കാണാ​ത്ത​തി​ലേ​ക്കുള്ള എത്തി​നോ​ട്ടം എന്തു വെളി​പ്പെ​ടു​ത്തു​ന്നു?

മുമ്പ്‌ ദൃശ്യ​മ​ല്ലാ​തി​രുന്ന സംഗതി​ക​ളി​ലേക്ക്‌ പുതിയ പുതിയ കണ്ടുപി​ടി​ത്ത​ങ്ങ​ളു​ടെ സഹായ​ത്തോ​ടെ മനുഷ്യൻ എത്തി​നോ​ക്കു​ന്ന​തു​കൊ​ണ്ടുള്ള നേട്ട​മെ​ന്താണ്‌? മുമ്പ്‌ അജ്ഞാത​മാ​യി​രുന്ന കാര്യ​ങ്ങളെ കുറിച്ച്‌ ഒരു പരിധി വരെ കൃത്യ​ത​യോ​ടെ മനസ്സി​ലാ​ക്കാൻ അതു സഹായി​ക്കു​ന്നു.—താഴെ കൊടു​ത്തി​രി​ക്കുന്ന ചതുരം കാണുക.

ഭൂമി​യാണ്‌ പ്രപഞ്ച​ത്തി​ന്റെ കേന്ദ്ര​മെന്ന്‌ ആളുകൾ വിശ്വ​സി​ച്ചി​രുന്ന ഒരു കാലം ഉണ്ടായി​രു​ന്നു. എന്നാൽ പിന്നീട്‌ ദൂരദർശി​നി​കൾ ഉപയോ​ഗ​ത്തിൽ വന്നതോ​ടെ ഭൂമി​യുൾപ്പെടെ എല്ലാ ഗ്രഹങ്ങ​ളും സൂര്യനു ചുറ്റും പ്രത്യേ​കം പ്രത്യേ​കം ഭ്രമണ​പ​ഥ​ങ്ങ​ളിൽ കറങ്ങി​ക്കൊ​ണ്ടി​രി​ക്കു​ക​യാണ്‌ എന്നു മനസ്സി​ലാ​യി. കുറേ​ക്കൂ​ടെ അടുത്ത​കാ​ലത്ത്‌ ശക്തിയുള്ള സൂക്ഷ്‌മ​ദർശി​നി​കൾ കണ്ടുപി​ടി​ച്ച​തോ​ടെ, മനുഷ്യൻ ആറ്റത്തെ​ക്കു​റി​ച്ചു പോലും പഠിക്കു​ക​യും പ്രത്യേക ഇനം ആറ്റങ്ങൾ മറ്റിന​ങ്ങ​ളു​മാ​യി ചേർന്ന്‌ തന്മാ​ത്രകൾ എന്നു വിളി​ക്ക​പ്പെ​ടു​ന്നവ രൂപം​കൊ​ള്ളു​ന്നത്‌ എങ്ങനെ​യെന്നു മനസ്സി​ലാ​ക്കു​ക​യും ചെയ്‌തു.

ജീവന്റെ നിലനിൽപ്പിന്‌ അത്യന്താ​പേ​ക്ഷി​ത​മായ ജലത്തിന്റെ തന്മാത്രാ ഘടന പരി​ശോ​ധി​ക്കുക. രൂപര​ച​ന​യി​ലെ സവി​ശേഷത നിമിത്തം രണ്ടു ഹൈ​ഡ്രജൻ ആറ്റങ്ങൾ അതുല്യ​മായ ഒരു വിധത്തിൽ ഒരു ഓക്‌സി​ജൻ ആറ്റവു​മാ​യി കൂടി​ച്ചേർന്ന്‌ ഒരു ജലതന്മാ​ത്ര​യ്‌ക്കു രൂപം​നൽകു​ന്നു. ഒരു തുള്ളി വെള്ളത്തിൽ ഇത്തരത്തി​ലുള്ള ശതകോ​ടി​ക്ക​ണ​ക്കിന്‌ തന്മാ​ത്രകൾ ഉണ്ടായി​രി​ക്കും! ഒരു ജലതന്മാ​ത്ര പരി​ശോ​ധി​ക്കു​ക​യും വ്യത്യസ്‌ത അവസ്ഥക​ളിൻകീ​ഴി​ലെ അതിന്റെ സ്വഭാ​വ​സ​വി​ശേഷത പരിചി​ന്തി​ക്കു​ക​യും ചെയ്യു​ന്ന​തിൽനി​ന്നു നമുക്ക്‌ എന്തു പഠിക്കാ​നാ​വും?

ജലം എന്ന അത്ഭുതം

ഒരു തുള്ളി വെള്ളം കണ്ടാൽ എത്ര നിസ്സാ​ര​മാ​ണല്ലേ. എന്നാൽ വെള്ളം യഥാർഥ​ത്തിൽ വളരെ സങ്കീർണ​മാണ്‌. ഇംഗ്ലണ്ടി​ലെ ലണ്ടനി​ലുള്ള ഇംപീ​രി​യൽ കോ​ളെ​ജി​ലെ ശാസ്‌ത്ര​ലേ​ഖ​ക​നായ ഡോ. ജോൺ എംസ്ലി ജലത്തെ “ഏറ്റവു​മ​ധി​കം പഠനവി​ധേ​യ​മാ​ക്കി​യി​ട്ടുള്ള രാസപ​ദാർഥ​മെ​ങ്കി​ലും ഏറ്റവും കുറച്ചു മനസ്സി​ലാ​ക്കാൻ കഴിഞ്ഞി​ട്ടു​ള്ളത്‌” എന്നു വിളിച്ചു. ന്യൂ സയന്റിസ്റ്റ്‌ മാസിക ഇങ്ങനെ പറഞ്ഞു: “ഭൂമി​യിൽ ഉള്ളവർക്ക്‌ ഏറ്റവും പരിചി​ത​മായ ദ്രാവ​ക​മാണ്‌ ജലം. എന്നാൽ ഏറ്റവും ദുർഗ്രാ​ഹ്യ​മായ ഒന്നും കൂടി​യാണ്‌ അത്‌.”

