AGOSTO

Versu ela enowoga dhithu biili dhathima: (1) Athu apama enofwanyiwa makathamiho. (2) Yehova ononikavihera nafwanyiwaga makathamiho. Oliye ananikavihera nimakalelo baani? Ekalelo emodha, fuudhela onikavihera okanna moonelo wapama wodhela egumi yehu mwilaboni ela nnakalihu. Yehova ononipaganya wi naamulabelaga oliye nnere okanna egumi yohagalasa. Mbwenye oliye, kawogile wi egumihu kinakanne makathamiho mwilaboni ela yabure. (Isa. 66:14) Yehova ononikongomedha osugwa osogolo, wengo nnakanihu egumi oliye ananifuniyena — eli egumi yohagalala ni yamukalakala. (2 Kor. 4:16-18) Mbwenye nijheehaga nlabo nno ofiya, Yehova anerege onikavihera kadda labo, naarive nifwanyiwaga makathamiho ohiyana-iyana. (Lam. 3:22-24) Dhithu baani nnafunihu ohudhera ni dhotajhiha dha adhaari ororomeleya a Yehova akale ni amudhidhi yoola? Nnere woona wi aatene iyo podi ofwanyiwa makathamiho nahajhehedhihu mwigumini mwehu. Mbwenye namuroromela Yehova, oliye aneere onikavihera. — Sal. 55:22. Namasugwera 04/23 epaddi 14-15 ddima 3-4

Iyo podi ohudhera ni yopadduwa ya Juze ni Mariya, yaali owiwegeredhene wihina yawiwelele anamathonga, naarive eyo egaali ethu yorusa. (Luk. 2:1-6) Kabeni noone ethu yehile wiwelela wewa mudhidhi Mariya aganna wari. Namathonga oRoma Augusto okumiha nlamulo nawoga wihina athu aatene yohowela ohogolowelela elabo ebaliwiwa wihina elebeliwe. Juze ni Mariya yohowela wedda olenddo yeddaga dila yanna mukitakita wihina efiye oBele walapenle makilometuru 150. Olenddo ole kuwaakale wokweya thabwathabwa wa Mariya anna wari ya mweri 9. Yere ddi ahere ofiya mudhidhi wa Mariya obala egaali mudila? Podi wera aliwa yahithabwa othuwathuwa ni egumi ya Mariya ni ya mwaana afuna obaliwa, aakale Mesiya. Yahafune, ela yere okala ethu yathukule aliwa ohawiwelela anamathonga. Juze ni Mariya kiyathambwe wubuwela dhothuwathuwiha dhewa. Aliwa yahawiwela anamathonga. Mwaha wa yeyo Yehova ahireeliha wiwelela wewa. Mariya ahifiya nubareleya elabo yoBele ni ahimbala mwaana ni egumi yapama teto ahifiyedha wakwaneliha yovuhulela! — Miq. 5:2. Namasugwera 10/23 epaddi 8 ddima 9; epaddi 9 ddima 11-12

Ki akala onowoova ovaha yowakula mmutugumanoni? Ethu yobajha onahoweliwe werana fuwiwegeredha pamadhene. (Pro. 21:5) Wahudhera pama museluya, enere okweya ovaha yowakula. Ethu emodha fuvaha dhowakula dhokwiva. (Pro. 15:23; 17:27) Wavahaga yowakula yookwiva, kunathabwege woova. Wavahaga yowakula yookwiva ni madhu awo, onowoniha wihina ohegeredha pama ni ohonelamo museluya. Ki akala nihixixa dholaga ndha, mbwenye nnowovave ovaha dhowakula? Okanne ebarbari wihina Yehova anovaha thima wilibihedha wawo wihina werena ele onandiwe. (Luk. 21:1-4) Wilibihedha kinatapulela werana ndhe nihinandihu. (Fil. 4:5) Werena yoluba onandiwe wakwanihedha ni olobele wa Yehova omulobaga murima wopwaseya. Yoluba yobajha podi okala ovaha yowakula yookwiva. Namasugwera 04/23 epaddi 21 ddima 6-8

Murumiwi Pawulo aniliganihe ni anyakoddo eli owiwegeredhene wi ewane koddo. Vakoddoni, munyakoddo anakala owiwegeredhene wihina awane ni amwiddani mudhidhi bu mudhidhi. Enopadduwa emodhave nihiyo. Wihina nikale owiwegeredhene wodhela nlabo na Yehova, nnohowela okala owiwegeredhene ni yowara ya mujhila ya nroromelo ni kapaseti a ejhehedhelo. Ninga yowara ya mujhila enabareliwa murima wa munyakoddo. Nroromelo ni odhivela winobarela murima wehu. Dhikalelo ndha dhinere onikavihera odhowagave nimulabelaga Mulugu ni nimuharaga Yesu. Nroromelo nnonivaha ebaribari wi Yehova anere wareeliha ale enamusayela ni murima wamutene. (Ebe. 11:6) Nroromelo nnonlibiha ni nnonikavihera odidelagave okala ororomeleya wa mwene ehu Yesu naarive nifwanyiwaga makathamiho. Wihina nlibihe nroromelo nehu ni ovilela, nnohowela ohudhera dhotajhiha dha addibilihu enadidela okala ororomeleya naarive eharahariwaga obe egaali ohaweene. Nnohowela okala pasope ni dhithu dhomwilini naatajhihaga addibilihu yajajalihe egumi yewa wihina epwehe Omwene wa Mulugu mburo wobajha. Namasugwera 06/23 epaddi 10 ddima 8-9

