Tʋʋlgo

A Zɛfte ba-biisã sẽn da maand sũ-kiir ne-a la b kis-a wã kɩtame tɩ b maan-a pãnga, n dig-a t’a loog n bas a rogem-pʋɩɩrã. (Bʋ. 11:1-3) Baa ne rẽ, b sẽn wa n kos-a sõngrã, a sakame meng n na n sõng-ba. (Bʋ. 11:4-11) A Zɛfte ra miime t’a sã n sõng n zab a Zeova yʋʋrã yĩng n são a sẽn na n bao n dok a sũuri. A kell n zĩnda a Zeova poorẽ ne a sũur fãa, tɩ naf yẽ ne Israyɛll nebã fãa. (Ebre. 11:32, 33) D tõe n dɩka yam a Zɛfte kibarã pʋgẽ. Wala makre, d tẽed-n-taas tõe n wa maana bũmb n sãam d sũuri, pa rẽ bɩ d wa tagsdẽ tɩ b maan-d-la pãnga. Sã n wa yaa woto bɩ d ra bas tɩ rẽ kɩt tɩ d pa le tũud a Zeova wall d bas tigissã kẽnde, bɩ n pa le baood d tẽed-n-taasã zĩig ye. D rɩk a Zɛfte togs-n-taare, n tũ Biiblã saglse. Rẽ na n sõng-d lame tɩ sẽn wa n yaa zu-loɛɛg ning fãa la d seg-yã, bɩ d kell n maan neer n tõog wẽnga.—Rom. 12:20, 21; Efɛ. 4:32. w16.04 1:7, 9, 10

D segd n tõoga toog n tãag dũniyã sɛɛbo. Pa wakat a wãn bal ye. D rɩk makr ne koom-koglg sẽn na n sãam n sɩng bõrbo. Neb nins sẽn be a pʋgẽ wã sã n dat n põse, b segd n dugame, hal n tãag kʋɩl-koakã. Ned sã n sɩng rugb n wẽneg n base, koomã na n dɩ-a lame. Ned sã n modg n kolg kʋɩl-koakã n yaool n bas me, a na n kiime. Tõnd me segd n tõoga toog hal n wa kẽ dũni-paalgã pʋgẽ. Yaa yõor yelle. D tara tʋm-tʋmd a Poll yamã buudu. A yeela naoor a yiib woto: “Tõnd ka boogd d raood ye.” (2 Kor. 4:16) Tõnd me kɩsa sɩd wa a Poll t’a Zeova na n sõng-d lame tɩ d tõog toog n tãag dũni-kãngã sɛɛbo. A Poll yeela woto: “Tõnd yaa tõaagdb hakɩɩka, sẽn nong-a tõndã maasem yĩnga. Bala, mam sũur keemame tɩ kũum, wall vɩɩm, wall malegse, wall pãn-soaadba, wall bũmb sẽn be moasã, wall bũmb sẽn wata, wall pãense, wall yĩngr nebã, wall tẽngr nebã, wall bõn-naandg a to baa a yembr kõn n welg tõnd ne Wẽnnaam nonglem sẽn be tõnd Zu-soab a Zeezi Kiris pʋgẽ wã ye.”—Rom. 8:37-39. w16.04 2:17, 18

Kos-y-yã a Zeova yam, tɩ sõng-y tɩ y pĩnd n bãng yɛl sẽn tõe n wa kɩt tɩ y kɩɩs a noore. B tõe n kẽes-y-la bãens roogo, wall b maan-y bũmb a to y sẽn sakd a Zeova n pa kẽed politikã yĩnga. Sã n wa yaa woto bɩ y kos a Zeova raoodo, n tõog n wilg nebã y sẽn pa kẽed politikã võore. Y tõe n kɩsa sɩd t’a na n sõng-y lame tɩ baa sẽn wa n yaa a soab fãa bɩ y kell n tõog toogo. (Tʋʋm 4:27-31) A Zeova tõe n kenga y raood me ne a Gomdã maasem. Biiblã vɛrse-rãmb wʋsg n tõe n sõng-y tɩ baa toog pʋgẽ bɩ y kell n da kẽ politikã ye. Bʋgsd-y vɛrse-kãens zugu. Modg-y tɩ b goamã pa y yamẽ. Rẽ, baa y sã n wa pa tar Biible, na n sõng-y lame. Wẽnnaam Gomdã tõe n kɩtame me tɩ y maneg n kɩs sɩd tɩ bark nins Rĩungã sẽn na n wa ne wã pa na n vaal ye. Sɩd me, d sã n miẽ tɩ manegr n wate, na n sõng-d lame tɩ d tõog toogo. (Rom. 8:25) Bao-y vɛrse-rãmb sẽn wilgd bõn-sõma y sẽn dat ne y sũur fãa n wa paam dũni-paalgã pʋgẽ, la y mams y vɩɩmã sẽn na n yɩ noog to-to wakat kãngã. w16.04 4:14, 15

Kiris-neb ne yʋʋrã taoor dãmb pa moond Wẽnnaam Rĩungã koɛɛg ye. B sã n wa gomd Rĩungã yelle, b wʋsg yetame tɩ yaa bũmb sẽn be kiris-nebã sũyẽ. (Luk 17:21) B pa wilgd nebã tɩ Wẽnnaam Rĩungã yaa goosneema sẽn be saasẽ, la tɩ yaa a Zeezi la Rĩungã naab ye. Sẽn bas n pak bãmb yaa b maand Nowɛll n tẽegd a Zeezi rogmã, la b maand Pak n tẽegd a sẽn nams n ki wã. B pa wilgd nebã t’a Zeezi sẽn yaa Rĩungã Rĩmã na n kɩtame tɩ wẽnem buud fãa sa, la tɩ na n tũu ne Rĩungã maasem tɩ ãdem-biisã paam-b mens ne zu-loeesã fãa ye. (Vẽn. 19:11-21) Dẽnd yaa vẽeneg tɩ kiris-neb ne yʋʋrã taoor dãmb pa mi a Zeezi sẽn na n wa maanã ye. B pa mi bũmb ning yĩng b sẽn segd n moon-a me ye. A Zeezi karen-biisã pa segd n moon koɛɛgã ligd yĩnga, wall sẽn na yɩl n paam n me ro-bɛd ye. Ned pa segd n dɩk Wẽnnaam goamã n maan leebg bũmb ye. (2 Kor. 2:17) Neb nins sẽn moond Wẽnnaam koɛɛgã pa tog n tũnug rẽ n bao b mens nafr ye.—Tʋʋ. 20:33-35. w16.05 2:7, 8

