Yʋʋm-sare

A Zeezi zʋg-sõng a ye sẽn noom nebã wʋsg yaa a sẽn mi nebã zu-loeesã sẽn namsd-b to-to wã, n kʋmd-bã. A yɩɩ ned sẽn da tõe n bãng n ‘maan sũ-noog ne neb nins sẽn maand sũ-noogo, la a yãb ne neb nins sẽn yãbdã.’ (Rom. 12:15) Wala makre, daar a ye, a Zeezi tʋma a karen-biis 70 tɩ b tɩ moon koɛɛgã. B lebg n waa a nengẽ ne sũ-noogo, tʋʋmdã sẽn wom biis sõma wã yĩnga. Biiblã yeelame tɩ wakat kãnga, vʋʋsem sõngã ‘kɩtame t’a Zeezi paam sũ-no-kãsenga.’ (Luk 10:17-21) La a sẽn wa n yã a Lazaar nebã sẽn yãbd a kaalmã, Biiblã wilgame t’a “yĩngã rigimdame,” la t’a “sũurã sãamame.” (Zã 11:33) Bõe n sõng a Zeezi sẽn da yaa ned sẽn zems zãngã, t’a ra tõe n bãng n kʋm ninsaalbã sẽn pa zems zãngã? Bũmb sẽn sõng-a n tɩ yɩɩd yaa a sẽn da nong nebã. (Yel. 8:31, Wẽnnaam Sebre, 1983) A sẽn da nong ninsaalbã woto wã kɩtame t’a bao n na n bãng b tagsg sẽn wae n yaa to-to yell fãa pʋgẽ. Ad tʋm-tʋmd a Zã sẽn yeele: “Bãmb mengã mii bũmb ning sẽn be ninsaal pʋgẽ.”—Zã 2:25. w19.03 20 s. a 1-2

A Sʋɩtãan kɩtame t’a Zoob bõn a paoongã, la a kʋ a tʋm-tʋmdbã, la a kɩt t’a yʋʋrã sãame. A pa bas a zakã rãmb me ye. A pʋd n kʋʋ a kambã a sẽn da nong wʋsgã. Bãmb piigã fãa! Rẽ poore, a lobg-a-la bã-toaaga. A yĩngã fãa ra yaa noada, sẽn sɩng ne a nao-pʋsã n tɩ tãag a zugã. Sũ-sãangã sãaga a pagã, hal t’a yeel t’a tʋʋs Wẽnnaam la a ki tɩ sa. A Zoob mengã wa n datame n ki, la a kell n pa bas a burkĩndã ye. Wakat kãng la a Sʋɩtãan bao sɩlem a to, n na n nams a Zoobe. A tũnuga ne rap a tãab sẽn da yet tɩ b yaa a Zoob zo-rãmba. B tɩ zĩnda ne a Zoob n maan rasma, la b goamã pa bels-a baa bilfu. B pʋd n goma a Zoob la b rõd-a, n pa zoe a nimbãaneg ye. B yeelame tɩ yaa Wẽnnaam n sɩbgd a Zoobe, la tɩ Wẽnnaam toog kae ne a burkĩndã ye. B yeelame meng t’a Zoob yaa nin-wẽnga, la tɩ bũmb nins sẽn paamd-a wã yaa a wẽnemã biisi.—Zoob 1:13-22; 2:7-11; 15:4, 5; 22:3-6; 25:4-6. w19.02 4 s. a 7-8

Rabeem buud n be n yaa sõma. Wala makre, segdame tɩ d zoet rabeem, n pa rat n wa maan bũmb n sãam a Zeova sũur ye. Rabeem a woto buudã sã n da tar a Ãdem ne a Awa, b ra pa na n kɩɩs a Zeova, n lebg tõatb ye. Bʋko, b kɩɩsame. B kɩɩsgã poore, b ninã pukame, rat n yeel tɩ b bãngame tɩ b lebga yel-wẽn-maandba. Yel-wẽnã la kũumã bal la b ra tar n na n kõ b kambã la b yagensã. B ninã sẽn puk tɩ b bãng tɩ b kɩɩsa Wẽnnaamã, rẽ masã la yãndã yõk-ba, b sẽn yaa b zaala yĩnga, tɩ b bao vãad n sẽgne. (Sɩng. 3:7, 21) D sã n zoet a Zeova, yaa sõma. La rabeem buud n be d sẽn pa segd n zoe. Wala makre, d pa segd n zoe kũum tɩ loog ye. Bala, a Zeova maana bũmb tɩ pak sor tɩ tõnd tõe n wa paam vɩɩm sẽn kõn sa. D sã n maan yel-wẽnde, n tek yam n kos sugr ne d sũur fãa, a Zeova na n kõ-d-la sugri. D sẽn tar tẽeb t’a Biigã sẽn ki wã ronda tõnd yel-wẽnã, a Zeova na n tika rẽ n sak n kõ-d sugri. Bũmb a ye sẽn wilgd vẽeneg tɩ d tara tẽebo, yaa d sẽn na n dɩk d meng n kõ Wẽnnaam n deeg lisgu.—1 Pɩy. 3:21. w19.03 5-6 s. 12-13

Bʋʋm waoog sẽn da segd n kɩt tɩ Israyɛll nebã wilg tɩ b sũur nooma ne a Zeova sẽn maan-b neer to-to wã. A kɩtame tɩ tood piig paam Ezipt nebã, tɩ b yaool n na n sak n bas Israyɛll nebã tɩ b looge. Rẽ poore, mog-miuugẽ wã, a fãag-b-la Ezipt sodaasã nugẽ. A kɩtame tɩ koomã lim sodaasã, n kʋ-b zãnga. Baraarã, Israyɛll nebã yɩɩla tõogr yɩɩll n pʋʋs Wẽnnaam bark ne sũ-no-kãsenga. La zãaga zĩig bɩ? B paama zu-loɛɛg a to, n wẽneg n yĩm a Zeova sẽn maan-b neer ningã fãa. B sẽn maan bũmb ningã wilgame tɩ b pa mi b zaamẽ ye. (Yɩɩn. 106:7) Bõe yĩng tɩ d yet woto? Ad Biiblã sẽn yete: “Israyɛll nebã yẽgma ne a Moyiis la a Aarõ.” La togs sɩdã, yaa ne a Zeova la b sẽn yẽgmã. (Yik. 16:2, 8) Nin-buiidã manesmã sẽn wilg tɩ b yaa zɩ-beoog rãmbã sãama a Zeova sũur wʋsgo. A wa n pʋd n yeelame t’a Zozuwe ne a Kalɛɛb sẽn yãk b toogo, zãmaan-kãng nebã fãa na n kii we-rasempʋɩɩgẽ wã.—Sõd. 14:22-24. w19.02 17 s. 12-13

