Sa-sika

Tigissã zĩigẽ, d wae n wʋmda goam sẽn tẽegd tõnd bũmb ning a Zeova ne a Zeezi sẽn maan n kõ tõndã. D sẽn dat n pʋʋs-b barkã yĩnga, d maoodame n na n dɩk a Zeezi togs-n-taar d sẽn vɩ to-to wã pʋgẽ, daar ne a to fãa. (2 Kor. 5:14, 15) Sẽn paase, d rata ne d sũur fãa n pẽg a Zeova, a sẽn kɩt t’a Biigã wa ki tõnd yĩngã. Bũmb a ye d sẽn tõe n maan n pẽg-a, yaa d sẽn na n naagd n leokd tigissã sasa. D sã n dat n wilg tɩ d nonga a Zeova la a Zeezi ne d sũur fãa, d segd n sakd n mongda d meng baa sẽn wa n yaa bũmb ninga, sẽn na yɩl n maan b raabã. Naoor wʋsgo, d maanda woto sẽn na yɩl n kẽng tigissã. D tigsg a ye n yaa sibr bɩ hato. Wakat kãng tɩ neb a taabã vʋʋsdame. D maanda tigsg daar a to me. Nong n yaa zaabre, tʋʋmã sigb poore, hal tɩ yaa yaamse. D sẽn modgd n kẽnd tigissã baa ne yaamsã, a Zeova neeme bɩ? Yaa vẽeneg t’a neeme. D modgrã sã n yaa wʋsgo, a Zeova sũur me maneg n nooma ne-do, bala wilgdame tɩ d nong-a lame.—Mark 12:41-44. w19.01 29 s. 12-13

Zu-loees kẽer sẽn da namsd nebã paama a Zeezi me. Wala makre, wõnda a Zeezi zakã rãmb ra yaa naong rãmba. A sẽn tʋm ne a ba-wubdg a Zozɛfã, kɩtame t’a ra mi tʋʋm-toogo. (Mat. 13:55; Mark 6:3) Tõe t’a Zozɛf maana kaalem t’a Zeezi ra nan pa sɩng a koe-moonegã ye. Dẽnd a Zeezi ra tog n mii f ned kaalem sẽn zabd to-to wã. A ma-biisã sẽn da pa tẽed-a wã yĩnga, d tõe n yeelame me t’a miime tɩ zak rãmb tũudum sã n pa yembre, pa nana ye. (Zã 7:5) Woto fãa la yɛl a taab kɩtame t’a Zeezi ra wʋmd nebã zu-loeesã võore, n kʋmd-ba. A Zeezi sã n da wa maand yel-solemde, wakat kãng la nebã tolg n ne vẽeneg t’a kʋmda a taabã nimbãanega. A ra pa maand yel-soalem n sõngd nebã a we n maan bal ye. A “zoee bãmb nimbãanega,” b sẽn da namsdã yĩnga. (Mat. 20:29-34; Mark 1:40-42) A bãnga b yellã sẽn da namsd-b to-to wã, n maan bũmb n sõng-ba.—Mark 7:32-35; Luk 7:12-15. w19.03 16 s. 10-11

Yʋng ning b sẽn da na n wa n yõk a Zeezi wã, tags-y n ges-y a yɩɩrã sẽn da yaa wʋsg to-to! Tõe t’a ra sokda a meng a sã n na n tõog n kell n maana sɩd ne Wẽnnaam, n tãag a kũumã. A sã n pa tõoge, ned baa a ye fãagr yell pa gomd ye. (Rom. 5:18, 19) Sẽn yɩɩd menga, na n sãama a Ba wã yʋʋre. (Zoob 2:4) La baraar yʋngã, a sẽn zĩnd ne a tʋm-tʋmdbã tɩ b na n dɩ wã, b wa n wẽeda “nokoeemd ne taab wʋsg n dat n bãng ned ning b sẽn tog n ges wa kãsem bãmb sʋkã.” A Zeezi pa yik a sũur ye. A talla sũ-mar ne-ba. A le sagl-b lame n pa zoe b nifu, la yɩɩ ne sũ-bʋgsem. A sõng-b lame tɩ b bãng b sẽn segd n tall manesem ningã. Rẽ poore, a pẽg-b-la b sẽn kell n maan sɩd ne yẽ wã yĩnga. (Luk 22:24-​28; Zã 13:​1-​5, 12-​15) D rɩk a Zeezi togs-n-taare, tɩ baa d sã n wa maand yɩɩr wʋsg yell ning poorẽ bɩ d kell n tall sũ-bʋgsem. D sã n tẽegdẽ tɩ tõnd me mi n goma gomd wall d maan bũmb sẽn yikd d taabã sũuri, na n yɩɩ nana tɩ d tũ a Zeova sẽn yeelã. (Yel. 12:18; Zak 3:​2, 5) Yɩta sõma me tɩ d nong n pẽgd d taabã b zʋg-sõma wã yĩnga.—Efɛ. 4:29. w19.02 11-12 s. 16-17

A Moyiiz tõogã kɩtame tɩ ra yaa toog tɩ b rõd ned zaalem. B sã n tall ned n kẽng bʋ-kaoodbã taoore, a tara sor n na n bãng ned ning sẽn yeel t’a beegame wã. (Tõo. 19:16-19; 25:1) Nand tɩ b ning-a taale, neb a yiib bɩ sẽn yɩɩd rẽ n segd n kõ kaset t’a sɩd beegame. (Tõo. 17:6; 19:15) La Israyɛll ned sã n da beege, tɩ yaa nin-yend bal n yã yellã? A pa segd n tẽ t’a pa na n paam sɩbgr ye. A Zeova yãa a sẽn maanã. A Zeova kõta tõnd mak-sõng sẽn ka to. A pa tol n maand kɛgr ye. A keooda neb nins sẽn tũud a noyã, la a sɩbgda neb nins sẽn maand b taabã pãngã. (2 Sãm. 22:21-23; Eze. 9:9, 10) Neb kẽer tʋmda wẽnem, tɩ wõnd b pa paamd sɩbgr ye. La a Zeova na n wa bʋʋ ne-b wakat sẽn zemse. (Yel. 28:13) B sã n pa sak n tek yam n kos sugri, pa kaoosd la b bãng tɩ ‘lʋɩ Wẽnnaam sẽn vɩ wã nugẽ yaa yell meng-meng’ ye.—Ebre. 10:30, 31. w19.02 23-24 s. 20-21

