YIKR SEBRE

1 Ad a Israyɛll kom-dibli nins sẽn tũ yẽ* n wa Ezɩptã yʋya. Rao fãa waa ne a zak rãmba.+ 2 Yaa a Rubɛnne, a Sɩmeyõ, a Levi la a Zida,+ 3 a Isakaare, a Zabulõ la a Bẽnzame, 4 a Dan ne a Naftali, a Gaad la a Asɛɛre.+ 5 Neb nins fãa* sẽn yi a Zakoob pendẽ wã* ra yaa bãmb* pis-yopoe, la a Zozɛf ra zoe n bee Ezɩpti.+ 6 A Zozɛf wa n kiime,+ t’a ba-biisã fãa n paas zãmaan-kãng nebã fãa me ki. 7 La Israyɛll nebã* ra rogda kamba, tɩ b sõorã paasd wʋsgo. B sõorã ra paasda tʋʋll-tʋʋlle, tɩ b paamd pãng wʋsgo, hal n pid soolmã.+

8 Kaoosg zugẽ, rĩm-paall n wa n deeg naamã Ezɩpti. La yẽ soabã pa bãng a Zozɛf ye. 9 A yeela a nin-buiidã yaa: “Ges-y-yã! Israyɛll nebã sõor la b pãng yɩɩda tõndo.+ 10 Bɩ d maan yam ne-ba. Sã n pa rẽ, b sõorã na n ket n paasdame. Zabr sã n wa yiki, b na n naaga tõnd bɛɛbã n zab ne tõnd la b yi tẽngã.”

11 Rẽ n so tɩ b yãk yembs taoor dãmb* sẽn na yɩl tɩ b modg-b tɩ b tʋm tʋʋm-wɛgla.+ B mee galʋ-tẽns a Farawõ sẽn na n bĩngd a teedã b pʋsẽ. Yaa Pitom la Ramsɛs.+ 12 La baa b sẽn da modgd-b wʋsgã, b sõorã me ra paasda wʋsgo, tɩ b ra fɩɩgdẽ, hal tɩ Ezɩpt nebã ra zoet Israyɛll nebã wʋsg la b kis-ba.+ 13 Woto, Ezɩpt nebã kẽesa Israyɛll nebã yembdo, n modgd-b tɩ b tʋmd tʋʋm-kɛgemse.+ 14 B kɩtame tɩ b vɩɩmã lebg toog tʋʋm-kɛgemsã yĩnga, bala b ra tʋmda ne tãn-maas la tãn-koɛɛma, la b tʋmd yembd tʋʋm buud toor-toor pʋtẽ wã. Sɩd-sɩda, Ezɩpt nebã weoog-b-la ne toolem tɩ b tʋm tʋʋm buud toor-toor yembs sẽn tʋmde.+

15 Ezɩpt rĩmã wa n goma ne a Sɩfra la a Puwa sẽn yaa pʋg-roagsdb nins sẽn yaa Ebre-rãmbã. 16 A yeel-b lame yaa: “Yãmb sã n wa sõngd Ebre-poak t’a na n doge,+ yãmb segd n gũus n gesa a rogmã sasa. Sã n yaa bi-ribla, yãmb segd n kʋʋ biigã, la sã n yaa bi-pugla, yãmb segd n basa biigã t’a vɩɩmde.” 17 La pʋg-roagsdbã ra zoeta Wẽnnaam, n pa maan wa Ezɩpt rĩmã sẽn yeel-bã ye. B basa kom-dibli wã tɩ b vɩɩmde.+ 18 Ezɩpt rĩmã wa n boola pʋg-roagsdbã n sok-b yaa: “Bõe yĩng tɩ yãmb bas kom-dibli wã tɩ b vɩɩmde?” 19 La pʋg-roagsdbã yeela a Farawõ yaa: “Ebre-pogsã pa wa Ezɩpt pagbã ye. B tara pãnga, tɩ pʋg-roagsã ne a na n ta bɩ mik tɩ b rogame.”

20 Dẽ, Wẽnnaam maana pʋg-roagsdbã neere. Nin-buiidã ra ket n tara paasgo, tɩ b pãngã me paasd wʋsgo. 21 La pʋg-roagsdbã sẽn da zoet Wẽnnaamã yĩnga, Wẽnnaam wa n kõ-b-la kamba. 22 Sẽn na n baase, a Farawõ wa n yeela a nin-buiidã fãa yaa: “Yãmb segd n loba Ebre-rãmbã kom-peels nins fãa sẽn yaa kom-dibli wã Nill kʋɩlgã pʋgẽ, la y bas sẽn yaa-a bi-pugl fãa t’a vɩɩmde.”+

2 Wakat kãnga, a Levi zakã rao a yembr n kẽ kãadem ne a Levi bi-pugla.+ 2 La pagã rɩka pʋg n dog bi-ribla. A sẽn yã tɩ biigã yaa neer wʋsgã, a solg-a-la kiis a tãabo.+ 3 A sẽn wa n pa le tõe n solg biigã yɛsã,+ a rɩka peoog* sẽn wʋg ne rudma,* n bolg-a sũud la kontaale,* n sagl biigã be. A tɩ rɩgla peoogã tãnwĩisã sʋk Nill kʋɩlgã noore. 4 La biigã tãoã+ ra yasa zĩig sẽn pa zãr wʋsg n get bũmb ning sẽn na n paam-a.

5 A Farawõ bi-puglã wa n kẽe Nill kʋɩlgẽ wã n na n deem koom, t’a tʋm-tʋmd-pogsã kẽnd kʋɩlgã noore. La a yãa peoogã sẽn be tãnwĩisã sʋkã. Zĩig pʋgẽ, a tʋma a yem-poak t’a tɩ rɩk-a n wa.+ 6 A sẽn lak peoogã a yãa biigã, la biigã ra yãbdame. A nimbãaneg yõk-a lame. La a yeelame yaa: “Yãoã yaa Ebre-rãmbã biig a ye.” 7 Dẽ, biigã tãoã soka a Farawõ bi-puglã yaa: “Yãmb datame tɩ m kẽng n tɩ bool pag sẽn tõe n yẽsem biigã Ebre-rãmbã sʋk n kõ-y bɩ?” 8 T’a Farawõ bi-puglã leok-a yaa: “Kẽnge!” Bi-puglã yɩɩ tao-tao n kẽng n tɩ bool biigã ma.+ 9 A Farawõ bi-puglã yeela pagã yaa: “Reeg bi-kãngã n yẽsem n kõ-ma, tɩ m na n yao-f lame.” Woto, pagã reega biigã n yẽsme. 10 Biigã sẽn wa n bɩ, a tall-a lame n tɩ kõ a Farawõ bi-puglã, t’a lebg a biiga.+ A pʋda a yʋʋr t’a Moyiizi,* n yeele: “Yaa mam sẽn yiis-a koomẽ wã yĩnga.”+

11 La a Moyiiz sẽn wa n lebg kãsmã,* daar a ye, a yiime n kẽng a saam-biisã nengẽ, n na n ges zɩɩb nins b sẽn tʋkdã.+ A yãa Ezɩpt ned sẽn pãbd Ebre a ye, rat n yeel t’a saam-biisã nin-yende. 12 A wẽnemdame n ges ka la ka, la a sẽn pa yã nedã, a kʋʋ Ezɩpt nedã n solg bĩisrẽ wã.+

13 La a le yii vẽkembeoogã n yã Ebre-rãmb a yiib sẽn zabd taaba. Dẽ, a soka sẽn pa tar-a bʋʋmã yaa: “Bõe yĩng tɩ fo pãbd f tũud-n-taagã?”+ 14 Tɩ yẽ me sok yaa: “Ãnda n yãk foo tɩ f yaa tõnd naab la d bʋ-kaooda? Fo rat n kʋʋ ma-me wa fo sẽn kʋ Ezɩpt nedã la?”+ A Moyiiz yɛɛsame n yeel yaa: “Sãmbg sẽn kae, yellã vẽnegame!”

15 Rẽ poore, a Farawõ wʋma yellã, n bao n na n kʋ a Moyiizi. La a Moyiiz zoeeme n zãag ne a Farawõ, n kẽng n na n tɩ vɩɩmd Madiyã soolmẽ wã.+ A tɩ zĩnda bulg noore. 16 La Madiyã maan-kʋʋdã+ ra tara kom-pugli a yopoe. B waame n na n toog koom n pids kogendã tɩ b ba wã rũmsã yũ. 17 La pe-kɩɩmbã waame n dig-b wa raasenkamã. Rẽ la a Moyiiz yik n sõng pagbã, la a yũnug b rũmsã. 18 B sẽn lebg n kuil b ba a Rewuyɛll*+ nengẽ wã, a zẽka a koɛɛg n sok yaa: “Maana wãn tɩ yãmb lebg n wa pĩnd woto rũndã?” 19 Tɩ b leok yaa: “Ezɩpt ned+ a ye n fãag tõnd pe-kɩɩmbã nusẽ. A pʋd n tooga koomã n kõ tõndo, la a yũnug rũmsã.” 20 T’a yeel a kom-pugli wã: “La a bee yɛ? Bõe yĩng tɩ yãmb bas raoã be? Tɩ bool-y-yã-a t’a wa naag tõnd n dɩ.” 21 Rẽ poore, a Moyiiz sakame n na n pa raoã nengẽ. A rɩka a bi-pugl a Sefora+ n kõ a Moyiiz t’a maan a paga. 22 A Sefora wa n doga bi-ribla, t’a Moyiiz pʋd-a t’a Gɛrsom,*+ bala a yeelame: “Mam lebga sãan n vɩ sãand weoogo.”+

23 Kaoosg zugẽ,* Ezɩpt rĩmã wa n kiime,+ la Israyɛll nebã ra ket n sidgdame la b yãbd yembdã yĩnga. B sẽn da yãbd n kot sõngrã ra tata Wẽnnaam.+ 24 Wẽnnaam wa n wʋma b sidgrã,+ la Wẽnnaam tẽega kaool ning a sẽn da maan ne a Abrahaam, a Izaak la a Zakoobã.+ 25 Dẽ, Wẽnnaam gesa Israyɛll nebã, n yã b namsgã.

3 A Moyiiz lebga rũm-kɩɩm n gũud a rɛɛmb a Zetro+ sẽn yaa Madiyã maan-kʋʋdã rũmsi. A sẽn wa n tar rũmsã n teesd we-raoogã nin-taoor sẽnese, a wa n taa Wẽnnaam tãngẽ wã, rat n yeel tɩ Horɛɛbe.+ 2 Dẽ, a Zeova malɛkã vẽnega a meng ne-a bugum pʋgẽ. Bugmã ra wita gõos tuug sʋka.+ A Moyiiz sẽn da ket n getẽ wã, a yãame tɩ gõos tuugã wita bugum, n yaool n pa rɩtẽ ye. 3 Dẽ, a Moyiiz yeelame: “Ad yaa yel-solemde! Bõe yĩng tɩ tuugã pa rɩtẽ? Mam na n kolg n gesame.” 4 A Zeova sẽn yã t’a kolgdame n na n gesã, a paa gõos tuugẽ wã n bool-a yaa: “Moyiizi! Moyiizi!” T’a leok yaa: “Naaba!” 5 Tɩ Wẽnnaam yeele: “Ra kolg n paas ye. Piid f neooda wã, bala zĩig ning fo sẽn yasã yaa zĩ-sõngo.”

6 A paasame yaa: “Mam yaa fo yaab-rãmbã* Wẽnnaam, rat n yeel t’a Abrahaam Wẽnnaam,+ a Izaak Wẽnnaam,+ la a Zakoob Wẽnnaam.”+ Dẽ, a Moyiiz luda a nengã, a sẽn da yɛɛsd n pa rat n ges Wẽnnaamã yĩnga. 7 A Zeova paasame: “Sɩd-sɩda, mam yãa m nin-buiidã sẽn be Ezɩpt n namsdẽ wã, la m wʋm b sẽn kelemde, b sẽn modgd-b tɩ b tʋmdẽ wã yĩnga. Mam mii toog ning b sẽn paamdã sõma.+ 8 Mam na n sig n fãag-b-la Ezɩpt nebã nusẽ,+ la m tall-b n yi soolem-kãnga, n tɩ kẽes-b tẽng sẽn yaa sõma la sẽn yalem pʋgẽ, tẽng sẽn pid ne bĩisim la sɩɩdo.+ Yaa Kanaã nebã, Hɛt nebã, Amoor nebã, Perɛɛz nebã, Hevi nebã, la Zebuus nebã+ tẽngẽ. 9 Sɩd-sɩda, Israyɛll nebã kelemsã taa maam. La mam yãa Ezɩpt nebã sẽn namsd-b ne toolmã me.+ 10 Masã, wa tɩ m na n tʋm-f-la a Farawõ nengẽ, la fo na n yiisa Israyɛll nebã sẽn yaa mam nebã Ezɩpti.”+

11 La a Moyiiz soka Wẽnnaam yaa: “Mam yaa ãnda n na n kẽng a Farawõ nengẽ, n tɩ yiis Israyɛll nebã Ezɩpti?” 12 Tɩ Wẽnnaam yeele: “Mam na n zĩnda ne foo,+ la ad bãnd mam sẽn kõt foo, tɩ wilgdẽ tɩ yaa maam n tʋm foo: Fo sã n wa yiis nebã Ezɩpti, yãmb na n waooga Wẽnnaam tãn-kãngã zugu.”+

13 La a Moyiiz yeela Wẽnnaam yaa: “La mam sã n kẽng Israyɛll nebã nengẽ n tɩ yeel-ba: ‘Yãmb yaab-rãmbã Wẽnnaam n tʋm maam yãmb nengẽ,’ tɩ b sok maam yaa: ‘Yẽ yʋʋr la a bõe?’+ Mam na n leok-b lame tɩ bõe?” 14 Dẽ, Wẽnnaam yeela a Moyiiz yaa: “Mam na n lebga mam sẽn dat* n lebg a soaba.”*+ La a paase: “Ad bũmb ning fo sẽn segd n togs Israyɛll nebã: ‘Soab ning yʋʋr sẽn yaa Mam na n lebga mam sẽn dat n lebg a soabã* n tʋm maam yãmb nengẽ.’”+ 15 Rẽ poore, Wẽnnaam le yeela a Moyiiz yaa:

“Ad fo sẽn segd n tɩ yeel Israyɛll nebã bũmb ninga: ‘A Zeova sẽn yaa yãmb yaab-rãmbã Wẽnnaamã, rat n yeel t’a Abrahaam Wẽnnaam,+ a Izaak Wẽnnaam,+ la a Zakoob Wẽnnaamã+ n tʋm maam yãmb nengẽ.’ Yãoã na n yɩɩ mam yʋʋr wakat fãa,+ la yaa yʋʋr b sẽn na n tẽegd zãmaan woo zãmaana. 16 Masã, kẽng n tɩ tigim Israyɛll kãsem-dãmbã n yeel-b yaa: ‘A Zeova sẽn yaa yãmb yaab-rãmbã Wẽnnaamã, rat n yeel t’a Abrahaam ne a Izaak la a Zakoob Wẽnnaamã vẽnega a meng ne maam n yeele: “Sɩd-sɩda, mam yãa bũmb ning b sẽn maand yãmb Ezɩptã.+ 17 Mam yeelame: Mam na n yiisa yãmb y namsgã pʋgẽ+ Ezɩpt nebã nusẽ, n kẽes-y Kanaã nebã, Hɛt nebã, Amoor nebã,+ Perɛɛz nebã, Hevi nebã, la Zebuus nebã+ tẽng sẽn yaa tẽng sẽn pid ne bĩisim la sɩɩdã pʋgẽ.”’+

18 “Sãmbg sẽn kae, b na n kelga fo goamã.+ Foo ne Israyɛll kãsem-dãmbã na n kẽnga Ezɩpt rĩmã nengẽ. La yãmb segd n yeel-a lame yaa: ‘A Zeova sẽn yaa Ebre-rãmbã Wẽnnaamã+ goma ne tõndo. Woto wã, d bõos tɩ f bas tɩ d kẽn rasem a tãab kẽnd we-raoogẽ wã, n tɩ maan maoong n kõ tõnd Wẽnnaam a Zeova.’+ 19 La mam mengã mii vẽeneg tɩ Ezɩpt rĩmã pa na n kõ yãmb sor tɩ y looge, sã n pa tũu ne modgre.+ 20 Dẽ, na n yɩɩ tɩlɛ tɩ m tẽeg m nug n sɩbg Ezɩpt soolmã ne tʋʋm-kãsems wʋsg m sẽn na n tʋm soolmã pʋgẽ. Rẽ poore, a na n basa yãmb tɩ y looge.+ 21 Mam na n kɩtame tɩ nin-buiidã paam lohorem Ezɩpt nebã taoore, sẽn na yɩl tɩ yãmb sã n wa na n looge, bɩ y ra loog nug-zaal ye.+ 22 Pag fãa segd n kosa a yaka, la pag ning sẽn be a roogẽ wã wanzuri la sãnem teedo, n paas futu. La yãmb segd n ninga y kom-dibli wã ne y kom-pugli wã bõn-kãense. Yãmb na n fãa Ezɩpt nebã.”+

4 Baasgo, a Moyiiz leokame yaa: “La b sã n pa tẽ maam, la b pa kelg mam koɛɛgã?+ Bala b na n yeelame: ‘A Zeova pa vẽneg a meng ne foo ye.’” 2 Dẽ, a Zeova sok-a lame: “Yaa bõe la sẽn be fo nugẽ wã?” T’a leok yaa: “Yaa rasaare.” 3 Tɩ Wẽnnaam yeele: “Lob-a tẽnga.” A Moyiiz lob-a-la tẽnga, la a lebga waafo,+ t’a Moyiiz yɩ tao-tao n lak waafã sɛɛgẽ. 4 La a Zeova yeela a Moyiiz yaa: “Tẽeg f nug n gãd waafã zʋʋre.” A tẽega a nug n gãd-a, t’a lebg rasaar a nugẽ wã. 5 Wẽnnaam yeelame: “Yaa sẽn na yɩl tɩ bãmb tẽ t’a Zeova sẽn yaa b yaab-rãmbã Wẽnnaamã, rat n yeel t’a Abrahaam Wẽnnaam, a Izaak Wẽnnaam, la a Zakoob Wẽnnaamã+ vẽnega a meng ne foom.”+

6 A Zeova le yeel-a lame yaa: “M bõos tɩ f ning f nugã f fuugã pʋgẽ, f yãoogẽ wã.” A ninga a nugã a fuugã pʋgẽ. La a sẽn yiis-a wã, a mikame tɩ wãood n yõk a nugã t’a lebg pɛɛlg wa sa-lamdo!+ 7 Dẽ, Wẽnnaam yeelame: “Le ning f nugã f fuugã pʋgẽ, f yãoogẽ wã.” A le ninga a nugã a fuugẽ wã. La a sẽn yiis a nugã a fuugẽ wã, a le lebga sõma wa a yĩngã zĩis a taabã! 8 Wẽnnaam yeelame: “B sã n pa tẽ foo wall b pa kɩs sɩd ne pipi bãndã, vẽenega, b na n kɩsa sɩd ne bãnd ning sẽn pʋgdã.+ 9 Baasgo, b sã n kell n pa tẽ bãn a yiibã, la b zãgs n pa kelg fo koɛɛgã, fo na n yãka Nill kʋɩlgã koom n daag tẽn-koɛɛngã zugu, la ko-kãng na n lebga zɩɩm tẽn-koɛɛngã zugu.”+

10 La a Moyiiz yeela a Zeova yaa: “Zeova, y sugri. Mam zɩ n yɩ gom-minim soab ye. Mam pa yɩ gom-minim soab pĩnda, la yãmb sẽn sɩng goam ne y tʋm-tʋmdã tɛk me ye. Bala m pa tõe goam ye.* Mam zɩlemdã pa faasg me ye.”+ 11 T’a Zeova sok-a yaa: “Ãnda n maan noor n kõ ninsaala, wall ãnda n kɩtd tɩ ninsaalb pa tõe n gome, n yaa muka, bɩ n ne sõma, wall n yaa zoanga? Pa maam a Zeova la? 12 Woto wã, bɩ f kẽng tɩ mam na n zĩnda ne foo f sẽn wat n gomda,* la mam na n wilga foo bũmb ning f sẽn segd n yeele.”+ 13 La a yeelame: “Zeova, y sugri. M bõos tɩ y tʋm ned a to yãmb sẽn date.” 14 A Zeova sũurã puuga ne a Moyiiz t’a yeele: “La Levi ned a Aarõ sẽn yaa fo ba-biigã yẽ?+ Mam miime t’a tõee goam sõma. Sẽn paase, a rɩka sor n wat n na n seg foo. A sã n yã foo, a sũur na n yɩɩ noogo.+ 15 Dẽ, fo segd n goma ne-a, la f wilg-a bũmb ning a sẽn na n togsã.*+ Mam na n zĩnda ne yãmb y yiibã y sẽn wat n gomda,+ la mam na n wilga yãmb y sẽn segd n maane. 16 A na n goma ne nin-buiidã fo yĩnga, la a na n yɩɩ fo koe-taasda, tɩ fo yɩ wa Wẽnnaam yẽ yĩnga.+ 17 Fo segd n zãa rasa-kãngã me f nugẽ, n tall-a n maan bõn-bãnã.”+

18 A Moyiiz lebg n kẽnga a rɛɛmb a Zetro nengẽ,+ n yeel-a yaa: “M dat n bõos n leba m saam-biisã sẽn be Ezɩptã nengẽ, n tɩ ges b sã n ket n bee laafɩ.” A Zetro yeela a Moyiiz yaa: “Kẽng ne laafɩ.” 19 Rẽ poore, a Zeova yeela a Moyiiz Madiyã soolmẽ wã yaa: “Yik n leb Ezɩpti, bala neb nins fãa sẽn da baood n na n kʋ foomã* kiime.”+

20 Dẽ, a Moyiiz rɩka a pagã ne a kom-dibli wã n zombg bõanga, n dɩk Ezɩpt sore. Sẽn paase, a Moyiiz zãa Wẽnnaam rasaarã. 21 A Zeova yeela a Moyiiz yaa: “Fo sã n ta Ezɩpt bɩ f maan yel-soalem nins fãa mam sẽn kõ foo tõog tɩ f maanã a Farawõ taoore.+ La mam na n basame t’a sũurã riglmi,+ la a pa na n sak tɩ nin-buiidã loog ye.+ 22 Fo segd n yeela a Farawõ yaa: ‘Ad a Zeova sẽn yeele: “Israyɛll yaa mam bi-ribla, mam bi-kãsenga.+ 23 Mam yeta foo tɩ f bas m bi-riblã t’a looge, sẽn na yɩl t’a tɩ waoog maam. La fo sã n zãgs tɩ f kõn bas-a t’a looge, m na n kʋʋ fo bi-riblã, f bi-kãsengã.”’”+

24 La sorã zugu, b sẽn wa n ta gãagã zĩigẽ, a Zeova+ seg-a lame, n da baood n na n kʋ-a.+ 25 A Sefora+ wa n dɩka kugr sẽn dɩt wa sʋʋga,* n kẽes a biigã bãongo, la a maan tɩ yo-gãongã sɩɩs a naoã,* la a yeele: “Bala fo yaa mam sɩda, zɩ-kãngã maasem yĩnga.” 26 Dẽ, Wẽnnaam bas-a lame t’a looge. Yaa bãongã yĩng la a Sefora sẽn yeel wakat kãnga: “Yaa mam sɩda, zɩ-kãngã maasem yĩnga.”

27 Rẽ poore, a Zeova yeela a Aarõ yaa: “Kẽng we-raoogẽ wã n tɩ seg a Moyiizi.”+ A kẽngame n tɩ seg-a Wẽnnaam tãngẽ wã+ n pʋʋs-a la a mok-a. 28 A Moyiiz togsa a Aarõ a Zeova sẽn yaa soab ning sẽn tʋm yẽ wã goamã fãa,+ la a wilg-a bãn nins fãa a sẽn yeel-a t’a maanã.+ 29 Rẽ poore, a Moyiiz ne a Aarõ kẽngame, n tɩ tigim Israyɛll nebã kãsem-dãmb fãa.+ 30 A Aarõ togs-b-la goam nins fãa a Zeova sẽn yeel a Moyiizã, la a Moyiiz maana bãnã+ nin-buiidã taoore. 31 Nin-buiidã tẽe a Moyiizi.+ Israyɛll nebã sẽn wʋm t’a Zeova na n sõng-b lame,+ la t’a yãa b namsgã,+ b sulgame n wõgemde.

5 Rẽ poore, a Moyiiz ne a Aarõ kẽe a Farawõ nengẽ, n yeel-a yaa: “Ad a Zeova sẽn yaa Israyɛll Wẽnnaamã sẽn yeele: ‘Bas mam nin-buiidã tɩ b looge, sẽn na yɩl tɩ b tɩ maan tigr mam yĩng we-raoogẽ wã.’” 2 La a Farawõ yeelame: “A Zeova yaa ãnda,+ tɩ mam na n sak a koɛɛg n bas Israyɛll nebã tɩ b looge?+ Mam pa mi a Zeova baa bilf ye. Mam pa na n bas Israyɛll nebã tɩ b loog ye.”+ 3 La bãmb yeelame: “Ebre-rãmbã Wẽnnaam goma ne tõndo. D rat n bõos n kẽna rasem a tãab kẽnd we-raoogẽ wã, n tɩ maan maoong n kõ tõnd Wẽnnaam a Zeova.+ Sã n pa rẽ, a na n sɩbga tõnd ne bãaga, wall a kʋ tõnd ne sʋʋga.” 4 Ezɩpt rĩmã leoka bãmb yaa: “A Moyiiz ne a Aarõ, bõe yĩng tɩ yãmb dat n kɩt tɩ nin-buiidã bas b tʋʋmdã? Leb-y y tʋʋmdẽ wã!”*+ 5 A Farawõ paasame: “Ges-y nin-buiidã sõor sẽn yaa wʋsg to-to soolmã pʋgẽ, tɩ yãmb rat tɩ b bas b tʋʋmdã.”

6 Baraar bala, a Farawõ yeela tʋʋmdã taoor dãmb ne neb nins b sẽn yãk tɩ b get tʋʋmdã yellã yaa: 7 “Yãmb pa segd n le kõ nin-buiidã mood tɩ b wẽ tãn-koɛɛm ye.+ Bas-y tɩ b kẽng n tɩ bao moodã b toore. 8 La tãn-koɛɛm nins b sẽn segd n wẽ daar fãa wã sõor pa na n toeem ye. Da boog-y b tãn-koɛɛmã sõore, bala b maanda kʋɩɩngo. Yaa rẽ yĩng la b sẽn yete: ‘Tõnd dat n loogame. Tõnd dat n tɩ maana maoong n kõ tõnd Wẽnnaamã!’ 9 Kɩt-y tɩ b tʋm wʋsg n yɩɩg pĩndã, la y kõ-b tʋʋm wʋsg sẽn na yɩl tɩ b ra kelg zirẽ-be-goam ye.”

10 Dẽ, tʋʋmdã taoor dãmb+ ne neb nins b sẽn yãk tɩ b get tʋʋmdã yellã yiime n yeel nin-buiidã yaa: “Ad a Farawõ sẽn yeele: ‘Mam pa na n le kõt yãmb mood ye. 11 Kẽng-y n tɩ bao-y moodã y toor zĩig ning fãa y sẽn tõe n paame. La b pa na n boog yãmb tʋʋmdã baa bilf ye.’” 12 Nin-buiidã sãeegame n kẽ Ezɩpt soolmã fãa, n na n wʋk mo-koeemse. 13 La tʋʋmdã taoor dãmb ra pẽdgd-b lame n yetẽ: “Yãmb ned kam fãa segd n saa a tʋʋmd daar fãa, wa wakat ning b sẽn da kõt yãmb moodã.” 14 Sẽn paase, a Farawõ tʋʋmdã taoor dãmb pãba Israyɛll neb nins b sẽn yãk tɩ b get tʋʋmdã yellã.+ B sok-b lame yaa: “Bõe yĩng tɩ yãmb pa tõog n wẽ tãn-koɛɛmã tɩ ta sõor ning y sẽn wẽed raasenkamã? Yɩɩ woto zaamẽ ne rũndã fãa.”

15 Dẽ, Israyɛll neb nins b sẽn yãk tɩ b get tʋʋmdã yellã kẽe a Farawõ nengẽ, n yeel-a yaa: “Bõe yĩng tɩ y maand y tʋm-tʋmdbã woto? 16 B pa kõt yãmb tʋm-tʋmdbã moodo, n yaool n yet tõnd yaa: ‘Wẽ-y tãn-koɛɛma!’ B pãba yãmb tʋm-tʋmdbã, tɩ yaool n yaa yãmb meng nebã n ka bʋʋm.” 17 La a yeelame: “Yãmb maanda kʋɩɩngo! Y maanda kʋɩɩngo!+ Yaa rẽ yĩng la y sẽn yete: ‘Tõnd dat n loogame. Tõnd dat n tɩ maana maoong n kõ a Zeova wã.’+ 18 Woto wã, kẽng-y n leb-y tʋʋmdẽ wã! B pa na n kõ yãmb mood ye. La yãmb segd n kell n wẽe tãn-koɛɛm sõor ning y sẽn wẽed raasenkamã.”

19 Israyɛll neb nins b sẽn yãk tɩ b get tʋʋmdã yellã bãngame tɩ b paama zu-loe-kãsenga. Bala b yeel-b lame: “Yãmb pa segd n boog tãn-koɛɛmã y sẽn wẽed daar fãa wã sõor baa bilf ye.” 20 Rẽ poore, b sega a Moyiiz ne a Aarõ sẽn da yas n gũudẽ, sẽn na yɩl tɩ b sã n yi a Farawõ nengẽ bɩ b yã taaba. 21 Zĩig pʋgẽ, b yeel-b lame: “Bɩ a Zeova ges yãmb la a kao bʋʋdo. Bala yãmb kɩtame t’a Farawõ ne a tʋm-tʋmdbã kis tõndo,* la yãmb ninga sʋʋg b nusẽ tɩ b kʋ tõndo.”+ 22 Dẽ, a Moyiiz pʋʋsa a Zeova n yeel yaa: “Zeova, bõe yĩng tɩ y nams y nin-buiidã? Bõe yĩng tɩ y tʋm maam? 23 Mam sẽn kẽ a Farawõ nengẽ n gom yãmb yʋʋr yĩngã tɛka,+ a maneg n maana nin-buiidã wẽnga,+ la yãmb pa tol n fãag y nebã ye.”+

6 Dẽ, a Zeova yeela a Moyiiz yaa: “Masã, fo na n yãa mam sẽn na n maan a Farawõ bũmb ninga.+ Nug sẽn tar pãng n na n modg-a t’a bas nin-buiidã tɩ b looge, la nug sẽn tar pãng n na n modg-a t’a rig-b n yiis a soolmẽ wã.”+

2 Rẽ poore, Wẽnnaam yeela a Moyiiz yaa: “Mam yaa a Zeova. 3 Mam da vẽnegda m meng ne a Abrahaam, a Izaak la a Zakoob wa Wẽnnaam Sẽn-tõe-a-fãa wã.+ La sã n yaa ne mam yʋʋrã sẽn yaa Zeova wã wɛɛngẽ,+ mam pa kɩt tɩ b bãng maam sõma ye.+ 4 Sẽn paase, mam maana kaool ne bãmba, n yeel tɩ m na n kõ-b-la Kanaã soolmã sẽn yaa soolem ning pʋgẽ b sẽn zĩnd sãandã.+ 5 Mam mengã wʋma Israyɛll nebã sidgrã, Ezɩpt nebã sẽn kẽes-b yembd tɩ b sidgdẽ wã. La mam pa yĩm m kaoolã ye.+

6 “Woto wã, yeel Israyɛll nebã yaa: ‘Mam yaa a Zeova. Mam na n yiisa yãmb Ezɩpt nebã tʋʋm-kɛgemsã pʋsẽ la b yembdã pʋgẽ.+ Mam na n fãaga yãmb ne kang sẽn tar pãnga,* la m sɩbg Ezɩpt nebã sõma.+ 7 Yãmb na n lebga mam neba, la mam na n yɩɩ yãmb Wẽnnaam.+ Hakɩɩka, yãmb na n bãngame tɩ mam yaa a Zeova sẽn yaa yãmb Wẽnnaamã, soab ning sẽn yiisd yãmb Ezɩpt nebã tʋʋm-kɛgemsã pʋsẽ wã. 8 Mam na n talla yãmb n tɩ kẽes soolem ning mam sẽn wẽen n pʋlem* tɩ m na n kõo a Abrahaam, a Izaak la a Zakoobã pʋgẽ. Mam na n kõ-a-la yãmb tɩ y sooge.+ Mam yaa a Zeova.’”+

9 A Moyiiz wa n tɩ togsa Israyɛll nebã koe-kãngã, la b pa kelg-a, b sẽn da koms raoodã, la b sẽn modgd-b tɩ b tʋmd tʋʋm-kɛgemsã yĩnga.+

10 Rẽ poore, a Zeova goma ne a Moyiiz n yeele: 11 “Kẽ a Farawõ sẽn yaa Ezɩpt rĩmã nengẽ, n yeel-a t’a segd n basa Israyɛll nebã tɩ b yi a soolmẽ wã.” 12 La a Moyiiz leoka a Zeova yaa: “Israyɛll nebã pa kelg maam ye.+ A Farawõ na n yɩɩ wãn n kelg maam, tɩ mam yaool n pa tõe goama?”*+ 13 La a Zeova le togsa a Moyiiz ne a Aarõ noy nins b sẽn segd n kõ Israyɛll nebã, la b sẽn na n kõ a Farawõ sẽn yaa Ezɩpt rĩmã, sẽn na yɩl n tall Israyɛll nebã n yi Ezɩpt soolmẽ wã.

14 Ad b buud toor-toorã taoor dãmba: A Rubɛn sẽn yaa a Israyɛll bi-kãsengã kom-dibli wã+ yɩɩ a Hanoke, a Palu, a Ɛsron la a Karmi.+ Bãmb yaa Rubɛn buudã neba.

15 A Sɩmeyõ kom-dibli wã yɩɩ a Yemuwɛlle, a Yaminni, a Ohaade, a Yakinni, a Zowaar ne a Sawull sẽn yɩ Kanaã pag a ye biigã.+ Bãmb yaa Sɩmeyõ buudã neba.

16 Ad a Levi+ kom-dibli wã yʋy wa sẽn zems b roto: A Gɛrson ne a Kehat la a Merari.+ A Levi vɩɩmã tõr yɩɩ yʋʋm koabg la pis-tã la a yopoe.

