എപ്പഫ്രാസ്‌—‘ക്രിസ്‌തു​വി​ന്റെ വിശ്വസ്‌ത ശുശ്രൂ​ഷകൻ’

കൊരിന്ത്‌, എഫെ​സൊസ്‌, ഫിലിപ്പി എന്നിവി​ട​ങ്ങ​ളിൽ സഭകൾ സ്ഥാപി​ച്ച​താ​രാണ്‌? ‘“ജാതി​ക​ളു​ടെ അപ്പൊ​സ്‌ത​ല​നായ” പൗലൊസ്‌’ എന്നു നിങ്ങൾ ഉടനടി ഉത്തരം പറഞ്ഞേ​ക്കാം. (റോമർ 11:13) നിങ്ങളു​ടെ ഉത്തരം ശരിതന്നെ.

എന്നാൽ, കൊ​ലൊ​സ്സ്യ, ഹിയര​പൊ​ലി, ലവുദി​ക്യ എന്നിവി​ട​ങ്ങ​ളിൽ സഭകൾ സ്ഥാപി​ച്ച​താ​രാണ്‌? ഉറപ്പോ​ടെ പറയാ​നാ​വി​ല്ലെ​ങ്കി​ലും, അത്‌ എപ്പഫ്രാസ്‌ എന്നു പേരുള്ള ഒരുവ​നാ​യി​രി​ക്കാ​നാ​ണു സാധ്യത. എന്തുത​ന്നെ​യാ​ണെ​ങ്കി​ലും, ആ സുവി​ശേ​ഷ​കനെ ‘ക്രിസ്‌തു​വി​ന്റെ വിശ്വസ്‌ത ശുശ്രൂ​ഷകൻ’ എന്നു വിളി​ച്ചി​രി​ക്കുന്ന സ്ഥിതിക്ക്‌ അവനെ​ക്കു​റി​ച്ചു കൂടു​ത​ല​റി​യാൻ ഒരുപക്ഷേ നിങ്ങൾ ആഗ്രഹി​ച്ചേ​ക്കാം.—കൊ​ലൊ​സ്സ്യർ 1:7.

ലൈക്കസ്‌ താഴ്‌വ​ര​യി​ലെ സുവി​ശേ​ഷ​കൻ

എപ്പഫ്രാസ്‌ എന്നത്‌ എപ്പ​ഫ്രൊ​ദി​ത്തൊസ്‌ എന്ന പേരിന്റെ ചുരു​ക്ക​മാണ്‌. എങ്കിലും, എപ്പഫ്രാസ്‌ ഫിലി​പ്പി​യി​ലെ എപ്പ​ഫ്രൊ​ദി​ത്തൊസ്‌ ആണെന്നു തെറ്റി​ദ്ധ​രി​ക്ക​രുത്‌. ഏഷ്യാ​മൈ​ന​റി​ലെ ലൈക്കസ്‌ താഴ്‌വ​ര​യി​ലുള്ള ക്രിസ്‌തീയ സഭയുടെ മൂന്നു കേന്ദ്ര​ങ്ങ​ളി​ലൊ​ന്നാ​യി​രുന്ന, കൊ​ലൊ​സ്സ്യ ദേശക്കാ​ര​നാ​യി​രു​ന്നു എപ്പഫ്രാസ്‌. ലവുദി​ക്യ​യിൽനി​ന്നു 18 കിലോ​മീ​റ്റ​റും പുരാതന പ്രുഗ്യ​യി​ലെ ഹിയര​പൊ​ലി​യിൽനി​ന്നു 19 കിലോ​മീ​റ്റ​റും അകലെ​യാ​യി​രു​ന്നു കൊ​ലൊ​സ്സ്യ.

