Tʋʋlgo

D sã n karem baa yaa Sɩngr sebrã pipi sags a yiibã bala, d bãngdame t’a Ãdem ne a Awa ra tara lohorem ning tõnd sẽn baood rũndã-rũndã n pa tõe n paamã. B ra tara b sẽn datã fãa. B ra pa maand rabeem, ned ra pa maand a to kɛgr me ye. B ra pa maand yɩɩr rɩɩb poorẽ, tʋʋm yĩnga, wall n yɛɛsd bãag bɩ kũum ye. (Sɩng. 1:27-29; 2:8, 9, 15) La segdame tɩ d tẽegd wakat fãa tɩ yaa a Zeova a ye tãa bal n tõe n maan a raab bũmb fãa pʋgẽ. Bõe yĩnga? Bala, yẽ n naan bũmb fãa, n leb n yaa yĩngr la tẽng Naaba. (1 Tɩm. 1:17; Vẽn. 4:11) La yĩngr la tẽng bõn-vɩɩlɩ wã fãa sẽn tar lohorem ningã tara koaka. A Zeova ratame tɩ tõnd sak n deeg tɩ yaa yẽ bal n tar sor n na n wilg noy sã n zemsame, pa rẽ bɩ sã n wẽgda nin-buiidã, wall yaa noy faado, bɩ sã n looga nugu. Sɩd me, hal sɩngrẽ wã, a sẽn maan to-to ne d yaab a Ãdem ne a Awa wã wilgdame tɩ woto la a rata. w18.04 4 s. a 4, 6

D miime tɩ dũni-kãngã pʋgẽ vɩɩmã lebga toog wʋsgo. Yaa ne a Zeova sõngr bal la tõnd sẽn tõogd toogã. (2 Kor. 4:7, 8) La d tags n ges neb nins sẽn pa tar zood ne a Zeova, n tẽbd b yembr ne zu-loeesã. Wa a Zeezi, d kʋmd-b lame, n dat n taas-b “koe-noogã” sẽn wilgd tɩ manegr n watã. Woto yĩnga, d tall sũ-mar ne neb nins d sẽn zãmsd Biiblã. D tẽeg tɩ tõnd sã n mii Biiblã sẽn yetã sõma me, tõe tɩ bãmb ra zɩ n tags bũmb nins d sẽn dat n wilg-bã yell ye. Wʋsg me nonga bũmb nins b sẽn zoe n tẽedã ne b sũur fãa. Tõe tɩ b getame tɩ b tũudmã kɩtame tɩ bãmb ne b zakã rãmb la b buudã, pa rẽ bɩ b sakã neb yaa bũmb a yembre. Tõnd sã n dat n sõng nebã tɩ b bas bũmb nins b sẽn da sɩng n tẽed la b nongẽ wã, mi n yaa tɩlɛ tɩ d reng n sõng-b tɩ b wʋm “bõn-paalã” d sẽn zãmsd-bã võor sõma, hal n wa nong rẽ. Rẽ tɛk la b na n sak n bas b sẽn da tẽedã. Yɩl n paam tɩ ned sak n toeem woto wã tõe n kaoosa bilfu.—Rom. 12:2. w19.03 23 s. 10; 24 s. 13

A Zeova sẽn yeel a Zeezi woto n na n wilg t’a nong-a lame, la t’a sũur yaa noog ne-a wã, tẽegda tõnd tɩ yɩta sõma tɩ d gũusdẽ tɩ d sã n paam segb fãa bɩ d keng d taabã raoodo. (Zã 5:20) Ned d sẽn nand wʋsg sã n maan bũmb sẽn wilgd t’a nonga tõndo, la a pẽg tõnd d tʋʋm-sõma yĩnga, noogda d sũur la paasd d pãnga. Woto me, d tẽed-n-taasã la d zakã neb ratame tɩ d mi n wilg-b tɩ d nong-b lame, la d keng b raoodo. D sã n pẽgd d taabã, paasda b tẽebã pãnga, la sõngd-b tɩ b kell n maan sɩd ne a Zeova. Sẽn yɩɩd fãa, yaa sõma tɩ roagdbã kengd b kambã raoodo. Roagdbã sã n minim n pẽgd b kambã ne pʋ-peelem, la b wilgd-b tɩ b nong-b lame, noogda kambã sũur la kengd b raoodo. A Zeova sẽn yeel tɩ ‘fo taa mam yam zãngã,’ wilgdame t’a ra kɩsa sɩd zãng t’a Zeezi na n maana yẽ raabã bal kɛpɩ. A Zeova sẽn kɩs a Biigã sɩd woto wã, tõnd me tõe n basa d yam zãnga, t’a Zeezi na n gesame tɩ bũmb nins fãa a Zeova sẽn pʋlmã pidsi. (2 Kor. 1:20) D sã n tagsd a Zeezi mak-sõngã yelle, pʋd n na n kɩtame tɩ d rat n maneg n nang pãng n bãng-a n paase, la d rɩk a togs-n-taare.—1 Pɩy. 2:21. w19.03 8 s. a 3; 9 s. a 5-6

Ned sã n kõ tõnd kũuni, d pʋʋsd-a-la barka, n wilg tɩ d sũur nooma ne-a. A Zeova sẽn yiis Israyɛll nebã Ezipt yembdã pʋgẽ tɩ b paam b mensã, b pa wilg tɩ b sũur nooma ne-a ye. Kiis a wãn poor bala, b yamã ra bee rɩbd nins b sẽn da rɩt Eziptã, tɩ b ra yẽgemd mannã a Zeova sẽn kõt-bã poorẽ, n da rat meng n leb Ezipti. B ra getame tɩ zĩmã, kõnkõmbrã, pastɛkã, gãbdã, gɛba wã ne laee wã b sẽn bas Eziptã yõod yɩɩda lohorem ning a Zeova sẽn kõ-bã. Dẽnd a Zeova sũur sẽn puug ne-bã pa zaalem ye. (Sõd. 11:5, 6, 10; 14:3, 4) Woto kõta tõnd yam. Tʋm-tʋmd a Poll keooga kiris-nebã fãa, tɩ b gũus n da wa tall manesem sẽn wilgd tɩ b sũur pa noom ne lohorem ning a Zeova sẽn kõ-b ne a Biig a Zeezi Kirist maasmã ye.—2 Kor. 6:1. w18.04 9-10 s. a 6-7