17 Ad a Gɛrson kom-dibli wã wa sẽn zems b buudu: A Libni ne a Simeyi.+

18 A Kehat kom-dibli wã yɩɩ a Amram ne a Izehaar la a Ebrõ ne a Uziyɛlle.+ A Kehat vɩɩmã tõr yɩɩ yʋʋm koabg la pis-tã la a tã.

19 A Merari kom-dibli wã yɩɩ a Mali la a Musi.

Bãmb yaa Levi buudã neb wa sẽn zems b roto.+

20 La a Amram rɩka a Zokebɛɛd sẽn yaa a ba wã tãoã n maan a paga.+ A Zokebɛɛd roga a Aarõ ne a Moyiiz n kõ-a.+ A Amram vɩɩmã tõr yɩɩ yʋʋm koabg la pis-tã la a yopoe.

21 A Izehaar kom-dibli wã yɩɩ a Koore,+ a Nefɛɛg la a Zikri.

22 A Uziyɛll kom-dibli wã yɩɩ a Misayɛll ne a Elizafan+ la a Sitri.

23 A Aarõ rɩka a Eliseba sẽn yaa a Aminadaab bi-pugla, la a Naasõ+ tãoã n maan a paga. A roga a Nadaabe, a Abiyu, a Eleazaar la a Itamaar n kõ a Aarõ.+

24 A Koore kom-dibli wã yɩɩ a Asɩɩr ne a Ɛlkana la a Abiyazafe.+ Bãmb yaa Koore buudã neba.+

25 A Aarõ biig a Eleazaar+ rɩka a Putiyɛll bi-pugl a ye n maan a paga. A roga a Fineyaas+ n kõ-a.

Bãmb yaa Levi buudã rot taoor dãmba, wa sẽn zems b buudu.+

26 Yaa Aarõ-kãng ne Moyiiz-kãng la a Zeova sẽn yeele: “Tall-y Israyɛll nebã n yi Ezɩpt soolmẽ wã sull-sullã.”*+ 27 Yaa a Moyiiz ne a Aarõ+ n gom ne a Farawõ sẽn yaa Ezɩpt rĩmã, sẽn na yɩl n yiis Israyɛll nebã Ezɩptã.

28 Daar ning a Zeova sẽn gom ne a Moyiiz Ezɩpt soolmẽ wã, 29 a Zeova yeel-a lame: “Mam yaa a Zeova. Togs a Farawõ sẽn yaa Ezɩpt rĩmã bũmb nins fãa mam sẽn togsd foomã.” 30 Dẽ, a Moyiiz yeela a Zeova yaa: “Mam pa tõe goam ye.* Woto wã, a Farawõ na n yɩɩ wãn n kelg maam?”+

7 A Zeova yeela a Moyiiz yaa: “Gese, mam kɩtame tɩ fo lebg wa Wẽnnaam* a Farawõ yĩnga, la a Aarõ sẽn yaa fo meng ba-biigã na n lebga fo no-rɛɛsa.+ 2 Fo segd n togsa a Aarõ sẽn yaa fo ba-biigã bũmb ning fãa mam sẽn na n yeel foomã. Yẽ na n goma ne a Farawõ, la a na n basa Israyɛll nebã tɩ b yi a soolmẽ wã n looge. 3 Mam na n basame t’a Farawõ sũurã riglmi.+ Mam na n maana bõn-bãn ne yel-soalem wʋsg Ezɩpt soolmẽ wã.+ 4 La a Farawõ pa na n kelg foo ye. Mam na n ninga m nug Ezɩpt soolmã zugu, la m sɩbg Ezɩpt nebã sõma,+ n yiis mam nebã sẽn yaa kʋʋngã,* rat n yeel tɩ Israyɛll nebã Ezɩpt soolmẽ wã. 5 Sãmbg sẽn kae, Ezɩpt nebã na n bãngame tɩ maam la a Zeova,+ wakat ning mam sẽn na n tẽeg m nugã n sɩbg Ezɩpt soolmã, la m yiis Israyɛll nebã b sʋkã.” 6 A Moyiiz ne a Aarõ maana bũmb ning a Zeova sẽn yeelã. B maana woto bal kɛpɩ. 7 A Moyiiz ne a Aarõ sẽn wa n na n gom ne a Farawõ wã t’a Moyiiz ra tara yʋʋm pis-nii, t’a Aarõ tar yʋʋm pis-nii la a tãabo.+

8 A Zeova yeela a Moyiiz ne a Aarõ yaa: 9 “A Farawõ sã n yeel yãmb tɩ y ‘maan yel-solemde,’ bɩ f yeel a Aarõ yaa: ‘Rɩk f rasaarã n lob tẽng a Farawõ taoore.’ Rasaarã na n lebga wag-bedre.”+ 10 A Moyiiz ne a Aarõ kẽe a Farawõ nengẽ, n maan wa a Zeova sẽn yeelã bal kɛpɩ. A Aarõ loba a rasaarã a Farawõ ne a tʋm-tʋmdbã taoore, tɩ rasaarã lebg wag-bedre. 11 La a Farawõ boola yam dãmbã ne tɩtã rãmba. Ezɩpt maan-kʋʋdb nins sẽn maand tɩtã+ me talla b tɩtã n maan a buudu.+ 12 B ned kam fãa loba a rasaar tẽnga, tɩ b rasabã lebg wag-bɛda. La a Aarõ rasaarã vela b rasabã. 13 Baa ne rẽ, a Farawõ sũurã riglmame+ t’a pa kelg-ba, wa a Zeova sẽn da yeelã.

14 A Zeova yeela a Moyiiz yaa: “A Farawõ sũurã riglmame.+ A zãgsame t’a kõn bas nin-buiidã tɩ b loog ye. 15 Kẽng a Farawõ nengẽ beoog yibeoogo. A na n waa koomã noore! Fo segd n yaasa Nill kʋɩlgã noor n seg-a. Zã rasaar ning sẽn da lebg waafã.+ 16 Fo segd n yeel-a lame yaa: ‘A Zeova sẽn yaa Ebre-rãmbã Wẽnnaamã tʋma maam fo nengẽ,+ la a yeelame: “Bas mam nin-buiidã tɩ b looge, n tɩ waoog maam we-raoogẽ wã,” la hal n tãag masã, fo pa sak ye. 17 Ad a Zeova sẽn yeele: “Mam na n maana bũmb tɩ fo bãng tɩ mam yaa a Zeova.+ Ade! M na n wẽe koomã sẽn be Nill kʋɩlgẽ wã ne rasaarã sẽn be mam nugẽ wã, la koomã na n lebga zɩɩm. 18 Zĩmã sẽn be Nill kʋɩlgẽ wã na n kiime. Nill kʋɩlgã na n lebga yũugu, tɩ Ezɩpt nebã pa le tõe n yũ Nill kʋɩlgã koom ye.”’”

19 Dẽ, a Zeova yeela a Moyiiz yaa: “Yeel a Aarõ: ‘Rɩk f rasaarã n tẽeg f nugã Ezɩpt ko-rãmbã+ zut tɩ b lebg zɩɩm, rat n yeel t’a kʋɩlsã zutu, a ko-soayã,* a bãtã+ la zĩis nins fãa b sẽn bĩngd koomã zutu.’ Zɩɩmã na n zĩnda Ezɩpt soolmã fãa pʋgẽ, baa lagd nins b sẽn maan ne raad la kugã pʋsẽ.” 20 A Moyiiz ne a Aarõ maana wa a Zeova sẽn yeelã zĩig pʋgẽ. A Aarõ zẽka rasaarã n wẽ koomã sẽn be Nill kʋɩlgẽ wã a Farawõ ne a tʋm-tʋmdbã taoore, la koomã fãa sẽn be kʋɩlgẽ wã lebga zɩɩm.+ 21 Zĩmã sẽn be kʋɩlgẽ wã kiime,+ tɩ kʋɩlgã lebg yũugu. La Ezɩpt nebã ra pa tõe n yũ Nill kʋɩlgã koom ye.+ Zɩɩmã ra bee Ezɩpt soolmã fãa pʋgẽ.

22 La Ezɩpt maan-kʋʋdb nins sẽn maand tɩtã talla b tɩtã n maan a buudu.+ Woto, a Farawõ sũurã kell n diglmame t’a pa kelg a Moyiiz ne a Aarõ, wa a Zeova sẽn da yeelã.+ 23 Dẽ, a Farawõ lebg n kuila a yiri, la a pa ges tɩ bũmb ning a sẽn yã wã yaa yell baa bilf ye. 24 Ezɩpt nebã fãa ra tuuda buls Nill kʋɩlgã noor sẽn na yɩl n paam koom n yũ, bala b ra pa tol n tõe n yũ Nill kʋɩlgã koom ye. 25 A Zeova kɩtame tɩ Nill kʋɩlgã koom lebg zɩɩm n kaoos rasem a yopoe.

8 Rẽ poore, a Zeova yeela a Moyiiz yaa: “Kẽ a Farawõ nengẽ n yeel-a: ‘Ad a Zeova sẽn yeele: “Bas mam nin-buiidã tɩ b looge, n tɩ waoog maam.+ 2 Fo sã n ket n zãgsdẽ n pa rat n bas-b tɩ b looge, mam na n kɩtame tɩ loms wa pid fo tẽngã zãnga.+ 3 Nill kʋɩlgã na n pida ne lomse, la b na n yiime n kẽ fo zakã, fo ro-gãagã, la b rʋ fo gãagã zugu. B na n kẽe fo tʋm-tʋmdbã ne f nin-buiidã zagsẽ, f wʋmsẽ wã la bũmb nins b sẽn tar n nagd bur-zomã pʋsẽ.+ 4 Lomsã na n dʋʋ fo zugu, f nin-buiidã la f tʋm-tʋmdbã fãa zutu.”’”

5 A Zeova wa n yeela a Moyiiz yaa: “Yeel a Aarõ: ‘Tẽeg f nug ne f rasaarã kʋɩlsã zutu, Nill ko-soayã la bãtã zutu, n kɩt tɩ lomsã yi n kẽ Ezɩpt soolmã.’” 6 Dẽ, a Aarõ tẽega a nug Ezɩpt ko-rãmbã zutu, tɩ lomsã yi n pid Ezɩpt soolmã. 7 La maan-kʋʋdb nins sẽn maand tɩtã talla b tɩtã n maan a buudu. Bãmb me kɩtame tɩ loms wa Ezɩpt soolmẽ wã.+ 8 Dẽ, a Farawõ boola a Moyiiz ne a Aarõ n yeele: “Yõk-y-yã a Zeova sɛɛga, t’a kɩt tɩ lomsã loog n bas maam ne m nin-buiidã,+ bala mam dat n basa Israyɛll nin-buiidã tɩ b loog n tɩ maan maoong n kõ a Zeova.” 9 T’a Moyiiz yeel a Farawõ yaa: “Bee ne yãmb tɩ y yãk wakat ning mam sẽn na n yõk Wẽnnaam sɛɛg t’a kɩt tɩ lomsã loog n bas yãmb ne y tʋm-tʋmdbã, y nin-buiidã la y zagsã. Yaa Nill kʋɩlgẽ wã bal la b na n zĩndi.” 10 T’a yeele: “Beoogo.” Dẽ, a Moyiiz yeelame yaa: “Na n yɩɩ wa yãmb sẽn yeelã, sẽn na yɩl tɩ y bãng tɩ Wẽnnaam a Zeova pa tar to ye.+ 11 Lomsã na n loogame n bas yãmba, y zagsã, y tʋm-tʋmdbã la y nin-buiidã. Yaa Nill kʋɩlgẽ wã bal la b na n zĩndi.”+

12 A Moyiiz ne a Aarõ yii a Farawõ nengẽ n looge, la a Moyiiz yõka a Zeova sɛɛg lomsã a sẽn kɩt tɩ wa a Farawõ nengẽ wã wɛɛngẽ.+ 13 Dẽ, a Zeova maana wa a Moyiiz sẽn kosã, tɩ lomsã kiid rotã pʋsẽ, zagsẽ wã la pʋtã pʋsẽ. 14 B wʋk-b lame n zam rʋy ka tɛka, tɩ soolmã lebg yũugu. 15 A Farawõ sẽn wa n yã tɩ yolsg paamame wã, a riglma a sũurã+ n zãgs t’a kõn kelg-ba, wa a Zeova sẽn da yeelã.

16 A Zeova yeela a Moyiiz yaa: “Yeel a Aarõ: ‘Zẽk f rasaarã n wẽ tẽngã tom, tɩ tomã na n lebga rũmpigli Ezɩpt soolmã fãa pʋgẽ.’” 17 B maana woto. A Aarõ tẽega a nugã ne a rasaarã n wẽ tẽngã tom, la rũmpigli n wa ninsaalbã la rũmsã zutu. Tẽngã tom fãa lebga rũmpigli Ezɩpt soolmã fãa pʋgẽ.+ 18 Maan-kʋʋdb nins sẽn maand tɩtã mak n na n talla b tɩtã n maan a buudu,+ rat n yeel tɩ b baoome n na n maan rũmpigli, la b pa tõog ye. Rũmpigli wã ra bee ninsaalbã la rũmsã zutu. 19 Rẽ n so tɩ maan-kʋʋdb nins sẽn maand tɩtã yeel a Farawõ yaa: “B maana bõn-kãngã ne Wẽnnaam pãnga!”*+ La a Farawõ sũurã kell n diglmame t’a pa kelg-ba, wa a Zeova sẽn da yeelã.

20 Rẽ poore, a Zeova yeela a Moyiiz yaa: “Yik yibeoogã pĩnda, n tɩ yals a Farawõ taoore. A na n yi n kẽnga koomã noore! Fo segd n yeel-a lame yaa: ‘Ad a Zeova sẽn yeele: “Bas mam nin-buiidã tɩ b looge, n tɩ waoog maam. 21 La fo sã n pa bas mam nin-buiidã tɩ b looge, mam na n tʋma kɛɛda* tɩ b wa foo ne f tʋm-tʋmdbã la f nin-buiidã zutu, la y zagsã pʋsẽ. Ezɩpt nebã zags na n pida ne kɛɛda wã. Tẽn-gãong ning zug bãmb* sẽn be wã na n pida ne kɛɛda wã. 22 Baraare, mam na n welga Gosɛn soolmã sẽn yaa zĩig ning mam nin-buiidã sẽn be wã. Keedr baa a ye pa na n zĩnd be ye.+ Woto, yãmb na n bãngame tɩ maam a Zeova bee soolmã pʋgẽ.+ 23 Mam na n kɩtame tɩ welgr zĩnd mam nin-buiidã ne fo nin-buiidã sʋka. Beoog la rẽ na n yɩ.”’”

24 A Zeova sɩd maana woto. Kɛɛda ka tɛk n wa n pid a Farawõ zakã, a tʋm-tʋmdbã zagse, la Ezɩpt soolmã fãa.+ Kɛɛda wã+ namsa Ezɩpt nebã wʋsgo. 25 A Farawõ wa n kong n boola a Moyiiz ne a Aarõ n yeele: “Kẽng-y n tɩ maan-y maoong n kõ y Wẽnnaamã, la segd n yɩɩ soolmã pʋgẽ.” 26 La a Moyiiz yeelame yaa: “Pa zems tɩ d maan woto ye. Bala bũmb ning tõnd sẽn na n kʋ n kõ d Wẽnnaam a Zeova wã na n yika Ezɩpt nebã sũuri.+ Tõnd sã n maan maoongo, n kʋ bũmb Ezɩpt nebã nifẽ tɩ b sũy yiki, b kõn lob tõnd kug sɩda? 27 Tõnd na n kẽna rasem a tãab kẽnd we-raoogẽ wã, n tɩ maan maoong be n kõ d Wẽnnaam a Zeova, wa a sẽn yeel tõndã.”+

28 T’a Farawõ yeel yaa: “Mam na n basa yãmb tɩ y kẽng n tɩ maan maoong n kõ y Wẽnnaam a Zeova we-raoogẽ wã. La yãmb pa segd n zãag wʋsg ye. Yõk-y y Wẽnnaamã sɛɛg mam yĩnga.”+ 29 Dẽ, a Moyiiz yeelame: “Masã, mam yita yãmb taoore, la m na n yõka a Zeova sɛɛga, tɩ kɛɛda wã loog n bas a Farawõ, a tʋm-tʋmdbã la a nin-buiidã beoogo. La bɩ a Farawõ ra belg tõnd yɛsa, bala yãmb tõe n yeelame tɩ y na n basa Israyɛll nebã tɩ b tɩ maan maoong n kõ a Zeova, la y zãgs tɩ y kõn bas-b tɩ b loog ye.”+ 30 Rẽ poore, a Moyiiz yii a Farawõ taoore, n tɩ yõk a Zeova sɛɛga.+ 31 A Zeova maana wa a Moyiiz sẽn kosã, tɩ kɛɛda wã loog n bas a Farawõ ne a tʋm-tʋmdbã la a nin-buiidã. Baa a ye pa kell ye. 32 La a Farawõ le riglma a sũurã, n pa bas nin-buiidã tɩ b loog ye.

9 Dẽ, a Zeova yeela a Moyiiz yaa: “Kẽng a Farawõ nengẽ n tɩ yeel-a: ‘Ad a Zeova sẽn yaa Ebre-rãmbã Wẽnnaamã sẽn yeele: “Bas mam nin-buiidã tɩ b looge, n tɩ waoog maam.+ 2 La fo sã n zãgs tɩ f pa na n bas-b tɩ b looge, n ket n gɩdgd-ba, 3 maam a Zeova na n kʋʋ fo rũmsã ne m pãngã.+ M na n kɩtame tɩ bã-loangdg sẽn yaa wẽng wʋsg+ kʋ wed-moosã, bõensã, yʋgma wã, rũm-bɛdã la rũm-bõonegã. 4 A Zeova na n kɩtame tɩ welgr zĩnd Israyɛll nebã rũmsã ne Ezɩpt nebã rũmsã sʋka, la Israyɛll nebã rũng baa a ye pa na n ki ye.”’”+ 5 Sẽn paase, a Zeova yãka sẽn na n yɩ wakat ningã, n yeel yaa: “Beoogo, a Zeova na n maana rẽ soolmã pʋgẽ.”

6 A Zeova sɩd maana rẽ vẽkembeoogã bala. Ezɩpt nebã rũmsã buud toor-toorã ra kiidame,+ la Israyɛll nebã rũng baa a ye pa ki ye. 7 A Farawõ sẽn sok n na n bãngã, a mikame tɩ Israyɛll nebã rũng baa a ye pa ki ye. La baa ne rẽ, a Farawõ sũurã kell n diglmame, t’a pa bas nin-buiidã tɩ b loog ye.+

8 Dẽ, a Zeova yeela a Moyiiz ne a Aarõ yaa: “Kãds-y bug-vũund wʋng pʋgẽ n pids y nusã. A Moyiiz segd n loba bug-vũundã yĩngr a Farawõ taoore. 9 Bug-vũundã na n lebga wubsg sẽn yaa bãaneg Ezɩpt soolmã fãa pʋgẽ, la a na n lebga nod-tãoods ninsaalbã la rũmsã zut Ezɩpt soolmã fãa pʋgẽ.”

10 Dẽ, b kãdsa bug-vũund wʋng pʋgẽ, n tɩ yals a Farawõ taoore, t’a Moyiiz lob bug-vũundã yĩngri. A lebga nod-tãoods n pukd ninsaalbã la rũmsã zutu. 11 Maan-kʋʋdb nins sẽn maand tɩtã pa tõog n yals a Moyiiz taoore, nod-tãoodsã yĩnga. Bala nod-tãoodsã ra puka maan-kʋʋdb nins sẽn maand tɩtã ne Ezɩpt nebã fãa zutu.+ 12 La a Zeova basame t’a Farawõ sũurã riglmi, t’a pa kelg-b wa a Zeova sẽn da yeel a Moyiizã.+

13 Dẽ, a Zeova yeela a Moyiiz yaa: “Yik yibeoog pĩnd n tɩ yals a Farawõ taoor n yeel-a: ‘Ad a Zeova sẽn yaa Ebre-rãmbã Wẽnnaamã sẽn yeele: “Bas mam nin-buiidã tɩ b looge, n tɩ waoog maam. 14 Bala masã, mam na n kɩtame tɩ toodã fãa wa fo* zugu, fo tʋm-tʋmdbã la fo nin-buiidã zugu, sẽn na yɩl tɩ fo bãng tɩ mam pa tar to tẽngã gill zug ye.+ 15 Bala mam da tõe n tẽega m nug n sɩbg foo ne f nin-buiidã ne bã-loangdg sẽn yaa wẽng wʋsgo, la yãmb ra na n menema zãng tẽngã zugu. 16 La ad bũmb ning yĩng mam sẽn bas tɩ fo ket n vɩ wã: Yaa sẽn na n wilg foo m pãngã, la sẽn na yɩl tɩ b moon mam yʋʋrã dũniyã gill zugu.+ 17 La fo ket n wukda f meng ne mam nin-buiidã, n pa rat n bas-b tɩ b loog ye. 18 Ade! M na n kɩtame tɩ sapɩlem sẽn yaa bɛd wʋsg ni beoog woto wẽnde. Ezɩpt yẽbgrã tɛk n tãag masã, a buud zɩ n zĩnd ye. 19 Woto wã, tʋm koɛɛg tɩ b kẽes fo rũmsã fãa la bũmb nins fãa sẽn yaa fo rẽnd n be weoogẽ wã rot pʋsẽ. Sapɩlmã sã n wa na n ni, ninsaal la rũng ning fãa sẽn na n ket weoogẽ n pa kẽ roogẽ na n kiime.”’”

20 A Farawõ tʋm-tʋmdbã sʋka, kẽer zoee a Zeova n yɩ tao-tao n kɩt tɩ b tʋm-tʋmdbã la b rũmsã kẽ rotẽ. 21 La neb nins sẽn pa tẽ a Zeova gomdã basa b tʋm-tʋmdbã ne b rũmsã weoogẽ wã.

22 A Zeova yeela a Moyiiz yaa: “Zẽk f nug n tees yĩngri, tɩ sapɩlem ni Ezɩpt soolmã fãa pʋgẽ,+ rat n yeel tɩ ninsaalbã, rũmsã, moodã la tɩɩsã fãa sẽn be weoogẽ wã zutu.”+ 23 Dẽ, a Moyiiz zẽka a rasaarã n tees yĩngri, la a Zeova kɩtame tɩ sa-tãs la sapɩlem zĩndi, la bugum* n yi yĩngr n lʋɩ tẽngã zugu. A Zeova kell n kɩtame tɩ sapɩlem ni Ezɩpt soolmã pʋgẽ. 24 Sapɩlmã ra rʋʋgdame, la bugum n da yãgd sapɩlmã sʋka. Sapɩlmã ra yaa bɛd wʋsgo. Ezɩpt yẽbgrã tɛka, sapɩlem a woto zɩ n zĩnd soolmã pʋgẽ ye.+ 25 Sapɩlmã pãba bũmb nins fãa sẽn da be weoogẽ wã Ezɩpt soolmã fãa pʋgẽ, sẽn sɩng ne ninsaalbã n tɩ ta rũmsã, la a pãb moodã fãa, la a kao tɩɩsã fãa sẽn be weoogẽ wã.+ 26 Yaa Gosɛn soolmẽ wã bala, zĩig ning Israyɛll nebã sẽn da be wã la sapɩlmã pa ni.+

27 Dẽ, a Farawõ tʋmame tɩ b bool a Moyiiz ne a Aarõ t’a yeel-b yaa: “So-kãnga wã, mam beegame. A Zeova yaa tɩrga, la maam ne m nin-buiidã tudgame. 28 Yõk-y-yã a Zeova sɛɛg tɩ Wẽnnaam sa-tãsã ne a sapɩlmã sa. Dẽ, mam na n sak n basa yãmb tɩ y looge. Yãmb pa na n le kaoos ka ye.” 29 A Moyiiz yeel-a lame yaa: “Mam sã n yi tẽngã bala, mam na n pʋʋsa a Zeova.* Sa-tãsã na n saame, la sapɩlmã pa na n le ni, sẽn na yɩl tɩ y bãng tɩ dũniyã yaa a Zeova n so.+ 30 La sã n yaa yãmb ne y tʋm-tʋmdbã, mam zoe n miime tɩ baa ne rẽ, yãmb pa na n zoe Wẽnnaam a Zeova ye.”

31 La lẽ* wã ne orzã* sãamame, bala orzã ra zoe n womame, tɩ lẽ wã ra ning puudu. 32 La bɩle wã buud toor-toorã pa sãam ye. Bala b pa womd pĩnd ye. 33 A Moyiiz yii tẽngã n loog n bas a Farawõ, n pʋʋs a Zeova tɩ sa-tãsã ne sapɩlmã sa, tɩ saagã me bas niibu.+ 34 A Farawõ sẽn wa n yã tɩ saagã, sapɩlmã ne sa-tãsã saame wã, a le beegame n diglim a sũurã,+ yẽ ne a tʋm-tʋmdbã. 35 A Farawõ sũurã kell n diglmame, t’a pa bas Israyɛll nebã tɩ b looge, wa a Zeova sẽn da tũnug ne a Moyiiz n togsã.+

10 Dẽ, a Zeova yeela a Moyiiz yaa: “Kẽng a Farawõ nengẽ, bala mam basame tɩ yẽ ne a tʋm-tʋmdbã sũy riglmi,+ sẽn na yɩl tɩ m tõog n maan m bãnã yẽ taoore,+ 2 la sẽn na yɩl tɩ yãmb tõog n togs y kambã la y yagensã mam sẽn sɩbg Ezɩpt nebã ne toolem to-to, la bãn nins mam sẽn maan bãmb sʋkã.+ La sãmbg sẽn kae, yãmb na n bãngame tɩ mam yaa a Zeova.”

3 A Moyiiz ne a Aarõ kẽe a Farawõ nengẽ, n yeel-a yaa: “Ad a Zeova sẽn yaa Ebre-rãmbã Wẽnnaamã sẽn yeele: ‘Fo na n zãgsame tɩ f kõn sak maam n ta dabʋre?+ Bas mam nin-buiidã tɩ b looge, n tɩ waoog maam. 4 Bala fo sã n kell n zãgs tɩ f kõn bas mam nin-buiidã tɩ b looge, m na n kɩtame tɩ sʋy wa fo soolmã pʋgẽ beoogo. 5 Sʋyã na n luda tẽn-gãongã, tɩ ned pa tõe n le yã tẽn-gãongã ye. B na n wãba bũmb nins sapɩlmã sẽn pa sãamã, rat n yeel tɩ bũmb nins sẽn kell yãmb yĩngã, la b wãb yãmb tɩɩsã fãa sẽn be weoogẽ wã.+ 6 B na n pida yãmb rotã, y tʋm-tʋmdbã rotã, la Ezɩpt rotã fãa. Na n yɩɩ bũmb ned sẽn zɩ n yã, hal yãmb ba-rãmbã la y yaab-rãmbã sẽn zĩnd tẽn-kãngã pʋgẽ n tãag rũndã wã.’+ Rẽ poore, a wẽnemdame n yi a Farawõ nengẽ.

7 A Farawõ tʋm-tʋmdbã sok-a lame yaa: “Nin-kãngã na n yɩɩ bẽdg tõnd yĩng n ta dabʋre? Bas-y-b tɩ b looge, n tɩ waoog b Wẽnnaam a Zeova. Yãmb ket n pa mi tɩ Ezɩpt sãamame la?” 8 Dẽ, b kɩtame t’a Moyiiz ne a Aarõ lebg n wa a Farawõ nengẽ, t’a yeel-b yaa: “Kẽng-y n tɩ waoog-y y Wẽnnaam a Zeova. Pʋd n yaa ãnda rãmb la sẽn na n kẽngã?” 9 T’a Moyiiz leok yaa: “Tõnd na n kẽnga ne d kom-bɩɩsã, d kom-kãsemsã, d kom-dibli wã, d kom-pugli wã, d piisã la d niisã,+ bala d na n tɩ maana tigr a Zeova yĩnga.”+ 10 T’a Farawõ yeel-b yaa: “Mam sã n bas yãmb ne y kambã tɩ y looge, dẽnd a Zeova sɩd bee ne yãmba!+ Yaa vẽeneg tɩ yãmb magd n na n maana bũmb sẽn yaa wẽnga. 11 Yaa yãmb rapã bal n tõe n kẽng n tɩ waoog a Zeova, bala yaa rẽ la y kos-yã.” Rẽ poore, b rig-b lame tɩ b yi a Farawõ taoore.

12 A Zeova yeela a Moyiiz yaa: “Tẽeg f nug Ezɩpt soolmã zug sẽn na yɩl tɩ sʋy wa pid Ezɩpt soolmã, n wãb tẽngã moodã la tɩɩsã fãa, rat n yeel tɩ bũmb nins fãa sapɩlmã sẽn sãam n kellã.” 13 Zĩig pʋgẽ, a Moyiiz zẽka a rasaarã Ezɩpt soolmã zugu, t’a Zeova kɩt tɩ yaang sobg fug soolmã fãa zug daar-n-kãnga, wĩndgã la yʋngã tõre. Beoogã sẽn vẽege, yaang sobgã waa ne sʋya. 14 Sʋyã waa Ezɩpt soolmã fãa zugu,+ n sig n pid tẽngã gilli. B ra yaa wʋsgo.+ B zɩ n yã sʋy wʋsg woto ye. La b pa na n le yã a buud me ye. 15 B luda tẽn-gãongã tõre, t’a lebg sablga. B wãba tẽngã moodã la tɩɩsã biis fãa sapɩlmã sẽn sãam n kellã. Vã-maasr baa a ye pa pa tɩɩsã la moodã sẽn be weoogẽ wã zut Ezɩpt soolmã fãa pʋgẽ ye.

16 A Farawõ yɩɩ tao-tao n bool a Moyiiz ne a Aarõ n yeel yaa: “Mam beega a Zeova sẽn yaa yãmb Wẽnnaamã, la m beeg yãmb me. 17 Masã, m bõos tɩ y kõ-m sugr so-kãngã bala, la y yõk y Wẽnnaam a Zeova sɛɛg t’a kɩt tɩ to-kãngã loog n bas maam.” 18 Dẽ, a* yii a Farawõ nengẽ n yõk a Zeova sɛɛga.+ 19 La a Zeova kɩtame tɩ sobgã wẽnemde, n lebg nin-taoor sobg sẽn fugd ne pãnga. Sobgã kãaga sʋyã n tɩ kiig Mog-miuugẽ wã. Sʋʋr baa a ye pa kell Ezɩpt tẽngã pʋgẽ ye. 20 La a Zeova basame t’a Farawõ sũurã riglmi,+ t’a Farawõ pa bas Israyɛll nebã tɩ b loog ye.

21 A Zeova yeela a Moyiiz yaa: “Tẽeg f nug n tees yĩngri, sẽn na yɩl tɩ lik zĩnd Ezɩpt soolmã pʋgẽ. Na n yɩɩ lik sẽn yaa bida.” 22 Tao-tao bala, a Moyiiz tẽega a nug n tees yĩngri, tɩ lik bida zĩnd Ezɩpt soolmã fãa pʋgẽ rasem a tãabo.+ 23 B ra pa ne taaba, la rasem a tãab tõre, b ned baa a ye pa yi a sẽn beẽ ye. La Israyɛll nebã ra tara vẽenem b sẽn da be zĩig ningã.+ 24 A Farawõ boola a Moyiiz n yeel yaa: “Kẽng-y n tɩ waoog-y-yã a Zeova.+ Yaa yãmb piisã ne y niisã bal n na n pa ka. Baa yãmb kambã tõe n tũu yãmba.” 25 La a Moyiiz yeelame: “Yãmb mengã na n kõo tõnd rũms me d sẽn na n kʋ n maan maoong n kõ a Zeova sẽn yaa tõnd Wẽnnaamã.+ 26 D rũmsã me na n tũu tõndo. D pa na n bas rũng* baa a yembr ye. Bala tõnd na n tɩ yãka kẽer n maan maoong n kõ tõnd Wẽnnaam a Zeova. La sã n pa tõnd taa be, d pa mi bũmb ning tõnd sẽn na n kõ a Zeova tɩ yɩ maoongã ye.” 27 A Zeova basame t’a Farawõ sũurã riglmi, t’a Farawõ pa sak n bas Israyɛll nebã tɩ b loog ye.+ 28 A Farawõ yeel-a lame yaa: “Menem ka! Ra le bao n wa mam taoor yɛs ye. Bala daar ning fo sẽn na n wa mam taoorã, fo na n kiime.” 29 La a Moyiiz leokame yaa: “Yell kae ye. M pa na n le bao n wa yãmb taoor ye.”

11 Dẽ, a Zeova yeela a Moyiiz yaa: “Mam na n kɩtame tɩ toog a to wa a Farawõ ne Ezɩpt nebã zutu. Rẽ poore, a na n basa yãmb tɩ y yi ka n looge.+ A sã n wa na n bas yãmb tɩ y looge, a na n diga yãmb fãa gilli.+ 2 La bɩ f yeel nin-buiidã tɩ rapã la pagbã fãa segd n kosa b yagsã wanzuri la sãnem teedo.”+ 3 A Zeova kɩtame tɩ Israyɛll nebã paam lohorem Ezɩpt nebã nifẽ. Sẽn paase, a Moyiiz lebga ned b sẽn nand wʋsg Ezɩpt soolmã pʋgẽ, rat n yeel tɩ ned a Farawõ tʋm-tʋmdbã ne Ezɩpt nebã sẽn nande.

4 A Moyiiz yeelame yaa: “Ad a Zeova sẽn yeele: ‘Yʋn-sʋk sẽnese, mam na n pɩʋʋga Ezɩpt soolmã,+ 5 la Ezɩpt kom-dẽemsã fãa na n kiime,+ sẽn sɩng ne a Farawõ sẽn zao a geerẽ wã bi-kãsengã, n tãag yem-poak ning sẽn werd neerẽ wã bi-kãsengã, la rũng fãa pipi biiga.+ 6 Ezɩpt soolmã fãa pʋgẽ, kelems sẽn yaa kãsems n na n zĩndi. A buud zɩ n zĩndi, la a buud kõn tol n le zĩnd me ye.+ 7 La baag meng pa na n wes* Israyɛll nebã wall b rũmsã ye. Woto, yãmb na n bãngame t’a Zeova tõe n kɩtame tɩ welgr zĩnd Ezɩpt nebã ne Israyɛll nebã sʋka.’+ 8 Hakɩɩka, yãmb tʋm-tʋmdbã fãa na n waa mam nengẽ, n wõgemd mam taoore, n yeele: ‘Looge, foo ne nin-buiidã sẽn pʋgd foomã fãa.’+ Rẽ poore, mam na n loogame.” La a Moyiiz yii a Farawõ nengẽ n loog ne sũ-puug-kãsenga.

