Yʋʋm-vẽkre

A Tɩmote tẽeba ra tika a sẽn da kɩs sɩd tɩ Gʋls-sõamyã sẽn yetã yaa sɩdã, tɩ kɩt t’a ra tʋll n lebg a Zeova zoa wã. Yãmb me segd n bʋgsda y sẽn karemd Biiblã pʋgẽ wã, n wa tõog n kɩs sɩd sõma ne bũmb nins a sẽn yet a Zeova zugã. Bũmb a tãab sẽn tar yõod wʋsg la y tog n deng n bãng a Zeova zugu. Pipi, rẽnda y kɩs sɩd tɩ yaa Wẽnnaam a Zeova la bũmb fãa Naanda. (Yik. 3:14, 15; Ebre. 3:4; Vẽn. 4:11) Yiibu, y segd n kɩsa sɩd tɩ Biiblã goamã yaa a Zeova n vẽneg tɩ b gʋls ãdem-biisã yĩnga. (2 Tɩm. 3:16, 17) Tãabo, rẽnda y kɩs sɩd t’a Zeova tara nin-buiid sẽn sigl sõma n tũud-a, tɩ Kiristã yaa b taoor soaba, la tɩ yaa a Zeova Kaset rãmbã. (Eza. 43:10-12; Zã 14:6; Tʋʋ. 15:14) Woto pa rat n yeel tɩ y segd n bãnga Biiblã gill ne zug ye. Yãmb bõn-daabã yaa y ‘yamã’ sõng-y tɩ y maneg n kɩs sɩd n paas tɩ y bãnga sɩdã.—Rom. 12:1. w20.07 10 s. a 8-9

Bãngr-gom-kãng pʋgẽ, b gomda sʋy sẽn sũ taab yelle, tɩ b nensã wõnd ninsaalb nense, tɩ ‘bũmb sẽn wõnd sãnem maanf-rãmb fõg b zutã.’ (Vẽn. 9:7) B namsda “neb nins sẽn pa tar Wẽnnaam bãndã b rĩyẽ wã [Wẽnnaam bɛɛbã]” n na n kaoos kiis a nu, sẽn zems sʋʋr sẽn tõe n vɩɩmd n kaoos to-to wã. (Vẽn. 9:4) Yaa vẽeneg tɩ woto makda neb nins a Zeova sẽn zae ne a vʋʋsem sõngã. B moonda ne raood n wilgd nebã t’a Zeova na n sãama dũni-kãngã. Rẽ kɩtame tɩ neb nins sẽn teend dũni-kãngã wã yam pa gãe ye. Woto rat n yeelame tɩ sʋy nins yell b sẽn gomd Zowɛll 2:7-9 wã yaa toor fasɩ ne sʋy nins yell b sẽn gom Vẽnegr sebrã pʋgẽ wã. Naoor wʋsgo, Biiblã tõe n gomda bõn-yɛng yell zĩis wʋsgo, tɩ yaool n makd bũmb toor-toore. Wala makre, Vẽnegr 5:5 wã pʋgẽ, b boola a Zeezi tɩ “Zida buudã Gɩgemdã,” n bool a Sʋɩtãan me 1 Pɩyɛɛr 5:8 wã pʋgẽ tɩ “gɩgemd sẽn kelemde.” w20.04 3 s. a 8; 5 s. 10

A Sarayi sẽn dɩk a yem-poak a Agaar n kõ a Abram t’a lebg a pagã poore, a Agaar talla manesem sẽn pa sõma. A wa n dɩka pʋga, n yik n paoogd a Sarayi sẽn da pa tar rogmã. A Sarayi namsa a Agaar hal t’a wa zoe n looge. (Sɩng. 16:4-6) D sẽn pa zems zãngã yĩnga, tõe tɩ d na n ninga a Agaar taale, n tags t’a ra yaa pʋg-wẽnga, la tɩ ra segdame tɩ b sɩd nams-a. A Zeova yẽ ra pa tagsd woto ye. A tʋma a malɛk a Agaar nengẽ, t’a tɩ sõng-a t’a tek yam, la a yeel-a tɩ Wẽnnaam na n kɩtame t’a yagensã lebg wʋsgo. Kɩtame t’a Agaar bãng t’a Zeova get-a lame, la t’a mii yell ning sẽn namsd-a wã sõma. A sũurã yɩɩ noog hal t’a pẽg Wẽnnaam n yeele: “Bãmb yaa Wẽnnaam sẽn ne maam!” (Sɩng. 16:7-13) A Zeova tagsg ra yaa bõe a Agaar zugu? A ra mii a Agaar yɛlã sẽn yaa to-to wã sõma, la toog ning fãa a sẽn yã wã. Dẽnd pʋg-taarã sẽn wat ne sũ-kiirã la sũ-toogã pa lingr ye. Yaa sɩd t’a Zeova sũur pa yɩ noog ne a Agaar sẽn paoog a Sarayi wã ye. La d tõe n kɩsa sɩd t’a tagsa namsg la tood nins fãa a Agaar sẽn paamã yelle, tɩ kɩt t’a pa ning-a taal ye. w20.04 16 s. a 8-9

Tʋm-tʋmd a Poll yeelame tɩ kiris-neb hakɩɩkã bee zoees zugu. (Ebre. 12:1) D yaa bi-bɩɩg tɩ d yaa kãsma, d tara keelem tɩ d pa tar me, d sã n dat keoorã a Zeova sẽn pʋlmã, segdame tɩ d fãa zoe zoeesã n baase. (Mat. 24:13) A Poll tõog n basa a yam n gom woto, bala yẽ mengã tõog n “zoee zoeesã n tãag a tɛka.” (2 Tɩm. 4:7, 8) La pʋd n yaa bõe zoees yell la a Poll sẽn gomdã? A Poll ra mi n goma pĩnd Gɛrɛs soolmã reem kẽer yelle, n na n zãms nebã bũmb sẽn tar yõod wʋsgo. (1 Kor. 9:25-27; 2 Tɩm. 2:5) Naoor wʋsgo, a maka kiris-ned vɩɩm ne zoeese. (1 Kor. 9:24; Gal. 2:2; Fili. 2:16) Ned sã n dɩk a meng n kõ a Zeova n deeg lisgu, a sɩnga zoeesã. (1 Pɩy. 3:21) A Zeova sã n wa keo a soabã n kõ-a vɩɩm sẽn ka sɛtã, wakat kãng la zoeesã ta a tɛka.—Mat. 25:31-34, 46; 2 Tɩm. 4:8. w20.04 26 s. a 1-3

