സ്വന്തം മനസ്സാ​ക്ഷി​യെ നിങ്ങൾക്ക്‌ ആശ്രയി​ക്കാൻ കഴിയു​മോ?

സാധാരണ ഗതിയിൽ, വടക്കു​നോ​ക്കി യന്ത്രം ആശ്രയ​യോ​ഗ്യ​മായ ഒരു ഉപകര​ണ​മാണ്‌. ഭൗമ കാന്തിക മണ്ഡലത്തി​ന്റെ സ്വാധീ​ന​ത്താൽ അതിന്റെ സൂചി എല്ലായ്‌പോ​ഴും വടക്കോ​ട്ടു തിരി​ഞ്ഞി​രി​ക്കു​ന്നു. അതു​കൊണ്ട്‌ വഴികാ​ട്ടാ​നാ​യി യാതൊ​രു ഭൂസ്ഥാ​നീയ ചിഹ്നങ്ങ​ളും ഇല്ലാത്ത​പ്പോൾ, ദിശ അറിയാൻ സഞ്ചാരി​കൾക്ക്‌ വടക്കു​നോ​ക്കി യന്ത്രത്തെ ആശ്രയി​ക്കാൻ കഴിയും. എന്നാൽ വടക്കു​നോ​ക്കി യന്ത്രത്തിന്‌ അടുത്ത്‌ ഒരു കാന്തിക വസ്‌തു വെച്ചാൽ എന്താണു സംഭവി​ക്കുക? വടക്കോ​ട്ടു തിരി​ഞ്ഞി​രി​ക്കു​ന്ന​തി​നു പകരം സൂചി കാന്തത്തി​ന്റെ നേർക്കു തിരി​യും. അത്‌ മേലാൽ ആശ്രയ​യോ​ഗ്യ​മായ ഒരു വഴികാ​ട്ടി​യല്ല.

മനുഷ്യ മനസ്സാ​ക്ഷിക്ക്‌ സമാന​മായ ചിലതു സംഭവി​ക്കാ​വു​ന്ന​താണ്‌. ആശ്രയ​യോ​ഗ്യ​മായ ഒരു വഴികാ​ട്ടി​യാ​യി ഉപകരി​ക്കാൻ സ്രഷ്ടാവ്‌ നമ്മിൽ ആ പ്രാപ്‌തി ഉൾനട്ടു. നാം ദൈവ​ത്തി​ന്റെ പ്രതി​ച്ഛാ​യ​യിൽ സൃഷ്ടി​ക്ക​പ്പെ​ട്ടി​രി​ക്കു​ന്ന​തി​നാൽ, തീരു​മാ​നങ്ങൾ എടു​ക്കേ​ണ്ട​തു​ള്ള​പ്പോൾ മനസ്സാക്ഷി എല്ലായ്‌പോ​ഴും നമ്മെ ശരിയായ ദിശ ചൂണ്ടി​ക്കാ​ണി​ക്കേ​ണ്ട​താണ്‌. ദൈവ​ത്തി​ന്റെ ധാർമിക നിലവാ​രങ്ങൾ പ്രതി​ഫ​ലി​പ്പി​ക്കാൻ അതു നമ്മെ പ്രേരി​പ്പി​ക്കേ​ണ്ട​താണ്‌. (ഉല്‌പത്തി 1:27) മിക്ക​പ്പോ​ഴും അത്‌ അപ്രകാ​രം ചെയ്യുന്നു. ദൃഷ്ടാ​ന്ത​ത്തിന്‌, ദൈവ​ത്തി​ന്റെ വെളി​പ്പെ​ടു​ത്ത​പ്പെട്ട നിയമം ഇല്ലാത്ത ചിലർ പോലും “നിയമം അനുശാ​സി​ക്കു​ന്ന​വയെ പ്രകൃ​ത്യാ അനുഷ്‌ഠി​ക്കു​ന്നു” എന്ന്‌ ക്രിസ്‌തീയ അപ്പൊ​സ്‌ത​ല​നായ പൗലൊസ്‌ എഴുതി. അവർ അപ്രകാ​രം ചെയ്യു​ന്നത്‌ എന്തു​കൊണ്ട്‌? എന്തു​കൊ​ണ്ടെ​ന്നാൽ, “അവരുടെ മനസ്സാക്ഷി ഇതിന്നു സാക്ഷ്യം വഹിക്കു​ന്നു.”—റോമർ 2:14, 15, ഓശാന ബൈബിൾ.

