Tʋʋl-nifu

La tõnd yẽ? D tagsa wã yaa Wẽnnaam dẽnd bɩ, bɩ yaa dũniyã neb rẽnda? D sẽn yaa kiris-nebã, d zoe n modgdame tɩ d zʋgdã la d manesmã tat Wẽnnaam yam. La d tagsa wã yẽ? D maanda d sẽn tõe fãa sẽn na yɩl tɩ d tagsa wã zemsd ne Wẽnnaam dẽndã bɩ? Yɩl n maan woto pa nana ye. Yaool n yaa nana tɩ d wa tagsd wa dũniyã nebã. Bala, zĩig fãa, dũniyã nebã tagsa wã b sẽn boond me tɩ dũniyã yamã bɩ a ‘sɩɩgã’ piuugame. (Efɛ. 2:2) Sẽn paase, dũniyã rãmb wae n pirsda nebã tɩ b tagsd b meng yell bala. Kɩtame tɩ d tõe n wa rat n maan wa bãmb sẽn yetã. Sɩd-sɩdã, yaa nana tɩ d wa tagsd wa dũniyã rãmba, tɩ yɩl n tõog tɩ d tagsa wã yɩ a Zeova rẽndã yaool n yaa toogo. Sẽn paas me, d sã n bas tɩ dũniyã neb tagsa wã kẽ-do, d na n lebga neb sẽn tagsd b mens yell bala, tɩ sẽn yaa sõma bɩ wẽngã wɛɛngẽ bɩ d rat n yãkd d toorẽ noy. (Mark 7:21, 22) Rẽ n so tɩ yaa tɩlɛ tɩ d mao, n tõog tɩ d tagsa wã yɩ ‘Wẽnnaam dẽnda,’ la ra yɩ ‘ninsaal dẽnd’ ye. w18.11 18 s. a 1; 19 s. a 3-4

Hal naoor a tãab la a Zeova zĩnd saasẽ n gome, n wilg a Zeezi t’a nong-a lame. Woto tog n sɩd kenga a raood wʋsgo! A sẽn deeg lisg Zʋrdẽ kʋɩlgẽ wã poor bala, a Zeova togsa rũndã vɛrse wã goamã. Wõnda yaa yẽ ne a Zãmbatiis bal n wʋm gom-kãensa. Na maan yʋʋmd sẽn deng a kũumã, a tʋm-tʋmdb a tãab n da be ne-a, n wa wʋm a Zeova sẽn yeel yaa: “Ada yaa mam Bi-ribl-nongr sẽn ta mam yam zãnga. Kelg-y-yã-a.” (Mat. 17:5) A kũumã ket tɩ rasem a wãna, a Zeova le zĩnda saasẽ n gom ne-a. (Zã 12:28) A Zeezi ra miime tɩ b na n dõd-a lame t’a yaa wẽn-tʋʋsa, la b kʋ-a wa bi-bɛɛg n ning-a yãnde. Baa ne rẽ, a pʋʋsa Wẽnnaam n yeel-a yaa: “Bɩ a ra yɩ mam sẽn dat ye, a yɩ wa yãmb sẽn datã.” (Mat. 26:39, 42) A sẽn da pa baood ninsaalbã pẽgre, tɩ yaa a Ba wã na pẽg-a n da pak-a wã, a sakame n ki ra-luk zugu, n “pa zoe yãnd” ye.—Ebre. 12:2. w18.07 10-11 s. 15-16

A Zeezi sẽn wilg a karen-biisã sẽn tog n tẽeg a kũumã yell to-to wã poor bilfu, a maana bũmb sẽn wilgd t’a tara raood meng-menga. Bõe la a maan-yã? A ra miime tɩ b na n rõd-a lame t’a paooga Wẽnnaam, n kʋ-a. Baasgo, a saka rẽ, bala yaa a Ba wã raabo. (Mat. 26:65, 66) Sẽn na yɩl n waoog Wẽnnaam yʋʋrã, la a wilg t’a teenda a naam sẽn ka to wã, la a pak sor tɩ sẽn na n tek-b yamã wa paam vɩɩm sẽn kõn sa, a Zeezi kell n maana sɩd zãng-zãng ne a Zeova. A leb n sõnga a karen-biisã tɩ b na n segl b mens n wa tõog n mao ne yɛl nins sẽn da na n wa ka la bilfã. A Zeezi pa maan yɩɩr tɩ loog a mengã yĩng ye. Yaa a tʋm-tʋmdb nins sẽn kell n maan sɩd ne-a wã yell n da pak-a n yɩɩda. Woto wilgdame me t’a yaa raood soaba. A kɩtame t’a Zida looge, t’a yaool n wilg a karen-biisã sẽn tog n maand n tẽegd a kũumã. Yaa bũmb sẽn na n tẽegd a karen-biis nins fãa sẽn na n paam vʋʋsem sõngã zaeebã a zɩɩmã sẽn daagã yõod ne bãmba, la bark nins kaool-paalgã sẽn na n kɩt tɩ b paamã.—1 Kor. 10:16, 17. w19.01 22 s. 7-8

A Zeezi Ba wã zĩnda saasẽ n leok yaa: “Mam waooga m yʋʋrã, la m na n le waoog-a lame yɛsa.” A Zeezi ra maanda yɩɩre, bala, a ra miime t’a sẽn tog n kell n maan sɩd ne a Zeova wã yaa yel-kãseng sẽn zao yẽnda zugu. A ra miime me tɩ b na n nams-a-la wʋsgo, t’a ki kũ-toaaga. (Mat. 26:38) La sẽn yɩɩd menga, a ra rata ne a sũur fãa t’a Ba wã yʋʋr paam waoogre. B rõd-a lame t’a yaa wẽn-tʋʋsa, t’a ra maand yɩɩr tɩ Wẽnnaam yʋʋrã na n wa sãame, b sẽn na n kʋ-a rẽ yĩngã. Ad a Zeova sẽn yeel bũmb ning baraarã tog n kenga a raood hal sõma! Wa a Zeezi, tõe tɩ tõnd me mi n maanda yɩɩr tɩ bũmb ning na sãam a Zeova yʋʋrã. Wala makre, tõe tɩ b maan-d-la kɛgr wa a Zeezi. Tõe me tɩ yaa ziri nins sɩdã kɩɩsdbã sẽn yelgdã n kɩt tɩ d maand yɩɩre. Tõeeme tɩ d tagsda b goamã sẽn sãamd a Zeova yʋʋre, la sãamd a siglgã yʋʋrã. Sã n wa yaa woto, a Zeova sẽn yeel bũmb ningã tõe n bels-d-la wʋsgo. Wakat fãa, a Zeova kɩtdame t’a yʋʋrã paamd waoogre.—Yɩɩn. 94:22, 23; Eza. 65:17. w19.03 11-12 s. 14-16