Ned buud fãa ratame tɩ b nong-a. Ned me kae n dat tɩ b maand-a kɛgr ye. B sã n pa nong neda, n maand-a kɛgr wakat fãa, a tõe n wa getame t’a ka võore, la t’a vɩɩmã pa tol n tõe n tall bark ye. A Zeova miime tɩ tõnd ned kam fãa ratame tɩ b nong-a, la tɩ d pa nong kɛgr ye. (Yɩɩn. 33:5) D tõe n kɩsa sɩd t’a nonga tõnd wʋsgo, la t’a pa rat tɩ b maan-d kɛgr ye. D sã n maag d yĩng n bʋgs tõogã a sẽn da kõ Israyɛll nebã zugu, d sɩd nee rẽ vẽenega. D sã n maag d yĩng n bʋgs a Moyiiz tõogã zugu, d bãngdame tɩ tõnd Wẽnnaam a Zeova nonglmã sɩd ka to ye. (Rom. 13:8-10) D tõe n yeelame t’a Moyiiz tõogã yẽbga nonglem zugu, bala a Zeova sẽn maand fãa yaa nonglem yĩnga. (1 Zã 4:8) A Zeova yẽbga a Moyiiz tõogã gill noy a yiib zugu: Nong Wẽnnaam, la nong f to wa f menga. (Maan. 19:18; Tõo. 6:5; Mat. 22:36-40) Dẽnd d tõe n kɩsa sɩd tɩ tõogã noy 600 la zakã fãa sõngda tõnd tɩ d bãng bũmb a Zeova nonglmã zugu. w19.02 20-21 s. a 1-4

A Zoob ra maood n sakda Wẽnnaam noyã daar ne a to fãa. Wala makre, a ra gũusda a manesmã ne pagbã. (Zoob 31:1) A ra miime tɩ pa segd t’a yam kẽ pag a to ye. Rũndã-rũndã, dũniyã pida ne bũmb wʋsg sẽn tõe n kẽes-d yoob pʋgẽ. Wa a Zoobe, tõnd me na n maoome n da wa ges ned sẽn pa tõnd pag wall d sɩd ne ratem-wẽng bɩ? D na n gũusame me n da wa ges pornogarfi buud baa a ye bɩ? (Mat. 5:28) D sã n yõkd d meng woto daar ne a to fãa, d tõogd n kell n yɩɩ burkĩmba. A Zoob tagsg me sẽn da yaa a soab ne ligdã la teedã ra wilgdame t’a sakda a Zeova. A ra getame t’a sã n teeg a paoongã, yaa yel-wẽn-kãseng sẽn tog ne sɩbgre. (Zoob 31:24, 25, 28) Rũndã-rũndã, nebã nonga ligdã la teedã hal wʋsgo. D sã n tũud Biiblã sẽn yetã, n tar tagsg sẽn zems ligdã la teedã wɛɛngẽ, na n sõng-d lame tɩ d maneg n dat ne d sũur fãa n kell n yɩ burkĩmba.—Yel. 30:8, 9; Mat. 6:19, 20. w19.02 6 s. 13-14

A Zeezi sẽn da maand fãa pʋgẽ, a ra rɩkda a Zeova togs-n-taar kɛpɩ, n wilgd nonglem sẽn ka to. (1 Zã 4:8-10) Sẽn tɩ yɩɩd fãa, a sẽn sak n ki tɩ yɩ maoong tõnd yĩngã. A Zeova ne a Biigã sẽn wilg tõnd nonglem ning ne maoong-kãng maasmã nafda sẽn paam-b vʋʋsem sõngã zaeebã, la Kiristã ‘piis a taabã.’ (Zã 10:16; 1 Zã 2:2) D sã n tags bũmb nins d sẽn tar n maand Kiristã kũumã tẽegrã, d na n nee vẽeneg tɩ wilgdame t’a nonga a poorẽ dãmbã, la a nand-b wʋsgo. Bõe yĩng tɩ d yet woto? A Zeezi sẽn wilg bũmb sẽn yaa nana-nana, b sẽn tog n maand n tẽegd a kũumã yellã wilgdame t’a nonga kiris-neb nins sẽn paam vʋʋsem sõngã zaeebã. Yaa tɩlɛ tɩ b tẽeg Kiristã kũumã yʋʋmd fãa. La wakat kẽere, segame tɩ b be yel-pakr la zu-loees a taab pʋgẽ. Wala makre, bãens roogẽ. (Vẽn. 2:10) Woto wã, b ra tõogd n maanda a Zeezi kũumã tẽegr bɩ? N-ye, b tõogame! Hal n tãag rũndã, kiris-neb hakɩɩkã maanda b sẽn tõe fãa n ket n tẽegd a Zeezi kũumã yelle. w19.01 24 s. 13-15

Ne a Zeova sõngre, d paama d mens ne ziri tũudmã, zɩɩlmã la tẽeb ziri ka tɛkã. La pa rẽ bal ye. D gũuda wakat ning d sẽn na n “paam pʋɩɩr ne Wẽnnaam kambã b lohormã ne b ziirã pʋgẽ” wã. (Rom. 8:21) Baa rũndã-rũndã menga, yãmb tõe n paama lohorem, y sã n kell n ‘tall a Zeezi goamã.’ (Zã 8:31) Rẽ n na n wilg tɩ y sɩd ‘bãnga sɩdã.’ Bala, y na n tũuda y sẽn bãngã! Dũni-kãngã pʋgẽ, baa ned sã n tõog n paam naar vɩɩm, a wat n kiime. Sẽn paase, d pa mi sẽn wat beoog ye. (Zak 4:13, 14) Dẽnd sẽn são yaa d sẽn na n modg n tũ vɩɩmã sore, n wa paam “vɩɩm hakɩɩkã” rat n yeel tɩ vɩɩm sẽn kõn sa wã. (1 Tɩm. 6:19) La a Zeova pa modgd ned baa a ye t’a tũ vɩɩmã sor ye. Yaa ned kam fãa n yãkde. Rẽ wã, maan-y y sẽn tõe fãa, t’a Zeova yɩ yãmb “pʋɩɩre.” (Yɩɩn. 16:5) Wilg-y tɩ y sũur nooma ne bõn-sõma ka tɛkã a sẽn kõt yãmbã. (1 Tɩm. 6:17) Kɩs-y sɩd t’a Zeova tõe n sõnga yãmb tɩ y paam “sũ-noog wʋsg . . . wakat sẽn ka sɛta.”—Yɩɩn. 16:11. w18.12 28 s. 19, 21

