അച്ഛനി​ല്ലാത്ത കുടും​ബങ്ങൾ—ഈ തുടർക്ക​ഥ​യ്‌ക്ക്‌ എങ്ങനെ ഒരു വിരാ​മ​മി​ടാം?

ഇന്നത്തെ രീതി​യിൽ മുന്നോ​ട്ടു പോയാൽ പെട്ടെ​ന്നു​തന്നെ അച്ഛനി​ല്ലാത്ത കുടും​ബങ്ങൾ എന്ന മഹാവ്യാ​ധി സമൂഹത്തെ വിഴു​ങ്ങി​ക്ക​ള​യും. യു.എസ്‌. ഡിപ്പാർട്ട്‌മെന്റ്‌ ഓഫ്‌ ഹെൽത്ത്‌ ആൻഡ്‌ ഹ്യൂമൻ സർവീ​സ​സി​ന്റെ ഒരു റിപ്പോർട്ട്‌ ഇങ്ങനെ പ്രസ്‌താ​വി​ക്കു​ന്നു: “അച്ഛനമ്മ​മാ​രിൽ ഒരാൾ തനിയെ വളർത്തി​ക്കൊ​ണ്ടു വരുന്ന കുട്ടികൾ പഠനത്തിൽ പിന്നോ​ക്കം പോകാൻ ചായ്‌വു കാണി​ക്കു​ന്നു. അതു​പോ​ലെ തന്നെ പെരു​മാറ്റ വൈക​ല്യ​ങ്ങ​ളും ആരോ​ഗ്യ​പ​ര​വും മാനസി​ക​വു​മായ സ്ഥായി​യായ തകരാ​റു​ക​ളും ഇക്കൂട്ട​രിൽ കൂടു​ത​ലാ​യി​രി​ക്കും. . . . അച്ഛനി​ല്ലാത്ത കുടും​ബ​ങ്ങ​ളിൽ വളർന്നു വരുന്ന കുട്ടികൾ പഠിത്തം നിറു​ത്താ​നും ജയിലിൽ പോകാ​നും കൂടുതൽ സാധ്യ​ത​യുണ്ട്‌. കൗമാ​ര​ഗർഭ​ധാ​രണ സാധ്യ​ത​യും ഇവരുടെ ഇടയിൽ കൂടു​ത​ലാണ്‌.”

അപ്പോൾപ്പി​ന്നെ, സാമൂ​ഹിക ശാസ്‌ത്ര​ജ്ഞ​രും കുടുംബ ഉപദേ​ഷ്ടാ​ക്ക​ളും വിദ്യാ​ഭ്യാ​സ പ്രവർത്ത​ക​രും എന്തിന്‌, രാഷ്‌ട്രീ​യ​ക്കാർ പോലും വിനാ​ശ​ക​ര​മായ ഈ പ്രവണ​ത​യ്‌ക്കു തടയി​ടാ​നുള്ള വഴികൾ തേടി നെട്ടോ​ട്ട​മോ​ടു​ന്ന​തിൽ അതിശ​യി​ക്കാ​നില്ല. പിതൃ​ത്വ​ത്തിൽ അഭിമാ​നം കൊള്ളാ​നും കുടും​ബ​ത്തോ​ടുള്ള തങ്ങളുടെ പ്രതി​ബദ്ധത നിറ​വേ​റ്റാ​നും പുരു​ഷ​ന്മാ​രെ പ്രേരി​പ്പി​ക്കുക എന്ന ലക്ഷ്യത്തിൽ വൻ റാലികൾ സംഘടി​പ്പി​ക്ക​പ്പെ​ട്ടി​ട്ടുണ്ട്‌. പിതൃ​ത്വ​മെന്ന വിഷയത്തെ കേന്ദ്രീ​ക​രി​ച്ചുള്ള പുസ്‌ത​കങ്ങൾ പല രാജ്യ​ങ്ങ​ളി​ലെ​യും പുസ്‌ത​ക​ച്ച​ന്ത​ക​ളിൽ ഒരു പ്രളയം തന്നെ സൃഷ്ടി​ച്ചി​രി​ക്കു​ന്നു. അച്ഛന്മാ​രെ​ക്കൊണ്ട്‌ അവരുടെ ഉത്തരവാ​ദി​ത്വ​ങ്ങൾ നിർബ​ന്ധിച്ച്‌ ഏറ്റെടു​പ്പി​ക്കു​ന്ന​തി​നുള്ള ശ്രമങ്ങൾ പോലും നടന്നി​രി​ക്കു​ന്നു. ഐക്യ​നാ​ടു​ക​ളിൽ, “കുട്ടി​ക​ളു​ടെ കാര്യം നോക്കാൻ അമ്പേ പരാജ​യ​പ്പെ​ടുന്ന അച്ഛന്മാർക്ക്‌” ജഡ്‌ജി​മാർ ശിക്ഷ വിധി​ച്ചി​രി​ക്കു​ന്നു. കൂടാതെ, ഇക്കൂട്ടരെ ടിവി ടോക്ക്‌ ഷോക​ളി​ലൂ​ടെ നിശി​ത​മാ​യി വിമർശി​ക്കു​ക​യും, എന്തിന്‌ പൊതു​ജ​ന​ങ്ങ​ളു​ടെ മുമ്പാകെ അവരെ കരി​തേച്ചു കാണി​ക്കുക പോലും ചെയ്‌തി​രി​ക്കു​ന്നു. എങ്കിലും ഇത്തരം ശ്രമങ്ങൾ കൊണ്ട്‌ കാര്യ​മായ പ്രയോ​ജനം ഒന്നും ഉണ്ടായി​ട്ടില്ല.

