യുവജനങ്ങൾ ചോദിക്കുന്നു
ശ്രദ്ധ പിടിച്ചുനിറുത്താൻ ഞാൻ എന്തു ചെയ്യണം?
എന്താണ്‌ തടസ്സം?
“മുമ്പത്തെപ്പോലെ ഞാൻ ഇപ്പോൾ പുസ്‌തകങ്ങൾ ഒന്നും വായിക്കാറില്ല. വലിയ ഖണ്ഡികകൾ വായിക്കാനേ എനിക്ക്‌ ഇഷ്ടമല്ല.”—എലൈൻ.
“ഒരു വീഡിയോ നിരങ്ങി നീങ്ങുന്നപോലെ എനിക്ക്‌ തോന്നിയാൽ ഞാൻ അത്‌ ഓടിച്ചുവിടും.”—മിറാൻഡ.
“ഞാൻ ശ്രദ്ധിച്ച്‌ പ്രധാനപ്പെട്ട ഒരു കാര്യം ചെയ്‌തുകൊണ്ടിരിക്കുമ്പോൾ, എന്റെ ഫോൺ എങ്ങാനും ഓഫ്‌ ആയിപ്പോയാൽ പിന്നെ എന്റെ ചിന്ത മുഴുവൻ ‘ആരെങ്കിലും എനിക്ക്‌ മെസേജ്‌ അയയ്‌ക്കുന്നുണ്ടോ’ എന്നായിരിക്കും.”—ജയിൻ.
ശ്രദ്ധ കേന്ദ്രീകരിക്കുന്നതിന്‌ തടസ്സമാകാൻ സാങ്കേതികവിദ്യക്ക്‌ ആകുമോ? ‘ഉവ്വ്‌’ എന്ന്‌ ചിലർ പറയുന്നു. “നമ്മൾ ഇന്റർനെറ്റ്‌ എത്രയധികം ഉപയോഗിക്കുന്നോ, ശ്രദ്ധ പതറാൻ അത്രയധികം നമ്മുടെ തലച്ചോറിനെ പരിശീലിപ്പിക്കുകയായിരിക്കും. അതായത്‌ വേഗത്തിൽ വിവരങ്ങൾ ഉൾക്കൊള്ളാൻ കഴിയും, പക്ഷേ അതിൽ ശ്രദ്ധിക്കാൻ കഴിയില്ല,” എന്ന്‌ എഴുത്തുകാരനും മാനേജ്‌മെന്റ്‌ വിദഗ്‌ധനും ആയ നിക്കോളാസ്‌ കാർ എഴുതുന്നു.a
സാങ്കേതികവിദ്യ നിങ്ങളുടെ ശ്രദ്ധ പതറിക്കാവുന്ന മൂന്നു സാഹചര്യങ്ങൾ നോക്കാം.
സംസാരിക്കുമ്പോൾ. “ആരോടെങ്കിലും നേരിട്ട്‌ സംസാരിക്കുമ്പോൾ ആളുകൾ അവരുമായുള്ള സംസാരത്തിൽ ശ്രദ്ധിക്കാതെ ഫോണിൽ മെസേജുകൾ അയയ്‌ക്കുകയോ ഗെയിം കളിക്കുകയോ സോഷ്യൽ മീഡിയയിൽ നോക്കുകയോ ഒക്കെ ചെയ്യുന്നു” എന്ന്‌ മരിയ എന്ന ചെറുപ്പക്കാരി അഭിപ്രായപ്പെടുന്നു.
ക്ലാസിൽ ആയിരിക്കുമ്പോൾ. “മിക്ക കുട്ടികളും പറയുന്നത്‌ അവർ ക്ലാസിന്റെ സമയത്ത്‌ തങ്ങളുടെ ഫോണോ ടാബോ ഉപയോഗിച്ച്‌ ഇന്റർനെറ്റിൽ പരതുകയോ മെസേജുകൾ അയയ്‌ക്കുകയോ ഒക്കെ ചെയ്യും എന്നാണ്‌” എന്ന്‌ ഡിജിറ്റൽ കുട്ടികൾ (ഇംഗ്ലീഷ്‌) എന്ന പുസ്‌തകം പറയുന്നു. അത്‌ ഇങ്ങനെ തുടരുന്നു, “പഠിക്കുന്ന വിഷയവുമായി ബന്ധമില്ലാത്ത കാര്യങ്ങളിൽ” ആണ്‌ അവർ ഏർപ്പെടുന്നത്‌.