Kiris-nebã fãa segd n waooga kãadmã, wa a Zeova ne a Zeezi. La d sẽn pa zems zãngã, kẽer mi n pa waoogd kãadmã ye. (Rom. 7:18-23) Dẽnd pipi kiris-neb kẽer sẽn da tar zu-loe-kɛgems b kãadmã pʋgẽ wã pa lingd tõnd ye. A Poll yeelame tɩ “pag ra yi n bas a sɩd ye.” La kẽer maana woto. (1 Kor. 7:10) A Poll pa togs bũmb nins sẽn tõe n wa kɩt tɩ pag yi n bas a sɩda, tɩ b yiibã pa le be ne taabã ye. La yaa vẽeneg tɩ pa raoã sẽn yo yĩng ye. Bala sã n da yaa rẽ, pagã tara sor n na n kao kãadmã, n lebg n kẽ ne ned a to. A Poll yeelame tɩ pag sã n yi n bas a sɩda, segdame t’a ‘kell n zĩnd a yembre, wall a maneg a yellã ne-a.’ Woto wilgdame tɩ Wẽnnaam nifẽ, b ket n yaa pag ne a sɩda. A Poll sagenda sẽn kẽ-b kãadmã tɩ baa sẽn wa n yaa yell ning fãa la b tara, sã n mik tɩ pa b nin-yend n yo, segdame tɩ b modg n maneg yellã, rat n yeel tɩ b welg yellã la b kell n zĩnd ne taaba. B tõe n kosa kãsem-dãmbã sõngre. Kãsem-dãmbã tõe n kõ-b-la sagls sẽn yit Biiblã pʋgẽ. w18.12 13 s. 14-15

Rũndã-rũndã, a Zeova ratame t’a nin-buiidã tall zood sõma ne-a la b tʋm tʋʋmd ning a sẽn kõ-bã ne b sũur fãa. (Mat. 6:33; 28:19, 20; Zak 4:8) Wa a Pɩyɛɛre, neb sẽn dat d neer tõe n baoome n na n koms d raood tɩ d ra kell n wɩng ne tʋʋmdã ye. Wala makre, y patrõ sã n dat n kõ-y tʋʋmd la a paas y yaoodã, tɩ yaool n na n kɩt tɩ y pa le tõe n kẽnd tigissã n pa vaandẽ, wall y pa le tõe n yit koe-moonegã woto, y maanda wãna? Bɩ y sã n yaa karen-biiga, n paam n na n kẽng lekoll a to n tɩ karem n paase, tɩ yaool n yaa tɩlɛ tɩ y bas y roagdbã n tɩ zĩnd zĩig a to? Rẽ yĩnga, yaa wakat kãng masã la y na n pʋʋs a Zeova, n maan vaeesgo, n yẽs ne neb a taaba, n yaool n yãk y sẽn na n maanegã bɩ? Sẽn são yaa y sẽn na n bao n bãng a Zeova tagsg masã menga, la y mao tɩ lebg yãmb me tagsgo. Rẽ, yell a woto taoore, y pa na n getẽ tɩ yãkrã yaa toog ye. Bala, y sẽn dat n maan a Zeova tũudmã pʋgẽ wã yaa vẽeneg y yamẽ, tɩ y rat n maan y sẽn tõe fãa n pids rẽ. w18.11 27 s. 18

A Salomo lebga Israyɛll rĩm t’a nan yaa bi-bɩɩga. A naamã paalmẽ, a Zeova vẽnega a meng ne-a zãmsd pʋgẽ n yeel-a yaa: “Kos maam f sẽn dat bũmb ninga, la m na n kõ-f lame.” A Salomo leokame yaa: “Mam yaa yãaga, n ka mi m sẽn na n zã nebã to-to ye. . . . Bɩ y kõ y tʋmtʋmdã yam, t’a tõog n zã y nebã.” (1 Rĩm. 3:5-10) A kosa “yam.” Ad yaa sik-m-meng soaba! Pa zaalem la a Zeova sẽn da nong a Salomo wã ye! (2 Sãm. 12:24, 25) A sũur tolg n yɩɩ noog ne bi-bɩɩg a Salomo, a sẽn kos bũmb ningã yĩnga, hal t’a kõ-a “yam ne bãngre.” (1 Rĩm. 3:12) Wakat ning fãa a Salomo sẽn tũ a Zeova ne a sũur fãa wã, a paama bark ka tɛka. A paamame meng n me wẽnd-doog a Zeova “sẽn yaa Israyɛll Wẽnnaamã yʋʋr yĩnga.” (1 Rĩm. 8:20) Wẽnnaam sẽn kõ-a yam wʋsgã kɩtame t’a yʋʋrã yi. Bũmb nins Wẽnnaam sẽn vẽneg-a t’a gʋlsã bee Biiblã sɛb a tãab pʋgẽ, wala makre, Yel-bũn sebrã pʋgẽ. w19.01 14 s. a 1-2

Neb n be n pʋd n pa rat tɩ ned baa ye wilg bãmb b sẽn segd n tags to-to ye. B nong n yetame yaa: “Mam sẽn tagsdã la m maanda.” B rat n yeelame bal tɩ b tʋllame n yãkd yam b toore, la tɩ b tara sor n na n maan dẽ. B pa rat tɩ yaa neb a taab n so-ba, n pirsd-b wall n modgd-b tɩ b maand wa bãmb ye. D tõe n basa d yam tɩ d sã n mao tɩ d tagsa wã yɩ a Zeova rẽndã, pa rat n yeel tɩ d pa le tol n tar d toorẽ tagsgo, wall tɩ d tolg n basa d mensã raab fasɩ ye. Ad 2 Korẽnt-rãmb 3:17 wã sẽn yete: “Zu-soabã Sɩɩg sẽn be zĩig ninga, lohorem bee be.” D fãa tara sore, n tõe n yɩ ned ning d sẽn date. D tõe n yãka sẽn noom-do, la bũmb nins d sẽn date. A Zeova meng n naan ninsaal woto. La pa rat n yeel tɩ yaa bũmb fãa pʋgẽ la d tar sor n maan d yam ye. (1 Pɩy. 2:16) Sã n wa yaa sẽn yaa sõma bɩ wẽngã wɛɛngẽ, a Zeova ratame tɩ d ges Biiblã pʋgẽ n bãng yẽ tagsgã, n tũ. w18.11 19 s. a 5-6

