Sigri

A gomdã tog n da kenga a tʋm-tʋmdbã raood sõma! B ra pa mi tɩ ka la bilfu, b Zu-soabã na n kiime ye. La pa rat n yeel t’a kũumã poore, b pa na n le paamd sõngr ye. Sẽn wa n yaa sõngr ning fãa la b rat sẽn na yɩl n kell n moon Rĩungã koɛɛgã, b sã n pʋʋs a Zeova n kose, b na n paamame t’a reeg b kosgã. A Zeova sɩd maana woto. A Zeezi kũumã poor bilfu, tʋm-tʋmdbã pʋʋsa a Zeova n kos-a t’a kõ-b raoodo, t’a sɩd leok-ba. (Tʋʋ. 4:29, 31) Yaa woto me rũndã-rũndã. D sã n ket n wɩngd ne koɛɛgã moonego, d na n kell n yɩɩ a Zeezi zo-rãmba. D tõe n kɩsa sɩd me tɩ d sã n wa segd zu-loees koe-moonegã pʋgẽ, n pʋʋs a Zeova n kos-a t’a sõng-d tɩ d tõog toogo, a na n deega d kosgã. (2 Kor. 4:7) D sũur nooma d sẽn paam t’a Zeova reegd d pʋʋsgã, la d paam me n yaa a Zeezi zo-rãmbã! A Zeova sẽn kɩt tɩ d paam woto fãa wã, paasda tõnd raoodo, tɩ d rat n ket n womd biisi.—Zak 1:17. w18.05 21 s. 17-18

Ra keta yʋʋm a nu bala, tɩ kiris-neb nins sẽn da be Zerizalɛmmã bãng vẽeneg t’a Zeova “daarã” kolgdame. B na n yãa bãnd ning a Zeezi sẽn kõ a karen-biisã, n yeel tɩ b sã n wa yã rẽ bɩ b zoe n yi tẽngã n paam n põsã. (Tʋʋ. 2:19, 20; Luk 21:20-22) Sɩd me, a Zeova daarã waa yʋʋmd 70 wã, wakat ning Rom sodaasã sẽn sãam Zerizalɛmmã. Rũndã-rũndã me, bʋʋm waoog sẽn kɩt tɩ d segd n kɩs sɩd t’a Zeova “daarã” sẽn yaa ‘ra-kãsenga,’ la sẽn ‘sek yɛɛsg wʋsgã’ ta n saame. (Zow. 2:11) No-rɛɛs a Sofoni ra yeelame yaa: “Sẽn-Ka-Saab daarã sẽn yaa ra-kãsengã kolgame, a kolgame, la a wata tao-tao!” (Sof. 1:14) Yaa keoogr sẽn pak tõnd me rũndã-rũndã. A Zeova daarã sẽn kolgã, d segd n tũu a Poll sẽn yeel tɩ d “ges taab yelle,” n “nek taab ratem tɩ nong taaba la maan tʋʋm-sõamyã.” (Ebre. 10:24) Dẽnd yɩta sõma tɩ d wilgd masã n yɩɩd pĩndã tɩ d tẽed-n-taasã yell pak-d lame. Rẽ, b sã n wa rat raood kengre, d tõogd n kenga b raoodo. w18.04 20 s. a 1-2

Ad yaa goam sẽn sɩd kengd raoodo, a Zeova sẽn togs a Zozuwe, nand t’a nimbuiidã kẽ kãabg tengã! A Zeova ra mi n taasa a nin-buiidã gill me koeese, n na n keng b raoodo. Wala makre, a Zeova ra miime t’a nin-buiidã sã n wa tɩ be yembd Babilond tẽngã, b na n datame tɩ b keng b raoodo. Rẽ n so t’a kɩt t’a no-rɛɛsã pĩnd n yeel yaa: “Da zoe rabeem ye, bala, mam bee ne foom. Da maan yɩɩr ye, bala, mam yaa fo Wẽnnaam. Mam kõta foom pãnga, la m na n wa sõnga foom, mam na n tebenda foom ne m nug-rɩtg sẽn tõogdã.” (Eza. 41:10) A Zeova ra kengda pipi kiris-nebã me raoodo. Rũndã-rũndã me, a kengda tõnd raoodo. (2 Kor. 1:3, 4) A Zeova kenga a Biig a Zeezi me raoodo. A lisgã sasa, a wʋma koɛɛg sẽn zĩnd saasẽ n yeel yaa: “Ada yaa mam Bi-ribl-nongr sẽn ta mam yam zãnga.” (Mat. 3:17) Tags-y n ges-y gom-kãensã sẽn keng a Zeezi pɛlg to-to, t’a tõog n maan a sẽn da tog n maan tẽngã zugã. w18.04 16 s. a 3-5

Neb kẽer na n yeelame tɩ no-kãngã Wẽnnaam sẽn da kõ a Ãdmã kɩtame t’a ra pa tõe n maan a yam ye. Sẽn yet-b woto wã pa mi tɩ yãk f toorẽ yamã pa yembr ne f sẽn na n tar sor n wilgd sẽn yaa sõma bɩ wẽng n bakã ye. A Ãdem ne a Awa ra tara lohorem, n tõe n yãk b sã n na n saka Wẽnnaam bɩ b pa na n sak-a. La yaa a Zeova bal n tar sor n wilgd sẽn yaa sõma bɩ wẽngã n bake. Wẽnnaam sẽn yeel tɩ tɩɩgã yaa “wẽng la sõmb bãngr tɩɩgã,” ra tog n sõnga a Ãdem ne a Awa tɩ b bãng woto vẽenega. (Sɩng. 2:9) A Zeova sẽn yeel a Ãdem ne a Awa tɩ b ra rɩ tɩɩgã bilã, yaa sẽn na n sõng-b tɩ b bãng tɩ yɩl n paam lohorem hakɩɩka, yaa tɩlɛ tɩ b sak yẽ. Bʋko, a Ãdem ne a Awa yãka yam n kɩɩs a Zeova. B sẽn dɩ tɩɩgã bilã, b paama lohorem n yɩɩd pĩndã bɩ? Ayo! B sẽn bao n na welg sẽn yaa sõma bɩ wẽngã b toorã, b pa paam lohorem n paas ye. B pʋd n konga lohorem hakɩɩkã a Zeova sẽn da kõ-bã. w18.04 5-6 s. a 9-12