Mams-y wa yãmb sẽn na n tar fut y sẽn nonge, n yaool n miẽ tɩ sãamda tigingã neb kẽer sũuri. Y miime tɩ Biiblã pa kõ noor takɩ futã wɛɛngẽ ye. Woto wã, y maanda wãn n bãng sẽn noom a Zeova? A vẽnega tʋm-tʋmd a Poll t’a yeel woto: “Sã n yaa ne pagbã, b tog n yera fut sẽn yaa sõama n zems gesgo, la ne sik-m-menga. Bɩ b nagmã ra yɩ zutã pãnengo, wall sãnem, wall kĩndi, wall fut ligd sẽn yaa toog yeelgrẽ ye. Ayo! B tog n nagsa b mens ne tʋʋm-sõamyã maanego, wa sẽn zems pagb sẽn sakd Wẽnnaam sẽn tog n maane.” (1 Tɩm. 2:9, 10) Rapã me tog n tũu sagl-kãngã. D sã n yaa sik-m-meng soaba, d na n tagsda d fu-yerdɩ wã sẽn tõe n maan d taabã bũmb ningã. D sẽn nong-bã, d gũusdame n pa rat n wa maan tɩ b sũy sãam ye. (1 Kor. 10:23, 24; Fili. 3:17) Nand tɩ d yãk yam n maan bũmbu, d sã n tẽeg Biiblã sẽn yet rẽ wɛɛngẽ, la d bao n bãng sẽn noom a Zeova, d tõogd n yãka yam tɩ zemse.—1 Kor. 10:23; Fili. 3:17. w16.05 3:14

A Ãdem sẽn kɩɩs a Naandã tɛka, a ra pa le yaa a biig ye. La pĩnd wẽndẽ n tãag masã, ãdem-biis wʋsg n sak a Zeova, tɩ wilgdẽ tɩ b miime tɩ yẽ n yaa yĩngr la tẽng Naaba. (Ebre. 12:1) B sẽn sik b mens n sak b Naandã wilgdame tɩ b ratame t’a yɩ b Ba, tɩ bãmb yɩ wa yagd a nugẽ, la tɩ b pa rat n zĩnd a Sʋɩtãan nugẽ tɩ yẽ yɩ b ba ye. (Zã 8:44) B sẽn sak Wẽnnaam ne b sũur fãa wã tẽegda tõnd rũndã daar vɛrse wã goamã. Rũndã-rũndã me, a Zeova nin-buiidã fãa maanda b sẽn tõe n sikd b mens n sakd-a. B getame tɩ b sẽn paam n tõe n bool a Zeova tɩ b Ba wã, n leb n yaa wa yagd a nugẽ wã yaa zu-zẽkre. La yɩta sõma tɩ ned kam fãa sok a meng woto: Rẽ yĩnga, m yaa wa yagd a Zeova sẽn tõe n tall n maan bõn-neer bɩ? M getame tɩ m tẽed-n-taasã ned kam fãa yaa wa yagd a Zeova nugẽ t’a tʋmdẽ, n dat n maan teoog sẽn yaa sõma bɩ? w16.06 1:2, 3

Ka la bilfu, tõnd me na n kẽe dũni-paalgã pʋgẽ. La zu-loees toor-toor n dat n koms d tẽebã. Woto yĩnga, segdame tɩ d feesd d meng n get d tẽebã sã n ket n tara pãnga. Wala makre, d tõe n feesa d meng n ges d sã n sɩd tũuda a Zeezi goam nins sẽn be Matye 6:33 wã. D sok d meng woto: ‘Rẽ yĩnga bũmb nins sẽn pak maam n yɩɩdã, la m yam-yãkr toor-toorã wilgdame tɩ m kɩsa sɩd ne a Zeezi sẽn yeelã bɩ? Mam na n sak n vaala tigissã bɩ koɛɛgã moonego, sẽn na yɩl n tʋm n paam ligd n paas bɩ? Sã n wa mik tɩ mam tʋʋmdã rɩkda m sẽkã zãng la kõt-m yaams wʋsgo, m maanda wãna? Mam na n lʋɩɩsa m tʋʋmdã taoor wa dũniyã nebã, tɩ rẽ yaool n tõe n kɩt tɩ m bas a Zeova tũub bɩ?’ Ned sã n pa tũud sagls nins Biiblã sẽn kõt tũud-n-taarã la reemã yãkr wɛɛngẽ wã, pa rẽ bɩ pemsmã kokr wɛɛngẽ, wall a pa lakd a meng ne neb nins b sẽn yiis tigingã pʋgẽ wã, rẽ me tõe n kɩtame t’a sũurã riglme. Bɩ ned kam fãa sok a meng woto: ‘Mam tũuda sagl-kãens ne m sũur fãa bɩ?’ D sã n mik tɩ d pa le tũud-b wa pĩndã, segdame tɩ d fees d meng tao-tao n ges d tẽebã sã n pa booge. Dẽnd segdame tɩ d mi n fees d meng ne pʋ-peelem, n bas tɩ Wẽnnaam Gomdã rems d tagsa wã. w16.06 2:8, 9

