ദൈവത്തിന്റെ രാജ്യത്തെക്കുറിച്ച്‌ ഉള്ള സത്യം
തന്റെ അനുഗാമികളോട്‌ ഇങ്ങനെ പ്രാർഥിക്കാൻ യേശു പറഞ്ഞു: “സ്വർഗസ്ഥനായ ഞങ്ങളുടെ പിതാവേ, അങ്ങയുടെ പേര്‌ പരിശുദ്ധമായിരിക്കേണമേ. അങ്ങയുടെ രാജ്യം വരേണമേ. അങ്ങയുടെ ഇഷ്ടം സ്വർഗത്തിലെപ്പോലെ ഭൂമിയിലും നടക്കേണമേ.” (മത്തായി 6:9, 10) ദൈവത്തിന്റെ രാജ്യം എന്താണ്‌? അത്‌ എന്തു ചെയ്യുന്നു? നമ്മൾ അതിനുവേണ്ടി പ്രാർഥിക്കേണ്ടത്‌ എന്തുകൊണ്ട്‌?
ദൈവരാജ്യത്തിന്റെ രാജാവ്‌ യേശുവാണ്‌.
ലൂക്കോസ്‌ 1:31-33: “നീ അവന്‌ യേശു എന്നു പേരിടണം. അവൻ മഹാനാകും. അത്യുന്നതന്റെ മകൻ എന്നു വിളിക്കപ്പെടും. ദൈവമായ യഹോവ അവന്‌, പിതാവായ ദാവീദിന്റെ സിംഹാസനം കൊടുക്കും. അവൻ യാക്കോബുഗൃഹത്തിന്മേൽ എന്നും രാജാവായി ഭരിക്കും. അവന്റെ ഭരണത്തിന്‌ അവസാനമുണ്ടാകില്ല.”
ദൈവരാജ്യമായിരുന്നു യേശുവിന്റെ പ്രസംഗത്തിന്റെ മുഖ്യവിഷയം.
മത്തായി 9:35: “യേശുവാകട്ടെ എല്ലാ നഗരങ്ങളിലും ഗ്രാമങ്ങളിലും ചുറ്റിസഞ്ചരിച്ച്‌ അവരുടെ സിനഗോഗുകളിൽ പഠിപ്പിക്കുകയും ദൈവരാജ്യത്തെക്കുറിച്ചുള്ള സന്തോഷവാർത്ത പ്രസംഗിക്കുകയും എല്ലാ തരം രോഗങ്ങളും വൈകല്യങ്ങളും സുഖപ്പെടുത്തുകയും ചെയ്‌തു.”
ദൈവരാജ്യം എപ്പോഴായിരിക്കും വരുന്നതെന്ന്‌ മനസ്സിലാക്കാനുള്ള ഒരു അടയാളത്തെക്കുറിച്ച്‌ യേശു തന്റെ ശിഷ്യന്മാർക്കു പറഞ്ഞുകൊടുത്തു.
മത്തായി 24:7: “ജനത ജനതയ്‌ക്ക്‌ എതിരെയും രാജ്യം രാജ്യത്തിന്‌ എതിരെയും എഴുന്നേൽക്കും. ഒന്നിനു പുറകേ ഒന്നായി പല സ്ഥലങ്ങളിൽ ഭക്ഷ്യക്ഷാമങ്ങളും ഭൂകമ്പങ്ങളും ഉണ്ടാകും.”
യേശുവിന്റെ അനുഗാമികൾ ഇന്ന്‌ ദൈവരാജ്യത്തെക്കുറിച്ചുള്ള സുവിശേഷം ലോകമെങ്ങുമായി പ്രസംഗിക്കുന്നു.
മത്തായി 24:14: “ദൈവരാജ്യത്തിന്റെ ഈ സന്തോഷവാർത്ത എല്ലാ ജനതകളും അറിയാനായി ഭൂലോകത്തെങ്ങും പ്രസംഗിക്കപ്പെടും. അപ്പോൾ അവസാനം വരും.”