9 Dẽ, a Zeova yeela a Moyiiz yaa: “A Farawõ pa na n kelg foo ye.+ Yaa sẽn na yɩl tɩ mam maan yel-soalem wʋsg Ezɩpt soolmã pʋgẽ.”+ 10 A Moyiiz ne a Aarõ maana yel-solem-kãensã fãa a Farawõ taoore,+ la a Zeova basame t’a Farawõ sũurã riglmi, t’a pa bas Israyɛll nebã tɩ b yi a soolmẽ wã ye.+

12 A Zeova yeela a Moyiiz ne a Aarõ Ezɩpt soolmẽ wã yaa: 2 “Ki-kãngã na n yɩɩ sɩngr kiuug yãmb yĩnga. Yʋʋmdã pʋgẽ, ki-kãngã n na n yɩ yãmb pipi kiuugu.+ 3 Gom-y ne Israyɛll nebã fãa n yeel-b yaa: ‘Ki-kãngã rasem piig soabã daare, ned kam fãa segd n yõka pesg+ a zak* rãmb yĩnga. Zak fãa ne a pesgo. 4 La zak sã n paoodẽ t’a nebã pa tõe n wãb pesg a yembr n sa, bãmb* ne b yak ning sẽn pẽ n yɩɩdã segd n naaga taab n wãb nemdã b roogẽ wã, tɩ zems ne nebã* sõorã. Yãmb sã n wa geendẽ, y segd n bao n bãnga sẽn zems ned kam fãa sẽn tõe n wãbe. 5 Yãmb pesgã segd n yɩɩ pe-raoog sẽn tar yʋʋmde, la sẽn pa tar zanga.+ Y tõe n yãka pe-ra-poalã sʋka, wall bʋʋsã sʋka. 6 Yãmb segd n gesa a yell n tãag ki-kãngã rasem piig la a naas-n-soabã daare.+ Israyɛll nebã fãa segd n kooda b rũmsã zĩ-sobd wakate.+ 7 B segd n yãka a zɩɩmã n mes rot nins pʋsẽ b sẽn na n wãb-a wã kʋɩlensã lug a yiibã, la b rignoyã zugẽ.+

8 “‘B segd n wãba nemdã yʋn-kãnga.+ B segd n sẽ-a-la ne bugum la b wãb-a ne bur sẽn pa ning rabɩlle,+ la ne zẽ-vãad sẽn yaa toogo.+ 9 Bɩ y ra wãb a bũmb baa a ye kãado, wall sẽn dʋg ne koom ye. Sẽ-y-yã-a ne bugum, rat n yeel t’a zugã, a karsã ne a pʋ-teedã fãa. 10 Yãmb pa segd n bas a bũmb baa a ye tɩ vẽeg beoog ye. La a bũmb sã n kell tɩ beoogã vẽege, y segd n yõog-a-la bugum.+ 11 Ad y sẽn segd n wãb-a to-to: Y segd n sẽba y sẽbdse, n wid y neooda, n zãad y rasab y nusẽ, la y wãb-a ne yãgbo. Yaa a Zeova Pakã.* 12 Bala mam na n pɩʋʋga Ezɩpt soolmã yʋn-kãnga, n kʋ* kom-dẽemsã fãa Ezɩpt soolmã pʋgẽ, sẽn sɩng ne ninsaal n tɩ tãag rũnga.+ Mam na n sɩbga Ezɩpt wẽnnaam-dãmbã fãa.+ Mam yaa a Zeova. 13 Zɩɩmã na n yɩɩ bãnd rot nins pʋsẽ y sẽn be wã zutu. Mam na n yãa zɩɩmã n zʋʋg yãmb n looge. Wakat ning mam sẽn na n sɩbg Ezɩpt tẽngã, toogã pa na n wa yãmb zut n sãam-y ye.+

14 “‘Yãmb segd n tẽegda ra-kãnga, n maand tigr a Zeova yĩnga, y zãmaan-dãmbã fãa pʋsẽ. Yaa noor y sẽn segd n tũ wakat fãa. 15 Rasem a yopoe pʋgẽ, yãmb segd n wãba bur sẽn pa ning rabɩlle.+ Pipi daarã, yãmb segd n yiisa rabɩllã* y rotã pʋsẽ. Bala pipi daarã n tãag rasem a yopoe-n-soabã daare, ned ning fãa sẽn na n dɩ bũmb sẽn ning rabɩlle, b segd n yiisa* nin-kãng* Israyɛll nebã sʋka. 16 Pipi daarã, yãmb segd n maana tigsg sẽn yaa sõngo, la y maan tigsg a to sẽn yaa sõng rasem a yopoe-n-soabã daar me. Ra-kãense, ned pa segd n tʋm ye.+ Yaa bũmb ning ned kam fãa* sẽn segd n dɩ wã bal la y tõe n segle.

17 “‘Yãmb segd n maanda Bur sẽn pa ning rabɩllã tigri.+ Bala yaa daar-n-kãng la mam na n yiis yãmb nebã sẽn yaa kʋʋngã Ezɩpt soolmã pʋgẽ. La yãmb segd n tẽegda ra-kãng yell y zãmaan-dãmbã fãa pʋsẽ. Yaa noor y sẽn segd n tũ wakat fãa. 18 Pipi kiuugã rasem piig la a naas-n-soabã daar zaabre, n tãag kiuugã rasem pisi la a ye soabã daar zaabre, yãmb segd n wãba bur sẽn pa ning rabɩlle.+ 19 Rasem a yopoe wã pʋgẽ, rabɩll* pa tog n zĩnd yãmb rotã pʋsẽ ye. Bala ned sã n dɩ bũmb sẽn ning rabɩlle, yaa sãan tɩ yaa tẽng-n-ned me,+ b segd n yiisa* nin-kãng* Israyɛll nin-buiidã sʋka.+ 20 Yãmb pa segd n dɩ baa fʋɩ sẽn ning rabɩll ye. Y zagsã fãa pʋsẽ, y segd n wãbda bur sẽn pa ning rabɩlle.’”

21 A Moyiiz yɩɩ tao-tao n bool Israyɛll kãsem-dãmbã fãa+ n yeel-b yaa: “Kẽng-y n tɩ yãk-y rũm-poal* y zak fãa yĩnga, n kodg tɩ yɩ Pakã maoongo. 22 Rẽ poore, y segd n dɩka izop* vãad n suk zɩɩmã y sẽn kok laag pʋgẽ wã, n mes rignoorã zugẽ, la a kʋɩlengã lug a yiibã zutu. La hal n tãag yibeoogo, yãmb ned baa a ye pa segd n yi a roogã pʋgẽ ye. 23 Dẽ, a Zeova sã n wa pɩʋʋg n na n sɩbg Ezɩpt nebã, n yã zɩɩmã rignoorã zugẽ la a kʋɩlengã lug a yiibã zutu, a Zeova na n zʋʋga rignoorã n looge, n pa bas tɩ toogã sẽn yaa kũumã kẽ yãmb dotã pʋsẽ ye.+

24 “Yãmb segd n maanda tigr n tẽegd bõn-kãngã. Yaa noor yãmb ne y kambã sẽn segd n tũ wakat fãa.+ 25 Yãmb sã n wa kẽ soolem ning a Zeova sẽn na n kõ yãmb wa a sẽn yeelã pʋgẽ, yãmb segd n maanda tig-kãngã.+ 26 Yãmb kambã sã n wa sok yãmb tɩ ‘tig-kãngã y sẽn maandã võor yaa bõe?’+ 27 Y segd n leokame yaa: ‘Yaa Pakã maoong d sẽn kʋʋd n kõt a Zeova, a sẽn zʋʋg Israyɛll nebã rotã Ezɩpt soolmẽ wã n loogã yĩnga, wakat ning a sẽn sɩbg Ezɩpt nebã, n yaool n bas neb nins sẽn da be tõnd rotẽ wã.’”

Dẽ, nin-buiidã sulgame n wõgemde. 28 Israyɛll nebã kẽngame n tɩ maan wa a Zeova sẽn yeel a Moyiiz ne a Aarõ wã.+ B maana woto kɛpɩ.

29 Yʋn-sʋkã, a Zeova kʋʋ kom-dẽemsã fãa sẽn be Ezɩpt soolmẽ wã,+ sẽn sɩng ne a Farawõ sẽn zao a geerẽ wã bi-kãsengã, n tãag ned ning b sẽn yõk n sui bãens roogẽ wã* bi-kãsengã, la rũmsã fãa kom-dẽemsã.+ 30 A Farawõ yika yʋn-kãnga, yẽ ne a tʋm-tʋmdbã fãa la Ezɩpt neb a taabã fãa, la kelems sẽn yaa kãsems n da be Ezɩpt nebã sʋka, bala zak pa zĩnd tɩ ned pa ki a pʋgẽ ye.+ 31 Zĩig pʋgẽ, a Farawõ boola a Moyiiz ne a Aarõ+ ne yʋngã n yeele: “Yik-y n yi-y mam nin-buiidã sʋka, yãmb ne Israyɛll neb a taabã. Kẽng-y n tɩ waoog-y-yã a Zeova wa yãmb sẽn yeelã.+ 32 Tall-y y rũm-bõonegã ne y rũm-bɛdã me n loog wa yãmb sẽn yeelã.+ Yãmb segdame me n kos Wẽnnaam t’a ning-m barka.”

33 Ezɩpt nebã ra pẽdgda nin-buiidã tɩ b yi soolmã tao-tao,+ n da yetẽ: “Yãmb sã n pa looge, tõnd fãa na n kiime!”+ 34 Dẽ, nin-buiidã rɩka b zom-nagdgã sẽn pa ning rabɩllã ne b teed nins sẽn tar n nagd zomã n vil ne b futu, n palg b bãgdo. 35 Israyɛll nebã maana wa a Moyiiz sẽn da togs-bã. B kosa Ezɩpt nebã wanzuri la sãnem teedo, n paas futu.+ 36 A Zeova kɩtame tɩ nin-buiidã paam lohorem Ezɩpt nebã taoore, tɩ b kõ-b bũmb nins b sẽn kosã. Woto, b fãa Ezɩpt nebã.+

37 Israyɛll nebã yii Ramsɛs+ n dɩk Sukot+ sore. Ra yaa na maan rap* tus-kobs-yoobe, kambã sẽn pa naage.+ 38 Sẽn paase, neb kʋʋng sẽn yaa buud toor-toor neb+ n tũ-ba, ne rũm-bõoneg la rũm-bɛda, rat n yeel tɩ rũms wʋsgo. 39 B rɩka zom-nagdgã b sẽn zã n yi Ezɩptã n wẽ bur-gils sẽn pa ning rabɩlle. Zom-nagdgã ra pa ning rabɩlle, bala b tiig n dig-b-la Ezɩpti, tɩ b pa paam n segl dɩɩb n zã ye.+

40 Israyɛll nebã sẽn zĩnd Ezɩptã+ kaoosa yʋʋm kobs-naas la pis-tã.+ 41 Yʋʋm kobs-naas la pis-tã wã baasg daare, a Zeova nin-buiidã sẽn yaa kʋʋngã yii Ezɩpt soolmẽ wã daar-n-kãng bala. 42 Yaa yʋng b sẽn na n maand tigr n tẽegd a Zeova sẽn yiis-b Ezɩpt soolmẽ wã. Israyɛll nebã fãa segd n maanda tigr a Zeova yĩng yʋn-kãnga, b zãmaan-dãmbã fãa pʋsẽ.+

43 Dẽ, a Zeova yeela a Moyiiz ne a Aarõ yaa: “Ad noy nins y sẽn segd n tũ Pakã wɛɛngẽ: Sãan pa segd n wãb Pakã nemd ye.+ 44 Ned sã n tar yamb a sẽn da ne ligdi, a segd n kẽes-a-la bãongo.+ Yaa rẽ poor bal la a tõe n naag n wãb Pakã nemdo. 45 Ned sẽn wa n nok yãmb tẽngã, la ned b sẽn dɩk tʋʋmd pa segd n wãb Pakã nemd ye. 46 Yãmb segd n wãba Pakã nemd ro-yɛng pʋgẽ. Y pa segd n yãk a nemdã baa bilf n yi yɩng ye. Y pa segd me n kaoog a kõbr baa a yembr ye.+ 47 Yaa Israyɛll nin-buiidã fãa n segd n maan Pakã. 48 Sãan sẽn be yãmb sʋkã sã n dat n maan Pakã a Zeova yĩnga, rap nins fãa sẽn be a zakẽ wã segd n kẽe bãongo. Rẽ poore, a na n lebga wa tẽng-n-neda, n tõe n maan Pakã. Rao sẽn pa kẽ bãong pa segd n wãb Pakã nemd ye.+ 49 Tẽng-n-nebã ne sãambã sẽn be yãmb sʋkã segd n tũu no-yɛnga.”+

50 Dẽ, Israyɛll nebã fãa maana wa a Zeova sẽn yeel a Moyiiz ne a Aarõ wã. B maana woto kɛpɩ. 51 Daar-n-kãng bala, a Zeova yiisa Israyɛll nebã fãa* Ezɩpt soolmẽ wã.

13 A Zeova le goma ne a Moyiiz n yeele: 2 “Welg kom-dẽemsã fãa sẽn be Israyɛll nebã sʋkã n kõ maam. Bi-rẽeng ning fãa sẽn yaa raoogo, tɩ yaa ninsaal biig wall rũng biiga, yaa maam n so.”+

3 Dẽ, a Moyiiz yeela nin-buiidã yaa: “Tẽegd-y daar-n-kãngã sẽn yaa daar ning y sẽn yi Ezɩptã yelle.+ Yaa tẽng ning pʋgẽ y sẽn da yaa yembsã. Bala yaa ne nug sẽn tar pãng la a Zeova yiis yãmb be.+ Woto wã, yãmb pa segd n dɩ bũmb sẽn ning rabɩll ye. 4 Yãmb loogda rũndã, Abiib*+ kiuugã pʋgẽ. 5 A Zeova sã n wa tall yãmb n tɩ kẽes Kanaã nebã soolmẽ wã, la Hɛt nebã, Amoor nebã, Hevi nebã la Zebuus nebã+ soolmẽ wã yẽ sẽn da wẽen yãmb yaab-rãmbã t’a na n kõo yãmbã,+ sẽn yaa tẽng sẽn pid ne bĩisim la sɩɩdã,+ yãmb segd n maanda tigrã ki-kãnga. 6 Rasem a yopoe pʋgẽ, yãmb segd n wãba bur sẽn pa ning rabɩlle,+ la rasem a yopoe-n-soabã na n yɩɩ tigr a Zeova yĩnga. 7 Bur sẽn pa ning rabɩll la yãmb segd n wãb rasem a yopoe wã,+ la b pa segd n yã bũmb sẽn ning rabɩll yãmb nengẽ ye.+ B pa segd n yã rabɩll* yãmb nengẽ y soolmã* tõr pʋgẽ ye. 8 La daar-n-kãnga, yãmb segd n yeela y kambã yaa: ‘Yaa bũmb ning a Zeova sẽn maan tõnd yĩnga, wakat ning d sẽn yi Ezɩptã yĩnga.’+ 9 Tigrã na n tẽegda yãmb bõn-kãnga, tɩ yaa wa b gʋls-a-la yãmb nusẽ wã, la y rĩyẽ wã.*+ Woto, yãmb na n gomda a Zeova noyã yelle, bala yaa ne nug sẽn tar pãng la a Zeova yiis yãmb Ezɩpti. 10 Yãmb segd n tũu no-kãngã a wakate, yʋʋmd-yʋʋmde.+

11 “A Zeova sã n wa tall yãmb n tɩ kẽes Kanaã nebã soolmẽ a sẽn da wẽen t’a na n kõo yãmb ne y yaab-rãmbã,+ 12 yãmb segd n dɩka kom-dẽems nins sẽn yaa rapã fãa, ne rũms nins y sẽn paamdã pipi kambã sẽn yaa raadã fãa n kõ a Zeova. Sẽn yaa-a raoog fãa yaa a Zeova n so.+ 13 Yãmb segd n teka bõang fãa pipi biig ne pesgo, la y sã n pa tek-a, y segd n wẽe a yublã n kaoog t’a ki. La y segd n teka y kom-dẽems nins fãa sẽn yaa rapã.+

14 “Yãmb kambã sã n wa sok yãmb tɩ ‘bõn-kãngã võor yaa bõe?’ Yãmb segd n yeel-b lame: ‘Yaa ne nug sẽn tar pãng la a Zeova yiis tõnd Ezɩpti, tẽng ning pʋgẽ d sẽn da yaa yembsã.+ 15 A Farawõ sẽn wa n tõdg fasɩ t’a kõn bas tõnd tɩ d loogã,+ a Zeova kʋʋ kom-dẽemsã fãa Ezɩpt soolmẽ wã, sẽn sɩng ne ninsaalbã kom-dẽemsã n tɩ tãag rũmsã pipi kambã.+ Yaa rẽ yĩng la tõnd sẽn kʋʋd rũmsã fãa pipi kambã n maand maoong n kõt a Zeova wã, la d tekd d kom-dẽems nins fãa sẽn yaa rapã.’ 16 Bõn-kãngã segd n yɩɩ bãnd yãmb nusẽ, la y rĩyẽ wã,*+ bala yaa ne nug sẽn tar pãng la a Zeova yiis tõnd Ezɩpti.”

17 A Farawõ sẽn wa n bas nin-buiidã tɩ b na n loogã, Wẽnnaam pa kɩt tɩ b tũ sor ning sẽn pasgd Filisti nebã soolmã, baa ne so-kãng sẽn da yaa koɛɛgã ye. Bala Wẽnnaam yeelame yaa: “Nin-buiidã sã n yã tɩ b segd n zabame, b tõe n teka yam n lebg n leb Ezɩpti.” 18 Rẽ n so tɩ Wẽnnaam kɩt tɩ nin-buiidã gil n tũ sor ning sẽn pasgd we-raoog ning sẽn be Mog-miuugã+ noorã. La Israyɛll nebã yii Ezɩpt soolmẽ wã ball-balle, wa tãb-biis sula. 19 Sẽn paase, a Moyiiz zãa a Zozɛf kõabã, bala a Zozɛf ra kɩtame t’a Israyɛll kom-dibli wã wẽene, n yeele: “Sãmbg sẽn kae, Wẽnnaam na n sõnga yãmba, la yãmb segd n zãa mam kõabã n yi ka.”+ 20 B yii Sukot n tɩ tilg b sik-zĩigã Etam sẽn be we-raoogã noorã.

21 A Zeova ra bee b taoor n yãagd-b sawadg pʋgẽ wĩndga, sẽn na yɩl n wilg-b sorã,+ la a yãagd-b bugum pʋgẽ yʋngo, sẽn na yɩl n vẽneg-b tɩ b tõog n kẽn wĩndg la yʋngo.+ 22 Sawadgã ra pa zãagd ne nin-buiidã wĩndga, tɩ bugmã me ra pa zãagd ne-b yʋng ye.+

14 A Zeova yeela a Moyiiz yaa: 2 “Togs Israyɛll nebã tɩ b segd n leba poorẽ, n tilg b sik-zĩigã Pihahirot taoore, Migdoll ne mogrã sʋka, n tees Baal-zefõ.+ Yãmb segd n tii y sik-zĩigã mogrã noor n tees Baal-zefõ. 3 Dẽ, a Farawõ na n yeela Israyɛll nebã wɛɛngẽ yaa: ‘B yeebda soolmẽ wã, n pa mi b sẽn dabdẽ ye. B pa tar sor we-raoogẽ wã n na n tũ n loog ye.’ 4 M na n basame t’a Farawõ sũurã riglim+ t’a pʋgl-yã, la mam na n tũnuga ne a Farawõ la a tãb-biisã fãa n waoog m yʋʋrã.+ Sãmbg sẽn kae, Ezɩpt nebã na n bãngame tɩ mam yaa a Zeova.”+ Dẽ, Israyɛll nebã maana woto.

5 B wa n togsa Ezɩpt rĩmã tɩ nin-buiidã zoeeme. Zĩig pʋgẽ, a Farawõ ne a tʋm-tʋmdbã toeema yam nin-buiidã wɛɛngẽ,+ n sok yaa: “Bõe yĩng tɩ tõnd maan bõn-kãngã, n bas Israyɛll nebã tɩ b pa na n le yɩ tõnd yembse?” 6 Dẽ, a segla a zabr saar-dãmba,* la a peeg a tãb-biisã.+ 7 A rɩka saar-dãmb kobs-yoob sẽn yaa sõma wʋsgo, ne Ezɩpt saar-dãmb a taabã fãa, n kɩt tɩ tãb-biis zomb saar-dãmbã fãa. 8 Woto, a Zeova basame t’a Farawõ sẽn yaa Ezɩpt rĩmã sũur diglmi, t’a pʋgl Israyɛll nebã. La Israyɛll nebã ra loogda ne bas-m-yam.*+ 9 Ezɩpt nebã pʋgl-b lame.+ A Farawõ saar-dãmbã, a wed-moosã, a wed-rʋʋdbã, la a tãb-biisã fãa tɩ paam-b lame. Rẽ tɩ b tilga b sik-zĩigã mogrã noor Pihahirot sɛɛga, n tees Baal-zefõ.

10 A Farawõ sẽn wa n kolgdẽ wã, Israyɛll nebã zẽka b nens n yã Ezɩpt nebã sẽn watã. Israyɛll nebã yɛɛsame n zẽk b koees n bool a Zeova.+ 11 B soka a Moyiiz yaa: “Yaa yaad zĩis sẽn ka be Ezɩpt yĩng la fo tall tõnd n wa ka, sẽn na yɩl tɩ d ki we-raoogẽ wã bɩ?+ Bõe tɩ fo maan tõnd woto? Bõe yĩng tɩ fo yiis tõnd Ezɩpti? 12 Pa woto bal la tõnd sẽn da yeel foo Ezɩpt tɩ f ‘bas-d sɩɩ tɩ d tʋm n kõ Ezɩpt nebã’ sɩda? Bala tõnd sẽn tʋmd n kõt Ezɩpt nebã n são tõnd sẽn kiid we-raoogẽ wã.”+ 13 Dẽ, a Moyiiz yeela nin-buiidã yaa: “Ra zoe-y rabeem ye.+ Yals-y sɩɩ n ges a Zeova sẽn na n fãag yãmb to-to rũndã.+ Bala Ezɩpt nebã yãmb sẽn ne rũndã wã, yãmb pa na n tol n le yã-b a bada.+ 14 A Zeova meng n na n zab n sõng yãmba,+ la yãmb na n yalsa sɩɩ.”

15 A Zeova yeela a Moyiiz yaa: “Bõe yĩng tɩ fo zẽk f koɛɛg n tar mam boaala? Yeel Israyɛll nebã tɩ b yik n dɩk sore. 16 La fo segd n zẽka f rasaarã n tẽeg f nugã mogrã zugu, n welg-a sẽn na yɩl tɩ Israyɛll nebã tõog n pasg mogrã tẽn-sʋka, tẽn-koɛɛng zugu. 17 Mam na n basame tɩ Ezɩpt nebã sũy riglmi, tɩ b pʋgl yãmb n kẽ mogrã pʋgẽ. Dẽ, mam na n tũnuga ne a Farawõ, a tãb-biisã, a zabr saar-dãmbã, la ne a wed-rʋʋdbã fãa n waoog m yʋʋrã.+ 18 La sãmbg sẽn kae, Ezɩpt nebã na n bãngame tɩ mam yaa a Zeova, m sã n wa tũnug ne a Farawõ, a zabr saar-dãmbã la ne a wed-rʋʋdbã n waoog m yʋʋrã.”+

19 Rẽ poore, Wẽnnaam malɛkã+ sẽn da be Israyɛll nebã taoorã leba b poorẽ wã, tɩ sawadgã me sẽn da be b taoorã leb poorẽ, n yalse.+ 20 Woto, sawadgã wa n yalsa Ezɩpt nebã ne Israyɛll nebã sʋka.+ A neng a ye wã ra yaa sawad-sablga, t’a neng a to wã kõt yʋngã vẽenem.+ Yʋngã tõre, sull a ye wã neb ra pa tõe n kolg sull a to wã neb ye.

21 A Moyiiz tẽega a nugã mogrã zugu,+ t’a Zeova kɩt tɩ yaang sob-kãseng fug yʋngã tõre. Koomã welgame+ tɩ mogrã tẽn-sʋkã lebg tẽn-koɛɛnga.+ 22 Dẽ, Israyɛll nebã pasga mogrã sʋka, tẽn-koɛɛng zugu,+ tɩ koomã zẽk wa lalg n be b rɩtg la b goabga.+ 23 Ezɩpt nebã pʋgl-b lame. La a Farawõ wed-moosã fãa ne a zabr saar-dãmbã la a wed-rʋʋdbã pʋgl-b lame n kẽ mogrã tẽn-sʋka.+ 24 Beoogã sẽn wa n kolg vẽegre,* a Zeova paa bugmã ne sawadgã pʋgẽ n ges Ezɩpt nebã,+ n kɩt tɩ zũnd-zãnd zĩnd Ezɩpt nebã sʋka. 25 Wẽnnaam ra kɩtdame tɩ b saar-dãmbã nao feoosdẽ, hal tɩ saar-dãmbã wẽneb lebg toogo. Ezɩpt nebã ra yetame yaa: “D zoe n zãag ne Israyɛll nebã, bala a Zeova zabda ne tõnd n sõngd-ba.”+

26 Dẽ, a Zeova yeela a Moyiiz yaa: “Tẽeg f nugã mogrã zugu, sẽn na yɩl tɩ koomã sig n lim Ezɩpt nebã ne b zabr saar-dãmbã la b wed-rʋʋdbã.” 27 Zĩig pʋgẽ, a Moyiiz tẽega a nugã mogrã zugu. La zĩigã sẽn wa n kolg yẽegrã, mogrã leba a zĩigẽ. Ezɩpt nebã sẽn wa n zoet n na n yi wã, a Zeova lob-b-la mogrã tẽn-sʋka.+ 28 Koomã sẽn sigdã lima zabr saar-dãmbã ne wed-rʋʋdbã, la a Farawõ tãb-biisã fãa sẽn da pʋgl-b n kẽ mogrã pʋgẽ wã.+ B baa a ye pa põs ye.+

29 La Israyɛll nebã kẽna tẽn-koɛɛng zug mogrã tẽn-sʋka,+ tɩ koomã zẽk wa lalg n be b rɩtg la b goabga.+ 30 Woto, a Zeova fãaga Israyɛll nebã baraare, Ezɩpt nebã nugẽ.+ La Israyɛll nebã yãa Ezɩpt nebã kũ-rãmbã mogrã noore. 31 Sẽn paase, Israyɛll nebã yãa pãn-kãseng* ning a Zeova sẽn tall n zab ne Ezɩpt nebã. Nin-buiidã sɩnga a Zeova zoeese, la b tẽ a Zeova ne a tʋm-tʋmd a Moyiizi.+

15 Wakat kãnga, a Moyiiz ne Israyɛll nebã yɩɩla yɩɩll n pẽg a Zeova, n yeele:+

“Bas-y tɩ m yɩɩl n pẽg a Zeova, bala yẽ paama waoogr wʋsgo.+

A loba wed-moaagã ne ned ning sẽn zao a zugã mogrã pʋgẽ.+

 2 A Zah* yaa mam pãng la m tõogo, bala a lebga mam fãagda.+

A yaa mam Wẽnnaam, tɩ mam na n pẽg-a.+ A yaa mam ba wã Wẽnnaam,+ la mam na n waoog-a lame.+

 3 A Zeova yaa zabr gãndaoogo.+ Yẽ yʋʋrã yaa a Zeova.+

 5 Ko-pɛmã luda bãmba. B bõra zĩ-zulumsẽ wã wa kugri.+

 9 Bɛyã yeelame: ‘Mam na n pʋgl-b lame! Mam na n paam-b lame!

Mam na n pʋɩɩ te-zɛɛdem hal tɩ wa sek maam!*

Mam na n wõoga m sʋʋgã! Mam nugã na n tõog-b lame!’+

11 Zeova, ãnda n yaa wa yãmb wẽnnaam-dãmbã sʋka?+

Ãnda n yaa wa yãmba, n wilgd sõmblem wʋsgo?+

Yãmb n yaa soab ning sẽn zems tɩ b zoe la b yɩɩl n pẽge, soab ning sẽn maand yel-soalmã.+

12 Yãmb tẽega y nug-rɩtgã, tɩ tẽngã vel-ba.+

Neb nins sẽn be Kanaã wã fãa na n komsa raoodo.+

16 Rabeem-kãseng n na n yõk-ba.+

18 A Zeova na n dɩɩ naam wakat sẽn kõn sa yĩnga.+

20 Dẽ, no-rɛɛs-poak a Miryam sẽn yaa a Aarõ tãoã rɩka bembengo,* tɩ pagbã fãa pʋgd-a n wẽed bembend la b saoodẽ. 21 A Miryam ra reesda rapã yɩɩllã n yetẽ:

“Yɩɩl-y n pẽg-y-yã a Zeova, bala a paama waoogr wʋsgo.+

A loba wed-moaagã ne ned ning sẽn zao a zugã mogrã pʋgẽ.”+

22 Rẽ poore, a Moyiiz talla Israyɛll nebã tɩ b yi Mog-miuugẽ wã, n dɩk Suur we-raoogã sore. B kẽna rasem a tãab we-raoogẽ wã, la b pa yã koom ye. 23 B wa n taa Maara,*+ la b ra pa tõe n yũ Maara koomã ye. Bala a ra yaa toogo. Yaa rẽ yĩng la b sẽn pʋd zĩigã tɩ Maara wã. 24 Dẽ, nin-buiidã sɩngame n yẽgemd ne a Moyiiz+ n yetẽ: “Yaa bõe la tõnd na n yũ?” 25 A Moyiiz zẽka a koɛɛg n bool a Zeova,+ t’a Zeova wilg-a tɩɩga. A sẽn lob-a koomã pʋgẽ wã, koomã lebga noogo.

Zĩ-kãnga, Wẽnnaam lugla noor b yĩnga, la bũmb b sẽn na n tikd n kaood bʋʋdo. Be, Wẽnnaam mak-b lame.+ 26 A yeelame: “Yãmb sã n kelg yãmb Wẽnnaam a Zeova koɛɛgã neere, n maan sẽn yaa tɩrg a nifẽ, n tũ a noyã la y sak a tõodã fãa,+ mam pa na n kɩt tɩ bãas nins m sẽn lob Ezɩpt nebã baa a ye yõk-y ye.+ Bala yaa maam a Zeova n sãoogd yãmba.”+

27 B wa n taa Elim. Ko-bunds piig la a yiib la koms pis-yopoe n da be be. Dẽ, b tilga b sik-zĩigã be, koomã noore.

16 Israyɛll nebã fãa sẽn yi Elimmã poore, b wa n taa Sin we-raoogã+ sẽn be Elim ne Sinayi sʋkã. Yɩɩ b sẽn yi Ezɩpt soolmẽ wã kiuug a yiib-n-soabã rasem piig la a nu wã.

2 Israyɛll nebã fãa sɩnga yẽgeng ne a Moyiiz la a Aarõ we-raoogẽ wã.+ 3 Israyɛll nebã ra yet-b lame yaa: “A Zeova nugã sã n da kʋ tõnd Ezɩpt soolmẽ wã, d sẽn wa n zĩ nemdã rʋgd seese,+ la d sẽn wa n dɩt n tɩgdã sasa n são. La yãmb talla tõnd n wa we-ra-kãngã pʋgẽ, n na n kɩt tɩ nin-buiidã fãa ki kom.”+

4 Dẽ, a Zeova yeela a Moyiiz yaa: “Mam na n kɩtame tɩ rɩɩb* yit saasẽ n niid wa saag yãmb yĩnga,+ la nin-buiidã ned kam fãa segd n yiime n wʋk sẽn zems a rɩɩb daar fãa.+ Woto, mam na n mak-b lame n ges b sã n na n tũu mam noyã bɩ b pa na n tũ.+ 5 La rasem a yoob-n-soabã,+ b sã n wa segend b sẽn wʋkã, segd n yɩɩ b sẽn wʋkd daar fãa wã naoor a yiibu.”+

6 Dẽ, a Moyiiz ne a Aarõ yeela Israyɛll nebã fãa yaa: “Sãmbg sẽn kae, zaabrã yãmb na n bãngame tɩ yaa a Zeova n yiis yãmb Ezɩpt soolmẽ wã.+ 7 Yibeoogo, yãmb na n yãa a Zeova ziirã, bala a Zeova wʋma yãmb sẽn yẽgemd ne-a wã. Tõnd yaa ãnd dãmba, tɩ yãmb na n yẽgem ne tõndo?” 8 T’a Moyiiz paase: “A Zeova sã n wa kõ yãmb nemd zaabrã tɩ y wãbe, la a kõ-y rɩɩb yibeoog tɩ y rɩ n tɩge, yãmb na n bãngame t’a Zeova wʋma yãmb yẽgengã y sẽn yẽgemd ne-a wã. Tõnd yaa ãnda rãmba? Pa ne tõnd la yãmb sẽn yẽgemdã ye. Yaa ne a Zeova.”+

9 Rẽ poore, a Moyiiz yeela a Aarõ yaa: “Togs Israyɛll nebã fãa yaa: ‘Wa-y-yã a Zeova taoore, bala a wʋma yãmb yẽgengã.’”+ 10 A Aarõ sẽn gom ne Israyɛll nebã fãa n sa wã bala, b wẽnemdame n tees we-raoogã, la a Zeova ziirã puka sawadgã pʋgẽ.+

11 A Zeova le goma ne a Moyiiz n yeele: 12 “Mam wʋma Israyɛll nebã yẽgengã.+ Yeel-b yaa: ‘Zĩ-sobdã, yãmb na n wãba nemdo, la yibeoogo, yãmb na n dɩɩ rɩɩb n tɩge.+ Hakɩɩka, yãmb na n bãngame tɩ mam yaa yãmb Wẽnnaam a Zeova.’”+

13 Daar-n-kãng zaabre, kodens n wa n pid sik-zĩigã,+ la yibeoogo, meenem n gãneg sik-zĩigã kɩremsã fãa. 14 Meenemã sẽn wa n mesgã, bũmb sẽn yaa kɩds la faasg n da gãneg we-raoogã,+ n yaa wa sa-lamd n be tẽnga. 15 Israyɛll nebã sẽn yã wã, b ra sokda taab yaa: “Woto yaa bõe?” Bala b ra pa mi sẽn yaa bũmb ning ye. A Moyiiz yeel-b lame: “Yaa rɩɩb ning a Zeova sẽn kõ yãmb tɩ y rɩ wã.+ 16 Ad a Zeova sẽn yeele: ‘Ned kam fãa segd n wʋka wa sẽn zems a sẽn tõe n dɩ. Yãmb segd n wʋka omɛɛr* a ye+ ned kam fãa yĩnga, wa sẽn zems neb* nins sẽn be ned kam fãa fu-roogẽ wã sõore.’” 17 Israyɛll nebã sɩnga wʋkre. Kẽer wʋka wʋsgo, tɩ sãnda wʋk bilfu. 18 B sã n da mak ne omɛɛrã, sẽn wʋk-a wʋsgã pa paam tɩ looge, tɩ bũmb pa paoog sẽn wʋk-a bilfã me ye.+ B ned kam fãa wʋka wa sẽn zems a sẽn tõe n dɩ.

