SETEMBRO

Mulugu ohuvaha kopolo Yesu wihina amarihe makathamiho aatene amwilaboni. Matikiniho aweriliyena, enowoniha wihina Yesu ohukanna kopolo yowamariha makathamiho aamatene nahinadhihu wamariha yekihu. Motajhiha, oliye ohukanna kopolo yonobola muuthegani ni makathamiho amatene enanitoteliwa, ninga oredda ni okwa. (Mat. 9:1-6; Rom. 5:12, 18, 19) Matikiniho aweriliyena, enowoniha wihina Yesu ohukanna owedha womariha dhiredda dhatedhene ni wowavenyiha anookwa. (Mat. 4:23; Juwa. 11:43, 44) Teto, ohukanna kopolo wosugera nipevo ninlubale ni ohukanna kopolo yowawobola athu enonihiwa goyi ni muzimu dhotakala. (Mar. 4:37-39; Luk. 8:2) Nnohagalala vanlubale onona wi Yehova, ohunvaha kopolo dhatedhene ndha mwanaye Yesu Kiristu. Nnohowela ororomela wihina Omwene wa Mulugu onere wadhana mareeliho owinjhiva mwilaboni ya vati. Matikiniho awerilena Yesu agaali mwilaboni ya vati, nifwanafwaniho wa dhithu anafuniye wera abajha othonga mumweneni mwa Mulugu. Namasugwera 04/23 epaddi 3 ddima 5-7

Wakala mulogo muli anamalaleya owinjhiva ni wonelamo wi kunatonyiwa wihina wakule, we podi ofunaga oselela ovaha dhowakula dhawo. Mbwenye kuselele ovaha dhowakula dhawo. Kadda mutugumano wegeredhege dhowakula dhohiyana-iyana. Akala kuthonyiwe omabajho wa ohudhera, enere okanna ofuru wovaha dhowakula. Wegeredhaga ohudhera wa Namasugwera wubuwele makalelo kadda ddima eniwananiwa ni musoloya. Nimakalelo yala onere wanda ovaha dhowakula dhapama. Ohiya eyo we, podi wiwegeredha wihina waakule ddima dhinawoga wodhela muselu dhorusa otapulela. Mwaha waddi? Mwaha addibila podi ohuvenyiha moono ddima yeyo. Mbwenye wahitonyiwa wihina waakule, onere ddi? We podi othapanya ni ddibila aneddihe epaddi yele wegi, nafiya ddima ngana ginafuna gaakule. Namasugwera 04/23 epaddi 21-22 ddima 9-10

Juze owiwelela dhoholela dha Yehova ahiddoddomile, eyo yahimuthukulela okala mulobwana apama. Motajhiha, dila tharu oliye wakela dhoholela dha Mulugu dhakavihere emudhaye. Dila dhatedhene ndha oliye ahiiwelela mowaguva, naarive ehoweleyaga wawerana masadduwo manlubale. (Mat. 1:20, 24; 2:13-15, 19-21) Mwaha wiwelela dhoholela dha Mulugu ahanda ombarela, omukavihera ni omusamalela Mariya. Mohaganyedha, eyo yahimuthukulela Mariya wenjhedhedha odhivela anniyena ni Juze. Alobwana etenle podi omutajhiha Juze wodhela osayela dhoholela dha mBibiliyani yasamalelaga emudhi yewa. Mwaharaga dholaga dha mBibiliyani naarive ehoweleyaga wawerana masadduwo, munere wooniha wi munowadhivela ahiyana enyu ni munere walibiha matelo enyu. Murogola dhaala anakala elabo ya Vanuatu, ali oteliweene okwaranya yaka 20, anihina: “Mamunaga asayelaga ni aharaga dhoholela dha Yehova ginothabwa omuriha. Miyo kaginathuwathuwa ni ginororomela dhothoma dhaye.” Namasugwera 05/23 epaddi 21 ddima 5

MaJudewu yahogolowele elabo yewa, yohowela okala ‘nlogo noweela na Yehova.’ (Deut. 7:6) Mwebaribarene, wihina emuhagalase Yehova aliwa yere ohowela wawerana masadduwo mwigumini mwewa. MaJudewu owinjhiva yaali mento yabaliwe oBabiloniya, teto owinjhiva, podi wera yahivoloweliwa ni makalelo owubuwela akudda Babiloniya. Ehalaga vang’ono wihina yakwane yaka 70 maJudewu oobajha egahogolowenle wIzarayeli, musadoro Neemiya otakaleliwa vanlubale mwaha onona wihina aliwa kayahudhihile aniwa ewogelo ya maJudewu. (Deut. 6:6, 7; Nee. 13:23, 24) Mudhidhi yole dholebela dha Madhu a Mulugu dhalebiwe ni ewogelo yEbarayiku. Ki vano woona wihina aniwa kiyanda owoga Ebarayiku yahudhere aavi omudhivela ni omwebedha Yehova? (Esd. 10:3, 44) Nnowanda woonelamo wihina maJudewu ala yohowela wawerana masadduwo manlubale mwigumini mwewa. Mbwenye yaakweye wawerana masadduwo ala egaali wIzarayeli, woona wihina webedha webaribari wanna obubuhuliwa vang’ono vang’ono. — Nee. 8:8, 9. Namasugwera 05/23 epaddi 15 ddima 6-7

