Sẽoogo

Tõnd bee tood wakate, hal tɩ vɩɩmã pa nana ye. (2 Tɩm. 3:1) La d miime tɩ nand t’a Zeova sãam nin-wẽnsã la a kɩt tɩ laafɩ zĩnd tẽngã zugu, vɩɩmã na n maneg n lebgda toog n paasdẽ. Rẽ n so tɩ d segd n sok d meng yaa: ‘Ãnd la mam geta, n dat t’a sõng-m la a wilg-m sore?’ Pĩnd wẽndẽ, yɩɩn-gʋlsd a ye wilgame tɩ d sã n wa rat sõngre, yaa a Zeova la d segd n gese. (Yɩɩn. 123:1-4) A yeelame tɩ tõnd geta a Zeova wa tʋm-tʋmdb sẽn get b zu-soaba. A gomdã võor yaa bõe? Tʋm-tʋmd pa get a zu-soab n na n paam rɩɩb la koglg bal ye. A segd n get-a-la wakat fãa sẽn na yɩl n bãng a sẽn datã, n maane. Tõnd ned kam fãa me segd n zãmsda Biiblã neer daar fãa, n paam n bãng a Zeova sẽn dat t’a maanã, la a maan rẽ. Yaa d sã n maand a woto bal la d tõe n bas d yam tɩ d sã n wa rat sõngre, a Zeova na n sõng-d lame. w18.07 12 s. a 1-2

Yaa d sẽn na n paam d mens ne yembd ning pʋgẽ ãdem-biisã fãa sẽn be, hal tɩ yaa nimbãaneg sẽn pa tõe n bãng n bilgã yell la a Zeezi ra gomda, rat n yeel tɩ ‘yel-wẽnã yembdã.’ (Zã 8:34) Yel-wẽnã pa kɩt tɩ d maand sẽn pa segd bal ye. A tõe n kɩtame tɩ d pa maan bũmb nins d sẽn mi tɩ yaa neerã ye. Wakat ning me, a kɩtdame tɩ d pa maand d sẽn tõe wã fãa ye. Dẽnd d sɩd yaa yel-wẽnã yembse, tɩ rẽ wat ne sũ-sãams la namsgo, n wa baas ne kũum. (Rom. 6:23) Yaa d sã n wa paam d mens fasɩ ne yel-wẽnã, la d na n paam lohorem ning a Ãdem ne a Awa sẽn da tar sɩngrẽ wã. A Zeezi yeelame tɩ yaa d ‘sã n tall yẽ goamã’ la a na n kõ-d lohorem. Woto wilgdame tɩ bũmb kẽer la d segd n maane, n yaool n paam lohorem hakɩɩkã. (Zã 8:31) D sẽn lebg kiris-nebã, d kɩɩsa d mensã raabo, n yãk yam n na n tũ noy nins a Zeezi sẽn gãnegã. (Mat. 16:24) Wa a Zeezi sẽn pʋlmã, wakat n wat tɩ d na n paam n dɩ a maoongã yõod zãnga. Wakat kãnga, d na n sɩd paama lohorem hakɩɩka. w18.04 7 s. 14-16

A Zeova kʋmda a nin-buiidã nimbãanega, n wilgd t’a yaa wʋmda, baa b sã n wa tar tags-kɛga. D gom no-rɛɛs a Zonaas yelle. Wẽnnaam da tʋm-a-la Niniiv tẽngã, t’a tɩ taas bʋ-kaoor koɛɛga. Niniiv nebã sẽn tek yamã, Wẽnnaam basame n pa sãam-b ye. La yellã sẽn baas woto wã pa yɩ a Zonaas noog ye. A Zonaas ‘sũurã yikame,’ a sẽn moon n togs tɩ tẽngã na n sãamame, tɩ pa pidsã yĩnga. La a Zeova maana sũ-mar ne a Zonaase, n sõng-a t’a toeem a tagsgã. (Zon. 3:10–4:11) A wa n bãnga a Zeova sẽn da rat n zãms-a bũmb ningã. Pʋd n yaa yẽ meng la a Zeova kɩt t’a gʋls kibarã, tõnd nafr yĩnga. (Rom. 15:4) A Zeova manesem sẽn yɩ to-to ne a nin-buiidã kɩtame tɩ d tõe n kɩs sɩd t’a kʋmda sẽn tũud-b yẽ wã nimbãanega. A mii namsg la toog ning sẽn be ne tõnd ned kam fãa wã. A mii d tagsa wã hal sõma, sẽn noogd d sũur la sẽn sãamd d sũuri, d sẽn tõe la d sẽn pa tõe. A ‘ka na n sak tɩ d paam makr sẽn yɩɩd d pãng ye.’ (1 Kor. 10:13) Ad yaa gomd sẽn kengd pɛlg sõma! w19.03 16 s. a 6-7

A Moyiiz tõogã ra kõo noy tɩ buudã kãsem-dãmb ra segd n bʋ yell fãa tɩ zems ne noy nins a Zeova sẽn luglã. Ned sã n da beeg tũudmã wɛɛngẽ, wall a tara yell ne ned a to, pa rẽ bɩ a kɩɩsa noor ninga, kãsem-dãmbã n da segd n bʋ yellã. Ad makr a wãna. Israyɛll ned sã n da yãk a to yõore, b pa kɩtd tɩ b kʋ-a zĩig pʋgẽ ye. Tẽngã kãsem-dãmb na n deng n feesa yellã neere, n yaool n bãng b sã n tog n kʋ-a lame n lebse. (Tõo. 19:2-7, 11-13) Yɛl ka tɛk me la kãsem-dãmbã ra segd n bʋ. Wala makre, ned sã n tar yell ne a to, roog bɩ zĩig wall rũng poorẽ, pa rẽ bɩ ned sã n tar yell ne a paga. (Yik. 21:35; Tõo. 22:13-19) Israyɛll kãsem-dãmbã sã n da kaood bʋʋdã tɩrga, tɩ nin-buiidã me tũud tõogã sõma, ra nafda b fãa, la kɩtdẽ t’a Zeova yʋʋrã paamd waoogre. (Maan. 20:7, 8; Eza. 48:17, 18) Woto wilgdame tɩ tõnd vɩɩmã yɛl toɛy-toɛyã fãa paka a Zeova. A ratame tɩ d nong d taabã, n da maan ned baa a ye kɛgr ye. A nee d sẽn maande, la d sẽn yet fãa, baa d sẽn wat n yaa d yembr d roogẽ wã. w19.02 23 s. 16-18