19 Dẽ, a Moyiiz yeel-b lame: “Ned baa a ye pa segd n bas rɩɩbã baa bilf tɩ vẽeg beoog ye.”+ 20 La b pa kelg a Moyiiz ye. B neb kẽer sẽn bas tɩ vẽeg beoogã, kẽe zũnzũy n lebg yũugu, t’a Moyiiz sũurã puug ne-ba. 21 B ra wʋkda rɩɩbã yibeoog fãa, tɩ ned kam fãa wʋkd wa sẽn zems a sẽn tõe n dɩ. Wĩndgã sã n wa zẽk tɩ zĩigã wɩnge, rɩɩbã boogdame.

22 Rasem a yoob-n-soabã, b wʋka rɩɩbã b sẽn minim n wʋkdẽ wã naoor a yiibu.+ Omɛɛr a yiib ned kam fãa yĩnga. Dẽ, nin-buiidã nanambs fãa wa n togsa a Moyiiz bõn-kãnga. 23 T’a yeel-b yaa: “Yaa woto la a Zeova yeel-yã. Beoogo, ned kam fãa segd n vʋʋsame, bala beoog yaa vʋʋsg daar sẽn welg toor a Zeova yĩnga.+ Rɩk-y yãmb sẽn dat n tall n maan burã n maan buri, la y rʋg y sẽn dat n dʋg a soabã,+ la y bĩng sẽn kellã hal tɩ ta yibeoogo.” 24 B bĩngame tɩ ta yibeoog wa a Moyiiz sẽn yeelã, la pa lebg yũug ye. Zũnzũy me pa kẽ ye. 25 Dẽ, a Moyiiz yeelame: “Rɩ-y-yã-a rũndã, bala rũndã yaa vʋʋsg daar a Zeova yĩnga. Rũndã, y pa na n yã-a tẽng ye. 26 Yãmb na n wʋk-a-la rasem a yoobe, la rasem a yopoe-n-soabã sẽn yaa Vʋʋsg daarã,+ baa fʋɩ pa na n zĩnd ye.” 27 Baa ne rẽ, neb kẽer yiime n na n wʋk-a rasem a yopoe-n-soabã, la b pa yã baa fʋɩ.

28 Dẽ, a Zeova soka a Moyiiz yaa: “Yãmb na n zãgsame tɩ y kõn tũ mam noyã la m tõodã n ta rabʋre?+ 29 Ra yĩm-y tɩ yaa a Zeova n kõ yãmb Vʋʋsg daarã ye.+ Rẽ n so t’a kõt yãmb rasem a yiib rɩɩb rasem a yoob-n-soabã. Ned fãa segd n paa a sẽn beẽ. Ned baa a ye pa segd n yi a zĩigẽ rasem a yopoe-n-soabã ye.” 30 Dẽ, nin-buiidã maana Vʋʋsg daarã* rasem a yopoe-n-soabã.+

31 Israyɛll nebã boola rɩɩbã tɩ “mann.”* A ra yaa pɛɛlg wa baninga,* t’a noosmã yaa wa bur sẽn maan ne sɩɩdo.+ 32 A Moyiiz yeelame: “Ad a Zeova sẽn yeele: ‘Yãk-y mannã n pids omɛɛr a ye, tɩ yɩ bũmb y sẽn na n bĩng yãmb zãmaan-dãmbã pʋgẽ,+ sẽn na yɩl tɩ b tõog n yã rɩɩb ning mam sẽn kõ yãmb tɩ y rɩ we-raoogẽ wã, mam sẽn wa n yiisd yãmb Ezɩpt soolmẽ wã.’” 33 Dẽ, a Moyiiz yeela a Aarõ yaa: “Rɩk yʋʋr n ning mannã omɛɛr a ye a pʋgẽ, n dɩgl a Zeova taoor tɩ yɩ bũmb y sẽn na n bĩng yãmb zãmaan-dãmbã pʋsẽ.”+ 34 A Aarõ maana wa a Zeova sẽn yeel a Moyiizã, n dɩgl-a Kasetã kug-walsã taoore,+ sẽn na yɩl n bĩng-a. 35 Israyɛll nebã rɩɩ mannã yʋʋm pis-naase,+ hal tɩ b wa kẽ tẽng neb sẽn beẽ.+ B rɩɩ mannã hal n wa ta Kanaã soolmã toadgẽ.+ 36 Omɛɛr piig yaa efa* a yembre.

17 Israyɛll nebã fãa yii Sin we-raoogẽ wã n looge,+ n da kẽnd la b yaasdẽ wa a Zeova sẽn wilgd-bã.+ B wa n tilga b sik-zĩigã Refidim.+ La koom da ka be nin-buiidã sẽn na n yũ ye.

2 Dẽ, nin-buiidã sɩnga zabr ne a Moyiiz+ n yetẽ: “Kõ tõnd koom tɩ d yũ.” La a Moyiiz sok-b lame yaa: “Bõe yĩng tɩ yãmb zabd ne maam? Bõe yĩng tɩ yãmb makd a Zeova wakat fãa?”+ 3 La ko-yũudã ra tara nin-buiidã wʋsgo, tɩ b ra yẽgemd ne a Moyiiz+ n yetẽ: “Bõe yĩng tɩ fo yiis tõnd Ezɩpt n na n kɩt tɩ ko-yũud kʋ tõnd ne d kambã la d rũmsã?” 4 A Moyiiz wa n baas n zẽka a koɛɛg n bool a Zeova n yeel yaa: “Mam segd n maana bõe ne nin-kãensã? Keta bilf bal tɩ b lob maam kuga!”

5 A Zeova yeela a Moyiiz yaa: “Lʋɩ nin-buiidã taoore, n peeg Israyɛll kãsem-dãmbã kẽere, la f rɩk rasaar ning fo sẽn tall n wẽ Nill kʋɩlgã n zã.+ Rɩk-a n zã f nugẽ n kẽne. 6 Ade! Mam na n yaasa fo taoore, rat n yeel tɩ Horɛɛbe, pĩigã zugu. Fo segd n wẽe pĩigã, la koom n na n yi a pʋgẽ tɩ nin-buiidã yũ.”+ A Moyiiz maana woto Israyɛll kãsem-dãmbã nifẽ. 7 Rẽ n so t’a pʋd zĩigã yʋʋr tɩ Masa*+ la Meriba,*+ Israyɛll nebã sẽn zabã yĩnga, la b sẽn mak a Zeova+ n da sokdẽ: “A Zeova bee tõnd sʋk bɩ, bɩ a pa be tõnd sʋkã” yĩnga.

8 Rẽ poore, Amalɛk nebã+ waame, n zab ne Israyɛll nebã Refidim.+ 9 Dẽ, a Moyiiz yeela a Zozuwe yaa:+ “Yãk rap n yi n tɩ zab ne Amalɛk nebã. Beoogo, mam na n tɩ yalsa tãngã zugu, n zãad Wẽnnaam rasaarã.” 10 A Zozuwe maana wa a Moyiiz sẽn yeel-a wã,+ n tɩ zab ne Amalɛk nebã. La a Moyiiz ne a Aarõ la a Huur+ kẽnga tãngã zugu.

11 A Moyiiz sã n da zẽk a nusã, Israyɛll nebã tõogdame, la a sã n da sik a nusã bala, Amalɛk nebã tõogdame. 12 A Moyiiz nusã sẽn wa n ya wã, a Aarõ ne a Huur rɩka kugr n dɩgl t’a zaoonde. Rẽ poore, b tebenda a nusã, t’a ye be goabg t’a to wã be rɩtgo, t’a nusã kell n tall pãng hal n tãag wĩntoogã lʋɩɩse. 13 Woto, a Zozuwe tõoga Amalɛk nebã ne sʋʋga.+

14 A Zeova yeela a Moyiiz yaa: “Gʋls yãoã sebrã pʋgẽ sẽn na yɩl tɩ b tẽegd a yelle, la f togs-a a Zozuwe: ‘Mam na n menesa Amalɛk nebã zãng saasã tẽngre,+ la b pa na n tol n tẽeg b yell yɛs ye.’” 15 A Moyiiz maana tẽn-kugr n pʋd a yʋʋr t’a Zeova-nisi,* 16 n yeele: “Amalɛk nebã nusã sẽn zabd ne a Zah geerã yĩnga,+ a Zeova na n zaba ne-b zãmaan woo zãmaana.”+

18 A Zetro sẽn yaa Madiyã maan-kʋʋd la a Moyiiz rɛɛmbã+ wʋma bũmb nins fãa Wẽnnaam sẽn maan a Moyiiz yĩnga, la Israyɛll nebã sẽn yaa a nin-buiidã yĩnga, rat n yeel t’a Zeova sẽn yiis Israyɛll nebã to-to Ezɩptã.+ 2 A Moyiiz rɛɛmb a Zetro ra reega a Moyiiz pag a Sefora, wakat ning a sẽn kɩt t’a lebg n wa a nengẽ 3 ne a kom-dibli a yiibã.+ A ye wã yʋʋr ra yaa a Gɛrsom,*+ bala a Moyiiz yeelame: “Mam lebga sãan n vɩ sãand weoogo.” 4 La a to wã yʋʋr ra yaa a Eliyezɛɛre,* bala a Moyiiz yeelame: “Mam ba wã Wẽnnaamã yaa mam sõangda. Yẽ n fãag maam t’a Farawõ pa paam maam n kʋ ne a sʋʋgã ye.”+

5 Dẽ, a Moyiiz rɛɛmb a Zetro ne a Moyiiz kom-dibli a yiibã, n paas a pagã waa a Moyiiz nengẽ we-raoogẽ wã, zĩig ning a sẽn tilg a fu-roogã Wẽnnaam tãngẽ wã.+ 6 A tʋma koɛɛg tɩ b togs a Moyiiz yaa: “Maam a Zetro sẽn yaa fo rɛɛmbã+ wata fo nengẽ ne f pagã, la a kom-dibli a yiibã.” 7 Zĩig pʋgẽ, a Moyiiz yiime n tɩ seg a rɛɛmbã, n wõgemd a taoor la a mok-a. B sẽn sok taab keelem poore, a Moyiiz tall-a lame n tɩ kẽ a fu-roogẽ wã.

8 A Moyiiz togsa a rɛɛmbã bũmb nins fãa a Zeova sẽn maan a Farawõ la Ezɩpt soolmã Israyɛll nebã yĩnga,+ tood nins fãa sẽn paam bãmb sorã zugã,+ la a Zeova sẽn fãag-b to-to wã. 9 A Zetro sũurã yɩɩ noog ne bõn-sõma nins fãa a Zeova sẽn maan Israyɛll nebã yĩnga, n fãag-b Ezɩpt nebã nusẽ wã. 10 Rẽ poore, a Zetro yeelame: “Bɩ a Zeova paam pẽgre. Yaa yẽ n fãag yãmb Ezɩpt nebã ne a Farawõ nusẽ wã, la a fãag nin-buiidã tɩ Ezɩpt nebã pa le so-bã. 11 Masã, mam bãngame t’a Zeova yaa kãseng n yɩɩd wẽnnaam-dãmb a taabã fãa,+ bũmb ning a sẽn maan neb nins sẽn da wukd b mens ne a nin-buiidã yĩnga.” 12 A Moyiiz rɛɛmb a Zetro talla maoong sẽn yõogd bugum ne maand a taab n wa kõ Wẽnnaam. A Aarõ ne Israyɛll kãsem-dãmbã fãa naaga a Moyiiz rɛɛmbã n dɩ rɩɩb Wẽnnaam taoore.

13 Vẽkembeoogo, a Moyiiz zĩnda wa raasenkamã n na n kao bʋʋd nin-buiidã yĩnga. Nin-buiidã yalsa a Moyiiz taoor yibeoog hal n tãag zaabre. 14 A Moyiiz rɛɛmbã sẽn yã bũmb nins fãa a sẽn maand nin-buiidã yĩngã, a sokame yaa: “Bõe yĩng tɩ fo maand woto? Bõe yĩng tɩ fo zĩ ka f yembre, tɩ nin-buiidã fãa yas fo taoor yibeoog hal n tãag zaabre?” 15 A Moyiiz leoka a rɛɛmbã yaa: “Yaa nin-buiidã sẽn wat mam nengẽ n na n sok n bãng Wẽnnaam daabã yĩnga. 16 Yell sã n wa be neb a yiib sʋka, b tallda yellã n wa togs maam. Mam segd n kaoo bʋʋdo, la m wilg Wẽnnaam sẽn yãk yam ninga, la a noyã.”+

17 A Moyiiz rɛɛmbã yeel-a lame: “Fo sẽn maand to-to wã pa sõma ye. 18 Yaa vẽeneg tɩ foo ne nin-buiidã sẽn be ne foomã fãa na n yaame. Bala tʋʋm-kãngã yaa zɩɩb sẽn zɩs wʋsg ne foo, tɩ fo pa tõe n tʋk-a f yembr ye. 19 Masã, kelg maam. Mam na n kõo foo saglga, la Wẽnnaam na n zĩnda ne foom.+ Fo segd n gomda nin-buiidã yʋʋr yĩng Wẽnnaam taoore,+ la f talld yɛlã n kẽnd Wẽnnaam nengẽ.+ 20 Fo segd n zãms-b-la Wẽnnaam tõodã la a noyã,+ la f kɩt tɩ b bãng b sẽn segd n vɩɩmd to-to, la tʋʋmd ning b sẽn segd n tʋme. 21 La fo segd n yãka rap sẽn tar minim+ la sẽn zoet Wẽnnaam, n yaa rap b sẽn tõe n teeg la sẽn kis zãmb paoongo,+ n kɩt tɩ b yɩ b nanambse, n yaa neb tusr-tusr nanambse, neb koabg-koabg nanambse, neb pis-nu-nu nanambse, la neb piig-piig nanambse.+ 22 Yell sã n wa be nin-buiidã sʋka,* bãmb n segd n kao bʋʋdã. B na n talla yel-kãseng buud fãa n wa fo nengẽ.+ La bãmb n na n get yel-bõonegã yelle. Bas tɩ b sõng-f ne zɩɩbã tɩ yɩ nana ne foo.+ 23 Fo sã n maan woto, la sã n mik tɩ zemsa ne Wẽnnaam daabã, fo na n tõog n tʋka zɩɩbã, la ned kam fãa na n leba a yir t’a yam gãe bãane.”

24 A Moyiiz kelga a rɛɛmbã, n maan a sẽn yeelã fãa zĩig pʋgẽ. 25 A Moyiiz yãka rap sẽn tar minim Israyɛll nebã sʋka, n kɩt tɩ b yɩ nin-buiidã nanambse, n yaa neb tusr-tusr nanambse, neb koabg-koabg nanambse, neb pis-nu-nu nanambse, la neb piig-piig nanambse. 26 Woto, nin-buiidã sã n wa tar yelle, bãmb n kaood bʋʋdã. Yel-kãsemsã la b ra talld n wat a Moyiiz nengẽ,+ la b kaood yel-bõonegã bʋʋdo. 27 Rẽ poore, a Moyiiz yãaga a rɛɛmbã,+ t’a rɩk sor n leb a soolmẽ.

19 Israyɛll nebã sẽn yi Ezɩpt soolmã kiuug a tãab-n-soabã daare, b taa Sinayi we-raoogẽ wã. B taa be daar-n-kãng bala. 2 B yii Refidim+ n kẽng Sinayi we-raoogẽ wã, n tɩ tilg b sik-zĩigã we-raoogẽ wã. Israyɛll nebã tilga b sik-zĩigã be n tees tãngã.+

3 Dẽ, a Moyiiz rʋʋ tãngã n kẽng Wẽnnaam nengẽ. A Zeova paa tãngẽ wã+ n bool-a n yeele: “Ad fo sẽn segd n yeel a Zakoob yagensã, rat n yeel tɩ Israyɛll nebã: 4 ‘Yãmb mens yãa bũmb ning mam sẽn maan Ezɩpt nebã+ sẽn na yɩl n zã yãmb wa sɩlg sẽn zãad a kamb to-to wã, la m tall yãmb n wa m nengẽ wã.+ 5 Yãmb sã n sak mam koɛɛgã neere, la y sak mam kaoolã, hakɩɩka, yãmb na n lebga mam buud sẽn yaa toor zall buud toɛy-toɛyã fãa sʋka,+ bala tẽngã tõr yaa maam n so.+ 6 Yãmb na n lebga rĩm-dãmb ne maan-kʋʋdba, la buud sẽn yaa sõng mam yĩnga.’+ Yaa gom-kãensã la fo segd n tɩ togs Israyɛll nebã.”

7 Dẽ, a Moyiiz kẽngame n tɩ tigim nin-buiidã kãsem-dãmbã, n togs-b goam nins fãa a Zeova sẽn yeel yẽ wã.+ 8 Rẽ poore, nin-buiidã naaga taab noor a yembr n leok yaa: “Tõnd sakame n na n maan bũmb nins fãa a Zeova sẽn yeelã.”+ A Moyiiz kẽnga tao-tao n tɩ togs a Zeova nin-buiidã sẽn leok a soabã. 9 T’a Zeova yeel a Moyiiz yaa: “Gese! Mam na n waa fo nengẽ sawad-sablg pʋgẽ, sẽn na yɩl tɩ mam sã n wa gomd ne foo bɩ nin-buiidã wʋme, la sẽn na yɩl tɩ b tẽ foo wakat fãa me.” A Moyiiz tɩ togsa nin-buiidã a Zeova goamã.

10 Dẽ, a Zeova yeela a Moyiiz yaa: “Kẽng nin-buiidã nengẽ n tɩ yɩlg-b rũndã ne beoogo. B segd n pegsa b futã. 11 B segd n segla b mens rasem a tãab-n-soabã yĩnga, bala rasem a tãab-n-soabã, a Zeova na n siga Sinayi tãngã zug nin-buiidã fãa nifẽ. 12 Fo segd n yãka toadg n gilg tãngã nin-buiidã yĩnga, la f yeel-b yaa: ‘Gũus-y n da rʋ-y tãngã wall y sɩɩs a pendã ye. Sɩd-sɩda, b na n kʋʋ ned ning fãa sẽn na n sɩɩs tãngã. 13 Ned nug pa segd n sɩɩs a soabã ye. B na n lob-a-la ne kug wall b tão-a ne pɛɛma.* Yaa rũng tɩ yaa neda, a pa na n le vɩɩmd ye.’+ La b sã n wa wʋm baorgã* rãamde,+ b tõe n yiime n wa tãngẽ wã.”

14 Dẽ, a Moyiiz siga tãngã zug n bʋʋg nin-buiidã, n sɩng-b yɩlgre. Nin-buiidã pegsa b futã.+ 15 A yeela nin-buiidã yaa: “Segl-y y mens rasem a tãab-n-soabã yĩnga. Yãmb pa segd n kẽ ne y pagbã ye.”*

16 Rasem a tãab-n-soabã yibeoogo, saagã ra tãsdame la a yãgda, tɩ sawad-taok+ ra be tãngã zugu. Baorg rãamd n da zẽkd wʋsgo. Nin-buiidã fãa sẽn be sikã zĩigẽ wã sɩnga rigbu.+ 17 A Moyiiz kɩtame tɩ nin-buiidã yi sik-zĩigẽ wã, tɩ b na n tɩ seg Wẽnnaam. B tɩ yalsa tãngã sɛɛga. 18 Sinayi tãngã tõr da nusda bug-zõose, bala a Zeova siga a zug bugum pʋgẽ.+ A bug-zõosã ra zẽkda wa wʋng bug-zõose. Tãngã tõr da rĩmsda wʋsgo.+ 19 Baorgã rãamd sẽn wa n paasdẽ wã, a Moyiiz gomame, tɩ Wẽnnaam leok-a.

20 Woto, a Zeova siga Sinayi tãngã zugu, tãngã zug tẽn-sʋka. Rẽ poore, a Zeova boola a Moyiiz tãngã zug tẽn-sʋka, t’a Moyiiz rʋ.+ 21 A Zeova yeela a Moyiiz yaa: “Sig n tɩ yeel nin-buiidã tɩ b ra mak n na n long toadgã n ges a Zeova ye. Sã n pa rẽ, b wʋsg na n kiime. 22 Bɩ maan-kʋʋdbã sẽn minim n kolgd a Zeova wã yɩlg b mense, sẽn na yɩl t’a Zeova ra wa kʋ-b ye.”+ 23 T’a Moyiiz yeel a Zeova yaa: “Nin-buiidã pa tõe n dʋ Sinayi tãngã ye. Bala yãmb zoe n keooga tõnd n yeele: ‘Yãk toadg n gilg tãngã, n kɩt t’a lebg sõngo.’”+ 24 La a Zeova yeel-a lame yaa: “Kẽng n sigi, la f lebg n dʋ ne a Aarõ. La f ra bas maan-kʋʋdbã ne nin-buiidã tɩ b long toadgã n dʋ n wa a Zeova nengẽ, t’a ra wa kʋ-b ye.”+ 25 Dẽ, a Moyiiz sig n bʋʋga nin-buiidã n togs-b gom-kãense.

20 Ad goam nins fãa Wẽnnaam sẽn yeelã:+

2 “Mam yaa yãmb Wẽnnaam a Zeova, soab ning sẽn yiis yãmb Ezɩpt soolmẽ wã, tẽng ning pʋgẽ y sẽn da yaa yembsã.+ 3 Yãmb pa segd n tall wẽnnaam-dãmb a taab n zʋʋg maam ye.+

4 “Yãmb pa segd n pees bõn-naandg y mens yĩnga, wall y maan bũmb sẽn be saasẽ, sẽn be tẽngã zugu, bɩ sẽn be koomã pʋgẽ wõneg ye.+ 5 Yãmb pa segd n wõgemd b taoore, bɩ n bas tɩ b belg-y tɩ y waoog-b ye.+ Bala maam a Zeova sẽn yaa yãmb Wẽnnaamã yaa Wẽnnaam sẽn dat tɩ b waoog yẽ a ye tãa,+ la sẽn sɩbgd neb nins sẽn kis maamã kamb la b yagense, hal n tãag b zãmaan a tãab-n-soab ne a naas-n-soaba, b ba-rãmbã beegr yĩnga. 6 La mam maanda neb nins sẽn nong maam la b tũud mam noyã neere, hal n tãag b zãmaan tusr soabã.+

7 “Yãmb pa segd n pʋt yãmb Wẽnnaam a Zeova yʋʋrã ne paoogr* ye.+ Bala a Zeova pa na n bas ned ning sẽn pʋt a yʋʋrã ne paoogr* n pa sɩbg ye.+

8 “Tẽegd-y Vʋʋsg daarã yelle, n kɩt t’a kell n yɩ sõngo.+ 9 Yãmb segd n tʋma rasem a yoobe, la y maan bũmb nins fãa y sẽn na n maane,+ 10 la rasem a yopoe-n-soabã yaa vʋʋsg daar yãmb Wẽnnaam a Zeova yĩnga. Yãmb pa segd n tʋm tʋʋmd baa a yembr ye. Yãmb ne y kom-dibli wã, y kom-pugli wã, y yem-daadã, y yem-pogsã, y yir dũmsã, la sãamb nins sẽn be yãmb tẽnsẽ wã.*+ 11 Bala rasem a yoob pʋgẽ, a Zeova maana saasã ne tẽngã la mogrã, la bũmb nins fãa sẽn be b pʋsẽ wã. La rasem a yopoe-n-soabã, a sɩnga vʋʋsgo.+ Yaa rẽ yĩng la a Zeova sẽn ning Vʋʋsg daarã barka, n kɩt t’a lebg sõngã.

12 “Waoog f ba la f ma,+ sẽn na yɩl n vɩɩmd n kaoos tẽng ning fo Wẽnnaam a Zeova sẽn na n kõ yãmbã pʋgẽ.+

13 “Fo pa segd n kʋ ye.+

14 “Fo pa segd n yo ye.+

15 “Fo pa segd n zu ye.+

16 “Fo pa segd n kõ kaset sẽn pa sɩd n dõd f to ye.+

17 “Fo pa segd n tʋlg f to roog ye. Fo pa segd n tʋlg f to paga,+ wall a yem-daoogo, a yem-poaka, a loalga, a bõanga, la bũmb nins fãa a sẽn so ye.”+

18 Nin-buiidã fãa maana kaset ne sa-tãsã la sa-yãgbã, baorgã rãamdã, la tãngã sẽn da nusd bug-zõosã. Rẽ kɩtame tɩ b rigda, la b yas yɩɩga.+ 19 Dẽ, b yeela a Moyiiz yaa: “Bɩ fo gom ne tõnd tɩ d na n kelgame. La bɩ Wẽnnaam da gom ne tõndo, bala d yɛɛsda d na wa n ki.”+ 20 Rẽ la a Moyiiz yeel nin-buiidã yaa: “Da zoe-y rabeem ye. Bala Wẽnnaam waame n na n mak yãmba,+ sẽn na yɩl tɩ y kell n zoe-a, n da wa maan yel-wẽnd ye.”+ 21 Dẽ, nin-buiidã kell n yalsa yɩɩga, la a Moyiiz kolga sawad-sablg ning pʋgẽ Wẽnnaam sẽn be wã.+

22 A Zeova yeela a Moyiiz yaa: “Ad bũmb ning fo sẽn segd n togs Israyɛll nebã: ‘Yãmb mens yãame tɩ yaa saasẽ la mam pa n gom ne yãmba.+ 23 Yãmb pa segd n maan wanzuri wẽnnaam-dãmb n paas maam ye. Y pa segd n maan sãnem wẽnnaam-dãmb y mens yĩng ye.+ 24 Yaa tãnd tẽn-kugr la yãmb segd n maan mam yĩnga. Yẽ zug la yãmb na n kʋʋd y rũm-bõonegã ne y rũm-bɛdã n maand maand sẽn yõogd bugum, la zems-n-taar maando.* Sẽn yaa zĩig ning fãa la mam na n kɩt tɩ b tẽegd mam yʋʋrã yelle,+ mam na n wata yãmb nengẽ be, n ningd-y barka. 25 Yãmb sã n na n tall kug n maan tẽn-kugr mam yĩnga, yãmb pa segd n maan-a ne kug b sẽn pees ne kɩtg ye.+ Bala yãmb sã n maan woto, tẽn-kugrã pa na n ta mam yam ye. 26 Yãmb pa segd n maan rʋʋds n tũud n dʋʋd m tẽn-kugrẽ wã, sẽn na yɩl tɩ b ra wa yã yãmb yãndã* ye.’

21 “Ad noy nins fo sẽn segd n taas-bã:+

2 “Fo sã n da yamb sẽn yaa Ebre,+ a na n tʋma fo yĩng yʋʋm a yoobe, la yʋʋm a yopoe-n-soabã, f segd n bas-a lame t’a loog n pa yao bũmb ye.+ 3 A sã n waa a yembre, a na n looga a yembre. La a sã n yaa pʋg-sɩda, a pagã segd n tũ-a lame n looge. 4 A zu-soabã sã n kõ-a pag t’a rog kom-dibli wall kom-pugli, pagã ne a kambã na n lebga a zu-soabã n so, la yẽ na n looga a yembre.+ 5 La yambã sã n pẽdgd n yetẽ: ‘Mam nonga m zu-soabã, m pagã ne m kambã. M pa rat tɩ b bas-m tɩ m looge,’+ 6 a zu-soabã segd n tall-a lame n wa Wẽnnaam taoore. Rẽ poore, a zu-soabã na n tall-a lame n kẽng rignoorẽ wã wall kʋɩlengã lugrẽ wã, n tɩ poog a tʋbrã ne pĩim, la a na n lebga a yamb a yõor tɛka.

7 “Rao sã n koos a bi-pugl t’a lebg yamba, a zu-soabã pa na n bas-a t’a loog wa yem-daoog sẽn loogd to-to wã ye. 8 A sã n pa ta a zu-soabã yam t’a pa kɩt t’a lebg a pʋg-rɩkdga,* la a rat n koos-a ne ned a to, a pa tar sor n na n koos-a ne sãamb ye. Bala a maan-a-la zãmbo. 9 A sã n dɩk-a n kõ a bi-ribla, a segd n maan-a-la wa a meng bi-pugla. 10 Biigã sã n dɩk pag a to, a pa segd n boog pipi pagã rɩɩb la a fut ye. A segd n ket n kõt-a-la a sẽn segd ne kãadmã wɛɛngẽ wã.*+ 11 A sã n pa na n kõ-a bõn-kãensã a tãabã, a segd n loogame n pa yao ligd ye.

12 “Ned ning fãa sẽn wẽ a to t’a ki, b segd n kʋ-a lame.+ 13 La a sã n pa maan ne pʋ-toogo, tɩ Wẽnnaam bas tɩ yɩ woto, mam na n yãka zĩig yãmb yĩng t’a tõe n zoe n kẽng be.+ 14 Ned sũur sã n yik wʋsg ne a to t’a yãk yam n kʋ-a,+ baa a sã n zoe n tɩ bao koglg mam tẽn-kugrẽ wã, yãmb segd n kʋ-a lame.+ 15 Ned ning fãa sẽn wẽ a ba bɩ a ma, b segd n kʋ-a lame.+

16 “Ned sã n yõk a to+ n koose, wall b yãa ned a sẽn yõk tɩ ket a nugẽ,+ b segd n kʋ-a lame.+

17 “Ned sã n tʋʋs a ba wall a ma,* b segd n kʋ-a lame.+

18 “Neb sã n zab taab tɩ b nin-yɛng wẽ a to wã ne kugri, pa rẽ bɩ ne nug-gilg* t’a pa ki, n yaool n pogl n segd n pa a gãagã zug n kaoose, ad bũmb ning sẽn segd n maane: 19 A sã n tõe n yik n kẽn yɩng ne rasaare, b pa segd n sɩbg ned ning sẽn wẽ-a wã ye. A na n yaoome bal n dol sẽn pogl-a wã sẽn bõn bũmb ninga, a sẽn pa tõe n tʋmã, n tãag a sẽn na n paam laafɩ zãnga.

20 “Rao sã n wẽ a yem-daoog wall a yem-poak ne raoog t’a ki a nugẽ, b segd n sɩbg-a lame.+ 21 La a sã n kell n vɩɩmd daar a ye bɩ rasem a yiibu, b pa segd n sɩbg-a ye. Bala yambã yaa ned a zu-soabã sẽn da ne a ligdi.

22 “Rap a yiib sã n zabd taaba, n fão pag sẽn tar pʋg t’a rog tɩ pa ta,*+ tɩ yõor yaool n pa yãke,* sẽn tar-a taalã segd n yaoo bũmb ning pagã sɩd sẽn na n togsã. La a segd n yaoome tɩ zems bʋ-kaoodbã sẽn na n yãk yam ningã.+ 23 La yõor sã n yãke, fo segd n kõo vɩɩm vɩɩm yĩnga,*+ 24 nifr nifr yĩnga, yẽnd yẽnd yĩnga, nug nug yĩnga, naoor naoor yĩnga,+ 25 bugum yõogr bugum yõogr yĩnga, sãmpogr sãmpogr yĩnga, wẽeb wẽeb yĩnga.

26 “Rao sã n wẽ a yem-daoog wall a yem-poak nifr n sãame, a segd n basa a yambã t’a looge, n dol a nifrã.+ 27 A sã n wẽ a yem-daoog wall a yem-poak yẽnd n feooge, a segd n basa a yambã t’a looge, n dol a yẽndã.

28 “Loalg sã n tãag rao wall pag n kʋ, b segd n loba loalgã kug hal t’a wa ki.+ B pa segd n wãb a nemdã ye. La b pa segd n sɩbg loalgã soab ye. 29 La loalg sã n minim n tãada, tɩ b keoog a soabã t’a pa gũ-a sõma t’a kʋ rao wall paga, b segd n loba loalgã ne kuga, la b kʋ a soabã me. 30 B sã n dogl-a yaoodo, a segd n yaoo yaood ning fãa b sẽn dogl-a wã n dol a vɩɩmã.* 31 Yaa bi-ribl tɩ yaa bi-pugl la loalgã tãag-yã, b segd n maana a soabã wa sẽn zems no-kãngã. 32 Sã n yaa yem-daoog wall yem-poak la loalgã sẽn tãagã, a soabã na n kõo yambã zu-soabã sɩkl* pis-tã, la b segd n loba loalgã ne kug t’a ki.

33 “Ned sã n bas bok n pa page, wall a tuk bok n pa pag tɩ loalg bɩ bõang lʋɩ a pʋgẽ, 34 bokã soab segd n dolame.+ A segd n yaoo rũngã soaba, la a soog rũm-kɩɩngã. 35 Ned loalg sã n tã a to loalg t’a ki, b segd n koosa loalg ning sẽn vɩ wã n pʋɩ ligdã. B segdame me n pʋɩ rũm-kɩɩngã. 36 La b sã n miẽ tɩ loalgã minim n tãadame, t’a soabã pa gũ-a sõma, a segd n dola loalg loalg yĩnga, la a soog sẽn ki-a wã.

22 “Ned sã n zuk loalg wall pesg n kodg-a wall a koos-a, a segd n dola lols a nu loalgã yĩnga, la piis a naas pesgã yĩnga.+

2 (“B sã n yã wagdr+ t’a kaood roog n na n zu tɩ b wẽ-a n kʋ, a zɩɩmã taal ka zao ned ning sẽn kʋ-a wã ye. 3 La sã n yaa wĩndgã pukr poor la b kʋ-a, a zɩɩmã taal zaoo ned ning sẽn kʋ-a wã.)

“A segd n dolame. La a sã n pa tar baa fʋɩ, b segd n koos-a lame n yao bũmb nins a sẽn zu wã. 4 A sẽn zuk rũng ningã sã n ket n vɩ a nugẽ, tɩ yaa loalga, bõanga, wall pesgo, a segd n dola naoor a yiibu.