Yowukulihaya sowihina naarive niganna efunelo obe nimuharihedhaga pamadhene porogarama ehu, iyo podi ofwanyiwa makathamiho yanthukulele ohakwanihedha dholuba dhehu. Motajhiha, podi opadduwa ethu ‘yorulumusa’ enanthukulele ohakwanihedha yoluba yehu. (Ecl. 9:11) Obe podi okumelela makathamiho enanukuula obe enanthukulela okala ookwerebeyene. (Pro. 24:10) Teto mwaha okala athu ohulogomana iyo podi oviriganiha ofiyedha ohakwaneliha dholuba dhehu. (Rom. 7:23) Obe iyo podi okala oogomeene. (Mat. 26:43) Enaanikavihere ddi wagonjhiha makathamiho ni okanna efunelo labo nihinakannihuna kopolo? Ofwanyiwa makathamiho kawuthukulele ohakwanihedha yoluba yawo. Bibiliya anowoga wihina naarive nifwanyiwaga makathamiho iyo podi okanna kopolo dhowerana ndhe nnafunihu. Nahiselela wakwanihedha dholuba dhehu naarive nifwanyiwaga makathamiho, nnomoniha Yehova wihina nnofuna omuhagalasa. Teto Yehova anohagalala uwoonaga wilibihedhaga wihina wakwanihedhe yoluba yawo! Namasugwera 05/23 epaddi 30 ddima 14-15

Okala piyonero podi omukavihera muzombwe onona waweddiha pama athu aatene ni, onona olabihedha korowa anakeliye ni ohinonga bure-bure. (Fil. 4:11-13) Makalelo apama owawambela mabasa amudhidhi wamutene fuudhela okala piyonero ookavihera. Eyo yahakavihera okala owiwegeredhene wihina ekale piyonero a mudhidhi wamutene. Mabasa opiyonero podi wuvaha ofuru wowinjhiva wowapara mabasa a mudhidhi wamutene, ninga motajhiha, olaba ninga namamaga Nyumba dhOmwene obe betelita. Alobwana aatene mmulogoni enofwanelela okanna yoluba yowakavihera addibila ni arogola, elabaga ninga anamaholela mulogo. Bibiliya anihina alobwana enilibihedha wihina ekanne mutholo ola ennawilibihedha wihina yapare ‘mabasa apama.’ (1 Tim. 3:1) Mbwenye ddibila ahinathi wambela olaba ninga namaholela mulogo, anarajhiha olaba ninga mudhaari ookavihera. Adhaari ookavihera enowakavihera anamaholela mulogo osamalela mutholo dhohiyana-hiyana mmulogoni. Teto anamaholela mulogo vamodha ni adhaari ookaviheraya athu owiyeviha enalabela addibila ni arogola teto enowapara mabasa oolaleya nuviheya. Namasugwera 12/23 epaddi 28 ddima 14-16

Mwene Joziya aanna yaka 16 nuwambela omusayela Yehova. Oliye afuniye fuhudhera wodhela Yehova ni werana efunelo yaye. Mbwenye dhithudha kadhali dhokweya wa oliye mwaha mudhidhi yoole athu owinjhiva yawebedha amulugu owoota, Joziya ohowela oliba murima wihina ande wakihedha webedha webaribari. Teto siyeyo oliye eeriliyena! Aali ahinakwanihe yaka 20 nubajha oxeelamo webedha wowoota elabo yaye. (2 Cró. 34:12) Naarive ogaali muzombwene, we podi omutajhiha Joziya ni ohudhera wodhela Yehova ni dhikalelo dhaye dhotikiniha. Siyeyo enuthukulele okanna efunelo yoopeleka egumawo mmadani mwa Yehova. Mbwenye yothoma eyo enaapathe aavi egumawo? Lucas, abaddiziwe aganna yaka 14 ohuwoga egi: “Okuma peeno odhowa osogolo ginere wapweha mabasa a Yehova mburo wobajha mwigumini mwaaga ni ginere wilibihedha wihina gihagalase murima waye.” (Mar. 12:30) Okanne ebaribari wihina onere oreelihiwa wathoma werana emodhave! Namasugwera 09/23 epaddi 11 ddima 12-13