Wihiha ekalelo enamuthukulela muthu osugwera dhowera dhaye ni mubuwelo waye. Mbwenye nnohowela wihiha wihina nikanne efunelo yowerana dhithu dhapama, thabwathabwa yakala ethu yorusa obe nahinadhiveliwihu werana. Kuddiwale wihina wihiha yowima yomuzimuni. Bumwahaya olobele wa Yehova olobaga muzimu wotxena wihina wukavihere okanna ekalelo ela yathima yowihiha. (Luk. 11:13; Gal. 5:22, 23) Kujhehege baahi mudhidhi wofwanelela. Mwilaboni muna nnakalihu kanijhehedhege wihina dhatedhene dhinerege oneeddela pama. Nakalaga ojhehave baahi mudhidhi wofwanelela, kannande wakwanihedha dholuba dhehu. podi wera kunakanna efunelo mwaha onona wi yoluba yawo soorusa wakwanihedha. Akala dhili ndo, ononamo aavi wakwanihedhaga vang’ono vang’ono? Akala onofuna okanna ekalelo ya omuzimuni ononamo aavi wooniha weragana ethu-sithu? Obe akala yoluba yawo fumwileri Bibiliya aatene ononamo aavi kadda labo omwilerigi mutala vang’onove? Namasugwera 05/23 epaddi 29 ddima 11-13

Mwaha wa mahala a Yehova nnikuru naaye kinanihalela yojha yomuzimuni malabo yala okuthula. Yojha eyo enonikavihera odhowagave neddaga “Dila Yoweela.”(Isa. 48:17; 60:17) Iyo podi owoga wihina muthu anarumedha omuhudhera Bibliya ohukanna ofuru wohara “Dila Yoweela.” Amodha enohara mudhidhi mung’onove yindo ohiya. Amodha enothoma odhowaga yeeddagave ofiyedha mburo winayiwa. Mbwenye mburo baani? Ale eli makiristawu othikitheliwa mburo wewa di ‘parayizu a Mulugu’ ali odhulu. (Ovuhu. 2:7) Vano ale enna ejhehedhelo yokala mwilaboni yavati mburo wewa fumakuthulo wa Yaka Txikwi dha Othonga wa Kiristu, athu aatene enakaliwa ologomana. Akala onna weeddave Dila ela kusugwe mundduli ni kuhiye dila ela, odhowe wafiye winayiwe, Mwilaboni Exa. Nnafuna nere “olenddo wapama.” Namasugwera 05/23 epaddi 17 ddima 15; epaddi 19 ddima 16-18

Wubuwelaga dhithu dhatedhene Yehova uwereliye, we onothabwa omutamalela ofiyedha ofunaga ovelela egumawo wa Oliye. (Sal. 116:12-14) Bibiliya anawoga egi: ‘Dhego dhatedhene dhapama ni nvaho wapama’ ananivaha di Yehova. (Tiya. 1:17) Nvaho munlubale Yehova anivahiliye bu mukutho wa mwanaye Yesu Kiristu. Kabiha wubuwela! Enowandeya okanna wandana woliba ni Yehova mwaha wa yowobola. Teto mwaha wa yowobola Yehova anonivaha oneti wokalawo ni mukalakala. (1 Juwa. 4:9, 10) Wipeleka wa Yehova makalelo apama owooniha wihina onomutamalela Yehova ohiya baahi mwaha wa yowobola, mbwenye mwaha wa mareeliho aatene anuvahiiye. — Deut. 16:17; 2 Kor. 5:15. Namasugwera 03/24 epaddi 5 ddima 8

Peeno noonaga makalelo owubuwela aathu ehinaligana ni mubuwelo wa Yehova, nnakala ninga Lo. Oliye ‘akalesa othuwathuwene mwaha wa mweddelo wonyakavala yanna athu a mudhidhi yole.’ Teto oliye ahinona wihina baabihu odhulu oowidda mweddelo yole. (2 Ped. 2:7, 8) Omoova ni omudhivela Mulugu wahimukavihera Lo okoodda mweddelo waathu yamwapele. Nihiyowa naapeliwe ni athu ehinna nriho ni malagano a Yehova. Naarive dhigaali ndo, Iyo podi okala oweela epaddi ya mubuwelo nadidelave omudhivela Mulugu ni nahudhera omoova oliye mwamakalelo apama. Wi naande werana eyo, nihikanna nikavihero na Yehova. Oliye onolabihedha livuru na Provérbios wihina anikongomedhe. Makiristawu aatene, alobwana, ahiyana, azombwe ni anakalaba, podi ohudhera vanlubale ni livuru na Provérbios. Naamoovaga Yehova, kannisijhedhege nikalaga ninga kaninna wandana wabure obe kannerana dhithu dhabure. Namasugwera 06/23 epaddi 20 ddima 1-2; epaddi 21 ddima 5