Dũniyã gill zugu, siglg a ye n be t’a nin-buiidã fãa yaa neb sẽn nong a Zeova, n dat ne b sũy fãa n maan a raabã. Yaa a Zeova Kaset rãmbã. Baa b sẽn yaa pãn-komsem dãmb n mi n kongdẽ wã, a Zeova wilgd-b-la sor ne a vʋʋsem sõngã maasem. Yʋʋmd 1914 soabã t’a Zeova nin-buiidã sõor pa waoog ye. La a Zeova ninga b koe-moonegã barka. Woto kɩtame tɩ neb milyõ-rãmb zãms Biiblã n bãng sɩdã, n lebg a Zeova Kaset rãmba. A Zeova togsa rũndã daar vɛrse wã goamã, n bilg a nin-buiidã sẽn da na n fɩɩg to-to wã. A paasame: “Maam a Sẽn-Ka-Saab na n kɩtame t’a wakatã sã n ta bɩ yɩ tao-tao.” Bãngr-gom-kãngã pidsda rũndã-rũndã. A Zeova nin-buiidã fɩɩgame n lebg “buud sẽn tar pãnga.” Sɩd me, tẽns wʋsg n be tɩ b nin-buiidã sõor pa ta a Zeova Kaset rãmbã ye. w16.06 4:1, 2

A Zeezi ra kɩsa sɩd t’a Ba wã sẽn get liuuli wã yellã, a na n gesa ãdem-biisã me yelle. (1 Pɩy. 5:6, 7) Tõnd me segd n baoa d noorã rɩɩb wa liuuli wã, n da maan kʋɩɩng ye. D segd n koome wall d tʋm n bao ligd n tõog n paam rɩɩbo. La a Zeova na n ninga d modgrã barka, tɩ d paam d sẽn datã. Rɩɩb wall ligd sã n wa paoog-do, a na n kell n gesame tɩ d paame. Wala makre, a tõe n kɩtame tɩ neb sõng-do. A Zeova maaname tɩ liuuli wã tõe n paam gãag zĩiga. A kõ-b-la yam tɩ b tõe n maan tʋgdo. A naana bũmb nins liuuli wã sẽn tar n maand tʋgdã me. Rẽnd a tõe n sõnga tõnd ne d zakã rãmb me tɩ d paam gãag zĩiga. Yaa vẽeneg t’a Zeezi sẽn wa n yet rũndã daar vɛrse wã pʋgẽ goamã, a ra tagsda yẽ sẽn na n sak n ki ãdem-biisã yĩngã. (Ges-y Luk 12:6, 7.) Kiristã sẽn ki tɩ yɩ maoongã pa liuuli wã yĩng ye. Yaa tõnd yĩnga, sẽn na yɩl tɩ d wa paam n vɩɩmd wakat sẽn kõn sa.—Mat. 20:28. w16.07 1:11-13

Bõe yĩng tɩ ninsaalbã yaa yel-wẽn-maandb la kiidba? Ad Biiblã sẽn yete: “Nin-yend yel-wẽnd waa ne kũum dũni pʋgẽ, la kũum lebga naaba, nin-kãng manesem yĩnga.” (Rom. 5:17, Sebr Sõngo) Rẽnd yaa tõnd sẽn yaa a Ãdem yagensã yĩng la d sẽn yaa yel-wẽn-maandb la kiidbã. (Rom. 5:20, 21) Baasgo, d ket n yaa yel-wẽn-maandba. La d segd n maoome tɩ yel-wẽnã ra soog-d ye. D sã n maan bũmb sẽn pa segde, d kota a Zeova sugri. Dẽnd lebga Wẽnnaam barkã n so tõndo. Rẽ yõod yaa bõe? A Poll yeelame tɩ Wẽnnaam barkã “zãmsda tõnd tɩ d bas wẽn-kɩɩsgo la dũniyã ratem wẽnsã la d vɩɩmd zamaan kãnga pʋgẽ ne gũus-m-menga la tɩrlem la d sak Wẽnnaam.”—Tit 2:11, 12. w16.07 3:5, 6

A Ãdem ne a Awa sẽn kɩɩs a Zeova wã kɩtame tɩ b paam zu-loees b kãadmã pʋgẽ. A Sʋɩtãan b sẽn boond tɩ “wag-kʋdrã” belga a Awa t’a tẽ t’a sã n dɩ sõma la wẽng bãngr tɩɩgã biisi, a yamã na n wekame n yɩɩd pĩnda. A yeela a Awa t’a sã n dɩ, a na n tõog n bãnga wẽng la sõma n bak a toore. A Awa yãka tɩɩgã bil n dɩ n pa reng n sok a sɩdã ye. A sẽn maan woto wã, a pa waoog a Ãdem sẽn yaa zakã soabã ye. A Ãdem me sẽn dɩ tɩɩgã bil a pagã sẽn kõ-a wã, a saka a pagã raabo, n kɩɩs Wẽnnaam. (Vẽn. 12:9; Sɩng. 2:9, 16, 17; 3:1-6) Wẽnnaam sẽn wa n sok-bã, a Ãdem dɩka yellã n dogl a pagã. A Awa me yeelame tɩ yaa waafã yelle, tɩ bala yaa waafã n belg yẽ. (Sɩng. 3:12, 13) A Ãdem ne a Awa fãa baoo pademse, la a Zeova nifẽ, ra yaa kɩɩsdba. Woto yaa keoogr n kõ tõndo! Pag ne a sɩd sã n dat tɩ b kãadmã yãk nenga, b ned kam fãa tog n sakda a Zeova, t’a sã n wa kong me bɩ a sak n deege. w16.08 1:1, 4, 5