Murumiwi Pawulo nuuleba karta nna, mulugo wotesalonika were wambelawene withiwa. Podi wera alobwana ale yathomiwe ninga anamaholela mulogo, yahinaaxagele mabasaya teto podi wera yoviriganiha. Naarive dhigali ndo, yohowela oriihiwa. Waddamelaga ohoseya winlubale, nnohowela waroromela anamaholela mulogo ni oharaga dhoholela dhewa. Podi wera mudhidhi yoyo kannathapanyege ni addibila osede Mundiyale ni ooBeteli, bumwahaya sapama ohudhera wadhivela ni waariha addibila enaniholela mmulogoni mwehu okuma peeno odhowa osogolo. Naarive epadduwaga ethu-sithu, iyo nnere odidelave okala mento ni kannathabwege osugwa dhoviriganiha dhaaddibilihu. Kanaanganyedhege wihina Yehova ni Yesu enowalabihedha alobwana ala oororomeleya wihina enivahe dhoholela. Ndala ninga kapaseti onabareliye musolo wa munyakoddo, ejhehedho ninnihuna yovulusiwa enobarela mubuwelo wehu. Iyo nnowonelamo wi mpaganyo dha Yehova sili dhathima opitha ethu-sithu elabo enanivahiwa. (Fil. 3:8) Ejhehedho ninnihuna enonikavihera okala oomaleyene ni okala txithi. Namasugwera 06/23 epaddi 11-12 ddima 11-12

Ale enanvuruwana ‘muhiyana ali taduwa’ enohowela othoma akala eneere orumedha obe naari mwithanelo waye. Nihikanna dhithu dhowinjhiva dhinanithukulela warabela mararuwo. ‘Muhiyana ali taduwa’ anawoga egi: ‘Manjhe owiyiwa enothabwa othapila.’ (Pro. 9:17) ‘Manjhe owiyiwa’ enagiwana ddi? Bibiliya anoladdaniha ogonihana wa mulobwana ni muhiyana etelanne ninga mahinjhe oridha. (Pro. 5:15-18) Mulobwana ni muhiyana etelanne mowiwanana ni malamulo podi ogonihana yahoovile ethu. Mbwenye ‘Manjhe owiyiwa’ bohiyana. Podi wagiwanaga mararuwo. Athu enawerana mararuwo dila dhowinjhivadhene enowawipitiha athu amodha wihina yahinone, ndala ninga anerana mbava. Vano yubuwelaga wi kavo anaanone ndhe yeriliwana, manjhe ala owiyiwa podi okalaga ninga manjhe othabwa othapila. Wubuwela ndo, ethu yabure! Mwaha Yehova onowoona dhatedhene ni kayivo ethu yothapila. Teto oyelela wandana ninnihuna ni Yehova winothabwa owaawa. — 1 Kor. 6:9, 10. Namasugwera 06/23 epaddi 22 ddima 7-9

Ki wavira mudhidhi wonelamo wihina malobelo awo kahiyo a vati va murima, mbwenye onalobela ninga elemelelo baahi? Kuwubuwele wi kunna muzimu wotxena wa Yehova. Ninga athu ohulogomana malabo mamodha makalelo nnoonihu dhithu dhomuzimuni podi osadduwa. Oviheya wawo ni mabasa oomuzimuni wavuguwa, we podi wubuwela yopadduwa ya murumiwi Pawulo. Oliye owilibihera wihina amutajhihe Yesu, mbwenye Pawulo ahinona wihina malabo mamodha kaakanne efunelo enlubale yowerana ndhe afuniye. Pawulo ahithoma wapara mabasa oolaleya, ahipwathile makalelo aaliye. Ni makalelo mamodhave kuwerena dhothoma mwaha wa makalelo oliwe, ohiya eyo wikome werana ele eli yapama naarive ohufunaga. Wadidela werana dhithu dhapama mubuwelo wawo podi osadduwa ni obajha odhiveliwa dhithu oneriwena. — 1 Kor. 9:16. Namasugwera 03/24 epaddi 11-12 ddima 12-13

Iyo podi wawoniha odhivela addibilihu ni arogola wodhela wandana naliwa ni ojha mudhidhi vamodha. Ndala iyo podi wathukulela aliwa okannaga efunelo yoononiha odhivela. (2 Kor. 6:11-13) Owinjhiva wa iyo nnafwanyeya mulogo wili addibila owinjhiva enna dhikalelo dhohiyana-iyana. Iyo podi olibiha odhivela ninnihuna naaliwa wodhela osugwa dhikalelo dhewa dhapama. Odhivela onere okala wofuneya mudhidhi wa mahoso manlubale. Kubuwela, Yehova anaanibarele ni makalelo baani mahoso manlubale yabajha? Kasugwa dhoholela Yehova avahiliye nlogo naye nurijhiwa ni aBabiloniyu: ‘Nyu muli anlogo naaga, mudhowe mwavolowe mba mweenyu, ni nfuge musiwodha. Mwipite mudhidhi vang’ono, ofiyedha ovira owali watene.’ (Isa. 26:20) Podi wera ni iyoya nnere ohowela dhoholela ndha mudhidhi wa mahoso manlubale. Namasugwera 07/23 epaddi 6-7 ddima 14-16

