A MATIYE SEBRE

1 Seb-kãngã gomda a Zeezi Kirist* vɩɩmã* sẽn yɩ to-to wã yelle. Yẽ yaa a Davɩɩd biiga,*+ n yaa a Abrahaam biiga.+

 3 A Zida roga a Perɛɛz ne a Zeera,+ tɩ b ma yaa a Tamaare.

17 Rẽnd sẽn sɩng ne a Abrahaam n tãag a Davɩɩde, yɩɩ zãmaan piig la a naase, tɩ sẽn sɩng ne a Davɩɩd n tãag b sẽn na n yõg Zʋɩf-rãmbã n kẽng yembd Babilonnã yɩ zãmaan piig la a naase. B sẽn yõg-b n kẽng Babilonnã n tãag Kiristã me yɩɩ zãmaan piig la a naase.

18 Ad a Zeezi Kirist rogmã sẽn yɩ to-to: B ra rɩka a ma a Maari n kõ a Zozɛf t’a na n maan a paga, la nand tɩ b kẽ kãadem, a rɩka pʋg ne vʋʋsem sõngã*+ maasem. 19 La a sɩd a Zozɛf sẽn yaa nin-tɩrga, n pa rat n ning-a yãnd nebã nifẽ wã yĩnga, a ra magdame n na n soos n bas-a.+ 20 A sẽn tags bõn-kãensã yell n sa n gũsi, a Zeova* malɛkã vẽnega a meng ne-a zãmsd pʋgẽ n yeel-a: “Zozɛfe, Davɩɩd biiga. Kẽng n tɩ peeg f pag a Maari la f ra zoe rabeem ye. Bala pʋgã a sẽn tʋtã* tũu ne vʋʋsem sõng+ pãnga. 21 A na n doga bi-ribla, la fo tog n pʋda a yʋʋr t’a Zeezi.*+ Bala a na n fãaga a nin-buiidã ne b yel-wẽnã.”+ 22 Bõn-kãensã fãa maaname sẽn na yɩl t’a Zeova* sẽn kɩt t’a no-rɛɛsã yeel bũmb ningã pidsi. A ra yeelame yaa: 23 “Ade! Pa-kuil* n na n dɩk pʋg n dog bi-ribla, la b na n pʋda a yʋʋr t’a Emanuwɛlle,+ sẽn dat n yeel tɩ “Wẽnd-be-ne-do.”+

24 A Zozɛf sẽn neke, a maana wa a Zeova* malɛkã sẽn yeelã. A tɩ peega a pagã n wa a zakẽ. 25 La a pa tol n kẽ ne-a, hal t’a wa rog bi-ribla,+ t’a pʋd a yʋʋr t’a Zeezi.+

2 A Zeezi roga Betlehɛm+ sẽn be Zide wã, rĩm a Erood* zãmaanẽ.+ La ade! Ãds-bagb n yi yaang n wa Zerizalɛm, 2 n soke: “Zʋɩf-rãmbã rĩm sẽn nan dogã bee yɛ?+ Bala tõnd zĩnda yaang n yã a ãdgã, n wa n na n waoog-a.” 3 Rĩm a Erood sẽn wʋm dẽ, a yɛɛsame, tɩ Zerizalɛm nebã fãa me yɛɛse. 4 A tigma maan-kʋʋdbã taoor dãmb la gʋlsdbã fãa, n sok-b n na n bãng Kiristã* sẽn tog n dog tẽng ningã. 5 Bãmb leoka yẽnda yaa: “Yaa Zide Betlehɛmmã,+ bala no-rɛɛsã ra gʋlsame n yeele: 6 ‘La foom a Zida Betlehɛmmã, fo pa tẽng sẽn pa poorẽ Zida nanambsã sʋk ye. Bala naab n na n yi fo pʋgẽ, n yɩ Israyɛll nebã sẽn yaa mam nin-buiidã pe-kɩɩma.’”+

7 Rẽ poore, a Erood soosame n bool ãds-bagbã, n fees-b n bãng ãdgã pukr wakate. 8 A sẽn wa n na n wilg-b tɩ b kẽng Betlehɛmmã, a yeel-b lame: “Kẽng-y n tɩ gẽes-y biigã neere, tɩ y sã n yã-a bɩ y wa togs-ma, tɩ ma-me tɩ waoog-a.” 9 Rĩmã sẽn yeel-b rẽ wã poore, b rɩka sore. La ãdg ning b sẽn da yã b sẽn wa n be yaangã+ lʋɩɩ b taoore, hal n tɩ yaas biigã sẽn beẽ wã zugẽ. 10 B sẽn yã ãdgã, b sũy yɩɩ noog wʋsgo. 11 B kẽe roogẽ wã, n yã biigã ne a ma a Maari. B wõgemda biigã taoor n waoog-a, la b yiis sãnem, wisd sẽn yaa pɛɛlg la miir* n kõ-a. 12 La Wẽnnaam sẽn keoog-b zãmsd pʋgẽ+ tɩ b ra tũ a Erood nengẽ wã yĩnga, b rɩka sor a to n leb b tẽngẽ wã.

13 B loogrã poore, a Zeova* malɛkã vẽnega a meng ne a Zozɛf zãmsd pʋgẽ,+ n yeel-a: “Yik n dɩk biigã ne a ma wã n zoe n kẽng Ezɩpti, n pa be hal tɩ m le wa gom ne-fo, bala a Erood na n gẽesa biigã sẽn na yɩl n paam-a n kʋ.” 14 Dẽ, a Zozɛf yikame, n tall biigã ne a ma wã ne yʋngo, n kẽng Ezɩpti. 15 A paa be n tãag a Erood kũum. Woto pidsa bũmb ning a Zeova* sẽn da kɩt t’a no-rɛɛsã togsã. A ra yeelame: “Mam boola m bi-riblã t’a yi Ezɩpti.”+

16 La a Erood sẽn wa n bãng tɩ ãds-bagbã belg-a lame wã, a sũurã puuga wʋsgo, t’a tʋm tɩ b kẽng Betlehɛm ne a tẽn-kɩremsã, n kʋ kom-dibli nins fãa sẽn zems yʋʋm a yi n tar n sigdã, wa sẽn zems yẽ sẽn da fees ãds-bagbã+ n bãng ãdgã pukr wakatã. 17 Woto, no-rɛɛs a Zeremi sẽn da yeel bũmb ningã pidsame. A ra yeelame: 18 “Koɛɛg rãamd la b wʋmd Rama. Yaa yãbr la kaasg wʋsg rãamde. Yaa a Rasɛll+ n yãbd a kambã yĩng n tõt belsgo. Bala b ka le be ye.”+

19 A Erood sẽn wa n ki wã, a Zeova* malɛkã vẽnega a meng ne a Zozɛf zãmsd pʋgẽ+ Ezɩpti, 20 n yeel-a yaa: “Yik n tall biigã ne a ma wã n leb Israyɛll soolmẽ wã. Bala sẽn da gẽesd-b biigã n na n yãk a yõorã* kiime.” 21 Dẽ, yẽ yikame n tall biigã ne a ma wã n leb Israyɛll soolmẽ wã. 22 La a sẽn wʋm tɩ yaa a Arkelayuus n ledg a ba a Erood n dɩt naam Zide wã, yẽ yɛɛsa be kẽngre. Sẽn paase, Wẽnnaam sẽn keoog-a zãmsd pʋgẽ+ wã yĩnga, a kẽnga Galile soolmẽ.+ 23 A tɩ zĩnda tẽng sẽn boond tɩ Nazarɛte,+ tɩ bũmb ning no-rɛɛsdbã sẽn da yeelã pidsi. B ra yeelame: “B na n bool-a lame tɩ Nazarɛt neda.”*+

3 Kaoosg zugẽ, a Zãmbatiis+ wa n sɩnga mooneg+ Zide we-raoogẽ wã, 2 n yetẽ: “Tek-y yam, bala saasẽ Rĩungã kolgame.”+ 3 Sɩd-sɩda, yaa yẽ yell la no-rɛɛs a Ezayi+ sẽn da gomã. A yeelame: “Ned n zẽkd a koɛɛg we-raoogẽ wã n yetẽ: ‘Maneg-y-yã a Zeova* sorã! Rems-y-yã a soayã tɩ yɩ tɩrse.’”+ 4 A Zã ra yera fuug sẽn wʋg ne yʋgemd kõbdo, la a sẽbg a sɛɛg ne gãongo.+ A rɩɩb ra yaa sʋya,* la weoogẽ sɩɩdo.+ 5 Nebã ra yita Zerizalɛm la Zide fãa, n paas tẽns nins fãa sẽn be Zʋrdẽ kʋɩlgã noorã n kẽnd yẽ nengẽ,+ 6 t’a lisd-b* Zʋrdẽ kʋɩlgẽ wã,+ la b vẽnegd b yel-wẽnã n togsdẽ.

7 Yẽ sẽn yã Fariziyẽ-rãmb la Sadiseyẽ-rãmb+ wʋsg sẽn wat lisgã zĩigẽ wã, a yeel-b lame: “Yãmb a wag-toos yagense,+ ãnda n sagl yãmb tɩ y bao n põs sũ-puugr ning sẽn watã?+ 8 Woto wã, bɩ y tʋm tʋʋm sẽn wilgd tɩ y teka yam n kos sugri. 9 Ra tags-y tɩ yãmb sẽn paam t’a Abrahaam yaa yãmb ba+ wã sekame ye. Bala mam yeta yãmb tɩ Wẽnnaam tõe n kɩtame tɩ kug-kãensã lebg a Abrahaam kamba. 10 Larã zoe n bee tɩɩsã yẽgẽ. Dẽnd tɩɩg ning fãa sẽn pa womd bi-sõma, b na n kɛɛg-a lame n lob bugmẽ.+ 11 Sã n yaa ne maam, mam lisda yãmb koomẽ, y sẽn tek yam n kos sugrã yĩnga.+ La sẽn na n pʋgl-a maamã tõog yɩɩda maam. Mam pa zems tɩ piid a neooda meng ye.+ A na n lisa yãmb ne vʋʋsem sõngo,+ la ne bugum.+ 12 A zãada a kaorg* sẽn tar n yelgdẽ a nugẽ. A na n pɩɩsa a zɛɛgã zãnga, n wʋk koodã n sui baoorẽ wã, la a yõog wudgã ne bugum+ sẽn pa tõe n kiisi.”

13 Rẽ poore, a Zeezi yii Galile n wa a Zã nengẽ Zʋrdẽ kʋɩlgẽ wã, sẽn na yɩl t’a lis-a.+ 14 La a Zã baoome n na n gɩdg-a, n yeele: “Yaa yãmb n da segd n lis maam. La bõe yĩng tɩ yãmb wat mam nengẽ?” 15 T’a Zeezi leok yaa: “Bas tɩ yɩ woto nanda, bala segdame tɩ d maan bũmb nins fãa Wẽnnaam sẽn yeelã.”* Rẽ poore, a pa le gɩdg-a ye. 16 B sẽn lis a Zeezi koomẽ wã, tao-tao bala a le pukame. La saasã pakame,+ t’a Zã yã vʋʋsem sõngã sẽn sigd a zugu, n wõnd marwalle.+ 17 Sẽn paase, koɛɛg n yi saasẽ+ n yeele: “Yãoã yaa mam Bi-ribla,+ mam sẽn nong a soabã. A taa mam yam.”+

4 Rẽ poore, vʋʋsem sõngã talla a Zeezi n kẽng we-raoogẽ, sẽn na yɩl tɩ Sʋɩtãanã*+ mak-a.+ 2 A sẽn loe noor wĩndg la yʋng rasem pis-naas poore, kom yõk-a lame. 3 La Makdã+ kolgame n yeel-a yaa: “Fo sã n yaa Wẽnnaam biiga, bɩ f yeel kug-kãensã tɩ b lebg buri.” 4 La a leokame yaa: “B gʋlsame: ‘Ninsaal pa tog n vɩ ne rɩɩb bal ye. A tog n vɩɩ ne gomd ning fãa sẽn yit a Zeova* noorẽ wã.’”+

5 Rẽ poore, Sʋɩtãanã* tall-a lame n kẽng tẽn-sõngẽ wã,+ n tɩ rʋʋs-a wẽnd-doogã zugu,*+ 6 n yeel-a yaa: “Fo sã n yaa Wẽnnaam bi-ribla, bɩ f bas f meng n lʋɩ tẽnga, bala b gʋlsame: ‘A na n kõo a malɛgsã noor tɩ b gũ foom,’ la ‘malɛgsã na n koka foo ne b nusi, tɩ f naoor da wa lak kugr ye.’”+ 7 A Zeezi yeela yẽ yaa: “B le gʋlsame: ‘Yãmb pa segd n mak yãmb Wẽnnaam a Zeova* ye.’”+

8 Sʋɩtãanã* le tall-a lame n kẽng tãn-lug-lug zugu, n wilg-a dũniyã soolem toɛy-toɛyã fãa ne b ziirã,+ 9 la a yeel-a yaa: “Fo sã n wõgemd n waoog maam vugr bala, m na n kõ-f-la bõn-kãensã fãa.” 10 T’a Zeezi leok-a yaa: “Sʋɩtãana, looge! Bala b gʋlsame: ‘Yaa yãmb Wẽnnaam a Zeova* la y segd n waooge,+ la yaa yẽ a ye bal la y segd n sak ne y sũur fãa.’”+ 11 Dẽ, Sʋɩtãanã* loog n bas-a lame.+ La malɛgs n wa n ges a yelle.+

12 A Zeezi sẽn wa n wʋm tɩ b yõka a Zã wã,+ a kẽnga Galile.+ 13 Yẽ sẽn yi Nazarɛte, a tɩ zĩnda Kapɛrnawum+ sẽn be mogrã noore, Zebulõ la Naftali soolmẽ wã, 14 tɩ no-rɛɛs a Ezayi sẽn da yeel bũmb ningã pidsi. A ra yeelame: 15 “Zebulõ soolmã la Naftali soolmã sẽn be mogrã sor noorã, Zʋrdẽ kʋɩlgã rʋʋnde, Galile sẽn yaa bu-zẽms soolmã, 16 neb nins sẽn zĩ lik pʋgẽ wã yãa vẽenem-kãsenga, la sã n yaa ne sẽn zĩ-b tẽng ning kũum maasem sẽn bui wã, vẽenem+ puka b zutu.”+ 17 Rẽ tɛka, a Zeezi sɩnga mooneg n yetẽ: “Tek-y yam n kos sugri, bala saasẽ Rĩungã kolgame.”+

18 A sẽn wa n kẽnd Galile mogrã noore, a yãa rap a yiib sẽn yaa ba-biisi. Yaa a Sɩmo b sẽn boond me t’a Pɩyɛɛrã,+ la a ba-biig a Ãndere. B ra lobda zĩm-gãmbr mogrã pʋgẽ, bala b ra yaa zĩm-yõgdba.+ 19 La a yeel-b lame yaa: “Wa n tũ-y maam, tɩ mam na n kɩtame tɩ y yõgd neba,+ wa y sẽn yõgd zĩmã to-to wã.” 20 Zĩig pʋgẽ, b basa b zĩm-gãmba wã n pʋg-a.+ 21 A sẽn yi be, a yãa rap a yiib me sẽn yaa ba-biisi. Yaa a Zebede biig a Zak ne a ba-biig a Zã.+ B ra bee koom-koglg pʋg ne b ba a Zebede, n manegd b zĩm-gãmba, t’a Zeezi bool-ba.+ 22 Zĩig pʋgẽ, b basa koom-koglgã ne b ba wã, n pʋg-a.

23 A Zeezi saaga Galile soolmã fãa,+ n zãmsd nebã tigsg rotẽ,+ la a moond Rĩungã koe-noogã, n sãoogd bãas buud fãa, la komslem buud fãa.+ 24 A yʋʋrã saaga Siiri soolmã fãa. Nebã ra tara sẽn namsd-b ne bãas la tood buud toor-toore,+ zĩn-dãmb sẽn namsd b rãmba,+ n paas sẽn lʋɩt-b kĩsinkĩiri,+ la koms-rãmb n wat a nengẽ, t’a sãoogd-ba. 25 Rẽ kɩtame tɩ neb kʋʋng yi Galile, Dekapolle,* Zerizalɛm, Zide la Zʋrdẽ kʋɩlgã rʋʋnd n pʋg-a.

5 A Zeezi sẽn yã kʋʋngã, a rʋʋ tãngã zug n zĩndi, t’a karen-biisã wa a sɛɛgẽ. 2 Dẽ, a sɩngame n zãmsd-ba, n yetẽ:

3 “Sũ-noog rãmb la neb nins sẽn mi tɩ b segd n baoo Wẽnnaamã,+ bala saasẽ Rĩungã yaa bãmb n so.

4 “Sũ-noog rãmb la neb nins sẽn kẽnd ne sũ-sãamsã, bala b na n paama belsgo.+

5 “Sũ-noog rãmb la neb nins sẽn yaa sũ-maasem dãmbã,*+ bala b na n sooga tẽngã.+

6 “Sũ-noog rãmb la neb nins tɩrlem kom la a ko-yũud sẽn tarã,+ bala b na n tɩgame.*+

7 “Sũ-noog rãmb la nimbãan-zoɛtbã,+ bala b na n zoee b nimbãanega.

8 “Sũ-noog rãmb la neb nins sẽn yaa pʋ-peelem dãmbã,*+ bala b na n yãa Wẽnnaam.

9 “Sũ-noog rãmb la neb nins sẽn baood laafɩ wã,*+ bala b na n bool-b lame tɩ Wẽnnaam kamba.*

10 “Sũ-noog rãmb la neb nins b sẽn namsd tɩrlem yĩngã,+ bala saasẽ Rĩungã yaa bãmb n so.

11 “Yãmb yaa sũ-noog rãmba, sã n mik tɩ b paoogda yãmb+ mam yĩnga, n namsd yãmb+ la b rõt yãmb ne wẽng buud fãa.+ 12 Maan-y sũ-noog la y kɩdme,+ yãmb keoorã+ sẽn be saasẽ wã sẽn yaa kãsengã yĩnga. Bala yaa woto me la b nams no-rɛɛsdbã sẽn zĩnd sẽn deng yãmbã.+

13 “Yãmb yaa dũniyã yamsem.+ La yamsem sã n sãbge, bõe la b tõe n maan t’a le paam noosem? A pa le tar yõod tɩ sã n pa b rɩk-a n lob yɩng+ tɩ nebã tab ye.

14 “Yãmb yaa dũniyã vẽenem.+ Tẽng sẽn be tãng zug pa tõe n solg ye. 15 Ned pa yõgend fɩtl n ning peoog* tẽngr ye. A na n dogl-a-la fɩtl-doagendg zugu, tɩ vẽneg neb nins fãa sẽn be roogã pʋgẽ wã.+ 16 Bɩ yãmb me vẽenemã yãg nebã sʋka,+ tɩ b tõog n yã yãmb tʋʋm-sõma wã,+ n pẽg yãmb Ba sẽn be saasẽ wã.+

17 “Ra tags-y tɩ mam waame n na n sãam Tõogã la no-rɛɛsdbã sẽn gʋls bũmb ninsã ye. Mam pa wa n na n sãam-b ye. Yaa sẽn na n pids-ba.+ 18 Sɩd-sɩda, mam yeta yãmb tɩ baa saasã la tẽngã sã n looge, Tõogã gʋls-bil ning sẽn pa ta a taabã, wall a gʋls-bi-pɛdg baa a ye kõn sãame, tɩ bõn-kãensã fãa pa pids ye.+ 19 Rẽnd ned ning fãa sẽn kɩɩsd no-bõon-kãensã a ye, la a yet neb a taabã tɩ b maan woto, yẽ kõn zems tɩ kẽ saasẽ Rĩungã pʋgẽ ye.* La ned sã n tũud no-kãense, la a zãmsd neb a taabã rẽ, yẽ soab na n zemsame tɩ kẽ saasẽ Rĩungã pʋgẽ.* 20 Mam yeta yãmb tɩ yãmb tɩrlmã sã n pa yɩɩg gʋlsdbã ne Fariziyẽ-rãmbã rẽndã,+ yãmb kõn tol n kẽ saasẽ Rĩungã pʋgẽ ye.+

21 “Yãmb wʋmame tɩ b ra yeela pĩnd wẽndẽ dãmbã yaa: ‘Fo pa segd n kʋ ye.+ La tɩ ned sã n kʋ a to, zemsame tɩ bʋ-kaoodb kao a bʋʋdo.’+ 22 La mam yeta yãmb tɩ ned sũur sã n yik ne a saam-biig n pa sigda,+ zemsame tɩ bʋ-kaoodb kao a bʋʋdo. Ned sã n paoog a saam-biig ne gom-bɛda, zemsame tɩ Bʋ-kaoodbã sul-kãsengã* kao a bʋʋdo. La ned sã n yeel a to yaa: ‘Fo yaa yalem tembende,’ zemsame tɩ b lob-a Zeyɛn* bugmã pʋgẽ.+

23 “Woto yĩnga, fo sã n tall f kũun n ta tẽn-kugrã taoore,+ n tẽeg tɩ f saam-biig sũur n sãam ne foo, 24 bɩ f bas kũunã tẽn-kugrã taoore, la f reng n kẽng n tɩ maneg f yellã ne f saam-biigã, n yaool n wa kõ f kũunã.+

25 “Bɩ f yɩ tao-tao n maneg f yell ne f zabd-n-taaga, yãmb sẽn wat n be sorẽ n dabd bʋ-kaoorã zĩigẽ, sẽn na yɩl tɩ f zabd-n-taagã ra wa rɩk-f n ning bʋ-kaoodã nugẽ, tɩ bʋ-kaoodã ning-f bʋ-kaoor zĩigẽ tʋm-tʋmdã nugẽ, t’a kɩt tɩ b kẽes-f bãens roogẽ ye.+ 26 Mam yeta foom sɩd tɩ f sã n pa yao f samdã, hal n tãag f yaoolem lagf ning sẽn pa zem baa fʋɩ wã,* b kõn bas-f tɩ f yi ye.

27 “Yãmb wʋmame tɩ b ra yeelame: ‘Fo pa segd n yo ye.’+ 28 La mam yeta yãmb tɩ ned sã n ges pag+ hal t’a yam wa kẽ-a, a zoe n yoo ne-a a sũurẽ wã.+ 29 Woto yĩnga, fo rɩtg nifã sã n kʋɩɩbd foom* bɩ f feoog-a n lob yɩɩga.+ Bala fo sã n kong f yĩngã will a yembr n são b sẽn na n lob f yĩngã tõr Zeyɛnne.*+ 30 Sẽn paase, fo rɩtg nugã sã n kʋɩɩbd foom bɩ f fiuug-a n lob yɩɩga. Bala fo sã n kong f yĩngã will a yembr n são f yĩngã tõr sẽn na n wa tɩ be Zeyɛnne.*+

31 “B ra yeelame me: ‘Ned sã n na n kao kãadem ne a paga, bɩ a kõ-a basg sebre.’+ 32 La mam yeta yãmb tɩ ned sã n kao kãadem ne a pag tɩ pa a sẽn yo* yĩng bala, a kɩtdame t’a tõe n lʋɩ yoob pʋgẽ. La ned sã n kẽ kãadem ne pag b sẽn base, yẽ me yoodame.+

33 “Yãmb wʋmame me tɩ b ra yeela pĩnd wẽndẽ dãmbã yaa: ‘Fo pa segd n wẽen n yaool n pa pidsi,+ la tɩ f segd n pidsa pʋleng ning fãa f sẽn pʋlem a Zeova.’*+ 34 La mam yeta yãmba: Ra wẽen-y a bada.+ Ra wẽen-y ne saasã ye. Bala yaa Wẽnnaam geere. 35 Ra wẽen-y ne tẽngã, bala yaa Wẽnnaam nao-roagendga.+ Ra wẽen-y ne Zerizalɛm me ye. Bala yaa Rĩm-kãsengã galʋ-tẽnga.+ 36 Ra wẽen-y ne y zugã ye. Bala yãmb pa tõe n kɩt tɩ y zoobg a yembr lebg pɛɛlg bɩ sablg ye. 37 Bɩ yãmb ‘N-yẽe’ yɩ n-yẽe, tɩ y ‘Ayo’ yɩ ayo.+ Bala sẽn zʋʋg rẽ yita wẽng soabã nengẽ.+

38 “Yãmb wʋmame tɩ b ra yeelame: ‘Nifr nifr yĩnga, la yẽnd yẽnd yĩnga.’+ 39 La mam yeta yãmba: Ra kɩɩs-y nin-wẽng ye. La ned sã n wẽ f rɩtg yɛgdgã, bɩ f tees-a yɛgdg a to wã me.+ 40 La ned sã n dat n tall foo n kẽng bʋʋd zĩigẽ sẽn na yɩl n deeg f tẽngr fuugu, bɩ f bas t’a reeg f zugẽ fuugã me.+ 41 Pãn-soaad sã n modg foo tɩ f tʋk zɩɩb n kẽn kɩlo a yembre, bɩ f kẽn kɩlo a yiibu. 42 Ned sã n kos foo bũmb bɩ f kõ-a. Ned sã n dat n peng* fo bũmb me bɩ f ra zãgs ye.+

43 “Yãmb wʋmame tɩ b ra yeelame: ‘Fo segd n nonga f to,+ la f kisg f bɛya.’ 44 La mam yeta yãmba: Nong-y y bɛɛbã,+ la y pʋʋsd neb nins sẽn namsd yãmbã yĩnga.+ 45 Woto la y wilgd tɩ y yaa y Ba sẽn be saasẽ wã kamba.+ Bala a kɩtdame t’a wĩntoogã zẽkd nin-wẽnsã la nin-sõma wã yĩnga, la a kɩtdẽ tɩ saagã niid nin-tɩrsã la sẽn pa-b tɩrsã yĩnga.+ 46 La yãmb sã n nong neb nins sẽn nong yãmbã bala, bõe keoor la yãmb segd ne?+ Yõor-yaood dɛɛgdbã me pa maand woto la? 47 La yãmb sã n pʋʋsd yãmb saam-biisã bala, yãmb maanda bõn-kãseng sɩda? Neb nins sẽn pa mi Wẽnnaamã me pa maand woto la? 48 Woto yĩnga, yãmb segd n zemsa zãnga, wa yãmb Ba sẽn be saasẽ wã sẽn zems zãngã.+

6 “Bɩ yãmb gũus n da wa tʋm y tʋʋm-sõma wã nebã nifẽ sẽn na yɩl tɩ b yã ye.+ Sã n pa rẽ, y pa na n paam keoor y Ba sẽn be saasẽ wã nengẽ ye. 2 Woto wã, fo sã n dat n kõ naong rãmb kũuni,* bɩ f ra kɩt tɩ b peeb tãntãoog fo taoor wa pʋ-lik rãmbã sẽn maand tigsg rotẽ wã, la soay zut n dat tɩ nebã pẽg-bã ye. Sɩd-sɩda, mam yeta yãmb tɩ b zoe n paama b keoorã zãnga. 3 La fo sã n na n kõ naong rãmb kũuni, bɩ f ra sak tɩ f nug-goabgã bãng f nug-rɩtgã sẽn maandã, 4 tɩ f kũunã yɩ sẽn soos n kõ. Woto, fo Ba wã sẽn ne bũmb fãa wã na n keoo foom.+

5 “Yãmb sã n na n pʋʋs me, bɩ y ra maan wa pʋ-lik rãmbã ye.+ B nong n yasa tigsg rotẽ la so-kãsemsã sotiisẽ n pʋʋsdẽ, n dat tɩ nebã yã-ba.+ Sɩd-sɩda, mam yeta yãmb tɩ b zoe n paama b keoorã zãnga. 6 La fo sã n na n pʋʋs bɩ f kẽ f roogẽ, n pag kʋɩlengã la f yaool n pʋʋs f Ba sẽn yaa soab ning ninsaal sẽn pa tõe n yã wã.+ Woto, fo Ba wã sẽn ne bũmb fãa wã na n keoo foom. 7 Fo sã n wa pʋʋsdẽ, bɩ f ra togsd goam n yɩlemdẽ, wa bu-zẽmsã neb* sẽn maandã ye. B tẽedame tɩ b sẽn gomd wʋsgã yĩng la b pʋʋsgã na n deege. 8 Bɩ y ra maan wa bãmb ye. Bala nand tɩ y kos menga, yãmb Ba wã mii bũmb nins yãmb sẽn datã.+

9 “Woto wã, ad yãmb sẽn tog n pʋʋs to-to:+

“‘Tõnd Ba sẽn be saasẽ, bɩ yãmb yʋʋr+ paam waoogre.*+ 10 Bɩ yãmb Rĩungã+ wa. Bɩ y raabã+ maan tẽngã zugu,+ wa sẽn maand saasẽ wã.* 11 Bɩ y kõ tõnd rɩɩb* rũndã daarã yĩnga,+ 12 la y kõ tõnd sugr d yel-wẽnã yĩnga,* wa tõnd me sẽn kõ d bɛɛgdbã* sugrã.+ 13 Ra bas-y tõnd tɩ d maan yel-wẽnd makr sasa ye.*+ Fãag-y* tõnd wẽng soabã nugẽ.’+

14 “Bala yãmb sã n kõt nebã sugr b beegrã yĩnga, yãmb Ba sẽn be saasẽ wã me na n kõo yãmb sugri.+ 15 La yãmb sã n pa kõt nebã sugr b beegrã yĩnga, yãmb Ba wã me pa na n kõ yãmb sugr y beegrã yĩng ye.+

16 “Yãmb sã n loe noor+ bɩ y ra le gãnem y nensã wa pʋ-lik rãmbã ye. Bãmb yeegda b nensã,* n dat tɩ nebã bãng tɩ b loee noore.+ Sɩd-sɩda, mam yeta yãmb tɩ b zoe n paama b keoorã zãnga. 17 La fo sã n loe noor bɩ f sõog f zugã kaam, la f widg f nengã, 18 sẽn na yɩl tɩ nebã ra bãng tɩ fo loee noore, tɩ yɩ f Ba sẽn yaa soab ning ninsaal sẽn pa tõe n yã wã bal n mi rẽnda. Woto, fo Ba wã sẽn ne bũmb fãa wã na n keoo foom.