ജലത്തിന്റെ ഘടന വളരെ ലളിത​മാ​ണെ​ങ്കി​ലും “അതി​ന്റെ​യത്ര സങ്കീർണ​മായ സ്വഭാ​വ​സ​വി​ശേ​ഷ​ത​ക​ളുള്ള മറ്റൊ​ന്നു​മില്ല” എന്ന്‌ ഡോ. എംസ്ലി വിശദീ​ക​രി​ച്ചു. ഉദാഹ​ര​ണ​ത്തിന്‌, അദ്ദേഹം പറഞ്ഞു: “H₂O ഒരു വാതകം ആയിരി​ക്കേ​ണ്ട​താണ്‌ . . . എന്നാൽ അതു ദ്രാവ​ക​മാണ്‌. കൂടാതെ . . . [സംഭവി​ക്കേ​ണ്ട​തിൽനി​ന്നു വ്യത്യ​സ്‌ത​മാ​യി] തണുത്തു​റ​യു​മ്പോൾ അതിന്റെ ഖരരൂ​പ​മായ ഐസ്‌ താഴ്‌ന്നു​പോ​കു​ന്ന​തി​നു പകരം പൊങ്ങി​ക്കി​ട​ക്കു​ന്നു.” ജലത്തിന്റെ ഈ അസാധാ​രണ സ്വഭാ​വ​ത്തെ​ക്കു​റിച്ച്‌ ‘ശാസ്‌ത്ര​പു​രോ​ഗ​തി​ക്കാ​യുള്ള അമേരി​ക്കൻ സമിതി’യുടെ ഒരു മുൻ പ്രസി​ഡന്റ്‌, ഡോ. പോൾ ഇ. ക്ലോപ്‌സ്റ്റെഗ്‌ പിൻവ​രുന്ന പ്രകാരം പ്രസ്‌താ​വി​ച്ചു:

“മത്സ്യങ്ങൾ ഉൾപ്പെ​ടെ​യുള്ള ജലജീ​വി​ക​ളു​ടെ പരിര​ക്ഷണം മുന്നിൽക​ണ്ടു​കൊ​ണ്ടുള്ള അത്ഭുത​ക​ര​മായ ഒരു രൂപര​ച​ന​യാണ്‌ ഇതെന്നു തോന്നു​ന്നു. ഹിമാ​ങ്ക​ത്തി​ലെ​ത്തു​മ്പോൾ ജലം മേൽപ്പ​റ​ഞ്ഞ​വി​ധം പ്രവർത്തി​ക്കു​ന്നി​ല്ലെ​ങ്കിൽ എന്തു സംഭവി​ക്കു​മെന്ന്‌ ഒന്നു ചിന്തി​ച്ചു​നോ​ക്കൂ. കൂടുതൽ കൂടുതൽ ഐസ്‌ രൂപം​കൊ​ള്ളു​ക​യും ഒടുവിൽ ജലാശയം മുഴുവൻ ഒരു വലിയ ഐസുകട്ട ആയിത്തീ​രു​ക​യും ചെയ്യും. ജലജീ​വി​കൾ ഒന്നാകെ അല്ലെങ്കിൽ അവയിൽ മിക്കവ​യും നശിച്ചു​പോ​കാൻ അത്‌ ഇടയാ​ക്കും.” ജലത്തിന്റെ ഈ അസാധാ​രണ സ്വഭാ​വ​സ​വി​ശേഷത “മഹത്തര​വും ഉദ്ദേശ്യ​പൂർണ​വു​മായ ഒരു മനസ്സ്‌ ഈ പ്രപഞ്ച​ത്തിൽ പ്രവർത്തി​ക്കു​ന്നുണ്ട്‌ എന്നതിന്റെ തെളി​വാണ്‌” എന്നു ഡോ. ക്ലോപ്‌സ്റ്റെഗ്‌ പറഞ്ഞു.

ജലത്തിന്റെ ഈ അസാധാ​രണ സ്വഭാ​വ​ത്തി​നുള്ള കാരണം തങ്ങൾ ഇപ്പോൾ മനസ്സി​ലാ​ക്കി​യി​രി​ക്കു​ന്ന​താ​യി ഗവേഷകർ വിചാ​രി​ക്കു​ന്നു​വെന്നു ന്യൂ സയന്റിസ്റ്റ്‌ റിപ്പോർട്ടു ചെയ്‌തു. ജലം എന്തു​കൊ​ണ്ടു വികസി​ക്കു​ന്നു എന്നതിന്‌ ഒരു കൃത്യ​മായ വിശദീ​ക​രണം നൽകാൻ ആദ്യമാ​യി അവർക്കു കഴിഞ്ഞി​രി​ക്കു​ന്നു. “ജലത്തി​ന്റെ​യും ഐസി​ന്റെ​യും തന്മാത്രാ ഘടനക​ളി​ലെ ഓക്‌സി​ജൻ ആറ്റങ്ങളു​ടെ ക്രമീ​ക​ര​ണ​ത്തി​ലാണ്‌ അതിനുള്ള വിശദീ​ക​രണം കുടി​കൊ​ള്ളു​ന്നത്‌” എന്നു ഗവേഷകർ മനസ്സി​ലാ​ക്കി.

എത്ര അത്ഭുത​കരം അല്ലേ? എത്ര പാടു​പെ​ട്ടാ​ലാണ്‌ വളരെ നിസ്സാ​ര​മെന്നു തോന്നുന്ന ഒരു ജലതന്മാ​ത്രയെ കുറിച്ചു മനുഷ്യ​നു പൂർണ​മാ​യി മനസ്സി​ലാ​ക്കാൻ കഴിയുക! നമ്മുടെ ശരീര​ഭാ​ര​ത്തി​ന്റെ ഏറിയ​ഭാ​ഗ​വും ജലമാ​ണെന്ന്‌ ഓർക്കു​മ്പോ​ഴോ? രണ്ടു മൂലക​ങ്ങ​ളു​ടെ മൂന്ന്‌ ആറ്റങ്ങൾ മാത്രം അടങ്ങി​യി​രി​ക്കുന്ന ഈ തന്മാ​ത്ര​യു​ടെ അത്ഭുത സ്വഭാ​വ​വി​ശേ​ഷ​ത​ക​ളിൽ, ‘മഹത്തര​വും ഉദ്ദേശ്യ​പൂർണ​വു​മായ ഒരു മനസ്സു പ്രവർത്തി​ക്കു​ന്നുണ്ട്‌ എന്നതിന്റെ തെളിവു’ നിങ്ങൾക്കു കാണാൻ കഴിയു​ന്നു​ണ്ടോ? എന്നിരു​ന്നാ​ലും ഒരു ജലതന്മാ​ത്ര വളരെ ചെറു​തും മറ്റനേകം തന്മാ​ത്ര​ക​ളോ​ടുള്ള താരത​മ്യ​ത്തിൽ അത്യന്തം സരളവു​മാണ്‌.