D sẽn wa n bãng sɩdã paalmã, ra yaa vẽeneg ne-d t’a Zeova tũubã yõod yɩɩda ligdã la teedã hal zĩig sẽn zãre. D sakame meng n na n bõn ligd la teed sɩdã yĩnga. La d sã n wa neẽ tɩ d taabã raada portaabl bɩ taablɛt sẽn nan yi paalem wall teed a taaba, tõe n kɩtame tɩ d wa getẽ tɩ d maana d menga. D tõeeme n wa pa le maand sũ-noog ne bũmb nins d sẽn tarã, n lebs a Zeova raabã poorẽ la d na n bao ligdã. Woto tẽegda tõnd a Demas kibarã. A ra paam n tũuda tʋm-tʋmd a Poll n gilgd n moond koɛɛgã, la a sẽn da “nong moasã dũni wã yĩnga,” a wa n basa a Polle. Tõe tɩ yaa a sẽn da nong ligdã la teedã n yɩɩd Wẽnnaam tʋʋmdã, wall yaa a sẽn da pa le rat n mong a meng bũmb kẽer n kell n tũ a Pollã yĩnga. Kõta tõnd yam-bʋgo? D sã n pa gũusi, d wat n le nonga rẽ hal n pa le nong sɩdã ne d sũur fãa ye. w18.11 10 s. a 9

A Sʋɩtãan sẽn yag ziri wã yaa sẽn na n wã a Awa. Bala, a ra miime t’a sã n tẽ yẽ ziri wã n dɩ tɩɩgã bilã, a na n kiime. Baasa wãna? A Ãdem ne a Awa kɩɩsa a Zeova noorã, n wa baas n ki. (Sɩng. 3:6; 5:5) Sẽn yaa wẽng n yɩɩd menga, yel-wẽndã kɩtame “tɩ nebã fãa kiidẽ.” Sɩd me, kũumã lebga wa naaba, n so hal ‘baa neb nins sẽn ka beeg a Ãdem beegrã buudã.’ (Rom. 5:12, 14) Rẽ n so tɩ tõnd yaa neb sẽn pa zems zãnga, n pa tõe n vɩɩmd wakat sẽn kõn sa wa Wẽnnaam sẽn da ratã ye. Tõnd “yʋʋmã sõor ka yɩɩd pis-yopoe ye. La yĩns kelem sã n beẽ, a tata pis-nii.” Rẽ me, yaa “namsg la nimbãaneg bala.” (Yɩɩn. 90:10) Woto fãa yaa a Sʋɩtãan ziri wã yĩnga! A Zeezi ra yeelame t’a Sʋɩtãan ‘ka pa sɩd pʋgẽ, sɩd sẽn ka be yẽnda pʋgẽ wã yĩnga.’ (Zã 8:44) Hal ne rũndã, sɩd ka be a Sʋɩtãan pʋgẽ ye. Bala, a ket n yaa a “soab ning sẽn belgd tẽngã zĩig ning fãa neb sẽn be wã nebã.” (Vẽn. 12:9) La tõnd pa rat t’a Sʋɩtãan tõog n belg-d ye. w18.10 6-7 s. a 1-4

D sã n yaa ned sẽn modgd wakat fãa n baood laafɩ, d na n yɩɩ sũ-noog soaba. Karen-biig a Zak ra yeelame yaa: “Tɩrlem bil bʋta laafɩ pʋgẽ, la yaa laafɩ baoodbã n bʋt-a.” (Zak 3:18) Sã n mik tɩ yãmb ne y zakã ned wall tigingã ned pa wʋmd taab hal tɩ zems-n-taarã yaa toogo, bɩ y yõk a Zeova sɛɛg t’a sõng-y tɩ y yɩ ned sẽn baood laafɩ. Rẽ, a Zeova na n kõ-y-la a vʋʋsem sõngã tɩ sõng-y tɩ y bɩɩs zʋg-sõma, tɩ y sũ-noogã me paase. A Zeezi yeela bũmb sẽn sɩd wilgd tɩ tara yõod wʋsg tɩ d reng n bao laafɩ. Ad a sẽn yeele: “Fo sã n wa ne f kũun tẽn-kugrã taoore, n zĩnd be n tẽeg tɩ f ba-biig n tar yell ne foom, bɩ f bas f kũunã tẽn-kugrã taoore, n deng n kẽng n tɩ maneg f yellã ne f ba-biigã, n yaool n wa kõ f kũunã.”—Mat. 5:23, 24. w18.09 21 s. 17

Yʋng ning b sẽn na n yõk a Zeezi wã, a goma nonglmã yell ne a karen-biisã hal sẽn dat n ta naoor 30. A tolg n togs-b lame tɩ b segd n ‘nonga taaba.’ (Zã 15:12, 17) B sẽn na n nong taab to-to wã na n talla pãng hal tɩ nebã bãng vẽeneg tɩ yaa bãmb la kiris-neb hakɩɩkã. (Zã 13:35) Nonglem ning yell a Zeezi sẽn da gomdã pa sũur pʋgẽ nonglem bal ye. Yaa nonglem sẽn tar pãng hal n tõe tɩ ned sakd n mongd a meng a taabã nafr yĩnga. Ad a Zeezi sẽn yeele: “Nonglem ka be ninsaal yĩnga, n yɩɩd tɩ kõ f vɩɩm f zo-rãmb yĩng ye. Yãmb sã n maan bũmb nins mam sẽn yet yãmbã, yãmb yaa mam zo-rãmba.” (Zã 15:13, 14) Rũndã-rũndã, a Zeova Kaset rãmbã sẽn nong taab ne nonglem hakɩɩka, nonglem sẽn kɩt tɩ b sakd n mongd d mens b taabã nafr yĩnga, tɩ zems-n-taar me be b sʋkã, kɩtame tɩ yaa vẽeneg tɩ bãmb la Wẽnnaam nin-buiidã. (1 Zã 3:10, 11) D sũy yaa noog d sẽn paam n naag a Zeova nin-buiidã sẽn nong taab wa Kirist sẽn nong tõnd to-to wã, tɩ pa be ne d buudu, d tẽng bɩ d sẽn yitẽ, d buud-gomd wall b sẽn wub-d zĩig ningã. w18.09 12 s. a 1-2

