Sɩpaolgo

D sẽn tũud a Zeova wã, d tõe n wa paama vɩɩm sẽn kõn sa wã, la bũmb a taabã fãa a Ãdem ne a Awa sẽn bõnã. Yaa a Ãdem ne a Awa sẽn pa tõog tɩ b nonglmã ne a Zeova tall pãngã la b sẽn yãk yam n pa na n tũ-a wã. Baasgo, a Zeova basame tɩ b vɩɩmd n kaoose, hal n dog kamba, la b yãk b toorẽ noy b kambã wubr wɛɛngẽ. A Ãdem ne a Awa sẽn yãk yam n na n bas a Zeova n soog b mensã, pa kaoos la b bãng tɩ yaa yalemd ye. B bi-kãsengã kʋʋ a yao zaalem. Tarẽ-n-tarẽ, ãdem-biisã wʋsg wa n tolg n lebga nen-kɛglem dãmba, la rat-m-ye rãmba. (Sɩng. 4:8; 6:11-13) Ne rẽ fãa, a Zeova ra zoe n yãka a sẽn na n maanega, n fãag a Ãdem ne a Awa kamb la b yagens nins sẽn dat n tũ yẽ wã. (Zã 6:38-40, 57) Fo sã n wɩng ne Biiblã zãmsgo, n bãngd a Zeova n paasdẽ, n ne a sũ-marã la a nonglmã sẽn waoog to-to wã, f na n maneg n nong-a lame. Na n kɩtame tɩ f rat n dɩk f meng n kõ a Zeova, n da wa maan wa a Ãdem ne a Awa ye. w19.03 2 s. a 3; 4 s. a 9

Yɩl n tõog n kʋmd d taabã, d segd n bao n bãnga d zakã rãmb la d tigingã nebã zu-loees sẽn namsd-b to-to. D wilgd tɩ d kʋmda kom-bɩɩsã, sẽn bẽed-bã, sẽn kʋʋl-bã, la b rãmb nins sẽn be sũ-sãams pʋgẽ, b ned kaalem yĩngã. D mi n sok-b b keelem. B sã n wa togsd tõnd b yell bɩ d kelg-b neere. D maan tɩ b bãng tɩ d miime tɩ b yellã sɩd namsd-b lame. Sẽn wa n yaa bũmb ning fãa la d tõe n maan n sõng-b bɩ d togs-ba. D sã n maand woto, d wilgda nonglem hakɩɩka. (1 Zã 3:18) D sã n wa rat n sõng neda, yɩta sõma tɩ d tẽeg tɩ nebã pa taab ye. Bõe yĩnga? Bala, nebã manesem yaa toor-toor zu-loeesã pʋgẽ. Kẽer pa nong n gomd b zu-loeesã yelle, tɩ sãnda sakd n gomd b zu-loeesã yell faag-faaga. Yaa sɩd tɩ d rat n sõnga d taabã, la d segd n gũusame n da wa sokd-b sogsg n na n bãng yɛl sẽn pa pak-d ye. (1 Tes. 4:11) Ned sã n sak n pelg a pʋg n togs tõnd a sũur yelle, la a wilg a tagsg a yellã zugu, baa d pa tagsd wa yẽ, d segd n tẽegame t’a sẽn togsã yaa sẽn be yẽnda sũurẽ. D ratame n wɩng ne kelgre, la d maag ne goama.—Mat. 7:1; Zak 1:19. w19.03 19 s. 18-19

Yãmb sã n wa be zãma sʋk n dat n gom sɩdã yelle, y zoeta rabeem bɩ? Tẽeg-y a Neemi kibarã. A ra tʋmda rĩm-kãseng zakẽ. Daar a ye, a sũurã sãama wʋsgo, bala a wʋmame tɩ Zerizalɛm lalsã lebga wedse, t’a kʋɩlensã me sãame. (Nee. 1:1-4) Tags-y n ges-y-yã a sũur sẽn da kiuusd to-to, rĩmã sẽn wa n yeel-a t’a togs a sũ-sãangã võorã. A Neemi pʋʋsa a Zeova koɛɛg-koɛɛga, n yaool n na n leoke. Baasa wãna? Rĩmã maana bũmb wʋsg n sõng Wẽnnaam nin-buiidã. (Nee. 2:1-8) Tẽeg-y-yã a Zonaas me yelle. A Zeova sẽn yeel-a t’a tɩ taas Niniiv nebã a koeesã, rabeem yõk-a lame, hal t’a zoe n na n kẽng zĩig sẽn zãr ne be. (Zon. 1:1-3) Baa ne rẽ, a Zeova sõnga a Zonaas t’a tõog n tʋm tʋʋmd ning a sẽn da kõ-a wã. Koɛɛgã a sẽn taas Niniiv nebã sõng-b-la wʋsgo. (Zon. 3:5-10) A Neemi kibarã wilgda tõnd tɩ d sã n pʋʋs n yaool n na n leoke, sõngda hal sõma. A Zonaas kibarã wilgdame tɩ baa d rabeemã sẽn yaa to-to fãa, a Zeova tõe n sõng-d lame tɩ d maan a sẽn datã. w19.01 11 s. 12

D sã n bãng sɩdã n yãk yam n na n tũ d sẽn bãng Biiblã pʋgẽ wã, zems-n-taar ning d sẽn da tar ne d zo-rãmba, d roagdb la d mitinsã tõeeme n pa le yɩ wa pĩndã ye. Bõe yĩnga? Bũmb la a Zeezi pʋʋs n kos a poorẽ dãmbã yĩnga, tɩ wilgd a võore. A kosa a Zeova yaa: “Soog-y bãmb zãng ne-y sɩdã. Yaa yãmb goamã la sɩdã.” (Zã 17:17) ‘Soog-y bãmb zãngã’ tõe n dat n yeelame me tɩ ‘welg-y bãmb toore.’ D sã n bãng sɩdã, d lebgda toor ne dũniyã nebã, bala, d pa le maand wa bãmb ye. Nebã getame tɩ d yaa toore, bala sẽn tar yõod n yɩɩd ne tõndã pa yembr ne pĩndã ye. Lebga Biiblã sẽn yetã la d tũuda. Baa ne sẽn pa welgr la d ratã, d zo-rãmb la d roagdb ne d mitins tõeeme n pa le tolg n nong d zĩigẽ, wall b pʋd n namsd tõndo, d sẽn toeem tũudmã yĩnga. Woto pa lingd tõnd ye. A Zeezi ra yeelame tɩ “ned yir dãmb meng n na n yɩ a bɛɛba.” (Mat. 10:36) La a yeelame me tɩ d bas d yam tɩ baa d sẽn sak n bõn a soab fãa n na n tũ sɩd tũudmã, d keoorã na n yɩɩga d sẽn bõnã naoor ka tɛka. w18.11 6 s. 11