Daar a ye, a Zeezi yeela bũmb sẽn ling a karen-biisã hal sõma. A yeelame tɩ ka la bilfu, b na n namsa yẽ, la b kʋ-a menga. Karen-biisã yaool n da tẽedame t’a na n lebs n deega Israyɛll soolmã n lebs-ba. Tʋm-tʋmd a Pɩyɛɛr leokame, n yeel yaa: “Zu-soaba, Wẽnd na zãage! Yel-kãngã kõn paam yãmb abada.” A Zeezi lebg n leok-a lame n yeel yaa: “Leb mam poorẽ, Sʋtãana! Fo yaa gɩdgr mam sor zugu. Bala, fo tagsdã ka Wẽnnaam dẽnd ye, yaa ninsaal dẽnda.” (Mat. 16:22, 23; Tʋʋ. 1:6) A Zeezi sẽn leok woto wã wilga vẽeneg tɩ Wẽnnaam tagsa wã yaa toor fasɩ ne a Sʋɩtãan dũniyã nebã rẽndã. (1 Zã 5:19) A Pɩyɛɛr ra ratame t’a Zeezi tags wa dũniyã neb wʋsgo, rat n yeel tɩ sẽn na n maneg yẽ wã bala. A Zeezi sẽn leok a Pɩyɛɛr to-to wã wilga vẽeneg t’a tagsa wã yaa a Zeova rẽnda, la t’a kõn tol n sak dũniyã neb tagsg ye. w18.11 18 s. a 1-2

Yʋʋmd fãa, neb milyõ-rãmb n tigimd taab dũniyã gill zug n maand Kiristã kũumã tẽegre. La tags-y n ges-y-yã! B sã n tigim taab woto t’a Zeova getẽ, pa neb kʋʋng bal la a ne ye. A nee b ned kam fãa yembr-yembre. Wala makre, a mii sẽn wat-b yʋʋmd ne a to fãa wã. Tõe tɩ kẽer meng yãta nams-toaag tũudmã yĩnga, la b baas n watẽ. Sãnda me pa wat d tigissã fãa, la sã n yaa Kiristã kũumã tẽegrã, b getame tɩ rẽnda b modg n wa. Sã n yaa pipi la ned wa Kiristã kũumã tẽegr me, a Zeova miime, baa yaa nif-na-yã yĩng la a wa-yã. Hakɩɩka, a Zeova sũur nooma wʋsgo, a sã n ne neb kʋʋng woto sẽn tigimd taab a Zeezi kũumã tẽegr yĩngã. (Luk 22:19) Yaa bũmb ning sẽn kɩt tɩ ned kam fãa yãk yam n na n wa wã n noom-a n yɩɩda. Rẽ n tar yõod a nifẽ n yɩɩda. La tõnd yẽ rata ne d sũur fãa t’a Zeova tũnug ne a siglgã n zãms-d a raabã.—Eza. 30:20; Zã 6:45. w19.01 26 s. a 1-3

A Zeezi sak n kii a karen-biisã yĩnga. La pa rẽ bal ye. A sẽn da vɩ to-to wã wilgdame me t’a karen-biisã neer la a baood n yɩɩda. Wala makre, nand tɩ b wa yõk-a wã, a sõsa ne a karen-biisã n sagl-ba, baa a sẽn da yɛ wʋsgo, tɩ sũ-sãan-kãseng me ra tar-a wã. (Luk 22:39-46) Pa nebã sẽn da tõe n maan n sõng-a wã n da pak-a ye. Yaa yẽ mengã sẽn da tõe n maan n sõng-bã n da pak-a n yɩɩda. (Mat. 20:28) Tõnd paam n bee kiris-neb hakɩɩkã tiging pʋgẽ, tɩ tõnd ne d tẽed-n-taasã yaa wa zak a ye rãmba. D zems-n-taarã buud kae ye. Rẽ n so tɩ d kẽesd d sẽkã koɛɛgã mooneg pʋgẽ n boond d taabã, n dat tɩ b wa naag-do. La yaa neb nins sẽn yaa tõnd ‘tẽeb pʋgẽ ba-biisi,’ n pa le wat tigissã, la b pa le yit koɛɛgã moonegã la d rat n sõng n yɩɩda. (Gal. 6:10) D sã n maood n na n sõng-b tɩ b le sɩng tigissã waoongo, wilgdame tɩ d nong-b lame. Sẽn yɩɩd fãa, d sã n sõng tɩ b wa Kiristã kũumã tẽegre. Ned a woto sã n lebg n wa a Zeova sẽn yaa d Ba la d Pe-kɩɩmã nengẽ, d sũur nooma wʋsg wa a Zeova ne a Zeezi. (Mat. 18:14) Tigissã sõngda tõnd tɩ d kell n tall sik-m-menga, raood la nonglem.—Mat. 18:14. w19.01 29 s. 12, 14; 30 s. 15