Bõe n kɩt tɩ kẽer tar zu-loe-kɛgems b kãadmã pʋgẽ? Sãnda maga b kãadmã sẽn na n yɩ noog to-to wã tɩ loog nugu, n wa mik pa woto ye. Rẽ mi n waa ne sũ-sãamse, tɩ lebg sũ-toogo. Pag ne a sɩd tõe n wa tara zu-loees ne b reem-dãmbã, b kambã wubr wɛɛngẽ, wall ligdã zãab poorẽ. Sẽn paase, b ned kam fãa manesem sẽn pa yembr yell buud fãa taoore, tɩ b wubrã me pa yembrã, mi n waa ne zu-loeese. La kiris-neb nins sẽn kẽ kãadmã fãa la bal baooda Wẽnnaam sõngr n tõogd n welgd b zu-loeesã, hal tɩ d pẽgd-b rẽ yĩnga. Kiris-neb sã n wa tar zu-loe-kɛgems a woto, b segd n baoo kãsem-dãmbã sõngre. Nin-kãensã tara minim wʋsgo, n tõe n sõng-b tɩ b tũ Biiblã saglse. Sẽn paase, sẽn kẽ-b kãadmã sã n pʋʋs a Zeova n kõs a vʋʋsem sõngã, na n sõng-b lame tɩ b tũ Biiblã saglse, la b tõog n bɩɩs zʋg-sõma nins vʋʋsem sõngã sẽn sõngd ned t’a bɩɩsã.—Gal. 5:22, 23. w16.08 2:11-13

A Zeezi tʋʋmã ra waoogame. La neb sã n da wʋm koɛɛgã n dat n bãng n paase, a baooda sẽk n sõs ne-ba, n zãms-b bũmb wʋsgo. Wala makre, daar a ye, kʋʋng n tigim mogrã noor n na n kelg-a. A kẽe a Pɩyɛɛr koglgã pʋgẽ, n kos-a t’a zãag bilf ne mogrã noor t’a sõs ne nebã. Sõsgã poore, a maana yel-solemd n na n sõng a Pɩyɛɛr t’a bãng tɩ yẽ ratame t’a yɩ a karen-biiga. A kɩtame t’a paam zĩm wʋsgo. Rẽ poore, a yeel-a-la goam nins sẽn yaa rũndã daar vɛrse wã. Zĩig pʋgẽ, a Pɩyɛɛr ne a tʋmd-n-taasã basa fãa la b tũ a Zeezi.” (Luk 5:1-11) A Nikodɛm wʋma koɛɛgã a Zeezi sẽn moondã tɩ yɩ-a noogo, t’a tʋll n bãng n paase. La a sẽn da yaa Sãnedrẽ wã nedã, a ra yɛɛsda nebã na n wa yã a sẽn sõsd ne a Zeezi. A kẽnga a Zeezi nengẽ ne yʋngo. La a Zeezi pa tõdg t’a kõn sõs ne-a ye. A pʋd n dɩka sẽk n wilg-a bũmb sẽn tar yõod wʋsgo. (Zã 3:1, 2) A Zeezi ra baooda sẽk n wilgd nebã Wẽnnaam daabã, la a kengd b tẽebã. Tõnd me segd n tɩ kaaga nebã wakat sẽn zems ne-ba, la d rɩk sẽk n sõng-b tɩ b wʋm Biiblã goam võore. w16.08 4:10, 11

D sak n deega ne sik-m-meng tɩ tõnd Wẽnnaam a Zeova yaa sõng la yɩlemde, la t’a saglsã sõmblem ka to ye. Woto kɩtame tɩ d sakd n tũud Biiblã sagls bũmb fãa pʋgẽ. Sik-m-mengã na n kɩtame me tɩ d sã n na n maneg d meng bɩ d gũus n da wa sãam d taabã sũuri, la d tẽeg tɩ bãmb me tara b sẽn nonge. Tõnd fu-yerdɩ wã pa segd n kɩt tɩ b wa sãmbd tõnd sã n sɩd yaa a Zeova Kaset soab ye. D ned kam fãa segd n modgame tɩ d tẽed-n-taasã la nebã fãa ne vẽeneg tɩ d yaa a Zeova tʋm-tʋmda. A kõo tõnd noy sõmblem sẽn ka to, tɩ d maood n tũudẽ. D pẽgda d saam-biisã la d saam-bi-pogsã sẽn zãad b mens sõma, la b manegd b mens sõma wã. Woto kɩtame tɩ sẽn baood-b Wẽnnaamã sakd n kelgd Biiblã koɛɛg sẽn fãagd yõyã, t’a Zeova paamd waoogr la sũ-noogo. w16.09 3:18-20

A Zakoob sẽn da rat barkã ne a sũur fãa wã, a pẽdgame, n sak n maan a sẽn tõe fãa! (Sɩng. 32:25-27) A sẽn pẽdg woto wã, a Zeova ning-a-la barka, n pʋd a yʋʋr t’a Israyɛlle, sẽn dat n yeel tɩ sẽn “mao-a ne Wẽnnaam.” Yaa keoor ning a Zakoob sẽn paamã buud la tõnd me sẽn baoodã. D ratame n ta Wẽnnaam yam, la d paam a barka. A Zakoob pʋg-nongr a Rasɛll me ra rata ne a sũur fãa n yã a Zeova sẽn na n maan to-to n pids a sẽn yeel t’a na n kɩtame t’a sɩdã yageng paam barkã. La a ra pa tar dogem ye. Bãmb wakatẽ wã, pag sã n da pa tõe n dog biiga, nebã geta rẽ wa yel-beedo. Bõe n sõng a Rasɛll t’a tõog n mao ne zu-loe-kãngã sẽn komsd raoodo, t’a yaool n da pa tar a tɩɩmã? A kell n tẽeme t’a yellã na n manegame. A wɩnga ne a Zeova pʋʋsgo. La a Zeova sɩd wa n deega a pʋʋsgã, t’a tõog n dog kamba. A wa n yeela ne sũ-noog yaa: “Mam zaba . . . Wẽnnaam zabre, la m paama tõogre.”—Sɩng. 30:8. w16.09 2:6, 7

