Bõn-bɩʋʋngo

A Lazaar sẽn wa n maan kaalmã, a Zeezi kʋma a Mart ne a Maari nimbãanega. A Zeezi sẽn yã tɩ b yãbd b ma-biigã kũumã, yẽ me “yãbame.” (Zã 11:32-35) Pa a sẽn pa na n le paam n yã a zoa wã yĩng la a sẽn yãbã ye. Sɩd me, a ra miime t’a na n vʋʋga a Lazaare. A yãbame, bala a ra wʋmda yellã sẽn namsd a zo-rãmbã to-to wã, tɩ ra sãamd a sũuri. Tõnd sẽn mi t’a Zeezi kʋmda nebã nimbãanegã kengda d raood hal wʋsgo. Yaa sɩd tɩ tõnd pa zems zãng wa yẽ ye. La a sẽn kʋmd nebã kɩtame tɩ d nong-a. D sẽn mi t’a lebga Wẽnnaam Rĩungã Rĩmã kengda d raoodo. Ka la bilfu, a na n kɩtame tɩ namsg buud fãa sa. A meng sẽn yɩ ninsaalã kɩtame tɩ yaa yẽ n sɩd tõe n bãng n sõng ninsaalbã tɩ b paam b mens ne zu-loees nins fãa a Sʋɩtãan naamã sẽn wa ne wã. Hakɩɩka, d sẽn paam tɩ d Rĩmã yaa ned sẽn “tõe n wʋm tõnd pãn-komsmã võorã” yaa bark meng-menga.—Ebre. 2:17, 18; 4:15, 16. w19.03 17 s. 12-13

Bũmb kẽer la d tõe n maan sẽn na yɩl n sõng nebã tɩ b bao n bãng a Zeova, la tʋʋmdã meng-mengã yaa a Zeova. (1 Kor.3:6, 7) Yaa yẽ n takd nebã n wat tũudum hakɩɩkã pʋgẽ. Sẽn paase, ned kam fãa manesem sẽn na n yɩ to-to ne koe-noogã bee ne a sẽn yaa a soab a sũurã pʋgẽ wã. (Mat. 13:4-8) D tẽeg tɩ baa ne a Zeezi sẽn yɩ karen-saamb sẽn ka to wã, neb wʋsg pa sak koɛɛgã a sẽn da moondã ye. Dẽnd baa neb wʋsg d sẽn maand d sẽn tõe fãa n na n sõngã sã n pa sakd n kelge, d pa segd n koms raood ye. D sã n kʋmd neb nins d sẽn taasd koɛɛgã, d na n yãa a nafa wã. D sũur na n maneg n nooma ne koe-moonegã. D na n sɩd bãngame tɩ kũun kõta sũ-noog wʋsgo. Sẽn paase, na n yɩɩ nana ne neb nins sẽn zems ne “vɩɩm sẽn kõn sɛ wã” tɩ b sak koe-noogã. (Tʋʋ. 13:48) Rẽ wã, “tõnd sẽn paam weer ning fãa, bɩ d maan nebã fãa neere.” (Gal. 6:10) Woto, d paamd n sõng n kɩtame tɩ d saasẽ Ba wã paam pẽgre, tɩ rẽ kõ-d sũ-noogo.—Mat. 5:16. w19.03 25 s. 18-19

Rĩm a Davɩɩd ra yeelame t’a Zeova “yaa kãsenga,” la tɩ ‘zemsame t’a reeg pẽgrã fãa.’ (Yɩɩn. 145:3) A ra nonga a Zeova, tɩ rẽ kɩt t’a ra ‘pẽgd-a nebã tiging sʋka.’ (1 Kib. 29:10-13; Yɩɩn. 40:6) Rũndã-rũndã, segb d sẽn tar n tõe n pẽg a Zeova waoogame. Wala makre, d sã n zẽk d nug n leok sokr tigissã sasa, d pẽgda a Zeova. Ned fãa leoor sẽn pa wõnd a to wã, d sã n kelgdẽ noom-d lame. D sã n kelg biig leoore, tɩ yaa goam sẽn yit a sũurẽ, noom-d lame. Ned sã n bãng bũmb Biiblã pʋgẽ paalem, n gomd rẽ yell ne yẽesem, kẽeda sũuri. Ned sẽn zoet yãnd ne goama, wall sẽn zãmsd d buud-gomdã sã n “paam pɛl-kɛgeng” n zẽk a nug n leoke, noom-d lame. (1 Tes. 2:2) Bõe la d tõe n maan tɩ wilg tɩ d sũur yaa noog ne b fãa sẽn modgd woto wã? Tigsgã poore, d tõe n pʋʋs-b-la barka, b goamã sẽn keng d fãa raoodã yĩnga. Bũmb a to me d sẽn tõe n maan tɩ wilg tɩ d sũur yaa noogo, yaa tõnd mengã sẽn na n leokdẽ. Woto, pa d taabã bal n kengd tõnd raood ye. Tõnd me kengda bãmb raoodo.—Rom. 1:11, 12. w19.01 8 s. a 1-2; 9 s. a 6

Rap piig n da tar zu-loɛɛg sẽn wõnd pa tar tɩɩm. B ra bẽeda wãoodo, hal tɩ ra tar kengr bala. La daar a ye, b yãa karen-saam-kãseng a Zeezi sẽn be yɩɩg n watẽ. B ra wʋmame t’a tõeeme tɩ bãag buud fãa sa. Rẽ n so tɩ b zẽk b koees n yeel yaa: “Zeezi, Zu-soaba, zoe-y tõnd nimbãanega.” Baraarã, a Zeezi maaga wãoob piigã. Sãmbg kae tɩ b fãa sũur yɩɩ noog a Zeezi sẽn maan-b neerã. La b nin-yend n maan sẽn yɩɩd rẽ. A kẽnga a Zeezi nengẽ n tɩ pʋʋs-a bark n wilg t’a sũur noomame. Ra yaa Samari neda. A sẽn yã t’a paama laafɩ wã, a ‘zẽka a koɛɛg n pẽgd Wẽnnaam.’ (Luk 17:12-19) Wa Samari raoã, ned sã n maan neere, d rat n pʋʋs-a-la barka, wall d maan bũmb n wilg tɩ d sũur noomame. Wilg tɩ f sũur nooma ne bũmb ned sẽn maanã wɛɛngẽ, a Zeova n kõt tõnd mak-sõng sẽn ka to. Wala makre, a keooda neb nins sẽn maand sẽn noom yẽ wã. (2 Sãm. 22:21; Yɩɩn. 13:6; Mat. 10:40, 41) Biiblã yaool n sagenda tõnd tɩ d yɩ “Wẽnnaam togs-n-taase, wa kom-nongdse.” (Efɛ. 5:1) Dẽnd sẽn yɩɩd fãa, yaa d sẽn dat n dɩk a Zeova togs-n-taarã la d sẽn wilgd d sũ-noogo, ned sã n maan neerã. w19.02 14 s. a 1-2; 15 s. a 4