Ononiwe ninga muthu ookweya. Wikohe: ‘Athu enagoona ninga muthu ookweya, oovilela ni anaavuruwana athu amodha? Obe enagoona ninga muthu oorusa ni oovuruvuru? Obe ginowavuruwana athu amodha ni ginowilibihedha ohara moonelo wewa?’ Nilibihedhaga okala athu ookweya, nnere woniha wi nnomutajhiha Yehova ni Yesu. Yapadduwa masadduwo mwigumini mwehu nnohowela okala athu ookweya ni werana dhithudha mowaguva. Masadduwo ayo podi onitatamulela makathamiho nahajhehedhihu. Ninga motajhiha, mohujhehedha iyo podi okala aredda, orameyeliwa korowa obe mapolitiku podi werana dhithu dhathukulele egumihu ohikala yokweya. (Ecl. 9:11) Naakela mutholo muxa munikuruni mwa Yehova, iyo podi woonaga wihina soorusa wawerana masadduwo wihina nakwanihedhe mutholoya. Naarive egaali ethu yorusa, iyo podi wanda werana masadduwo mwigumini mwehu naparihedha mabasa dhithu ndha nayi: (1) warumedha masadduwoya, (2) osugwa osogolo, (3) osugwa mareeliho onawakeliwe ni (4) wakavihera amodha. Namasugwera 07/23 epaddi 21-22 ddima 7-8

Namavuhulela Daniyeli aathukuleliwe oBabiloniya agaali muzombwene. Mbwenye naarive agaali muzombwe, ahatikiniha vanlubale amusadoro ooBabiloniya. Aliwa yahona wihina Daniyeli ‘kanna nihonya, aali oowoma’ ni adheela emudhi yathima. (1 Sam. 16:7) Bumwahaya aBabiloniyu edhe emuxagihege wihina alabege opalasiyu. (Dan. 1:3, 4, 6) Yehova oomudhivela Daniyeli mwaha dhikalelo dhapama anniyena. Podi wera, Daniyeli anna yaka 20 Yehova nuwoga wihina oliye aali ninga Nowe ni Jo. Eyo enatapulela wi wa Yehova, Daniyeli aali owogowa ninga Nowe ni Jo; yamulabenle Yehova muwari mwa yakadhene. (Gén. 5:32; 6:9, 10; Jó 42:16, 17; Eze. 14:14) Daniyeli ahikanna egumi yohagalasa amulabelaga Yehova, teto ahikalawo yaka dhowinjhivadhene. Yehova oomudhivela mudhidhi wamuteene. — Dan. 10:11, 19. Namasugwera 08/23 epaddi 2 ddima 1-2

Wahafunege ogula nyumba were ohowela woona dhipaddi dhatedhene dha nyumbaya ni were ofuna onona kadda epaddi ya nyumba ele wahinathi ogula. Iyo podi werana emodhave namwilerigi ni naamuhudheraga Bibiliya. Wamwilerigi Bibiliya baahi we podi onona dhithu dhokweya — ‘dhathima dhoweela dha Mulugu.’ (Ebe. 5:12) Ni makalelo mamodhave wafuniwe woona nyumba wahinathi ogula, we onohowela ompwasedha pamadhene Bibiliya wihina wande omoonelamo pama. Makalelo apama oomuhudhera Bibiliya fuudhela woona makalelo kadda epaddi ya Bibiliya eniwananiwa ni emodha. Wilibihedhe woona ohiya baahi dhithu baani onarumedhiwe mbwenye mwahaya bwaddi ogarumedha. Wihina nande wonelamo pamadhene ebaribari enafwanyeya mBibiliyani nnohowela ohudhera dhithu dhoviteya dhinafwanyeya mBibiliyani. Murumiwi Pawulo ahawerela makiristawu wihina emuhudherege Bibiliya nupwaseya wihina ‘mukanne owedha wonona makwiveloya, malapeloya, mataameloya ni maddiiheloya’ ya ebaribari. Nimakalelo yala eneere okala ‘oolibeene ni nnere okala txithi’ munroromeloni. (Efe. 3:14-19) Ni iyoya nnohowela werana emodhave. Namasugwera 10/23 epaddi 18 ddima 1-3

MBibiliyani dhihikalamo dhopadduwa dha athu yonihile ovilela. Ononamo aavi ompandda porogarama wihina ohudhere wodhela dhopadduwa ndha? Motajhiha, Davidi aali mwana muzombwene nusakuliwa wihina akale mwene, mbwenye oliye ohowela ojheha yaka dhowinjhivadhene wihina ambele othonga. Yotajhiha emodhaya sa Simiyawu ni Ana. Aliwa yomulabela Yehova nuuroromeleya ejheehaga nuuvilela odha wa Mesiya. (Luk. 2:25, 36-38) Wahudheraga dhopadduwa ndha, wawakule makoho ala: Ethu baani emukavihere muthu ola woniha ovilela? Mwahaya bwaddi okala muthu oovilela odhe omukaviherege? Ginamutajhihe aavi? Teto we podi ohudhera ni ale yahandile woniha ovilela. (1 Sam. 13:8-14) Wahudheraga dhopadduwa ndha wikohe: ‘Mwahaya bwaddi muthu ola adhe ahonihege ovilela? Makathamiho baani yakumelelevo mwaha ohivilela?’ Namasugwera 08/23 epaddi 25 ddima 15