എന്നാൽ, വേണ്ട​പ്പോ​ഴെ​ല്ലാം മനസ്സാക്ഷി പ്രതി​ക​രി​ക്കു​ന്നില്ല. മാനുഷ അപൂർണത നിമിത്തം, തെറ്റാ​ണെന്ന്‌ നമുക്ക്‌ അറിയാ​വുന്ന കാര്യങ്ങൾ ചെയ്യാൻ നാം ചായ്‌വ്‌ ഉള്ളവരാണ്‌. “ഉള്ളം​കൊ​ണ്ടു ഞാൻ ദൈവ​ത്തി​ന്റെ ന്യായ​പ്ര​മാ​ണ​ത്തിൽ രസിക്കു​ന്നു” എന്ന്‌ പൗലൊസ്‌ സമ്മതിച്ചു. “എങ്കിലും എന്റെ ബുദ്ധി​യു​ടെ പ്രമാ​ണ​ത്തോ​ടു പോരാ​ടുന്ന വേറൊ​രു പ്രമാണം ഞാൻ എന്റെ അവയവ​ങ്ങ​ളിൽ കാണുന്നു; അതു എന്റെ അവയവ​ങ്ങ​ളി​ലുള്ള പാപ​പ്ര​മാ​ണ​ത്തി​ന്നു എന്നെ ബദ്ധനാ​ക്കി​ക്ക​ള​യു​ന്നു.” (റോമർ 7:22, 23) നാം തെറ്റായ പ്രവണ​ത​കൾക്ക്‌ കൂടെ​ക്കൂ​ടെ വഴി​പ്പെ​ടു​ന്നെ​ങ്കിൽ നമ്മുടെ മനസ്സാക്ഷി ക്രമേണ മരവിച്ച്‌ ഒടുവിൽ അത്തരം പ്രവർത്തനം തെറ്റാ​ണെന്ന്‌ നമ്മോടു പറയു​ന്നത്‌ നിർത്തി​യേ​ക്കാം.

എന്നാൽ, അപൂർണർ ആണെങ്കി​ലും നമുക്ക്‌ നമ്മുടെ മനസ്സാ​ക്ഷി​യെ ദൈവ​ത്തി​ന്റെ നിലവാ​ര​ങ്ങൾക്കു ചേർച്ച​യിൽ കൊണ്ടു​വ​രാൻ കഴിയും. അപ്രകാ​രം ചെയ്യു​ന്നത്‌ തീർച്ച​യാ​യും മർമ​പ്ര​ധാ​ന​മാണ്‌. ശുദ്ധമായ, ശരിയാ​യി പരിശീ​ലി​പ്പി​ക്ക​പ്പെട്ട ഒരു മനസ്സാക്ഷി നമ്മെ ദൈവ​വു​മാ​യുള്ള ഒരു ഊഷ്‌മള വ്യക്തിഗത ബന്ധത്തി​ലേക്ക്‌ നയിക്കുക മാത്രമല്ല, അതു നമ്മുടെ രക്ഷയ്‌ക്ക്‌ അനിവാ​ര്യ​വു​മാണ്‌. (എബ്രായർ 10:22; 1 പത്രൊസ്‌ 1:15, 16) തന്നെയു​മല്ല, നമുക്കു ജീവി​ത​ത്തിൽ സമാധാ​ന​വും സംതൃ​പ്‌തി​യും കൈവ​രു​ത്തുന്ന ജ്ഞാനപൂർവ​ക​മായ തീരു​മാ​നങ്ങൾ എടുക്കാൻ നല്ല മനസ്സാക്ഷി നമ്മെ സഹായി​ക്കും. അത്തരം മനസ്സാ​ക്ഷി​യുള്ള ഒരു വ്യക്തിയെ കുറിച്ച്‌ സങ്കീർത്ത​ന​ക്കാ​രൻ ഇങ്ങനെ പറഞ്ഞു: “തന്റെ ദൈവ​ത്തി​ന്റെ ന്യായ​പ്ര​മാ​ണം അവന്റെ ഹൃദയ​ത്തിൽ ഉണ്ടു; അവന്റെ കാലടി​കൾ വഴുതു​ക​യില്ല.”—സങ്കീർത്തനം 37:31.

മനസ്സാ​ക്ഷി​യെ പരിശീ​ലി​പ്പി​ക്കൽ

നിയമ​ങ്ങ​ളു​ടെ ഒരു പട്ടിക കേവലം മനപ്പാ​ഠ​മാ​ക്കി​യിട്ട്‌ അവയോട്‌ കർശന​മാ​യി പറ്റിനിൽക്കു​ന്നതു മാത്രമല്ല മനസ്സാ​ക്ഷി​യെ പരിശീ​ലി​പ്പി​ക്കു​ന്ന​തിൽ ഉൾപ്പെ​ട്ടി​രി​ക്കു​ന്നത്‌. യേശു​വി​ന്റെ നാളിലെ പരീശ​ന്മാർ അതാണ്‌ ചെയ്‌തത്‌. ആ മത നേതാ​ക്ക​ന്മാർക്ക്‌ ന്യായ​പ്ര​മാ​ണം അറിയാ​മാ​യി​രു​ന്നു. ന്യായ​പ്ര​മാ​ണം ലംഘി​ക്കാ​തി​രി​ക്കാൻ ആളുകളെ സഹായി​ക്കുക എന്ന ലക്ഷ്യത്തിൽ അവർ ബൃഹത്തായ ഒരു പാരമ്പ​ര്യം വികസി​പ്പി​ച്ചെ​ടു​ത്തു. തത്‌ഫ​ല​മാ​യി, യേശു​വി​ന്റെ ശിഷ്യ​ന്മാർ ശബത്തു ദിവസം ധാന്യ​മ​ണി​കൾ പറിച്ചു തിന്ന​പ്പോൾ അതിനെ ചോദ്യം ചെയ്യാൻ പരീശ​ന്മാർ തിടുക്കം കൂട്ടി. ശബത്തു ദിവസം യേശു ഒരു മനുഷ്യ​ന്റെ വരണ്ട കൈ സൗഖ്യ​മാ​ക്കി​യ​പ്പോൾ അവർ യേശു​വി​നെ എതിർത്തു. (മത്തായി 12:1, 2, 9, 10) പരീശ​ന്മാ​രു​ടെ പാരമ്പര്യ പ്രകാരം ആ പ്രവൃ​ത്തി​കൾ രണ്ടും നാലാ​മത്തെ കൽപ്പന​യു​ടെ ലംഘന​മാ​യി​രു​ന്നു.—പുറപ്പാ​ടു 20:8-11.