A Moyiiz yɩɩ ned sẽn da nong n get a Zeova, t’a wilgd-a sor la a kõt-a saglse. Sɩd me, Biiblã yeelame t’a “talla tẽeb kãn-kãe wa a yãa nebã nin sẽn ka tõe n yã a soabã.” (Ebre. 11:24-27) Israyɛll nebã sẽn wa n yi Eziptã, la nand meng tɩ b ta Sinayi tãngẽ wã, yel-kãseng n maane. Rẽ tɩ b Ezipt yiibã pa ta kiuug a yiib ye. Nin-buiidã sɩnga yẽgengo, koom sẽn da pa be wã yĩnga. B sũyã yikame tɩ b yẽgem ne a Moyiizi, hal t’a Moyiiz kong n yeel a Zeova yaa: “Mam na n maana bõe ne nin-kãensã? Ketẽ-la bilfu, tɩ bãmb lob maam ne kuga.” (Yik. 17:4) A Zeova leoka a Moyiizi, n wilg-a a sẽn segd n maane. A yeel-a lame t’a rɩk a dasaarã n wẽ pĩigã sẽn be Horɛɛbã, tɩ koom n na n yi. Ad Biiblã sẽn yeele: ‘A Moyiiz maana woto Israyɛll nebã kãsem-dãmbã nifẽ.’ Israyɛll nebã paama koom n yũ tɩ seke, tɩ yellã kell n sa.—Yik. 17:5, 6. w18.07 13 s. a 4-5

A Zeova tũnugda ne kiris-neb tigingã me n kengd d raoodo, tɩ d tõe n bas d yam t’a nong-d lame. Tõnd ned kam fãa me sã n nong d tẽed-n-taasã, n maand d sẽn tõe fãa tɩ b paamd tẽeb kengr la raoodo, wilgdame tɩ tõnd me nonga a Zeova. (1 Zã 4:19-21) Tʋm-tʋmd a Poll yeela kiris-nebã yaa: “Woto yĩnga, paas-y taab raoodo, la y bɩɩs taab tẽeb wa y sẽn zoe n maandẽ wã.” (1 Tes. 5:11) Pa kãsem-dãmbã bal n segd n kengd b taabã raood ye. Tigingã ned fãa tõe n dɩka a Zeova ne a Zeezi togs-n-taare, n belsd a tẽed-n-taasã la a paasd b raoodo. (Rom. 15:1, 2) Tigingã ned sã n maand yɩɩr tɩ loog nugu, wall a maooda ne sũ-sãams sẽn kɩt t’a yamã yi a menga, a tog n tɩ yãa logtor t’a sõng-a. (Luk 5:31) Yaa sɩd tɩ kãsem-dãmbã ne tigingã neb a taabã ka logtoɛɛmb ye. La b tara b sẽn tõe n maan hal tɩ bels ned a woto wʋsgo. Sɩd me, ned kam fãa tõeeme n “paas neb nins raood sẽn boogã raoodo,” la a “tebel pãn-komsem dãmbã,” la a “maan sũ-mar ne nebã fãa.”—1 Tes. 5:14. w18.09 14 s. 10-11

D sã n bãngd a Zeova n paasdẽ, d manegd n kɩs-a-la sɩd n yɩɩd pĩndã. Ad bũmb ning sẽn tõe n sõng-d tɩ d bãng Wẽnnaam sõma: Yaa d sẽn na n maagd d yĩng n karemd Biiblã, la d bʋgsd d sẽn karemdã zugu. Kibay wʋsg n be Biiblã pʋgẽ, n wilgd a Zeova sẽn kogl a nin-buiidã to-to pĩnd wẽndẽ wã. Kiba-kãensã kɩtame tɩ d kɩs sɩd tɩ rũndã-rũndã me, a na n gesa tõnd yelle. Wala makre, a Ezayi bilga a Zeova sẽn kogend a nin-buiidã to-to wã hal tɩ kengd pɛlga. A maka a Zeova ne pe-kɩɩma, tɩ sẽn tũud-b a Zeova wã yaa wa piisi. Ad a sẽn yeele: “Bãmb na n tẽega b nug n tigim b piisã, n kãag-b n mobg b menga.” (Eza. 40:11) D sã n tags t’a Zeova mobga tõnd ne a nusã sẽn tar pãng wʋsgã, d sɩd neeme t’a kogenda tõndo, tɩ d yamã gãe bãane. Sẽn na yɩl n kell n tall sũur pʋgẽ bãan baa ne zu-loeesã, d bʋgs-y rũndã daar vɛrse wã sẽn sẽn kengd pɛlgã zugu. Na n kõ-y-la pãng la raoodo, tɩ y tõog n mao ne zu-loees nins sẽn watã. w19.01 7 s. 17-18

Bũmb la y magd n na n maan a Zeova tũubã pʋgẽ, n dat rẽ ne y sũur fãa bɩ? Tõe tɩ y maoodame n na n karemd Biiblã daar fãa, pa rẽ bɩ n na n maneg y sẽn mi n leokd to-to tigissã sasa wã, wall yaa nebã zãmsgã minim la y modgd n na n bɩɩse. Sẽn yaa to-to fãa, yãmb mengã sã n wa ne y modgrã biisi, pa rẽ bɩ ned sã n yã y modgrã n pẽg-yã, y sũur kõn yɩ noog sɩda? Yaa vẽeneg tɩ y sũur na n yɩɩ noogo. Yaa bũmb sẽn segd me. Bõe yĩnga? Bala wilgdame tɩ y rɩka a Zeezi togs-n-taare, n lʋɩɩsd a Zeova raabã taoore. (Yel. 27:11) Y sã n wɩngd ne a Zeova tũubu, y maanda bũmb sẽn na n kõ-y sũ-noogo, la kɩt tɩ y vɩɩmã tall barka. Tʋm-tʋmd a Poll ra yeelame: ‘Yals-y kãenkãe, tɩ bũmb da tõog n vigs yãmb ye. Kẽng-y taoor Zu-soabã tʋʋmd pʋgẽ wakat fãa, yãmb sẽn mi tɩ tʋʋmd ning yãmb sẽn tʋmd Zu-soabã yĩngã ka na n yɩ zaalmã yĩnga.’ (1 Kor. 15:58) Neb nins sẽn yaool n wɩngd ne ligdã la teedã baoobo, pa rẽ bɩ yʋʋrã baoobã pa paamd sũ-noog sɩd-sɩd ye. Baa sã n wõnd b sẽn maand fãa yãkda nenga, naoor wʋsgo, bãmb mens getame tɩ b vɩɩmã ka bark ye.—Luk 9:25. w18.12 22 s. 12-13