Tʋm-tʋmd a Poll sũur da nooma ne a tẽed-n-taasã sẽn maandã. A sẽn da gomd b yell to-to wã wilgda rẽ. Wakat fãa, a ra pʋʋsda Wẽnnaam bark b yĩnga. Lɛta nins a sẽn gʋls n tool-bã pʋgẽ, a wilga vẽeneg t’a sũur nooma ne-ba. Wala makre, Rom-dãmb sak 16 vɛrse a 1 n tãag 15 wã pʋgẽ, a Poll goma a tẽed-n-taas bãmb 27 yelle, hal n pʋd b yʋyã. A togsa vẽeneg t’a Priska ne a Akila “gẽnega b yõor” n na n fãag yẽ, la t’a Feebe “sõnga neb wʋsgo,” la yẽ mengã. A pẽga nin-kãensã sẽn da tʋmd Wẽnnaam tʋʋmdã ne b sũy fãa, t’a nong-b wʋsgã. (Rom. 16:1-15) A Poll ra mii vẽeneg t’a tẽed-n-taasã kongdame. Baa ne rẽ, a yãka yam n na n pẽg-b b zʋg-sõma wã yĩnga. Tags-y n ges-y b sũur sẽn da noom to-to, b sẽn wa n karemd a Poll lɛtrã tɩ b kelgdẽ wã. D tõe n yeelame tɩ kɩtame tɩ bãmb ne a Poll zems-n-taarã paase. Yãmb minim n pẽgda y tigingã neba, bõn-sõma wã b sẽn yet bɩ n maandẽ wã yĩng bɩ? w19.02 16 s. a 8-9

Yɩl n yɩ burkĩmba, d tog n yɩɩ neb sẽn zems zãng bɩ? Ayo! Sɩd me, d pʋd n mi n getame tɩ d yaa neb sẽn tudgd wʋsgo. La d pa segd n yɛɛs ye. Bala, a Zeova sẽn get n yɩɩdã pa tõnd sẽn kongdã ye. Biiblã yetame: “Sẽn-Ka-Saabo, yãmb sã n dag n tẽegdẽ tõnd kongrã, ãnda soab n na n põse?” (Yɩɩn. 130:3) A miime tɩ d pa zems zãnga, n yaa yel-wẽn-maandba. Rẽ n so t’a kõt-d sugr wʋsgo. (Yɩɩn. 86:5) Sẽn paase, a Zeova mii tõnd ned kam fãa sẽn pa tõe bũmb ninsã. A pa kot tɩ d maan sẽn yɩɩd d pãng ye. (Yɩɩn. 103:12-14) D sã n dat n yɩ burkĩmba, yaa tɩlɛ tɩ d nong a Zeova. D sẽn nong-a to-to la d sakd-a wã segd n yɩɩ ne d sũur fãa zãnga. D sã n kell n tall nonglem a woto baa makr pʋgẽ, wilgdame tɩ d yaa burkĩmba. (1 Kib. 28:9; Mat. 22:37) D miime tɩ bũmb fãa pʋgẽ, a Zeova lugla noy a sẽn dat tɩ d tũ. Sẽn da pak-dã yaa d maan sẽn tat d saasẽ Ba wã yam. D sẽn nong-a wã yĩnga, d sẽn dat n maan a soab fãa, d rengd n tagsa a yelle. Woto wilgdame tɩ d yaa burkĩmba. w19.02 3 s. a 4-5

D sã n tõog n maan sẽn yaa sõma fãa, n ne rẽ nafa wã, d tẽebã pãng paasdame. (Zak 1:2, 3) D sũur me yaa noogo, bala d sẽn maanã kɩtame t’a Zeova sũur noom ne-do, t’a boond-d t’a biiga, hal tɩ rẽ kɩt tɩ d maneg n dat n maan a raabã. (Yel. 27:11) Makr fãa lebgda segb d sẽn paam n na n wilg tɩ d saasẽ Ba wã tũubã wɛɛngẽ, d pa yam a yiib soab ye. (Yɩɩn. 119:113) D na n pʋd n wilgame tɩ d nong-a-la ne d sũur fãa, n dat n sak a noyã la d maan a raabã. (1 Rĩm. 8:61) D na n mi n tudgame bɩ? N-ye. Bala, d yaa neb sẽn pa zems zãnga. D sã n wa tudgi, bɩ d tẽeg rĩm a Ezekɩyaas kibarã. A wa n kongame, la a teka yam n kos sugri, n kell n wɩng ne a Zeova tũub ne a “sũur fãa.” (Eza. 38:3-6; 2 Kib. 29:1, 2; 32:25, 26) Woto wã, bɩ d maan d sẽn tõe fãa t’a Sʋɩtãan ra wa tõog tɩ d tagsa wã lebg wẽns ye. D pʋʋs a Zeova n kos t’a sõng-d tɩ d sakd-a ne d sũur fãa, la d tõog n kell n maan sɩd ne-a.—1 Rĩm. 3:9; Yɩɩn. 139:23, 24. w19.01 18-19 s. 17-18