അതിസ​ങ്കീർണ​മായ തന്മാ​ത്ര​കൾ

ചില തന്മാ​ത്ര​ക​ളിൽ, ഭൂമി​യിൽ പ്രകൃ​ത്യാ കാണുന്ന 88 മൂലക​ങ്ങ​ളിൽ മിക്കവ​യു​ടെ​യും ആയിര​ക്ക​ണ​ക്കിന്‌ ആറ്റങ്ങൾ അടങ്ങി​യി​ട്ടുണ്ട്‌. ഉദാഹ​ര​ണ​ത്തിന്‌, എല്ലാ ജീവജാ​ല​ങ്ങ​ളു​ടെ​യും പാരമ്പര്യ സവി​ശേ​ഷ​തകൾ നിർണ​യി​ക്കുന്ന ജനിതക കോഡ്‌ അടങ്ങിയ ഒരു ഡിഎൻഎ (ഡീഓ​ക്‌സി റൈ​ബോ​ന്യൂ​ക്ലിക്‌ ആസിഡ്‌ എന്നതിന്റെ ചുരു​ക്ക​രൂ​പം) തന്മാ​ത്ര​യിൽ വ്യത്യസ്‌ത മൂലക​ങ്ങ​ളു​ടെ ദശലക്ഷ​ക്ക​ണ​ക്കിന്‌ ആറ്റങ്ങൾ അടങ്ങി​യി​ട്ടു​ണ്ടാ​യി​രി​ക്കാ​വു​ന്ന​താണ്‌!

അചിന്ത​നീ​യ​മാം​വി​ധം സങ്കീർണ​മെ​ങ്കി​ലും ഒരു ഡിഎൻഎ തന്മാ​ത്ര​യു​ടെ വ്യാസം എത്രയാ​ണെ​ന്നോ? വെറും 0.0000025 മില്ലി​മീ​റ്റർ! ശക്തമായ ഒരു സൂക്ഷ്‌മ​ദർശി​നി​യി​ലൂ​ടെ​യ​ല്ലാ​തെ കാണാൻ പറ്റാത്ത​വി​ധം ചെറുത്‌. ഡിഎൻഎ-യാണ്‌ ഒരു വ്യക്തി​യു​ടെ പാരമ്പര്യ സവി​ശേ​ഷ​തകൾ നിർണ​യി​ക്കു​ന്നത്‌ എന്നു ശാസ്‌ത്ര​ജ്ഞ​ന്മാർ കണ്ടെത്തി​യത്‌ 1944-ൽ മാത്ര​മാണ്‌. ഈ കണ്ടെത്തൽ അതിസ​ങ്കീർണ​മായ ഈ തന്മാ​ത്രയെ കുറി​ച്ചുള്ള ഊർജി​ത​മായ ഗവേഷ​ണ​ങ്ങൾക്ക്‌ വഴി​തെ​ളി​ച്ചു.

എന്നാൽ നിർമാ​ണ​ത്തി​നു​ത​കുന്ന അനേക തരം തന്മാ​ത്ര​ക​ളിൽ രണ്ടെണ്ണം മാത്ര​മാണ്‌ ഡിഎൻഎ-യും ജലവും. ജീവനുള്ള വസ്‌തു​ക്ക​ളി​ലും ജീവനി​ല്ലാത്ത വസ്‌തു​ക്ക​ളി​ലും പൊതു​വാ​യി കാണ​പ്പെ​ടുന്ന അനേകം തന്മാ​ത്രകൾ ഉള്ളതി​നാൽ ജീവനു​ള്ള​വ​യ്‌ക്കും അല്ലാത്ത​വ​യ്‌ക്കും ഇടയിലെ വിടവ്‌ വളരെ ചെറു​താണ്‌ എന്നു നാം നിഗമനം ചെയ്യണ​മോ?

വളരെ​ക്കാ​ല​ത്തേക്ക്‌ പലരും അങ്ങനെ കരുതി​പ്പോ​ന്നു. സൂക്ഷ്‌മ​ജീ​വി​ശാ​സ്‌ത്ര​ജ്ഞ​നായ മൈക്കൽ ഡെന്റൺ “1920-കളിലും 30-കളിലും പല വിദഗ്‌ധ​രും ജീവര​സ​ത​ന്ത്രത്തെ കുറി​ച്ചുള്ള വർധിച്ച അറിവ്‌ ഈ വിടവ്‌ നികത്തു​മെന്ന പ്രത്യാശ പ്രകടി​പ്പി​ച്ചി​രു​ന്നു” എന്നു വിശദീ​ക​രി​ക്കു​ന്നു. എന്നാൽ സമയം കടന്നു​പോ​യ​പ്പോൾ വാസ്‌ത​വ​ത്തിൽ എന്താണു തെളി​യി​ക്ക​പ്പെ​ട്ടത്‌?

ജീവൻ —സവി​ശേ​ഷ​വും അതുല്യ​വു​മാ​യത്‌

സചേത​ന​വും അചേത​ന​വു​മാ​യ​വയെ ബന്ധിപ്പി​ക്കുന്ന കണ്ണികൾ, അല്ലെങ്കിൽ രണ്ടാമ​ത്തേ​തിൽനിന്ന്‌ ആദ്യ​ത്തേ​തി​ലേ​ക്കുള്ള പടിപ​ടി​യാ​യുള്ള മാറ്റങ്ങൾക്കുള്ള തെളി​വു​കൾ കണ്ടെത്താൻ കഴിയു​മെ​ന്നാണ്‌ ശാസ്‌ത്രജ്ഞർ പ്രതീ​ക്ഷി​ച്ച​തെ​ങ്കി​ലും “1950-കളുടെ ആരംഭ​ത്തിൽ നടന്ന തന്മാത്രാ ജീവശാ​സ്‌ത്ര​ത്തി​ലെ വിപ്ലവ​ക​ര​മായ കണ്ടുപി​ടി​ത്തങ്ങൾ” സുനി​ശ്ചി​ത​മായ ഒരു വിടവു​ണ്ടെന്ന്‌ “സംശയ​ലേ​ശ​മ​ന്യെ തെളി​യി​ക്കു​ക​യാ​ണു ചെയ്‌തത്‌” എന്നു ഡെന്റൺ പ്രസ്‌താ​വി​ച്ചു. ഇപ്പോൾ ശാസ്‌ത്ര​ജ്ഞ​ന്മാർക്ക്‌ വളരെ നന്നായി മനസ്സി​ലാ​യി​ട്ടുള്ള വിസ്‌മ​യാ​വ​ഹ​മായ ഒരു വസ്‌തു​ത​യെ​ക്കു​റിച്ച്‌ ഡെന്റൺ തുടർന്ന്‌ ഇങ്ങനെ വിശദീ​ക​രി​ച്ചു:

“സചേത​ന​വും അചേത​ന​വു​മായ ലോകങ്ങൾ തമ്മിൽ ഒരു വിടവു​ണ്ടെന്നു നമുക്കി​പ്പോൾ അറിയാം. എന്നാൽ അതിലും കൂടു​ത​ലാ​യി, ആ വിടവ്‌ പ്രകൃ​തി​യി​ലെ ഏറ്റവും പ്രകട​വും അടിസ്ഥാ​ന​പ​ര​വു​മായ വിടവാ​ണെ​ന്നും നാം മനസ്സി​ലാ​ക്കി​യി​രി​ക്കു​ന്നു. ഒരു ജീവ​കോ​ശ​ത്തി​നും പരലോ മഞ്ഞുപ​ര​ലോ പോലുള്ള ഏറ്റവും ക്രമീ​കൃ​ത​മായ അജീവ വ്യവസ്ഥ​യ്‌ക്കും മധ്യേ സങ്കൽപ്പി​ക്കാൻ കഴിയു​ന്ന​തി​ലേ​ക്കും ബൃഹത്തും സമ്പൂർണ്ണ​വു​മായ ഒരു വിടവ്‌ സ്ഥിതി​ചെ​യ്യു​ന്നു.”