Tara yõod wʋsg tɩ y sõng y kambã tɩ b bãng tɩ yaa b sã n tũud Biiblã saglsã la b vɩɩmã yɩt noogo. (Yɩɩn. 1:1-3) Wala makre, y tõe n yeela y kambã tɩ b mams wa b sẽn na n segd n tɩ vɩɩmd koom sʋk tẽngẽ, n segd n yãk neb sẽn na n tɩ naag-b n vɩɩmd be. Sok-y-b woto: “Y sã n dat tɩ y fãa zemsd taaba, tɩ y zĩid-n-taarã yɩ noogo, nin-bʋs buud la y na n yãke?” Rẽ poor bɩ y karem Galat-rãmb 5:19-23 sẽn wilgd neb nins buud a Zeova sẽn dat tɩ b vɩɩmd dũni-paalgã pʋgẽ wã. Y sã n maand woto, y tõogd n sõnga y kambã tɩ b bãng bũmb a yiib sẽn tar yõod wʋsgo. Pipi, b na n bãngame t’a Zeova noyã sõngda tõnd tɩ d vɩɩmã tall barka, la d paam tɩ tõnd ne d taabã zĩid-n-taarã noome. Yiibu, b na n bãngame t’a Zeova saglsã sõngda tõnd tɩ d segend d mens n na n wa vɩɩmd dũni-paalgã pʋgẽ. (Eza. 54:13; Zã 17:3) Y tõeeme me n bao kibay siglgã sɛb pʋsẽ, n wilg-b Biiblã saglsã sẽn maneg d tẽed-n-taas vɩɩm to-to. Kibay a woto buud bee Gũusg Gasgã sõsg ning gom-zug sẽn yaa “Biiblã toeemda neba” pʋgẽ. w16.09 5:13, 14

D tʋʋmã tõe n dɩkda sẽk wʋsgo, la togame tɩ d yãt sẽk me n zãmsd Biiblã d yembr la ne d zakã rãmba. (Efɛ. 5:15) D raabã pa d we n tõog n karem d sɛbã wʋsgo, bɩ n tõog n leokd sõma tigissã sasa ye. D sẽn dat yaa d tõog tɩ Wẽnnaam goamã kẽ d sũurã sõma, tɩ d tẽebã tall pãnga. D sã n wa zãmsd Biiblã, yɩta sõma tɩ d tags n ges bũmb ning d sẽn zãmsdã sẽn tõe n naf tõnd mengã to-to, la d ra bas n tagsd bõn-kãens sẽn na n naf d taabã to-to wã bal ye. (Fili. 1:9, 10) Naoor wʋsgo, d sã n segend bũmb d sẽn na n yeel koe-moonegã sasa, pa rẽ bɩ tigissã sasa, wall d sẽn na n togs sõsg d sẽn na n wɛgs pʋgẽ, yaa d kɛlgdbã yell la d tagsd n yɩɩda. D rɩk makr ne ned sẽn segend rɩɩb n koosdẽ. Yaa sɩd t’a na n mi n lembame. La rẽ yĩnga, a tõe n teega lembgã n vɩɩmd sɩda? A sã n dat n kell n tall keelem, rẽnda yẽ mengã rɩt sõma. Woto wilgdame tɩ tõnd me sã n dat tɩ d tẽebã tall pãnga, yaa tɩlɛ tɩ d zãmsd Biiblã tɩ kẽed-d sõma. w16.10 2:10, 11

Ebre-rãmb 11:1 wã pʋgẽ, Biiblã bilgda tẽeb sẽn yaa bũmb ningã. B wilga be tɩ tẽebã yaa buk a yiibu: 1) Yaa ‘pɛl-kɛgeng ned sẽn tar ne bũmb nins a sẽn tẽed t’a na n paamame’ wã. Wala makre, d tẽeda Wẽnnaam sẽn pʋlem t’a na n wa kɩtame tɩ wẽnem buud fãa sa, la a kɩt tɩ tẽngã lebg arzãnã, n bas yard tɩ na n sɩd pidsame. 2) Tẽeb yaa “bũmb nins ned sẽn ka ne wã wilgri.” Rat n yeel tɩ bũmb f sẽn pa tõe n yã, n yaool n kɩs sɩd t’a beeme, hal n tõe n wilg ned rẽ. Wala makre, d pa ne Wẽnnaam a Zeova, a Zeezi Kiristi, a Rĩungã la malɛgsã sẽn be saasẽ wã, la d kɩsa sɩd tɩ b beeme. Bõe la d tõe n maan n wilg tɩ d sɩd tẽeda a Zeova pʋlemsã, la bũmb a taab d ninã sẽn pa ne? D tõe n wilga rẽ ne d no-goamã, d tʋʋm-tʋmdɩ wã, la d sẽn vɩ to-to wã. w16.10 4:6

A Zeova ne a Zeezi nanda bũmb nins tõnd ned kam fãa sẽn maand n teend Rĩungã tʋʋmã, baa a yɛlã sã n kɩt t’a sẽn maandã pa wʋsgo. (Luk 21:1-4; 2 Kor. 8:12) Wala makre, d tẽed-n-taas nins sẽn kʋʋlã modgda wʋsg n kẽnd tigissã la b yit koɛɛgã moonego. Rẽ yĩnga y kengda b raood la y pẽgd-b bɩ? Y sã n paam segb fãa, bɩ y keng y taabã raoodo. Ned sã n maan bũmb sẽn tog ne pẽgre, bɩ y pẽg-a. Ad makr sẽn wilgd rẽ. A Poll ne a Barnabas sẽn wa n be Ãntiyoos sẽn be Pisidi soolmẽ wã, karen-doogã taoor dãmb yeel-b-la woto: “Ba-biisi, yãmb sã n tara koɛɛg n na n gom ne nebã n paas-b raoodo, yãmb tõe n gomame moasã.” A Poll tũnuga ne segb kãng n keng nebã raoodo. (Tʋʋ. 13:13-16, 42-44) D sã n paam segb n tõe n gom n keng ned raoodo, bɩ d ra sĩnd ye. D sã n minim n kengd d taabã raoodo, bãmb me na n kengda tõnd raoodo.—Luk 6:38. w16.11 1:3, 15, 16