സ്‌പഷ്ട​മാ​യും, പരീശ​ന്മാർ ന്യായ​പ്ര​മാ​ണം പഠിച്ചി​രു​ന്നു. എന്നാൽ അവരുടെ മനസ്സാക്ഷി ദൈവ​ത്തി​ന്റെ നിലവാ​ര​ങ്ങ​ളു​മാ​യി യോജി​പ്പിൽ ആയിരു​ന്നോ? തീർച്ച​യാ​യു​മല്ല! എന്തിന്‌, ശബത്ത്‌ നിയമ​ത്തി​ന്റെ ഒരു ഞെട്ടി​പ്പി​ക്കുന്ന ലംഘനം ആണെന്ന്‌ അവർക്കു തോന്നിയ ഒരു നിസ്സാര കാര്യത്തെ അന്യാ​യ​മാ​യി വിമർശിച്ച ശേഷം, പരീശ​ന്മാർ യേശു​വി​നെ “നശിപ്പി​പ്പാൻ” അവനു വിരോ​ധ​മാ​യി തമ്മിൽ ആലോ​ചി​ച്ചു. (മത്തായി 12:14) ഒന്നു ചിന്തിച്ചു നോക്കൂ—ധാന്യ​മ​ണി​കൾ പറിച്ചു തിന്നതും ശബത്തു ദിവസം സൗഖ്യ​മാ​ക്കി​യ​തും നിമിത്തം സ്വയനീ​തി​ക്കാ​രായ ആ പരീശ​ന്മാർ ക്രുദ്ധ​രാ​യി; എന്നാൽ യേശു​വി​നെ കൊല്ലാൻ ഗൂഢാ​ലോ​ചന നടത്തു​ന്ന​തിൽ അവർക്ക്‌ യാതൊ​രു മനസ്സാ​ക്ഷി​ക്കു​ത്തും തോന്നി​യില്ല!

മുഖ്യ പുരോ​ഹി​ത​ന്മാർ സമാന​മായ വികല ചിന്താ​ഗതി പ്രകട​മാ​ക്കി. യേശു​വി​നെ ഒറ്റി​ക്കൊ​ടു​ക്കാ​നാ​യി ആലയ ഭണ്ഡാര​ത്തിൽനിന്ന്‌ 30 വെള്ളി നാണയങ്ങൾ യൂദാ​യ്‌ക്കു വാഗ്‌ദാ​നം ചെയ്‌ത​പ്പോൾ ആ നീചർക്ക്‌ തെല്ലും കുറ്റ​ബോ​ധം തോന്നി​യില്ല. എന്നാൽ യൂദാ അപ്രതീ​ക്ഷി​ത​മാ​യി പണം തിരികെ കൊണ്ടു​ചെന്ന്‌ ആലയത്തി​ലേക്ക്‌ എറിഞ്ഞ​പ്പോൾ മുഖ്യ പുരോ​ഹി​ത​ന്മാ​രു​ടെ മനസ്സാക്ഷി നിയമ​പ​ര​മായ ഒരു വിഷമ​ഘ​ട്ടത്തെ അഭിമു​ഖീ​ക​രി​ച്ചു. “ഇതു [നാണയങ്ങൾ] രക്തവി​ല​യാ​ക​യാൽ ശ്രീഭ​ണ്ഡാ​ര​ത്തിൽ ഇടുന്നതു വിഹി​തമല്ല” എന്ന്‌ അവർ പറഞ്ഞു. (മത്തായി 27:3-6) യൂദാ​യു​ടെ പണം ഇപ്പോൾ അശുദ്ധ​മാ​ണെ​ന്ന​തിൽ മുഖ്യ പുരോ​ഹി​ത​ന്മാർ വ്യക്തമാ​യും ആകുലത പ്രകടി​പ്പി​ച്ചു. (ആവർത്ത​ന​പു​സ്‌തകം 23:18 താരത​മ്യം ചെയ്യുക.) എന്നാൽ, ദൈവ​പു​ത്രനു വേണ്ടി ഒറ്റുകാ​ണം കൊടു​ക്കു​ന്ന​തിൽ അവർ യാതൊ​രു തെറ്റും കണ്ടില്ല!

