ചാവുകടൽ ചുരുളിലെ യശയ്യ പ്രവചനത്തിലെ ഒരു ഭാഗവും അതിന്റെ അറബിയിലുള്ള പരിഭാഷയും. ദൈവവചനത്തിന്റെ സന്ദേശത്തിന്‌ യാതൊരു മാറ്റവും സംഭവിച്ചിട്ടില്ല
ദൈവത്തിന്റെ വചനത്തിന്‌ എന്തെങ്കിലും മാറ്റം വന്നിട്ടുണ്ടോ?
‘ദൈവത്തിന്റെ വചനത്തിൽ എന്തെങ്കിലും മാറ്റം വരുത്തിയിട്ടുണ്ടാകുമോ’ എന്നു ചിലർ സംശയിക്കുന്നു. പ്രവാചകനായ യശയ്യ പറയുന്നു ‘ദൈവത്തിന്റെ വചനം എന്നും നിലനിൽക്കുന്നു’ എന്ന്‌. (യശയ്യ 40:8) അതു നമുക്ക്‌ എങ്ങനെ ഉറപ്പിക്കാം?
തന്റെ വചനം കാത്തുസൂക്ഷിക്കാനും അതിൽ എന്തെങ്കിലും മാറ്റം വരുത്തുന്നതു തടയാനും ഉള്ള ശക്തി ദൈവത്തിനുണ്ട്‌. പുരാതനകാലങ്ങളിൽ കൈയെഴുത്തുപ്രതികൾ തയ്യാറാക്കുമ്പോൾ പകർപ്പെഴുത്തുകാർ വിശുദ്ധഗ്രന്ഥത്തിലെ ഓരോ അക്ഷരങ്ങളും എണ്ണിനോക്കുമായിരുന്നു. അങ്ങനെ എന്തെങ്കിലും കൂട്ടിച്ചേർക്കുകയോ മാറ്റം വരുത്തുകയോ എടുത്തുകളയുകയോ ചെയ്‌തിട്ടില്ലെന്ന്‌ അവർ ഉറപ്പാക്കി. എന്നാൽ പകർപ്പെഴുത്തുകാർക്കും ചെറിയ ചില പിശകുകൾ സംഭവിച്ചിട്ടുണ്ട്‌. കാരണം, മനുഷ്യർക്കു തെറ്റുപറ്റുമല്ലോ.
വിശുദ്ധതിരുവെഴുത്തുകളിൽ ദൈവത്തിന്റെ സന്ദേശമാണ്‌ ഉള്ളതെന്ന്‌ എങ്ങനെ ഉറപ്പാക്കാം?
വിശുദ്ധതിരുവെഴുത്തുകളുടെ പുരാതന കൈയെഴുത്തുപ്രതികളുടെ ആയിരക്കണക്കിനു പകർപ്പുകളുണ്ട്‌. ലഭ്യമായ വ്യത്യസ്‌ത പകർപ്പുകൾ താരതമ്യം ചെയ്‌തുനോക്കിയാൽ എന്തെങ്കിലും പിശകുകൾ വന്നിട്ടുണ്ടോ എന്ന്‌ എളുപ്പം കണ്ടെത്താനാകും. ഇതെക്കുറിച്ച്‌ കൂടുതൽ അറിയാൻ jw.org വെബ്‌സൈറ്റിലെ “ബൈബിളിൽ എന്തെങ്കിലും മാറ്റങ്ങളോ തിരിമറികളോ വരുത്തിയിട്ടുണ്ടോ?” എന്ന ലേഖനം കാണുക.
1947-ൽ ചാവുകടലിന്‌ അടുത്തുള്ള ഗുഹകളിൽനിന്ന്‌ ചില ചുരുളുകൾ കണ്ടെടുക്കപ്പെട്ടു. അതിനെ ചാവുകടൽ ചുരുളുകൾ എന്നാണു വിളിക്കുന്നത്‌. അതിൽ വിശുദ്ധതിരുവെഴുത്തുകളുടെ ഭാഗങ്ങളുണ്ടായിരുന്നു. ഇവയ്‌ക്കു 2,000 വർഷത്തോളം പഴക്കമുണ്ട്‌. നമ്മുടെ കൈവശമുള്ള വിശുദ്ധതിരുവെഴുത്തുകളെ ഈ പുരാതന കൈയെഴുത്തുപ്രതികളുമായി പണ്ഡിതന്മാർ താരതമ്യം ചെയ്‌തുനോക്കി. അവർ എന്താണ്‌ കണ്ടെത്തിയത്‌?
ആദ്യത്തെ കൈയെഴുത്തുപ്രതികളിൽ ഉണ്ടായിരുന്ന അതേ വിവരങ്ങൾതന്നെയാണ്‌ ഇന്നു നമ്മുടെ കൈവശമുള്ള ദൈവവചനത്തിലും ഉള്ളതെന്നു പണ്ഡിതന്മാർ കണ്ടെത്തി.a വിശുദ്ധതിരുവെഴുത്തുകളിൽ ഉള്ളത്‌ ദൈവത്തിന്റെ സന്ദേശമാണെന്ന കാര്യം ഇത്‌ വ്യക്തമാക്കുന്നു. തിരുവെഴുത്തുകളുടെ കൃത്യതയ്‌ക്കു ഒരു കോട്ടവും സംഭവിക്കാതെ ദൈവം സംരക്ഷിച്ചിരിക്കുന്നു എന്നല്ലേ ഇതു കാണിക്കുന്നത്‌!
അതുകൊണ്ട്‌ ദൈവത്തിന്റെ വചനത്തിലെ വിവരങ്ങൾ കൃത്യമാണെന്ന കാര്യത്തിൽ സംശയം വേണ്ടാ. നമുക്കു പൂർണവിശ്വാസത്തോടും ബോധ്യത്തോടും കൂടെ അതു വായിക്കാം. അടുത്ത ലേഖനത്തിൽ ദൈവത്തിന്റെ പ്രവാചകന്മാരിൽനിന്ന്‌ ദൈവത്തെക്കുറിച്ച്‌ എന്തു പഠിക്കാമെന്നു നോക്കാം.
a ഗേസാ വെർമെഷിന്റെ മുഴുവൻ ചാവുകടൽ ചുരുളുകളും ഇംഗ്ലീഷിൽ, പേജ്‌ 16.