ഒരു തന്മാ​ത്രയെ സൃഷ്ടി​ക്കുക എന്നത്‌ വളരെ എളുപ്പ​മുള്ള സംഗതി​യാണ്‌ എന്നല്ല ഇതിന്റെ അർഥം. മോളി​ക്യൂൾസ്‌ ടു ലിവിങ്‌ സെൽസ്‌ എന്ന പുസ്‌തകം ഇങ്ങനെ വിശദീ​ക​രി​ക്കു​ന്നു: “നിർമാ​ണ​ഘ​ട​ക​ങ്ങ​ളായ ചെറിയ തന്മാ​ത്ര​ക​ളു​ടെ സംശ്ലേ​ഷണം അതിൽത്തന്നെ വളരെ സങ്കീർണ​മായ ഒന്നാണ്‌.” എന്നാൽ അത്‌ “ആദ്യത്തെ ജീവ​കോ​ശ​ത്തി​ന്റെ നിർമാ​ണ​ത്തോ​ടു താരത​മ്യ​പ്പെ​ടു​ത്തു​മ്പോൾ വെറും കുട്ടി​ക്ക​ളി​യാണ്‌.”

ബാക്‌ടീ​രി​യ​യെ​പ്പോ​ലുള്ള ഏകകോശ ജീവി​ക​ളു​ടെ കാര്യ​ത്തി​ലെ​ന്ന​പോ​ലെ കോശ​ങ്ങൾക്ക്‌ ഒറ്റയ്‌ക്ക്‌ സ്വത​ന്ത്ര​മാ​യി ജീവി​ക്കാ​നും, മനുഷ്യ​നെ​പ്പോ​ലുള്ള ബഹു​കോ​ശ​ജീ​വി​ക​ളു​ടെ ഭാഗമാ​യി പ്രവർത്തി​ക്കാ​നും കഴിയും. സാധാരണ വലിപ്പ​മുള്ള 500 കോശങ്ങൾ കൂടി​യാൽ ഈ വാക്യ​ത്തി​ന്റെ അവസാ​ന​ത്തി​ലുള്ള പൂർണ​വി​രാ​മ​ത്തി​ന്റെ അത്രയും വലിപ്പമേ ഉണ്ടാവൂ. അപ്പോൾപ്പി​ന്നെ ഒരു കോശ​ത്തി​ന്റെ പ്രവർത്ത​നങ്ങൾ നഗ്നനേ​ത്ര​ങ്ങൾക്കു ദൃശ്യമല്ല എന്നതിൽ അതിശ​യി​ക്കാ​നില്ല. എന്നാൽ ഒരു സൂക്ഷ്‌മ​ദർശി​നി​യു​ടെ സഹായ​ത്താൽ മനുഷ്യ​ശ​രീ​ര​ത്തി​ലെ ഒരു കോശം പരി​ശോ​ധി​ച്ചാൽ എന്താണു വെളി​പ്പെ​ടുക?

കോശം—അതിനു പിന്നിൽ യാദൃ​ച്ഛി​ക​ത​യോ അതോ രൂപര​ച​ന​യോ?

ഒരു കാര്യം ഉറപ്പാണ്‌, ജീവ​കോ​ശ​ങ്ങ​ളു​ടെ സങ്കീർണ​ത​യെ​പ്രതി വിസ്‌മ​യം​കൊ​ള്ളാ​തി​രി​ക്കാൻ ഒരു വ്യക്തി​ക്കാ​വില്ല. ഒരു ശാസ്‌ത്ര​ലേ​ഖകൻ ഇങ്ങനെ പ്രസ്‌താ​വി​ച്ചു: “ഏറ്റവും ലളിത​മായ ജീവ​കോ​ശം പോലും വളരണ​മെ​ങ്കിൽ ഏകോ​പി​ത​മായ വിധത്തിൽ പതിനാ​യി​ര​ക്ക​ണ​ക്കി​നു രാസ​പ്ര​വർത്ത​നങ്ങൾ നടക്കേ​ണ്ട​തുണ്ട്‌.” അദ്ദേഹം ഇങ്ങനെ ചോദി​ക്കു​ന്നു: “തീരെ ചെറിയ ഒരു കോശ​ത്തി​നു​ള്ളിൽ 20,000 രാസ​പ്ര​വർത്ത​നങ്ങൾ ഒരേസ​മ​യത്ത്‌ നിയ​ന്ത്രി​ക്ക​പ്പെ​ടു​ന്നത്‌ എങ്ങനെ​യാണ്‌?”

ഏറ്റവും ചെറിയ ജീവ​കോ​ശം പോലും “ഉത്‌കൃ​ഷ്ട​മാ​യി രൂപകൽപ്പന ചെയ്യപ്പെട്ട അതിസ​ങ്കീർണ്ണ​മായ ആയിര​ക്ക​ണ​ക്കിന്‌ തന്മാ​ത്രീയ യന്ത്രാ​വ​ലി​കൾ അടങ്ങുന്ന, പതിനാ​യി​രം​കോ​ടി ആറ്റങ്ങളാൽ നിർമി​ത​മായ അതിസൂ​ക്ഷ്‌മ​മായ ഒരു ഫാക്ടറി​തന്നെ” ആണെന്ന്‌ മൈക്കൽ ഡെന്റൺ പറഞ്ഞു. അദ്ദേഹം ഇങ്ങനെ കൂട്ടി​ച്ചേർത്തു: “മനുഷ്യൻ നിർമി​ച്ചി​ട്ടുള്ള ഏതു യന്ത്ര​ത്തെ​ക്കാ​ളും വളരെ​യേറെ സങ്കീർണ്ണ​മായ അതിന്‌ നിർജീവ ലോക​ത്തിൽ യാതൊ​രു സമാന്ത​ര​വും കാണാൻ കഴിയില്ല.”