ദൈവ​ചി​ന്ത​യോട്‌ അനുരൂ​പ​പ്പെ​ടൽ

മനസ്സാ​ക്ഷി​യെ പരിശീ​ലി​പ്പി​ക്കു​ന്ന​തിന്‌, ചെയ്യേ​ണ്ട​തും ചെയ്യരു​താ​ത്ത​തു​മായ കാര്യ​ങ്ങ​ളു​ടെ ഒരു പട്ടിക​കൊ​ണ്ടു മനസ്സു നിറച്ചാൽ മാത്രം പോ​രെന്ന്‌ മേൽ പ്രസ്‌താ​വിച്ച ദൃഷ്ടാ​ന്തങ്ങൾ കാണി​ക്കു​ന്നു. ദൈവ​നി​യ​മങ്ങൾ സംബന്ധിച്ച പരിജ്ഞാ​ന​വും അവ അനുസ​രി​ക്കു​ന്ന​തും രക്ഷയ്‌ക്ക്‌ അനിവാ​ര്യം ആണെന്നു​ള്ളതു സത്യം തന്നെ. (സങ്കീർത്തനം 19:7-11) എന്നാൽ, ദൈവ​നി​യ​മങ്ങൾ പഠിക്കു​ന്ന​തി​നു പുറമേ, ദൈവ​ത്തി​ന്റെ ചിന്ത​യോ​ടു പൊരു​ത്ത​പ്പെ​ടുന്ന ഒരു ഹൃദയം നാം വളർത്തി​യെ​ടു​ക്കണം. അപ്പോൾ നമുക്ക്‌ യെശയ്യാവ്‌ മുഖാ​ന്തരം യഹോവ നൽകിയ പ്രവച​ന​ത്തി​ന്റെ നിവൃത്തി അനുഭ​വി​ക്കാൻ കഴിയും. അത്‌ ഇപ്രകാ​രം പ്രസ്‌താ​വി​ക്കു​ന്നു: “നിന്റെ കണ്ണു നിന്റെ ഉപദേ​ഷ്ടാ​വി​നെ കണ്ടു​കൊ​ണ്ടി​രി​ക്കും. നിങ്ങൾ വലത്തോ​ട്ടോ ഇടത്തോ​ട്ടോ തിരി​യു​മ്പോൾ: വഴി ഇതാകു​ന്നു, ഇതിൽ നടന്നു​കൊൾവിൻ എന്നൊരു വാക്കു പിറകിൽനി​ന്നു കേൾക്കും.”—യെശയ്യാ​വു 30:20, 21; 48:17.

നാം ഗൗരവ​മേ​റിയ ഒരു തീരു​മാ​നത്തെ അഭിമു​ഖീ​ക​രി​ക്കു​മ്പോൾ എന്തു ചെയ്യണ​മെന്ന്‌ ഒരു അക്ഷരീയ ശബ്ദം നമ്മോടു പറയു​മെന്നല്ല ഇതിന്റെ അർഥം. എന്നാൽ, കാര്യങ്ങൾ സംബന്ധിച്ച ദൈവ​ത്തി​ന്റെ ചിന്തയു​മാ​യി നമ്മുടെ ചിന്ത ചേർച്ച​യിൽ ആയിരി​ക്കു​മ്പോൾ, അവനെ പ്രീതി​പ്പെ​ടു​ത്തുന്ന തീരു​മാ​നങ്ങൾ എടുക്കാൻ നമ്മെ സഹായി​ക്കാൻ മനസ്സാക്ഷി തികച്ചും സജ്ജമാ​യി​രി​ക്കും.—സദൃശ​വാ​ക്യ​ങ്ങൾ 27:11.