പഠിക്കുന്ന സമയത്ത്‌. “ഫോണിൽ എന്തെങ്കിലും മെസേജോ മറ്റോ വന്നാൽ അത്‌ നോക്കാതിരിക്കാൻ എനിക്കു ശരിക്കും ബുദ്ധിമുട്ടാണ്‌,” എന്ന്‌ 22 വയസ്സുള്ള ക്രിസ്‌ പറയുന്നു. നിങ്ങൾ സ്‌കൂളിൽ പഠിക്കുന്ന ഒരു കുട്ടിയാണെങ്കിൽ, ഹോംവർക്ക്‌ ചെയ്യുന്ന സമയത്ത്‌ ഫോണോ മറ്റെന്തെങ്കിലുമോ നിങ്ങളുടെ ശ്രദ്ധ പതറിച്ചാൽ, ഒരു മണിക്കൂറുകൊണ്ട്‌ ചെയ്യാവുന്ന ഹോംവർക്കിനു മൂന്നു മണിക്കൂറോ അതിൽക്കൂടുതലോ വേണ്ടിവരും.
ചുരുക്കിപ്പറഞ്ഞാൽ: സാങ്കേതികവിദ്യ നിങ്ങളുടെ ശ്രദ്ധ പതറിക്കാനോ നിങ്ങളെ നിയന്ത്രിക്കാനോ അനുവദിച്ചാൽ, ശ്രദ്ധ കേന്ദ്രീകരിക്കാൻ നിങ്ങൾക്കു ബുദ്ധിമുട്ടാകും.
ഏകാഗ്രമല്ലാത്ത മനസ്സ്‌ ഒരു കാട്ടുകുതിരയെപ്പോലെ ആണ്‌—അതു നിങ്ങളെ നിയന്ത്രിക്കും
തടസ്സം എങ്ങനെ മറികടക്കാം?
സംസാരിക്കുമ്പോൾ. ബൈബിൾ പറയുന്നു: “നിങ്ങൾ സ്വന്തം താത്‌പര്യം മാത്രം നോക്കാതെ മറ്റുള്ളവരുടെ താത്‌പര്യവുംകൂടെ നോക്കണം.” (ഫിലിപ്പിയർ 2:4) മറ്റുള്ളവർ പറയുന്നത്‌ ശ്രദ്ധയോടെ കേട്ടുകൊണ്ട്‌ അവരോടു പരിഗണന കാണിക്കാം. കണ്ണുകളിൽ നോക്കി സംസാരിക്കുക, മറ്റ്‌ ഉപകരണങ്ങൾ നിങ്ങളുടെ ശ്രദ്ധ പതറിക്കരുത്‌.
“ആരോടെങ്കിലും സംസാരിച്ചുകൊണ്ടിരിക്കുമ്പോൾ അതിനിടയ്‌ക്കു ഫോണിൽ നോക്കാൻ നിങ്ങൾക്കു തോന്നിയാലും നോക്കരുത്‌. ആ വ്യക്തി പറയുന്നത്‌ മുഴുവൻ ശ്രദ്ധിച്ച്‌ കേട്ടുകൊണ്ട്‌ അവരോടു ബഹുമാനം കാണിക്കണം.”—തോമസ്‌.
ചെയ്യാനാകുന്നത്‌: ആരോടെങ്കിലും സംസാരിച്ചുകൊണ്ടിരിക്കുമ്പോൾ, ഫോൺ നിങ്ങളുടെ അടുത്തുനിന്ന്‌ മാറ്റിവെക്കാം. ഫോൺ അടുത്ത്‌ വെച്ചാൽ എന്തെങ്കിലും മെസേജോ മറ്റോ വന്നാലോ എന്ന ചിന്തകൊണ്ടുതന്നെ നിങ്ങളുടെ ശ്രദ്ധ പതറിപ്പോകാം എന്നാണ്‌ ഗവേഷകർ പറയുന്നത്‌.