A Zeezi pa bao tɩ b waoog-a tɩ loog noor ye. Rẽ n so t’a pa yeel a karen-biisã tɩ b maand bũmb sẽn yaa hobragi n tẽegd a kũumã yellã. Pʋd n yaa bũmb sẽn yaa nana la a yeel tɩ b maand yʋʋmd fãa n tẽegd a kũumã. (Zã 13:15; 1 Kor. 11:23-25) Woto wilgdame t’a Zeezi pa wuk-m-meng soab ye. D sũur nooma d sẽn paam tɩ d Rĩmã yaa sik-m-meng soab woto wã. (Fili. 2:5-8) Wãn to la d tõe n dɩk a Zeezi togs-n-taare, n yɩ sik-m-mens rãmba? Yaa d sẽn na n baood d taabã nafr n yɩɩda. (Fili. 2:3, 4) Tẽeg-y a Zeezi kũumã sẽn wa n ket tɩ beoogã. A ra miime tɩ ka la bilfu, a na n paama nams-toaaga, hal n ki. Baasgo, a ra maanda yɩɩr wʋsg a tʋm-tʋmdbã yĩnga, bala a kũumã na n sãama b sũur hal wʋsgo. Rẽ n so tɩ baraarã, a sõs ne-b yʋngã tõre, n zãms-b bũmb wʋsgo, la a keng b raoodo. (Zã 14:25-31) A Zeezi talla sik-m-menga, n lʋɩɩs neb a taabã neerã yell taoore. Ad yaa mak-sõng d sẽn tog n tũ! w19.01 21 s. a 5-6.

Yãmb sã n wa rat n zẽk y nug n leok gomd tigissã sasa fãa, y sũurã kiuusda wʋsg bɩ? Sã n yaa rẽ bɩ y bãng tɩ y pa y yembr ye. Togs sɩdã, d fãa la bal sã n mi n dat n leoke, rabeem tar-d-la baa yaa bilfu. Yɩl n tõog rabeemã, yaa tɩlɛ tɩ y reng n bao n bãng bũmb ning sẽn wat ne-a wã. Y yɛɛsda y na n wa yĩm y sẽn dat n yeelã bɩ, bɩ y zoeta y na n wa leok tɩ pa zemse? Tõe tɩ y tagsdame tɩ y leoorã pa na n yɩ sõma wa neb a taabã rẽnd ye. La bãng-y tɩ rabeem a woto tõeeme n pa wẽng ye. Wilgdame tɩ y yaa sik-m-meng soaba, la tɩ y getame tɩ y taabã yɩɩda yãmba. A Zeova nonga sik-m-mens rãmbã. (Yɩɩn. 138:6; Fili. 2:3) La a ratame me tɩ tigissã sasa bɩ y naagd n leokdẽ, n pẽgd yẽ la y kengd y tẽed-n-taasã raoodo. (1 Tes. 5:11) A sẽn nong yãmbã, a na n kõ-y-la raood tɩ y tõog n maan woto. D ges bũmb a wãn Biiblã sẽn yete. Biiblã yetame tɩ tõnd fãa tudgda d goamã pʋgẽ, rat n yeel tɩ d sẽn yet bũmb ninsã, la d sẽn yet rẽ to-to wã me pʋgẽ. (Zak 3:2) A Zeova pa baood tɩ d sẽn maand fãa zems zãnga, d tẽed-n-taasã me pa baood rẽ ye. (Yɩɩn. 103:12-14) D tẽed-n-taasã nonga tõndo, d yaa wa zak a ye rãmba. (Mark 10:29, 30; Zã 13:35) B miime tɩ wakat ninga, pa d sẽn dat n yeelã kɛpɩ la d tõogd n yeel ye. w19.01 8 s. a 3; 10-11 s. 10-11

Woto maaneg pa nana dũni-kãngã pʋgẽ ye. La pa rat n yeel tɩ pa tõe ye. A Zeova ratame tɩ y vɩɩmã tall barka, n kõt-y sũ-noogo. Ne a sõngre, y tõe n paamame tɩ y vɩɩmã tall bark masã menga, la baa y sã n wa lebg kãsemba. D gom Israyɛll nebã sẽn tõog n zab n deeg kãabg tẽngã yelle, tɩ sõng-d tɩ d rɩk yam. Israyɛll nebã sẽn wa n kolg kãabg tẽngã, a Zeova pa yeel-b tɩ b mao n paam zabr minim n paase, wall tɩ b segl b mens zabr yĩng ye. (Tõo. 28:1, 2) A yeel-b lame tɩ b sak yẽ tõodã la b teeg-a. (Zoz. 1:7-9) Ne ninsaal tagsgo, wõnda saglg sẽn ka nenga. La ra yaa sagl-sõng tɛkẽ! Sɩd me, a Zeova sõng-b lame tɩ b tõog n dees Kanaã tẽnsã yembr-yembre. (Zoz. 24:11-13) Sẽn na yɩl n sakd Wẽnnaam, yaa tɩlɛ tɩ d kɩs-a sɩd zãnga. La d sã n kɩs-a sɩd woto, d sẽn maand fãa yãkda nenga. Pĩnd wẽndẽ, ra yaa woto, la baa rũndã-rũndã menga. w18.12 25 s. a 3-4