A Zeova nin-buiidã sã n namsdẽ, a pa kʋmd b nimbãaneg bal ye. A maanda bũmb n sõng-ba. Wala makre, Israyɛll nebã sẽn wa n yaa yembs Ezipt tẽngẽ wã tɩ b namsd-bã, a Zeova yãa b toogã, n kʋm b nimbãanega, n fãag-ba. Ad a sẽn yeel a Moyiizã: “Sɩdã, mam yãnda m nebã sẽn be Ezɩptã namsgã. Mam wʋma bãmb kelemsã. . . . N-yẽe! Mam mii toog ning sẽn tar bãmbã. Mam sigame n na n fãag bãmb Ezɩpt nebã nusẽ.” (Yik. 3:7, 8) Yaa a nin-buiidã nimbãaneg sẽn yõk-a wã la a sẽn yiis-b yembdã pʋgẽ wã. Yʋʋm kobs poore, Israyɛll nebã sẽn wa n be kãabg tẽngẽ wã, bɛɛb n da mi n zabd ne-ba. Bõe la a Zeova maan-yã? Biiblã yeelame tɩ ‘bãmb wõosgã pʋga, la neb nins sẽn maand bãmb pãng n namsd-bã yĩnga, Sẽn-Ka-Saab zoee bãmb nimbãanega.’ Yaa a nimbãan-zoeerã yĩng yɛs la a sẽn da fãagd-bã. A yãka bʋ-kaoodb n lʋɩɩs Israyɛll nebã taoore, tɩ b ra zabd n fãagd bãmb bɛɛbã nusẽ.—Bʋ. 2:16, 18. w19.03 15 s. a 4-5

Tõod piigã pipi soabã ne yiib-n-soabã wilgame tɩ yaa a Zeova a ye tãa la Israyɛll nebã segd n tũ, la tɩ b pa segd n pʋʋs bõn-naands ye. (Yik. 20:3-6) Pa a Zeova meng nafr yĩng la a sẽn kõ no-kãensa wã ye. Yaa a nin-buiidã nafr yĩnga. La b sã n da bas a Zeova n pʋʋsd bu-zẽmsã wẽn-naandsã, b paamda toog wʋsgo. La Israyɛll nebã sã n da maand sɩd ne a Zeova, n tar manesem sẽn segd ne taaba, a ningd-b-la barka. (1 Rĩm. 10:4-9) Neb sẽn yet tɩ b tũuda a Zeova sã n kɩɩsd a noyã, tɩ wat ne toog a nin-buiidã zugu, pa a Zeova yell ye. La a sẽn nong tõnd wʋsgã, d sã n namsd yel-kɛgr yĩnga, a miime. A kʋmda tõnd nimbãanega, n yɩɩd pag sẽn kʋmd a bi-pɛɛlg nimbãaneg to-to wã menga. (Eza. 49:15) Baa a sã n pa maan bũmb zĩig pʋgẽ, a na n wa bʋʋ yel-wẽn-maandb nins sẽn pa rat n tek yam n kos sugrã, b sẽn nams b taabã yĩnga. w19.02 22 s. 13-15

Kiristã kũumã tẽegr sã n wa ket tɩ semen a wãna, d tigissã sasa d wae n gomda a mak-sõngã yelle, la a sẽn sik a meng n sak n ki tɩ yɩ maoong tõnd yĩngã. Leb n kɩtdame tɩ d rat n modg n yɩ sik-m-mens rãmb wa a Zeezi, la d mao n maan a Zeova raabã, baa sã n wa yaa toogo. Tags-y n ges-y raood ning a sẽn tall a kũumã ket tɩ rasem a wãnã. A ra miime tɩ ka ne rasem a wãn bala, a bɛɛbã na n yaal-a lame, la b pãb-a, la b kʋ-a. (Mat. 20:17-19) Ne rẽ fãa, a sakame. A yõkrã sẽn wa n kolgdẽ wã, a yeela a tʋm-tʋmdb nins sẽn da be ne-a Gɛtsemane wã yaa: “Yik-y tɩ d kẽnge. Sẽn zãmb-a maamã kolgdame.” (Mat. 26:36, 46) Nebã sẽn sũ taab n wa ne zab-teed n na n yõk-a wã, a kolgame, n yeel tɩ yẽ la woto, la a yeel sodaasã tɩ b bas a tʋm-tʋmdbã tɩ b looge. (Zã 18:3-8) Ad sɩd yaa raood tɛkẽ! Rũndã-rũndã, kiris-neb nins sẽn paam vʋʋsem sõngã zaeebã, la a Zeezi piis a taabã maanda b sẽn tõe fãa n dɩkd a togs-n-taare, n wilgd raoodo. w19.01 27-28 s. a 7-8

Sẽn maand-b desẽ-rãmbã tʋmda ne kulɛɛr buud toor-toore, hal tɩ b sã n maan desẽ bɩ be yamleoogo. Woto me, sẽn na yɩl n bɩɩs sik-m-menga, zʋg-sõma toor-toor la d segd n bɩɩs tɩlɛ. Wala makre, d segd n yɩɩ sakda, sũ-bʋgsem soaba, la raood soaba. Yaa sik-m-mens rãmbã bal n sakd n tũud Wẽnnaam sẽn datã. Wala makre, Wẽnnaam datame tɩ d yɩ sũ-maasem dãmba. (Mat. 5:5; Gal. 5:22) D sã n maand Wẽnnaam daabo, puugda a Sʋɩtãan sũuri. Rẽ n so tɩ baa ne d sẽn yaa sik-m-mens rãmb la sũ-maasem dãmbã, a Sʋɩtãan dũniyã neb wʋsg kisa tõndo. (Zã 15:18, 19) Yaa rẽ yĩng la d sẽn segd n tall raoodo, n tõog n kɩɩs a Sʋɩtãanã. Ned sẽn pa sik-m-meng soab yaa zẽk-m-meng soaba, a pa tõe a sũuri, a pa tũud a Zeova noyã. A Sʋɩtãan yaa woto kɛpɩ! Pa zaalem la a sẽn kis sik-m-mens rãmbã ye. B zʋg-sõma wã maneg n pukda a wẽnemã, la pʋd n wilgdẽ t’a yaa ziri-yagda. Bõe yĩng tɩ d yet woto? Bala, baa a sẽn yet bɩ a sẽn maand a soaba, a pa tõe tɩ sik-m-mens rãmbã bas a Zeova tũub ye.—Zoob 2:3-5. w19.02 8-9 s. a 3-5