ക്ഷിപ്ര പരിഹാ​ര​മാർഗങ്ങൾ

ക്ഷിപ്ര പരിഹാ​ര​മാർഗ​ങ്ങ​ളും വിജയം കാണു​ന്നി​ല്ലെന്നു വേണം പറയാൻ. ഒരു ഉദാഹ​ര​ണ​മെ​ടു​ക്കാം. മക്കൾക്ക്‌ ഒരു പുതിയ അച്ഛനെ നൽകാ​മെന്ന പ്രത്യാ​ശ​യിൽ വിവാ​ഹ​മോ​ചി​ത​യായ ഒരു സ്‌ത്രീ തിടു​ക്ക​ത്തിൽ പുനർവി​വാ​ഹം ചെയ്‌തേ​ക്കാം. എന്നാൽ, പുനർവി​വാ​ഹ​ത്തിന്‌ അതി​ന്റേ​തായ നേട്ടങ്ങൾ ഉണ്ടായി​രു​ന്നേ​ക്കാ​മെ​ങ്കി​ലും ചിലരു​ടെ കാര്യ​ത്തിൽ അതിന്‌ ഒരു ഇരുണ്ട മറുപു​റ​വു​മുണ്ട്‌. പുതിയ ഒരാളെ അച്ഛനായി സ്വീക​രി​ക്കാൻ കുട്ടികൾ പെട്ടെ​ന്നൊ​ന്നും മനസ്സൊ​രു​ക്കം കാട്ടി​യെന്നു വരില്ല. ചില​പ്പോൾ അവർ ഒരിക്ക​ലും അതിനു തയ്യാറാ​യി​ല്ലെ​ന്നും വരാം. “രണ്ടാനച്ഛൻ ഉള്ള കുടും​ബ​ങ്ങ​ളി​ലെ പെൺകു​ട്ടി​ക​ളിൽ ഏകദേശം 67 ശതമാ​ന​വും 19 വയസ്സാ​കു​ന്ന​തി​നു മുമ്പെ വീടു​വി​ട്ടു പോയ”തായി ഒരു സർവേ വെളി​പ്പെ​ടു​ത്തി. “എന്നാൽ സ്വന്തം അച്ഛന്റെ​യും അമ്മയു​ടെ​യും കൂടെ കഴിഞ്ഞി​രുന്ന പെൺകു​ട്ടി​ക​ളിൽ 50 ശതമാനം മാത്രമേ അങ്ങനെ ചെയ്‌തു​ള്ളൂ.” ഇനി, പുനർവി​വാ​ഹം ഒരു വിജയ​മാ​ണെ​ങ്കിൽ പോലും കുട്ടികൾ രണ്ടാന​ച്ഛന്റെ സ്ഥാനം അംഗീ​ക​രി​ച്ചു കൊടു​ക്കാൻ ചില​പ്പോൾ വർഷങ്ങൾതന്നെ വേണ്ടി​വ​ന്നേ​ക്കാം.a

കൗമാര ഗർഭധാ​രണം എന്ന പ്രശ്‌ന​ത്തി​ന്റെ കാര്യ​ത്തി​ലും ക്ഷിപ്ര പരിഹാ​ര​മാർഗങ്ങൾ യഥാർഥ പോം​വ​ഴി​യാ​കു​ന്നില്ല. ഉദാഹ​ര​ണ​ത്തിന്‌, ഗർഭച്ഛി​ദ്ര​ത്തി​ന്റെ കാര്യ​മെ​ടു​ക്കാം. അത്‌ ദൈവ​നി​യമം വിലക്കുന്ന ഒരു സംഗതി​യാണ്‌. മാത്രമല്ല, ഒരു യുവതി തന്റെ ഉള്ളിൽ വളരുന്ന കുരുന്നു ജീവനു നേരെ മനസ്സലി​വി​ന്റെ വാതാ​യ​നങ്ങൾ കൊട്ടി​യ​ട​ച്ചു​കൊ​ണ്ടാണ്‌ അതിനു മുതി​രു​ന്നത്‌. (പുറപ്പാ​ടു 20:13; 21:22, 23, NW; സങ്കീർത്തനം 139:14-16; 1 യോഹ​ന്നാൻ 3:17 താരത​മ്യം ചെയ്യുക.) അങ്ങനെ ചെയ്യു​ന്നത്‌, മാതൃ​ഹൃ​ദ​യ​ത്തിൽ ഒരു നീറ്റലാ​യി അവശേ​ഷി​ക്കാ​തി​രി​ക്കു​മോ? കുഞ്ഞിനെ ദത്തു നൽകു​ന്നത്‌ കുറച്ചു കൂടി ഭേദപ്പെട്ട ഒരു പരിഹാ​ര​മാ​യി പലരും കാണുന്നു. എന്നാൽ അതും മനസ്സിൽ എന്നും ഒരു കനലായി പുകഞ്ഞു​കൊ​ണ്ടി​രി​ക്കും—അമ്മയു​ടെ​യും കുട്ടി​യു​ടെ​യും.

ഇല്ല, ഇത്തരം പരിഹാ​ര​മാർഗ​ങ്ങ​ളൊ​ന്നും അച്ഛനി​ല്ലാത്ത കുടും​ബ​ങ്ങ​ളെന്ന തുടർക്ക​ഥ​യ്‌ക്ക്‌ വിരാ​മ​മി​ടില്ല. ആളുകൾ ചിന്താ​ഗ​തി​യി​ലും മനോ​ഭാ​വ​ങ്ങ​ളി​ലും പെരു​മാ​റ്റ​ത്തി​ലും ധാർമിക മൂല്യ​ങ്ങ​ളി​ലും സമൂല പരിവർത്തനം വരുത്താൻ തയ്യാറാ​യാ​ലേ ഇതു​പോ​ലുള്ള പ്രവണ​ത​കൾക്കു തടയി​ടാൻ കഴിയൂ. ഘോര​ഘോ​രം പ്രസം​ഗി​ച്ച​തു​കൊ​ണ്ടോ ആളുകളെ ആകർഷി​ക്കുന്ന മനശ്ശാ​സ്‌ത്ര​പ​ര​മായ സമീപനം കൈ​ക്കൊ​ണ്ട​തു​കൊ​ണ്ടോ ഒന്നും ആളുകൾ ഇത്തര​മൊ​രു സമൂല മാറ്റം വരുത്താൻ പോകു​ന്നില്ല. അതി​നെ​ക്കാൾ കവിഞ്ഞ ഒന്ന്‌ ആവശ്യ​മാണ്‌. അത്‌ ദൈവ​ത്തി​ന്റെ വചനമായ ബൈബി​ളിൽ കണ്ടെത്താൻ കഴിയും. കുടുംബ ക്രമീ​ക​ര​ണ​ത്തിന്‌ തുടക്ക​മി​ട്ട​തു​തന്നെ ദൈവ​മാ​ണ​ല്ലോ. (എഫെസ്യർ 3:14, 15) അതു​കൊണ്ട്‌, കുട്ടി​കൾക്ക്‌ എന്താണ്‌ ആവശ്യ​മു​ള്ള​തെന്ന്‌ മറ്റാ​രെ​ക്കാ​ളും നന്നായി അറിയാ​വു​ന്നത്‌ അവനാണ്‌.