A Davɩɩd ra goma wakat ning tẽngã sẽn na n pid ne neb sẽn sakd Wẽnnaam noyã la a saglsã yelle. (2 Pɩy. 3:13) Ezayi 65:22 yetame: “Mam nebã rasem na n kaoosa wa tɩɩse.” Woto wilgdame tɩ dũni-paalgã pʋgẽ, nebã na n vɩɩmd n kaoosa yʋʋm tusa. Vẽnegr 21:1-4 wilgdame tɩ Wẽnnaam na n gesa ãdem-biisã yelle, n ning-b barka, la tɩ wakat kãnga, “kũum kõn leb n zĩnd ye.” A Ãdem ne a Awa maaname tɩ d bõn arzãnã, la wakat n wat tɩ tẽngã na n lebg arzãna. Wa Wẽnnaam sẽn pʋlmã, tẽngã nebã buud fãa na n wa paama barka. A Davɩɩd yeelame tɩ sẽn yaa-b nin-tɩrs la sik-m-mens rãmbã na n sooga tẽngã, la b na n paa beenẽ wakat sẽn kõn sa. (Yɩɩn. 37:11) A Ezayi bãngr-goamã me kɩtame tɩ d maneg n gũud wakat ning tẽngã sẽn na n wa yɩ arzãna, tɩ nebã vɩɩmd ne sũ-noogã. (Eza. 11:6-9; 35:5-10; 65:21-23) Na n yɩɩ da-bʋre? Na n yɩɩ a Zeezi sẽn pʋlem bi-bɛɛgã bũmb ningã pidsg daare. (Luk 23:43) Yãmb tõe n paam n zĩnda be. w18.12 7 s. 22-23

D tõeeme n da tol n wʋm dũniyã neb tagsa bɩ? Ayo. Bala, d pa tõe n yi dũniyã ye. (1 Kor. 5:9, 10) Baa d sã n wa moond koɛɛgã, d wʋmda goam sẽn pa sɩda, la bũmb kẽer nebã sẽn tẽed tɩ yaool n yaa ziri. Yaa sɩd tɩ d pa tõe n pa tol n wʋm dũniyã neb tagsa wã ye. La pa tɩlɛ tɩ d bas tɩ lebg rẽ n be d yamẽ, wall d pʋd n sak b sẽn yetã ye. Wa a Zeezi, tõnd me sã n wʋm goam a Sʋɩtãan sẽn dat tɩ d tẽ, d segd n bãnga tao-tao la d ra tẽ ye. D gũus me tɩ ra wa yɩ bũmb tõnd mengã sẽn maand n kɩtd tɩ dũniyã nebã tagsa wã tõe n kẽ-d nana-nana ye. Wala makre, d segd n gũusa ne d zo-rãmbã yãkre. Biiblã keoogda tõnd tɩ d sã n yõg zood ne neb sẽn pa tũud a Zeova, d tõe n wa tagsda wa bãmba. (Yel. 13:20; 1 Kor. 15:12, 32, 33) Sẽn paase, d segd n bãng n yãka filim-dãmbã, la bũmb a taabã d sẽn maand n kokd pemsmã. D sã n zãagd d meng ne filim la sɛb sẽn gomd evolisiyõ wã yelle, bɩ sẽn wilgd nen-kɛglem wall yoobo, na n sõngame tɩ tagsa nins sẽn lut nebã yam tɩ b pa tõe n “bãng Wẽnnaamã” ra kẽ d yamã ye.—2 Kor. 10:5. w18.11 21 s. 16-17

Bõe n tõe n sõng-d tɩ d maneg n dat ne d sũur fãa n kell n ‘kẽn sɩdã pʋgẽ’? D segd n maoo wa d sẽn tõe fãa, n sõng nebã tɩ b bãng sɩdã. Woto, d na n tõog n gãda Wẽnnaam Gomdã sẽn yaa wa sʋʋgã kãn-kãe, wa sodaag sẽn gãd a sʋʋg sõma. (Efɛ. 6:17) D fãa tõe n maoome n paamd nebã zãmsg minim n paasdẽ, n tõog n “togsd sɩd koɛɛgã ne tɩrlem.” (2 Tɩm. 2:15) D sã n sõngd nebã ne Biiblã maasem tɩ b bãngd sɩdã, kɩtdame tɩ sɩdã maneg n kẽed tõnd sũurã la d yamã. Woto, d na n maneg n data ne d sũur fãa n kell n kẽn sɩdã pʋgẽ. Sɩdã a Zeova sẽn sõng tõnd tɩ d bãngã yaa wa kũun a sẽn kõ-do. Sõngame tɩ d tar zood sõma ne d saasẽ Ba wã. Rẽ n yaa bũmb ning sẽn tar yõod n yɩɩd d vɩɩmã pʋgẽ wã. A Zeova sõnga tõnd tɩ d bãng bũmb ka tɛka, la nan yaa sɩngr bala. A pʋlmame t’a na n kell n zãmsa tõnd bũmb wʋsg wakat sẽn kõn sa. Woto wã, bɩ d nong sɩdã, n get-a wa kĩndf sẽn yaa sõma wʋsgo. D kell n ‘bao sɩdã, la d ra bas-a ye.’—Yel. 23:23. w18.11 8 s. a 2; 12 s. 15-17