Podi wera we onowiddiwaga ni amudhi awo mwaha okala Namoona a Yehova obe mwaha oleva dhoreela dhawo wihina opwehe Omwene wa Mulugu mburo wobajha mwigumini mwawo. (Mat. 6:33) Akala siyeyo, okanne ebaribari wi Yehova ohunona dhithu dhatedhene weriliwena wihina omulabele. (Ebe. 6:10) Mwebaribarene we uhonelamo wi madhu ala a Yesu beebaribari: “Kaawo muthu anahiye nyumba yaye, addibile, arogoliye, amaye, ababe, anaaye obe mundda dhaye, mwaha waaga ni mwaha wa muthenga dhapama, ahakela okunamo mudhidhi yola, nyumba, addibile, arogoliye, amaye, anaaye, mundda dhaye, ni oharahariwa ni osogolo egumi yohimala.” (Mar. 10:29, 30) Mwebaribarene mareeliho wawakeliwe ehithabwa winjhiva opitha ethu-sithu oleviliwe. — Sal. 37:4. Namasugwera 03/24 epaddi 9 ddima 5

Makiristawu oJudeya nuufwanyiwa dala enlubale. Addibila a mulogo wAntiyokiya ‘othoma mowiwanana ni ele kadda muthu anniyena, wihina yakavihere addibila oJudeya.’ (Dho. 11:27-30) Naarive addibila yafwanyiwe dala egaali woolapela, makiristawu owAntiyokiya yahithoma wakavihera. (1 Juwa. 3:17, 18) Peeno iyo podi waweddela thagaraga addibilihu nanona wihina enna ofwanyiwa ngovi. Iyo podi werana ethu-sithu mowaguva wodhela waligarela anamaholela mulogo wi niivelele wihina nikavihere ni ethu-sithu. Iyo podi ovaha dhovelela dhehu ni walobelela ale enafwanyiwa ngovi. Teto addibilihu ni arogolihu podi ohowela nikavihero wihina ekanne yojha ya kadda labo. Mwenihu Yesu Kiristu adha wihina aatorihe athu, nnafuna wi nuliyeya oone wi ninna woniha thagaraga ni anithane wi ‘naakele Omwene.’ — Mat. 25:34-40. Namasugwera 07/23 epaddi 4 ddima 9-10; epaddi 6 ddima 12

Yesu onohara yotajhiha yaababe, bumwahaya adhe akalege ookweya. Oliye aarumiwe veelaboni yavati wihina aalaleye baahi athu a “nlogo naamwaana Ezarayeli.” Mbwenye oliye aali ookweya, bumwahaya adhe aalaleyege athu amodha. Motajhiha, nlabo dhaala muhiyana dhaala ahaali mweEzarayelita omukokorela Yesu ni omuloba wihina anvulumuse mwanaye onihiwa goyi ni ademoniyu. Mwaha wa thagaraga Yesu werana ele muhiyana ole aamulombiye ni onvulumusa mwanaye. (Mat. 15:21-28) Kasugwa yopadduwa emodha. Nubajha waapara mabasa aye oolaleya, Yesu owoga egi: “Muthu yole anagikodde . . . , nimiyowa ginere omukodda.” (Mat. 10:33) Mbwenye Yesu kaamukooddile Peduru naarive oliye agamukooddile dila thaaru. Oliye ahinona wihina Peduru ahithwaruwa ni wihina oliye aali mulobwana oororomeleya. Nuvenyihiwa muukwani Yesu onfwanya Peduru. Mohanganyedha Yesu ahiwoga nuliye wi oomudhivela ni ahimulevelela dhoothega dhaye. (Luk. 24:33, 34) Yehova ni mwanaye Yesu, bookweya. Ki iyo? Yehova anajheha wihina ni iyoya nikale athu ookweya. Namasugwera 07/23 epaddi 21 ddima 6-7

Muwari mwa yohudhera ela nihoona dhithu dhowinjhiva dhinanthukulela orumedha wi elabo ela enere okala parayizu. Ki vano ethu baani nnafunihu wawaddela athu ale enanganyedha wi mpaganyo ola onere wakwanela? Ethu yoobajha, di mwinnyene Yehova aneerana mpaganyo ola. Livuru na Apocalipse nnihina: ‘Ole akiratile vampaddoni wera: Kasugwa! “Gihisaddula dhithu dhatedhene vano dhixa.”’ Yehova ohukanna thotho, kopolo ni efunelo yowakwaneliha ele apaganyiliye. Yanabiili, vamentoni va Yehova dhithu dhaatedhene apaganyiliye dhinakala ninga dhihimala wakwanela. Bumwahaya Oliye ohuwoga egi: ‘Olebe, mwaha madhu ala boororomeleya ni ebaribari. . . . Dhihakwanela!’ Yanatharu, kaavo ethu enamuhihe Yehova wakwaneliha ethu ambeliye werana. Bumwahaya Oliye ohuwoga miyo gili: ‘Alfa ni Omega.’ (Ovuhu. 21:6) Omakuthulo athu aatene enere woona wihina di Saddana ahinna kopolo ni ali muliba woota, omuhiya Yehova. Bumwahaya nlabo onafuniwe wileri mpaganyo woriya, vano muthuya awoga egi: ‘Eyo kinadha epadduwa,’ We podi omwilerela versu 5 ni 6 ni omutapulele, openddaga ni oliye omwaddelaga wihina enakala ninga Yehova ohasinari wihina anere wakwaneliha dhithu dhaatedhene. — Isa. 65:16. Namasugwera 11/23 epaddi 7 ddima 18-19