5 “Ned sã n yiis a rũms n na n tɩ wãbneg pʋʋgẽ wall viyn pʋʋgẽ, n bas-b tɩ b tɩ wãb ned a to pʋʋgo, a segd n dola ne a pʋʋgã bõn-sõma sẽn yɩɩdã, wall ne a viyn pʋʋgã bi-sõma sẽn yɩɩdã.

6 “Ned sã n yõgen bugum tɩ bugmã yãng n kok gõos tuudu, n sãag n dɩ kood b sẽn kɛ n sam wall kood sẽn ket n yasẽ, pa rẽ bɩ pʋʋgo, sẽn yõgn-a bugmã segd n dola bũmb nins bugmã sẽn dɩ wã.

7 “Ned sã n kõ a to ligd bɩ teed t’a bĩngi, tɩ b wa zu bõn-kãens a to wã roogẽ, b sã n yõk wagdrã, a segd n dola a sẽn zukã naoor a yiibu.+ 8 B sã n pa yã wagdrã, b segd n talla roogã soab n wa Wẽnnaam taoore,+ sẽn na yɩl tɩ b bao n bãng sã n pa yẽ n dɩ a to wã teedo.* 9 B sã n dõd ned t’a tara bũmb a sẽn pa so, tɩ yaa loalga, bõanga, pesgo, fuugu, wall bũmb sẽn menem tɩ ned yeele: ‘Ada yaa mam dẽnda!,’ b yiibã fãa na n talla b yellã n kẽng Wẽnnaam taoore.+ Wẽnnaam sẽn wilg t’a soab ning tara taalã segd n dola a to wã naoor a yiibu.+

10 “Ned sã n kõ a to bõanga, loalga, pesgo, wall yir dũng buud fãa t’a gũ, tɩ rũngã ki wall a pogl wʋsgo, pa rẽ bɩ b tall-a lame n loog tɩ ned pa yã, 11 sẽn da gũud-a rũngã segd n wẽena a Zeova taoor t’a pa rɩ a to wã bũmbã ye. Sẽn so-a rũngã segd n sak n deegame. Ned a to wã pa segd n dol ye.+ 12 La b sã n zuka rũngã a nengẽ, a segd n dola a soabã. 13 Sã n yaa we-rũng n wãb rũngã, a segd n talla kellã n wa tɩ yɩ kaseto. A pa segd n dol bũmb we-rũng sẽn wãb ye.

14 “La ned sã n peng a to rũng tɩ rũngã pogl wʋsg wall a ki tɩ rũngã soab pa be yambẽ, sẽn peng-a rũngã segd n dolame. 15 A soabã sã n da be yambẽ, sẽn peng-a wã pa segd n dol ye. B sã n da sarame t’a na n yaoo rũngã soab la a tall-a n tʋme, ligd ning b sẽn da sarã n na n dole.

16 “Rao sã n do pa-kuil b sẽn nan pa kõ sɩd n kẽ ne-a, a segd n yaoo pʋg-beoleng yaood sẽn na yɩl t’a lebg a paga.+ 17 A ba wã sã n zãgs fasɩ t’a kõn dɩk-a n kõ raoã, raoã segd n yaoo ligdã tɩ zems pʋg-beolengã yaoodo.

18 “Yãmb pa segd n bas tɩɩm soab* t’a vɩɩmd ye.+

19 “Ned ning fãa sẽn kẽ ne rũnga, b segd n kʋ-a lame.+

20 “Ned ning sẽn maand maand n kõt wẽnnaam-dãmb a taab n zʋʋg a Zeova, b segd n kʋ-a lame.+

21 “Yãmb pa segd n nams sãan wall y weoog-a ye.+ Bala yãmb da yaa sãamb Ezɩpt soolmẽ wã.+

22 “Yãmb pa segd n nams pʋg-kõor baa a ye, wall kɩɩb ye.*+ 23 Yãmb sã n nams-a t’a kelem n bool maam, hakɩɩka, mam na n wʋma a kelemsã.+ 24 Mam sũurã na n puuga wʋsg tɩ mam kʋ yãmb ne sʋʋga, tɩ yãmb pagbã lebg pʋg-kõapa, tɩ y kambã lebg kɩɩbse.

25 Fo sã n peng naong soab ligd mam nin-buiidã sʋka, rat n yeel tɩ ned sẽn be ne yãmba, fo pa segd n yɩ sam-soab sẽn yaa toaag ne-a ye. Fo pa segd n kɩt t’a yao n dogl bũmb ye.+

26 “Fo sã n deeg f to fuug a sẽn tar fo samd yĩnga,+ fo segd n lebs-a-la fuugã tɩ wĩndgã nan pa lʋɩ ye. 27 Bala yaa yẽ fu-yɛng a sẽn tar n pind a mengã.* Bõe la a na n pil n gãande?+ A sã n kelem n bool maam, sɩd-sɩda, mam na n wʋmame, bala mam yaa nimbãan-zoɛta.+

28 “Fo pa segd n tʋʋs* Wẽnnaam,+ wall f buudã naab ye.+

29 “Fo pa segd n maan sãmb-sãmb ne yãk f koodã sẽn yaa wʋsgã, la f divẽ wã ne f kaamã sẽn yaa wʋsgã n kõ maam ye.+ Yãmb segd n kõo maam y kom-dẽems nins fãa sẽn yaa rapã.+ 30 Ad bũmb ning yãmb sẽn segd n maan ne y loalg la y pesgo:+ A na n kell n zĩnda ne a ma wã rasem a yopoe. Rasem a nii-n-soabã, yãmb segd n kõ-a-la maam.+

31 “Yãmb segd n wilgame tɩ y yaa buud sẽn welg toor mam yĩnga.+ We-rũng sã n wãb rũng weoogẽ, yãmb pa segd n wãb a nemdã ye.+ Yãmb segd n dɩk-a lame n kõ baasã.

23 “Fo pa segd n yelg kibar sẽn pa sɩd ye.+ Ra sõng nin-wẽng n wa yɩ kaset soab sẽn yagd ziri ye.+ 2 Fo pa segd n tũ kʋʋng n maan wẽnga, bɩ n kõ kaset sẽn yaa ziri sẽn na yɩl n noog neb wʋsg sũur ye. Bala f sã n maan woto, f na n kɩtame tɩ b kao bʋʋd kɛgre. 3 Fo sã n wa kaood naong soab bʋʋdo, bɩ f ra kõ-a bʋʋm a sẽn yaa naong soabã yĩng ye.+

4 “Fo sã n yã f bɛ loalg wall a bõang sẽn meneme, f segd n tall-a lame n tɩ kõ-a.+ 5 Fo sã n yã ned sẽn kis foo bõang sẽn lʋɩ ne a zɩɩbo, fo pa segd n maan wa f pa yã n loog ye. Fo segd n sõng-a lame n lok rũngã zɩɩbo.+

6 “Naong soab sẽn be yãmb sʋkã sã n tar yell ne neda, yãmb pa segd n kao a bʋʋd kɛgr ye.+

7 “Zãag f meng ne rõadga,* la f ra kʋ bʋʋm soab ne nin-tɩrg ye. Bala mam pa na n yeel tɩ nin-wẽng yaa tɩrg ye.*+

8 “Fo pa segd n sak noor-madgr ye. Bala noor-madgr kɩtdame tɩ bʋ-kaoodb pa sakd n deeg sẽn yaa tɩrg ye. A tõe n golma nin-tɩrg goam me.+

9 “Yãmb pa segd n weoog sãan ye. Yãmb mii yɩ sãan sẽn dat n yɛɛlga,* bala yãmb yɩɩ sãamb Ezɩpt soolmẽ wã.+

10 “Yãmb segd n bʋda y pʋtã yʋʋm a yoobe, la y tigs b koodã.+ 11 La yʋʋm a yopoe-n-soabã, yãmb segd n basa y pʋtã vɩʋʋg n pa bʋde, tɩ naong rãmbã sẽn be yãmb sʋkã rɩ bũmb ning sẽn na n yi b pʋsẽ wã biisi. La bũmb ning b sẽn na n kellã, we-rũmsã n na n dɩ. Yaa woto la yãmb segd n maan ne y viyn pʋtã la ne y oliiv tɩɩsã.

12 “Yãmb segd n tʋma y tʋʋmã rasem a yoobe. La rasem a yopoe-n-soabã, yãmb segd n basa y tʋʋmã, tɩ y lolsã ne y bõensã vʋʋse, la sẽn na yɩl tɩ y yem-pogsã kom-dibli ne sãambã vʋʋs n paam pãnga.+

13 “Yãmb segd n gũusame n maan bũmb ning fãa mam sẽn yeel yãmbã.+ Yãmb pa segd n pʋd wẽnnaam-dãmb a taab yʋy ye. B pa segd n wʋm b yʋyã yãmb noorẽ ye.+

14 “Yʋʋmd fãa, yãmb segd n maana tigr mam yĩng naoor a tãabo.+ 15 Yãmb na n maana Bur sẽn pa ning rabɩll tigrã.+ Yãmb na n wãba bur sẽn pa ning rabɩll rasem a yopoe, wa mam sẽn yeel yãmbã, Abiib*+ kiuugã wakat ning mam sẽn yãkã. Bala yaa wakat kãng la yãmb yi Ezɩpti. Ned baa a ye pa segd n wa mam taoor nug-zaal ye.+ 16 Sẽn paase, yãmb segd n maana Kẽebgã tigrã,* y sã n wa kẽebd y pʋtã bi-rẽemsã.+ La y maan Tigsgã tigrã* yʋʋmdã baasgẽ, yãmb sã n wa tigs bũmb nins y sẽn paam y pʋtẽ wã n sa.+ 17 Yʋʋmd fãa, yãmb rapã fãa segd n waa a Zeova sẽn yaa Zu-soab sɩd-sɩdã taoor naoor a tãabo.+

18 “Yãmb pa segd n dɩk mam maoongã zɩɩm n naag ne bũmb sẽn ning rabɩll n kõ maam ye. Maandã kaam yãmb sẽn kõt mam tigã sasa wã pa segd n pa yʋngã n tãag yibeoog ye.

19 “Yãmb segd n talla y pʋtã bi-rẽems nins sẽn yaa sõma n yɩɩdã n wa y Wẽnnaam a Zeova roogẽ wã.+

“Yãmb pa segd n dʋg bull a ma bĩisim pʋgẽ ye.+

20 “Mam tʋmda malɛk t’a lʋɩ yãmb taoor+ n kogl yãmb sorã zugu, la a tall yãmb n kẽng zĩig ning mam sẽn seglã.+ 21 Kelg-y-yã-a la y sak a koɛɛgã. Ra kɩɩs-y-yã-a ye. Bala a pa na n kõ yãmb y beegrã sugri,+ a sẽn zãad mam yʋʋrã yĩnga. 22 La yãmb sã n sak a koɛɛgã neere, n maan bũmb ning fãa mam sẽn yeelã, mam na n yɩɩ y bɛɛbã bɛya, la m kɩɩs neb nins sẽn kɩɩsd yãmbã. 23 Bala mam malɛkã na n lʋɩɩ yãmb taoor n tall yãmb n kẽng Amoor nebã, Hɛt nebã, Perɛɛz nebã, Kanaã nebã, Hevi nebã, la Zebuus nebã nengẽ. Mam na n sãam-b lame.+ 24 Yãmb pa segd n wõgemd bãmb wẽnnaam-dãmbã taoore, bɩ n waoog-b ye. Yãmb pa segd n tũ b minundã ye.+ Yãmb segd n sãama b wẽnnaam-dãmbã, la y wã b kugã b sẽn lugl n pʋʋsdẽ wã.+ 25 Yãmb segd n tũu y Wẽnnaam a Zeova,+ tɩ rẽ la a na n ning y rɩɩbã la y koomã barka.+ Mam na n yiisa bãas yãmb sʋkã.*+ 26 Pagbã sẽn be yãmb soolmẽ wã pʋs pa na n sãame, la b pa na n yɩ pʋg-kiy me ye.+ Mam na n kõo yãmb yõ-woko.*

27 “Nand meng tɩ yãmb ta, mam na n kɩtame tɩ b zoe maam,+ la m kɩt tɩ zũnd-zãnd zĩnd neb nins fãa yãmb sẽn na n zab ne wã sʋka. M na n kɩtame tɩ y tõog y bɛɛbã fãa tɩ b zoe yãmb taoore.*+ 28 Nand tɩ yãmb ta, mam na n kɩtame tɩ y bɛɛbã koms raoodo,*+ la m dig Hevi nebã, Kanaã nebã, ne Hɛt nebã tɩ b zoe yãmb taoore.+ 29 Mam pa na n dig-b yãmb taoor yʋʋm-yɛnga, sẽn na yɩl tɩ soolmã ra lebg vɩʋʋgo, tɩ we-rũmsã lebg wʋsg n maan yãmb wẽng ye.+ 30 Mam na n dig-b-la yãmb taoor bilf-bilfu, n tãag yãmb sẽn na n lebg wʋsg n deeg soolmã n sooge.+

31 “Mam na n yãka yãmb soolmã toadgã t’a yɩ sẽn sɩng ne Mog-miuugã n tãag Filisti mogrã, la sẽn sɩng ne we-raoogã n tãag Efrat kʋɩlgã.*+ Bala mam na n ninga soolmã neb yãmb nugẽ, la yãmb na n dig-b lame n yiisi.+ 32 Yãmb pa segd n maan kaool ne bãmb wall ne b wẽnnaam-dãmbã ye.+ 33 B pa segd n zĩnd yãmb soolmẽ wã, sẽn na yɩl tɩ b ra wa kɩt tɩ y beeg maam ye. Yãmb sã n tũ b wẽnnaam-dãmbã, hakɩɩka, rẽ na n lebga bẽdg yãmb yĩnga.”+

24 Dẽ, a Zeova yeela a Moyiiz yaa: “Yik n dʋ tãngã, foo ne a Aarõ la a Nadaab ne a Abiyu,+ n paas Israyɛll kãsem-dãmb pis-yopoe. Yãmb segd n wõgemda yɩɩg n waoog maam. 2 A Moyiiz a ye n segd n kolg a Zeova. La neb a taabã pa segd n kolg ye. Nin-buiidã pa segd n tũ-a n dʋ ye.”+

3 A Moyiiz kẽng n tɩ togsa nin-buiidã a Zeova goamã fãa la a noyã fãa,+ tɩ nin-buiidã leok noor a yembr yaa: “Tõnd sakame n na n maan bũmb nins fãa a Zeova sẽn yeelã.”+ 4 Dẽ, a Moyiiz gʋlsa a Zeova goamã fãa.+ A yika yibeoog pĩnd n maan tẽn-kugr tãngã sɛɛga, la a lugl kug piig la a yiib wa sẽn zems Israyɛll buud piig la a yiibã sõore. 5 Rẽ poore, a tʋma Israyɛll kom-bɩɩs sẽn yaa rapa, tɩ b tɩ maan maoong sẽn yõogd bugum, la b kʋ lols n maan zems-n-taar maoong+ n kõ a Zeova. 6 A Moyiiz yãka zɩɩmã pʋɩ-sʋk n ning laas pʋsẽ, la a rɩk pʋɩ-sʋkã n mes tẽn-kugrã. 7 A rɩka kaoolã sebr n zẽk a koɛɛg n karem tɩ nin-buiidã kelge.+ La bãmb yeelame yaa: “Tõnd sakame n na n maan bũmb nins fãa a Zeova sẽn yeelã. D na n yɩɩ sakdba.”+ 8 A Moyiiz rɩka zɩɩmã n mes nin-buiidã+ n yeel yaa: “Woto yaa kaoolã zɩɩm, kaool ning a Zeova sẽn maan ne yãmb wa sẽn zems ne gom-kãensã fãa wã.”+

9 A Moyiiz ne a Aarõ la a Nadaab ne a Abiyu, n paas Israyɛll kãsem-dãmb pis-yopoe n dʋ tãngã, 10 n yã Israyɛll Wẽnnaamã.+ Bũmb sẽn wõnd safɩɩr kug b sẽn gãneg n da be a naoã tẽngre, la a ra yaa yɩlll wa sa-gãongã menga.+ 11 A pa maan Israyɛll nin-kãsemsã bũmb ye.+ B yãa Wẽnnaam vẽnegr pʋgẽ, la b rɩ la b yũ.

12 A Zeova yeela a Moyiiz yaa: “Yik n dʋ n bʋʋg maam tãngã zug n pa be. Mam na n kõo foo kug-wals sẽn tar noy la tõod mam sẽn na n gʋls nebã zãmsg yĩnga.”+ 13 Dẽ, a Moyiiz yika ne a sõangd a Zozuwe+ n looge, t’a Moyiiz tɩ rʋ Wẽnnaam tãngã.+ 14 La a yeela kãsem-dãmbã yaa: “Pa-y ka n gũ tõnd hal tɩ d lebg n wa yãmb nengẽ.+ A Aarõ ne a Huur+ bee ne yãmba. Ned sã n tar yell ne a to, a tõe n kẽnga bãmb nengẽ.”+ 15 A Moyiiz ra rʋʋda tãngã, tɩ sawadgã lut tãngã.+

16 A Zeova ziirã+ kell n paa Sinayi tãngã zugu,+ la sawadgã luda tãngã rasem a yoobe. Rasem a yopoe-n-soabã, a zĩnda sawadgã tẽn-sʋk n bool a Moyiizi. 17 Israyɛll neb nins sẽn da getã nifẽ, a Zeova ziirã ra yaa wa bugum sẽn dɩt tãngã zug tẽn-sʋka. 18 Dẽ, a Moyiiz kẽe sawadgã pʋgẽ, n dʋ tãngã zugu.+ A Moyiiz paa tãngã zug rasem pis-naase, wĩndg la yʋngo.+

25 Dẽ, a Zeova yeela a Moyiiz yaa: 2 “Yeel Israyɛll nebã tɩ b tall kũun n wa kõ maam. Yãmb segd n deega ned ning fãa sẽn dat n kõ kũun ne a sũur fãa wã kũuni.+ 3 Ad kũun nins yãmb sẽn segd n dees b nengẽ: Yaa sãnem,+ wanzuri,+ zũudu,+ 4 gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, lẽ* gĩs-bãanese, bʋʋs kõbdo, 5 pe-raad gãnd b sẽn moneme, fok* gãndo, akasiya raado,+ 6 kaam fɩtl-dãmbã yĩnga,+ bomiye kaam* zaeebã kaam yĩng+ la wisdã sẽn tar yũ-noogã yĩnga,+ 7 n paas onigs kuga, ne kug a taab b sẽn na n ning efoodẽ wã,*+ la yãoog lutgẽ wã.+ 8 B segd n maana wẽnd-doog n kõ maam, tɩ m zĩnd b sʋka.+ 9 Yãmb segd n maana sɛk-roogã ne a teedã fãa tɩ yɩ wa mam sẽn wilgd foomã bal kɛpɩ.+

10 “B segd n maana koglg ne akasiya raado, t’a woglmã yaa kãntɩɩg* a yiib la pʋɩ-sʋka, t’a yalmã yaa kãntɩɩg a ye la pʋɩ-sʋka, t’a zãntlmã yaa kãntɩɩg a ye la pʋɩ-sʋka.+ 11 Fo na n bolg-a-la ne sãnem halaale.+ Fo segd n bolga a pʋgã ne a yɩngã, la f maan kogr ne sãnem n gilg-a.+ 12 Fo na n maana sãnem tuiids a naase, n ning a kars a naasã zugẽ, tɩ tuiids a yiib be kɩreng a ye wã, t’a yiib me be kɩreng a to wã. 13 Fo na n peesa akasiya ra-bɩlma, n bolg-b ne sãnem.+ 14 Fo na n tuii ra-bɩlmã tuiidsã sẽn be Koglgã kɩrengã pʋsẽ, sẽn na yɩl n tar-b n zãad Koglgã. 15 Ra-bɩlmã na n paa Koglgã tuiidsã pʋsẽ. B pa segd n foos-b be ye.+ 16 Fo na n ninga Kasetã kug-walsã mam sẽn na n kõ foomã Koglgã pʋgẽ.+

17 “Fo na n maana limd ne sãnem halaale, t’a woglmã yaa kãntɩɩg a yiib la pʋɩ-sʋka, t’a yalmã yaa kãntɩɩg a ye la pʋɩ-sʋka.+ 18 Fo segd n maana seribẽ-rãmb a yiib ne sãnem. Fo na n kud-b lame n ning limdã kɩrems a yiibã zugu.+ 19 Maan seribẽ-rãmbã n ning kɩrems a yiibã zutu, tɩ seribẽ be limdã kɩreng fãa zugu. 20 Seribẽ-rãmbã segd n tẽega b pɩgs a yiibã n tees yĩngri, n lud limdã ne b pɩgsã,+ la b tees taaba. Seribẽ-rãmbã nens na n geta limdã. 21 Fo na n ninga limdã+ Koglgã zugu, la f ning Kasetã kug-walsã mam sẽn na n kõ foomã Koglgã pʋgẽ. 22 Mam na n vẽnega m meng ne foo be, la m pa limdã zug n gom ne foo.+ Mam na n paa seribẽ-rãmb a yiibã sẽn be Kasetã koglg zugã sʋka, n kɩt tɩ f bãng bũmb nins fãa mam sẽn na n togs foo tɩ f taas Israyɛll nebã.

23 “Fo na n maana taabl+ me ne akasiya raado, t’a woglmã yaa kãntɩɩg a yiibu, t’a yalmã yaa kãntɩɩg a ye, t’a zãntlmã yaa kãntɩɩg pʋɩ-sʋka.+ 24 Fo na n bolg-a-la ne sãnem halaale, la f maan kogr ne sãnem n gilg-a. 25 Fo na n maana kogrã t’a yalmã zems nug-biis a naas* n gilg taablã, la f nags kogrã ne sãnem n gilgi. 26 Fo na n maana sãnem tuiids a naas taablã yĩnga, n ning tuiidsã a kɩrems a naasã, kars a naasã zĩisẽ. 27 Tuiidsã segd n pẽe kogrã, tɩ zãad ra-bɩlmã b sẽn tar n zẽkd taablã. 28 Fo na n peesa akasiya ra-bɩlmã, n bolg-b ne sãnem n tar-b n zãad taablã.

29 “Fo na n maana a laasã, a wũmbli wã, a yubli wã, la a la-bõonegã b sẽn na n tar n kiigd divẽ kũunã. Fo segd n maan-b-la ne sãnem halaale.+ 30 Fo na n dogenda burã b sẽn kõt maamã* taablã zug mam taoor wakat fãa.+

31 “Fo na n maana fɩtl-doagendg+ ne sãnem halaale. Fɩtl-doagendgã segd n yɩɩ bũmb b sẽn kudi. A sɛɛgã, a naoorã, a wilã, a wũmbli wã, a yoadã, la a puudã na n yɩɩ bũmb a ye.+ 32 Wil a yoob n na n yi fɩtl-doagendgã kɩremsã: Wil a tãab kɩreng a ye, t’a tãab me kɩreng a to wã. 33 Wũmbli a tãab b sẽn maan tɩ wõnd amand tɩɩg puud n na n zĩnd kɩreng a ye wã wil zutu, n tar yoad la puud tɩ yaa loalem-loalma, tɩ wũmbli a tãab b sẽn maan tɩ wõnd amand tɩɩg puud be kɩreng a to wã wil zutu, n tar yoad la puud tɩ yaa loalem-loalma. Yaa woto la b na n maan wil a yoobã sẽn yit fɩtl-doagendgã naoorẽ wã. 34 Wũmbli a naas b sẽn maan tɩ wõnd amand tɩɩg puud n na n zĩnd fɩtl-doagendgã naoor zugu, n paas yoad la puud tɩ yaa loalem-loalma. 35 Yodr n na n zĩnd pipi wil a yiibã sẽn yit naoorẽ wã tẽngre, tɩ yodr a to zĩnd wil a yiibã sẽn pʋgdã tẽngre, tɩ yodr a to me le be wil a yiibã sẽn pʋgdã tẽngre, wil a yoobã sẽn yit naoorẽ wã yĩnga. 36 Yoadã ne wilã la fɩtl-doagendgã fãa segd n maana ne sãnem halaal b sẽn kud tɩ yaa bũmb a yembre.+ 37 Fo na n maana fɩtl-dãmb a yopoe n dogl fɩtl-doagendgã zugu. B sã n yõgen fɩtl-dãmbã, b na n vẽnega zĩigã sẽn be fɩtl-doagendgã taoorã.+ 38 A yɩʋʋsã ne a bugmã laas segd n maana ne sãnem halaale.+ 39 B segd n maana fɩtl-doagendgã ne te-kãensã ne sãnem halaal talã* a ye. 40 Gũus neer n maan-b wa sẽn zems b sẽn wilg foom tãngã zugã.+

26 “Fo segd n maana sɛk-roogã+ ne lẽ* gĩs-bãanes pɛɛl piiga, gĩs sẽn yaa kẽeg haoo,* rũms kõbd gĩs sẽn yaa miid-miidu, la ne gĩs-moaama. Fo segd n gʋla seribẽ-rãmb+ b zutu. 2 Peend fãa woglem na n yɩɩ kãntɩɩg* pisi la a nii, t’a yalmã yɩ kãntɩɩg a naase. Pɛɛlã fãa woglmã ne b yalmã segd n zema taaba.+ 3 Pɛɛl a nu n segd n bogl taab n lebg bũmb a yembre, tɩ pɛɛl a nu wã me bogl taab n lebg bũmb a yembre. 4 Fo na n maana bõn-gils ne gĩs sẽn yaa kẽeg haoo,* peend ning sẽn be pɛɛlã sẽn bogl taabã baasgẽ wã noore, la f maan woto me peend ning sẽn be pɛɛl a taabã sẽn bogl taabã baasgẽ wã noore, zĩig ning b sẽn na n sog taabã. 5 Fo na n maana bõn-gils pis-nu peend a ye wã noore, la f maan bõn-gils pis-nu peend a to wã noore, sẽn na yɩl tɩ b tees taab zĩig ning b sẽn sogd taabã. 6 Fo segd n maana sãnem sogds pis-nu n tall n sog pɛɛlã ne taaba. Woto, sɛk-roogã na n yɩɩ bũmb a yembre.+

7 “Fo na n wʋga pɛɛl ne bʋʋs kõbd+ me n pil sɛk-roogã. Fo na n wʋga pɛɛl piig la a ye.+ 8 Peend fãa woglem na n yɩɩ kãntɩɩg pis-tã, t’a yalmã yɩ kãntɩɩg a naase. Pɛɛl piig la a ye wã fãa woglmã la b yalmã segd n zema taaba. 9 Fo segd n bogla pɛɛl a nu wã taaba, la f bogl a yoobã me taaba. Fo segd n põda peend a yoob-n-soabã sɛk-roogã taoore. 10 Fo segd n maana bõn-gils pis-nu peend a ye wã noore, rat n yeel tɩ peend ning sẽn be pɛɛlã sẽn bogl taabã baasgẽ wã zugu, la f maan bõn-gils pis-nu peend a to wã noore, zĩig ning b sẽn sogd taabã. 11 Fo segd n maana zũud sogds pis-nu, n ning sogdsã bõn-gilsã pʋsẽ n sog pɛɛlã taaba, tɩ sɛk-roogã lebg bũmb a yembre. 12 Pɛɛlã sẽn na n zʋʋgã na n luundame. Peendã sẽn na n zʋʋgã pʋɩ-sʋk na n luunda sɛk-roogã poore. 13 Pɛɛlã woglem sẽn na n zʋʋgã na n luunda sɛk-roogã zugu, tɩ sẽn luund kɩreng fãa wã yɩ kãntɩɩg a ye, sẽn na yɩl t’a lud sɛk-roogã.

14 “Sẽn paase, fo na n maana lutg ne pe-raad gãnd sẽn monem sɛk-roogã yĩnga, la f maan lutg ne fok* gãnd+ n dogl a zugu.

15 “Fo na n peesa akasiya raad n maan kaadr-dãmb*+ sɛk-roogã yĩnga, tɩ b yas selle.+ 16 Kaadr fãa zãntlem segd n yɩɩ kãntɩɩg piiga, t’a yalmã yɩ kãntɩɩg a ye la pʋɩ-sʋka. 17 Kaadr fãa tara nao a yiib sẽn sog taaba. Yaa woto la fo segd n maan sɛk-roogã kaadr-dãmbã fãa. 18 Fo segd n maana kaadr-dãmb pisi sɛk-roogã goabg kɩrengã yĩnga.

19 “Fo na n maana wanzuri nao pis-naas sẽn tar bogd+ kaadr-dãmb pisi wã tẽngre: Nao a yiib sẽn tar bogd kaadr a ye nao a yiibã tẽngre, la nao a yiib sẽn tar bogd kaadr-dãmb nins sẽn pʋgdã fãa nao a yiibã yĩnga.+ 20 Sɛk-roogã kɩreng a to wã yĩnga, rat n yeel tɩ kɩreng ning sẽn tees rɩtgã yĩnga, fo na n maana kaadr-dãmb pisi 21 ne b wanzuri nao pis-naas sẽn tar bogdo: Nao a yiib sẽn tar bogd kaadr a ye tẽngre, la nao a yiib sẽn tar bogd kaadr-dãmb nins sẽn pʋgdã fãa tẽngre. 22 Fo segd n maana kaadr-dãmb a yoob sɛk-roogã poor sẽn tees nin-taoorã yĩnga.+ 23 Fo na n maana kaadr-dãmb a yiib tɩ yɩ sɛk-roogã poorẽ gõad a yiibã. 24 B segd n bogla taab tẽngr n tãag yĩngri, n tãag pipi tuiidgã. B segd n maana b yiibã fãa woto, tɩ b yɩ gõad a yiibã. 25 Na n yɩɩ kaadr-dãmb a nii ne b wanzuri nao piig la a yoob sẽn tar bogdo: Nao a yiib sẽn tar bogd kaadr a ye tẽngre, la nao a yiib sẽn tar bogd kaadr nins sẽn pʋgdã fãa tẽngre.

26 “Fo na n peesa akasiya ra-wogdo: Bãmb b nu kaadr-dãmb nins sẽn be sɛk-roogã kɩreng a ye yĩnga,+ 27 la bãmb b nu kaadr-dãmb nins sẽn be sɛk-roogã kɩreng a to wã yĩnga, la bãmb b nu me sɛk-roogã nin-taoor kɩrengã yĩnga, rat n yeel t’a poorẽ wã yĩnga. 28 Tẽn-sʋk ra-wokã sẽn be kaadr-dãmbã sʋkã segd n sɩnga kɩreng a ye n tãag kɩreng a to wã.

29 “Fo segd n bolga kaadr-dãmbã ne sãnem,+ la f maan b tuiidsã ne sãnem tɩ b zãad ra-wogdã. Fo na n bolga ra-wogdã ne sãnem. 30 Fo segd n tii sɛk-roogã t’a yɩ wa mam sẽn wilg foo tãngẽ wã.+

31 “Fo segd n wʋga fu-lilldg+ ne gĩs sẽn yaa kẽeg haoo,* ne rũms kõbd gĩs sẽn yaa miid-miidu, ne gĩs-moaama, la ne lẽ gĩs-bãanese. B na n gʋla seribẽ-rãmb a zugu. 32 Fo na n yagl-a-la akasiya ra-lugs a naas sẽn bolg sãnem zugu. B yagendsã segd n maana ne sãnem. B na n sela ra-lugsã wanzuri nao a naas sẽn tar bogd zutu. 33 Fo na n yagla fu-lilldgã sogdsã tẽngre, la f tall Kasetã koglg+ n wa kẽes fu-lilldgã poore. Fu-lilldgã na n welga Zĩ-sõngã+ ne Zĩ-sõng sẽn yɩɩdã.+ 34 Fo segd n fõgna limdã Kasetã koglg zug Zĩ-sõng sẽn yɩɩdã pʋgẽ.

35 “Fo na n dɩgla taablã fu-lilldgã taoore, tɩ fɩtl-doagendgã+ tees taablã n be sɛk-roogã kɩreng ning sẽn be goabg sẽnesã. La taablã na n zĩnda kɩreng ning sẽn be rɩtg sẽnesã. 36 Fo na n wʋga fu-lilldg sɛk-roogã rignoor yĩng ne gĩs sẽn yaa kẽeg haoo,* ne rũms kõbd gĩs sẽn yaa miid-miidu, ne gĩs-moaama, la ne lẽ gĩs-bãanese, b sẽn naag taab n wʋge.+ 37 Fo na n peesa akasiya ra-lugs a nu fu-lilldgã yĩnga, n bolg-b sãnem. B yagendsã na n maana ne sãnem. Fo na n maana zũud nao a nu sẽn tar bogd b yĩnga.

27 “Fo na n maana tẽn-kugrã ne akasiya raado.+ A woglmã na n yɩɩ kãntɩɩg* a nu, t’a yalmã yɩ kãntɩɩg a nu. Tẽn-kugrã woglmã ne a yalmã segd n zema taaba, t’a zãntlmã yɩ kãntɩɩg a tãabo.+ 2 Fo na n maana yɩɩl+ n ning a kɩrems a naasã. Yɩɩlã na n naaga tẽn-kugrã n yɩ bũmb a yembre. Fo na n bolga tẽn-kugrã ne zũudu.+ 3 Fo na n maana so-rãmb tɩ b tar n wʋkd tẽn-kugrã tompɛglmã,* n paas pell-dãmba, laase, yaagdse, la bugum laase. Fo na n maana a teedã fãa ne zũudu.+ 4 Fo na n maana gãmbr ne zũud tẽn-kugrã yĩnga, la f maan tuiids a naas ne zũud n ning gãmbrã kɩrems a naasã. 5 Fo na n sagl-a-la tẽn-kugrã kogr tẽngre, tɩ gãmbrã zĩnd tẽn-kugrã pʋgẽ n zems a pʋɩ-sʋkã. 6 Fo na n peesa akasiya ra-bɩlem tẽn-kugrã yĩnga, n bolg-b ne zũudu. 7 B na n tuii ra-bɩlmã tuiidsã pʋsẽ, sẽn na yɩl tɩ b sã n wa zãad tẽn-kugrã bɩ ra-bɩlmã zĩnd a kɩrems a yiibẽ wã.+ 8 Fo na n maana tẽn-kugrã t’a yaa raad koglg sẽn yaa vɩʋʋgo. B segd n maan-a lame t’a yɩ wa Wẽnnaam sẽn wilg foom tãngã zugã.+

9 “Fo na n maana sɛk-roogã samande.+ Samandã goabg kɩrengã na n talla lẽ* gĩs-bãanes fu-lilldsi. Kɩren-kãng woglmã na n yɩɩ kãntɩɩg koabga.+ 10 A na n talla ra-lugs pisi ne zũud nao pisi sẽn tar bogdo. Ra-lugsã yagendsã ne b sogdsã* segd n yɩɩ ne wanzuri. 11 Rɩtg kɩrengã fu-lilldsã me woglem na n yɩɩ kãntɩɩg koabga. A na n talla ra-lugs pisi ne b zũud nao pisi sẽn tar bogdo, la wanzuri yagends la sogds ra-lugsã yĩnga. 12 Samandã nin-taoor kɩrengã fu-lilldsã woglem segd n yɩɩ kãntɩɩg pis-nu. A na n talla ra-lugs piig ne nao piig sẽn tar bogdo. 13 Samandã yaang kɩrengã sẽn tees wĩndg sẽn pukdẽ sẽnesã yalmã segd n yɩɩ kãntɩɩg pis-nu. 14 Fu-lillds woglem sẽn yaa kãntɩɩg piig la a nu n na n zĩnd kɩreng a ye wã, n paas ra-lugs a tãab ne nao a tãab sẽn tar bogdo.+ 15 Fu-lillds woglem sẽn yaa kãntɩɩg piig la a nu, n paas ra-lugs a tãab ne nao a tãab sẽn tar bogd n na n zĩnd kɩreng a to wã me.

