Olibihe ejhehedho yawo

1. Ejhehedho baani Yehova anivahiliye?

YEHOVA ohunivaha ejhehedho enlubale yokanna egumi yohimala. Amodha enere okanna egumi yohimala ninga angero. (1 Cor. 15:50, 53) Mbwenye muthithi waathu enna ejhehedho yokalawo elabo yela yavati ni egumi yologomana ni murenddele. (Apo. 21:3, 4) ejhehedho ela sathima mwigumini mwehu. Kannapwatha akala nnere odhowa odhulu obe nnakale mwilaboni yela ya vati.

2. Ejhehedho enatapulela ddi?

² Mbibiliyani, madhu owi ‘ejhehedho,’ podi “otapulela ovilela mwaha wi enere opadduwa ethu yapama.” Iyo podi okanna ebaribari wi ejhehedho ninnihuna yosogolo enere opadduwa mwaha Yehova dinapaganya. (Rom. 15:13) Iyo nihikanna ebaribari wihina Yehova apaganya ethu onowakwanihedha ele apaganyiye. (Núm. 23:19) Iyo nihikanna ebaribari wi Yehova ohukanna efunelo ni kopolo wihina anere werana dhatedhene apaganyiye. Ejhehedho ninnihuna kinadhela wodhela dhithu nahinonelihumo pama, mbwenye wodhela dhithu nnonelihumo ni nnonihu.

3. Ohudhera wula nnasunze ddi? (Salmos 27:14)

³ Babihu odhulu ononidhivela ni onofuna wihina nimuroromelege. (Omwileri Salmos 27:14.) Namuroromela Yehova ni nalibiha ejhehedho yehu, nnere wanda wawanana makathamiho osogolo ni murenddele ni oliba murima. Ohudhera wula nnere woona makalelo ejhehedho enanibareliwa. Mbwenye vobajha nnere woona ni makalelo baani ejhehedho enaliganiwa ni ankora vamodha ni kapaseti. Vasogolova nnere woona makalelo olibiha ejhehedho yeehu.

EJHEHEDHO YEHU ENALIGANA NINGA ANKORA

4. Nimakalelo baani ejhehedho yehu enaliganiwa ninga ankora? (Hebreus 6:19)

⁴ Karta murumiwi Pawulo alebiliye akudda eebrewu, oliye ahiliganina ejhehedho ni ankora. (Omwileri Hebreus 6:19.) Oliye odhiveliwa weedda olenddo ni baruku ni ahinona wihina ankora onolabihedhiwa wihina ambarele baruku yapadduwaga ethu-siithu. Labo nimodha agali munaviyu, wambela nipevo ninlubale, ni oliye ahawona amarinyero envokaga ankora muniya wihina embarele baruku ohavada mabwe. (At. 27:29, 39- 41) Ninga ankora, ejhehedho yehu enonlibiha ni enonikavihera ohimusukuma Yehova ni ohunona ethu yowerana naafwanyiwaga makathamiho. Nalibiha ejhehedho, nnere wanda wakwaranya makathamiho ehu mwaha nihikanna ebaribari wihina ovanene dhithudha dhinere owomela. Enohoweleya ohidduwala wihina Yesu ohuwoga wi nnere oharahariwa. (João 15:20) Wapendda mareeliho nnawakelihu osogolo winere onikavihera odhowagave neddaga dila yeebaribari wodhela omulabela Yehova ninroromelo.

5. Nimakalelo baani ejhehedho envahiliwa kopolo Yesu wihina ande ogonjhiha okwa?

⁵ Osugwe makalelo ejhehedho emukaviheriwa Yesu naarive anonaga wihina eere otabusiwa ofiyedha okwa vantxikwani na goyi. Nlabo na pentekosti yaka ya 33 M.W., murumiwi Peduru owoga yovuhulela enafwanyeya va Salmos, enawoga makalelo apama Yesu akaliye opwaseya ni ororomeleya, enihina: ‘Miyo ginere okalawo gijhehaga, mwaha nyu kamunaagihiye mmahame, newene kamunenye wihina nnigonaga nnyuwo mmahame . . . Nyu munere ogihagalasa vamentoni veenyu.’ (At. 2:25-28; Sal. 16:8-11) Naarive aganonne wihina eere okwa, Yesu ahikanna ejhehedho wihina Yehova eere onvenyiha mukwani. Ni eere ohagalala wodhela ohogolowela okala vamodha ni baabe odhulu.  — Heb. 12: 2, 3.