A Zeova ra miime tɩ wakat n wat tɩ rabeem na n kẽ neb nins sẽn be Babilondã. Bõe n da na n kẽes-b rabeem? Yʋʋm 70 la zʋɩf-rãmbã na n tɩ zĩnd Babilonde. Yʋʋm 70 wã sã n wa kolg saabo, Meed la Pɛrs sodaasã sẽn yaa gãndaadã na n wa zaba ne Babilond nebã. A Zeova na n kell n tũnuga ne Meed la Pɛrs rãmbã, n kõ a nin-buiidã sor tɩ b yi Babilond n leb b ba-yirã. (Eza. 41:2-4) Babilond nebã, la buud a taabã neb sẽn wʋm tɩ b bɛɛbã wat n na n zaba ne-bã, b baoome n na n keng taab raoodo. Ned kam fãa ra yeta a to yaa: “Keng f pɛlga!” B maneg n paasa b wẽn-naandsã sõore, n tagsdẽ tɩ b wẽnnaam-dãmbã na n kogl-b lame. (Eza. 41:5-7) La wakat kãnga, bũmb la a Zeova yeel zʋɩf-rãmbã sẽn yaa a nin-buiidã, tɩ kɩt tɩ b yam ra gãe bãane. A yeel-b lame yaa: ‘La foom a Israyɛll sẽn yaa mam tʋmtʋmdã, [n pa wa f yagsã] . . . Da maan yɩɩr ye, bala, mam yaa fo Wẽnnaam.’ (Eza. 41:8-10) Ges-y koe! A Zeova yeela a nin-buiidã yaa: ‘Mam yaa fo Wẽnnaam.’ A Zeova gom-kãensã sõnga sẽn da maand-b sɩd ne-a wã tɩ b bas b yam t’a pa yĩm b yelle, t’a ket n yaa b Wẽnnaam, tɩ bãmb me ket n yaa a nin-buiidu. A yeel-b lame yaa: “M dat n leb n zãa yãmba, . . . la m yols-yã.” Yaa vẽeneg t’a sẽn pʋlem-b woto wã, kenga b raood wʋsgo.—Eza. 46:3,4. w19.01 4 s. a 8

A Zeova sẽn na n zĩnd saasẽ n gom pipi n yeel bũmb ningã bee Mark 1:9-11 wã pʋgẽ. Yaa naoor a tãab la a zĩnd saasẽ n gome. A Zeova yeela a Zeezi yaa: “Fo yaa mam Bi-ribl-nongr sẽn ta mam yam zãnga.” A Zeezi sẽn wʋm a Ba wã sẽn yeel woto n na n wilg t’a nong-a lame, la t’a kɩs-a-la sɩdã, tog n kẽe a sũur hal sõma! A Zeova sẽn yeelã wilgda bũmb a tãab sẽn tar yõod wʋsgo. Pipi, a wilgame t’a Zeezi yaa a Biiga, yiib-n-soaba, t’a nonga a Biigã, la tãab-n-soaba, t’a Biigã taa a yam zãnga. A Zeova sẽn yeel tɩ ‘fo yaa mam Biigã,’ rat n wilgame t’a Zeezi lisgã tɛka, bũmb n toeeme. A sẽn wa n be saasẽ wã, a ra yaa Wẽnnaam biig sẽn yaa malɛka. La a lisgã tɛka, Wẽnnaam zae-a-la ne a vʋʋsem sõngã, t’a na n wa leb saasẽ, n tɩ lebg rĩm a sẽn yãke, la maan-kʋʋdb kãsma. (Luk 1:31-33; Ebre. 1:8, 9, MN; 2:17) Dẽnd Wẽnnaam bee bʋʋm la a sẽn yeel-a a lisgã sasa t’a yaa yẽ Biigã.—Luk 3:22. w19.03 8 s. a 3-4

Pa rũndã-rũndã bal la sagls sẽn tõe n wã ned be ye. Sɩnga hal dũniyã sɩngrẽ. Wuk-m-meng soab a Sʋɩtãan n yɩ pipi n kõ saglg sẽn pa sõma. A yeela d yaab a Awa tɩ yẽ ne a Ãdem sã n yãk yam n na n maand b mensã raabo, rẽ la b paamd sũ-noog n yɩɩda. (Sɩng. 3:1-6) La togs sɩdã, a Sʋɩtãan sẽn da baoodã yaa yẽ mengã nafre! A ra ratame t’a Ãdem ne a Awa, n paas kambã la yagensã b sẽn na n paamã bas a Zeova waoogre, n tũ yẽ raabã la b waoogd yẽ. A yaool n pa maan baa fʋɩ n kõ a Ãdem ne a Awa ye. A Zeova n kõ-b bũmb fãa. Yẽ n naam-b rao la paga, n naan zĩ-neer n ning-b be, n naan-b tɩ b yĩngã pa tar zanga, tɩ b tõe n vɩɩmd wakat sẽn kõn sa. Bʋko, a Ãdem ne a Awa sak n kɩɩsa Wẽnnaam. B sẽn maan woto wã, b zãaga b mens ne sẽn kõ-a bãmb vɩɩmã. Wa d sẽn mi wã, waa ne yel-beedo. Wa fɩlɛɛr b sẽn tõsg sẽn zelgd bilf-bilf n wa kʋɩ wã, b sɩnga kʋʋlg bilf-bilfu, n wa ki. B yel-wẽndã biis ket n namsda b yagensã hal ne rũndã. (Rom. 5:12) La ne rẽ fãa, neb wʋsg toog kae ne Wẽnnaam goamã ye. B yãka yam n na n maand b mensã sẽn dat bala. (Efɛ. 2:1-3) Woto wata ne bõe? Yɛlã sẽn lebg to-to wã wilgda vẽeneg tɩ rũndã daar vɛrse wã sẽn yetã yaa sɩda. w18.12 20 s. a 3-4