Bi-pugl a ye sẽn yaa lekoll karen-biig yeela a karen-saamb ne waoogr t’a pa na n naag n maan tigr sẽn pa tat Wẽnnaam yam ye. Bi-bɩɩg sẽn yaa yãn-zoɛt n da moond koɛɛgã zak-zaka, n wa wẽ a karen-bi-taag kʋɩlenga. A karen-bi-taagã ra zoe n gom n paooga a Zeova Kaset rãmbã. Rao n tʋmd wʋsg sẽn na yɩl n ges a zakã rãmb yelle, t’a patrõ wã yeel-a t’a maan bũmb sẽn kɩɩsd laloa wã. Baa ne a sẽn mi t’a sã n zãgse, a tʋʋmdã tõe n sãamame wã, a wilga a patrõ wã tɩ yẽ segd n maana pʋ-peelem, n tũ laloa wã, bala Wẽnnaam datame tɩ sẽn tũud-b yẽ wã maan woto. (Rom. 13:1-4; Ebre. 13:18) Sã n yaa ne yãmba, neb a tãabã manesmã wilgdame tɩ b tara zʋg-sõng bʋgo? Tõe tɩ y getame tɩ b tara raood ne pʋ-peelem la zʋg-sõma a taaba. La sẽn yɩɩd fãa, b manesmã wilgdame tɩ b yaa burkĩmba. B fãa maana sɩd ne a Zeova. B baa a ye pa sak n kɩɩs a Zeova noyã ye. Yaa b burkĩndã yĩng la b sẽn maan woto wã. Yaa vẽeneg t’a Zeova sũur yɩɩ noog ne-b rẽ yĩnga. Tõnd me ratame tɩ d saasẽ Ba wã sũur yɩɩ noog ne-do. w19.02 2 s. a 1-2

Yaa sẽn da pa tar-b sõangdã la tõogã ra kogend n tɩ yɩɩda. Wala makre, kɩɩbsã, pʋg-kõapã la sãambã. A Zeova ra yeela Israyɛll bʋ-kaoodbã yaa: “Da bʋ-y sãan bɩ kɩɩb bʋʋd kegre, la ra reeg-y pʋg-kõor fuug n gãneg n yaool n kõ-a bũmb ye.” (Tõo. 24:17) Sẽn da pa tar-b sõangdã yell da paka a Zeova wʋsgo, t’a rat n sõng-ba. A ra sɩbgda neb nins sẽn namsd nin-kãensã. (Yik. 22:22-24) A Zeova ratame tɩ neb nins a sẽn yãk tɩ b lʋɩt a nin-buiidã taoorã ges b fãa yell ne nonglem. A kisa ned sẽn na n modg a to n kẽ ne-a, ned sẽn na n kẽ ne a roagda, bɩ ned sẽn na n yõg biiga. A ratame tɩ b ges tɩ ned fãa paam koglg ne yel-kãensã, sẽn yɩɩd fãa, sẽn pa tar-b sõangdã. (Maan. 18:6-30) D sã n kɩs sɩd t’a Zeova manesem sẽn yaa to-to ne tõndã yaa tɩrg wakat fãa, d na n maneg n nong-a lame n paase. Tõnd sã n nong Wẽnnaam, la d nong a noyã sẽn yaa tɩrsã, kɩtdame tɩ d nong d taabã, n pa maand-b kɛgr ye. w19.02 24-25 s. 22-26

D rɩk makr ne yell a ye, n ges d sẽn tõe n maan to-to t’a Sʋɩtãan ra wa tõog tɩ d tagsa wã lebg wẽng ye. A Zeova yeelame tɩ d ‘ra saag tɩ b pʋd yoobo, la rẽgd buud baa a yembr’ yell tõnd sʋk ye. (Efɛ. 5:3) La d sã n be ne d tʋmd-n-taas wall d karen-bi-taase, tɩ b wa gomd pag ne rao lageng yelle, d maanda wãna? D sũur-kasetã sẽn yaa wa gũudã na n keoog-d lame. (Rom. 2:15) La d na n sak n kelg-a lame bɩ? Tõe tɩ d na n dat n kelga b goamã, wall d ges fot-rãmb b sẽn wilgdi. La yaa wakat kãng la d segd n maan bũmb n kogl d menga. D tõe n toeema sõsgã, wall d loog la d bas-ba. Sẽn na yɩl tɩ d taabã ra wa tõog tɩ d tall tags-wẽnse, wall d maan sẽn yaa wẽnga, yaa tɩlɛ tɩ d tall raoodo. D tõe n basa d yam t’a Zeova nee tõnd modgrã, la t’a na n kõ-d-la yam la pãnga, tɩ sõng-d tɩ d kell n mao, n da wa tagsd wa a Sʋɩtãan ye.—2 Kib. 16:9; Eza. 40:29; Zak 1:5. w19.01 17-18 s. 12-13