“Zu-soabã yaa sɩd soaba. B na n paasa yãmb pãnga, la b kogl yãmb ne wẽng soabã.” (2 Tes. 3:3) Wãn to la a Zeova kogend tõndo? A Zeova kõo tõnd zab-teed sẽn tõe n kogl-d t’a Sʋɩtãan ra tõog-d ye. (Efɛ. 6:13-17) Zab-te-kãens tara pãng n tõe n tõog bɛ wã. Zab-teedã tõe n kogla tõndo, la yaa d sẽn na n bob b fãa n da yãk-b ye. Wala makre, Sɩdã sẽbdgã makda sɩdã sẽn be Wẽnnaam Gomdã sẽn yaa Biiblã pʋgẽ wã. Bõe yĩng tɩ d segd n sẽbg sẽbdg-kãngã? Yaa a Sʋɩtãan sẽn yaa “ziri wã ba” wã yĩnga. (Zã 8:44) Yʋʋm tusa la woto a sẽn sɩng a ziri wã yagbo, n “tudgd dũniyã fãa.” (Vẽn. 12:9) La sɩdã sẽn be Biiblã pʋgẽ wã kogenda tõnd t’a Sʋɩtãan pa tõe n belg-d ye. Wãn to la d sẽbgd sɩdã sẽbdgã? Yaa d sã n baood n bãngd sɩdã a Zeova zugu, n tũud-a “ne sɩɩga la ne sɩda,” la d maand pʋ-peelem bũmb fãa pʋgẽ.—Zã 4:24; Efɛ. 4:25; Ebre. 13:18. w21.03 26-27 s. a 3-5

Yaa tẽn-kãng sẽn da yaa tũudum hakɩɩkã nifã n kɩt tɩ t’a ra ka to wã. Yʋʋmd 33 Pãntekotã tɛka, “tẽng ning sẽn yaa neer n yɩɩd fãa wã” pa le yaa zĩig takɩ ye. Sɩd me, a Zeova nin-buiidã bee dũniyã gill zugu. Rũndã-rũndã, “tẽng ning sẽn yaa neer n yɩɩd fãa wã” makda a Zeova nin-buiidã sẽn vɩ to-to wã, wala makre, b sẽn waoogd a Zeova ne tigissã la koe-moonegã maasmã. Yaoolem wakatã sasa, rɩtg rĩmã kẽe “tẽng ning sẽn yaa neer n yɩɩd fãa wã” pʋgẽ naoor wʋsgo. Wala makre, Alemayn Nazi sẽn wa n yaa rɩtg rĩmã sasa, sẽn yɩɩd fãa, dũni gill zabr a yiib-n-soabã wakate, a namsa Wẽnnaam nin-buiidã, la a kʋ sãnda. A sẽn maan woto wã, yaa wa a sẽn kẽ “tẽng ning sẽn yaa neer n yɩɩd fãa wã” pʋgẽ. Dũni gill zabr a yiib-n-soabã poore, Iniyõ Sovietik sẽn da wa n yaa rɩtg rĩmã me, a namsa Wẽnnaam nin-buiidã, la a tall-b ne pãng n kẽng zĩ-zãrsẽ. Woto, a kẽe “tẽng ning sẽn yaa neer n yɩɩd fãa wã” pʋgẽ. w20.05 13 s. a 7-8

D ges kibay sẽn wilgd rap sẽn yɩ Wẽnnaam zo-rãmba, nand tɩ Kirist wa tẽng zugu. A Abrahaam yɩɩ rao sẽn tall tẽeb hal sõma. Baa yʋʋm 1000 a Abrahaam kũumã poore, a Zeova bool-a lame tɩ “mam zoa.” (Eza. 41:8) Dẽnd kũum meng pa tõe n welg a Zeova ne a zo-rãmb hakɩɩkã ye. A Zeova pʋ-tẽerẽ wã, a Abrahaam ket n vɩɩme. (Luk 20:37, 38) A Zoob me yɩɩ a Zeova zoa. Malɛgs n wa n tigim taab saasẽ, t’a Zeova gom n wilg t’a kɩsa a Zoob sɩda. A Zeova yeelame t’a yaa “burkĩna, n yaa nin-tɩrga, la a zoet Wẽnnaam n zãagd a meng ne wẽnga.” (Zoob 1:6-8) La a Zeova tagsg yɩɩ wãn ne a Dãniyɛll yẽ? A kell n tũu Wẽnnaam bõn-naands pʋʋsdb tẽngẽ na maan yʋʋm 80. Hal naoor a tãab la malɛgs yeel a Dãniyɛll sẽn da kʋʋlã t’a yaa Wẽnnaam “nin-nongre.” (Dãn. 9:23; 10:11, 19) D tõe n basa d yam t’a Zeova yãgdame n na n wa vʋʋg a zo-nongds nins sẽn maan kaalmã.—Zoob 14:15. w20.05 26-27 s. a 3-4

Biibl karen-biig sẽn maand modgr tõe n bãnga Wẽnnaam noyã hal t’a sũur noom ne rẽ. La rẽ yĩnga, a na n sakda a Zeova, a sẽn nong-a yĩng bɩ? Tẽeg-y t’a Awa ra mii Wẽnnaam noyã, la a ra pa nong Wẽnnaam ne a sũur fãa ye. A Ãdem me ra pa nong Wẽnnaam ne a sũur fãa ye. (Sɩng. 3:1-6) Dẽnd d pa segd bal n zãms nebã Wẽnnaam noyã sẽn yaa tɩrsã ye. D segd n maana sẽn yɩɩd rẽ. A Zeova noyã la a saglsã nafda tõnd wakat fãa. (Yɩɩn. 119:97, 111, 112) La Biibl karen-biig tõeeme n pa ne rẽ vẽenega, sã n pa a wa n bãngame t’a Zeova sẽn kõt tõnd noyã yaa a sẽn nong-dã yĩng ye. D tõe n mi n soka d Biibl karen-biisã yaa: “Fo tagsdame tɩ yaa bõe yĩng la Wẽnnaam sẽn yeel tɩ d maan woto, wall tɩ d ra maan woto wã? Bõe la rẽ wilgd tõnd a mengã zugu?” D sã n sõng-b tɩ b tags a Zeova sẽn yaa Wẽnnaam ning buudã yelle, la b wa nong a yʋʋrã sẽn tar ziirã ne b sũur fãa, na n kɩtame tɩ zãmsgã maneg n kẽ b sũyã. Rẽ, d Biibl karen-biisã pa na n wa nong Wẽnnaam noyã bal ye. B na n wa nonga Wẽnnaam me, soab ning sẽn kõt noyã. B tẽebã na n bɩɩme, tɩ b tõog me n yals kãn-kãe baa mak-toos pʋsẽ.—1 Kor. 3:12-15. w20.06 10 s. 10-11