Yehova ahimpaganya Abaraawu. Mudhidhi ahinathi okanna mwana, aganna yaka 75. (Gén. 12:1-4) Abaraawu ahoona mpaganyo ola wakwanelaga? Hee. Oliye ahoona epaddi emodha wa mpaganyo ole wakwanelaga. Agaabuwile muhinjhe Ewufarati dhahivira yaka 25 oliye ajhehaga wakwanela mpaganyo wa Yehova. Nuwindo oliye woona obaliwa wa mwanaye Izaki. Ale yaali matikiniho manlubale. Teto nuuvira yaka 60, oliye woona obaliwa wa adhule Ezawu ni Jako. (Ebe. 6:15) Mbwenye Abaraawu kandile woona odhuulu waye okalaga nlogo ninlubale ni ovolowaga Elabo Yothomeliwa. Naarive dhigaali ndo, mulobwana ola oororomeleya ahikanna wandana wohuthikeya ni Yehova. (Tia. 2:23) Abaraawu avenyihiwa, aneere ohagalala onona wi mwaha ovilela ni nroromelo naye malogo amatene a elabo yavati ehireelihiwa! (Gén. 22:18) Nnahudheravo ddi? Podi wera kannande woona wakwanela wa mpaganyo dhatene dha Yehova ovanene. Mbwenye nakala oovilela ninga Abaraawu, iyo podi okanna ebaribari wihina Yehova aneere onreeliha ovanene ni mwilaboni exa. — Mar. 10:29, 30. Namasugwera 08/23 epaddi 24 ddima 14

Agaali muzombwe, mwene Uziya aali muthu owiyeviha. Oliye ahihudhera ‘omoova Mulugu eebaribari.’ Uziya akwile aganna yaka 68. Muwari mwa yaka dhowinjhivadhene, Yehova oomureeliha. (2 Cró. 26:1-4) Uziya ahaagonjhiha malogo owinjhiva ni ahibarela elabo yoJeruzale. (2 Cró. 26:6-15) Mwebaribarene Uziya ahihagalala mwaha werana dhithu dhowinjhiva nnikavihero na Yehova. (Ecl. 3:12, 13) Mwene Uziya ahilemela wawaddela athu ele yahoweliwa werana. Nerege siyeyo yamuthukulele oliye wubuwela wihina ahikanna oneeti wowerana ethu sithu afuniye? Nlabo nimodha, oliye ovolowa muTempulu ya Yehova ni oxixa ompaha insensu waltareni, ethu mamwene yahanniwana ofuru wowerana. (2 Cró. 26:16-18) Namakutha munlubale Azariya ahixixa omusumulula, mbwenye Uziya otakaleliwa vanlubale. Yowukulihaya, Uziya ohiya okala oororomeleya wa Yehova, vano mwaha wa yeyo Yehova omusinyusa ni maranya. (2 Cró. 26:19-21) Ahere adidela okala owiyeviha, dhithudha kadhamale ndala! Namasugwera 09/23 epaddi 10 ddima 9-10

Naarive nuukala mukiristawu oothikitheliwa omuzimuni, Peduru oohowela owanana dhithu dhamurusa epaddi yoomuzimuni. Yaka ya 36 M.W., Mulugu omuruma vade va Korneliyu ahaali muJudewu, numala Korneliyu othikitheliwa ni muzimu wotxena. Vano obajha woneya pamadhene wihina “Mulugu kanna nsakulo” teto ale yahali maJudewu yere okanna ofuru wokala makiristawu. (Dho. 10:34, 44, 45) Voharela Peduru obajha ojha ni ale yahali maJudewu, ethu ahineregiyena egumaye yatene. Mbwenye makiristawu amodha yahali majudewu nivanove yubuwela wihina maJudewu kiyafwanela ojha vamodha ni ale yahali maJudewu. Vano makiristawu dhaala yaali maJudewu yanna mubuwelo yola nufiya wAntiyokiya, Peduru ohiya ojha naaddibila ale yahali maJudewu. Podi wera oliye oova wihina makiristawu ale yaali majudewu etakaleliwe nuliye. Murumiwi Pawulo wonelamo wi ndhe Peduru eeriye dhaali dhogwalagwambi, vano omusumulula vaari vaanamwinjhi. (Gal. 2:13, 14) Naarive agaviriganihe Peduru kaaselele. Oliye ahididelave wilibihedha wihina awomihedhe emuthu yaye. Namasugwera 09/23 epaddi 22 ddima 8

Podi wera ehikalawo epaddi onooniwe wihina enohoweleya owomihedha mwigumini mwawo, naarive dhigaali ndo kuhiye eyo wukwerebeyiha. ‘Nabwiya dapama,’ Oliye anere wukavihera wawerana masadduwo enahoweleya. (1 Ped. 2:3) Murumiwi Peduru ohuniroromeliha egi: ‘Mulugu . . . onere omala wuhudhihani. Vobajhavene Peduru uubuwela wihina kafwanelela okala ni Yesu. (Luk. 5:8) Mbwenye nnikavihero ni odhivela wa Yehova vamodha ni mwanaye Yesu, Peduru ahivilela ni ahididela okala namahara a Yesu Kiristu. Yokumelelavoya sowihina Yehova ohenya wihina Peduru ‘akanne ofuru wovolowa Mumweneni wamukalakala wa Nabuyihu ni Nvulusi ehu Yesu Kiristu.’ (2 Ped. 1:11) Ala mareeliho manlubale! Wavilela ndala ninga Peduru ni warumedha oxagihiwa ni Yehova, ni weya onere wawakela mareeliho a egumi yohimala. Ni makalelo yala onere ‘wakwanihedha yoluba ya nroromelo nawo, wili ovulusiwa wa egumi yawo.’ — 1 Ped. 1:9. Namasugwera 09/23 epaddi 31 ddima 16-17