Rĩm a Salomo yɩɩ arzɛg-kẽeng soaba, n da tar ziir wʋsgo. A tagsa a sũurẽ, n yeele: “Mam na n makame n maan sũ-noogo, la m bãng sũ-noog sẽn yaa-a soaba.” (Koɛ. 2:1-10) A mee zag-bɛda, n maan zardẽ-rãmb la park-rãmb sẽn yaa neeba, la a maan a sẽn dat fãa. La rẽ yĩnga, a paama sũ-noog woto fãa pʋgẽ bɩ? Yaa yẽ mengã n togs goam nins sẽn yaa rũndã daar vɛrse wã. Y sak n deegame t’a Salomo kibarã sɩd kõta tõnd yam bɩ? A Zeova pa rat tɩ y tudgi, tɩ rẽ sẽn wat ne bi-wẽns ninsã nams-yã, tɩ y yaool n dɩk yam ye. La yɩl n sak n kelgd a Zeova la y lʋɩɩsd a raabã taoore, yaa tɩlɛ tɩ y tall tẽeb ne-a. Tẽeb a woto yõod ka to ye. Y kõn tol n maan y bãngẽ y sẽn tall tẽeb ne a Zeova wã yĩng ye. A Zeova me kõn tol n yĩm ‘nonglem ning yãmb sẽn wilg a yʋʋrã yĩngã’ ye. (Ebre. 6:10) Rẽ wã, maan-y y sẽn tõe fãa n bɩɩs y tẽebã. Woto, y na n nee vẽeneg tɩ y saasẽ Ba wã sɩd rata y neere.—Yɩɩn. 32:8. w18.12 22 s. 14-15

Ned sẽn nong Wẽnnaam tara tẽeb ne-a sõma, la a modgd n na n bãng a tagsg bũmb fãa pʋgẽ, n tũ. A sakdame tɩ Wẽnnaam wilgd-a sor bũmb fãa pʋgẽ, n dat ne a sũur n tũ a raabã. (1 Kor. 2:12, 13) A Davɩɩd kõo mak-sõng rẽ wɛɛngẽ. Ad a sẽn yeele: “Sẽn-Ka-Saab yaa mam pʋɩɩre, la b yaa mam bũmb fãa. Yãmb n so mam beoog yelle.” (Yɩɩn. 16:5) A Davɩɩd sũur da yaa noog a sẽn paam t’a Zeova yaa a “pʋɩɩre,” rat n yeel t’a zoa wã. A Zeova ra yaa a zĩ-soalgdga. (Yɩɩn. 16:1) Rẽ n so t’a yeel tɩ yẽ ‘sɩɩgã kɩdemda ne sũ-noogo.’ Hakɩɩka, bũmb da kae n kõt-a sũ-noog n ta a sẽn paam n yaa a Zeova zoa wã ye! (Yɩɩn. 16:9, 11) Neb nins sẽn bas tɩ yaa ligdã la sũ-noogã baoob n pak-b n yɩɩdã pa tol n tõe n paam a Davɩɩd sũ-noogã buud ye. (1 Tɩm. 6:9, 10) Y sã n mao n paam tẽeb sẽn tar pãnga, la y sak n maand a Zeova raabã, y vɩɩmã na n talla barka, tɩ y paam sũ-noogo. Wãn to la y tõe n maan tɩ y tẽebã pãng paase? Bũmb a wãn la y tõe n maandẽ, tɩ yaa wa y sẽn be ne Wẽnnaam, tɩ rẽ na n paasd y tẽebã: Bao-y weer n karemd Biiblã, la y mi n get bũmb nins a Zeova sẽn naanã, la y bʋgsd a sẽn yaa Wẽnnaam ning buudã zugu, wala makre, a sẽn nong-y to-to wã.—Rom. 1:20. w18.12 25 s. a 7-8

Tʋm-tʋmd a Poll sẽn yeel woto wã, pa goam bal t’a gomd ye. Yaa sẽn na n sõng kiris-nebã tɩ b bãng tɩ b segd n nanda kãadem. Yãmb tagsg yaa woto ne kãadem buud fãa bɩ? Y sã n kẽe kãadem, y tagsg yaa woto ne yãmb mengã kãadmã bɩ? Y sã n nanda kãadmã, y rɩkda a Zeezi togs-n-taare. Sɩd me, a Zeezi ra waoogda kãadmã. Daar a ye, fariziẽ-rãmbã sok-a lame n na n bãng noor sã n beeme tɩ ned kao a kãadem. A lebg n tẽega Wẽnnaam sẽn lugl pipi kãadmã, n yeel yaa: “Yaa woto yĩng tɩ rao na n yii n bas a ba la a ma, n zĩnd ne a paga. La bãmb b yiibã fãa na n lebga yĩng a yembre. Dẽ, bɩ ninsaal da welg bũmb nins Wẽnnaam sẽn lagem ne taab ye.” (Mark 10:2-12; Sɩng. 2:24) A Zeezi gomdã wilgdame t’a sak n deegame tɩ kãadmã yaa Wẽnnaam n lugli, la tɩ rao ne pag sã n kẽ kãadem, yaa wakat fãa yĩnga. Wẽnnaam pa yeel a Ãdem ne a Awa tɩ b tõe n wa kao b kãadmã ye. Wẽnnaam da ratame tɩ “b yiibã” zĩnd ne taab wakat sẽn kõn sa. A lugla kãadem, n dat tɩ yɩ woto. w18.12 10-11 s. a 2-4

Tõnd sẽn wa n bãng a Zeova paalmã, d yãa Biiblã pʋgẽ tɩ segdame tɩ d tũud a noyã. La d sã n bãngd-a n paasdẽ, d wat n mi a tagsg bũmb wʋsg zugu, a sẽn kis la a sẽn nonge, la a manesem sẽn yaa to-to yɛl toɛy-toɛy pʋgẽ. Woto masã, d yam-yãkr la d sẽn maand fãa pʋgẽ, d sã n bao n bãng a Zeova tagsgo, n tũ rẽ, wilgdame tɩ d tagsa wã lebga yẽ rẽndã. D sẽn modgd tɩ d tagsa wã lebgd a Zeova rẽndã noom-d lame, la pa wakat fãa la yaa nana, bala d pa zems zãng ye. Wala makre, d mii a Zeova tagsg sẽn yaa a soab ne yoobã, arzɛgsã nonglmã, koe-noogã moonegã, zɩɩmã tall n tɩpã, la bũmb a taaba. La d tõeeme n pa wʋmd a sẽn tagsd woto wã võor sõma ye. Woto wã, bõe la d tõe n maan n wa tõog tɩ d tagsa wã zems ne a Zeova rẽndã? Wãn to la rẽ na n sõng-d tɩ d bãngd n yãkd yam bũmb fãa pʋgẽ masã menga, la baa beoog sẽn wate? Yaa d sẽn na n zãmsd Biiblã sõma, n mao n wʋm a goamã võore, n bʋgsd rẽ zugu, la d modg tɩ d tagsa wã zems ne Wẽnnaam tagsa wã sẽn be be wã, n palemd d yamã. w18.11 23-24 s. a 2-4