19 “Bɩ y ra le bĩng y paoongã tẽng zugu,+ zĩig ning mogd* la tẽngempiisim sẽn sãamde, la wagda sẽn kẽed n zuudã ye. 20 Bĩng-y yãmb paoongã saasẽ,+ zĩig ning mogd la tẽngempiisim sẽn pa sãamde,+ la wagda sẽn pa kẽed n zuudã. 21 Bala fo paoongã sẽn be zĩig ninga, yaa be la fo sũurã me na n zĩndi.

22 “Nifr yaa yĩngã fɩtla.+ Dẽnd fo nifã sã n get bõn-yɛnga,* fo yĩngã tõr na n yɩɩ vẽenem.* 23 La fo nifã sã n tʋll bũmb neb a taab sẽn tare,*+ fo yĩngã tõr na n yɩɩ lika. Vẽenem ning sẽn be fo pʋgẽ wã sã n yaa lika, lik-kãng sɩd na n yɩɩ kãsenga!

24 “Ned baa a ye pa tõe n yɩ zu-soben-dãmb a yiib yamb ye. Bala a na n kisga a ye, la a nong a to wã,+ pa rẽ bɩ a sak a ye, la a paoog a to wã. Yãmb pa tõe n yaa Wẽnnaam yembse, la y yaa arzɛgsã yembs me ye.+

25 “Rẽ n so tɩ mam yet yãmb yaa: Ra le maan-y yɩɩr+ ne y vɩɩmã* yelle, rat n yeel tɩ yãmb sẽn na n dɩ bũmb ninga, wall y sẽn na n yũ bũmb ninga, pa rẽ bɩ ne y yĩngã yelle, rat n yeel tɩ y sẽn na n yeelg bũmb ning ye.+ Ninsaal vɩɩmã* yõod pa yɩɩd rɩɩbo, tɩ yĩngã yõod yɩɩd fut sɩda?+ 26 Maag-y y yĩng n ges bõn-yɩgdɩ wã sẽn yɩgd yĩngrã.+ Bãmb pa bʋte, b pa kẽebde, la b pa tigsd bao pʋsẽ me ye. La yãmb Ba sẽn be saasẽ wã rɩlgd-b lame. Yãmb yõod pa yɩɩd bõn-yɩgdɩ wã sɩda? 27 Yãmb sʋka, ãnda n tõe n paas a vɩɩmã woglem kãntɩɩg* a yembre, a sẽn maand yɩɩr yĩnga?+ 28 La bõe yĩng tɩ y maand yɩɩr fut poorẽ? Ges-y rulg-lɛlmã sẽn be weoogẽ wã sẽn bɩt to-to wã, n dɩk yam. B pa tʋmde, la b pa wĩid gĩs me ye. 29 La mam yeta yãmb tɩ baa a Salomo+ ne a ziirã fãa, a pa tõog n maneg a meng wa rulg-lelem-kãensã a yembr ye. 30 Yãmb a tẽeb bilf rãmba, Wẽnnaam sã n nagsd mood sẽn be weoogẽ rũndã, tɩ b na n dɩk-b n lob bugmẽ beoogã, a kõn sõng yãmb n yɩɩg tɩ y paam fut sɩda? 31 Bɩ y ra tol n maan yɩɩre,+ n sokd y meng yaa: ‘Bõe la tõnd na n dɩ?’ bɩ ‘Bõe la tõnd na n yũ?’ wall ‘Bõe la tõnd na n yeelge?’+ 32 Bala yaa bõn-kãens la bu-zẽmsã neb baood ne b sũy fãa. Yãmb Ba sẽn be saasẽ wã miime tɩ yãmb data bõn-kãens fãa.

33 “Bɩ y rengd n baood Wẽnnaam Rĩungã ne a tɩrlmã wakat fãa, tɩ b na paas yãmb bõn-kãens fãa sẽn ketã.+ 34 Ra maan-y yɩɩr a bada ne beoog yelle,+ bala beoog me na n talla a meng zu-loeese. Daar fãa tara a meng yɛl tɩ seke.

7 “Bas-y taab bʋʋd kaoobo,+ tɩ Wẽnnaam ra wa kao yãmb me bʋʋd ye. 2 Bala yãmb sẽn kaood nebã bʋʋd to-to wã, b na n kaoo yãmb me bʋʋd woto,+ la yaa ne makdg ning yãmb sẽn tar n makdẽ wã la b na n mak n lebs yãmba.+ 3 Bõe yĩng tɩ fo get moogã sẽn be f saam-biigã nifẽ wã, n yaool n pa ne sug-raoogã sẽn be fo mengã nifẽ wã?+ 4 Bɩ fo na n yɩɩ wãn n yeel f saam-biiga: ‘Bas tɩ m yãk moogã sẽn be fo nifẽ wã,’ tɩ sug-raoog yaool n be fo mengã nifẽ? 5 Pʋ-lik soaba! Reng n yãk sug-raoogã sẽn be fo nifẽ wã, tɩ rẽ la f tõogd n bãng f sẽn na n maan to-to n yãk moogã f saam-biigã nifẽ.

6 “Ra rɩk-y bõn-sõamyã n kõ baase, la y ra rɩk y kĩndi n lob kurkuy taoor+ tɩ b wa tab ne b nao, la b lɛɛg n pogl-y ye.

7 “Kot-y tɩ b na kõ-yã.+ Gẽesd-y tɩ y na yã. Kogsd-y kʋɩlengã tɩ b na pak n kõ-yã.+ 8 Bala sẽn kot-a fãa paamdame,+ sẽn gẽesd-a fãa yãtame, la b pakd n kõo sẽn kogsd-a kʋɩleng fãa. 9 Sɩd me, ãnda n be yãmb sʋk t’a biig na n kos-a bur t’a kõ-a kugri? 10 Wall a sã n kos zĩnfu, a na kõ-a waaf sɩda? 11 Woto wã, baa yãmb sẽn yaa nin-wẽnsã sã n mi tɩ y segd kõo y kambã bũmb sẽn yaa sõma, sẽn yɩɩd fãa, yãmb Ba sẽn be saasẽ wã kõn kõ neb nins sẽn kot-a wã+ bõn-sõma+ sɩda?

12 “Rẽ wã, yãmb sẽn dat tɩ nebã maan bũmb nins yãmb yĩngã, yãmb me segd n maana bãmb bõn-kãense.+ Sɩd-sɩda, a Moyiiz Tõogã ne no-rɛɛsdbã sɛbã võor la woto.+

13 “Bɩ y tũ rigno-sẽkã n kẽ,+ bala rigno-yalengã, la so-yalengã tar n dabda sãoong zĩigẽ, la neb wʋsg tũuda be. 14 La sor ning sẽn tar n dabd vɩɩm zĩigẽ wã yaa sẽka, t’a rignoorã yaa bãanega, la a yãtbã sõor paoodame.+

15 “Gũus-y y mens ne zirẽ-be-no-rɛɛsdbã.+ B wata yãmb nengẽ n maand wa piis sẽn pa tar b toorẽ yellã,+ n yaool n yaa wa we-baas kom sẽn tare.+ 16 Yaa b biisẽ wã la y na n bãng-b n welge. Ned zɩ n wob sib wall kankam gõos tɩɩg zug ye. Bɩ bõe?+ 17 Woto me, tɩ-sõng fãa womda bi-sõma, la tɩ-yook fãa womda biis sẽn pa tar yõodo.+ 18 Tɩ-sõng pa tõe n wom biis sẽn pa tar yõod ye. Tɩ-yook me pa tõe n wom bi-sõma ye.+ 19 Tɩɩg ning fãa sẽn pa womd bi-sõma, b kɛɛgd-a lame n lob bugmẽ.+ 20 Rẽnd sɩd yaa b biisẽ wã la y na n bãng nin-kãens n welge.+

21 “Pa ned ning fãa sẽn boond maam tɩ ‘Zu-soaba, Zu-soaba,’ n na n kẽ saasẽ Rĩungã pʋgẽ ye. Yaa sẽn maand-a mam Ba sẽn be saasẽ wã raabã bala.+ 22 Baraare, neb wʋsg na n soka maam yaa: ‘Zu-soaba, Zu-soaba,+ tõnd pa togs bãngr-goam ne yãmb yʋʋre, n dig zĩn-dãmb ne yãmb yʋʋre, la d maan yel-soalem wʋsg ne yãmb yʋʋr sɩda?’+ 23 La mam na n leoka bãmb yaa: ‘Mam pa mi yãmb lae-lae! Yãmb a tʋʋm-wẽns-maandba, loog-y n bas-y maam!’+

24 “Woto yĩnga, ned ning fãa sẽn wʋm mam gom-kãensã la a tũudẽ, a na n yɩɩ wa rao sẽn tar yam sẽn me a roog kugr zugu.+ 25 Saagã niime n kidgi, tɩ koomã pid zĩig fãa, tɩ sobgã me fug ne pãng n wẽ roogã, la a pa lʋɩ ye. Bala a yẽbga kugr zugu. 26 La ned ning fãa sẽn wʋm mam gom-kãensã la a pa tũudẽ, a na n yɩɩ wa yalem sẽn me a roog bĩisr zugu.+ 27 Saagã niime n kidgi, tɩ koomã pid zĩig fãa, tɩ sobgã me fug ne pãng n wẽ roogã+ t’a siigi, la a sãoongã yɩɩ kãsenga.”

28 A Zeezi sẽn togs gom-kãensã n sa, a sẽn da zãmsd nebã to-to wã linga kʋʋngã wʋsgo,+ 29 bala a ra pa zãmsd-b wa bãmb gʋlsdbã ye. A ra gomda ne tõogo.+

8 Yẽ sẽn yi tãngã zug n sigã, neb kʋʋng n pʋg-a. 2 La wãoor n wa n wõgemd a taoor n yeele: “Zu-soaba, yãmb sã n dat bala, y tõe n kɩtame tɩ m lebg yɩlemde.”+ 3 Dẽ, a tẽega a nug n sɩɩs-a n yeele: “M datame! Bɩ f lebg yɩlemde.”+ Zĩig pʋgẽ, a wãoodã sãoogame t’a lebg yɩlemde.+ 4 Rẽ poore, a Zeezi yeel-a lame: “Ra saag n togs ned ye.+ Kẽng n tɩ wilg f meng maan-kʋʋdã,+ la f kõ bũmb ning a Moyiiz sẽn wilgã+ tɩ yɩ kaset bãmb yĩnga.”

5 A sẽn kẽ Kapɛrnawum, soda-naab n wa a nengẽ n kos-a+ 6 n yeel yaa: “M soaala, mam tʋʋm-biig n gãe yir n pa tõe n yiki, n namsd wʋsgo.” 7 A yeela yẽnda: “M sã n ta be, m na n sãoog-a lame.” 8 La soda-naabã leok-a lame yaa: “M soaala, mam pa zems tɩ y wa mam zakẽ ye. Yãmb we n yeel bũmb bal tɩ mam tʋm-tʋmdã na n paama laafɩ. 9 Bala neb n so ma-me, tɩ mam tar sodaas m sẽn so. M sã n yeel a ye: ‘Kẽnge!’ a kẽngdame, la m yeel a to: ‘Wa!’ a watame. M sã n yeel m yambã yaa: ‘Maan woto!’ a maanda rẽ.” 10 A Zeezi sẽn wʋm gom-kãensã, ling-a-la wʋsg t’a yeel neb nins sẽn pʋgd-a wã yaa: “Mam yeta yãmb sɩd tɩ Israyɛll soolmẽ wã, m pa yã ned tẽeb sẽn yaa kãseng woto ye.+ 11 La mam yeta yãmb tɩ neb wʋsg na n yii yaang la nin-taoore, n wa zĩnd taablẽ ne a Abrahaam, a Izaak la a Zakoob saasẽ Rĩungã pʋgẽ.+ 12 La b na n loba Rĩungã kamb yɩng likã pʋgẽ. Yaa be la b na n yãb la b wãb b yẽnã.”+ 13 Rẽ poore, a Zeezi yeela soda-naabã yaa: “Kẽnge. Bɩ f kosgã reege, fo sẽn wilg tɩ f tara tẽebã yĩnga.”+ Wakat kãng bala, tʋm-tʋmdã bãag sãoogame.+

14 A Zeezi kẽnga a Pɩyɛɛr zakẽ wã, n tɩ mik t’a Pɩyɛɛr pagã ma+ gãeeme t’a yĩnsã wɩnge.+ 15 Dẽ, yẽ sɩɩsa a nugu,+ la a yĩnsã sẽn da wɩngã sigame, t’a yik n sɩng a yell gesgo. 16 La zaabrã sẽn wa n ta, nebã talla neb wʋsg zĩn-dãmb sẽn tar n wa a nengẽ, la a riga zĩn-dãmbã ne a noor gomd bala, la a sãoog neb nins fãa sẽn bẽedã, 17 sẽn na yɩl tɩ Wẽnnaam sẽn kɩt tɩ no-rɛɛs a Ezayi yeel bũmb ningã pidsi. A ra yeelame: “Yẽ meng deega tõnd bãase, la a tʋk tõnd toodo.”+

18 A Zeezi sẽn yã tɩ neb kʋʋng n gũbg-a wã, a yeela a karen-biisã tɩ b wa tɩ b kẽng mogrã rʋʋnde.+ 19 La gʋlsd a ye n kolg-a n yeele: “Karen-saamba, mam na n tũu yãmb n kẽng zĩig ning fãa y sẽn na n kẽnge.”+ 20 La a Zeezi leok-a lame yaa: “Waas* tara bogdo, tɩ liuuli wã me tar tʋgdo, la Ninsaal biigã pa tar zĩig a sẽn na n gãneg a zug ye.”+ 21 Rẽ poore, a karen-biig a to n yeel-a yaa: “Zu-soaba, kõ-y maam sor tɩ m deng n kẽng n tɩ mum m ba wã.”+ 22 T’a Zeezi yeel-a: “Kell n tũ maam, la f bas kũ-rãmbã tɩ b mum b kũ-rãmba.”+

23 A tɩ kẽe koom-koglg pʋgẽ, t’a karen-biisã tũ-a.+ 24 La haya! Sob-kãseng n yik mogrã zugu, tɩ ko-pɛmã zẽkd koomã tɩ kẽed koglgã pʋgẽ. La a Zeezi ra gõeeme.+ 25 B kolgame n nek-a n yeele: “Zu-soaba, fãag-y-do. Tõnd na n kiime!” 26 La a yeel-b lame: “Yãmb a tẽeb bilf rãmba, bõe yĩng tɩ yãmb yɛɛsd* woto?”+ Rẽ poore, a yikame n tãs sobgã ne mogrã, la zĩigã lebga sɩddd.+ 27 Rẽ linga karen-biisã wʋsgo, tɩ b yeele: “Nin-kãngã yaa bõe neda? Baa sobgã ne mogrã sakd-a lame.”

28 A sẽn ta mogrã rʋʋnde, Gadara nebã soolmẽ wã, rap a yiib zĩn-dãmb sẽn tar yii yaadẽ wã n seg-a.+ B ra yaa nin-toos wʋsgo, hal tɩ ned baa a ye ra pa tõe n paam daood n tũ so-kãng ye. 29 B ra tãsdame n yetẽ: “Wẽnnaam Biiga, bõe la yãmb dat ne tõndo?+ Yãmb waame n na n nams tõnd+ tɩ wakat ning b sẽn yãkã nan pa ta la?”+ 30 La sẽn da vẽsg ne be bilfu, kurkuy wʋsg n da be be n dɩtẽ.+ 31 Zĩn-dãmbã sɩnga a Zeezi bõosgo, n yeel yaa: “Yãmb sã n na n dig tõnd bɩ y kɩt tɩ d tɩ kẽ kurkuyã.”+ 32 T’a yeel-ba: “Kẽng-y-yã!” Dẽ, zĩn-dãmbã yiime n tɩ kẽ kurkuyã. La kurkuyã fãa zoeeme n ta mogrã noore, n yi sigdgẽ* wã n lʋɩ mogrã pʋgẽ n ki koomẽ wã. 33 Sẽn da gũud-b kurkuyã zoeeme n kẽng tẽngã pʋgẽ, n tɩ togs kibarã fãa, baa bũmb ning sẽn paam neb nins zĩn-dãmbã sẽn da tarã. 34 La tẽngã neb fãa yiime n na n seg a Zeezi. B sẽn yã-a wã, b kos-a lame t’a yi bãmb soolmẽ wã.+

9 Rẽ n so t’a Zeezi kẽ koom-koglgã, n pasg mogrã n leb a meng tẽngẽ wã.+ 2 La neb n dɩk rao sẽn ki bogr ne gãag n wa a nengẽ. A Zeezi sẽn yã tɩ b tara tẽebã, a yeela ki-bogrã yaa: “M biiga, keng f sũuri! Fo paama f yel-wẽnã sugri.”+ 3 La gʋlsdb kẽer ra yeta b mens yaa: “Ra-kãngã paoogda Wẽnnaam.” 4 A Zeezi sẽn mi b tagsa wã, a sokame: “Bõe yĩng tɩ yãmb tagsd tags-wẽns y sũurẽ?+ 5 Wala makre, bʋg yeelg n yaa nana n yɩɩda: ‘Fo paama f yel-wẽnã sugr bɩ,’ bɩ ‘Yik n kẽne’?+ 6 La mam na n wilga yãmb tɩ Ninsaal biigã tara noor tɩ kõ yel-wẽnã sugr tẽngã zugu.” Dẽ, a yeela ki-bogrã yaa: “Yik n dɩk f gãagã n kuil f yiri.”+ 7 A yikame n kuil a yiri. 8 Kʋʋngã sẽn yã rẽ wã, b yɛɛsa wʋsgo, n da pẽgd Wẽnnaam a sẽn kõ ninsaal tõog a woto wã yĩnga.

9 A Zeezi sẽn wa n yi be n loogdẽ, a yãa rao yʋʋr sẽn boond t’a Matiye t’a zĩ yõor-yaood reegr zĩigẽ. A yeela yẽ yaa: “Wa tũ maam.” Zĩig pʋgẽ, yẽ yikame n pʋg-a.+ 10 Rẽ poore, a Zeezi sẽn wa n zĩ roogẽ n dɩtẽ, yõor-yaood dɛɛgdb la yel-wẽn-maandb wʋsg n wa n naag yẽ ne a karen-biisã n dɩtẽ.+ 11 La Fariziyẽ-rãmbã sẽn yã rẽ wã, b soka a karen-biisã yaa: “Bõe yĩng tɩ yãmb karen-saambã rɩt ne yõor-yaood dɛɛgdb la yel-wẽn-maandba?”+ 12 A Zeezi sẽn wʋm b goamã, a yeelame: “Pa neb nins sẽn tar laafɩ wã n baood tɩp ye. Yaa bãad-rãmb n baood tɩpa.+ 13 Bɩ y kẽng n tɩ bao n bãng gomd ning sẽn yete: ‘Mam data nimbãan-zoeere, la pa maandã’ võore.+ Bala mam pa wa n na n bool nin-tɩrs ye. M waame n na n bool yel-wẽn-maandba.”

14 Dẽ, a Zã karen-biisã waa a Zeezi nengẽ, n sok-a yaa: “Bõe yĩng tɩ tõnd ne Fariziyẽ-rãmbã minim n loet noore, tɩ yãmb karen-biisã pa loetẽ?”+ 15 A Zeezi leoka bãmb n yeele: “Pʋg-paal sɩd+ sã n ket n be ne a zo-rãmba, bũmb bee sẽn tõe n sãam a zo-rãmbã sũur sɩda? La wakat n wat tɩ b na n yiis pʋg-paalã sɩd b sʋka.+ Dẽ, b na yaool n loe noore. 16 Ned pa be sẽn na n wãag peen-paall n lisg fu-kʋdr ye. Bala peen-paallã na n yõbgame n kɩt tɩ fu-kʋdrã kẽeg n yɩɩg pĩndã.+ 17 Nebã pa suiid divẽ-paalg wao-kʋd pʋsẽ me ye. B sã n maan dẽ, waoosã na n pusame tɩ divẽ wã raage, tɩ waoosã me yɩ bõne. La nebã suiida divẽ-paalg wao-paal pʋsẽ, sẽn na yɩl tɩ b yiibã fãa ra yɩ bõn ye.”

18 A sẽn wa n togsd nebã gom-kãensa wã, nin-naab a ye n kolg n wõgemd a taoor n yeele: “Tõe tɩ woto tɩ mam bi-puglã kiime. La mam kot-y lame tɩ y wa sɩɩs-a ne y nugu, t’a na vʋʋge.”+

19 Dẽ, a Zeezi yikame tɩ yẽ ne a karen-biisã pʋg-a. 20 La pag sẽn bẽed bãag yʋʋm piig la a yiib t’a zɩɩm yit n kolg a poorẽ,+ n sɩɩs a zugẽ fuugã noore,+ 21 bala a ra yeta a sũurẽ yaa: “Mam sã n sɩɩs a fuugã bala, mam na n paama laafɩ.” 22 A Zeezi wẽnemdame n yã pagã, n yeel-a yaa: “M biiga, keng f sũuri! Fo tẽebã kɩtame tɩ f paam laafɩ.”+ Wakat kãng bala, pagã paama laafɩ.+

23 A Zeezi sẽn ta nin-naabã zakẽ n yã wɩ-pɛɛbdbã ne kʋʋngã sẽn maand bʋʋrã,+ 24 a yeelame: “Yi-y-yã, bala bi-puglã pa ki ye. A gõeeme.”+ Nebã sẽn wʋm dẽ wã, b sɩnga a yaalgo. 25 B sẽn yiis kʋʋngã bala, a Zeezi kẽeme n gãd bi-puglã nug+ tɩ bi-puglã yiki.+ 26 La yel-kãngã kibarã saaga soolem-kãng fãa.

27 A Zeezi sẽn wa n yi be n loogdẽ, rap a yi sẽn yaa zoens+ n da pʋgd-a, n zẽkd b koees n yetẽ: “Davɩɩd Biiga, zoe-y tõnd nimbãanega.” 28 A Zeezi sẽn tɩ kẽ roogẽ wã, zoensã waa a nengẽ, t’a sok-b yaa: “Yãmb tẽedame tɩ mam tõe n maana bõn-kãng bɩ?”+ Tɩ b leok yaa: “N-ye, Zu-soaba.” 29 Dẽ, a Zeezi sɩɩsa bãmb ninã+ n yeele: “Bɩ a yɩ wa yãmb sẽn tẽedã.” 30 B ninã pukame tɩ b neẽ. Sẽn paase, a Zeezi keoog-b lame n yeele: “Ra saag-y tɩ ned bãng yãoã ye.”+ 31 La b sẽn yi wã, b goma a Zeezi yell tɩ soolem-kãng nebã fãa wʋme.