16 “Samandã noor segd n talla fu-lilldg woglem sẽn yaa kãntɩɩg pisi. B segd n wʋga fu-lilldgã ne gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la ne lẽ gĩs-bãanes sẽn naag taab n wʋge.+ Samandã noor segd n talla ra-lugs a naas ne b nao a naas sẽn tar bogdo.+ 17 Ra-lugsã fãa sẽn gũbg samandã na n talla wanzuri sẽbdse, la wanzuri yagendse. La b naoã sẽn tar bogdã na n yɩɩ ne zũudu.+ 18 Samandã woglem na n yɩɩ kãntɩɩg koabga,+ t’a yalmã yɩ kãntɩɩg pis-nu. Lẽ gĩs-bãanesã fu-lilldgã sẽn gilg samandã zãntlem na n yɩɩ kãntɩɩg a nu. A segd n talla zũud nao sẽn tar bogdo. 19 Teed nins fãa b sẽn tar n tʋmd sɛk-roogẽ wã, n paas a bayã* la samandã bayã fãa segd n yɩɩ ne zũudu.+

20 “Fo segd n yeela Israyɛll nebã tɩ b wa ne oliiv kaam sẽn yaa sõma fɩtl-dãmbã yĩnga, sẽn na yɩl tɩ fɩtl-dãmbã tõog n wid wakat fãa.+ 21 A Aarõ ne a kom-dibli wã na n gesame tɩ fɩtl-dãmbã wid a Zeova taoor+ sɛk-roogã pʋgẽ, rat n yeel tɩ fu-lilldgã sẽn pẽ Kasetã koglgã+ taoore. Fɩtl-dãmbã na n wida wĩndgã kõom n tãag yibeoogo. Rẽ na n yɩɩ noor Israyɛll nebã sẽn segd n tũ wakat fãa, b zãmaan-dãmbã fãa pʋsẽ.+

28 “Fo segd n boola f ba-biig a Aarõ ne a kom-dibli wã, n welg-b ne Israyɛll nebã, sẽn na yɩl t’a Aarõ yɩ mam maan-kʋʋda:+ Yaa a Aarõ+ ne a Nadaabe, a Abiyu,+ a Eleazaar la a Itamaar+ sẽn yaa a kom-dibli wã.+ 2 Fo segd n wʋga fut sẽn welg toor f ba-biig a Aarõ yĩnga, sẽn na yɩl t’a tall ziir la a yɩ neere.+ 3 Fo segd n goma ne neb nins fãa sẽn tar minimã,* rat n yeel tɩ neb nins mam sẽn kõ yamã,+ tɩ b wʋg a Aarõ futã sẽn na yɩl t’a welg toore, n yɩ mam maan-kʋʋda.

4 “Ad fut nins b sẽn segd n wʋgã: Yaa yãoog lutga,+ efoode,*+ kobr sẽn yaa bãg-vɩɩdo,+ kasaabo, zu-vindga,+ la sẽbdga.+ B na n wʋga fu-kãensã sẽn welg toorã fo ba-biig a Aarõ ne a kom-dibli wã yĩnga, sẽn na yɩl t’a Aarõ yɩ mam maan-kʋʋda. 5 Tʋʋm-mitbã na n tʋma ne sãnemã, gĩsã sẽn yaa kẽeg haoo* wã, rũmsã kõbd gĩs sẽn yaa miid-miidã, gĩs-moaamã, la lẽ* gĩs-bãanesã.

6 “B segd n wʋga efoodã* ne sãnem, gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la lẽ gĩs-bãanese, n gʋl-a.+ 7 A segd n talla sogds a yiib bãgdẽ wã, n sog noy a yiibã sẽn be yĩngrã ne taaba. 8 Sẽbdgã+ sẽn naag efoodã* sẽn na yɩl t’a pa zĩig a yembrã sẽn wʋg ne bũmb ninsã segd n yɩɩ a yembr ne bũmb nins b sẽn tall n wʋg efoodã: Yaa sãnem, gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la lẽ gĩs-bãanese.

9 “Fo segd n baoo onigs kug a yiib+ n gʋl a Israyɛll kom-dibli wã yʋy b zutu:+ 10 Yʋy a yoob kugr a yembr zugu, t’a yoobã sẽn kellã kugr a to wã zugu. B segd n gʋla yʋyã wa sẽn zems b rogmã sẽn pʋg taab to-to wã. 11 Ned sẽn gʋnd kug n na n gʋl a Israyɛll kom-dibli wã yʋy kug a yiibã zutu, wa a sẽn na n gʋl bũmb b sẽn tar n ningd bãnde.+ Rẽ poore, fo segd n kɩtame tɩ b yõg sãnem n sag-ba. 12 Fo segd n ninga kug a yiibã efoodã* bãgdẽ wã, tɩ yɩ kug sẽn na n kɩtdẽ tɩ b tẽegd a Israyɛll kom-dibli wã yelle.+ A Aarõ segd n tallda b yʋyã a bãgdẽ wã n wat a Zeova taoore, tɩ yɩ tẽegre. 13 Fo segd n yõga bũmb nins pʋsẽ f sẽn na n ning kugã ne sãnem, 14 la f maan sãnem halaal bãens a yiib sẽn kal taab wa wĩiri.+ Fo segd n tabla bãensã bũmb nins pʋsẽ f sẽn na n sag kugã.+

15 “Fo segd n kɩtame tɩ fu-gʋnd wʋg yãoog lutgã b sẽn tar n kaood bʋʋdã.+ A segd n wʋg-a-la ne sãnem, gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la lẽ gĩs-bãanes wa efoodã.*+ 16 B sã n põd-a a yiibu, a woglmã ne a yalmã segd n yɩɩ yembre. A woglmã na n yɩɩ nug-yakemde,* t’a yalmã me yɩ nug-yakemde. 17 Fo segd n ninga kug a zugu. Na n yɩɩ kug ruls a naase. Pipi rulgã yaa rubi, topaaz la emeroode. 18 Rulg a yiib-n-soabã yaa tirkowaaze, safɩɩr la zaspe. 19 Rulg a tãab-n-soabã yaa lesɛm kugri,* agat la ametisti. 20 Rulg a naas-n-soabã yaa kirzoliti, onigs la zaade. B segd n yõga bũmb ne sãnem n sag kugã b pʋsẽ. 21 Kugã na n zemsa a Israyɛll kom-dibli piig la a yiibã yʋya. B segd n gʋla kugr fãa wa bũmb sẽn tar n ningd bãnde, tɩ yʋʋr fãa yɩ buud a yembre, buud piig la a yiibã sʋka.

22 “Fo segd n maana bãens sẽn kal taab yãoog lutgã yĩnga, tɩ yɩ wa sãnem halaal wĩya.+ 23 Fo segd n maana sãnem tuiids a yiib yãoog lutgã yĩnga, n sẽb tuiids a yiibã yãoog lutgã noy a yiibã. 24 Fo segd n tuii sãnem wĩy a yiibã tuiids a yiibã sẽn be yãoog lutgã noyẽ wã. 25 Fo na n tuii wĩy a yiibã noyã bũmb a yiib nins b sẽn yõg n na n sag kugã pʋsẽ. Fo segd n sẽb-b-la efoodã* bãgdẽ, a taoorã. 26 Fo segd n maana sãnem tuiids a yiibu, n sẽb-b yãoog lutgã noy a yiib nins sẽn be pʋgẽ n tees efoodã.*+ 27 Fo segd n maana sãnem tuiids a yiib a taab n ning efoodã* taoore, bãgd a yiibã tẽngre, zĩig ning b sẽn sog taabã sɛɛga, rat n yeel tɩ efoodã sẽbdgã b sẽn wʋgã zugẽ.+ 28 Wĩir sẽn yaa kẽeg haoo* n segd n gãd yãoog lutgã t’a pa a zĩigẽ. A na n sẽbga yãoog lutgã tuiidsã ne efoodã* tuiidsã ne taaba. Rẽ n na n kɩt tɩ yãoog lutgã pa a zĩigẽ fu-koɛɛgã zugu, rat n yeel tɩ sẽbdgã b sẽn wʋgã zugẽ.

29 “A Aarõ sã n wa kẽed Zĩ-sõngã pʋgẽ, a segd n zãada a Israyɛll kom-dibli wã yʋy yãoog lutgã b sẽn tar n kaood bʋʋdã zugu, rat n yeel t’a sũurã zugu, tɩ yɩ tẽegr a Zeova taoor wakat fãa. 30 Fo na n ninga Urimmã ne Tumimmã*+ yãoog lutgã b sẽn tar n kaood bʋʋdã pʋgẽ. B segd n zĩnda a Aarõ sũurã zug a sã n wa kẽed a Zeova taoore. A Aarõ segd n zãada bũmb nins b sẽn tar n kaood Israyɛll nebã bʋʋdã a sũurã zug a Zeova taoor wakat fãa.

31 “Fo segd n wʋga efoodã* kobr sẽn yaa bãg-vɩɩdã tõr ne gĩs sẽn yaa kẽeg haoo.*+ 32 Loor n na n zĩnd kobrã zugẽ wã,* a tẽn-sʋkã. Sʋn-wʋgd n segd n wʋg loorã noor n gilg zãnga. A segd n yɩɩ wa tãb-biig fuug loore, sẽn na yɩl t’a ra wa kẽeg ye. 33 Fo segd n maana bõn-gils sẽn wõnd gernaad tɩɩg biis ne gĩs sẽn yaa kẽeg haoo,* rũms kõbd gĩs sẽn yaa miid-miidu, la ne gĩs-moaam n gilg kobrã tẽngrã, n paas sãnem loamba bõn-gilsã sʋgse. 34 Fo segd n lɩʋʋsa sãnem loamba wã ne bõn-gilsã n gilg kobr sẽn yaa bãg-vɩɩdã tẽngr zãnga. 35 A Aarõ segd n yeelga kobrã n tõog n tʋm maan-kʋʋr tʋʋmdã. B segd n wʋmda a rãamdã a sẽn wat n kẽed zĩ-sõngẽ wã, rat n yeel t’a Zeova taoore, la a sẽn wat n yita, sẽn na yɩl t’a ra wa ki ye.+

36 “Fo segd n maana sãnem halaal bõn-paklg sẽn pɩnda, n gʋl a zug wa b sẽn gʋnd bũmb b sẽn tar n ningd bãnde. Gʋls yaa: ‘Sõmblem yita a Zeova nengẽ.’+ 37 Fo segd n talla wĩir sẽn yaa kẽeg haoo* n loe-a ne zu-vindgã.+ A segd n paa zu-vindgã taoore. 38 A na n zĩnda a Aarõ rĩirẽ wã, tɩ ned sã n maan yel-wẽnd bõn-sõamyã wã wɛɛngẽ+ bɩ yellã zĩnd a Aarõ zugu. Yaa bũmb nins Israyɛll nebã sẽn kõt tɩ yaa kũun sẽn welg toor n yaa sõngã. Bõn-paklgã segd n paa a Aarõ rĩirẽ wã wakat fãa, sẽn na yɩl tɩ Israyɛll nebã tõog n ta a Zeova yam.

39 “Fo segd n wʋga kasaabã ne lẽ gĩs-bãanese. Wʋg zu-vindg ne lẽ gĩs-bãanese, la f wʋg sẽbdga.+

40 “Sẽn paase, fo na n wʋga kasaabse, sẽbds la pugli a Aarõ kom-dibli wã+ yĩnga, sẽn na yɩl tɩ b tall ziir la b yɩ neeba.+ 41 Fo na n yeelga f ba-biig a Aarõ ne a kom-dibli wã b futã. Fo segd n zae-b-la kaam,+ n zĩnig-b maan-kʋʋrã tʋʋmd pʋgẽ,+ la f welg-b toore, tɩ b yɩ mam maan-kʋʋdba. 42 Wʋg kur-koees* me ne lẽ gĩsi, n kõ-b tɩ b lud b yãndã.+ Kur-koeesã segd n sɩnga seesã n tãag gɛyã. 43 A Aarõ ne a kom-dibli wã segd n tão-b-la b sẽn wat n kẽed sɛk-roogẽ wã, wall b sẽn wat n kolgd tẽn-kugrã n na n tʋm zĩ-sõngã pʋgẽ, sẽn na yɩl tɩ b ra wa paam taal n ki ye. Woto na n yɩɩ noor sẽn paad wakat fãa yẽ ne a yagensã sẽn na n pʋgl-a wã yĩnga.

29 “Ad bũmb ning fo sẽn segd n maan n welg-b toor tɩ b yɩ mam maan-kʋʋdbã: Bao lol-poll ne pe-raad a yiib sẽn pa tar zamse,+ 2 bur sẽn pa ning rabɩlle, bur sẽn pa ning rabɩll la sẽn yaa gils wa maanf n kalem kaam, la bur-pakls sẽn pa ning rabɩll n mes kaam.+ Fo segd n maana burã ne bɩle zom-bãanega, 3 n ning-b yaag pʋgẽ. Fo segd n tall-b-la ne yaagã,+ n paas loalgã ne pe-raad a yiibã n wa mam taoore.

4 “Fo na n talla a Aarõ ne a kom-dibli wã n wa sɛk-roogã rignoorẽ,+ n so-b koom.+ 5 Rẽ poore, fo segd n dɩka kasaabã, efoodã* kobr sẽn yaa bãg-vɩɩdã, fu-koɛɛgã, la yãoog lutgã+ n yeelg a Aarõ, la f sẽbg a sɛɛgã kãn-kãe ne efoodã sẽbdgã b sẽn wʋgã.+ 6 Fo na n dɩka zu-vindgã n vil a zugã, la f ning sãnem bõn-paklgã sẽn yaa sõngã* zu-vindgã+ zugu, 7 la f rɩk zaeebã kaam+ n kɩrg a zugã, sẽn na yɩl t’a lebg maan-kʋʋda.+

8 “Rẽ poor bɩ f tall a kom-dibli wã n kolge, n dɩk kasaabsã n yeelg-ba,+ 9 la f sẽbg b seesã ne sẽbdsã, rat n yeel t’a Aarõ ne a kom-dibli wã fãa, la f fõgen-b pugli wã. Maan-kʋʋrã tʋʋmd segd n lebga bãmb dẽnda. Yaa mam noor sẽn paad wakat fãa.+ Yaa woto la fo segd n maan n zĩnig a Aarõ ne a kom-dibli wã mam maan-kʋʋrã tʋʋmd pʋgẽ.+

10 “Rẽ poore, fo segd n talla loalgã n wa sɛk-roogã rignoorẽ, t’a Aarõ ne a kom-dibli wã tik loalgã zugã ne b nusã.+ 11 Kodg loalgã a Zeova taoore, sɛk-roogã rignoorẽ.+ 12 Tẽk loalgã zɩɩmã ne f nug-bilã n ning tẽn-kugrã yɩɩl zutu,+ la f kiig zɩɩmã sẽn ketã fãa tẽn-kugrã sɛɛgẽ.+ 13 Rẽ poor bɩ f yãk kaamã fãa+ sẽn lud yãadã, sãoorã kaamã, la yiim a yiibã n paas b kaamã, n yõog sẽn na yɩl tɩ b bug-zõosã nus tẽn-kugrã zugu.+ 14 La fo na n talla loalgã nemdã ne a gãongã, la a bĩndã n yi sik-zĩigã kɩreng n yõoge. Yaa yel-wẽnd maoongo.

15 “Rẽ poor bɩ f kolg ne pe-raoog a yembre. A Aarõ ne a kom-dibli wã segd n tika pe-raoogã zugã ne b nusã.+ 16 Kodg pe-raoogã, n yãk a zɩɩmã n mes tẽn-kugrã kɩremsã fãa.+ 17 Bees pe-raoogã wa sẽn zems a babs toor-toorã, la f pek a yãadã+ ne a karsã, n maneg n dɩgl fãa ne a zugã tẽn-kugrã zugu. 18 Fo segd n yõoga pe-raoogã tõre, n kɩt t’a bug-zõosã nus tẽn-kugrã zugu. Yaa maoong sẽn yõogd bugum a Zeova yĩnga, tɩ tar yũ-noogo.*+ Yaa maoong b sẽn maand ne bugum n kõ a Zeova.

19 “Rẽ zugẽ, fo segd n kolga ne pe-raoog a to wã. A Aarõ ne a kom-dibli wã segd n tika pe-raoogã zugã ne b nusi.+ 20 Kodg pe-raoogã n yãk a zɩɩmã n tẽk a Aarõ rɩtg tʋbrã, la a kom-dibli wã rɩtg tʋbã, la f tẽgs b rɩtg nug-raadã, ne b rɩtg na-raadã, la f mes tẽn-kugrã kɩremsã fãa ne zɩɩmã. 21 Yãk zɩɩmã sẽn be tẽn-kugrã zugã la f yãk zaeebã kaam,+ n mes a Aarõ ne a futã, la f mes a kom-dibli wã ne b futã, sẽn na yɩl tɩ yẽ ne a futã, la a kom-dibli wã ne b futã lebg sõamyã.+

22 “Rẽ poore, yãk pe-raoogã kaamã, zʋʋrã sẽn tar kaamã, kaamã sẽn lud yãadã, sãoorã kaamã, yiim a yiibã ne b kaamã,+ n paas rɩtg gerã, bala yaa maan-kʋʋdbã zĩnigr pe-raoogo.+ 23 Sẽn paase, yãk bur-gilga, bur sẽn yaa gilg wa maanf b sẽn maan ne kaam, la bur-paklga, burã sẽn pa ning rabɩllã yaagã sẽn be a Zeova taoorã pʋgẽ. 24 Fo segd n ninga b fãa a Aarõ nusẽ, la a kom-dibli wã nusẽ, la fo segd n yuum-b-la poorẽ la taoore, tɩ yɩ maoong b sẽn yuumd a Zeova taoore. 25 Rẽ poore, fo na n deeg-b-la b nusẽ wã, n yõog tẽn-kugrã zugu, maoong sẽn yõogd bugmã zugu, tɩ yɩ yũug sẽn noom a Zeova. Yaa maoong b sẽn maand ne bugum n kõ a Zeova.

26 “Rɩk maan-kʋʋdbã zĩnigr pe-raoogã yãoogo,+ rat n yeel tɩ pe-raoogã b sẽn kõ a Aarõ yĩngã, n yuum poorẽ la taoor tɩ yɩ maoong b sẽn yuumd a Zeova taoore. Rẽ na n lebga fo pʋɩɩre. 27 Fo segd n welga maoong b sẽn yuumdã yãoogã ne pʋɩɩr sẽn yaa sõngã b sẽn yuumã ger toore. Yaa b sẽn yãk b rãmb maan-kʋʋdbã zĩnigr pe-raoogẽ wã,+ rat n yeel tɩ bũmb ning b sẽn maan maoong a Aarõ ne a kom-dibli wã yĩngã. 28 Rẽ na n lebga a Aarõ ne a kom-dibli wã rẽnda. Yaa noor Israyɛll nebã sẽn segd n tũ wakat fãa, bala rẽ yaa pʋɩɩr sẽn yaa sõngo. Rẽ na n lebga pʋɩɩr sẽn yaa sõng Israyɛll nebã sẽn na n kõtẽ.+ Yaa Israyɛll nebã pʋɩɩr sẽn yaa sõng a Zeova yĩnga, tɩ b na n yãkd b zems-n-taar maandã pʋsẽ.+

29 “A Aarõ kom-dibli wã+ n na n yer a futã sẽn yaa sõamyã wã+ yẽ loogr poore, b sã n wa zae-b n zĩnig-b maan-kʋʋrã tʋʋmd pʋgẽ. 30 A kom-dibli wã sʋk maan-kʋʋd ning sẽn na n ledg-a wã, la sẽn na n kẽed sɛk-roogẽ wã n tʋmd zĩ-sõngã pʋgẽ wã na n yeelga fu-kãens rasem a yopoe.+

31 “Fo na n dɩka maan-kʋʋdbã zĩnigr pe-raoogã n dʋg a nemdã zĩig sẽn yaa sõng pʋgẽ.+ 32 A Aarõ ne a kom-dibli wã na n wãba+ pe-raoogã nemd sɛk-roogã rignoorẽ, ne burã sẽn be yaagẽ wã. 33 B segd n wãba bũmb nins b sẽn tall n maan paasgo,* n zĩnig-b maan-kʋʋrã tʋʋmd pʋgẽ la b welg-b toorã. La ned sẽn pa tar sor* pa segd n wãb bõn-kãense, bala b yaa sõamyã.+ 34 Maan-kʋʋdbã zĩnigr maoongã nemd la burã sã n kell n tãag yibeoogo, fo segd n yõoga kellã bugmẽ.+ B pa segd n wãb-b ye. Bala b yaa sõamyã.

35 “Fo segd n maana a Aarõ ne a kom-dibli wã wa sẽn zems bũmb nins fãa mam sẽn yeel foomã. Fo na n dɩka rasem a yopoe n zĩnig-b maan-kʋʋrã tʋʋmd pʋgẽ.+ 36 Daar fãa, fo na n kʋʋ loalg tɩ yɩ yel-wẽnd maoong n maan paasgo. Fo segd n maana paasg tẽn-kugrã yĩnga, n yɩlg-a ne yel-wẽndã. Fo segd n zae-a lame sẽn na yɩl t’a welg toore.+ 37 Fo na n dɩka rasem a yopoe n maan paasg tẽn-kugrã yĩnga. Fo segd n welg-a-la toor sẽn na yɩl t’a lebg tẽn-kugr sẽn yaa sõng wʋsgo.+ Ned ning fãa sẽn sɩɩsd tẽn-kugrã segd n yɩɩ sõngo.

38 “Ad bũmb nins fo sẽn na n kõt tẽn-kugrã zugã: Daar fãa, yaa pe-raad a yiib sẽn tar yʋʋmde. Segd n yɩɩ wakat fãa.+ 39 Kʋ pe-ra-poll a ye wã yibeoog tɩ yɩ maoongo, la f kʋ a to wã zĩ-sobdo.+ 40 Zom-bãaneg efa* pʋɩɩr a ye pʋɩ piig zug sẽn kalem ne oliiv kaam hĩn* pʋɩɩr a ye pʋɩ a naas zugu, n paas divẽ kũun hĩn pʋɩɩr a ye pʋɩ a naas zug la b na n naag pipi pe-ra-pollã n kõ. 41 Fo na n kõo pe-raoog a yiib-n-soabã zĩ-sobdo, ne zom-bãaneg wa yibeoogã zom-bãanegã, n paas divẽ kũun wa yibeoogã divẽ kũunã. Fo na n kõ-a lame tɩ yɩ yũug sẽn noome,* rat n yeel tɩ maoong b sẽn maand ne bugum n kõ a Zeova. 42 Na n yɩɩ maoong sẽn yõogd bugum wakat fãa, yãmb zãmaan-dãmbã fãa pʋsẽ, b sẽn kõt sɛk-roogã rignoor a Zeova taoore, zĩig ning mam sẽn na n vẽneg m meng ne yãmb n gom ne foomã.+

43 “Mam na n vẽnega m meng ne Israyɛll nebã be, la a na n yɩɩ sõng mam ziirã maasem yĩnga.+ 44 Mam na n welga sɛk-roogã ne tẽn-kugrã toore, la m welg a Aarõ ne a kom-dibli wã me toore,+ tɩ b yɩ mam maan-kʋʋdba. 45 Mam na n zĩnda* Israyɛll nebã sʋka, n yɩ b Wẽnnaam.+ 46 Hakɩɩka, b na n bãngame tɩ mam yaa a Zeova sẽn yaa b Wẽnnaamã, n yaa soab ning sẽn yiis-b Ezɩpt soolmẽ wã n na n zĩnd b sʋkã.+ Mam yaa a Zeova sẽn yaa b Wẽnnaamã.

30 “Fo segd n maana tẽn-kugr tɩ b yõogd wisdu.+ Fo na n maan-a-la ne akasiya raado.+ 2 A woglmã ne a yalmã na n yɩɩ yembre. A woglmã na n yɩɩ kãntɩɩg* a ye, a yalmã kãntɩɩg a ye, a zãntlmã kãntɩɩg a yiibu. Tẽn-kugrã yɩɩlã na n naag-a lame n yɩ bũmb a yembre.+ 3 Fo segd n bolga tẽn-kugrã ne sãnem halaale: A yĩngrã, a kɩremsã fãa n gilgi, la a yɩɩlã. Fo segd n maana sãnem kogr n gilg-a. 4 Fo na n maana sãnem tuiids a yiib a kogrã tẽngre, a kɩrems a yiibã sẽn tees taabã zutu. Tuiidsã n na n zã ra-bɩlem nins b sẽn tar n zãad tẽn-kugrã. 5 Pees akasiya ra-bɩlma, n bolg-b ne sãnem. 6 Fo segd n ning-a-la fu-lilldgã sẽn pẽ Kasetã koglgã+ taoore, rat n yeel tɩ limdã sẽn lud Kasetã kug-walsã taoore, zĩig ning mam sẽn na n vẽneg m meng ne foomã.+

7 “Yibeoog fãa, a Aarõ+ na n yõoga wisd sẽn tar yũ-noog+ tẽn-kugrã zugu,+ n kɩt t’a bug-zõosã nus tẽn-kugrã zugu, a sã n wa manegd fɩtl-dãmbã.+ 8 Sẽn paase, a Aarõ sã n wa yõgend fɩtl-dãmbã zĩ-sobdo, a na n yõoga wisdã. Yaa wisd b sẽn na n kõt wakat fãa tɩ yɩ maoong a Zeova taoore, yãmb zãmaan-dãmbã fãa pʋsẽ. 9 Yãmb pa segd n yõog wisd mam sẽn pa kõ sor tɩ y yõog+ a zugu, wall y yõog maoong sẽn yõogd bugum a zugu, pa rẽ bɩ y kõ kood biis kũun a zug ye. Yãmb pa segd me n pʋdg divẽ kũun tẽn-kugrã zug ye. 10 Yʋʋmd fãa, a Aarõ segd n maana paasg* tẽn-kugrã yɩɩlã zut vugri.+ A na n yãka yel-wẽndã paasg maoongã zɩɩm+ n maan paasg vugr yʋʋmd fãa, yãmb zãmaan-dãmbã fãa pʋsẽ. Tẽn-kugrã yaa sõng wʋsg a Zeova yĩnga.”

11 Rẽ poore, a Zeova yeela a Moyiiz yaa: 12 “Wakat ning fãa fo sẽn na n sõd Israyɛll rapã,+ b ned kam fãa segd n kõo a Zeova yaood a vɩɩmã* yĩng sõadgã wakate. Yaa sẽn na yɩl tɩ b ra wa kɩt tɩ bã-loangdg yõk-b b sẽn wat n sõt-bã ye. 13 Ad bũmb ning b sẽn sõd b rãmbã fãa sẽn na n kõ: Yaa sɩkl* pʋɩ-sʋk wa sẽn zems zĩ-sõngã sɩklã.*+ Geera* pisi zema sɩkl a ye. Kũun ning b sẽn na n kõ a Zeova wã segd n yɩɩ sɩkl pʋɩ-sʋka.+ 14 Ned ning fãa b sẽn na n sõd t’a yʋʋmã ta pisi bɩ sẽn yɩɩd rẽ na n kõo a Zeova kũunã.+ 15 Sẽn na yɩl n kõ a Zeova kũun n maan paasg y vɩɩmã* yĩnga, rakãagr pa segd n kõ tɩ yɩɩg sɩkl* pʋɩ-sʋka, tɩ naong soab me pa segd n kõ tɩ pa ta rẽ ye. 16 Fo segd n deega paasgã wanzuri ligdã Israyɛll nebã nengẽ n kõ sɛk-roogã tʋʋm yĩnga, sẽn na yɩl t’a yɩ tẽegr a Zeova taoor Israyɛll nebã yĩnga, n maan paasg y vɩɩmã* yĩnga.”

17 A Zeova le goma ne a Moyiiz n yeele: 18 “Maan zũud la-pok ne a roagendga, koom waasg yĩnga.+ Rẽ poor bɩ f rɩgl-a sɛk-roogã ne tẽn-kugrã sʋka, n ning koom a pʋgẽ.+ 19 A Aarõ ne a kom-dibli wã na n waasda b nusã ne b naoã be.+ 20 B sã n wa na n kẽ sɛk-roogẽ wã wall b kolg tẽn-kugrã n tʋme, la b maan maand sẽn yõogd bugum n kõ a Zeova sẽn na yɩl tɩ maandã bug-zõos zẽke, b na n waasa koom n da wa ki ye. 21 B segd n waasa b nusã ne b naoã n da wa ki ye. Na n yɩɩ noor b sẽn segd n tũ wakat fãa, rat n yeel t’a Aarõ ne a kambã la a yagensã, b zãmaan-dãmbã fãa pʋsẽ.”+

22 A Zeova le yeela a Moyiiz yaa: 23 “Rẽ poore, bao parfẽ-rãmb nins sẽn yaa sõma n yɩɩda: Yaa miir* sẽn kʋɩ sɩkl kobs-nu, sinamon sẽn tar yũ-noog sɩkl kobs-yi la pis-nu, roozo sẽn tar yũ-noog sɩkl kobs-yi la pis-nu, 24 la kass sɩkl kobs-nu wa sẽn zems zĩ-sõngã sɩklã,*+ n paas oliiv kaam hĩn* a yembre. 25 Tall-b n maan zaeeb kaam sẽn yaa sõngo. B segd n maaga b yĩng n kalem-b taaba.*+ A segd n yɩɩ zaeeb kaam sẽn yaa sõngo.

26 “Fo segd n tall-a lame n zae sɛk-roogã+ ne Kasetã koglgo, 27 n paas taablã ne a teedã fãa, fɩtl-doagendgã ne a teedã, wisdã tẽn-kugri, 28 maoong sẽn yõogd bugmã tẽn-kugr ne a teedã fãa, la la-pokã ne a roagendgã. 29 Fo segd n welg-b-la toor sẽn na yɩl tɩ b yɩ sõng wʋsgo.+ Ned ning fãa sẽn sɩɩsd-b segd n yɩɩ sõngo.+ 30 Fo na n zaee a Aarõ+ ne a kom-dibli wã+ me, n welg-b toor tɩ b yɩ mam maan-kʋʋdba.+

31 “Fo na n goma ne Israyɛll nebã n yeel yaa: ‘Yãoã segd n kell n yɩɩ zaeeb kaam sẽn yaa sõng mam yĩng yãmb zãmaan-dãmbã pʋsẽ.+ 32 B pa segd n dɩk-a n zae ned a to ye. Yãmb pa segd n dɩk bũmb nins b sẽn tall n maan-a wã n kalem n maan bũmb ye. Yaa bũmb sẽn yaa sõngo. Ne yãmba, a segd n kell n yɩɩ bũmb sẽn yaa sõngo. 33 Ned ning fãa sẽn na n maan ka-kãngã buudu, la sẽn na n dɩk-a n zae ned sẽn pa tar sore,* b segd n yiis-a-la* a buudã sʋka.’”+

34 Rẽ poore, a Zeova yeela a Moyiiz yaa: “Bao parfẽ-rãmba:+ Yaa ɛstakte sũm, õngle, galbanom sẽn tar yũ-noogo, la wisd halaal sẽn yaa pɛɛlga. Mak-b tɩ b zem taaba. 35 Tall-b n maan wisdu.+ Fo segd n maaga f yĩng n kalem bõn-kãensã sẽn tar yũ-noogã taaba, n ning yamsem+ n maan wisd sẽn pa tar rẽgd la sẽn yaa sõngo. 36 Fo segd n yãk-a lame n wer t’a lebg zom-bãanega, la f yãk-a n ning Kasetã koglg sẽn be sɛk-roogẽ wã taoore, zĩig ning mam sẽn na n vẽneg m meng ne foomã. Ne yãmba, a segd n yɩɩ sõng wʋsgo. 37 Yãmb pa segd n tall bũmb nins b sẽn tall n maan-a wã n maan wisd y mens yĩng ye.+ Fo nifẽ, a segd n yɩɩ bũmb sẽn yaa sõng a Zeova yĩnga. 38 Ned ning fãa sẽn na n maan a wõneg sẽn na yɩl n kok a yũugã, b segd n yiis-a-la* a buudã sʋka.”

31 A Zeova le goma ne a Moyiiz n yeele: 2 “Gese! Mam yãka a Uri biig a Bɛtsalɛll+ sẽn yaa Zida buudã nedã. A Uri yaa a Huur biiga.+ 3 Mam na n kõ-a-la m vʋʋsmã, t’a paam yam la bãngre, n paas nug-tʋʋm buud toor-toor minim, 4 n tõe n mag n bãng a sẽn na n maan bũmb to-to tɩ yɩ neere, t’a tʋm ne sãnem, wanzuri, la zũudu, 5 n tõe n pees kug la a yõg bũmb n sag-ba,+ la a maan bũmb toor-toor ne raado.+ 6 Sẽn paase, mam yãka a Ahisamak biig a Oholiyaab+ sẽn yaa Dan buudã nedã t’a sõng-a. Mam na n kõo neb nins fãa sẽn tar minimã* yam, sẽn na yɩl tɩ b maan bũmb nins fãa mam sẽn yeel foomã:+ 7 Yaa sɛk-roogã,+ Kasetã koglg+ ne limdã+ sẽn be a zugã, sɛk-roogã teed fãa, 8 taablã+ ne a teedã, fɩtl-doagendgã sẽn maan ne sãnem halaalã ne a teedã fãa,+ wisd tẽn-kugrã,+ 9 maoong sẽn yõogd bugmã tẽn-kugrã+ ne a teedã fãa, la-pokã ne a roagendgã,+ 10 fut sẽn wʋg tɩ yaa neebã, fut sẽn welg toor maan-kʋʋd a Aarõ yĩngã, a kom-dibli wã fut sẽn na yɩl tɩ b yɩ maan-kʋʋdbã,+ 11 zaeebã kaamã, la wisd sẽn tar yũ-noogã sɛk-roogã yĩnga.+ B na n maana bũmb nins fãa mam sẽn yeel foomã.”

