Sig-noya

Yʋʋma noorã, yɩɩ tɩlɛ ne neb wʋsg tɩ b zoe n bas b ba-yiri. Y tõe n deng n bao n bãnga y sẽn tõe n pʋʋs-b to-to b buud-gomdã pʋgẽ. Y tõeeme meng n zãms bũmb a wãn y sẽn tõe n yeel tɩ kɩt tɩ b tʋlg n kelg-yã. Woto, y tõogd n wilg-b-la video-rãmb la sɛb sẽn be jw.org pʋgẽ ne b buud-gomdã. A Zeova sõngda tõnd tɩ d paamd saglse, n tõe n bãng n taas nebã koɛɛgã tɩ kẽ-ba. Wala makre, sagls nins d sẽn paamd Kiris-nebã vɩɩm la b tʋʋma tigsgã sasa wã. Yaa sagls sẽn sõngd tɩ d tõe n gom ne bas-m-yam, n tõe n lebg n tɩ sõs ne nebã n paase, la d tõog n sɩng Biiblã zãmsg ne-ba. Roagdba, sõng-y y kambã tɩ b tõe n leok ne b mens gom-biisi, tɩ rẽ, bãmb me vẽenemã yãgdame. Neb n lebg a Zeova Kaset rãmba, b sẽn wʋm kom-bõoneg sẽn gom n wilg b tẽebo, tɩ b neẽ tɩ yaa sẽn be b sũyẽ la b sẽn yetã.—1 Kor. 14:25. w18.06 22-23 s. a 7-9

Yɩta sõma tɩ d tẽeg tɩ wakat n zĩnd tɩ tõnd fãa ra pa mi Wẽnnaam, n da zãr ne-a. (Efɛ. 2:12) La a Zeova ‘loee tõnd ne nonglem loeese,’ n tɛ tõnd n pẽneg a menga. (Ooze 11:4; Zã 6:44) A Zeezi me reega tõnd neere. A kɩtame tɩ d paam n lebg Wẽnnaam zakã neda. A Zeezi sẽn deeg tõnd neer woto baa ne d sẽn pa zems zãngã, d pa segd n sãbs neda, n pa rat n sak t’a naag-d ye. Dũni-kãngã sɛɛbã sẽn tar kolgrã, welsgã ne sãbs-taabã la kisgrã na n maneg n paasame. (Gal. 5:19-21; 2 Tɩm. 3:13) La d sẽn tũud a Zeova wã, d kot-a lame t’a kõ-d “yam sẽn yit yĩngrã,” tɩ sõng-d tɩ d ra bakd nebã, la sõng me tɩ laafɩ zĩnd d sʋka. (Zak 3:17, 18) D sakd n yõgda zood ne tẽns a taab neba, n sakd b minimdã, la d tõe meng n zãms b buud-gomdã, hal tɩ noom-do. D sẽn maand woto wã, kɩtame tɩ laafɩ wã sẽn be d sʋkã yaa wa kʋɩlg koom sẽn zoete, tɩ d tɩrlmã yaa wa ko-kãsengã ko-wiisi.—Eza. 48:17, 18. w18.06 12 s. 18-19

Rom sodaag sã n da rat n kẽng zabr n pa reng n wid a neooda, a pa segl n sa ye. Rom sodaasã neooda wã tẽngr ra yaa gãnd a tãab b sẽn pʋgl taab n sẽ. Sodaag sã n wid-b n na n kẽne, pa namsd-a, a pa yɛɛsd a na wa n salg me. Neooda wã sẽn maan to-to wã kɩtame tɩ ra pa sãamd nana ye. Rom sodaag neooda ra sõngd-a lame t’a tõog n kẽn n kẽng zabrã zĩigẽ. Woto me, “laafɩ koe-noogã togsg ratem” sẽn yaa kiris-ned neooda wã sõngd-a lame t’a tɩ taas laafɩ koɛɛgã. (Eza. 52:7; Rom. 10:15) La wakat ninga, yɩl n moon koɛɛgã, rẽnda f tall raoodo. A Robɛɛr sẽn tar yʋʋm 20 wã yeelame: “M da zoeta rabeem n pa rat n taas m karen-bi-taasã koɛɛgã ye. M tagsdame tɩ yaa yãnd la m da zoeta. M sã n lebg n tẽege, m neeme tɩ m da pa tar bʋʋm n na n zoe yãnd ye. Masã, m taasda m taabã koɛɛgã, tɩ m sũur noomẽ.” Kom-bɩɩs wʋsg gũus n gesame tɩ b sã n deng n segl b mens sõma n na n taas koɛɛgã, b tõogd n goma ne bas-m-yam. w18.05 29 s. a 9-11

A Zeezi yeela a tʋm-tʋmdbã yaa: ‘Mam kõta yãmb m laafɩ.’ (Zã 14:27) Wãn to la laafɩ wã a sẽn kõt tõndã sõngd tõnd tɩ d ket n moond koɛɛgã? D sã n ket n wɩngd ne koe-moonegã, d paamda sũur pʋgẽ bãane, bala d miime tɩ d noogda a Zeova ne a Zeezi sũuri. (Yɩɩn. 149:4; Rom. 5:3, 4; Kol. 3:15). A Zeezi sẽn yeel a tʋm-tʋmdbã t’a ratame tɩ b sũ-noogã ‘pidã’ poore, a togs-b-la bũmb ning sẽn kɩt tɩ yaa tɩlɛ tɩ b nong b taabã, hal n tõe n sak n ki b yĩngã. (Zã 15:11-13) Rẽ poore, a yeel-b lame yaa: “Mam boola yãmb tɩ m zo-rãmba.” B paamame n yaa a Zeezi zo-rãmba. Ad yaa bark tɛkẽ! La bõe la b segd n maane, n kell n yɩ a zo-rãmba? A Zeezi yeelame tɩ b segd n ‘kẽng n woma biisi,’ rat n yeel tɩ n kell n wɩng ne koe-moonegã. (Zã 15:14-16) Na maan yʋʋm a yiib sẽn deng rẽ, a Zeezi yeela a tʋm-tʋmdbã yaa: ‘Bɩ y kẽng n moone, n yeel tɩ arzãn soolem kolgame.’ (Mat. 10:7, Wẽnnaam Sebre, 1983) Rẽ n so t’a sẽn wa n sõsd ne a karen-biisã ne yʋngã, a sagl-b tɩ b kell n wɩng ne koe-moonegã.—Mat. 24:13; Mark 3:14, 15. w18.05 20-21 s. 15-16

