക്കു മുമ്പും പിമ്പും ഉള്ള ഭാഗങ്ങൾ പരി​ശോ​ധി​ക്കു​ന്നത്‌ നമ്മെ സഹായി​ക്കും. ‘കണ്ണുകൾക്കി​ട​യിൽ അസാധാ​ര​ണ​മായ ഒരു കൊമ്പുള്ള’ “ആൺകോ​ലാട്‌” ‘രണ്ടു കൊമ്പുള്ള ആണാടി​നെ’ നിലം​പ​രി​ചാ​ക്കി​യ​താ​യി പ്രവാ​ച​ക​നായ ദാനീ​യേൽ ദർശന​ത്തിൽ കണ്ടു. തുടർന്നുള്ള വാക്യ​ങ്ങ​ളിൽ പിൻവ​രുന്ന വിശദാം​ശങ്ങൾ നൽകി​യി​രി​ക്കു​ന്നു: “മേദ്യ​യി​​ലെ​യും പേർഷ്യ​യി​​ലെ​യും രാജാ​ക്ക​ന്മാ​രാണ്‌” രണ്ടു കൊമ്പുള്ള ആണാട്‌; ആൺകോ​ലാട്‌ ‘ഗ്രീക്കു​രാ​ജാ​വും.’ (ദാനീ​യേൽ 8:3-8, 20-22, ഓശാന ബൈബിൾ) 200-ലേറെ വർഷങ്ങൾക്കു ശേഷം, ‘വലിയ കൊമ്പായ’ മഹാനായ അലക്‌സാ​ണ്ടർ പേർഷ്യ​യു​ടെ ഭാഗങ്ങൾ ഓരോ​ന്നാ​യി കീഴട​ക്കാൻ തുടങ്ങി​യ​​പ്പോൾ ഈ പ്രവചനം നിവൃ​ത്തി​​യേറി. യെരു​ശ​​ലേ​മിന്‌ അടു​ത്തേക്ക്‌ പടനയി​​ച്ചെ​ത്തിയ അലക്‌സാ​ണ്ട​റി​നെ ഈ പ്രവചനം കാണി​ച്ച​താ​യും അത്‌ തന്നെക്കു​റി​ച്ചുള്ള പ്രവച​ന​മാ​​ണെന്ന്‌ അദ്ദേഹം വിശ്വ​സി​ച്ച​താ​യും യഹൂദ ചരി​ത്ര​കാ​ര​നായ ജോസീ​ഫസ്‌ അവകാ​ശ​​പ്പെ​ടു​ന്നു.

മറ്റൊരു അർഥത്തി​ലും ‘വ്യാഖ്യാ​നം ദൈവ​ത്തി​നു​ള്ള​താണ്‌.’ പരിശു​ദ്ധാ​ത്മാ​വി​ന്റെ സഹായ​ത്താ​ലാണ്‌ യഹോ​വ​യു​ടെ വിശ്വസ്‌ത ദാസനായ യോ​സേ​ഫിന്‌, സഹതട​വു​കാർ പറഞ്ഞ കുഴപ്പി​ക്കുന്ന സ്വപ്‌ന​ങ്ങ​ളു​ടെ അർഥം മനസ്സി​ലാ​യത്‌. (ഉല്‌പത്തി 41:38) ഇന്നും, ചില പ്രവച​ന​ങ്ങ​ളു​ടെ അർഥം വ്യക്തമാ​കാ​തെ വരു​മ്പോൾ ദൈവ​ദാ​സ​ന്മാർ ദൈവാ​ത്മാ​വി​ന്റെ സഹായ​ത്തി​നാ​യി പ്രാർഥി​ക്കു​ക​യും ദൈവാ​ത്മാ​വി​ന്റെ പ്രചോ​ദ​ന​ത്താൽ എഴുത​പ്പെട്ട ദൈവ​വ​ചനം ഉത്സാഹ​​ത്തോ​ടെ പഠിക്കു​ക​യും ചെയ്യുന്നു. അപ്പോൾ, പ്രവച​ന​ങ്ങ​ളു​ടെ അർഥത്തി​​ലേക്ക്‌ വെളി​ച്ചം​വീ​ശുന്ന ബൈബിൾഭാ​ഗങ്ങൾ കണ്ടെത്താൻ ദൈവ​ത്തി​ന്റെ സഹായ​ത്താൽ അവർക്കു സാധി​ക്കു​ന്നു. പ്രവച​ന​ങ്ങ​ളു​ടെ അർഥം മനസ്സി​ലാ​ക്കാൻ സഹായി​ക്കു​ന്നത്‌ ദൈവാ​ത്മാ​വും ദൈവ​വ​ച​ന​വും ആയതു​​കൊണ്ട്‌ പ്രവച​ന​വ്യാ​ഖ്യാ​നം ദൈവ​ത്തിൽനി​ന്നു​ള്ള​താണ്‌; മനുഷ്യർക്ക്‌ അതിനുള്ള അത്ഭുത​സി​ദ്ധി​യില്ല. ബൈബി​ളി​ന്റെ സഹായ​മി​ല്ലാ​തെ പ്രവച​ന​വ്യാ​ഖ്യാ​നം ഒരു മനുഷ്യ​നും സാധ്യമല്ല.—പ്രവൃ​ത്തി​കൾ 15:12-21.

