പ്രദർശനോപാധി ഉപയോഗിച്ച്‌ എങ്ങനെ സാക്ഷീകരിക്കാം?

ആത്മാർഥഹൃദയരെ സത്യത്തിലേക്ക്‌ ആകർഷിക്കുന്നതിൽ സാഹിത്യ മേശയും കൈവണ്ടിയും ഉപയോഗിച്ചുള്ള സാക്ഷീകരണം വളരെ ഫലവത്തായി കണ്ടിരിക്കുന്നു. (യോഹ. 6:44) അതിനാൽ സഭയുടെ പ്രദേശത്ത്‌ കാൽനടയാത്രക്കാർ കൂടുതൽ ഉള്ള ഇടങ്ങളിൽ ഇത്തരത്തിലുള്ള സാക്ഷീകരണം ക്രമീകരിക്കാൻ മൂപ്പന്മാരെ പ്രോത്സാഹിപ്പിച്ചിരിക്കുന്നു. സാഹിത്യ പ്രദർശനോപാധികൾ സാക്ഷീകരണത്തിനുശേഷം എടുത്തുമാറ്റാവുന്നതിനാൽ സാധാരണഗതിയിൽ അധികാരികളിൽനിന്ന്‌ അനുവാദം വാങ്ങേണ്ടതില്ല. ആർക്കൊക്കെ ഇതിൽ പങ്കെടുക്കാം? നല്ല ന്യായബോധവും മാന്യമായ പെരുമാറ്റരീതിയും സംഭാഷണചാതുര്യവും ഉള്ള പ്രചാരകർ. ഇതിൽ ഏർപ്പെടുമ്പോൾ ചെയ്യേണ്ടതും ചെയ്യരുതാത്തതും ആയ ചില കാര്യങ്ങൾ താഴെ പറയുന്നു. അത്‌ അനുസരിച്ചാൽ ഈ രംഗത്ത്‌ വിജയിക്കാനാകും.

ചെയ്യേണ്ടത്‌:

പ്രദർശനോപാധിയുടെ അടുത്തുകൂടി പോകുന്നവരെ സൗഹാർദപരമായും സഹായമനസ്ഥിതിയോടെയും സ്വാഗതം ചെയ്യുക. ചില പ്രചാരകർ ഊഷ്‌മളതയോടെ ആത്മാർഥമായി പുഞ്ചിരിച്ച്‌ അഭിവാദ്യം ചെയ്യുന്നു. പ്രദർശനോപാധിയുടെ അടുത്തേക്കു വരുന്നവരോട്‌ ഇങ്ങനെ പറയാവുന്നതാണ്‌: “നിങ്ങൾക്ക്‌ ഇഷ്ടമുള്ള ഏതെങ്കിലും പ്രസിദ്ധീകരണം ഇതിൽനിന്ന്‌ എടുക്കാം.”
പ്രദർശനോപാധിയിൽനിന്ന്‌ ഉചിതമായ അകലം പാലിക്കുക. ചില സ്ഥലങ്ങളിൽ പ്രദർശനോപാധിയുടെ അരികിൽത്തന്നെ നിൽക്കുന്നത്‌ ഗുണകരമെന്നു പ്രചാരകർ കണ്ടിരിക്കുന്നു. എന്നാൽ ഈ രീതിയിൽ പ്രദർശനോപാധിയുടെ തൊട്ടടുത്ത്‌ നിൽക്കുമ്പോൾ കടന്നുപോകുന്നവർ അടുത്തുവരാൻ മടിക്കുന്നതായി ചിലർ നിരീക്ഷിച്ചിട്ടുണ്ട്‌. അതുകൊണ്ട്‌ കുറച്ചുകൂടെ അകലത്തിൽ നിന്നിട്ട്‌ ആരെങ്കിലും പ്രദർശനോപാധിയുടെ അടുത്ത്‌ എത്തുന്നതുവരെ അവർ കാത്തിരിക്കുന്നു. പ്രദർശനോപാധിയുടെ അടുത്തേക്ക്‌ ഒരു വ്യക്തി വരുമ്പോൾ ഒരുപക്ഷേ നിങ്ങൾക്ക്‌ ഇങ്ങനെ ചോദിക്കാം: “ഈ ചോദ്യത്തെക്കുറിച്ച്‌ താങ്കൾ എന്നെങ്കിലും ചിന്തിച്ചിട്ടുണ്ടോ?”
സാധിക്കുമ്പോഴെല്ലാം ബൈബിൾ ഉപയോഗിക്കുക.
ബൈബിൾ പഠിപ്പിക്കുന്നു പുസ്‌തകം പോലെ നമ്മുടെ ഏതെങ്കിലും അധ്യയനപ്രസിദ്ധീകരണം എടുക്കുന്ന ഏവരോടും ബൈബിൾപഠന ക്രമീകരണത്തെക്കുറിച്ച്‌ പറയാം. ബൈബിൾ പഠിക്കേണ്ടത്‌ എന്തുകൊണ്ട്‌? എന്ന വീഡിയോയും കാണിക്കാനാകും.
താത്‌പര്യം കാണിക്കുന്ന വ്യക്തിയുമായി ബന്ധപ്പെടാനുള്ള വിവരങ്ങൾ സാധിക്കുമ്പോഴെല്ലാം ചോദിച്ചറിയുക. നിങ്ങളുടെ സഭാപ്രദേശത്തല്ല വ്യക്തി താമസിക്കുന്നതെങ്കിൽ ദയവായി ബന്ധപ്പെടുക (S-43) എന്ന ഫാറം പൂരിപ്പിച്ച്‌ എത്രയും വേഗം സഭാസെക്രട്ടറിയെ ഏൽപ്പിക്കുക.
പ്രശ്‌നക്കാരെക്കുറിച്ച്‌ ജാഗ്രതയുള്ളവരും ശ്രദ്ധയുള്ളവരും ആയിരിക്കുക. ആരെങ്കിലും നമ്മുടെ പ്രവർത്തനത്തെ ശക്തമായി എതിർക്കുന്നെങ്കിൽ പ്രദേശം വിട്ടുപോരുന്നതായിരിക്കും ഉചിതം.

ചെയ്യരുതാത്തത്‌:

പരുക്കൻ മനോഭാവമുള്ളവരോ നിർബന്ധിക്കുന്നവരോ ആയിരിക്കരുത്‌. പ്രദർശനോപാധിക്ക്‌ അരികിൽ വെറുതെ നോക്കിനിൽക്കുന്നവരും ആകാൻ പാടില്ല.
സാഹിത്യം വിതരണം ചെയ്യാനുള്ള ഒരു മാർഗമായി മാത്രം ഈ സാക്ഷീകരണത്തെ കാണരുത്‌. ശുശ്രൂഷയിലായിരിക്കുമ്പോൾ നമ്മുടെ ലക്ഷ്യം ബൈബിളധ്യയനങ്ങൾ ആരംഭിക്കുക എന്നതാണ്‌. അതുകൊണ്ട്‌ വ്യക്തികളുമായി സംഭാഷണത്തിൽ ഏർപ്പെടുക.
പ്രദർശനോപാധി മറയ്‌ക്കുംവിധം നിൽക്കുകയോ കൂടെയുള്ള പ്രചാരകനുമായി സംഭാഷണത്തിൽ മുഴുകിപ്പോകുകയോ അരുത്‌. വ്യക്തിപരമായ കാര്യത്തിനുവേണ്ടി മൊബൈൽ ഉപയോഗിക്കേണ്ടിവന്നാൽ പ്രദർശനോപാധിയുടെ അരികിൽനിന്ന്‌ മാറിനിന്ന്‌ സംസാരിക്കുക.
എതിർക്കുന്നവരുമായി തർക്കിക്കരുത്‌. അവർ മോശമായി പെരുമാറുന്നെങ്കിൽ മറ്റൊരു സ്ഥലത്തേക്ക്‌ മാറേണ്ടതായി വന്നേക്കാം.