32 Zoensã sẽn wa n loogdẽ wã, neb n tall rao zĩn sẽn tar t’a yaa muk n wa a Zeezi nengẽ.+ 33 A sẽn dig zĩnã poore, mukã gomame.+ Rẽ linga kʋʋngã wʋsg tɩ b yeele: “Bõn-kãngã buud zɩ n maan Israyɛll ye.”+ 34 La Fariziyẽ-rãmbã ra yetame: “A rigda zĩn-dãmbã ne zĩn-dãmbã naabã maasem.”+

35 A Zeezi ra saagda tẽn-bɛd la tẽn-bõones fãa, n zãmsd nebã b tigsg rotẽ, n moond Rĩungã koe-noogã, la a sãoogd bãas la komslem buud fãa.+ 36 A Zeezi sẽn yã kʋʋngã, b nimbãaneg yõk-a lame.+ Bala a mikame tɩ b yaa wa piis sẽn pa tar pe-kɩɩma,+ n namsdẽ la b pa tar ned sẽn get b yell ye. 37 Dẽ, a Zeezi yeela a karen-biisã yaa: “Sɩd-sɩda, tigsgã yaa wʋsgo, la tʋm-tʋmdbã sõor paoodame.+ 38 Woto wã, bɩ y kos tigsgã Soab t’a tʋm tʋm-tʋmdb tɩ b wa a tigsgẽ wã.”+

10 Dẽ, a boola a karen-biis piig la a yiibã n kõ-b tõog tɩ b rig zĩn-dãmba,*+ la b sãoog bãas la komslem buud fãa.

2 Ad tẽn-tʋmdb piig la a yiibã yʋya:+ Pipi, yaa a Sɩmo b sẽn boond me t’a Pɩyɛɛrã+ ne a ba-biig a Ãndere,+ a Zak sẽn yaa a Zebede biigã n paas a ba-biig a Zã,+ 3 a Filip ne a Bartelemi,+ a Toma,+ a Matiye+ sẽn yaa yõor-yaood dɛɛgdã, a Alfe biig a Zake, a Taade, 4 a Sɩmo b sẽn boond tɩ yẽesem soabã, la a Zida Iskariot sẽn yaa ned ning sẽn wa n zãmb a Zeezi wã.+

5 A tʋma nin-kãens piig la a yiibã, n kõ-b noya.+ A yeelame: “Ra kẽng-y bu-zẽmsã nengẽ, la y ra kẽ Samari tẽng+ baa a ye pʋgẽ ye. 6 Kẽng-y Israyɛll buudã neb sẽn yaa wa piis sẽn menemã nengẽ bala.+ 7 Kẽng-y n moon-y n yeele: ‘Saasẽ Rĩungã kolgame.’+ 8 Sãoog-y bãad-rãmba,+ vʋʋg-y kũ-rãmba, kɩt-y tɩ wãoob lebg yɩlma, la y rig zĩn-dãmba. Yãmb deega zaalem, bɩ y kõ zaalem. 9 Ra bao-y sãnem bɩ wanzuri, wall zũud n sui y ligd sẽbdsẽ,+ 10 wall y zã rɩɩb korgo, bɩ fu-yord a yiibu,* pa rẽ bɩ neooda, wall dasaar+ y so-toakã yĩng ye. Bala tʋm-tʋmd zemsa ne a rɩɩbo.+

11 “Yãmb sã n kẽ tẽn-bedr wall tẽn-bila, bɩ y bao ned sẽn zems n pa a zakẽ wã n tãag y loogre.+ 12 Yãmb sã n kẽ zakã pʋgẽ bɩ y pʋʋs zakã rãmba. 13 Sã n mik tɩ zakã zemsame, bɩ laafɩ zĩnd a pʋgẽ wa yãmb sẽn kosã.+ La sã n mik t’a pa zemse, bɩ yãmb laafɩ wã lebg n sig y mens zutu. 14 Yãmb sẽn ta zĩig ning fãa tɩ b pa reeg yãmb wall b pa kelg yãmb goamã, y sã n wa yit zag-kãng wall tẽn-kãnga, bɩ y pĩms y naoã tom.+ 15 Sɩd-sɩda, mam yeta yãmb tɩ Bʋ-kaoorã daare, na n yɩɩ nana ne Sodom la Gomoor tẽnsã+ n yɩɩg tẽn-kãnga.

16 “Ade! Mam tʋmda yãmb wa piis we-baas sʋka. Woto wã, bɩ y yɩ gũus-m-mens rãmb wa wiisi, la y yɩ neb sẽn pa tar b toorẽ yell wa marwala.+ 17 Bɩ y gũus ne nebã, bala b na n yõga yãmb n kẽng bʋʋd zĩisẽ,+ la b pãb yãmb ne kalwaas+ b tigsg rotẽ wã.+ 18 B na n talla yãmb n kẽng guvɛrneer-dãmb la rĩm-dãmb nengẽ+ me mam yĩnga, tɩ yɩ kaset bãmb ne buud toɛy-toɛyã yĩnga.+ 19 La b sã n wa yõg yãmba, bɩ y ra maan yɩɩr ne yãmb sẽn na n gom to-to wall y sẽn na n yeel bũmb ning ye. Bala b na n wilga yãmb y sẽn segd n yeelã wakat kãnga.+ 20 Sẽn gomd-bã pa yãmb bal ye. Yaa yãmb Ba wã vʋʋsem sõngã n tũnugd ne yãmb n gomda.+ 21 Sẽn paase, ned na n yõka a ba-biig n kɩs tɩ b kʋ, tɩ ba yõk a biig n kɩse, tɩ kamb kɩɩs b roagdb n kɩt tɩ b kʋ-ba.+ 22 Nebã fãa na n kisga yãmb mam yʋʋrã yĩnga,+ la ned ning sẽn na n tõog toog* hal n tãag saabã, a na n paama fãagre.+ 23 B sã n nams yãmb tẽng a ye bɩ y zoe n kẽng tẽng a to.+ Sɩd-sɩda, mam yeta yãmb tɩ yãmb pa na n gilg Israyɛll tẽnsã n sa la Ninsaal biigã wa ye.

24 “Karen-biig pa yɩɩd a karen-saamba, tɩ yamb me pa yɩɩd a zu-soab ye.+ 25 La karen-biig sã n paam n lebg wa a karen-saamba, tɩ yamb me paam n lebg wa a zu-soaba,+ sekame. Nebã sã n bool zakã soab t’a Beelzebuubi,*+ b kõn bool a zakã rãmb woto n yɩɩd sɩda? 26 Bɩ y ra zoe bãmb ye. Bala bũmb pa be sẽn lud sẽn pa na n puki, la bũmb pa be sẽn solg sẽn pa na n vẽneg ye.+ 27 Bũmb ning mam sẽn togs yãmb likẽ, bɩ y rɩk-a n togs vẽenemẽ, la y moon bũmb nins yãmb sẽn wʋm tɩ m walmã rotã zutu.+ 28 Ra zoe-y neb nins sẽn kʋʋd yĩngã, la b yaool n pa tõe n kʋ sɩɩgã* ye.+ Bɩ y zoe sẽn tõe n sãam-a yĩngã ne sɩɩgã fãa Zeyɛn* pʋgẽ wã.+ 29 B pa koosd yirs a yiib ligd-koɛɛng sẽn pa zem baa fʋɩ* sɩda? Baasgo, b baa a ye pa lʋɩt tẽng tɩ yãmb Ba wã pa bãng ye.+ 30 La baa yãmb zugã zoobd fãa sõdame. 31 Woto wã, bɩ y ra maan dabeem ye. Yãmb yõod yɩɩda yirs wʋsgo.+

32 “Rẽ n so tɩ ned ning fãa sẽn na n yeel nebã taoor t’a mii maam,+ ma-me na n yeela m Ba sẽn be saasẽ wã taoor tɩ m mi-a lame.+ 33 La ned sã n yeel nebã taoor t’a pa mi maam, ma-me na n yeela m Ba sẽn be saasẽ wã taoor tɩ m pa mi-a ye.+ 34 Ra tags-y tɩ mam waame n na n kɩt tɩ laafɩ zĩnd tẽngã zug ye. Mam pa wa ne laafɩ ye. M waa ne sʋʋga.+ 35 Bala m waame n na n kɩt tɩ welgr zĩndi: Bi-ribl na n zabda ne a ba, tɩ bi-pugl zabd ne a ma, la pag na n zabda ne a sɩd-ma.+ 36 Hakɩɩka, ned meng zak rãmb na n yɩɩ a bɛɛba. 37 Ned ning sẽn nong a ba wall a ma n yɩɩd maam pa zems tɩ yɩ mam karen-biig ye. Sẽn nong-a a bi-ribl wall a bi-pugl n yɩɩd maam me pa zems tɩ yɩ mam karen-biig ye.+ 38 Ned ning sẽn pa na n sak n dɩk a namsg ra-luk* n tũ maam pa zems tɩ yɩ mam karen-biig ye.+ 39 Ned ning sẽn baood n na n kogl a vɩɩm,* a na n bõn-a lame, la ned ning sẽn bõn a vɩɩm* mam yĩng na n le paam-a lame.+

40 “Ned ning sẽn deegd yãmb reegda ma-me, la ned ning sẽn deegd maam reegda Soab ning sẽn tʋm maamã me.+ 41 Sẽn deegd-a no-rɛɛs a sẽn yaa no-rɛɛsã yĩnga, a na paam no-rɛɛs keoore.+ La sẽn deegd-a nin-tɩrg a sẽn yaa nin-tɩrgã yĩnga, a na paam nin-tɩrg keoore. 42 Sẽn paase, mam yeta yãmb sɩd tɩ ned ning sẽn na n kõ kom-bõon-kãensã ned a ye ko-maasg t’a yũ, a sẽn yaa mam karen-biigã yĩnga, a pa na n kong a keoorã ye.”+

11 A Zeezi sẽn wilg a karen-biis piig la a yiibã b sẽn segd n maanã n sa, yẽ mengã yii be n kẽng n tɩ zãms nebã b tẽnsẽ wã,+ la a moon koe-noogã.

2 La a Zã sẽn zĩnd bãens roogẽ+ wã n wʋm tʋʋm nins Kiristã sẽn tʋmdã, a tʋma a karen-biisã+ 3 tɩ b tɩ sok-a yaa: “Yaa yãmb la soab ning sẽn tog n wa wã bɩ, bɩ tõnd segd n gũu ned a to?”+ 4 La a Zeezi leoka bãmb n yeele: “Kẽng-y n tɩ togs-y-yã a Zã bũmb nins yãmb sẽn wʋmdã, la y sẽn yãtã:+ 5 Zoens nin neeme masã,+ põy kẽndame, wãoob+ lebgda yɩlma, wʋms wʋmdame, kũ-rãmb vʋʋgdame, tɩ koe-noogã+ moond naong rãmb sʋka. 6 Sũ-noog soab la ned ning sẽn pa yã bũmb mam nengẽ n lak n lʋɩ wã.”+

7 Nin-kãens loogr poore, a Zeezi sɩnga a Zã yell goama, n yeel kʋʋngã yaa: “Bõe la yãmb yi n tɩ ges we-raoogẽ wã?+ Tãnwĩig sobg sẽn da lengd bɩ?+ 8 La yɩɩ bõe la yãmb sẽn yi n tɩ gesã? Rao sẽn yer fut ligd sẽn toe* bɩ? Ayo. Neb nins sẽn yer fut ligd sẽn yaa toogã bee rĩm-dãmb zagsẽ. 9 Pʋd n yɩɩ bõe yĩng la yãmb sẽn yi wã? Yaa sẽn na n tɩ ges no-rɛɛs bɩ? N-ye. Mam yeta yãmb t’a yɩɩda no-rɛɛs hal zĩig sẽn zãre.+ 10 Yaa yẽ yell la b sẽn gʋls n yeele: ‘Kelg-y-yã! Mam na n tʋma m koe-taasdã t’a reng fo taoore.* Yẽ na n lʋɩɩ fo taoor n maneg f sorã.’+ 11 Sɩd-sɩda, mam yeta yãmb tɩ pagb sẽn dog b rãmbã sʋka, ned sẽn yɩɩd a Zãmbatiis nan pa zĩnd ye. La ned sẽn yaa bilf saasẽ Rĩungã pʋgẽ yɩɩda yẽnda.+ 12 Hal a Zãmbatiis wakatã n tãag masã, yaa saasẽ Rĩungã la nebã nangd pãng n data, la sẽn nangd-b pãng woto wã paamd-a lame.+ 13 Bala hal n tãag a Zã wakatã,+ No-rɛɛsdbã ne Tõogã fãa togsa bũmb nins sẽn watã. 14 La y sã n na n sak n deege, yaa yẽ la ‘Eli ning sẽn da tog n wa wã.’+ 15 Bɩ sẽn tar-a tʋb kelge.

16 “Mam na n maka zãmaan-kãngã nebã ne ãnd dãmba?+ Bãmb yaa wa kom-bõoneg sẽn zĩ raagẽ n gomd ne b reem-n-taas 17 n yetẽ: ‘Tõnd peeba wɩɩs tɩ yãmb sao, la yãmb pa sao ye. Tõnd yɩɩla kʋʋr yɩɩla, la yãmb pa wilg y sũ-sãang ye.’ 18 Woto me, a Zã waame n loet noor la a pa yũud divẽ ye. La nebã yeelame: ‘Zĩn n tar-a.’ 19 Ninsaal biigã waame, n dɩtẽ la a yũud divẽ,+ la nebã yeelame: ‘Ad rao sẽn yaa yão-be-ned la ned sẽn nong divẽ yũubu, n yaa yõor-yaood dɛɛgdbã la yel-wẽn-maandbã zoa.’+ La b bãngda yam* a biisẽ.”*+

20 Dẽ, a sɩngame n gomd tẽns nins pʋsẽ a sẽn maan yel-soalem wʋsgã yelle, n ningd-b taal b sẽn pa tek yam n kos sugrã yĩnga: 21 “Korazin, fo na n paama toogo! Betsayida, fo na n paama toogo! Bala yel-soalem nins sẽn maan yãmb pʋsẽ wã sã n da maanẽ Tɩɩr la Sɩdõ, woto tɩ b sẽn tek yam n kos sugr n yeelg bot la b zĩnd tompɛglem pʋgẽ daar zãra.+ 22 La mam yeta yãmb tɩ Bʋ-kaoorã daare, na n yɩɩ nana ne Tɩɩr la Sɩdõ n yɩɩg yãmba.+ 23 La foom a Kapɛrnawum,+ b na n zẽka foom n ta saasẽ bɩ? Fo na n sigame n ta Yaoogẽ,*+ bala yel-soalem nins sẽn maan fo pʋgẽ wã sã n da maanẽ Sodom tẽngã pʋgẽ, a ra na n ketẽ lame n tãag rũndã. 24 La mam yeta foom tɩ Bʋ-kaoorã daare, na n yɩɩ nana ne Sodom n yɩɩg foom.”+

25 Wakat kãnga, a Zeezi yeelame yaa: “M Ba sẽn yaa yĩngr la tẽng Zu-soaba, mam pẽgda yãmb nebã taoore, bala yãmb solga bõn-kãensã ne yam dãmbã la ne bãngdbã, la y yaool n vẽneg-b ne kom-bõonego.+ 26 N-ye, m Ba, mam pẽgda yãmba, yãmb sẽn dat tɩ yɩ woto wã yĩnga. 27 M Ba rɩka bũmb fãa n ning mam nugẽ,+ la ned baa a ye pa mi Biigã sõma tɩ sã n pa Ba wã ye.+ La ned baa a ye pa mi Ba wã sõma tɩ sã n pa Biigã, la ned ning Biigã sẽn dat n vẽnegã ye.+ 28 Bɩ y wa mam nengẽ, yãmb fãa sẽn yɛ la sẽn tʋk zɩɩbo, la mam na bels yãmba. 29 Rɩk-y mam yubl-balgdgã n pidi, la y rɩk yam mam nengẽ, bala mam yaa sũ-maasem soab la sik-m-meng soaba.+ Dẽ, y* na paam yolsgo. 30 Bala mam yubl-balgdgã yaa bʋgsgo,* tɩ m zɩɩbã yaa faasga.”

12 Wakat kãnga, a Zeezi pasga pʋt Vʋʋsg daare. Kom n da tar a karen-biisã, tɩ b sɩng ka-zutã fãrb n wãbdẽ.+ 2 Fariziyẽ-rãmbã sẽn yã rẽ, b yeel-a lame yaa: “Ges-y-yã! Yãmb karen-biisã maanda bũmb ned sẽn pa segd n maan Vʋʋsg daare.”+ 3 A Zeezi yeela bãmb yaa: “Yãmb pa karem bũmb ning a Davɩɩd sẽn maane, kom sẽn wa n tar yẽ ne rap nins sẽn da be ne-a wã la?+ 4 A sẽn yɩ wãn n kẽ Wẽnnaam doogẽ wã, la bãmb sẽn wãb burã b sẽn dɩk n kõ Wẽnnaamã,*+ bũmb sẽn yaa maan-kʋʋdbã bal n tar sor n na n wãbe, tɩ yẽ ne rap nins sẽn da be ne-a wã pa segd n wãbã la?+ 5 Bɩ yãmb pa karem Tõogã pʋgẽ tɩ Vʋʋsg daar fãa, maan-kʋʋdbã sẽn be wẽnd-doogẽ wã kɩɩsda Vʋʋsg daarã noy tɩ taal kae la?+ 6 La mam yeta yãmb tɩ sẽn yɩɩd wẽnd-doogã n be ka.+ 7 La yãmb sã n da wʋmẽ-la gomd ning sẽn yeel tɩ ‘mam data nimbãan-zoeere,+ la pa maandã’+ võore, yãmb da kõn ningẽ bʋʋm dãmbã taal ye. 8 Bala Ninsaal biigã yaa Vʋʋsg daarã Zu-soaba.”+

9 Yẽ sẽn yi be, a tɩ kẽe tigsg roog a ye pʋgẽ, 10 la rao nug sẽn ki* n da be be.+ Dẽ, bãmb soka a Zeezi yaa: “Zemsame tɩ b maag ned Vʋʋsg daar bɩ?” La yaa sẽn na yɩl n paam n dõd-a.+ 11 A Zeezi yeel-b lame: “Ãnd n be yãmb sʋk n tar pe-yɛnga, tɩ pe-kãng lʋɩ bok pʋgẽ Vʋʋsg daare, t’a pa tɩ tak-a n yiisi?+ 12 Ninsaal yõod yɩɩda pesg hal zĩig sẽn zãre! Rẽnd zemsame tɩ d maan bõn-sõng Vʋʋsg daare.” 13 Dẽ, a yeela raoã yaa: “Tẽeg f nugã.” Raoã tẽega a nugã, la a nugã vʋʋgame n lebg wa a to wã. 14 La Fariziyẽ-rãmbã yiime n yẽs ne taab n dat n bãng b sẽn na n maan to-to n paam-a n kʋ. 15 A Zeezi sẽn bãng rẽ wã, a yii be n looge. Neb wʋsg me tũ-a lame,+ t’a maag b fãa. 16 La a yeel-b lame tɩ b ra saag n gom yẽ yell ne neb a taabã ye.+ 17 Yaa sẽn na yɩl tɩ Wẽnnaam sẽn da kɩt tɩ no-rɛɛs a Ezayi togs bũmb ningã pidsi. A ra yeelame:

18 “Ad mam tʋm-tʋmdã+ mam sẽn yãkã, m nin-nongre, la sẽn ta-a mam yamã!*+ Mam na n ninga m vʋʋsmã a zugu,+ la a na n wilga buud toɛy-toɛyã tɩrlem sẽn yaa a soaba. 19 Yẽ pa na n zab+ wall a zẽk a koɛɛg ye. Ned pa na n wʋm yẽ koɛɛg so-kãsemsã zut me ye. 20 A pa na n kao tãnwĩig sẽn zõgemd n baase, la a pa na n kiis fɩtl laong sẽn nusd me,+ hal t’a wa tõog tɩ tɩrlem zĩndi. 21 Sɩd me, buud toɛy-toɛyã na n kɩsa sɩd ne yẽ.”*+

22 Dẽ, b talla rao zĩn sẽn tare, la sẽn yaa zoang la muk n wa a nengẽ, la a sãoog-a lame, tɩ raoã sẽn da yaa mukã tõe n gome, t’a ninã neẽ me. 23 Rẽ linga kʋʋngã wʋsgo, tɩ b sokdẽ yaa: “Nin-kãngã pa a Davɩɩd Biigã sɩda?” 24 Fariziyẽ-rãmbã sẽn wʋm dẽ wã, b yeelame: “Nin-kãngã sẽn digd zĩn-dãmbã, yaa ne a Beelzebuub* sẽn yaa zĩn-dãmbã naabã maasem.”+ 25 A Zeezi sẽn mi b tagsgã, a yeel-b lame: “Soolem ning fãa neb sẽn wẽneg n zabd taab lʋɩtame, la tẽng wall zak ning neb sẽn wẽneg n zabd taab pa na n kaoos ye.” 26 Woto me, a Sʋɩtãan sã n digd a Sʋɩtãana, a wẽneg n zabda ne a menga. Sã n yaa woto, a soolmã na n yɩɩ wãn n kaoose? 27 La sã n mik tɩ mam digda zĩn-dãmbã ne a Beelzebuub maasem, yaa ne ãnda maasem la yãmb kom-dibli wã rigd-ba? Yaa rẽ yĩng la bãmb sẽn na n yɩ yãmb bʋ-kaoodbã. 28 La sã n yaa ne Wẽnnaam vʋʋsem sõngã pãng la mam digd zĩn-dãmbã, rat n yeelame tɩ Wẽnnaam Rĩungã waame tɩ yãmb pa miẽ ye.+ 29 Ned tõe n kẽe pãng soab roogẽ, n wʋk a paoongã t’a pa reng n yõk pãng soabã n sẽb sɩda? Yaa rẽ poor bal la a tõe n zɛ a roogã teedo. 30 Ned ning sẽn pa be ne maam kɩɩsda maam, la ned ning sẽn pa naag maam n tigsdẽ, a sãeegdame.+

31 “Rẽ n kɩt tɩ mam yet yãmb tɩ ninsaalbã na n paama sugr yel-wẽn buud fãa yĩnga, la tʋy buud fãa yĩnga, la sẽn tʋʋs-a Wẽnnaam vʋʋsem sõngã pa na n paam sugr ye.+ 32 Wala makre, ned sã n gom Ninsaal biigã wẽnga, a na n paama sugri.+ La ned sã n gom Wẽnnaam vʋʋsem sõngã wẽnga, a pa na n paam sugr dũni-kãngã pʋgẽ, la dũni-paalgã* sẽn watã pʋgẽ me ye.+

33 “Tɩɩg sã n yaa sõma, a biisã na n yɩɩ sõma. La tɩɩg sã n yaa yooko, a biisã me na n yɩɩ yoodo. Bala yaa tɩɩg biis n kɩtd tɩ b bãng a yaa sõma bɩ a pa sõma.+ 34 Wag-toos yagense,+ yãmb na n yɩɩ wãn n gom gom-sõma tɩ yãmb mensã yaool n yaa nin-wẽnse? Bala yaa sũur sẽn pid ne bũmb ningã la noor yiisda.+ 35 Nin-sõng noor yiisda bõn-sõma, a sũur sẽn pid ne bõn-sõma wã yĩnga. La nin-wẽng noor yiisda bõn-wẽnse, a sũur sẽn pid ne bõn-wẽnsã yĩnga.+ 36 Mam yeta yãmb tɩ Bʋ-kaoorã daare, b na n soka ninsaalbã+ gom-vɩɩd nins fãa b sẽn gomã. 37 Bala yaa fo goamã la b na n tik n kõ-f bʋʋm, leb n yaa fo goamã la b na n tik n ning-f taale.”

38 La sẽn na yɩl n leok a Zeezi, gʋlsdbã ne Fariziyẽ-rãmbã kẽer yeelame: “Karen-saamba, tõnd ratame tɩ y maan bãnd tɩ d yã.”+ 39 T’a leok-b n yeele: “Zãmaan-kãngã neb sẽn yaa wẽns la yoaadbã* rat n yãa bãnde, la b pa na n yã bãnd a to n zʋʋg no-rɛɛs a Zonas bãndã ye.+ 40 Bala wa a Zonas sẽn pa zĩm-bedrã pʋgẽ rasem a tãabo, wĩndg la yʋngã,+ Ninsaal biigã me na n paa tẽn-gãongã pʋgẽ rasem a tãabo, wĩndg la yʋngo.+ 41 Bʋʋdã kaoob sasa, Niniiv nebã na n vʋʋga ne zãmaan-kãngã n ning-a taale, bala Niniiv nebã sẽn wʋm a Zonas sẽn moon koɛɛg ningã,+ b teka yam n kos sugri. La ade! Sẽn yɩɩd a Zonas n be ka.+ 42 Bʋʋdã kaoob sasa, goabg rĩm-poakã na n vʋʋga ne zãmaan-kãngã n ning-a taale, bala yẽ yii hal zĩ-zãrgẽ n wa kelg a Salomo yam goamã.+ La ade! Sẽn yɩɩd a Salomo n be ka.+

43 “Zĩn* sã n yi n bas neda, a yeebda zĩ-pɛɛlẽ wã n baood vʋʋsg zĩiga. La a sã n pa yã,+ 44 a yetame: ‘Mam na n leba m doogẽ wã, zĩig ning m sẽn yi wã.’ La a sã n tɩ ta, a mikdame tɩ roogã yaa vɩʋʋgo, n pɩɩs n nags tɩ yaa neere. 45 Dẽ, yẽ kẽngdame n tɩ peeg zĩn-dãmb a yopoe sẽn yaa wẽns n yɩɩd yẽ mengã, tɩ b wa kẽ n pa be, tɩ nin-kãng yaoolem yɛlã lebg wẽng n yɩɩg pipi wã.+ Na n yɩɩ woto ne zãmaan-kãngã sẽn yaa wẽngã.”