Tʋm-tʋmd a Poll ra yaa ned sẽn tar yam la bãngr wʋsgo. A ra gomda ebre la gɛrke. (Tʋʋ. 5:34; 21:37, 39; 22:2, 3) La pa ninsaalbã bãngr la a ra teeg n na n bãng sẽn yaa sõma bɩ wẽngã n bak ye. Yaa Wẽnnaam Gomdã. (Tʋʋ. 17:2; 1 Kor. 2:6, 7) Kɩtame t’a koe-moonegã wom biisi, t’a leb n da gũud wakat ning a sẽn na n paam vɩɩm sẽn kõn sa wã tɩ yɩ a keoorã. (2 Tɩm. 4:8) Hakɩɩka, a Zeova tagsa wã yaa sõma n yɩɩd dũniyã nebã rẽnd hal zĩig sẽn zãre. D sã n tũud a Zeova noyã la a saglsã, d vɩɩmã na n talla barka, tɩ d tar sũ-noog meng-menga. La a Zeova pa na n modg tõnd tɩ d tagsa wã yɩ yẽ rẽndã ye. Tʋm-tʋmd sẽn tũud sɩdã la kãsem-dãmbã me pa na n modg tõnd tɩ d toeem d tagsa wã ye. (Mat. 24:45; 2 Kor. 1:24) Yaa kiris-ned fãa n segd n mao t’a tagsa wã yɩ a Zeova rẽndã. w18.11 20-21 s. 12-13

Wẽnnaam kɩtame tɩ no-rɛɛs a Ezayi pĩnd n togs tɩ Israyɛll nebã sã n wa lebg n wa b ba-yirã, laafɩ la bãan na n zĩnda zĩig fãa. B pa na n yɛɛsdẽ tɩ ned wall rũng na wa n maan-b bũmb ye. Bũmb kõn maan biig wall kãsem ye. (Eza. 11:6-9; 35:5-10; 51:3) A Ezayi yeelame me tɩ ‘dũniyã gill na n pida ne Sẽn-Ka-Saab bãngre, wa ko-kãsengã sẽn pidã.’ A pa yeel tɩ na n yɩɩ Israyɛll tẽngã bal ye. A Ezayi le pĩnd n togsame tɩ Israyɛll nebã sã n wa lebg n wa b ba-yirã, b pa na n yɛɛsdẽ tɩ ned wall rũng na n wa maan-b bũmb ye. A yeelame tɩ tẽngã na n saka koodo, tɩ rɩɩbã seke, bala, koom na n bee zĩig fãa, wa sẽn da yaa to-to Edɛnnã. (Sɩng. 2:10-14; Zer. 31:12) Yaa bãmb wakatẽ wã bal la gom-kãensã ra segd n pids bɩ? Tẽeg-y tɩ bãngr-gomdã yetame me tɩ zoens nin na n pukame, tɩ wʋms tʋb yoose, tɩ wobs paam karse. La rẽ fãa pa pids wakat kãng ye. Dẽnd Wẽnnaam da ratame tɩ b bãng tɩ daar n wat t’a na n kɩt tɩ bãas buud fãa sa. w18.12 5 s. 11-12

D raab yaa d kell n kẽn sɩdã pʋgẽ wakat sẽn kõn sa yĩnga. Bõe n na n sõng-d tɩ d maneg n dat ne d sũur fãa n kell n kẽn sɩdã pʋgẽ? Bɩ d gom bũmb a tãab yelle. D segd n ket n wɩngda ne Biiblã zãmsgo, la d bʋgsd d sẽn bãngdã zugu. D yãk wakat sẽn na yɩl n paam n dɩlgd d yamã ne Wẽnnaam Gomdã. D mao n da vaandẽ ye. Woto na n kɩtame tɩ d maneg n nong sɩdã ne d sũur fãa, hal n pa tol n dat n bas-a ye. Yel-bũn 23:23 yeelame me tɩ d “bao yam, ne zãmsg la bãngre.” D sã n mi Biiblã sẽn yetã, yaa sõma. La rẽ bal pa sek ye. Yaa tɩlɛ me tɩ d tũ d sẽn bãngã. D sã n mao n wʋm d sẽn bãng bũmb ninsã võore, d na n nee vẽeneg t’a Zeova goamã fãa tũuda taaba, n lokd taab sõma. Yell taoore, yam ning d sẽn paamã na n sõng-d lame tɩ d maan tɩ zems ne d sẽn mi wã. Wakat ninga, Wẽnnaam goamã sẽn yaa sɩdã sõngd-d lame tɩ d paam ‘zãmsgo,’ rat n yeel tɩ sõngd-d lame tɩ d bãng bũmb kẽer d sẽn tog n demse. Segdame tɩ d yɩ tao-tao n dems bũmb ning sẽn dat remsgã. Biiblã yeelame tɩ d sak remsgo, bala a yõod yɩɩda wanzuri.—Yel. 8:10. w18.11 9 s. a 3; 11 s. 13-14