Yɩta sõma tɩ kom-bɩɩsã mao t’a Zeova tũubã pak-b n tɩ yɩɩda, la b pĩnd n yãk b sẽn dat n wa maan tũudmã pʋgẽ wã. La tõe tɩ y neeme tɩ y rog-taasã wʋsg sẽn dat bal yaa b noog b yõore. Tõe meng tɩ b na n datame tɩ y wat n naagd-ba. Na n wa yɩɩ tɩlɛ tɩ y wilg-b vẽeneg tɩ sẽn tar yõod n yɩɩd ne yãmbã yaa y pids y sẽn dat n maan bũmb ning tũudmã pʋgẽ wã. Ra sak-y tɩ y rog-taasã tõog tɩ y bas y sẽn magd n na n maanã ye. La y maanda wãn tɩ y taabã ra tõog tɩ y maan wa bãmba? Modg-y n gil-y bũmb nins fãa y sẽn mi tɩ tõe n kɩtame tɩ y taabã wa tõog tɩ y maan sẽn pa segdã. (Yel. 22:3) Tagsd-y b sẽn dat tɩ y naag-b n maanã sẽn wat ne bi-wẽns ninsã yelle. Bũmb a to sẽn na n sõng-y yaa y sak n deeg tɩ mi n yaa tɩlɛ tɩ y paam tɩ b sagl-yã. Y sã n yaa sik-m-meng soaba, y na n sakda sagls nins y roagdbã la tigingã neb nins tẽeb sẽn tar pãngã sẽn mi n kõt-y wã. (1 Pɩy. 5:5, 6) B sã n kõ-y saglg sẽn yaa sõma, y sakd n sika y meng n tũ bɩ? w18.04 28-29 s.14-16

Koees nins a Zeezi sẽn kɩt tɩ b taas Aazi Mineer tigims kẽerã pʋgẽ, a wilgame t’a sũur nooma ne b tʋʋmdã. Wala makre, Tiyatiir tigingã nengẽ, a yeela a goamã sɩngrẽ yaa: “Mam bãnga yãmb tʋʋmã la y nonglmã, la y tẽebã, la y tʋʋm-sõamyã, la y sũ-marã ne y yaoolem tʋʋmã sẽn yaa wʋsg n yɩɩd y pipi tʋʋmã.” (Vẽn. 2:19) A goma b yaoolem tʋʋmã sẽn yɩɩd pĩndã yelle, la a leb n pẽg-ba, n wilg zʋg-sõma nins b sẽn tare, tɩ kɩt tɩ b tʋmd tʋʋm-sõma woto wã. Baa ne sẽn yɩ tɩlɛ t’a sagl tigingã neb kẽerã, a goamã sɩngrẽ la a baasgẽ wã fãa, a goma goam sẽn kengd raoodo. (Vẽn. 2:27, 28) Yãmb we n tags n gese! A Zeezi yaa tigimsã fãa Zu-soaba. Pa tɩlɛ t’a pʋʋs tõnd barka, tʋʋm nins d sẽn tʋmd n kõt-a wã yĩng ye. Baasgo, a getame tɩ wilg t’a sũur nooma ne d sẽn maandã tara yõod wʋsgo. A kõo kãsem-dãmbã mak-sõng tɛkẽ! w19.02 16 s. 10

Pipi kiris-nebã taoor lʋɩtb sullã ra kengda tigimsã yel-gɛtbã la b tẽed-n-taasã fãa raoodo. B tʋma b neb a yiib tɩ b tɩ pʋʋs Samari kiris-nebã yĩnga, tɩ bãmb me paam vʋʋsem sõngã. Yɩɩ a Pɩyɛɛr ne a Zã. (Tʋʋ. 8:5, 14-17) Yaa vẽeneg tɩ woto kenga a Filip ne Samari kiris-neb a taabã raood hal sõma! Rũndã-rũndã me, kiris-nebã taoor lʋɩtb sullã kengda Betɛllẽ tʋm-tʋmdbã, misioneer-dãmbã, zall so-pakdbã la b tẽed-n-taasã sẽn be dũniyã gill zugã fãa raoodo. Wa pipi kiris-nebã, tõnd me sũur nooma d sẽn paamd raood kengr a woto wã. Sẽn paase, yʋʋmd 2015 wã, siglgã taoor lʋɩtb sull yiisa Lebg n wa a Zeova nengẽ sebrã. Yaa sebr sẽn keng neb wʋsg raood dũniyã gill zugu. w18.04 19 s. 18-20

Neb n tagsd tɩ yaa b sã n tõe n maan b yam bũmb fãa pʋgẽ la b vɩɩmã na n yɩ noogo. La tags-y n ges-y vɩɩmã sẽn da na n yɩ to-to, ned fãa sã n da tar lohorem n maand a sẽn date, tɩ gɩdgr kae ye. Sebr a ye pʋgẽ, b yeelame tɩ tẽng fãa pʋgẽ, yɩl n bãng n lugl noyã pa nana, bala, noyã tog n wilgda nin-buiidã sẽn pa tar lohorem n maanã, la leb n sõng tɩ ned fãa tõe n maan a sẽn tar sor n maanã. Yaa rẽ yĩng la tẽng fãa noyã sẽn yaa ka tɛka, tɩ noy-lugundbã la bʋ-kaoodbã sẽn wilgd b sẽn tog n tũ noyã to-to wã me waoogẽ wã. A Zeezi gomdã wilgdame tɩ yɩl n paam lohorem hakɩɩkã, bũmb a yiib n yaa tɩlɛ: Pipi, d tog n saka a goamã sẽn yaa sɩdã, la yiib-n-soaba, d tog n lebga a karen-biiga. Rẽ la d paamd d meng zãng-zãnga. D na n paama d meng ne bõe? Ad a Zeezi sẽn yeele: “Ned ninga fãa sẽn maand yel-wẽna, a yaa yel-wẽnã yamba. . . . Biigã sã n kõ yãmb lohorem, yãmb na paam lohorem menga.”—Zã 8:34, 36, Wẽnnaam Sebre, 1983. w18.04 6-7 s. 13-14