Tõnd sã n naagd n leokd tigissã sasa, yaa tõnd mengã sõngr yĩnga. (Eza. 48:17) Wãn to? Pipi, d sã n dat n naagd n leokdẽ, rẽ na n kɩtame tɩ d modgd n segend tigissã neere. D sã n segl sõma, sõngdame tɩ d maneg n wʋm Wẽnnaam Gomdã sẽn yetã võor sõma n paase. Yaa d sã n wʋmd goamã võor sõma la d na n bãng n tũ. Yiib-n-soaba, yaa d sã n kẽesd d toog sõma sõsgã pʋgẽ la tigsgã na n yɩ-d noog n yɩɩda. Tãab-n-soaba, sẽn mik tɩ yɩl n leokã baooda modgrã, d pa wae n yĩmd bũmb ning d sẽn yeelã, baa kaoosg zugẽ. Sẽn paase, d goamã sẽn wilgd d tẽebã tata a Zeova yam. D tõe n kɩsa sɩd t’a Zeova kelgda d sẽn leokd tigissã sasa wã, la t’a sũur nooma ne d modgrã. (Mal. 3:16) A sã n neẽ tɩ d maanda d sẽn tõe fãa n na n ta a yam, noom-a lame, t’a ningd-d barka. (Mal. 3:10) Hakɩɩka, bʋʋm waoog sẽn kɩt tɩ d segd n naagd n leokd tigissã sasa. w19.01 8 s. a 3; 9-10 s. a 7-9

A Zeova manesem sẽn yaa to-to ne a nin-buiidã wilgdame t’a yamã ka to ye. A pa kõt tõnd noy ka tɛk ye. Ne sũ-mare, a wilgda tõnd d sẽn tõe n tũ nonglem tõogã to-to. A ratame tɩ d tũ a noyã ne a saglsã, la d kisg sẽn yaa wẽnga. A Biig a Zeezi sẽn zãms nebã bũmb nins tãngã zugã sõngda tõnd tɩ d bãng nebã sẽn maand wẽngã võore. (Mat. 5:27, 28) Dũni-paalgã pʋgẽ, a Zeezi sẽn yaa Wẽnnaam Rĩungã Rĩmã na n ket n zãmsda tõnd sẽn na yɩl tɩ d nong tɩrlem la d kisg sẽn yaa wẽngã wa yẽnda. (Ebre. 1:9) A na n kɩtame me tɩ d lebg neb sẽn zems zãnga, n tar yĩns keelem la tagsa sẽn yaa sõma zãnga. Tags-y n ges-y! D pa na n leb n tʋlg wẽnga, yel-wẽndã biisã me pa na n le tar tõnd n namsdẽ ye. Rẽ masã la d na n paam “Wẽnnaam kambã lohorem sẽn be ziirã” wa a sẽn pʋlmã. (Rom. 8:21) La baa dũni-paalgã pʋgẽ, tõnd lohormã pa na n yɩ lohorem zãng-zãng ye. Yaa d sã n dɩkd Wẽnnaam togs-n-taar bal la d paamd lohorem meng-menga.—1 Zã 4:7, 8. w18.12 23 s. 19-20

Rao ra tõe n basa a paga, a sã n ‘wa mik t’a maana yãnde.’ Tõogã pa wilg “yãndã” sẽn tõe n yɩ bũmb ning ye. La yaa vẽeneg tɩ pa kong-bõoneg ye. Tõe tɩ yaa manesem sẽn ningd yãnde, wall sẽn yaa wẽng wʋsgo. (Tõo. 23:15) Bʋko, a Zeezi wakatẽ wã tɩ zʋɩf-rãmb wʋsg ra basda b pagba, “beegr buud fãa yĩnga.” (Mat. 19:3) Tõnd pa rat n maan wa bãmb a bada! No-rɛɛs a Malaki wakatẽ wã, kãadmã kaoob ra lebga bũmb sẽn wae. Tõe tɩ rapã ra basda ‘pag ning b sẽn peeg b bi-bɩɩlem wakatã,’ n dɩk pʋg-bɩɩg sẽn pa tũud a Zeova. La Wẽnnaam kɩtame t’a Malaki yeel-b vẽeneg yaa: “Mam kisa ned sẽn digd a paga.” (Mal. 2:14-16) Wẽnnaam tagsgã kãadmã zugã pa toeem ye. Wa a sẽn da yeel hal sɩngrẽ wã, a ket n datame tɩ rao “loe a meng ne a paga,” tɩ b yiibã ‘lebg yĩng a yembre.’ (Sɩng. 2:24) A Zeezi me tagsg yaa wa a Ba wã bal kɛpɩ. Yaa rẽ yĩng la a sẽn yeel tɩ “ninsaal da welg bũmb nins Wẽnnaam sẽn lagem ne taabã.”—Mat. 19:6. w18.12 11 s. a 7-8

D tẽed-n-taas kẽer gesame tɩ b tõe n kẽnga zĩig koe-moondb sẽn pa waooge, n tɩ sõnge. B rɩkda no-rɛɛs a Ezayi togs-n-taare. Daar a ye, a Zeova sokame yaa: “Ãnda la mam na n tʋme? Ãnda n na n kẽng tõnd yʋʋr yĩnga?” A Ezayi leokame tɩ: “Ad maam, tʋm-y maam!” (Eza. 6:8) Yãmb me getame tɩ y tõe n sak n tɩ tʋma zĩig ning fãa a Zeova siglgã sẽn dat tɩ y kẽng bɩ? Bõe la y tõe n tɩ sõng n maane? A Zeezi ra goma koɛɛgã mooneg la karen-biisã maaneg yell n yeel yaa: “Dẽ yĩnga, kos-y tigsgã soab tɩ b tʋm tʋmtʋmdb b pʋʋgẽ wã.” (Mat. 9:38) Y tõe n kẽnga zĩig koe-moondb sẽn pa waooge, n tɩ yɩ so-pakd be, wall y sõng ned t’a maan woto bɩ? D tẽed-n-taas wʋsg yeelame tɩ f sã n yik n kẽng zĩig koe-moondb sẽn pa waooge, n tɩ yɩ so-pakd be, yaa segb meng-meng f sẽn paam n tõe n wilg tɩ f nonga Wẽnnaam la f taabã. Y nee bũmb a taab y sẽn tõe n maan n paas Wẽnnaam tʋʋmdã pʋgẽ bɩ? Y sã n yãk bũmb n maane, y sũ-noogã na n yɩɩ wʋsgo. w18.08 27 s. 14-15