A Habakuk wakatẽ wã tɩ vɩɩmã ra pida ne zu-loeese. Nebã tʋʋm-yoodã la b wẽnemã ra sãamda a sũur wʋsgo. Zĩig fãa, a ra nee Israyɛll nebã sẽn maand taab pãnga, n wẽgd taaba. A ra sokda a meng yaa: ‘Woto fãa na n saa ra-bʋre? Bõe yĩng t’a Zeova ket n nan pa maan bũmbu?’ Ra yaa wa sẽn maand kae ye. Rẽ n so t’a pʋʋs a Zeova, n kos-a t’a kẽes a toogo. Tõe tɩ wakat kãng t’a Habakuk sɩngame n tagsdẽ t’a Zeova toog pa le be ne a nin-buiidã, la t’a pa rat n welg b yɛlã tao-tao ye. Yãmb me zoe n tagsa woto bɩ? A Habakuk sẽn da sokd a Zeova woto wã, rat n yeelame t’a pa le kɩs a Zeova sɩda, la t’a pa le tẽed a pʋlemsã bɩ? Ayo! Sɩd me, a sẽn dɩk yellã n togs a Zeova, la a kos-a sõngr n pa teeg ninsaalbã wilgdame t’a ra ket n tẽeda manegre, la t’a kɩsa sɩd t’a Zeova tõe n welga yellã. A sogsgã wilgdame bal t’a ra maanda yɩɩre, n pa mi a sẽn maand ye. A ra pa wʋmd Wẽnnaam sẽn nan pa kẽes a toogã võore, la bũmb ning sẽn kɩt t’a sak n bas yẽ t’a namsd woto fãa wã ye. w18.11 14 s. a 4-5

A Zeezi sẽn na n bool a Pɩyɛɛr ne a Ãndere tɩ b lebg a karen-biisã, rẽ tɩ b ra yaa zĩm-yõgdba, la b sak n “basa zĩm-gãmba wã” n tũ a Zeezi. (Mat. 4:18-20) La yaa vẽeneg tɩ pa rat n yeel tɩ ned sã n bãng sɩdã, a tog n basa a tʋʋmd ye. Yaa tɩlɛ t’a tʋm n ges a meng la a zak rãmb yelle. (1 Tɩm. 5:8) La naoor wʋsgo, ned sã n bãng sɩdã, a tagsg sẽn da yaa a soab ligdã la teedã wɛɛngẽ wã toeemdame. A bãngda bũmb nins sẽn tar yõod n yɩɩd vɩɩmã pʋgẽ wã. Yaa woto la pag yʋʋr sẽn boond t’a Mariya maan-yã. A ra rata ne a sũur fãa tɩ golfã tãoob lebg a tʋʋmde, t’a paam n wʋk ligdi. Yaa wakat kãng la a Mariya sɩng Biiblã zãmsgo. A ra nonga bũmb nins a sẽn bãngd Biiblã zãmsg pʋgẽ wã wʋsgo, hal n sɩng tũubu, t’a sũur noom ne rẽ sẽn toeemd a vɩɩmã. A wa n bãngame tɩ na n yɩɩ toog t’a kell n wɩng ne golfã tãoobo, la a ket n tar zood sõma ne a Zeova. (Mat. 6:24) A sakame n na n bas golfã a sẽn da nong ne a sũur fãa wã. Rũndã-rũndã, a Mariya yaa so-pakda. A yetame meng tɩ woto wã la a tar “sũ-noog n yɩɩda, la tɩ vɩɩm kae n tar bark n le yɩɩd wã ye.” w18.11 5 s. a 9-10

A Zeezi sẽn wa n tar yʋʋm 30, a basa a nug-tʋʋmdã n lebg Wẽnnaam Gomdã karen-saamba, bala a ra miime tɩ rẽ n tar yõod n yɩɩda. A yeelame tɩ yaa Rĩungã koe-noogã mooneg yĩng la Wẽnnaam sẽn tʋm yẽ tẽng zugã. (Mat. 20:28; Luk 3:23; 4:43) Yaa koe-noogã mooneg n da pak a Zeezi n tɩ yɩɩda. A ra ratame tɩ neb a taabã me maan wa yẽ. (Mat. 9:35-38) Yaa sɩd tɩ tõnd fãa la bal pa ra-wãadba, la d fãa yaa Wẽnnaam Gomdã karen-saam-dãmba. D moonda koe-noogã, n zãmsd nebã Biiblã. Yaa tʋʋmd sẽn tar yõod wʋsgo, hal meng tɩ Wẽnnaam naagd tõnd n tʋmdẽ. Sɩd me, Biiblã yeelame tɩ “tõnd yaa tʋmd-n-taas ne Wẽnnaam.” (1 Kor. 3:9; 2 Kor. 6:4) Tõnd kɩsa sɩd t’a Zeova “goamã fãa yaa sɩda.” (Yɩɩn. 119:159, 160) Kɩtame tɩ d ned kam fãa maand a sẽn tõe fãa, n dat n yɩ “ned sẽn togsd sɩd koɛɛgã ne tɩrlem.” (2 Tɩm. 2:15) Rẽ n so tɩ d maood n paamd minim n paasdẽ, Biiblã tall n moonã wɛɛngẽ. Bala, Biiblã n yaa tʋʋm-teoog ning d sẽn tʋmd ne n yɩɩda, n na n sõng nebã tɩ b bãng sɩdã a Zeova ne a Zeezi la Rĩungã zugu. w18.10 11 s. a 1-2