ബൈബിൾ തത്ത്വങ്ങൾ കുടും​ബ​ങ്ങളെ സഹായി​ക്കു​ന്നു

അച്ഛന്റെ സാന്നി​ധ്യ​മി​ല്ലാ​തെ വളരുന്ന കുഞ്ഞു​ങ്ങളെ ബൈബി​ളിന്‌ യഥാർഥ​ത്തിൽ സഹായി​ക്കാ​നാ​കു​മോ? ഒരിക്ക​ലും കരകയ​റാൻ പറ്റാത്ത ഒരു അവസ്ഥയിൽ അല്ലേ അവർ എന്ന്‌ ഒരുപക്ഷേ തോന്നി​യേ​ക്കാം. എന്നാൽ തീർച്ച​യാ​യും അങ്ങനെ അല്ല! ഇത്തരം കുട്ടി​കളെ കാത്തി​രി​ക്കുന്ന നിരവധി അപകട​സാ​ധ്യ​ത​കളെ കുറി​ച്ചുള്ള യു.എസ്‌. ഗവൺമെ​ന്റി​ന്റെ ഒരു റിപ്പോർട്ട്‌ ഈ ലേഖന​ത്തി​ന്റെ തുടക്ക​ത്തിൽ ഞങ്ങൾ ഉദ്ധരി​ച്ചി​രു​ന്നു. എന്നാൽ ആ റിപ്പോർട്ടി​ലെ ഉപസം​ഹാര വാക്കുകൾ ഇവയാ​യി​രു​ന്നു: “തെളി​വു​കൾ കാണി​ക്കു​ന്ന​തു​പോ​ലെ, മാതാ​പി​താ​ക്ക​ളിൽ ഒരാൾ മാത്ര​മുള്ള കുടും​ബ​ങ്ങ​ളിൽ വളരുന്ന കുട്ടി​കൾക്ക്‌ അപകട​സാ​ധ്യത കൂടു​ത​ലാണ്‌ എന്നതു സത്യം തന്നെ. എങ്കിലും, അവരിൽ ഭൂരി​പ​ക്ഷ​വും യാതൊ​രു കുഴപ്പ​വും ഇല്ലാ​തെ​തന്നെ വളർന്നു​വ​രു​ന്ന​താ​യി ഗവേഷ​ണങ്ങൾ കാണി​ക്കു​ന്നു.” അതേ, അച്ഛനി​ല്ലാ​തെ വളരു​ന്ന​തി​ന്റെ ഭവിഷ്യ​ത്തു​കൾ ഇല്ലാതാ​ക്കാ​നോ കുറഞ്ഞ​പക്ഷം ലഘൂക​രി​ക്കാ​നോ എങ്കിലും കഴിയും. ബൈബിൾ തത്ത്വങ്ങ​ള​നു​സ​രി​ച്ചു കുട്ടി​കളെ വളർത്തു​ന്നെ​ങ്കിൽ ഇതു പ്രത്യേ​കി​ച്ചും സത്യമാണ്‌.

ഇത്‌ ഒറ്റക്കാ​രി​യായ മാതാ​വി​ന്റെ ഭാഗത്ത്‌ അത്യധ്വാ​നം ആവശ്യ​മാ​ക്കി​ത്തീർക്കു​ന്നു. തനിച്ച്‌ ഈ തോണി തുഴയാ​നാ​കി​ല്ലെന്ന്‌ ഒരുപക്ഷേ തുടക്ക​ത്തിൽ അമ്മയ്‌ക്കു തോന്നി​യേ​ക്കാം. എന്നാൽ, നിങ്ങൾ ഇത്തര​മൊ​രു സാഹച​ര്യ​ത്തിൽ ആണെങ്കിൽ യഹോ​വ​യാം ദൈവ​ത്തിൽ പൂർണ​മാ​യി ആശ്രയി​ക്കു​ന്ന​തി​നു പഠിക്കാൻ കഴിയും. (സദൃശ​വാ​ക്യ​ങ്ങൾ 3:1, 2) ബൈബിൾ കാലങ്ങ​ളി​ലും ചില ക്രിസ്‌തീയ സ്‌ത്രീ​കൾ വൈധ​വ്യം പോലുള്ള ദുരനു​ഭ​വ​ങ്ങ​ളു​ടെ കയ്‌പു​നീർ കുടി​ച്ചി​രു​ന്നു. അത്തരക്കാ​രെ കുറിച്ച്‌ ബൈബിൾ ഇപ്രകാ​രം പറയുന്നു: “സാക്ഷാൽ വിധവ​യും ഏകാകി​യു​മാ​യവൾ ദൈവ​ത്തിൽ ആശവെച്ചു രാപ്പകൽ യാചന​യി​ലും പ്രാർത്ഥ​ന​യി​ലും ഉററു​പാർക്കു​ന്നു.” (1 തിമൊ​ഥെ​യൊസ്‌ 5:5) യഹോവ, തന്നെത്തന്നെ “പിതാ​വി​ല്ലാത്ത ബാലന്മാ​രു​ടെ പിതാവ്‌” എന്നാണു വിശേ​ഷി​പ്പി​ക്കു​ന്ന​തെന്ന്‌ ഓർമി​ക്കുക. (സങ്കീർത്തനം 68:5, NW) തന്റെ കുഞ്ഞു​ങ്ങളെ വളർത്തി​ക്കൊ​ണ്ടു​വ​രാൻ ദൈവ​ഭ​യ​മുള്ള ഒരു സ്‌ത്രീ ചെയ്യുന്ന ശ്രമങ്ങളെ അവൻ അനു​ഗ്ര​ഹി​ക്കുക തന്നെ ചെയ്യും.