A Zeova ratame tɩ d get d zakã rãmb yelle. Wala makre, tõe tɩ y tog n tʋma wʋsgo, n tõog tɩ y zakã rãmb paam sẽn yaa tɩlɛ ne-bã. Pagb wʋsg me paada zakẽ, n tʋmd zakã tʋʋm la b get kom-bõonegã yelle. Roagdb kẽer me pa le tõe n ges b mens yelle, tɩ lebg b kambã n segd n ges b yelle. Woto fãa yaa tɩlɛ. Yãmb sã n tara zɩɩb woto, y tõe n getame tɩ y pa le tõe n paam sẽk wʋsg n tʋm Wẽnnaam tʋʋmã wa y sẽn dat ye. La ra n koms-y raood ye! Y sẽn get y zakã rãmb yellã nooma a Zeova. (1 Kor. 10:31) La y zakã rãmb yell gesg sã n pa tolg n yaa zɩɩb woto? Y tõe n sõnga y tẽed-n-taas nins sẽn bẽed bɩ sẽn kʋʋle, wall sẽn dat sõngr buud a taaba, pa rẽ bɩ y maan bũmb n teel sẽn sõngd-b nin-kãensã. Tags-y n ges-y y tigingã neb nins sẽn baood sõngrã. Y sã n maand woto n sõngd y tẽed-n-taasã, y naagda a Zeova n tʋmdẽ, tɩ sõngr ning b sẽn paamdã tõe n kell n yɩ b sẽn da pʋʋsd n kotẽ wã.—1 Kor. 10:24. w18.08 24 s. a 3, 5

A Zozɛf sẽn wa n tar yʋʋm 17 woto la a ba-biis koos-a yembdo, sũ-kiir yĩnga. Yẽ n da yaa a ba a Zakoob bi-nongre. (Sɩng. 37:2-4, 23-28) Yʋʋm 13 la a Zozɛf sẽn nams Ezipt tẽngẽ wã. A ba wã a sẽn da nong wʋsgã ra pa be yambẽ ye. A Zozɛf reng n yɩɩ yamba. Rẽ poore, a zĩnda bãens roogo. Bõe n sõng-a t’a pa tags t’a yɛlã yõome, n lebg sũ-to-neda? A Zozɛf sẽn wa n be bãensã roogẽ wã, tog n da yaa bũmb nins sẽn wilgd t’a Zeova ket n sõngd-a lame wã yell la a ra tagsd n yɩɩda. (Sɩng. 39:21; Yɩɩn. 105:17-19) Tõe t’a ra mi n tagsa a yãadmẽ zãmsd nins sẽn yɩ bãngr-goamã yelle, tɩ ra sõngd-a t’a tõe n bas a yam t’a Zeova bee ne-a. (Sɩng. 37:5-11) Wõnda a pʋʋsa a Zeova naoor wʋsgo, n togs-a bũmb nins fãa sẽn da be a sũurẽ wã. (Yɩɩn. 145:18) A Zeova leoka a Zozɛf kosgã, n kɩt t’a ra kɩs sɩd tɩ sẽn wa n yaa a soab fãa, a ‘bee ne-a.’ w18.10 28 s. a 3-4

D sã n pa gũusi, d tõe n gesa ned tarem n kao a bʋʋdo. La bõe yĩng meng tɩ d tõe n wa tik ned tarem bɩ a naong n kao a bʋʋdo? Wẽnnaam vʋʋsem sõngã vẽnega a Salomo t’a yeel bũmb sẽn yaa sɩd ninsaalbã sẽn pa zems zãngã zugu, wa rũndã vɛrse wã sẽn wilgdã. Bõe la yel-bũn-kãngã wilgd tõndo? Wilgda tõnd tɩ d sã n pa gũusi, d tõe n wa baooda d tẽed-n-taas nins nus sẽn zãadã zoodo, n pa baood sẽn pa tar-bã zĩigẽ ye. La d sã n get nebã tarmã n kaood b bʋʋdo, wata ne yɛla. Bõe yĩnga? Bala, woto tõe n waa ne welsg tigingã pʋgẽ. A buud zĩnda pipi kiris-nebã wakatẽ, tɩ karen-biig a Zak keoog-b rẽ wɛɛngẽ. (Zak 2:1-4) Rũndã-rũndã me, d segd n gũusame tɩ welsg a woto ra zĩnd tigingã pʋgẽ ye. w18.08 10 s. a 8-10

D manesem sẽn yaa to-to me ne d tẽed-n-taasã wilgda d sũur sã n nooma d sẽn paam n yaa a Zeova zoa wã. Bãmb me yaa a Zeova zo-rãmba. Rẽ sã n be d yamẽ, d na n nonga d tẽed-n-taasã wakat fãa, la d maand-b neere. (1 Tes. 5:15) A Zeezi ra yeela a karen-biisã yaa: “Yãmb sã n nong taaba, nebã fãa na bãng tɩ yãmb yaa mam karen-biisi.” (Zã 13:35) A Malaki wilgame tɩ neb nins sẽn tũud a Zeova wã sã n yẽsd ne taaba, a Zeova ‘kɩllda a tʋbre, n wʋmdẽ.’ (Mal. 3:16) Woto wilgdame t’a Zeova “mii neb nins sẽn yaa bãmb dẽndã.” (2 Tɩm. 2:19) A mii d sẽn yet fãa la d sẽn maand fãa. (Ebre. 4:13) D sã n yaa gãs-gãs ne d tẽed-n-taasã, a neeme. La d sã n nong n maand-b sãando, n pʋɩt tõnd sẽn tarã ne-ba, n maand-b neer la d kõt-b sugri, d tõe n kɩsa sɩd t’a Zeova nee rẽ me.—Ebre. 13:16. w18.07 26 s. 15, 17