Nand tɩ sa-kãsengã sɩnge, a Nowe moona koɛɛgã n keoog nebã tɩ Wẽnnaam na n kɩtame tɩ saag ni n sãam dũniyã. A Zeezi yeelame yaa: ‘Rasem nins sẽn deng sãoong sa-kãsengã, nebã dag n dɩtame la b yũuda, n kẽed kãadem la b yiisd b kamb kãadem, hal tɩ ta daar ning a Nowe sẽn kẽ koom koglgã pʋgẽ wã. Bãmb dag n ka tẽed yell hal tɩ sãoong sa-kãsengã wa n kãag bãmb fãa. Na n yɩɩ a woto me Ninsaal Bi-riblã waoong wakate.’ (Mat. 24:38, 39) A Nowe kell n moona koɛɛg ning a Zeova sẽn yeel t’a moonã, baa ne nebã sẽn da maand b toog kae wã. Rũndã-rũndã, d moonda Rĩungã koɛɛgã, n na n sõng nebã tɩ b bãng Wẽnnaam sẽn na n wa maan bũmb ning n kõ ninsaalbã. Wa a Zeova, tõnd me rata ne d sũur fãa tɩ nebã sak n kelge, n wa “paam n vɩɩmde.” (Eze. 18:23) D sã n wa moond koɛɛgã zak-zak wall zãma wã zĩisẽ me, d keoogda nebã wa d sẽn tõe tɛka, tɩ Wẽnnaam Rĩungã na n wa sãama dũni-wẽn-kãngã.—Eze. 3:18, 19; Dãn. 2:44; Vẽn. 14:6, 7. w18.05 19 s. a 8-9

Yãmb tẽngã taoor dãmb sã n gɩdg a Zeova Kaset rãmbã tʋʋmdã, tɩ polɩɩs-rãmbã yõk yãmba, n dat tɩ y togs yɛl kẽer y tẽed-n-taasã zugu, y maanda wãna? Y na n togs-b-la y sẽn mi wã fãa bɩ? B sẽn yõk a Zeezi n kẽng guvɛrneerã taoore, tɩ guvɛrneerã sok-a sogsgã, a Zeezi manesem yɩɩ wãna? A tũu Biiblã sẽn wilg tɩ “sĩndim wakat beeme,” la tɩ “goam wakat me beeme” wã. Wakat ninga, a pa leok gomd baa a yembr ye. (Koɛ. 3:1, 7; Mat. 27:11-14) Yell a woto pʋgẽ, yaa tɩlɛ tɩ d tall yam la d maan gũusg wʋsgo, n da wa bao yell n kõ d tẽed-n-taasã ye. (Yel. 10:19; 11:12) La y zoa wall y zakã ned sã n maan yel-wẽn-kãseng tɩ y bãnge, y maanda wãna? ‘Togs-y sɩda.’ (Yel. 21:28) Y segd n togsa kãsem-dãmbã sɩd zãnga, n da golem yellã ye. Segdame tɩ kãsem-dãmbã bãng sɩdã yellã zugu, n tõog n ges b sẽn na n maan to-to n sõng a soabã sõma t’a lebs n maneg yẽ ne a Zeova zoodã.—Zak 5:14, 15. w18.10 10 s. 17-18

Wãn to la nonglmã sẽn be tigingã neb sʋkã tõe n paas neb nins sũy sẽn sãam wʋsgã raoodo? Bũmb y sẽn tõe n maan yaa y sẽn na n yɩ ned sẽn mi kelgre. (Zak 1:19) D sã n kelg ned neere, t’a neẽ tɩ d kʋmd-a lame, wilgdame tɩ d nong-a lame. A sã n wa gomda, y tõe n mi n sok-a-la bũmb ninga, tɩ sõng-y tɩ y bãng a yellã sẽn namsd-a to-to wã. Woto, y tõogd n ninga y meng a soabã zĩigẽ, n tõog n keng a raoodo. Yãmb nengã meng sẽn yaa to-to wã tõe n sõngame t’a bãng tɩ y kʋmd-a lame. Y sã n neẽ t’a rat n pɩdga yellã n togs-y zãnga, bɩ y tall sũ-mar n kelg-a, la y gũus n da wa kʋʋg a goamã ye. Y sã n maag y yĩng n kelg-a neere, tõe n sõngame tɩ y bãng yellã sẽn namsd-a n ta zĩig ningã. Rẽ me, tõe n kɩtame t’a soabã kɩs-y sɩda, n sak n kelg y sẽn na n yeel bũmb ning n keng a raoodã. Nebã sã n neẽ tɩ b yell pak-y lame, na n sõngame tɩ y paamd n kengd b raood sõma. w18.09 14 s. 10; 15 s. 13

Yaa tɩlɛ ne ned ning fãa sẽn dat n bao sɩdã t’a yã sẽk n kelg Rĩungã koe-noogã, n karemd Biiblã la sɛb sẽn wɛgsd a goamã, n zãms Biiblã ne a Zeova Kaset soaba, n segend tigissã, la a kẽnd tigissã n pa vaandẽ ye. Sẽn na yɩl n maan woto fãa, yaa tɩlɛ tɩ d bas bũmb kẽer yõod sẽn pa tolg n waoogẽ, n tõog n paam weere. (Efɛ. 5:15, 16) La kaoosda wakat a wãn tɩ ned yaool n wa bãng Biiblã zãms-nana wã? Bee ne ned fãa yɛlã. Bũmb nins d sẽn tõe n bãng a Zeova zugã pa tar saab ye. Makre, a yamã, a manesmã ne a noyã, la bũmb nins fãa a sẽn maanã. (Rom. 11:33) Pipi Gũusg Gasgã sẽn yi yʋʋmd 1879 wã pʋgẽ, b yeelame tɩ sɩdã yaa wa “fɩlɛɛr sẽn solg mood sʋka,” la b paas tɩ “f sã n paam fɩlɛɛr a ye, f pa segd n bas gẽesgã ye. A ye sã n da sekame, Wẽnnaam ra pa na n kɩtẽ tɩ yaa wʋsg ye. Ket n gẽesdẽ, n wa paam a taab n paase.” Baa d sã n wa vɩ wakat sẽn kõn sa, d na n ket n bãngda bũmb wʋsg a Zeova zugu. La nananda, segdame tɩ d maood wakat fãa n yãt weer sẽn na yɩl n bao n bãng bũmb wʋsg a Zeova zug wa d sẽn tõe tɛka. w18.11 4 s. a 7

