“Bãmb ka bãng” ye

F SÃ N pa sak keoogre, tõe n baasa ne yel-beedo.

Galʋ-tẽng b sẽn boond tɩ Darwin sẽn be Ostrali wã ra segenda kibs yʋʋmd 1974, t’a wuu kelem n wilg tɩ seb-kẽeng n wate. La maana yʋʋm 30 tɩ seb-kẽeng pa sãam Darwin ye. Bõe yĩng t’a pa na n põs so-kãngã me? La tẽngã neb wʋsg pa tags tɩ yaa yell ye, hali tɩ sebg sẽn tar pãng wʋsg wa sɩng n fõgsd rotã suga la a lubd rotã lals tɩ neb ket n be be. Beoogã ne a vẽeg tɩ galʋ-tẽngã lebga raboogo.

Kolõmbi, yʋʋmd 1985, sɩpaolg kiuugu, tãng n pusgi. Neezã la galaasã sẽn yẽnegã rɩka bɛgdã n zoe n wa bus sẽn yɩɩd neb 20 000 galʋ-tẽng sẽn boond tɩ Armero wã pʋgẽ. Yaa bũmb n pa wilg tɩ woto na n zĩndame bɩ? Tãngã da rigimda sẽn na maan kiisi. La Armero nebã sẽn da minim n vɩ tãngã sẽn nong n pusgdẽ wã sɛɛgẽ wã yĩnga, neb wʋsg toog ra kae ye. B togsa tẽngã taoor dãmb tɩ pa na n kaoos la sabaab wa ye, la b pa wɩsg b mens n keoog zãma wã ye. Radio wã taasa koees sẽn na yɩl n gãneg nin-buiidã yam. B ra rɩka egiliizã mikoro n gom n sagl nebã tɩ b ra yɛɛs ye. Zĩ-sobdã wakate, naoor a yiib la tãngã pusg n maan bʋrg wʋsgo. Yãmb sã n da beẽ n be, y na n basẽ-la y tarma la y zoe bɩ? Neb wʋsg kell n paa be hali tɩ wa kẽ n bõoge.

Naoor wʋsgo, tẽn-digimdgã mitb togsda tẽn-digimdgã sẽn na n maan zĩig ning takɩ. La yaa toog wʋsg tɩ b tõog n togs sẽn na n yɩ wakat ningã takɩ. Yʋʋmd 1999, dũniyã gill zugu, tẽn-digimdgã kʋʋ neb 20 000. Nin-kãens sẽn ki wã sʋka, wʋsg ra tagsame tɩ rẽ ra pa tol n tõe n paam-b ye.

Yãmb manesem yaa wãn to ne keoogr nins sẽn yit Wẽnnaam mengã nengẽ wã?

Hal sẽn kaoos wʋsgo, Biiblã reng n wilga yɛl nins sẽn na n zĩnd yaoolem dayã pʋsẽ vẽenega. Sẽn tɩ loe ne bilg-kãngã, Biiblã sagenda tõnd tɩ d tags “a Nowe wakatã” yelle. “Sẽn deng sãoong sa-kãsengã,” sẽn da pak nebã ra yaa b raasenkam tʋʋmã, baa ne b sẽn da maand yɩɩr meng ne nen-kɛglmã sẽn da yaa wʋsgã. Sã n yaa ne keoogr ning Wẽnnaam sẽn tũnug ne a sõgen a Nowe n kõ wã, “bãmb ka bãng hal tɩ sãoong sa-kãsenga wa n loog ne bãmb fãa.” (Matɩe 24:37-39) Sã n da yaa yãmba, y ra na n saka keoogrã bɩ? Yaa woto la y maand masã bɩ?

La yaa wãn to masã, yãmb sã n da vɩ Sodom sẽn da pẽ Mog-kɩɩngã, a Abrahaam ba-biig biig a Lot wakatã? Tẽngã ra yaa wa arzãna. Galʋ-tẽngã ra tara arzɛka, t’a nebã ra tagsdẽ tɩ yell kae ye. A Lot wakatã, “neba ra dɩtame la b yũuda, b ra raadame la b koosdẽ, la b ra bʋtame la b metẽ.” Neba ra yoodame me tɩ loog nugu. Yãmb ra na n kelga a Lote, a sẽn keoog nebã n wilg tɩ b tʋʋmã yaa wẽnsa bɩ? Yãmb da na n kelgame, a sẽn wa n yetẽ tɩ Wẽnnaam na n sãama Sodom galʋ-tẽngã bɩ? Bɩ y ra na n gesa rẽ wa kʋʋsem goamã, wala kom-bɩɩs nins sẽn da rat n kẽ kãadem ne a Lot kompugli wã sẽn maanã? Yãmb ra na n sɩnga zoees n yaool n wẽneg n ges poorẽ wala a Lot pagã sẽn maanã bɩ? Baa neb a taabã sẽn pa tẽ keoogrã, a Lot sẽn yi Sodommã daare, “bugum ne kidbr yii yĩngr n ni wa saag n sãam bãmb fãa.”—Luk 17:28, 29.

Rũndã-rũndã, neb wʋsg pa tẽed tɩ bũmb n na n maan ye. La b yaool n gʋlsa mak-kãensã Wẽnnaam Gomdã pʋgẽ sẽn na yɩl tɩ yɩ keoogr n kõ tõndo, n keng tõnd raood tɩ d KET N GŨUSDẼ!

[Zĩ-gũbri/Foto, seb-​neng 22]

Sãoong sa-kãseng n sɩd zĩnd bɩ?

Kɩɩsdb wʋsg yetame tɩ ayo. La Biiblã yaool n yetame tɩ yɩɩ bũmb sẽn zĩndi.

A Zezi Kirist mengã goma a yelle, la a sẽn da be saasẽ wã a ra yãa yel-kãngã sẽn wa n maandẽ wã.

[Zĩ-gũbri/Foto, seb-​neng 23]

B sɩd sãama Sodom la Gomoor bɩ?

Raboodã vaeesg wilgdame tɩ yɩɩ bũmb sẽn sɩd zĩndi.

Pĩnd yɛlã sɛb gomda a yelle.

A Zezi Kirist wilgame tɩ yel-kãngã sɩd zĩndame, la sẽn paase b goma bõn-kãng yell Biiblã sɛb toɛy-toɛy 14 pʋsẽ.