D tog n talla sũ-mare, bala yɩl n tõog tɩ ned lebg n wa a Zeova nengẽ, kaoosdame. Wʋsg sẽn da bas a Zeova yeelame tɩ yaa kãsem-dãmbã la tigingã neb a taab sẽn wa n kaag-b naoor ka tɛk poore, la b yaool n yãk yam n na n lebg n wa. Saam-bi-poak sẽn be Aazi, t’a yʋʋr yaa a Nansi yeelame: “Saam-bi-poak a ye sẽn da be tigingã pʋgẽ, n yaa m zoa meng-meng n sõng-m wʋsgo. A ra nong-m-la wa a yao. A tẽeg-m-la bũmb kẽer d sẽn da nong n maandẽ. M sã n da wa togsd-a sẽn be m sũurẽ wã, a maagda a yĩng n kelg-m neere. A sã n da tar saglga, a kõt-m lame. A sɩd wilgame t’a yaa m zoa hakɩɩka, sẽn sõngd-m wakat fãa.” Ned sũur sã n sãam tɩ d kʋm a nimbãanega, tõe n sõngame t’a sũurã maage. Yaa wa tɩɩm sẽn kõt ned pãnga. Neb kẽer sẽn bas a Zeova kẽnda ne sũ-toog hal na maan yʋʋm wʋsgo, bala tigingã ned n maan bũmb tɩ sãam b sũuri. Rẽ n kɩt tɩ b pa rat n lebg n wa a Zeova nengẽ ye. Kẽer tõe n tagsdame tɩ b maana bãmb kɛgre. B ratame n paam ned sẽn na n kelg-b neere, la a kʋm b nimbãanega. w20.06 26 s. 10-11

Y sã n tõog n yals kãn-kãe makr pʋgẽ fãa, na n maneg n lebgda nana tɩ y maan sẽn yaa tɩrga. Tẽeg-y me tɩ yaa a Sʋɩtãan n kɩt tɩ nebã tar tags-kɛg pag ne rao lagengã wɛɛngẽ. Rẽnd y sã n wa tõdg fãa tɩ y kõn maan wa dũniyã nebã, y “tõoga wẽng soabã.” D sak n deegame tɩ yaa a Zeova n tar sor n na n wilg yel-manesem ning sẽn yaa yel-wẽnde. D maooda ne d pãng fãa n da wa maan yel-wẽnd ye. La d sã n wa beege, d pʋʋsda a Zeova n togs-a d kongrã. (1 Zã 1:9) D sã n maana yel-wẽn-kãsenga, d baooda kãsem-dãmbã a Zeova sẽn yãk tɩ b ges d yellã sõngre. (Zak 5:14-16) La d pa segd n ket n ningd d meng taal tɩ loog nugu, yel-wẽnd d sẽn da maan hal sẽn kaoos yĩng ye. Bõe yĩnga? Bala tõnd Ba wã sẽn nong-dã kɩtame t’a Bi-riblã wa ki tɩ yɩ maoong tõnd yel-wẽnã na paam sugr yĩnga. A Zeova sã n yeel tɩ ned sẽn maan yel-wẽnd sã n tek yam n kos sugri, a na n kõo a soab sugri, rẽnd a na n sɩd kõ-a-la sugri. Dẽnd bũmb kae sẽn tõe n kɩt tɩ d pa tũ a Zeova ne sũur-kaset sẽn pa ningd-d taal ye.—1 Zã 2:1, 2, 12; 3:19, 20. w20.07 22-23 s. a 9-10

Sasa n zĩnd t’a Zeova ra yaa a yembre. La a sũur da pa sãamd ne a sẽn da yaa a yembrã ye. A ra seka a meng ne bũmb fãa. Baasgo, Wẽnnaam da ratame tɩ bõn-vɩɩs a taab me rɩ vɩɩmã yõodo. Yaa nonglem n kɩt t’a sɩng bũmb fãa naanego. (1 Zã 4:19) Pipi, a Zeova naana a Biig a Zeezi. Rẽ poore, ne a Zeezi maasem, a ‘naana bũmb a taabã fãa,’ malɛgs milyõ-rãmbã sẽn naage. (Kol. 1:16) A Zeezi sũur da nooma a sẽn paam n tʋmd ne a Ba wã. (Yel. 8:30) Malɛgsã me sẽn yaa Wẽnnaam kom-dibli wã sũy ra noomame. A Zeova ne a tʋʋm-mit a Zeezi sẽn wa n naand saasã ne tẽngã, malɛgsã ra getame. B manesem yɩɩ wãna? A Zeova sẽn wa n naan tẽngã n sa, b sɩngame n “kaasd ne sũ-noogo.” Sãmbg kae tɩ b kell n kaasa sũ-noogo, bũmb nins fãa a Zeova sẽn naanã yĩnga, sẽn yɩɩd fãa a sẽn wa n naan ninsaalã. (Zoob 38:7; Yel. 8:31) Bũmb nins fãa a Zeova sẽn naanã pukda a nonglmã la a yamã.—Yɩɩn. 104:24; Rom. 1:20. w20.08 14 s. a 1-2

A Zeova naana tõnd tɩ d tõe n nong d taabã, la d rat me tɩ neb a taabã nong-do. Dẽnd ned sã n kis-du, zabd-d-la wʋsgo, la tõe n kẽes-d-la rabeem menga. Saam-biig a ye yeelame: “Daar a ye, sodaas n pãb maam, n tʋ-ma, la b yeel tɩ b na n maan-m-la yelle, m sẽn yaa a Zeova Kaset soabã yĩnga. Kẽes-m-la ra-beem, la m da getẽ tɩ b paoog-m lame.” Kisgr a woto zabda wʋsgo, la pa segd n ling tõnd ye. Bala a Zeezi ra pĩnd n togsame tɩ nebã na n kisg-d lame. Bõe yĩng tɩ dũniyã kis a Zeezi karen-biisã? Bala wa a Zeezi, tõnd “pa dũniyã rẽnd” ye. (Zã 15:17-19) Baa d sẽn sakd ninsaalbã goosneema-rãmbã noyã, d pa kẽed politikã yɛlẽ, d pa pʋʋsd darpo wã, d leb n pa yɩɩnd tãb-kaoorã yɩɩl ye. Yaa a Zeova a ye bal la d tũuda. Tõnd wilgdame tɩ yaa Wẽnnaam n tar sor n na n dɩ naam, la a Sʋɩtãan ne a poorẽ dãmbã pa sak n deeg rẽ ye. (Sɩng. 3:1-5, 15) Tõnd moondame n yetẽ tɩ Wẽnnaam Rĩungã bal n na n wa ne ãdem-biisã zu-loeesã tɩɩm. La tɩ ka la bilfu, Wẽnnaam Rĩungã na n sãama kɩɩsdbã fãa. (Dãn. 2:44; Vẽn. 19:19-21) Woto yaa koe-noog ne sik-m-mens rãmbã, la yaa koe-beed ne nin-wẽnsã. w21.03 20 s. a 1-2