Biiblã yeelame tɩ rapã segd n zĩnda ne b pagbã wa sẽn zems bãmb sẽn mi-b sõma wã. (1 Pɩy. 3:7) Woto rat n yeelame tɩ b segd n yɩɩ wʋmdba, la b nand b pagbã. Rao sẽn yaa wʋmd miime tɩ bũmb wʋsg pʋgẽ, yẽ ne a pagã pa yembre, la tɩ pa rat n yeel tɩ yẽ sãoo a pagã ye. (Sɩng. 2:18) A pa maand a toog kae ne a pagã tagsgo, la bũmb nins sẽn noom-a wall sẽn sãamd a sũurã ye. A pa paoogd-a ye. Rao sẽn pa maand a toog kae ne a pagã tagsg pa na n tall rolsem manesem ne pagb a taab ye. A leb n pa na n tũnug ne rezo sosiyo-rãmbã n maan woto, wall a kẽed sɩt wɛɛb-rãmbẽ n get yel-yood ye. (Zoob 31:1) A na n maana sɩd ne a pagã. La pa a sẽn nong-a wã yĩng bal ye. Yaa a sẽn nong Wẽnnaam la a kis sẽn yaa wẽngã me yĩnga.—Yɩɩn. 19:15; 97:10. w18.09 29 s. a 3-4

Bõe yĩng tɩ yɩl n tũ bũmb nins d sẽn bãng Wẽnnaam Gomdã pʋgẽ wã pa nana? Bũmb a ye sẽn kɩt tɩ pa nana, yaa tɩ sẽn na yɩl n maan sẽn yaa tɩrga, yaa tɩlɛ tɩ f yɩ sik-m-meng soaba. La d sẽn be dũniyã ‘yaoolem wakatã’ kɩtame tɩ tõog n kell n yɩ sik-m-meng soab yaa toogo. Bala, nebã wʋsg yaa “beed-rãmba,” rat n yeel tɩ b mensã yell bal n pak-ba. B yaa “ligd-noangdba, yʋ-baoodba, wilg-m-mens rãmba,” la neb sẽn “ka tar yõk-m-menga.” (2 Tɩm. 3:1-3) D sẽn tũud Wẽnnaamã, d miime tɩ zʋg-kãensã pa sõma ye. La tõe tɩ wakat ninga, d mi n getame tɩ sẽn yaa-b woto wã vɩɩm noom-b lame. (Yɩɩn. 37:1; 73:3) Tõe meng tɩ d mi n soka d meng yaa: ‘M sã n modgd n lʋɩɩsd bũmb nins sẽn manegd m taabã taoore, tara yõod sɩda? M sã n sikd m menga, nebã na n ket n waoogd-m lame sɩda?’ D sã n dɩk dũniyã nebã togs-n-taare, tɩ lebg d mensã yell bal n pak-do, tõe n sãama tõnd ne d tẽed-n-taasã zems-n-taare, la kɩt me tɩ yɩ toog tɩ nebã bãng tɩ d yaa kiris-neba. La d sã n bʋgsd pĩnd wẽndẽ wẽn-sakdbã kibay sẽn be Biiblã pʋgẽ wã, la d rɩkd b togs-n-taare, rẽ na n nafa tõnd n yɩɩda. w18.09 3 s. a 1

Wakat n zĩnd t’a Zeova ra yaa a ye tãa. La a sẽn pa tagsd a meng yell balã, a wa n yãka yam n na n naan malɛgsã tɩ b vɩɩmd saasẽ, la a naan ninsaalbã tɩ b vɩɩmd tẽngã zugu. Yẽ n kõ b fãa vɩɩm. A Zeova sẽn yaa “sũ-noog buud fãa yẽgrã” nong n kõta kũun-sõma wʋsgo. (1 Tɩm. 1:11, Sebr Sõngo; Zak 1:17) A sẽn dat tɩ tõnd me tall sũ-noogã, a wilgda tõnd d sẽn tõe n yɩ kõatb to-to. (Rom. 1:20) Wẽnnaam a Zeova naana ninsaal n wẽneg a menga. (Sɩng. 1:27) Woto rat n yeelame t’a naana tõnd tɩ d tõe n dɩk a togs-n-taare. D sã n dat sũ-noog la bark hakɩɩka, yaa tɩlɛ tɩ d yɩ kõatb wa a Zeova, n pʋɩt d sẽn tarã ne d taabã, la d tagsd b yelle, n baood b neere. (Fili. 2:3, 4; Zak 1:5) Bõe yĩnga? Bala, a Zeova naan-d-la woto. Baa d sẽn yaa koangdbã, d tõe n dɩka a Zeova togs-n-taar n yɩ kõatba. D sã n yaa kõatba, a Zeova sũur noomame, bala a ratame tɩ d rɩk a togs-n-taare.—Efɛ. 5:1. w18.08 18 s. a 1-2; 19 s. a 4

Kiristã poorẽ dãmbã pa kelgd a goamã neer bal ye. B tũudame. Yaa woto me n wilgd tɩ b wʋmda a koɛɛga. B pa basd tɩ “vɩɩmã yɛl yɩɩr” tiis-b ye. (Luk 21:34) Yaa a Zeezi noyã tũub la b lʋɩɩsd taoor b vɩɩmã pʋgẽ, baa sã n wa pa nana. B maanda sɩd ne a Zeova, baa sẽn na n yɩ a soaba. Bũmb a to me d sẽn tõe n maan tɩ wilg tɩ d kelgda a Zeezi yaa d sẽn na n sakd n tũud neb nins a sẽn yãk tɩ b lʋɩt tõnd taoorã. (Ebre. 13:7, 17) Bũmb wʋsg la siglgã toeem yʋʋmã noorã. Wala makre, b yiisa koe-moonegã tʋʋm-te-paala, la b wilg-d koɛɛgã taasg yam-paalse. D sẽn maand semennã pʋgẽ pipi tigsgã to-to wã me toeemame. Sẽn paase, d sẽn met Rĩungã rot to-to wã, d sẽn lebsd n manegd-b la d get b yell to-to wã me toeemame. D sũur nooma wʋsgo! Bala, woto fãa yaa tõnd neer yĩnga, tɩ wilgdẽ t’a Zeova siglgã nonga tõndo. D tõe n kɩsa sɩd t’a Zeova na n ning-d-la barka, d sẽn modgd n tũud a siglgã saglsã sẽn yaa sagls sẽn zems a wakatã. w19.03 10-11 s. 11-12