Bõe n tar yõod n tɩ yɩɩd yãmb vɩɩmã pʋgẽ? Y na n sak n tek-a-la ne bũmb yõod sẽn pa ta rẽ bɩ? Sogs-kãensã leokr pa toog ne neb nins sẽn dɩk b mens n kõ a Zeova wã ye. Yaa tõnd ne a Zeova zoodã n tar yõod n yɩɩd d vɩɩmã pʋgẽ. D pa na n tol n sak n tek rẽ ne baa fʋɩ ye. D nonga Biiblã goamã me wʋsgo, bala yaa rẽ n sõngd tõnd tɩ d tõe n paam d saasẽ Ba wã zoodo. (Kol. 1:9, 10) Tags-y n ges-y a Zeova sẽn yaa d karen-saam-kãsengã sẽn zãmsd tõnd bũmb nins ne Biiblã maasmã! A sõnga tõnd tɩ d bãng a yʋʋrã, la d bãngd a võorã n paasdẽ, la a zʋgdã sẽn yaa sõma zãngã. A sõnga tõnd tɩ d bãng t’a nong-d-la wʋsgo, hal n kɩt t’a Bi-ribl a Zeezi wa ki tɩ yɩ maoong tõnd yĩnga. A sõng-d-lame me tɩ d bãng t’a lugla Rĩungu, la tɩ d beoog na n yɩɩ neere. A wilgd-d-la d sẽn tog n vɩɩmd to-to me. D sũur yaa noog ne bõn-kãensã d sẽn bãngã, bala sõngdame tɩ zood ning d sẽn tar ne d Naandã paasdẽ, la kɩtdẽ tɩ d vɩɩmã tar barka. w18.11 3 s. a 1-2

Baa ned sã n yagd ziri, a pa tõe n belg a Zeova ye. Bala “bũmb fãa yaa vẽenes la bɛɛl” a Zeova taoore. (Ebre. 4:13) Wala makre, a Ananias ne a Safɩra baoome n na n belg tʋm-tʋmdbã. B koosa b pʋʋgo, n yãk ligdã n kõ tʋm-tʋmdbã. La b sẽn da rat tɩ b tẽed-n-taasã pẽg-bã yĩnga, b yeela tʋm-tʋmdbã tɩ yaa pʋʋgã ligd fãa la b sẽn kõ wã. A Zeova yẽ ra miime tɩ b yaga ziri. A sɩbg-b-la rẽ yĩnga. (Tʋʋ. 5:1-10) A Zeova tagsg yaa wãn ne ziri-n-beedo? A Sʋɩtãan ne neb nins fãa sẽn yagd ziri n na n wã b taabã, la b pa rat n tek yamã na n wa baasa ‘bugum mogrã’ pʋgẽ. (Vẽn. 20:10; 21:8; Yɩɩn. 5:7) D miime t’a Zeova “ka ninsaal n yagd zĩrẽ ye.” A pʋd n “ka tõe n yag zĩrẽ” ye. (Sõd. 23:19; Ebre. 6:18) A Zeova kisa “zelemd sẽn gomd zĩrẽ goamã.” (Yel. 6:16, 17) D sã n dat n ta a yam, yaa tɩlɛ tɩ d togsd sɩd wakat fãa. w18.10 8 s. 10-13

D rɩk makr wa yãmb patrõ sẽn na n yeel-y tɩ y lob ligd tɩ b maan tigr y sẽn mi tɩ naaga ne ziri tũudmã yel-maandɩ. Y manesem na n yɩɩ wãna? Yaa masã meng la y segd n bao n bãng a Zeova tagsg sẽn yaa soab yell a woto zugu, nand t’a buud paam-yã. Dẽ, yell a woto pʋgẽ, y bãngd n yãka yam. D sã n deng n tags d sẽn na n maaneg n kell n maan sɩd ne a Zeova, tõe n sõng-d lame me tɩ d sã n wa rat tɩbsg tao-tao bɩ d bãng n yãke. Yaa sɩd tɩ d pa na n tol n sak tɩ b ning-d zɩɩm, wall zɩɩmã pʋgẽ bõn-kãsems a naasã baa a yembr ye. (Tʋʋ. 15:28, 29) La tɩbsg kẽer n be n tõe n tũ ne tõnd mengã zɩɩm wall zɩɩmã pʋgẽ bõn-kɩdsã, tɩ yaa tɩlɛ tɩ ned fãa reng n tags Biiblã saglsã zug n bãng a Zeova tagsgo, tɩ sõng-a t’a bãng sẽn sakd ne yẽ. Yaa vẽeneg tɩ yaa masã meng la d segd n tags neere, n yãk d sẽn na n sak tɩbsg ningã. Pa d sã n wa be logtor yirã n gãe ne toogo, tɩ nebã me pẽdgd tõndã la d na n bãng n yãk zĩig pʋgẽ ye. Yaa masã la d segd n maan vaeesgo, n gʋls d kart depeya (DPA) wã la d tɩbsgã sɛb a taabã n wilg d sẽn dat tɩbsg ningã vẽenega, la d gom rẽ yell ne d logtorã. w18.11 24 s. a 5; 26 s. 15-16

A Zeova geta a nin-buiidã yell neer wa pe-kɩɩm sẽn nong a piisi, n maand bũmb toor-toor n sõngd-ba. A geta b yell ne nonglem tɩ b yam gãe bãane, la a kogend-b ne b bɛɛbã. Sẽn mik tɩ dũni-kãngã saabã tara kolgrã, woto kengda tõnd raood wʋsgo. A Zeova ket n geta a nin-buiidã yelle. Baa to-kãsengã sẽn wat ka la bilfã sasa me, a na n kell n maana woto. (Vẽn. 7:9, 10) Dẽnd to-kãsengã sasa, Wẽnnaam nin-buiidã fãa, kom-bɩɩsã la kãsembã, sẽn tar-b keelem la sẽn yaa-b koms-rãmbã fãa pa na n maan rabeem bɩ n yirb ye. B pʋd n na n talla raoodo! B na n tẽega bũmb a Zeezi sẽn yeele. A ra yeelame yaa: “Bɩ y roog la y nak n gese, bala, yãmb fãagrã kolgame.” (Luk 21:28) Baa a Goog sẽn yaa tẽns sẽn tar pãng wʋsg sẽn lagem taabã sã n wa na n zab ne Wẽnnaam nin-buiidã, b na n kell n kɩsa sɩd t’a Zeova na n kogl-b lame. (Eze. 38:2, 14-16) Bõe yĩnga? Bala, b miime t’a Zeova pa toeemd ye. Wakat fãa, a yaa a nin-buiidã fãagda, tɩ wilgdẽ t’a nong-b lame la a get b yell neere.—Eza. 26:20. w18.09 26 s. 15-16