Ned sã n gãd a Zeova kãn-kãe, wilgdame t’a tara yam. A Zeova pãngã, a yamã la a nonglmã ka to ye. D fãa pa rat n kell n sak Wẽnnaam a woto, n yɩ a poorẽ dãmb sɩda? (Yɩɩn. 96:4-6) La pĩnd wẽndẽ, wa n yɩɩ tɩlɛ ne neb sẽn da tũud a Zeova tɩ b yãk b sã n na n kell n zĩnda a poorẽ. Bʋko, kẽer pa kell n gãd-a kãn-kãe ye. D gom a Kayẽ yelle. A ra pa tũud wẽnnaam a to tɩ pa a Zeova ye. La a sẽn da tũud a Zeova to-to wã ra pa tat a Zeova yam ye. Bõe yĩnga? A Zeova yãame tɩ tʋls-wẽns n da paamd pãng a sũurẽ wã. (1 Zã 3:12) A Zeova keoog-a lame, n yeel-a yaa: “Fo sã n maan sẽn yaa sõama, f na n tõog n zẽka f zugu, la f sã n ka maan sẽn yaa sõama, yel-wẽnã wũga fo rignoorẽ, la a rat n sooga foom, bee ne foom tɩ f tõog-a.” (Sɩng. 4:6, 7) A Zeova sẽn yeelã wilgda vẽeneg t’a sã n toeeme, n yãk yam n na n zĩnd yẽ poorẽ, yẽ me na n zĩnda ne-a. La a pa tũ saglgã ye. w18.07 17s. a 1; 18 s. a 4

Ne koe-noogã mooneg la karen-biisã maaneg maasem, kiris-ned kɩtdame t’a vẽenem yãgda. (Mat. 28:19, 20) Sẽn paase, d sã n wa moond koɛɛgã, d yel-manesmã tõe n kɩtame t’a Zeova paam waoogre. Zagsã rãmb ne so-loaadbã geta tõndo. D sẽn yõgemded d noor ne nebã, la d pʋʋsd-b noog-noogã, sõngdame tɩ b ra tall tags-kɛg d zugu, la b bãng Wẽnnaam ning d sẽn tũudã sẽn yaa Wẽnnaam ning buudã. A Zeezi ra yeela a karen-biisã yaa: “Y sã n wa kẽed zakẽ wã, bɩ y yeel tɩ laafɩ zĩnd ne zakã rãmba.” (Mat. 10:12) Zĩis nins a Zeezi ne a karen-biisã sẽn da moond koɛɛgã, nebã sã n da yã sãan b rignoorẽ, b ra wae n deegd-a-la b zakẽ wã. Rũndã-rũndã, nebã pa maand woto zĩis wʋsg ye. Naoor wʋsgo, nebã sã n yã sãan b zak noore, b yɛɛsdame, wall b pʋd n yik b sũuri. La d sã n yõgemd d noor ne-ba, la d gom noog-noogo, tõe n sõngame tɩ b bas b yam. Yãmb pa gũus n ges tɩ y sã n wa moond koɛɛgã ne perzãntoaar-dãmbã, y sã n yõgemd y noor ne nebã, la y pʋʋs-b noog-noogo, sõngdame tɩ b bas b yam n kolg n deeg sɛbã sɩda? w18.06 22 s. a 4-5

Ra yaa ne zʋɩf-rãmbã bal la tʋm-tʋmd a Pɩyɛɛr ra minim n be ne. La Wẽnnaam wa n maaname tɩ lebg vẽeneg tɩ welsg pa segd n zĩnd kiris-nebã sʋka, n kɩt t’a Pɩyɛɛr tɩ taas Rom sodaag a Korney koe-noogã. (Tʋʋ. 10:28, 35) Rẽ tɛka, a Pɩyɛɛr ra naagda bu-zẽmsã neb n dɩtẽ la a maand bũmb a taaba. Yʋʋm a wãn poore, a wa n kẽnga Ãntiyoose, n da naagd kiris-neb nins sẽn yaa bu-zẽmsã n dɩtẽ. La a wa n tiig n basame n pa le naagd-b ye. (Gal. 2:11-14) A Poll yeel-a-la vẽeneg t’a sẽn maandã pa segd ye. A Pɩyɛɛr saka remsgã. Sɩd me, a sẽn wa n gʋls a pipi lɛtrã n tool Aazimineer kiris-nebã sẽn da yaa zʋɩf-rãmb la bu-zẽmsã, a wilga vẽeneg tɩ b segd n nonga ba-biisã fãa.(1 Pɩy. 1:1; 2:17) A Zeezi mak-sõngã sɩd sõnga a tʋm-tʋmdbã tɩ b bãng tɩ b segd n nonga ned buud fãa. (Zã 12:32; 1 Tɩm. 4:10) B tõog n toeema b tagsg sẽn da yaa a soab neb a taabã zugã, baa sẽn pa yɩ zĩig pʋgẽ wã. Pipi kiris-nebã sẽn mao n yelg “yalẽ-paalgã,” sõng-b lame tɩ b wa tõog n getẽ tɩ nebã fãa yaa yembr Wẽnnaam nifẽ.—Kol. 3:10, 11. w18.06 11 s. 15-16

Pipi kiris-nebã wakatẽ, gãntik buud a ye Rom sodaasã sẽn da bobd yaa kud-pakls b sẽn ning sogdse, n bogl taab n sog-sog ne gãnd wĩy tɩ lebg wa fu-yorgo. Woto kɩtame tɩ wakat fãa yaa tɩlɛ t’a gũusd n get gãntikã sogdsã zĩisẽ sã n pa yolse, sẽn na yɩl tɩ sʋʋg wall peemd ra wa kõs a sũurã, wall zĩ-bãnd a to, tɩ tũ ne a yõor ye. A Zeova noyã sẽn yaa tɩrsã me kogenda tõnd “sũurã,” rat n yeel tɩ d sẽn yaa a soab d sũurẽ wã. (Yel. 4:23) Sodaag pa na n saag n bas gãntik sẽn maan ne kutu, n dɩk gãntik sẽn maan ne bũmb pãng sẽn pa ta kut ye. Tõnd me pa segd n bas noy nins a Zeova sẽn gãneg sõma la wẽngã wɛɛngẽ wã, n sak tõnd mengã sẽn tagsd tɩ yaa sõma wall wẽngã ye. Tõnd mengã yamã pa sek na kogl d sũurã ye. (Yel. 3:5, 6) Rẽ n so tɩ wakat fãa, d segd n gũusd n get “gãntikã” a Zeova sẽn kõ tõndã sogdsã sã n ket n soga taab sõma, n kogend d sũurã. D sã n nong bũmb nins sẽn be Wẽnnaam Gomdã pʋgẽ wã ne d sũur fãa, “gãntikã” bob n kẽnã na n yɩɩ nana ne-do, rat n yeel tɩ Wẽnnaam noyã la a saglsã tũub pa na n yɩ toog wʋsg ye.—Yɩɩn. 111:7, 8; 1 Zã 5:3. w18.05 28 s. a 3-4, 6-7