Rao sã n dɩkd Kirist sẽn yaa a Zu-soabã togs-n-taare, na n yɩɩ nana ne a pagã t’a “waoog a sɩdã.” (Efɛ. 5:22-25, 33) Rẽ na n kɩtame tɩ pagã yɩ wʋmda, n tall sũ-mar ne-a. Roagdbã sã n nand taaba, n maand taab neere, b kõta b kambã mak-sõngo. Sẽn yɩɩd fãa, yaa bãmb n segd n zãms b kambã, n sõng-b tɩ b bãng b sẽn tõe n wilg to-to tɩ b nanda b taabã. Wala makre, roagdbã segd n sõnga b kambã tɩ b bãng tɩ b pa tog n zoe Rĩungã roogẽ ye. Y sã n wa tigim ne y tẽed-n-taas n na n kok pemsem, tɩ rɩɩbã wakat wa ta, wilg-y y kambã tɩ b segd n basame tɩ kãsembã reng n yãke. Biig sã n maan bũmb n sõng-do, wala makre, a sã n pak roog tɩ d kẽ, yɩta sõma tɩ d pẽg-a. Woto tõe n yɩɩ biigã noog wʋsgo, hal tɩ sõng-a t’a bãng tɩ kũun wata ne sũ-noog n yɩɩd reegre. w18.09 29 s. a 5-6

Rĩm a Zeezi Kirist sẽn yaa d taoor soabã sẽn tũnugd ne tʋm-tʋmdã n wilgd-d sorã yaa sẽn na n sõng-d masã menga, la beoog daare. Bɩ d bʋgs n ges toeeng buud fãa b sẽn maan yʋʋmã noorã sẽn naf tõnd to-to wã, n kɩdem sũ-noogo. Zak pʋgẽ Biibl zãmsgã sasa, y tõe n sõsa ne taab n ges bũmb nins b sẽn toeem tigissã la koe-moonegã wɛɛngẽ wã sẽn naf y fãa to-to. Siglgã sã n toeem bũmbu, tɩ d bao n wʋm toeengã võore, la a sẽn na n naf-d to-to wã, na n kɩtame tɩ d sak toeengã ne yamleoogo. Wala makre, d sẽn boog sɛbã d sẽn ẽnpirimdã, n tʋmd ne portaabl-dãmb la taablɛt-rãmb ne bũmb a taabã kɩtame tɩ d paamd n kẽgsd ligdi, tɩ rẽ sõngdẽ tɩ Rĩungã koe-noogã tat dũniyã zĩig fãa masã. D sẽn ne rẽ wã noom-d-la wʋsgo. Woto wã, d telesarzd sɛbã, video-rãmbã la bũmb a taabã siglgã sẽn yiisdã. Rẽ, d yaa yam a ye ne Kiristã, bala a pa rat tɩ d sãamd siglgã laogã ye. D sã n tũud bũmb nins Kiristã sẽn wilgdã, paasda d tẽed-n-taasã tẽebã pãnga, la sõngdẽ tɩ d fãa yaa yam a yembre. w18.10 25-26 s. 17-19

Tõnd sã n dɩk Wẽnnaam togs-n-taar n pid ne sũ-bʋgsem, tõe n sõngame tɩ d tẽed-n-taag ning paam belsg a sẽn pʋʋsd n kotẽ. (2 Kor. 1:3-6) La ra n bao-y tɩ y tẽed-n-taasã sẽn maandã zems zãng ye. Y sã n baoodẽ tɩ b sẽn maand fãa zems zãnga, y baooda sẽn pa tõe. Rẽ me, wata ne sũ-sãams bala. (Koɛ. 7:21, 22) D tẽeg t’a Zeova zɩ n kos tõnd tɩ d maan bũmb d sẽn pa tõe ye. D sã n dɩk a togs-n-taare, na n sõng-d lame tɩ baa ne d taabã pãn-komsem, bɩ d tõog n maand sũ-mar ne-ba. (Efɛ. 4:2, 32) D pa segd n tall manesem sẽn na n kɩt tɩ b tags tɩ b sẽn maand a Zeova tũudmã pʋgẽ wã pa sek ye. D pʋd n pẽg-b b sẽn zoe n maandẽ wã yĩnga. Woto tõe n paasa b raoodo. D sã n pẽgd d taabã ne pʋ-peelem, na n kengda b raoodo, tɩ b neẽ tɩ d nong-b lame, la sõng-b me tɩ b “maan sũ-noog” ne b sẽn tõogd n maand Wẽnnaam tʋʋmdã pʋgẽ wã. Rẽ pa são d sẽn na n makd-b ne neb a taaba, tɩ sãamd b sũurã sɩda?—Gal. 6:4. w18.09 16 s. 16-17

A Zeezi ra getame tɩ Wẽnnaam raabã maaneg yaa wa rɩɩbo. Bõe yĩnga? Ned sã n dɩt rɩ-sõma, a sũur noomame, la leb n paasda a yĩnsã keelem. Woto me, d sã n maand Wẽnnaam daabã, kengda d pɛlga, la rɩlgd d tẽebã t’a paamd pãnga. D sã n sik d meng n maand a Zeova sẽn datã, rẽ wilgdame tɩ d tara yam. (Zak 3:13) Sẽn maand-a woto paamda bark ka tɛka. Ad Biiblã sẽn yete: “Bark bee ned ning sẽn tar-a yamã zugu. . . . Yam tara yõod n yɩɩd kĩndi halaale. La bõn-neebã fãa ka tõe n dɩk n mak ne-a ye. . . . Yam yaa vɩɩm tɩɩg ned ning sẽn tar-a wã yĩnga, la ned sã n tar yam, a tara sũ-noogo.” (Yel. 3:13-18) A Zeezi ra yeela a karen-biisã yaa: “Yãmb sã n mi rẽnda, yãmb yaa sũ-noog rãmba, yãmb sã n maand a woto.” (Zã 13:17) Dẽnd yaa a karen-biisã sã n sak n tũud bũmb nins a sẽn zãms-bã la b na n paam sũ-noog wakat fãa. Pa wakat ning a Zeezi sẽn gom ne-bã bal la b ra segd n tũ bũmb nins a sẽn zãms-bã ye. Segd n yɩɩ wakat fãa, la bũmb fãa pʋgẽ. w18.09 4 s. a 4-5