Tags-y n ges-y Israyɛll nebã sũy sẽn yɩ noog to-to, a Zeova sẽn wa n yeel-b rũndã vɛrse wã goamã. D sẽn tũud a Zeova wã, d tõe n basa d yam t’a nonga tõnd ned kam fãa wʋsgo. Biiblã yeta tũudum hakɩɩkã neb yaa: “B yaa gãndaoog sẽn fãagd yãmba, yãmb na n yɩɩ bãmb sũ-noogo.” (Sof. 3:16, 17) A Zeova pʋlmame t’a na n sõnga a nin-buiidã, n keng b raoodo, baa sẽn wa n yaa zu-loɛɛg ning fãa la b tara. Ad Biiblã sẽn yete: “Yẽnda na n kõo yãmb tɩ y yẽsme. B na n dɩka yãmb n pẽgne, la b zaoolg yãmb b naoẽ n saage. Wa ned ma sẽn belsd-a to-to wã, mam na n belsa yãmb a woto.” (Eza. 66:12, 13) Ad yaa goam sẽn kengd raoodo! Tags-y n ges-y pag sẽn pẽgen a bi-pɛɛlga, bɩ sẽn zĩndg-a a naoẽ, n deemd ne-a! Woto wilgdame t’a Zeova ratame tɩ sẽn tũud-b yẽ wã bas b yam t’a nong-b-la ne a sũur fãa. Bɩ d ned kam fãa tẽegdẽ t’a tara yõod wʋsg a Zeova nifẽ. D ra tol n maan sãmb-sãmb ne rẽ ye.—Zer. 31:3. w18.09 13 s. a 6-7

Pĩnd wẽndẽ, Israyɛll nebã paama segb buud toor-toore, n sõng n tʋm a Zeova tʋʋmã ne yamleoogo. (Yik. 36:2; Nee. 11:2) Rũndã-rũndã, tõnd me tara segb buud toor-toore, n tõe n kẽes d sẽka, d paoongo, d bãngr la d minim a Zeova tʋʋmã pʋgẽ n sõng d tẽed-n-taasã. D sã n sak ne yamleoog n maan woto, d paamda sũ-noog wʋsgo, la bark ka tɛka. Neb nins sẽn sõngd n tʋmd siglgã tʋʋmã ne yamleoogã wae n paamda zo-rãmb n paasdẽ. D gom a Margi yelle. Yaa saam-bi-poak sẽn sõng ne Rĩungã rot meeb na maan yʋʋm 18. Meebã zĩisẽ, a ra nong n sõngda saam-bi-pogs sẽn pa ta yẽ sẽn na yɩl tɩ b paam minim. A yeelame tɩ tʋʋmdã sasa, tʋm-tʋmdbã fãa paamdame n kengd taab raoodo. (Rom. 1:12) A Margi wa n paama zu-loees hal tɩ pa yɩ nana ne-a ye. La zo-rãmb nins a sẽn paam meebã zĩisẽ wã kenga a raoodo. Yãmb zoe n tɩ sõng n mee Rĩung roog wall siglgã roog a to bɩ? w18.08 25 s. a 9, 11

A Poll sẽn wa n yet a Tɩmote woto wã t’a Tɩmote yʋʋmã ra tog n zemsa 30. Baa ne rẽ, a Poll ra kõ-a-la tʋʋm-kãsems kiris-nebã tiging pʋgẽ. Woto wilgda tõnd bõe? Wilgdame tɩ d pa segd n ges saam-biig yʋʋm n sãbs-a ye. D tẽeg t’a Zeezi sẽn wa n na n ta yʋʋm 33 wã, rẽ t’a tʋma tʋʋm nins a sẽn da segd n tʋm tẽngã zugã fãa n sa. Tẽns kẽere, nebã pa wae n nand kom-bɩɩsã ye. Rẽ tõe n kɩtame tɩ baa bi-bɩɩg tar minim bɩ a tigingã kãsem-dãmb pa rat n sak n yãk-a t’a lebg kãsemb-sõngda, wall kãsem-soab ye. La kãsem-soab fãa segd n tẽegame tɩ Biiblã pa yãk yʋʋm sõore, tɩ saam-biig sã n pa ta rẽ bɩ a pa tõe n yɩ kãsemb-sõngd wall kãsem-soab ye.—1 Tɩm. 3:1-10, 12, 13; Tit 1:5-9. w18.08 11-12 s. 15-16

D sã n dat n bãng n yãk yam, yaa tɩlɛ tɩ d tik kibay sẽn yaa sɩda. Rẽ n so tɩ d segd n maan gũusg wʋsgo, n bãng n yãk bũmb nins d sẽn karemdã. (Fili. 4:8, 9) D segd n gũusa ne sɩt-rãmb nins sẽn taasd kibay d sẽn pa tõe n bãng sã n yaa sɩdã, la kibay nins nebã sẽn yelgd ne mesaaz-rãmb maasmã karengo, bala sãamda sẽkã. Sẽn yɩɩd fãa, d segd n zãaga d meng ne sɩdã kɩɩsdbã sɩt wɛɛb rãmbã. Bala, b raab yaa b koms Wẽnnaam nin-buiidã tẽebo, la b golem Biiblã goamã. Ned sã n tik kibay sẽn pa sɩd n na n yãk yam, a yam-yãkrã pa tõe n yɩ sõma ye. Woto wã, ra tol-y n tags-y tɩ kibay sẽn pa sɩd pa tõe n maan yãmb bũmb ye. D tẽeg bũmb sẽn maan a Moyiiz wakatẽ wã. Tẽn-gũusdb 12 wã b sẽn da tʋm tɩ b tɩ gilg n ges kãabg tẽngã sẽn lebg n wa wã, bãmb 10 n togs kibay sẽn pa sɩda. (Sõd. 13:25-33) B zẽna yɛlã, hal tɩ koms a Zeova nin-buiidã raood zãnga. (Sõd. 14:1-4, 6-10) B pa bao n na n fees n bãng sẽn yaa sɩdã, la b teeg a Zeova ye. B maana yalemdo, n tẽ sẽn pa sɩda. w18.08 4 s. a 4-5

