യഹോവയുടെ സാക്ഷികൾ ദുരിതാശ്വാസ പ്രവർത്തനങ്ങളിൽ ഏർപ്പെടാറുണ്ടോ?
ഉണ്ട്‌. ദുരിതങ്ങൾ ആഞ്ഞടിക്കുമ്പോൾ യഹോവയുടെ സാക്ഷികൾ സഹായത്തിന്‌ എത്താറുണ്ട്‌. “സമയം അനുകൂലമായിരിക്കുന്നിടത്തോളം നമുക്ക്‌ സകലർക്കും നന്മ ചെയ്യാം; വിശേഷാൽ സഹവിശ്വാസികളായവർക്ക്‌” എന്ന ഗലാത്യർ 6:10-നോടുള്ള ചേർച്ചയിൽ സാക്ഷികൾക്കും അല്ലാത്തവർക്കും ഞങ്ങൾ വേണ്ട സഹായം ചെയ്‌തുകൊടുക്കുന്നു. മാത്രമല്ല, അത്തരം സാഹചര്യങ്ങളിൽ ദുരന്തത്തിന്‌ ഇരയായ ആളുകൾക്ക്‌ വൈകാരികവും ആത്മീയവും ആയ പിന്തുണ നൽകാനും ഞങ്ങൾ ശ്രമിക്കാറുണ്ട്‌.—2 കൊരിന്ത്യർ 1:3, 4.
സംഘടന
ഒരു ദുരന്തം ഉണ്ടായാൽ, ആ പ്രദേശത്തുള്ള സഭയിലെ മൂപ്പന്മാർ സഭാംഗങ്ങളുമായി ബന്ധപ്പെട്ട്‌, അവർ സുരക്ഷിതരാണോ, എന്തെങ്കിലും സഹായം ആവശ്യമുണ്ടോ എന്ന്‌ അന്വേഷിക്കുന്നു. പിന്നീട്‌, അവർ ചെയ്‌ത അടിയന്തിരസഹായങ്ങളെക്കുറിച്ചും വിലയിരുത്തിയ കാര്യങ്ങളെക്കുറിച്ചും യഹോവയുടെ സാക്ഷികളുടെ പ്രാദേശിക ബ്രാഞ്ചോഫീസിനെ അറിയിക്കുന്നു.
ആവശ്യമായ സഹായം പ്രാദേശിക സഭകളുടെ പ്രാപ്‌തിക്ക്‌ അതീതമാണെങ്കിൽ യഹോവയുടെ സാക്ഷികളുടെ ഭരണസംഘം അതിനുവേണ്ട ക്രമീകരണങ്ങൾ ചെയ്യുന്നു. ഇത്‌, ക്ഷാമം ബാധിച്ചപ്പോൾ ഒന്നാം നൂറ്റാണ്ടിലെ ക്രിസ്‌ത്യാനികൾ പരസ്‌പരം കരുതിയ വിധത്തോട്‌ സമാനമാണ്‌. (1 കൊരിന്ത്യർ 16:1-4) ഉടനെ, പ്രാദേശിക ബ്രാഞ്ചോഫീസ്‌ ദുരിതാശ്വാസ കമ്മിറ്റികൾ രൂപീകരിക്കുകയും അവരുടെ നിയന്ത്രണത്തിൽ വേണ്ട സഹായം ചെയ്‌തുകൊടുക്കുകയും ചെയ്യുന്നു. മറ്റു പ്രദേശങ്ങളിൽ നിന്നുള്ള സാക്ഷികളും ദുരിതം ബാധിച്ച സഹോദരങ്ങളെ സഹായിക്കാൻ തങ്ങളുടെ സമയവും ഊർജവും നിസ്വാർഥമായി ചെലവഴിക്കുന്നു.—സദൃശവാക്യങ്ങൾ 17:17.
ധനസഹായം
ദുരന്തബാധിത പ്രദേശത്തെ ആളുകളെ സഹായിക്കുന്നതിനുവേണ്ടിയും യഹോവയുടെ സാക്ഷികളുടെ ബ്രാഞ്ചോഫീസിലേക്കു ലഭിക്കുന്ന സംഭാവനകൾ ഉപയോഗിക്കാറുണ്ട്‌. (പ്രവൃത്തികൾ 11:27-30; 2 കൊരിന്ത്യർ 8:13-15) അവരെ സഹായിക്കാൻ എത്തുന്നവർ ശമ്പളം കൈപ്പറ്റാതെ സേവിക്കുന്നവരായതിനാൽ ഓഫീസിനും മറ്റ്‌ നടത്തിപ്പിനും വേണ്ടി പണം ചിലവാക്കേണ്ടിവരുന്നില്ല. അതുകൊണ്ട്‌, നീക്കിവെച്ചിരിക്കുന്ന തുകയും സഹായവും ദുരന്തബാധിതർക്കുതന്നെ ലഭിക്കാൻ ഇടയാകുന്നു. അങ്ങനെ, ലഭിക്കുന്ന സംഭാവനകൾ കരുതലോടെ ഉപയോഗിക്കുന്നു എന്ന്‌ ഞങ്ങൾ ഉറപ്പുവരുത്തുന്നു.—2 കൊരിന്ത്യർ 8:20.