Baa a Ãdem ne a Awa sẽn da yaa b yiib bal Edɛn zẽedã zĩigẽ wã, Wẽnnaam kõ-b-la noy sẽn da segd n kɩt tɩ b tags b taabã neer yelle. Sɩd me, a Zeova ning-b-la barka, n yeel-b tɩ b rog kamb n fɩɩg n pid dũniyã la b soog-a. (Sɩng. 1:28) A Ãdem ne a Awa me ra segd n baoo b kambã b sẽn na n dogã neere, wa a Zeova sẽn dat t’a bõn-naandsã paam sũ-noogã. Bãmb ne b kambã la b yagensã ra na n naaga taab n tʋm tɩ tẽngã gill lebg arzãna. Ad yaa tʋʋm-kẽeng tɛkẽ! A Ãdem ne a Awa sã n da pa kɩɩs a Zeova, tẽngã ra na n pida ne neb sẽn zems zãnga. Nin-bãmba ra na n naaga a Zeova n tʋm tɩ tẽngã lebg arzãna, t’a raabã pidsi. Woto la b ra na n kẽ a vʋʋsgã pʋgẽ. (Ebre. 4:11) Tags-y n ges-y tʋʋm-kãngã sẽn da na n tall bark la yamleoog to-to! Ned fãa sẽn da na n tʋm a taabã neer yĩngã ra na n kɩtame tɩ b fãa paam bark la sũ-noog wʋsgo. w18.08 18 s. a 2; 20 s. a8-9

Ned sã n yelgd yɛl yãmb zug n na n sãam y yʋʋre, y maanda wãna? A buud paama a Zeezi ne a Zãmbatiis me. (Mat. 11:18, 19) A Zeezi maana wãna? A pa bao n na n gilg n wilg nebã tɩ yaa rõdga, n sãam a sẽk la a bao yaams ye. A pʋd n wilga nebã tɩ b ges yẽ tʋʋm-tʋmdɩ wã la bũmb nins yẽ sẽn zãmsd nebã. A yeelame tɩ “yam tʋʋm-sõama n wilgd yam sẽn yaa a soaba.” D tõe n dɩka yam a Zeezi mak-sõngã pʋgẽ. Wakat ninga, neb tõe n wɩda tõndo, wall b togs yɛl sẽn pa sɩd tõnd zugu, n sãam d yʋʋre. D tõe n data ne d sũur fãa tɩ sɩdã puki, n baood d sẽn na n maanega, n wilg tɩ b sẽn yeelã pa sɩd ye. Bũmb n be d sẽn tõe n maan bɩ? N-ye! Ned sã n dõd tõndo, d tõe n basame tɩ d tʋʋm-tʋmdɩ wã la d manesmã wilg tɩ yaa ziri. B sẽn dõd a Zeezi t’a tall manesem ningã wilgdame tɩ b sã n togsd yɛl sẽn pa sɩd zãng tõnd zugu, d tʋʋm-tʋmdɩ wã na n wa kɩtame tɩ nebã bãng tɩ pa sɩd ye. w18.08 6 s. 11-13

A Kayẽ ne a Salomo la Israyɛll nebã sẽn kɩɩsã ra tõe n teka yam n kos sugri, la b toeeme. (Tʋʋ. 3:19) Ned sẽn tũud a Zeova sã n tudgi, a Zeova pa yɩt tao-tao n bas-a ye. D tags a sẽn kõ a Aarõ sugrã yelle. Rũndã-rũndã me, a Zeova keoogda tõnd ne nonglem, n na n sõng tõnd tɩ d ra wa maan sẽn yaa wẽng ye. A tũnugda ne Biiblã, siglgã sɛbã, la baa d tẽed-n-taasã menga. A Zeova sã n keoog-d woto tɩ d sak n kelge, d tõe n kɩsa sɩd t’a na n zoee d nimbãaneg n kõ-d sugri. Wẽnnaam a Zeova sẽn wilgd tõnd a nimbãan-zoeerã bɩ a bark sẽn ka to wã pa zaalem ye. (2 Kor. 6:1) Kõta tõnd weer tɩ d paam n “bas wẽn-kɩɩsgo la dũniyã ratem wẽnsã.” (Tɩt 2:11-14) D sẽn be dũni-kãngã pʋgẽ wã, d miime tɩ yɛl kẽer pʋgẽ, na n yɩɩ tɩlɛ tɩ d wilg d sã n sɩd bee a Zeova poorẽ. Bɩ d mao wakat fãa, n kell n zĩnd a Zeova poorẽ. w18.07 21 s. 20-21

Bõe n na n kɩt tɩ d maneg n dat ne d sũur fãa t’a Zeova pẽg-do, la d ra bao dũniyã neb pẽgrã? Bũmb a yiib la d segd n tẽegd wakat fãa. Pipi, a Zeova kõn tol n yĩm ned sẽn tũud-a ne a sũur fãa ye. (Ebre. 6:10; 11:6) A Zeova nonga sẽn tũud-b yẽ wã ned kam fãa wʋsgo. A getame meng t’a sã n yĩm ned sẽn tũud yẽ yelle, yaa kɛgre. A “mii nin-tɩrsã sore,” la a mi a sẽn na n maan to-to n fãag-ba. (Yɩɩn. 1:6; 2 Pɩy. 2:9) Bũmb a yiib-n-soab d sẽn tog n tẽege, yaa t’a Zeova tõe n maana bũmb d sẽn da pa tẽede, n keo-do, a sẽn mi tõndã yĩnga. Ned sã n maand sẽn yaa neere, a sẽn dat tɩ nebã pẽg-a yĩng bala, a Zeova pa na n keo-a ye. Bõe yĩnga? Bala, a Zeezi yeelame t’a zoe n paama a keoore. (Mat. 6:1-5) La a Zeezi yeelame tɩ ned sã n soos n maan a to neer tɩ nebã pa bãnge, a Ba wã na n yãame, n keo-a. Wẽnnaam nee tʋʋm-sõma a woto buudã ned kam fãa sẽn maandã, n na n keo-a. w18.07 9 s. a 8, 10