46 A sẽn wa n ket n gomd ne kʋʋngã, a ma wã ne a ma-biisã+ wa n yasa yɩng n dat n gom ne-a.+ 47 Rẽ n so tɩ ned a ye yeel-a yaa: “Ade! Yãmb ma wã ne y ma-biisã bee yɩng n dat n gom ne yãmba.” 48 Yẽ leoka ned ning sẽn gomd ne-a wã, n sok yaa: “Ãnda la mam ma, la ãnd dãmb la mam ma-biisi?” 49 La a tẽega a nug n tees a karen-biisã n yeele: “Ad mam ma, la m ma-biisi!+ 50 Bala ned ning fãa sẽn maand m Ba sẽn be saasẽ wã raab n yaa mam ma-bi-raoogo, m ma-bi-poaka, la m ma.”+

13 Baraare, a Zeezi yii roogẽ wã n tɩ zĩnd mogrã noore. 2 La neb kʋʋn-kʋʋng n wa n tigim taab a nengẽ, tɩ kɩt t’a tɩ kẽ koom-koglg a ye pʋgẽ n zĩndi. La kʋʋngã fãa ra yasa mogrã noore.+ 3 Dẽ, a wẽe yel-bũn+ n togs nebã bũmb wʋsg n yeele: “Ka-koaad n yi n na n fẽrg bõn-buudu.+ 4 La a sẽn wa n fẽrgdẽ wã, bõn-buud kẽer n lʋɩ sorã noor tɩ liuuli wa rɩ.+ 5 Sãnda lʋɩɩ kug zĩigẽ, tom sẽn pa waoogẽ. B yii tao-tao, tomã sẽn pa waoogã yĩnga.+ 6 La wĩntoogã sẽn zẽke, a tʋʋlmã kɩtame tɩ b zelg n ki, b sẽn pa tar yẽgã yĩnga. 7 Kẽer lʋɩɩ gõos sʋka, tɩ gõosã yik n wulumd-ba.+ 8 La sãnda lʋɩɩ zĩ-sõngẽ, n sɩng biis wombo. Yãoã soab woma koabga, tɩ kada soabã wom pis-yoobe, t’a to wã wom pis-tã.+ 9 Bɩ sẽn tar-a tʋb kelge.”+

10 Dẽ, karen-biisã kolg-a lame n sok yaa: “Bõe yĩng tɩ yãmb gomd ne bãmb ne yel-bũna?”+ 11 La a Zeezi leoka bãmb n yeele: “Wẽnnaam sõnga yãmb tɩ y tõe n wʋm saasẽ Rĩungã yel-solgdsã sẽn yaa sõamyã+ wã võore, la a pa sõng nin-kãensã ye. 12 Bala ned ning sẽn tare, b na n kõ-a lame n paas t’a paam tɩ seke. La ned ning sẽn pa tare, baa a sẽn tarã menga, b na n deeg n bas-a lame.+ 13 Rẽ n so tɩ mam gomd ne bãmb ne yel-bũna, bala b sẽn getã, b geta zaalem, la b sẽn kelgdã, b kelgda zaalem n pa wʋmd a võor me ye.+ 14 Sẽn paase, a Ezayi bãngr-gomdã pidsda bãmb zutu. A ra yeelame: ‘Sɩd-sɩda, yãmb na n kelgame, la y pa na n tol n wʋm a võor ye. Sɩd-sɩda, y na n gesame, la y pa na n tol n yã ye.+ 15 Bala bu-kãngã neb sũyã riglmame. B tʋbã wʋmame la b pa reeg ye. B muma b nin sẽn na yɩl tɩ b ninã ra tol n yã, tɩ b tʋbã ra wʋme, la b ra wa wʋm a võor b sũyã pʋsẽ, n lebg n wa mam nengẽ tɩ m sãoog-b ye.’+

16 “La yãmb yaa sũ-noog rãmba, bala yãmb nin neeme, tɩ y tʋb wʋmdẽ.+ 17 La sɩd-sɩda, mam yeta yãmb tɩ no-rɛɛsdb ne nin-tɩrs wʋsg ra tʋll n yãa bũmb nins yãmb sẽn ne wã, la b pa yã ye,+ la b wʋm bũmb nins yãmb sẽn wʋmdã, la b pa wʋm ye.

18 “Masã, bɩ y kelg ka-koaadã sẽn yi n na n fẽrg bõn-buudã yel-bũndã võore:+ 19 Ned sã n kelg Rĩungã koɛɛg n pa wʋm a võore, wẽng soabã+ wat n yiisa bũmb ning b sẽn bʋd yẽ sũurẽ wã. Rẽ makda bõn-buudã sẽn lʋɩ sorã noorã.+ 20 La sã n yaa ne sẽn lʋɩ-a kug zĩigẽ wã, rẽ yaa ned sẽn kelg koɛɛgã n deeg-a zĩig pʋgẽ ne sũ-noogo.+ 21 La yẽ sẽn pa tar a toorẽ yẽgã yĩnga, a kaoosda wakat bilfu. La a sã n wa paam zu-loɛɛg wall namsg koɛɛgã yĩnga, a lʋɩta zĩig pʋgẽ. 22 La sã n yaa ne sẽn lʋɩ-a gõos sʋkã, rẽ yaa ned sẽn wʋm koɛɛgã, tɩ yɩɩr ne dũni-kãngã* yɛlã,+ n paas arzɛkã pãng sẽn tõe n belg nedã wulumd koɛɛgã n kɩt t’a pa womd biis ye.+ 23 La sã n yaa ne sẽn lʋɩ-a zĩ-sõngẽ wã, rẽ yaa ned sẽn kelgd koɛɛgã la a wʋmd a võor n womd biisi. Yãoã soab womda koabga, tɩ kada soabã womd pis-yoobe, t’a to wã womd pis-tã.”+

24 A wẽ-b-la yel-bũnd a to n yeele: “D tõe n dɩka saasẽ Rĩungã n mak ne rao sẽn bʋd bõn-buud sẽn yaa sõma a pʋʋgẽ. 25 Nebã gõeem wakate, raoã bɛ n wa n kẽ ki* wã sʋk n bʋd nadens* la a looge. 26 Koodã sẽn wa n bul n yi n wom biisi, nadensã me pukame. 27 Dẽ, yirã soab tʋm-tʋmdbã wa n yeel-a lame: ‘Zu-soaba, yãmb pa bʋd bõn-buud sẽn yaa sõma y pʋʋgẽ wã wɛ? La maana wãn tɩ nadens be beenẽ?’ 28 Yẽ yeel-b lame: ‘Yaa mam bɛ n maan dẽ.’+ Tɩ tʋm-tʋmdbã sok yaa: ‘Yãmb datame tɩ d yi n võ-b bɩ?’ 29 Yẽ leokame yaa: ‘Ayo. Bala mam yɛɛsda yãmb na wa n naag ki wã ne nadensã n võ. 30 Bas-y tɩ b naag taab n bɩ hal n tãag tigsgã. Tigsgã sasa, mam na n yeela tigsdbã yaa: Reng-y n kɛ-y nadensã n loe kil n yõog bugum, la y tigs ki wã n sui mam baoorẽ wã.’”+

31 A wẽ-b-la yel-bũnd a to n yeele: “Saasẽ Rĩungã yaa wa mutard bil* rao sẽn dɩk n bʋd a pʋʋgẽ.+ 32 Sɩd-sɩda, a yaa bilf n yɩɩd bõn-buud a taabã fãa, la a sã n bɩ a yaa kãseng n yɩɩd bũmb nins b sẽn kood zẽed zĩisẽ wã fãa. A lebgda tɩɩga, hal tɩ liuuli wã sẽn yɩgd yĩngrã wat n soonded a wilẽ wã.”

33 A paas-b-la yel-bũnd a to n yeele: “Saasẽ Rĩungã yaa wa rabɩll pag sẽn dɩk n kalem zom wʋsg* n nage, hal tɩ zom-nagdgã fãa wa wuki.”+

34 A Zeezi togsa kʋʋngã bõn-kãensã fãa ne yel-bũna. Sɩd me, a ra pa gomd ne bãmb tɩ pa ne yel-bũna,+ 35 sẽn na yɩl tɩ Wẽnnaam sẽn da kɩt tɩ no-rɛɛsã yeel bũmb ningã pidsi. A ra yeelame: “Mam na n yaaga m noor n wẽ yel-bũna. Mam na n moona bũmb nins sẽn solg hal sɩngrẽ* wã.”+

36 La a Zeezi sẽn kuils kʋʋngã poore, a tɩ kẽe roogẽ. A karen-biisã kolg-a lame n yeele: “Bilg-y tõnd yel-bũnd ning sẽn gomd nadensã sẽn be pʋʋgẽ wã yellã võore.” 37 T’a leok yaa: “Sẽn bʋd-a bõn-buud sẽn yaa sõma wã yaa Ninsaal biigã, 38 tɩ pʋʋgã yaa dũniyã.+ La sã n yaa ne bõn-buud sẽn yaa sõma wã, bãmb yaa Rĩungã kamba. La nadensã yaa wẽng soabã kamba,+ 39 tɩ bɛ wã sẽn bʋd-bã yaa Sʋɩtãanã.* Tigsgã yaa dũniyã* saabo, tɩ tigsdbã yaa malɛgsã. 40 B sẽn tigim nadensã n yõog bugmã, na n yɩɩ woto me dũniyã* saab wakate.+ 41 Ninsaal biigã na n tʋma a malɛgsã tɩ b yiis bũmb nins fãa sẽn tõe n kɩt tɩ ned lak n lʋɩ wã, ne tʋʋm-wẽns-maandbã a Rĩungã pʋgẽ, 42 n tɩ lob-b wʋng ning sẽn wɩng wʋsgã pʋgẽ.+ Yaa be la b na n yãb la b wãb b yẽna. 43 Wakat kãnga, nin-tɩrsã na n yãga wa wĩntoogã+ sẽn yãgd to-to wã bãmb Ba wã Rĩungã pʋgẽ. Bɩ sẽn tar-a tʋb kelge.

44 “Saasẽ Rĩungã yaa wa laog sẽn solg pʋʋg pʋgẽ, tɩ rao yã n lebs n solge. A sũurã sẽn yaa noogã yĩnga, a tɩ koosa a sẽn tarã fãa n da pʋʋgã.+

45 “Saasẽ Rĩungã leb n yaa wa toand sẽn gilgd n baood kĩndi sẽn yaa sõma. 46 A sẽn wa n yã kĩndf sẽn tar yõod wʋsgo, a kẽngame n tɩ koos a sẽn tarã fãa tao-tao n da-a.+

47 “Saasẽ Rĩungã leb n yaa wa zĩm-gãmbr b sẽn lob mogrã pʋgẽ, t’a yõgd zĩm buud fãa. 48 A sã n wa n pidi, b vuugd-a lame n wa mogrã noore, n zĩnd n tũus zĩm nins sẽn yaa sõma wã+ n ning yaas pʋsẽ, la b lob sẽn pa-b sõma wã.+ 49 Na n yɩɩ woto dũniyã* saab wakate. Malɛgsã na n wa yiisa nin-wẽnsã nin-tɩrsã sʋka, 50 n lob-b wʋng ning sẽn wɩng wʋsgã pʋgẽ. Yaa be la b na n yãb la b wãb b yẽna.”

51 Dẽ, a Zeezi sokame: “Yãmb wʋma bõn-kãensã fãa võor bɩ?” Tɩ b leok-a yaa: “N-ye.” 52 La a Zeezi yeela bãmb yaa: “Sã n yaa woto, karen-saamb ning fãa b sẽn zãms saasẽ Rĩungã yɛl yaa wa rao sẽn yaa yir soaba, sẽn yiisd bõn-paal la bõn-kʋd a paoong bĩngr zĩigẽ.”

53 A Zeezi sẽn wẽ yel-bũn-kãensã n sa, a yii be n looge. 54 A sẽn ta a meng tẽngẽ wã,+ a sɩnga nebã zãmsg b tigsg roogẽ wã, hal tɩ ling-b wʋsg tɩ b yeele: “Yɛ la ra-kãngã paam yam a woto? A yɩɩ wãn n paam tõog n maand yel-solem-kãensã?+ 55 Pa ra-wãadã biig la?+ Pa a ma wã yʋʋr la a Maari, t’a ma-biisã yaa a Zak la a Zozɛfe, n paas a Sɩmo ne a Zida la?+ 56 A ma-bi-pogsã fãa pa be ne tõnd sɩda? Woto wã, a maana wãn n paam bõn-kãensã fãa?”+ 57 Rẽ kɩtame tɩ b pa tẽ a Zeezi ye.+ La a yeel-b lame yaa: “No-rɛɛs pa paamd paoogr tɩ sã n pa a meng tẽngẽ, la a meng yir ye.”+ 58 La a pa maan yel-soalem wʋsg beenẽ, nebã sẽn pa tall tẽebã yĩnga.

14 Wakat kãnga, tẽngã naab* a Erood wʋmame tɩ b gomd a Zeezi yelle,+ 2 t’a yeel a tʋm-tʋmdbã yaa: “Yaa a Zãmbatiisi. A vʋʋgame n yi kũ-rãmb sʋka. Yaa rẽ yĩng la a sẽn maand yel-solem-kãensa wã.”+ 3 A Erood* ra yõka a Zã n sẽb n kẽes bãens roogo, a ba-biig a Filip pag a Erodiyaad poorẽ.+ 4 Bala a Zã ra yeta a Erood yaa: “Pa zems tɩ yãmb peeg-a n maan y pag ye.”+ 5 La baa a Erood sẽn da rat n kʋ a Zã wã, a ra yɛɛsda kʋʋngã, bala b ra kɩsa sɩd t’a yaa no-rɛɛsa.+ 6 La b sẽn wa n maand a Erood rogem daar tẽegr kibsa,+ a Erodiyaad bi-puglã saoo nebã taoor tɩ yɩ a Erood noog wʋsgo,+ 7 t’a wẽen t’a na n kõ-a-la bũmb ning fãa a sẽn na n kose. 8 La a ma wã sagl-a lame t’a tɩ yeel yaa: “Bɩ y sagl a Zãmbatiis zugã laag pʋgẽ n wa kõ maam.”+ 9 Baa rĩmã sũur sẽn sãamã, a wẽenegã yĩnga, n paas neb nins sẽn da zĩ ne-a n dɩtẽ wã yĩnga, a kõo noor tɩ b kɩs bi-puglã a sẽn kosã. 10 Rĩmã tʋmame tɩ b tɩ fiuug a Zã zugã bãensã roogẽ. 11 B sagla a zugã laag pʋgẽ n wa kõ bi-puglã, t’a reeg n tɩ kõ a ma wã. 12 Rẽ poore, a Zã karen-biisã wa n dɩka a kũumã n tɩ mumi, la b kẽng n tɩ togs a Zeezi. 13 A Zeezi sẽn wʋm dẽ wã, a yii be n kẽ koom-koglg n kẽng zĩig neb sẽn pa beẽ sẽn na yɩl n yɩ a yembre. La neb kʋʋng n bãng rẽ, n yi tẽnsã pʋsẽ n pʋg-a ne nao.+

14 A sẽn yi koom-koglgã pʋgẽ wã, a yãa kʋʋng sẽn yaa kãsenga. La nebã nimbãaneg yõk-a lame,+ t’a sãoog bãad-rãmb+ nins sẽn da be b sʋkã. 15 La zĩigã sẽn wa n dat n sobge, a karen-biisã kolg-a lame n yeele: “Zĩ-kãngã yaa weoogo, tɩ zĩigã kolg sobgr me. Bɩ y bas kʋʋngã tɩ b looge, sẽn na yɩl tɩ b tõog n kẽng tẽn-bõonesẽ wã n tɩ ra rɩɩbo.”+ 16 La a Zeezi leok-b lame yaa: “Pa tɩlɛ tɩ b loog ye. Bɩ yãmb mensã bao bũmb n kõ-b tɩ b rɩ.” 17 Bãmb yeela a Zeezi yaa: “Tõnd pa tar bũmb ka n zʋʋg bur a nu la zĩm a yiib ye.” 18 T’a yeele: “Tall-y-b n wa kõ maam ka.” 19 Rẽ poore, a yeela kʋʋngã tɩ b zĩnd moodã zugu. Dẽ, a rɩka bur a nu wã ne zĩm a yiibã, n nak a neng yĩngr n ning barka.+ A kaoo burã n kõ a karen-biisã, t’a karen-biisã reeg n kõ kʋʋngã. 20 Dẽ, b fãa rɩɩme n tɩge, la b tigsa kellã tɩ pid yaas piig la a yiibu.+ 21 Sẽn dɩ-bã yaool n da yaa na maan rap tus a nu, n paas pagb la kamba.+ 22 La tao-tao bala, a kɩtame t’a karen-biisã kẽ koom-koglgã n deng yẽ taoor mogrã rʋʋnde, t’a yõdg n kuils kʋʋngã.+

23 A sẽn kuils kʋʋngã n sa, a rʋʋ tãngã zug a yembr n na n pʋʋse.+ Zĩigã wa n sobgame t’a ket n be be a yembre. 24 Rẽ tɩ koom-koglgã ra paam n zãaga wʋsg* ne tẽn-koɛɛngã, la ko-pɛmã ra tar-a lame n lengdẽ, sobgã sẽn segd-bã yĩnga. 25 La sẽn wa n ta tõd-beoogo,* a ra kẽnda mogrã zug n babsd a karen-biisã. 26 Karen-biisã sẽn yã-a t’a kẽnd mogrã zugã, b yɛɛsa wʋsg n yeele: “Yaa bõe me la wã?” Sẽn paase, b ra kaasda ne rabeem. 27 La a Zeezi yɩɩ tao-tao n gom ne-b n yeele: “Keng-y y pelse! Yaa maam. Da zoe-y rabeem ye.”+ 28 A Pɩyɛɛr leok-a lame n yeele: “Zu-soaba, sã n yaa yãmb bɩ y kɩt tɩ m kẽn koomã zug n seg yãmba.” 29 T’a yeel-a yaa: “Wa!” Dẽ, a Pɩyɛɛr yii koom-koglgã pʋgẽ n kẽnd koomã zug n babsd a Zeezi. 30 La yẽ sẽn ges sobgã, rabeem yõk-a lame t’a sɩng bõrbo. La a kelmame n yeele: “Zu-soaba, fãag-y-ma!” 31 Tao-tao bala, a Zeezi tẽega a nug n gãd-a la a yeele: “Tẽeb bilf soaba, yaa bõe tɩ fo bas tɩ f yamã yuusi?”+ 32 Bãmb sẽn kẽ koom-koglgã pʋgẽ, sobgã yõkame. 33 Neb nins sẽn da be koom-koglgã pʋgẽ wã wõgemda a Zeezi taoor n yeele: “Yãmb sɩd yaa Wẽnnaam Bi-ribla.” 34 La bãmb rʋʋga mogrã n ta Zenezarɛte.+

35 Tẽn-kãng nebã sẽn bãng tɩ yaa a Zeezi wã, b toola koees tẽn-yagsã fãa pʋsẽ, la nebã talla neb nins fãa sẽn bẽedã n wa a nengẽ. 36 B kosa a Zeezi t’a bas tɩ bãmb sɩɩs baa yaa a zugẽ fuugã noore.+ La sẽn sɩɩs-b fuugã noorã fãa paama laafɩ zãnga.

15 Dẽ, Fariziyẽ-rãmb la gʋlsdb n yi Zerizalɛm n wa a Zeezi nengẽ,+ n yeel-a yaa: 2 “Bõe yĩng tɩ yãmb karen-biisã kɩɩsd pĩnd rãmbã miningã? Wala makre, b pa pegsd* b nus n yaool n dɩ rɩɩb ye.”+

3 A Zeezi leok-b lame n yeele: “Bõe yĩng tɩ yãmb kɩɩsd Wẽnnaam tõogã y miningã yĩnga?+ 4 Wala makre, Wẽnnaam yeelame: ‘Waoog f ba la f ma,’+ la tɩ ‘ned sã n tʋʋs* a ba wall a ma bɩ b kʋ-a.’+ 5 La yãmb yetame tɩ ‘ned sã n yeel a ba bɩ a ma: “Bũmb ning fãa mam sẽn tar tɩ tõe n naf yãmbã yaa kũun m sẽn kõ Wẽnnaam,”+ 6 pa le yaa tɩlɛ baa bilf tɩ yẽ soab waoog a ba ye.’ Woto, yãmb miningã yĩnga,+ y kɩtame tɩ Wẽnnaam sẽn yeelã lebg zaalem. 7 Pʋ-lik rãmba, a Ezayi sẽn togs bãngr-gomd ning yãmb zugã sɩd zemsame. A yeelame:+ 8 ‘Bu-kãngã nebã waoogda maam ne b no-bɩmse, la b sũyã zãra ne maam. 9 Bũmb nins b sẽn maand n waoogd maamã yaa zaalem, bala yaa ninsaalb tõod la b zãmsd nebã.’”+ 10 Rẽ poore, a kɩtame tɩ kʋʋngã pẽneg-a t’a yeel-ba: “Kelg-y-yã, la y wʋm bõn-kãngã võore:+ 11 Pa bũmb ning sẽn kẽed ned noorẽ wã n dẽgemd-a ye. Yaa bũmb ning sẽn yit a noorẽ wã.”+

12 Dẽ, a karen-biisã kolgame n yeel-a yaa: “Yãmb miime tɩ Fariziyẽ-rãmbã sẽn wʋm yãmb goamã, b sũyã yikame sɩda?”+ 13 T’a Zeezi leok n yeele: “B na n võoga tɩɩg ning fãa m Ba sẽn be saasẽ wã sẽn pa sele. 14 Bas-y-ba. B yaa taoor dãmb sẽn yaa zoense. Zoang sã n tɛt zoanga, b yiibã fãa na n lʋɩɩ bokẽ.”+ 15 T’a Pɩyɛɛr yeele: “Bɩ y wilg tõnd yel-bũndã võor wɛ.” 16 Rẽ la a Zeezi yeel-yã: “Yãmb me yamã ket n nan pa vẽneg la?+ 17 Yãmb pa mi tɩ bũmb ning fãa sẽn kẽed noorẽ wã tũuda pʋʋrẽ wã, n wa tɩ yi we-kɛɛng la? 18 La bũmb ning fãa sẽn yit noorẽ wã yita sũurẽ, la yaa bõn-kãens n dẽgemd neda.+ 19 Wala makre, tags-wẽns+ yita sũur pʋgẽ. Rẽ n wat ne nin-kʋʋre, yoobo, raglem tʋʋma,* wagdem, kaset sẽn yaa ziri la paoogr goama. 20 Yaa bõn-kãensã n dẽgemd neda. La rɩ rɩɩb ne nus sẽn pa pek* pa rẽgemd ned ye.”

21 A Zeezi sẽn yi be, a kẽnga Tɩɩr ne Sɩdõ+ soolmẽ wã. 22 La ade! Fenisi pag sẽn be soolem-kãng n wa a Zeezi nengẽ, n zẽk a koɛɛg n yeele: “Zu-soaba, a Davɩɩd Biiga, zoe-y mam nimbãanega. Zĩn n tar m bi-puglã, n namsd-a wʋsgo.”+ 23 La a pa leok-a tɩ bũmb ye. Rẽ n so t’a karen-biisã kolg n yeel-a: “Yeel-y-yã-a t’a looge, bala a pʋgda tõnd n kelemdẽ.” 24 T’a leok yaa: “B tʋma maam Israyɛll buudã neb nins sẽn wõnd piis sẽn menemã nengẽ bala.”+ 25 La pagã kolgame n wõgemd a taoor n yeele: “Zu-soaba, sõng-y-ma!” 26 La a leokame yaa: “Pa zems tɩ b rɩk kambã rɩɩb n lob ba-bi ye.” 27 Tɩ pagã yeele: “Zu-soaba, yaa sɩda. La ba-bi wã yaool n dɩta rɩ-zersã sẽn lʋɩt b zu-soben-dãmbã taabl tẽngrã wɛ.”+ 28 Dẽ, a Zeezi leok-a lame n yeele: “Paga, ad f tẽebã yaa kãsenga. Bɩ a yɩ wa fo sẽn datã.” Wakat kãng bala, pagã bi-puglã paama laafɩ.

29 A Zeezi sẽn yi be, a waa zĩig sẽn pẽ Galile mogrã.+ La a rʋʋ tãngã, n zĩnd be. 30 Dẽ, neb kʋʋng n tall wobse, zoense, mugs la bãad-rãmb a taab n wa a taoore, la a sãoog-b lame.+ 31 Kʋʋngã sũur yɩɩ noog wʋsgo, b sẽn ne mugsã sẽn gomdã, koms-rãmbã sẽn paamd keelmã, wobsã sẽn kẽnd sõma wã, la zoensã sẽn ne wã. La b pẽga Israyɛll Wẽnnaamã.+

32 La a Zeezi boola a karen-biisã n yeele: “Kʋʋngã nimbãaneg tara maam,+ bala yaa rasem a tã masã la b be ne maam, la b pa tar rɩɩb n na n dɩ ye. Mam pa rat n kuils-b ne kom, tɩ b nensã wa sobd sorã zug ye.”+ 33 La a karen-biisã yeelame yaa: “Weoogẽ ka, yɛ la tõnd na n paam bur tɩ sek zãma-kãngã fãa?”+ 34 T’a Zeezi sok-ba: “Bur a wãn la yãmb tara?” Tɩ b leok yaa: “Bãmb b yopoe, n paas zĩm-bõoneg a wãna.” 35 Dẽ, a sẽn yeel kʋʋngã tɩ b zĩnd tẽngã poore, 36 a rɩka bur a yopoe wã ne zĩmã n deng n pʋʋs Wẽnnaam barka, la a kao n kõ a karen-biisã, t’a karen-biisã reeg n kõ kʋʋngã.+ 37 La b fãa rɩɩme n tɩge, tɩ b tigs gɩrsã sẽn kellã n pids ya-bɛd a yopoe.+ 38 Neb nins sẽn dɩ wã yaool n da yaa rap tus a naase, n paas pagb la kamba. 39 Sẽn na n baase, a kuilsa kʋʋngã, la a kẽ koom-koglgã n kẽng Magadan soolmẽ wã.+

16 Be, Fariziyẽ-rãmbã ne Sadiseyẽ-rãmbã waa a Zeezi nengẽ. Sẽn na yɩl n mak-a, b kos-a lame t’a wilg-b bãnd sẽn yit saasẽ tɩ b gese.+ 2 La a Zeezi leoka bãmb yaa: “Zaabr sã n ta, yãmb yetame tɩ ‘saagã pa na n ni ye. Bala sa-gãongã yaa miuug masɩ.’ 3 La yibeoogo, yãmb yetame tɩ ‘rũndã na n yɩɩ waoodo, tɩ saagã me ni, bala sa-gãongã yaa miuug masɩ, la sawat beeme.’ Yãmb tõe n gesa sa-gãongã sẽn yaa to-to wã n wilg a võore, la y yaool n pa tõe n ges wakatã bãnã n wilg b võor ye. 4 Zãmaan-kãngã neb sẽn yaa wẽns la yoaadbã* rat n yãa bãnde, la b pa na n yã bãnd+ a to n zʋʋg no-rɛɛs a Zonas bãndã ye.”+ Rẽ poore, a Zeezi loogame n bas-ba.

5 La karen-biisã kẽnga mogrã rʋʋnde, n yĩm n pa zã bur ye.+ 6 A Zeezi yeel-b lame yaa: “Puk-y y nini, la y gũus ne Fariziyẽ-rãmbã la Sadiseyẽ-rãmbã rabɩllã.”+ 7 Dẽ, bãmb sɩngame n gomd ne taab n yetẽ: “Tõnd pa zã bur ye.” 8 A Zeezi sẽn bãng rẽ wã, a yeelame: “Yãmb a tẽeb bilf rãmba, bõe yĩng tɩ yãmb gomd ne taab n yetẽ tɩ y pa tar buri? 9 Yãmb ket n pa wʋmd bũmb ning mam sẽn yeel yãmbã võor la? Yãmb pa tẽr mam sẽn dɩlg rap tus a nu ne bur a nu wã, la kellã yãmb sẽn wʋkã sẽn pid yaasã sõor la?+ 10 Bɩ yãmb pa tẽr mam sẽn dɩlg rap tus a naasã ne bur a yopoe wã, la kellã yãmb sẽn tigsã sẽn pid ya-bɛdã sõor la?+ 11 Maana wãn tɩ yãmb pa bãng tɩ pa bur yell la mam sẽn gomd ne yãmbã? Baasgo, gũus-y ne Fariziyẽ-rãmbã la Sadiseyẽ-rãmbã rabɩllã.”+ 12 Dẽ, bãmb bãngame t’a Zeezi ra pa gomd rabɩll sẽn tar n maand burã yelle, la t’a ra yet-b lame tɩ b gũus ne Fariziyẽ-rãmbã la Sadiseyẽ-rãmbã sẽn zãmsd nebã bũmb ninsã.