Neb n pa tũud a Zeova la b tar zʋg-sõma. Wʋsg meng yãka yam n pa maand sẽn yaa wẽng ye. Baa y sẽn wae n be ne b rãmbã sã n yaa woto, rat n yeelame tɩ b tõe n yɩɩ tũud-n-ta-sõma bɩ? Sok-y y meng yaa: ‘M sã n maand tũud-n-taar ne-ba, na n paasa maam ne a Zeova zoodã bɩ? Na n sõnga maam tɩ m maneg n nong a Zeova bɩ? Bõe n tar yõod bãmb nifẽ n yɩɩda? Bõe yell la b nong n gomda? Yaa futã la nag-teedã yelle, ligdã la reem toor-toorã, portaabl-dãmbã la taablɛt-rãmbã yell bɩ? B nonga neb wɩdg bɩ? B nonga gom-yood bɩ?’ D tẽeg t’a Zeezi ra yeelame tɩ “yaa bũmb nins sẽn pid sũurẽ wã n yit noorẽ wã.” (Mat. 12:34) Y sã n neẽ tɩ y sẽn nong n be ne b rãmbã tũud-n-taarã rat n sãama yãmb ne a Zeova zoodã bɩ y maan bũmb tao-tao. Boog-y y zoodã, wall sã n yaa tɩlɛ meng bɩ y tolg n lak y meng ne-ba.—Yel. 13:20. w18.07 19 s. 11

A Moyiiz sẽn wa n tar yʋʋm 80, a Zeova kõ-a-la tʋʋmde, n yeel-a t’a kẽng Ezipt n tɩ yiis Israyɛll nin-buiidã yembdo. (Yik. 3:10) A Moyiiz maka naoor wʋsg n na n zãgs tʋm-tʋmdã, la a Zeova kell n maana sũ-mar ne-a, n kõ-a tõog meng t’a maan yel-soalma. (Yik. 4:2-9, 21) A ra tõe n bugsa a Moyiizi, n kẽes-a rabeem, t’a sak yẽ raabã tao-tao. La a maana sũ-mare, n bʋk a meng ne nin-kãngã sẽn da yaa sik-m-meng soabã, n sõng-a t’a bas a yam t’a na n zĩnda ne-a. A sẽn maan woto wã yãka neng bɩ? N-ye! Bala, a Moyiiz yɩɩ Israyɛll nebã taoor lʋɩta, n ges nin-buiidã yell ne sũ-mar la naneb wa a Zeova sẽn maan to-to ne yẽ wã. Yãmb sã n yaa pʋg-sɩda, roagda, wall y yaa kãsem-soab tiging pʋgẽ, neb n be tɩ yãmb get b yelle. Segdame tɩ y rɩk a Zeova togs-n-taare, n maand sũ-mar ne neb nins yell y sẽn getã, la y wilgdẽ tɩ y nand-b lame. (Kol. 3:19-21; 1 Pɩy. 5:1-3) Y sã n modgd n dɩkd a Zeova ne a Zeezi Kirist sẽn yaa Moyiiz-kãsengã togs-n-taar woto, y na n yɩɩ ned pẽnegr sẽn yaa nana, tɩ y taabã tõe n paam yolsg yãmb nengẽ.—Mat. 11:28, 29. w18.09 24-25 s. a 7-10

D sã n yaa nin-bʋgsgo, la d maand d tẽed-n-taasã neere, na n kengda b raoodo, tɩ zems-n-taarã paasd tigingã pʋgẽ. Y sã n zoe n maanda woto, seka pẽgre. La rẽ yĩnga, y pa tõe n bao n bãng y tẽed-n-taasã n paas sɩda? (2 Kor. 6:11-13) Bõe la y tõe n maan tɩ Wẽnnaam Gomdã vẽenemã yãg yãmb sẽn vɩẽ wã? Y sã n gomd ne y yagsã noog-noog la y maand-b neere, tõe n kɩtame tɩ kẽer wa rat n bao n bãng a Zeova. Bɩ d sok d meng yaa: ‘Bõe la yagsã yet mam zugu? M manegda m doogã, tɩ yaa yɩlemd wakat fãa bɩ? Yagsã pẽgdame bɩ? M mi n sõnga m yagsã bɩ?’ Y sã n wa sõsd ne y tẽed-n-taasã, y tõe n mi n sok-b-la b roagdba, b yagse, b tʋmd-n-taas wall b karen-bi-taas sẽn yeel bũmb ninga, b sẽn maand b taabã neer la b zãad b mens sõma wã yĩnga. Sãmbg kae tɩ b sẽn na n togsã na n yɩ-y-la noogo.—Efɛ. 5:9. w18.06 24 s. 13-14

Neb nins sẽn kʋ a Etɩyɛnnã ra tagsdame tɩ b sẽn maanã yaa Wẽnnaam daabo. (Tʋʋ. 6:8, 12; 7:54-60) Hal pĩnd n tãag masã, neb n lʋɩɩs tũudmã taoor n yãgs yõyã, n yetẽ tɩ yaa Wẽnnaam yʋʋr yĩnga. La sɩd-sɩdã, pʋd n yaa a noyã kɩɩsgo. (Yik. 20:13) Yaa vẽeneg tɩ sẽn maand-b woto wã sũur-kasetã kẽes-b-la moogo. Bõe la d tõe n maan tɩ d sũur-kasetã tõog n keoogd-d wakat fãa? Wẽnnaam noyã la a saglsã sẽn be Biiblã pʋgẽ wã “bee yõod zãmsg yĩnga, tɩ kɩt tɩ ned bãng a kongre, tɩ rems neda, tɩ wub ned tɩrlem pʋgẽ.” (2 Tɩm. 3:16) Dẽnd d sã n zãmsd Biiblã sõma, n bʋgsd a goamã zug neere, la d tũud bũmb nins d sẽn bãngã, d sũur-kasetã na n paama kiblg sõma, t’a sẽn sakd tɩ d maan fãa zemsd ne Wẽnnaam daabã. Woto, d tõe n kɩsa sɩd t’a na n sõng-d lame tɩ d bãng n maan sẽn segd bũmb fãa pʋgẽ. w18.06 16-17 s. a 3-4