ദ ന്യൂ​യോർക്ക്‌ ടൈം​സി​ന്റെ 2000 ഫെബ്രു​വരി 15 ലക്കം ചൂണ്ടി​ക്കാ​ട്ടി​യ​തു​പോ​ലെ കോശ​ത്തി​ന്റെ സങ്കീർണത ഇപ്പോ​ഴും ശാസ്‌ത്ര​ജ്ഞരെ കുഴപ്പി​ക്കു​ക​യാണ്‌. അതിങ്ങനെ പറഞ്ഞു: “ജീവ​കോ​ശ​ങ്ങ​ളി​ലെ നിഗൂ​ഢ​ത​യു​ടെ ചുരു​ള​ഴി​യു​ന്തോ​റും അവയിൽ നടക്കുന്ന എല്ലാ പ്രവർത്ത​ന​ങ്ങ​ളും തിട്ട​പ്പെ​ടു​ത്തുക എന്നത്‌ ജീവശാ​സ്‌ത്ര​ജ്ഞരെ സംബന്ധി​ച്ചി​ട​ത്തോ​ളം കൂടുതൽ വെല്ലു​വി​ളി നിറഞ്ഞ​താ​യി​ത്തീ​രു​ന്നു. ഒരു സാധാരണ മനുഷ്യ​കോ​ശം കാണാൻ കഴിയാ​ത്ത​വി​ധം ചെറു​താണ്‌. എന്നാൽ ഓരോ നിമി​ഷ​വും അതിന്റെ 1,00,000 ജീനു​ക​ളിൽ ഏകദേശം 30,000 എണ്ണം പ്രവർത്ത​ന​ക്ഷ​മ​മാ​കു​ക​യോ പ്രവർത്ത​ന​ര​ഹി​ത​മാ​കു​ക​യോ കോശ​ത്തി​ലെ പതിവ്‌ ജോലി​കൾ നിറ​വേ​റ്റു​ക​യോ മറ്റു കോശ​ങ്ങ​ളിൽനി​ന്നുള്ള സന്ദേശ​ങ്ങ​ളോ​ടു പ്രതി​ക​രി​ക്കു​ക​യോ ചെയ്‌തു​കൊ​ണ്ടി​രി​ക്കു​ക​യാണ്‌.”

ടൈംസ്‌ ഇങ്ങനെ ചോദി​ച്ചു: “ഇത്രയും ചെറു​തും സങ്കീർണ​വു​മായ ഒരു സംവി​ധാ​നത്തെ എങ്ങനെ​യാണ്‌ അപഗ്ര​ഥി​ക്കാൻ കഴിയുക? ഇനി വളരെ ശ്രമം ചെലുത്തി ഒരു മനുഷ്യ​കോ​ശത്തെ കുറിച്ചു പൂർണ​മാ​യി മനസ്സി​ലാ​ക്കി എന്നുത​ന്നെ​യി​രി​ക്കട്ടെ, അത്‌ ഒന്നുമാ​കില്ല, കാരണം മനുഷ്യ​ശ​രീ​ര​ത്തിൽ 200 വ്യത്യ​സ്‌ത​തരം കോശങ്ങൾ എങ്കിലു​മുണ്ട്‌.”

“സൃഷ്ടി​യി​ലെ യഥാർഥ എൻജി​നു​കൾ” എന്ന ഒരു ലേഖന​ത്തിൽ നേച്ചർ മാസിക ശരീര​ത്തി​ലെ ഓരോ കോശ​ത്തി​ന്റെ​യും ഉള്ളിൽ തീരെ ചെറിയ മോട്ട​റു​കൾ കണ്ടെത്തി​യി​ട്ടു​ള്ള​താ​യി റിപ്പോർട്ടു ചെയ്‌തു. ഇവ തിരി​യു​മ്പോ​ഴാണ്‌ കോശ​ങ്ങ​ളു​ടെ ഊർജ​സ്രോ​ത​സ്സായ അഡി​നോ​സിൻ ട്രൈ​ഫോ​സ്‌ഫേറ്റ്‌ ഉത്‌പാ​ദി​പ്പി​ക്ക​പ്പെ​ടു​ന്നത്‌. ഒരു ശാസ്‌ത്രജ്ഞൻ ഇങ്ങനെ പറഞ്ഞു: “കോശ​ങ്ങ​ളിൽ നാം കാണുന്ന തന്മാ​ത്രീയ സംവി​ധാ​ന​ങ്ങൾക്കു സമാന​മായ തന്മാ​ത്രീയ യന്ത്രസം​വി​ധാ​നങ്ങൾ രൂപകൽപ്പന ചെയ്‌തു നിർമി​ക്കാൻ നാം പഠിച്ചാൽ എന്തൊ​ക്കെ​യാ​ണു നമുക്കു നേടാ​നാ​വുക?”

കോശ​ത്തി​ന്റെ സൃഷ്ടി​പ​ര​മായ പ്രാപ്‌തി​യെ കുറിച്ചു ചിന്തി​ക്കുക! നമ്മുടെ ശരീര​ത്തി​ലെ ഒറ്റയൊ​രു കോശ​ത്തി​ന്റെ ഡിഎൻഎ-യിൽ അടങ്ങി​യി​ട്ടുള്ള വിവരങ്ങൾ പകർത്ത​ണ​മെ​ങ്കിൽ ഈ താളി​ന്റെ​യത്ര വലിപ്പ​മുള്ള ഏകദേശം പത്തുലക്ഷം താളുകൾ വേണ്ടി​വ​രും! അതിലും അതിശ​യ​ക​ര​മായ ഒരു സംഗതി​യുണ്ട്‌. ഒരു കോശം വിഭജിച്ച്‌ ഒരു പുതി​യ​കോ​ശ​ത്തി​നു രൂപം​നൽകുന്ന ഓരോ പ്രാവ​ശ്യ​വും ആദ്യത്തെ കോശ​ത്തി​ലുള്ള ഈ വിവരങ്ങൾ അതേപടി പുതിയ കോശ​ത്തി​ലേക്കു കൈമാ​റ​പ്പെ​ടു​ന്നു. ഓരോ കോശ​ത്തി​ലും—നിങ്ങളു​ടെ ശരീര​ത്തി​ലെ 100 ലക്ഷം കോടി കോശ​ങ്ങ​ളി​ലും—ഈ വിവരങ്ങൾ പ്രോ​ഗ്രാം ചെയ്യ​പ്പെ​ട്ടത്‌ എങ്ങനെ​യാ​ണെ​ന്നാണ്‌ നിങ്ങൾ കരുതു​ന്നത്‌? വെറും യാദൃ​ച്ഛി​ക​ത​യാ​ലോ, അതോ ഒരു വിദഗ്‌ധ രൂപര​ച​യി​താ​വി​ന്റെ പ്രവർത്ത​ന​ത്താ​ലോ?