Tabernakulu yahikanna nthaddo nowunnuwa ni noobareleya, anamakutha yaapariwa mabasa ewa. Altare a kobere wapahiwavo mukutho akala nthaddo nenna vamodha ni basiya ya kobere mwaali manjhe anamakutha yalabihedhiiwa wihina yisuwena yahinabajhe wapara mabasa ootaleleya. (Êxo. 30:17-20; 40:6-8) Makiristawu oothikitheliwa enolaba nuroromeleya elabo yeela yavati, obe neere, nthaddo na muwari na tempulu yomuzimuni. Basiya ninlubale na manjhe nnafwanyeya nthaddo nna, yowubusedha yinlubale ya makiristawu oothikitheliwa, wihina ndala ninga makiristawu aatene aliwa enohowela okala oweela epaddi yomwilini ni yomuzimuni. Ki vano, ‘muthithi waathu’ onamwebedha Yehova wuvi? Murumiwi Juwawu ahoona muthithi waathu ‘egimenle osogolo wa mpaddo ni osogolo wa Nimbila.’ Tempulu yowoneya eyo enaliganihiwa ni nthaddo noode, wengo aliwa ‘enampareliwa mabasa aye otaleleya mutana ni mahiyu mu tempulu mwaaye.’ (Ovuhu. 7:9, 13-15) Teto iyo nnovaha thima oneti Yehova anivahiliye womwebedha mwamakalelo ooweela mutempuluni mwaaye yomuzimuni! Namasugwera 10/23 epaddi 28 ddima 15-16

Makalelo mamodha Yehova ananivahiye kopolo fuudhela walabihedha anamaholela mulogo. (Isa. 32:1, 2) Bumwahaya, wakala othuwathuwene wawaddele dhothuwathuwiha dhawo anamaholela mulogo. Yuvaha nikavihero, kuwubuwele dila bili, orumedhe mowaguva. Aalabihedhaga anamaholela mulogo, Yehova podi wuvaha kopolo.Ejhehedhelo yehu enafwanyeya mBibiliya, yokalawo ni mukalakala podi okala velaboni yavati obe odhulu.oliye anere onivaha kopol. (Rom. 4:3, 18, 19) Ejhehedhelo yehu enonikavihera wawanana makathamiho, odidelave olaleya ni wakwanihedha mutholo bu mutholo nnakelihu mmulogoni. (1 Tes. 1:3) Yaali ejhehedhelo yela yaamulibihile murumiwi Pawulo. Oliye ahipinyamwinyiwa, ‘ahisimwela,’ ‘ahiharahariwa’ ni ahifiyedha wubuwela wihina ‘ahimorihiwa’. Teto malabo mamodha oliye ahihala nena nukwa. (2 Kor. 4:8-10) Pawulo ahikanna kopolo wihina ande ovilela, mwaha ubuwela baahi ejhehedhelo yaye. (2 Kor. 4:16-18) Pawulo asugwa baahi ejhehedhelo yaye. Ejhehedhelo yaye yowakela egumi yohimala odhulu yaali yathima vanlubale. Bumwahaya naarive afwanyiwaga makathamiho bi makathamiho oliye kaaselele. Pawulo oopendda wodhela ejhehedhelo ela, mwaha wa yeyo oliye “oovenyihedhiwa kadda labo.” Namasugwera 10/23 epaddi 15-16 ddima 14-17

Walobelaga we podi wikoha, akala ola mudhidhi wofwanelela wihina Yehova agivahe ethu ginalobimi. Podi wera we onubuwela wi onohowela yowakula yowaguveya, mbwenye ebaribariya sowihina Yehova ohunona mudhidhi wapama wonikavihera. (Ebe. 4:16) Dhooloba dhehu dhahakuliwa iyo podi wubuwela wi yowakula ya Yehova sowihina ‘Naari.’ Mbwenye podi wera yowakulaya sowi ‘Ovanene naari.’ Motajhiha, ddibila dhaala aali muzombwe ahilobela wa Yehova amulobaga wihina anvulumuse, mbwenye oliye kavulumuwe. Ahere Yehova awerana matikiniho ni anvulumusa. Saddana eere owoga wihina ddibila ole ahididela omulabela Yehova mwaha wihina ahivulumusiwa. (Jó 1:9-11; 2:4) Ohiya eyo Yehova ohupaganya wihina osogolo anere omariha oredda watene. (Isa. 33:24; Ovuhu. 21:3, 4) Mudhidhi oyo wahinafiye kanijhehe ovulumusiwa mwamakalelo ootikiniha. Vano ddibila ole anohowela olobela wa Yehova wihina anvahe kopolo ni murenddele wa mmubuweloni wihina adidele ovilela. Naarive agaali muredda adhowegeve amulabelaga Yehova nuroromeleya. Namasugwera 11/23 epaddi 24 ddima 13

