ക്രിസ്‌ത്യാനികളായി ജീവിക്കാം

മധ്യവാരയോഗത്തിന്റെ പുതിയ സവിശേഷത

മധ്യവാരയോഗത്തിൽ 2018 ജനുവരി മുതൽ പുതിയ ലോക ഭാഷാന്തരത്തിന്റെ പഠനപ്പതിപ്പിലെ പഠനക്കുറിപ്പുകളും വീഡിയോകളും ചിത്രങ്ങളും ലഭ്യമായിരിക്കും, നിങ്ങളുടെ ഭാഷയിൽ ഇതു പ്രസിദ്ധീകരിച്ചിട്ടില്ലെങ്കിലും. മീറ്റിങ്ങുകൾക്കു തയ്യാറാകുമ്പോൾ ഈ വിവരങ്ങൾ നിങ്ങൾക്കു കൂടുതൽ പ്രയോജനം ചെയ്യുമെന്ന്‌ ഉറപ്പാണ്‌. അതിലും പ്രധാനമായി സ്‌നേഹവാനായ നമ്മുടെ സ്വർഗീയപിതാവിനോടു കൂടുതൽ അടുക്കാനും ഈ വിവരങ്ങൾ നിങ്ങളെ സഹായിക്കട്ടെ!

പഠനക്കുറിപ്പുകൾ

പഠനക്കുറിപ്പുകൾ പല ബൈബിൾ വാക്യങ്ങളെക്കുറിച്ച്‌ സാംസ്‌കാരികവും ഭൂമിശാസ്‌ത്രപരവും ഭാഷാപരവുമായ ഉൾക്കാഴ്‌ച തരുന്നു.

മത്തായി 12:20

പുകയുന്ന തിരി: സാധാരണയായി വീടുകളിൽ വിളക്കായി ഉപയോഗിച്ചിരുന്നത്‌ ഒലിവെണ്ണ നിറച്ച ചെറിയ മൺപാത്രങ്ങളായിരുന്നു. ചണനാരുകൊണ്ടുള്ള തിരി, തീനാളം കത്തിനിൽക്കാൻവേണ്ട എണ്ണ വലിച്ചെടുക്കും. “പുകയുന്ന തിരി” എന്നു പരിഭാഷപ്പെടുത്തിയിരിക്കുന്ന ഗ്രീക്കുപ്രയോഗം, കെടാറായ അല്ലെങ്കിൽ അണഞ്ഞുപോയ ഒരു തിരി പുകഞ്ഞുകത്തുന്നതിനെയായിരിക്കാം കുറിക്കുന്നത്‌. യശയ്യ 42:3-ലെ പ്രവചനം യേശുവിന്റെ അനുകമ്പയെക്കുറിച്ച്‌ മുൻകൂട്ടിപ്പറയുകയായിരുന്നു. എളിയവരും അടിച്ചമർത്തപ്പെട്ടവരും ആയ ആളുകളുടെ പ്രതീക്ഷയുടെ അവസാനത്തെ തിരിനാളം യേശു ഒരിക്കലും കെടുത്തിക്കളയില്ലായിരുന്നു.

മത്തായി 26:13

സത്യമായി: ഗ്രീക്കിൽ ആമെൻ. “അങ്ങനെയാകട്ടെ” എന്നോ “തീർച്ചയായും” എന്നോ അർഥമുള്ള ആമെൻ എന്ന എബ്രായപദത്തിന്റെ ലിപ്യന്തരണം. ഒരു പ്രസ്‌താവനയോ വാഗ്‌ദാനമോ പ്രവചനമോ ഉച്ചരിക്കുന്നതിനു മുമ്പ്‌ യേശു പലപ്പോഴും ഈ പദം ഉപയോഗിച്ചിട്ടുണ്ട്‌. പറയുന്ന കാര്യങ്ങൾ തികച്ചും സത്യവും ആശ്രയയോഗ്യവും ആണെന്നു കാണിക്കാനായിരുന്നു ഇത്‌. വിശുദ്ധലിഖിതങ്ങളിൽ “സത്യമായും” (ആമെൻ) എന്ന പദം ഈ രീതിയിൽ ഉപയോഗിച്ചത്‌ യേശു മാത്രമാണെന്നു പറയപ്പെടുന്നു. യോഹന്നാന്റെ സുവിശേഷത്തിൽ ഉടനീളം മൂലഭാഷയിൽ ഈ പദം അടുത്തടുത്ത്‌ ആവർത്തിച്ച്‌ (ആമെൻ ആമെൻ) ഉപയോഗിച്ചിരിക്കുന്നു. അതിനെ മിക്കയിടങ്ങളിലും “സത്യംസത്യമായി” എന്നാണു പരിഭാഷപ്പെടുത്തിയിരിക്കുന്നത്‌.—യോഹ 1:51.

വീഡിയോകളും ചിത്രങ്ങളും

ഫോട്ടോകളും ചിത്രങ്ങളും നിശ്ശബ്ദവീഡിയോകളും അനിമേഷനുകളും ബൈബിളിൽ രേഖപ്പെടുത്തിയിരിക്കുന്ന വിവരണങ്ങൾക്കു ജീവൻ പകരുന്നു.