A Moyiiz yɩɩ b taoor lʋɩt yʋʋm wʋsg me, n da ka baood a meng nafr ye. Baa ne rẽ, nin-buiidã yẽgmame. B ra pa yẽgemd koom sẽn da ka be wã yĩng bal ye. B ra yẽgemda ne a Moyiiz me, wa yaa yẽ yell la ko-yũudã sẽn tar-bã. (Sõd. 20:1-5, 9-11) A Moyiiz sũurã yika wʋsgo. A pa kell n tall sũ-maasem ye. A Zeova sẽn yeel-a t’a gom ne pĩigã, a pa maan rẽ ye. Yaa nin-buiidã la a gom sũ-to-goama, n yeel tɩ yẽ na n maana yel-solemde. Rẽ poore, a wẽe pĩigã naoor a yiibu, tɩ koom pusg n yi wʋsgo. Wuk-m-mengã la sũ-yikrã kɩtame t’a maan yel-wẽn-kãsenga. (Yɩɩn. 106:32, 33) Yaa wakat bilf bal la a Moyiiz sẽn pa sik a mengã, la kɩtame t’a pa paam n kẽ kãabg tẽngẽ wã ye. (Sõd. 20:12) Kiba-kãngã kõta tõnd yam. Pipi, wilgdame tɩ d segd n modga wakat fãa sẽn na yɩl n kell n yɩ sik-m-mens rãmba. Baa yaa wakat bilf la d bas n pa le maoodẽ, d tõe n lebga wuk-m-meng soab zĩig pʋgẽ, n gom goam wall d maan bũmb n pa reng n tags neer ye. Yiib-n-soaba, wilgdame tɩ d sã n wa maand yɩɩr wʋsgo, yɩl n kell n sik d mengã tõe n yɩɩ toogo. Dẽnd baa yell sã n wa kɩt tɩ d maand yɩɩre, d segd n mao n kell n yɩɩ sik-m-meng soaba. w19.02 12-13 s. 19-21

Koɛɛgã moonegã yaa tʋʋmd sẽn yaa toog la sẽn wat ne yam-yiisg bɩ? A bada! A Zeezi sẽn wẽ reezẽ tɩɩgã yel-bũndã poore, a wilgame tɩ d sã n moond Rĩungã koɛɛgã, d paamda sũ-noogo. Zã 15:11) A pʋd n yeelame tɩ d na n paama yẽ sũ-noogã buudu. Wãn to? A yeelame tɩ yẽ yaa reezẽ tɩɩgã, t’a karen-biisã yaa wilã. (Zã 15:5.) Yaa wilã sã n be tɩɩgã zug la b na n paam koom la bũmb a taab sẽn yaa tɩlɛ ne-bã. Woto me, yaa d sã n kell n pa Kiristã pʋgẽ, n tũud a naoã sõma la d na n paam sũ-noog ning a sẽn tare, a sẽn maand a Ba wã raab yĩngã. (Zã 4:34; 17:13; 1 Pɩy. 2:21) A Ann yaa so-pakd na maan yʋʋm 40 la zaka. Ad a sẽn yeele: “M sã n yi n moon koɛɛgã fãa, m sũ-noogã rẽ poorã kɩtdame tɩ m dat n kell wɩng ne a Zeova tʋʋmdã.” Hakɩɩka, sũ-noogã kõt-d-la raood tɩ d ket n moondẽ, baa zĩis nins nebã sẽn pa sakd n kelgã.—Mat. 5:10-12. w18.05 17 s. a 2; 20 s. 14

Pipi kiris-nebã wakate, wõnda yaa tʋm-tʋmd a Poll n wɩng ne a taabã raood kengr n tɩ yɩɩda. Vʋʋsem sõngã kɩtame t’a Poll tɩ moon koɛɛgã gɛrk-rãmba, Rom neba, la bu-zẽms a taab sẽn da pʋʋsd wẽnnaam-dãmb ka tɛka. (Gal. 2:7-9) A Poll gilga zĩ-zãrsẽ, n tɩ moon bu-zẽmsã koe-noogã, la a lugl tigimsi. A gilg n taa b sẽn boond rũndã-rũndã tɩ Tirki wã, la hal baa Gɛrɛs la Itali. Sẽn sak n lebg-b kiris-neb wakat kãngã namsa wʋsg b “tẽngã rãmb” nugẽ, n da rat raood kengr sõma. (1 Tes. 2:14) Yʋʋmd 50 wã sẽnese, a Poll gʋlsa lɛtr sẽn kengd raood n tool Tesalonik tigingã b sẽn da lugl paalmã. Lɛtrã pʋgẽ, a yeelame: “Tõnd pʋʋsda Wẽnnaam bark yãmb yĩng n ka basdẽ ye, la tõnd pʋta yãmb yell d pʋʋsg pʋgẽ. Tõnd tẽegda yãmb tẽebã tʋʋmde, la yãmb nonglmã tʋʋmde, la y tẽeb ne tõnd Zu-soab a Zeezi Kirisã tẽeb-pidsg gũudum sẽn ka vigsdã yelle.” (1 Tes. 1:2, 3) A sagl-b lame me tɩ b kengd taab raoodo. Ad a sẽn yeel-bã: “Paas-y taab raoodo, la y bɩɩs taab tẽeb wa y sẽn zoe n maandẽ wã.”—1 Tes. 5:11. w18.04 18-19 s. 16-17