കുട്ടി​ക​ളു​മൊ​ത്തു ക്രമമാ​യി ബൈബിൾ പഠിക്കു​ന്നത്‌ സമനി​ല​യും പക്വത​യും ഉള്ളവരാ​യി മുതിർന്നു​വ​രാൻ അവരെ സഹായി​ക്കു​ന്ന​തി​നുള്ള ഒരു സുപ്ര​ധാന മാർഗ​മാണ്‌. (ആവർത്ത​ന​പു​സ്‌തകം 6:6-9) യഹോ​വ​യു​ടെ സാക്ഷി​ക​ളു​ടെ​യി​ട​യി​ലെ ഒറ്റക്കാ​രായ പല അമ്മമാ​രും യുവജ​ന​ങ്ങൾക്കു വേണ്ടി പ്രത്യേ​കം തയ്യാറാ​ക്കിയ ബൈബി​ള​ധി​ഷ്‌ഠിത പ്രസി​ദ്ധീ​ക​ര​ണങ്ങൾ ഉപയോ​ഗി​ക്കു​ന്നു. അവയി​ലൊ​ന്നാണ്‌ യുവജ​നങ്ങൾ ചോദി​ക്കുന്ന ചോദ്യ​ങ്ങ​ളും—പ്രാ​യോ​ഗി​ക​മായ ഉത്തരങ്ങ​ളും എന്ന പുസ്‌തകം.b മാതാ​പി​താ​ക്ക​ളു​ടെ തെറ്റുകൾ ആവർത്തി​ക്കാ​തി​രി​ക്കാൻ സഹായ​ക​മായ ധാർമിക നിലവാ​രങ്ങൾ വളർത്തി​യെ​ടു​ക്കാൻ അവയി​ലുള്ള വിവരങ്ങൾ യുവജ​ന​ങ്ങളെ സഹായി​ക്കു​ന്നു. യഹോ​വ​യാം ദൈവത്തെ അറിയാ​നി​ട​യാ​കു​മ്പോൾ കുട്ടികൾ, തങ്ങൾക്കു വേണ്ടി വളരെ​യ​ധി​കം കരുതുന്ന ഒരു സ്വർഗീയ പിതാ​വു​ണ്ടെന്നു മനസ്സി​ലാ​ക്കി​ത്തു​ട​ങ്ങും. (സങ്കീർത്തനം 27:10) തങ്ങൾക്ക്‌ അച്ഛനി​ല്ല​ല്ലോ എന്ന ചിന്തയെ തരണം ചെയ്യാൻ ഇത്‌ അവരെ സഹായി​ച്ചേ​ക്കാം. മാതാ​പി​താ​ക്ക​ളു​ടെ വിവാ​ഹ​മോ​ച​നത്തെ നേരി​ടേണ്ടി വന്ന ബ്രിട്ടൻകാ​രി​യായ ഒരു പെൺകു​ട്ടി ഇപ്രകാ​രം അനുസ്‌മ​രി​ക്കു​ന്നു: “പൊള്ളുന്ന ആ ദുരനു​ഭ​വ​ങ്ങ​ളി​ലൂ​ടെ സഞ്ചരി​ക്കവെ പ്രാർഥ​ന​യും യഹോ​വ​യി​ലുള്ള പൂർണ​മായ ആശ്രയ​വും എത്രമാ​ത്രം പ്രധാ​ന​മാ​ണെന്ന്‌ മമ്മി എന്നോടു പറയു​മാ​യി​രു​ന്നു. സാഹച​ര്യ​വു​മാ​യി പൊരു​ത്ത​പ്പെ​ടാൻ എന്നെയും മമ്മി​യെ​യും പ്രാപ്‌ത​രാ​ക്കി​യ​തും അതുത​ന്നെ​യാണ്‌.”

അച്ഛനും കുട്ടി​യും തമ്മിലുള്ള ബന്ധം ഇഴപി​രി​യാ​തെ നിലനിർത്തൽ

മക്കൾ അമ്മയെ മാത്രമല്ല അച്ഛനെ​യും ബഹുമാ​നി​ക്കേ​ണ്ട​തു​ണ്ടെന്ന്‌ ബൈബിൾ വ്യക്തമാ​യി പറയുന്നു. (പുറപ്പാ​ടു 20:12) വിവാ​ഹ​മോ​ചനം അച്ഛനും കുട്ടി​യും തമ്മിലുള്ള ബന്ധം വേർപെ​ടു​ത്തു​ന്നില്ല. വിവാ​ഹ​മോ​ചി​ത​നായ പിതാവ്‌ മേലാൽ കുടും​ബ​ത്തോ​ടൊ​പ്പം കഴിയു​ന്നി​ല്ലെ​ങ്കി​ലും അദ്ദേഹ​വു​മാ​യി ഒരു ഊഷ്‌മള ബന്ധം ആസ്വദി​ക്കു​ന്ന​തി​ലൂ​ടെ കുട്ടി​കൾക്ക്‌ പ്രയോ​ജനം നേടാൻ കഴിയും.c എന്നാൽ മനസ്സിൽ തികട്ടി​വ​രുന്ന കയ്‌പ്‌, മുൻഭർത്താവ്‌ കുട്ടി​ക​ളു​ടെ കാര്യ​ത്തിൽ ഇടപെ​ടു​മ്പോൾ അമ്മയ്‌ക്ക്‌ അമർഷം തോന്നാൻ ഇടയാ​ക്കി​യേ​ക്കാം. അമ്മയ്‌ക്ക്‌ ഈ വികാ​ര​ങ്ങളെ എങ്ങനെ നിയ​ന്ത്രി​ക്കാൻ കഴിയും?