Evãnzill-dãmbã tõe n sõnga tõnd tɩ d bãng a Zeova tagsg sẽn yaa a soab ne ligdã la teedã. A Zeova yãka a Maari t’a na n dog a Zeezi, tɩ yẽ ne a Zozɛf wub-a. B yaool n da yaa naong rãmba. (Maan. 12:8; Luk 2:24) A Zeezi rogmã daare, a Maari kong n gãneg-a-la “rũms rɩɩb koglg pʋgẽ, weer sẽn ka be sik-zĩigẽ wã yĩnga.” (Luk 2:7) A Zeova ra tõe n gesame t’a Biigã sẽn na n dog zĩig ningã yɩ sõma n yɩɩd woto. La sẽn da tar yõod n yɩɩd a nifẽ, yaa a Biigã we n paam roagdb sẽn lʋɩɩsd yẽ tũudmã taoore. Kiba-kãngã sẽn be Biiblã pʋgẽ wã wilgda tõnd a Zeova tagsg ligdã la teedã zugu. Roagdb n be n maand b sẽn tõe fãa sẽn na yɩl tɩ b kambã paam b sẽn dat fãa, baa rẽ sã n na n kɩtame tɩ b kambã pa tõe n tall zood sõma ne a Zeova. La yaa vẽeneg tɩ sã n yaa ne a Zeova tagsgo, d sẽn na n tar zood ne yẽ la sõma n yɩɩda. Yãmb me tagsda wa a Zeova bɩ? Y tʋʋm-tʋmdɩ wã la y yel-manesmã wilgda bõe rẽ wɛɛngẽ? w18.11 24 s. a 7-8

Sẽn mik t’a Zeova yaa “sũ-noog buud fãa yẽgrã,” a ratame tɩ tõnd me tall sũ-noogo. Rẽ n so t’a maand bũmb ka tɛk sẽn kɩt tɩ d tõe n paam sũ-noogo. (Tõo. 12:7; Koɛ. 3:12, 13) La vɩɩmã sẽn yaa to-to rũndã-rũndã wã kɩtame tɩ yɩl n tall sũ-noog pa nana ye. Bõe yĩng tɩ d yet woto? Bũmb wʋsg n wat ne yɩɩre, n tõe n kɩt tɩ lebg toog tɩ d kell n tall sũ-noogo. Wala makre, ned d sẽn nong wʋsg sã n maan kaalem, b sã n yiis d ned tigingã pʋgẽ, d kãadem sã n sãame, d tʋʋm sã n sãame, d zakã pʋgẽ sã n yaa zab wakat fãa, d tʋmd-n-taasã bɩ d karen-bi-taasã sã n tar-d n yaandẽ, b sã n namsd tõnd wall b pʋd n kẽes-d bãens-roog d tũudmã yĩnga. D yĩnsã keelem sã n boogdẽ, d sã n bẽed bãag sẽn pa sate, pa rẽ bɩ deprɛsɩyõ, rẽ me kɩtdame tɩ yaa toog tɩ d tall sũ-noogo. La d tẽeg t’a Zeezi Kirist sẽn yaa bark bɩ sũ-noog soaba, n yaa a “yembr tãa n so naamã” nonga nebã belsgo, la a rat n sõng-b tɩ b paam sũ-noogo. (1 Tɩm. 6:15; Mat. 11:28-30) A sẽn na n sõs ne nebã tãngã zugã, a sõdga zʋg-sõma sẽn tõe n sõng-d tɩ d tall sũ-noogo, baa ne d sẽn vɩ a Sʋɩtãan dũniyã pʋgẽ wã. w18.09 17-18 s. a 1-3

Neb kẽer sã n bãng sɩdã, yɩl n sak n bas rog-n-mik la minimd sẽn pa tat Wẽnnaam yamã pa toog ne-b ye. (Yel. 23:23) La sãnda nengẽ yẽ tõe n yɩɩ toog wʋsgo. B zoeta b zakã rãmb manesem sẽn na n yɩ to-to ne-bã, wall b tʋmd-n-taasã, pa rẽ bɩ b zo-rãmbã. B miime tɩ naoor wʋsgo, nebã pa reemd ne rog-n-migs kẽere, wala makre, yaab-rãmbã bɩ kɩɩmsã waoogrã. Woto wã, bõe n na n sõng-d tɩ d tõog n zãag d meng ne rog-n-mik la minimd sẽn pa tat Wẽnnaam yam? D tõe n dɩka yam Efɛɛz kiris-nebã nengẽ. Sẽn wa n bãng-b sɩdã sẽn da nong tɩtã la zĩn-dãmb yɛlã maana wãn n bas rẽ fãa? Ad Biiblã sẽn yete: “[Bãmb] talla b sɛbã n wa yõog bugum nebã fãa taoore. La b geela sɛbã ligd n mik tɩ taa wanzuri ligd tus pis-nu.” (Tʋʋ. 19:19, 20) B sak n yõoga b sɛbã ligd sẽn da yaa toogã, la a Zeova ning-b-la bark rẽ yĩnga. w18.11 7 s. 15-16