Murumiwi Peduru aali muthu oororomeleya. Oliye keenyile wihina muthu obe ethu-sithu emuhihe omuhara Yesu. Motajhiha dila modha Peduru ahoniha ororomeleya waye Yesu nuwoga ethu anamahara aye yahandiliwa wonelamo mudhidhi yoole. (Juwa 6:68) Mbwenye athu owinjhiva yamuhara Yesu yahihiya omuhara mudhidhi yole, newene kayajhehile wihina Yesu atapulele pamadhene muselu yole. Mbwenye Peduru kaahiile omuhara Yesu, ohiya eyo oliye owoga wihina Yesu baahi dinna “muthenga dha egumi yohimala.” Yesu ahinona wihina Peduru vamodha ni anamahara amodha yere omuthawa. Mbwenye naarive dhigali ndo, Yesu owoga ni Peduru wihina ahinona wi oliye eere okala oororomeleya. (Luk. 22:31, 32) Bumwahaya Yesu kaamusukumme murumiwi aye amudhiveliye, Peduru. Naarive oliye agamukoddile dila tharu, Yesu ahinona wi “muzimu onofuna, mbwenye mwiili oli wokwerebeyene.” (Mar. 14:38) Vano Yesu numala ovenyihiwa Bibiliya anowoniha wihina Yesu ahimuthwanyuwela Peduru agaali yeka. (Mar. 16:7; Luk. 24:34; 1 Kor. 15:5) Eyo yahimulibiha vanlubale Peduru aali owukuwene, ubuwelaga dhithu eriliyena! Namasugwera 09/23 epaddi 22 ddima 9-10

Mulugu anolevelela dhothega dha athu ale enna nroromelo. Oliye anolevelela ni murima waatene, teto newene kanubuwela dhoviriganiha dha muthu yole amuleveleliye. (Sal. 32:1, 2) Vamentoni va Yehova muthu yoyo dowogowa ni kanna nihonya mwaha wa nroromelo naye. Ebaribari wihina Abarawu Davidi vamodha ni adhaari amodha oororomeleya a Yehova akale, yahithaniwa athu owogowa, naarive dhigaali ndo aliwa yaali athu oohulogomana ni oothega. Mbwenye mwaha wa nroromelo yanniwana, Yehova awoona ninga athu ohukanna nihonya, thabwathabwa aaliganiha ni ale yahamwebedha Oliye. (Efe. 2:12) Karta aalebenliye aRomano, murumiwi Pawulo ohuwoga wihina nnohowela okanna nroromelo negi nandane ni Mulugu. Bumwahaya ndala ninga Abarawu ni Davidi, nakanna nroromelo ni Yehova nnere wandana ni Oliye. Namasugwera 12/23 epaddi 3 ddima 6-7

Peeno makiristawu aatene ehikanna oneti wompelekela mukutho Yehova elabihedhaga mudhidhi wewa, kopolo dhewa ni dhithu dhinniwana wihina ekavihere dhithu dhatedhene dhinerana Omwene wa Mulugu. Iyo nnowoniha wi nnovaha thima oneti ola ninnihuna namwebedhaga Yehova ni ninvahaga dhithu dhathima ninnihuna. Murumiwi Pawulo ohuwoga dhithu dhohiyanahiyana nnahowelihu werana wihina nimwebedhe Yehova. (Ebe. 10:22-25) Dhithu ndho dhinovolowelavo olobela wa Yehova malabo amatene, walaleyela athu amodhaya nawaddelaga ejhehedhelo yehu, ohujhombela mutugumano ni olibihana mmodha ni mukwaye ‘thabwathabwa noonaga wi omakuthulo onna waddamela.’ Teto livuru na Apocalipse nnowawileri madhu asorihile mungero awogaga egi: ‘Omwebedhe Mulugu!’ Oliye ohawoga madhu ala dila biili wihina onihe wi eyo ethu yathima vanlubale. (Ovuhu. 19:10; 22:9) Iyo kannafuna odduwala dhithu dhatedhene nihudherihu wodhela tempulu enlubale yomuzimuni ni oneti winlubale ninnihuna womwebedha Mulugu ehu munlubale Yehova! Namasugwera 10/23 epaddi 29 ddima 17-18

Iyo aatene nnafuna “nididele odhivelana mmodha ni mukwaye.” Mbwenye nnohowela ohidduwala wihina Yesu ohuwoga wi “odhivela waathu owinjhiva winere oridha.” (Mat. 24:12) Yesu kaafuna owoga wihina anamahara aye yere ohiya woniha odhivela mmodha nimukwaye. Mbwenye nnohowela okala pasope wihina nahihiye mubuwelo wa elabo ovolowele makalelo nnaweddihihu addibilihu. Bumwahaya, kabeni noone nikoho nimodhana nathima: Nnande aavi onona akala odhivela ninnihuna naaddibilihu booliba? Makalelo oonona akala odhivela ninnihuna naaddibilihu booliba fudheela opendda makalelo nnaweddihihu aliwa yanerela ethu sithu. (2 Kor. 8:8) Eyo enowoneya pamadhene mowiwanana ni madhu aawogile murumiwi Peduru: ‘Mwadhatedhene mudhivelanege pamadhene, mwaha wi odhivela onokunela dhotega dhowinjhiva.’ (1 Ped. 4:8) Obe neere, dhoviriganiha vamodha ni ohilogomana waaddibilihu podi weha odhivela ninnihuna naaliwa. Namasugwera 11/23 epaddi 10-11 ddima 12-13

