യുവജനങ്ങൾ ചോദിക്കുന്നു
തെറ്റുകളെ എങ്ങനെ കൈകാര്യം ചെയ്യാം?
നിങ്ങൾ എന്തു ചെയ്യുമായിരുന്നു?
കരീനയുടെ കാര്യത്തിൽ സംഭവിച്ചതിനെക്കുറിച്ച്‌ വായിക്കുക. നിങ്ങളുടെ ജീവിതത്തിലും അതുപോലെ സംഭവിക്കുന്നതായി ഭാവനയിൽ കാണുക. അവളുടെ സ്ഥാനത്തു നിങ്ങളായിരുന്നെങ്കിൽ എന്തു ചെയ്യുമായിരുന്നു?
കരീന: ഞാൻ സ്‌കൂളിലേക്ക്‌ അമിതവേഗത്തിൽ വണ്ടി ഓടിച്ചുപോകുകയായിരുന്നു. പോലീസ്‌ എന്നെ പിടിച്ചു, പിഴയും അടപ്പിച്ചു. അത്‌ എനിക്ക്‌ വളരെ വിഷമമായി. ഇക്കാര്യം ഞാൻ മമ്മിയോടു പറഞ്ഞു. സംഭവത്തെക്കുറിച്ച്‌ ഡാഡിയോടു പറയാൻ മമ്മി ആവശ്യപ്പെട്ടു. അത്‌ എനിക്ക്‌ ഇഷ്ടമല്ലായിരുന്നു.
നിങ്ങൾ എന്തു ചെയ്യുമായിരുന്നു?
എ: ഡാഡി ഇതിനെക്കുറിച്ച്‌ ഒരിക്കലും അറിയാൻപോകുന്നില്ലെന്ന്‌ ചിന്തിച്ച്‌ മിണ്ടാതിരിക്കും.
ബി: സംഭവിച്ചതിനെക്കുറിച്ച്‌ വള്ളിപുള്ളി വിടാതെ ഡാഡിയോടു പറയും.
ഓപ്‌ഷൻ ‘എ’ തിരഞ്ഞെടുക്കാൻ നിങ്ങൾക്കു പ്രലോഭനം തോന്നിയേക്കാം. നിങ്ങൾ ഇക്കാര്യം ഡാഡിയെ അറിയിച്ചുവെന്ന്‌ മമ്മി വിചാരിക്കുകയും ചെയ്യും. എന്നാൽ വണ്ടി ഓടിക്കുന്നതോ മറ്റെന്തെങ്കിലുമായി ബന്ധപ്പെട്ടോ ഉള്ള നിങ്ങളുടെ തെറ്റുകൾ തുറന്നുപറയുന്നതിനു നല്ല കാരണങ്ങളുണ്ട്‌.
നിങ്ങളുടെ തെറ്റുകൾ തുറന്നുസമ്മതിക്കേണ്ടതിന്റെ മൂന്നു കാരണങ്ങൾ
1. അങ്ങനെ ചെയ്യുന്നതാണ്‌ ശരി. ക്രിസ്‌ത്യാനികൾക്ക്‌ ഉണ്ടായിരിക്കേണ്ട നിലവാരങ്ങളെക്കുറിച്ച്‌ ബൈബിൾ ഇങ്ങനെയാണു പറയുന്നത്‌: “എല്ലാത്തിലും സത്യസന്ധരായിരിക്കാൻ ഞങ്ങൾ ആഗ്രഹിക്കുന്നു”—എബ്രായർ 13:18.
“ചെയ്‌ത കാര്യത്തിന്റെ ഉത്തരവാദിത്വം ഏറ്റെടുക്കാനും സത്യസന്ധനായിരിക്കാനും ഒരു തെറ്റു പറ്റിയാൽ ഉടനെ തുറന്നുസമ്മതിക്കാനും എനിക്കു വളരെ അധ്വാനിക്കേണ്ടിവന്നു.”—അലെക്‌സിസ്‌.
2. തെറ്റു തുറന്നുസമ്മതിക്കുന്നവരോട്‌ ആളുകൾ ക്ഷമിക്കാനുള്ള സാധ്യത കൂടുതലാണ്‌. ബൈബിൾ ഇങ്ങനെ പറയുന്നു: “സ്വന്തം തെറ്റുകൾ മൂടിവെക്കുന്നവൻ വിജയിക്കില്ല; അവ ഏറ്റുപറഞ്ഞ്‌ ഉപേക്ഷിക്കുന്നവനു കരുണ ലഭിക്കും.”—സുഭാഷിതങ്ങൾ 28:13.