D sã n wa maand yɩɩr wʋsgo, yɩl n kell n sik d meng pa nana ye. Tõe n kɩtame tɩ d gomd n pa gũusdẽ, la d pa bʋkd d meng ne d taabã ye. Y sã n zoe n maana yɩɩr wʋsg bũmb ning poorẽ, bɩ y tags a Zeezi mak-sõngã yelle. A Zeezi kũumã sẽn wa n ket tɩ kiis a wãna, ra lebga yɩɩr wʋsg ne-a. A ra miime tɩ b na n nams-a-la nams-toaaga, la b kʋ-a menga. (Zã 3:14, 15; Gal. 3:13) A kũumã sẽn wa n kolgdẽ wã, a wilgame tɩ yellã namsda yẽ. (Luk 12:50) Sẽn wa n ket tɩ rasem a wãna, a yeelame yaa: “Sũ-sãang n tar maam.” A sẽn pʋʋs Wẽnnaam n yeel bũmb ningã sõngda tõnd tɩ d bãng t’a sɩd yaa sik-m-meng soab la sakda. (Zã 12:27, 28) A kũumã wakat sẽn wa n ta wã, ne raoodo, a basame tɩ bɛɛbã yõk-a. A yãa namsg la paoogr tɛkẽ! Baa ne a yɩɩrã, la a namsgã sẽn da yaa wʋsgã, a kell n sika a meng n maan Wẽnnaam sẽn datã. Hakɩɩka, kell n sik f meng baa f sã n wa maand yɩɩr wʋsgã wɛɛngẽ, d tõe n yeelame t’a Zeezi kõo mak-sõng sẽn ka to.​—Eza. 53:10. w19.02 11 s. 14-15

Yel-pakr wall zu-loees sasa, yaa tɩlɛ tɩ d tall raood sẽn na yɩl n ket n kẽnd tigissã. Tõnd tẽed-n-taas n be sũ-sãang pʋgẽ b ned kaalem yĩnga, tɩ kẽer yaa b raood n komse, wall bãag n namsd-ba. La baa ne rẽ, b kẽnda tigissã. Sãnda me tara raood n wat tigissã, baa ne b sẽn paamd namsg b zakã neb nugẽ, wall tẽngã taoor dãmb nugẽ wã. Tags-y n ges-y tõnd mak-sõngã sẽn nafd d tẽed-n-taas nins sẽn be bãens roogẽ b tũudmã yĩngã to-to. (Ebre. 13:3) B sã n wʋmdẽ tɩ tõnd ket n wɩngda ne a Zeova tũub baa ne yɛlã, kengda b pɛlga, tɩ b rat n kell n tall tẽeb kãn-kãe, n tall raood la b maan sɩda. A Poll sẽn wa n be bãens roog Rommã, a sã n da wʋm fãa t’a tẽed-n-taasã wɩngda ne Wẽnnaam tũubã, noogda a sũuri. (Fili. 1:3-5, 12-14) A wa n gʋlsa lɛtr n tool kiris-neb nins sẽn yaa ebre-rãmbã. Tõe tɩ yaa a yiibã sẽn wa n kolgã, pa rẽ bɩ a yiibã poor bilfu. Lɛtrã pʋgẽ, a yeela kiris-nin-kãensã sẽn maand sɩdã tɩ b ra tol n bas taab tiging ye.—Ebre. 10:25. w19.01 28 s. a 9

A Sʋɩtãan raabã yaa tõnd me lebg wa yẽ, n maand d toog kae ne a Zeova noyã, tɩ sẽn pak-d yaa d mensã raabo. A tũnugda ne neb nins a sẽn tõog tɩ b sũurã tagsg lebg wẽngã, n saagdẽ tɩ b na n “sãama” tõnd tagsa wã la d yel-manesmã. (1 Kor. 15:33) Sẽn na yɩl tɩ d tagsa wã lebg wẽnse, a Sʋɩtãan maooda a pãng tɛk me n na n kɩt tɩ d bas a Zeova sẽn yetã, n teeg ninsaalbã yam la b bãngrã. (Kol. 2:8) D rɩk makr ne bũmb a ye a Sʋɩtãan sẽn maan tɩ lebg neb wʋsg tagsgo. B tagsdame tɩ ligdã baoob n segd n lʋɩ taoor ned vɩɩm pʋgẽ. Sẽn tagsd-b woto wã kẽer tõe n sɩd lebga arzɛk rãmba, la kẽer me ket n yaa naong rãmba. Sẽn yaa a soab fãa, yell n yɛgd-ba. Bõe yĩnga? Bala, tõe n wa lebga arzɛgsã baoob n pak-ba, hal tɩ b toog kae ne b yĩnsã laafɩ la b zakã pʋgẽ vɩɩm sẽn yaa to-to wã ye. B pʋd n pa zoet tɩ bãmb ne Wẽnnaam zoodã na n wa sãam meng ye. (1 Tɩm. 6:10) D sũur nooma d sẽn paam tɩ d saasẽ Ba wã sõngd tõndo, tɩ d tar tagsg sẽn zems ligdã wɛɛngẽ wã.—Koɛ. 7:12; Luk 12:15. w19.01 15 s. a 6; 17 s. a 9

Nand t’a Zeezi wa tẽngã zug n kõ mak-sõng neb a taabã raood kengr wɛɛngẽ, neb nins sẽn da tũud a Zeova wã ra miime tɩ segdame tɩ b kengd b taabã raoodo. Wala makre, a Ezekɩyaas. Asiiri nebã sẽn wa n dat n zab ne Zida nebã, a tigma tãb-biisã nanambsã la nin-buiidã, n gom n keng b raoodo. Sɩd me, kʋʋngã sẽn wʋm “a Ezekɩyaas goamã, b paama raoodo.” (2 Kib. 32:6-8) A Zoob me kõo mak-sõng neb a taabã raood kengr wɛɛngẽ. Yẽ mengã ra namsdame, n dat raood kengre. La bũmb la a yeel rap a tãabã sẽn da wa n na n bels-a wã, n na n wilg-b b sẽn tõe n keng ned raood to-to. A yeel-b lame tɩ sã n da yaa bãmb n namsde, tɩ yẽ na n bels-ba, a ‘rag n na n gomame n paas-b raoodo, la a noor dag na n yiisa belsg goam b yĩnga.’ (Zoob 16:1-5) A wa n paama belsg a Eliyu nengẽ, la a Zeova meng nengẽ.—Zoob 33:24, 25; 36:1, 11; 42:7, 10. w18.04 16 s. a 6; 17 s. a 8-9