Baa kibar pa ziri zãnga, wall b sẽn togs n kellã yaa bilf bala, kẽesda ned moogo. A Zozuwe wakatẽ wã, bũmb la Israyɛll neb nins sẽn da tɩ be Zʋrdẽ kʋɩlgã rʋʋnd a to wã naan n maane, tɩ d tõe n dɩk yam a pʋgẽ. (Zoz. 22:9-34) B wa n wʋmame tɩ Israyɛll neb nins sẽn be rʋʋnd a ye wã mee tẽn-kug-kẽeng kʋɩlgã noore. Israyɛll buud a taabã sẽn wʋmã ra yaa sɩda, la ra pa kibarã zãng ye. Kɩtame tɩ b yãk yam n na n tɩ zab ne b saam-biisã sẽn be rʋʋnd a to wã, bala b tagsame tɩ yaa a Zeova la b kɩɩs-yã. (Zoz. 22:9-12) Zu-noogo, b reng n tʋma rap tɩ b na n tɩ sok n wʋm yellã vɩʋʋgo. Bõe la b tɩ bãng-yã? B bãngame tɩ b sẽn me tẽn-kugrã pa sẽn na n kʋʋd maand ye. Yaa sẽn na yɩl tɩ yɩ kaset tɩ bãmb me naag n yaa a Zeova nin-buiidu. Ad b sũy yɩɩ noog b sẽn deng n bao n na n wʋm yellã vɩʋʋgo, n pa yɩ yãg-yãg n yik zabr ne b saam-biisã! w18.08 5 s. a 9-10

A Poll gomdã wilgdame tɩ baa kiris-ned hakɩɩk tõe n wa maana sẽn yaa wẽnga. A tõeeme meng n tagsdẽ t’a Zeova sũur ket n yaa noog ne-a. La baa ned sã n dat n yɩ a Zeova zoa, wall a sã n yetẽ t’a maanda sɩd ne a Zeova, pa wakat fãa la rẽ wilgd t’a Zeova sũur sɩd nooma ne-a ye. (1 Kor. 10:1-5) A Moyiiz sẽn dʋ Sinayi tãngã zug n kaoosd n pa sigdã, wa n lebga yɩɩr wʋsg ne Israyɛll nebã. Tõnd me sã n wa getẽ tɩ dũniyã saab kaoosdame, tõe n wa lebga yɩɩr wʋsg ne-do. D tõe n wa getame t’a Zeova sẽn pʋlem bũmb ninsã pa na n pids mas-masã, wall d tagsdẽ tɩ b pidsg yaa toogo. D sã n pa gũusi, woto tõe n kɩtame tɩ d wa lʋɩɩs tõnd mengã sẽn datã taoore, t’a Zeova raabã leb poorẽ. Bilf-bilfã, d tõe n wa zãaga d meng ne a Zeova, n wa maand bũmb nins d sẽn da pa na n saag n maanã menga. w18.07 21 s. 17-18

Tõnd sã n paam t’a Zeova mi tõnd a woto, d na n paama bark ka tɛka. La d maanda wãn n paam t’a Zeova bãng-do? Yaa tɩlɛ tɩ d nong-a, la d rɩk d meng n kõ-a, n na n maan a raabã. (1 Kor. 8:3) D sã n paam tɩ d Ba sẽn be saasẽ wã bãng-do, d segd n kell n maoome n yɩ a zoa wakat fãa. Wa a Poll sẽn yeel Galat kiris-nebã, tõnd me pa segd n leb n bao yʋʋr la ziir dũniyã pʋgẽ, wall d bao dũniyã bũmb a taabã “sẽn ka pãnga la sẽn ka yõodã,” n wa lebg b yembs yɛs ye. (Gal. 4:9) Galat kiris-nebã ra zoe n bãnga Wẽnnaam, tɩ Wẽnnaam me mi-ba. La a Poll yeelame tɩ b ra ‘leb n kẽeda’ dũniyã bũmb nins sẽn ka yõodã. Yaa wa a sẽn sok-b tɩ: “Yãmb sẽn paam n bãng Wẽnnaamã, bõe yĩng tɩ y leb n targ n na n yɩ bõn-zaal sẽn ka yõod yembs yɛsa?” w18.07 8 s. a 5-6

Pa tɩlɛ tɩ d kɩɩs Wẽnnaam noore, n yã a biisã n yaool n dɩk yam ye. Neb n maan yel-wẽn pĩnd wẽndẽ, tɩ b kibayã be Biiblã pʋgẽ, tɩ d tõe n karem n dɩk yam. Sɩd me, d sã n karem ned kibar Biiblã pʋgẽ la d bʋgse, yaa Wẽnnaam la d kelgda, la yam ning d sẽn na n paamã ka to ye. Wala makre, tags-y n ges-y rĩm a Davɩɩd sẽn yo ne a Batseba, t’a yel-wẽndã biis nams-a to-to wã. (2 Sãm. 12:7-14) D sã n wa karem kibarã, n bʋgsdẽ, d tõe n soka d meng yaa: ‘Bõe n da tõe n sõng a Davɩɩd t’a gil zu-loe-kãensã? M sã n wa be yell a woto pʋgẽ, m na n tõogame n da kɩɩs Wẽnnaam bɩ? M na n zoe n põsa wa a Zozɛf bɩ, bɩ m na n maana wa a Davɩɩde?’ (Sɩng. 39:11-15) D sã n tagsd zu-loees nins yel-wẽnã sẽn na n wa ne wã, na n kɩtame tɩ d maneg n ‘kisg wẽnga.’—Amoos 5:15. w18.06 17 s. a 5, 7

Naoor wʋsgo, nebã sã n ne yel-kɛgã, kɩtdame tɩ b maneg n kẽed politikã. A Zeezi wakatẽ wã tɩ lampo wã poorẽ no-koɛɛmã yaa wʋsgo. Kɩtame tɩ neb wʋsg ra kẽed politikã rẽ yĩnga. Rom sẽn da so tẽns ninsã fãa neb ra segd n yaoo lampo-rãmb buk toor-toore. Zagsã yaoodo, zĩisã yaoodo, la lampo-rãmb a taaba. Yaood rɛɛgdbã me ra wẽgda nebã, tɩ maneg n zẽn yellã. Kẽer meng yaoo tẽngã taoor dãmb n paam tɩ b kõ-b tʋʋmdã, tɩ b wẽgd nebã n deegd ligd wʋsgo. A Zaase sẽn da yaa Zeriko yaood dɛɛgdbã naabã ra lebga rakãagre, a sẽn da zãmbd nebã yĩnga. (Luk 19:2, 8) Wõnda b wʋsg ra maanda wa yẽ. A Zeezi bɛɛbã baoome n na n kɩt t’a kẽ lampo wã yaoob no-koɛɛmã. Daar a ye, b sok-a lame n ges sã n zemsame tɩ zʋɩf-rãmbã yao ‘yõor-yaoodã’ sẽn da yaa deniye a yembrã. (Mat. 22:16-18.) Zʋɩf-rãmbã ra tolg n kisa yõor-yaoodã, bala, ra tẽegd-b lame tɩ yaa Rom nebã n so bãmba. w18.06 5-6 s. a 8-10