Ebaribari wihina Sansawu aherana yoviriganiha enlubale, mbwenye oliye kaaselele omulabela Yehova. Oliye ahisayela makalelo owerana efunelo ya Yehova, obe neere, owana ni mafilistewu. (Juí. 16:28-30) Sansawu ahimpigiriyela Yehova egi: ‘Mugeenye wawelihedha kunyawunya mafilistewu.’ Yehova ahaakula yoloba ya Sansawu wodhela onvaha kopolo dhohukala dha masika mwamakalelo ootikiniha. Mwaha wa yeyo Sansawu ahanda waapa mafilistewu owinjhiva nlabo nenne opitha ale andiliye waapa egumaye yaatene. Ebaribari wihina Sansawu ohoowela wawanana makathamiho yakumelelevo mwaha wa dhoviriganiha dhaye. Naarive dhigaali ndo, oliye kahile werana efunelo ya Yehova. Emodhave enapadduwa ni iyo. Nerana yoviriganiha, vano ohowelaga osinyusiwa obe nayelela mutholo bu mutholo, kaniselele omulabela Yehova. Kudduwale wi Yehova kadha aninyanyalaga. (Sal. 103:8, 9) Naarive niviriganihaga, Yehova podi ofunagave onilabihedha ndala ninga eriliyena ni Sansawu. Namasugwera 09/23 epaddi 6 ddima 15-16

Ovilela winonthukulela orumedhiwa ni Mulugu. Eyo enatapulela wi wavilelega onorumedhiwa vamentoni va Yehova. Eyo kinatapulela wi waharahariwaga obe wafwanyiwaga makathamiho Yehova anohagalala, mbwenye enatapulela wihina Yehova anahagalala ni ekalelo yawo. Mwaha ovilela winonthukulela orumedhiwa ni Mulugu. Ala mareeliho ooriha vanlubale! (Sal. 5:12) Kuddiwale wihina Abarawu ahivilela naarive afwanyiwaga makathamiho ohiyanahiyana teto eyo yahimuhagalasa vanlubale Yehova. Bumwahaya Yehova ahandana nuliye ni amoona ninga muthu owogowa. (Gén. 15:6; Rom. 4:13, 22) Nihiyoya podi onipadduwela emodhave. Orumedhiwa wehu vamentoni va Yehova kunadha mwaha wa mabasa nnandihu omparela obe mwaha wa mutholo nnakelihu. Yehova anonirumedha mwaha nnovilela ni nroromelo, teto aatene iyo podi wanda ovilela naarive niganna yaka dhohiyana-hiyana, dhithu dhinanipadduwela mwigumi mwehu obe akala nnowanda werana dhithu dhowinjhiva. We onna wavilelana makathamiho mudhidhi yola? Akala siyeyo enupadduwela kuddiwale wihina onomuhagalasa Yehova. Noonelamo wihina nnorumedhiwa vamentoni va Yehova ejhehedhelo ninnihuna wihina Oliye anere wakwanihedha mpaganyo dhatedhene enothabwa oliba. Namasugwera 12/23 epaddi 11 ddima 13-14

Mukiristawu anohowela ohudhera othapanya ni makalelo apama. Mulobwana anone othapanya pama, anopwasedha ovuruwana ni anowanda wonelamo mubuwelo dha athu amodha. (Pro. 20:5) Oliye anowanda wonelamo makalelo anawoga muthuya, makalelo winakala wintoni waye ni makalelo anaddiginyiye madaye. We kunande ohudhera dhithu dhatedhene ndha wahipathaga mudhidhi wi okale ni athu. Akala onothabwesa othapanya ni athu olabihedhaga telefoni ninga emeyili obe mensaje, eyo kinukavihere wanda othapanya ni athu tho-tho. Bumwahaya osayelege makalelo wihina wande othapanya ni athu tho-tho. (2 Juwa. 12) Mukiristawu owithwelavo epaddi yomuzimuni anohowela onoona wisamalela yeka vamodha ni osamalela emudhaye. (1 Tim. 5:8) Sathima vanlubale ohudhera ethu enafuna wukavihera waafwanya mabasa. (Dho. 18:2, 3; 20:34; Efe. 4:28) Wilibihedhe ononiwa ninga muthu anonne wapara mabasa nuviheya ni anamariha ele anambeliye. Werana eyo, enere wukavihera waafwanya mabasa nudhowagave waparaga mabasaya. Namasugwera 12/23 epaddi 27 ddima 12-13

Mbibiliyani madhu owi ‘nlabo na Yehova’ onagiwana mudhidhi Yehova anaatorihiye amwiddani aye ni anavulusiye nlogo naaye. Eyo ehipadduwa dila dhowinjhivadhene mundduli. (Isa. 13:1, 6; Eze. 13:5; Sof. 1:8) Mudhidhi wehu, ‘nlabo na Yehova’ nnaabajhe anamathonga yamurijha obe yamugujhula Babiloniya Munlubale ni nnamale va koddo ya Armajedo. Wihina nivuluwe ‘nlabo’ nno nnohowela wiwegeredha ovanene. Yesu ohuhudhiha wihina nnohowela okala owiwegeredhene ‘ohoseya winlubale’ wahinafiye, eyo enoniha wihina nnohowela okala owiwegeredheene malabo amateene. (Mat. 24:21; Luk. 12:40) Ethu baani nnahowelihu werana wihina nivuluwe nlabo na Yehova? Tesalonika, ahilabihedha dholaddaniha dhowinjhiva wihina aakavihere makiristawu okala owiwegeredheene nlabo ninlubale na Yehova nihinafiye. Pawulo ahinona wihina nlabo na Yehova kanafiye mudhidhi yole. (2 Tes. 2:1-3) Naarive dhigali ndo, Pawulo ahakongomedha addibila okala owiwegeredhene okalaga ninga nlabo nne nahanle neenaa nufiya. Ni iyoya peeno podi olabihedha yolaga ela. Namasugwera 06/23 epaddi 8 ddima 1-2