A Ezayi ra zoe n wilga a Zeova sẽn na n kõ a nin-buiidã pãng la a keng b raood to-to. Ad a sẽn yeel-ba: ‘Zu-soab a Sẽn-Ka-Saab wata ne pãnga, bãmb yãoog pãng tõeeme tɩ b rɩ naam.’ (Eza. 40:10) A sẽn yeel t’a Zeova ‘yãoog pãng tõeeme tɩ b rɩ naamã’ tẽegda tõnd t’a Zeova yaa Rĩm sẽn tar pãnga. Pĩnd wẽndẽ wã, a talla a pãngã sẽn ka to wã n sõng sẽn da tũud-b yẽ wã, la a kogl-ba. Rũndã-rũndã me, a ket n kõta neb nins sẽn teeg-a wã pãng la raoodo, la a kogend-ba. (Tõo. 1:30, 31; Eza. 43:10.) Bɛɛb sã n wa namsd tõndo, wakat kãng la a Zeova sẽn yeel t’a ‘kõta tõnd pãngã’ pidsd n tɩ yɩɩda. Tẽns kẽere, bɛɛbã maanda b sẽn tõe fãa sẽn na yɩl tɩ d ra le moon koɛɛgã, wall b rat n tolg n gɩdg d tũudmã. Ne rẽ fãa, d pa maand yɩɩr tɩ loog ye. Bũmb la a Zeova pʋlem-yã, tɩ kɩt tɩ d yam gãe, tɩ d tar pãng la raood wʋsgo. A yeela a nin-buiidã yaa: “Zab-teoog ning fãa b sẽn maan n na n zab ne foomã kõn tol n tõog n maan foom bũmb ye.”—Eza. 54:17. w19.01 5-6 s. 12-13

Ninsaal miime t’a tog n bao n bãnga a Naandã, n tẽ-a, la a maan a raabã, la pa woto rũmsã nengẽ ye. (Mat. 4:4) Y sã n kelg Wẽnnaam neere, y paamda yam la bãngr ne sũ-noogo. Yaa ne Biiblã maasem, la bũmb nins fãa tʋm-tʋmd sẽn tũud sɩd la sẽn tar yamã sẽn yiisdã maasem la Wẽnnaam sõngd-y tɩ y bãngd a raabã n paasdẽ, tɩ y tẽebã kengdẽ. (Mat. 24:45) D tõe n maka tʋm-tʋmdã sẽn yiisdã fãa ne rɩɩbo, bala kengda tõnd tẽebã tɩ tõnd ne a Zeova zoodã paamd pãnga, wa rɩɩb sẽn kõt ned pãngã. Bũmb nins tʋm-tʋmdã sẽn yiisdã waoogame, t’a sõmblmã me ka to ye. (Eza. 65:13, 14) Bũmb nins a Zeova sẽn kõt-y y tẽebã kengr yĩngã na n sõng-y lame tɩ y paam yam-vẽenem, n tõe n tags neere, tɩ rẽ na n kogl-y bũmb wʋsg pʋgẽ. (Yel. 2:10-14) Wala makre, sõngd-y lame tɩ y bãng sẽn yaa ziri wã. Makre, b sẽn yet tɩ Naand pa be wã, la tɩ teedã la ligdã n kõt sũ-noogã. Na n sõng-y lame me tɩ y bãng tʋls-wẽns sẽn tõe n wa be y sũurẽ, la y sẽn na n maan to-to n tõog-ba, n da wa tall manesem sẽn na n wẽneg n wã-y ye. Rẽ wã, maan-y y sẽn tõe fãa, n paam yam-vẽenem, n tõe n tags neer bũmb fãa pʋgẽ. w18.12 20 s. a 6-7

A Ezayi wilgame tɩ wakat n wat tɩ ‘nebã rasem na n kaoos wa tɩɩse.’ Tɩɩs n be n kaoosd yʋʋm tusa. Ninsaalbã yʋʋm sã n na n taa woto, yaa tɩlɛ tɩ b paam yĩns keelem hal sõma. Zĩig ning b sẽn na n vɩɩmdã me sã n na n yɩɩ neere, tɩ laafɩ la bãan be zĩig fãa wa a Ezayi sẽn pĩnd n togsã, na n yɩɩ arzãna! La sɩd-sɩdã, bãngr-gom-kãngã na n pidsame! Bʋgs-y neer n ges wãn to la bãngr-goam nins yell d sẽn gomã wilgd vẽeneg tɩ arzãn n wate. Dũniyã gill na n pida ne neb sẽn tar Wẽnnaam barka. Ned baa a ye kõn yɛɛs tɩ ned bɩ rũng na n wa maan-a bũmb ye. Zoensã na n paama b nini, tɩ wʋms tʋb yoke, tɩ wobs paam b karse. Nebã na n mee b toorẽ zagse, la b rɩ b koodã biisi. B na n vɩɩmd n kaoosame n yɩɩd tɩɩsã. Biiblã sõngda tõnd tɩ d bãng tɩ gom-kãensã pidsgã nan watame. La tõe tɩ neb kẽer na n yeelame tɩ gom-kãensã pa tolg n wilgd vẽeneg tɩ tẽngã na n wa yɩɩ arzãn ye. Y tõe n leok-b lame tɩ bõe? Kaset-bʋg la y tara, sẽn kɩt tɩ y kɩs sɩd zãng tɩ tẽngã na n wa yɩɩ arzãna? A Zeezi sẽn yaa nin-kãseng sẽn ka to wã kõo kaseto, tɩ d miẽ tɩ yaa sɩda.—Luk 23:43. w18.12 5 s. 13-15