ബൈബിൾ പിൻവ​രുന്ന നല്ല ബുദ്ധി​യു​പ​ദേശം നൽകുന്നു: “ക്രോ​ധാ​വേശം നിന്നെ ദ്രോ​ഹ​ബു​ദ്ധി​യോ​ടെ [പെരു​മാ​റു​ന്ന​തി​ലേക്കു] വശീക​രി​ക്കാ​തി​രി​ക്കാൻ സൂക്ഷി​ച്ചു​കൊൾക. . . . ദ്രോ​ഹ​ക​ര​മാ​യ​തി​ലേക്കു തിരി​യാ​തി​രി​ക്കാൻ നീ ശ്രദ്ധി​ച്ചു​കൊൾക.” (ഇയ്യോബ്‌ 36:18-21, NW) നിങ്ങളെ വ്രണ​പ്പെ​ടു​ത്തു​ക​യോ ഉപേക്ഷി​ച്ചു പോകു​ക​യോ ചെയ്‌ത ഒരാളെ കുറിച്ച്‌ നല്ലതു മാത്രം സംസാ​രി​ക്കുക എളുപ്പ​മുള്ള കാര്യമല്ല എന്നതു സത്യം​തന്നെ. എന്നാൽ നിങ്ങ​ളോ​ടു​തന്നെ ഇങ്ങനെ ചോദി​ക്കുക: ‘തന്റെ അച്ഛൻ കൊള്ള​രു​താ​ത്ത​വ​നാണ്‌ എന്ന സ്ഥിരം പല്ലവി കേട്ടു​കൊ​ണ്ടി​രി​ക്കുന്ന ഒരു പെൺകു​ട്ടിക്ക്‌ ഒരു പുരു​ഷ​നിൽ വിശ്വാ​സം അർപ്പി​ക്കാൻ കഴിയു​മോ? “നീ നിന്റെ അച്ഛന്റെ തനി പകർപ്പാണ്‌” എന്നു പറഞ്ഞ്‌, തൊടു​ന്ന​തി​നും പിടി​ക്കു​ന്ന​തി​നു​മൊ​ക്കെ ഒരു ആൺകു​ട്ടി​യെ കുറ്റ​പ്പെ​ടു​ത്തി​ക്കൊ​ണ്ടി​രു​ന്നാൽ അവന്‌ ആണത്തമുള്ള, ഒരു ഉറച്ച വ്യക്തി​ത്വം വളർത്തി​യെ​ടു​ക്കാ​നാ​വു​മോ? സ്വന്തം പിതാ​വി​നെ വെറു​ക്കാൻ പഠിപ്പി​ക്ക​പ്പെ​ടുന്ന, അദ്ദേഹത്തെ ഒന്നു കാണാൻ പോലും അനുവാ​ദം ലഭിക്കാത്ത കുട്ടി​കൾക്ക്‌ അധികാ​ര​സ്ഥാ​ന​ത്തു​ള്ള​വ​രോട്‌ ഉചിത​മായ ഒരു വീക്ഷണം ഉണ്ടായി​രി​ക്കു​മോ? കുട്ടി​യു​ടെ മനസ്സിൽ അച്ഛനെ കുറി​ച്ചുള്ള കയ്‌പ്‌ കുത്തി​വെ​ക്കു​ന്നത്‌ ദോഷ​ക​ര​മാണ്‌ എന്നതു വ്യക്തം.

ധാർമി​ക​രോ​ഷം തോന്നു​ന്ന​തി​നെ ബൈബിൾ കുറ്റം വിധി​ക്കു​ന്നില്ല എന്നറി​യു​ന്നത്‌ ഒരുപക്ഷേ നിങ്ങളെ അതിശ​യി​പ്പി​ച്ചേ​ക്കാം. “കോപി​ക്കാം; എന്നാൽ, പാപം ചെയ്യരുത്‌” എന്ന്‌ ബൈബിൾ പറയുന്നു. (എഫെസ്യർ 4:26, പി.ഒ.സി. ബൈബിൾ) കോപി​ക്കു​ന്നതല്ല, പിന്നെ​യോ നമ്മുടെ മേൽ നിയ​ന്ത്രണം ചെലു​ത്താൻ “കോപം, ക്രോധം, ഈർഷ്യ, വായിൽനി​ന്നു വരുന്ന ദൂഷണം” എന്നിവയെ അനുവ​ദി​ക്കു​ന്ന​താ​ണു പാപം. (കൊ​ലൊ​സ്സ്യർ 3:8) അതു​കൊണ്ട്‌ കുട്ടികൾ കേൾക്കെ അവരുടെ അച്ഛനെ കുറ്റ​പ്പെ​ടു​ത്തി സംസാ​രി​ക്കു​ക​യോ അദ്ദേഹ​ത്തി​നെ​തി​രെ വാക്‌ശ​രങ്ങൾ എയ്‌തു​വി​ടു​ക​യോ ചെയ്യാ​തി​രി​ക്കുക. നിങ്ങളു​ടെ മനസ്സിന്റെ ഭാരം ഒന്നിറക്കി വെക്കണ​മെന്നു തോന്നു​ന്നെ​ങ്കിൽ, “മനോ​വ്യ​സനം” ആരെങ്കി​ലു​മാ​യി—ഒരുപക്ഷേ ആശ്രയി​ക്കാൻ കൊള്ളാ​വുന്ന ഒരു സുഹൃ​ത്തു​മാ​യി, എന്നാൽ നിങ്ങളു​ടെ കുട്ടി​ക​ളു​മാ​യിട്ട്‌ ആയിരി​ക്ക​രുത്‌—പങ്കു​വെ​ക്കുക എന്ന ബൈബി​ളി​ന്റെ നിർദേശം പിൻപ​റ്റുക. (സദൃശ​വാ​ക്യ​ങ്ങൾ 12:25) കഴിഞ്ഞ​തി​നെ കുറി​ച്ചോർത്ത്‌ തല പുണ്ണാ​ക്കാ​തെ ഒരു ക്രിയാ​ത്മക മനോ​ഭാ​വം നിലനിർത്താൻ ശ്രമി​ക്കുക. (സഭാ​പ്ര​സം​ഗി 7:10) ഇപ്രകാ​രം ചെയ്യു​ന്നത്‌ കോപ​ത്തി​നു കടിഞ്ഞാ​ണി​ടാൻ നിങ്ങളെ വളരെ​യേറെ സഹായി​ക്കും.

അവസാ​ന​മാ​യി ഒരു കാര്യം കൂടി. അച്ഛനെ ആദരി​ക്കാൻ ബൈബിൾ കുട്ടി​ക​ളോ​ടു കൽപ്പി​ക്കു​ന്നു, അദ്ദേഹ​ത്തി​ന്റെ പെരു​മാ​റ്റം മാതൃ​കാ​യോ​ഗ്യം അല്ലെങ്കിൽ പോലും അങ്ങനെ ചെയ്യേ​ണ്ട​താണ്‌. (എഫെസ്യർ 6:2, 3) അതു​കൊണ്ട്‌ തങ്ങളുടെ അച്ഛന്റെ ബലഹീ​ന​ത​കളെ വസ്‌തു​നി​ഷ്‌ഠ​മാ​യി വീക്ഷി​ക്കാൻ കുട്ടി​കളെ സഹായി​ക്കുക. ഒരു തകർന്ന കുടും​ബ​ത്തിൽ വളർന്നു വന്ന ഒരു യുവതി ഇപ്രകാ​രം പറയുന്നു: “ഞാൻ എന്റെ പിതാ​വി​നെ വസ്‌തു​നി​ഷ്‌ഠ​മാ​യി മനസ്സി​ലാ​ക്കാൻ തുടങ്ങി​യ​പ്പോൾ, അതായത്‌ അദ്ദേഹ​വും തെറ്റു പറ്റാവുന്ന ഒരു അപൂർണ മനുഷ്യ​നാ​ണെന്നു മനസ്സി​ലാ​ക്കി​യ​പ്പോൾ ഒടുവിൽ എനിക്ക്‌ അദ്ദേഹ​വു​മാ​യി പൊരു​ത്ത​പ്പെ​ടാൻ കഴിഞ്ഞു.” തങ്ങളുടെ അച്ഛനെ ആദരി​ക്കാൻ കുട്ടി​കളെ പ്രോ​ത്സാ​ഹി​പ്പി​ക്കു​മ്പോൾ, മാതാ​പി​താ​ക്ക​ളു​ടെ അധികാ​രത്തെ സംബന്ധിച്ച്‌ ആരോ​ഗ്യാ​വ​ഹ​മായ ഒരു വീക്ഷണം വളർത്തി​യെ​ടു​ക്കാൻ നിങ്ങൾ അവരെ സഹായി​ക്കു​ക​യാ​യി​രി​ക്കും ചെയ്യു​ന്നത്‌.