ജീവശാ​സ്‌ത്ര​ജ്ഞ​നായ റസ്സൽ ചാൾസ്‌ ആർട്ടി​സ്റ്റി​ന്റെ അതേ നിഗമ​ന​ത്തിൽ ഒരുപക്ഷേ നിങ്ങളും എത്തിയി​ട്ടു​ണ്ടാ​കും. അദ്ദേഹം പറഞ്ഞു: “ഒരു കോശ​ത്തി​ന്റെ ഉത്‌പ​ത്തി​ക്കു പിന്നിൽ ബുദ്ധി​ശക്തി അഥവാ ഒരു മനസ്സ്‌ ഉണ്ടായി​രു​ന്നു എന്ന യുക്തി​സ​ഹ​മായ നിഗമ​ന​ത്തിൽ എത്താത്തി​ട​ത്തോ​ളം കാലം കോശ​ത്തി​ന്റെ ഉത്ഭവവും അതിന്റെ തുടർച്ച​യാ​യുള്ള പ്രവർത്ത​ന​വും വിശദീ​ക​രി​ക്കുക എന്നത്‌ ഭീമമായ അല്ലെങ്കിൽ പരിഹാ​ര​മി​ല്ലാത്ത ഒരു പ്രശ്‌ന​മാ​യി അവശേ​ഷി​ക്കും.”

കാര്യ​ങ്ങ​ളു​ടെ വിസ്‌മ​യ​ക​ര​മായ ക്രമം

വർഷങ്ങൾക്കു മുമ്പ്‌, ഹാർവാർഡ്‌ സർവക​ലാ​ശാ​ല​യി​ലെ ഭൂഗർഭ​ശാ​സ്‌ത്ര പ്രൊ​ഫസർ ആയിരുന്ന സമയത്ത്‌ കെർട്ട്‌ലി എഫ്‌. മേഥർ ഇങ്ങനെ​യൊ​രു നിഗമ​ന​ത്തിൽ എത്തുക​യു​ണ്ടാ​യി: “നമ്മുടെ പ്രപഞ്ചം യാദൃ​ച്ഛി​ക​ത​യു​ടെ​യും അസ്ഥിര​ത​യു​ടെ​യും ഒന്നല്ല, മറിച്ച്‌ നിയമ​ത്തി​ന്റെ​യും ക്രമത്തി​ന്റെ​യും ഒന്നാണ്‌. അതിന്റെ നടത്തിപ്പ്‌ അത്യന്തം യുക്തി​സ​ഹ​വും അങ്ങേയറ്റം ആദരവ്‌ അർഹി​ക്കു​ന്ന​തു​മാണ്‌. എല്ലാ മൂലക​ങ്ങൾക്കും തുടർച്ച​യായ അറ്റോ​മിക സംഖ്യകൾ നൽകുക സാധ്യ​മാ​ക്കി​ത്തീർക്കുന്ന പ്രകൃ​തി​യി​ലെ വിസ്‌മ​യ​ക​ര​മായ ഗണിത​ശാ​സ്‌ത്ര സംവി​ധാ​നം പരിചി​ന്തി​ക്കുക.”

“പ്രകൃ​തി​യി​ലെ” ആ “വിസ്‌മ​യ​ക​ര​മായ ഗണിത​ശാ​സ്‌ത്ര സംവി​ധാ​നം” നമുക്കി​പ്പോൾ ചുരു​ക്ക​മാ​യി പരിചി​ന്തി​ക്കാം. സ്വർണ്ണം, വെള്ളി, ചെമ്പ്‌, വെളു​ത്തീ​യം, ഇരുമ്പ്‌ എന്നീ മൂലകങ്ങളെക്കുറിച്ച്‌a പുരാ​ത​ന​കാ​ല​ത്തു​ള്ള​വർക്ക്‌ അറിയാ​മാ​യി​രു​ന്നു. മധ്യയു​ഗ​ങ്ങ​ളി​ലെ ആൽക്കെ​മി​സ്റ്റു​കൾ ആർസെ​നിക്‌, ബിസ്‌മത്ത്‌, ആന്റിമണി എന്നിവ കണ്ടെത്തി. പിന്നീട്‌ 1700-കളിൽ മറ്റു പല മൂലക​ങ്ങ​ളും കണ്ടെത്ത​പ്പെട്ടു. ഓരോ മൂലക​ത്തി​ന്റെ​യും വ്യതി​രി​ക്ത​മായ വർണരാ​ജി​യെ വേർതി​രി​ച്ചു കാണി​ക്കാൻ കഴിവുള്ള സ്‌പെ​ക്‌​ട്രോ​സ്‌കോപ്‌ എന്ന ഉപകര​ണ​ത്തി​ന്റെ സഹായ​ത്തോ​ടെ 1863-ൽ ഇൻഡിയം കണ്ടുപി​ടി​ച്ചു. കണ്ടുപി​ടി​ക്ക​പ്പെട്ട 63-ാമത്തെ മൂലകം ആയിരു​ന്നു അത്‌.

ആ സമയത്ത്‌ റഷ്യൻ രസത​ന്ത്ര​ജ്ഞ​നായ ഡിമി​ട്രി ഇവാ​നോ​വിച്ച്‌ മെൻഡ​ലീ​യേവ്‌ മൂലകങ്ങൾ യാദൃ​ച്ഛി​ക​മാ​യി ഉണ്ടായതല്ല എന്ന നിഗമ​ന​ത്തി​ലെത്തി. ഒടുവിൽ 1869 മാർച്ച്‌ 18-ന്‌ “മൂലക​ങ്ങ​ളു​ടെ വ്യവസ്ഥ സംബന്ധിച്ച ബാഹ്യ​രേഖ” എന്ന അദ്ദേഹ​ത്തി​ന്റെ പ്രബന്ധം റഷ്യൻ രസത​ന്ത്ര​സ​മി​തി​യു​ടെ മുമ്പാകെ വായിച്ചു കേൾപ്പി​ച്ചു. അതിൽ അദ്ദേഹം ഇങ്ങനെ പറഞ്ഞു: ‘യാദൃ​ച്ഛി​ക​ത​യിൽ അല്ല, മറിച്ച്‌ നിശ്ചി​ത​വും കൃത്യ​വു​മായ ഏതെങ്കി​ലു​മൊ​രു തത്ത്വത്തിൽ അധിഷ്‌ഠി​ത​മായ ഒരു വ്യവസ്ഥ സ്ഥാപി​ക്കാൻ ഞാൻ ആഗ്രഹി​ക്കു​ന്നു.’