D tõeeme n mao n toeem d tagsa wã. D tõe n toeema d tagsa wã tɩ zems ne tõnd mengã sẽn dat n tagsd bũmb nins yellã. Dẽnd d sã n nong n bʋgsd bũmb nins a Zeova sẽn yeelã zugu, d wat n bãngame tɩ wakat fãa, yẽ tagsa wã la sõma. Woto, bũmb fãa pʋgẽ, d na n data ne d sũur fãa tɩ d tagsgã yɩ yẽ rẽndã. La yɩl n paam “yam-wek-paalle,” n tõog tɩ d tagsa wã yɩ a Zeova rẽndã, yaa tɩlɛ tɩ d mao tɩ d tagsa wã ra le yɩ “wa dũni-kãngã nebã ye.” Woto rat n yeelame tɩ d pa segd n le ges bɩ n karem wall d kelg bũmb sẽn pa tat a Zeova yam ye. D rɩk makre. Ned sã n dat laafɩ, a na n dɩta rɩ-sõma sẽn kõt laafɩ. La a sã n dɩt rẽ la a rɩt rɩ-põos n paasdẽ, a na n kell n talla laafɩ sɩda? Woto me, d sã n maand d sẽn tõe fãa n dat tɩ d tagsa wã yɩ a Zeova rẽndã, n yaool n basdẽ me tɩ dũniyã neb tagsa wã kẽed d yamẽ wã, d modgrã na n yɩɩ zaalem. w18.11 21 s. 14-15

D segd n yãka yam n na n mao n tũ sɩdã d sẽn bãngã daar fãa. Biiblã maka sɩdã ne sodaag sẽbdga. Pĩnd wẽndẽ wã, sodaag sẽbgd ra kogend-a-la zabr sasa. La yaa sẽbdgã sã n da sẽbg a sɛɛgã sõma. Sã n da pa sẽbg sõma, pa tõe n kogl-a woto ye. Wãn to la sɩdã kogend tõndo? D sã n mao tɩ sɩdã lebg wa sẽbgd sẽn sẽbg tõnd sõma, na n sõng-d lame tɩ d ra wa tar tagsa sẽn pa zemse, la sõng-d me tɩ d bãngd n yãkd yam bũmb fãa pʋgẽ. D sã n wa be makr pʋgẽ, wall d maood ne zu-loɛɛga, sɩdã d sẽn bãngã na n sõng-d lame tɩ d maneg n dat ne d sũur fãa n maan sẽn yaa tɩrga. Wa sodaag sẽn da pa na n saag n kẽng zabr n pa sẽb a sẽbdgã, tõnd me pa na n bas tɩ sɩdã sẽn yaa wa d sẽbdgã lebg yog-yoge, wall d tolg n lok-a ye. D na n pʋd n maana d sẽn tõe fãa n tũud Biiblã sẽn yetã daar fãa. w18.11 12 s. 15

Ned sã n dat n zãms Biiblã n bãng sɩdã, bũmb kẽer la a segd n maane. Yaa tɩlɛ t’a sak n mong a menga. Ned sã n “bao sɩdã” me n wa bãnge, wa yel-bũn sebrã sẽn yeelã, a segd n gũusame n da wa “bas-a” ye. Baa b sã n yeel tɩ d pa yaood n paam bũmbu, pa rat n yeel tɩ d tõe n paamame n pa nams ye. Ebre wã gom-bil ning b sẽn lebg Yel-bũn 23:23 tɩ “bao” wã rat n yeelame me tɩ “mao n paame.” Gom-biis a yiibã fãa wilgdame tɩ d sã n dat bũmb d sẽn mi tɩ tara yõod wʋsgo, yaa tɩlɛ tɩ d maan modgre, wall d sak n bõn bũmb n yaool n paame. D rɩk makr ne b sẽn na n moon n yeel tɩ zĩig n be tɩ b kõt banand zaalem. Rẽ yĩnga, d na n zĩime bal tɩ banandã wa rɩg d taoor bɩ? Ayo! Yaa tɩlɛ tɩ d zẽk d karg n kẽng zĩig ning b sẽn kõt banandã. Yaa sɩd tɩ b kõta zaalem, la baooda weer la modgre. Woto me, baa yɩl n “bao sɩdã” n paamã pa ligd yelle, yaa tɩlɛ tɩ d maan modgr n yaool n paame. w18.11 4 s. a 4-5

A Zeezi peega a Pɩyɛɛr ne a Zak la a Zã tɩ b rʋ tãn-luglug zugu. B sẽn wa n be be wã, b yãa bũmb sẽn sek yɛɛsgo: A Zeezi tedgame, t’a nengã rag n yãgda, t’a futã lebg peelse. Neb a yiib sẽn wõnd a Moyiiz ne a Eli n puki, n sɩng sõsg ne a Zeezi, n gomd a kũumã la a vʋʋgrã yelle. (Luk 9:29-32) Rẽ poore, sawadg sẽn pɩnd n wa n lud-ba. B wʋma koɛɛg sẽn yi sawadgẽ wã. Yaa Wẽnnaam koɛɛga. Tʋm-tʋmdbã sẽn yã bõn-makr ningã ra wilgda ziir la naam ning a Zeezi sẽn na n wa paame, a sã n wa lebg Wẽnnaam Rĩungã Rĩma. Kiristã sẽn da na n yã namsg la a ki kũ-toaagã, yaa vẽeneg tɩ woto kenga a pɛlga, n kõ-a raood t’a na n tõog toogo. Kenga a karen-biisã me tẽeb la kõ-b raoodo, bala bãmb me na n wa tʋma tʋʋmd ning a sẽn kõ-bã, la b paam makr buud toor-toore. Na maan yʋʋm 30 poore, tʋm-tʋmd a Pɩyɛɛr goma a Zeezi tedgrã b sẽn yã wã yelle, tɩ wilgdẽ t’a ra ket n tẽra sõma.—2 Pɩy. 1:16-18. w19.03 10 s. a 7-8