Yaa Pakã rɩɩbã sẽn kellã la a Zeezi yãk-yã, n wilg b sẽn tog n maand n tẽegd a kũumã yellã. Yɩɩ burã sẽn pa ning rabɩllã la divẽ wã bala. A Zeezi yeela a tʋm-tʋmdbã tɩ burã ne divẽ wã makda yẽ yĩngã ne a zɩɩmã sẽn zems zãngã, a sẽn da na n kõ ka la bilf tɩ yɩ maoong b yĩngã. Tõe t’a Zeezi sẽn wilg a tʋm-tʋmdbã bũmb sẽn yaa nana, b sẽn tog n maand n tẽegd a kũumã yellã pa ling-b ye. Bõe yĩnga? Kiis a wãn sẽn deng rẽ, a Zeezi ra kẽnga a Lazaar ne a Mart la a Maari sẽn da yaa a zo-rãmbã nengẽ. Baraarã, a wa n sɩnga nebã zãmsgo. A Mart ra bee be, la sẽn da pak-a wã yaa a segl rɩɩb sõma b sãanã yĩnga. A Zeezi sẽn bãng rẽ wã, a sagl-a lame n na n sõng-a t’a bãng tɩ wakat ninga, pa tɩlɛ tɩ f bao n segl rɩ-bɛd ye. (Luk 10:40-42) A kũumã sẽn wa n ket tɩ lɛɛr a wãnã, yẽ mengã tũu saglg ning a sẽn da kõ a Martã. A wilga kiris-nebã bũmb sẽn yaa nana, b sẽn tog maand n tẽegd a kũumã yelle. w19.01 20-21 s. a 3-4

A Zeova maana bũmb sẽn yɩɩg a Zeezi sẽn da tẽedã. A vʋʋg-a lame t’a leb saasẽ, n kɩt t’a paam “waoogr sẽn yaa kãsenga.” A kɩtame me t’a pa le tõe n ki a bada! (Fili. 2:9; 1 Tɩm. 6:16) Ad sɩd yɩɩ keoor tɛkẽ! Bõe n na n sõng-do, tɩ d ra bao dũniyã neb pẽgrã? D tẽegdẽ tɩ wakat fãa a Zeova pẽgda neb nins sẽn tũud-a ne b sũur fãa wã la a keood-ba, la tɩ naoor wʋsgo, yaa keoor b sẽn da pa tẽede. D pa tõe n bãng bark ka tɛkã d sẽn na n wa paamã zãng fasɩ ye. La nananda, d maooda ne dũni-kãngã zu-loees buud toor-toorã. Rẽ n so tɩ d segd n tẽegd wakat fãa tɩ dũni-kãngã loogdame, la tɩ yʋʋr bɩ ziir buud fãa d sẽn tõe n paam dũniyã pʋgẽ wã na n wa saame. (1 Zã 2:17) A Zeova sẽn yaa d Ba sẽn nong-dã ‘ka ka-tɩrlem soaba, n na n yĩm d tʋʋm sõamyã, wall nonglem ning d sẽn wilg a yʋʋrã yĩngã’ ye.—Ebre. 6:10. w18.07 11 s. 17-18

A Zeezi ra rata ne a sũur fãa t’a karen-biisã yɩ yam a yembre. A sẽn na n naag-b n dɩ nand tɩ b wa yõk-a wã, a togsa gomd sẽn wilgd rẽ. Baraarã, a sɩd pʋʋsame n kos t’a karen-biisã yɩ yembr wa yẽ ne a Ba wã. A Zeezi karen-biisã sã n yaa yam a yembre, na n yɩɩ kaset tɩ yaa a Zeova n tʋm-a. Yaa b sẽn na n nong taabã n na n wilg tɩ b yaa a Zeezi karen-biis hakɩɩka, la kɩt me tɩ b maneg n yɩ yam a ye. (Zã 13:34, 35) Baraarã, a Zeezi sẽn gom zems taab yam a yembrã yell n yɩlmã, a bee bʋʋm. A mikame t’a tʋm-tʋmdbã ra pa tolg n yaa noor a yembr ye. Wala makre, b “wẽe nokoeemd ne taab wʋsg n dat n bãng ned ning b sẽn tog n ges wa kãsem bãmb sʋkã,” la ra pa b pipi ye. (Luk 22:24-27; Mark 9:33, 34) Vugr me, a Zak ne a Zã kosa a Zeezi t’a sã n wa rɩt a naamã bɩ a kɩt tɩ bãmb ned a ye zĩnd a goabga, t’a to wã zĩnd a rɩtgo.—Mark 10:35-40. w18.06 8 s. a 1-2

A Zeova ratame tɩ pag ne a sɩd bɩɩs nonglem ne taaba, hal tɩ yɩ nonglem sẽn na n kaoos b yõor tɛka. (Mat. 19:3-6) Ned sã n zãmb a pag wall a sɩda, yaa wẽnem tɛkẽ! Rẽ n so tɩ tõod piigã sʋka, yopoe-n-soabã gɩdg yoobo. (Tõo. 5:18) Sẽn zãmb-a a to wã ‘beega Wẽnnaam,’ la a maan a to wã wẽng wʋsgo. (Sɩng. 39:7-9) Yellã tõe n namsa a to wã n kaoos yʋʋm ka tɛka. Kambã neerã yell me ra paka a Zeova wʋsgo. A Zeova yeela roagdbã tɩ b segd n gesame tɩ b kambã paamd rɩɩb la bũmb a taab sẽn yaa tɩlɛ, la b sõng-b me tɩ b paam zood sõma ne yẽ. Roagdbã ra segd n tũnuga ne segb b sẽn paam fãa, n sõng b kambã tɩ b nong a Zeova, la b nong a tõodã. (Tõo. 6:6-9; 7:13) Roagdbã ra pa segd n tags tɩ sẽn yaa bãmb n dog kambã, b tõe n nams-b lame, wall b maan b sẽn dat ne-b ye. B ra segd n get-b-la wa kũun a Zeova sẽn kõ-ba, n nong-b wʋsgo.—Yɩɩn. 127: 3. w19.02 21 s. a 5, 7