13 A Zeezi sẽn ta Sezaare sẽn yaa Filip soolmã, a soka a karen-biisã yaa: “Nebã yetame tɩ Ninsaal biigã yaa ãnda?”+ 14 La bãmb leokame yaa: “Kẽer yetame t’a Zãmbatiisi,+ tɩ sãnda yetẽ t’a Eli,+ tɩ kẽer me yetẽ t’a Zeremi wall no-rɛɛs a to.” 15 T’a Zeezi sok-ba: “La yãmba, y yetame tɩ mam yaa ãnda?” 16 A Sɩmo-Pɩyɛɛr leokame yaa: “Yãmb yaa Kiristã,+ Wẽnnaam ning sẽn vɩ wã Biigã.”+ 17 A Zeezi leok-a lame n yeele: “Zonas biig a Sɩmo, bark bee fo zugu. Bala pa ninsaal* n vẽneg foo bõn-kãngã ye. Yaa mam Ba sẽn be saasẽ wã.+ 18 Sẽn paase, mam yeta foom: Fo yaa a Pɩyɛɛre,+ la mam na n lugla m tigingã pĩ-kãngã zugu,+ la Yaoogã rignoy* pa na n tõog-a ye. 19 Mam na n kõo foo saasẽ Rĩungã kʋɩlen-biisi. Bũmb ning fãa fo sẽn na n loe tẽngã zugu, na n yɩɩ sẽn zoe n loe saasẽ. Bũmb ning fãa fo sẽn na n lok tẽngã zugu, na n yɩɩ sẽn zoe n lok saasẽ.” 20 Rẽ poore, a yeela karen-biisã tɩ b ra saag n togs ned baa a ye tɩ yẽ la Kiristã ye.+

21 Wakat kãng tɛka, a Zeezi sɩngame n wilgd a karen-biisã tɩ yẽ segd n kẽnga Zerizalɛm, n tɩ nams wʋsg kãsem-dãmbã ne maan-kʋʋdbã taoor dãmb la gʋlsdbã nusẽ, la tɩ b na n kʋ-a lame, tɩ rasem a tãab-n-soabã daar bɩ a vʋʋge.+ 22 Rẽ la a Pɩyɛɛr tall-a n yi kɛɛnga, n gom-a n yeele: “Zu-soaba, ra yeel-y woto ye. Bõn-kãngã pa na n paam yãmb a bada.”+ 23 La a Zeezi wẽnega a poor n tees a Pɩyɛɛr n yeele: “Leb mam poorẽ, Sʋɩtãana! Fo yaa bũmb sẽn tõe n kɩt tɩ mam lake. Bala fo tagsa wã pa Wẽnnaam tagsa ye. Yaa ninsaalb rẽnda.”+

24 Rẽ poore, a Zeezi yeela a karen-biisã yaa: “Ned sã n dat n tũ maam, bɩ a kɩɩs a mengã raabo, la a rɩk a namsg ra-luk* n pʋg maam wakat fãa.+ 25 Bala ned ning sẽn dat n kogl a vɩɩm* na n bõn-a lame, la ned ning sẽn bõn a vɩɩm* mam yĩng na n le paam-a lame.+ 26 Sɩd-sɩda, ned sã n paam dũniyã tõr n yaool n bõn a vɩɩm,* a yõod bee yɛ?+ Wall bõe la ned na n dɩk n kõ tɩ led a vɩɩmã* zĩiga?+ 27 Bala Ninsaal biigã segd n waa ne a Ba wã ziir la ne a malɛgsã, la rẽ poore, a na n dola ned kam fãa wa sẽn zems a manesem.+ 28 Sɩd-sɩda, mam yeta yãmb tɩ sẽn yas-b ka wã sʋka, kẽer n pa na n ki* tɩ b pa reng n yã Ninsaal biigã sẽn wat a Rĩungã pʋgẽ ye.”+

17 Rasem a yoob poore, a Zeezi talla a Pɩyɛɛre, a Zak ne a ba-biig a Zã bal n dʋ tãn-lug-lug zugu.+ 2 La a Zeezi tedga bãmb taoore, t’a nengã yãgd wa wĩntoogã, t’a zugẽ futã yãgd* wa vẽenem.+ 3 La gese! A Moyiiz ne a Eli vẽnega b mens ne bãmba, n sõsd ne a Zeezi. 4 Dẽ, a Pɩyɛɛr yeela a Zeezi yaa: “Zu-soaba, tõnd sẽn be ka wã yaa bõn-sõngo. Y sã n data, m na n tilga fu-rot a tãab ka. A ye yãmb yĩnga, a to wã a Moyiiz yĩnga, la a ye me a Eli yĩnga.” 5 A Pɩyɛɛr sẽn wa n ket n gomdã, sawadg sẽn pɩnd n bui bãmba. La koɛɛg n yi sawadgẽ wã n yeele: “Yãoã yaa mam Bi-ribla, mam sẽn nong a soabã. A taa mam yam.+ Kelg-y-yã-a.”+ 6 Karen-biisã sẽn wʋm dẽ wã, b yɛɛsa wʋsg n lʋɩ n fõgen b nens tẽnga. 7 Dẽ, a Zeezi kolgame n sɩɩs bãmb n yeele: “Yik-y-yã. Ra zoe-y rabeem ye.” 8 La b sẽn zẽk b nense, b pa yã ned a to n zʋʋg a Zeezi ye. 9 B sẽn wa n yi tãngã zug sigdã, a Zeezi yeel-b lame yaa: “Da togs-y ned baa a ye bũmb ning yãmb sẽn yã wã, hal tɩ Ninsaal biigã wa vʋʋg n yi kũ-rãmb sʋka.”+

10 La karen-biisã sok-a lame yaa: “La bõe yĩng tɩ gʋlsdbã yetẽ t’a Eli segd n deng n waame?”+ 11 T’a leok n yeele: “A Eli sɩd watame n na n lebs n maneg bũmb fãa.+ 12 La mam yeta yãmb t’a Eli zoe n waame tɩ b pa bãng-a ye. La b maan-a-la bũmb ning fãa b sẽn date.+ Woto me, Ninsaal biigã na n namsa b nusẽ.”+ 13 Dẽ, karen-biisã bãngame tɩ yaa a Zãmbatiis yell la a Zeezi sẽn da gomd ne-bã.

14 Bãmb sẽn wa n kolgd kʋʋngã,+ rao n pẽneg a Zeezi n yĩgimd a taoor n yeele: 15 “Zu-soaba, zoe-y m biigã nimbãanega, bala kisĩnkiir n tar-a t’a namsd wʋsgo. A mi n lʋɩɩ bugmẽ, la a mi n lʋɩ koomẽ me.+ 16 Mam tall-a lame n wa yãmb karen-biisã nengẽ, la b pa tõog n sãoog-a ye.” 17 A Zeezi leokame n yeele: “Zãmaan neb sẽn ka tẽeb la sẽn yaa nin-wẽnse,+ mam segd n paa ne yãmb n kaoos wakat a wãna? Mam segd n maana sũ-mar ne yãmb n kaoos wakat a wãna? Tall-y-yã-a n wa ka.” 18 Dẽ, a Zeezi tãsa zĩnã, la a yiime n bas biigã t’a sãoog wakat kãng bala.+ 19 Rẽ poore, karen-biisã waa a Zeezi nengẽ neb a taab sẽn pa pẽ yambẽ wakate, n sok-a yaa: “Bõe yĩng tɩ tõnd pa tõog n dig zĩnã?” 20 La a leokame n yeele: “Yaa yãmb tẽebã sẽn paoodã yĩnga. Sɩd-sɩda, mam yeta yãmb tɩ yãmb sã n tar tẽeb sẽn zem mutard bila,* y na n yeela tãn-kãngã, ‘serg ka n leb ka,’ la a na serge. Bũmb kõn zĩnd yãmb sẽn pa na n tõog n maan ye.”+ 21* ——

22 Bãmb sẽn wa n tigim taab Galile, a Zeezi yeela a karen-biisã yaa: “B na n zãmba Ninsaal biigã n ning-a nebã nusẽ,+ 23 la b na n kʋ-a lame tɩ rasem a tãab-n-soabã daar bɩ a vʋʋge.”+ La rẽ sãama karen-biisã sũy wʋsgo.

24 Bãmb sẽn ta Kapɛrnawum, neb nins sẽn deesd darkem* a yiibã lampo wã kolga a Pɩyɛɛr n soke: “Yãmb karen-saambã pa yaood darkem a yiibã lampo wã la?”+ 25 T’a leok tɩ “n-ye, a yaoodame.” La a sẽn wa n kẽ roogẽ wã bala, a Zeezi sok-a lame yaa: “Sɩmo, fo tagsg yaa bõe ne yãoã? Dũniyã rĩm-dãmb reesda lampo wã wall yõor-yaoodã ãnd dãmb nengẽ? B kambã nengẽ bɩ, bɩ sãambã nengẽ?” 26 A sẽn leok tɩ “sãambã nengẽ” wã, a Zeezi yeel-a lame: “Rẽnd sɩd-sɩda, kambã pa yaood ye. 27 La sẽn na yɩl tɩ bãmb da wa lak n lʋɩ,+ kẽng mogrẽ wã n tɩ lob lɛooga. Yaag zĩnf ning f sẽn na n yõk pipi wã noor tɩ f na n yãa wanzuri ligd-koɛɛnga.* Yãk n tɩ kõ bãmb maam ne foom yĩnga.”

18 Wakat kãnga, karen-biisã kolga a Zeezi n soke: “Sɩd-sɩda, ãnda soab n yaa kãseng n yɩɩd saasẽ Rĩungã pʋgẽ?”+ 2 Dẽ, a Zeezi boola bi-bilf n yals bãmb sʋk 3 n yeele: “Sɩd-sɩda, mam yeta yãmb tɩ yãmb sã n pa toeem* n lebg wa kom-bõonego,+ yãmb pa na n tol n kẽ saasẽ Rĩungã pʋgẽ ye.+ 4 Dẽnd ned ning sẽn na n sik a meng wa bi-bilf-kãngã, yẽ soab n yaa kãseng n yɩɩd saasẽ Rĩungã pʋgẽ.+ 5 Sẽn paase, ned ning sẽn deegd bi-bilf wa yãoã mam yʋʋrã yĩnga, a reegda ma-me. 6 La ned ning sẽn na n kɩt tɩ kom-bõon-kãensã sẽn tar tẽeb ne maamã nin-yend lake, sẽn são ne yẽ soabã yaa b sẽn na n loe a yublã ne neer kug nins bõensã sẽn tɛt tɩ yilimdẽ wã a yembre, n lob-a mogrã pʋgẽ.+

7 “Toog na paam dũniyã, bũmb nins sẽn tõe n kɩt tɩ ned lak n lʋɩ wã yĩnga! Sɩd-sɩda, bũmb nins sẽn tõe n kɩt tɩ ned lak n lʋɩ wã pa tõe n pa zĩnd ye. La toog na n paama ned ning fãa sẽn yaa sabab tɩ bõn-kãens beẽ wã! 8 Woto wã, fo nug wall fo naoor sã n kʋɩɩbd foom, bɩ f fiuug-a n lob yɩɩga. Fo sẽn na n paam vɩɩm ne nug-yɛnga, wall ne nao-yɛng n são b sẽn na n lob foo bugum sẽn pa kiidã pʋgẽ ne nus a yiib bɩ ne nao a yiibu.+ 9 Sẽn paase, fo nifã sã n kʋɩɩbd foom, bɩ f feoog-a n lob yɩɩga. Fo sẽn na n paam vɩɩm ne nif-yɛng n são b sẽn na n lob foo ne nin a yiib Zeyɛn* bugmã pʋgẽ.+ 10 Bɩ y gũus n da wa paoog kom-bõon-kãensã nin-yend ye. Bala mam yeta yãmb tɩ saasẽ, b malɛgsã geta m Ba sẽn be saasẽ wã neng wakat fãa.+ 11* ——

12 “Yãmb tagsg yaa bõe ne yãoã? Rao sã n tar piis koabg t’a yembr meneme,+ a pa na n bas pis-wɛ la a wɛ wã tãensã zutu, la a kẽng n tɩ gẽes sẽn menem-a wã sɩda?+ 13 La mam yeta yãmb sɩd t’a sã n wa yã-a, a na n kɩdma sũ-noog pe-kãng yĩnga, n yɩɩg pis-wɛ la a wɛ wã sẽn pa menemã. 14 Woto me, m* Ba sẽn be saasẽ wã pa rat tɩ baa kom-bõon-kãensã nin-yend sãam ye.+

15 “Sẽn paase, fo saam-biig sã n maan yel-wẽnde, kẽng n tɩ togs-a a kongrã* foo ne yẽ sʋk bala.+ A sã n kelg foom, fo le paama f saam-biigã.+ 16 La a sã n pa kelge, bɩ f kẽng n tɩ bao nin-yɛng wall neb a yiib tɩ b yãag-fo, sẽn na yɩl tɩ bũmb fãa yɩ vẽeneg ne neb a yiib bɩ a tãab kaseto.*+ 17 La a sã n pa kelg bãmba, bɩ f togs tigingã. La a sã n baas n pa kelg tigingã, bɩ f ges-a wa bu-zẽng neda,+ la wa yõor-yaood dɛɛgda.+

18 “Sɩd-sɩda, mam yeta yãmb tɩ bũmb nins fãa yãmb sẽn na n loe tẽngã zugu, na n yɩɩ sẽn zoe n loe saasẽ, la bũmb nins fãa yãmb sẽn na n lok tẽngã zugu, na n yɩɩ sẽn zoe n lok saasẽ. 19 Sẽn paase, mam yeta yãmb sɩd tɩ yãmb neb a yiib sã n zĩnd tẽngã zugu, n sɩɩg taab noor n na n pʋʋs n kos bũmb sẽn tar yõodo, mam Ba sẽn be saasẽ wã na n kɩtame t’a yɩ wa b sẽn kosã.+ 20 Bala zĩig ning neb a yi wall a tã sẽn tigim taab mam yʋʋr yĩnga,+ mam bee bãmb sʋka.”

21 Rẽ la a Pɩyɛɛr kolg n sok-a yaa: “Zu-soaba, naoor a wãn la m saam-biig tõe n beeg maam tɩ m kõ-a sugri? Hal naoor a yopoe bɩ?” 22 T’a Zeezi leok yaa: “Mam yeta foo tɩ pa hal naoor a yopoe ye. Yaa hal naoor pis-yopoe la a yopoe.+

23 “Yaa rẽ la d sẽn tõe n mak saasẽ Rĩungã ne rĩm sẽn dat t’a tʋm-tʋmdb wa geelg b sam t’a gesã. 24 A sẽn wa n sɩng gɛɛlã, b waa ne rao a ye sẽn tar a talã tus-piig* samde. 25 La a sẽn pa tar tõog n na n yao wã, a zu-soabã kõo noor tɩ b koos yẽ ne a pagã la a kambã, n paas bũmb nins fãa a sẽn so wã n yao samdã.+ 26 La tʋm-tʋmdã lʋɩɩ tẽng n wõgemd a taoor n yeele: ‘Maan-y sũ-mar ne maam. M na n yao-y-la fãa.’ 27 Tʋm-tʋmdã nimbãaneg yõka a zu-soabã, t’a bas-a t’a looge, la a bas a samdã taale.+ 28 La tʋm-tʋmd-kãng yiime n yã a tʋm-tʋmd-taag sẽn tar a samd deniye koabga.* La a gãd-a lame n wẽoog a koakoayã, n yeele: ‘Yao m samdã fãa.’ 29 Dẽ, a tʋm-tʋmd-taagã lʋɩɩ tẽng n yĩgimd n kos yẽnda n yeele: ‘Maan sũ-mar ne maam. M na n yao-f-la fãa.’ 30 La a pa sak ye. A tall-a lame n tɩ kɩt tɩ b pag bãens roogo, n gũud a sẽn na n wa tõog n yao a samdã. 31 La a tʋm-tʋmd-taasã sẽn yã rẽ wã, b sũy sãama wʋsg tɩ b kẽng n tɩ togs b zu-soabã bũmb nins fãa sẽn maanã. 32 Dẽ, a zu-soabã bool-a lame n yeele: ‘Tʋm-tʋmd-wẽnga, mam basa sam-kãngã fãa taale, fo sẽn yõk maam sɛɛgã yĩnga. 33 Fo-me ra pa segd n zoe f tʋm-tʋmd-taagã nimbãaneg wa mam sẽn zoe fo nimbãanegã sɩda?’+ 34 La a zu-soabã sũur yika wʋsgo, t’a ning-a bãens roog gũudbã nugẽ, n gũud a sẽn na n wa yao samdã fãa. 35 Yaa woto la m Ba sẽn be saasẽ wã me na n maan yãmb ned kam fãa,+ y sã n pa kõ y saam-biig sugr ne y sũur fãa.”+

19 A Zeezi sẽn gom gom-kãens n sa, a yii Galile n kẽng Zide soolmã toadgẽ, Zʋrdẽ kʋɩlgã rʋʋnde.+ 2 Neb kʋʋng me n pʋg-a, t’a sãoog b bãasã beenẽ.

3 La Fariziyẽ-rãmb n wa a Zeezi nengẽ n dat n mak-a. B sok-a lame yaa: “Zemsa ne tõogã tɩ rao kao kãadem ne a pag bũmb fãa poorẽ bɩ?”+ 4 T’a leok n yeele: “Yãmb nan pa karem tɩ sẽn naan-a bãmb hal sɩngrẽ wã naan-b-la rao la paga,+ 5 la t’a yeelame: ‘Yaa rẽ n kɩt tɩ rao na n bas a ba ne a ma n tɩ zĩnd ne a paga,* la b yiibã na n yɩɩ yĩng a yembr’+ la? 6 Dẽnd bãmb pa le yaa yiib yɛs ye. B lebga yĩng a yembre. Woto wã, bũmb nins Wẽnnaam sẽn lagem taabã, bɩ ned ra welg-b ye.”+ 7 Bãmb soka a Zeezi yaa: “La bõe yĩng t’a Moyiiz yeel tɩ b segd n kõo pag basg sebr n kao kãadem ne-a?”+ 8 T’a Zeezi yeel-ba: “Yaa yãmb sũyã sẽn yaa kɛgemsã yĩng la a Moyiiz sẽn kõ yãmb sor tɩ y tõe n bas y pagbã.+ La ra pa woto hal sɩngrẽ wã ye.+ 9 Mam yeta yãmb tɩ ned sã n kao kãadem ne a pag tɩ pa a sẽn yo* yĩng n tɩ rɩk pag a to, a yoodame.”+

10 Karen-biisã yeel-a lame yaa: “Pag ne rao yellã sã n yaa woto, rẽnd f sã n pa kẽ kãadem n são.” 11 A yeel-b lame: “Pa nebã fãa n sakd gom-kãngã ye. Yaa sẽn paam-b kũunã bala.+ 12 Bala neb kẽer dogame n pa tõe n kẽ kãadem, tɩ sãnda nengẽ wã yaa neb n maan-b woto. La kẽer yãka yam n pa na n tol n kẽ kãadem, saasẽ Rĩungã yĩnga. Bɩ ned ning sẽn tõe n sak yãoã sake.”+

13 Rẽ poore, neb n tall kom-bõoneg n wa a Zeezi nengẽ sẽn na yɩl t’a tik-b ne a nus la a pʋʋs b yĩnga, la karen-biisã zab-b lame.+ 14 La a Zeezi yeelame: “Bas-y kom-bõonegã sɩɩ, la y ra bao n gɩdg-b tɩ b ra wa mam nengẽ ye. Bala saasẽ Rĩungã yaa sẽn yaa-b wa bãmbã rẽnda.”+ 15 A tika bãmb ne a nusi, la a yi be n looge.

16 La ade! Ned n kolg-a n sok yaa: “Karen-saamba, bõe n yaa sõma tɩ m segd n maan n wa paam vɩɩm sẽn ka sɛtã?”+ 17 T’a yeel-a yaa: “Bõe yĩng tɩ fo sokd maam sẽn yaa sõma wɛɛngẽ? Yaa Wẽnnaam bal n yaa sõngo.+ La fo sã n dat n paam vɩɩm bɩ f tũ noyã wakat fãa.”+ 18 T’a soke: “No-bʋse?” T’a Zeezi yeele: “Fo pa segd n kʋ ye.+ Fo pa segd n yo ye.+ Fo pa segd n zu ye.+ Fo pa segd n kɩs kaset sẽn ka sɩd ye.+ 19 Waoog f ba la f ma.+ Fo segd n nonga f to wa f menga.”+ 20 Bi-bɩɩgã yeel-a lame yaa: “Mam sɩng n tũuda bõn-kãensã fãa. La bõe n paoog maam?” 21 T’a Zeezi yeel-a: “Fo sã n dat n zems zãnga,* bɩ f kẽng n tɩ koos f paoongã n kõ naong rãmba, tɩ rẽ la f na n paam arzɛk saasẽ,+ la f wa tũ maam.”+ 22 Bi-bɩɩgã sẽn wʋm dẽ wã, a looga ne sũ-sãanga, a sẽn da tar paoong wʋsgã yĩnga.+ 23 Rẽ la a Zeezi yeel a karen-biisã yaa: “Sɩd-sɩda, mam yeta yãmb tɩ na n yɩɩ toog ne arzɛk soab t’a kẽ saasẽ Rĩungã pʋgẽ.+ 24 Mam le yeta yãmb tɩ yaa nana tɩ yʋgemd tũ supĩim võorẽ n looge, n yɩɩd arzɛk soab sẽn na n kẽ Wẽnnaam Rĩungã pʋgẽ.”+

25 Karen-biisã sẽn wʋm dẽ wã, b yɛɛsa wʋsgo, n sok yaa: “Ãnda n sɩd tõe n paam fãagre?”+ 26 La a Zeezi gesa bãmb kuii n yeele: “Sã n yaa ne ninsaalbã, pa bũmb sẽn tõe ye. La sã n yaa ne Wẽnnaam, bũmb fãa tõeeme.”+

27 Dẽ, a Pɩyɛɛr yeelame: “La tõnd basa bũmb fãa n tũ yãmba. Woto wã, bõe la tõnd na n paame?”+ 28 T’a Zeezi yeel-b yaa: “Sɩd-sɩda, mam yeta yãmb tɩ wakat ning b sẽn na n lebs n maneg* bũmb fãa wã, Ninsaal biigã sã n wa zaoond a geerã sẽn tar ziirã zugu, yãmb sẽn tũ maamã me na n zaoonda gɛy piig la a yiib zutu, n kao Israyɛll buud piig la a yiibã bʋʋdo.+ 29 Sẽn paase, ned ning fãa sẽn bas a rot wall a ba-bi-rap bɩ a ba-bi-pogse, pa rẽ bɩ a ba wall a ma, bɩ a kamb wall a pʋt mam yʋʋrã yĩnga, a na n paama sẽn yɩɩd rẽ naoor koabga, la a wa paam vɩɩm sẽn ka sɛta.+

30 “La wʋsg sẽn yaa pipi rãmb na n lebga yaoolem dãmba, tɩ yaoolem dãmbã lebg pipi rãmba.+

20 “Bala saasẽ Rĩungã wõnda zak soab sẽn yi yibeoog pĩnd n na n dɩk tʋm-tʋmdb tɩ b tʋm a viyn pʋʋgẽ.+ 2 A sẽn sar ne tʋm-tʋmdbã n na n yao-b deniye* a ye daarã tõrã poore, a kɩtame tɩ b kẽng a viyn pʋʋgẽ wã. 3 A yii yibeoog wakat a wɛ wã sẽnes* me n yã kẽer sẽn yas raagẽ wã n pa tar tʋmd ye. 4 La a yeela bãmb yaa: ‘Bɩ yãmb me kẽng viyn pʋʋgẽ wã, tɩ m na n yao-y-la wa sẽn segde.’ 5 Dẽ, b kẽngame. La a le yii wĩntoog wakat a piig la a yiibã sẽnese,* la zaabr wakat a tãabã sẽnes* n maan woto. 6 Sẽn na n baase, zaabr wakat a nu wã sẽnese,* a yiime n yã kẽer sẽn yase, t’a sok-ba: ‘Bõe yĩng tɩ yãmb yas ka daarã tõr n pa tʋmdẽ?’ 7 Tɩ b leok yaa: ‘Yaa ned sẽn pa rɩk tõnd tʋʋmã yĩnga.’ T’a yeel-ba: ‘Bɩ yãmb me kẽng viyn pʋʋgẽ wã.’