പൊ.യു.മു. 18-ാം നൂറ്റാ​ണ്ടിൽ ജീവി​ച്ചി​രുന്ന യോ​സേ​ഫി​ന്റെ കാര്യം പരിചി​ന്തി​ക്കുക. താനു​മാ​യി വ്യഭി​ചാര ബന്ധത്തിൽ ഏർപ്പെ​ടാൻ പോത്തി​ഫ​റി​ന്റെ ഭാര്യ യോ​സേ​ഫി​നെ നിർബ​ന്ധി​ച്ച​പ്പോൾ പിൻവ​രുന്ന പ്രകാരം പറഞ്ഞു​കൊണ്ട്‌ അവൻ അതു നിരസി​ച്ചു: “ഞാൻ ഈ മഹാ​ദോ​ഷം പ്രവർത്തി​ച്ചു ദൈവ​ത്തോ​ടു പാപം ചെയ്യു​ന്നതു എങ്ങനെ.” (ഉല്‌പത്തി 39:9) വ്യഭി​ചാ​രത്തെ കുറ്റം വിധി​ച്ചു​കൊണ്ട്‌ ദൈവം നൽകിയ യാതൊ​രു ലിഖിത നിയമ​വും യോ​സേ​ഫി​ന്റെ കാലത്ത്‌ ഉണ്ടായി​രു​ന്നില്ല. അതിനു പുറമേ, കുടുംബ ശിക്ഷണ​വും ഗോത്ര പിതാ​ക്ക​ന്മാ​രു​ടെ ചട്ടങ്ങളും ഇല്ലാതെ അങ്ങകലെ ഈജി​പ്‌തിൽ ആയിരു​ന്നു യോ​സേഫ്‌ പാർത്തി​രു​ന്നത്‌. അപ്പോൾ പിന്നെ പ്രലോ​ഭ​നത്തെ ചെറു​ക്കാൻ അവനെ പ്രാപ്‌ത​നാ​ക്കി​യത്‌ എന്തായി​രു​ന്നു? ലളിത​മാ​യി പറഞ്ഞാൽ, അത്‌ അവന്റെ പരിശീ​ലിത മനസ്സാക്ഷി ആയിരു​ന്നു. ഭർത്താ​വും ഭാര്യ​യും “ഏകദേ​ഹ​മാ​യി”രിക്കണം എന്നുള്ള ദൈവിക വീക്ഷണം യോ​സേഫ്‌ കൈ​ക്കൊ​ണ്ടു. (ഉല്‌പത്തി 2:24) അതു​കൊണ്ട്‌ മറ്റൊ​രു​വന്റെ ഭാര്യ​യു​മാ​യുള്ള ലൈം​ഗി​കത തെറ്റാ​യി​രി​ക്കും എന്ന്‌ അവൻ മനസ്സി​ലാ​ക്കി. അക്കാര്യം സംബന്ധിച്ച യോ​സേ​ഫി​ന്റെ ചിന്ത ദൈവ​ത്തി​ന്റെ ചിന്തയു​മാ​യി യോജി​പ്പിൽ ആയിരു​ന്നു. വ്യഭി​ചാ​രം അവന്റെ ധാർമിക ബോധ​ത്തിന്‌ എതിരാ​യി​രു​ന്നു.

യോ​സേ​ഫി​നെ പോലു​ള്ളവർ ഇന്നു കുറവാണ്‌. ലൈം​ഗിക അധാർമി​കത വിപുല വ്യാപ​ക​മാണ്‌. ധാർമി​ക​മാ​യി ശുദ്ധരാ​യി നില​കൊ​ള്ളാൻ തക്കവിധം തങ്ങളുടെ സ്രഷ്ടാ​വി​നോ​ടോ തങ്ങളോ​ടു​ത​ന്നെ​യോ തങ്ങളുടെ ഇണക​ളോ​ടു പോലു​മോ അനേകർക്കും യാതൊ​രു കടപ്പാ​ടും തോന്നു​ന്നില്ല. യിരെ​മ്യാ​വി​ന്റെ പുസ്‌ത​ക​ത്തിൽ വിവരി​ച്ചി​രി​ക്കു​ന്നതു പോ​ലെ​യാണ്‌ മിക്കവാ​റും ഇന്നത്തെ സാഹച​ര്യം: “അയ്യോ ഞാൻ എന്തു ചെയ്‌തു​പോ​യി എന്നു പറഞ്ഞു ആരും തന്റെ ദുഷ്ടത​യെ​ക്കു​റി​ച്ചു അനുത​പി​ച്ചില്ല; കുതിര പടെക്കു പായു​ന്ന​തു​പോ​ലെ ഓരോ​രു​ത്തൻ താന്താന്റെ വഴിക്കു തിരി​യു​ന്നു.” (യിരെ​മ്യാ​വു 8:6) അതു​കൊണ്ട്‌, ദൈവ​ത്തി​ന്റെ ചിന്തയു​മാ​യി നമ്മുടെ ചിന്തയെ അനുരൂ​പ​പ്പെ​ടു​ത്തേ​ണ്ടത്‌ മുമ്പ്‌ എന്നത്തെ​ക്കാ​ളും അനിവാ​ര്യ​മാണ്‌. അപ്രകാ​രം ചെയ്യാൻ സഹായി​ക്കുന്ന നല്ലൊരു കരുതൽ നമുക്കുണ്ട്‌.

മനസ്സാ​ക്ഷി​യെ പരിശീ​ലി​പ്പി​ക്കാൻ ഒരു സഹായി

നിശ്വസ്‌ത തിരു​വെ​ഴു​ത്തു​കൾ, “ദൈവ​ത്തി​ന്റെ മനുഷ്യൻ സകല സൽപ്ര​വൃ​ത്തി​ക്കും വക പ്രാപി​ച്ചു തികഞ്ഞവൻ ആകേണ്ട​തി​ന്നു ഉപദേ​ശ​ത്തി​ന്നും ശാസന​ത്തി​ന്നും ഗുണീ​ക​ര​ണ​ത്തി​ന്നും നീതി​യി​ലെ അഭ്യാ​സ​ത്തി​ന്നും പ്രയോ​ജ​ന​മു​ള്ളതു ആകുന്നു.” (2 തിമൊ​ഥെ​യൊസ്‌ 3:16, 17) നമ്മുടെ “ഗ്രഹണ ശക്തി” എന്ന്‌ ബൈബിൾ വിളി​ക്കു​ന്ന​തി​നെ, ശരിയും തെറ്റും തിരി​ച്ച​റി​യാൻ തക്കവണ്ണം പരിശീ​ലി​പ്പി​ക്കാൻ ബൈബിൾ പഠനം നമ്മെ സഹായി​ക്കും. (എബ്രായർ 5:14, NW) ദൈവം സ്‌നേ​ഹി​ക്കുന്ന കാര്യ​ങ്ങ​ളോ​ടു സ്‌നേ​ഹ​വും അവൻ വെറു​ക്കുന്ന കാര്യ​ങ്ങ​ളോ​ടു കഠിന​മായ വെറു​പ്പും വളർത്തി​യെ​ടു​ക്കാൻ അതു നമ്മെ പ്രാപ്‌ത​രാ​ക്കും.—സങ്കീർത്തനം 97:10; 139:21.