ദൈവ​രാ​ജ്യ​ത്തി​ന്റെ സുവാർത്ത പ്രുഗ്യ​യിൽ എങ്ങനെ എത്തി​യെ​ന്ന​തി​നെ​ക്കു​റി​ച്ചു ബൈബിൾ സ്‌പഷ്ട​മാ​ക്കു​ന്നില്ല. എങ്കിലും, പൊ.യു. 33-ലെ പെന്ത​ക്കോ​സ്‌തു നാളിൽ പ്രുഗ്യ​ക്കാർ യെരൂ​ശ​ലേ​മിൽ സന്നിഹി​ത​രാ​യി​രു​ന്നു. ഒരുപക്ഷേ അവരിൽ ചിലർ കൊ​ലൊ​സ്സ്യ​യിൽനി​ന്നു​ള്ളവർ ആയിരു​ന്നി​രി​ക്കണം. (പ്രവൃ​ത്തി​കൾ 2:1, 5, 10) പൗലൊ​സി​ന്റെ എഫെ​സൊ​സി​ലെ ശുശ്രൂ​ഷ​യിൽ (പൊ.യു. ഏതാണ്ട്‌ 52-55), ആ പ്രദേ​ശത്തു സമഗ്ര​വും ഫലപ്ര​ദ​വു​മായ സാക്ഷ്യം നൽക​പ്പെട്ടു. തത്‌ഫ​ല​മാ​യി, എഫെസ്യർ മാത്രമല്ല, “ആസ്യയിൽ പാർക്കുന്ന യെഹൂ​ദ​ന്മാ​രും യവനന്മാ​രും എല്ലാം കർത്താ​വി​ന്റെ വചനം കേൾപ്പാൻ ഇടയായി.” (പ്രവൃ​ത്തി​കൾ 19:10) ലൈക്കസ്‌ താഴ്‌വ​ര​യി​ലു​ട​നീ​ളം പൗലൊസ്‌ സുവാർത്ത പ്രസം​ഗി​ച്ചി​ട്ടി​ല്ലെന്നു തോന്നു​ന്നു. കാരണം, ആ പ്രദേ​ശത്തു ക്രിസ്‌ത്യാ​നി​ക​ളാ​യി​ത്തീർന്ന അനേകർ ഒരിക്ക​ലും അവനെ കണ്ടിട്ടില്ല.—കൊ​ലൊ​സ്സ്യർ 2:1.

പൗലൊസ്‌ പറയു​ന്ന​ത​നു​സ​രിച്ച്‌, “ദൈവ​കൃ​പയെ യഥാർത്ഥ​മാ​യി” കൊ​ലൊ​സ്സ്യ​രെ പഠിപ്പി​ച്ചത്‌ എപ്പഫ്രാസ്‌ ആയിരു​ന്നു. ആ സഹഭൃ​ത്യ​നെ ‘ഞങ്ങൾക്കാ​യുള്ള ക്രിസ്‌തു​വി​ന്റെ വിശ്വസ്‌ത ശുശ്രൂ​ഷകൻ’ എന്നു പൗലൊസ്‌ വിളി​ച്ചു​വെന്ന വസ്‌തുത, എപ്പഫ്രാസ്‌ ആ പ്രദേ​ശത്തെ ഒരു സജീവ സുവി​ശേ​ഷ​ക​നാ​യി​രു​ന്നു​വെന്നു വ്യക്തമാ​ക്കു​ന്നു.—കൊ​ലൊ​സ്സ്യർ 1:6-8, NW.

അപ്പോ​സ്‌ത​ല​നാ​യി​രുന്ന പൗലൊ​സും സുവി​ശേ​ഷ​ക​നാ​യി​രുന്ന എപ്പഫ്രാ​സും ലൈക്കസ്‌ താഴ്‌വ​ര​യി​ലെ തങ്ങളുടെ സഹവി​ശ്വാ​സി​ക​ളു​ടെ ക്ഷേമത്തിൽ വളരെ​യ​ധി​കം തത്‌പ​ര​രാ​യി​രു​ന്നു. അവരുടെ പുരോ​ഗ​തി​യെ​ക്കു​റി​ച്ചുള്ള വാർത്ത, ‘ജാതി​ക​ളു​ടെ അപ്പൊ​സ്‌തലൻ’ എന്ന നിലയിൽ പൗലൊ​സി​നെ ആഹ്ലാദി​പ്പി​ച്ചി​രി​ക്കണം. കൊ​ലൊ​സ്സ്യ​രു​ടെ ആത്മീയാ​വ​സ്ഥ​യെ​ക്കു​റി​ച്ചു പൗലൊ​സി​നു വിവരം കൊടു​ത്തതു മറ്റാരു​മല്ല, എപ്പഫ്രാ​സാണ്‌.—കൊ​ലൊ​സ്സ്യർ 1:4, 8.