Tõnd sã n paam n be ne neb sẽn kʋmd d nimbãanega, n dat d neere, noom-d lame. B nong n ningda b meng d zĩigẽ, n na n bãng d sẽn tagsde, sẽn noom tõnd bɩ sẽn sãamd d sũuri. Nand meng tɩ d kos-b sõngre, b tõe n bãnga d sẽn dat sõngr ningã, n sõng-do. D sũur nooma wʋsg ne neb nins sẽn wilgd tɩ b ‘kʋmda’ tõndã. Tõnd sẽn yaa kiris-nebã, d ratame n kʋmd d taabã nimbãanega. La togs sɩdã, pa wakat fãa la rẽ yaa nana ye. Bõe yĩnga? Ad bũmb a ye: D pa zems zãng ye. (Rom. 3:23) Naoor wʋsgo, yaa d mensã raabã yell n pak-do. Kɩtame tɩ yɩl n tagsd d taabã me yelle, rẽnda d wõr d mense. Neb kẽer me nengẽ, yaa b sẽn wub-b to-to wã, wall bũmb nins b sẽn yã b vɩɩmã pʋgẽ wã n kɩt tɩ yɩl n kʋm b taabã pa nana ye. Sẽn paase, neb nins d sẽn nong n be ne wã me tõe n kɩtame tɩ d pa minim n kʋmd d taabã ye. D sẽn be yaoolem wakatã, neb wʋsg pa tar nimbãan-zoeer ye. B yaa “beed-rãmba,” rat n yeel tɩ yaa b mensã yell bal n pak-ba. (2 Tɩm. 3:1, 2) La d sã n dɩkd a Zeova ne a Biig a Zeezi togs-n-taare, na n sõng-d lame tɩ d maneg n kʋmd d taabã. w19.03 14 s. a 1-3

Tõod piigã yaoolem soabã wilgame tɩ ned pa segd n maan sũ-kiir bɩ n tʋlg a to bũmb ye. (Tõo. 5:21; Rom. 7:7) A Zeova kõo a nin-buiidã tõ-kãnga, n na n sõng-b tɩ b bãng tɩ b segd n gũusa ne b sũurã, rat n yeel tɩ b tagsa wã la b tʋlsmã. A miime tɩ yaa tags-wẽnsã la tʋls-wẽnsã n wat n baas ne tʋʋm-wẽnsã. A buud paama rĩm a Davɩɩde. A ra yaa nin-sõngo. La vugri, a tʋlga rao a to paga. Wa n baasa ne yel-wẽnde. (Zak 1:14, 15) A yoo ne pagã, n bao n na n solg yellã t’a sɩdã ra bãng ye. A wa n pʋd n kɩtame tɩ b kʋ raoã. (2 Sãm. 11:2-4; 12:7-11) A Zeova pa get nina sẽn ne wã bal ye. A geta ned sẽn sɩd yaa a soab a sũurẽ wã. (1 Sãm. 16:7) Ned pa tõe n solg a Zeova a tagsa bɩ a tʋlsem wall a tʋʋm-tʋmdɩ ye. A Zeova sẽn get n yɩɩdã yaa tõnd zʋg-sõma wã, n dat tɩ d mao n bɩɩs zʋg-kãense. La a ratame me tɩ d bao n bãng bũmb nins sẽn tõe n wa ne tʋls-wẽns d sũurẽ wã, la d mao n tõog-ba, tɩ ra wa kɩt tɩ d maan sẽn yaa wẽng ye.—2 Kib. 16:9; Mat. 5:27-30. w19.02 21 s. a 9; 22 s. 11

Biiblã pʋgẽ, b wilga vẽeneg t’a Moyiiz “dag n yaa sik-m-meng soab hal wʋsgo, n yɩɩd ninsaalbã fãa sẽn be dũniyã zugã.” (Sõd. 12:3) Rat n yeelame t’a ra pa tar raoodo, t’a yamã ra yuusdame, la t’a ra yaa rabɛɛm bɩ? Tõe tɩ neb n tagsd tɩ sik-m-meng soab yaa woto. La yaa ziri fasɩ! A Moyiiz ra yaa wẽn-tũud sẽn tar raoodo, a yam da pa yuusdi, a ra pa rabɛɛm me. Ne a Zeova sõngre, a kẽnga Ezipt rĩm-toaagã taoor n tɩ taas koeese, la a lʋɩ na maan neb milyõ a tãab taoor tɩ b pasg we-rasempʋɩɩga, la a sõng-b tɩ b zab n tõog b bɛɛbã. Tõe tɩ d zu-loeesã pa yembr ne a Moyiiz ye. Baasgo, daar ne a to fãa, neb kẽer d sẽn be ne, wall zu-loees kẽer tõe n kɩtame tɩ pa nana tɩ d kell n yɩ sik-m-meng soab ye. La ad bũmb a ye sẽn kɩt tɩ d segd n mao n bɩɩs sik-m-menga: A Zeova yeelame tɩ yaa “sik-m-mens rãmbã n na n soog tẽngã.” (Yɩɩn. 37:11) Yãmb tagsdame tɩ y yaa sik-m-meng soab bɩ? Neb a taabã getame tɩ y yaa sik-m-meng soab bɩ? w19.02 8 s. a 1-2

A Zeova naana ninsaal t’a tar sũur-kaseto. A Ãdem ne a Awa sẽn kɩɩs a Zeova wã poore, b zoe n solgame. Wilgdame tɩ yaa b sũur-kasetã n da ningd-b taale. Ned sũur-kaset sõngd-a lame t’a bãng sõma ne wẽng n bake. La a sũur-kasetã sã n pa paam kiblg sõma, lebgda wa batayo valo sẽn pa sõma. Batayo a woto sã n wa be mogrã zugu, sebgã la ko-wiisã na n kɩtame t’a bʋdge. La valo wã sã n yaa sõma, sẽn wẽnd-a batayo wã tõogdame t’a tees a sẽn datẽ wã. Tõnd sũur-kasetã me sã n paam kiblg sõma, d bãngd n maana sẽn yaa sõma bũmb fãa pʋgẽ. Ned sũur-kaset sã n pa paam kiblg sõma, a sã n wa rat n maan wẽnga, a sũurã pa na n keoog-a ye. (1 Tɩm. 4:1, 2) A sũur-kasetã tõe n pʋd n kɩtame t’a maan sẽn yaa wẽnga, n kɩs sɩd tɩ rẽ la sõma. w18.06 16 s. a 1-3