Israyɛll nebã sẽn pasg Zʋrdẽ kʋɩlgã poore, daar a ye, a Zozuwe sega rao sẽn wõog a sʋʋg n zãada. Ra yaa a Zeova “tãb-biisã naaba.” Yaa malɛk sẽn wa n na n zab n sõng Wẽnnaam nin-buiidã. (Zoz. 5:13-15.) Malɛkã togsa a Zozuwe b sẽn tog maaneg takɩ, n tõog n deeg Zeriko tẽngã. Bũmb kẽer la a yeel-b tɩ b maane, tɩ ra wõnd pa tar neng ye. Wala makre, a yeelame tɩ b kẽes rapã fãa bãongo. Dẽnd ra na n maana rasem a wãn tɩ b pa tõe n zab ye. (Sɩng. 34:24, 25; Zoz. 5:2) Tõe tɩ Israyɛll tãb-biisã ra sokda b meng yaa: ‘Bɛɛbã sã n wa na n zab ne-do, d maanda wãn n zab n kolg d pagbã la d kambã?’ La bũmb b sẽn da pa tẽed n maane. B wʋmame tɩ “Israyɛll nebã yĩng kɩtame tɩ Zeeriko nebã pag b tẽngã kʋɩlems sõama.” (Zoz. 6:1) Yɛlã sẽn tiig n toeem woto wã pa kɩt tɩ b maneg n kɩs sɩd tɩ b sã n tũ a Zeova goamã la sõma n yɩɩd sɩda? w18.10 23 s. a 5-7

Wãn to la d tõe n wilg tɩ d yaa sik-m-meng soab wa a Polle? Baa sẽn yaa tʋʋmd ning fãa la b kõ tõnd Wẽnnaam tʋʋmdã pʋgẽ tɩ d tõog n maane, d pa segd n baoodẽ tɩ b waoog-do, wall n sak tɩ b kilsd-d rẽ yĩng ye. Bɩ d ned kam fãa sok a meng yaa: ‘M tagsg yaa wãn ne tõnd tigingã mooneg zĩigẽ nebã? M baka neb n sãbsdẽ bɩ?’ Dũniyã gill zugu, a Zeova Kaset rãmbã kẽnda zĩig fãa, n baood neb buud fãa sẽn na n sak n kelg koe-noogã, baa buud nins neb a taabã sẽn pa nandã. Kẽer meng zãmsda nin-bãmb buud-gomdã wall b minimdã. La b zɩ n tags tɩ b sãoo neb nins b sẽn taasd koɛɛgã ye. B maoodame meng n na n bãng ned kam fãa sõma, n tõog tɩ Rĩungã koɛɛgã kẽ a sũurã. w18.09 5 s. a 9, 11

Rom dãmbã wa n paama a Zʋdaas n kʋ. Yẽ la neb a taab sẽn da yaa nen-kɛglem dãmb sẽn yãk b toogo, zʋɩf-rãmbã wʋsg ra gũuda Mesi sɩd-sɩdã. B ra tagsdame t’a na n wa fãag-b-la Rom nebã nugẽ, la a kɩt tɩ Israyɛll le yɩ tẽn-kãsenga. (Luk 2:38; 3:15) Wʋsg ra tẽedame tɩ Mesi wã na n lugla a naamã Israyɛll soolmẽ wã, tɩ zʋɩf-rãmb milyõ-rãmbã sẽn sãeeg n be tẽn-taasã lebg n wa b ba-yirẽ wã. A Zãmbatiis meng ra soka a Zeezi yaa: “Yãmb la sẽn tog n wa-a wã bɩ, bɩ d tog n gũ ned a to?” (Mat. 11:2, 3) Tõe t’a Zãmbatiis ra rat n bãnga sã n yaa a Zeezi bɩ yaa ned a to n na n wa pids bũmb nins fãa zʋɩf-rãmbã sẽn da saagdã. A Zeezi vʋʋgrã poore, karen-biis a yiibã sẽn yã-a Emayus sorã zugã me yeelame tɩ b ra saagdame tɩ Mesi wã n da na n fãag Israyɛll nebã. (Luk 24:21) Rasem a wãn poore, a Zeezi tʋm-tʋmdbã sok-a lame yaa: “Zu-soaba, yaa moasã la y na n deeg Israyɛll soolmã n lebs-ba?”—Tʋʋ. 1:6. w18.06 4 s. a 3-4

Segdame tɩ d gũus ne kibayã d sẽn wʋmdã, sẽn yɩɩd fãa sã n yaa kibar sẽn gomd a Zeova nin-buiidã yelle. D ra yĩm tɩ Biiblã yeelame t’a Sʋɩtãan yaa a soab ning sẽn dõt sẽn tũud-b a Zeova wã ye. (Vẽn. 12:10) A Zeezi me ra pĩnd n yeelame tɩ bɛɛbã na n ‘sa n sãama’ tõnd yʋʋre. (Mat. 5:11) D sã n tẽegd rẽ, na n sõngame tɩ d sã n wa wʋm kibay sẽn sãamd a Zeova nin-buiidã yʋʋre, bɩ ra ling-d ye. Yãmb yaa ned sẽn wae n dɩkd kibay nins y sẽn paamdã n toond y mitinsi, la y zo-rãmb bɩ? Y sã n paam kiba-paalle, y yãgdame n na n tool-a neb a taaba, wa kiba-kɩt sẽn dat n yɩ pipi n togs a sẽn wʋm bɩ? Gũus-y-yã! Nand tɩ y tool ned mesaaz y sẽn paame, sok-y y meng yaa: ‘M kɩsa sɩd tɩ b sẽn yeelã yaa sɩd bɩ? Bõe n wilgd tɩ m sẽn wʋmã yaa sɩda?’ Y sã n pa mi sã n yaa sɩd bɩ ziri bɩ y gũusi, bala tõe tɩ yaa ziri la y na n sõng n yelg d tẽed-n-taasã sʋka. Y yam sã n yooda, bɩ y ra tool ye. Yẽes-y-yã! w18.08 3 s. a 3; 4 s. a 6-7