Rũnda-rũndã, neb n wa n yãk b yam n bas sɩdã. Kẽer nengẽ, yaa Biiblã gomd la siglgã maneg n wɛgs tɩ b getẽ tɩ pa zems ye. Sãnda kelga sɩdã kɩɩsdbã la neb a taab sẽn gomd n sãbsd tõnd tũudmã, b sẽn pa nong tõndã yĩngã. Yaa woto fãa n kɩt tɩ kẽer yãk yam n “wẽnemd n bas” a Zeova ne a nin-buiidã. (Ebre. 3:12-14) B sã n da rɩk tʋm-tʋmd a Pɩyɛɛr togs-n-taar n são. Nebã sũy sẽn wa n sãam ne a Zeezi goamã, tɩ b yãk yam n pa na n le tũ-a wã, a soka a tʋm-tʋmdbã tɩ bãmb me pa na n loog n bas yẽ la? Sãnda me yaa bilf-bilf la b wa n bas sɩdã. Tõe meng tɩ b pa bãng tɩ b ra zãagda ne a Zeova ye. Yaa wa koom-koglg sẽn na n zãagd bilf-bilf ne kʋɩl-koaka. Biiblã keoogda tõnd tɩ d gũus n “da wa bʋdg” n bas sɩdã ye. (Ebre. 2:1) Naoor wʋsgo, ned sẽn bʋdgd n basd sɩdã pa mi t’a bʋdgdame ye. La yaa bilf-bilf la a basd tɩ yẽ ne a Zeova zoodã pãng boogdẽ, hal n wa sãame. w18.11 9 s. a 5-6

Y ratame n paam minim la bãngr n paase, n tõog n tʋm a Zeova tʋʋmã sõma n paas bɩ? Sã n yaa woto, y tõe n kos n kẽnga Rĩungã koe-moondb lekolle. Lekoll-kãng sõngda saam-biis la saam-bi-pogs tẽeb sẽn bɩ, la sẽn kẽes b mens zãng a Zeova tʋʋmdã pʋgẽ, tɩ b tõe n paam minim n tõog n tʋm tũudmã tʋʋm n paase. Neb nins sẽn kot n na n kẽng lekoll-kãngã segd n sakame n na n kẽng zĩig ning fãa siglgã sẽn na n tʋm-b lekollã poorã. Yãmb datame n kẽng Rĩungã koe-moondb lekolle, n wa paam n tʋm a Zeova tʋʋmã n paas bɩ? (1 Kor. 9:23) D sẽn yaa a Zeova nin-buiidã, d yaa kõatba, n nong d taabã, la d maand-b neere. Daar ne a to fãa, d wilgdame tɩ d taabã yell pak-d lame. D sẽn maand woto wã kɩtame tɩ d tar sũ-noogo, la sũur pʋgẽ bãane. (Gal. 5:22, 23) Baa y vɩɩmã sẽn yaa to-to fãa, y sã n dɩkd a Zeova togs-n-taar n yaa kõata, la y naagd-a n tʋmdẽ, y na n paama sũ-noogo.—Yel. 3:9, 10. w18.08 27 s. 16-18

Tõe tɩ kẽer sokda b meng yaa: ‘Bʋʋm bee sẽn kõt kiris-ned sor t’a tõe n kao a kãadem, n lebg n kẽ kãadem ne ned a to bɩ?’ Ad a Zeezi sẽn yeele: “Ned sã n dig a pag n dɩk pag a to, a yaa yoaad a pipi pagã nifẽ. La pag sã n bas a sɩd n dɩk a to, a maanda yoobo.” (Mark 10:11, 12; Luk 16:18) Dẽnd yaa vẽeneg t’a Zeezi waoogda kãadmã, n dat tɩ neb a taabã me maan woto. Ned sã n bas a pag wall a sɩd n tɩ rɩk ned a to, yaa yoobo. Sɩd me, a sẽn bas-a wã pa rat n yeel tɩ kãadmã kaool saame ye. Wẽnnaam nifẽ, b ket n yaa “yĩng a yembre.” Sẽn paas menga, a Zeezi yeelame tɩ ned sẽn basd a paga, t’a yaool n pa maan sẽn yaa wẽnga, a kɩtdame t’a kẽ yoobo. Wãn to? Wakat kãngã, rao sã n bas a paga, pagã tõe n getame tɩ yaa tɩlɛ t’a lebg n kẽ kãadem, n paam ned t’a get a yelle. A sã n yaool n kẽ kãadem ne ned a to, yaa yoobo. w18.12 11 s. a 8-9

A Habakuk sẽn yẽs ne a Zeova wã, sõngame t’a yamã gãande. Rẽ n so t’a yãk yam n na n kell n gũ a Zeova, n kɩs sɩd t’a na n wa welga yellã. A Habakuk ra sɩd rata ne a sũur fãa n gũ a Zeova, bala, a wa n le yeelame yaa: “M dag n yasa sɩɩ n gũudẽ, m dag n gũuda sũ-sãangã daare.” (Hab. 3:16) A Habakuk sẽn yãk yam ningã kõta tõnd yam-bʋgo? Pipi, baa sẽn yaa yell ning fãa n namsd tõndo, d pa segd n bas a Zeova pʋʋsg a bada! Yiib-n-soaba, d segd n kelgda bũmb nins fãa a Zeova sẽn yet tõnd ne a Gomdã la a siglgã maasmã. Tãab-n-soaba, d segd n maana sũ-mar n gũ a Zeova, n kɩs sɩd zãng t’a na n wa welga d zu-loeesã wakat ning yẽ sẽn yãkã. D sã n ket n pelgd d pʋg n pʋʋsd a Zeova, la d kelgd-a, la d maand sũ-mar n gũud-a wa a Habakuki, tõnd me na n paama sũur pʋgẽ bãane, tɩ sõng-d tɩ d tõog toogo. D sẽn tẽed manegrã na n paasa d sũ-marã, tɩ sõng-d tɩ d kell n tall sũ-noog baa d zu-loeesã sẽn yaa to-to fãa. Na n kɩtame me tɩ d kɩs sɩd tɩ d saasẽ Ba wã na n wa maana bũmbu.—Rom. 12:12. w18.11 15-16 s. 11-12