A Pɩyɛɛr ra sokda a meng bõn-makrã võore. Wakat kãng la neb yi a Korney nengẽ n nan tata. Vʋʋsem sõngã yeela a Pɩyɛɛr t’a yi n tũ-b n kẽng a Korney zakẽ wã, t’a sɩd sak n tũ-b n kẽnge. A Pɩyɛɛr sã n da gesẽ-la a Korney sẽn yaa buud ningã bala, a ra kõn sak n kẽng a zakẽ wã ye. Zʋɩf-rãmbã ra pa sakd n kẽ bu-zẽng zakẽ ye. Bõe yĩng t’a sak n kẽnge? Baa a sẽn da tar tags-kɛg bu-zẽmsã zugã, bõn-makrã a sẽn yã wã, la vʋʋsem sõngã sẽn yeel-a bũmb ningã kɩtame t’a toeem yam. A sẽn kelg a Korney wã poore, a yeelame: “Moasã, mam sɩd bãngame tɩ Wẽnnaam ka tũusd neb ye. Ned ning fãa, sẽn yaa buud ning fãa sẽn zoet Wẽnnaam la a maand tɩrlem, yẽnda soab tata bãmb yam.” (Tʋʋ. 10:34, 35) Ad a Pɩyɛɛr sẽn bãng woto wã sɩd yɩ-a-la noogo! A sẽn bãng bũmb ningã na n sõnga kiris-nebã fãa me. w18.08 9 s. a 3-4

Yaa sɩd tɩ d zãagda d mens ne bũmb nins Wẽnnaam sẽn kisã. La d bãng tɩ yɛl kẽer wɛɛngẽ, Wẽnnaam pa kõ noy takɩ ye. Woto wã, d maanda wãn n bãng a sẽn date? D sũur-kasetã tõe n sõng-d lame tɩ d bãng n maan sẽn segde, sã n mik tɩ d kibind-a-la sõma ne Biiblã maasem. A Zeova sẽn nong tõndã, sagls me la a kõ Biiblã pʋgẽ, tɩ tõe n sõng-d tɩ d kibl d sũur-kasetã. Ad a Zeova mengã sẽn yeele: “Maam . . . n yaa fo Wẽnnaam, mam na n zãmsa foom f meng sõngr yĩnga, maam n tɛt foom sor ning fo sẽn be wã zugu.” (Eza. 48:17, 18) D sã n maagd d yĩng n bʋgsd Biiblã saglsã zug tɩ kẽed tõndo, d tõogd n kibla d sũur-kasetã sõma. Woto la d na n tõog tɩ d yam-yãkr fãa yɩ sõma. Saglg tõe n sõnga ned t’a bãng n yãk yam-sõngo. D sã n wʋmd Biiblã saglsã võor sõma, na n sõng-d lame tɩ d bãng a Zeova raab bũmb fãa pʋgẽ, la d bãng sẽn yaa bũmb ning yĩng la a sẽn kõ-d noy kẽerã. w18.06 17 s. a 5; 18 s. a8-10

A Erood poorẽ dãmbã politik sullã ra saagdame t’a Zeezi na n yeelame tɩ pa segd tɩ b yao ye. Rẽ, b paamd n dõd-a lame t’a yaa Rom naamã bɛ. La a Zeezi sã n yeel me tɩ segdame tɩ b yao, nebã pa na n le tũ-a ye. A Zeezi kell n pa kẽ lampo wã yaoob no-koɛɛmã ye. A ra miime tɩ yaood rɛɛgdb wʋsg zãmbda nebã, la pa rẽ n da pak-a ye. Sẽn da pak-a yaa Wẽnnaam Rĩungã yelle, bala, rẽ la ãdem-biisã zu-loeesã tɩɩm. Yaa mak-sõng d fãa sẽn segd n tũ. Tõnd me pa segd n kẽ politikã rãmb no-koɛɛmã, baa sã n wõnd sull a ye n tar bʋʋm. Yaa Wẽnnaam Rĩungã ne a tɩrlmã la kiris-nebã baooda. Rẽ n so tɩ d pa wɩt politikã rãmba, bɩ n baood n na n puk b yel-kɛgã ye. (Mat. 6:33) Wʋsg ra kẽeda politikã no-koɛɛmã nand tɩ b bãng a Zeova, la b tõog n basame. w18.06 6 s. a 9-11

Tõe t’a Sʋɩtãan sẽn bẽd malɛgs kẽerã pa yɩ b sẽn na n paam n kẽ ne ninsaalbã kom-pugli wã bal ye. Wõnda a Sʋɩtãan togs-b lame me t’a na n kõ-b-la naam, tɩ b soog ãdem-biisã. A Sʋɩtãan tog n da maanda a sẽn tõe fãa sẽn na yɩl t’a Zeova sẽn pʋlem tɩ “pagã yageng” n watã ra pids ye. (Sɩng. 3:15) Sẽn yaa a soab fãa, a Zeova pa sak t’a Sʋɩtãan raabã tõog ye. A kɩtame tɩ sa-kãsengã ni, t’a Sʋɩtãan ne a zĩn-dãmbã magbã fãa vaale. Dẽnd yoobã la zẽk-m-mengã yaa bẽds meng-menga. Yaa yʋʋm kõn bãng n sõd la malɛgs nins sẽn lebg a Sʋɩtãan poorẽ dãmbã zĩnd saasẽ ne Wẽnnaam. Baa ne rẽ, b basame tɩ tʋls-wẽns kẽ b yamẽ, hal n wa paam pãnga. Sõngda tõnd tɩ d bãng tɩ baa tõnd tũ a Zeova n kaoos to-to, d sã n pa gũusi, tʋl-wẽns tõe n wa kẽe d sũurẽ wã. (1 Kor. 10:12) Rẽ n so tɩ wakat fãa bɩ ned kam fãa segd n bao n bãng sẽn be a sũurẽ wã, tɩ yoob tʋlsem bɩ wuk-m-meng sã n wa sɩngdẽ bɩ a yiis rẽ tao-tao tɩ ra paam pãng ye.—Gal. 5:26; Kol. 3:5. w18.05 25 s. 11-12