A Zeova waoogda saam-bi-pogsã n kõt-b tʋʋm sẽn tar yõod tigingã pʋgẽ. Bala b tara yam, yẽesem, raoodo, n yaa kõatb la b tʋmd tʋʋm-sõma. (Luk 8:2, 3; Tʋʋ. 16:14, 15; Rom. 16:3, 6; Fili. 4:3; Ebre. 11:11, 31, 35) D sũy leb n yaa noog d sẽn tar neb wʋsg sẽn kʋʋl d tigimsã pʋsẽ wã. Tõe tɩ b maooda ne bãas toor-toore, b yʋʋmã sẽn vẽsgã yĩnga. la b maanda b sẽn tõe tɛk koɛɛgã mooneg pʋgẽ, la b maand b pãng sẽn tõe n kengd b taabã raoodo! Sẽn paase, d rɩta b minimã nafa. B sɩd bee rasãnd a Zeova nifẽ, la tõnd me nifẽ. (Yel. 16:31) Tags-y kom-bɩɩsã sẽn be tõnd sʋkã me yelle. B segda zu-loees wʋsg b bi-bɩɩlmã sasa dũni kãngã pʋgẽ, bala yaa a Sʋɩtãan n so dũniyã la a tudgd nebã ne a tags-wẽnsã. Baasgo, d fãa sũy yaa noogo, d sã n ne kom-bɩɩsã sẽn kõt leoor tigissã sasa, n naagd n moond koɛɛgã, la b gomd n teend b tẽebã ne raoodã. Sɩd-sɩdã, yãmb a kom-bɩɩsã tara y zĩig a Zeova tigingã pʋgẽ!—Yɩɩn. 8:3. w20.08 21-22 s. a 9-11

D sã n wa sɩng koɛɛgã moonego, tɩ nebã bãng tɩ d yaa a Zeova Kaset soaba, tõe n waa ne namsgo. Wala makre, d zakã rãmb tõe n nams-d lame, d mitinsã tõe n yaand-d lame, wall nebã tõeeme n pa kelgd koɛɛgã ye. Bõe la y tõe n maan n paam raoodo? Pipi, bas-y y yam t’a Zeezi bee saasẽ n ket n sõngd tõnd koe-moonegã pʋgẽ. (Zã 16:33; Vẽn. 14:14-16) Rẽ poore, tall-y tẽeb sõma t’a Zeova na n kell n gesa y yelle. (Mat. 6:32-34) Y tẽebã pãng sã n paasdẽ, y raoodã me na n paasdame. Yãmb sẽn wa n yeel y zakã rãmb la y mitinsã tɩ y sɩngame n zãmsd Biiblã ne a Zeova Kaset rãmbã la y kẽnd b tigissã, wilgdame tɩ y tẽebã sɩd tara pãnga. Sãmbg kae tɩ y toeema bũmb wʋsg y vɩɩmã pʋgẽ, n tar yel-manesem sẽn yaa sõma, y sẽn dat n tũ a Zeova noyã yĩnga. Rẽ me, yɩɩ tɩlɛ tɩ y tall tẽeb la raoodo. Y sã n modgdẽ tɩ y raoodã paasdẽ, y tõe n basa y yam t’a Zeova ‘sẽn yaa yãmb Wẽnnaamã na n zĩnda ne-y zĩig ninga fãa yãmb sẽn na n kẽnge.’—Zoz. 1:7-9. w20.09 5 s. 11-12

Rĩm a Aaza kõo tõnd mak-sõngo. A kell n teega a Zeova zãng-zãnga, tɩ wilg t’a talla yam. Pa toog sasa bal la a tũ a Zeova ye. A tũu a Zeova, b sẽn wa n vɩ bãan sasa me. A Aaza “kell n loee a meng zãng ne Sẽn-Ka-Saabo,” hal a yãadmẽ. (1 Rĩm 15:14) Bũmb a ye a Aaza sẽn maan tɩ wilg t’a tũu a Zeova ne a sũur fãa, yaa a sẽn menes bõn-naandsã pʋʋsg Zida tẽngẽ wã. Ad Biiblã sẽn yete: “Yẽnda sãama bu-zẽms a taabã wẽnnaam-dãmbã tẽn-kuga, maoong kʋʋb zĩisã, la a wã kug-vigindsã, la a kɛ a Aseera ra-lugdsã n lubi.” (2 Kib. 14:2, 4) A pʋd n kɩtame t’a yaab-poak a Maaka pa le yɩ rĩm poak soolmã pʋgẽ ye. Bõe yĩnga? Bala a yaab-poakã ra pirsda nebã tɩ b pʋʋsd bõn-naandga. (1 Rĩm. 15:11-13) A Aaza pa menes bõn-naandsã pʋʋsg bal ye. A sõnga Zida nebã me tɩ b le sɩng a Zeova tũubu. A Zeova kɩtame t’a Aaza ne Zida nebã ra vɩ ne bãane. A Aaza naamã wakate, “tẽngã vɩɩmda bãan” yʋʋm piiga.—2 Kib. 13:23; 14:3, 5. w20.09 14 s. a 2-3

