Zĩ-likri

Tõnd pa tõe n bãng sẽn be ned sũurẽ wa a Zeova ne a Zeezi ye. Baasgo, d tõe n bao n bãnga d taabã zu-loees sẽn namsd-b to-to wã, la b sẽn dat sõngr ninga. (2 Kor. 11:29) Tõnd pa wa dũniyã neb sẽn baood b mens nafr balã ye. D maooda wa d sẽn tõe fãa, n get “neb a taaba sõngr yell me,” n pa get d “meng sõngr yell bal ye.” (Fili. 2:4) Tigimsã kãsem-dãmbã n segd n kʋmd b taabã n tɩ yɩɩda. B miime t’a Zeova na n bʋʋ ne-ba, b sẽn get a piisã yell to-to wã wɛɛngẽ. (Ebre. 13:17) Sẽn na yɩl n tõog n sõng b tẽed-n-taasã, yaa tɩlɛ tɩ kãsem-dãmbã yɩ wʋmdba. Wãn to la b tõe n wilg tɩ b kʋmda b taabã? Kãsem-soab sẽn kʋmd a tẽed-n-taasã nong n sõsda ne-ba. A mi n sokd-b-la sogsgo, la a maagd a yĩng n kelgd-b neere. Woto tara yõod wʋsgo, sẽn yɩɩd fãa, b tẽed-n-taag sã n wa tar a sũur yell n dat n togs-ba, n yaool n pa mi a sẽn na n bãng n togs to-to. (Yel. 20:5) Kãsem-soab sã n yãt sẽk n sõsd ne a tẽed-n-taasã la a sõngd-ba, wat n kɩtame tɩ bas-m-yam ne zood la nonglem ning sẽn be b sʋkã paam pãnga.—Tʋʋ. 20:37. w19.03 17 s. 14-17

Tõnd mengã sã n neẽ tɩ d taabã sũur nooma ne bũmb d sẽn maande, kõta tõnd sũ-noogo. Tõnd me sã n wilg d to tɩ d sũur nooma ne bũmb a sẽn maane, kõta yẽ me sũ-noogo. Ned sã n maan bũmb n kõ-do, tɩ d wilg tɩ d sũur noomame, a neeme tɩ modgr ning a sẽn maanã pa yɩ zaalem ye. Woto kɩtdame tɩ d yiibã zems-n-taarã paase. D taabã sã n maan-d neer tɩ d wilg d sũ-noogo, a yõodã yaa wa rũndã daar vɛrse wã sẽn yetã. Mams-y wa b sẽn na n dɩk sãnem n dõog tɩ wõnd tɩɩg biisi, n dɩk n naag wanzuri n yõge. Tags-y n ges-y a neermã, la a ligdã toolem! B sã n dɩk n kõ yãmba, y sũur kõ yɩ noog wʋsg sɩda? Y sã n wilg ned tɩ bũmb a sẽn maan yɩ-y-la noogo, a yõodã taa woto. Sẽn paase, tẽeg-y tɩ sãnem tɩ-biis tõe n kaoosa yʋʋm ka tɛka. Woto me, ned sã n maan neer tɩ y pẽge, tõe t’a vɩɩmã tõre, a na n ket n tẽegdame. w19.02 15 s. a 5-6

A Ãdem ne a Awa sẽn dɩ sõma la wẽng bãngr tɩɩgã bilã, wilga vẽeneg tɩ b pa kɩs a Zeova ne a noyã sɩd ye. B yãka yam n na n bakd sẽn yaa sõmã bɩ wẽngã b toore. La ges b sẽn bõn bũmb ninsã. B sãama bãmb ne a Zeova zoodã. B bõna vɩɩm sẽn kõn sa wã me. B kɩtame tɩ b kambã la b yagensã lebg yel-wẽn-maandb la kiidba. (Rom. 5:12) A Ãdem ne a Awa yam-yãkrã waa ne namsg wʋsgo. Etiopi ligd-gũudã a Filip sẽn taas koɛɛgã manesem yɩɩ toor fasɩ ne a Ãdem la a Awa. A sũur yɩɩ noog wʋsg ne bũmb nins a Zeova ne a Zeezi sẽn maan n kõ-a wã, hal t’a reeg lisg zĩig pʋgẽ. (Tʋʋ. 8:34-38) Wa ligd-gũudã, d sã n dɩk d meng n kõ a Zeova n deeg lisgu, wilgda vẽeneg tɩ d sũur nooma ne bũmb nins yẽ ne a Zeezi sẽn maan n kõ-dã. Wilgdame me tɩ d kɩsa a Zeova sɩda, la tɩ d sakame tɩ yẽ bal n tar sor n na n lugl noy n wilg sẽn yaa sõma la wẽngã n bake. w19.03 2 s. a 1-2

Bi-pugl a ye sẽn yaa lekoll karen-biig yeela a karen-saamb ne waoogr t’a pa na n naag n maan tigr sẽn pa tat Wẽnnaam yam ye. Bi-bɩɩg sẽn yaa yãn-zoɛt n da moond koɛɛgã zak-zaka, n wa wẽ a karen-bi-taag kʋɩlenga. A karen-bi-taagã ra zoe n gom n paooga a Zeova Kaset rãmbã. Rao n tʋmd wʋsg sẽn na yɩl n ges a zakã rãmb yelle, t’a patrõ wã yeel-a t’a maan bũmb sẽn kɩɩsd laloa wã. Baa ne a sẽn mi t’a sã n zãgse, a tʋʋmdã tõe n sãamame wã, a wilga a patrõ wã tɩ yẽ segd n maana pʋ-peelem, n tũ laloa wã, bala Wẽnnaam datame tɩ sẽn tũud-b yẽ wã maan woto. (Rom. 13:1-4; Ebre. 13:18) Sã n yaa ne yãmba, neb a tãabã manesmã wilgdame tɩ b tara zʋg-sõng bʋgo? Tõe tɩ y getame tɩ b tara raood ne pʋ-peelem la zʋg-sõma a taaba. La sẽn yɩɩd fãa, b manesmã wilgdame tɩ b yaa burkĩmba. B fãa maana sɩd ne a Zeova. B baa a ye pa sak n kɩɩs a Zeova noyã ye. Yaa b burkĩndã yĩng la b sẽn maan woto wã. Yaa vẽeneg t’a Zeova sũur yɩɩ noog ne-b rẽ yĩnga. Tõnd me ratame tɩ d saasẽ Ba wã sũur yɩɩ noog ne-do. w19.02 2 s. a 1-2

