Aj Chukul Tzʼokʼsajooʼ wa a Testigojooʼ Tiʼi Jehovah?

Walak ti tzʼokʼsik ti leʼek inoʼon a Testigojoʼon Tiʼi Jehovah aj chukul tzʼokʼsajoʼon. Kʼuʼkaʼa walak ti tzʼokʼsik abʼeeʼ? Tzʼaj ti kuentaj tubʼaj jokʼol kʼuʼ a walak ti tzʼokʼsiki, bʼiki ti walak u bʼetik ti jumpaayoʼon tuwich ulaakʼooʼ aj tzʼokʼsaj a kʼabʼaʼ a yantoʼono y bʼiki ti walak ti yeʼik a yakunaj tiʼijooʼ ti wettzʼokʼsajil.

1. Tubʼaj walak u jokʼol kʼuʼ a walak u tzʼokʼsikooʼ a Testigojooʼ Tiʼi Jehovah?

A Jesusu u yadʼaj: «Leʼec [u tʼan a Dʼioso] leʼec a jajil tʼana.» (Juan 17:17) Jabʼixilik ti u tʼan Dʼios a walak u tzʼokʼsik a Jesusu bʼoobʼeʼilik a Testigojooʼ Tiʼi Jehovah. Ich Bʼibʼle jokʼol kʼuʼ a walakooʼ u tzʼokʼsik. Tzʼaj ti kuentaj kʼuʼ a uchi ichil a jaabʼ 1870. Yan a junmuuchʼ ti winik muchʼlajooʼ u tzikbʼalte u pektzil kʼuʼ a yan ichil a Bʼibʼle. Kiʼ kajooʼ u tzʼaaʼ ti kuentaj kʼuʼ a walak u kaʼansik a Bʼibʼle. Leʼek kʼuʼ u yadʼaj a Bʼibʼle leʼek a kajooʼ u tzʼokʼseje, kaʼax bʼoon maʼ kʼet etel kʼuʼ a walak u kaʼansikooʼ a kʼunaja. Tupach abʼeeʼ leʼek kʼuʼ u känajooʼo kajooʼ u tzikbʼalte tiʼijooʼ ulaakʼ mak.a

2. Kʼuʼkaʼa walak ti wadʼik ti Testigojoʼon Tiʼi Jehovah?

A Jehovah walak u yadʼik ti leʼek u jentejooʼo, u testigojooʼ, umen walakooʼ u tzikbʼaltik u jajil u pektzil. (Hebreos 11:4–12:1) Por ejemploj uchiji, a Dʼioso u yadʼaj tiʼijooʼ u jente: «Incheʼex in testigo.» (Xoko a Isaias 43:10.) A Jesusu walak u adʼabʼäl ti «leʼec a testigo a jaj u tʼana.» (Revelacion 1:5) Ichil a jaabʼ 1931 tzʼabʼi toʼon a kʼabʼaʼ Testigo Tiʼi Jehovah. Kiʼ ti wool ti leʼek abʼeʼ ti kʼabʼaʼ.

3. A Testigojooʼ Tiʼi Jehovah bʼiki ti walakooʼ u yeʼik a yakunaj a jabʼix u yeʼaj a Jesusu?

A Jesusu top yaj u yubʼooʼ u yaj täkʼään jabʼix u chukul famiilia. (Xoko a Marcos 3:35.) Bʼoobʼeʼooʼlik a Testigojooʼ Tiʼi Jehovah tupeteebʼ a yokʼolkabʼa jumpʼe famiiliajooʼ, yaj u yubʼooʼ u bʼajil. Mentäktunu walak ti wadʼik ti witzʼin, ti sukuʼun y ti kikooʼ. (Filemon 1, 2) Walak ti tzʼokʼsik u tʼan a Dʼios tiʼi kaʼ ti: «[Yacunte] tulacal a hermanojo.» (1 Pedro 2:17) A Testigojooʼ Tiʼi Jehovah yaabʼ bʼiki ti walakooʼ u yeʼik a yakunaj adʼaaʼ. Leʼek ti tanooʼ u kʼämik a yaj u yettzʼokʼsajilooʼo walakooʼ u yaantik.