മാതാ​വെന്ന നിലയി​ലുള്ള നിങ്ങളു​ടെ സ്ഥാനത്തു​നി​ന്നു വ്യതി​ച​ലി​ക്കാ​തി​രി​ക്കു​ന്ന​തും പ്രധാ​ന​മാണ്‌. നിങ്ങൾ എന്നും അമ്മയാണ്‌, അവർ കുട്ടി​ക​ളും. ഇതിനു മാറ്റം വരാൻ പാടില്ല. അവർ ഇപ്പോ​ഴും ‘തങ്ങളുടെ അമ്മയുടെ ഉപദേശ’ത്തിൻ കീഴി​ലാണ്‌. (സദൃശ​വാ​ക്യ​ങ്ങൾ 1:8) അമ്മ, മകനെ ‘കാരണ​വ​സ്ഥാന’ത്തു പ്രതി​ഷ്‌ഠി​ക്കു​ന്നെ​ങ്കിൽ അത്‌ അവന്റെ ഇളം ചുമലു​കൾക്കു താങ്ങാ​വു​ന്ന​തി​ലും അധിക​മാ​യി​രി​ക്കും. അമ്മയുടെ സ്വകാര്യ പ്രശ്‌ന​ങ്ങ​ളും ആകുല​ത​ക​ളു​മെ​ല്ലാം തലയി​ലേ​റ്റേണ്ടി വരുന്ന മകളുടെ അവസ്ഥയും വിഭി​ന്നമല്ല. ഒരമ്മയെന്ന നിലയിൽ നിങ്ങൾ അവർക്കാ​യി കരുതു​മെന്ന ഉറപ്പ്‌ കുട്ടി​കൾക്കു ലഭി​ക്കേ​ണ്ട​തുണ്ട്‌, അല്ലാതെ മറിച്ചല്ല. (2 കൊരി​ന്ത്യർ 12:14 താരത​മ്യം ചെയ്യുക.) അങ്ങനെ​യാ​കു​മ്പോൾ തങ്ങളുടെ കുടുംബ സാഹച​ര്യം എല്ലാം തികഞ്ഞത്‌ അല്ലെങ്കിൽ കൂടി അവർക്കു സുരക്ഷി​ത​ത്വം തോന്നും.

അച്ഛന്റെ സ്ഥാനത്തു വരുന്നവർ

അച്ഛനെ​ന്നൊ​രാൾ രംഗത്തു​നിന്ന്‌ പാടേ അപ്രത്യ​ക്ഷ​നാ​യി​രി​ക്കു​ന്നെ​ങ്കി​ലെന്ത്‌? പുരു​ഷ​ന്മാ​രു​മാ​യി സഹവസി​ക്കു​ന്നത്‌ കുട്ടി​കൾക്കു പ്രയോ​ജനം ചെയ്യു​മെ​ന്നാണ്‌ വിദഗ്‌ധ മതം. അമ്മാവ​നോ ഒരു അയൽക്കാ​ര​നോ കുട്ടി​യിൽ ദയാപൂർവ​ക​മായ താത്‌പ​ര്യം എടുക്കു​ന്നത്‌ അവനു കുറെ​യൊ​ക്കെ ഗുണം ചെയ്യു​മെ​ങ്കി​ലും ക്രിസ്‌തീയ സഭയ്‌ക്കു​ള്ളി​ലെ സഹോ​ദ​ര​ന്മാ​രു​മാ​യുള്ള ആരോ​ഗ്യാ​വ​ഹ​മായ സഹവാ​സ​മാണ്‌ ഏറെ പ്രയോ​ജ​ന​പ്രദം. സഭ, പിന്തു​ണ​യേ​കുന്ന ഒരു കുടും​ബം പോ​ലെ​യാ​യി​രി​ക്കും എന്ന്‌ യേശു വാഗ്‌ദാ​നം ചെയ്‌തു.—മർക്കൊസ്‌ 10:29, 30.