Iyo kannande wiwelela nlamulo na Yesu wula naasakulaga addibilaya owawoniha odhivela. Ebaribari wihina iyo podi othabwa wandana naathu amodha, ndala ninga Yesu aathambwiye wandana ni arumiwi amodha. (Juwa. 13:23; 20:2) Mbwenye murumiwi Peduru anonubusedha wi nnohowela wilibihedha wadhivela addibilihu ni arogolihu ndala ninga nnaadhivelihu amudhihu. (1 Ped. 2:17) Murumiwi Peduru ohoniha wihina sathima ‘odhivelana pamadhene mmodha ni mukwaye ni murima wehu watene.’ (1 Ped. 1:22) Mowiwanana ni madhu yala, ‘odhivelana pamadhene’ enatapulela omudhivela muthu naarive erusaga omoniha odhivela. Motajhiha, weere ddi ahere ddibila awoga ethu obe aherena ethu yupihe mbani? Podi wera ethu yobajha wuubuweliwe yakale omuwelihedha kunyawunya ohiya wooniha odhivela. Peduru ahihudhera ni Yesu wihina makalelo yala owerana dhithudha kinamuhagalasa Yehova. (Juwa. 18:10, 11) Murumiwi Peduru ohuleba egihina: ‘Kuwelihedhe obure ni obure, newene oruwaniwa ni oruwana. Ohiya eyo, mwaareelihege.’ (1 Ped. 3:9) Naadhivelaga addibilihu ni arogolihu ni murima wehu wamutene, nnere wanda waweddiha athu aatene nuupama ni wanda wawonelamo. Namasugwera 09/23 epaddi 28-29 ddima 9-11

Iyo nnotikina vanlubale namoona makalelo mwaana anunnuwiye ofiyedha okala pogo. Malabo mamodha eyo enapadduwa mwamakalelo owaguva, mbwenye wunnuwa epaddi yomuzimuni wihiyana. (1 Kor. 13:11; Ebe. 6:1) Wihina muthu akanne wandana woliba ni Yehova oliye anohowela wilibihedha. Ohiya eyo egi muthu unnuwelevo epaddi yomuzimuni anohowela nikavihero na muzimu wotxena wihina akanne dhikalelo dhapama, ahudhere werana dhithu dhimodha ni wiwegeredha wihina ande osamalela mutholo bu mutholo osogolo. (Pro. 1:5) Yehova aapaddusile athu velaboni yavati wihina akale mulobwana obe muhiyana. (Gén. 1:27) Ebaribari wihina mulobwana ni muhiyana ehihiyana makalelo opaddusiwiwa mwiili wewa. Mbwenye dhihikalawo dhithu dhimodha dhinaahiyaniha. Motajhiha, Yehova aapaddusile alobwana ni ahiyana ni mutholo dhohiyanahiyana, ni ohunvaha kadda muthu dhikalelo obe gari dhinamukavihere wakwanihedha mutholo dhewa.— Gén. 2:18. Namasugwera 12/23 epaddi 18 ddima 1-2

Yesu oofuna wihina athu amodhaya elabihedhege ndina na Ababe? Hee. Anamasogolela gereja amodha yarumedha wihina ole aromola ndina na Mulugu kaamuriha Yehova, mbwenye Yesu keenyile wi elemelelo ela yahiniwanana ni Dholebela emuhihe oriha ndina na Ababe. Nlabo dhaala Yesu onvulumusa mulobwana dhaala oonihiwa goyi ni ademoniyu akala murudda waaJerazenu. Vano athuya obajha omoova vanlubale Yesu ofiyedha omuloba wihina avenyewo murudda yole. (Mar. 5:16, 17) Naarive dhigaali ndo, Yesu afuna wi athu enone ndina na Mulugu. Bumwahaya Yesu omwaddela mulobwana ole aavulumusiye wihina awaddele athu ohiya ethu Yesu amwereliye, mbwenye ethu Yehova aamwerenliye. (Mar. 5:19) Nivanove Yesu anoofuna wi ndina na Ababe nnoniwe wapela elabo yaatene yavati! (Mat. 24:14; 28:20) Vano iyo navuwihaga ndina na Yehova, nnomuhagalasa Mwene ehu Yesu Kiristu. Namasugwera 02/24 epaddi 10 ddima 10