“ഒരു തെറ്റ്‌ തുറന്നുസമ്മതിക്കുന്നതിനു ധൈര്യം ആവശ്യമാണ്‌. അത്‌ ആളുകളുടെ വിശ്വാസം പിടിച്ചുപറ്റാൻ സഹായിക്കും. നിങ്ങൾ സത്യസന്ധരാണെന്ന്‌ അവർ മനസ്സിലാക്കും. ഒരു തെറ്റ്‌ സമ്മതിക്കുന്നതിലൂടെ മോശമാകേണ്ട ഒരു സാഹചര്യത്തെ നിങ്ങൾ നല്ലതിലേക്കു നയിക്കും.”—റിച്ചാർഡ്‌.
3. ഏറ്റവും പ്രധാനമായി അത്‌ യഹോവയാം ദൈവത്തെ പ്രസാദിപ്പിക്കും. ബൈബിൾ പറയുന്നു: “യഹോവ വഞ്ചകരെ വെറുക്കുന്നു, നേരുള്ളവരെയാണു ദൈവം ഉറ്റസുഹൃത്തുക്കളാക്കുന്നത്‌.”—സുഭാഷിതങ്ങൾ 3:32.
“ഗുരുതരമായ ഒരു തെറ്റ്‌ എന്റെ ഭാഗത്തുനിന്ന്‌ ഉണ്ടായപ്പോൾ അത്‌ തുറന്നുസമ്മതിക്കേണ്ടതിന്റെ പ്രാധാന്യം ഞാൻ തിരിച്ചറിഞ്ഞു. കാര്യങ്ങൾ യഹോവയുടെ വഴിക്കു ചെയ്യാതിരിക്കുമ്പോൾ യഹോവയിൽനിന്ന്‌ അനുഗ്രഹങ്ങൾ പ്രതീക്ഷിക്കുക സാധ്യമല്ല.”—റെയ്‌ച്ചൽ.
തെറ്റു സംഭവിച്ചതിനു ശേഷം തുടക്കത്തിൽ പറഞ്ഞ കരീന എന്താണു ചെയ്‌തത്‌? പിഴ അടച്ച രസീത്‌ ഡാഡിയിൽനിന്ന്‌ അവൾ ഒളിച്ചുവെച്ചു. അധികകാലത്തേക്ക്‌ അങ്ങനെ ചെയ്യാൻ അവൾക്കു സാധിച്ചില്ല. “ഒരു വർഷം കഴിഞ്ഞപ്പോൾ ചില ഇൻഷുറൻസ്‌ രേഖകൾ അന്വേഷിക്കുന്നതിനിടയിൽ എന്റെ പേരിലുള്ള രസീത്‌ ഡാഡിയുടെ കണ്ണിൽപ്പെട്ടു. അതോടെ വലിയ പ്രശ്‌നമായി. ഇക്കാര്യം ഡാഡിയോടു പറയാതിരുന്നതിന്‌ മമ്മിയും എന്നോട്‌ ദേഷ്യപ്പെട്ടു.”
പഠിച്ച പാഠം: തെറ്റുകൾ രഹസ്യമാക്കിവെക്കുന്നത്‌ കാര്യങ്ങൾ വഷളാകാനേ ഉപകരിക്കൂ. അതിന്റെ പിഴ പിന്നീട്‌ എപ്പോഴെങ്കിലും ഒടുക്കേണ്ടിവരും.
നിങ്ങളുടെ തെറ്റുകളിൽനിന്ന്‌ എങ്ങനെ പാഠം പഠിക്കാം.
എല്ലാവരും തെറ്റുവരുത്തുന്നവരാണ്‌. (റോമർ 3:23; 1 യോഹന്നാൻ 1:8) നമ്മൾ കണ്ടുകഴിഞ്ഞതുപോലെ തെറ്റ്‌ സംഭവിക്കുമ്പോൾത്തന്നെ അതു തുറന്നുസമ്മതിക്കുന്നത്‌ താഴ്‌മയുടെയും പക്വതയുടെയും അടയാളമാണ്‌.