Sẽn na yɩl n gũus ne d sũurã, pa segd bal tɩ d modg tɩ tags-wẽns wall tʋls-wẽns ra kẽ d sũurẽ wã ye. Segdame me tɩ d bas tɩ bũmb nins sẽn na n sõng-d tɩ d tagsa wã la d tʋlsmã yɩ sõma wã kẽ d sũurẽ wã. Pĩnd wẽndẽ wã, b ra pagda tẽngã kʋɩlens sẽn na yɩl tɩ bɛɛbã ra kẽ ye. La b mi n pakame sẽn na yɩl tɩ rɩɩb la bũmb a taab kẽ tẽngã. Kʋɩlensã sã n pag wakat fãa, n pa tol n pakdẽ, tẽngã nebã na n kii kom. Woto me, d segd n sakda wakat fãa n kelgd Wẽnnaam goamã, tɩ kẽ d sũurã, tɩ d tagsa wã paam n zems ne a raabã. Ne Biiblã maasem, d bãngda a Zeova tagsg bũmb toor-toor zugu. Dẽnd d sã n karemd Biiblã, d basdame t’a Zeova sẽn yetã kẽ d sũurã, tɩ sõngd tõnd tɩ d tagsa wã ne d tʋlsmã la d tʋʋm-tʋmdɩ wã zemsd ne a raabã. Bõe la d tõe n maan tɩ Biiblã karengã sɩd naf-do? Pʋʋsgã yaa tɩlɛ. Sõngdame tɩ d “yã bõn-sõma wã sẽn be a Gomdã pʋgẽ wã.” (Yɩɩn. 119:18) Yaa tɩlɛ me tɩ d bʋgs d sẽn karmã zugu. D sã n pʋʋse, n karem la d bʋgse, Wẽnnaam goamã na n kẽe d “sũurã pʋgẽ” sõma, hal tɩ d wa nong a Zeova sẽn yetã fãa.—Yel. 4:20-22. w19.01 18 s. 14-15

A Zeova miime tɩ d sẽn tar tõod ninsã la d yɛlã pa yembr ye. A sũur nooma wʋsg ne maand nins ned kam fãa sẽn tõe n kõ-a wã. Tags-y Israyɛll nebã sẽn da kõt-a maand ninsã yelle. B kẽer ra tara tõogo, n kõt-a piis bɩ bʋʋse. La sẽn da yaa-b naong rãmbã ra tõe n kõo ‘wal a yiibu, wall manwan-bi a yiibu.’ Ned ning sẽn da pa tõe n paam rẽ, a Zeova ra kõo sor t’a tõe n kõ “zom-bãaneg sẽn zems wamd a yembre.” (Maan. 5:7, 11) Baa ne zomã ligd sẽn da pa waoogã, sã n mik tɩ yaa ‘zom-bãanega,’ rat n yeel tɩ sẽn yaa sõma wʋsgo, tata a Zeova yam. Rũndã-rũndã me, yaa woto. Ned fãa tõe n zẽka a nug n gom tigissã sasa. A Zeova pa baood tɩ d fãa goamã yɩ wa a Apolos sẽn da yaa gom-minim soabã, pa rẽ bɩ wa a Poll sẽn da tõe n bilg yɛlã võor nana-nana wã ye. (Tʋʋ. 18:24; 19:8) A sẽn dat yaa ned kam fãa maan a sẽn tõe, n zems a minim la a tõogo. Tẽeg-y pʋg-kõorã sẽn ning ligd-bõones a yiib kũunã koglg pʋgẽ wã. A Zeova sũur yɩɩ noog wʋsg ne-a, bala, yaa a fãa-fãa la a sẽn kõ wã.—Luk 21:1-4. w19.01 8-9 s. a 3-5

D sẽn yaa Kiristã karen-biisã, d miime tɩ nebã na n kisg-d lame. A Zeezi ra pĩnd n yeelame tɩ yaoolem wakatã, b na n namsa a poorẽ dãmbã ne toolem wʋsgo. (Mat. 24:9; Zã 15:20) A Ezayi ra keoog-d lame tɩ bɛɛbã pa na n kisg-d bal ye, b na n maana zab-teed toor-toor me n zab ne-do. Wala makre, b zab-teedã mi n yaa kãnegre, rõdga, wall nams-toaag menga. (Mat. 5:11) A Zeova pa na n gɩdg d bɛɛbã tɩ b ra le tall zab-te-kãensã n zab ne-d ye. (Efɛ. 6:12; Vẽn. 12:17) La d pa segd n maan rabeem ye. Bõe yĩnga? A Zeova yeelame tɩ “zab-teoog ning fãa” b sẽn na n tall n zab ne tõndã ‘kõn tol n tõog’ n maan-d bũmb ye. (Eza. 54:17) Wa lalg sẽn kogend ned ne sa-kẽeng sẽn fẽedã, a Zeova me kogenda tõnd ne “nin-toosã vʋʋsem.” Bɛɛbã pa tar b sẽn tõe n maan-do, t’a Zeova pa tar a tɩɩm ye. (Eza. 65:17) Wẽnnaam na n “na n sãama bãmb tɩ b lebg zaalem la vɩʋʋgo.”—Eza. 41:11, 12. w19.01 6-7 s. 13-16

Kom-bɩɩse, a Zeova miime tɩ lohorem noomame. Yẽ n naan ninsaal me t’a nong lohorem. La a ratame tɩ baa y lohormã pʋg bɩ y maan sẽn segde, tɩ rẽ n na n kogl-yã. Tõe tɩ y mii y rog-taas sẽn get pornogarfi, tɩ kẽer yooda, tɩ sãnda nong ɛspoor sẽn tõe n tũ ne yõore, tɩ taab me yũud dorge, wall b yũud rãam n suuda. Y sã n get-ba, tõe n wõnda b paamda sũ-noogo. La naoor wʋsgo, baasda wẽnga. Wala makre, b wat n pa tõe n base, tɩ kẽer nengẽ baasd ne bãase, la kũum menga. (Gal. 6:7, 8) B tagsdame tɩ b tara lohorem, la hakɩɩka, wã pa lohorem ye! (Tɩt 3:3) Yãmb mii ned sẽn lʋɩ bãaga, a sẽn tũud Biiblã noyã yĩng bɩ? A Zeova noyã sakr kõta laafɩ la lohorem. (Yɩɩn. 19:8-12) Sẽn paase, y lohormã pʋgẽ, y sã n maand sẽn segde, rat n yeel tɩ y yam-yãkr fãa pʋgẽ tɩ y sã n tũud a Zeova noyã la a saglsã sẽn yaa sõma zãngã, y wilgda a Zeova ne y roagdbã tɩ y yaa ned b sẽn tõe n kɩs sɩda. Tõe n pʋd n kɩtame tɩ y roagdbã kõ-y lohorem n paase.—Rom. 8:21. w18.12 22-23 s. 16-17