Bũmb a ye sẽn kɩt tɩ kiris-neb hakɩɩkã yaa toor ne tũudum nins sẽn yaa ziri wã nebã, yaa d sẽn ‘gomd sɩd ne taabã.’ (Zaka. 8:16, 17) D sã n gomd ne d zo-rãmba, d tʋmd-n-taase, d zakã rãmb la baa d sẽn pa mi-b rãmbã, d pa yagd ziri ye. La y sã n yaa bi-bɩɩga, n dat tɩ y rog-taasã nong y zĩigẽ? Gũus-y tɩ rẽ ra wa kɩt tɩ y lebg ned sẽn maand kuus-kuus wa kom-bɩɩs kẽere, n solgd n maand sẽn pa segd ye. B zakã rãmb la tigingã neb sʋka, b yaa wa neb sẽn pa tar yelle, tɩ b sã n yaool n wa be ne kom-bɩɩs sẽn pa tũud a Zeova, wall b be reezo sosiyo-rãmbã zug bɩ b yaa toor fasɩ. (Yɩɩn. 26:4, 5) D sã n waoogd a Zeova ne d “nobɩms bala,” tɩ d sũurã yaool n zãr ne-a, a miime. (Mark 7:6) D tũ saglg b sẽn kõ yel-bũn sebrã pʋgẽ tɩ rẽ n são. Ad b sẽn yeele: “Da maan sũ-kiir ne yel-wẽn-maandbã ye, la bɩ f zoe Sẽn-Ka-Saab daar fãa.”—Yel. 23:17. w18.10 9 s. 14-15

A Zeova nin-buiidã sẽn be dũniyã gill zugã yaa wa zak a ye rãmb sẽn nong taaba. (1 Zã 4:21) B mi n maana bõn-kãsems b tẽed-n-taasã yĩnga. La naoor wʋsgo, yaa bõn-kɩds ka tɛkã b sẽn maand b yĩngã n wilgd tɩ b nong-b lame. Wala makre, nina tõe n yeela a tẽed-n-taag gomd n keng a raoodo, wall a maan bũmb n sõng-a. D sã n maand d tẽed-n-taasã neer woto, tɩ wilgdẽ tɩ d nand-b lame, d yaa “Wẽnnaam togs-n-taase, wa kom-nongdse.” (Efɛ. 5:1) A Zeezi rɩka a Ba wã togs-n-taar kɛpɩ. Ad a sẽn yeele: “Bɩ y wa mam nengẽ yãmb-dãmb fãa sẽn yɛ, la sẽn tʋk zɩɩb sẽn yaa zɩsgo, la mam na n kõo yãmb vʋʋsgo. . . . Bala mam yaa nin-bʋgsgo, la m yaa sũ-mar soaba.” (Mat. 11:28, 29) D sã n dɩk a Zeezi togs-n-taare, n tagsd pãn-komsem dãmbã yelle, d Ba sẽn be saasẽ wã na n ning-d-la barka, d na n paama sũ-noog me. (Yɩɩn. 41:2) Woto wã, bɩ d wilgdẽ tɩ d nanda d zakã nebã, d tigingã nebã, la koɛɛgã mooneg zĩigẽ nebã. w18.09 28 s. a 1-2

Sabab-wẽng sã n wa maane, yaa segb me d sẽn paam n tõe n naag a Zeova n tʋme, n sõng d tẽed-n-taas nins yellã sẽn paamã. Wala makre, d tõe n kõo ligd n sõnge. (Zã 13:34, 35; Tʋʋ. 11:27-30) D leb n tõe n sõng n manega rotã sẽn sãamã. Daar a ye, sa-kẽeng n sãam Poloyn saam-bi-poak a ye roogo. A yʋʋr la a Gabriyela. A tẽed-n-taas sẽn be tigims sẽn pa zãr ne be n wa n na n sõng-a. A sẽn yã-bã, a sũur yɩɩ noog wʋsgo. Ad a sẽn yeele: “Pa bũmb nins m sẽn bõnã yell la m na n gom ye. Bala, yaa teed bala. M na n goma bũmb ning m sẽn paamã yelle. M sẽn paam sõngr a woto wã kɩtame tɩ m maneg n kɩs sɩd tɩ m sẽn paam n naag kiris-neb tigingã yaa zu-zẽkr meng-menga, la sũ-noog bũmbu.” Sẽn paam-b sõngr sabab-wẽns sasa wã wʋsg yeela bũmb sẽn wilgd tɩ bãmb me tagsg yaa woto. La sẽn naagd-b a Zeova n tʋmdẽ, n sõngd d tẽed-n-taas nins sabab-wẽns sẽn paamã me sũ-noog pa tõe n bãng n bilg ye.—Tʋʋ. 20:35; 2 Kor. 9:6, 7. w18.08 26 s. 12

D sã n dat n gũusd ne d sũurã tagsgo, yaa tɩlɛ tɩ d yɩ ned sẽn tõe n deng n yã yelle, n yɩ tao-tao n maan bũmb n kolg a menga. Gom-bil ning b sẽn lebg tɩ “maan gũusgã” tẽegd-d-la pĩnd wẽndẽ gũudbã sẽn da gũud b tẽngã to-to wã. Gũusdbã ra wae n dʋʋda b tẽngã lalg zug n get yɩɩga, tɩ b sã n yã yell sẽn wat bɩ b peeb baorg n keoog nebã. D sã n tẽegd woto, sõngd-d lame tɩ d bãng d sẽn segd n maanega, t’a Sʋɩtãan ra wa tõog tɩ d sũurã tagsg lebg wẽng ye. Pĩnd wẽndẽ wã, tẽngã gũudbã ne rigno-gũudbã ra tʋmda ne taaba. (2 Sãm. 18:24-26) B ra naagda taab n gũusdẽ, tɩ bɛɛb sã n kolgdẽ bɩ b pag kʋɩlensã sõma sẽn na yɩl n kogl tẽngã. (Nee. 7:1-3) D sã n kibl d sũur-kasetã sõma ne Biiblã maasem, a tõe n yɩɩ wa gũuda. Woto, a Sʋɩtãan sã n wa baood n na n soog d sũurã, rat n yeel tɩ n baood n na n kɩt tɩ d tagsa wã bɩ d tʋlsmã, la d bõn-datɩ wã wall d zʋgã lebg wẽnse, d sũur-kasetã na n keoog-d lame. D sũur-kasetã sã n keoog-do, d segd n kelg-a lame, la d mao wa d sẽn tõe tɛka, n kogl d menga. w19.01 17 s. 10-11