ബേത്ത്‌ഫാഗ, ഒലിവുമല, യരുശലേം

ഈ ഹ്രസ്വവീഡിയോ യരുശലേമിനു കിഴക്കുള്ള ആധുനികകാല എറ്റ്‌-റ്റർ ഗ്രാമത്തിൽനിന്നും യരുശലേമിലേക്കു പ്രവേശിക്കുന്ന ഒരു വഴി കാണിച്ചുതരുന്നു. ബൈബിളിൽ പറഞ്ഞിരിക്കുന്ന ബേത്ത്‌ഫാഗയാണ്‌ ഒലിവുമലയുടെ ഉയരംകൂടിയ ഭാഗത്തുള്ള ഈ ഗ്രാമം എന്നു കരുതപ്പെടുന്നു. ഒലിവുമലയുടെ കിഴക്കേ ചെരുവിലായി ബേത്ത്‌ഫാഗയുടെ കിഴക്കു വശത്താണ്‌ ബഥാന്യ സ്ഥിതി ചെയ്യുന്നത്‌. യരുശലേമിലായിരുന്നപ്പോഴൊക്കെ യേശുവും ശിഷ്യന്മാരും ബഥാന്യയിലാണ്‌ രാത്രി കഴിച്ചുകൂട്ടിയിരുന്നത്‌. ഇന്ന്‌ എൽ-അസറിയാഹ്‌ (എൽ ഐസറിയ) എന്നാണ്‌ ആ പട്ടണം അറിയപ്പെടുന്നത്‌. അറബിയിലുള്ള ഈ പേരിന്റെ അർഥം ‘ലാസറിന്റെ സ്ഥലം’ എന്നാണ്‌. യേശു മാർത്തയുടെയും മറിയയുടെയും ലാസറിന്റെയും വീട്ടിൽ താമസിച്ചിട്ടുണ്ടെന്ന്‌ സംശയമില്ല. (മത്ത 21:17; മർ 11:11; ലൂക്ക 21:37; യോഹ 11:1) അവരുടെ വീട്ടിൽനിന്ന്‌ യരുശലേമിലേക്ക്‌ യാത്ര ചെയ്‌തിരുന്നപ്പോൾ, വീഡിയോയിൽ കാണുന്ന റോഡിനു സമാനമായ ഒരു പാതയിലൂടെയായിരിക്കാം യേശു പോയത്‌. എ.ഡി. 33 നീസാൻ 9-ന്‌ യേശു ഒരു കഴുതക്കുട്ടിയുടെ പുറത്ത്‌ കയറി ഒലിവുമലയിൽനിന്ന്‌ യരുശലേമിലേക്കു പോയതും ബേത്ത്‌ഫാഗയിൽനിന്നും യരുശലേമിലേക്കുള്ള ഈ വഴിയെതന്നെയായിരിക്കാം.

ബഥാന്യയിൽനിന്ന്‌ ബേത്ത്‌ഫാഗയിലേക്കുള്ള വഴി
ബേത്ത്‌ഫാഗ
ഒലിവുമല
കിദ്രോൻ താഴ്‌വര
ദേവാലയം

ഉപ്പൂറ്റിയിലെ അസ്ഥിയിൽ അടിച്ചുകയറ്റിയ ആണി

മനുഷ്യന്റെ ഉപ്പൂറ്റിയിലെ അസ്ഥിയിൽ 11.5 സെന്റിമീറ്റർ നീളമുള്ള ഇരുമ്പാണി അടിച്ചുകയറ്റിയ ഒരു കരകൗശലപ്പണിയുടെ ഫോട്ടോയാണ്‌ ഇത്‌. 1968-ൽ വടക്കേ യരുശലേമിൽ പുരാവസ്‌തുശാസ്‌ത്രജ്ഞർ കുഴിച്ചപ്പോൾ ഇതിന്റെ ആദ്യം ഉണ്ടാക്കിയ രൂപം കണ്ടെത്തി. ഇതു റോമൻ ഭരണകാലത്തേതാണ്‌. തടികൊണ്ടുള്ള സ്‌തംഭത്തിൽ ഒരു വ്യക്തിയെ തറച്ചുകൊല്ലുന്നതിന്‌ ആണികൾ ഉപയോഗിച്ചിരിക്കാം എന്നതിന്റെ ഒരു പുരാവസ്‌തുശാസ്‌ത്ര തെളിവാണ്‌ ഇത്‌. ഇതുപോലുള്ള ആണികളായിരിക്കാം റോമൻ പടയാളികൾ യേശുക്രിസ്‌തുവിനെ സ്‌തംഭത്തിൽ തറയ്‌ക്കാൻ ഉപയോഗിച്ചത്‌. മരിച്ച ആളുകളുടെ അസ്ഥികൾ ഇട്ടുവെക്കുന്ന കല്ലുകൊണ്ടുള്ള ഒരു പെട്ടിയിൽനിന്നാണു ഗവേഷകർക്ക്‌ ഇതു കിട്ടിയത്‌. സ്‌തംഭത്തിൽ വധിക്കുന്ന ആളുകളെ അടക്കം ചെയ്യാറുണ്ടായിരുന്നു എന്നായിരിക്കും ഇത്‌ സൂചിപ്പിക്കുന്നത്‌.—മത്ത 27:35.