D mi n dɩkda d bõn-sõma wã n gũnugd neb a taaba. Wala makre, d tõe n tɩ bĩnga d ligd bãnkẽ. Yaa d sẽn dat tɩ b ges d ligdã yell sõma tɩ ra meneme, bɩ wagda ra zu wã yĩnga. Tʋm-tʋmd a Poll tẽega a Tɩmote tɩ b kõ-a-la bũmb sẽn tar yõod wʋsgo. Yaa a sẽn paam n bãng Wẽnnaam daabã ne ãdem-biisã sẽn yaa bũmb ningã. A Tɩmote paamame me t’a Zeova yeel-a t’a “moon koɛɛgã,” la a “tʋm koe-moond tʋʋmde.” (2 Tɩm. 4:2, 5) A Poll sagla a Tɩmote t’a gũ bũmb ning b sẽn kõ-a wã neere. Wala a Tɩmote, a Zeova sõnga tõnd me tɩ d bãng bũmb ka tɛk sẽn tar yõod wʋsgo. A Zeova maana tõnd neere, a sẽn sõng tõnd tɩ d bãng a Gomdã sẽn yet bũmb ning tɩ yaa wa paoongã. Biiblã sẽn yet bũmb ningã sɩd yaa wa paoongo, bala a sõngda tõnd tɩ d bãng d sẽn tõe n maan n paam zood sõma ne a Zeova, la d sẽn tõe n maan me n paam sũ-noog hakɩɩka. D sã n sak Biiblã sẽn yetã la d tũud rẽ, d paamda d mens ne zãmsg nins sẽn pa sɩdã, la ne yel-manesem nins fãa sẽn pa sõma wã.—1 Kor. 6:9-11. w20.09 26 s. a 1-3

Biibl karen-biig segd n neeme tɩ yãmb tara yẽesem, la tɩ y kɩsa sɩd ne Biiblã sẽn yet bũmb ningã. Woto, a na n maneg n nonga bũmb ning a sẽn zãmsdã. Y tõe n wilg-a-la Biiblã saglsã tũub sẽn nafd yãmb mengã to-to. Rẽ wã, a na n bãngame tɩ Biiblã saglsã tõe n nafa yẽ me. Zãmsgã sasa, togs-y karen-biigã neb kẽer kibay, neb sẽn mao ne yẽ zu-loeesã buud n tõoge. Ned sã n bee tigingã pʋgẽ t’a kibarã tõe n sõng karen-biigã, y tõe n kos-a lame t’a yãag-y tɩ y tɩ zãms karen-biigã. Sõng-y karen-biigã t’a bãng tɩ Biiblã saglsã tũub nafda wʋsgo. A sã n kẽe kãadem wall a bee ne neda, nin-kãng me zãmsda Biiblã bɩ? A sã n pa zãmsdẽ, bɩ y bool-a t’a wa naage. Yeel-y y karen-biigã t’a gomd ne a zakã rãmb la a zo-rãmbã bũmb nins a sẽn zãmsd Biiblã pʋgẽ wã.—Zã 1:40-45. w20.10 16 s. a 7-9

A Zozɛf ne a Maari wuba b biig a Zeezi t’a wa lebg kãsma, n ta a Zeova yam. B tũu noy nins a Zeova sẽn kõ roagdbã, kambã wubr wɛɛngẽ wã. (Tõo. 6:6, 7) A Zozɛf ne a Maari ra nonga a Zeova wʋsgo. La b sẽn da rat n yɩɩd yaa b sõng b kambã tɩ bãmb me wa nong a Zeova wʋsgo. A Zozɛf ne a Maari la b kambã ra naagda taab wakat fãa n tũud a Zeova. Sãmbg kae tɩ semen fãa, b ra kẽnda zʋɩf-rãmbã karen-doogẽ wã Nazarɛte, la b kẽnd Zerizalɛm yʋʋmd fãa me n maand Pakã kibsa. (Luk 2:41; 4:16) Tõe tɩ b Zerizalɛm kẽndã sasa, b ra zãmsda a Zeezi ne a yaopã bũmb wʋsg a Zeova nin-buiidã kʋdemd yɛl wɛɛngẽ, pa rẽ bɩ n yalsd n kaagd zĩis sãnda Biiblã sẽn gomd b yelle. A Zozɛf ne a Maari kambã sẽn wa n lebg wʋsgã, tõe tɩ ra pa nana ne-b tɩ b ket n wɩngd ne tũudmã yɛl ye. La b paama bark wʋsgo. Bala b sẽn lʋɩɩs a Zeova tũubã taoorã, sõnga b zakã neb tɩ b kell n tall zood sõma ne a Zeova. w20.10 28 s. a 8-9

Y sã n wa na n yãag koe-moond t’a tɩ zãms ned Biiblã, yɩta sõma tɩ y reng n segl bũmb ning y sẽn na n tɩ zãms karen-biigã. A Dãniyɛll, sẽn yaa zall so-pakdã yeelame: “Sẽn na n yãag-a maamã sã n deng n segl a menga, noom-m lame. Woto, a tõogd n kẽesa a toog sõma zãmsgã sasa.” Sẽn paase, karen-biigã na n bãngame tɩ yãmb y yiibã fãa segla y mens sõma. La woto na n yɩɩ mak-sõng n kõ-a. Baa y pa tõog n segl y meng sõma zãmsgã yĩnga, bɩ y modg n ges zãmsgã zĩis nins sẽn tar pãng n yɩɩdã bala. Biibl zãmsg sasa, pʋʋsgã tara yõod wʋsgo. Rẽ wã, reng-y n tags-y y sẽn na n yɛɛlgã, b sã n wa kos-y tɩ y pʋʋse. Woto, y na n bãng n goma bũmb takɩ yell y pʋʋsgã pʋgẽ. (Yɩɩn. 141:2) A Ana sẽn be Zapõ wã ket n tẽra saam-bi-poak a ye sẽn da pʋʋse. Saam-bi-poakã ra yãaga koe-moond a to tɩ b wa na n zãms a Ana Biiblã. Ad a sẽn yeele: “Mam bãngame t’a tara zood sõma ne a Zeova. La m da rat n yɩɩ wa yẽ. Sẽn paase, a sẽn pʋd mam yʋʋr a pʋʋsgã pʋgẽ wã wilgame t’a ra nong-m lame.” w21.03 9-10 s. a 7-8