ബൈബിൾ കാലങ്ങ​ളിൽ, യുവാ​വായ തിമൊ​ഥെ​യൊസ്‌ വിശ്വാ​സി​യായ ഒരു പിതാ​വി​ന്റെ സഹായം ഇല്ലാഞ്ഞി​ട്ടു​കൂ​ടി, ദൈവ​ഭ​ക്തി​യുള്ള ഒരു മാതൃ​കാ​പു​രു​ഷ​നാ​യി വളർന്നു വന്നു. ബൈബിൾ, ഇതിനുള്ള ബഹുമതി മുഖ്യ​മാ​യും കൊടു​ക്കു​ന്നത്‌ സ്‌നേ​ഹ​മ​യി​ക​ളായ അവന്റെ അമ്മയ്‌ക്കും വല്യമ്മ​യ്‌ക്കും ആണ്‌. (പ്രവൃ​ത്തി​കൾ 16:1; 2 തിമൊ​ഥെ​യൊസ്‌ 1:1-5) എന്നാൽ, ക്രിസ്‌തീയ അപ്പൊ​സ്‌ത​ല​നായ പൗലൊ​സി​ന്റെ സഹവാ​സ​വും അവനു വളരെ​യ​ധി​കം പ്രയോ​ജനം ചെയ്‌തു. “കർത്താ​വിൽ വിശ്വ​സ്‌ത​നും എന്റെ പ്രിയ മകനു​മായ തിമൊ​ഥെ​യോസ്‌” എന്നു പൗലൊസ്‌ അവനെ കുറിച്ചു പരാമർശി​ക്കു​ക​യു​ണ്ടാ​യി. (1 കൊരി​ന്ത്യർ 4:17) സമാന​മാ​യി ഇന്ന്‌, “അനാഥ​രു​ടെ​യും വിധവ​ക​ളു​ടെ​യും ഞെരു​ക്ക​ങ്ങ​ളിൽ അവരുടെ സഹായ​ത്തി​നെ​ത്തുക” എന്ന ബൈബി​ളി​ന്റെ ബുദ്ധി​യു​പ​ദേശം അനുസ​രി​ക്കാൻ യഹോ​വ​യു​ടെ സാക്ഷികൾ പ്രോ​ത്സാ​ഹി​പ്പി​ക്ക​പ്പെ​ടു​ന്നു. (യാക്കോബ്‌ 1:27, പി.ഒ.സി. ബൈബിൾ) ആത്മാർഥ​മായ, സമനി​ല​യോ​ടു​കൂ​ടിയ താത്‌പ​ര്യം പ്രകട​മാ​ക്കി​ക്കൊണ്ട്‌ ‘പിതാ​വി​ല്ലാത്ത കുട്ടി​കളെ രക്ഷിക്കാൻ’ അവർ ഉദ്‌ബോ​ധി​പ്പി​ക്ക​പ്പെ​ടു​ന്നു. (ഇയ്യോബ്‌ 29:12, NW) താനൊ​രു കുട്ടി​യാ​യി​രു​ന്ന​പ്പോൾ ഒരു ക്രിസ്‌തീയ മൂപ്പൻ തന്നിൽ ആത്മാർഥ​മായ താത്‌പ​ര്യം പ്രകട​മാ​ക്കി​യത്‌ അനുസ്‌മ​രി​ച്ചു കൊണ്ട്‌ ആനെറ്റ്‌ എന്ന യുവതി ഇപ്രകാ​രം പറയുന്നു: “അച്ഛന്റെ സ്ഥാനത്തു നിന്ന്‌ എനിക്കു വേണ്ട​തെ​ല്ലാം ചെയ്‌തു​തന്ന ഒരേ​യൊ​രാൾ അദ്ദേഹ​മാ​യി​രു​ന്നു.”

തുടർക്ക​ഥ​യ്‌ക്കു വിരാ​മ​മി​ടൽ

മേൽപ്പറഞ്ഞ തത്ത്വങ്ങൾ ബാധക​മാ​ക്കു​ന്നത്‌, അച്ഛനി​ല്ലാത്ത കുട്ടി​കളെ ജീവിത വിജയം കൈവ​രി​ക്കാൻ സഹായി​ക്കും. നിറം​മ​ങ്ങിയ കുട്ടി​ക്കാ​ല​മാണ്‌ അവരു​ടേ​തെ​ങ്കി​ലും സമനി​ല​യും കാര്യ​പ്രാ​പ്‌തി​യു​മുള്ള മുതിർന്ന​വ​രാ​യി തീരാൻ, സ്‌നേ​ഹ​വും വിശ്വ​സ്‌ത​ത​യും പ്രതി​ജ്ഞാ​ബ​ദ്ധ​ത​യും ഒത്തിണ​ങ്ങിയ അച്ഛന്മാ​രാ​കാൻ അവർക്കും കഴിയും. എങ്കിലും, പ്രതി​രോ​ധം ആണു പ്രതി​വി​ധി​യെ​ക്കാൾ ഉത്തമം. അച്ഛനി​ല്ലാത്ത കുടും​ബങ്ങൾ എന്ന തുടർക്ക​ഥ​യ്‌ക്കു വിരാ​മ​മി​ട​ണ​മെ​ങ്കിൽ, തങ്ങളുടെ ജീവി​ത​ത്തിൽ ബൈബിൾ തത്ത്വങ്ങൾ ബാധക​മാ​ക്കു​ന്ന​തി​നുള്ള—വിവാ​ഹ​ത്തി​നു മുമ്പുള്ള ലൈം​ഗി​കത സംബന്ധിച്ച ബൈബി​ളി​ന്റെ വിലക്കി​നോ​ടു പറ്റിനിൽക്കു​ന്ന​തും ഭാര്യാ​ഭർത്താ​ക്ക​ന്മാർക്കു വേണ്ടി അതു വെക്കുന്ന നിലവാ​രങ്ങൾ പിൻപ​റ്റു​ന്ന​തും മറ്റും ഇതിൽ ഉൾപ്പെ​ടു​ന്നു—ഒരു പ്രതി​ജ്ഞാ​ബദ്ധത ഓരോ സ്‌ത്രീ​യും പുരു​ഷ​നും വളർത്തി​യെ​ടു​ക്കുക തന്നെ വേണം.—1 കൊരി​ന്ത്യർ 6:9, 10; എഫെസ്യർ 5:21-33.

ഇക്കാലത്ത്‌, പല കുടും​ബ​ങ്ങ​ളി​ലും അച്ഛൻ ഉള്ളതും ഇല്ലാത്ത​തും ഒരു​പോ​ലെ​യാണ്‌. കുടുംബ പ്രശ്‌ന​ങ്ങളെ കുറിച്ചു പഠിക്കുന്ന ഒരു വിദഗ്‌ധൻ ഇപ്രകാ​രം അഭി​പ്രാ​യ​പ്പെ​ടു​ന്നു: “ഇന്നത്തെ കുട്ടികൾ അഭിമു​ഖീ​ക​രി​ക്കുന്ന ഏറ്റവും വലിയ പ്രശ്‌നം . . . അവർക്കു മാതാ​പി​താ​ക്ക​ളു​ടെ സമയവും ശ്രദ്ധയും ലഭിക്കു​ന്നില്ല എന്നതാണ്‌.” ഈ പ്രശ്‌നം എങ്ങനെ കൈകാ​ര്യം ചെയ്യാ​മെന്ന്‌ ദൈവ​വ​ചനം വ്യക്തമാ​യി പറയുന്നു. കുട്ടി​ക​ളോ​ടുള്ള ബന്ധത്തിൽ പിതാ​ക്ക​ന്മാർ എന്താണു ചെയ്യേ​ണ്ട​തെന്നു ബൈബിൾ കൽപ്പി​ക്കു​ന്നു: “പ്രബോ​ധ​ന​വും തിരു​ത്ത​ലും കൊടു​ത്തു​കൊണ്ട്‌ അവരെ ക്രിസ്‌തീയ രീതി​യിൽ വളർത്തി​ക്കൊ​ണ്ടു വരുക.” (എഫെസ്യർ 6:4, ന്യൂ ഇംഗ്ലീഷ്‌ ബൈബിൾ; സദൃശ​വാ​ക്യ​ങ്ങൾ 24:27, NW) പിതാ​ക്ക​ന്മാർ ബൈബി​ളി​ന്റെ ബുദ്ധി​യു​പ​ദേശം പിൻപ​റ്റു​ന്ന​വ​രാ​കു​മ്പോൾ അവർ തങ്ങളെ ഉപേക്ഷി​ച്ചു പോകു​മോ എന്ന ഭയം കുട്ടി​കളെ ഒരു പ്രകാ​ര​ത്തി​ലും വേട്ടയാ​ടില്ല.