അടുത്തപടി തെറ്റുകളിൽനിന്ന്‌ പാഠം പഠിക്കുക എന്നതാണ്‌. സങ്കടകരമെന്നു പറയട്ടെ പല യുവജനങ്ങളും അതിനുള്ള അവസരം കളഞ്ഞുകുളിക്കുന്നു. പ്രിസ്‌കില്ല എന്നു പേരുള്ള കൗമാരക്കാരിക്ക്‌ തോന്നുന്നതുപോലെയാണ്‌ അവർക്കും അനുഭവപ്പെടുന്നത്‌. “ഞാൻ എനിക്ക്‌ പറ്റിപ്പോയ തെറ്റുകളെക്കുറിച്ച്‌ ഓർത്ത്‌ അമിതമായി ഉത്‌കണ്‌ഠപ്പെട്ടുകൊണ്ടിരിക്കും. ഞാൻ എന്നെ വിലകുറച്ചാണ്‌ കാണുന്നത്‌. അതുകൊണ്ടുതന്നെ എന്റെ തെറ്റുകൾ എടുത്താൽ പൊങ്ങാത്ത ഒരു വലിയ ഭാരമായി എനിക്ക്‌ അനുഭവപ്പെടുന്നു. എന്നെക്കൊണ്ട്‌ ഒന്നിനും കൊള്ളില്ല എന്നൊരു ചിന്തയാണ്‌ എന്നെ എല്ലായ്‌പോഴും വേട്ടയാടുന്നത്‌.”
നിങ്ങൾക്കും ഇതുപോലെ എപ്പോഴെങ്കിലും തോന്നിയിട്ടുണ്ടോ? ഉണ്ടെങ്കിൽ ഓർക്കുക. കഴിഞ്ഞകാല തെറ്റുകളെക്കുറിച്ച്‌ ചിന്തിച്ചുകൊണ്ടിരിക്കുന്നത്‌ കാർ ഓടിക്കുമ്പോൾ പിൻവശം കാണാനുള്ള കണ്ണാടിയിൽ നോക്കിക്കൊണ്ടിരിക്കുന്നതുപോലെയാണ്‌. അതുപോലെ കഴിഞ്ഞ കാലത്തെക്കുറിച്ച്‌ ചിന്തിച്ചുകൊണ്ടിരിക്കുന്നത്‌ ഒന്നിനും കൊള്ളാത്ത വ്യക്തിയാണെന്നു തോന്നാനും ജീവിതത്തിൽ വരാനിരിക്കുന്ന വെല്ലുവിളികളെ നേരിടുന്നതിനുള്ള ശക്തി ചോർത്തിക്കളയാനും മാത്രമേ ഉപകരിക്കൂ.
പകരം സന്തുലിതമായ ഒരു വീക്ഷണം എന്തുകൊണ്ട്‌ വളർത്തിയെടുത്തുകൂടാ?
“പാഠം പഠിക്കുക, തെറ്റു വീണ്ടും ആവർത്തിക്കാതിരിക്കുക എന്ന ഉദ്ദേശ്യത്തിൽ മാത്രം കഴിഞ്ഞകാല പിഴവുകളിലേക്കു നോക്കുക. എന്നാൽ നിങ്ങളുടെ ശക്തി ചോർത്തിക്കളയുന്ന വിധത്തിൽ തെറ്റുകളെക്കുറിച്ചുള്ള ചിന്തയിൽ മുഴുകുന്നത്‌ നിറുത്തുക.”—എല്യറ്റ്‌.
“ഓരോ തെറ്റും ഒരു പരിശീലനമായി കാണാൻ ഞാൻ ശ്രമിക്കാറുണ്ട്‌. അങ്ങനെ പഠിക്കുന്ന ഓരോ പാഠവും എന്നെ കൂടുതൽ നല്ല വ്യക്തിയാക്കുന്നു. അടുത്ത തവണ അതേ സാഹചര്യത്തെ മറ്റൊരു രീതിയിൽ കൈകാര്യം ചെയ്യാനും എനിക്കാകുന്നു. അങ്ങനെയൊരു നിലപാടു സ്വീകരിക്കുന്നതാണു നല്ലത്‌, മെച്ചപ്പെട്ട വ്യക്തിയായി വളരാൻ അതു നമ്മളെ സഹായിക്കും.”—വേര.