A Zeezi ra yeela tʋm-tʋmd a Poll t’a bas a yam t’a na n taa Rom. La zʋɩf-rãmb kẽer sẽn be Zerizalɛm maana sɩlem n na n kʋ a Polle. Rom soda-naab a Kolood Lisiyas sẽn bãng rẽ wã, a fãaga a Polle. Tao-tao bala, a Kolood kɩtame tɩ sodaas wʋsg yãag a Poll n kẽng Sezaare. Beenẽ, guvɛrneer a Feligs kõo noor tɩ b “tɩ pag-a a Erood na-yirã.” Woto kɩtame tɩ zʋɩf-rãmb nins sẽn da rat n kʋ a Pollã pa paam-a n kʋ ye. (Tʋʋ. 23:12-35) A Fɛstus n da ledg a Feligs n lebg guvɛrneere. A sẽn da rat n “noog Zʋɩf-rãmbã sũurã,” a soka a Poll yaa: “Fo rat n kẽnga Zerizalɛm tɩ b tɩ kao fo bʋʋd yel-kãensã wɛɛngẽ mam taoor bɩ?” A Poll ra miime t’a sã n da sak n kẽng Zerizalɛm, b ra na n kʋ-a lame. A leokame yaa: “Mam kotame t’a Sezaar ges yel-kãngã yelle!” A Fɛstus yeela a Poll yaa: “Fo sẽn dat t’a Sezaar kao fo bʋʋdã, a Sezaar n na n kao fo bʋʋdã.” A Poll wa n tɩ bee Rom, n zãr ne zʋɩf-rãmb nins sẽn da baood-a n na n kʋ wã.—Tʋʋ. 25:6-12. w20.11 13 s. a 4; 14 s. a 8-10

D fãa mi n ningda d meng taal wakat ninga. Wala makre, neb kẽer ningda b mens taal bũmb nins b sẽn maan nand tɩ b bãng a Zeova wã yĩnga. Neb a taab ningda b mens taale, b sẽn tudg n maan yɛl kẽer b lisgã poor yĩnga. (Rom. 3:23) Sãmbg kae tɩ d rat n maana sẽn yaa tɩrga. La “tõnd fãa tudgda naoor wʋsgo.” (Zak 3:2; Rom. 7:21-23) Yaa sɩd tɩ d pa rat n ningd d meng taal ye. La yaool n tõe n naf-d lame. Wãn to? Bala, d sã n ningd d meng taale, tõe n kɩtame tɩ d toeem yam, la d yãk yam n da le yɩlem d kongrã ye. (Ebre. 12:12, 13) La wakat ninga, d tõe n wa ningda d meng taal tɩ loog nugu, rat n yeel tɩ n ket n ningd d meng taale, baa d sẽn tek yam n kos sugri, t’a Zeova wilg t’a kõ-d-la sugrã. Taal a woto tõe n wã-d lame. (Yɩɩn. 31:11; 38:4, 5) La d pa segd n ningd d meng taal tɩ loog nug ye. Tags-y n ges-y a Sʋɩtãan sũur sẽn na n yɩ noog to-to, d sã n bas a Zeova tũubu, t’a Zeova yaool n pa bas-d ye.—Ges-y 2 Korẽnt rãmb 2:5-7, 11. w20.11 27 s. 12-13

Yɩɩn-sõamyã 73 soabã gʋlsdã sẽn yaa Levi neda wa n maanda sũ-kiir ne nin-wẽnsã la wilg-m-mens rãmbã. Pa b tʋʋm-wẽnsã yĩng ye. Yaa sẽn da wõnd b vɩɩmã yaa sõma n yɩɩd yẽ vɩɩmã yĩnga. (Yɩɩn. 73:2-9, 11-14) Ra wõnda b tara fãa, arzɛka, vɩ-noogo, n pa tol n maand yɩɩr ye. Levi nedã ra segd n gesa yɛlã wa a Zeova sẽn get-b to-to wã. A sẽn maan woto wã, a le paama sũur pʋgẽ bãane, la sũ-noogo. A yeelame: “Mam ka maand sũ-noog dũniyã zugu, sã n ka [a Zeova] pʋgẽ.” (Yɩɩn. 73:25) Bɩ d ra tol n maan sũ-kiir ne nin-wẽnsã sẽn wõnd b vɩɩmã tara barkã ye. B sũ-noogã pa sũ-noog hakɩɩka, leb n pa kaoosd ye. (Koɛ. 8:12, 13) D sã n maand sũ-kiir ne-ba, tõe n komsa d raoodo, la sãam tõnd ne a Zeova zoodã. Woto wã, sã n wa mik tɩ y maanda sũ-kiir ne nin-wẽnsã sẽn wõnd b vɩɩmã tara barkã, bɩ y maan wa Levi nedã. Kelg-y sagls nins Wẽnnaam sẽn kõt tɩ wilgdẽ t’a nong-d lame wã, la y ket n naagd y tẽed-n-taasã sẽn maand a Zeova raabã. Sã n yaa a Zeova la y nong n yɩɩd bũmba fãa, y na n paama sũ-noog hakɩɩka. Leb n na n sõng-y lame tɩ y kell n pa “vɩɩm hakɩɩkã” sor zugu.—1 Tɩm. 6:19. w20.12 19 s. 14-16

Y sã n wa pʋʋsd a Zeova n na n bas y yɩɩrã ne-a, bɩ y tẽeg n pʋʋs-a bark me. Yaa sõma tɩ d tẽegd bõn-sõma nins a Zeova sẽn maan n kõ-dã, baa d zu-loeesã sã n yaa wʋsgo. Y sã n wa pa mi y sẽn na n yeel a Zeova bũmb ning y pʋʋsg pʋgẽ, bɩ y tẽeg tɩ baa y yeelame bal tɩ ‘Zeova sõng-ma,’ a na n leok-y lame. (2 Kib. 18:31) Teeg-y a Zeova yamã, la y ra teeg y meng yam ye. No-rɛɛs a Ezayi wakatẽ wã, Zida nebã ra yɛɛsda Asiiri nebã na n wa zab ne-ba. B sẽn da pa rat tɩ Asiiri nebã wa tõog-bã yĩnga, b tɩ baoo sõngr Ezɩpt nebã nengẽ. (Eza. 30:1, 2) A Zeova keoog-b lame tɩ b sẽn tɩ bao sõngr Ezɩpt nebã nengẽ wã na n waa ne yel-beedo. (Eza. 30:7, 12, 13) Ne a Ezayi maasem, a Zeova wilga a nin-buiidã b sẽn tõe n maan n paam koglg hakɩɩka. A yeelame: “Yaa y sã n kell n pa sɩɩ la y teeg maam, la y na n paam pãnga.”—Eza. 30:15, MN. w21.01 3-4 s. a 8-9