A Ãdem kɩɩsgã kɩtame tɩ yɛl wʋsg toeeme. Wala makre, ninsaal sẽn lebg kiidã yaa bũmb sẽn wat ne toeeng kãadem pʋgẽ. Bũmb la tʋm-tʋmd a Poll yeel-yã, tɩ bilgd rẽ sõma. A yeelame tɩ neb sã n kẽ kãadem, t’a ye wa maan kaalem, kãadmã kaool saame, t’a to wã tar sor n na n lebg n kẽ kãadem. (Rom. 7:1-3) Tõogã Wẽnnaam sẽn da kõ Israyɛll nebã sõngda tõnd tɩ d bãng bũmb kẽer kãadmã wɛɛngẽ. Wala makre, Wẽnnaam ra basame tɩ rao tõe n dɩk pagb a yiib bɩ sẽn yɩɩd rẽ. Yaa bũmb sẽn sɩng nand tɩ Wẽnnaam kõ-b tõogã. La tõogã pʋgẽ, Wẽnnaam ra kõo noy sẽn kɩt tɩ b pa tõe n wẽg pagbã la kambã bɩ n maan-b pãng ye. Wala makre, rao sã n da kẽ kãadem ne yem-poaka, tɩ rẽ poor t’a rɩk pag a to, a pa segd n boog rɩɩbã bɩ futã a sẽn da kõt pipi pagã, a segd n ket n kẽeda ne-a me wa pĩndã. Wẽnnaam ratame t’a kell n ges pipi pagã yelle, t’a paam koglgo, la sẽn yaa tɩlɛ ne-a wã. (Yik. 21:9, 10) Rũndã-rũndã, tõnd pa tũud tõogã ye. La sõngda tõnd tɩ d bãng t’a Zeova nanda kãadem. Woto pa kɩt tɩ yãmb me rat n waoogd kãadem sɩda? w18.12 10 s. a 3; 11 s. a 5-6

A Habakuk sẽn dɩk a yellã n ning a Zeova nugẽ wã, tõe t’a ra sokda a meng a Zeova sẽn na n maanega. Baa ne a Habakuk sogsgã sẽn da wõnd yẽgengã, a Zeova sẽn yaa Ba sẽn yaa nimbãan-zoɛt la wʋmdã, a pa zab-a ye. A bãngame tɩ yaa toogã n loog-a t’a kot sõngre. A togsa a Habakuk a sẽn na n maan ka la bilf n sɩbg zʋɩf-rãmb nins sẽn yaa wẽn-kɩɩsdbã. Tõe tɩ yaa a Habakuk la a Zeova reng n togs pipi tɩ nin-wẽnsã sɩbgr daar ta n saame. A Zeova wilga a Habakuk t’a bee yellã welgr zugu. A na n kɩtame tɩ Kalde nebã b sẽn boond me tɩ Babilond nebã sɩbg Zida nebã sẽn tʋmd nen-kɛglem la tʋʋm-wẽns a taabã. A sẽn yeel tɩ sɩbgrã na n yɩɩ ‘bãmb wakatã,’ wilgdame tɩ no-rɛɛsã wall a zãmaanã neb n na n yã sɩbgrã nand tɩ b maan kaalem. A Zeova sẽn yeel t’a na n welga yellã to-to wã pa wa a Habakuk sẽn da tagsdã baa-baa. Babilond nebã ra yaa nin-toose. B nen-kɛglem ra yɩɩda Israyɛll nebã, bala, bãmb são tɩ b ra mii a Zeova noyã. Rẽ yĩnga, Zida nebã namsgã kõn maneg n yãng sɩda? w18.11 15 s. a 7-8

Yãmb tagsg yaa wãn ne neb nins sẽn nan pa mi sɩdã? Tʋm-tʋmd a Poll koe-moonegã pʋgẽ, a ra segd n sõsa ne neb sẽn da zoe n mi bũmb kẽer a Zeova zugu. La a ra segd n sõsa ne neb me sẽn da pʋʋsd wẽn-naandse. A sẽn da na n tall manesem ning ne sẽn da pa mi-b a Zeova wã ra na n wilga a sã n yaa sik-m-meng soaba. A Poll sẽn na n gilg n moon koɛɛgã pipi wã, yẽ ne a Barnabaas wa n tũ taab n kẽng Listri. Beenẽ nebã baoome n na n waoog-b wa wẽnnaam-dãmba. B yeelame t’a Poll yaa bãmb wẽnnaam a Ɛrmeese, t’a Barnabaas yaa b wẽnnaam a Zeese. La rẽ yĩnga, a Poll ne a Barnabaas sũy yɩɩ noogo, tɩ b ges tɩ woto na n kɩtame tɩ b yʋʋrã yi bɩ? B ra getame tɩ na n sõngame tɩ b ra paam namsg wa tẽn-taasã pʋgẽ wã bɩ? B tagsame tɩ na n sõngame tɩ neb wʋsg sak n kelg koe-noogã bɩ? A bada! Zĩig pʋgẽ, b kẽesa b futã n na n wilg tɩ b sũur pa noom ne nebã sẽn maandã, la b pʋd n wudg n kẽ kʋʋngã sʋk n zẽk b koees n yeele: “Yaa bõe tɩ y maand a woto? Tõnd me yaa ninsaalb wa yãmb bala.”—Tʋʋ. 14:8-15. w18.09 4-5 s. a 8-9