എപ്പഫ്രാ​സി​ന്റെ റിപ്പോർട്ട്‌

കൊ​ലൊ​സ്സ്യർ ഗൗരവ​മായ പ്രശ്‌ന​ങ്ങളെ അഭിമു​ഖീ​ക​രി​ച്ചി​രു​ന്നു. അവയെ​ക്കു​റി​ച്ചു പൗലൊ​സു​മാ​യി ചർച്ചന​ട​ത്തു​ക​യെന്ന പ്രത്യേക ഉദ്ദേശ്യ​ത്തിൽ റോമി​ലേക്ക എപ്പഫ്രാസ്‌ ദീർഘ​യാ​ത്ര ചെയ്യത്ത​ക്ക​വണ്ണം ഗൗരവ​മാർന്ന പ്രശ്‌ന​ങ്ങ​ളാ​യി​രു​ന്നു അവ. തനിക്ക​റി​ഞ്ഞു​കൂ​ടാ​യി​രുന്ന സഹോ​ദ​ര​ങ്ങൾക്കു രണ്ടു ലേഖന​മെ​ഴു​തു​ന്ന​തി​നു പൗലൊ​സി​നെ പ്രേരി​പ്പി​ച്ചത്‌ എപ്പ്രഫാസ്‌ നൽകിയ വിശദ​മായ റിപ്പോർട്ടാ​യി​രു​ന്നു​വെന്നു വ്യക്തം. ഒരു ലേഖനം കൊ​ലൊ​സ്സ്യർക്കു​ള്ള​താ​യി​രു​ന്നു. ലവുദി​ക്യർക്കയച്ച മറ്റേ ലേഖനം സൂക്ഷിച്ചു വെക്കു​ക​യു​ണ്ടാ​യില്ല. (കൊ​ലൊ​സ്സ്യർ 4:16) ആ ലേഖന​ങ്ങ​ളു​ടെ ഉള്ളടക്കം എപ്പഫ്രാസ്‌ മനസ്സി​ലാ​ക്കി​യ​വണ്ണം, ആ ക്രിസ്‌ത്യാ​നി​ക​ളു​ടെ ആവശ്യ​ത്തി​നു​ത​കാൻ ഉദ്ദേശി​ച്ചു​ള്ള​താ​യി​രു​ന്നു​വെന്നു ചിന്തി​ക്കു​ന്നതു ന്യായ​യു​ക്ത​മാണ്‌. ആവശ്യ​മെന്ന്‌ അവനു തോന്നിയ കാര്യങ്ങൾ ഏവ? അതവന്റെ വ്യക്തി​ത്വ​ത്തെ​ക്കു​റി​ച്ചു നമ്മോ​ടെന്തു പറയുന്നു?

സന്ന്യാ​സ​വാ​ദം, ആത്മവിദ്യ, വിഗ്ര​ഹാ​രാ​ധ​നാ​പ​ര​മായ അന്ധവി​ശ്വാ​സം എന്നിവ ഉൾപ്പെട്ട പുറജാ​തീയ തത്ത്വശാ​സ്‌ത്രങ്ങൾ കൊ​ലൊ​സ്സ്യ​യി​ലുള്ള ക്രിസ്‌ത്യാ​നി​കൾക്കു ഭീഷണി​യാ​യി നില​കൊ​ള്ളു​ന്ന​തിൽ എപ്പഫ്രാസ്‌ ഉത്‌ക​ണ്‌ഠ​യു​ള്ള​വ​നാ​യി​രു​ന്നെന്നു കൊ​ലൊ​സ്സ്യർക്കുള്ള ലേഖനം സൂചി​പ്പി​ക്കു​ന്ന​താ​യി തോന്നു​ന്നു. മാത്രമല്ല, ചിലതരം ഭക്ഷ്യവർജനം, ചില ദിവസ​ങ്ങ​ളു​ടെ ആചരണം എന്നിങ്ങ​നെ​യുള്ള യഹൂദ പഠിപ്പി​ക്ക​ലു​കൾ സഭയിലെ ചിലരെ സ്വാധീ​നി​ച്ചി​രി​ക്കാം.—കൊ​ലൊ​സ്സ്യർ 2:4, 8, 16, 20-23.