Kirist ba-biisã sẽn paam zaeebã keoor na n yɩɩ b sẽn na n lebg rĩm-dãmb la maan-kʋʋdb ne a Zeezi saasẽ wã. (Vẽn. 20:6) A Zeova ne a Zeezi la malɛgsã fãa sũy na n yɩɩ noog wʋsgo, neb 144000 sã n wa paam b keoorã saasẽ. Tʋm-tʋmd a Zã sẽn gom nanambs la maan-kʋʋdb 144000 yell poore, a yãa bũmb sẽn kõt sũ-noog wʋsgo. Yaa “kʋʋn-kãseng” sẽn põs Armagedõ sasa. B yaa toor ne neb 144000, bala b sõorã yɩɩda nin-kãensã hal zĩig sẽn zãre, tɩ ned pa mi b sõorã takɩ ye. (Vẽn. 7:9, 10) B yera “kasaab-peelse,” tɩ wilgdẽ tɩ b pa bas t’a Sʋɩtãan ‘dũniyã rẽgem-ba,’ la tɩ b kell n maana sɩd ne Wẽnnaam la Kiristã. (Zak 1:27) B zẽka b koees n yetẽ tɩ b paama fãagre, a Zeova, ne a Zeezi sẽn yaa Wẽnnaam Pe-bilã sẽn maan bũmb ningã yĩnga. Sẽn paase, b ra zãada koms vãad b nusẽ, tɩ wilgdẽ tɩ b sak n deega ne sũ-noog t’a Zeezi n yaa rĩm ning a Zeova sẽn yãkã.—Ges-y Zã 12:12, 13. w21.01 15-16 s. a 6-7

Rao sã n dɩk a Zeova la a Zeezi togs-n-taar zu-sobendã wɛɛngẽ, a bãngd n zãa a zakã tɩ zemse. Wala makre, d gom sik-m-mengã yelle. A Zeova yamã ka to ye. La baa ne rẽ, a sakd n kelgda neb nins sẽn tũud-a wã tagsgo. (Sɩng. 18:23, 24, 32) A Zeova zemsa zãnga, la rũndã-rũndã, a nan pa baood tɩ d maand yɛlã tɩ zemsd kɛpɩ ye. A pʋd n sõngda neb nins sẽn tũud-a wã sẽn yaa ninsaalb sẽn pa zems zãngã, tɩ b sɩd tõogd n maand a raabã. (Yɩɩn. 113:6, 7) Sɩd me, Biiblã wilgdame t’a Zeova yaa “sõangda.” (Yɩɩn. 27:9; Ebre. 13:6) Rĩm a Davɩɩd sak n deegame tɩ yẽ sẽn tõog n tʋm tʋʋm-kãsem nins fãa wã yaa a Zeova sik-m-mengã yĩnga. D gom a Zeezi mak-sõngã yelle. A Zeezi sakame n waas a karen-biisã naoã, baa ne a sẽn da yaa b Zu-soab la b Karen-saambã. A Zeezi mengã yeelame: “Mam basa mamsg yãmb yĩnga, tɩ y segd n maan wa mam sẽn maan yãmbã kɛpɩ.” (Zã 13:12-17) Baa ne a Zeezi zu-sobendã sẽn da yaa kãsengã, a ra pa gũud tɩ nebã tʋm n kõ-a ye. Yẽ n da tʋmd n kõt nebã.—Mat. 20:28. w21.02 3-4 s. a 8-10

Kom-bɩɩse, bãng-y tɩ y tara yõod wʋsg tigingã pʋgẽ. Yãmb wʋsg tara pãnga, la keelem. Bũmb wʋsg la yãmb tõe n maan n sõng y tigingã. Tõeeme tɩ y gũuda ne y sũur fãa n dat tɩ b wa yãk-y tɩ y lebg kãsemb-sõngd tigingã pʋgẽ. La tõe tɩ y tagsdame tɩ neb a taabã getame tɩ y paoodame, bɩ tɩ y pa tar minim wʋsg tɩ b tõe n bobl yãmb tʋʋmd sẽn tar yõod ye. Baa y sã n ket n yaa bi-bɩɩga, bũmb kẽer n be y sẽn tõe n maan masã menga, n paam tɩ y tigingã neb nand yãmba, la b kɩs-y sɩda. Kom-bɩɩse, rẽ yĩnga yãmb tara minim sẽn tõe n naf neb a taabã tigingã pʋgẽ bɩ? Y wʋsg tarame. Tõe tɩ y gũus n gesame tɩ sẽn kʋʋl-bã wʋsg nongame tɩ b wilg-b b sẽn tõe n tall b tablɛt-rãmbã wall b portaabl-dãmbã n zãms Biiblã b toor to-to, bɩ n maan tigissã. Yãmb sẽn tar minim te-kãensã wɛɛngẽ wã yĩnga, y tõe n sõnga neb nins sẽn kʋʋlã sõma. Y sẽn maand fãa pʋgẽ bɩ y modg tɩ y saasẽ Ba wã sũur yɩ noog ne-yã. w21.03 2 s. a 1, 3; 7 s. 18

Baa pag sã n karmame n zãag n yɩɩd a sɩda, yaa raoã n segd n lʋɩ taoor zak pʋgẽ Biiblã zãmsgã, la tũudmã tʋʋm a taabã pʋgẽ. (Efɛ. 6:4) Pag segd n sulgda a meng n sakd a sɩda, la yaa yẽ mengã n segd n modg t’a tẽebã pãng paasdẽ. Sẽn na yɩl n maan woto, a segd n baoo sẽk n zãmsd Biiblã a toore, la a bʋgsdẽ. Woto na n sõng-a lame t’a ket n nong a Zeova la a waoogd-a. A leb n na n paama sũ-noogo, a sẽn sulgd n sakd a sɩdã yĩnga. Pagb nins sẽn kelld n sulgd b mens n sakd b sɩdbã b sẽn nong a Zeova wã yĩngã paamda sũ-noogo, n yɩɩd b rãmb nins sẽn zãgsd zu-sobend ning a Zeova sẽn lugl zakã pʋgẽ wã. B kõta kom-bɩɩsã la kom-pugli wã mak-sõngo. B kɩtdame me tɩ vɩɩmã be yamleoog zakã pʋgẽ, la tigingã pʋgẽ. me. (Tɩt 2:3-5) Rũndã-rũndã, sẽn tũud-b a Zeova wã sʋka, pagbã sõor n yɩɩda.—Yɩɩn. 68:12. w21.02 13 s. 21-23