Zʋɩf-rãmbã sẽn tõdg tɩ b kõn kelg Rĩungã koɛɛgã, sãama a Poll sũuri. La ne rẽ fãa, a pa koms raoodo, n bas n pa le taasd-b koɛɛgã ye. Lɛtr ning a sẽn wa n gʋls n tool Rom kiris-nebã pʋgẽ, a yeelame yaa: “Mam sũurã raabo, la mam bõosg ne Wẽnnaam b yĩng yaa tɩ b paam fãagre. Bala, mam kɩta bãmb kaset n yetẽ tɩ b tara ratem wʋsg Wẽnnaam yĩnga, la b ka tar bãngr ye.” (Rom. 10:1, 2) A Poll wilga bũmb ning sẽn kɩt t’a kell n wɩng ne koɛɛgã moonegã. A yeelame tɩ yaa yẽ ‘sũurã raab’ yĩnga. A ra rata ne a sũur fãa tɩ zʋɩf-rãmbã paam fãagre. (Rom. 11:13, 14) A ra yõkda a Zeova sɛɛga, n dat t’a sõng b ned kam fãa t’a sak Rĩungã koɛɛgã. A Poll yeelame: “B tara ratem wʋsg Wẽnnaam yĩnga.” A ra geta sẽn yaa sõma nebã nengẽ wã, la a kɩs sɩd me tɩ b tõe n wa sak n sɩnga a Zeova tũubu. A ra miime tɩ baa ned sã n tar yẽesem ne bũmb sẽn pa zemse, a tõe n wa lebga Kiristã karen-biiga, n tũud Wẽnnaam ne yẽesem. w18.05 13 s. a 4; 15-16 s. 13-14

D ned kam fãa segd n mi n tags n gesa d taabã sẽn dat sõngr ninga, la d sẽn tõe n maan n sõng-bã. No-rɛɛs a Ezayi ra yeela Israyɛll nebã yaa: “Keng-y nus nins sẽn ka tar pãngã, la paas-y rũm nins sẽn keoosdã pãnga.” (Ebre. 12:12, 13) D yaa kãsem tɩ d yaa biiga, d fãa tõe n kenga d tẽed-n-taasã raood ne d no-goamã. A Poll ra yeela Filip kiris-nebã yaa: “Sã n yaa tɩ tũ Kiris wata ne belsgo, sã n yaa tɩ Kiris nonglem yãmb yĩngã paasda yãmb raoodo, sã n yaa tɩ yãmb tara lagem-n-taar ne Sɩɩg-sõngo, la sã n yaa tɩ yãb-taab ne nimbãan-zoeer beeme, bɩ y paam nonglem a yembre, la yam a yembre, la datem a yembre, tɩ mam sũurã yɩ noog zãnga. Da maan-y bũmb baa fɩ ne geesem-geesem wall ne wuk-m-meng ye, la bɩ ned kam fãa paam sik-m-meng yam n tags tɩ neb a taaba yɩɩda yẽnda. Bɩ yãmb ned kam fãa ra ges a meng sõngr yell bal ye, la bɩ a ges neb a taaba sõngr yell me.”—Fili. 2:1-4. w18.04 22 s. 10; 23 s.12

Dẽnd a Zeova sẽn sõng tõnd ne a Zeezi maasem tɩ d paam d mens ne yel-wẽnã la kũumã yembdã, yaa sẽn na yɩl tɩ d rɩk d mensã n kõ yẽ, n maan a raabã d vɩɩmã tõre. D sã n kẽesd d mengã wʋsg a Zeova tũudmã tʋʋm pʋgẽ, rẽ na n sõng-d lame n tɩ yɩɩd tɩ d ra wa lʋɩɩs d lohormã taoor n pids d mengã tʋlsem, wall n bao bũmb nins dũniyã nebã sẽn baoodã ye. (Gal. 5:16) D tẽeg a Nowe ne a zakã rãmb yelle. B wakatẽ wã tɩ dũniyã ra pida ne yoob la nen-kɛglem, la b pa naag n maan wa nebã ye. Bõe n sõng-ba? Yaa b sẽn yãk yam n wɩng ne tʋʋm nins a Zeova sẽn kõ-bã. B kaa koom-koglgã, n bao rɩɩb n bĩng b mensã yĩnga, la rũmsã me yĩnga, la b moon n keoog nebã. Ad Biiblã sẽn yeele: “A Nowe maana bũmbã fãa wa sẽn zems Wẽnnaam sẽn dag n yeel yẽnda wã kɛpɩ.” (Sɩng. 6:22) Kɩtame tɩ yẽ ne a zakã rãmb paam n põs b wakatẽ dũniyã sãoongo.—Ebre. 11:7. w18.04 10 s. a 8; 11 s. 11-12

A Sʋɩtãan ne zĩn-dãmbã tũnugda ne tũudum nins sẽn pa sɩdã, la ligdã baoob siglsã n belgd ‘tẽngã zĩig fãa’ nebã. (Vẽn. 12:9) Ne tũudum-yoodã maasem, a Sʋɩtãan yelgda ziri buud toor-toor a Zeova zugu. A pʋd n maanda a sẽn tõe fãa n dat tɩ nebã ra bãng Wẽnnaam yʋʋrã la b pʋt-a ye. (Zer. 23:26, 27) Woto fãa kɩtame tɩ neb wʋsg sẽn yaa pʋ-peelem dãmb maand zĩn-dãmbã raabo, n tagsdẽ tɩ yaa Wẽnnaam la b tũuda. (1 Kor. 10:20; 2 Kor. 11:13-15) Ne ligdã baoob siglsã maasem me, a Sʋɩtãan kɩtame tɩ nebã tẽed bũmb kẽer sẽn pa sɩda. Wala makre, b kɩtame tɩ nebã tẽed tɩ yaa ligdã la teedã n kõt sũ-noogo. (Yel. 18:11) Sẽn tẽed-b woto wã basa Wẽnnaam baoobo, tɩ lebg ligdã baoob n pak-b n yɩɩd b vɩɩmã pʋgẽ. (Mat. 6:24) Baa b sã n da nonga Wẽnnaam, ligdã la teedã nonglem wat n paama pãnga, hal tɩ b pa le nong Wẽnnaam ye.—Mat. 13:22; 1 Zã 2:15, 16. w18.05 23 s. a 6-7