‘വ്യാഖ്യാ​നം ദൈവ​ത്തി​നു​ള്ള​താണ്‌’ എന്നു പറയു​ന്ന​തിന്‌ മറ്റൊരു കാരണം​കൂ​ടി ഉണ്ട്‌. ഭൂമി​യി​ലുള്ള തന്റെ വിശ്വസ്‌ത ദാസന്മാർ പ്രവച​ന​ത്തി​ന്റെ അർഥം എപ്പോൾ മനസ്സി​ലാ​ക്കണം എന്ന്‌ തീരു​മാ​നി​ക്കു​ന്നത്‌ ദൈവ​മാണ്‌. പ്രവച​നങ്ങൾ നിവൃ​ത്തി​​യേ​റി​​ക്കൊ​ണ്ടി​രി​ക്കു​മ്പോ​ഴോ പ്രവച​ന​നി​വൃ​ത്തിക്ക്‌ മുമ്പോ ശേഷമോ ആയിരി​ക്കാം അതിന്റെ അർഥം ഗ്രഹി​ക്കാ​നാ​കു​ന്നത്‌. പ്രവച​ന​ങ്ങളെ ബന്ധിച്ചി​രി​ക്കു​ന്നത്‌ ദൈവ​മാ​യ​തു​​കൊണ്ട്‌ ഉചിത​മായ സമയത്ത്‌—തന്റെ സമയത്ത്‌—അവൻ അത്‌ വെളി​​പ്പെ​ടു​ത്തും.

തന്നോ​​ടൊ​പ്പം തടവി​ലാ​യി​രുന്ന രണ്ടുപേർ കണ്ട സ്വപ്‌നങ്ങൾ, അവ നിവൃ​ത്തി​​യേ​റു​ന്ന​തിന്‌ മൂന്നു​ദി​വസം മുമ്പു​തന്നെ യോ​സേഫ്‌ വിശദീ​ക​രി​ച്ചു​​കൊ​ടു​ത്തു. (ഉല്‌പത്തി 40:13, 19) പിന്നീട്‌, ഫറവോ​ന്റെ സ്വപ്‌നം വ്യാഖ്യാ​നി​ക്കാ​നും യോ​സേ​ഫി​നെ വിളി​ച്ചു​വ​രു​ത്തി. ദൈവാ​ത്മാ​വി​ന്റെ സഹായ​ത്താൽ യോ​സേഫ്‌ ആ സ്വപ്‌ന​ത്തി​ന്റെ അർഥം വിശദീ​ക​രി​ച്ചു​​കൊ​ടു​ത്തു. ഫറവോൻ സ്വപ്‌ന​ത്തിൽ കണ്ട സുഭി​ക്ഷ​മായ ഏഴുവർഷം ആരംഭി​ക്കു​ന്ന​തിന്‌ മുമ്പാ​യി​രു​ന്നു അത്‌. ഇതുമൂ​ലം, സുഭി​ക്ഷ​ത​യു​ടെ കാലത്തെ അധിക​വി​ളവ്‌ ശേഖരി​ച്ചു​​വെ​ക്കാൻ എല്ലാ ക്രമീ​ക​ര​ണ​ങ്ങ​ളും ചെയ്യാ​നാ​യി.—ഉല്‌പത്തി 41:29, 39, 40.