A Zoob ra tagsda Wẽnnaam sẽn na n wa keo-a wã yelle, tɩ rẽ sõng-a t’a kell n yɩ burkĩna. A ra miime t’a sẽn yaa burkĩnã nooma Wẽnnaam. Baa ne a sẽn da namsdã, a ra kɩsa sɩd t’a Zeova na n wa keo-a lame. Sãmbg kae t’a sẽn kɩs sɩd woto wã sõng-a lame t’a kell n yɩ burkĩna. A Zeova sũur yɩɩ noog wʋsg ne a Zoob a burkĩndã yĩnga, hal t’a ning-a bark tɩ seke, baa a sẽn da ket n yaa ned sẽn pa zems zãngã. (Zoob 42:12-17; Zak 5:11) La bark sẽn yɩɩd rẽ la a Zoob na n wa paame. Wẽnnaam pa toeem ye. (Mal. 3:6) D sã n tẽegd wakat fãa tɩ d sẽn yaa burkĩmbã noom-a-la wʋsgo, la t’a na n keo-d-la rẽ yĩnga, na n sõng-d lame tɩ d ra tol n yĩm tɩ d beoog na n yɩɩ neer ye. (1 Tes. 5:8, 9) Wakat ninga, d tõe n wa tagsdame tɩ d yaa d ye n maood n na n yɩ burkĩna. La d ra tol n yĩm tɩ d pa d yembr ye. D tara tẽed-n-taas bãmb milyõ-rãmb dũniyã gill zug sẽn yaa burkĩmba. Sẽn paase, pagb la rap sẽn zĩnd pĩnd wẽndẽ me kell n yɩɩ burkĩmba, baa kũum taoore.—Ebre. 11:36-38; 12:1. w19.02 7 s. 15-16

A Zeezi kũumã tẽegr wakatã sẽn loogdã, yɩta sõma tɩ d ned kam fãa sok a meng yaa: ‘Nonglmã wɛɛngẽ, bõe la m tõe n maan n maneg n dɩk a Zeezi togs-n-taare? Mam wae n tagsda m tẽed-n-taasã neer yell n yɩɩd m mengã bɩ? M datame tɩ m tẽed-n-taasã maan sẽn yɩɩd b pãng bɩ, bɩ m tẽegdame tɩ b ned kam fãa tara a sẽn pa tõe?’ Bɩ d ket n dɩkd a Zeezi togs-n-taare, n kʋmd taab nimbãanega. D pa na n maan a Zeezi Kirist kũumã tẽegr wakat sẽn kõn sa ye. A Zeezi sã n wa “wa” to-kãsengã sasa, a na n tigma a “nin-tũusdsã” sẽn ket tẽngã zugã tɩ b kẽng saasẽ. Rẽ tɛka, d pa na n le maand a kũumã tẽegr ye. (1 Kor. 11:26; Mat. 24:31) D tõe n kɩsa sɩd tɩ baa d sã n wa pa le maand Kiristã kũumã tẽegre, d na n ket n tẽegdame tɩ wilgdame tɩ ninsaal kae sẽn tall sik-m-meng ne raood la nonglem n ta a Zeezi ye. Wakat kãnga, sãmbg kae tɩ sẽn da maand-b Kiristã kũumã tẽegrã na n gomda rẽ yelle, neb nins fãa sẽn vɩ wã nafr yĩnga. La sẽn na yɩl tɩ Kiristã kũumã tẽegr naf tõnd masã menga, d segd n yãka yam n na n dɩk a togs-n-taar ne d sũur fãa, n tall sik-m-menga, raood la nonglem. w19.01 25 s. 17-19

D rɩk makr ne d yĩnsã laafɩ wã, tɩ rẽ na n sõng-d lame tɩ d bãng tɩ tara yõod wʋsg tɩ d gũusd n get d sẽn sɩd yaa a soab d sũurã pʋgẽ wã. Pipi, sẽn na yɩl tɩ d yĩnsã taar laafɩ sõma, d segd n dɩta rɩ-sõma la d wae n wɩsgd d yĩnsã. Woto me, sẽn na yɩl tɩ d tẽebã kell n tall pãnga, d segd n dɩlgda d yamã sõma ne Wẽnnaam goamã, la d wɩngd ne bũmb nins sẽn wilgd tɩ d tẽeda Wẽnnaamã. Sẽn na yɩl n tõog n maand woto, yaa tɩlɛ tɩ d tũud d sẽn zãmsdã, la d gomd d sẽn tẽed bũmb ninsã yelle. (Rom. 10:8-10; Zak 2:26) Yiib-n-soaba, d tõe n tagsdame tɩ d tara laafɩ, mik bãag n be d yĩnsã pʋgẽ tɩ d pa miẽ ye. Woto me, d tõe n geta d sẽn minim n maand tũudmã pʋgẽ wã, n tagsdẽ tɩ d tẽebã tara pãnga, mik tʋls-wẽns n paamd pãng d sũurã pʋgẽ. (1 Kor. 10:12; Zak 1:14, 15) Segdame tɩ d tẽegdẽ t’a Sʋɩtãan raabã yaa a na tõog tɩ d tagsd wa yẽnda. w19.01 15 s. a 4-5

Tõnd me tõe n soka d meng yaa: ‘Mam maanda wa Samari nedã bɩ? Ned sã n namsdẽ, m kʋmda a nimbãaneg bɩ? (Luk 10:30-35) Nimbãan-zoeerã wɛɛngẽ, bõe la m tõe n maan n paase? Wala makre, m tõe n sõngda m tẽed-n-taas nins sẽn kʋʋlã, sẽn yaa-b pʋg-kõapã, la kamb nins roagdb sẽn pa tũud a Zeova wã bɩ? M tõeeme n mi n gom gomd sẽn na n ‘paas neb nins raood sẽn boogã raood’ bɩ?’ (1 Tes. 5:14; Zak 1:27) D sã n kʋmd nebã nimbãanega, n sõngd-ba, yaa wa d sẽn kõt-b kũuni. A Zeezi yaool n yeelame tɩ d sã n kõ d to bũmbu, d paamda sũ-noogo. Sẽn paas rẽ, d miime t’a Zeova sũur nooma ne-do. (Tʋʋ. 20:35; Ebre. 13:16) Rĩm a Davɩɩd yeelame t’a Zeova “na n gũu” sẽn tagsd-a pãn-komsem soab yelle, la a “kɩt t’a vɩɩmde,” la a paas t’a soab “na n paama sũ-noog dũniyã zugu.” (Yɩɩn. 41:2, 3) D sã n kʋmd d taabã nimbãaneg n sõngd-ba, tõnd me na n paamame t’a Zeova zoe d nimbãanega, tɩ rẽ na n wa kɩt tɩ d paam n vɩɩmd ne sũ-noog wakat sẽn kõn sa.—Zak 2:13. w18.09 19 s. 11-12