Tõnd sẽn paam n naag n yaa a Zeova nin-buiidu, n mi a raabã yaa zu-zẽkre! La kɩtame tɩ yaa tɩlɛ ne-d tɩ d sak a raabã, n maan sẽn yaa tɩrga. Dũniyã sẽn lebgd wẽng n paasdẽ, t’a nebã nong sẽn pa sõma wã, tõnd segd n modgame n ‘kisg wẽnga.’ (Yɩɩn. 97:10) D pa rat n yɩ wa neb nins sẽn “boond wẽng tɩ sõama la b boond sõama tɩ wẽngã” ye. (Eza. 5:20) Tõnd sẽn dat t’a Zeova sũur noom ne-dã, d maanda d sẽn tõe fãa n yaa yɩlem tũudmã wɛɛngẽ, la d tagsa wã ne d yĩngã pʋgẽ me. (1 Kor. 6:9-11) Tõnd nonga a Zeova, n kɩs-a sɩda. Rẽ n so tɩ d maand sɩd ne-a, n tũud noy nins fãa a sẽn kõ a Gomdã pʋgẽ wã. Yaa d zagsẽ, d tʋʋm zĩisẽ, d lekoll dãmbẽ, tigingã pʋg wall zĩig a to, d tũuda Biiblã noyã. w16.11 3:13

Dũni gill pipi zabrã sasa, Biiblã Zãmsdbã ra pa wʋmd a Zeova sẽn yeel tɩ d sak goosneema-rãmbã võor sõma ye. Rẽ n kɩt tɩ pa b fãa n tõog n kell n pa kẽes b toog zabrã pʋgẽ wã. Sɩd me, yʋʋmd 1918 wã, Etazĩni tẽngã perzidã sẽn wa n moon tɩ sig-noy rasem 30 wã na n yɩɩ raar sẽn welg toore, la tɩ b pʋʋs baraar n kos tɩ laafɩ zĩndã, Gũusg Gasgã pʋgẽ, b yeela d tẽed-n-taasã tɩ bãmb me naag n pʋʋse. D tẽed-n-taas kẽer me kõo ligd n teel zabrã, tɩ sãnda meng sak n kẽng zabrã. La baa ne bũmb kẽer sẽn da segd ne remsg wakat kãngã, d sã n yeel tɩ yaa rẽ n kɩt t’a Zeova bas tɩ b kẽ Babilon-kãsengã yembdẽ, pa zems ye. Sɩd-sɩdã, wakat kãng meng tɩ b ra zoe n yii Babilon-kãsengã yembdẽ la bala.—Luk 12:47, 48. w16.11 5:9

Bõe yĩng t’a Poll keoog kiris-neb sẽn paam vʋʋsem sõng zaeeb tɩ b gũus n da wa “vɩ wa yĩngã sẽn datã”? Rẽ yĩnga, yel-kãngã buud tõe n paama rũndã-rũndã kiris-nebã sẽn yaa nin-tɩrs Wẽnnaam nifẽ, t’a boond-b t’a zo-rãmbã bɩ? Bʋko, kiris-ned buud fãa tõe n wa basame tɩ lebg a mengã raabã n pak-a n yɩɩda. Wala makre, a Poll yeelame tɩ Rom kiris-neb kẽer n da tʋmd “b mens pʋs yĩnga.” Tõe n yaa rɩɩbã la rãamã, bɩ b yĩngã ratem a taaba, wala pag ne rao lageng tʋlsmã la b ra bas tɩ pak-b n yɩɩda. (Rom. 16:17, 18; Fili. 3:18, 19; Zʋʋd 4, 8, 12) D tẽeg tɩ Korẽnt tigingã pʋgẽ, ned a ye n da ‘tar a ba paga.’ (1 Kor. 5:1) Dẽnd Wẽnnaam sẽn kɩt t’a Poll keoog kiris-nebã tɩ b gũus n da wa “vɩ wa yĩngã sẽn datã,” yaa bũmb sẽn zemse. (Rom. 8:5, 6) Rũndã-rũndã kiris-nebã me segd n gũusame n da wa “vɩ wa yĩngã sẽn datã” ye. w16.12 2:5, 8, 9

Bũmb sẽn tõe n boog yɩɩre, yaa y sẽn na n bao ned y sẽn kɩs sɩda, n togs-a sẽn be y sũurẽ wã fãa. Tõe n yɩɩ y pag wall y sɩda, y zoa hakɩɩka, pa rẽ bɩ tigingã kãsem-soaba. Ned a woto tõe n sõng-y lame tɩ y maneg n tags yellã zug neere, n bãng a vɩʋʋg sõma. Biiblã yetame tɩ “yẽsg sã n kae, saagr ka paamd pidsg ye, la sagendb sã n yaa wʋsgo, tõogr beeme.” (Yel. 15:22) Tigissã a Zeova sẽn kɩt tɩ d paamd semen fãa wã me sõngda ned t’a yɩɩr booge. D tigimda ne d tẽed-n-taas sẽn dat d neere, la sẽn dat n keng b taabã raoodo. (Ebre. 10:24, 25) D sẽn ‘naagd taab n paamd raood paoosg’ woto wã kengda pɛlga, la kɩtdẽ tɩ d tõe n mao ne yell buud fãa, n da maan yɩɩr tɩ loog ye.—Rom. 1:12. w16.12 3:17, 18