അതിനാൽ, ബൈബിൾ പഠനത്തി​ന്റെ ലക്ഷ്യം കേവലം സാങ്കേ​തിക ജ്ഞാനം നേടുക എന്നതല്ല, മറിച്ച്‌ സത്യത്തി​ന്റെ സാരവും സത്തയും സ്വായ​ത്ത​മാ​ക്കുക എന്നതാണ്‌. 1976 സെപ്‌റ്റം​ബർ 1 ലക്കം വീക്ഷാ​ഗോ​പു​രം (ഇംഗ്ലീഷ്‌) ഇങ്ങനെ പ്രസ്‌താ​വി​ച്ചു: “നമ്മുടെ തിരു​വെ​ഴു​ത്തു പഠനത്തിൽ നാം ശ്രമി​ക്കേ​ണ്ടത്‌, ദൈവ​ത്തി​ന്റെ നീതി, ന്യായം, സ്‌നേഹം എന്നിവ​യു​ടെ സാരാം​ശം ഗ്രഹി​ക്കാ​നും അവ നമ്മുടെ ഹൃദയ​ത്തിൽ ആഴമായി ഉൾനടാ​നും അങ്ങനെ തീറ്റി​യും ശ്വസന​വും പോ​ലെ​തന്നെ അതിനെ നമ്മുടെ ഭാഗമാ​ക്കി തീർക്കാ​നു​മാണ്‌. ശരിയും തെറ്റും സംബന്ധിച്ച്‌ സൂക്ഷ്‌മ​മായ ഒരു അവബോ​ധം നട്ടുവ​ളർത്തി​ക്കൊണ്ട്‌ ധാർമിക കടപ്പാട്‌ സംബന്ധിച്ച ബോധ്യം കൂടുതൽ സമഗ്ര​മാ​ക്കാൻ നാം ശ്രമി​ക്കണം. അതിലു​പരി, അത്യുത്തമ നിയമ​ദാ​താ​വും ന്യായാ​ധി​പ​നും ആയവ​നോ​ടു ശക്തമായ കടപ്പാടു തോന്നാൻ നാം നമ്മുടെ മനസ്സാ​ക്ഷി​യെ പ്രേരി​പ്പി​ക്കണം. (യെശ. 33:22) ആയതി​നാൽ, ദൈവ​ത്തെ​ക്കു​റി​ച്ചുള്ള കാര്യങ്ങൾ പഠിക്കു​മ്പോൾ, ജീവി​ത​ത്തി​ന്റെ എല്ലാ വശങ്ങളി​ലും അവനെ അനുക​രി​ക്കാൻ നാം ശ്രമി​ക്കണം.”

‘ക്രിസ്‌തു​വി​ന്റെ മനസ്സ്‌’ സ്വായ​ത്ത​മാ​ക്കൽ

‘ക്രിസ്‌തു​വി​ന്റെ മനസ്സ്‌,’ അതായത്‌ യേശു പ്രകട​മാ​ക്കിയ അനുസ​ര​ണ​ത്തി​ന്റെ​യും താഴ്‌മ​യു​ടെ​യും മാനസിക ഭാവം സ്വായ​ത്ത​മാ​ക്കാ​നും ബൈബിൾ പഠനം നമ്മെ സഹായി​ക്കും. (1 കൊരി​ന്ത്യർ 2:16) തന്റെ പിതാ​വി​ന്റെ ഇഷ്ടം ചെയ്യു​ന്നത്‌ അവനു സന്തോ​ഷ​മാ​യി​രു​ന്നു. ചിന്ത ആവശ്യ​മി​ല്ലാത്ത, യാന്ത്രി​ക​മാ​യി അനുവർത്തി​ക്കേണ്ട വെറു​മൊ​രു ദിനചര്യ ആയിരു​ന്നില്ല അത്‌. അവന്റെ മനോ​ഭാ​വത്തെ സങ്കീർത്ത​ന​ക്കാ​ര​നായ ദാവീദ്‌ പ്രാവ​ച​നി​ക​മാ​യി ഇങ്ങനെ വർണിച്ചു: “എന്റെ ദൈവമേ, നിന്റെ ഇഷ്ടം ചെയ്‌വാൻ ഞാൻ പ്രിയ​പ്പെ​ടു​ന്നു; നിന്റെ ന്യായ​പ്ര​മാ​ണം എന്റെ ഉള്ളിൽ ഇരിക്കു​ന്നു.”a—സങ്കീർത്തനം 40:8.