Daar a ye, logtor n togs a Yosiko sẽn yaa d tẽed-n-taagã koe-beedo. A yeel-a lame tɩ ka ne kiis a wãn bala, a na n maana kaalem. A Yosiko manesem yɩɩ wãna? A tẽega vɛrse a sẽn nong wʋsgo. Yaa rũndã daar vɛrse wã. A bʋka a koɛɛg n yeel logtorã tɩ rabeem pa tar-a, bala a Zeova gãda yẽ nugu. Vɛrse wã goamã sẽn kengd raoodã sõnga a Yosiko t’a teeg a Zeova zãng-zãng a yellã pʋgẽ. Vɛrse wã tõe n sõnga tõnd me tɩ d kell n tall sũur pʋgẽ bãane, d sã n wa tar zu-loe-kɛgenga. Wãn to? Bɩ d reng n bao n bãng bũmb ning sẽn kɩt tɩ Wẽnnaam kɩt t’a Ezayi gʋls gom-kãensa wã. A Zeova sẽn kɩt t’a Ezayi gʋls gom-kãensa wã, pipi, yaa sẽn na n keng zʋɩf-rãmbã b sẽn da na n wa yõg n kẽng Babilondã. La a kɩtame tɩ b bĩng gom-kãensã sõma sẽn na yɩl tɩ sõng-ba, b sãn wa be Babilonde. La pa bãmb sõngr yĩng bal ye. Yaa sẽn na n tũ-b yẽ wã fãa sõngr yĩnga. (Eza. 40:8; Rom. 15:4) Yaa masã meng la yaa tɩlɛ tɩ d paam t’a Ezayi sebrã goam keng d raoodo. Bala, yɛlã lebga kãn-kãe hal tɩ vɩɩmã yaa toogo.—2 Tɩm. 3:1. w19.01 2 s. a 1-2

Baa pag ne a sɩd sã n pa le be ne taaba, b ket n yaa yĩng a yembre, bala kãadmã pa kao ye. Ned fãa na n maoo ne zu-loees wa d sẽn zoe n togsã. Tʋm-tʋmd a Poll wilga bũmb a to me sẽn kɩt tɩ b tõe n yãk yam n na n kell n zĩnd ne taabã. Ad a sẽn yeele: “Bala, pagã kɩtame t’a sɩdã sẽn ka tẽedã lebg nin-sõngo, la d ba-bi-raoogã kɩtdame t’a pagã sẽn ka tẽedã lebg nin-sõngo. Sã n ka rẽ, yãmb kambã na n yɩɩ bõn-dẽgdo, tɩ b yaool n yaa nin-sõamyã.” (1 Kor. 7:14) Kiris-neb sẽn kell n zĩnd ne b pag wall b sɩd sẽn da pa tũud a Zeova, baa sẽn da yaa toog wʋsgã sõor waoogame. B tõe n kõo kaset tɩ b sẽn wõr b mens woto wã pa yɩ zaalem, bala b to wã wa n lebga a Zeova Kaset soaba. (1 Kor. 7:16; 1 Pɩy. 3:1, 2) Kiris-nebã tigimsã sẽn be dũniyã gill zugã pida ne neb sẽn tar sũ-noog b kãadmã pʋgẽ. Yãmb tigingã pʋgẽ menga, y tog n mii neb wʋsg kãadem sẽn tar barka, n kõt sũ-noogo. Yaa pʋg-sɩdb sẽn maand sɩda, n nong b pagbã, tɩ pagbã me nong b sɩdbã, n waoogd-ba. Woto yaa kaset tɩ kãadmã waoogrã yaa bũmb sẽn tõe.—Ebre. 13:4. w18.12 14 s. 18-19

Edɛn võor yaa “nuura.” Sɩd me, zẽedã zĩig ra yaa nuura zĩiga. Rɩɩb ra gãeeme, zĩigã ra yaa neere, tɩ rũms buud toor-toor ra vɩ ne ninsaal hal tɩ be yamleoogo. (Sɩng. 1:29-31) Gɛrkã pʋgẽ, b lebga ebre wã gom-bil ning b sẽn lebg tɩ “zẽed zĩigã” tɩ paradeisos. Sebr a ye goma gɛrkã gom-bil-kãngã yeele, n yeel tɩ yaa ‘zĩig sẽn yaa yalenga, n yaa neere, n pa sãamd baa bilfu, tɩ bũmb pa tõe n maan ned beenẽ, tɩ tɩɩs be zĩig fãa, tɩ b wʋsg womd biisi, tɩ koomã sẽn zoet n zãgsd tɩɩsã yaa yɩlgemde, tɩ mood be sõma, tɩ yãgs la piis wãbd b yam.’ (Ges-y Sɩng. 2:15, 16) Yaa zĩ-neer a woto pʋgẽ la Wẽnnaam ning a Ãdem ne a Awa, la b kɩɩsa Wẽnnaam, t’a rig-b n yiisi. Bãmb ne b kambã la b yagensã bõna arzãnã. (Sɩng. 3:23, 24) Ned ra pa le get zẽedã zĩig yell ye. Baa ne rẽ, wõnda a kell n paa woto n tãag a Nowe wakatẽ sa-kãsengã. w18.12 3-4 s. a 3-5