6. Ethu baani awogile ddibila wodhela ejhehedho?

⁶ Ejhehedho yehu enowakavihera addibilihu owinjhiva ovilela. Kasugwa yotajhiha ya ddibila Leonard Chinn, aali ororomeleya akala elabo yo Winglaterra. Muwari mwa Koddo Yoobajha, oliye ahivolosihiwa mukambura mwaha okoodda wivolosiha mukoddoni, ahimala mweri minddi agali mukambura vasogolova aliwa omuwaddihedha wapara mabasa anyakambura. Oliye onowoga egi: “Dhithu dhaagipadduwele dhihigikavihera wonelamo wihina nnohowela okanna Ejhehedho wihina nande ovilela. Mbibiliyani dhihikalamo dhotajhiha dhowinjhiva ninga ya Yesu, arumiwi, anamavuhulela, ni dhijhehedho dhohagalasa. Dhatedhene dhendha dhinonivaha ejhehedho enlubale yosogolo, ni dhinonivaha kopolo wihina nivilela.” Ejhehedho yaali ninga ankora wa ddibila Leonard ni podi okala emodhave wa iyo.

7. Ni makalelo baani makathamiho enanikaviheriwa olibiha ejhehedho yehu? (Romanos 5:3-5; Tiago 1:1, 2)

⁷ Naafwanyiwaga makathamiho ni noonaga makalelo Yehova ananikaviheriye, kannaganyedhege wihina Yehova ononirumedha vamentoni vaye, ni eyo enolibiha vanlubale ejhehedho yehu. (Omwileri Romanos 5:3-5; Tiago 1:12.) Teto nnokanna ejhehedho yoliba mohiyana ni mudhidhi nihinathi onona ebaribari. Saddana anafuna wi makathamiho ehu enigojhihe, mbwenye namuroromela Yehova iyo nnere wanda ogonjhiha ethu-sithu enanipadduwele osogolo.

EJHEHEDHO YEEHU ELI NINGA KAPASETI

8. Nimakalelo baani ejhehedho yehu eliwa ninga kapaseti? (1 Tessalonicenses 5:8)

⁸ Bibiliya onoliganiha ejhehedho yehu ni kapaseti. (Omwileri 1 Tessalonicenses 5:8.) Kapaseti onobarela musolo wa munyakoddo awanaga ni mwiddani. Epaddi yomuzimuni nnohowela obarela mubuwelo wodhela dhoweha dha Saddana. Oliye anoneeha ni dhithu dhonyakavala wihina atakalihe mubuwelo wehu. Ninga kapaseti anabareliye musolo wa munyakoddo, ejhehedho ninnihuna enobarela mubuwelo wehu wihina nande okala oororomeleya wa Yehova.

9. Athu yahikanna ejhehedho enapadduwele ddi?

⁹ Ejhehedho yehu yokanna egumi yohimala enonikavihera werana dhithudha, ninonelo ni monelo wapama, mbwenye nahiya wihina Ejhehedho yehu eriidhe ni wihina mubuwelo welabo onivolowele egumi yoohimala podi okala ethu nahinonelegihumo. Kasugwa yaapadduwele Makiristawu mamodha yakala Sidadi yooKorinto. Aliwa oyelela nroromelo neewa ni Ejhehedho yohanganyedha ya Mulugu — yoovenyihiwa anookwa. (1 Cor. 15:12) Murumiwi Pawulo oleba egi: ale yahinarumedha wihina ehikalawo Ejhehedho enakalawo wihina yiihagalase. (1 Cor. 15:32) Peeno athu owinjhiva yahinarumedha mpaganyo dha Yehova enakalawo ninga kawindha wikala nlabo nimodha, yeragana nde enafuniwa. mbwenye iyo niihiyana. Iyo nnorumedha nde Yehova anapaganyiye dhosongolo. Ejhehedho yehu eli ninga kapaseti, enonibarela makalelo ehu owubuwela ni enonikavihera ohiwubuwela ninga nili yekihu wanthukulele ononga wandana wehu ni Yehova.  — 1 Cor. 15:33, 34.