Sã n yaa a Zeova raabã n pak bi-bɩɩg n yɩɩda, a na n wɩngda ne koɛɛgã moonego. Dẽnd koɛɛgã mooneg yaa tʋʋm-yãgdem, hal tɩ segd n yɩ bũmb sẽn tar yõod wʋsg ned kam fãa nifẽ. Rẽ yĩnga, y pa tõe n moond koɛɛgã n yɩɩd pĩndã sɩda? Y pa tõe n lebg wakat fãa so-pakda? La koɛɛgã mooneg sã n pa kõt-y sũ-noog woto? Bõe la y tõe n maan tɩ sõng-y tɩ y sẽn moond to-to wã yɩ sõma n paase? Ad bũmb a yiib sẽn na n sõng-yã: Segend-y y meng sõma, la y maood wakat fãa n taasd neb a taabã y sẽn mi a Zeova zugã. Woto, y na n wa nonga koɛɛgã mooneg n yɩɩd pĩndã, hal tɩ ling-yã. Y sã n data, sɩngrẽ wã, y tõe n bʋgs n gesa sogsg nins y karen-bi-taasã sẽn nong n sokdẽ wã, n segl y sẽn na n leok to-to. Wala makre, b tõe n sok-y lame yaa: “Bõe n kɩt tɩ f tẽed tɩ Wẽnnaam beeme?” Tõnd sɩtã pʋgẽ, bũmb toor-toor la b ning n na n sõng kom-bɩɩsã tɩ b bãng b sẽn tõe n leok sok-kãnga to-to. Y na n yãa Fiche de réflexion gom-zug sẽn yaa Pourquoi est-ce que je crois en Dieu ? Fiches de réflexion wã tõe n sõng-y lame tɩ y segl y meng n bãng n leok sogsg a taaba. w18.04 27 s. 10-11

A Ãdem ne a Awa ra tara lohorem bũmb wʋsg pʋgẽ, la noy kẽer la b ra segd n tũ tɩlɛ. Noy kẽer meng tũubã pa baood tɩ b yals n tags ye. Wala makre, b ra miime bal tɩ b sã n dat n ket n vɩ, yaa tɩlɛ tɩ b vʋʋsd pemsmã, n dɩtẽ, la b gõe. La woto sẽn yaa tɩlɛ wã, rat n yeelame tɩ b pa tar lohorem bɩ? Ayo! A Zeova pʋd n maaname tɩ bõn-kãensã noom-ba, n kõt-b sũ-noogo. (Yɩɩn. 104:14, 15; Koɛ. 3:12, 13) A Zeova yeela a Ãdem ne a Awa vẽeneg tɩ b rog kamb n fɩɩg n pid dũniyã, la b soog-a. No-kãngã ra kɩtame tɩ b pa tar lohorem bɩ? A bada! B pʋd n paama lohorem, n na n naag n pids b Naandã raabo. A ra ratame tɩ tẽngã tõr lebg arzãna, tɩ ninsaalb sẽn zems zãng vɩɩmd a zug wakat sẽn kõn sa. (Yɩɩn. 127:3; Eza. 45:18) Hakɩɩka, a Ãdem ne a Awa sã n da sakẽ-la a Zeova, b kãadmã ra na n yɩɩ noogo, tɩ bãmb ne b kambã la b yagensã vɩɩm me tall bark wakat sẽn kõn sa. w18.04 4-5 s. a 7-8

D sã n maand sũ-mar ne nebã d sẽn taasd koɛɛgã, d pa na n dat tɩ d sã n togs-b bũmb Biiblã sẽn yet bɩ b wʋm a võorã zĩig pʋgẽ, wall b wẽneg n sak ye. D rɩk makr ne tõnd sẽn na n dat n sõng ned t’a sak n tẽ tɩ ninsaalbã na n wa vɩɩmda wakat sẽn kõn sa, arzãn pʋgẽ, tẽngã zugu. Neb wʋsg tagsdame tɩ ned sã n ki, saame, wall b tẽed tɩ nin-sõma wã fãa rabda saasẽ. Ad saam-biig a ye sẽn togs yẽ sẽn maand to-to: Pipi, a karemda Sɩngr 1:28, la a sok kɛlgdã n ges Wẽnnaam sẽn da rat tɩ ninsaalbã vɩɩmd zĩig ningã, la a sẽn da rat tɩ b vɩɩmã yɩ to-to. Wʋsg leokdame tɩ yaa “tẽngã zugu, laafɩ la sũ-noog pʋgẽ.” Rẽ poore, a karemda Ezayi 55:11, n bas n sok kɛlgdã n ges Wẽnnaam daabã sã n toeemame. Naoor wʋsgo, a soabã leokdame tɩ ayo. Sẽn na n baase, saam-biigã karemda Yɩɩn-sõamyã 37:10, 11 la a sok kɛlgdã n ges ninsaalbã vɩɩm sẽn na n yɩ to-to beoogo. A maana woto, n tõog n sõng neb wʋsg tɩ b bãng tɩ Wẽnnaam ket n datame tɩ nin-sõma wã vɩɩmd tẽngã zug wakat sẽn kõn sa, arzãn pʋgẽ. w19.03 24 s. 14-15; 25 s. 19

A Zeova gom-kãngã wilgda vẽeneg t’a ratame tɩ tõnd kelg a Biigã goamã la d tũ. A Zeezi zãmsa a karen-biisã b sẽn tog n moon koe-noogã to-to, la a togs-b n yɩlem tɩ b wɩng ne gũubu. (Mat. 24:42; 28:19, 20) A sagl-b lame me tɩ b nang pãng ne Wẽnnaam tũubu, la a yeel-b tɩ b modg n da koms raood n bas ye. (Luk 13:24) A wilga vẽeneg me tɩ yaa tɩlɛ ne a poorẽ dãmbã tɩ b nong taaba, la b kell n yɩ yam a yembre, la b tũud yẽ noyã. (Zã 15:10, 12, 13) Hal ne rũndã, a saglsã yõod ket n waooga wa b togsgã wakatã. A Zeezi leb n yeelame: “Ned ning fãa sẽn yaa sɩdã rẽnd kelgda mam koɛɛga.” (Zã 18:37) D sã n ket n ‘maand sũ-mar ne taaba, la d kõt taab sugri,’ wilgdame tɩ d kelgda a Zeezi koɛɛga. (Kol. 3:13, Wẽnnaam Sebre, 1983; Luk 17:3, 4) D sã n moond koe-noogã ne yẽesem “nana walla toog pʋgẽ,” wilgdame me tɩ d kelgda a Zeezi koɛɛga.—2 Tɩm. 4:2, Wẽnnaam Sebre, 1983. w19.03 10 s. a 9-10