8 “Zaabr sẽn wa n ta, viyn pʋʋgã soab yeela a ned ning sẽn get tʋʋmdã yellã t’a ‘bool tʋm-tʋmdbã n yao-ba,+ n sɩng ne yaoolem dãmbã n baas ne pipi rãmbã.’ 9 Sẽn sɩng-b tʋʋmdã zaabr wakat a nu wã sẽn wa wã, b ned kam fãa reega deniye* a yembre. 10 Dẽ, pipi rãmbã sẽn wa wã, b tagsame tɩ b na n paamame tɩ yɩɩg rẽ. La b yaoo bãmb ned kam fãa me deniye* a yembre. 11 Bãmb sẽn deegã, b yẽgma ne zakã soab 12 n yeel yaa: ‘Nin-kãensã sẽn wa yaoolmã tʋma lɛɛr a yembre, la yãmb maana bãmb tɩ b yɩ yembr ne tõnd sẽn tʋm wʋsg daarã tõr ne wĩntoogã!’ 13 La a leoka bãmb ned a yembr n yeele: ‘M zoa, mam pa zãmb foo ye. Pa deniye* a ye la fo sẽn sar ne maamã la?+ 14 Reeg f rẽndã la f looge. Mam dat n kõo nin-kãngã sẽn yaa yaoolem soabã wa mam sẽn kõ foomã. 15 Mam pa tar sor tɩ maan m sẽn dat ne bũmb nins m sẽn so wã sɩda? Bɩ fo* maanda sũ-kiir mam sẽn yaa nin-sõngã* yĩnga?’+ 16 Yaa woto la yaoolem dãmbã na n lebg pipi rãmba, tɩ pipi rãmbã lebg yaoolem dãmba.”+

17 A Zeezi sẽn wa n dabd Zerizalɛm, sorã zugu a talla a karen-biis piig la a yiibã n yi kɛɛng n yeel-b yaa:+ 18 “Ade! Tõnd dabda Zerizalɛm, la b na n yõka Ninsaal biigã n ning maan-kʋʋdbã taoor dãmb la gʋlsdbã nusẽ, tɩ b kao a bʋʋd n yeel t’a toga ne kũum.+ 19 B na n ninga yẽ bu-zẽms neb nusẽ tɩ b yaal-a, n pãb-a ne kalwaas la b kʋ-a ra-luk zugu.+ La rasem a tãab-n-soabã daare, a na n vʋʋgame.”+

20 Rẽ poore, a Zebede+ pagã waa a Zeezi nengẽ ne a kom-dibli a yiibã, n wõgemd a taoor n na n kos bũmbu.+ 21 A soka yẽnda: “Bõe la fo rata?” T’a leok yaa: “Kõ-y noor tɩ mam kom-dibl-kãensã b yiibã nin-yend zĩnd yãmb nug-rɩtgo, t’a to wã zĩnd yãmb nug-goabg y Rĩungã pʋgẽ.”+ 22 A Zeezi leokame n yeele: “Yãmb pa mi yãmb sẽn kot bũmb ningã ye. Yãmb tõe n yũu bõn-yũudl ning mam sẽn na n yũ ka la bilfã sɩda?”+ Tɩ b leok yaa: “Tõnd tõeeme.” 23 A Zeezi yeela bãmb yaa: “Yaa sɩd tɩ yãmb na n yũu mam bõn-yũudlã.+ La sã n yaa ne zĩnd mam rɩtg bɩ m goabgã, pa maam n kõt rẽ ye. Zĩ-kãens yaa m Ba sẽn yãk b rãmbã rẽnda.”+

24 Piigã sẽn kellã sẽn wa n wʋm dẽ wã, b sũyã yika ne ba-biis a yiibã.+ 25 La a Zeezi boola bãmb n yeele: “Yãmb miime tɩ buud toɛy-toɛyã nanambs soo bãmb ne pãnga, la tɩ nin-kãsemsã rɩta naam b zutu.+ 26 Pa segd n yɩ woto yãmb sʋk ye.+ La ned ning sẽn dat n yɩ kãseng yãmb sʋk segd n yɩɩ yãmb tʋm-tʋmda,+ 27 tɩ ned ning sẽn dat n yɩ pipi soab yãmb sʋk yɩ yãmb yamba.+ 28 Woto me, Ninsaal biigã pa wa tɩ neb sõng-a ye. A waame n na n sõng nebã,+ la a kõ a vɩɩmã* tɩ yɩ yaood neb wʋsg yĩnga.”+

29 Bãmb sẽn wa n yit Zeriko wã, neb kʋʋng n pʋg a Zeezi. 30 La rap a yiib sẽn yaa zoens n da zĩ sorã noore. B sẽn wʋm tɩ yaa a Zeezi la sẽn loogdã, b zẽka b koees n yeele: “Zu-soaba, a Davɩɩd Biiga, zoe-y tõnd nimbãanega!”+ 31 La kʋʋngã tãs-b lame n yeel tɩ b sĩndi. Baa ne rẽ, b maneg n zẽka b koees n tãs ne pãng n yeele: “Zu-soaba, a Davɩɩd Biiga, zoe-y tõnd nimbãanega!” 32 Dẽ, a Zeezi yalsame n bool-b n soke: “Bõe la yãmb dat tɩ mam maane?” 33 Tɩ b leok yaa: “Zu-soaba, bɩ y kɩt tɩ d ninã puki.” 34 B nimbãaneg yõka a Zeezi, t’a sɩɩs b ninã.+ Zĩig pʋgẽ, b ninã pukame, tɩ b pʋg a Zeezi.

21 B sẽn wa n kolg Zerizalɛm n ta Bɛtfaaze sẽn be Oliiv tɩɩs tãngã zugã, a Zeezi tʋma karen-biis a yiibu,+ 2 n yeel-b yaa: “Kẽng-y tẽn-bilã sẽn tondã pʋgẽ. La y sã n ta bala, y na n yãa bõang b sẽn loe tɩ bõn-bil be ne-a. Lok-y-b n wa kõ maam. 3 Ned sã n yeel yãmb bũmbu, y segd n yeel-a lame tɩ ‘yaa Zu-soabã n dat-ba.’ La wakat kãng bala, a na n basame tɩ y tall-b n looge.”

4 Bõn-kãngã maaname sẽn na yɩl tɩ Wẽnnaam sẽn da vẽneg no-rɛɛsã t’a yeel bũmb ningã pidsi. A ra yeelame: 5 “Yeel-y Siyõ bi-puglã yaa: ‘Gese! Fo rĩmã wata fo nengẽ.+ A yaa sũ-maasem soaba.+ A zaoo bõanga, bõn-bil sẽn yaa rũng b sẽn tar n zɩlgd zɩɩb biiga.’”+

6 Dẽ, karen-biisã kẽngame n tɩ maan wa a Zeezi sẽn yeelã.+ 7 B talla bõangã ne a biigã n wa, n palg b zugẽ futã bõensã zut t’a Zeezi zomb bõn-bilã.+ 8 Kʋʋngã fãa la bal tʋɩɩ b zugẽ futã sorã zugu,+ tɩ kẽer kɛɛd tɩɩsã vãad n tʋɩt sorã zugu. 9 Sẽn paase, kʋʋngã sẽn da be a taoorã ne sẽn da pʋgd-b yẽ wã ra zẽkda b koees n yetẽ: “D kotame tɩ y fãag a Davɩɩd Biigã!+ Bark bee ned ning sẽn wat ne a Zeova* yʋʋrã zugu!+ D kota yãmb sẽn yaa soab ning sẽn be hal yĩngrã tɩ y fãag-a!”+

10 A Zeezi sẽn ta Zerizalɛmmã, tẽngã fãa wulumda ne bʋʋre, tɩ nebã sokdẽ: “Yaa ãnda soab la woto?” 11 Kʋʋngã ra leokdame n yetẽ: “Yaa no-rɛɛs a Zeezi+ sẽn yit Galile Nazarɛtã!”

12 A Zeezi kẽe wẽnd-doogẽ wã n dig neb nins fãa sẽn koosd la b raad teed be wã n yiisi, la a leeb ligd-tekdbã taabl-dãmb ne marwan-koaasdbã goeels n lubi.+ 13 Sẽn paase, a yeel-b lame: “B gʋlsame: ‘B na n boola mam doogã tɩ pʋʋsg roogo,’+ la yãmb kɩtame t’a lebg fãadb roogo.”+ 14 Zoens la wobs me waa a nengẽ wẽnd-doogẽ wã, t’a sãoog-ba.

15 Maan-kʋʋdbã taoor dãmb la gʋlsdbã yãa bõn-kãsems nins a Zeezi sẽn maanã, la b wʋm kom-dibli wã sẽn zẽkd b koees wẽnd-doogẽ wã n yetẽ: “D kotame tɩ y fãag a Davɩɩd Biigã!”+ Rẽ puuga b sũyã wʋsg+ 16 tɩ b sok a Zeezi yaa: “Fo wʋmda b sẽn yetã bɩ?” T’a Zeezi leok n yeele: “N-ye. Yãmb zɩ n karem goam nins sẽn yet tɩ ‘yãmb kɩtame tɩ pẽgr yi kamb la kom-bõoneg noyẽ wã’ la?”+ 17 A bas-b-la be n yi tẽngã, n kẽng Betani n tɩ gãand yʋn-kãnga.+

18 La a Zeezi sẽn wa n lebd tẽngã pʋgẽ yibeoogã pĩndã, kom n yõk-a.+ 19 A yãa kankang sẽn pa zãr ne sorã, n bʋdg n kẽng la a pa yã baa fʋɩ a zug n zʋʋg vãadã ye.+ Dẽ, a yeela kankangã yaa: “Fo kõn le wom biis a bada.”+ La kankangã kʋɩɩ zĩig pʋgẽ. 20 Karen-biisã sẽn yã rẽ wã, ling-b-la wʋsg tɩ b yeele: “Maana wãn tɩ kankangã kʋɩ zĩig pʋgẽ?”+ 21 T’a Zeezi leok n yeel-ba: “Sɩd-sɩda, mam yeta yãmb tɩ yãmb sã n tar tẽeb n pa sãmbdẽ, y pa na n maan bũmb ning mam sẽn maan kankangã bal ye. Baa y sã n yeel tãn-kãngã t’a ‘zẽk n tɩ lʋɩ mogrã pʋgẽ,’ na n yɩɩ woto.+ 22 Bũmb ning fãa yãmb sẽn na n pʋʋs ne tẽeb n kose, y na paame.”+

23 A sẽn kẽ wẽnd-doogẽ wã poore, maan-kʋʋdbã taoor dãmb la nin-buiidã kãsem-dãmb waa a nengẽ a sẽn zãmsd nebã wakate, n soke: “Yaa ne tõ-bʋg la fo maand bõn-kãensã? Ãnda n kõ foo tõ-kãnga?”+ 24 A Zeezi leokame n yeele: “Ma-me na n soka yãmb bũmbu. Y sã n leok-ma, ma-me na togs yãmb mam sẽn maand bõn-kãensã ne tõog ningã: 25 Ãnda n tʋm a Zã t’a lis nebã? Yaa Wẽnnaam sẽn be saasẽ wã bɩ, bɩ yaa ninsaalbã?” La b sɩnga yẽsg ne taab n yetẽ: “Tõnd sã n yeel tɩ ‘yaa Wẽnnaam sẽn be saasẽ wã,’ a na n soka tõndo: ‘Bõe yĩng masã tɩ yãmb pa tẽ-a?’+ 26 La tõnd sã n yeel tɩ ‘yaa ninsaalbã,’ d yɛɛsda kʋʋngã sẽn tõe n maan-d bũmb ningã, bala b fãa kɩsa sɩd t’a Zã yaa no-rɛɛsa.” 27 Rẽ n so tɩ b leok a Zeezi yaa: “Tõnd pa mi ye.” Tɩ yẽ me yeel-ba: “Ma-me pa na n togs yãmb m sẽn maand bõn-kãensã ne tõog ningã ye.

28 “Yãmb tagsg yaa bõe ne yãoã? Rao n da tar kamb a yiibu. A kẽnga pipi soabã nengẽ n yeel-a: ‘M biiga, kẽng n tɩ tʋm viyn pʋʋgẽ wã rũndã.’ 29 T’a leok n yeele: ‘M pa na n kẽng ye.’ La rẽ poore, a toeema yam n kẽnge. 30 Ba wã kolga yiib-n-soabã n yeel yẽ me woto. Bi-kãng leokame: ‘M baaba, m na n kẽngame,’ la a pa kẽng ye. 31 B yiibã sʋka, bʋg n maan a ba wã raabo?” Tɩ b leok yaa: “Pipi soabã.” T’a Zeezi yeel-ba: “Sɩd-sɩda, mam yeta yãmb tɩ yõor-yaood dɛɛgdbã ne pʋg-yoaadbã na n denga yãmb Wẽnnaam Rĩungã pʋgẽ. 32 Bala a Zã waa yãmb nengẽ n na n wilg-y tɩrlem sore, la yãmb pa tẽ-a ye. La yõor-yaood dɛɛgdbã ne pʋg-yoaadbã tẽ-a lame.+ La baa yãmb sẽn yã rẽ wã, y pa toeem yam n tẽ-a ye.

33 “Kelg-y yel-bũnd a to: Rao sẽn yaa pʋʋg soab n da sel viyn tɩɩs a pʋʋgẽ,+ n wẽ yãgr n gũbg-a, n tuk vẽ wẽkr bok be, la a me gasgo.+ Rẽ poore, a rɩka pʋʋgã n gũnug koaadba, la a kẽng tẽn-zẽnga.+ 34 Viyn wã wobr wakat sẽn wa n ta, a tʋma a tʋm-tʋmdb koaadbã nengẽ tɩ b tɩ reeg a pʋɩɩrã n wa. 35 La koaadbã yõka tʋm-tʋmdbã n pãb a yembre, n kʋ a to, la b lob a to me kuga.+ 36 A le tʋma tʋm-tʋmdb sõor sẽn yɩɩd pipi rãmbã, la b maana bãmb me woto.+ 37 Sẽn na n baase, a tʋma a bi-riblã bãmb nengẽ, n tagsdẽ yaa: ‘B na n waooga mam bi-riblã.’ 38 Koaadbã sẽn yã bi-riblã, b goma ne taab n yeele: ‘Yaa yãoã la rogem-pʋɩɩrã soaba.+ Wa-y tɩ d kʋ-a n soog a rogem-pʋɩɩrã!’ 39 Dẽ, b yõk-a lame n yiis viyn pʋʋgã pʋgẽ n kʋ-a.+ 40 Woto wã, viyn pʋʋgã soab sã n wa, bõe la a na n maan koaadbã?” 41 Bãmb leoka a Zeezi yaa: “B sẽn yaa nin-wẽnsã yĩnga, a na n kɩtame tɩ b ki kũ-toaaga,* la a rɩk pʋʋgã n gũnug koaadb a taab sẽn na n kõ-a biisã wakat sẽn zemse.”

42 A Zeezi yeela bãmb yaa: “Yãmb zɩ n karem Gʋls-sõamyã sẽn yetã la? A yetame: ‘Kugr ning tãn-metbã sẽn zãgsã n lebg roogã pãng kugrã.*+ Rẽ yita a Zeova* nengẽ, la a yaa bõn-kãseng tõnd nifẽ.’+ 43 Rẽ n so tɩ mam yet yãmb tɩ b na n deega Wẽnnaam Rĩungã yãmb nugẽ, n kõ buud sẽn womd biis sẽn zems ne Rĩungã. 44 Sẽn paase, ned ning sẽn na n lʋɩ kug-kãngã zug na n kaoome.+ La kugrã sẽn na n lʋɩ ned ning zugu, a na n beds-a lame.”+

45 Maan-kʋʋdbã taoor dãmb la Fariziyẽ-rãmbã sẽn wʋm yel-bũn nins a Zeezi sẽn wẽ wã, b bãngame tɩ yaa bãmb yell la a sẽn da gomdã.+ 46 La baa bãmb sẽn da rat n yõk a Zeezi wã, b ra yɛɛsda kʋʋngã, bala b ra kɩsa sɩd t’a Zeezi yaa no-rɛɛsa.+

22 A Zeezi le goma ne bãmb ne yel-bũn n yeele: 2 “D tõe n dɩka saasẽ Rĩungã n mak ne rĩm sẽn maan a bi-ribl yi-kãadem kibsa.+ 3 A tʋma a tʋm-tʋmdb tɩ b tɩ yeel neb nins a sẽn boolã tɩ b wa yi-kãadem kibsã, la b pa sak n na n wa ye.+ 4 A le tʋma tʋm-tʋmdb a taab n yeel-ba: ‘Tɩ togs-y m sẽn bool b rãmbã yaa: “Mam segla m rɩɩbã* n sa. Mam kooda m lols ne m rũm-nobdse. Bũmbã fãa segl n saame. Wa-y yi-kãadmã kibsã.”’ 5 La b maana b toog kae n yi, tɩ yãoã soab kẽng a pʋʋgẽ, t’a to wã kẽng a koosem zĩigẽ.+ 6 La sẽn ket-bã yõga a tʋm-tʋmdbã, n yaal-b la b kʋ-ba.

7 “Rĩmã sũur puugame t’a tʋm a tãb-biisã tɩ b tɩ kʋ nin-kãensã sẽn yaa nin-kʋʋdbã, la b yõog b tẽngã.+ 8 Rẽ poore, a yeela a tʋm-tʋmdbã yaa: ‘Yi-kãadmã kibs segl n saame, la neb nins m sẽn da boolã pa zems b na zĩnd kibsẽ wã ye.+ 9 Woto yĩnga, kẽng-y so-kãsemsã zutu, n bool ned ning fãa y sẽn na n yã t’a wa yi-kãadem kibsã.’+ 10 Tʋm-tʋmdbã sɩd yii soayã zut n bool neb nins fãa b sẽn yã wã, nin-wẽns la nin-sõma, tɩ roog ning pʋgẽ b sẽn maand yi-kãadmã pid ne neb sẽn dɩte.

11 “Rĩmã sẽn wa n kẽ n na n ges neb nins b sẽn boolã, a yãa rao a ye sẽn pa yer yi-kãadem fuug ye. 12 Rẽ la a sok-a yaa: ‘M zoa, fo maana a wãn n kẽ ka n pa ning yi-kãadem fuugu?’ T’a pa tar a sẽn na n yɛɛlg ye. 13 La rĩmã yeela a tʋm-tʋmdbã yaa: ‘Sẽb-y-yã a nusã la a naoã, n lob-a yɩng likã pʋgẽ. Yaa be la a na n yãb la a wãb a yẽna.’

14 “Bala b sẽn bool b rãmbã yaa wʋsgo, la b sẽn yãk b rãmbã sõor paoodame.”

15 La Fariziyẽ-rãmbã loogame, n tɩ yẽs ne taab sẽn na yɩl n bẽd a Zeezi a goamẽ wã n yõke.+ 16 Rẽ n so tɩ b tʋm b karen-biisã ne a Erood poorẽ dãmb+ tɩ b tɩ yeel-a yaa: “Karen-saamba, tõnd miime tɩ yãmb yaa sɩd soaba, la tɩ y zãmsda nebã Wẽnnaam sorã ne sɩda, n pa baood ninsaalb pẽgr ye. Bala yãmb pa get ned yalẽ ye. 17 Bɩ y togs tõnd yãmb tagsg sẽn yaa a soab wɛ! Zemsame tɩ d yao a Sezaar yõor-yaoodã bɩ, bɩ pa zemse?” 18 La a Zeezi sẽn bãng b wẽnemã, a sok-b lame: “Pʋ-lik rãmba, bõe yĩng tɩ yãmb makd maam? 19 Wilg-y maam lagf ning b sẽn tar n yaood yõor-yaoodã.” B talla deniye* a ye n wa kõ-a. 20 A Zeezi sok-b lame: “Yaa ãnda naand la a gʋlsem la woto?” 21 Tɩ b leok yaa: “A Sezaare.” Dẽ, a Zeezi yeel-b lame: “Bɩ y kõ a Sezaar bũmb nins sẽn yaa a Sezaar dẽndã, la y kõ Wẽnnaam bũmb nins sẽn yaa Wẽnnaam dẽndã.”+ 22 B sẽn wʋm dẽ wã, ling-b lame tɩ b loog n bas-a.

23 Baraare, Sadiseyẽ-rãmbã sẽn yet tɩ kũum vʋʋgr ka be+ wã waame, n sok-a yaa:+ 24 “Karen-saamba, a Moyiiz yeelame: ‘Rao sã n ki n pa paam kamba, a ba-biigã segd n dɩka a pagã, n dog kamb n kõ kiidã.’+ 25 La ba-biis a yopoe n da be ne tõndo. Pipi soabã kẽe kãadem, n maan kaalem. La a sẽn pa paam biigã, a ba-biigã rɩka a pagã. 26 Yɩɩ woto ne yiib-n-soabã la tãab-n-soabã, hal n tãag yopoe-n-soabã. 27 B fãa kũumã poore, pagã me kiime. 28 Woto wã, yopoe wã sʋka, ãnda n na n soog pagã kũum vʋʋgrã sasa? Bala b fãa rɩk-a lame n maan b paga.”

29 A Zeezi leok-b lame n yeele: “Yãmb tudgame, bala yãmb pa mi Gʋls-sõamyã, la y pa mi Wẽnnaam pãngã me ye.+ 30 Kũum vʋʋgrã sasa, rapã pa kẽed kãadem, la b pa kõt pagb sɩdb me ye. B yaa wa malɛgsã sẽn be saasẽ wã.+ 31 La sã n yaa ne kũum vʋʋgrã yelle, yãmb pa karem Wẽnnaam sẽn gom ne yãmb n yeele: 32 ‘Mam yaa a Abrahaam Wẽnnaam, a Izaak Wẽnnaam, la a Zakoob Wẽnnaamã’+ la? A pa kũ-rãmb Wẽnnaam ye. A yaa nin-vɩɩs Wẽnnaam.”+ 33 A Zeezi zãmsgã linga kʋʋngã sẽn da kelgdã wʋsgo.+

34 Fariziyẽ-rãmbã sẽn wʋm t’a gom n luba Sadiseyẽ-rãmbã, b tigma taab n wa. 35 La b sʋkã ned a yembr sẽn yaa Tõogã karen-saamb sok-a-la sokr n na n mak-a. A sokame yaa: 36 “Karen-saamba, Tõogã noyã sʋka, bʋg n yaa kãseng n yɩɩda?”+ 37 A leoka yẽnda yaa: “‘Fo tog n nonga a Zeova* sẽn yaa fo Wẽnnaamã ne f sũurã fãa, ne f sɩɩgã* fãa, la ne f yamã fãa.’+ 38 Yãoã la noor ning sẽn yaa kãseng n yɩɩdã, la pipi soabã. 39 Yiib-n-soabã wõnda yẽnda. A yetame: ‘Fo segd n nonga f to wa f menga.’+ 40 Tõogã fãa ne no-rɛɛsdbã goamã tika no-kãensã b yiibã zutu.”+

41 La Fariziyẽ-rãmbã sẽn da ket n tigim taabã, a Zeezi sok-b lame yaa:+ 42 “Yãmb tagsg yaa bõe ne Kiristã? A yaa ãnda biiga?” Tɩ b leok n yeele: “A Davɩɩde.”+ 43 T’a Zeezi sok-ba: “La maana wãn tɩ Wẽnnaam vẽneg a Davɩɩd+ t’a bool Kiristã t’a Zu-soaba, n yeele, 44 ‘A Zeova* yeela mam Zu-soabã yaa: “Zĩnd mam nug-rɩtgo, n tãag m sẽn na n ning f bɛɛbã f naoã tẽngre”’?+ 45 A Davɩɩd sã n boond-a t’a Zu-soaba, a yɩta wãn n yɩ a biiga?”+ 46 La ned pa tõog n leok-a tɩ bũmb ye. La daar-n-kãng tɛka, ned baa a ye pa le saag n sok-a sokr ye.

23 Dẽ, a Zeezi goma ne kʋʋngã la ne a karen-biisã n yeele: 2 “Gʋlsdbã ne Fariziyẽ-rãmbã zĩnda a Moyiiz zaoorẽ wã. 3 Woto wã, bɩ y sak bũmb nins fãa b sẽn yet yãmbã la y tũ, la y ra maan wa bãmb ye. Bala b gomdame la b pa tũud bũmb nins b sẽn yetã ye.+ 4 Bãmb sẽbda zɩɩb sẽn yaa zɩsd n palgd nebã bãgdo,+ la b mens yaool n pa rat n sɩɩs-b ne b nug-bil ye.+ 5 Bũmb nins fãa b sẽn maandã, b maanda nebã gesg yĩnga.+ Bala b maanda tʋgd nins b sẽn ningd Gʋls-sõamyã goamã tɩ yaa yalemse, n sẽbd rẽ n tẽed tɩ kogend-b lame,+ la b maand b futã noy zerdã wogdo.+ 6 Bãmb nonga naam zĩis tigã zĩisẽ, la taoor zĩis* tigsg rotẽ wã.+ 7 B ratame tɩ nebã pʋʋsd bãmb raasã pʋsẽ, la b boond-b tɩ Karen-saamba.* 8 La sã n yaa ne yãmba, ra sak-y tɩ ned bool yãmb tɩ Karen-saamb* ye. Bala nin-yɛng bal n yaa yãmb Karen-saamba,+ tɩ yãmb fãa yaa saam-biisi. 9 Sẽn paase, ra bool-y ned baa a ye tẽngã zug tɩ y ba ye. Bala yãmb Ba+ yaa a yembre: Yaa soab ning sẽn be saasẽ wã. 10 Ra sak-y me tɩ b bool yãmb tɩ taoor dãmba, bala yãmb Taoor soab yaa a yembre: Yaa Kiristã. 11 La ned ning sẽn yaa kãseng n yɩɩd yãmb sʋkã segd n yɩɩ yãmb tʋm-tʋmda.+ 12 Ned ning sẽn zẽkd a menga, b na n sik-a lame,+ la ned ning sẽn sikd a menga, b na n zẽk-a lame.+

13 “Yãmb a gʋlsdbã ne Fariziyẽ-rãmbã sẽn yaa pʋ-lik rãmbã, yãmb na n paama toogo, yãmb sẽn pag saasẽ Rĩungã nebã taoorã yĩnga. Bala yãmb mensã pa kẽede, la y pa basd neb nins sẽn baood n na n kẽ wã tɩ b kẽ ye.+ 14* ——

15 “Yãmb a gʋlsdbã ne Fariziyẽ-rãmbã sẽn yaa pʋ-lik rãmbã,+ yãmb na n paama toogo! Bala yãmb togda sor n dʋʋgd mogr la y saagd zĩig fãa sẽn na yɩl n paam ned sẽn na n tuub n sak yãmb zãmsgã. La y sã n paam ned a woto, y maandame t’a zems ne Zeyɛn* n yɩɩd yãmb mensã naoor a yiibu.

16 “Yãmb a taoor dãmb sẽn yaa zoense,+ y na n paama toogo. Yãmb yetame: ‘Ned sã n wẽen ne wẽnd-doogã, pa yell ye. La ned sã n wẽen ne sãnemã sẽn be wẽnd-doogẽ wã, a segd n pidsa a wẽenegã.’+ 17 Yam-koees rãmb la zoense! Sɩd-sɩda, bʋg n tar yõod n yɩɩda? Sãnemã bɩ, bɩ wẽnd-doogã sẽn kɩt tɩ sãnemã lebg sõngã? 18 Yãmb yetame me: ‘Ned sã n wẽen ne tẽn-kugrã, pa yell ye. La ned sã n wẽen ne kũunã sẽn be tẽn-kugrã zugã, a segd n pidsa a wẽenegã.’ 19 Zoense! Sɩd-sɩda, bʋg n tar yõod n yɩɩda? Kũunã bɩ, bɩ tẽn-kugrã sẽn kɩt tɩ kũunã lebg sõngã? 20 Dẽnd ned sã n wẽen ne tẽn-kugrã, a wẽenda ne tẽn-kugrã la ne bũmb nins fãa sẽn be a zugã me. 21 La ned sã n wẽen ne wẽnd-doogã, a wẽenda ne wẽnd-doogã la ne Soab ning sẽn be a pʋgẽ wã me.+ 22 Ned sã n wẽen ne saasã, a wẽenda ne Wẽnnaam geerã la ne Soab ning sẽn zao a zugã me.

23 “Yãmb a gʋlsdbã ne Fariziyẽ-rãmbã sẽn yaa pʋ-lik rãmbã, yãmb na n paama toogo! Bala yãmb kõta mante, anɛt la kumẽ*+ pʋɩɩr a ye pʋɩ piig zugu, la yãmb pa sakd Tõogã bũmb nins sẽn tar yõod n yɩɩdã, sẽn yaa tɩrlem,+ nimbãan-zoeer+ la kɩs-sɩdã ye. Yaa tɩlɛ tɩ y maan bõn-kãensã, la y pa segd n bas bũmb a taabã me ye.+ 24 Taoor dãmb sẽn yaa zoense,+ yãmb yoogda rũmpigli,+ n yaool n vend yʋgemde!+

25 “Yãmb a gʋlsdbã ne Fariziyẽ-rãmbã sẽn yaa pʋ-lik rãmbã, yãmb na n paama toogo! Bala yãmb nedgda laasã poɛyã,+ la b pʋsã pida ne yão-beed*+ la yĩngã ratem sakre.+ 26 Fariziyẽ sẽn yaa zoanga, reng n nedg laasã pʋse, tɩ b poɛyã me yɩ yɩlma.