D sã n wa bãng sɩdã n dat n tũ Biiblã sẽn yetã, yaa tɩlɛ tɩ d sak n toeem d tagsa wã la d yel-manesmã. Tʋm-tʋmd a Pɩyɛɛr ra yeelame: “Bɩ y yɩ kom-sakdse, la y ra sak wẽng ratem nins yãmb sẽn dag n sak wakat sẽn looge, y sẽn dag n be y zɩɩlem pʋgã ye.” A paasame: “Bɩ yãmb me welg toor n yɩ pʋ-peelem dãmb y yel-manesemã buud fãa pʋgẽ.” (1 Pɩy. 1:14, 15) Korẽnt tẽngã neb wʋsg ra tara yel-manesem sẽn pa lebd be. Ra yaa tɩlɛ ne sẽn dat-a n ta a Zeova yam t’a mao n toeem fasɩ. Rũndã-rũndã me, neb wʋsg mao n toeema b yel-manesmã fasɩ sẽn na yɩl n sak sɩdã. A Pɩyɛɛr yeela bũmb sẽn bilgd rẽ sõma. Ad a sẽn yeelã: “Wakat sẽn looge, yãmb dag n maanda wa neb nins sẽn ka pʋʋsd Wẽnnaamã sẽn maandã. Yaa n sekame. Yãmb dag n kẽnda raglem pʋga, ratem wẽnse la yũ rãam n tuumdẽ wã pʋga, la rã-tɩgrã ne yão-beedã pʋga, la wẽn-naandsã pʋʋsg sẽn yaa bõn-wẽng wʋsgã pʋga.”—1 Pɩy. 4:3. w18.11 6 s. 13

D maanda wãn n paam neb nins sẽn zems ne “vɩɩm sẽn kõn sɛ wã”? Wa pipi kiris-nebã, yaa d sẽn na n moond koɛɛgã. A Zeezi ra yeela a karen-biisã yaa: “Yãmb sẽn kẽ tẽng ninga fãa, a sã n yaa tẽn-kãsenga bɩ tẽn-bila, bɩ y bao ned sẽn zemse.” (Mat. 10:11, Wẽnnaam Sebre, 1983) D miime tɩ sẽn pa-b sũ-tɩrs rãmba, n yaa wuk-m-mens rãmb n pa baood Wẽnnaamã pa na n sak n kelg koɛɛgã ye. D baooda sẽn yaa-b sik-m-mens rãmba, n dat ne b sũur fãa n bãng sɩdã. D tõe n maka d sẽn maand to-to n baood nin-kãens buudã ne a Zeezi sẽn da maand to-to a nug-tʋʋmdã pʋgẽ wã. A sã n da rat n ka kʋɩlenga, wall a maan goll bɩ teoog a to, a rengd n baoo raoog sẽn yaa sõma. Rẽ poor masã la minim ning a sẽn tarã, la a tʋʋmã teed na n sõng-a t’a maan teoog ning a sẽn datã. Tõnd me segd n deng n baoo sũ-tɩrs rãmbã, tɩ d sã n paam-b bɩ d yaool n sõng-b ne tʋʋm-teedã la minimã d sẽn tarã maasem tɩ b lebg Kiristã karen-biisi.—Mat. 28:19, 20. w18.10 12 s. a 3-4

Koe-moond a Filip wɩnga ne Wẽnnaam tʋʋmdã, baa yɛl kẽer sẽn toeem a vɩɩmã pʋgẽ naoor wʋsgã. Woto yaa mak-sõng n kõ tõndo. A Etɩyɛn kʋʋbã poore, b ra yik n namsda kiris-nebã Zerizalɛm. Wakat kãng tɩ b ra nan kõo a Filip tʋʋmd kiris-nebã sʋka. (Tʋʋ. 6:1-6) La namsgã sẽn wa n kɩt tɩ kiris-nebã sãeegã, a Filip pa sak n na n zĩẽ n pa maand bũmb ye. A zoe n kẽnga Samari. Rẽ tɩ koe-noogã ra pa ta be ye. (Mat. 10:5; Tʋʋ. 8:1) A Filip ra sakame n na n kẽng zĩig ning fãa vʋʋsem sõngã sẽn na n wilg-a t’a kẽngã. Rẽ n so t’a Zeova kɩt t’a na n kell n tɩ moon koɛɛgã zĩis nebã sẽn da zɩ n wʋm koe-noogã. Zʋɩf-rãmb wʋsg ra pa nand Samari nebã, la a Filip yẽ ra pa woto ye. A taas-b-la koe-noogã ne a sũur fãa. Woto kɩtame tɩ b ‘naag taab’ n kelge. (Tʋʋ. 8:6-8) A Filip kell n wɩnga ne koe-moonegã. Kɩtame tɩ yẽ ne a zakã rãmb paam t’a Zeova ning-b barka.—Tʋʋ. 21:8, 9. w18.10 30 s. 14-16

Daar a ye, a Zeezi wa n bee Dekapoll soolmẽ wã, tɩ b tall “wʋng sẽn yaa bidg” n wa a nengẽ. (Mark 7:31-35) La a Zeezi pa sãoog-a zãma wã taoor ye. A “peega yẽnda kʋʋngã sʋk n yi kɛɛnga,” n sãoog-a. Bõe yĩng t’a maan woto? Tõe tɩ raoã sẽn da yaa wʋngã, a sã n da be zamã sʋka, pa nana ne-a ye. A Zeezi bãnga rẽ, n tall-a n kẽng kɛɛng n tɩ sãoog a bãagã. Yaa sɩd tɩ tõnd pa tõe n maan yel-solemd tɩ ned bãag sa ye. La d segd n tags n gesa bũmb nins sẽn namsd d tẽed-n-taasã, la sõngr ning b sẽn datã, n sõng-ba. A Zeezi bãnga bũmb ning sẽn da namsd wʋngã, n ges a yell ne bʋgsem. Tõnd me segd n wilgame tɩ d nanda sẽn kʋʋl-bã la koms-rãmbã. Sẽn tar yõod n yɩɩd kiris-neb tigingã pʋgẽ wã, pa d sẽn na n tõogd n maand bõn-kãsems ye. Yaa d sẽn na n nong taaba. (Zã 13:34, 35) Nonglmã yĩnga, d mongda d mens bũmb kẽere, n sõngd sẽn kʋʋl-bã la koms-rãmbã tɩ b wat tigissã la b yit koɛɛgã moonego. D sõngd-b lame, baa pa na n yɩ nana ne-do, wall d sẽn na n sõng-b tɩ b tõog n maanã na n yɩɩ bilfu.—Mat. 13:23. w18.09 29-30 s. a 7-8