പൗലൊസ്‌ ആ വിഷയ​ങ്ങ​ളെ​ക്കു​റിച്ച്‌ എഴുതു​ന്നു​വെന്ന വസ്‌തുത, സഹക്രി​സ്‌ത്യാ​നി​ക​ളു​ടെ ആവശ്യങ്ങൾ സംബന്ധിച്ച്‌ എപ്പഫ്രാസ്‌ എത്രകണ്ടു ജാഗരൂ​ക​നും ബോധ​വാ​നു​മാ​യി​രു​ന്നു​വെന്നു വ്യക്തമാ​ക്കു​ന്നു. അവർ ജീവി​ച്ചി​രുന്ന ചുറ്റു​പാ​ടു​ക​ളെ​ക്കു​റി​ച്ചു ബോധ​വ​നാ​യി​രു​ന്ന​തി​നാൽ അവൻ അവരുടെ ആത്മീയ ക്ഷേമത്തിൽ സ്‌നേ​ഹ​നിർഭ​ര​മായ താത്‌പ​ര്യം പ്രകട​മാ​ക്കി. എപ്പഫ്രാസ്‌ പൗലൊ​സി​നോട്‌ ഉപദേ​ശ​മാ​രാ​ഞ്ഞു. അത്‌ അവൻ താഴ്‌മ​യു​ള്ള​വ​നാ​യി​രു​ന്നു​വെന്നു പ്രകട​മാ​ക്കു​ന്നു. കൂടുതൽ അനുഭ​വ​ജ്ഞാ​ന​മു​ള്ള​യാ​ളിൽനിന്ന്‌ ഉപദേശം ലഭി​ക്കേ​ണ്ട​തി​ന്റെ ആവശ്യം അവൻ തിരി​ച്ച​റി​ഞ്ഞി​രി​ക്കും. സംഗതി എന്തുത​ന്നെ​യാ​യി​രു​ന്നാ​ലും, എപ്പഫ്രാസ്‌ ജ്ഞാനപൂർവം പെരു​മാ​റി.—സദൃശ​വാ​ക്യ​ങ്ങൾ 15:22.

പ്രാർഥന മൂല്യ​വ​ത്താ​യി കരുതി​യ​വൻ

കൊ​ലൊ​സ്സ്യ ക്രിസ്‌ത്യാ​നി​കൾക്കെ​ഴു​തിയ ലേഖനം പൗലൊസ്‌ ഇങ്ങനെ ഉപസം​ഹ​രി​ക്കു​ന്നു: “നിങ്ങളിൽ ഒരുത്ത​നാ​യി ക്രിസ്‌തു​യേ​ശു​വി​ന്റെ ദാസനായ എപ്പഫ്രാസ്‌ നിങ്ങളെ വന്ദനം ചെയ്യുന്നു; നിങ്ങൾ തികഞ്ഞ​വ​രും ദൈവ​ഹി​തം സംബന്ധി​ച്ചൊ​ക്കെ​യും പൂർണ്ണ​നി​ശ്ച​യ​മു​ള്ള​വ​രു​മാ​യി നില്‌ക്കേ​ണ്ട​തി​ന്നു അവൻ പ്രാർത്ഥ​ന​യിൽ നിങ്ങൾക്കു വേണ്ടി എപ്പോ​ഴും പോരാ​ടു​ന്നു. നിങ്ങൾക്കും ലവുദി​ക്യ​ക്കാർക്കും ഹിയര​പൊ​ലി​ക്കാർക്കും വേണ്ടി അവൻ വളരെ പ്രയാ​സ​പ്പെ​ടു​ന്നു എന്നുള്ള​തി​ന്നു ഞാൻ സാക്ഷി.”—കൊ​ലൊ​സ്സ്യർ 4:12, 13.

അതേ, റോമിൽ പൗലൊ​സി​ന്റെ “സഹബദ്ധനാ”യിരു​ന്ന​പ്പോ​ഴും എപ്പഫ്രാസ്‌ കൊ​ലൊ​സ്സ്യ, ലവുദി​ക്യ, ഹിയര​പൊ​ലി എന്നിവി​ട​ങ്ങ​ളി​ലുള്ള പ്രിയ​പ്പെട്ട സഹോ​ദ​ര​ങ്ങ​ളെ​ക്കു​റി​ച്ചു ചിന്തി​ക്കു​ക​യും അവർക്കു​വേണ്ടി പ്രാർഥി​ക്കു​ക​യു​മാ​യി​രു​ന്നു. (ഫിലേ​മോൻ 23) അക്ഷരാർഥ​ത്തിൽ അവർക്കു​വേണ്ടി അവൻ പ്രാർഥ​ന​യിൽ ‘പോരാ​ടി.’ എഡ്‌മണ്ട്‌ ഹൈ​ബെർട്ട്‌ എന്ന പണ്ഡിതൻ പറയു​ന്ന​ത​നു​സ​രിച്ച്‌, ഇവിടെ ഉപയോ​ഗി​ച്ചി​രി​ക്കുന്ന ഗ്രീക്കു പദം “കഠിന​മായ, ത്യാഗ​നിർഭ​ര​മായ പ്രവർത്തന”ത്തെ അർഥമാ​ക്കു​ന്നു. അത്‌, ഗെത്ത്‌ശെമന തോട്ട​ത്തിൽ പ്രാർഥി​ച്ചു​കൊ​ണ്ടി​രു​ന്ന​പ്പോൾ യേശു​ക്രി​സ്‌തു​വിന്‌ അനുഭ​വ​പ്പെട്ട മാനസിക “വേദന”യ്‌ക്കു സമാന​മാണ്‌. (ലൂക്കൊസ്‌ 22:44) തന്റെ ആത്മീയ സഹോ​ദ​രീ​സ​ഹോ​ദ​ര​ന്മാർ സ്ഥിരത​യും സമ്പൂർണ ക്രിസ്‌തീയ പക്വത​യും ആർജി​ക്കാൻ എപ്പഫ്രാസ്‌ ആത്മാർഥ​മാ​യി ആഗ്രഹി​ച്ചു. ആത്മീയ ചിന്താ​ഗ​തി​യുള്ള അത്തര​മൊ​രു സഹോ​ദരൻ ആ സഭകൾക്ക്‌ എന്തൊ​ര​നു​ഗ്ര​ഹ​മാ​യി​രു​ന്നി​രി​ക്കണം!