Segdame me tɩ d gũusd n bãngd baa nebã tagsa nins sẽn pa tolg n wõnd yaa dũniyã rãmb tagsa wã, n da tẽ ye. Wala makre, kiba-kɩtb kẽer sẽn mi n taas kibayã to-to wã yaa sẽn na yɩl tɩ nebã sak n teel politik sull ninga. Sãnda me mi n goma ninsaalbã sẽn tõog n maanã, wall b sẽn magd n na n maanã, sẽn na yɩl tɩ d tẽ tɩ ninsaalbã tõe n welga b zu-loeesã b toore. Filim-dãmb la sɛb kẽer pʋgẽ me, b sagenda nebã tɩ b reng n bao b mensã nafr wall b zagsã rãmb nafre, hal tɩ yaa wa rẽ n zemse, rẽ n yaa sõma la pʋd n segde. La Biiblã yẽ wilgdame tɩ yaa d sã n nong a Zeova n yɩɩd bũmb fãa la tõnd ne d zakã rãmb paamd sũ-noog hakɩɩka. (Mat. 22:36-39) La pa rat n yeel tɩ d pa segd n ges filim bɩ n karem sebre, wall d maan bũmb a to n kok pemsem ye. Baasgo, d sok d meng yaa: ‘Rẽ yĩnga, m gũusd n bãngda baa nebã tagsa nins sẽn pa tolg n wõnd yaa dũniyã rãmb tagsa wã bɩ? M maanda gũusg tɩ maam bɩ m kambã ra wa karem seb-yoodo, wall n ges bũmb sẽn pa sõma tele wã pʋgẽ bɩ? M sõngda m kambã tɩ b bãngd a Zeova tagsa wã sõma, tɩ b sã n wa yã wall b wʋm bũmb sẽn pukd dũniyã neb tagsg bɩ b ra tẽ bɩ?’ w18.11 22 s. 18-19

Wãn to la a Zeova wilgd t’a bee ne tõndo? A geta tõnd yell neere, la a wilgd tõnd a nonglem. A yeela bũmb sẽn wilgd t’a nong-d-la ne a sũur fãa. A yeelame tɩ tõnd ‘tara yõod a nifẽ’, tɩ b ‘waooga tõndo,’ la t’a ‘nonga tõndo.’ (Eza. 43:4) Bũmb ka be yĩngr la tẽnga, n tõe n kɩt t’a Zeova pa le nong sẽn tũud-b yẽ wã ye. A kõn tol n bas tõnd a bada! (Eza. 54:10) A Zeova pa pʋlem t’a na n kɩtame tɩ yɛl nins sẽn kɩt tɩ vɩɩmã yaa toogã sa zĩig pʋgẽ ye. La a pa na n bas tɩ d zu-loeesã sẽn waoog wa ‘kʋɩlsã’ lim-d zãnga, tɩ d bas yẽ tũub ye. A pa na n bas me tɩ yɛl sẽn zabd tõnd wa “bugum” nams-d wakat fãa yĩng ye. A yeelame tɩ d bas d yam t’a na n zĩnda ne-do, n sõng-d zu-loeesã fãa pʋgẽ, tɩ d tõog n tẽb n yi. Bõe la a na n maan n sõng-do? A na n sõng-d lame tɩ d rabeemã boog tɩ d tõog n kell n maan sɩd ne-a, baa na n tũu ne d yõore. (Eza. 41:13; 43:2) D sã n kɩs sɩd t’a Zeova na n zĩnda ne tõnd wa a sẽn pʋlmã, d na n paama raood n tõog n mao ne d zu-loeesã. w19.01 3 s. a 4-6

Kom-bɩɩse, yaa vẽeneg tɩ y paamda sagls ka tɛk y beoog vɩɩmã wɛɛngẽ. Tõe tɩ y karen-saam-dãmba, kõnseye-rãmb la neb a taab sagenda yãmb tɩ y modg n karem karen-bɛda, n wa paam tʋʋm-sõngo. La a Zeova sẽn sagend yãmb tɩ y maanã yaa toore. Yaa sɩd t’a ratame tɩ y wɩsg y meng n karem sõma, n wa tõog n tʋm n ges y meng yelle. (Kol. 3:23) La a miime me tɩ yaa y bi-bɩɩlmã wakat la y segd n yãk y sẽn na n tees y vɩɩmã neng ningã. Rẽ n so t’a kõt-y sagls sẽn na n sõng-y y yam yãkr fãa pʋgẽ, sẽn na yɩl tɩ y tõog tɩ y vɩɩmã yɩ sõma la ta a yam, baa ne d sẽn be dũniyã yaoolem wakatã. (Mat. 24:14) A Zeova mii bũmb fãa. A mii sẽn wat beoogo, la a mi dũniyã sɛɛb daar takɩ. (Eza. 46:10; Mat. 24:3, 36) A mii yãmb ned kam fãa me sõma. A mii sẽn sãamd y sũuri, la a mi bũmb ning sẽn kõt-y sũ-noogo. Rẽ n so tɩ baa ned saglg sã n wõnd yaa sõma, sã n pa zems ne Wẽnnaam Gomdã sẽn yetã, yaa yalemdo. w18.12 19 s. a 1-2

Yaa “sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga.” Wẽnnaam vẽnega a Davɩɩd t’a yeel me tɩ ‘nin-tɩrsã na n sooga tẽngã, la b na n paa beenẽ wakat sẽn kõn sa.’ (Yɩɩn. 37:11, 29; 2 Sãm. 23:2) Yãmb tagsdame tɩ sẽn da rat-b ne b sũur fãa n maan Wẽnnaam daabã sẽn wʋm woto wã, b tagsg yɩɩ wãna? Woto seka b na tags tɩ wakat n wate, tɩ na n yɩ nin-tɩrs bal n be tẽngã zugu, la t’a na n wa lebga wa Edɛn zẽedã zĩigã. La tarẽ-n-tarẽ, Israyɛll nebã wʋsg wa n basa a Zeova. Rẽ n so t’a bas tɩ Babilond nebã wa zab ne-ba, n sãam b tẽngã la b tall b wʋsg n loog yembdo. (2 Kib. 36:15-21; Zer. 4:22-27) La no-rɛɛsdbã ra reng n togsame tɩ yʋʋm 70 poore, b na n lebg n waa b ba-yirã. Bãngr-gom-kãensã sɩd pidsame. La b ket n nafda tõnd rũndã-rũndã. Tẽngã na n wa yɩɩ arzãna. w18.12 4 s. a 9-10