ക്ലാസിൽ ആയിരിക്കുമ്പോൾ. ബൈബിൾ പറയുന്നു: “നിങ്ങൾ എങ്ങനെ കേൾക്കുന്നു എന്നതിനു ശ്രദ്ധ കൊടുക്കുക.” (ലൂക്കോസ്‌ 8:18) ഈ തത്ത്വം മനസ്സിൽപ്പിടിച്ചുകൊണ്ട്‌, ക്ലാസിൽവെച്ച്‌ ഇന്റർനെറ്റ്‌ ഉപയോഗിക്കാൻ അനുവാദം ഉണ്ടെങ്കിൽ, ആ സമയത്ത്‌ മെസേജുകൾ നോക്കാനോ ഗെയിമുകൾ കളിക്കാനോ ചാറ്റ്‌ ചെയ്യാനോ പോകാതെ പഠിപ്പിക്കുന്ന കാര്യങ്ങളിൽ ശ്രദ്ധിക്കാം.
“ക്ലാസിൽ ശ്രദ്ധിച്ചിരിക്കാൻ ശ്രമിക്കണം. നോട്ടുകൾ എഴുതുക. പറ്റുമെങ്കിൽ ക്ലാസിന്റെ മുൻനിരയിൽത്തന്നെ ഇരിക്കുക, അങ്ങനെയാകുമ്പോൾ ശ്രദ്ധ പോകില്ല.”—കാരെൻ.
ചെയ്യാനാകുന്നത്‌: കമ്പ്യൂട്ടറിൽ നോട്ട്‌ എടുക്കുന്നതിനെക്കാൾ കൈകൊണ്ട്‌ അത്‌ എഴുതിയെടുക്കുന്നതാണ്‌ നല്ലത്‌. ഗവേഷണങ്ങൾ സൂചിപ്പിക്കുന്നത്‌, ശ്രദ്ധ പതറാതിരിക്കാനും പഠിച്ച കാര്യങ്ങൾ ഓർമയിൽ സൂക്ഷിക്കാനും അങ്ങനെ ചെയ്യുന്നത്‌ സഹായിക്കും എന്നാണ്‌.
പഠിക്കുന്ന സമയത്ത്‌. ബൈബിൾ പറയുന്നു: “ജ്ഞാനം നേടുക, വകതിരിവ്‌ സമ്പാദിക്കുക.” (സുഭാഷിതങ്ങൾ 4:5) അതിൽ, വെറുതെ പരീക്ഷയ്‌ക്കു ജയിക്കാൻവേണ്ടി ഓടിച്ചു വായിക്കുന്നതിനേക്കാൾ ആഴത്തിൽ ചിന്തിക്കുന്നത്‌ ഉൾപ്പെടുന്നു.
“പഠിക്കാൻ ഇരിക്കുന്ന സമയത്ത്‌ എന്റെ ടാബ്‌, ഞാൻ ഫ്‌ലൈറ്റ്‌ മോഡിൽ ഇട്ടിട്ട്‌, ചെയ്യുന്ന കാര്യത്തിൽ മുഴുവനായും ശ്രദ്ധിക്കും. മെസേജോ മറ്റോ വരുന്നുണ്ടോ എന്നു ഞാൻ നോക്കാറില്ല. ചെയ്യേണ്ട കാര്യങ്ങൾ എന്തെങ്കിലും ഓർത്തിരിക്കാൻ ഫോണിൽ റിമൈൻഡർ സെറ്റ്‌ ചെയ്‌തിട്ടുണ്ടെങ്കിൽ ഞാൻ അത്‌ എഴുതിവെക്കും.”—ക്രിസ്‌.
ചെയ്യാനാകുന്നത്‌: നിങ്ങൾ പഠിക്കാനിരിക്കുന്ന സ്ഥലം ശ്രദ്ധ കേന്ദ്രീകരിക്കാൻ സഹായിക്കുന്നതാണെന്ന്‌ ഉറപ്പുവരുത്തുക, വൃത്തിയും അടുക്കുംചിട്ടയും ഉള്ളതായി സൂക്ഷിക്കുക.
a മുരടിക്കുന്ന ചിന്ത–ഇന്റർനെറ്റ്‌ നമ്മുടെ തലച്ചോറിനെ ബാധിക്കുന്ന വിധം (ഇംഗ്ലീഷ്‌) എന്ന പുസ്‌തകത്തിൽനിന്ന്‌.