A Zeova nonga sẽn tũud-b yẽ wã ned kam fãa wʋsgo. A Zeezi me nong-b lame, hal n sak n wa ki b yĩnga. (Gal. 2:20) Tõnd me nonga d tẽed-n-taasã ne d sũur fãa. D pa rat n yaa gãs-gãs ne-b ye. D baooda “bũmb ning fãa sẽn wat ne laafɩ la ne taab bɩɩsgo.” (Rom. 14:19) D fãa gũuda arzãnã ne d sũur fãa! Wakat kãnga, baa fʋɩ pa na n le koms ned raood ye. Bãasã, zabã, kũumã a Ãdem yel-wẽndã sẽn wa ne wã, la zagsã pʋgẽ zu-loeesã pa na n le zĩnd ye. Ned kõn le paam namsg a buud yĩnga, wall tũudum yĩng ye. Baa fʋɩ me kõn le sãam ned sũuri. Kiristã naamã sẽn na n kaoos yʋʋm tusrã ne a na n sa tɩ ninsaalbã fãa zemsa zãnga. Neb nins sẽn na n kell n yals kãn-kãe yaoolem makrã sasa wã na n paam n lebga a Zeova tẽng zug kamba, n “paam pʋɩɩr ne Wẽnnaam kambã lohorem sẽn be ziirã.” (Rom. 8:21) Bɩ d fãa ket n bɩɩsd nonglem sẽn kengd d taabã raoodo, la d sõng taab tɩ d fãa paam n kẽ dũni-paalgã pʋgẽ. w18.09 14 s. 10; 16 s. 18

Biiblã zãmsg pa d sẽn na n karemd Biiblã woto bala, wall d sẽn na n karemd sebr sẽn wɛgsd a goamã, n dẽegd sogsgã leoor ye. D sã n wa zãmsd Biiblã, d segd n tags n gesa d sẽn karemd bũmb ninsã sẽn sõngd tõnd tɩ d bãng a Zeova mengã la a manesmã zugã, la a tagsg sẽn yaa a soabã. Segdame tɩ d bao n bãng bũmb ning sẽn kɩt t’a Zeova kõ noor tɩ d maan bũmb kẽere, la a gɩdg tɩ d ra maan kẽerã. Yaa tɩlɛ me tɩ d bʋgs n ges d sẽn tõe n toeem d tagsa wã la d tʋʋm-tʋmdɩ wã to-to, n paam n tũ bũmb ning d sẽn bãngã. Pa rat n yeel tɩ Biiblã zãmsg fãa sasa, d segd n maana woto fãa tɩlɛ ye. La yɩta sõma tɩ d yãt sẽk n bʋgsd d sẽn zãmsdã zugu. Wala makre, bʋgsgã tõe n kaoosame n ta sẽk ning d sẽn yãk zãmsgã yĩngã pʋɩ-sʋka. (1 Tɩm. 4:15) D sã n yãk wakat n bʋgsd Wẽnnaam Gomdã zug n pa vaandẽ, d wat n ‘bãnga Wẽnnaam daabã,’ n kɩs sɩd tɩ yaa yẽ tagsa wã n yaa sõma zãnga. Woto, bũmb fãa pʋgẽ, d na n wa mii a tagsg sẽn yaa a soaba, n wʋmd a sẽn tagsd woto wã võore, la d sak n deeg tɩ yẽ sẽn yetã la sõma. Rẽ, d paamda yam-wek-paalle, tɩ d tagsa wã teke. (Rom. 12:2) Tarẽ-n-tarẽ, d tagsa wã wat n yaa a yembr ne a Zeova tagsa wã. w18.11 24 s. a 5-6

Tʋm-tʋmd a Poll ra goma yẽ ne kiris-neb a taab yelle, n yeel tɩ bãmb yaa “tʋmd-n-taas ne Wẽnnaam,” bala b ra taasda nebã Rĩungã koɛɛgã la b sõngd-b tɩ b bãngd a Zeova. (1 Kor. 3:6) Rũndã-rũndã, tõnd me sã n kẽesd d sẽkã, d pãngã la d paoongã koe-moonegã pʋgẽ, d paamd n lebga “tʋmd-n-taas ne Wẽnnaam.” Ad yaa zu-zẽkr tɛkẽ! D sã n kẽesd d sẽkã la d pãngã sõma koɛɛgã mooneg la karen-biisã maaneg pʋgẽ, d paamda sũ-noog wʋsgo. D tẽed-n-taas wʋsg sẽn paam n zãms neb Biiblã tɩ b wa sak a Zeova wilgame tɩ bũmb sẽn kõt sũ-noog a woto pa waoog ye. D sũur nooma wʋsgo, d sã n neẽ tɩ Biiblã goamã kẽeda karen-biig sũuri, t’a tẽebã paasdẽ, t’a toeemd bũmb kẽer a vɩɩmã pʋgẽ, la a togsd neb a taabã a sẽn bãngã. A Zeezi me maana sũ-noog wʋsgo, a karen-biis 70 wã a sẽn da tʋm tɩ b tɩ moon koɛɛgã sẽn lebg n wa ‘ne sũ-noogo,’ tʋʋmdã sẽn wom biis ninsã yĩngã.—Luk 10:17-21. w18.08 20 s. 11-12

D tõe n wa teega d meng tɩ loog nugu. D tõeeme n wa rat n welg yell fãa ne d mengã tagsg la d yamã. Tõe tɩ d wa tagsdẽ tɩ baa d pa mi yell vɩʋʋgo, d wʋmda a võor sõma. Yaool n tõe n wã-d lame! D sã n yã bũmbu, wall d wʋma bũmb d tẽed-n-taag zugu, tɩ tõnd ne yẽ yaool n pa noom woto, rẽ me tõe n kɩtame tɩ yɩ toog tɩ d tags neer n ges d sã n tõe n tẽeme. D sã n tagsd tõnd ne nin-kãng mo-yõsã yell wakat fãa, tõe n kɩtame tɩ d wa pa le tolg n kɩs-a sɩda, n maand sãmbs ne-a. D sã n wa wʋm bũmb sẽn pa a yʋ-noogo, d tõe n yɩɩ tao-tao n tẽ, n pa bao n na n bãng sã n yaa sɩd ye. Woto wilgda tõnd bõe? D sã n maand sũ-kẽk ne d tẽed-n-taaga, tõe n kɩtame tɩ d sã n wa yã bɩ n wʋm a yell bɩ d yɩ tao-tao n tẽ, n pa bao n na n bãng sã n yaa sɩd bɩ ziri ye. (1 Tɩm. 6:4, 5) Bũmb sẽn na n sõng-d yaa d sẽn na n mao tɩ sũ-kiir la tags-kɛg ra be d sũurẽ wã ye. D tẽegd wakat fãa t’a Zeova ratame tɩ tõnd nong d tẽed-n-taasã, n kõt-b sugr ne d sũur fãa.—Efɛ. 4:2, 32. w18.08 6 s. 15; 7 s. 18