Roagdbã wilgda b kambã tɩ b tog n yɩɩ pʋ-peelem dãmba, neb sẽn nong tʋʋm la b waoogd b taabã. Kambã sã n sak n tũ minim-sõma nins b roagdbã sẽn wilg-bã, na n sõng-b lame tɩ b bãngd n yãkd yam, la b gind zu-loees la yɩɩre, n da wa maand b bãngẽ ye. Tõnd me yaa a Zeova kamba, t’a rat tɩ d vɩɩmã tall barka. (Eza. 48:18) Rẽ n so t’a kõt-d noy la sagls sẽn wilgd d sẽn tog n vɩɩmd to-to, la d manesem sẽn tog n yɩ to-to ne d taabã. Bũmb fãa pʋgẽ, a ratame tɩ tõnd bao n bãng yẽ tagsg sẽn yaa a soaba, la d vɩɩmd tɩ zems ne rẽ. Pa sẽn na n weoog-d ye. Pʋd n yaa sẽn na n sõng-do, tɩ bũmb fãa pʋgẽ bɩ d tõogd n tagsd neere, n bãngd sẽn segde. (Yɩɩn. 92:6; Yel. 2:1-5; Eza. 55:9) Woto, d sẽn na n yãk yam ninsã na n tata Wẽnnaam yam, la noom tõnd me, tɩ kõt-d sũ-noogo. (Yɩɩn. 1:2, 3) Hakɩɩka, d tagsa wã sã n yaa a Zeova rẽndã, nafa wã waoogame! w18.11 19-20 s. a 7-8

Sẽn na yɩl n kell n kẽn sɩdã pʋgẽ, d pa segd n bas tɩ sẽn pa tũud-b a Zeova wã tõog tɩ d maan b sẽn dat ye. D sẽn bãng sɩdã tɛka, tõnd ne d zo-rãmb wall d roagdb nins sẽn pa tũud a Zeova wã pa le noom wa pĩndã ye. Kẽer pa paoogd tõnd d sẽn toeem tũudmã yĩnga, la sãnda yẽ tolg n namsd-d lame. D roagdba, d tʋmd-n-taase, wall d karen-bi-taas tõe n wa ratame tɩ d naag-b n maan kibs kẽere. Bõe n na n sõng-do, tɩ baa b pẽdgd tõnd bɩ d ra naag-b n maan rog-n-migs la kibs-rãmb sẽn pa tat a Zeova yam? Wakat fãa, d segd n tẽegda bũmb ning sẽn kɩt tɩ kibs la rog-n-migs sãnda pa tat a Zeova yamã. D tõe n maana vaeesg siglgã sɛb pʋsẽ, n lebg n tẽeg sẽn sɩng to-to tɩ nebã wa maand kibs kẽerã, tɩ sõng-do. D sã n bʋgs bũmb ning Biiblã sẽn yete, tɩ kɩt tɩ d pa naagd n maan kibs-kãensa wã, na n sõng-d lame tɩ d bas d yam tɩ d maanda sẽn “tat Zu-soabã yam.” (Efɛ. 5:10) D sã n teeg a Zeova la d kɩs sɩd t’a Gomdã yaa sɩda, d pa na n zoe ninsaal ye.—Yel. 29:25. w18.11 11 s. 10, 12

Bũmb ning sã n tiig n toeem d vɩɩmã pʋgẽ, d tõe n basame tɩ lebg yɩɩr wʋsg ne-do, hal tɩ yaa rẽ yell bal la d tagsda. A Zozɛf ra tõe n maana woto. La a yãka yam n na n maan a sẽn tõe fãa a yellã pʋgẽ. Woto la a Zeova na n paam n ning-a barka. Bãensã roogẽ, a tʋma tʋʋm nins fãa bi-bees roog gũudbã naab sẽn kõ-a wã ne a sũur fãa, wa a sẽn da tʋmd to-to a sẽn wa n yaa a Potifaar yambã. (Sɩng. 39:21, 22) Wa a Zozɛfe, yell ning tõe n wa paama tõnd me, tɩ d pa tar a tɩɩm ye. La d sã n kell n maan sũ-mare, la d maan d sẽn tõe wã fãa, a Zeova paamd n ning-d-la barka. (Yɩɩn. 37:5) Yaa sɩd tɩ wakat ninga, d tõeeme n ‘ka mi d sẽn na n maanega,’ la d pa na n tol n ‘boog raoodo,’ n pa le tẽed manegr ye. (2 Kor. 4:8) A Zeova na n kell n zĩnda ne-do, sẽn yɩɩd fãa, d sã n kell n wɩng ne a tʋʋmdã. w18.10 29 s. 11, 13

Ned yãmb sẽn mi sõma la y nand wʋsg sã n yĩm y yʋʋrã, wall a pʋd n yã yãmb n pa bãng-yã, na yɩ-y noog sɩda? Ayo! Tõe n sãama y sũur wʋsg menga. Bõe yĩnga? Bala, ninsaal buud fãa ratame t’a taabã nand-a. La pa rẽ bal ye. D ratame me tɩ b bãng d sẽn yaa ned ning buudã, la b bãng bũmb kẽer d sẽn tõog n maane, n pẽg-do. (Sõd. 11:16; Zoob 31:6) La d sẽn pa zems zãngã, d sã n pa gũusi, d tõe n wa rata pẽgrã tɩ loog nugu. A Sʋɩtãan ne a dũniyã tõe n wa kɩtame tɩ d baood yʋʋr la ziir wʋsgo, hal n pa le tẽegdẽ tɩ yaa d Ba a Zeova sẽn be saasẽ wã n tog ne ziir la waoogr ye.—Vẽn. 4:11. w18.07 7 s. a 1-2

A Sʋɩtãan ne a zĩn-dãmbã sẽn pirsd dũniyã nin-bɛdã tɩ b nong ziri la zãmbã pa lingd tõnd ye. (1 Tɩm. 4:1, 2) Tũudmã taoor dãmb ziri wã n tolg n yaa yell n yɩɩda, bala tõe n kɩtame tɩ sẽn tẽed-b bãmb goamã wa kong vɩɩm sẽn ka sɛtã. Ned sã n tẽ bũmb b sẽn zãms-a tɩ yaool n yaa ziri, n maan Wẽnnaam sẽn kisi, tõe n kɩtame t’a pa paam vɩɩm sẽn kõn sa wã ye. (Ooze 4:9) A Zeezi ra miime t’a wakatẽ tũudmã taoor dãmb ra belgda nebã. A yeel-b-la vẽeneg yaa: “Yãmba, tõog karen-saam-dãmba, la Fariizẽ-dãmb sẽn yaa zãmb dãmba, yãmb na paam toogo!” A wilga b sẽn na n paam toogã võore. A yeelame tɩ b ‘saagda ko-kãsengã ne tẽngã fãa n baood ned sẽn na sak bãmb kaorengã,’ la tɩ b sã n paam neda, b kɩtdame t’a lebg “wẽng n yɩɩd bãmb naoor a yiibu,” n tog ne sãoong wakat sẽn kõn sa yĩnga. (Mat. 23:15) A Zeezi pʋd n yeela a wakatẽ tũudmã taoor dãmb tɩ b yaa wa b ba a Sʋɩtãan sẽn yaa ‘nin-kʋʋdã.’—Zã 8:44. w18.10 7 s. a 5-6