വിഖ്യാ​ത​മാ​യ ഈ പ്രബന്ധ​ത്തിൽ മെൻഡ​ലീ​യേവ്‌ പിൻവ​രു​ന്ന​പ്ര​കാ​രം പ്രവചി​ച്ചി​രു​ന്നു: “അജ്ഞാത​മായ അനേകം മൂലകങ്ങൾ ഇനിയും കണ്ടെത്ത​പ്പെ​ടു​മെന്നു നാം പ്രതീ​ക്ഷി​ക്കേ​ണ്ട​തുണ്ട്‌; ഉദാഹ​ര​ണ​ത്തിന്‌ അലൂമി​നി​യം, സിലിക്കൺ എന്നിവ​യോ​ടു സദൃശ​മായ, അറ്റോ​മിക ഭാരം 65-നും 75-നും ഇടയ്‌ക്കു​ള്ളവ.” മെൻഡ​ലീ​യേവ്‌ 16 പുതിയ മൂലക​ങ്ങൾക്കുള്ള സ്ഥലം ഒഴിച്ചി​ട്ടു. ഈ പ്രവച​ന​ങ്ങൾക്ക്‌ തെളിവ്‌ ആവശ്യ​പ്പെ​ട്ട​പ്പോൾ അദ്ദേഹം മറുപടി പറഞ്ഞു: “ഇതിനു തെളി​വി​ന്റെ ആവശ്യ​മില്ല. പ്രകൃതി നിയമങ്ങൾ വ്യാകരണ നിയമ​ങ്ങ​ളിൽനി​ന്നു വ്യത്യ​സ്‌ത​മാണ്‌. അവ അപവാ​ദ​ങ്ങൾക്ക്‌ ഇടം നൽകു​ന്നില്ല.” അദ്ദേഹം ഇങ്ങനെ കൂട്ടി​ച്ചേർത്തു: “എന്റെ ഈ അജ്ഞാത മൂലക​ങ്ങളെ കണ്ടെത്തി​ക്ക​ഴി​യു​മ്പോൾ കൂടുതൽ ആളുകൾ ഞങ്ങൾ പറയു​ന്ന​തി​നു ശ്രദ്ധ നൽകി​യേ​ക്കാം.”

അതുതന്നെ സംഭവി​ച്ചു! എൻ​സൈ​ക്ലോ​പീ​ഡിയ അമേരി​ക്കാന വിശദീ​ക​രി​ക്കു​ന്നു: “അടുത്ത 15 വർഷത്തി​നി​ട​യിൽ മെൻഡ​ലീ​യേവ്‌ മുൻകൂ​ട്ടി​പ്പ​റ​ഞ്ഞ​വ​യോട്‌ വളരെ അടുത്തു സാമ്യ​മുള്ള ഗുണധർമ​ങ്ങ​ളോ​ടു​കൂ​ടിയ ഗാലിയം, സ്‌കാൻഡി​യം, ജെർമേ​നി​യം എന്നിവ​യു​ടെ കണ്ടെത്തൽ ആവർത്ത​ന​പ്പ​ട്ടി​ക​യു​ടെ സാധുത സ്ഥാപി​ക്കു​ക​യും അതിന്റെ ഉപജ്ഞാ​താ​വി​ന്റെ കീർത്തി വർധി​പ്പി​ക്കു​ക​യും ചെയ്‌തു.” 20-ാം നൂറ്റാ​ണ്ടി​ന്റെ ആദ്യപാ​ദ​ത്തോ​ടു കൂടി അസ്‌തി​ത്വ​ത്തി​ലുള്ള എല്ലാ മൂലക​ങ്ങ​ളെ​യും കണ്ടെത്തി​ക്ക​ഴി​ഞ്ഞി​രു​ന്നു.

വ്യക്തമാ​യും, രസതന്ത്ര ഗവേഷ​ക​നായ എൽമെർ ഡബ്ല്യു. മൗറർ നിരീ​ക്ഷി​ച്ച​തു​പോ​ലെ, “മനോ​ഹ​ര​മായ ഈ ക്രമീ​ക​രണം വെറും യാദൃ​ച്ഛി​ക​ത​യാ​യി​രി​ക്കാൻ ഒരു സാധ്യ​ത​യു​മില്ല.” മൂലക​ങ്ങ​ളു​ടെ ക്രമം യാദൃ​ച്ഛി​ക​ത​യു​ടെ ഫലമാ​യി​രി​ക്കാ​നുള്ള സാധ്യ​തയെ കുറിച്ച്‌ രസത​ന്ത്ര​ശാ​സ്‌ത്ര പ്രൊ​ഫ​സ​റായ ജോൺ ക്ലീവ്‌ലൻഡ്‌ കോഥ്‌റൻ ഇങ്ങനെ പറഞ്ഞു: “[മെൻഡ​ലീ​യേവ്‌] മുൻകൂ​ട്ടി​പ്പറഞ്ഞ എല്ലാ മൂലക​ങ്ങ​ളും കണ്ടെത്ത​പ്പെട്ടു എന്നതും അവയ്‌ക്ക്‌ അദ്ദേഹം പ്രവചി​ച്ച​തി​നോട്‌ വളരെ അടുത്തു സാമ്യ​മുള്ള ഗുണധർമങ്ങൾ തന്നെയാണ്‌ ഉണ്ടായി​രു​ന്നത്‌ എന്നതും അത്തരത്തി​ലുള്ള ഏതൊരു സാധ്യ​ത​യെ​യും അസ്ഥാന​ത്താ​ക്കു​ന്നു. അദ്ദേഹ​ത്തി​ന്റെ മഹത്തായ സാമാ​ന്യ​വ​ത്‌ക​ര​ണത്തെ ഒരിക്ക​ലും ‘ആവർത്തന യാദൃ​ച്ഛി​കത’ എന്നു വിളി​ക്കു​ന്നില്ല. മറിച്ച്‌ അത്‌ ‘ആവർത്തന നിയമം’ ആണ്‌.”

മൂലക​ങ്ങ​ളെ കുറി​ച്ചും പ്രപഞ്ച​ത്തി​ലുള്ള സകലതും ഉണ്ടാകാൻ ഇടയാ​ക്കിയ അവയുടെ സംയോ​ജ​ന​ങ്ങളെ കുറി​ച്ചു​മുള്ള ഗഹനമായ പഠനം കേം​ബ്രി​ഡ്‌ജ്‌ സർവക​ലാ​ശാ​ല​യി​ലെ ഗണിത​ശാ​സ്‌ത്ര പ്രൊ​ഫ​സ​റാ​യി​രുന്ന പി. എ. എം. ഡിറക്ക്‌ എന്ന പ്രശസ്‌ത ഭൗതി​ക​ശാ​സ്‌ത്ര​ജ്ഞനെ ഇപ്രകാ​രം പറയാൻ പ്രേരി​പ്പി​ച്ചു: “ദൈവം ഗണിത​ശാ​സ്‌ത്ര​ജ്ഞ​രിൽ അഗ്രഗ​ണ്യ​നാണ്‌ എന്നും, പ്രപഞ്ച​ത്തി​ന്റെ നിർമാ​ണ​ത്തിൽ അവൻ വളരെ ഉയർന്ന ഗണിത​ശാ​സ്‌ത്ര തത്ത്വങ്ങൾ ഉപയോ​ഗി​ച്ചി​ട്ടുണ്ട്‌ എന്നും പറഞ്ഞു​കൊണ്ട്‌ ഇതിന്‌ ഒരു വിശദീ​ക​രണം നൽകാൻ കഴി​ഞ്ഞേ​ക്കും.”