12 A Zeova le yeela a Moyiiz yaa: 13 “Gom ne Israyɛll nebã n yeel-ba: ‘Yãmb segd n tũu noor ning mam sẽn kõ vʋʋsg rayã+ wɛɛngẽ wã sõma. Bala a yaa bãnd maam ne yãmb sʋk y zãmaan-dãmbã pʋsẽ, sẽn na yɩl tɩ yãmb bãng tɩ yaa maam a Zeova n welgd yãmb toore. 14 Yãmb segd n tũu Vʋʋsg daarã noore, bala yaa bũmb sẽn yaa sõng ne yãmba.+ Sẽn kɩɩs-a vʋʋsg daarã noore, b segd n kʋ-a lame. Sẽn yaa tʋʋmd ning fãa la ned tʋm daar-n-kãnga, b segd n yiisa* nin-kãng* a buudã sʋka.+ 15 Rasem a yoob la b segd n tʋme, la rasem a yopoe-n-soabã, ned kam fãa segd n vʋʋsame, bala yaa vʋʋsg daare.+ Yaa bũmb sẽn yaa sõng a Zeova yĩnga. B segd n kʋʋ ned ning fãa sẽn tʋmd Vʋʋsg daarã. 16 Israyɛll nebã segd n tũu Vʋʋsg daarã noore. B segd n tũu Vʋʋsg daarã noorã b zãmaan-dãmbã fãa pʋsẽ. Yaa kaool sẽn paad wakat fãa. 17 Yaa bãnd sẽn paad wakat fãa maam ne Israyɛll nin-buiidã sʋka.+ Bala rasem a yoob pʋgẽ, a Zeova maana saasã la tẽngã, la rasem a yopoe-n-soabã, a basa tʋʋm n vʋʋse.’”+

18 Wẽnnaam sẽn gom ne a Moyiiz Sinayi tãngã zug n sa wã bala, a kõ-a-la Kasetã kug-wals a yiibã,+ rat n yeel tɩ kug-wals Wẽnnaam nug-bil sẽn gʋlse.+

32 Wakat kãnga, nin-buiidã gesame t’a Moyiiz kaoosda wʋsg tãngã zug n pa sigd ye.+ Dẽ, b tigma taab n gũbg a Aarõ n yeel-a yaa: “Yik n maan wẽnnaam n kõ tõnd t’a lʋɩ tõnd taoore,+ bala tõnd pa mi bũmb ning sẽn paam Moyiiz-kãngã, rao ning sẽn yiis tõnd Ezɩpt soolmẽ wã ye.” 2 Rẽ la a Aarõ yeel-b yaa: “Yãgs-y sãnem tʋb-londã+ sẽn be yãmb pagbã tʋbẽ wã, y kom-dibli wã la y kom-pugli wã tʋbẽ wã n tall n wa kõ maam.” 3 Dẽ, nin-buiidã fãa sɩnga sãnem tʋb-londã sẽn da be b tʋbẽ wã yãgsgo, n wat n kõt a Aarõ. 4 A reega sãnemã bãmb nusẽ, n maan bõn-naandg* sẽn yaa nag-bila,+ ne kɩtga. B sɩngame n yetẽ: “Israyɛll neba, ad yãmb Wẽnnaamã, soab ning sẽn yiis yãmb Ezɩpt soolmẽ wã.”+

5 A Aarõ sẽn yã rẽ wã, a maana tẽn-kugr bõn-naandgã taoore, la a zẽk a koɛɛg n yeele: “Beoogo, tigr n na n zĩnd a Zeova yĩnga.” 6 Dẽ, b yika vẽkembeoogã yibeoog pĩnda, n sɩng maand sẽn yõogd bugum la zems-n-taar maand kũuni. Rẽ poore, nebã zĩndame n dɩ la b yũ, la b yik n deeme.+

7 A Zeova yeela a Moyiiz yaa: “Kẽng n sigi, bala fo nebã fo sẽn yiis Ezɩpt soolmẽ wã sãama b mense.+ 8 B bʋdga tao-tao n bas sor ning mam sẽn yeel tɩ b tũ wã.+ B maana bõn-naandg* sẽn yaa nag-bil b mens yĩnga, n wõgemded a taoore, la b maand maand n kõt-a, n yetẽ: ‘Israyɛll neba, ad yãmb Wẽnnaamã, soab ning sẽn yiis yãmb Ezɩpt soolmẽ wã.’” 9 A Zeova le yeela a Moyiiz yaa: “Mam yãame tɩ nin-kãensã yaa nin-buiid sẽn yaa tõatba.+ 10 Mam sũurã yika wʋsgo. Woto wã, bas tɩ m sãam-b la m kɩt tɩ fo lebg bu-kãsenga.”+

11 Dẽ, a Moyiiz yõka a Zeova sẽn yaa yẽ Wẽnnaamã sɛɛg+ n yeele: “Zeova, bõe yĩng tɩ fo na n bas tɩ f sũ-puugrã kɩt tɩ f maan f nin-buiidã woto, fo sẽn yiis-b Ezɩpt soolmã pʋgẽ ne pãn-kãseng la ne nug sẽn tar pãngã poore?+ 12 Bõe yĩng tɩ Ezɩpt nebã na n yeele: ‘A sẽn wa n yiisd-b Ezɩpt soolmẽ wã t’a tara yam-wẽnga. A ra rat n tɩ kʋ-b-la tãensẽ wã, n menes-b dũniyã gill zugu’?+ Sik f sũuri, la f toeem yam n da kɩt tɩ to-kãngã paam f nin-buiidã ye. 13 Tẽeg f tʋm-tʋmdb a Abrahaam, a Izaak la a Israyɛll yelle. Fo wẽena ne f meng n yeel-b yaa: ‘Mam na n kɩtame tɩ y yagensã lebg wʋsg wa ãdsã sẽn be saasẽ wã.+ Mam na n kõo yãmb yagensã tẽn-kãngã fãa mam sẽn wilgã, tɩ b soog-a wakat fãa.’”+

14 Dẽ, a Zeova toeema yam n pa na n le kɩt tɩ toog ning yell a sẽn da gomã paam a nin-buiidã ye.+

15 Rẽ poore, a Moyiiz lebgame n sig tãngã zug ne Kasetã kug-wals+ a yiibã a nugẽ.+ Walsã nens a yiibã ra gʋlsame. B ra gʋlsa poorẽ la taoore. 16 Kug-walsã ra yaa Wẽnnaam nug tʋʋmde, tɩ gʋlsmã yaa Wẽnnaam gʋlsem b sẽn gʋl walsã zutu.+ 17 A Zozuwe sẽn wʋm nin-buiidã bʋʋrã b sẽn da kaasdã yĩngã, a yeela a Moyiiz yaa: “Zabr dãamd n be sik-zĩigẽ wã.” 18 La a Moyiiz yeelame:

19 A Moyiiz sẽn pẽneg sik-zĩigã bal n yã nag-bilã+ la nebã sẽn saoodã, a sũurã yika wʋsg t’a lob walsã sẽn da be a nusẽ wã, tɩ b wã tãngã sɛɛgẽ.+ 20 A rɩka nag-bilã b sẽn da maanã n yõog-a bugmẽ la a wer-a t’a lebg zom.+ Rẽ poore, a fẽrg-a-la koomẽ wã n kɩt tɩ Israyɛll nebã yũ-a.+ 21 A Moyiiz soka a Aarõ yaa: “Nin-kãensã maana foo bõe, tɩ fo kɩt tɩ b maan yel-wẽn-kãseng a woto?” 22 T’a Aarõ leok yaa: “M zu-soaba, ra yik-y y sũur ye. Yãmb mengã miime tɩ nin-buiidã nonga wẽng maanego.+ 23 B yeela maam yaa: ‘Maan wẽnnaam n kõ tõnd t’a lʋɩ tõnd taoore, bala tõnd pa mi bũmb ning sẽn paam Moyiiz-kãngã, rao ning sẽn yiis tõnd Ezɩpt soolmẽ wã ye.’+ 24 Rẽ la mam yeel-b yaa: ‘Bɩ ned ning fãa sẽn tar sãnem pidg n wa kõ maam.’ Dẽ, mam loba sãnemã bugmẽ wã, tɩ nag-bi-kãngã yi be.”

25 A Moyiiz yãame tɩ nin-buiidã wɛgmame, bala a Aarõ basame tɩ b wɛgme, hal n ning b mens yãnd b bɛɛbã taoore. 26 Dẽ, a Moyiiz yalsa sik-zĩigã noore, n yeele: “Ãnda n be a Zeova poorẽ? Bɩ a wa mam nengẽ!”+ La Levi buudã fãa tɩ tigma taab n gũbg-a. 27 Rẽ la a yeel-b yaa: “Ad Israyɛll Wẽnnaam a Zeova sẽn yeele: ‘Bɩ yãmb ned kam fãa sẽbg a sʋʋga, n kẽ sik-zĩigã fãa pʋgẽ, noor a ye n tãag a to, n kʋ a ba-biiga, a yaka, la a zoa.’”+ 28 Levi nebã maana bũmb ning a Moyiiz sẽn yeelã. Woto, b kʋʋ na maan neb tus a tãab daar-n-kãnga. 29 Rẽ poore, a Moyiiz yeelame: “Welg-y y mens toor rũndã a Zeova yĩnga, bala yãmb ned kam fãa zaba ne a meng biiga, la a meng ba-biiga.+ Rũndã, a na n ninga yãmb barka.”+

30 Daar-n-kãng vẽkembeoogã, a Moyiiz yeela nin-buiidã yaa: “Yãmb maana yel-wẽnd sẽn yaa kãseng wʋsgo. Masã, mam na n dʋʋ a Zeova nengẽ, n ges m sã n pa tõe n maan bũmb t’a kõ yãmb sugr y yel-wẽndã yĩnga.”+ 31 Dẽ, a Moyiiz lebg n leba a Zeova nengẽ, n tɩ yeele: “Ad sɩd yaa yel-wẽn-kãseng la nin-kãensã sẽn maanã! B maana wẽnnaam ne sãnem b mens yĩnga!+ 32 La sã n taa f yam, bɩ f kõ-b sugr b yel-wẽndã yĩnga.+ Fo sã n pa na n kõ-b sugri, bɩ m bõos tɩ f yẽes mam yʋʋrã f sebrã f sẽn gʋlsã pʋgẽ.”+ 33 La a Zeova yeela a Moyiiz yaa: “Yaa ned ning sẽn beeg maamã yʋʋr la m na n yẽes m sebrã pʋgẽ. 34 Masã, tɩ tall nin-buiidã n kẽng zĩig ning yell mam sẽn da gom ne foomã. Ade! Mam malɛkã na n lʋɩɩ fo taoor n kẽne,+ la daar ning mam sẽn na n sok-bã, mam na n sɩbg-b-la b yel-wẽndã yĩnga.” 35 Dẽ, a Zeova sɩnga nin-buiidã sɩbgr nag-bilã b sẽn maanã yĩnga, rat n yeel t’a Aarõ sẽn maan a soabã.

33 A Zeova le yeela a Moyiiz yaa: “Rɩk sor n yi ka, foo ne neb nins fo sẽn yiis Ezɩpt soolmẽ wã. Kẽng tẽng ning mam sẽn wẽen a Abrahaam, a Izaak la a Zakoob n yeel tɩ m na n kõ-a-la b yagensã.+ 2 Mam na n tʋma malɛk t’a lʋɩ fo taoore,+ la m dig Kanaã nebã, Amoor nebã, Hɛt nebã, Perɛɛz nebã, Hevi nebã, la Zebuus nebã.+ 3 Kẽng tẽng sẽn pid ne bĩisim la sɩɩd pʋgẽ.+ La mam pa na n tũ yãmb ye. Bala yãmb yaa nin-buiid sẽn yaa tõatba,+ tɩ m tõe n wa sãam y fãa sorã zugu.”+

4 Nin-buiidã sẽn wʋm gom-kãensã sẽn yaa toogã, b sũyã sãama wʋsgo, tɩ b ned baa a ye pa ning a fan-teed ye. 5 A Zeova yeela a Moyiiz yaa: “Yeel Israyɛll nebã yaa: ‘Yãmb yaa nin-buiid sẽn yaa tõatba.+ Wakat bilf pʋgẽ, mam tõe n kẽe yãmb sʋk n sãam yãmb fãa.+ Woto wã, bɩ y ra le ning y fan-teedã, tɩ m tags n ges m sẽn na n maan-y bũmb ninga.’” 6 Dẽ, sẽn sɩng ne Horɛɛb tãngã tɛka, Israyɛll nebã pa le ning b fan-teedã ye.*

7 A Moyiiz luka a fu-roogã n yi sik-zĩigã n zãag bilf n tilgi. A bool-a lame tɩ sɛk-roogo. Ned sã n da rat n sok a Zeova bũmbu,+ a yita sik-zĩigã kɩreng n kẽng sɛk-roogẽ wã. 8 A Moyiiz sã n da yi n na n kẽng sɛk-roogẽ wã bala, nin-buiidã fãa yikdame n yaas b fu-rotã noya. B ra geta a Moyiiz hal t’a tɩ kẽ sɛk-roogẽ wã. 9 A Moyiiz sã n da kẽ sɛk-roogẽ wã bala, sawadgã+ ra sigdame n yals sɛk-roogã rignoore, tɩ Wẽnnaam gomd ne a Moyiizi.+ 10 Nin-buiidã sã n wa yã sawadgã sẽn yas sɛk-roogã rignoorẽ, b ned kam fãa yikdame n wõgemd a fu-roog noore. 11 A Zeova ra gomda ne a Moyiiz neng ne nenga,+ wa ninsaal sẽn na n gom ne a to. A Moyiiz sã n da leb sik-zĩigẽ wã, a Nun biig a Zozuwe+ sẽn da yaa a sõangd la a tʋm-tʋmdã+ ra pa loogd n bas sɛk-roogã ye.

12 A Moyiiz yeela a Zeova yaa: “Yãmb yeta maam tɩ m ‘tall nin-kãensã n looge,’ la yãmb pa wilg maam yãmb sẽn na n tʋm a soab t’a yãag maamã ye. Sẽn paase, yãmb yeelame: ‘Mam mii fo yʋʋrã.* Fo taa mam yam me.’ 13 Mam sã n taa yãmb yam, bɩ m bõos tɩ y kɩt tɩ m bãng y soayã,+ sẽn na yɩl n bãng yãmba, la m kell n ta y yam. Tẽeg-y me tɩ bu-kãngã yaa yãmb neba.”+ 14 Tɩ Wẽnnaam yeel yaa: “Mam mengã* n na n yãag foo,+ la m kɩt tɩ f paam bãane.”+ 15 T’a Moyiiz yeel-a yaa: “Yãmb mengã* sã n pa na n tũ, bɩ y ra kɩt tɩ d yi ka ye. 16 Nebã na n yɩɩ wãn n bãng tɩ maam ne yãmb nin-buiidã taa y yam? Rẽ yĩnga, pa y sẽn na n yãag tõndo,+ sẽn na yɩl tɩ maam ne y nin-buiidã yɩ toor ne buud a taabã sẽn be tẽngã zugã sɩda?”+

17 A Zeova le yeela a Moyiiz yaa: “Mam na n maana bõn-kãngã me fo sẽn kosã, bala fo yaa ned sẽn ta mam yam. Sẽn paase, mam mii fo yʋʋrã.” 18 T’a yeel yaa: “M bõos tɩ y wilg maam y ziirã.” 19 La Wẽnnaam yeelame: “Mam na n kɩtame tɩ m ziirã* fãa pɩʋʋg fo taoore, la mam na n moona mam yʋʋrã sẽn yaa Zeova wã+ fo taoore. Mam na n maana m sẽn dat a soab lohorem, la m zoe m sẽn dat a soab nimbãanega.”+ 20 La a paasame: “Fo pa tõe n yã mam nengã ye. Bala ninsaal baa a ye pa tõe n yã maam la a kell n vɩɩmd ye.”

21 A Zeova le yeelame yaa: “Ad zĩig sẽn be mam sɛɛgẽ. Yaas pĩigã zugu. 22 Mam ziirã sã n wa loogdẽ, mam na n ninga foom pĩigã bokẽ, la m kogl-f ne m nugã hal tɩ m wa looge. 23 Rẽ poore, mam na n yãka m nugã tɩ fo yã mam poorã. La f pa na n yã mam nengã ye.”+

34 A Zeova yeela a Moyiiz yaa: “Pees kug-wals a yiib f meng yĩng tɩ b wõneg pipi rãmbã.+ Mam na n gʋlsa goam nins sẽn da be pipi walsã+ fo sẽn wã wã+ zutã bãmb me zutu. 2 Segl f meng beoog yibeoog yĩnga, bala beoog yibeoogo, fo na n dʋʋ Sinayi tãngã zug n yaas mam taoor tãngã zug tẽn-sʋka.+ 3 La ned baa a ye pa segd n tũ foo n dʋ ye. B pa segd n yã ned baa a ye me tãngã zug ye. Baa rũm-bõonegã wall rũm-bɛdã pa segd n wãb yamd tãn-kãng sɛɛg ye.”+

4 Dẽ, a Moyiiz peesa kug-wals a yiib sẽn wõnd pipi rãmbã, n yik yibeoog pĩnd n dʋ Sinayi tãngã wa a Zeova sẽn da yeel-a wã. A zãa kug-wals a yiibã. 5 A Zeova siga+ ne sawadgã n yaas ne a Moyiizi. La a moona a yʋʋrã sẽn yaa Zeova wã.+ 6 A Zeova ra loogda a taoor n yetẽ: “Zeova, Zeova, Wẽnnaam sẽn yaa nimbãan-zoɛta,+ la sõmblem soaba,+ sũur sẽn pa yikd tao-tao,+ la sẽn pid ne maan-neer+ la sɩda,+ 7 sẽn wilgd zãmaan tusa a nonglem,+ la sẽn kõt tudgr ne beegr la yel-wẽnd sugri.+ Baasgo, a pa na n bas ned sẽn tar taal n pa sɩbg ye.+ A sɩbgda kamb la yagense, hal n tãag b zãmaan a tãab-n-soab ne a naas-n-soaba, b ba-rãmbã beegr yĩnga.”+

8 A Moyiiz yɩɩ tao-tao n yĩgimdi, la a wõgemd tẽnga. 9 Rẽ poore, a yeelame: “Zeova, mam sã n taa yãmb yam, bɩ m bõos tɩ y zĩnd tõnd sʋk n yãag-do,+ baa tõnd sẽn yaa nin-buiid sẽn yaa tõatbã.+ Zeova, kõ-y tõnd sugr d beegrã ne d yel-wẽndã yĩnga,+ la y yãk tõnd tɩ d yɩ y rẽnda.” 10 Rẽ la a yeel yaa: “Ade! Mam maanda kaoole: Fo nebã fãa taoore, mam na n maana* bõn-kãsems sẽn zɩ n maan dũniyã gill zug bɩ buud toɛy-toɛyã fãa pʋsẽ ye.+ Buud nins sʋk yãmb sẽn be wã na n yãa a Zeova tʋʋmdã, bala yaa bõn-kãseng la m maand yãmb yĩnga.+

11 “Kelg-y noy nins mam sẽn kõt yãmb rũndã wã neere.+ Mam digda Kanaã nebã, Amoor nebã, Hɛt nebã, Perɛɛz nebã, Hevi nebã, la Zebuus nebã+ yãmb taoore. 12 Gũus-y n da wa maan kaool ne tẽng ning pʋgẽ yãmb sẽn dabdã neb ye.+ Bala rẽ tõe n wa yɩɩ bẽdg yãmb sʋka.+ 13 La yãmb segd n sãama b tẽn-kugã, n wã kugã b sẽn lugl n pʋʋsdẽ wã, la y kɛ ra-lugsã b sẽn lugl n pʋʋsdẽ* wã n lubi.+ 14 Yãmb pa segd n wõgemd wẽnnaam a to taoor ye.+ Bala a Zeova yaa Wẽnnaam sẽn dat* tɩ b tũ yẽ a ye tãa bala. A sɩd yaa Wẽnnaam sẽn dat tɩ b tũ yẽ a ye tãa bala.+ 15 Gũus-y n da wa maan kaool ne tẽngã neb ye. Bala b sã n wa waoogd* b wẽnnaam-dãmbã la b maand maand n kõt-ba,+ nina na n boola foo, la fo na n dɩɩ a maoongã rɩɩbo.+ 16 Woto, yãmb na n dɩgsa b kom-pugli wã n kõ y kom-dibli wã,+ la b kom-pugli wã na n waooga* b wẽnnaam-dãmbã, la b maan tɩ yãmb kom-dibli wã me waoog b wẽnnaam-dãmbã.+

17 “Yãmb pa segd n yõg bõn-naandg tɩ lebg yãmb wẽnnaam ye.+

18 “Yãmb segd n maanda Bur sẽn pa ning rabɩll tigrã.+ Yãmb na n wãba bur sẽn pa ning rabɩlle, wa mam sẽn yeel yãmbã. Maan-y-yã-a rasem a yopoe Abiib*+ kiuugã pʋgẽ, wakat ning mam sẽn yãkã. Bala yɩɩ Abiib kiuugã pʋg la yãmb yi Ezɩpti.

19 “Bi-rẽeng ning fãa sẽn yaa rao yaa mam dẽnda,+ n paas yãmb rũmsã fãa kom-dẽemsã, tɩ yaa naaf wall pesg pipi bi-raoogo.+ 20 Yãmb segd n teka bõang fãa pipi biig ne pesgo, la yãmb sã n pa tek-a, yãmb segd n wẽe a yublã n kaoog t’a ki. La yãmb segd n teka y kom-dẽems nins fãa sẽn yaa rapã.+ Ned baa a ye pa segd n wa mam taoor nug-zaal ye.

21 “Yãmb segd n tʋma rasem a yoobe, la rasem a yopoe-n-soabã, y na n vʋʋsame.*+ Baa sã n yaa koob wakat la kẽebg wakate, yãmb na n vʋʋsame.

22 “Sẽn paase, yãmb na n maana y Kẽebgã tigrã* ne bɩle wã dẽenem biisi, la y maan Tigsgã tigrã* yʋʋmdã baasgẽ.+

23 “Yʋʋmd fãa, yãmb rapã fãa segd n waa Israyɛll Wẽnnaam a Zeova sẽn yaa Zu-soab sɩd-sɩdã taoor naoor a tãabo.+ 24 Bala mam na n diga buud toɛy-toɛyã yãmb taoore,+ la m yalg yãmb soolmã. Yãmb sã n wa rabd yãmb Wẽnnaam a Zeova nengẽ naoor a tãab yʋʋmd fãa, ned baa a ye pa na n tʋlg yãmb tẽngã ye.

25 “Yãmb pa segd n dɩk mam maoongã zɩɩm n naag ne bũmb sẽn ning rabɩll n kõ maam ye.+ Pakã tigr maoongã pa segd n pa yʋngã n tãag yibeoog ye.+

26 “Yãmb segd n talla y pʋtã bi-rẽems nins sẽn yaa sõma n yɩɩdã n wa y Wẽnnaam a Zeova roogẽ wã.+

“Yãmb pa segd n dʋg bull a ma bĩisim pʋgẽ ye.”+

27 A Zeova le yeela a Moyiiz yaa: “Fo segd n gʋlsa gom-kãensã,+ bala yaa sẽn zems ne gom-kãensã la mam maand kaool ne foo la ne Israyɛll nebã.”+ 28 A Moyiiz paa be ne a Zeova rasem pis-naase, wĩndg la yʋngo. A pa tol n dɩ rɩɩb wall a yũ koom ye.+ A gʋlsa kaoolã goamã sẽn yaa Tõod piigã*+ kug-walsã zutu.

29 Rẽ poore, a Moyiiz siga Sinayi tãngã zugu, n da zãad Kasetã kug-wals a yiibã a nugẽ.+ A Moyiiz sẽn wa n sig tãngã zugã, a ra pa mi t’a nengã yãgdame, a sẽn da gomd ne Wẽnnaamã yĩng ye. 30 A Aarõ ne Israyɛll nebã sẽn yã a Moyiizã, b mikame t’a nengã yãgdame, tɩ b ra yɛɛsd n pa rat n pẽneg-a ye.+

31 La a Moyiiz bool-b lame. Dẽ, a Aarõ ne nin-buiidã nanambsã fãa kẽnga a Moyiiz nengẽ, t’a gom ne-ba. 32 Rẽ poore, Israyɛll nebã fãa kolga a Moyiizi, t’a taas-b noy nins fãa a Zeova sẽn kõ-a Sinayi tãngã zugã.+ 33 A Moyiiz sã n da gom ne-b n sa, a pinda a nengã ne peende.+ 34 La a Moyiiz sã n da na n kẽng a Zeova taoor n tɩ gom ne-a, a pilgda peendã hal n tãag a sẽn na n yi sɛk-roogẽ wã.+ Rẽ poore, a yitame n taas Israyɛll nebã noy nins Wẽnnaam sẽn kõ-a wã.+ 35 La Israyɛll nebã ra yãtame t’a Moyiiz nengã yãgdame. Rẽ n so t’a Moyiiz ra pind peendã yɛsa, n tãag a sẽn na n le kẽ n gom ne Wẽnnaam.+

35 A Moyiiz wa n tigma Israyɛll nebã fãa n yeel-b yaa: “Ad bũmb nins a Zeova sẽn yeel tɩ y segd n maaname wã:+ 2 Yaa rasem a yoob la y segd n tʋme, la rasem a yopoe-n-soabã na n lebga sõng ne yãmba. Yãmb ned kam fãa segd n vʋʋsame, bala yaa vʋʋsg daar a Zeova yĩnga.+ B na n kʋʋ ned ning fãa sẽn tʋmd daar-n-kãnga.+ 3 Yãmb pa segd n widg bugum y sẽn be zĩis ninsã Vʋʋsg daarã ye.”

4 Dẽ, a Moyiiz yeela Israyɛll nebã fãa yaa: “Ad a Zeova sẽn yeele: 5 ‘Yãk-y kũun y paoongã pʋgẽ n kõ a Zeova.+ Bɩ ned ning fãa sẽn dat ne a sũur fãa+ tall kũun n wa kõ a Zeova: Yaa sãnem, wanzuri, zũudu, 6 gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, lẽ* gĩs-bãanese, bʋʋs kõbdo,+ 7 pe-raad gãnd sẽn moneme, fok* gãndo, akasiya raado, 8 kaam fɩtl-dãmbã yĩnga, bomiye kaam* zaeebã kaam yĩng la wisdã sẽn tar yũ-noogã yĩnga,+ 9 onigs kuga, ne kug a taab b sẽn na n ning efoodẽ wã,*+ la yãoog lutgẽ+ wã.

10 “‘Bɩ neb nins fãa sẽn tar minim*+ yãmb sʋkã wa maan bũmb nins fãa a Zeova sẽn yeelã: 11 Yaa sɛk-roogã ne a lutgã, a sogdsã, a kaadr-dãmbã,* a ra-bɩlmã, a ra-lugsã, ne a naoã sẽn tar bogdã, 12 Koglgã+ ne a ra-bɩlmã,+ limdã+ la fu-lilldgã,+ 13 taablã+ ne a ra-bɩlmã la a teedã fãa ne burã b sẽn kõt Wẽnnaamã,*+ 14 fɩtl-doagendgã+ bugmã yĩnga, ne a teedã la a fɩtl-dãmbã ne kaamã fɩtl-dãmbã yĩnga,+ 15 wisd tẽn-kugrã+ ne a ra-bɩlmã, zaeebã kaam ne wisdã sẽn tar yũ-noogã,+ fu-lilldgã sɛk-roogã rignoor yĩnga, 16 maoong sẽn yõogd bugmã tẽn-kugrã+ ne a zũud gãmbrã, a ra-bɩlmã la a teedã fãa, la-pokã ne a roagendgã,+ 17 samandã fu-lilldsã,+ a ra-lugsã ne a naoã sẽn tar bogdã, samandã noor fu-lilldgã, 18 sɛk-roogã bayã* ne samandã bayã la b wĩyã,+ 19 futã sẽn wʋg tɩ yaa neebã+ sɛk-roogã tʋʋm yĩngã, futã sẽn welg toor maan-kʋʋd a Aarõ yĩngã,+ la a kom-dibli wã futã b sẽn na n yeelg n tʋm maan-kʋʋrã tʋʋmã.’”

20 Dẽ, Israyɛll nebã fãa yii a Moyiiz taoor n looge. 21 Rẽ poore, neb nins fãa sẽn dat n kõ ne b sũy fãa+ wã talla b kũunã n wa kõ a Zeova sẽn na yɩl tɩ b maan sɛk-roogã, teed nins b sẽn tar n tʋmd a pʋgẽ wã, la futã sẽn welg toorã. 22 Neb nins fãa sẽn dat ne b sũy fãa, pagb la rap ra wata ne sogdse,* tʋb-londo, nugbĩns la fan-teed a taaba, n paas sãnem teed buud toor-toore. B fãa talla sãnem n wa kõ a Zeova tɩ yɩ maando.*+ 23 Sẽn paase, neb nins fãa sẽn tar gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, lẽ gĩs-bãanese, bʋʋs kõbdo, pe-raad gãnd sẽn moneme, la fok* gãnd tallame n wa. 24 Neb nins fãa sẽn dat n kõ wanzuri la zũudã talla kũun n wa kõ a Zeova. Neb nins fãa sẽn tar akasiya raad tall-b lame n wa kõ tʋʋmdã yĩnga.

25 Pagb nins fãa sẽn tar minimã+ wĩi gĩs n tall n wa: Yaa gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la lẽ gĩs-bãanese. 26 Sẽn paase, pagb nins fãa sẽn tar minim la sẽn dat ne b sũy fãa wã wĩi bʋʋsã kõbdã.

27 Nanambsã waa ne onigs kug la kug a taab b sẽn na n ning efoodẽ wã, la yãoog lutgẽ+ wã, 28 ne bomiye kaam* la kaam fɩtl-dãmbã yĩnga, n paas zaeebã kaam+ yĩng la wisdã sẽn tar yũ-noogã+ yĩnga. 29 Pagb la rap nins sẽn dat ne b sũy fãa wã talla bũmb n wa kõ sẽn na yɩl tɩ b tʋm tʋʋmd ning a Zeova sẽn kɩt t’a Moyiiz yeel-b tɩ b segd n tʋmame wã. Israyɛll nebã kõo a Zeova rẽ tɩ yɩ yamleoog kũuni.+

30 Rẽ poore, a Moyiiz yeela Israyɛll nebã yaa: “Ade! A Zeova yãka a Uri biig a Bɛtsalɛll sẽn yaa Zida buudã nedã. A Uri yaa a Huur biiga.+ 31 A kõ-a-la a vʋʋsmã, t’a paam yam la bãngre, n paas nug-tʋʋm buud toor-toor minim 32 n tõe n mag n bãng a sẽn na n maan bũmb to-to tɩ yɩ neere, t’a tʋm ne sãnem, wanzuri, la zũudu, 33 n tõe n pees kug la a yõg bũmb n sag-ba, la a maan bũmb toor-toor sẽn yaa neeb ne raado. 34 Sẽn paase, Wẽnnaam kõo yẽ ne a Ahisamak biig a Oholiyaab+ sẽn yaa Dan buudã nedã bãngr tɩ b tõe n zãms neb a taaba. 35 A kõ-b-la minim*+ tɩ b tõe n tʋm fu-gʋnd tʋʋmde, la b tõe n wʋg fut ne gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la lẽ gĩs-bãanese, la b tʋm nug-tʋʋmd buud a taabã fãa. Nin-kãensã na n tʋma tʋʋm buud fãa, la b mag n bãng b sẽn na n maan bũmb toor-toor to-to.

36 “A Bɛtsalɛll na n tʋma ne a Oholiyaab la rap nins fãa sẽn tar minim,* a Zeova sẽn kõ b rãmb yam la bãngr sẽn na yɩl tɩ b bãng b sẽn na n tʋm sɛk-roogã tʋʋm to-to tɩ yɩ wa a Zeova sẽn yeelã.”+

2 Dẽ, a Moyiiz boola a Bɛtsalɛll ne a Oholiyaab la rap nins fãa sẽn tar minim t’a Zeova kõ-b yamã,+ rat n yeel tɩ neb nins fãa sũy sẽn kɩt tɩ b rat n tʋm tʋʋmdã ne yamleoogã.+ 3 B reega kũunã fãa+ Israyɛll nebã sẽn tall n wa sɛk-roogã tʋʋm yĩngã a Moyiiz nengẽ. Baa ne rẽ, Israyɛll nebã ra ket n wata ne yamleoog kũun yibeoog fãa.

4 B sẽn sɩng sɛk-roogã tʋʋmdã poore, tʋʋm-mitbã fãa ra wata yembr-yembr 5 n yet a Moyiiz yaa: “Nin-buiidã wata ne teed wʋsg tɩ yɩɩd bũmb nins sẽn yaa tɩlɛ tʋʋmd ning a Zeova sẽn yeel tɩ d tʋmã yĩnga.” 6 Rẽ n so t’a Moyiiz kɩt tɩ neb gilg sik-zĩigã n moon koɛɛg n yeele: “Rap la pagba, ra le tall-y teed n wa kõ sɛk-roogã yĩng ye.” Woto, b gɩdga nin-buiidã tɩ b ra le wa ne bũmb ye. 7 Teedã ra seka tʋʋm nins fãa b sẽn segd n tʋmã, hal n kelle.