Bãag bɩ bũmb a to sã n wa namsd-d tɩ d pa tar a tɩɩm, d basda d yɩɩrã fãa ne a Zeova, n kɩs sɩd t’a geta d yelle. (1 Pɩy. 5:6, 7) La d maooda wa d sẽn tõe fãa n ket n kẽnd tigissã, la d maand bũmb nins sẽn na n sõng tɩ d tẽebã tall pãngã. (Ebre. 10:24, 25) La y sã n tar biig sẽn bas a Zeova tũubu? A Sãmwɛll da pa tõe n modg a kom-dibli wã sẽn lebg kãsembã tɩ b tũ a Zeova noyã a sẽn wilg-bã ye. (1 Sãm. 8:1-3) Ra yaa tɩlɛ t’a bas yellã a Zeova nugẽ. A sẽn da tõe n maan yaa a kell n wɩng ne a saasẽ Ba a Zeova tũubu, n paam t’a sũur ket n noom ne-a. (Yel. 27:11) Rũndã-rũndã, roagdb wʋsg sẽn yaa kiris-neb bee yell a woto buud pʋgẽ. B kɩsa sɩd t’a Zeova raab yaa sẽn bas-b yẽ wã tek yam n lebg n wa, t’a reeg-ba. (Luk 15:20) Roagdb nins sẽn tar zu-loe-kãngã wã sẽn tõe n maan yaa b ket n wɩngd ne a Zeova sakre, n saagdẽ tɩ b mak-sõngã na n sõnga b kambã tɩ b lebg n wa a Zeova nengẽ. w17.01 1:15, 16

Sik-m-meng soab miime t’a pa tar sor n tõe n maan bũmb fãa, la t’a pãngã tara koaka. A tẽegdame t’a kongdame. A sã n sɩd kong me, a sakd n deega a kongrã. Sik-m-meng soab sakd n kelgda neb a taabã me tagsgo, n dɩkd yam b nengẽ. A Zeova nonga sik-m-mens rãmbã wʋsgo. Biiblã wilgdame tɩ sik-m-meng soab mii a meng sõma, a sak n deegame t’a bãngrã, a minimã ne a sẽn tõe n maanã tara koaka, la tɩ bũmb kẽer me la a pa tar sor n na n maane. A manesmã ne a taabã la a no-goamã wilgda rẽ vẽenega. Ned tõe n wa tara tagsa wall manesem sẽn wilgd t’a yaa wuk-m-meng soaba, n ka miẽ meng ye. Wala makre, a tõe n wa tagsdame t’a yɩɩda a taaba, a meng wall a zakã ned bɩ a zoa sẽn tar tʋʋm kẽer tũudmã pʋgẽ yĩnga. (Rom. 12:16) Nina tõeeme me n wa yik n maand bũmb kẽere, a sẽn dat tɩ nebã ges-a wall b pẽg-a yĩnga. (1 Tɩm. 2:9, 10) D pʋd n tõeeme meng n wa rat n wilgd d taabã sẽn segd la sẽn pa segde, d sẽn tagsd tɩ d yam, d bãngre, wall d yʋʋm yɩɩd-b lame yĩnga.—1 Kor. 4:6. w17.01 3:6-8

Yʋʋmã noorã, a Zeova Kaset rãmbã tʋʋmdã pãng tara paasgo, tɩ d tʋmd ne tʋʋm-te-paal wʋsg masã sẽn na yɩl tɩ koe-noogã ta zĩig zãnga. La wakat ninga, yaa toog ne d tẽed-n-taas kẽer sẽn kʋʋl tɩ b zãms tʋʋm-te-paalã tall-n-tʋme. (Luk 5:39) Baa pa rẽ me, b keelmã la b pãngã pa wa saam-biis nins yʋʋm sẽn pa ta bãmbã ye. Woto yĩnga, saam-biis nins yʋʋm sẽn vẽsgã sã n zãmsd sẽn pa ta-b bãmbã tigingã tʋʋmã, yaa bũmb sẽn zemse, la wilgdẽ tɩ b rata tigingã neere. (Yɩɩn. 71:18) Pa wakat fãa la yaa nana ne saam-biis nins sẽn get tigingã yellã tɩ b boog b tʋʋmã n kõ b tẽed-n-taas yʋʋm sẽn pa ta bãmb ye. Kẽer yɛɛsda b na n wa reeg tʋʋmd b sẽn nong wʋsgo, pa rẽ bɩ tɩ sẽn pa ta-b bãmbã pa na n tõog tʋʋmdã ye. Sãnda me yetame tɩ b pa tar sẽk n na n zãms ned a to tʋʋmdã ye. La saam-biis nins me yʋʋm sẽn nan zemsã segd n maana sũ-mare, sã n wõnd kaoosdame tɩ b pa kõt-b tʋʋm a taaba. w17.01 5:3, 4

A Zeezi yɩɩ ned sẽn zems zãnga, wa d yaab a Ãdem. (Zã 1:14) La a Zeezi pa yɩ kɩɩsd wa a Ãdem ye. A kell n saka a Zeova noyã kɛpɩ, wa a Zeova sẽn dat tɩ ned sẽn zems zãng maan to-to wã. A paama makr sẽn loog nugu, la ne rẽ fãa, a pa kɩɩs baa Wẽnnaam noor a yembr ye. A Zeezi sẽn da yaa ned sẽn zems zãngã, a kii ãdem-biisã yĩnga, tɩ b tõe n paam b mens ne yel-wẽnã la kũumã. A Zeezi yɩɩ wa a Ãdem sẽn da segd n yɩ to-to wã: A yɩɩ ned sẽn zems zãnga, la sẽn sak Wẽnnaam wakat fãa. (1 Tɩm. 2:6) A kii tõnd yĩnga, tɩ rẽ kɩt tɩ rapa, pagb la kamb tõe n wa paam n vɩɩmd wakat sẽn kõn sa. (Mat. 20:28) Yaa a Zeezi maoongã yĩng la Wẽnnaam daabã na n pidsi.—2 Kor. 1:19, 20. w17.02 1:15, 16