Pa tẽngã minung wall b mensã tagsg la kãsem-dãmbã tog n tik n bãng bi-bɩɩg sã n tõe n lebga kãsemb-sõngd wall kãsem-soab ye. Yaa Biiblã sẽn yetã la b tog n tũ. (2 Tɩm. 3:16, 17) Kãsem-dãmb sã n pa tũ Biiblã sẽn yet kãsemb-sõngdbã la kãsem-dãmbã yãkr wɛɛngẽ wã, tõe n kɩtame tɩ b pa kõ saam-biis sẽn tar minim tʋʋmd tigingã pʋgẽ ye. Tẽng a ye pʋgẽ, kãsemb-sõngd n da tʋmd wʋsg a tigingã pʋgẽ, hal tɩ kãsem-dãmbã sak n deeg t’a tara minim sẽn sek a na lebg kãsem-soaba. Baasgo, kẽer yʋʋm sẽn vẽsg yeelame tɩ wõnda a paooda wʋsg ne a na lebg kãsem-soaba. Yɩɩ woto tɩ b pa sak n na n yãk-a t’a lebg kãsem-soaba, sẽn wõnd a paoodame wã yĩng bala. Wõnda yaa woto tẽns wʋsgo. D segd n teega Biiblã sẽn yetã, la d ra teeg tõnd mengã tagsg ye. Yaa d sã n maand a woto la d tũud a Zeezi sẽn yeelã, n pa tikd ninã sẽn ne wã n kaood nebã bʋʋd ye.—Zã 7:24. w18.08 12 s. 16-17

D sã n yɩ yãg-yãg n tool ned mesaaz d sẽn paame, tõe n waa ne yell a to me. Tẽns kẽere, d pa tar sor n na n tũ d tũudmã wa d sẽn date, wall b pʋd n gɩdga d tũudmã. Tẽn-kãens pʋsẽ, d bɛɛbã tõe n wʋga kibay n yelge, sẽn na yɩl n fʋʋs tõndo, wall n kɩt tɩ d pa le kɩs taab sɩd ye. D tẽeg bũmb ning sẽn maan pĩnd Iniyõ Sovietik soolmẽ wã. Polɩɩs-rãmb nins b sẽn boond tɩ kazebe (KGB) wã yelga kibay, n yetẽ t’a Zeova Kaset rãmb b sẽn da mi sõma zãmba a Zeova nin-buiidã. Bʋko, wʋsg tẽe kiba-kãens n welg n bas a Zeova siglgã. Zu-noogo, wʋsg wa n lebg n waame, la kẽer pa tol n le wa a Zeova nengẽ ye. B tẽebã kell n sãamame. (1 Tɩm. 1:19) Bõe la d tõe n maan tɩ yel-beed a woto ra wa paam-do? Ra n sak-y n yelg-y kibay sẽn pa ned yʋ-noogo, wall kibar y sẽn pa mi sã n yaa sɩd bɩ ziri ye. Ra n tẽ-y bũmb ning fãa y sẽn wʋm ye. Bao-y n bãng-y y sẽn wʋmã sã n yaa sɩda. w18.08 4 s. a 8

Pĩnd wẽndẽ gɛrkã ra pa wae n gʋlsd n ningd bãn ye. Woto wã, a Zeezi gomdã võor yaa: “Mam yeta foo, rũndã fo na n zĩnda ne maam arzãnã pʋgẽ,” bɩ yaa: “Mam yeta foo rũndã, fo na n zĩnda ne maam arzãnã pʋgẽ”? D tẽeg t’a Zeezi ra reng n yeela a karen-biisã yaa: “Ninsaal Bi-riblã na n paa tãnd tẽngr dasem a tãab la yʋnd a tãabo.” (Mat. 12:40; 16:21; 17:22, 23; Mark 10:34; Tʋʋ. 10:39, 40) Dẽnd a Zeezi ne bi-bɛɛgã kũumã daare, a pa kẽng arzãn ye. A Zeezi maana rasem a tã “kɩɩm-kulg” bɩ yaoogẽ wã hal tɩ Wẽnnaam wa vʋʋg-a. (Tʋʋ. 2:31, 32) Bi-bɛɛgã ra pa mi meng t’a Zeezi maana kaool ne a tʋm-tʋmdb nins sẽn kell n maan sɩd ne-a wã, tɩ b na n tɩ rɩ naam ne-a saasẽ ye. (Luk 22:29) Sẽn paas menga, a ra pa reeg lisgu, a ra pa paam vʋʋsem sõngã zaeebo. (Zã 3:3-6, 12) Dẽnd yaa arzãn sẽn na n zĩnd tẽng zug ka la a Zeezi sẽn pʋlem bi-bɛɛgã. w18.12 6 s. 17-18, 20-21

Pa yã n kaoos la Israyɛll nebã maan sãnem nag-bila, n wõgemded a taoor n pʋʋsd-a ye. B sẽn maan woto wã, b kɩɩsa a Zeova noore. La b belga b mens n da tẽed tɩ b ket n bee a Zeova poorẽ. A Aarõ pʋd n yeelame tɩ tigrã b sẽn maan nag-bilã waoogr yĩngã yaa “tigr Sẽn-Ka-Saab waoogr yĩnga.” A Zeova sũur yɩɩ noog bɩ? Ayo! A yeela a Moyiiz tɩ nin-buiidã “sãama b mense,” la a paas tɩ b ‘basa sor ning yẽ sẽn wilg bãmbã.’ A Zeova sũurã kãbgame, hal t’a ra rat n sãam buudã tõre. (Yik. 32:5-10) La a Zeova yãka yam n pa na n sãam buudã tõr ye. (Yik. 32:14) Baa ne sẽn yaa a Aarõ n maan nag-bilã, a teka yam. Yẽ ne Levi buudã neb a taabã fãa wilgame tɩ yaa a Zeova poorẽ la b be. B sẽn tɩ tigim a Moyiiz nengẽ wã wilga vẽeneg tɩ b pa be bɛɛgdbã poorẽ ye. B sẽn bak toorã, b maana b mens neere. Bala, neb tusa sẽn pʋʋs bõn-naandgã la b kʋ baraarã. La neb nins sẽn zĩnd a Zeova poorẽ wã yẽ põsame. Sẽn paase, a Zeova yeelame t’a na n ning-b-la barka.—Yik. 32:26-29. w18.07 20 s. 13-16