MAS KAMBʼALTETO

4. Leʼek kʼuʼ a yan ichil a Bʼibʼle leʼek a walak ti tzʼokʼsiki

A Jehovah ak u yadʼaj ti bʼel u kaʼa ti mas chilamtal bʼiki ti walak ti chʼaʼtojtik a jaj yan ichil a Bʼibʼle. Xokeʼex a Daniel 12:4 etel a tzʼiʼ puunto yalam, kaʼtun tzikbʼalteʼex a kʼaatchiʼ adʼaʼa:

• Kʼuʼ a mas bʼel u kaʼa «ti yaabʼtal» tuyaamooʼ u jente a Dʼios tanilooʼ u tzʼeek ti kuentaj kʼuʼ a yan ichil a Bʼibʼle?

Ila bʼiki kaʼ u tzʼajooʼ ti kuentaj kʼuʼ a yan ichil a Bʼibʼle aj Charles Russell. Chaʼanteʼex a VIDʼEO, kaʼtun tzikbʼalteʼex a kʼaatchiʼ adʼaʼa.

VIDʼEO: Kaʼ Käxtabʼaʼani a Jaj Yan Ichil a Bʼibʼle (7:45)

• Ichil a vidʼeo, bʼiki kaʼ u tzʼajooʼ ti kuentaj aj Charles Russell kʼuʼ a yan ichil a Bʼibʼle?

A weel wa?

Yan ti kʼin walak ti jelik kʼuʼ a walak ti tzʼokʼsiki. Kʼuʼkaʼa? Jabʼix ti walak u kaal ti jokʼol a kʼini, jujunpul tan u sastal u wich a yokʼolkabʼa. Bʼoobʼeʼilik ti walak u tzʼeek Dʼios ti weelte y ti chʼaʼtojte kʼuʼ a yan ichil u tʼan. (Xokeʼex a Proverbios 4:18.) A Bʼibʼle maʼ walak u jeeleli, pero leʼek ti tan ti mas bʼel ti chʼaʼtojte u tojil kʼuʼ a yan ichili, walak ti jelik kʼuʼ a tan ti tzʼokʼsiki.

5. Tan ti kuxtaltik kʼuʼ u nuʼkul ti kʼabʼaʼ

VIDʼEO: Junpʼeel Kʼabʼaʼ Tan u Yeʼik Makoʼon (2:40)

• Kʼuʼkaʼa Testigo Tiʼi Jehovah a kʼabʼaʼ ti käxtaja?

Kʼuʼkaʼa kristiyaanojooʼ u käxtaj a Jehovah tiʼi u Testigo? Umen bʼelooʼ u kaʼa u yadʼäʼ u jajil u pektzil a Dʼioso, porke yaabʼ a tus adʼajaʼan tupektzil. Ilbʼil kaʼpʼeelak a tus abʼeeʼ.

Yan a religion walakooʼ u kaʼansik ti u kʼati Dʼios kaʼ usaarbʼaʼanäk a bʼaʼal a chen bʼetbʼel tiʼi kaʼ ti tzʼaaʼ u yanil. Pero xokeʼex a Levitico 26:1, kaʼtun tzikbʼalteʼex a kʼaatchiʼooʼ adʼaʼa:

• Kʼuʼ u jajil? Bʼiki u yool a Jehovah etel a pätbʼil dʼioso?

Yan a religion walakooʼ u kaʼansik ti Dʼios a Jesusu. Pero xokeʼex a Juan 20:17, kaʼtun tzikbʼalteʼex a kʼaatchiʼooʼ adʼaʼa:

• Kʼuʼ u jajil? Ket wa a Dʼios etel a Jesusu?