ഇതൊ​ക്കെ​യാ​ണെ​ങ്കി​ലും, ബഹുഭൂ​രി​പക്ഷം ആളുക​ളും ബൈബി​ളി​ലേക്കു തിരി​യും എന്നു വിശ്വ​സി​ക്കു​ന്നതു വാസ്‌ത​വി​ക​മാ​ണോ? അല്ല. (മത്തായി 7:14) എങ്കിലും, ദശലക്ഷ​ങ്ങളെ ഒരു ഭവന ബൈബി​ള​ധ്യ​യന പരിപാ​ടി​യി​ലൂ​ടെ തങ്ങളുടെ കുടുംബ ജീവി​ത​ത്തിൽ സന്തോഷം കണ്ടെത്താൻ യഹോ​വ​യു​ടെ സാക്ഷികൾ സഹായി​ച്ചി​രി​ക്കു​ന്നു.d അപൂർണത നിമിത്തം എല്ലാ വിവാ​ഹിത ദമ്പതി​കൾക്കും “ജഡത്തിൽ കഷ്ടത” ഉണ്ടാകും എന്ന്‌ ബൈബിൾ മുന്നറി​യി​പ്പു നൽകുന്നു. (1 കൊരി​ന്ത്യർ 7:28) എങ്കിലും, ദൈവ​വ​ച​ന​ത്തോ​ടു യഥാർഥ ആദരവു​ള്ളവർ വിവാ​ഹ​ജീ​വി​ത​ത്തിൽ എന്തെങ്കി​ലു​മൊ​രു പ്രശ്‌നം തലപൊ​ക്കു​മ്പോ​ഴേ വിവാ​ഹ​മോ​ച​ന​ത്തി​ന്റെ പാത തേടാൻ ശ്രമി​ക്കാ​തെ, പ്രശ്‌നങ്ങൾ പരിഹ​രി​ക്കാൻ ശ്രമി​ക്കു​ന്നു. വ്യക്തമാ​യും, ഒരു ക്രിസ്‌ത്യാ​നി​യെ സംബന്ധി​ച്ചി​ട​ത്തോ​ളം വേർപി​രി​യു​ന്ന​തി​നെ കുറി​ച്ചോ വിവാ​ഹ​മോ​ചനം നേടു​ന്ന​തി​നെ കുറി​ച്ചോ പോലും ചിന്തി​ക്കു​ന്നത്‌ ഉചിത​മാ​യി​രു​ന്നേ​ക്കാ​വുന്ന സന്ദർഭ​ങ്ങ​ളുണ്ട്‌ എന്നതു ശരിതന്നെ. (മത്തായി 5:32) എങ്കിലും, അച്ഛനമ്മ​മാർ വേർപി​രി​യു​മ്പോൾ ഇടയിൽ കുരു​ങ്ങി​പ്പോ​കുന്ന കുരു​ന്നു​മ​ന​സ്സു​ക​ളിൽ അതേൽപ്പി​ക്കുന്ന ആഘാതത്തെ കുറി​ച്ചുള്ള ചിന്ത, കഴിയു​മെ​ങ്കിൽ ദാമ്പത്യ​ബന്ധം മുറി​ഞ്ഞു​പോ​കാ​തെ സംരക്ഷി​ക്കു​ന്ന​തി​നുള്ള വഴികൾ തേടാൻ ഒരു ക്രിസ്‌ത്യാ​നി​യെ പ്രേരി​പ്പി​ക്കും.

ബൈബി​ള​നു​സ​രി​ച്ചു ജീവി​ക്കു​ന്നത്‌ ഇപ്പോൾ നിങ്ങളു​ടെ കുടും​ബത്തെ തകർന്നു​ട​യാ​തെ സംരക്ഷി​ക്കുക മാത്രമല്ല ചെയ്യു​ന്നത്‌. പിന്നെ​യോ, അതു നിങ്ങൾക്ക്‌ ഏവർക്കും നിത്യ​മായ ജീവിതം സാധ്യ​മാ​ക്കു​ക​യും ചെയ്യും. യേശു പറഞ്ഞു: “ഏകസത്യ​ദൈ​വ​മായ നിന്നെ​യും നീ അയച്ചി​രി​ക്കുന്ന യേശു​ക്രി​സ്‌തു​വി​നെ​യും അറിയു​ന്നതു തന്നേ നിത്യ​ജീ​വൻ ആകുന്നു.” (യോഹ​ന്നാൻ 17:3) ദൈവ​വ​ചനം വായി​ക്കു​ന്ന​തും അതിലെ ബുദ്ധി​യു​പ​ദേശം ബാധക​മാ​ക്കു​ന്ന​തും നിങ്ങളു​ടെ കുടും​ബ​ബന്ധം ഇഴപി​രി​യാ​തെ എന്നും നിലനിൽക്കു​മെന്ന്‌ ഉറപ്പു വരുത്തു​ന്ന​തി​നുള്ള ഒരു ഉത്തമ മാർഗ​മാണ്‌.

[അടിക്കു​റി​പ്പു​കൾ]

[8, 9 പേജു​ക​ളി​ലെ ചിത്രം]

ബൈബിൾ തത്ത്വങ്ങൾ പിൻപ​റ്റുക വഴി, ഒറ്റയ്‌ക്കുള്ള ഒരു മാതാ​വിന്‌ മക്കളെ വിജയ​പ്ര​ദ​മാ​യി വളർത്തി​ക്കൊ​ണ്ടു​വ​രാൻ കഴിയും

[10-ാം പേജിലെ ചിത്രം]

ആത്മാർഥമായ, സമനി​ല​യോ​ടു​കൂ​ടിയ താത്‌പ​ര്യം പ്രകട​മാ​ക്കി​ക്കൊണ്ട്‌ ക്രിസ്‌തീയ പുരു​ഷ​ന്മാർക്കു പലപ്പോ​ഴും ‘പിതാ​വി​ല്ലാത്ത കുട്ടി​കളെ രക്ഷിക്കാൻ’ കഴിയും