Pẽgr bʋg buud la d segd n bao? Pa pẽgr ning neb wʋsg sẽn baood ne karen-bɛdã maasem, arzɛgsã bɩ ɛspoorã la reem a taabã maasmã ye. Bũmb la a Poll yeel-yã, tɩ wilgd pẽgr ning d sẽn tog n bao wã. A yeelame: ‘Moasã, yãmb sẽn bãng Wẽnnaamã, la sẽn yɩɩd fãa Wẽnnaam sẽn bãng yãmbã, yɩta a wãn tɩ yãmb leb n kẽed dũni bõn-kãensã sẽn ka pãnga la sẽn ka yõodã, n na n leb n lebg b yembse?’ (Gal. 4:9) Wẽnnaam sẽn yaa yĩngr la tẽng Naabã sã n mi neda, sɩd yaa a soab zu-zẽkre. Wẽnnaam nonga tõndo, n dat tɩ d yɩ a zo-rãmba. A pʋd n naana ninsaal t’a tõe n bao n ta a Naandã yam, n paam a zoodo.—Koɛ. 12:13, 14. w18.07 8 s. a 3-4

D sã n dat tɩ Wẽnnaam noyã naf-do, yaa tɩlɛ tɩ d nong Wẽnnaam noyã la d sak-ba. (Amoos 5:15) La bõe n na n sõng-do? D mao tɩ d tagsg sẽn yaa a soab bũmb fãa pʋgẽ wã zems ne a Zeova raabã. D rɩk makr wa yãmb sẽn na n pa gõe yʋng sõma. Y tɩ yãa logtore, t’a wilg-y rɩbd kẽer y sẽn pa segd n dɩ, la a yeel-y tɩ y segd n maanda ɛspoor la y toeem y minimd kẽere. Y sɩd tũu a saglsã, tɩ sõng-yã. Y sũur kõn yɩ noog ne logtorã, a sẽn sõng-y woto wã yĩng sɩda? A Zeova sẽn yaa tõnd Naandã me kõo tõnd noy. D sã n tũ, manegda tõnd vɩɩmã, bala sõngda tõnd tɩ d gind yel-wẽnã la bi-wẽns nins rẽ sẽn wat ne wã. D sã n tags n gese, d sɩd neeme tɩ d sẽn tũud Biiblã sẽn yet tɩ d pa segd n yag ziri, n zãmb neda, n zu, n yo, n maan ned pãnga, wall d maan zĩn-dãmb yɛlã naf-d lame. (Yel. 6:16-19; Vẽn. 21:8) D sã n ne a Zeova noyã tũub sẽn nafd tõnd to-to wã, kɩtdame tɩ d maneg n nong-a la d nong a noyã. w18.06 17 s. a 5-6

Tõe tɩ guvɛrneerã ra yɛɛsda a Zeezi na n wa pirs nebã tɩ b kɩɩs Rom naabã. Rẽ n da yaa a Pɩlat yel-pakr a naamã sasa. La a Zeezi leokame tɩ: “Mam soolmã ka dũni ka rẽnd ye.” (Zã 18:36) A pa sak n na n kẽes a toog politikã yɛlẽ, bala, yẽ Rĩungã na n zĩnda saasẽ. A yeela a Pɩlat t’a sẽn wa tẽngã zugã yaa sẽn na n “kɩs sɩdã kaseto.” (Zã 18:37) A Zeezi ra mii a sẽn wa tẽngã zug n na n maanã. Tõnd me sã n mi d sẽn segd n maanã, na n sõngame tɩ d ra wa teel politik sulli, baa d sũurẽ wã ye. La wakat ninga, pa nana ye. Tigims sull yel-gɛt a ye yeelame tɩ bãmb babgẽ wã, sẽn yik n dat-b toeeng naamã wɛɛngẽ wã tara paasg bala. B nonga b tẽngã tɩ loog nugu, n kɩs sɩd tɩ sã n yaa tẽng-n-biis n deeg tẽngã n na n zã, nin-buiidã vɩɩm na n yɩɩ noog n yɩɩda. Yel-gɛtã paasame: “La saam-biisã yẽ wɩngda ne Wẽnnaam Rĩungã koe-noogã moonego, tɩ rẽ sõng tɩ zems-n-taar ket n be b sʋka. B gũuda Wẽnnaam, n miẽ tɩ yẽ n na n wa welg yel-kɛgã la zu-loees a taabã fãa.” w18.06 4-5 s. a 6-7

Biiblã babg ning b sẽn da gʋls ne ebre wã pʋgẽ, yaa sɛb a tãab bal pʋgẽ la b pʋd yʋʋr ning sẽn yaa Sʋɩtãanã, sẽn dat n yeel tɩ “kɩɩsda.” Bõe yĩng tɩ b pa gom a Sʋɩtãan yell wʋsg nand tɩ Mesi wã wa wã? Wõnda a Zeova sẽn pa kɩt tɩ b gom a Sʋɩtãan ne a tʋʋm-tʋmdɩ wã yell wʋsg Biiblã babg ning b sẽn da gʋls ne ebre wã pʋgẽ wã, yaa a sẽn da pa rat tɩ wa kɩt t’a Sʋɩtãan yʋʋrã yi wã yĩnga. A sẽn kɩt tɩ b gʋls Biiblã bab-kãngã, bũmb la a ra rat n tɩ yɩɩda. Yaa sõng Israyɛll nebã tɩ b tõog n bãng Mesi wã n bake, la b bãng n tũ-a. (Luk 24:44; Gal. 3:24) Mesi wã sẽn wa wã, a Zeova tũnuga ne yẽ la a karen-biisã n vẽneg n togs bũmb wʋsg tõnd sẽn mi a Sʋɩtãan ne a malɛgsã zug masã wã. Woto zemsame, bala yaa ne a Zeezi la kiris-neb nins sẽn paam vʋʋsem sõng zaeebã maasem la a Zeova na n sãam a Sʋɩtãan ne a poorẽ dãmbã. (Rom. 16:20; Vẽn. 17:14; 20:10) A Sʋɩtãan tõogã tara koaka. A Zeova ne a Zeezi la malɛg-sõma wã bee tõnd poorẽ. Ne bãmb sõngre, tõnd tõeeme t’a Sʋɩtãan ra tõog-d ye. w18.05 22-23 s. a 2-4