A Zeova tagsg yaa bõe ne ned sẽn na n maan t’a to lʋɩ tũudmã wɛɛngẽ? A Zeezi yeelame yaa: “Ned sã n maan kom-bãooneg kãens sẽn tẽed maamã ned a yembr t’a lʋɩ, sẽn yaa neer n yɩɩd a soab yĩnga, yaa b sẽn na n loe a yubl ne neer kugr n lob-a ko-kãsengã pʋgẽ.” (Mark 9:42) Gom-kãensã wilgdame tɩ maan tɩ f to lʋɩ yaa yel-wẽn-kãsenga! D miime t’a Zeezi tagsg yaa wa a Ba wã bal kɛpɩ. Dẽnd d tõe n kɩsa sɩd tɩ ned sã n pa maan gũusgu, t’a manesem ning yɩ sabaab t’a tẽed-n-taag lʋɩ, yaa yel-wẽn-kãseng a Zeova me nifẽ. (Zã 14:9) Yãmb me tagsda wa a Zeova ne a Zeezi bɩ? Y manesmã la y tʋʋm-tʋmdɩ wã wilgda bõe rẽ wɛɛngẽ? Wala makre, y sã n miẽ tɩ y sẽn mi n manegd y meng to-to wã, bɩ fut kẽer y sẽn nong tõe n sãama sãnda sũur tigingã pʋgẽ, wall n kɩt tɩ kẽer tall tʋls-wẽnse, y maanda wãna? Y sẽn nong y tẽed-n-taasã, n dat b neerã yĩnga, y na n sak n basa sẽn noom yãmbã bɩ? w18.11 25 s. a 9-10

Bõe n kɩt tɩ tõnd ned kam fãa segd n yɩ burkĩna? Bala, a Sʋɩtãan rõda a Zeova, la a rõd tõnd me. A rõda Wẽnnaam t’a yaa na-wẽng sẽn baood a meng nafre, la sẽn pa maand pʋ-peelem. Woto la a sãam a Zeova yʋʋrã. Bʋko, a Ãdem ne a Awa tẽe a Sʋɩtãana, n kɩɩs a Zeova. (Sɩng. 3:1-6) B vɩɩmã sẽn da yaa to-to Edɛnnã ra segd n kɩtame tɩ b bɩɩs b nonglmã ne a Zeova. La a Sʋɩtãan sẽn wa n wa ne no-koeemdã tɩ b ra pa tolg n nong Wẽnnaam ne b sũyã fãa ye. A Sʋɩtãan wa n waa ne no-koeemd a to, tɩ wa ne sok-kãngã: Ned na n kell n maana sɩd ne a Zeova, a sẽn nong-a yĩng bal bɩ? Yaa wa b sẽn sok tɩ: Rẽ yĩnga, ninsaal tõe n yɩɩ burkĩn bɩ? A Sʋɩtãan waa ne no-koeem-kãngã a Zoob zugu. (Zoob 1:8-11) Yẽ me ra yaa koangd wa tõndo. A ra tudgdame. Baa ne rẽ, a Zeova ra nong-a-la a burkĩndã yĩnga. w19.02 3-4 s. a 6-7

A Zeezi wẽe yel-bũnd n wilg tɩ sẽn na n bãng-b sɩdã Wẽnnaam Rĩungã zugã na n getame tɩ yaa bũmb sẽn tar yõod wʋsgo. A goma toand sẽn da baood kĩndi sẽn yaa neeb yelle. Toandã wa n yãa kĩndf a ye, n kẽng n tɩ koos a sẽn tarã fãa tao-tao n da-a. (Mat. 13:45, 46) Kĩndfã makda bũmb nins Biiblã sẽn yet Wẽnnaam Rĩungã zugã. Tõnd sẽn wa n zãms Biiblã n bãng Wẽnnaam Rĩungã sẽn yaa a soabã, la d bãng bũmb a taab Biiblã sẽn yetã, d ra getame tɩ yaa bũmb sẽn tar yõod wʋsgo, hal n sak n mong d mens bũmb kẽer sẽn na yɩl n sak sɩdã. D sã n ket n nand sɩdã, d pa na n tol n bas-a ye. (Yel. 23:23) La bʋko, kiris-neb kẽer wa n pa le nand sɩdã, n pʋd n bas-a menga. D pa rat n maan a buud a bada! Bũmb sẽn na n wilg tɩ d nonga sɩdã ne d sũur fãa, la tɩ d pa rat n tol n bas-a, yaa d sẽn na n tũ Biiblã sẽn yet tɩ d ‘kẽn sɩdã pʋgẽ’ wã. (3 Zã 2-4) ‘Kẽn sɩdã pʋgẽ’ wã rat n yeelame tɩ bũmb fãa pʋgẽ, d segd n lʋɩɩsda Wẽnnaam goamã sẽn yaa sɩdã taoore, n maood n tũud a sẽn yetã. w18.11 9 s. a 3

Malɛkã yeela Israyɛll nebã tɩ b ra yãg n sɩng zabr ne Zeriko nebã, la tɩ b kẽn n gilg tẽngã vugr daar fãa hal tɩ ta rasem a yoobe, la tɩ rasem a yopoe wã daar bɩ b gilg naoor a yopoe. Tãb-biis kẽer ra tõe n tagsame tɩ na n yɩɩ sẽk sãoong la yaams zaalem bala. La a Zeova sẽn yaa Israyɛll nebã taoor soab meng-mengã ra mii a sẽn maande. Israyɛll nin-buiidã sẽn tũ noy nins a Zeova sẽn kõ wã, kenga b tẽebã. Pa yɩ tɩlɛ me tɩ b zab ne Zeriko tãb-biisã sẽn da yaa zabr gãndaadã ye. (Zoz. 6:2-5; Ebre. 11:30) Kibarã sõngda tõnd tɩ d bãng bõe? A Zeova siglgã tõe n wa toeema d sẽn minim n maand bũmb kẽer to-to wã, tɩ d pa wʋmd toeengã võor sõma ye. Wala makre, b sẽn wa n yeel tɩ masã, koe-moonegã sasa, tigissã sasa, la d sã n wa na n zãms Biiblã d yembre, d na n tʋmda ne portaabl-dãmbã, taablɛt-dãmbã la bũmb a taabã, tõe tɩ d ra pa kɩs sɩd tɩ yaa yam-sõng ye. La sãmbg kae tɩ masã wã, d nee a yõodã vẽenega. Siglgã sã n toeem bũmbu, tɩ d ra maand sãmbse, n wa ne a nafa wã, paasda d tẽebã pãnga, la sõngdẽ me tɩ tõnd ne d tẽed-n-taasã maneg n yaa yam a yembre. w18.10 23 s. a 8-9