Dũniyã nebã saglsã wʋsg pa zems ne Biiblã sẽn yetã ye. La rẽ yĩnga rũndã-rũndã wã, dũniyã nebã sagls kẽer yaa sõma n yɩɩd Biiblã saglsã bɩ? A Zeezi yeelame yaa: “Yam tʋʋm-sõama n wilgd yam sẽn yaa a soaba.” (Mat. 11:19) Yaa sɩd tɩ ninsaalbã paama bãngr n yiis teed wʋsgo. La b pa tõog tɩ yɛl nins sẽn tolg n namsd nebã tɩ b pa tõe n paam sũ-noogã sa ye. Wala makre, zabã, bu-welsgã la bi-be-tʋʋmã. Sẽn paase, b sẽn get tɩ yoobã pa tolg n yaa wẽngã wata ne zu-loeese. Neb wʋsg sak n deegame tɩ wãada zagsã, la wat ne bãas la yɛl a taaba. La kiris-nebã sẽn sakd n tũud a Zeova sẽn yetã, b tara sũ-noog b zagsã pʋsẽ, n tar yĩns laafɩ, la zems-n-tar ne b tẽed-n-taasã sẽn be dũniyã gill zugã. (Eza. 2:4; Tʋʋ. 10:34, 35; 1 Kor. 6:9-11) Woto pa wilgd vẽeneg t’a Zeova tagsa wã la sõma n yɩɩd sɩda? w18.11 20 s. a 8-10

Yaa sɩd tɩ d maooda sẽn na yɩl tɩ tõnd ne d roagdbã moor noomẽ, la d segd n gũusame n da wa maan bũmb sẽn kɩɩsd a Zeova noyã, d sẽn dat tɩ b sũur yɩ noog ne-dã yĩng ye. Tõnd zo-rãmb meng-mengã segd n yɩɩ sẽn nong-b a Zeova wã bala. Sẽn na yɩl n kẽn sɩdã pʋgẽ, yaa tɩlɛ tɩ d tagsa wã la d yel-manesmã yɩɩ sõma Wẽnnaam nifẽ. (Eza. 35:8; 1 Pɩy. 1:14-16) D fãa sẽn wa n bãng sɩdã, yɩɩ tɩlɛ tɩ d toeeme, n tũ Biiblã noyã la a saglsã. Yɩɩ tɩlɛ ne kẽer meng tɩ b tolg n toeem fasɩ. Sẽn yaa a soab fãa, d segd n gũusame n da leb n kẽ dũniyã tʋʋm-dẽgdã pʋgẽ ye. La bõe n na n sõng-do? D bʋgsd yaood ning a Zeova sẽn yao sẽn na yɩl tɩ d lebg neb sẽn yaa yɩlem a nifẽ wã. Yaa a Biigã zɩɩmã sẽn yaa sõma wʋsgã la a rɩk n yao. (1 Pɩy. 1:18, 19) D sã n tẽegd wakat fãa t’a Zeezi maoongã yaa yaood sẽn pa tõe n sɩfe, na n sõng-d lame tɩ d mao n kell n yɩ yɩlem a Zeova nifẽ. w18.11 11 s. 10-11

Neb wʋsg sẽn kẽes b meng zãng a Zeova tʋʋmdã pʋgẽ yetame tɩ b sẽn wɩngd ne tʋʋmdã kɩtame tɩ baa b yɛlã sã n wa toeem bɩ b pa tar tags-kɛga, n ket n tar sũ-noogo. Nin-kãens kibayã wilgdame tɩ baa d yɛlã sẽn wa n yaa to-to fãa, d sã n maan d sẽn tõe, la d gũ a Zeova n kɩs sɩd t’a na n sõng-d lame, d na n tõog n kell n paama sũur pʋgẽ bãane. D tõe n wa neeme meng tɩ d sẽn kell n mao baa ne d yɛlã sẽn toeemã paasa tõnd ne a Zeova zoodã. D sẽn ket n be dũni-kãngã pʋgẽ wã, d yɛlã tõe n wa tiig n toeemame. Wala makre, b tõe n wa toeema tʋʋmd d sẽn tʋmd a Zeova tũudmã pʋgẽ, wall bãag tõe n yõk-d lame. D zakã rãmb yell gesg wɛɛngẽ me, d zɩɩbã tõe n paasame. Sẽn yaa a soab fãa, bɩ y bas y yam t’a Zeova geta y yelle, la tɩ y sã n wa rat sõngr fãa, a na n sõng-y lame. (Ebre. 4:16; 1 Pɩy. 5:6, 7) La nananda, maan-y y sẽn tõe fãa yellã pʋgẽ. Pʋʋsd-y y Ba a Zeova, la y mao tɩ bũmb fãa pʋgẽ bɩ y sɩd teeg-a zãng-zãnga. Rẽ, baa y yɛlã sẽn wa n toeemd to-to fãa, y na n kell n talla sũur pʋgẽ bãane. w18.10 30 s. 17; 31 s. 19, 22

Kibay wʋsg n be Biiblã pʋgẽ, n wilgdẽ t’a Zeova sɩd nanda sẽn tũud-b yẽ wã. Wala makre, tẽeg-y-yã a Zeova sẽn sõng a Sãmwɛll sẽn da nan ya biigã ne bʋgsem to-to t’a taas maan-kʋʋdb kãsem a Eli a bʋ-kaoor koɛɛgã. Kiba-kãng bee 1 Sãmwɛll 3:1-18. Tõogã a Zeova sẽn da kõ wã pʋgẽ, b wilgame tɩ kambã segd n waooga sẽn kʋʋl-bã, sẽn yɩɩd fãa, taoor dãmbã. (Yik. 22:27; Maan. 19:32) Woto wã, yãmb tagsdame t’a Sãmwɛll na n yika yibeoogã, n kẽng a Eli nengẽ ne raood n tɩ togs-a Wẽnnaam bʋ-kaoor koɛɛgã? Ayo! Sɩd me, Biiblã yeelame t’a “dag n zoeta rabeem n ka rat n wilg a Eli vẽnegr ning yẽnda sẽn paamã ye.” La a Zeova maaname t’a Eli bãng t’a boonda a Sãmwɛlle. Rẽ n so t’a Eli yeel-a t’a gome, la a ‘ra solg-a bũmb baa a yembr ye.’ A Sãmwɛll sakame, n togs-a “bũmbã fãa.” A goamã zemsa ne koɛɛg b sẽn da taas a Eli wakat sẽn deng rẽ. (1 Sãm. 2:27-36) Kiba-kãngã wilgdame t’a Zeova yamã ka to, la t’a nanda nebã. w18.09 23 s. a 2; 24 s. a 4-5