Tõnd sã n womd biis bal la wilgd tɩ d tũuda a Zeova. (Mat. 13:23; 21:43) Dẽnd yel-bũnd ning sẽn be Zã 15:1-5 pʋgẽ wã, biis nins kiris-ned fãa sẽn segd n womã womb pa makd karen-biisã maaneg ye. (Mat. 28:19) Sã n pa rẽ, na n yɩɩ wa wil nins sẽn pa womd biisã makda a Zeova Kaset rãmb nins sẽn pa tõog n sõng ned t’a lebg a Zeezi karen-biigã. La tagsg a woto pa zemse ye! Bala, d pa tõe n modg ned t’a lebg a Zeezi karen-biig ye. A Zeova yaa nonglem. A pa na n tol n yeel tõnd tɩ d maan bũmb sẽn yɩɩd d pãng ye. Wakat fãa, a sẽn yet tõnd tɩ d maanã zemsda d pãnga. (Tõo. 30:11-14) La biis nins d sẽn segd n womã yaa bõe? Yaa vẽeneg tɩ tog n yaa bũmb tõnd fãa sẽn tõe n maane. Yaa bõe? Yaa Wẽnnaam Rĩungã koe-noogã moonego.—Mat. 24:14. w18.05 14 s. a 8-9

Tũudmã taoor dãmb yaa ka tɛk rũndã-rũndã, tɩ b yʋyã me yaa ka tɛka. Prɛtr-dãmba, pastɛɛr-dãmba, la yʋy a taaba. Wa fariziẽ-rãmbã, bãmb me yagda ziri, n belgd nebã. B “teka Wẽnnaam yellã sẽn yaa sɩdã ne zĩrẽ.” (Rom. 1:18, 25) Ad bũmb kẽer b sẽn zãmsd nebã tɩ yaool n yaa ziri: Sẽn tẽed-a a Zeezi zoe n paama fãagre, ninsaal tara sɩɩg sẽn pa kiidi, Wẽnnaam sɩbgda nebã bug-tẽnga, rao ne rao wall pag ne pag sã n kẽed ne taaba, wall b tolg n kẽ kãadem ne taaba, pa wẽng Wẽnnaam nifẽ ye. Politikã rãmb me yagda ziri, n belgd nebã. Bũmb a ye b sẽn na n togs tɩ yaool n yaa ziri meng-menga, yaa b sẽn na n wa yeel ka la bilf tɩ b tõogame tɩ dũniyã zug lebg “laafɩ la bãanã.” La “wakat-kãng la sãoong na n ling bãmba.” D ra bas tɩ politikã rãmb belg-d tɩ d wa tẽed tɩ bũmba fãa yaa sõma, la tɩ yell kae ye. Tõnd “mii sõama tɩ Zu-soabã waoong na n yɩɩ wa wagdr sẽn wat yʋngo.”—1 Tes. 5:1-4. w18.10 7-8 s. a 6-8

A Zeezi tũnugda ne kãsem-dãmbã, b paama vʋʋsem sõngã zaeeb tɩ b naaga piis a taabã, n kengd tõnd raood la a wilgd-d sore. Yaa bãmb la b sẽn bool tɩ “nanambsã.” Kãsem-dãmbã sẽn datã, pa b ‘modg tõnd d tẽebã pʋgẽ’ ye. B yaa tõnd tʋmd-n-taase, n sõngd tõnd tɩ d ket n tũud Wẽnnaam ne sũ-noogo. (Eza. 32:1, 2; 2 Kor. 1:24) Tʋm-tʋmd a Poll kõo mak-sõng kãsem-dãmbã sẽn tõe n tũ. A ra yeela Tesalonik kiris-nebã b sẽn da namsdã yaa: “Tõnd da nongẽ lame n kõ yãmb Wẽnnaam koe-noogã ne nonglem. La ka rẽ bal ye. Tõnd da nong n kõo d vɩɩmã me yãmb yĩnga, bala, yãmb lebga tõnd nin-nongdse.” (1 Tes. 2:8) Kãsem-dãmbã sã n kengd b tẽed-n-taasã raood ne b no-goamã, yaa sõma. La rẽ bal pa sek ye. A Poll sẽn yeel Efɛɛz kãsem-dãmbã goam nins sẽn yaa rũndã daar vɛrse wã wilgda rẽ. w18.04 21-22 s. a 6-8

Yɩl n paam lohorem-kãnga, yaa tɩlɛ tɩ d “wẽnemd n tek yam n tẽ ‘Zu-soabã,’” rat n yeel tɩ d mao n paam zood sõma ne-a. (2 Kor. 3:16) Israyɛll nebã sẽn wa n be weoogã pʋgẽ wã, b tagsg sẽn da yaa a soab ne bũmb nins a Zeova sẽn maandã ra wilgdame tɩ b pa tar tẽeb ye. Ra yaa wa peend n lud b yamã la b sũurã, tɩ lebg b mensã raab n pak-ba. B sẽn paam b mens ne yembdã bala, b basame tɩ yaa b mensã tʋlsem pidsg n pak-b n yɩɩda. (Ebre. 3:8-10) La lohorem ning a Zeova sẽn kõt ne a vʋʋsem sõngã maasmã pa wa ned sẽn na n be yembdo, n wa paam tɩ b yiis-a wã bal ye. A Zeova sẽn kõt lohorem ningã yɩɩda rẽ hal zĩig sẽn zãre. Yaa bũmb ninsaal sẽn pa tõe n paam ne a meng pãnga. Sɩd me, vʋʋsem sõngã sõngdame tɩ d paam d mens ne yel-wẽnã la kũumã yembdo, la d paam d mens ne minim-wẽns la tũudum sẽn pa sɩda. (Rom. 6:23; 8:2) Ad yaa lohorem tɛkẽ! Baa ned sẽn be bãens roog wall sẽn be yembd tõe n paama lohorem a woto.—Sɩng. 39:20-23. w18.04 9 s. a 3-5