എപ്പഫ്രാ​സി​നെ “പ്രിയ സഹഭൃത്യ”നെന്നു വിളിച്ച സ്ഥിതിക്ക്‌, അവൻ സഹക്രി​സ്‌ത്യാ​നി​കൾക്കു പ്രിയ​പ്പെ​ട്ട​വ​നാ​യി​രു​ന്നു​വെ​ന്ന​തിൽ യാതൊ​രു സംശയ​വു​മില്ല. (കൊ​ലൊ​സ്സ്യർ 1:7) സാഹച​ര്യ​ങ്ങൾ അനുവ​ദി​ക്കു​മ്പോ​ഴൊ​ക്കെ, സഭയിലെ എല്ലാ അംഗങ്ങ​ളും ഊഷ്‌മ​ള​ത​യും സ്‌നേ​ഹ​വും ഉള്ളവരാ​യി സ്വയം ലഭ്യമാ​ക്കണം. ഉദാഹ​ര​ണ​ത്തിന്‌, രോഗി​ക​ളെ​യോ പ്രായം​ചെ​ന്ന​വ​രെ​യോ പ്രത്യേക സഹായം ആവശ്യ​മുള്ള മറ്റുള്ള​വ​രെ​യോ സഹായി​ക്കുന്ന കാര്യ​ത്തിൽ ശ്രദ്ധ​ചെ​ലു​ത്താ​വു​ന്ന​താണ്‌. സഭയിൽ വ്യത്യസ്‌ത ഉത്തരവാ​ദി​ത്വ​ങ്ങൾ നിവർത്തി​ക്കാൻ കഴിയും. അല്ലെങ്കിൽ, ദിവ്യാ​ധി​പത്യ നിർമാണ പ്രവർത്ത​ന​ങ്ങ​ളിൽ ഏർപ്പെ​ടാ​വു​ന്ന​താണ്‌.

എപ്പഫ്രാസ്‌ ചെയ്‌ത​പോ​ലെ, മറ്റുള്ള​വർക്കു​വേണ്ടി പ്രാർഥി​ക്കു​ന്നതു വിശുദ്ധ സേവന​ത്തി​ന്റെ ഒരു വിധമാണ്‌. ആത്മീയ​മോ ശാരീ​രി​ക​മോ ആയ വിധത്തിൽ വിവിധ അപകടങ്ങൾ അല്ലെങ്കിൽ ബുദ്ധി​മു​ട്ടു​കൾ സഹി​ക്കേണ്ടി വരുന്ന യഹോ​വ​യു​ടെ ആരാധ​ക​രു​ടെ താത്‌പ​ര്യ​ങ്ങളെ അത്തരം പ്രാർഥ​ന​ക​ളിൽ ഉൾപ്പെ​ടു​ത്താ​വു​ന്ന​താണ്‌. ഈ വിധത്തിൽ കഠിന​മാ​യി പരി​ശ്ര​മി​ക്കു​മ്പോൾ നമുക്ക്‌ എപ്പഫ്രാ​സി​നെ​പ്പോ​ലെ​യാ​കാൻ സാധി​ക്കും. നമു​ക്കോ​രോ​രു​ത്തർക്കും യഹോ​വ​യു​ടെ വിശ്വസ്‌ത സേവക​രു​ടെ കുടും​ബ​ത്തിൽ “പ്രിയ സഹഭൃത്യ”നായി​രി​ക്കു​ന്ന​തി​നുള്ള പദവി​യും അങ്ങനെ ആയിരി​ക്കു​ന്ന​തി​ന്റെ സന്തോ​ഷ​വും ഉണ്ടായി​രി​ക്കും.