Ziri wã lebga nebã minung zĩig fãa. Sebr a ye pʋgẽ, b wilgame tɩ neb wʋsg tagsdame tɩ ninsaal pa tõe n pa mi n yag ziri ye. Nebã nong n yagda ziri n na n gil yelle, wall n paam bũmb kẽere. Wala makre, b yagdame n na n solg b kongr bɩ bũmb b sẽn maan tɩ yaa wẽnga, pa rẽ bɩ n na n paam ligd bɩ bũmb a to. B wilga sebrã pʋgẽ me tɩ neb n be n yagd ziri nana-nana, yel-bõones la yel-bɛd pʋgẽ. B sã n gomd ne b zo-rãmba, b tʋmd-n-taase, b zakã rãmba, la neb b sẽn pa mi, ziri wã yagb pa toog ne-b ye. Nebã sẽn nong n yagd ziri woto wã, wata ne bõe? Kɩtame tɩ nebã pa le kɩs taab sɩd ye. Sãamda zood la zems-n-taar me. Yɩɩn-gʋlsd a Davɩɩd ra pʋʋsa a Zeova, n yeel yaa: “Bũmb ning sẽn noom yãmba, yaa sɩd sẽn be ninsaal sũ-zulungẽ.” (Yɩɩn. 51:8) A Davɩɩd ra miime tɩ d sã n dat n yɩ sɩd rãmba, d sũurẽ wã la sɩngda. Bũmb fãa pʋgẽ, kiris-neb hakɩɩkã ‘gomda sɩd ne taaba.’—Zaka. 8:16. w18.10 7 s. a 4; 8 s. a 9-10; 10 s. 19

Israyɛll nebã sẽn wa n yit Ezipt yʋʋmd 1513 sẽn deng a Zeezi rogmã, rẽ tɩ b sõorã tog n da yɩɩda milyõ a tãabo. Kamb ra be b sʋka, neb sẽn kʋʋle, la baa bãad-rãmb la koms-rãmba. Ra yaa tɩlɛ tɩ sẽn na n yiis-a nin-buiid a woto Ezipt soolmẽ wã yɩ wʋmda, la sũ-mar soaba. Sɩd me, a Zeova yɩɩ wʋmda, n maan sũ-mar ne-ba. A tũnuga ne a Moyiiz n ges b yell sõma. Kɩtame tɩ baa Israyɛll nebã sẽn da zɩ n zĩnd zĩig a to tɩ pa Eziptã, b yi n basa tẽngã, tɩ rabeem ka yõk-b ye. (Yɩɩn. 78:52) A Zeova maana wãn tɩ rabeem ka yõk-ba? Ad bũmb a ye a sẽn maane: A kɩtame tɩ b tong taab “wa tãb-biis sẽn dabd zabre,” tɩ baa fʋɩ ra pa yaar ye. (Yik. 13:18, Sebr Sõngo) A Zeova sẽn sigl yɛlã fãa sõma woto wã, yaa vẽeneg tɩ sõnga nin-buiidã tɩ b bas b yam tɩ b Wẽnnaamã geta bũmb fãa yelle. Sẽn na yɩl tɩ b ra wa yĩm t’a bee ne-ba, n wilgd-b sor la a kogend-ba, a ra yãagd-b-la wĩndg “ne sawaodgo,” tɩ yʋng bɩ a yãagd-b ne “bugum vẽenem.” (Yɩɩn. 78:14) Yaa wa a Zeova sẽn da yet-b yaa: “Ra zoe-y rabeem ye. Mam bee ne yãmb n na n wilg-y sor la m kogl-y-yã.” w18.09 26 s. 11-12

Pĩnd wẽndẽ, wẽn-sakdb kẽer wa n getame tɩ yɛlã looga b nugu, hal tɩ b tags tɩ b sẽn kiid n são. Wala makre, toogã wa n sãaga a Zoobe, t’a yeel yaa: “M yam yii ne m vɩɩmã. Mam ka rat n vɩɩnd wakat fãa ye.” (Zoob 7:16, Wẽnnaam Sebre, 1983) Tʋʋmd ning a Zeova sẽn kõ a Zonaasã sẽn wa n baas to-to wã sãama a sũur wʋsgo, hal t’a yeel a Zeova yaa: “Bɩ y reeg m vɩɩmã. Bala mam sẽn kiid n são m sẽn vɩ.” (Zon. 4:3) No-rɛɛs a Eli me wa n tagsdame tɩ sẽn maand le kae, n yeel a Zeova yaa: “Moasã wã, mam yaa n yɛɛme. Reeg-y m vɩɩmã.” (1 Rĩm. 19:4) La a Zeova ra nonga nin-kãensã sẽn da tũud-a ne b sũur fãa wã, n dat tɩ b kell n vɩɩmde. A pa ning-b taal b sẽn da tagsd woto wã yĩng ye. Sẽn na yɩl tɩ b kell n tũ-a ne b sũur fãa, a sõng-b lame tɩ b toeem yam, la b paam raoodo, n kɩs sɩd t’a nong-b lame. w18.09 13 s. a 4