Sẽn yãk-a yam n na n zĩnd a Sʋɩtãan poorẽ, baa sã n wõnd manegd-a lame, wakat fãa wat n baasa wẽnga. (Zoob 21:7-17; Gal. 6:7, 8) D sẽn paam n bãng a Sʋɩtãan sẽn tõog n maanã, wãn to la nafd tõndo? Sõngda tõnd tɩ d tall tagsg sẽn zems ninsaalbã goosneema-rãmbã zugu, la kõt-d raood tɩ d wɩngd ne koe-noogã moonego. D miime t’a Zeova ratame tɩ d waoog goosneema-rãmbã. (1 Pɩy. 2:17) A ratame tɩ goosneema noor sã n pa kɩɩsd yẽ noor bɩ tõnd sak n tũ. (Rom. 13:1-4) D leb n miime tɩ d pa segd n kẽes d toog politikã yɛlẽ, wall n yãk politik sull n teendẽ ye. (Zã 17:15, 16; 18:36) D sẽn mi t’a Sʋɩtãan sãamda a Zeova yʋʋre, la a pʋd n baood n na n kɩt tɩ nebã ra bãng yʋʋrã, d rata ne d sũur fãa n sõng d taabã tɩ b bãng sɩdã Wẽnnaam zugu. D sẽn paam n yaa a Zeova Kaset rãmb la d pʋt a yʋʋrã noom-d-la wʋsgo. Kɩtame tɩ d miẽ tɩ d sã n nong a Zeova, rẽ bark yɩɩda ligdã la teedã nonglmã hal zĩig sẽn zãre.—Eza. 43:10; 1 Tɩm. 6:6-10. w18.05 24 s. a 8-9

Y sã n wa tar zu-loees y kãadmã pʋgẽ, y tara sor n na n bas welg taab bɩ? Biiblã pa wilgd bũmb nins sẽn tõe n wa kɩt tɩ neb welg taabã ye. Ad a Poll sẽn yeele: “Pag sã n tar sɩd sẽn ka tẽeda, la a sã n noom a sɩdã t’a rat n tall-a, bɩ a ra yi ye.” (1 Kor. 7:12, 13) Segd n yɩɩ woto rũndã-rũndã me. La rap kẽer sẽn pa tũud a Zeova tara manesem sẽn wilgd tɩ b pa rat n kell n zĩnd ne b pagã sẽn tũud a Zeova wã ye. Wala makre, tõe t’a tara pagã n pãbda, hal t’a getẽ tɩ tõe n pogl-a lame wall tũ ne a yõore. Tõe me t’a pa get a yelle, la zakã meng yelle, pa rẽ bɩ a pa rat n sak t’a tũ a Zeova wa sẽn segdã ye. Saam-bi-poak ning sɩd sã n maand woto, a tõeeme n wa getẽ tɩ baa raoã sẽn yet a soab fãa, a manesmã wilgdame t’a pa rat n kell n zĩnd ne yẽ, la tɩ welgrã lebga tɩlɛ, n yãk a yam n na n looge. La saam-bi-poak a to sẽn be yel-kãng me pʋgẽ tõe n yãka yam n na n kell n zĩnd ne a sɩdã, n sak n na n tõog toog la a maan a sẽn tõe fãa tɩ b zĩid-n-taarã manege. w18.12 13 s. 14, 16; 14 s. 17

Ka-koaad yel-bũndã sẽn be Luk 8:5-8, 11-15 pʋgẽ wã, bõn-buudã yaa “Wẽnnaam goamã” bɩ Rĩungã koɛɛgã. Zĩigã makda ninsaal sũurã. Bõn-buud ning sẽn lʋɩ zĩ-sõngẽ wã bulame n yi, n ning yẽga, n ‘wom biis tɩ ta koabg-koabga.’ Wa a Zeezi yel-bũndã pʋgẽ bõn-buudã sẽn lʋɩ zĩ-sõngẽ wã, tõnd me sakame tɩ koe-noogã kẽ d sũurã. Makr wɛɛngẽ, koɛɛgã bulame n yi, n kɩ yẽga, hal n wa tõe n wom biisi. La wa d sẽn zoe n yeelã, ka-bil sã n bul n yi, a pa womd kãnkã-kɩds ye. A womda ka-buudu. Woto me, tõnd me womda biisi. La pa karen-bi-paal ye. Yaa Rĩungã bõn-buudu. Wãn to la d maand rẽ? D sã n tũnug ne segb d sẽn paam fãa n taas ned Rĩungã koɛɛgã, yaa wa d sẽn fẽrg Rĩungã bõn-buudã b sẽn bʋd d sũurẽ wã. (Luk 6:45; 8:1) Dẽnd yel-bũndã wilgdame tɩ d sã n wɩngd ne Rĩungã koɛɛgã moonego, rẽ la d ‘womd biis ne sũ-mare.’ w18.05 14 s. 10-11