Sãmbg sẽn kae, yaa nebã sẽn da gũud tɩ Mesi wã wa maan bũmb ningã, wala makre, a Zeezi karen-biisã sẽn da tẽed bũmb ningã yĩng la Galile nebã sẽn da rat t’a Zeezi lebg b rĩmã. B tog n da getame t’a na n yɩɩ rĩm-sõng tɛkẽ! A ra mii goama, a tõe n sãooga bãase, la a kɩt meng tɩ kom sẽn tar-b rãmbã paam rɩɩbo. Daar a ye, a rɩlga rap na maan bãmb tus a nu, hal tɩ nebã sũy yɩ noogo. A Zeezi bãnga sẽn da be b yamẽ wã. Ad Biiblã sẽn yete: “A Zeezi sẽn mi tɩ nebã na n waa n yõka bãmb n tɩ maan b rĩmã yĩnga, b yii be n leb n dʋ tãngã zug b yembre.” (Zã 6:10-15) Vẽkembeoogã, b yãa a Zeezi Galile mogrã rʋʋnd a to wã. Rẽ tɩ naamã yellã maagame. Wakat kãnga, a Zeezi wilg-b lame tɩ yẽ sẽn wa tẽngã zugã, pa sẽn na n sõng-b tɩ b paam rɩɩb la bũmb a taab ye. Yaa sẽn na n sõng-b tɩ b bãng Wẽnnaam Rĩungã. A yeel-b lame yaa: “Da tʋm-y rɩɩb sẽn sãamdã yĩng ye. Tʋm-y rɩɩb ning sẽn paad vɩɩm sẽn kõn sa wã yĩnga.”—Zã 6:25-27. w18.06 4 s. a 4-5

A Zeezi ra kʋmda neb nins sẽn koms raood hal n lebg wa ‘tãnwĩig sẽn gõde,’ bɩ “fɩtl bugum sẽn dat n ki” wã. Rẽ n so t’a ra maand sũ-mar ne-ba, n wilgdẽ t’a nand-b lame, la a sõngd-ba. (Mark 10:14) Yaa sɩd tɩ d pa tõe n bãng sẽn be nebã sũyẽ wa a Zeezi, wall n bãng n zãms-b sõma wa yẽ ye. La d tõe n wilgdame tɩ d nand-b lame. Wala makre, d segd n gũusda ne d goamã, la d bãng n yãk wakat ning d sẽn na n tɩ sõs ne-bã, la d sẽn na n sõs ne-b n kaoos to-to wã. Rũndã-rũndã, neb milyõ ka tɛk “yɛɛme tɩ b nensã yeege,” bala politikã rãmb ne ligd baoodbã la tũudmã taoor dãmb wẽgd-b lame, n pa zoet b nimbãaneg ye. (Mat. 9:36) Kɩtame tɩ neb wʋsg pa le kɩs ned baa a ye sɩda, la b pa tẽed manegr me ye. Yaa rẽ n so tɩ d segd n modg tɩ tõnd koe-zomã la d no-goamã wilg tɩ d kʋmd-b lame, n dat b neere. Neb wʋsg sẽn sakd n kelgd koɛɛgã, pa b sẽn ne tɩ d mii Biiblã sõma wã yĩng bal ye. Yaa d manesmã sẽn wilgd tɩ d sɩd rata b neere, la tɩ d waoogd-b lame wã yĩng me. w18.09 31-32 s. 13-14

Bõe n na n wilg tɩ d miime tɩ d segd n baoo Wẽnnaam? Yaa d sẽn na n zãmsd Biiblã, n tũud Wẽnnaam sẽn yetã, la d lʋɩɩsd tũudmã yɛl taoore. Woto, d sũ-noogã na n paasdame. D na n maneg n kɩsa sɩd zãng tɩ bũmb nins Wẽnnaam sẽn pʋlmã na n pidsa ka la bilfu. (Tɩt 2:13) D sã n dat sũ-noog sẽn pa sate, yaa tɩlɛ tɩ d modg tɩ tõnd ne a Zeova zoodã tar paasgo. Tʋm-tʋmd a Poll ra yeelame: “Maan-y sũ-noog daar fãa Zu-soabã tũudum pʋgẽ. Mam leb n yetame, maan-y sũ-noogo.” (Fili. 4:4) Sẽn na yɩl tɩ tõnd ne a Zeova zoodã paasdẽ, d segd n paama yam ning sẽn yit yẽ nengẽ wã. (Yel. 3:13, 18) La d sã n dat n kell n tall sũ-noog wakat fãa, d segd n ket n tũuda bũmb nins d sẽn bãngd Biiblã zãmsg pʋgẽ wã. A Zeezi yeela bũmb sẽn wilgd tɩ tũubã tara yõod wʋsgo. A yeelame yaa: “Yãmb sã n mi rẽnda, yãmb yaa sũ-noog rãmba, yãmb sã n maand a woto.” (Zã 13:17; Zak 1:25) Woto yaa tɩlɛ, sã n pa rẽ d pa tõe n paam zood sõma ne Wẽnnaam, la sũ-noog hakɩɩk ye. w18.09 18 s. a 4-6

A Epafras ra mii a tẽed-n-ta-kãensã sõma, tɩ b yell ra pak-a hal wʋsgo. A Poll yeelame t’a Epafras ‘bee bi-bees roog pʋg ne yẽ.’ (File. 23) Dẽnd baa ne yẽ me sẽn da tar a zu-loeesã, a ra tagsda a tẽed-n-taasã yelle, n maand bũmb sẽn na n sõng-ba. Woto pa wilgd tɩ pa a meng yell bal n da pak-a sɩda? A ra pʋʋsda a tẽed-n-taasã yĩnga, n pʋt b yʋyã menga. Tõnd me tõe n maanda wa yẽ. Pʋʋs-kãensã buudã tara pãng wʋsgo. (2 Kor. 1:11; Zak 5:16) Tags-y n ges-y ãnd soab yĩng la y tõe n pʋʋse, hal n pʋd a soab yʋʋre. Tõe tɩ y tagsda y zoa ning yelle, pa rẽ bɩ zak neb sẽn be yãmb tigingã pʋgẽ, tɩ y miẽ tɩ b maooda ne zu-loeese. Sãnda tog n yãka yam yell ning pʋgẽ tɩ yaool n pa nana, wall b bee makr pʋgẽ. D tõe n pʋʋs n kõo d tẽed-n-taas nins neb sẽn maan kaalmã, sẽn zoe-b zab yĩnga, wall sabab-wẽns sẽn paam-b rãmbã, la sẽn namsd-b ligd zu-loees yĩngã. Hakɩɩka, d tẽed-n-taas wʋsg n dat tɩ d pʋʋs n kõ-b tɩ sõng-ba. w18.09 5-6 s. 12-13