Omagomihedho wa yaka ya 1970, obajha omagiwa perediyu yanna andare 60 oTokiyu elabo yoJapawu. Athu yasugwa perediyu ele, yotikina ni yowikoha akala perediyu ele yere wanda okalave txithi naarive wigaaliwo oddiginyeya weelabo. Ethu baani yerilena menjinyero wihina perediyuya ekaleve txithi? Menjinyero yahilabihedha dhipano wihina perediyuya ekaleve yolibene ni ehiddurumuwe naarive eddiginyeyaga wakalawo oddiginyeya wa elabo. Makiristawu podi oladdanihiwa ni perediyu ela yootama. Nimakalelo baani? Mukiristawu onohowela okala txithi mudhidhi mmodhave ookweya. Onohowela okala ooliba ni ohuthikeya aabarelaga ni awiwelelaga malagano a Yehova. Oliye anakala owiwegeredhene wihina “iwelele” ni kanahiya ethu-siithu osaddula efunelo yaye. Mudhidhi mmodhave oliye anohowela okala “ookweya” dhandeyaga obe dhahoweleyaga. (Tiya. 3:17) Mukiristawu anilibihedha okanna ekalelo yela kanathabwa okala ookweya newene oorusa. Namasugwera 07/23 epaddi 14 ddima 1-2

Yesu oohowela okoodda dhoweha dha Saddana. Ddiyabo, afuna wihina Yesu ahimwiwelelege Yehova. (Mat. 4:1-11) Saddana ahiikoma wihina amuthukulele Yesu otheega wi anaande oliva muthengo wowobola. Mudhidhi aaparaga mabasa oolaleya mwilaboni yavati, Yesu ahifwanyiwa makathamiho mamodha. Amwiddani aye yomuharahara teto yahixixa ompa. (Luk. 4:28, 29; 13:31) Ohiya eyo, oliye oohowela ovilelana dhoviriganiha dha anamahara aye. (Mar. 9:33, 34) Mudhidhi atorihiwaga, Yesu ahoonihiwa goyi ni ahinyemuliwa. Omakuthulo, oliye ahipiwa mwamakalelo abure ni owuukuliha. (Ebe. 12:1-3) Oliye oohowela owanana dhoweha dhookuthula dha mwigumini mwaaye yeka, wula ahibareliwaga ni Yehova. (Mat. 27:46) Mwebaribarene Yesu ahoonihiwa goyi vanlubale wihina anikwele. Nuubuwela dhithu dhatedhene Yesu eriliyena wihina anobole, eyo kinanithukulela iyo omudhivela vanlubale? Namasugwera 01/24 epaddi 10-11 ddima 7-9

Ovilela winonikavihera okanna wandana wapama ni athu amodha. Mwaha winonikavihera ovuruwana nupwaseya amodha yawogaga. (Tiya. 1:19) Ohiya eyo, ovilela winonikavihera okanna murenddele ni athu amodha. Nakala oovilela, naarive dhehu dhahineddelaga pama, kannerena newene kannawoge ethu yaapihe mbani athu amodha. Teto kannanyanyuwelege athu amodha yawoga ethu enanitakalela. Ohiya owelihedha kunyawunya, ‘mudhowegeve nvilelanaga mmodha ni mukwaye mulevelelanaga mmodha ni mukwaye mohihiyedhedha.’ (Kol. 3:12, 13) Ovilela podi onikavihera nafunaga werana yothoma. Ohiya werana dhithudha ni marulu obe nahuubuwenle, nnohowela oveda mudhidhi wihina nisanyihe pamadhene museluya. Ndo nnere werana yothoma yapama. Motajhiha, akala nnasayela mabasa iyo podi orumedha mabasa oobajha nnafwanyihu. Mbwenye nakala oovilela nnere orajhiha wubuwela makalelo mabasaya enafuniwa opatha emudhi yehu ni wandana wehu ni Yehova. Nakala athu oovilela nnere wanda werana dhothoma dhapama. Namasugwera 08/23 epaddi 22 ddima 8-9

Malabo mamodha we podi okala owukuwene mwaha wa dhoviriganiha dhawo. Wubuwela ethu ompaganyiliwe Yehova mudhidhi wipelekaga wa Oliye, sithu enuvahe kopolo wihina wande owanana yoweha si yoweha enufwanye. Ni makalelo baani? Wipelekaga wa Yehova, we onikoodda wamwinnyo. Eyo enatapulela wi onere okoodda werena ethu-sithu yamuukule Yehova. (Mat. 16:24) Bumwahaya wafwanyiwa yoweha kunajhe mudhidhi wowinjhiva wubuwelaga ethu onahoweliwe werana, mwaha wihina we ohunona ethu othomiliwe werana, eli okala oororomeleya wa Yehova. We onere odidela okala txithi wihina omuhagalase Yehova. Ni makalelo yala onere omutajhiha Jo, naarive nufwanyiwa makathamiho manlubale oliye ahiwoga egi: ‘Ginoofiyedha okwa waga gahiselele nroromelo naaga!’ — Jó 27:5. Namasugwera 03/24 epaddi 9 ddima 6-7