A Zeezi gomdã võor yaa bõe? Ad a sẽn yeele: “Maan-y sũ-noog la y kɩdme, yãmb keoorã sẽn be Wẽnnaam nengẽ wã sẽn yaa kãsengã yĩnga. Bala yaa woto me la b nams no-rɛɛsdbã sẽn zĩnd pĩndã.” (Mat. 5:12) Vugri, Zʋɩf-rãmbã bʋ-kaoodbã kɩtame tɩ b yõg a Zeezi tʋm-tʋmdbã n pãbe, la b yeel-b tɩ b ra le moon koe-noogã ye. La Biiblã yeelame tɩ tʋm-tʋmdbã “yii kaoreng yɛl-bʋ-bʋʋdbã taoor ne sũ-noogo.” Yaa vẽeneg tɩ pa b sẽn pãb-bã yĩng ye. Yaa “b sẽn ges tɩ bãmb zemsame tɩ paam namsg a Zeezi yʋʋrã yĩngã.” (Tʋʋ. 5:41) Rũndã-rũndã me, b sã n namsd a Zeova nin-buiidã b sẽn tũud-a wã yĩnga, b tõogda toog ne sũ-noogo. (Zak 1:2-4) Yaa sɩd tɩ wa tʋm-tʋmdbã, d sũ-noogã pa b sẽn namsd tõndã yĩng ye. La d sã n kell n maan sɩd ne a Zeova baa ne namsgã, a na n kõ-d-la raood tɩ d tõog toogo, tɩ d sũ-noogã ra boog ye. D sã n mi t’a Zeova sẽn yaa “sũ-noog buud fãa yẽgrã” sũur yaa noog ne-do, d tara sũ-noogo, baa b namsd tõnd d tũudmã yĩnga, wall yaa d zakã rãmb n namsd tõndo.—1 Tɩm. 1:11, Sebr Sõngo. w18.09 21 s. 18-20

Rũndã-rũndã, yɛlã yaa kãn-kãe, hal tɩ d vɩɩmã pid ne “namsg la nimbãaneg bala,” tɩ kɩt tɩ neb wʋsg tagsdẽ meng tɩ b sẽn kiid n são. (2 Tɩm. 3:1-5) Yʋʋmd pʋgẽ, neb tus 800 la zak n yãkd b mens yõya, rat n yeel tɩ segõnd 40 fãa, ned n kʋʋd a menga. Bʋko, d tẽed-n-taas meng n wa n tags tɩ b sẽn kiid n são, n wa baas n kʋ b mense. Baa d tẽed-n-taasã fãa la bal sẽn pa tagsd tɩ b sẽn kiid n são wã, wʋsg maooda ne zu-loeese, n dat tɩ b wilg-b tɩ b nong-b lame, tɩ keng b raoodo. B namsda kẽer b tũudmã yĩnga, wall b yaand-ba. Sãnda me nengẽ, yaa b tʋʋmã zĩisẽ la b weoogd-ba, wall b wɩt-ba. Wʋsg me maooda ne yaamse, bala b tʋmdame n zʋʋgd b sigbã wakate, wall tʋʋmã taoor soab pʋgd n pẽdgd-b-la tʋʋmã poorẽ. D tẽed-n-taas a taab me n maood ne zak pʋgẽ zu-loeese. Tõe tɩ b pagã wall b sɩdã pa tũud a Zeova, n tar-b n gomd wakat fãa. Zu-loe-kãensã la a taab kɩtame tɩ d tẽed-n-taas wʋsg raood boogdẽ, tɩ b tagsdẽ meng tɩ b ka võor ye. w18.09 13 s. a 3, 5

Roagdb nins sẽn yaa kiris-nebã sã n sõng b kambã tɩ b yãk b sẽn na n wa maan a Zeova tũudmã pʋgẽ, b naaga a Zeova n tʋmdẽ. Roagdb wʋsg maana woto, tɩ b kambã sɩd yãk yam n kẽes b meng zãng Wẽnnaam tʋʋmdã pʋgẽ, hal tɩ kẽer meng tɩ be tẽn-zãrsẽ. B lebga misioneer-dãmba, so-pakdb sẽn tɩ sõngd zĩis koe-moondbã sẽn pa waooge, pa rẽ bɩ Betɛllẽ tʋm-tʋmdba. Yaa sɩd tɩ zãrmã kɩtame tɩ zakã rãmb pa le tõe n yãt taab tao-tao ye. La roagdbã sẽn pa baood n mens nafr balã, b kengda kambã raoodo, n dat tɩ b ket n wɩngd ne b tʋʋmdã. Bõe yĩnga? Bala, b sũy yaa noog wʋsgo, b sẽn mi tɩ b kambã lʋɩɩsda Rĩungã tʋʋmã taoor b vɩɩmã pʋgẽ wã. B tagsda wa a Ana. A ra yeelame t’a rɩka a biig a Sãmwɛll n kõ a Zeova. Roagdbã sẽn paam n tõe n naag a Zeova n tʋmd woto wã, b getame tɩ yaa b zu-zẽkre!—1 Sãm. 1:28. w18.08 24 s. a 4