അതിസൂ​ക്ഷ്‌മ ആറ്റങ്ങളും തന്മാ​ത്ര​ക​ളും ജീവ​കോ​ശ​ങ്ങ​ളും മുതൽ നമ്മുടെ ദൃഷ്ടി​പ​ഥ​ത്തി​ന​പ്പു​റം സ്ഥിതി​ചെ​യ്യുന്ന ഭീമാ​കാ​ര​ങ്ങ​ളായ നക്ഷത്ര​നി​ബിഡ ഗാലക്‌സി​കൾ വരെ അടങ്ങുന്ന അദൃശ്യ​ലോ​ക​ത്തി​ലേ​ക്കുള്ള എത്തി​നോ​ട്ടം തികച്ചും താത്‌പ​ര്യ​ജ​നകം തന്നെ! ഈ എത്തി​നോ​ട്ടം നാം എത്ര നിസ്സാ​ര​രാണ്‌ എന്ന വസ്‌തു​തയെ എടുത്തു​കാ​ണി​ക്കു​ന്നു. ഇതു നിങ്ങളെ വ്യക്തി​പ​ര​മാ​യി എങ്ങനെ ബാധി​ക്കു​ന്നു? ഈ സംഗതി​ക​ളൊ​ക്കെ എന്താണു കാണി​ക്കു​ന്നത്‌? നിങ്ങളു​ടെ ഭൗതിക നേത്ര​ങ്ങൾക്കു കാണാ​വു​ന്ന​തി​ലും കൂടുതൽ നിങ്ങൾ കാണു​ന്നു​വോ?

[അടിക്കു​റിപ്പ്‌]

[5-ാം പേജിലെ ചതുരം/ചിത്രങ്ങൾ]

കാഴ്‌ചയെ വല്ലുന്ന വേഗം

കുതിര കുതി​ച്ചു​പാ​യു​ന്നതു വളരെ വേഗത്തി​ലാ​യ​തി​നാൽ ഏതെങ്കി​ലും ഒരു പ്രത്യേക സമയത്ത്‌ അതു നാലു​കാ​ലും ഒന്നിച്ച്‌ ഉയർത്താ​റു​ണ്ടോ എന്നതി​നെ​ച്ചൊ​ല്ലി​യുള്ള വാദ​പ്ര​തി​വാ​ദങ്ങൾ 19-ാം നൂറ്റാ​ണ്ടിൽ നിലനി​ന്നി​രു​ന്നു. എഡ്വേർഡ്‌ മൈ​ബ്രിജ്‌ എന്ന വ്യക്തി 1872-ൽ ആരംഭിച്ച ഫോ​ട്ടോ​ഗ്രാ​ഫിക്‌ പരീക്ഷ​ണങ്ങൾ ഒടുവിൽ ഈ പ്രശ്‌നം പരിഹ​രി​ക്കു​ന്ന​തി​ലേക്കു നയിച്ചു. ആദ്യത്തെ ഹൈസ്‌പീഡ്‌ ചലച്ചി​ത്രങ്ങൾ എടുക്കു​ന്ന​തി​നുള്ള ഒരു സാങ്കേ​തിക വിദ്യ അദ്ദേഹം വികസി​പ്പി​ച്ചെ​ടു​ത്തു.

മൈ​ബ്രിജ്‌ 24 ക്യാമ​റകൾ അൽപ്പം വിട്ടു​വിട്ട്‌ നിരത്തി​വെച്ചു. ഓരോ ക്യാമ​റ​യു​ടെ​യും ഷട്ടറിൽനിന്ന്‌ ഒരു ചരട്‌ പന്തയമാർഗ​ത്തി​നു കുറുകെ വലിച്ചു കെട്ടി. കുതിര ഓടു​മ്പോൾ ചരടു​ക​ളിൽ അതിന്റെ കാൽ തട്ടി ക്യാമ​റ​ക​ളു​ടെ ഷട്ടറുകൾ ഒന്നിനു​പു​റകേ ഒന്നായി തുറക്കു​മാ​യി​രു​ന്നു. ഇങ്ങനെ എടുത്ത ഫോ​ട്ടോ​കൾ പരി​ശോ​ധി​ച്ച​പ്പോൾ ചില സമയങ്ങ​ളിൽ കുതിര നാലു​കാ​ലും ഒപ്പം ഉയർത്താ​റു​ണ്ടെന്നു തെളിഞ്ഞു.

[കടപ്പാട്‌]

Courtesy George Eastman House

[7-ാം പേജിലെ ചിത്രം]

വെള്ളം തണുത്തു​റഞ്ഞ്‌ ഐസാ​കു​മ്പോൾ അത്‌ താഴ്‌ന്നു​പോ​കു​ന്ന​തി​നു പകരം പൊങ്ങി​ക്കി​ട​ക്കു​ന്നത്‌ എന്തു​കൊണ്ട്‌?

[7-ാം പേജിലെ ചിത്രം]

ഒരു ഡിഎൻഎ തന്മാ​ത്ര​യു​ടെ വ്യാസം വെറും 0.0000025 മില്ലി​മീ​റ്റർ ആണ്‌. എങ്കിലും അതിൽ അടങ്ങി​യി​രി​ക്കുന്ന വിവരങ്ങൾ പകർത്ത​ണ​മെ​ങ്കിൽ പത്തുലക്ഷം താളുകൾ വേണ്ടി​വ​രും

[കടപ്പാട്‌]

Computerized model of DNA: Donald Struthers/Tony Stone Images

[8-ാം പേജിലെ ചിത്രം]

ശരീരത്തിലെ 100 ലക്ഷം കോടി കോശ​ങ്ങ​ളിൽ ഓരോ​ന്നി​ലും ഏകോ​പി​ത​മായ വിധത്തിൽ പതിനാ​യി​ര​ക്ക​ണ​ക്കി​നു രാസ​പ്ര​വർത്ത​നങ്ങൾ നടക്കുന്നു

[കടപ്പാട്‌]

Copyright Dennis Kunkel, University of Hawaii

[9-ാം പേജിലെ ചിത്രങ്ങൾ]

റഷ്യൻ രസത​ന്ത്ര​ജ്ഞ​നായ മെൻഡ​ലീ​യേവ്‌ മൂലകങ്ങൾ യാദൃ​ച്ഛി​ക​മാ​യി ഉണ്ടായതല്ല എന്ന നിഗമ​ന​ത്തി​ലെ​ത്തി

[കടപ്പാട്‌]

Courtesy National Library of Medicine