Wẽn-sakdbã nong n maanda sãambã sãando. Biiblã pʋgẽ, gɛrk gom-biig ning b sẽn lebg ne moor tɩ “maan sãambã sãandã” võor yaa “maan sãambã neere.” (Ebre. 13:2) Kibay wʋsg n be Biiblã pʋgẽ, n wilgd tɩ d segd n nonga sãambã, n deegd-b sõma. (Sɩng. 18:1-5) Yɩta sõma tɩ d sã n paam segb fãa bɩ d maan d taabã neere, b yaa d tẽed-n-taas tɩ b pa d tẽed-n-taase. (Gal. 6:10) Y sã n deegd y tẽed-n-taas nins sẽn kẽes b meng zãng a Zeova tʋʋmdã pʋgẽ wã sãando, y naagda a Zeova n tʋmdẽ. (3 Zã 5, 8) Y maanda woto bɩ? Naoor wʋsgo, d sã n deeg-b sãando, d fãa ‘naagda taab n paam raood paasgo.’ (Rom. 1:11, 12) Wẽnnaam Gomdã sagenda rapã sẽn be tigimsã pʋsẽ wã tɩ b bao n lebg kãsemb-sõngdb la kãsem-dãmba, n paam n naag a Zeova n tʋm n sõng b taabã. (1 Tɩm. 3:1, 8, 9; 1 Pɩy. 5:2, 3) Sẽn tũud-b sagl-kãngã rat n sõnga b tẽed-n-taasã tũudmã wɛɛngẽ, la bũmb a taab pʋgẽ. (Tʋʋ. 6:1-4) Saam-biis nins sẽn sõngd ne tʋʋm-kãensa wã yetame tɩ kõt-b-la sũ-noog wʋsgo. w18.08 24 s. a 6-7; 25 s. 10

Yaa sɩd t’a Tɩmote ra tara sor n na n wilg saam-biis nins sẽn kʋʋlã b sẽn tog n maan bũmb kẽer pʋgẽ, la a ra segd n maana rẽ ne waoogre, la ne bʋgsem. La ned yʋʋm sẽn vẽsg sã n yãk yam n maand yel-wẽnde, wall a sagend a taabã tɩ b maan bũmb a Zeova sẽn kisi? Ned sã n maand yel-wẽn ne yamleoogo, baa a sã n kʋʋlame, a Zeova pa na n ges a yʋʋmã, n bas-a taal ye. D tẽeg bũmb ning b sẽn yeel Ezekɩyɛll 9:5, 6 pʋgẽ wã. Be, b yeelame: “Mam nifẽ, a yeela neb a taabã yaa: ‘Pʋg-y-yã-a n saag tẽngã n kʋ nebã. . . . Kʋ-y la y sãam nin-kẽembã, kom-bɩɩsã, pʋg-sadbã, pagbã, la zagsã neb fãa.’” Goam a woto buud me n be Ezayi sebrã pʋgẽ. (Eza. 65:20) Dẽnd wakat fãa, sẽn segd n pak tõnd n yɩɩdã yaa d waoog a Zeova, a soab ning b sẽn boond Biiblã pʋgẽ tɩ “nin-kẽem kulkuugã.” (Dãn. 7:9, 10, 13, 14) Rẽ na n kɩtame tɩ d tall raood n wilg ned a kongre, baa a yʋʋm sẽn yaa to-to fãa.—Gal. 6:1. w18.08 11 s. 13-14

Tõnd sẽn yaa kiris-neb hakɩɩkã, segdame tɩ d sã n wʋm kibar fãa bɩ d tags neer n ges d sã n tõe n tẽeme. D tog n maoome n bɩɩs yam-kãnga, tɩ lebg d minungu. (Yel. 3:21-23; 8:4, 5) Sã n pa rẽ, a Sʋɩtãan ne a dũniyã na n tõog n belg-d-la nana-nana tɩ d tẽ goam sẽn pa sɩda. (Efɛ. 5:6; Kol. 2:8) Sẽn na yɩl n bãng d sã n segd n tẽe kibar d sẽn wʋme, yaa tɩlɛ tɩ d reng n fees n bãng a vɩʋʋgã fãa. Rũndã-rũndã, kibayã yita zĩig fãa. Ẽnternetã pʋgẽ, tele wã pʋgẽ, zʋrno-rãmbẽ wã, la zĩis a taaba. D mitins la d zo-rãmb toond-d-la mesaaz-rãmb ne taablɛt-rãmbã la portaabl-dãmbã maasem. Yaa sɩd tɩ bãmb rata tõnd neere. Baasgo, d segd n maanda gũusgu, bala neb n be n yelgd kibay sẽn pa sɩda. Rẽ n so tɩ d sã n wʋm kibar fãa bɩ d segd n maag d yĩng n fees n gese. w18.08 3 s. a 1, 3

A Zeova sẽn wa n dat t’a Zeezi wa tẽngã zugã, a kɩtame tɩ pa-kul na n dɩk pʋg n dog-a. A yʋʋr la a Maari. A ra bee Nazarɛt sẽn yaa tẽn-bila, n zãr ne Zerizalɛm la a wẽnd-doogã sẽn da be rasãnd wʋsgã. (Luk 1:26-33) A Maari sẽn yeel a Elizabɛt bũmb ning rasem a wãn poorã sɩd wilgdame t’a ra yaa a Zeova zoa meng-menga. (Luk 1:46-55) A Zeova ra neeme t’a Maari tũud-a-la ne a sũur fãa, t’a yãk-a t’a na n yɩ a Zeezi ma. Yaa bark a sẽn da pa tẽede. A Maari sẽn wa n dog a Zeezi wã, a Zeova pa maan tɩ Zerizalɛm bɩ Betlehɛm nin-kãsems wall nanambs bãng ye. Yaa pe-kɩɩmb sẽn da be Betlehɛm weoogẽ wã n gũud b rũms la a kɩt tɩ malɛgs tɩ togs biigã rogem. (Luk 2:8-14) Rẽ poore, pe-kɩɩmbã tɩ gesa bi-pɛɛlgã. (Luk 2:15-17) A Maari ne a Zozɛf sẽn yã tɩ yaa pe-kɩɩmb la a Zeova togs biigã rogmã ling-b lame, la tog n yɩ-b-la noogo. w18.07 9-10 s. 11-12