Sapama vanlubale okala epaddi ya nikuru na Yehova malabo yala oorusa nnakalihu. Naarive dhithudha mwilaboni dhithabwaga orusa, Yehova anonivaha emudhi yowiwanana ya addibila ni arogola enanikavihera. (Sal. 133:1) Ohiya eyo, Yehova anonikavihera okanna emudhi yoliba ni yohagalala. (Efe. 5:33–6:1) Teto anonivaha thotho nnahowelihu wihina nande owanana othuwathuwa ni okanna murenddele mwigumini mwehu. Nnohowela wilibihedha wihina ndhowegeve nimulabelaga Yehova nuuroromeleya. Mwaha wa ddi? Mwaha wihina malabo mamodha nnotakaleliwa mwaha wa dhithu athu amodha enanereliwa ni enaniwogeliwa. Teto podi okala yorusa owanana dhoviriganiha dhehu, thabwathabwa nerana yoviriganiha emodhave dila dhowinjhivadhene. Ohudhera wula nnere woona dhipaddi tharu dha mwigumini mwehu, nnahowelihu woniha ovilela (1) ddibila anitheegela, (2) mamunihu obe mwadhihu anitheegela (3) nakala ookwerebeyene mwaha wa dhoviriganiha dhehu. Namasugwera 03/24 epaddi 14 ddima 1-2

Malabo mamodha onerege wiwa dhopadduwa dha addibila ni arogola ethomile wawenjhedhedha mabasa ewa enampareliwa Yehova. Podi wera aliwa ikursari Eskola ya Anamalaleya Oomwene obe ehitamela murudda wahoweleya anamalaleya. Akala egumi yawo enowuwenya, we podi okanna dholuba ninga dhendha. Adhaari a Yehova enosayela wawenjhedhedha mabasa ewa oolaleya. (Dho. 16:9) Ki akala mudhidhi yola kunanda wawenjhedhedha mabasa awo? Kuwubuwele wi kunna thima wiliganiha ni addibila amodha enawenjhedhedha mabasa ewa oomulabela Yehova, yathimaya fudhowagave ovilelaga. (Mat. 10:22) Kuddiwale wi Yehova anohagalala ni ele onandiwe werana mowiwanana ni mudhidhi onafwanyeyiwe. Onvaha Yehova ele onandiwe sithu enukavihere odhowagave omuharaga Yesu wamala obaddiziwa.— Sal. 26:1. Namasugwera 03/24 epaddi 10 ddima 11

Yehova anopaganya wi nathwaruwa mwaha wa dhothega dhehu oliye anere onilevelela. (Sal. 86:5) Nathwaruwa ni murima wehu waatene, iyo podi ororomela wi ele Yehova anawogiye ebaribari, oliye ohunilevelela. Bumwahaya kuddiwale wihina Yehova kananiloba dhithu nahinandihu teto kahi muthu oorusa. Oliye anovaha thima ethu-sithu nnerihuna, thabwathabwa neragana ni murima wehu wamutene. Ohiya eyo, we podi opendda wodhela dhopadduwa dha athu enafwanyeya mBibiliyani yamulabenle Yehova ni murima wewa wamutene. Motajhiha, kamubuwele murumiwi Pawulo oliye ahilaba nuuviheya muwari mwa yaka dhowinjhiva eeddaga olenddo dholapela ni akaviheraga wiita mulogo dhowinjhiva. Mbwenye dhithudha mwigumini mwaaye nusadduwa, wodhela ohanda olaleya ninga alaleyesiye kale, nerege Yehova kaavaha thima dhithu oliye eriyena? Naari, Pawulo ahididela werana ele andiye teto Yehova ahimureeliha. (Dho. 28:30, 31) Ni makalelo mamodhave, dhithu nnamparelihu Yehova malabo mamodha podi osadduwa mwigumini mwehu. Mbwenye yathimaya sithu enanithukulela omulabela Yehova. Namasugwera 03/24 epaddi 27 ddima 7, 9

Wodhela malobelo aweriyena wa Yehova, Yesu ohuhiya yotajhiha wihina iyo niharege. Egumi yaye yaatene agaali velaboni yavati, Yesu oolobelesa dila dhowinjhivadhene. Oliye ohowela waaja mudhidhi wihina alobele, mwaha mudhidhi wamutene oliye akala oopinyaminyeyene mwaha wa muthithi waathu wamwapela. (Mar. 6:31, 45, 46) Oliye oovenyesa mambeseene wihina akale yeka ni ande olobela. Nlabo nimodha Yesu ahilobela emahiyu yantero ahinathi werana yothoma yathima. (Luk. 6:12, 13) Emahiyu Yesu ahinathi opiwa, naarive anonaga wi eere wonihiwa goyi, oliye olobela dila dhowinjhivadhene. (Mat. 26:39, 42, 44) Yotajhiha ya Yesu enonihudhiha wihina naarive nigapinyaminyeye ni mabasa, nnohowela waaja mudhidhi wihina nilobele. Ndala ninga Yesu, nnohowela waaja mudhidhi wihina nilobele podi okala mambeseene obe nihinathi ogona. Neragana ndo, nnomoniha Yehova wihina nnovaha thima nvaho wa malobelo. Namasugwera 05/23 epaddi 3 ddima 4-5