A Zeova sẽn naan ninsaalbã yĩnga, b fãa yaa yẽ n so. (Yɩɩn. 100:3; Vẽn. 4:11) La hal ninsaalbã sẽn be tẽng zugã tɛka, Wẽnnaam yãkda neba, n welg-b toor tɩ b yaa a nin-buiidu. Wala makre, Yɩɩn-sõamyã 135 goma pĩnd Israyɛll neb nins sẽn da tũud a Zeova ne b sũur fãa wã yelle, n yeel tɩ b yaa a “dẽnda.” (Yɩɩn. 135:4) Ooze sebrã pʋgẽ me, b ra pĩnd n togsame tɩ neb sẽn yaa bu-zẽms na n wa lebga a Zeova nin-buiidu. (Ooze 2:25, Wẽnnaam Sebre, 1983) A Ooze bãngr-gomdã pidsa wakat ning a Zeova sẽn sɩng bu-zẽmsã yãkre, tɩ bãmb me na n tɩ naag a Zeezi n dɩ naamã. (Tʋʋ. 10:45; Rom. 9:23-26) Neb nins fãa Wẽnnaam sẽn yãkdã paamda a vʋʋsem sõngã zaeebo, n na n tɩ vɩɩmd saasẽ. B boond-b lame tɩ “buud sẽn welg toor Wẽnnaam yĩnga.” (1 Pɩy. 2:9, 10) La kiris-neb kʋʋngã sẽn saagd n na n wa vɩɩmd tẽngã zugã yẽ? A Zeova boonda bãmb me t’a ‘neba,’ bɩ ‘neb nins a sẽn yãkã.’—Eza. 65:22. w18.07 22 s. a 1-2

D sã n yaa kõatba, d rɩkda a Zeezi me togs-n-taare. A yɩɩ kõata, tɩ wilgd ninsaal sẽn tõe n yɩ kõat to-to wã, hal tɩ yaa mak-sõng tɛkẽ! (Mat. 20:28) Yaa sõma tɩ d ned kam fãa sok a meng yaa: ‘M pa tõe n maneg n tũ a Zeezi mak-sõngã n yɩɩg m sẽn zoe n maandẽ wã sɩda?’ (1 Pɩy. 2:21) D sã n dɩk a Zeova ne a Zeezi togs-n-taare, n baood d taabã neere, la d tagsd d sẽn tõe n maan n sõng-ba, a Zeova sũur na n yɩɩ noog ne-do. A Zeezi yel-bũnd ning pʋgẽ a sẽn gom Samari ned yellã, a wilgame t’a karen-biisã segd n sõngda b taabã, n pa get b sẽn yaa b rãmb wall b sẽn yitẽ ye. (Luk 10:29-37) Y ket n tẽra bũmb ning sẽn kɩt t’a Zeezi wẽ yel-bũndã bɩ? Rao sẽn yaa zʋɩf n da sok-a yaa: “Ãnda la mam to?” A Zeezi leoorã wilgame tɩ d sã n dat tɩ Wẽnnaam sũur yɩ noog ne-do, d segd n yɩɩ kõata, n sakd ne yamleoog n maand d taabã neer wa Samari nedã. w18.08 19 s. a 5-6

A Maari sẽn wa n wubd a Zeezi wã, a Zeova wilgame t’a sũur nooma ne-a bɩ? N-ye! A kɩtame tɩ b gʋls a Maari goam kẽere, la bũmb kẽer me a sẽn maane, tɩ be Biiblã pʋgẽ. Wõnda a Zeezi sẽn gilg n moon koɛɛgã yʋʋm a tãab la pʋɩ-sʋkã, a Maari pa tõog n tũ-a n gilg ye. Tõe t’a ra tog n paa Nazarɛte, a sẽn da lebg pʋg-kõorã yĩnga. Dẽnd bũmb wʋsg a Zeezi sẽn maan la a pa paam n yã. La a Zeezi kũumã sasa t’a ra bee ne-a. (Zã 19:26) Yɩɩ Pãntekotã daar la karen-biisã sẽn da tigim Zerizalɛmmã paam vʋʋsem sõngã zaeebo. La ket tɩ rasem a wãna, a Maari ra bee Zerizalɛm ne-ba. (Tʋʋ. 1:13, 14) Dẽnd wõnda yẽ me paama vʋʋsem sõngã zaeebo. Sã n yaa rẽ, rat n yeelame t’a na n paam n naaga a Zeezi n dɩ naam saasẽ wakat sẽn kõn sa. Ad sɩd yaa keoor tɛkẽ! w18.07 9 s. 11; 10 s.14

A Zeezi sẽn da yet a karen-biisã bũmb ninsã wʋsg ra yaa saglse. Ra yaa sẽn na n sõng-b tɩ b bãng tagsa kẽer la tʋʋm-tʋmdɩ kẽer sẽn tõe n wa ne biis ninsi. Wala makre, a wilg-b lame tɩ sũ-yikr tõe n waa ne nen-kɛglem, la tɩ ned sã n tagsd yoob yelle, tõe n wa kɩtame t’a sɩd yo. (Mat. 5:21, 22, 27, 28) A Zeova saglsã sã n be d yamẽ wakat fãa, na n sõngame tɩ d sũur-kasetã paam kiblg sõma, tɩ d bãngd n yãkd yam, tɩ Wẽnnaam paamd waoogre. (1 Kor. 10:31) Yell ning pʋgẽ, baa kiris-neb a yiib sẽn kibl b sũur-kasetã sõma yam-yãkr tõe n yɩɩ toor-toore. Wala makre, rãamã yũub wɛɛngẽ. Biiblã pa gɩdg rãam yũub ye. La a keoogda tõnd tɩ d gũus n da wa yũ tɩ loog-do, wall d bas tɩ rãamã soog-d ye. (Yel. 20:1; 1 Tɩm. 3:8) Woto rat n yeelame tɩ kiris-ned sã n tõog n yũud n zemsdẽ bala, sekame bɩ? Ayo! Baa rãamã yũub ka yell ne yẽ, a segd n tagsa neb a taabã sũur-kaset yelle. w18.06 18 s. 10-11

