Wao-fugdgu

D bao n bãng d tẽed-n-taasã sõma. Sõsd-y ne-b nand tɩ tigissã sɩnge, la tigissã poor me. Moond-y koɛɛgã ne-ba. Sã n tõe bɩ y mi n bool-b tɩ b wa naag yãmb n dɩ. Y sã n maand woto, tõe tɩ y bãng tɩ saam-bi-poakã sẽn yaa wa a pa nong neb zĩigẽ wã yaa a sẽn zoet yãnd yĩnga, bɩ saam-biigã y sẽn tagsd t’a lʋɩɩsa laogã baoob taoorã yaa kõata, wall saam-bi-poakã ne a kambã sẽn nong n wat tɩ tigissã zoe n sɩngame wã sɩdã namsd-a-la a tũudmã yĩnga. (Zak 4:12) Yaa vẽeneg tɩ d pa rat n ‘kẽesd d toog neb a taab yɛlẽ’ ye. (1 Tɩm. 5:13) La yaa sõma tɩ d baood n bãngd d tẽed-n-taasã sõma. Woto na n sõng-d lame tɩ d wʋmd b manesem kẽer võore. Y tẽed-n-taag sã n maanda bũmb tɩ pa noom yãmba, y sã n bao n bãng-a sõma, tõe n kɩtame tɩ y wa maneg n nand-a, la y kʋmd-a. Yɩl n bãng d tẽeg-n-taag sõma pa nana ye. La d sã n tũ Biiblã saglgã, n sɩd pak d sũyã yalengo, d rɩkda a Zeova togs-n-taare. Bala a nonga “nebã buud fãa.”—1 Tɩm. 2:3, 4; 2 Kor. 6:11-13. w20.04 16-17 s. 10-12

Yʋng ning sẽn deng a Zeezi kũumã, a yeela a karen-biisã tɩ b nong taaba. A ra miime tɩ nonglem hakɩɩkã na n sõng-b lame tɩ b kell n zems taaba, n tõog toog dũniyã sẽn kis-bã yĩnga. D gom Tesalonik tigingã neb mak-sõngã yelle. B sẽn wa n lugl tigingã n sa bala, a nebã paama namsg b tẽebã yĩnga. Ne rẽ fãa, saam-biisã la saam-bi-pogsã kell n kõo mak-sõng a Zeova sakrã wɛɛngẽ, la nonglmã wɛɛngẽ. (1 Tes. 1:3, 6, 7) A Poll sagl-b lame, n wilg tɩ b kell n nong taaba, la b pʋd “n maan dẽ n paase.” (1 Tes. 4:9, 10) Nonglmã ra na n kɩtame tɩ b bels sũ-sãang rãmbã, la b sõng neb nins sẽn ka pãngã. (1 Tes. 5:14) B tũu a Poll saglgã. Bala a lɛtr a yiib-n-soabã a sẽn gʋls sẽn zems yʋʋmd rẽ poorã pʋgẽ, a yeel-b lame: “Yãmb tẽebã pãng paasda wʋsgo, tɩ yãmb ned kam fãa nonglem ne a taabã me paasdẽ.” (2 Tes. 1:3-5) Nonglmã sõng-b lame tɩ b tõog toog b sẽn wa n namsd-b b tẽebã yĩngã, la yel-tood sasa. w21.03 22 s. 11

Tõnd sã n dat n wa paam vɩɩm sẽn ka sɛtã, yaa tɩlɛ tɩ d tũ sor ning Kiristã sẽn wilgã, rat n yeel tɩ d vɩɩmd wa kiris-ned sẽn tog n vɩɩmd to-to wã. (Tʋʋ. 20:24; 1 Pɩy. 2:21) La a Sʋɩtãan ne a poorẽ dãmbã pa rat tɩ d maan woto ye. B ratame tɩ d “naagd bãmb b tʋʋm-yoodã pʋgẽ.” (1 Pɩy. 4:4) B yaanda tõndo, d sẽn vɩ to-to wã yĩnga, la b yetẽ tɩ bãmb sẽn tũud sor ningã la sõma, la tɩ kɩtdame tɩ ned paam lohorem. La yaa ziri fasɩ. (2 Pɩy. 2:19) Ad d sã n yãk yam n na n tũ so-sõngã la sõma! A Sʋɩtãan ratame tɩ d fãa bas sor sẽn yaa sẽka, sẽn tar n “dabd vɩɩm zĩigẽ” wã tũubu, la d tũ so-yalengã wa dũniyã nebã. Neb wʋsg nonga so-kãnga, a tũub me yaa nana. La yaa sor sẽn tar n “dabd sãoong zĩigẽ.” (Mat. 7:13, 14.) D sã n dat n kell n pa so-sõngã zug n da tol n bʋdge, d segd n kɩsa a Zeova sɩda, la d sakd n kelgd-a. w20.04 26 s. a 1; 27 s. a 5, 7

