Adawu ni Eva Kiyamwiwelele Mulugu

Labo dhaala Eva aali yeka. Nuwindo odha nowa obajha owoga nuliye yegi: ‘Ebaribari wi Mulugu eerile kamujhege dhowima dhaatedhene dha mithanko dhili mmunddani muna?’ Eva waakula egi: ‘Kahi yeyo awogile Mulugu. Iyo podi ojha dhowima dhaatedhene dha mithanko ndha, mbwenye Mulugu awogile wi kanijhe dhowima dha mithanko mmodha.’ Mwaha najha nnere okwa. Nowa wakula yegi: ‘Kahi ebaribari, mwajha kamunaakwe mbwenye munerege oligana ni Mulugu.’ Eyo yaali ebaribari? Naari. Mbwenye Eva ahirumedha ele yawoga nowa. Mudhidhi aasugwaga yowima ele weraga othabwa okanna ethakwithakwi yoojha. Vano Eva ohapa obajha ojha, nuwindo onvahamo mamune Adawu. Adawu ahinona wi yajha yere okwa. Naarive dhigaali ndo, oliye ojha yowima ele.

Nuuvira mudhidhi, Yehova omukoha Adawu ni Eva ethu yaathukulele ojha yowima ele. Eva orunela nowa. Adawu omurunela Eva. Adawu ni Eva kiyamwiwelele Mulugu. Mwaha wa yeyo oliye wawigara mmunddani mune ni waruma angero wi esugwerege. Voharela opweha supadda na mootho va mulago woEdeni wihina aliwa ehihogolowele ovolowamo.

Vano, ki nowa? Ninga ononniwe, nowa kinawoga. Mbwenye aali Saddana eerihile wihina nowa ele emulekethe Eva. Ohumunona Saddana? Saddana mungero abure. Teto anoniwe ni ndina na Ddiyabo. Yehova ohuwoga wi eere omusinyusa Saddana. Osogolo Yehova aneere ompa Saddana. Ndo Saddana, kadha aalekethaga athu werana dhithu dhabure.