A Zeezi ratame tɩ d yɩ kõatba, n paam sũ-noogo. D sã n nong n kõt d taabã, bãmb me na n yɩɩ kõatba. Yaa sɩd tɩ d sã n yaa kõatba, pa nebã fãa n na n wilg tɩ b sũur nooma ne rẽ ye. La tõe n kɩtame tɩ sãnda rɩk d togs-n-taare, n lebg kõatb me. Rẽ wã yĩnga, yɩ-y kõatba, baa wõnd nebã pa nande. Y sã n maan ned neer baa yaa vugri, y pa tõe n bãng a nafa wã fãa ye. Sẽn yaa-b kõatb meng-mengã pa maand b taabã neere, n dat tɩ b maan-b n lebs ye. Yaa rẽ yĩng la a Zeezi sẽn yeel yaa: “Fo sã n na n bool neb tɩ b wa n dɩ ne foom, bool naong rãmba, la koms-rãmba, la wobse, la zoense, la fo na n paama sũ-noogo, b sẽn ka tar n na n kõ foom n lebsã yĩnga.” (Luk 14:13, 14) Biiblã pʋgẽ me, b yeelame: “Maan-neer soab na n paama barka.” Ad b sẽn yeel me: “Bark bee sẽn tagsd-a pãn-komsem soab yell zugu!” (Yel. 22:9; Yɩɩn. 41:2) D segd n yɩɩ kõatba, d sẽn dat ne d sũur fãa n sõng d taabã yĩnga. w18.08 21-22 s. 15-16

Rũndã-rũndã, d sã n paam kibare, yɩl n tags neer n bãng sã n yaa sɩd bɩ ziri yaa toogo. Bõe yĩnga? Bala kibayã wʋsg pa sɩd zãnga, wall yaa b sẽn togs n kelle. Sẽn paase, d yaa neb sẽn pa zems zãnga. La bõe n tõe n sõng-do? Biiblã tara sagls sẽn tõe n sõng-do. Wala makre, Biiblã yetame tɩ d sã n ka kelg n tɩg n yaool n leoke, yaa yalemdo. (Yel. 18:13) Biiblã leb n sagend-d lame tɩ d ra tẽ bũmb ning fãa d sẽn wʋme, n pa reng n bao n bãng sã n yaa sɩd ye. (Yel. 14:15) Baa d sẽn tũ a Zeova n kaoos to-to fãa, d segd n gũusame, n da wa teeg d meng tagsg ye. Biiblã saglsã tõe n sõng-d lame, tɩ yell fãa pʋgẽ bɩ d maan gũusgu, n deng n bao n bãng a vɩʋʋgo, n tõog n yãk d sẽn na n maanegã. w18.08 7 s. 19

D sã n dɩk d meng n kõ a Zeova n deeg lisgu, d wilgdame tɩ d sũur nooma d sẽn paam n naag a nin-buiidã. Ne lisgã maasem, d wilgda nebã tɩ d sakame tɩ yaa a Zeova n so tõndo, la tɩ d rata ne d sũur fãa n maan a raabã wakat fãa. A Zeezi me sẽn wa n na n deeg lisgã, a maana a buudu. Yaa wa a sẽn yeel a Zeova yaa: “Mam Wẽnnaam, mam dat n maana yãmb daabo.” (Yɩɩn. 40:8, 9) A Zeezi sẽn deeg lisgã, yɩɩ a Zeova noog bɩ? Ad Biiblã sẽn yeele: “A Zeezi sẽn paam lisg n sa, b yii koomẽ wã. La gese, yĩngr pakame, la bãmb yãnda Wẽnnaam Sɩɩg sẽn wẽnd wall t’a sigd bãmb zugu. La koɛɛg zĩnda saasẽ n yeele: ‘Ada yaa mam Bi-ribl-nongr sẽn ta mam yam zãnga.’” (Mat. 3:16, 17) Yaa sɩd t’a Zeezi ra zoe n yaa a Zeova Biiga, la a sẽn dɩk a meng n ko-a ne yamleoog n na n maan a raabã ne a sũur fãa wã yɩɩ a Zeova noog hal wʋsgo. Tõnd me sã n dɩk d meng n kõ a Zeova, a sũur nooma wʋsgo, t’a na n ning-d barka.—Yɩɩn. 149:4. w18.07 23 s. a 4-5

A Moyiiz sẽn yeel tɩ ‘tõndã’, tõe t’a ra rat n yeelame tɩ yẽ ne a Aarõ. A gomdã paooga a Zeova wʋsgo. Bala, pa wilgd tɩ yaa a Zeova n maan yel-solemdã ye. Yɩɩn-sõamyã 106:32, 33 yetame: ‘Bãmb sẽn wa n be Meriba koomã noorã b yika Sẽn-Ka-Saab sũurã, la bãmb manesmã waa ne yell a Moyiiz zugu. Bala, bãmb maaname t’a Moyiiz sũurã yiki, t’a gom n ka yals n tags ye.’ (Sõd. 27:14) Sẽn yaa a soab fãa, a Moyiiz sẽn maan to-to wã kɩtame t’a Zeova ka paam waoogr wa sẽn segdã ye. A Zeova yeela a Moyiiz ne a Aarõ yaa: “Yãmb kɩɩsa mam noorã.” (Sõd. 20:24) Ad sɩd yaa yel-wẽn-kãsenga! A Zeova ra zoe n sɩbga Israyɛll nebã zãmaan a ye tõre, n yeel tɩ b kõn kẽ kãabg tẽngã pʋga, b sẽn kɩɩs-a yĩnga. (Sõd. 14:26-30, 34) Dẽnd a Moyiiz me sẽn kɩɩs a Zeova, t’a yeel t’a kõn kẽ kãabg tẽngẽ wã yaa bũmb sẽn segde. A Zeova ka bas yẽ me t’a kẽ kãabg tẽngẽ wã ye. w18.07 14 s. a 9, 12; 15 s. 13

Baa d sã n tar sor n na n yũ rãam, d na n sak n basame n da yũ, d sã n mi tɩ na n namsa d tẽed-n-taaga. Tõe tɩ d tẽed-n-taag ning ra yaa rãamã yamb nand t’a bãng a Zeova, n yãk yam n pa na n tol n le yũ ye. D pa rat n maan baa fʋɩ sẽn na n kɩt t’a wa le rɩk a pĩnd zʋgã ye. (1 Kor. 6:9, 10) Rẽ wã, d sã n bool d tẽed-n-taag a woto d zakẽ, n kãab-a rãam t’a zãgse, tɩ d pẽdgd-a t’a we n yũ bala, d wilgd-a-la d nonglem sɩda? A Tɩmote sẽn wa n kolg yʋʋm 20 bɩ sẽn yɩɩd rẽ bilfu, a sakame tɩ b kẽesa bãongo, baa sẽn da na n zab-a wʋsgã. La yaa zʋɩf-rãmb nins a sẽn na n tɩ taas koɛɛgã sũur-kaset yĩnga. Wa a Polle, a Tɩmote me ra pa rat n yɩ kug-lakdg ned yĩng ye. (Tʋʋ. 16:3; 1 Kor. 9:19-23) Yãmb me sakd n mongda y meng bũmb kẽer y taabã yĩng bɩ? w18.06 18-19 s. 12-13