Yʋʋmã noorã, Risi ne a poorẽ dãmbã kẽe “tẽng ning sẽn yaa neer n yɩɩd fãa wã” pʋgẽ. (Dãn. 11:41) Wãn to? Yʋʋmd 2017 wã, rɩtg rĩm-kãngã yiisa noor n gɩdg a Zeova nin-buiidã tʋʋmd la a kẽes d tẽed-n-taas kẽer bãens roto. A leb n gɩdga Dũni-paalgã lebgr la d sɛb a taab b tẽngã pʋgẽ. La a pa tek woto ye. A reega tõnd filiyall ning sẽn be Risi wã roto, n paas Rĩung rot la tigis-kãsems roto. Rẽ fãa poore, yʋʋmd 2018 wã, Siglgã taoor lʋɩtb Sull bãngame tɩ yaa Risi ne a poorẽ dãmbã la rɩtg rĩmã. La baa b sã n wa namsd a Zeova nin-buiidã ne nams-toaaga, b pa sakd n naag n zab n dat naamã toeeng ye. La b tũuda Biiblã sẽn yet tɩ d pʋʋs “rĩm-dãmbã ne neb nins fãa sẽn tar naamã yĩnga,” sẽn yɩɩd fãa, nin-kãens sã n wa rɩkd sard sẽn tõe n kɩt tɩ ned paam lohorem, wall a ra paam lohorem n tũ a tũudum wa a sẽn date. w20.05 14 s. a 9

Roagdba, sẽn na yɩl tɩ y kambã kɩs sɩd tɩ b bee sɩdã pʋgẽ, segdame tɩ bãmb mensã tõog n yõg zood ne Wẽnnaam, la b kɩs sɩd tɩ Biiblã sẽn yetã yaa sɩda. Y sã n dat n zãms y kambã tɩ b bãng sɩdã Wẽnnaam zugu, rẽnda yãmb mensã zãmsd Biiblã neere, n kõt-b mak-sõngo. Y segd n baooda weer n zãmsd Biiblã sõma la y bʋgsdẽ. Woto la y na n tõog n zãms y kambã, tɩ bãmb me maan wa yãmba. Y segd n sõnga y kambã tɩ b bãng b sẽn tõe n maan to-to ne Biiblã zãmsg tʋʋm-teed toor-toorã d sẽn tarã, wa y sẽn maand to-to ne Biibl karen-biisã. Rẽ la y na n tõog n zãms y kambã tɩ b nong a Zeova, la b kɩs sɩd ne tʋm-tʋmd sẽn tũud sɩd la sẽn tar yamã a sẽn tũnugd ne n kõt-d bũmb nins sẽn yaa tɩlɛ d tẽebã kengr yĩngã. (Mat. 24:45-47) Ra bao-y n zãms-y y kambã bũmb nins sẽn yaa nana Biiblã pʋgẽ wã bal ye. Zãms-y-b “Wẽnnaam yel-zulumsã” tɩ zems b yʋʋmã la b sẽn tõe n wʋmã, tɩ sõng-b tɩ b bɩɩs tẽeb sẽn tar pãnga.—1 Kor. 2:10. w20.07 11 s. 10, 12-13

Ninsaalbã sẽn pa zems zãngã sʋka, bãmb b wãn n tar zood hakɩɩk ne a Zeova rũndã-rũndã? Yaa bãmb milyõ-rãmba. Yaa b sẽn tẽed a Zeezi maoongã n kɩt tɩ b tõe n paam a Zeova zoodo. Maoon-kãng maasem yĩnga, a Zeova sakame tɩ d tõe n dɩk d mengã n kõ-a n deeg lisgu. D sã n maan bõn-kãensã sẽn tar yõod wʋsgã, d paamd n naaga neb milyõ-rãmbã sẽn dɩk b mens n kõ a Zeova n deeg lisgu, n tar zood hakɩɩk ne soab ning sẽn ka to ãndũniyã gill fãa wã! Bõe la d tõe n maan n wilg tɩ d sũur nooma d sẽn paam Wẽnnaam zoodã? Wa a Abrahaam ne a Zoob sẽn kell n maan sɩd ne Wẽnnaam n kaoos yʋʋm koabg la zakã, tõnd me segd n kell n maana sɩda, baa tõnd sẽn tũud a Zeova sẽn kaoos to-to. Wa a Dãniyɛlle, tõnd me segd n wilgame tɩ d nanda Wẽnnaam zoodã n yɩɩd d mengã vɩɩm. (Dãn. 6:8, 11, 17, 23) Ne a Zeova sõngre, d tõe n tõoga toog makr buud fãa pʋgẽ, n kell tall zood ne-a.—Fili. 4:13. w20.05 27 s. a 5-6