Tʋm-tʋmd a Poll kõo mak-sõngo, raoodã la toogã tõogr wɛɛngẽ. Wakat ninga, a ra neeme t’a ka pãng ye. La a ra tõogda toogo, bala a ra teega a Zeova sẽn na n yɩl n paam pãnga. (2 Kor. 12:8-10; Fili. 4:13) Tõnd me sã n sik d meng n sak n deeg tɩ d rata a Zeova sõngre, d tõe n paama a Poll pãngã la a raoodã buudu. (Zak 4:10) D tõe n kɩsa sɩd tɩ zu-loees nins d sẽn maood ne wã pa sɩbgr sẽn yit a Zeova nengẽ ye. Rẽ wɛɛngẽ, karen-biig a Zak yeela bũmb sẽn tõe n kɩt tɩ d bas d yam. A yeelame: “Ned sã n wa paam zu-loɛɛg bɩ a ra yeele: ‘Yaa Wẽnnaam n makd maam.’ Bala ned pa tõe n mak Wẽnnaam tɩ b maan wẽnga, la Wẽnnaam me pa makd ned t’a maan wẽng ye.” (Zak 1:13) D sã n kɩsa sɩd ne rẽnda, tõnd ne d saasẽ Ba wã zoodã na n paama pãng n paase. A Zeova “pa tekde, la b pa toeemd” me ye. (Zak 1:17) A sõnga pipi kiris-nebã tɩ b tõog n mao ne b zu-loeesã. A na n sõnga tõnd me rũndã-rũndã. Kos-y a Zeova ne y sũur fãa, t’a sõng-y tɩ y paam yam, tẽebo, la raoodo. A na n deega y pʋʋsgã. w21.02 31 s. 19-21

Y tõe n kenga y Biibl karen-biig sẽn wat tigissã raoodo, n wilg-a t’a yell sɩd pak-y lame. (Fili. 2:4) Y tõe n pẽg-a-la a sẽn modg n toeem yɛl kẽer a vɩɩmã pʋgẽ wã yĩnga, la y sok-a sogsg kẽer a Biiblã zãmsg wɛɛngẽ, a zakã rãmba, la a tʋʋmã wɛɛngẽ. La y segd n gũusame n da sok-a sogsg sẽn na n ning-a yãnd ye. Sõsg a woto tõe n kɩtame tɩ y zoodã pãng paase. Y sã n yõg zood ne karen-biigã, y sõngd-a lame t’a wa tõog n deeg lisgu. Karen-biigã sã n ket n toeemd yɛl kẽer a vɩɩmã pʋgẽ, bɩ y kɩt t’a bãng vẽeneg t’a naaga tigingã nebã. Sẽn na yɩl n maan rẽ, y tõe n deegd-a-la sãando. (Ebre. 13:2) Biibl karen-biigã sã n wa sɩng koɛɛgã moonego, y tõe n mi n kos-a lame t’a tũ yãmb n moon koɛɛgã. A Diego sẽn yaa saam-biig sẽn be Berzillã yeelame: “Saam-biis wʋsg ra boonda maam tɩ m naagd-b n moondẽ. Yaa ne rẽ maasem la m maneg n bãng-b sõma. Kɩtame tɩ m paam n bãng bũmb wʋsgo, la kɩt me tɩ m maneg n paam zood sõma ne a Zeova la ne a Zeezi.” w21.03 12 s. 15-16

A Zeezi yeela a karen-biisã tɩ b nong b bɛɛbã. (Mat. 5:44, 45) Woto maaneg yaa nana sɩda? A bada. La ne a Zeova vʋʋsem sõngã sõngre, yaa bũmb sẽn tõe. Nonglmã naaga a Zeova vʋʋsem sõngã biis sʋka, n paas sũ-mare, maan-neere, sũ-bʋgsem la yõk-m-menga. (Gal. 5:22, 23) Zʋg-sõma kãensã sõngda tõnd tɩ d tõogd toogo, b sã n wa kis tõndo. Neb wʋsg sẽn da kis tõnd toeemame, b sɩda, b paga, b biig wall b yak sẽn yaa d tẽed-n-taag sẽn tall zʋg-sõma kãensã yĩnga. B wʋsg lebga tõnd saam-biis la d saam-bi-pogs d sẽn nong sõma. Sã n yaa toog ne-y tɩ y nong neb nins sẽn kis yãmb y sẽn tũud a Zeova wã yĩnga, bɩ y pʋʋs n kos vʋʋsem sõngã sõngre. (Luk 11:13) La y kell n kɩs sɩd tɩ wakat fãa, Wẽnnaam sakrã n yaa sõma n yɩɩda. (Yel. 3:5-7) Kisgr tõe n talla pãng la sãamd sũur wʋsgo. La nonglmã pãng yɩɩda kisgrã hal zĩig sẽn zãre. Nonglem kɩtdame tɩ ned yam tek t’a sak n tũ a Zeova. La woto noogda a Zeova sũuri. Baa nebã sã n ket n kis tõndo, d tõe n kell n talla sũ-noogo. w21.03 23 s. 13; 24 s. 15, 17

No-rɛɛs a Zowɛll ra gomda sodaas sẽn na n tɩ zab ne tẽng yelle. (Zow. 2:1, 8, 11) A Zeova yeelame t’a na n tũnuga ne a ‘tãb-bi-kʋʋngã,’ (rat n yeel tɩ Babilon sodaasã) n sɩbg Israyɛll neb nins sẽn yaa tõatbã. (Zow. 2:25) B boola Babilon sodaasã tɩ “nug-rɩtg bɛɛba,” bala b ra na n yii rɩtg sẽnes n wa zab ne Israyɛlle. (Zow. 2:20) Soda-kãens sigla sõma, hal tɩ b mak-b ne sʋy sẽn sũ taaba. A Zowɛll goma b yell n yeele: “Ned kam fãa [sodaag fãa] rɩka a sore. . . Bãmb kẽe tẽngã ne pãnga, . . . n tũud peem-leesẽ wã n kẽed rotã pʋs wa wagda.” (Zow. 2:8, 9) Tags-y n ges-y sodaasã sẽn pid zĩigã fãa, tɩ soondg zĩig kae ye. Ned pa tõe n põs Babilon sodaasã nugẽ ye! Yʋʋmd 607 sẽn deng a Zeezi rogmã, Babilon sodaasã [Kalde rãmbã] wa n kẽe Zerizalɛm wa sʋya, n sãam-a. Biiblã goma rẽ yelle, n yeele: ‘Kalde naabã . . . ka bas bi-ribl bɩ bi-pugla, wall nin-kẽem bɩ ned sẽn tar zoob peend ye.’—2 Kib. 36:17. w20.04 5 s. 11-12