Y sã n seg ned sẽn pa a Zeova Kaset soaba, tɩ yaa y sẽn yãt-a pipi, y sẽn tõe n bãng a soab zug zĩig pʋgẽ wã pa waoog ye. Y tõe n bãnga a yʋʋre, la a nengã yalẽ wã. Naoor wʋsgo, pa zʋʋgd rẽ ye. La sã n yaa a Zeova Kaset soaba, yaa toore. Y miime t’a nonga a Zeova. Y miime me t’a Zeova yãa zʋg-sõma a nengẽ la a sẽn sõng-a t’a wa be tũudum hakɩɩkã pʋgẽ wã. (Zã 6:44) Baa a sẽn yitẽ, la baa b sẽn wub-a to-to, y zoe n mii bũmb wʋsg a zugu, tɩ yẽ me mi bũmb wʋsg yãmb zugu. Yãmb ne y tẽed-n-taag sã n seg taab pipi, y yiibã fãa zoe n miime tɩ y gomda buud-gomd sẽn yaa yɩlemdã. Rat n yeelame tɩ y yiibã fãa tẽeda a Zeova la y tũud-a. A noyã y sẽn tũudã me yaa yembre. Y fãa tẽedame tɩ manegr n wate. Woto fãa kɩtame tɩ y tõe n kɩs taab sɩda, n yõg zood sẽn tar pãnga, tɩ na n kaoos wakat fãa. w18.12 21 s. a 9-10

Kiristã kɩtame tɩ taoor lʋɩtbã yiis noor n wilg vẽeneg tɩ bãongã pa tɩlɛ ne kiris-neb nins sẽn yaa bu-zẽmsã ye. (Tʋʋ. 15:19, 20) Baasgo, yʋʋm wʋsg poore, kiris-neb wʋsg sẽn da yaa zʋɩf-rãmb ra ket n kẽesda b kom-dibli wã bãongo. La tõe tɩ d sokda d meng yaa: ‘Sẽn mik t’a Zeezi kũumã kɩtame t’a Moyiiz tõogã ta a tɛkã, bõe yĩng t’a Zeezi bas tɩ bãongã yell kaoos yʋʋm wʋsg woto?’ (Kol. 2:13, 14) B sã n wa toeem Wẽnnaam tũudmã yell ninga, tõe n kaoosa bilf tɩ kẽer yaool n wa sake. Ra yaa toog ne kiris-neb kẽer sẽn da yaa zʋɩf-rãmb tɩ b sak zĩig pʋgẽ t’a Moyiiz tõogã tũub pa le yaa tɩlɛ ne-b ye. (Zã 16:12) Yɩɩ toog ne-b tɩ b sak tɩ bãongã pa le yaa bãnd sẽn wilgd tɩ f yaa Wẽnnaam ned ye. (Sɩng. 17:9-12) Sãnda ra yɛɛsda zʋɩf-rãmb a taabã na n wa nams-ba, b sã n neẽ tɩ b pa maand wa bãmba. (Gal. 6:12) La Kiristã wa n vẽnega a Poll t’a gʋls lɛta, n sõng kiris-nebã tɩ b wʋm yɛlã võor sõma.—Rom. 2:28, 29; Gal. 3:23-25. w18.10 24-25 s. 10-12

A Kayif basame tɩ zĩigã sobg t’a tʋm sodaas tɩ b na n tɩ yõk a Zeezi. La a Zeezi ra miime tɩ b baood n na n kʋ-a lame. Rẽ n so t’a sẽn wa n dɩt ne a tʋm-tʋmdbã nand tɩ b wa yõk-a wã, a yeel-b tɩ b bao sʋʋs a wãna. B ra tara sʋʋs a yiibu. Rẽ ra seka a na paam n sõng-b tɩ b bãng bũmb sẽn tar yõodo. (Luk 22:36-38) Kʋʋngã sẽn wa ne yʋngã n na n yõk a Zeezi wã, a Pɩyɛɛr sũurã yikame t’a kɛ b nin-yend ne sʋʋga. Yaa vẽeneg tɩ yaa a sẽn da get tɩ b sẽn maandã yaa kɛgrã. (Zã 18:10) La a Zeezi yeela a Pɩyɛɛr yaa: “Lebs f sʋʋgã n sui a wʋʋgẽ. Bala, neb nins fãa sẽn na n zab ne zabr sʋʋga, zabr sʋʋg n na n kʋ-ba.” (Mat. 26:52, 53) Ad woto sõng-b lame tɩ b bãng tɩ b pa segd n yɩ dũniyã rẽnd ye. Kell n zemsa ne a Zeezi sẽn da reng n pʋʋs baraar yʋng n yeel bũmb ningã. (Zã 17:16) Yaa Wẽnnaam a ye tãa n tar sor n na n zab ne yel-kɛgã. Yaa rẽ yĩng la a Zeova nin-buiidã yẽ sẽn zemsd taaba, tɩ laafɩ be b sʋkã. A Zeova sã n get welsgã sẽn be dũniyã pʋgẽ to-to wã, tɩ yẽ nin-buiidã yaool n tũud-a ne yam a yembrã, noom-a-la hal wʋsgo.—Sof. 3:17. w18.06 7 s. 13-14, 16