8 Dẽ, tʋʋm-mitbã fãa+ maana sɛk-roogã+ ne lẽ* gĩs-bãanes pɛɛl piiga, gĩs sẽn yaa kẽeg haoo,* rũms kõbd gĩs sẽn yaa miid-miidu, la gĩs-moaam pɛɛla. A* gʋla seribẽ-rãmb pɛɛlã zutu.+ 9 Peend fãa woglem ra yaa kãntɩɩg* pisi la a nii, t’a yalmã yaa kãntɩɩg a naase. Pɛɛlã fãa woglmã ne b yalmã ra zema taaba. 10 A bogla pɛɛl a nu wã taaba, la a bogl a nu wã me taaba. 11 Rẽ poore, a maana bõn-gils ne gĩs sẽn yaa kẽeg haoo,* peend ning sẽn be pɛɛlã sẽn bogl taabã baasgẽ wã noore, la a maan woto me peend ning sẽn be pɛɛl a taabã sẽn bogl taabã baasgẽ wã noore, zĩig ning b sẽn na n sog taabã. 12 A maana bõn-gils pis-nu peend a ye wã noore, la a maan bõn-gils pis-nu peend a to wã noore, zĩig ning b sẽn sogd taabã, sẽn na yɩl tɩ bõn-gilsã tees taaba. 13 Sẽn na n baase, a maana sãnem sogds pis-nu n tall n sog pɛɛlã ne taaba, sẽn na yɩl tɩ sɛk-roogã lebg bũmb a yembre.

14 Rẽ poore, a wʋga pɛɛl ne bʋʋs kõbd me n pil sɛk-roogã. A wʋga pɛɛl piig la a ye.+ 15 Peend fãa woglem ra yaa kãntɩɩg pis-tã, t’a yalmã yaa kãntɩɩg a naase. Pɛɛl piig la a ye wã fãa woglmã la b yalmã ra zema taaba. 16 A bogla pɛɛl a nu wã taaba, la a bogl a yoobã me taaba. 17 Rẽ poore, a maana bõn-gils pis-nu peend ning sẽn be baasgẽ wã noore, la a maan bõn-gils pis-nu peend a to wã noore, zĩig ning b sẽn sogd taabã. 18 A maana zũud sogds pis-nu, n sog pɛɛlã taaba, tɩ sɛk-roogã lebg bũmb a yembre.

19 A maana lutg ne pe-raad gãnd sẽn monem sɛk-roogã yĩnga, la a maan lutg ne fok* gãnd n dogl a zugu.+

20 A peesa akasiya raad+ n maan kaadr-dãmb* sɛk-roogã yĩnga, tɩ b yas selle.+ 21 Kaadr fãa zãntlem ra yaa kãntɩɩg piiga, t’a yalmã yaa kãntɩɩg a ye la pʋɩ-sʋka. 22 Kaadr fãa tara nao a yiib sẽn sog taaba. Yaa woto la a maan sɛk-roogã kaadr-dãmbã fãa. 23 A maana kaadr-dãmb pisi sɛk-roogã goabg kɩrengã yĩnga. 24 A maana wanzuri nao pis-naas sẽn tar bogdo, tɩ b na n ningd kaadr-dãmb pisi wã tẽngre: Nao a yiib sẽn tar bogd kaadr a ye nao a yiibã tẽngre, la nao a yiib sẽn tar bogd kaadr-dãmb nins sẽn pʋgdã fãa nao a yiibã yĩnga.+ 25 Sɛk-roogã kɩreng a to wã yĩnga, rat n yeel tɩ kɩreng ning sẽn tees rɩtgã yĩnga, a maana kaadr-dãmb pisi 26 ne b wanzuri nao pis-naas sẽn tar bogdo: Nao a yiib sẽn tar bogd kaadr a ye tẽngre, la nao a yiib sẽn tar bogd kaadr-dãmb nins sẽn pʋgdã fãa tẽngre.

27 A maana kaadr-dãmb a yoob+ sɛk-roogã poor sẽn tees nin-taoorã yĩnga. 28 A maana kaadr-dãmb a yiib tɩ yɩ sɛk-roogã poorẽ gõad a yiibã. 29 B bogla raadã taab tẽngr n tãag yĩngri, n tãag pipi tuiidgã. Yɩɩ woto la a maan gõad a yiibã. 30 Rẽnd kaadr-dãmbã fãa ra yaa bãmb b nii ne b wanzuri nao piig la a yoob sẽn tar bogdo: Nao a yiib sẽn tar bogd kaadr fãa tẽngre.

31 A peesa akasiya ra-wogdo: Bãmb b nu kaadr-dãmb nins sẽn be sɛk-roogã kɩreng a ye yĩnga,+ 32 la bãmb b nu kaadr-dãmb nins sẽn be sɛk-roogã kɩreng a to wã yĩnga, la bãmb b nu me sɛk-roogã nin-taoor kɩrengã yĩnga, rat n yeel t’a poorẽ wã yĩnga. 33 A peesa tẽn-sʋk ra-wokã sẽn na n zĩnd kaadr-dãmbã sʋkã, sẽn sɩng ne kɩreng a ye n tãag kɩreng a to wã. 34 A bolga kaadr-dãmbã ne sãnem, la a maan b tuiidsã ne sãnem tɩ b zãad ra-wogdã. A bolga ra-wogdã me ne sãnem.+

35 A wʋga fu-lilldg+ ne gĩs sẽn yaa kẽeg haoo,* ne rũms kõbd gĩs sẽn yaa miid-miidu, ne gĩs-moaama, la ne lẽ gĩs-bãanese. A gʋla+ seribẽ-rãmb+ fu-lilldgã zugu. 36 A peesa akasiya ra-lugs a naas n bolg-b sãnem, n paas sãnem yagendse, la a yõg wanzuri nao a naas sẽn tar bogd b yĩnga. 37 Rẽ poore, a wʋga fu-lilldg sɛk-roogã rignoor yĩng ne gĩs sẽn yaa kẽeg haoo,* ne rũms kõbd gĩs sẽn yaa miid-miidu, ne gĩs-moaama, la ne lẽ gĩs-bãanese, b sẽn naag taab n wʋge,+ 38 n paas a ra-lugs a nu wã ne a yagendsã. A bolga b zutã la b sogdsã* ne sãnem, la b nao a nu wã sẽn tar bogdã ra yaa ne zũudu.

37 A Bɛtsalɛll+ maana Koglgã+ ne akasiya raado. A woglmã ra yaa kãntɩɩg a yiib la pʋɩ-sʋka, t’a yalmã yaa kãntɩɩg* a ye la pʋɩ-sʋka, t’a zãntlmã yaa kãntɩɩg a ye la pʋɩ-sʋka.+ 2 A bolga a pʋgã ne a yɩngã ne sãnem halaale, la a maan kogr ne sãnem n gilg-a.+ 3 Rẽ poore, a maana sãnem tuiids a naase, n ning a kars a naasã zugẽ, tɩ tuiids a yiib be kɩreng a ye wã, t’a yiib be kɩreng a to wã. 4 Sẽn pʋgde, a peesa akasiya ra-bɩlma, n bolg-b ne sãnem.+ 5 Rẽ poore, a tuii ra-bɩlmã tuiidsã sẽn be Koglgã kɩrengã pʋsẽ, sẽn na yɩl tɩ b tar n zãad Koglgã.+

6 A maana limdã ne sãnem halaale.+ A woglmã ra yaa kãntɩɩg a yiib la pʋɩ-sʋka, t’a yalmã yaa kãntɩɩg a ye la pʋɩ-sʋka.+ 7 A kuda seribẽ-rãmb+ a yiib ne sãnem, n ning limdã kɩrems a yiibã zugu.+ 8 Seribẽ a yembr n da be kɩreng a ye, tɩ seribẽ a to wã be kɩreng a to wã. A maana seribẽ-rãmbã limdã kɩrems a yiibã zutu. 9 Seribẽ-rãmb a yiibã tẽega b pɩgsã n tees yĩngri, n lud limdã ne b pɩgsã.+ B ra teesa taaba, tɩ b nensã get limdã.+

10 A maana taablã ne akasiya raado.+ A woglmã ra yaa kãntɩɩg a yiibu, t’a yalmã yaa kãntɩɩg a ye, t’a zãntlmã yaa kãntɩɩg pʋɩ-sʋka.+ 11 A bolg-a-la ne sãnem halaale, la a maan kogr ne sãnem n gilg-a. 12 Rẽ poore, a maana kogr t’a yalmã zems nug-biis a naas* n gilg taablã, la a nags kogrã ne sãnem n gilgi. 13 Sẽn paase, a maana sãnem tuiids a naas taablã yĩnga, n ning tuiidsã a kɩrems a naasã, zĩig ning kars a naasã sẽn be wã. 14 Tuiidsã ra pẽe kogrã, tɩ zãad ra-bɩlem nins b sẽn tar n zãad taablã. 15 A peesa akasiya ra-bɩlmã, n bolg-b ne sãnem tɩ b tar n zãad taablã. 16 Rẽ zugẽ, a maana taablã teedã ne sãnem halaale: Yaa a laasã, a wũmbli wã, a la-bõonegã la a yubli wã b sẽn na n tar n kiigd divẽ kũunã.+

17 A maana fɩtl-doagendgã+ ne sãnem halaale. A kuda fɩtl-doagendgã. A sɛɛgã, a naoorã, a wũmbli wã, a yoadã, la a puudã yaa bũmb a ye.+ 18 Wil a yoob n da yit a naoorẽ wã. Wil a tãab n da yit fɩtl-doagendgã kɩreng a ye, tɩ wil a tãab yit kɩreng a to wã. 19 Wũmbli a tãab b sẽn maan tɩ wõnd amand tɩɩg puud n da be kɩreng a ye wã wil zutu, n tar yoad la puud tɩ yaa loalem-loalma, tɩ wũmbli a tãab b sẽn maan tɩ wõnd amand tɩɩg puud be kɩreng a to wã wil zutu, n tar yoad la puud tɩ yaa loalem-loalma. Yaa woto la b maan wil a yoobã sẽn yit fɩtl-doagendgã naoorẽ wã. 20 Wũmbli a naas b sẽn maan tɩ wõnd amand tɩɩg puud n da be fɩtl-doagendgã naoor zugu, n tar yoad la puud tɩ yaa loalem-loalma. 21 Yodr n da be pipi wil a yiibã sẽn yit naoorẽ wã tẽngre, tɩ yodr a to be wil a yiibã sẽn pʋgdã tẽngre, tɩ yodr a to me le be wil a yiibã sẽn pʋgdã tẽngre, wil a yoobã sẽn yit fɩtl-doagendgã naoorẽ wã yĩnga. 22 Yoadã ne wilã la fɩtl-doagendgã fãa ra maana ne sãnem halaal b sẽn kud tɩ yaa bũmb a yembre. 23 Rẽ poore, a maana a fɩtl-dãmb+ a yopoe wã, a yɩʋʋsã la a bugmã laas ne sãnem halaale. 24 A maana fɩtl-doagendgã ne a teedã fãa ne sãnem halaal talã* a ye.

25 A maana wisd tẽn-kugrã+ ne akasiya raado. A woglmã ne a yalmã ra zema taaba. A woglmã yaa kãntɩɩg a ye, t’a yalmã yaa kãntɩɩg a ye. Tẽn-kugrã yɩɩlã ra naag-a lame n yaa bũmb a yembre.+ 26 A bolga tẽn-kugrã ne sãnem halaale: A yĩngrã, a kɩremsã fãa n gilgi, la a yɩɩlã. A maana kogr ne sãnem n gilg-a. 27 A maana sãnem tuiids a yiib a kogrã tẽngre, a kɩrems a yiibã sẽn tees taabã zutu. Tuiidsã n na n zã ra-bɩlem nins b sẽn tar n zãad tẽn-kugrã. 28 Rẽ poore, a peesa akasiya ra-bɩlmã, n bolg-b ne sãnem. 29 Sẽn paase, a maana zaeebã kaam sẽn yaa sõngã,+ la wisdã sẽn tar yũ-noog+ la sẽn pa tar rẽgdã. A maaga a yĩng n kalem zaeebã kaamã,* la a maag a yĩng n kalem wisdã me.

38 A maana maoong sẽn yõogd bugmã tẽn-kugr ne akasiya raado. A woglmã ne a yalmã zema taaba. A woglmã yaa kãntɩɩg* a nu, t’a yalmã yaa kãntɩɩg a nu, t’a zãntlmã yaa kãntɩɩg a tãabo.+ 2 Rẽ poore, a maana yɩɩl n ning tẽn-kugrã kɩrems a naasã. Yɩɩlã naaga tẽn-kugrã n yaa bũmb a yembre. A bolga tẽn-kugrã ne zũudu.+ 3 Rẽ poore, a maana tẽn-kugrã teedã fãa: Yaa tompɛglem laasã, pell-dãmbã, laasã, yaagdsã, la bugum laasã. A maana a teedã fãa ne zũudu. 4 Sẽn paase, a maana gãmbr tẽn-kugrã yĩnga, zũud gãmbr n ning a kogrã tẽngre, a tẽn-sʋkã sẽnese. 5 A maana tuiids a naas a kɩrems a naasã zut n pẽneg zũud gãmbrã, tɩ na n zã ra-bɩlmã. 6 Rẽ poore, a peesa akasiya ra-bɩlmã, n bolg-b ne zũudu. 7 A tuii ra-bɩlmã tuiidsã sẽn be tẽn-kugrã kɩremsẽ wã pʋsẽ, sẽn na yɩl tɩ b tar n zãad-a. A maana tẽn-kugrã t’a yaa raad koglg sẽn yaa vɩʋʋgo.

8 A maana zũud la-pokã+ ne a zũud roagendgã. Yɩɩ pagb nins b sẽn sigl tɩ b tʋmd sɛk-roogã noorã zũud nen-getsã la a tall n maan-ba.

9 Rẽ poore, a maana samandã.+ A goabg kɩrengã yĩnga, a maana lẽ* gĩs-bãanes fu-lilldsi, tɩ b woglmã yaa kãntɩɩg koabga.+ 10 Ra-lugs pisi ne zũud nao pisi sẽn tar bogd n da be be, n paas b yagendsã ne b sogdsã* sẽn maan ne wanzuri wã. 11 Rɩtg kɩrengã yĩng me, fu-lillds woglem sẽn yaa kãntɩɩg koabg n da be be. B ra-lugs pisi wã ne b nao pisi sẽn tar bogdã maana ne zũudu. Ra-lugsã yagendsã ne b sogdsã* maana ne wanzuri. 12 La nin-taoor kɩrengã yĩnga, fu-lilldsã woglem ra yaa kãntɩɩg pis-nu. Ra-lugs piig ne nao piig sẽn tar bogd n da be be. Ra-lugsã yagendsã ne b sogdsã maana ne wanzuri. 13 A yaang kɩrengã sẽn tees wĩndg sẽn pukdẽ sẽnesã yalmã ra yaa kãntɩɩg pis-nu. 14 Fu-lillds woglem sẽn yaa kãntɩɩg piig la a nu n be kɩreng a ye wã, n paas ra-lugs a tãab ne nao a tãab sẽn tar bogdo. 15 Samandã noorã kɩreng a to wã yĩng me, fu-lillds woglem sẽn yaa kãntɩɩg piig la a nu n da be be, n paas ra-lugs a tãab ne nao a tãab sẽn tar bogdo. 16 Fu-lilldsã fãa sẽn gilg samandã ra wʋga ne lẽ gĩs-bãanese. 17 Naoã sẽn tar bogdã sẽn maan ra-lugsã yĩngã ra yaa ne zũudu, tɩ ra-lugsã yagendsã ne b sogdsã* ra maan ne wanzuri, tɩ b zutã bolg ne wanzuri. Wanzuri sẽbds n da be samandã ra-lugsã fãa yĩnga.+

18 Samandã noor fu-lilldgã ra wʋga ne gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la ne lẽ gĩs-bãanese. A woglmã ra yaa kãntɩɩg pisi, t’a zãntlmã yaa kãntɩɩg a nu, n zems samandã fu-lilldsã zãntlem.+ 19 B ra-lugs a naasã ne b nao a naas sẽn tar bogdã maana ne zũudu. B yagendsã maana ne wanzuri, tɩ b zutã ne b sogdsã* bolg ne wanzuri. 20 Sɛk-roogã bayã* ne bayã fãa sẽn gilg samandã maana ne zũudu.+

21 Ad teed nins b sẽn tall n ti sɛk-roogã, rat n yeel tɩ Kasetã sɛk-roogã.+ Yɩɩ a Moyiiz n yeel tɩ b geel-ba. Yaa Levi buudã neb+ n maan dẽ. A Itamaar+ sẽn yaa maan-kʋʋd a Aarõ biigã n lʋɩ b taoore. 22 Yɩɩ a Uri biig a Bɛtsalɛll+ sẽn yaa Zida buudã nedã n maan bũmb nins fãa a Zeova sẽn da yeel a Moyiizã. A Uri yaa a Huur biiga. 23 Ned ning sẽn da tʋmd ne a Bɛtsalɛllã yaa a Ahisamak biig a Oholiyaab+ sẽn yaa Dan buudã nedã. A Oholiyaab yaa tʋʋm-mita, fu-gʋnd la sʋn-wʋgd sẽn wʋgd gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la lẽ gĩs-bãanese.

24 Sãnemã fãa b sẽn tall n tʋm zĩ-sõngã tʋʋmdã zɩslem zemsa sãnemã b sẽn kõ tɩ yɩ maoong b sẽn yuumdã,+ rat n yeel tɩ talã* pisi la a wɛ, la sɩkl kobs-yopoe la pis-tã, wa sẽn zems zĩ-sõngã sɩklã.* 25 Neb nins b sẽn sõd nin-buiidã sʋkã wanzuri wã yɩɩ talã koabga, la sɩkl* tusr la kobs-yopoe la pis-yopoe la a nu, wa sẽn zems zĩ-sõngã sɩklã.* 26 Ned kam fãa sɩkl pʋɩ-sʋkã ra yaa sɩkl pʋɩ-sʋk wa sẽn zems zĩ-sõngã sɩklã,* bala neb nins fãa sẽn ta yʋʋm pisi la sẽn yɩɩd rẽ wã+ b sẽn sõdã yɩɩ tus-kobs-yoob la a tãabo, la kobs-nu la pis-nu.+

27 Wanzuri wã b sẽn tall n yõg zĩ-sõngã nao sẽn tar bogdã ne fu-lilldgã nao sẽn tar bogdã yaa talã koabga. Nao koabg sẽn tar bogdã zemsa talã koabga: Naoor sẽn tar bok+ fãa yaa talã a yembre. 28 Yɩɩ sɩkl tusr la kobs-yopoe la pis-yopoe la a nu wã la b tall n maan ra-lugsã yagendsã, n bolg ra-lugsã zutã, la b sog-b ne taaba.

29 Zũudã b sẽn kõ tɩ yɩ maoongã* yaa talã pis-yopoe la sɩkl tus a yi la kobs-naase. 30 Yɩɩ rẽ la a tall n maan nao sẽn tar bogd sɛk-roogã rignoorã yĩnga, zũud tẽn-kugrã ne a zũud gãmbrã, tẽn-kugrã teedã fãa, 31 nao sẽn tar bogdã sẽn gilg samandã, samandã noor nao sẽn tar bogdã, la sɛk-roogã bayã ne bayã fãa+ sẽn gilg samandã.

39 B talla gĩs sẽn yaa kẽeg haoo* wã, rũmsã kõbd gĩs sẽn yaa miid-miidã, ne gĩs-moaamã+ n wʋg futã sẽn yaa neeb sɛk-roogã tʋʋm yĩngã. B wʋga futã sẽn welg toor maan-kʋʋd a Aarõ yĩngã,+ wa a Zeova sẽn da yeel a Moyiizã.

2 A wʋga efoodã*+ ne sãnem, gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la ne lẽ* gĩs-bãanese. 3 B kuda sãnemã tɩ lebg paklse, n wã bãanes wa gĩs n naag gĩs sẽn yaa kẽeg haoo* wã, rũms kõbd gĩs sẽn yaa miid-miidã, gĩs-moaamã, la lẽ gĩs-bãanesã. Efoodã* ra gʋla ne gĩs-kãense. 4 B maana sogds a yiib bãgdẽ wã, n sẽb efoodã* sẽn na yɩl n sog noy a yiibã sẽn be yĩngrã ne taaba. 5 Sẽbdgã sẽn naag efoodã* sẽn na yɩl t’a pa zĩig a yembrã+ sẽn wʋg ne bũmb ninsã yaa a yembr ne bũmb nins b sẽn tall n wʋg efoodã: Yaa sãnem, gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la lẽ gĩs-bãanese. B maana wa a Zeova sẽn da yeel a Moyiizã.

6 B yõga sãnem n sag onigs kugã, la b gʋl a Israyɛll kom-dibli wã yʋy b zutu, wa b sẽn da na n gʋl bũmb b sẽn tar n ningd bãnde.+ 7 A ninga kugã efoodã* bãgdẽ wã, tɩ yɩ kug sẽn na n kɩtdẽ tɩ b tẽegd a Israyɛll kom-dibli wã+ yelle, wa a Zeova sẽn da yeel a Moyiizã. 8 Rẽ poore, a wʋga yãoog lutgã.+ Yɩɩ fu-gʋnd tʋʋmde, wa b sẽn wʋg efoodã* to-to wã. B wʋg-a-la ne sãnem, gĩs sẽn yaa kẽeg haoo,* rũms kõbd gĩs sẽn yaa miid-miidu, gĩs-moaama, la ne lẽ gĩs-bãanese.+ 9 B sã n põd yãoog lutgã a yiibu, a woglmã ne a yalmã yaa a yembre. A woglmã yaa nug-yakemde,* t’a yalmã me yaa nug-yakemde. 10 B ninga kug ruls a naas a zugu. Pipi rulgã yaa rubi, topaaz la emeroode. 11 Rulg a yiib-n-soabã yaa tirkowaaze, safɩɩr la zaspe. 12 Rulg a tãab-n-soabã yaa lesɛm kugri,* agat la ametisti. 13 Rulg a naas-n-soabã yaa kirzoliti, onigs la zaade. B yõga bũmb ne sãnem n sag kugã b pʋsẽ. 14 Kugã zemsa a Israyɛll kom-dibli piig la a yiibã yʋya. B gʋla kugr fãa wa bũmb b sẽn tar n ningd bãnde, tɩ yʋʋr fãa yaa buud a yembre, buud piig la a yiibã sʋka.

15 B maana bãens sẽn kal taab yãoog lutgã yĩnga, tɩ yaa wa sãnem halaal wĩya.+ 16 B maana bũmb a yiib nins pʋsẽ b sẽn sagd kugã ne sãnem, la b maan sãnem tuiids a yiibu, n sẽb tuiids a yiibã yãoog lutgã noy a yiibã. 17 Rẽ poore, b tuii sãnem wĩy a yiibã tuiids a yiibã sẽn be yãoog lutgã noyẽ wã. 18 B tuii wĩy a yiibã noyã bũmb a yiib nins b sẽn yõg n na n sag kugã pʋsẽ, la b sẽb-b efoodã* bãgdẽ, a taoorã. 19 Sẽn na n pʋgle, b maana sãnem tuiids a yiibu, n sẽb-b yãoog lutgã noy a yiib nins sẽn be pʋgẽ n tees efoodã.*+ 20 B maana sãnem tuiids a yiib a taab n ning efoodã* taoore, bãgd a yiibã tẽngre, zĩig ning b sẽn sog taabã sɛɛga, rat n yeel tɩ efoodã sẽbdgã b sẽn wʋgã zugẽ. 21 Sẽn na n baase, b talla wĩir sẽn yaa kẽeg haoo* n sẽb yãoog lutgã tuiidsã ne efoodã* tuiidsã ne taaba, sẽn na yɩl tɩ yãoog lutgã pa a zĩigẽ efoodã zugu, rat n yeel tɩ sẽbdgã b sẽn wʋgã zugẽ, wa a Zeova sẽn da yeel a Moyiizã.

22 Rẽ poore, b wʋga efoodã* kobr sẽn yaa bãg-vɩɩdã tõr ne gĩs sẽn yaa kẽeg haoo.*+ Yɩɩ sʋn-wʋgd n wʋg-a. 23 Kobr sẽn yaa bãg-vɩɩdã loorã bee a tẽn-sʋkã wa tãb-biig fuug loore. A loorã tara noor b sẽn wʋg n gilg sẽn na yɩl t’a ra wa kẽeg ye. 24 Sẽn pʋgde, b maana bõn-gils sẽn wõnd gernaad tɩɩg biis kobrã tẽngr ne gĩs sẽn yaa kẽeg haoo,* rũms kõbd gĩs sẽn yaa miid-miidu, la ne gĩs-moaama, n kal taaba. 25 B maana sãnem halaal loamba n ning-b bõn-gilsã sʋgs n gilg kobr sẽn yaa bãg-vɩɩdã tẽngr fãa, bõn-gilsã sʋgse. 26 B lɩʋʋsa loamba wã ne bõn-gilsã n gilg kobr sẽn yaa bãg-vɩɩdã tẽngr zãng maan-kʋʋrã tʋʋmd yĩnga, wa a Zeova sẽn da yeel a Moyiizã.

27 B wʋga kasaabsã ne lẽ gĩs-bãanese, a Aarõ ne a kom-dibli wã+ yĩnga. Yɩɩ sʋn-wʋgd n wʋg-ba. 28 B wʋga zu-vindsã+ ne lẽ gĩs-bãanese, pugl-neebã+ ne lẽ gĩs-bãanese, kur-koeesã*+ ne lẽ gĩs-bãanese, 29 sẽbdgã ne lẽ gĩs-bãanese, gĩs sẽn yaa kẽeg haoo,* rũms kõbd gĩs sẽn yaa miid-miidu, la ne gĩs-moaam sẽn naag taab n wʋge, wa a Zeova sẽn da yeel a Moyiizã.

30 Sẽn na n baase, b maana sãnem halaal bõn-paklg sẽn pɩndã, rat n yeel tɩ sãnem bõn-paklgã sẽn yaa sõngã,* n gʋl a zug wa b sẽn gʋnd bũmb b sẽn tar n ningd bãnde. B gʋlsame yaa: ‘Sõmblem yita a Zeova nengẽ.’+ 31 B sẽb-a-la ne wĩir sẽn yaa kẽeg haoo* sẽn na yɩl n ning-a zu-vindgã zugu, wa a Zeova sẽn da yeel a Moyiizã.

32 Woto, sɛk-roogã sẽn yaa sõngã tʋʋm fãa saame. Israyɛll nebã maana bũmb nins fãa a Zeova sẽn da yeel a Moyiizã.+ B maana woto kɛpɩ.

33 Dẽ, b talla sɛk-roogã+ babsã fãa n wa kõ a Moyiizi, n paas a pɛɛlã ne a teedã fãa: Yaa a sogdsã,+ a kaadr-dãmbã,+ a ra-wogdã,+ a ra-lugsã, a nao sẽn tar bogdã,+ 34 a lutgã sẽn maan ne pe-raad gãnd sẽn monemã,+ a lutgã sẽn maan ne fok* gãndã, a fu-lilldgã,+ 35 Kasetã koglg ne a ra-bɩlmã+ la a limdã,+ 36 taablã ne a teedã fãa+ n paas burã b sẽn kõt Wẽnnaamã,* 37 fɩtl-doagendgã sẽn maan ne sãnem halaalã, a fɩtl-dãmbã,+ rat n yeel tɩ fɩtl-dãmbã b sẽn tong taabã ne a teedã fãa+ n paas kaamã fɩtl-dãmbã+ yĩnga, 38 sãnem tẽn-kugrã,+ zaeebã kaamã,+ wisd sẽn tar yũ-noogã,+ sɛk-roogã rignoor fu-lilldgã,+ 39 zũud tẽn-kugrã+ ne a zũud gãmbrã, a ra-bɩlmã,+ a teedã fãa,+ la-pokã ne a roagendgã,+ 40 samandã fu-lilldsã, a ra-lugsã ne a naoã sẽn tar bogdã,+ samandã noor fu-lilldgã,+ a wĩyã ne a bayã,* n paas samandã bayã,+ ne teed nins fãa b sẽn na n tar n tʋmd sɛk-roogẽ wã, 41 futã sẽn wʋg tɩ yaa neeb sɛk-roogã tʋʋm yĩngã, futã sẽn welg toor maan-kʋʋd a Aarõ+ yĩngã, ne a kom-dibli wã futã b sẽn na n yeelg n tʋm maan-kʋʋrã tʋʋmã.

42 Israyɛll nebã tʋma tʋʋmã fãa tɩ zems bũmb nins fãa a Zeova sẽn da yeel a Moyiizã.+ 43 A Moyiiz sẽn maag a yĩng n ges b tʋʋmdã, a mikame tɩ b maana wa a Zeova sẽn da yeelã. Dẽ, a Moyiiz ning-b-la barka.

40 Dẽ, a Zeova yeela a Moyiiz yaa: 2 “Pipi kiuugã pipi daare, fo segd n tilga sɛk-roogã.*+ 3 Ning Kasetã koglg a pʋgẽ,+ la f lud Koglgã ne fu-lilldgã.+ 4 Fo segd n kẽesa taablã,+ n maneg a teedã sẽn segd n zĩnd a zugã, la f kẽes fɩtl-doagendgã,+ n widg a fɩtl-dãmbã.+ 5 Rẽ poore, bɩ f rɩgl wisdã+ sãnem tẽn-kugrã Kasetã koglg taoore, la f yagl sɛk-roogã rignoor fu-lilldgã.+

6 “Fo segd n dɩgla maoong sẽn yõogd bugmã tẽn-kugrã+ sɛk-roogã* rignoor taoore, 7 la f rɩgl la-pokã sɛk-roogã ne tẽn-kugrã sʋka, n ning koom a pʋgẽ.+ 8 Rẽ poore, bɩ f tilg samandã+ n gilg-a, la f yagl samandã noor fu-lilldgã.+ 9 Sẽn pʋgde, fo segd n dɩka zaeebã kaam+ n zae sɛk-roogã ne bũmb nins fãa sẽn be a pʋgẽ wã,+ n welg-a ne a teedã fãa toore, t’a lebg bũmb sẽn yaa sõngo. 10 Fo segd n zaee maoong sẽn yõogd bugmã tẽn-kugrã ne a teedã fãa, n welg tẽn-kugrã toore, sẽn na yɩl t’a lebg tẽn-kugr sẽn yaa sõng wʋsgo.+ 11 Zae la-pokã me ne a roagendgã, n welg la-pokã toore.

12 “Tall a Aarõ ne a kom-dibli wã n pẽneg sɛk-roogã rignoore, n so-b koom.+ 13 Fo segd n dɩka futã sẽn welg toorã+ n yeelg a Aarõ la f zae-a kaam,+ n welg-a toor t’a yɩ mam maan-kʋʋda. 14 Rẽ poore, bɩ f kɩt t’a kom-dibli wã kolge, tɩ f yeelg-b kasaabse.+ 15 Fo segd n zae-b-la wa fo sẽn zae b ba wã,+ sẽn na yɩl tɩ b yɩ mam maan-kʋʋdba. B zaeebã na n kõ-b-la sor tɩ b yɩ maan-kʋʋdb wakat fãa, zãmaan woo zãmaana.”+

16 A Moyiiz maana wa a Zeova sẽn yeel-a wã.+ A maana woto kɛpɩ.

17 Yʋʋm a yiib-n-soabã pipi kiuugã pipi daare, b tilga sɛk-roogã.+ 18 A Moyiiz sẽn wa n na n tilg sɛk-roogã, a rɩgla naoã sẽn tar bogdã+ tẽnga, n sel kaadr-dãmbã,+ n ning ra-wogdã,+ la a tilg ra-lugsã. 19 A Moyiiz tẽega peendã+ n pil sɛk-roogã kaadr-dãmbã, la a ning lutsã+ fu-roogã zugu, wa a Zeova sẽn da yeel-a wã.

20 Rẽ poore, a rɩka Kasetã kug-walsã+ n ning Koglgã pʋgẽ,+ n tui ra-bɩlmã+ Koglgẽ wã, la a rɩk limdã+ n fõgen Koglgã.+ 21 A Moyiiz kẽesa Koglgã sɛk-roogã pʋgẽ, n yagl fu-lilldgã+ a zĩigẽ n lud Kasetã koglgo,+ wa a Zeova sẽn da yeel-a wã.

22 Rẽ poore, a Moyiiz rɩgla taablã+ sɛk-roogã rɩtg sẽnese, fu-lilldgã taoore, 23 la a rɩgl burã a zĩigẽ+ taablã zug a Zeova taoore, wa a Zeova sẽn da yeel-a wã.

24 A Moyiiz rɩgla fɩtl-doagendgã+ sɛk-roogã kɩreng ning sẽn be goabg sẽnes n tees taablã. 25 A widga fɩtl-dãmbã+ a Zeova taoore, wa a Zeova sẽn da yeel-a wã.

26 Sẽn pʋgde, a Moyiiz rɩgla sãnem tẽn-kugrã+ sɛk-roogã pʋgẽ, fu-lilldgã taoore, 27 sẽn na yɩl tɩ b yõogd wisd sẽn tar yũ-noog+ a zugu,+ wa a Zeova sẽn da yeel-a wã.

28 Rẽ poore, a yagla sɛk-roogã fu-lilldgã+ a zĩigẽ.

29 A Moyiiz rɩgla maoong sẽn yõogd bugmã tẽn-kugrã+ sɛk-roogã rignoorẽ, sẽn na yɩl tɩ b tõe n maan maoong sẽn yõogd bugum+ la b kõ kood biis kũun a zugu, wa a Zeova sẽn da yeel-a wã.

30 Rẽ poore, a rɩgla la-pokã sɛk-roogã ne tẽn-kugrã sʋka, n ning koom a pʋgẽ waasgã yĩnga.+ 31 A Moyiiz ne a Aarõ la a Aarõ kom-dibli wã waasa b nusã la b naoã beenẽ. 32 B sã n da na n kẽ sɛk-roogẽ wã wall b kolg tẽn-kugrã, b ra waasda b nusã la b naoã,+ wa a Zeova sẽn da yeel a Moyiizã.

33 Sẽn na n baase, a tilga samandã+ n gilg sɛk-roogã ne tẽn-kugrã, la a yagl samandã noor fu-lilldgã.+

Woto, a Moyiiz tʋma tʋʋmdã n sa. 34 Sawadgã sɩngame n lut sɛk-roogã, la a Zeova ziirã pida sɛk-roogã.+ 35 A Moyiiz ra pa tõe n kẽ sɛk-roogã pʋgẽ, bala sawadgã ra bee a zugu, t’a Zeova ziirã me pid sɛk-roogã.+

36 Israyɛll nebã so-toakã sasa, sawadgã sã n da zẽk n bas sɛk-roogã, b yikdame n dɩk sore. Yɩɩ woto b yalsg fãa zĩigẽ.+ 37 La sawadgã sã n pa zẽke, b pa yikd n dɩk sore, hal n tãag daar ning a sẽn na n zẽke.+ 38 Bala a Zeova sawadgã ra bee sɛk-roogã zugẽ wĩntoogo, tɩ bugum be sɛk-roogã zugẽ yʋng tɩ Israyɛll nebã neẽ, b so-toakã fãa sasa.+