27 “Yãmb a gʋlsdbã ne Fariziyẽ-rãmbã sẽn yaa pʋ-lik rãmbã,+ yãmb na n paama toogo! Bala yãmb wõnda yaad b sẽn bol ne goor tɩ b yaa peelse.+ B yɩngã sɩd bee neere, la b pʋsã pida ne neb sẽn ki kõaba, la rẽgd buud fãa. 28 Woto me, nif gesgẽ yãmb wõnda nin-tɩrse, la yãmb pʋsã pida ne pʋ-lik la noyã kɩɩsgo.+

29 “Yãmb a gʋlsdbã ne Fariziyẽ-rãmbã sẽn yaa pʋ-lik rãmbã,+ yãmb na n paama toogo! Bala yãmb meta no-rɛɛsdbã yaado, la y nagsd nin-tɩrsã yaad+ 30 n yetẽ: ‘Tõnd sã n da zĩnd d yaab-rãmbã wakate, d ra pa na n naag-b n daag no-rɛɛsdbã zɩɩm ye.’ 31 Woto, yãmb mensã kõta kaset tɩ y yaa neb nins sẽn kʋ no-rɛɛsdbã yagense.+ 32 Rẽ wã, bɩ y baas tʋʋmd ning y yaab-rãmbã sẽn sɩngã.

33 “Wiisi, wag-toos* yagense,+ yãmb na n yɩɩ wãn n põs Zeyɛn*+ bʋʋdã? 34 Yaa woto yĩng la mam tʋmd no-rɛɛsdb+ ne yam dãmb la karen-saam-dãmb+ yãmb nengẽ. Yãmb na n kʋʋ kẽere,+ n ka sãnda ra-lugs zutu, la y pãb kẽer me ne kalwaas+ y tigsg rotẽ wã, n nams-b+ tẽng-tẽnga, 35 sẽn na yɩl tɩ nin-tɩrsã fãa zɩɩm sẽn daag tẽngã zugã zĩnd yãmb zutu. Sẽn sɩng ne nin-tɩrg a Abɛll+ zɩɩmã, n tãag a Barakiya biig a Zakari yãmb sẽn kʋ Wẽnnaam doogã ne tẽn-kugrã sʋkã zɩɩm.+ 36 Sɩd-sɩda, mam yeta yãmb tɩ bõn-kãensã fãa na n waa zãmaan-kãngã zugu.

37 “Zerizalɛm, Zerizalɛm, fo sẽn kʋʋd no-rɛɛsdbã, la f lobd neb nins b sẽn tʋm fo nengẽ wã ne kuga,+ naoor wʋsg la mam sẽn bao n na n tigim fo kambã wa no-yãang sẽn tigimd a no-bi a pɩgs tẽngrã! La yãmb pa tʋlg rẽ ye.+ 38 Ade! B basa yãmb roogã ne-yã.*+ 39 Bala mam yeta yãmb tɩ masã tɛka, y pa na n le yã maam, hal n tãag y sẽn na n yeel tɩ ‘bark bee ned ning sẽn wat ne a Zeova* yʋʋrã zugu!’”+

24 La a Zeezi sẽn wa n yi wẽnd-doogẽ wã n loogdẽ, a karen-biisã kolg-a lame n yeel-a t’a ges wẽnd-doogã sẽn me to-to wã. 2 A Zeezi leoka bãmb yaa: “Yãmb nee bõn-kãensã fãa? Sɩd-sɩda, mam yeta yãmb tɩ kugr baa a ye kõn pa a to zug tɩ b pa lub-a ye.”+

3 A Zeezi sẽn wa n zĩ Oliiv tɩɩs tãngã zugu, karen-biisã kolgame n na n yã-a bãmb ne taab sʋk bala, n yeele: “Bɩ y togs-d wɛ! Bõn-kãensã na n zĩnda wakat bʋgo, la bõe n na n yɩ bãnd n wilg tɩ yãmb waame,*+ la tɩ dũniyã* rabda a saabẽ?”+

4 A Zeezi leoka bãmb yaa: “Gũus-y tɩ ned ra wa kẽes-y moog ye.+ 5 Bala neb wʋsg na n waa ne mam yʋʋrã n yetẽ tɩ bãmb n yaa Kiristã. B na n kẽesa neb wʋsg moogo.+ 6 Yãmb na n wʋma zab rãamde, la y wʋm tɩ b gomd zab yelle. Ra bas-y tɩ rẽ yɛɛs-y ye. Bala yaa tɩlɛ tɩ bõn-kãensã zĩndi, la pa saabã nand ye.+

7 “Bala buud na n yika zabr ne buud a to, tɩ rĩung yik zabr ne rĩung a to.+ Kom+ la tẽn-digimdg na n zĩnda zĩig-zĩiga.+ 8 Bõn-kãensã yaa toodã* sɩngr bala.

9 “Nebã na n yõga yãmb n namse,+ la b kʋ yãmba.+ Buud toɛy-toɛyã fãa na n kisga yãmb mam yʋʋrã yĩnga.+ 10 La neb wʋsg me na n lak n lʋɩɩme. B na n zãmba taaba, la b kisg taaba. 11 Zirẽ-be-no-rɛɛsdb wʋsg na n yikame, n tudg neb wʋsgo.+ 12 Noyã kɩɩsg sẽn na n tar paasgã yĩng me, neb wʋsg nonglem pãng na n boogame. 13 La ned ning sẽn na n tõog toog* hal n tãag saabã, a na n paama fãagre.+ 14 Sẽn paase, Rĩungã koe-no-kãngã na n moona dũniyã tɛk fãa tɩ yɩ kaset buud toɛy-toɛyã fãa yĩnga.+ Yaa rẽ poor la saabã na n ta.

15 “Woto wã, yãmb sã n wa yã bõn-yook ning sẽn wat ne sãoongã, no-rɛɛs a Dãniyɛll sẽn gom a soab yellã t’a yas zĩ-sõngẽ+ (sẽn na yɩl n wʋm a võore, sẽn karemd-a wã tog n talla yam-vẽenem,) 16 bɩ neb nins sẽn be Zide wã sɩng zoeese, n teesd tãensẽ wã.+ 17 Bɩ ned ning sẽn be roog zug ra sig n wʋk teed a roogẽ wã, 18 tɩ ned ning sẽn be pʋʋgẽ me ra lebg n tɩ rɩk a zugẽ fuug ye. 19 Pagb nins sẽn tʋte, la sẽn yẽsemd-b kom-peels wakat kãngã na n paama toogo! 20 Pʋʋsd-y wakat fãa n kotẽ tɩ y zoeesã ra yɩ waood wakate, wall Vʋʋsg daar ye. 21 Bala to-kãseng+ n na n zĩnd sasa kãnga. A buud zɩ n zĩnd hal dũniyã sɩngr n tãag masã, la a buud kõn le zĩnd me ye.+ 22 Sɩd me, ra-kãens sõorã sã n da pa booge, ned baa a ye kõn põs ye. La nin-tũusdsã yĩnga, b na n booga ra-kãens sõore.+

23 “Woto wã, ned sã n yeel yãmba: ‘Ges-y-yã! Kiristã bee ka,’+ wall a yeele: ‘A bee ka sẽnẽ!’ bɩ y ra tẽ ye.+ 24 Bala zirẽ-be-kiris-rãmb la zirẽ-be-no-rɛɛsdb+ na n waame, la b na n maana bãn sẽn yaa kãsems la yel-soalem sẽn na yɩl tɩ sã n tõe, bɩ b tudg+ nin-tũusdsã menga. 25 Ade! Mam pĩnd n keooga yãmba. 26 Rẽ wã, ned sã n yeel yãmba: ‘Ges-y-yã! A bee we-raoogẽ,’ bɩ y ra yi n kẽng ye. Wall a yeele: ‘Ges-y-yã! A bee ro-yaangẽ,’ bɩ y ra tẽ ye.+ 27 Bala Ninsaal biigã waoong wakat* na n yɩɩ wa saag sẽn yãgd yaang t’a vẽenemã tat nin-taoore.+ 28 Zĩig ning dɩgr sẽn be wã, yaa be la sɩlsã* na n tigmi.+

29 “Wakat kãng toogã poor bala, wĩntoogã na n sobgame.+ Kiuugã me pa na n le kõ a vẽenem ye. Sẽn paase, ãdsã na n yii yĩngr n dʋʋge, la bũmb* nins sẽn be saasẽ wã na n digimdame.+ 30 Rẽ poore, Ninsaal biigã bãnd na n puka saasẽ, la dũniyã buud toɛy-toɛyã fãa neb na n wilga b sũ-sãanga.*+ B na n yãa Ninsaal biigã+ t’a zao sawatã sẽn be saasẽ wã n wat ne pãng la ziir sẽn yaa kãsenga.+ 31 A na n tʋma a malɛgsã ne tãntãoog rãamd sẽn yaa kãsenga, tɩ b tigim a nin-tũusdsã dũniyã ween-vɩɩs a naasã, saasã kɩreng a ye n tãag kɩreng a to.+

32 “Masã, bɩ y rɩk yam yel-bũn-kãngã sẽn gomd kankang yellã pʋgẽ: Kankangã sã n wa tãood wil-poal n ningd vãad bala, yãmb miime tɩ sigrã kolgame.+ 33 Woto me, yãmb sã n wa yã bõn-kãensã fãa, bɩ y bãng tɩ Ninsaal biigã kolgame n ta rignoyẽ wã.+ 34 Sɩd-sɩda, mam yeta yãmb tɩ zãmaan-kãngã pa na n loog tɩ bõn-kãensã fãa pa maan ye. 35 Saasã ne tẽngã na n loogame, la mam goamã pa na n tol n loog ye.+

36 “Sã n yaa ne daar-n-kãng la lɛɛr-kãnga, ned baa a ye pa mi ye.+ Malɛgsã sẽn be saasẽ wã pa mi, Biigã me pa mi ye. Yaa Ba wã bal n mi.+ 37 Bala Ninsaal biigã waoong wakate,*+ yɛlã na n yɩɩ wa sẽn yɩ to-to a Nowe wakatẽ wã.+ 38 Sẽn deng Sa-kãsengã, nebã ra rɩtame la b yũuda, tɩ rap kẽed kãadem, la b kõt pagb sɩdba, hal n tãag daar ning a Nowe sẽn kẽ koom-koglgã pʋgẽ wã.+ 39 B pa maan gũusgu, hal tɩ Sa-kãsengã wa kãag b fãa n looge.+ Ninsaal biigã waoong wakat me, na n yɩɩ woto. 40 Wakat kãnga, rap a yiib na n bee pʋʋgẽ, tɩ b rɩk a yembr n bas a to wã. 41 Pagb a yiib na n bee neerẽ n werda, tɩ b rɩk a yembr n bas a to wã.+ 42 Woto wã, bɩ y kell n gũ, bala yãmb pa mi yãmb Zu-soabã sẽn wat daar ning ye.+

43 “La bãng-y bũmb a yembre: Zakã soab sã n da bãng yʋngã wakat ning wagdrã sẽn watã,+ a ra na n gũume n da gũsi, n da bas tɩ b kao a roogã ye.+ 44 Woto yĩnga, bɩ yãmb me segl y mens n sa,+ bala Ninsaal biigã wata wakat y sẽn pa tẽede.

45 “Ãnda n yaa tʋm-tʋmd sẽn tũud sɩd la sẽn tar yamã, a zu-soabã sẽn yãk t’a ges a zakã rãmb yelle, n kõt-b rɩɩb wakat sẽn zemsã?+ 46 Bark bee tʋm-tʋmd-kãng zugu, a zu-soabã sẽn na n wa mik t’a maanda woto!+ 47 Sɩd-sɩda, mam yeta yãmb t’a na n kɩtame t’a ges a paoongã fãa yelle.

48 “La tʋm-tʋmd-kãng sã n yaa wẽng n yeel a sũur pʋgẽ yaa: ‘Mam zu-soabã kaoosdame,’+ 49 la a sɩng a tʋm-tʋmd-taasã pãbre, n naag rã-yũud-kãas n dɩtẽ la a yũuda, 50 tʋm-tʋmd-kãng zu-soabã na n waa daar a sẽn pa tẽede, la wakat a sẽn pa mi.+ 51 A na n sɩbg-a-la ne sɩbgr tɛkẽ, la a kõ-a zĩig pʋ-lik rãmbã sʋka. Yaa be la a na n yãb la a wãb a yẽna.+

25 “D tõe n dɩka saasẽ Rĩungã n mak ne pʋg-sadb* piig sẽn yi ne b fɩtl-dãmba,+ n na n seg pʋg-paal sɩda.+ 2 Bãmb b nu n yaa yalemba, tɩ b nu wã tar yam.+ 3 Bala yalembã rɩka b fɩtl-dãmbã, la b pa zã kaam ye. 4 La sẽn tar-b yamã zãa kaam b tʋgdẽ wã n paas b fɩtl-dãmbã. 5 Pʋg-paal sɩdã sẽn wa n kaoosdẽ wã, gõeem yõka b fãa tɩ b gũsi. 6 Yʋn-sʋkã sẽn wa n ta, koɛɛg n tãs n yeele: ‘Ad pʋg-paal sɩdã! Bɩ y yi n seg-a.’ 7 Dẽ, pʋg-sadbã fãa yikame n segl b fɩtl-dãmbã.+ 8 Yalembã yeela sẽn tar-b yamã yaa: ‘Pʋdg-y y kaamã bilf n kõ-do, bala tõnd fɩtl-dãmbã rat n kiime.’ 9 La sẽn tar-b yamã leokame n yeele: ‘Tõe tɩ pa na n sek tõnd ne yãmb fãa ye. Kẽng-y ka-koaasdbã nengẽ n tɩ ra yãmb mengã rẽnda.’ 10 B sẽn wa n dabd n na n tɩ ra kaamã, pʋg-paal sɩdã waame. Pʋg-sadb nins sẽn segl n sa wã tũ-a lame n kẽ yi-kãadem kibsẽ wã,+ tɩ b pag kʋɩlengã. 11 Rẽ poore, pʋg-sadb nins sẽn kellã me waame n yeele: ‘Soaala, Soaala, pak-y tɩ d kẽ!’+ 12 La a leokame n yeele: ‘Mam yeta yãmb sɩda. Mam pa mi yãmb ye.’

13 “Woto wã, bɩ y kell n gũ,+ yãmb sẽn pa mi daarã la lɛɛrã yĩnga.+

14 “Bala yaa wa rao sẽn dat n tog sore, n bool a tʋm-tʋmdb n dɩk a paoongã n gũnug-ba.+ 15 A kõo a yembr talã* a nu, a to talã a yiibu, la a to talã-yɛnga, wa sẽn zems ned kam fãa tõogo, n bas n looge. 16 Tao-tao bala, sẽn deeg-a talã a nu wã rɩk-b lame n tɩ leebe, n paam talã a nu n paase. 17 Woto me, sẽn deeg-a talã a yiibã paama talã a yiib n paase. 18 La tʋm-tʋmd ning sẽn deeg talã-yɛng balã kẽngame n tɩ tuk boko, n solg a zu-soabã ligdã.*

19 “La sẽn wa n kaoose, tʋm-tʋmdbã zu-soabã waame, n na n ges b sẽn yõd n maan bũmb ning ne a ligdã.+ 20 Dẽ, sẽn da reeg-a talã a nu wã kolga ne talã a nu wã a sẽn paam n paasã, n yeele: ‘Zu-soaba, yãmb ra kõo maam talã a nu. La ges-y-yã, mam paama talã a nu n paase.’+ 21 A zu-soabã yeel-a lame: ‘Tʋm-tʋmd-sõng sẽn maand sɩda, fo maana neere! Fo maana sɩd ne bũmb bilfu. Mam na n kɩtame tɩ fo ges bũmb wʋsg yelle.+ Wa naag f zu-soabã n maan sũ-noogo.’+ 22 Rẽ poore, sẽn da reeg-a talã a yiibã kolgame n yeele: ‘Zu-soaba, yãmb ra kõo maam talã a yiibu. La ges-y-yã, mam paama talã a yiib n paase.’+ 23 A zu-soabã yeel-a lame: ‘Tʋm-tʋmd-sõng sẽn maand sɩda, fo maana neere! Fo maana sɩd ne bũmb bilfu. Mam na n kɩtame tɩ fo ges bũmb wʋsg yelle. Wa naag f zu-soabã n maan sũ-noogo.’

24 “Sẽn na n baase, sẽn da reeg-a talã-yɛngã kolgame n yeele: ‘Zu-soaba, mam da miime tɩ yãmb yaa ned yell sẽn yaa toogo. Yãmb kẽebda y sẽn pa bʋdẽ, la y wʋkd y sẽn pa yelgẽ.+ 25 Rẽ n so tɩ m yɛɛs n tɩ tu bok n solg yãmb talã wã. Ad bũmb ning yãmb sẽn so wã.’ 26 A zu-soabã leok-a lame n yeele: ‘Tʋm-tʋmd-wẽng sẽn yaa kʋɩɩma, fo ra miime tɩ mam kẽebda m sẽn pa bʋdẽ, la m wʋkd m sẽn pa yelgẽ. Bɩ bõe? 27 Dẽnd fo ra segd n talla mam ligdã* n tɩ kɩs ligd bĩngr zĩigẽ, tɩ m sã n wa bɩ m deeg ne yõodo.

28 “‘Woto yĩnga, reeg-y talã wã a nengẽ, n kõ sẽn tar-a talã piigã.+ 29 Bala ned ning fãa sẽn tare, b na n kõ-a lame n paas t’a paam tɩ gale. La ned ning sẽn pa tare, baa a sẽn tarã menga, b na n deeg n bas-a lame.+ 30 Lob-y tʋm-tʋmd sẽn ka barkã yɩng likã pʋgẽ. Yaa be la a na n yãb la a wãb a yẽna.’

31 “Ninsaal biigã sã n wa+ ne a naamã, la ne malɛgsã fãa,+ a na n zĩnda a geerã sẽn tar ziirã zugu. 32 Buud toɛy-toɛyã fãa na n tigma a taoore. A na n welga nebã sul a yiibu, wa rũm-kɩɩm sẽn welgd piis ne bʋʋse. 33 A na n ninga piisã+ a nug-rɩtgo, la a ning bʋʋsã a goabga.+

34 “Dẽ, Rĩmã na n yeela sẽn be-b yẽ rɩtgã yaa: ‘Yãmb sẽn paam m Ba barka, bɩ y wa soog Rĩungã b sẽn segl yãmb yĩng hal dũniyã yẽbgr wakatã. 35 Bala kom yõka maam, la yãmb kõo maam rɩɩb tɩ m dɩ. Ko-yũud yõka maam, la yãmb kõo maam koom tɩ m yũ. Mam da yaa sãana, la yãmb deega maam sãando.+ 36 M da yaa beelle,* la yãmb yeelga maam fuugu.+ Mam lʋɩɩ bãaga, la yãmb gesa mam yelle. M da bee bãens roogẽ, la yãmb wa n gesa maam.’+ 37 La nin-tɩrsã na n sokame yaa: ‘Zu-soaba, dabʋr la tõnd yã yãmb tɩ kom tar-y tɩ d kõ-y rɩɩbo, wall tɩ ko-yũud tar-y tɩ d kõ-y koom tɩ y yũ?+ 38 Dabʋr la tõnd yã yãmb tɩ y yaa sãan tɩ d reeg-y sãando, wall tɩ y yaa beell tɩ d yeelg-y fuugu? 39 Dabʋr la tõnd yã tɩ y bẽedẽ, pa rẽ bɩ n be bãens roogẽ tɩ d wa ges-yã?’ 40 Rĩmã na n leokame n yeele: ‘Sɩd-sɩda, mam yeta yãmb tɩ yãmb sẽn maan bõn-kãensã n kõ mam ba-bi-kãensã nin-yend sẽn yaa yao-zʋʋgã, yaa maam la yãmb maan n kõ.’+

41 “La a na n yeela sẽn be-b yẽ goabgã yaa: ‘Yãmb sẽn yaa neb Wẽnnaam sẽn kãab wẽnga, loog-y n bas-y maam+ n tɩ kẽ bugum sẽn ka kiidã pʋgẽ,+ b sẽn segl Sʋɩtãanã* ne a malɛgsã yĩngã.+ 42 Bala kom yõka maam, la yãmb pa kõ maam rɩɩb tɩ m dɩ ye. Ko-yũud yõka maam, la yãmb pa kõ maam koom tɩ m yũ ye. 43 Mam da yaa sãana, la yãmb pa reeg maam sãand ye. M da yaa beelle, la yãmb pa yeelg maam fuug ye. Mam lʋɩɩ bãaga, la m da be bãens roogẽ, la yãmb pa ges m yell ye.’ 44 La bãmb me na n sokame yaa: ‘Zu-soaba, dabʋr la tõnd yã yãmb tɩ kom bɩ ko-yũud tar yãmba, wall tɩ y yaa sãan bɩ beelle, pa rẽ bɩ y bẽedẽ wall y be bãens roogẽ tɩ d pa sõng-yã?’ 45 La Rĩmã na n leok-b lame n yeele: ‘Sɩd-sɩda, mam yeta yãmb tɩ yãmb sẽn pa maan bõn-kãensã n kõ mam ba-bi-kãensã nin-yend sẽn yaa yao-zʋʋgã, yaa maam la y pa maan n kõ.’+ 46 Bãmb rãmbã na n paama sãoong* sẽn ka sɛta,+ la nin-tɩrsã na n paama vɩɩm sẽn ka sɛta.”+

26 A Zeezi sẽn gom bõn-kãensã fãa yell n sa, a yeela a karen-biisã yaa: 2 “Yãmb miime tɩ Pakã keta rasem a yiibu,+ la tɩ b na n yõka Ninsaal biigã n kɩs tɩ b kʋ ra-luk zugu.”+

3 Dẽ, maan-kʋʋdbã taoor dãmb ne nin-buiidã kãsem-dãmb tigma taaba, maan-kʋʋdb kãsmã b sẽn boond t’a Kayifã samandẽ.+ 4 La b yẽsa ne taab+ n na n bãng b sẽn tõe n maan to-to n yõk a Zeezi ne sɩlem n kʋ. 5 La b ra yetame: “Pa tog n yɩ tigrã sasa, sẽn na yɩl tɩ rãmbg ra wa zĩnd nin-buiidã sʋk ye.”

6 A Zeezi sẽn wa n be wãoor a Sɩmo zakẽ Betani,+ 7 pag n tall albatr tʋk ne kaam sẽn tar yũ-noog t’a ligd yaa toogo, n wa a nengẽ a sẽn dɩt wakate, n sudg kaamã a zugẽ wã. 8 Karen-biisã sẽn yã rẽ wã, b sũyã puugame tɩ b yeele: “Bõe ka-sãoong la woto? 9 Bala b ra tõe n koosa kaamã n paam ligd wʋsg n kõ naong rãmba.” 10 A Zeezi sẽn bãng rẽ wã a yeel-b lame: “Bõe yĩng tɩ yãmb maand pagã woto? A maana maam neere. 11 Bala naong rãmbã bee ne yãmb wakat fãa,+ la yãmb pa na n paam tɩ mam pa ne yãmb wakat fãa ye.+ 12 Pagã sẽn ning ka-kãngã sẽn tar yũ-noogã mam zugã, yaa sẽn na yɩl n segl maam, m mumbã yĩnga.+ 13 Sɩd-sɩda, mam yeta yãmb tɩ b sẽn na n moon koe-no-kãngã dũniyã zĩig ning fãa, b na n togsa bũmb ning pʋg-kãngã sẽn maanã me n tẽeg a yelle.”+

14 Dẽ, Piig la a yiibã ned a ye b sẽn boond t’a Zida Iskariotã+ kẽnga maan-kʋʋdbã taoor dãmb nengẽ+ 15 n tɩ yeele: “Mam sã n sõng yãmb tɩ y paam-a n yõke, bõe la y na n kõ maam?”+ La b yeelame tɩ b na n kõ-a-la wanzuri ligd pis-tã.+ 16 Wakat kãng tɛka, a ra baooda weer n na n sõng-b tɩ b yõk a Zeezi.

17 Bur sẽn pa ning rabɩllã tigrã pipi daare,+ karen-biisã waa a Zeezi nengẽ n yeel yaa: “Yɛ la yãmb dat tɩ d segl Pakã tɩ y rɩ?”+ 18 La a yeelame: “Bɩ y kẽng tẽngã pʋgẽ a zagl nengẽ n yeel-a: ‘Karen-saambã yeelame: “Mam wakatã* taame. Mam na n maana Pakã ne m karen-biisã fo zakẽ wã.”’” 19 Dẽ, karen-biisã maana wa a Zeezi sẽn yeel-bã n segl Pakã.

20 Wĩndgã sẽn wa n kẽ,+ a zĩnda taablẽ ne karen-biis piig la a yiibã.+ 21 Bãmb sẽn wa n dɩtẽ, a Zeezi yeelame: “Sɩd-sɩda, mam yeta yãmb tɩ yãmb ned a ye n na n zãmb maam.”+ 22 Rẽ sãama b sũy wʋsgo, tɩ b ned kam fãa sok-a yaa: “Zu-soaba, we n pa maam la?” 23 La a leokame n yeele: “Ned ning sẽn tʋmd a nug ne maam laagẽ wã, yaa yẽ soab n na n zãmb maam.+ 24 Yaa sɩd tɩ Ninsaal biigã loogda wa b sẽn da pĩnd n gʋls n gom a yellã. La toog na paam+ ned ning sẽn na n yɩ sabab tɩ b yõk Ninsaal biigã!+ Nin-kãng sã n da pa rog n são.”+ 25 A Zida sẽn yaa ned ning sẽn dat n zãmb-a wã sokame yaa: “Rabi,* we n pa maam la?” T’a Zeezi leok n yeele: “Yaa wa fo sẽn yeelã.”