Yehova, ‘Mulugu oodhivela’ teto Oliye ali ni iyo! (2 Kor. 13:11) Oliye anomuthuwathuwela kadda muthu wa iyo. Teto iyo podi okanna ebaribari wihina ‘odhivela waye wahinamala [ohunirijha iyo aatene].’ (Sal. 32:10) Naapendaga makalelo Yehova ananonihiye odhivela waye, nnerege othabwa omwaddamela ni Oliye anere okala muthu eebaribari mwigumini mwehu. Iyo podi olobela wa Yehova mudhidhi bu mudhidhi nimwaddelaga wi nnohowela vanlubale odhivela waye. Teto iyo podi omwaddela Yehova dhithu dhaatedhene dhinanithuwathuwiha. Nikannaga ebaribari wihina Oliye anowonelamo dhinanipadduwela ni anofuna vanlubale onikavihera. (Sal. 145:19) Ndala ninga nnaddamelihu mootho mudhidhi wooriidha wihina noothe, nnafuna nerena emodhave wodhela waddamela odhivela wa Yehova. Naarive odhivela wa Yehova wigaali winlubale, odhivela wula winoolibiha. Bumwahaya onfugulele Yehova murima wawo wihina wande woona odhivela waye mwigumini mwawo. Vano nabajha woona odhivela wa Yehova, aatene iyo podi owoga negi: ‘Ginomudhivela vanlubale Yehova!’ — Sal. 116:1. Namasugwera 01/24 epaddi 31 ddima 19-20

Ohiya baahi wawaddela wi ndina na Mulugu di Yehova, Yesu aherana dhithu dhowinjhiva. Majudewu Yesu alaleyesiye yahinona ndina na Mulugu, mbwenye Yesu “dinaaddele” dhatedhene wodhela Yehova. (Juwa. 1:17, 18) Motajhiha, Dholebela dha Ebarayiku dhinawoga wihina Yehova dathagaraga ni anthebwa. (Êxo. 34:5-7) Yesu ahoniha eyo pamadhene nuwoga nladdaniho na mwaana oovenyavo vaade. Nilerigi wodhela baabi ole amoonaga mwanaye wolapelawene adhaaga, amuthamagelaga, amukubarelaga, amulevelelaga ni murima waye watene, nnowanda wonelamo pamadhene wi Yehova Mulugu athagaraga ni anthebwa. (Luk. 15:11-32) Yesu ohunooniha pamadhene dhikalelo anna Yehova. Namasugwera 02/24 epaddi 10 ddima 8-9

Yehova anonilibiha ni anonivaha kopolo naafwanyiwaga makathamiho. Nnande aavi omutajhiha Yehova wodhela wakalela nthebwa athu amodha ni walibiha? Nnande werana eyo, wodhela wilibihedha okanna dhikalelo dhapama mmurimani mwehu dhinaanikavihere walibiha athu amodha. Dhikalelo ndho siivi? Ddiniyani enaanikavihere odhowagave kadda labo nawonihaga odhivela ni naalibihaga addibila? (1 Tes. 4:18) Nnohowela woniha dhikalelo dhapama ninga nthebwa, opama ni odhivela wooddibila. (Kol. 3:12; 1 Ped. 3:8) Dhikalelo ndha dhinanikavihere aavi? Naakalelaga nthebwa addibilihu ni naathuwathuwelaga ni murima wehu wamutene nnerege okanna efunelo enlubale yowalibiha yaafwanyiwaga makathamiho. Ndala ninga Yesu awogiliye “mulomo onawoga dhendhe dhinakuma vati vamurima. Muthu apama anokumiha dhoorela dhapama mmurimani mwaaye.” (Mat. 12:34, 35) Walibiha addibilihu ni arogolihu enafwanyiwa makathamiho, mwebaribarene makalelo athima owawoniha odhivela wehu addibilihu. Namasugwera 11/23 epaddi 10 ddima 10-11

Akala nnofuna woonelamo dhovuhulela dha mBibiliyani, nnere ohowela nikavihero na athu amodha. Kubuwela yopadduwa ela. Wubuwele waredhelaga murudda wahinafiyegiwewo, mbwenye oli ni mukwawo anonne pama muruddaya. Oliye ohunona pamadhene vego vilinyu ni kadda dila winathukuleliiwa. Mohanganyedha, okanna mukwawo ninga yoola anonne mburo dhatedhene wineere wukavihera vanlubale! Nimakalelo mamodhave, Yehova ali ninga mukwihu ole. Mwebaribareene Yehova ohunona pamadhene mudhidhi nilihu ni ethu enafuna opadduwa osogolo. Bumwahaya neegi ninone pamadhene dhovuhulela nnohowela okala athu owiyeviha ni oloba nikavihero naye. (Dan. 2:28; 2 Ped. 1:19, 20) Ndala ninga abaabi enaafunana opama aniwa, Yehova anafuna wihina anaaye ekanne osogolo wapama. (Jer. 29:11) Mbwenye mohiyana ni abaabi, Yehova ohunona pamadhene dhithu dhinaapadduwe osogolo. Teto oliye kanoota. Bumwahaya Yehova adhe enyege olebiwa dhovuhulela mBibiliyani. Nimakalelo yala, nnowanda onona dhithu dhinafuna opadduwa osogolo. — Isa. 46:10. Namasugwera 08/23 epaddi 8 ddima 3-4