Pa bũmb nins d sẽn tõe n dɩk n kõ wã yell bal la a Poll ra gomd ye. D sã n keng ned raoodo, wall d tẽeg-a Biiblã saglg ninga, pa rẽ bɩ n maan bũmb a to n sõng-a, rẽ me yaa kũuni. (Tʋʋ. 20:31-35) Ne a no-goamã la a tʋʋm-tʋmdɩ wã, a Poll wilgame tɩ tara yõod tɩ d sakd n kẽesd d sẽkã la d pãngã n sõngd d taabã, la d tagsd b yelle, n wilgd-b tɩ d nong-b lame. Bãngdb nins sẽn maand vaeesg ninsaalbã yel-manesem wɛɛngẽ wã mikame me tɩ ned sã n yaa kõata, a tara sũ-noogo. Sebr a ye wilgame tɩ nebã yetame tɩ b sã n maan b to neere, b sũ-noogã paasdame. Bãngdb n yeel tɩ ned sã n nong n sõngd a taabã, a mengã na n maneg n neeme t’a vɩɩmã tara barka. Rẽ n so tɩ bãngdb kẽer wae n sagend nebã tɩ b kẽes b mens tʋʋm nins sẽn yaa b taabã neer yĩngã pʋgẽ, tɩ rẽ na n paasa b keelmã la b sũ-noogã. La pa lingd tõnd ye. Bala, d Naandã sẽn nong-dã ra sɩng n yeelame tɩ d sã n yaa kõatba, d paamda sũ-noogo.—2 Tɩm. 3:16, 17. w18.08 22 s. 17-18

No-rɛɛs a Ezayi ra pĩnd n goma a Zeezi Kirist yelle, hal t’a sẽn yeelã kengd pɛlg wʋsgo. A ra yeelame t’a Zeezi “ka na n kao bʋʋdã wa sẽn zems yẽnda ninã sẽn ne wã,” la t’a “ka na n welg yɛlã wa sẽn zems yẽnda tʋb sẽn wʋm ye.” A paasame t’a “na n kaoo ka-pãens rãmbã bʋʋd ne zemsgo.” (Eza. 11:3, 4) Bõe yĩng tɩ woto kengd raoodo? Bala, rũndã-rũndã, dũniyã pida ne sãbs-taaba, tɩ nebã nong n tikd ninã sẽn ne wã n kaood b taabã bʋʋdo. Yaa ne d sũur fãa la d gũud a Zeezi sẽn yaa bʋ-kaood sẽn zems zãngã. A pa na n tol n tik ninã sẽn ne wã, n kao d bʋʋd ye. Tõnd ned kam fãa tara a sẽn tagsd a taabã zugu. La pa wakat fãa la d sẽn tagsdã yaa sɩd ye. Bala, d pa zems zãng wa a Zeezi ye. Naoor wʋsgo, d tagsg sẽn yaa a soab d taabã zugã tika ninã sẽn ne wã, rat n yeel tɩ rẽ la d tikd n kaood b bʋʋdo. A Zeezi yeelame tɩ d ra bʋ bʋʋd tɩ “zems ne nin sẽn yãtã,” la tɩ d bʋ “bʋ-tɩrga.” Dẽnd a Zeezi ratame tɩ d rɩk yẽ togs-n-taare, n da tikd ninã sẽn ne wã n kaood d taabã bʋʋd ye. w18.08 8 s. a 1-2

Yaa sɩd t’a Zeova pa na n zĩnd saasẽ n gom tɩ d wʋm a koɛɛg ye. La a kɩtame tɩ b gʋls Biiblã sẽn yaa a Gomdã, n na n wilg tõnd a sẽn dat tɩ d maane. Sẽn paase, ne a vʋʋsem sõngã maasem, wakat fãa, tʋm-tʋmd sẽn tũud sɩdã kõta a nin-buiidã bũmb nins sẽn kengd b tẽebã. (Luk 12:42) D paamda sɛb buud toor-toore, la bũmb wʋsg sẽn be d sɩtã zugu. Wala makre, video-rãmba, la bũmb a taab d sẽn tõe n kelge. Hakɩɩka, bũmb nins d sẽn paamd d tẽebã kengr yĩngã waoogame! Bɩ Wẽnnaam sẽn yeel bũmb ningã kɩt tɩ d kɩs sɩd tɩ bũmb kae n yɩɩd a pãnga, la t’a na n wa kɩtame tɩ zu-loees nins fãa a Sʋɩtãan ne a dũniyã sẽn wa ne wã sa fasɩ. Bɩ d fãa yãk yam n na n ket n kelgd a Zeova koɛɛgã neere. Rẽ, masã menga, d na n tõoga toog zu-loɛɛg buud fãa pʋgẽ, la d wa tõog me n mao ne zu-loees nins sẽn nan watã. Ad Biiblã sẽn yete: “Yãmb sɩd tog n nanga pãnga, tɩ yãmb sẽn maan Wẽnnaam daabã, y na reeg bũmb ning b sẽn kãab yãmbã.”—Ebre. 10:36. w19.03 13 s. 17-18

Sẽn mik t’a Moyiiz yɩɩ Israyɛll nebã taoor soab n kaoos yʋʋm wʋsgã, tõe t’a Zozuwe ra sokda a meng nin-buiidã sã n na n saka yẽ taoor-sobendã. (Tõo. 34:8, 10-12) Sebr a ye goma Zozoe 1:1, 2 sẽn yet bũmb ningã yelle, n wilg tɩ pĩnd wẽndẽ la rũndã-rũndã, bũmb a ye sẽn wae n wat ne zũnglg tẽng pʋgẽ, yaa naamã sẽn mi n toeem nugã. A Zozuwe sã n da maanda rabeem me, a bee bʋʋm. Baasgo, a teega a Zeova, n tũ a sẽn yeel-a t’a maanã tao-tao. (Zoz. 1:9-11) A sẽn teeg a Zeova wã, zemsame. Sɩd me, Biiblã wilgdame t’a Zeova kɩtame tɩ malɛk lʋɩ yẽ ne Israyɛll nebã taoore, n wilg-b sore. Tog n yaa malɛk ning sẽn yaa Wẽnnaam pipi Bi-riblã, b sẽn boond tɩ Gomdã. (Yik. 23:20-23; Zã 1:1) Sẽn lebg a Zozuwe n yaa Israyɛll nebã taoor soabã yɩɩ toeeng meng-menga, la a Zeova sõng-b lame tɩ b tõog n sak a taoor-sobendã. w18.10 22-23 s. a 1-4