10. Nimakalelo baani ejhehedho enanibareliiwa wodheela mubuwelo wowoota?

¹⁰ Ejhehedho yehu podi onibarela woodhela mubuwelo waanthukulele wubuwela wihina omweebedha Yehova kahiithu ya thima. Motajhiha, amodha podi wubuwelaga: Miyo kagiliithu ni kaginadha gikala vamodha nihale enna ejhehedho yookalawo nimukalakala ni kaginadha gikala athima vamentoni va Yehova. Mbwenye onomubuwela muthu aalabihedhe mubuwelo mmodhave ni Jo, aali mukwaye owoota Elifas, awogile egi: ‘Nimakalelo baani muthu ookwa anandiiye okala ooweela?’ Vasogolova oliye owoga woodhela Mulugu egi: ‘Kasugwa oliye kanaaroromela ale eli oweela, newene odhulu kawili woweela vamentoni vaye.’ (Jó 15:14, 15) Eyo yowota enlubale! Makalelo ala owubuwela enadhela wa— Saddana. Oliye ohunona wihina wubuwelaga ni makalelo yaala Ejhehedho yawo enere oridha. Bumwahaya, osukume dhowoota nda ni osugwege mpaganyo dha Yehova. Kuwanganyedhe wihina Yehova onoofuna wihina we okalewo nimukalakala ni oliye anere wukavihera wakwaneliha yothoma yawo. —1 Tim. 2:3, 4.

OLIBIHE EJHEHEDHO YAAWO

11. Mwahaya bwaddi nigahowela ovilela wula nijheehaga mudhidhi Yehova anakwanelihiye mpaganyo waye?

¹¹ Kahi yokweya olibiha nroromelo nehu. Eyo podi opadduwa mwaha iyo ogoma ojheeha Yehova wakwaneliha mpaganyo dhaye. Mbwenye nnohowela ohidduwala wihina Yehova damukalakala, makalelo Yehova anoniye mudhidhi waviraga ohuhiyana nimakalelo iyo nnonihu. (2 Ped. 3:8, 9) Oliye anere wakwaneliha mpaganyo dhaye mudhidhi wofwanelela, mbwenye podi opadduwa nimakalelo nahijhehedhihu. Enaanikavihere ddi olibiha ejhehedho yehu nijhehaga nuuvilela mudhidhi Yehova anakwanelihiye mpaganyo waye?— Tia. 5:7, 8.

12. Mowiwanana ni yolebela ya Hebreus 11:1, 6, nimakalelo baani ejhehedho enaliganiwa ni nroromelo?

¹² Bibiliya onoliganiha Ejhehedho ni nroromelo nowihina Mulugu ohukalawo wihina oliye dinaareliha ale ‘enanveda nimurimiiwa waatene.’ (Omwileri Hebreus 11:1, 6.) Narumedhaga wihina Mulugu dororomeleya, kannanganyedhege wihina oliye anere wakwanelihedha dhatedhene apaganyiliye. Mowindo nnere wanda olibiha ejhehedho yehu nadhowagave nimwaddamelaga Yehova ole anapaganya wakwaneliha nde anipaganyiliye. Vano nnere woona makalelo oolibiha wandana wehu ni Yehova wihina nlibihe ejhehedho yehu.

13. Naande addi omwaddamela Mulugu?

¹³ Olobelege wa Yehova ni omwilerigi Bibiliya. Ebaribari wihina kannande omoona Yehova, mbwenye iyo podi omwaddamela. Iyo podi owoga nuliye woodhela nlobelo niroromelaga wihina oliye anere onivuruwana. (Jer. 29:11, 12) Iyo podi onvuruwana Mulugu namwilerigi Bibiliya ni nipenddaga nde nnilerihu. Nahudheraga makalelo Yehova aasamaleliye adhaaraye akale, ejhehedho yehu enooliba. Bibiliya aamutene alebiwe wihina ‘anikavihere anihudhihe wihina ovilela wehu ni otodoliwa ni dholebela, nikanne Ejhehedho.’—Rom. 15:4.