• Bʼiki a wool ti kaʼ u täkaataj u Testigo a Jehovah tiʼi kaʼ u kaʼanse u jajil u pektzil etel u jajil u pektzil u mejen?

6. Yaj ti wuyi ti wetʼok

Jabʼix ti laj jumbʼel u parte u bʼäkʼel a maka bʼoobʼeʼlik ti tan u yadʼik Bʼibʼle ti laj jumbʼelakooʼ aj tzʼokʼsaja. Xokeʼex a 1 Corintios 12:25, 26, kaʼtun tzʼikbʼalteʼex a kʼaatchiʼooʼ adʼaʼa:

• Leʼek a tanooʼ u chukul tzʼokʼsaja kʼuʼ a kaʼ u bʼetooʼ ti tan u kʼämikooʼ a yaj u yettzʼokʼsajili?

• Kʼuʼ a wilaʼ etel bʼiki ti walakooʼ u yeʼik a yakunaj a Testigojooʼ Tiʼi Jehovah?

Wa yan a Testigojooʼ u kʼämajooʼ a yaja, u masil a Testigo tupeteebʼ a yokʼolkbʼa liistojooʼ ti antaj leʼek bʼiki ti jedʼeʼek. Tiʼi kaʼ a wilaʼ junpʼeel a ejemploj etel abʼeeʼ, chaʼanteʼex a VIDʼEO. Kaʼtun tzikbʼalteʼex a kʼaatchiʼ adʼaʼa.

VIDʼEO: A Kaj Haiti u Mansaj a Chichich ikʼ a Mateo u Kʼabʼaʼ (5:29)

• Tupach ti uchi a ikʼi, bʼiki kaʼ u yaantajooʼ u bʼajil a Testigojooʼ Tiʼi Jehovah?

KʼUʼ A KÄNAJA

Aj chukul Tzʼokʼsajooʼ a Testigo Tiʼi Jehovah. Tupeteebʼ a yokʼolkabʼa jumpʼe famiiliajoʼon taj tzʼokʼsaj y laj ich Bʼibʼle walak u jokʼol kʼuʼ a walak ti tzʼokʼsiki. Walak ti wadʼik u jajil u pektzil a Jehovah.

Tzikbʼalbʼäl kʼuʼ ti känaja

• Kʼuʼkaʼa tzʼabʼi toʼon a kʼabʼaʼ Testigo Tiʼi Jehovah?

• Bʼiki ti walak ti trataartik ti bʼajil?

• Bʼiki a tukul, aj chukul tzʼokʼsajooʼ wa a Testigojooʼ Tiʼi Jehovah?

MAS ILATOJ

Mas kambʼalte u pektzil a Testigojooʼ Tiʼi Jehovah.

Testigojooʼ Tiʼi Jehovah —Tanooʼ u Bʼetik u Meyajil u Tzʼokʼsaj, Parte 1: Jokʼooʼ Ich Akʼäbʼil (1:00:53)

Ila a ejemploj bʼiki kaʼ u yeʼajooʼ Testigo Tiʼi Jehovah bʼikiʼil a kaʼansaj a maʼ jaja.

Walak u Nakʼsabʼäl u Yanil u Kʼabʼaʼ a Dʼios Umen u Jente (7:08)

Käxte u nuukbʼeebʼal a kʼaatchiʼ a uchak walak a tuklik tupektzilooʼ a Testigo Tiʼi Jehovah.

«Kʼaatchiʼ a Walak u Kʼaatbʼäl Tupektzil a Testigojooʼ Tiʼi Jehovah» (web page)

Leʼek aj Stephen walak u bʼetik a yaj tiʼijooʼ ulaakʼooʼ a raasa umen motz tiʼijooʼ. Tzʼaj ti kuentaj kʼuʼ u yilaj tuyaamooʼ a Testigo Tiʼi Jehovah u jisaj u jeleʼ u kuxtal.

«Mas Kaji ti Kʼastal in Kuxtal» (The Watchtower, July 1, 2015)