മനസ്സാ​ക്ഷി​യെ പരിശീ​ലി​പ്പി​ക്കു​ന്ന​തിൽ ‘ക്രിസ്‌തു​വി​ന്റെ മനസ്സ്‌’ സ്വായ​ത്ത​മാ​ക്കു​ന്നതു മർമ​പ്ര​ധാ​ന​മാണ്‌. യേശു ഒരു പൂർണ മനുഷ്യൻ എന്ന നിലയിൽ ഭൂമി​യിൽ ആയിരു​ന്ന​പ്പോൾ, തന്റെ പിതാ​വി​ന്റെ ഗുണങ്ങ​ളും വ്യക്തി​ത്വ​വും മാനുഷ പരിമി​തി​കൾക്കു​ള്ളിൽ സാധ്യ​മാ​കു​മാ​യി​രു​ന്ന​തി​ന്റെ പരമാ​വധി പ്രതി​ഫ​ലി​പ്പി​ച്ചു. അതു​കൊണ്ട്‌ അവനു പിൻവ​രുന്ന പ്രകാരം പറയാൻ കഴിഞ്ഞു: “എന്നെ കണ്ടവൻ പിതാ​വി​നെ കണ്ടിരി​ക്കു​ന്നു.” (യോഹ​ന്നാൻ 14:9) ഭൂമി​യിൽ താൻ അഭിമു​ഖീ​ക​രിച്ച ഓരോ സാഹച​ര്യ​ത്തി​ലും, താൻ എന്തു ചെയ്യണ​മെന്ന്‌ തന്റെ പിതാവ്‌ ആഗ്രഹി​ച്ചോ അതുതന്നെ യേശു ചെയ്‌തു. അതു​കൊണ്ട്‌ നാം യേശു​വി​ന്റെ ജീവി​തത്തെ കുറിച്ച്‌ പഠിക്കു​മ്പോൾ, യഹോ​വ​യാം ദൈവം എങ്ങനെ​യു​ള്ളവൻ ആണ്‌ എന്നതു സംബന്ധിച്ച്‌ നമുക്ക്‌ വ്യക്തമായ ഒരു ചിത്രം ലഭിക്കു​ന്നു.

യഹോവ “കരുണ​യും കൃപയു​മു​ള്ളവൻ; ദീർഘ​ക്ഷ​മ​യും മഹാദ​യ​യും വിശ്വ​സ്‌ത​ത​യു​മു​ള്ളവൻ” എന്ന്‌ നാം വായി​ക്കു​ന്നു. (പുറപ്പാ​ടു 34:6) തന്റെ അപ്പൊ​സ്‌ത​ല​ന്മാ​രു​മാ​യി ഇടപെട്ട അവസര​ങ്ങ​ളിൽ യേശു ഈ ഗുണങ്ങൾ കൂടെ​ക്കൂ​ടെ പ്രകടി​പ്പി​ച്ചു. തങ്ങളിൽ ആരാണ്‌ വലിയവൻ എന്നതിനെ പറ്റി അവർ ആവർത്തി​ച്ചു വാദ​പ്ര​തി​വാ​ദം നടത്തി​യ​പ്പോൾ, “നിങ്ങളിൽ മഹാൻ ആകുവാൻ ഇച്ഛിക്കു​ന്ന​വ​നെ​ല്ലാം നിങ്ങളു​ടെ ശുശ്രൂ​ഷ​ക്കാ​രൻ ആകേണം. നിങ്ങളിൽ ഒന്നാമൻ ആകുവാൻ ഇച്ഛിക്കു​ന്ന​വ​നെ​ല്ലാം നിങ്ങളു​ടെ ദാസൻ ആകേണം” എന്ന്‌ യേശു വാക്കു​ക​ളാ​ലും മാതൃ​ക​യാ​ലും അവരെ ക്ഷമാപൂർവം പഠിപ്പി​ച്ചു. (മത്തായി 20:26, 27) യേശു​വി​ന്റെ ജീവി​ത​ത്തെ​പ്പറ്റി പരിചി​ന്തി​ക്കു​ക​വഴി നമുക്ക്‌ ദൈവ​ത്തി​ന്റെ ചിന്തയു​മാ​യി അനുരൂ​പ​പ്പെ​ടാൻ കഴിയും എന്ന്‌ കാണി​ക്കാ​നുള്ള കേവലം ഒരു ദൃഷ്ടാന്തം മാത്ര​മാ​ണിത്‌.