Rom sodaasã sʋʋsã woglem ra taa metr pʋɩ-sʋka. Daar fãa, b ra zãmsda sʋʋgã tall n zabã. Rẽ kɩtame tɩ b ra tõe zabr sõma. Tʋm-tʋmd a Poll yeelame tɩ Wẽnnaam Gomdã yaa wa sʋʋg a sẽn kõ tõndo. La tõnd segd n paama zãmsg sõma, n tõe n tall-a n dems d tagsa wã, tɩ ned sã n sok tõnd d sẽn tẽed bũmb ninsã me, bɩ d bãng n leoke. (2 Kor. 10:4, 5; 2 Tɩm. 2:15) D pa segd n zoe a Sʋɩtãan ne zĩn-dãmbã ye. Yaa sɩd tɩ b tara pãnga, la b pãng pa ta a Zeova ye. B pa na n vɩɩmd wakat sẽn kõn sa ye. Ka la bilfu, a Zeezi sã n wa sɩng a naamã sẽn na n kaoos yʋʋm tusrã, b na n balga a Sʋɩtãan ne zĩn-dãmbã bog-zulungẽ, tɩ b pa le tõe n maan bũmb ye. Yʋʋm tusrã poore, b na n sãam-b-la fasɩ. (Vẽn. 20:1-3, 7-10) D mii d bɛ wã sõma, n mi a sɩlem toor-toorã la a raabã. Ne a Zeova sõngre, d tõe n yalsa kãn-kãe, n zab ne-a n tõoge! w18.05 30 s. 15; 31s. 19-21

A Ãdem ra mii vẽeneg tɩ waaf pa gomd ye. Dẽnd tõe t’a Awa sẽn wa n yeel-a tɩ waaf n gom ne yẽ wã, a bãngame tɩ yaa malɛk la sẽn gom ne-a wã, n maan tɩ yaa wa waafã. (Sɩng. 3:1-6) A Ãdem ne a Awa ra pa mi malɛkã ye. Baasgo, a Ãdem sak n kɩɩsa a saasẽ Ba wã sẽn nong-a wã, n tũ malɛkã a sẽn da pa mi wã raabo. (1 Tɩm. 2:14) Tao-tao bala, a Zeova vẽnega yɛl kẽer malɛg-kãngã sẽn yaa bɛ wã zugu, la a wilg tɩ wakat n wat tɩ b na n sãam-a fasɩ. La a Zeova togsa vẽeneg tɩ nananda, malɛg-kãngã na n namsa neb nins fãa sẽn nong Wẽnnaamã. (Sɩng. 3:15) Zĩig baa a ye, a Zeova pa togs malɛk ning sẽn lebg kɩɩsdã yʋʋrã meng-meng ye. A Ãdem ne a Awa sẽn kɩɩsã, yaa na maan yʋʋm 2500 poor la a Zeova yaool n togs malɛg-tõatã sẽn yaa a soaba.—Zoob 1:6. w18.05 22 s. a 1-2

Y sã n zoe n moona koɛɛgã zĩig nebã sẽn pa sakd n kelgdẽ, tõe tɩ y na n wʋma tʋm-tʋmd a Poll sũur sẽn wa n sãam wʋsgã võore. A moona koɛɛgã na maan yʋʋm 30, n sõng neb wʋsg tɩ b lebg kiris-neba. (Tʋʋ. 14:21; 2 Kor. 3:2, 3) La a pa tõog tɩ zʋɩf-rãmb wʋsg lebg kiris-neb ye. B wʋsgã pʋd n zãgsame tɩ b kõn kelg-a, tɩ sãnda meng nams-a. (Tʋʋ. 14:19; 17:1, 4, 5, 13) Hal sẽn ta zĩ-bʋg la rẽ sãam a Poll sũuri? Ad a sẽn yeele: “Mam yeta sɩd Kiris pʋgẽ. . . . Sũ-sãoon-kãsenga, la sũ-sãang n be mam sũurẽ wã daar fãa.” (Rom. 9:1-3) Bõe yĩng t’a sũur sãam woto? Bala, a ra nonga koɛɛgã mooneg ne a sũur fãa, la a nong nebã. Yaa a sẽn da rat zʋɩf-rãmbã neerã yĩng la a sẽn da taasd-b koɛɛgã. Kɩtame tɩ b sẽn zãgs Wẽnnaam nimbãan-zoeerã, sãama a Poll sũuri. Wa a Polle, tõnd me taasda nebã koɛɛgã, d sẽn dat b neer yĩnga.—Mat. 22:39; 1 Kor. 11:1. w18.05 13 s. a 4-5

A Poll wilgame tɩ baa sẽn wɩngd-b ne b taabã raood kengrã me mi n data raood kengre. A ra yeela a tẽed-n-taas nins sẽn be Rommã yaa: “Mam data ne m sũur fãa n yãnd yãmba, tɩ m tõe n taas yãmb Sɩɩgã kũuni, tɩ yãmb tẽebã na paam pãnga, wall tɩ tõnd pʋs n naag taab n paam raood paoosg ne tẽeb a yembr tãa ning yãmb la maam sẽn tarã.” (Rom. 1:11, 12) Dẽnd baa a Poll mengã sẽn da nong n kengd a taabã raoodã ra mi n data “vʋʋsem bilf” a tẽed-n-taasã sʋka, rat n yeel tɩ pɛlg kengre. (Rom. 15:30-32) Yɩta sõma tɩ d kengd d tẽed-n-taas nins sẽn kẽes b meng zãng a Zeova tʋʋmdã pʋgẽ wã raoodo. D tẽed-n-taas nins me sẽn nan pa kẽ kãadem, b sẽn dat n tũ Biiblã sẽn yeel tɩ d tog n kẽe kãadem “Zu-soabã pʋgẽ” balã yĩngã toga ne raood kengre. (1 Kor. 7:39) Kiris-neb nins me b sẽn namsd b tũudmã yĩnga, wall sẽn maood ne bãasã rata raood kengre.—2 Tes. 1:3-5. w18.04 21 s. a 3-5