വേറെ ചില പ്രവച​നങ്ങൾ ദൈവ​ദാ​സ​ന്മാർക്ക്‌ മുഴു​വ​നാ​യി ഗ്രഹി​ക്കാ​നാ​യത്‌ അവ നിവൃ​ത്തി​​യേ​റി​യ​തി​നു ശേഷമാണ്‌. ഉദാഹ​ര​ണ​ത്തിന്‌, യേശു​വി​ന്റെ ജീവി​ത​ത്തി​ലു​ണ്ടായ പല സംഭവ​ങ്ങ​ളും അവന്റെ ജനനത്തി​നു നൂറ്റാ​ണ്ടു​കൾക്കു മുമ്പു​തന്നെ പ്രവചി​ക്ക​​പ്പെ​ട്ടി​രു​ന്നു. യേശു​വി​ന്റെ പുനരു​ത്ഥാ​ന​ത്തി​നു ശേഷം മാത്ര​മാണ്‌ ഇവയിൽ പലതും ശിഷ്യ​ന്മാർക്ക്‌ ശരിക്കും മനസ്സി​ലാ​യത്‌. (സങ്കീർത്തനം 22:18; 34:20; യോഹ​ന്നാൻ 19:24, 36) ഇനി ചില പ്രവച​നങ്ങൾ ‘ജ്ഞാനം വർധി​ക്കുന്ന’ “അന്ത്യകാ​ലം​വരെ” ‘മുദ്ര​യി​​ടേ​ണ്ട​തുണ്ട്‌’ എന്ന്‌ ദാനീ​യേൽ 12:4 പറയുന്നു. അങ്ങനെ​യുള്ള പ്രവച​നങ്ങൾ നിവൃ​ത്തി​​യേ​റി​​ക്കൊ​ണ്ടി​രി​ക്കുന്ന കാലത്താണ്‌ നാം ജീവി​ക്കു​ന്നത്‌.b

ബൈബിൾപ്ര​വ​ച​ന​ങ്ങ​ളും നിങ്ങളും

യോ​സേ​ഫും ദാനീ​​യേ​ലും അക്കാലത്തെ രാജാ​ക്ക​ന്മാ​​രോട്‌ രാഷ്‌ട്ര​ങ്ങ​​ളെ​യും രാജത്വ​ങ്ങ​​ളെ​യും ബാധി​ക്കുന്ന പ്രാവ​ച​നി​ക​സ​​ന്ദേ​ശങ്ങൾ അറിയി​ച്ചു. ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​ക​ളാ​കട്ടെ ജനതക​ളു​ടെ ഇടയിൽ പ്രവച​ന​ത്തി​ന്റെ ദൈവ​മായ യഹോ​വ​യു​ടെ വക്താക്ക​ളാ​യി നില​കൊ​ണ്ടു; അവരുടെ സന്ദേശ​ത്തിന്‌ ചെവി​​കൊ​ടു​ത്ത​വർക്ക്‌ വളരെ പ്രയോ​ജനം ലഭിച്ചു.

ഇന്ന്‌, ഗോള​​മെ​മ്പാ​ടു​മുള്ള യഹോ​വ​യു​ടെ സാക്ഷി​ക​ളും ഒരു പ്രാവ​ച​നി​ക​സ​​ന്ദേശം ഘോഷി​ച്ചു​​കൊ​ണ്ടാ​ണി​രി​ക്കു​ന്നത്‌; ദൈവ​രാ​ജ്യ​​ത്തെ​ക്കു​റി​ച്ചുള്ള സുവാർത്ത​യാണ്‌ അത്‌. “യുഗസ​മാ​പ്‌തി”യെക്കു​റി​ച്ചുള്ള യേശു​വി​ന്റെ പ്രവചനം നിറ​വേ​റി​​ക്കൊ​ണ്ടി​രി​ക്കു​ന്നു എന്നും അവർ ആളുക​ളു​ടെ ശ്രദ്ധയിൽപ്പെ​ടു​ത്തു​ന്നു. (മത്തായി 24:3, 14) ആ പ്രവചനം എന്താ​ണെന്ന്‌ നിങ്ങൾക്ക്‌ അറിയാ​മോ? നിങ്ങളെ അത്‌ ബാധി​ക്കു​ന്നത്‌ എങ്ങനെ​യാണ്‌? ബൈബി​ളി​ലെ മഹത്തായ പ്രവച​ന​ങ്ങ​ളു​ടെ ഗണത്തിൽപ്പെട്ട ആ പ്രവച​ന​​ത്തെ​ക്കു​റിച്ച്‌ മനസ്സി​ലാ​ക്കാ​നും അതിൽനിന്ന്‌ പ്രയോ​ജനം നേടാ​നും നിങ്ങളെ സഹായി​ക്കാൻ യഹോ​വ​യു​ടെ സാക്ഷി​കൾക്ക്‌ സന്തോ​ഷ​​മേ​യു​ള്ളൂ. (w11-E 12/01)

[അടിക്കു​റി​പ്പു​കൾ]

[12, 13 പേജു​ക​ളി​ലെ ചിത്രങ്ങൾ]

യോ​സേ​ഫും ദാനീ​​യേ​ലും പ്രവച​ന​വ്യാ​ഖ്യാ​ന​ത്തി​നുള്ള ബഹുമതി ദൈവ​ത്തി​നു നൽകി