യേശു​വി​നെ കുറിച്ച്‌ നാം എത്രമാ​ത്രം പഠിക്കു​ന്നു​വോ, നമ്മുടെ സ്വർഗീയ പിതാ​വായ യഹോ​വ​യാം ദൈവത്തെ അനുക​രി​ക്കാൻ നാം അത്രമാ​ത്രം സുസജ്ജർ ആയിരി​ക്കും. (എഫെസ്യർ 5:1, 2) ദൈവ​ത്തി​ന്റെ ചിന്ത​യോട്‌ ചേർച്ച​യി​ലുള്ള ഒരു മനസ്സാക്ഷി നമ്മെ ശരിയായ ദിശയിൽ നയിക്കും. തന്നെ ആശ്രയി​ക്കു​ന്ന​വ​രോട്‌ യഹോവ വാഗ്‌ദാ​നം ചെയ്യുന്നു: “ഞാൻ നിന്നെ ഉപദേ​ശി​ച്ചു, നടക്കേ​ണ്ടുന്ന വഴി നിനക്കു കാണി​ച്ചു​ത​രും; ഞാൻ നിന്റെ​മേൽ ദൃഷ്ടി​വെച്ചു നിനക്കു ആലോചന പറഞ്ഞു​ത​രും.”—സങ്കീർത്തനം 32:8.

പരിശീ​ലിത മനസ്സാ​ക്ഷി​യിൽനിന്ന്‌ പ്രയോ​ജനം നേടൽ

അപൂർണ മനുഷ്യ​രു​ടെ അനുസ​ര​ണ​ക്കേട്‌ മനസ്സി​ലാ​ക്കി​ക്കൊണ്ട്‌ മോശ ഇസ്രാ​യേ​ല്യർക്ക്‌ ഇങ്ങനെ മുന്നറി​യി​പ്പു നൽകി: “ഈ ന്യായ​പ്ര​മാ​ണ​ത്തി​ലെ വചനങ്ങൾ ഒക്കെയും പ്രമാ​ണി​ച്ചു​ന​ട​ക്കേ​ണ്ട​തി​ന്നു നിങ്ങൾ നിങ്ങളു​ടെ മക്കളോ​ടു കല്‌പി​പ്പാ​ന്ത​ക്ക​വണ്ണം ഞാൻ ഇന്നു നിങ്ങൾക്കു സാക്ഷീ​ക​രി​ക്കുന്ന സകലവ​ച​ന​ങ്ങ​ളും മനസ്സിൽ വെച്ചു​കൊൾവിൻ.” (ആവർത്ത​ന​പു​സ്‌തകം 32:46) നാമും ദൈവ​ത്തി​ന്റെ നിയമം നമ്മുടെ ഹൃദയ​ങ്ങ​ളിൽ എഴുതണം. നാം അപ്രകാ​രം ചെയ്യു​ന്നെ​ങ്കിൽ, മനസ്സാക്ഷി നമ്മുടെ കാലടി​കളെ നയിക്കു​ക​യും ശരിയായ തീരു​മാ​നങ്ങൾ എടുക്കാൻ നമ്മെ സഹായി​ക്കു​ക​യും ചെയ്യു​മെന്ന്‌ ഉറപ്പാണ്‌.

തീർച്ച​യാ​യും നാം ജാഗ്ര​ത​യു​ള്ളവർ ആയിരി​ക്കണം. ബൈബിൾ സദൃശ​വാ​ക്യം പറയുന്നു: “ചില​പ്പോൾ ഒരു വഴി മനുഷ്യ​ന്നു ചൊവ്വാ​യി തോന്നും; അതിന്റെ അവസാ​ന​മോ മരണവ​ഴി​കൾ അത്രേ.” (സദൃശ​വാ​ക്യ​ങ്ങൾ 14:12) മിക്ക​പ്പോ​ഴും സംഗതി ഇങ്ങനെ ആയിരി​ക്കു​ന്നത്‌ എന്തു​കൊണ്ട്‌? കാരണം, ബൈബിൾ പറയുന്നു: “ഹൃദയം എല്ലാറ​റി​നെ​ക്കാ​ളും കപടവും വിഷമ​വു​മു​ള്ളതു; അതു ആരാഞ്ഞ​റി​യു​ന്നവൻ ആർ?” (യിരെ​മ്യാ​വു 17:9) അതു​കൊണ്ട്‌ നാം എല്ലാവ​രും സദൃശ​വാ​ക്യ​ങ്ങൾ 3:5, 6-ലെ ഉദ്‌ബോ​ധനം പിൻപ​റ്റേണ്ട ആവശ്യ​മുണ്ട്‌: “പൂർണ്ണ​ഹൃ​ദ​യ​ത്തോ​ടെ യഹോ​വ​യിൽ ആശ്രയിക്ക; സ്വന്ത വിവേ​ക​ത്തിൽ ഊന്നരു​തു. നിന്റെ എല്ലാവ​ഴി​ക​ളി​ലും അവനെ നിനെ​ച്ചു​കൊൾക; അവൻ നിന്റെ പാതകളെ നേരെ​യാ​ക്കും.”

[അടിക്കു​റി​പ്പു​കൾ]

[7-ാം പേജിലെ ചിത്രം]

ഒരു വടക്കു​നോ​ക്കി യന്ത്ര​ത്തെ​പ്പോ​ലെ, ബൈബിൾ പരിശീ​ലിത മനസ്സാ​ക്ഷിക്ക്‌ നമ്മെ ശരിയായ ദിശ ചൂണ്ടി​ക്കാ​ണി​ക്കാൻ കഴിയും

[കടപ്പാട]

വടക്കുനോക്കി യന്ത്രം: Courtesy, Peabody Essex Museum, Salem, Mass.