14. Mwahaya bwaddi ekala yapama opendda mpaganyo Yehova aakwanelihiye?

¹⁴ Opendde makalelo Yehova aakwaniheliye mpaganyo dhaye. Wubuwele nde Mulugu amwereliye Abarawu ni Sara. Aliwa yahithabwa wuluvala ni kiyanna mwaana. Naarive dhigali ndo aliwa yahikanna mwaana mowiwanana ni ele Yehova aapaganyiliye. (Gén. 18:10) Mbwenye Mulugu ahapaganya dhithu dhimodha. Bibiliya anihina: ‘Oororomela wihina eere okala baabi amalogo owinjhiva.’ (Rom. 4:18) Naarive ni monelo waathu ela ekala ethu yoorusa, Abarawu ahikanna ebaribari wihina Yehova eere wakwaneliha mpaganyo waye. Ororomeleya wa mulobwana ole kawali ebeweene. (Rom. 4: 19-21) Dhopadduwa ninga nda dhinonihudhiha wihina Yehova onowakwaneliha mpaganyo dhaye, naarive vamentoni veehu egaali ethu yoorusa.

15. Mwahaya bwaddi nigahowela wubuwela nde Yehova anereliye?

¹⁵ Kuubuwela nde Yehova uwereliye. Wuubuwele dhopaganya dha mBibiliyani dhakwanele mwigumini mwawo. Motajhiha, Yesu opaganya wihina baabe eere wuvaha ele yahoweleye wihina okalewo. (Mat. 6:32, 33) Yesu ororomeliha wihina Yehova anere wuvaha muzimu wotxena wamuloba. (Luc. 11:13) Teto Yehova annave waakwaneliha mpaganyo ola. Podi wera, onowanda wubuwela mpaganyo Yehova anakwanelihiye mwigumini mwawo, oliye anopaganya wulevelela, wutodola ni wujhiha epaddi yomuzimuni. (Mat. 6:14; 24:45; 2 Cor. 1:3) Opendda dhatedhene Yehova uwereliye, winere olibiha Ejhehedho yawo wodhela nde oliye anuwereliye osogolo.

OHAGALALE NI EJHEHEDHO

16. Mwahaya bwaddi ejhehedho yehu ekala nvaho wathima?

¹⁶ Ejhehedho yehu yokanna egumi yohimala nvaho wathima wa Yehova. Nnojheha nuvilela osogolo wapama ninnihuna ebaribari wihina enere opadduwa. Ejhehedho yehu enoonikavihera ninga ankora nikalaga oolibeene wihina naawanena makathamiho, ovilela nuharahariwa naarive efunaga onipa. Ni enonikavihera ninga kapaseti enibarelaga mubuwelo wehu wihina nande osukuma nde dhili dhabure ni werana nde dhili dhapama. Ejhehedho yehu enakumela mBibiliya enonaddameliha ni Mulugu, ni winowoniha makalelo Mulugu ananidhiveliye vanlubale. Nnere wawakela mareeliho owinjhiva mwigumini mwehu nalibiha ejhehedho yehu.

17. Mwahaya bwaddi nigahowela ohagalala wodhela ejhehedho yehu?

¹⁷ Karta murumiwi Pawulo aalebenliye akuda Roma ohuwoga egi: ‘Ejhehedhelo yuhagalasegeni.’ (Rom. 12:12) Pawulo ohowela ohagalala mwaha ahikanna ebaribari wihina ahadhowegeve agaali ororomeleya, eere wakela egumi yohimala odhulu. Ni iyoya nihagalalege mwaha ejhehedho ninnihuna, mwaha kannaganyedha wihina Yehova anere wakwanihedha mpaganyo waye. Ninga awogile Salmista egi: ‘Oohagalala duule . . . ejhehedho eli wa Yehova Mulugo aawo, . . . Ole anaddiddelave okala ororomeleya.’ — Sal. 146:5, 6.