26 Bãmb sẽn wa n ket n dɩtẽ wã, a Zeezi rɩka bur n ning barka, n kao+ n kõ karen-biisã n yeele: “Bɩ y reeg n wãbe. Yãoã makda mam yĩngã.”+ 27 Sẽn paase, a rɩka bõn-yũudl n pʋʋs Wẽnnaam barka, la a kõ-b n yeele: “Bɩ yãmb fãa yũ,+ 28 bala yãoã makda mam zɩɩmã, sẽn yaa ‘kaoolã+ zɩɩm’+ sẽn na n daag neb wʋsg yĩnga,+ yel-wẽnã sugr kũun yĩnga.+ 29 La mam yeta yãmba: Mam pa na n tol n le yũ divẽ-kãngã, hal n tãag daar ning mam sẽn na n yũ divẽ-paalg ne yãmb mam Ba wã Rĩungã pʋgẽ ye.”+ 30 Sẽn na n baase, bãmb sẽn yɩɩl n pẽg Wẽnnaam* n sa, b yiime n kẽng Oliiv tɩɩs tãngã zugu.+

31 Dẽ, a Zeezi yeel-b lame yaa: “Yãmb fãa na n daaga maam n bas yʋn-kãngã.* Bala b gʋlsame: ‘Mam na n wẽe pe-kɩɩmã, la piisã sẽn be bãgrã pʋgẽ wã na n sãeegame.’+ 32 La mam vʋʋgrã poore, mam na n denga yãmb Galile.”+ 33 La a Pɩyɛɛr leok-a lame n yeele: “Baa neb a taabã fãa sã n daag yãmb n base, mam pa na n daag yãmb n bas a bada!”*+ 34 A Zeezi yeela yẽ yaa: “Sɩd-sɩda, mam yeta foom tɩ yʋn-kãngã, nand tɩ no-raoog kelme, fo na n kɩɩsa naoor a tãab tɩ f pa mi maam ye.”+ 35 A Pɩyɛɛr yeel-a lame: “Baa mam sã n na n naaga yãmb n ki, mam kõn tol n kɩɩs tɩ m pa mi yãmb ye.”+ La karen-biis a taabã fãa me yeela woto.

36 Dẽ, a Zeezi ne karen-biisã kẽnga zĩig b sẽn boond tɩ Gɛtsemane,+ t’a yeel-b yaa: “Zĩnd-y ka tɩ m kẽng ka sẽnes n tɩ pʋʋse.”+ 37 A peega a Pɩyɛɛr ne a Zebede kom-dibli a yiibã. La a Zeezi sũurã sɩnga sãoongo, hal t’a maand yɩɩr wʋsgo.+ 38 La a yeel-b lame: “Mam* sũurã sãama wʋsgo, hal tɩ m dat n ki. Pa-y ka n naag maam n gũ.”+ 39 La a sẽn kẽng taoor bilfu, a lʋɩɩme n fõgen a neng tẽng n pʋʋs n yeel yaa:+ “M Ba, sã n tõe bɩ f kɩt tɩ bõn-yũudl-kãngã+ loog n bas maam. La pa mam daabã n segd n maan ye. Yaa fo raabã.”+

40 A lebg n waa a karen-biisã nengẽ n mik tɩ b gõeeme, t’a yeel a Pɩyɛɛr yaa: “Yãmb pa tõog n naag maam n gũ baa yaa lɛɛr a yembr la?+ 41 Bɩ y gũudẽ+ la y pʋʋsd wakat fãa,+ n da wa kẽ makr pʋgẽ ye.+ Sɩda, sũurã tʋllame,* la yĩn-nemsã ka pãng ye.”+ 42 A leb n kẽnga naoor a yiib-n-soab n tɩ pʋʋse, n yeele: “M Ba, bõn-yũudl-kãngã sã n pa tõe n loog tɩ mam pa yũ-a, bɩ f raabã maane.”+ 43 La a lebg n waame, n mik tɩ b gõeeme. Bala gõeemã ra tar-b-la wʋsgo. 44 A bas-b lame, n kẽng n tɩ pʋʋs naoor a tãab-n-soaba, n le kos bũmb ning a sẽn da kosã. 45 Rẽ poore, a lebg n kẽnga a karen-biisã nengẽ n yeel-b yaa: “Wakat a woto sasa la yãmb gõe n vʋʋsdẽ? Ade! Wakat ning b sẽn na n yõk Ninsaal biigã n ning yel-wẽn-maandb nusẽ wã kolgame. 46 Yik-y tɩ d looge. Ges-y-yã! Sẽn na n zãmb-a maamã kolgame.” 47 A sẽn wa n ket n gomdã, a Zida sẽn yaa Piig la a yiibã nin-yendã waa ne neb kʋʋng sẽn zãad sʋʋs la rasaba. Yaa maan-kʋʋdbã taoor dãmb la nin-buiidã kãsem-dãmb n tʋm-ba.+

48 A Zeezi zãmbdã ra kõo kʋʋngã bãnd n yeele: “Ned ning mam sẽn na n mokã, yaa yẽ. Yõk-y-yã-a.” 49 A teesa tɩrg n ta a Zeezi nengẽ n yeele: “Y kibare, Rabi!”* La a mok-a sõma. 50 La a Zeezi soka yẽnda: “M neda, fo waa ka bõe yĩnga?”+ Dẽ, kʋʋngã kolgame n yõk a Zeezi. 51 La neb nins sẽn da be ne a Zeezi wã nin-yend wõoga a sʋʋg n kɛ maan-kʋʋdb kãsmã yambã, n fiuug a tʋbre.+ 52 Rẽ la a Zeezi yeel-a yaa: “Lebs n sui f sʋʋgã a wʋʋgẽ wã,+ bala neb nins fãa sẽn zabd ne sʋʋsã, sʋʋs n na n kʋ-ba.+ 53 Bɩ fo pa tẽed tɩ mam tõe n kosa m Ba t’a kɩt tɩ malɛgs tusa* wa sõng maam mas-masã?+ 54 Sã n yɩ woto, Gʋls-sõamyã sẽn yeel tɩ bõn-kãensã tog n maaname wã na n yɩɩ wãn n pidsi?” 55 Wakat kãnga, a Zeezi yeela kʋʋngã yaa: “Yãmb waa ne sʋʋs la rasab n na n yõk maam wa bi-bɛɛg la? Daar ne a to fãa, mam da bee wẽnd-doogẽ wã n zãmsd nebã,+ la yãmb pa yõk maam ye.+ 56 La bõn-kãensã fãa maaname sẽn na yɩl tɩ no-rɛɛsdbã sẽn gʋlsã pidsi.”+ Dẽ, karen-biisã fãa bas-a lame n zoe.+

57 Neb nins sẽn yõk a Zeezi wã tall-a lame n kẽng maan-kʋʋdb kãsem a Kayif+ zakẽ wã, zĩig ning gʋlsdbã ne kãsem-dãmbã sẽn da tigim taabã.+ 58 La a Pɩyɛɛr ra pʋgda yɩɩg-yɩɩga, hal n ta maan-kʋʋdb kãsmã samandẽ. La yẽ sẽn kẽ, a tɩ zĩnda ne zakã tʋm-tʋmdbã n na n ges yellã sẽn na n yɩ to-to.+

59 Maan-kʋʋdbã taoor dãmb ne Sãnedrẽ wã neb fãa ra baooda bũmb n na n dõd a Zeezi n paam n kʋ-a.+ 60 La baa neb wʋsg sẽn wa n kõ kaset sẽn pa sɩdã, b pa yã bũmb ye.+ Sẽn yɩ bilfu, neb a yiib n kolg 61 n yeele: “Nin-kãngã yeelame: ‘Mam tõe n sãama Wẽnnaam doogã, n lebs n me-a rasem a tãab pʋgẽ.’”+ 62 Rẽ la maan-kʋʋdb kãsmã yik n sok-a yaa: “Fo pa leokd tɩ bũmb la? Fo pa wʋmd nin-kãensã sẽn dõt foo bũmb ningã la?”+ 63 La a Zeezi kell n sĩndame.+ Dẽ, maan-kʋʋdb kãsmã yeel-a lame yaa: “Mam yeta foom tɩ f wẽen ne Wẽnnaam sẽn vɩ wã, n togs tõnd fo sã n yaa Kiristã, Wẽnnaam Biigã!”+ 64 T’a Zeezi leok n yeele: “Yaa wa yãmb sẽn yeelã. La mam yeta yãmb yaa: Sẽn sɩng masã, yãmb na n yãa Ninsaal biigã+ sẽn zĩ Wẽnnaam sẽn yaa pãng soabã rɩtgo,+ la sẽn zao yĩngr sawatã n watẽ.”+ 65 Rẽ la maan-kʋʋdb kãsmã kẽes a zugẽ futã n yeele: “A paooga Wẽnnaam! Tõnd le baooda kaset rãmb sɩda? Yãmb wʋma a sẽn paoog Wẽnnaamã. 66 Yãmb tagsg yaa bõe?” Tɩ b leok yaa: “A segda ne kũum.”+ 67 Dẽ, bãmb tʋbsa a nengã kolkoodo,+ la b pãb-a ne nug-gila.+ Kẽer me ra pãbd-a-la pɛgs+ 68 la b yetẽ: “Kiristã, togs tõnd bãngr-gomd wɛ. Yaa ãnd n wẽ foo?”

69 La a Pɩyɛɛr ra zĩi samandẽ wã yɩnga, tɩ tʋm-tʋmd-poak a ye kolg-a n yeele: “Fo-me ra bee ne Galile rao a Zeezi!”+ 70 La yẽ kɩɩsa bãmb fãa taoor n yeele: “Mam pa mi fo sẽn gomd bũmb ning yellã ye.” 71 A Pɩyɛɛr sẽn kẽng rignoorã sẽnẽ, pʋg-sad a to n bãng-a n yeel sẽn da be-b be wã yaa: “Ra-kãngã ra bee ne Nazarɛt rao a Zeezi.”+ 72 Yẽ leb n kɩɩsame, n wẽen n yeele: “Mam pa mi raoã ye!” 73 Sẽn yɩ bilfu, neb nins sẽn da yas be wã kolga a Pɩyɛɛr n yeele: “Hakɩɩka, fo-me yaa bãmb nin-yende. Bala fo sẽn gomd to-to wã pʋd n wilgda rẽ.” 74 Dẽ, a sɩnga a meng kãabg la a wẽendẽ n yetẽ: “Mam pa mi raoã ye!” La tao-tao bala, no-raoog n kelme. 75 La a Pɩyɛɛr tẽega a Zeezi goamã, a sẽn da yeele: “Nand tɩ no-raoog kelme, fo na n kɩɩsa naoor a tãab tɩ f pa mi maam ye.”+ La yẽ yii yɩng n yãb ne sũ-sãang wʋsgo.

27 Beoogã sẽn wa n vẽege, maan-kʋʋdbã taoor dãmb la nin-buiidã kãsem-dãmb fãa yẽsa ne taab a Zeezi yellã poorẽ, sẽn na yɩl n kʋ-a.+ 2 B sẽn sẽb-a n sa, b tall-a lame n tɩ ning a Pɩlat sẽn yaa guvɛrneerã nugẽ.+

3 Dẽ, a Zida sẽn yaa a Zeezi zãmbdã sẽn yã tɩ b kaoo a Zeezi bʋʋd n yeel t’a segda ne kũumã, a maana a bãngẽ, tɩ kɩt t’a tall wanzuri ligd pis-tã wã n wa na n lebs maan-kʋʋdbã taoor dãmb la kãsem-dãmbã,+ 4 n yeele: “Mam sẽn zãmb nin-tɩrgã, mam maana yel-wẽnde.” Tɩ b leok yaa: “Bʋg n pak tõndo? Paka foo!”* 5 Rẽ n so t’a lob wanzuri ligdã wẽnd-doogẽ wã la a looge. Rẽ poore, a kẽngame n tɩ luuli.+ 6 La maan-kʋʋdbã taoor dãmb wʋka wanzuri ligdã n yeele: “Pa segd tɩ d ning-b wẽnd-doogã ligd bĩngr zĩigẽ ye. Bala yaa zɩɩm ligdi.” 7 Bãmb sẽn yẽs ne taaba, b rɩka ligdã n da yagdã pʋʋg n na n maan sãambã yaad zĩiga. 8 Rẽ n kɩt tɩ b boond pʋ-kãng tɩ Zɩɩm pʋʋg+ hal n tãag rũndã. 9 Woto, bũmb ning Wẽnnaam sẽn vẽneg no-rɛɛs a Zeremi t’a yeelã pidsame. A ra yeelame: “B rɩka wanzuri ligd pis-tã wã sẽn yaa ligd ning b sẽn yãk n na n da raoã, rao ning Israyɛll neb kẽer sẽn yãk a ligd sõor n togsã, 10 n da yagdã pʋʋg wa a Zeova* sẽn yeel maamã.”+

11 B sẽn wa n tall a Zeezi n ta guvɛrneerã taoorã, guvɛrneerã sok-a lame yaa: “Foo la Zʋɩf-rãmbã Rĩmã bɩ?” T’a Zeezi leok yaa: “Yaa wa yãmb sẽn yeelã.”+ 12 La maan-kʋʋdbã taoor dãmb ne kãsem-dãmbã sẽn wa n dõt-a wã, a pa leok tɩ bũmb ye.+ 13 Dẽ, a Pɩlat sok-a lame yaa: “Fo pa wʋmd b sẽn dõt foo ne bũmb wʋsgã la?” 14 La a pa leok guvɛrneerã tɩ baa fʋɩ, hal tɩ ling-a wʋsgo.

15 La tigr fãa, guvɛrneerã ra minim n yiisda ned bãensã roogẽ, ned ning nin-buiidã sẽn date.+ 16 Wakat kãng tɩ bi-bɛɛg yʋʋr sẽn yi la b ra pag bãensã roogẽ, tɩ b boond-a t’a Barabaase. 17 Dẽ, nebã sẽn wa n tigmã, a Pɩlat sok-b lame yaa: “Ãnda la yãmb dat tɩ m yiis bãensã roogẽ? A Barabaas bɩ, bɩ a Zeezi b sẽn boond tɩ Kiristã?” 18 Bala a Pɩlat ra miime tɩ yaa sũ-kiir n kɩt tɩ b yõk a Zeezi n ning yẽ nugẽ. 19 Sẽn paase, yẽ sẽn wa n zĩ bʋʋdã kaoob geer zugu, a pagã kɩtame tɩ b taas-a koɛɛg n yeele: “Ra kẽes f toog nin-tɩr-kãngã yellã pʋgẽ ye. Bala rũndã mam gãandame n zãms n nams wʋsg a poorẽ.” 20 La maan-kʋʋdbã taoor dãmb ne kãsem-dãmbã tõga kʋʋngã tɩ b kos t’a bas a Barabaase,+ la a kɩt tɩ b kʋ a Zeezi.+ 21 La guvɛrneerã le soka bãmba: “Neb a yiibã sʋka, ãnda la yãmb dat tɩ m yiis bãensã roogẽ?” Tɩ b yeele: “A Barabaase.” 22 A Pɩlat soka bãmba: “Woto wã bõe la m segd n maan ne a Zeezi b sẽn boond tɩ Kiristã?” Tɩ b fãa leok yaa: “Ka-y-yã-a ra-luk zugu!”*+ 23 T’a Pɩlat soke: “Bõe yĩnga? Bõe la a maan tɩ yaa wẽnga?” La bãmb maneg n zẽka b koeesã n paase, n yetẽ: “Ka-y-yã-a ra-luk zugu!”+

24 A Pɩlat sẽn yã tɩ yẽ modgrã pa yãkd nenga, la tɩ rãmbg n da sɩngdã, a yãka koom n nudg a nus kʋʋngã taoor n yeele: “Ra-kãngã zɩɩmã taal pa be mam zug ye. Yãmb mensã bãng y sẽn na n maanega.” 25 Rẽ la nin-buiidã fãa leok n yeele: “Bɩ a zɩɩmã taal zĩnd tõnd zutu, la d kambã zutu.”+ 26 Dẽ, yẽ yiisa a Barabaas bãensã roogẽ wã. A kɩtame tɩ b pãb a Zeezi,+ la a rɩk-a n kõ tɩ b na n tɩ kʋ ra-luk zugu.+

27 Guvɛrneerã sodaas talla a Zeezi n kẽng guvɛrneerã zakẽ, la b tigim soda-sullã tõr tɩ b gũbg-a.+ 28 B yeesa a futã, n ning-a fu-miuugu,+ 29 n kal gõos n maan maanf n fõgen a zugã, n dɩk tãnwĩig n sagl a nug-rɩtgẽ wã, la b ra yĩgimded a taoor n yaand-a n yetẽ: “Tõnd pʋʋsda yãmba, Zʋɩf-rãmbã Rĩma!” 30 B tʋbs-a-la kolkoodo,+ la b reeg tãnwĩigã n sɩng a zugã pãbre. 31 Sẽn na n baase, b sẽn yaal-a wã poore, b yeega kobrã, n lebs n ning-a a zugẽ futã, la b tall-a n loog n na n tɩ ka ra-luk zugu.+

32 B sẽn wa n yitã, b yãa Sirɛn rao a ye yʋʋr sẽn boond t’a Sɩmo. B modga ra-kãng t’a tʋk a Zeezi namsg ra-lukã.*+ 33 La b sẽn wa n ta zĩig b sẽn boond tɩ Golgota sẽn dat n yeel tɩ Zu-wang zĩigã,+ 34 b kõo a Zeezi divẽ sẽn kalem ne bũmb sẽn yaa toog liga t’a yũ.+ La a sẽn lembe, a zãgsame n pa yũ ye. 35 B sẽn ka-a ra-lukã zug poore, b maana bãnd n pʋɩ a zugẽ futã,+ 36 la b zĩnd be n na n gũ-a. 37 Sẽn paase, b gʋlsa b sẽn dõd-a bũmb ningã n yagl a zugẽ wã. B gʋlsame yaa: “Yãoã yaa a Zeezi, Zʋɩf-rãmbã Rĩmã.”+

38 B kaa bi-bees a yiib ra-lugs zut n yɛgl a Zeezi, a yembr a rɩtgo, a to wã a goabga.+ 39 La so-loaadbã ra yaand-a lame,+ la b gird b zut+ 40 n yetẽ: “Fo sẽn da rat n tus wẽnd-doogã n lub la f lebs n me-a rasem a tãab pʋgẽ wã,+ fãag f menga! Fo sã n yaa Wẽnnaam biiga, bɩ f sig namsg ra-lukã* zugu!”+ 41 Maan-kʋʋdbã taoor dãmb la gʋlsdbã n paas kãsem-dãmbã me ra yaand-a-la woto, n yetẽ:+ 42 “Yẽ fãaga neb a taaba, la a pa tõe n fãag a meng ye! Yẽ yaa Israyɛll Rĩma.+ Bɩ a sig namsg ra-lukã* zugu, tɩ tõnd na tẽ yẽnda. 43 Yẽ teega Wẽnnaam, bɩ Wẽnnaam fãag-a masã, sã n mik t’a taa a yam,+ bala a yeelame: ‘Mam yaa Wẽnnaam Biiga.’”+ 44 Baa bi-bees nins b sẽn ka ra-lugs zut n yɛgl-a wã me ra yaand-a-la woto.+

45 Sẽn sɩng ne wĩntoog wakat piig la a yiibã sẽnese,* lik n zĩnd soolmã tõr hal n tãag zaabr wakat a tãabã sẽnese.*+ 46 Zaabr wakat a tãabã sẽnese, a Zeezi zẽka a koɛɛg n tãs ne pãng n yeele: “Eli, Eli, lama sabaktani?” Rẽ rat n yeelame: “Mam Wẽnnaam, mam Wẽnnaam, bõe yĩng tɩ yãmb bas maam?”+ 47 Sẽn da yas-b be wã kẽer sẽn wʋm dẽ, b yeelame: “Ra-kãngã boonda a Eli.”+ 48 La b nin-yend n yɩ tao-tao n wudg n dɩk bũmb sẽn fõogd koom n los divẽ sẽn yaa miisg pʋgẽ, n sẽb tãnwĩig n kõ-a sẽn na yɩl t’a yũ.+ 49 La a taabã yeelame: “Bas-a tɩ d ges a Eli sã n na n wa fãag-a lame.” 50 A Zeezi leb n zẽka a koɛɛg n kelem ne pãnga, la a ki.*+

51 La ade! Wẽnnaam doogã fu-lilldgã*+ pãrga a yiibu,+ sẽn sɩng yĩngr n tãag tẽngre.+ La tẽngã rigimdame tɩ pĩisã pusi. 52 Yaadã pagsame, la nin-sõamyã wʋsg sẽn da ki* kũ-rãmb pugsame, 53 tɩ neb wʋsg yã bãmba. (A Zeezi vʋʋgrã poore, neb kẽer sẽn da pasgd yaadã kẽe tẽn-sõngẽ wã.) 54 La sodaas koabg naabã, n paas neb nins sẽn da be ne yẽ n gũud a Zeezi wã sẽn yã tẽn-digimdgã ne bũmb nins fãa sẽn maanã, b yɛɛsa wʋsg n yeele: “Sɩd-sɩda, nin-kãngã yaa Wẽnnaam Biiga.”+

55 La pagb wʋsg n da be be, n yas yɩɩg n getẽ. Bãmb pʋga a Zeezi hal Galile n da get a yelle.+ 56 A Maari sẽn yit Magdala wã, n paas a Zak ne a Zozɛs* ma a Maari, la a Zebede kom-dibli wã ma ra bee bãmb sʋka.+

57 La wĩndgã sẽn da kolg kõomã, rakãagr a ye sẽn yit Arimate t’a yʋʋr boondẽ t’a Zozɛf n wa. Yẽ me ra lebga a Zeezi karen-biiga.+ 58 Ra-kãng kẽnga a Pɩlat nengẽ n tɩ kos a Zeezi kũumã.+ Dẽ, a Pɩlat yeelame tɩ b kõ-a.+ 59 A Zozɛf rɩka kũumã n vil ne lẽ gĩs-bãanes peend sẽn yaa yɩlemde,+ 60 n mum-a yẽ mengã yao-paall pʋgẽ.+ Yaa yaoog a sẽn da tu tãng pendẽ. A bilma kug-bedr n pag yaoogã noor n bas n looge. 61 La Maari ning sẽn yit Magdala wã n paas Maari a to wã kell n paa be, n zĩnd yaoogã noore.+

62 Vẽkembeoogã sẽn yaa Seglg daarã+ yɩ tɩ zaamẽ wã, maan-kʋʋdbã taoor dãmb ne Fariziyẽ-rãmbã tigma taab a Pɩlat taoor 63 n yeele: “Soaala, tõnd tẽega bũmb ning nin-kãngã sẽn yaa zirẽ-be-nedã sẽn yeel a sẽn wa n ket n vɩ wã. A ra yeelame: ‘Rasem a tãab poore, mam na n vʋʋgame.’+ 64 Woto yĩnga, kõ-y noor tɩ b gũ yaoogã n tãag rasem a tãab-n-soabã, sẽn na yɩl t’a karen-biisã ra wa zuk-a+ la b yeel nin-buiidã: ‘A vʋʋgame n yi kũ-rãmb sʋka!’ Sã n pa rẽ, yaoolem zirẽ-be-kãng wẽnem na n yɩɩga pipi soabã.” 65 T’a Pɩlat leok bãmb yaa: “Yãmb tõe n paame tɩ b kõ-y gũudba. Kẽng-y n tɩ gũ-y yaoogã wã y sẽn datã.” 66 Dẽ, bãmb loogame n tɩ kɩt tɩ b maneg yaoogã noor n pag ne kugrã sõma, la b yals gũudb be.

28 Vʋʋsg daarã loogr poore, semennã pipi daarã* beoog sẽn wa n vẽegdẽ wã, a Maari sẽn yit Magdala wã ne Maari a to wã kẽngame n na n tɩ ges yaoogã.+

2 La ade! Tẽn-digimd-kãseng n da zĩndi, bala a Zeova* malɛk n yi saasẽ n sig n bilim kugrã n lake, n da zĩ a zugu.+ 3 Malɛkã ra yãgda wa saaga, t’a fuugã yaa pɛɛlg wa sa-lamdo.+ 4 Gũudbã sẽn yã-a wã, rabeem yõk-b lame tɩ b rigi, n lebg wa neb sẽn ki.

5 La malɛkã yeela pagbã yaa: “Ra zoe-y rabeem ye. Mam miime tɩ yãmb gẽesda a Zeezi b sẽn kʋ ra-lukã zugã.+ 6 Yẽ pa be ka ye. A vʋʋga wa a sẽn da yeelã.+ Wa n ges-y a sẽn da gãe zĩig ningã. 7 Woto wã, bɩ y kẽng tao-tao n tɩ togs a karen-biisã t’a vʋʋgame n yi kũ-rãmb sʋka. A renga yãmb taoor n dabd Galile.+ Yãmb na n yã-a-la beenẽ. Koɛɛg ning m sẽn da tar n na n taas-yã la woto.”+

8 Dẽ, b yii yaoogẽ wã tao-tao ne rabeem la ne sũ-no-kãsenga, n zoet n na n tɩ togs a Zeezi karen-biisã bõn-kãense.+ 9 La a Zeezi sega bãmb n yeele: “Ne y yibeoogo!” Pagbã kolgame, n gãd a naoã n wõgemd a taoore. 10 Rẽ la a Zeezi yeel-b yaa: “Ra zoe-y rabeem ye! Kẽng-y n tɩ togs-y m saam-biisã kibarã, sẽn na yɩl tɩ b kẽng Galile, tɩ be la b na n yã maam.”

11 Pagbã sẽn wa n be sorẽ, gũudbã kẽer+ kẽnga tẽngã pʋgẽ, n tɩ togs maan-kʋʋdbã taoor dãmb bũmb nins fãa sẽn maanã. 12 La maan-kʋʋdbã taoor dãmb ne kãsem-dãmbã sẽn tigim taab n yẽse, b kõo sodaasã wanzuri ligd wʋsg 13 la b yeele: “Yeel-y yaa: ‘A karen-biisã waa ne yʋng tõnd sẽn wa n gõe, n zuk kũumã.’+ 14 Baa rẽ sã n lʋɩ guvɛrneerã tʋbrẽ bɩ y ra maan yɩɩr ye. Tõnd na n goma ne-a n fãag-yã.” 15 Dẽ, b reega wanzuri ligd-koeemsã, la b maan wa b sẽn yeel-bã. La kiba-kãng saaga Zʋɩf-rãmbã sʋk hal n tãag rũndã.

16 La karen-biis piig la a ye wã kẽnga Galile,+ n tɩ rʋ tãng ning zug a Zeezi sẽn da yeel tɩ b seg taabã.+ 17 Karen-biisã sẽn yã-a wã, b wõgemda a taoore, la kẽer da sãmbdame. 18 A Zeezi kolgame n gom ne bãmba, n yeele: “Wẽnnaam kõo maam noor tɩ m ges bũmb fãa yell saasẽ la tẽngã zugu.+ 19 Bɩ y kẽng n tɩ sõng buud toɛy-toɛyã fãa neb+ tɩ b yɩ mam karen-biisi, n lis bãmb+ ne Ba wã la Biigã la vʋʋsem sõngã yʋʋre, 20 la y zãms bãmb tɩ b tũ bũmb nins fãa mam sẽn yeel yãmbã.+ La ade! Mam bee ne yãmb daar fãa, hal tɩ ta dũniyã* saabo.”+