A Sʋɩtãan pa bẽt tõnd bal ye. Wakat ning me, a bugsda tõndo, n dat tɩ rabeem yõk-d tɩ d kɩɩs a Zeova. Wala makre, a tõe n pirsa goosneema-rãmbã tɩ b yiis noor n gɩdg koɛɛgã moonego, pa rẽ bɩ a kɩt tɩ d karen-bi-taas wall d tʋmd-n-taas yaand tõndo, d sẽn tũud Biiblã saglsã yĩnga. (1 Pɩy. 4:4) A Sʋɩtãan tõeeme me n kɩt tɩ d zakã neb sẽn pa tũud a Zeova maand b sẽn tõe fãa sẽn na yɩl tɩ d ra le kẽnd tigissã, n tagsdẽ tɩ yaa d neer la b baooda. (Mat. 10:36) Bõe n na n sõng-d t’a ra tõog-do? Pipi, d ning d yamẽ t’a Sʋɩtãan sẽn zabd ne tõndã, a pa tõe n pa mi n bugs-d ye. (Vẽn. 2:10) D tẽegdẽ me tɩ pa zaalem la a sẽn maand woto wã ye. A yeelame tɩ yaa yɛlã sã n yaa nana ne-d bal la d tũud a Zeova, la tɩ sã n wɩnge, d na n bas-a lame. (Zoob 1:9-11; 2:4, 5) Sẽn paase, wakat fãa bɩ d teeg a Zeova t’a kõ-d pãng tɩ d kell n sak-a. D tẽeg t’a Zeova pa na n tol n bas tõnd a bada!—Ebre. 13:5. w18.05 26 s 14

Baa sã n wõnda nebã pa kelgd Rĩungã koɛɛgã d sẽn moondã, d pa segd n tags tɩ d tʋʋmdã yaa zaalem ye. Yaa sɩd tɩ neb wʋsg pa kelgd ye. La b geta tõnd yel-manesmã. B neeme tɩ d manegda d mens sõma, n waoogd d taabã, la d tar zood manesem ne nebã. D yel-manesmã tõe n wa kɩtame tɩ kẽer bãng tɩ b tagsgã tõnd zugã pa zemse, hal n toeeme. A Sɛrzio ne a Olinda sẽn yaa so-pakdbã yeelame: “Wakat n zĩnd tɩ d ra pa le kẽngd zĩig ning neb wʋsg sẽn pʋɩɩgd wã, d yĩnsã sẽn da zabd yĩnga. D sẽn wa n le sɩng kẽndã, so-loaadb n sok tõnd yaa: ‘Yaa bõe n da tar-yã? Ad yaa kaoosgo.’” Hakɩɩka, d ‘sã n pa bas tɩ d nus yɩ zaalem’ Rĩungã bõn-buudã bʋdb pʋgẽ, d paamd n naag n sõngame tɩ koe-noogã ta zĩig fãa, tɩ yɩ “kaset soolem toay-toayã fãa nebã yĩnga.” (Mat. 24:14) La sẽn yɩɩda, d sẽn mi tɩ d tata a Zeova yamã kõt-d-la sũ-noog wʋsgo, bala a Zeova nonga neb nins fãa sẽn “womd biis ne sũ-marã.”—Luk 8:15. w18.05 16 s. 16-18

Hal ninsaalbã sẽn lebg yel-wẽn-maandbã tɛka, a Zeova wilgame t’a yaa Wẽnnaam sẽn belsd nebã la a kengd b raoodo. A Ãdem ne a Awa kɩɩsgã poor bala, a togsa bãngr-gomd ning sẽn be Sɩngr 3:15. Ãdem-biisã sã n da wa wʋm bãngr-gomdã võore, ra na n kõ-b-la raoodo, tɩ b kɩs sɩd tɩ wakat n wat t’a Zeova na n kɩt tɩ b sãam a Sʋɩtãan b sẽn boond tɩ “wag-kʋdrã” ne a tʋʋmã fãa. (Vẽn. 12:9; 1 Zã 3:8) A Nowe wakatẽ wã tɩ dũniyã ra pida ne neb sẽn nong nen-kɛglem la yoobo. Yaa a Nowe ne a zakã rãmb bal n da tũud a Zeova. Woto ra tõe n komsa a Nowe raood zãnga. (Sɩng. 6:4, 5, 9, 11; Zʋʋd 6) La a Zeova togsa a Nowe t’a na n wa sãama nin-wẽnsã, la a yeel-a a sẽn na n maan bũmb ning tɩ yẽ ne a zakã rãmb paam n põse. (Sɩng. 6:13-18) A Zeova gom-kãensã kɩtame t’a Nowe bãng vẽeneg t’a yaa Wẽnnaam sẽn kengd nebã raoodo. w18.04 15 s. a 1-2

Nina pa nong goama, n tagsdẽ t’a pa tol n tõe n keng a taabã raood ye. La baa d pa nong goama, d tõe n kenga d taabã raood hal sõma. D sã n dat n keng d to raoodo, pa tɩlɛ tɩ d maan bõn-kãseng ye. D sã n wa pʋʋsd neda, d tõe n yõgemda d noor ne-a. A soab sã n pa yõgemd a noor ne-do, tõe tɩ yaa bũmb n namsd-a, t’a rat ned n togs sẽn be a sũurẽ wã. D sã sak n na n kelg-a, rẽ meng zoe n tõe n yols-a lame. (Zak 1:19) D fãa tõe n maana bũmb n sõng d tẽed-n-taag sẽn dat belsgo. Rĩm a Salomo ra yeelame yaa: “Gomd b sẽn leok sẽn zems a wakat kõta sũ-noogo. Ned sã n yõgemd a noor ne foom, a noogda f sũuri, la kiba-noog paasda yĩns keelem.” (Yel. 15:23, 30) A Poll yeelame tɩ d sã n naag taab n yɩɩl Rĩungã yɩɩla, rẽ me kengda raoodo. (Kol. 3:16; Tʋʋ. 16:25) A Zeova “daarã” sẽn tar kolgrã, na n maneg n yɩɩ tɩlɛ tɩ d kengd taab raood n yɩɩd pĩndã.—Ebre. 10:25. w18.04 23 s. 16; 24 s.18-19