Pa ne no-goamã bal la a Poll ra rat n keng a tẽed-n-taasã raood ye. A yeelame: “Mam na n kɩsa bũmb fãa ne yamleoogo, la m kɩs m mengã fãa yãmb mensã yĩnga.” (2 Kor. 12:15) Woto me, pa ne b no-goamã bal la kãsem-dãmbã segd n bels b tẽed-n-taasã la b keng b raood ye. B tʋʋm-tʋmdɩ wã me segd n wilgame tɩ b tẽed-n-taasã ned kam fãa yell pak-b lame. (1 Kor. 14:3) Yɩl n keng b tẽed-n-taasã tẽebo, yaa tɩlɛ tɩ kãsem-dãmbã mi n kõ-b saglse. La sã n wa yaa woto me, b segd n tũu Biiblã sẽn yet rẽ wɛɛngẽ wã, n tõog tɩ b sã n na n kõ ned saglg bɩ keng a raoodo. A Zeezi kõo mak-sõng sẽn ka to zĩ-kãng wɛɛngẽ. A vʋʋgrã zugẽ, a taasa Aazimineer tigimsã koeese, n sagl-ba. A tolg n togsa Efɛɛz tigingã ne Pɛrgam la Tiyatiir tigingã bũmb kẽer b sẽn segd n demse. La a reng n pẽg-b-la b tʋʋm-sõma wã yĩnga. (Vẽn. 2:1-5, 12, 13, 18, 19) Kãsem-dãmbã sã n wa na n sagl b tẽed-n-taaga, b segd n dɩka Kiristã togs-n-taare. w18.04 22 s. a 8-9

Roagdba, bãng-y tɩ yaa yãmb n segd n sõng y kambã tɩ b mao t’a Sʋɩtãan ra tõog tɩ b sũurã tagsg lebg wẽng ye. Yaa vẽeneg tɩ y maanda y sẽn tõe fãa n kogend y kambã ne bãasã. Y modgdame tɩ y zakã yaa yɩlemde, la y gũusdẽ tɩ bũmb sẽn tõe n kɩt tɩ yãmb bɩ y kambã lʋɩ bãag ra zĩnd y zakã pʋgẽ ye. Woto me, y segd n sõnga y kambã tɩ b zãag b mens ne sɩt wɛɛb rãmba, ze-video rãmba, filim-dãmb la bũmb a taab sẽn yit tele wã pʋgẽ, n tõe n kɩt tɩ b wa tagsd wa a Sʋɩtãana. A Zeova yeelame tɩ yaa yãmb a roagdbã n segd n ges tɩ y kambã paam zood sõma ne yẽ. (Yel. 1:8) Rẽ wã, ra n yɛɛsd-y n pa rat n lugl noy y zakã rãmb yĩng ye. Lugl-y noy sẽn zems ne Biiblã sẽn yetã. Togs-y y kom-bõonegã b sẽn tar sor n na n gese, la b sẽn pa segd n gese, la y sõng-b tɩ b wʋm y sẽn yet woto wã võore. (Mat. 5:37) B sã n wa bɩtẽ, bɩ y sõng-b tɩ b wa tõe n tik a Zeova noyã n bãng sẽn yaa wẽng ne sẽn yaa sõma n bak b toore. (Ebre. 5:14) La yɩta sõma tɩ y tẽegdẽ tɩ y kambã sẽn get n yɩɩdã yaa yãmb sẽn maandã.—Tõo. 6:6, 7; Rom. 2:21. w19.01 16 s. a 8

Bõe la kambã la kom-bɩɩsã tõe n maandẽ, n paam n sõng tɩ tigingã neb zems-n-taarã paasdẽ, tɩ ned fãa vẽenem yãgda? Ad bũmb a ye. Yaa b sẽn na n bao b tẽed-n-taas nins yʋʋm sẽn vẽsgã zoodo. Y tõe n sok-b lame n gese, bõe n sõng-b tɩ b tõog n kell n sak a Zeova yʋʋm wʋsg woto. B sẽn na n yeelã na n kenga y tẽebã hal sõma, la kɩt tɩ y fãa rat n mao tɩ y vẽenemã ket n yãgda. D yaa biig tɩ d yaa kãsma, d tõe n yãka yam n na n deegd nebã sõma d Rĩungã roogẽ. Sẽn lʋɩt-b taoor koe-moonegã yiib tigsg sasa wã tõe n sõnga sẽn kʋʋl-bã tɩ b moon koɛɛgã sõma. Sõng-y tɩ b paam mooneg zĩig sẽn zems ne-ba. Y tõe n mi n kɩtame tɩ bi-bɩɩg naag ned sẽn kʋʋl n moone, sẽn na yɩl n teel-a. Y segd n wilgame me tɩ y kʋmda d tẽed-n-taas nins sẽn kʋʋl bɩ sẽn kẽnd ne bãase, n pa le tõe n moon koɛɛgã wa b sẽn datã. Y tẽed-n-taag kʋʋlame t’a pa kʋʋle, a tara minim wʋsg t’a pa tare, y sã n wilgdẽ t’a yell pak-y lame, na n kenga a raoodo, t’a rat n ket n moond koɛɛgã ne yẽesem.—Maan. 19:32. w18.06 23-24 s. 10-12

D pa segd n yĩm t’a Zeova fãaga tõnd ne yel-wẽnã la kũumã yembd ye. A Zeezi maoongã maasem yĩnga, d tõe n tũu Wẽnnaam ne sũur kaset sẽn pa le ningd-d taale, hal tɩ rẽ kõt-d sũ-noog meng-menga. (Yɩɩn. 40:9) D pa segd n wilg bal tɩ d sũur nooma ne a Zeova, a sẽn kõ-d lohormã yĩng ye. D segd n gũusame me n da wa lʋɩɩs lohorem-kãng taoor n maan sẽn pa segd ye. Tʋm-tʋmd a Pɩyɛɛr yeelame tɩ d pa segd n sak tɩ d lohormã yɩ wẽng lilldg ye. Woto pa tẽegd tõnd yell ning sẽn paam Israyɛll nebã, b sẽn wa n be weoogẽ wã sɩda? Yaa yell sẽn yɛgd tõnd rũndã-rũndã me. Tõe meng tɩ yaa tõnd n segd n tũ a Pɩyɛɛr saglgã n yɩɩda. A Sʋɩtãan kɩtame t’a dũniyã pid ne bũmb toor-toore, hal n maandẽ tɩ d yamã tõe n kẽ rẽ nana-nana. Wala makre, futã la mengã manegr wɛɛngẽ, rɩɩbã, reemã la yõ-noogrã wɛɛngẽ. Piblisite wã rãmb nong n yãkda neb sẽn yaa neeb tɩ b maand piblisite-rãmbã, n na n belg tõnd tɩ d ra teed sẽn pa tɩlɛ ne-do. Dẽnd d sã n pa gũusi, dũniyã tõe n wa belg-d-la nana-nana, tɩ d lʋɩɩs d lohormã taoore, n maan sẽn pa segde. w18.04 10 s. a 7-8