Wapwasedhe madhu enihina ‘ohuheliwa,’ enafwanyeya va yolebela ya peeno. Disiyonariyu dhaala a madhu a mBibiliyani anihina madhu ala enakala ninga “wumba wa manjhe enanikunela.” Yoladdaniha ela enowoniha pamadhene makalelo Yehova anaadhiveliye makiristawu oothikitheliwa omuzimuni! Teto naaliwaya ehinona wi ‘Yehova anowadhivela.’ (Juda. 1) Murumiwi Juwawu ahiwoga makalelo aaliye wodhela oleba egi: ‘Kasugwani makalelo enidhivele Ababa, ofiyedha iyo withaniwaga ahima a Mulugu!’ (1 Juwa. 3:1) Mbwenye nerege Yehova anaadhivela makiristawu oothikitheliwa omuzimuni baahi? Naari, Yehova ohoniha wi ononidhivela iyo aatene. Ethu baani enlubale Yehova eriliyena enoniha wihina anonidhivela? Ethu enlubale enoniha wi Yehova anonidhivela si yowobola! — Juwa. 3:16; Rom. 5:8. Namasugwera 01/24 epaddi 28 ddima 9-10

Versu ela enowoniha ethu emodhaya yamukavihere Davidi mudhidhi oovaga, naarive egumaye egaali vang’ovini, oliye owubuwela dhithu Yehova afuniye omwerela osogolo. Davidi ahinona wihina Yehova eere onvulusa mudhidhi wofwanelela. Mwaha wihina Yehova ahiwoga wihina Davidi aakale mwene ooharela owIzarayeli. (1 Sam. 16:1, 13) Vamentoni va Davidi dhithu Yehova aapaganyiye dhakala ninga dhahimala wakwanela. Ethu baani Yehova apaganyiliye wuwerela osogolo? Iyo kannajheha wihina Yehova anibarele wa makathamiho aatene. Mbwenye naarive nifwanyiwaga makathamiho bi makathamiho malabo yaala, nihikanna ebaribari wihina Yehova anere wamariha mwilaboni exa. (Isa. 25:7-9) Mpaddusi ehu mwebaribarene ohukanna kopolo wihina aavenyihe anookwa, omariha oredda watewene ni wagujhula amwiddani ehu aatene. — 1 Juwa. 4:4. Namasugwera 01/24 epaddi 6 ddima 12-13

Wubuwele ethu baani yuthukulele wipeleka ni obaddiziwa. Osakunle obaddiziwa mwaha were othoma okala epaddi ya Yehova. Kudduwale ethu yukavihere ohanganyedha wihina ohufwanya ebaribari. Mwaha omunona Yehova, we obajha omudhivela ni omuriha ninga Baabo oodhulu. We okanna nroromelo teto nroromelo nenna nahuthukulela othwaruwa. Odhivela wanniwena ni Mulugu ohuthukulela osukuma dhithu dhabure ni osakula werana dhithu dhinamuhagalasa Mulugu. (Sal. 32:2) Wahihagalala vanlubale nunona wihina Mulugu ohuulevelela, vano we obajha woona mutugumano ni othapanya naathu amodha dhithu wahudheriwe. Ninga mukiristawu owivelela ni abaddiziwe, vano onna weedda dila yegumi, ni ohuthoma werana ndhe onandiwe wihina odhowegeve weddaga dila yela. (Mat. 7:13, 14) Ohiya eyo, nithome okalave txithi ohuthikeya nimudhivelaga Yehova ni niwelelaga dhoholela dhaye. Namasugwera 07/23 epaddi 17 ddima 14; epaddi 19 ddima 19

Opendda wodhela nlobelo weriliwena wipelekaga wa Yehova, sithu enuvahe kopolo wihina wande owanana yoweha. Motajhiha, we were omugayela muthu ononniwe wihina ohuteliwa obe ohutela? Mwebaribarene naari! Mwaha we ohumpaganya Yehova wi kuwerena ethu ninga yela. Wahenya mubuwelo dhabure wuvolowela, kunivahe mabasa wubuwelaga makalelo oosukuma mubuwelo oyo wabure. Ni makalelo yala onere wanda ‘Orabela dila ya athu abure.’ (Pro. 4:14, 15) Opendda yopadduwa ya Yesu podi onikavihera vanlubale nafwanyiwa yoweha ninga yela, oliye ahiikoma wihina ahagalase Ababe malabo aamateene, teto ndala ninga Yesu nihiyoya nnafuna nimuhagalasege Babi ehu Yehova. (Mat. 4:10; Juwa. 8:29) Makathamiho ni dhoweha dhinere wuvaha ofuru wowoniha wihina we ohuthoma “omuharegeve” Yesu. Teto okanne ebaribari wi Yehova anere wukavihera odhowagave omuharaga Yesu. Namasugwera 03/24 epaddi 9-10 ddima 8-10