Bõe yĩng t’a Zeova sũurã yik ne a Salomo? Biiblã yeelame t’a Zeova ‘sũur yika ne a Salomo, yẽnda yamã sẽn wẽnemd n bas-a wã yĩnga.’ B paasame yaa: ‘Sẽn-Ka-Saab sẽn yaa Israyɛll Wẽnnaamã yaool n dag n vẽnega b meng ne a Salomo naoor a yiibu. Sẽn-Ka-Saab rag n goma ne a Salomo yel-kãng wɛɛngẽ n yeel-a t’a ra sak n pʋʋs Wẽnnaam a to ye. La a Salomo ka sak Sẽn-Ka-Saab noorã ye.’ Kɩtame t’a kong Wẽnnaam lohormã. A kambã la a yagensã pa rɩ naam Israyɛll buudã fãa zug ye. Rẽ me, yel-beed ka tɛk n nams a roogã rãmb na maan yʋʋm kobse.(1 Rĩm. 11:9-13) Wa sẽn yɩ to-to a Salomo nengẽ wã, tõnd me sã n yõg zood ne neb sẽn pa mi a Zeova noyã, wall sẽn maand b toog kae ne a noyã, tõe n komsa d tẽebã, la sãam tõnd ne a Zeova zoodã. Tõe n yɩɩ neb sẽn wat tigissã la b pa tar zood sõma ne a Zeova ye. Tõe n yɩɩ neb me sẽn pʋd n pa tũud a Zeova. Wala makre, neb d sẽn kĩ ne, d yagse, d tʋmd-n-taas bɩ d karen-bi-taase. Sẽn yaa a soab fãa, d bãng tɩ d sẽn nong n be ne b rãmbã sã n pa tũud a Zeova noyã, b tũud-n-taarã tõe n wa sãama zood ning d sẽn tar ne a Zeova wã. w18.07 19 s. a 9-10

A Sʋɩtãan tũnugda ne filim-dãmbã la bũmb a taab b sẽn wilgd ne tele wã maasmã, n maandẽ tɩ zĩig fãa bɩ nebã tagsd wa yẽ. A miime tɩ kibayã la soalmã d sẽn mi n kelgd n na n kok pemsmã toeemda tõnd tagsa wã la d yel-manesmã. A Zeezi me ra tũnugda ne kibay n zãmsd nebã bũmb wʋsgo. Wala makre, a wẽe yel-bũndi, n gom Samari rao sẽn yaa nin-sõng yelle. A leb n goma biig sẽn yi n bas a ba zaka, n tɩ sãam a rogem-pʋɩɩr yelle. (Mat. 13:34; Luk 10:29-37; 15:11-32) Neb nins sẽn tagsd wa a Sʋɩtãanã tõe n tũnuga ne kibayã, n maan tɩ tõnd me tagsa wã lebg wẽnse. La d bãng tɩ pa kibar bɩ filim buud fãa la wẽng ye. Filim la bũmb a taab b sẽn yiisd tele wã pʋgẽ tõe n sõnga ned t’a kok pemsem, la a zãms bũmb ninga. Sẽn be bala, d segd n maana gũusgu. Sẽn yaa reem ning fãa la d rat n gese, yɩta sõma tɩ d sok d meng yaa: ‘Yaa reem sẽn na n kɩt tɩ m tags tɩ m yĩngã tʋlsem pidsg pa yell bɩ?’ (Gal. 5:19-21; Efɛ. 2:1-3) Sã n mik tɩ reem y sẽn get na n kɩtame tɩ y wa tagsd wa a Sʋɩtãana, bõe la y segd n maane? Zãag-y y meng ne reem-kãnga, wa y sẽn na n zãag y meng ne ned sẽn bẽed bã-loangdga. w19.01 15-16 s. a 6-7

Tõnd “fãagrã tẽeb pidsg gũudmã” kogenda d tagsa wã la d yamã wa kut-puglã sẽn kogend sodaagã zugã. (1 Tes. 5:8; Yel. 3:21) A Sʋɩtãan tõe n belga tõnd tɩ d fõk d kut-puglã. Wãn to? D tẽeg a sẽn mak a Zeezi to-to wã. A Sʋɩtãan ra miime t’a Zeezi ra na n wa lebga Rĩm n soog dũniyã. La sẽn deng rẽ, a ra na n paama namsgo, la a ki menga. Sẽn paase, ra yaa tɩlɛ t’a gũ n tãag wakat ning a Zeova sẽn yãkã. Rẽ n so t’a yeel a Zeezi t’a tõe n yɩɩ rĩma, n pa gũ n kaoos ye. A yeel-a lame t’a sã n sak n wõgemd vugr bal n waoog yẽ, a na n paama a sẽn gũudã fãa zĩig pʋgẽ. (Luk 4:5-7) A Sʋɩtãan miime me t’a Zeova pʋlma tõnd bark ka tɛk dũni-paalgã pʋgẽ. La yaa tɩlɛ tɩ d gũ. Tõe tɩ d na n paama namsg menga. Rẽ n so t’a Sʋɩtãan rat tɩ d bao vɩ-noog masã meng la d ra gũ n kaoos ye. A ratame tɩ d bao naar vɩɩm masã menga, la zĩig pʋgẽ. A ratame tɩ d lʋɩɩs rẽ taoor tɩ Wẽnnaam Rĩungã yɛl leb poorẽ.—Mat. 6:31-33. w18.05 30-31 s. 15-17

Sɩd-sɩdã, a Zeova ratame tɩ y paam sũ-noog y bi-bɩɩlmã wakate. Mao-y n pids y sẽn yãk yam n na n maan tũudmã pʋgẽ wã, la y tũ a Zeova saglsã y magb fãa la y yam-yãkr fãa pʋgẽ. Sɩng-y rẽ pĩnda. Woto, y na n yãa pĩnd-pĩnd me t’a wilgd-y-la sor bũmb fãa pʋgẽ, n kogend-y la a ningd-y barka. Bʋgsd-y sagls nins fãa a sẽn kõ a Gomdã pʋgẽ wã, la y tũ a saglg ning sẽn be Koɛɛg soab 12:1 wã. Ad a sẽn yeele: “Tẽeg f naandã yell f bi-bɩɩlem wakate.” Kom-bɩɩs nins sẽn tũud a Zeova wã toga ne pẽgre, b sẽn yãk yam n na n maan bũmb kẽer a Zeova tũudmã pʋgẽ, la b lʋɩɩsd koɛɛgã mooneg taoorã wilgda rẽ. Sẽn paase, b yãka yam n pa na n sak tɩ dũniyã tõog tɩ b bas b sẽn dat n maanã ye. Kom-bɩɩsã tõe n basa b yam tɩ b tʋʋmdã pa na n yɩ zaalem ye. B tara tẽed-n-taas sẽn nong-b la b teend-ba. B sã n dɩk b yɛlã bɩ b magbã n bas ne a Zeova me, b sẽn saagdã fãa na n pidsame. w18.04 29 s. 17, 19