A Zeova mii neb nins sẽn sak ne yamleoog n tũud-a wã, n gʋlsd b yʋyã a ‘tẽegr sebrã’ pʋgẽ. D sã n paam tɩ d yʋʋrã be a Zeova ‘tẽegr sebrã’ pʋgẽ, tɩ wilgdẽ tɩ d naaga a nin-buiidã, bũmb kẽer la d segd n maane. A Malaki wilga vẽeneg tɩ d segd n zoee a Zeova la d waoogd a yʋʋrã. D sã n bas a Zeova tũubu, n tũ wẽnnaam a to bɩ bũmb a to, a na n yẽesa d yʋʋrã vɩɩm sebrã pʋgẽ. (Yik. 32:33; Yɩɩn. 69:29) Dẽnd d sã n dɩk d meng n kõ a Zeova n na n maan a raabã, n deeg lisgu, yaa sõma la pa sek ye. Bala, d maanda rẽ fãa vugr bala. La a Zeova tũubã yaool n yaa d vɩɩmã tõre. Beoog sẽn vẽeg fãa, d segd n wilgda ne d tʋʋm-tʋmdɩ wã tɩ d sakd-a lame.—1 Pɩy. 4:1, 2. w18.07 23-24 s. a 7-9

Pa d sẽn kaoos to-to tũudmã pʋgẽ wã n wilgd tɩ d yaa kiris-ned tẽeb sẽn bɩ ye. Yaa tɩlɛ tɩ d mao, n yaool n tõog tɩ d tẽebã bɩ. Bala, d bãngrã segd n paasdame, tɩ Wẽnnaam goamã võor me lebgd vẽeneg ne-d n paasdẽ. Rẽ n so tɩ b sagend tõnd wakat fãa tɩ d modg n karemd Biiblã daar fãa. (Yɩɩn. 1:1-3) Y sã n wɩng ne Biiblã kareng daar fãa, y na n wa wʋmda a Zeova noyã ne a saglsã võor sõma. Noy nins kiris-nebã sẽn tog n tũ wã sʋka, bʋg n yɩɩda? Yaa nong Wẽnnaam, la nong f to wa f mengã. Ad a Zeezi sẽn yeel a karen-biisã: “Yãmb sã n nong taaba, nebã fãa na bãng tɩ yãmb yaa mam karen-biisi.” (Zã 13:35) A Zeezi ma-biig a Zak yeelame tɩ nonglmã yaa ‘naam tõogo.’ (Zak 2:8, Wẽnnaam Sebre, 1983) A Poll me yeelame tɩ “nonglem yaa tõogã pidsgu.” (Rom. 13:10) Woto fãa wilgda nonglmã yõodã sẽn ta zĩig ningã. La pa lingd tõnd ye. Bala, Biiblã meng yetame tɩ “Wẽnnaam yaa nonglem.”—1 Zã 4:8. w18.06 19 s. 14-15

Yaa a Zeova la Israyɛll nebã kɩɩs-yã, la yaa a Moyiiz n deeg n yik a sũuri. A sẽn pa tõog a mengã, a gomame n pa reng n tags rẽ sẽn tõe n wa ne zu-loees ninsã ye. A Moyiiz ra pa le get a Zeova, bala, a basame tɩ neb a taabã manesmã tiis-a. Nebã sẽn da yẽgem koomã poorẽ pipi wã, a Moyiiz talla yam-sõngo. (Yik. 7:6) La tõe tɩ Israyɛll nebã sẽn tall a Zeova kɩɩsg yʋʋm wʋsgã, wa n lebga yaams ne a Moyiizi, la sũ-toogo. Tõe tɩ yaa rẽ la a ra bas n getẽ, n pa le tagsd a sẽn na n maan to-to t’a Zeova paam waoogr ye. A Moyiiz yɩɩ no-rɛɛs sẽn da sakd a Zeova ne a sũur fãa. Baasgo, a wa n basame tɩ bũmb tiis-a, hal t’a kɩɩs a Zeova. Woto wilgdame t’a buud tõe n paama tõnd me nana-nana. Ra keta ka ne ka t’a Moyiiz kẽ kãabg tẽngẽ wã. Woto me, keta bilf tɩ tõnd kẽ dũni-paalgã pʋgẽ. (2 Pɩy. 3:13) Tõnd ned baa a ye pa rat tɩ bũmb kɩt t’a pa tõog n kẽ ye. Dẽnd yaa tɩlɛ tɩ wakat fãa bɩ d get a Zeova sẽn na yɩl n bãng a sẽn datã, n maane.—1 Zã 2:17. w18.07 15 s. 14-16

A Sʋɩtãan pa tõe n modg ned t’a maan a sẽn pa rat ye. (Zak 1:14) Zɩɩlmã kɩtame tɩ neb wʋsg maand a Sʋɩtãan daabo. La ned sã n wa paam n bãng a Zeova, a tog n yãka a sã n na n tũu a Zeova bɩ a na n teela a Sʋɩtãanã. (Tʋʋ. 3:17; 17:30) D sã n dat ne d sũur fãa n maan a Zeova raabã, bũmb kae a Sʋɩtãan sẽn tõe n maane, n tõog tɩ d bas a Zeova ye. (Zoob 2:3; 27:5) Bũmb a taab me la a Sʋɩtãan ne zĩn-dãmbã pa tõe n maane. Wala makre, Biiblã zĩig baa a ye pa wilgd tɩ b tõe n bãnga sẽn be ned sũurẽ bɩ a yamẽ ye. A Zeova ne a Zeezi bal n tõe. (1 Sãm. 16:7; Mark 2:8) D sã n maand d sẽn tõe fãa tɩ d no-goamã la d tʋʋm-tʋmdɩ wã zemsd ne a Zeova raabã, d tõe n kɩsa sɩd t’a na n sõng-d lame, bala, a Sʋɩtãan pa tar a sẽn tõe n maan tõndo, t’a Zeova pa tar a tɩɩm ye. (Yɩɩn. 34:8) Segdame tɩ d bãng d bɛ wã sõma, la pa segd tɩ d zoe-a tɩ loog noor ye. Baa d sẽn pa zems zãngã, ne a Zeova sõngre, d tõe n tõoga a Sʋɩtãana. D sã n kɩɩs a Sʋɩtãana, a na n zoe n zãaga ne tõndo.—Zak 4:7; 1 Pɩy. 5:9. w18.05 26 s. 15-17