Mams-y wa y sẽn togd sor ne nao, n segd n pasg we-raoogo. Y taa weoogã sʋka, tɩ rabeem tar-yã. Y yɛɛsda we-rũms wall bi-bees na wa n yek-y-yã. Tõe tɩ y wa n sokda y meng y sã n na n ta y sẽn datẽ wã. D tõe n dɩka d vɩɩmã n mak ne so-toak a woto. Wakat ninga, y tõe n sega zu-loe-kɛgemse, tɩ zu-loees sãnda kẽesd-y rabeem. Tõe t’a buud paama a Zeezi menga. B sẽn wa n ka-a kũum da-lukã zugã, a ra namsda wʋsgo, tɩ nebã yaand-a me. Yaa vẽeneg tɩ bũmb pa nams-a tẽngã zug n ta rẽ ye. (Ebre. 12:3) La a Zeezi tõoga toogo. A Zeezi ra mi a sũ-marã sẽn na n wa ne bũmb ninsã, n da tagsd rẽ yelle. Sẽn yɩɩd fãa, a ra miime t’a sã n tõog toogo, na n sõngame tɩ Wẽnnaam yʋʋrã paam waoogre, la wilg t’a Zeova bal n tar sor n na n yɩ yĩngr la tẽng naaba. A Zeezi ra miime t’a namsgã na n talla tɛka, la tɩ keoor ning a sẽn na n paam saasẽ wã na n paa wakat sẽn kõn sa. Rũndã-rũndã me, d zu-loeesã tõe n yɩɩ kãn-kae wʋsgo. La ra yĩm-y tɩ na n wa saame ye. Y sã n tõog toogo, y na n wa paama vɩɩm sẽn ka sɛtã. w16.04 2:10

Rũndã-rũndã, nebã maanda b yam. Kɩtame tɩ wʋsg sã n maan yel-wẽnd bɩ b pa tagsd tɩ b beega Wẽnnaam ye. B pa mi yel-wẽnd sẽn dat n yɛɛlga, a sẽn maand ned bũmb ninga, la b sẽn segd n maan a soab n paam tɩ yel-wẽnã ra le soog-b ye. Sẽn yaa-b sũ-tɩrs rãmbã sã n bãng yel-wẽnd sẽn dat n yɛɛlgã, la b bãng t’a Zeova tʋma a Biigã t’a wa ki sẽn na yɩl tɩ d paam d mens ne yel-wẽndã la kũumã, b sũy nooma wʋsgo. Yaa a Zeova barkã sẽn ka to wã, n paas a sẽn nong tõnd wʋsgã la a sẽn kɩt t’a Biigã wa ki tõnd yĩngã. (1 Zã 4:9, 10) A Zeezi sẽn ki tɩ yɩ maoong ãdem-biisã yĩngã sɩd yaa Wẽnnaam nonglmã kaset sẽn ka to, la wilgdẽ me t’a barkã ka saab ye. Ad d sɩd paam yolsg tɛkẽ! Bala, d miime tɩ d sã n wilg tɩ d kɩsa sɩd t’a Zeezi kũumã yaa maoong sẽn fãagd tõndo, Wẽnnaam sakd n kõo tõnd d yel-wẽnã sugr tɩ d sũurã pa le ningd-d taal ye. (Ebre. 9:14) Yaa koe-noog d sẽn segd n taas nebã me. w16.07 4:6, 7

D sẽn tẽed a Zeezi maoongã, bɩ d bas d yam t’a “yẽesa” d yel-wẽnã. A basa d yel-wẽnã taale. (Tʋʋ. 3:19-21) A Zeezi maoongã yĩnga, a Zeova yãka neb kẽer tɩ b lebg a kamba, n na n tɩ vɩɩmd saasẽ. Yaa kiris-neb nins sẽn paam vʋʋsem sõngã zaeebã. (Rom. 8:15-17) Sã n yaa ne kiris-neb nins a Zeezi sẽn boond t’a ‘piis a taabã,’ a Zeova sakame tɩ b yaa yẽ nin-buiidu, n na n vɩɩmd tẽngã zugu. A na n sõng-b lame tɩ b lebg neb sẽn zems zãnga. Rẽ poore, b na n paama b yaoolem makre. B sã n kell n sak a Zeova, bãmb me na n lebga a kamba. (Rom. 8:20, 21; Vẽn. 20:7-9) A Zeova na n nonga a kambã fãa. A Zeezi maoongã nafa na n kaoosa wakat sẽn kõn sa. Hakɩɩka, a Zeezi maoongã sɩd yaa Wẽnnaam kũun sẽn ka to. Bõn-naandg baa a ye pa tõe n deeg-a n bas-d ye. Ned sã n tek yam n bas a yel-wẽnã, bũmb kae a Sʋɩtãan sẽn tõe n maan n gɩdg-a t’a pa lebg a Zeova rẽnd ye. w17.02 2:15, 16

A Zeova sẽn wa n sõngd tõnd ned kam fãa sẽn na yɩl t’a paam n lebg a zoa wã, a ra mii pãn-komsem nins sẽn na n nams tõnd n yɩɩdã. A ra miime me tɩ wakat ninga, d na n tudgame. La baa ne rẽ, a sakame tɩ d lebg a zoa. Wẽnnaam sẽn nong tõnd wʋsgã, a maana bõn-kãseng tõnd yĩnga. A kɩtame t’a Biigã wa ki tɩ yɩ maoong n dol tõnd yel-wẽnã. (Zã 3:16) D sã n maan yel-wẽnde, d tõe n kosa a Zeova sugri, la d bas d yam t’a na n tika a Zeezi maoongã, n kõ-d sugr tɩ d kell n yɩ a zoa.—1 Tɩm. 1:15. w16.05 4:6, 7