A Zeezi yeelame t’a karen-biisã gũus ne Fariizẽ-dãmbã, sadiseẽ-rãmbã n paas a Erood poorẽ dãmbã “rã-bɩllã,” rat n yeel tɩ bũmb nins b sẽn zãmsd nebã. (Mat. 16:6, 12) Yaa rasem a wãn poor bal nebã sẽn bao n na n yõk a Zeezi t’a yɩ b naabã la a sẽn keoog a karen-biisã woto wã. Tũudmã rãmb sã n kẽ politikã, naoor wʋsgo, wata ne nen-kɛglem. A Zeezi yeela a karen-biisã tɩ b ra kẽes b toog politikã pʋgẽ baa bilf ye. Rẽ me ra yaa bʋʋm sẽn kɩt tɩ maan-kʋʋdbã kãsem-dãmbã ra baood n na n kʋ-a. B ra yɛɛsda nin-buiidã na n wa bas bãmb n tũ a Zeezi, tɩ b naamã la b ziirã booge. Ad b sẽn yeele: “Tõnd sã n bas-a t’a ket n maandẽ, nebã fãa na n tẽe-a lame, la Rom-dãmbã na n waa n sãama tõnd wẽnd doogã ne d soolmã.” (Zã 11:48) Rẽ n so tɩ maan-kʋʋdb kãsem a Kayif kɩt tɩ b yẽs ne taab n ges b sẽn na n maan to-to n paam n kʋ a Zeezi.—Zã 11:49-53; 18:14. w18.06 6-7 s. 12-13

A Sʋɩtãan sẽn mi tɩ nebã nong n baood n na n bãnga yɛl sẽn wõnd yel-soalmã, a bẽta ne rẽ n paamd nebã. Rũndã-rũndã wã, pa ne tũudum-yoodã maasem bal la a Sʋɩtãan belgd nebã tɩ b kẽed zĩn-dãmbã yɛlẽ ye. A tũnugda ne reem buud toor-toor me. Filim-dãmba, reem kẽer sẽn be portaabl-dãmb la ordinatɛɛr-dãmb pʋgẽ, la bũmb a taab nebã sẽn maand n noogd b yõor kɩtame tɩ b getẽ tɩ yɛl kẽer zĩn-dãmbã sẽn maand tara yamleoogo. Bõe n na n sõng-d tɩ bẽd-kãngã ra wa paam-do? D pa segd n dat t’a Zeova siglgã sõdg reem nins sẽn yaa sõma la sẽn pa sõma wã n wilg tõnd ye. Yaa ned kam fãa n segd n zãms Wẽnnaam noyã neere, t’a sũur kasetã yɩ sõma. Woto, a tõogd n bãng n yãka reem sẽn yaa sõma. (Ebre. 5:14) Sẽn paase, d tũ tʋm-tʋmd a Poll saglgã sẽn yaa rũndã daar vɛrse wã goamã. D sok d meng yaa: ‘Reem nins m sẽn yãkdã wilgdame tɩ m tũuda bũmb nins m sẽn zãmsd m taabã bɩ? Ned m sẽn zãmsd Biiblã sã n yã rẽ, na n yɩɩ vẽeneg a yamẽ tɩ m tũuda Biiblã goamã m sẽn taasd nebã bɩ?’ D sã n modg n tũud bũmb nins d sẽn zãmsd neb a taabã, d tõogd n gila a Sʋɩtãan bẽdsã nana-nana.—1 Zã 3:18. w18.05 25 s. 13

Wãn to la d tõe n dɩk a Poll togs-n-taare? Pipi, d segd n data ne d sũur fãa n bao sẽn tar-b yam sẽn zems ne “vɩɩm sẽn kõn sɛ wã.” Yiib-n-soaba, d yõkda a Zeova sɛɛg t’a pak pʋ-peelem dãmbã sũya, tɩ d sã n wa taasd-b koɛɛgã bɩ b sak n kelge. (Tʋʋ. 13:48; 16:14) A Silviyana sẽn yaa so-pakd na maan yʋʋm 30 wã yeelame: “M sã n wa be moonegã zĩigẽ, nand tɩ m kẽ ned zakẽ, m pʋʋsda a Zeova, n kos-a t’a sõng-m tɩ m tall tagsg sẽn zemse.” D leb n kota Wẽnnaam t’a kɩt tɩ malɛgsã sõng-d tɩ d paam neb sẽn dat n kelge. (Mat. 10:11-13; Vẽn. 14:6) Ad a Robɛɛr sẽn yaa so-pakd na maan yʋʋm 30 la zakã sẽn yeele: “Malɛgsã mii zagsã rãmb vɩɩm sõma. Paam n naag-b n tʋmã yaa sũ-noog tɛkẽ!” Tãab-n-soaba, d gũusd n geta sẽn yaa sõma nebã nengẽ wã, la d kɩs sɩd me tɩ b tõe n wa sak n sɩnga a Zeova tũubu. Kãsem-soab yʋʋr sẽn boond t’a Karl yeelame: “M gũusd n geta m sã n na n yãa bũmb sẽn wilgd tɩ ned sɩd rat n kelgame, baa yaa bõn-kɩdga. Wala makre, a sã n pa gãnem a nenga, wall a sã n yõgemd a noore, pa rẽ bɩ a sã n sok sokr n dat ne a sũur fãa n bãng leoorã.” Hakɩɩka, d tõe n woma biis ne sũ-mare, wa a Polle. w18.05 15 s. 13; 16 s. 15

D sã n wʋm tɩ neb d sẽn sõng tɩ b bãng a Zeova ket n tũud-a lame, d sũy yaa noogo. Tʋm-tʋmd a Zã ra yeelame yaa: “Bũmb ka kõt maam sũ-noog n yɩɩd mam sẽn na n wʋm tɩ b gomd tɩ mam kambã kẽnda sɩdã pʋgẽ ye.” (3 Zã 4) So-pakdbã tõe n kõo kaset tɩ b sũur sɩd yaa noog wʋsgo, b sã n wa wʋm tɩ ned b sẽn da sõng yʋʋm a wãn sẽn loog t’a bãng a Zeova ket n tũud-a-la ne a sũur fãa, wall a pʋd n lebga so-pakda. Dẽnd so-pakd ning sã n wa koms raoodo, d tõe n lebg n tẽeg-a-la bũmb nins a sẽn da maan n sõng a taabã. Tigims sull yel-gɛtb wʋsg yeelame tɩ bãmb ne b pagbã sẽn mi n paam tɩ b tẽed-n-taas gʋls lɛtr n pʋʋs-b bark b sẽn wa n kaag b tigingã, kengda b raood wʋsgo. Yaa woto me ne kãsem-dãmbã, misioneer-dãmbã, so-pakdbã, la Betɛllẽ tʋm-tʋmdbã. D sã n tẽegd n pʋʋsd-b bark b sẽn wɩngd ne a Zeova tʋʋmdã baa ne zu-loeesã, kengda b raoodo. w18.04 23 s. 14-15