Mams-y wa yãmb sẽn na n dat n kẽng tẽn-zãrg n tɩ maan bũmb sẽn tar yõod wʋsgo. Sẽn na yɩl n ta be, y tog n kẽe kaare. Y taa gaarẽ wã n mik tɩ kaar-dãmbã yaa ka tɛka. Y tog n kẽe kaar ning sẽn dabd y sẽn datẽ wã. Y sã n kẽ kaar yaare, y na n kẽnga y sẽn pa ratẽ. Kom-bɩɩsã yaa wa neb nins sẽn nan be gaarẽ wã n dat n tog sorã. B sorã yaa woko, bala yaa b vɩɩmã tõre. La bi-bɩɩg sẽn tõe n yãk yam n maanã waoogame, hal tɩ wakat ning bɩ a pa mi a sẽn yãkd ye. Y sã n pĩnd n mi y sẽn dat vɩɩmã pʋgẽ, tɩ rẽ yaa vẽeneg y yamẽ, bãng-n-yãkã pa na n yɩ toog wʋsg ye. Yaa modg n ta a Zeova yamã n pak-y n yɩɩd bɩ? Woto rat n yeelame tɩ y yam-yãkr fãa la y sẽn maand fãa pʋgẽ, y tog n tũu a Zeova saglsã. Wala makre, karengã, tʋʋmã baoobo, la kãadmã wɛɛngẽ. Dẽnd bi-bɩɩg fãa tog n yãka a sẽn dat n wa n maan Wẽnnaam tũudmã pʋgẽ, la a mao n pidsi. Kom-bɩɩse, sã n yaa a Zeova raabã n pak-y n yɩɩda, y tõe n kɩsa sɩd t’a na n ning-y-la barka, la a sõng-y tɩ y tõog n pids y magbã. w18.04 25 s. a 1-3

A Zɛfte pidsa a pʋlengã, n kɩt t’a bi-yendã kẽng sɛk-roogẽ wã Silo, n tɩ tʋm a yõor tɛka. (Bʋ. 11:30-35) Yaa sɩd tɩ pa yɩ nana ne a Zɛfte, la a biigã n yɩɩde. Baasgo, a sakame n na n pids a ba wã pʋlengã. (Bʋ. 11:36, 37) Dẽnd a ra pa na n tol n kẽ kãadem, tɩ b sokd rogem ye. A ba wã yʋʋr na n kell n menemame. Ad a sɩd da rata raood kengr la belsgo! Biiblã wilgame tɩ yʋʋmd fãa, Israyɛll kom-pugli wã ra kẽnda a Zɛfte bi-puglã nengẽ rasem a naase, n tɩ keng a raood la b pẽg-a, hal tɩ ra lebg minungu. (Bʋ. 11:39, 40, MN) A Zɛfte bi-puglã kibar kɩtame tɩ d tagsd d tẽed-n-taas nins sẽn pa kẽ kãadem, n yãk yam n kẽesd b sẽkã wʋsg Zu-soabã tʋʋm pʋgẽ wã yelle. Yɩta sõma tɩ d tẽegd n kengd b raoodo, la d pẽgd-ba.—1 Kor. 7:32-35. w18.04 17 s. 10-11

Malɛgs wʋsg wa n lebga toatba, n naag a Sʋɩtãan a kɩɩsgã pʋgẽ. Sẽn deng sa-kãsengã, a Sʋɩtãan belg-b lame tɩ b sig n dɩgs ninsaalb kom-pugli n maan b pagba. Biiblã bilga rẽ, n yeel tɩ wag-bɛ-kãsengã kãaga ãdsã sẽn be yĩngrã, a yembr bãmb b tãab fãa sʋk n lob tẽng zugu. (Sɩng. 6:1-4; Vẽn. 12:3, 4) Malɛg-kãensã sẽn bas Wẽnnaam, n pa le naag a zakã rãmbã, b lebga zĩn-dãmba, n yaa a Sʋɩtãan poorẽ dãmba. La d ra tags tɩ b tʋmda yaar ye. A Sʋɩtãan sigla zĩn-dãmbã, tɩ b yaa rĩungu, wa Wẽnnaam me sẽn lugl a Rĩungã. Yẽ la rĩmã, n yãk zĩn-dãmbã tɩ b yaa nanambs la a pãens rãmba, n so naam tẽngã zugu. (Efɛ. 6:12) A Sʋɩtãan sẽn sigl zĩn-dãmbã woto wã kɩtame t’a tar pãng ninsaalbã goosneem-rãmbã fãa zugu. w18.05 23 s. a 5-6

Wẽnnaam sẽn nong tõndã, a mi n kibla tõndo, wa ba sẽn kibind a biiga. A Davɩɩd sũur da nooma a sẽn da paamd kiblg woto wã. A Davɩɩd ra bʋgsda a Zeova goamã zug n bãngd a tagsgo, n sakdẽ tɩ sõngd-a t’a toeemdẽ. Y sã n maand wa a Davɩɩde, y na n maneg n nonga Wẽnnaam n yɩɩd pĩndã, n dat ne y sũur fãa n sakd-a. Y na n lebga kiris-ned tẽeb sẽn tar pãng me. Saam-bi-poak yʋʋr sẽn boond t’a Kiristin yeelame: “M sã n karem Biiblã, n maan vaeesgo, la m bʋgs m sẽn karmã zugu, m yamẽ, yaa wa a Zeova kɩtame tɩ b gʋls rẽ mam yĩnga.” Yãmb sã n nong Wẽnnaam ne y sũur fãa, a na n kõ-y-la bãngr la yam, tɩ y tagsg sẽn yaa a soab ne dũniyã, la ne beoog-daarã yɩ a yembr ne yẽnda. Bõe yĩnga? Bala, a ratame tɩ y bãng sẽn sɩd tar yõod n yɩɩdã, n lʋɩɩs rẽ taoore, la y tõog tɩ y yam-yãkr fãa yɩ sõma, la y bas y yam tɩ beoog na n yɩɩ neere.—Eza. 26:3. w18.12 26 s. a 9-10