A Zeezi pa yeel tɩ pa tõe ye. Vugr me, a yeelame yaa: “Bark bee yãmb sẽn yaa naong rãmba zutu, bala, Wẽnnaam soolem yaa yãmb dẽnda.” (Luk 6:20) La woto pa rat n yeel tɩ naong rãmbã fãa na n sak n tũu a goamã, n paam Wẽnnaam barkã ye. Naong rãmb wʋsg n zãgs tɩ b kõn tũ a Zeezi ye. Dẽnd yaa vẽeneg tɩ d pa tõe n tik ned tarem n bãng a sã n tara zood sõma ne a Zeova bɩ a pa tar ye. A Zeova nin-buiidã sʋka, arzɛk rãmb beeme, tɩ naong rãmb me beẽ. La b fãa nonga a Zeova, n tũud-a ne b sũur fãa. Biiblã sagenda kiris-neb nins nus sẽn zãadã tɩ b ‘da rɩk b teegrã n teeg arzegs b sẽn ka tar a hakɩɩkã,’ la tɩ b “teeg Wẽnnaam.” (1 Tɩm. 6:17-19) La a sagenda Wẽnnaam nin-buiidã fãa, sẽn tar-bã la sẽn pa tar-bã, tɩ b gũus n da wa nong arzɛgsã ye. (1 Tɩm. 6:9, 10) D sã n mao tɩ d tagsg sẽn yaa a soab d tẽed-n-taasã zugã yaa yembr ne a Zeova, d pa na n wa rat n tik b sẽn tar wall b sẽn pa tar n kao b bʋʋd ye. w18.08 10-11 s. 11-12

D rata ne d sũur fãa n wilg a Zeova tɩ d sẽn paam n yaa a Kaset soabã noom-d lame. D miime tɩ d sẽn dɩk d meng n kõ-a ne yamleoog n na n tũ-a wã yaa bõn-sõng tɛkẽ! D maooda d pãng tɛk n pa maand sẽn yaa wẽng ye. D nonga d tẽed-n-taasã la d waoogd-ba, bala d miime tɩ bãmb me yaa a Zeova neba. (Rom. 12:10) Biiblã yeelame t’a Zeova ‘ka basd a nebã ye.’ (Yɩɩn. 94:14) Woto kɩtame tɩ d tõe n bas d yam tɩ sẽn wa n yaa yell ning fãa n paam-do, a Zeova na n sõng-d lame. Baa kũum pa tõe n welg tõnd ne a Zeova nonglmã ye. (Rom. 8:38, 39) Ad Biiblã sẽn paase: “Tõnd vɩ tɩ d yaa kũum me, tõnd yaa Zu-soabã rẽnda.” (Rom. 14:8) Yaa ne d sũur fãa la d gũud wakat ning a Zeova sẽn na n vʋʋg a zo-rãmb nins sẽn maan kaalmã. (Mat. 22:32) La baa masã menga, d zoe n paamda bark ka tɛka. Hakɩɩka, wa Biiblã sẽn yeelã, “bark bee soolem ning sẽn tar Sẽn-Ka-Saab tɩ yaa a Wẽnnaamã zugu! Bark bee Sẽn-Ka-Saab sẽn yãk neb nins tɩ b yaa b rẽnda zutu!”—Yɩɩn. 33:12. w18.07 26 s. 18-19

Neb kẽer tõe n tagsdame tɩ sẽn mik tɩ bũmb kẽer wɛɛngẽ, wala karengã wall tʋʋmã yaa ned fãa n tog n yãk a toorẽ yamã, b tara sor n na n maan b sẽn date, b sũur kasetã sã n pa ningd-b taale. Tõe tɩ b tẽra bũmb a Poll sẽn da yeel Korẽnt kiris-nebã. A ra sokame yaa: “Bõe yĩng tɩ sũur kaset sẽn ka mam dẽnd na n wa kao mam lohorem bʋʋdo?” (1 Kor. 10:29) Yaa sɩd tɩ karengã la tʋʋmã wɛɛngẽ, ned fãa tara lohorem n tõe n yãk a sẽn date. Baasgo, d pa segd n yĩm tɩ bũmb fãa pʋgẽ, d pa tar lohorem zãng-zãng n tõe maan d yam, la tɩ d yam-yãkr fãa wata ne bi-sõma wall bi-wẽns ye. Rẽ n so t’a Poll yeel goam nins sẽn yaa rũndã daar vɛrse wã Woto wilgdame tɩ baa d tar sor n yãkd d sẽn date, d pa segd n lʋɩɩs rẽ taoor n maan sẽn noom tõnd bal ye. D segd n tẽegame tɩ bũmb kẽer n be, n tar yõod n yɩɩd tõnd mengã raabã. w18.04 10 s. 10

Kiris-ned tõe n yetame t’a tũuda a Zeova, n yaool n maand bũmb kẽer a Zeova sẽn kisi. (Zʋʋd 11) A tõe n yit n moonda koɛɛgã, la a kẽnd tigissã n pa vaandẽ, n yaool n wae n tagsd yoob yelle, wall a yaa rat-wʋsg soaba, pa rẽ bɩ a tugd beem ne a tẽed-n-taaga. (1 Zã 2:15-17; 3:15) Woto fãa tõe n wa kɩtame tɩ ned maan sẽn yaa wẽnga. D taabã tõeeme n pa mi d sẽn tagsd bũmb ninsã, wall d sẽn maandã ye. La a Zeova yẽ mii bũmb fãa. Sã n pa ne d sũur fãa la d be a poorẽ, a miime. (Zer. 17:9, 10) La baa d sã n wa maan yel-wẽnde, a Zeova pa yɩt tao-tao n daag tõnd n bas ye. Ned sã n wa sɩng bʋdgre, a Zeova keoogd-a lame. A yet-a lame yaa: ‘Lebg n wa mam nengẽ.’ A Zeova miime tɩ d mi n maooda ne pãn-komsem. Rẽ n so t’a rat tɩ d zab ne sẽn yaa wẽngã. (Eza. 55:7) D sã n maan woto, a na n sõng-d lame, n kõ-d pãng la raood tɩ d “tõog” d tʋls-wẽnsã.—Sɩng. 4:7. w18.07 18 s. a 5-6