A Salomo kɩɩsame, n kẽ kãadem ne pagb 700. A pʋg-rɩkdsã me ra yaa bãmb 300. (1 Rĩm. 11:3) A Salomo pagbã wʋsg ra yaa bu-zẽmse, n da pʋʋsd bõn-naandse. Dẽnd a kɩɩsa Wẽnnaam tõogã sẽn yeel me tɩ b pa segd n kẽ kãadem ne bu-zẽmsã. (Tõo. 7:3, 4) A Salomo sẽn da kɩɩsd a Zeova noyã bilf-bilfã, wa n kɩtame t’a maan sẽn yaa wẽng wʋsgo. A mee tẽn-kug wẽn-naan-poak a Astarte la wẽn-naandg a Kemos waoogr yĩnga, n naag a pagb kẽer n da pʋʋsd-ba. Pʋd n yaa tãng sẽn kell n tees Zerizalɛm zug la a sẽn me tẽn-kug-kãensã wã, tɩ yaool n da yaa Zerizalɛm la a sẽn me a Zeova roogã. (1 Rĩm. 11:5-8; 2 Rĩm. 23:13) Tõe t’a Salomo belga a menga, n tẽed tɩ baa yẽ sẽn kɩɩsd a Zeova wã, a sã n ket n kʋʋd maand wẽnd-doogẽ wã n kõt-a, a na n sĩnd n geta a kɩɩsgã. La a Zeova pa tõe n sĩnd n get yel-wẽnd ye. w18.07 18-19 s. a 7-9

‘Pɛɛm sẽn yaa wa bugum’ a Sʋɩtãan sẽn tãood n dat tɩ yõg yãmbã tõe n yɩɩ ziri nins a sẽn yelgd a Zeova zugã. Wala makre, a ratame tɩ y tẽ tɩ y pa tog ne a Zeova nonglem, la tɩ y yell pa pak-a ye. A Ayida sẽn tar yʋʋm 19 wã yeelame: “Mam wae n tagsdame t’a Zeova pa mam zoa, la t’a pʋd n pa rat m zood ye.” Bõe n sõngd-a? Ad a sẽn yeele: “Tigissã yaa bũmb sẽn kengd m tẽebã hal sõma. M sã n da kẽng tigissã, m da pa zẽkd m nug n leok baa vugr ye. M da tagsdame tɩ ned kae n dat m goam n kelg ye. La masa wã, m segenda tigissã, la m maood n leokd naoor a yiib bɩ a tãabo. A Ayida kibarã sõngda tõnd tɩ d bãng bũmb a ye sẽn tar yõod wʋsgo: Sodaag gãong pa paasde, pa boogde. La tõnd tẽebã yẽ tõe n boogame, wall a paase. Bee ne tõndo. (Mat. 14:31; 2 Tes. 1:3) D sã n dat tɩ d tẽebã yɩ gãong sẽn kogend-d sõma, yaa tɩlɛ tɩ d modgd n paasd a pãngã. w18.05 29-30 s. 12-14

Yaa tẽn-digimdgã poor la bãens roog gũudã yaool n tek yam. (Tʋʋ. 16:25-34) Rũndã-rũndã me, neb kẽer sẽn pa sakd n kelg koe-noogã wat n teka yam, yell sẽn wõnd tẽn-digimdg sã n wa tiig n paam-ba. Wala makre, kẽer ra tara tʋʋmd hal yʋʋm ka tɛka, tɩ wa tiig n sãame, hal tɩ namsd-ba. Sãnda pa mi b sẽn maande, bala logtoɛɛmbã yeel-b lame tɩ b bẽeda bã-kɛgenga. Sãnda me sũy sãama hal wʋsgo, b ned sẽn maan kaalem yĩnga. B tõe n wa sokda b mens sogsg b sẽn da zɩ n soke. Wala makre, nina tõe n sokda a meng yaa: ‘Bõe la m tog n maan n paam fãagre?’ D sã n seg ned a woto koe-moonegã sasa, tõe tɩ yaa a pipi a sẽn na n sak n kelg koɛɛgã. Dẽnd d sã n ket n wɩngd ne koe-moonegã, na n kɩtame tɩ nebã sã n wa rat n kelg-d n paam belsg la raood kengre, bɩ d paam n sõng-ba.—Eza. 61:1. w18.05 19-20 s. 10-12.

Rũndã-rũndã, a Sʋɩtãan sẽn yaa dũni-kãnga wẽnnaamã luda neb wʋsg yam, tɩ b pa mi meng tɩ b yaa ziri tũudmã ne politikã yembse, la ligdã ne teedã yembs ye. (2 Kor. 4:4) Wa a Zeezi, d paamame n tõe n moon koɛɛgã, n sõng nebã tɩ b bãng a Zeova sẽn yaa Wẽnnaam sẽn kõt lohormã, la b tũ-a. (Mat. 28:19, 20) Tʋʋmdã meng pa nana, sẽn paase, zu-loees pa kongd ye. Zĩis kẽere, nebã pa rat n kelg koɛɛgã, tɩ sãnda meng yikd b sũur ne-do. La sẽn mik tɩ yaa a Zeova n kõ-d lohormã, yɩta sõma tɩ d ned kam fãa sok a meng yaa: ‘M pa tõe n tʋm a Rĩungã tʋʋmã n paas sɩda?’ A Zeova Kaset rãmb wʋsg sẽn ne tɩ dũniyã sãoong ta n saame wã, b basa bũmb kẽer baoob sẽn na yɩl n yã sẽk n lebg so-pakdba. (1 Kor. 9:19, 23) Woto sɩd kengda raoodo! Kẽer paa b sẽn beẽ wã, tɩ sãnda yik n tɩ sõngd zĩis koe-moondb sẽn pa waoogẽ. Wʋsg sẽn yãk yam n wɩngd ne a Zeova tʋʋmã woto wã sɩd yaa bõn-sõng tɛkẽ!—Yɩɩn. 110:3. w18.04 11-12 s. 13-14