Rĩm a Davɩɩd ra wa n bee a roogã zugu, n wa yã ned pag sẽn sood koomA ra miime t’a Zeova yeelame yaa: “Da tʋlg f to pag ye.” (Yik. 20:17, Sebr Sõngo) Baasgo, a kell n talla gesgo. A wa n tʋlla pagã, n yaool n da tʋll me n ta a Zeova yam. Baa ne a Davɩɩd sẽn da sɩng n nong a Zeova la a zoet-a wã, a basame t’a tʋls-wẽngã tõog-a. Rẽ n so t’a maan yel-wẽn-kãsemse. A sẽn maan woto wã, a sãama a Zeova yʋʋrã. A leb n waa ne yel-beed a zakã rãmb la neb a taab zugu. (2 Sãm. 11:1-5, 14-17; 12:7-12.) A Zeova kibla a Davɩɩde, t’a leb n paam zood sõma ne-a. (2 Sãm. 12:13; Yɩɩn. 51:4-6, 19) A Davɩɩd pa yĩm namsg la toog ning a beegrã sẽn wa ne, a sẽn pa tũ a Zeova ne a sũur fãa wã yĩngã ye. D tõe n lebga a gomd ning sẽn be Yɩɩn-sõamyã 86:11 pʋgẽ wã tɩ: “Kõ-y maam sũur sẽn pa pʋɩ.” A Zeova sõnga a Davɩɩd t’a le paam “sũur sẽn pa pʋɩ” bɩ? N-ye. Bala, b wa n yeela Wẽnnaam Gomdã pʋgẽ t’a ‘Davɩɩd yamã rag n loee’ ne a Zeova, rat n yeel t’a tũ-a-la ne a sũur fãa.—1 Rĩm. 11:4; 15:3. w20.06 11 s. 12-13

Biiblã maka a Zeova sẽn nong a nin-buiidã to-to wã ne wĩiri. Woto zemsame. Bõe yĩnga? D rɩk makre: Mams-y wa yãmb sẽn na n lʋɩ bog-zulung pʋgẽ. Bokã zulmame hal tɩ y pa tõe n yi a pʋgẽ y toor ye. Sã n pa y paamame tɩ ned rɩk wĩir n lob-y tɩ y gãd t’a tak-y n yiisi, y pa na n tol n tõog n yi bokã pʋgẽ ye. Wa rũndã daar vɛrse wã goam sẽn wilgdã, Israyɛll nebã sẽn wa n bas a Zeova wã, a kell n ‘tɛɛ bãmb ne nonglem wĩyã.’ Rũndã-rũndã, a Zeova manesem ket n yaa woto ne neb nins sẽn bas-a, n maood ne zu-loees la yɩɩr buud toor-toorã. A ratame tɩ b bãng t’a nong-b lame, la t’a rat n tɛ-b lame tɩ b lebg n wa a nengẽ. La a Zeova tõe n tũnuga ne yãmb n sõng nin-kãensã tɩ b bãng rẽ. D sã n sõng sẽn pa le naagd-b tigingã neb n moond koɛɛgã, la b pa le kẽnd tigissã tɩ b bas b yam t’a Zeova nong-b lame, la tɩ tõnd me nong-b lame, sõngd-b-la wʋsgo. w20.06 27 s. 12-13

B sẽn wa n kʋ karen-biig a Etɩɛnnã, kiris-nebã wʋsg zoe n yii Zerizalɛm n “sãeeg n kẽ Zide ne Samari soolmã,” hal n wa kẽng Sɩpr la Ãntiyoose. (Tʋʋ. 7:58–8:1; 11:19) D tõe n yeela vẽeneg tɩ karen-biisã maoo ne zu-loees wʋsgo. Baa ne rẽ, b sẽn kẽngẽ fãa, b kell n moona koe-noogã ne yẽesem, hal n lugl tigims Rom soolmã fãa pʋgẽ. (1 Pɩy. 1:1) La rẽ poore, b wa n maoo ne zu-loe-kɛgems a taaba. Wala makre, yʋʋmd 50 wã sẽnese, Rom naab a Kolood kõo noore, tɩ Zʋɩf-rãmbã fãa segd n yii Romme. Woto yɩɩ tɩlɛ ne Zʋɩf-rãmb nins sẽn da lebg kiris-nebã tɩ b zoe n bas b zagse, n tɩ zĩnd zĩis a taaba. (Tʋʋ. 18:1-3) Yʋʋmd 61 wã sẽnese, tʋm-tʋmd a Poll gʋlsame n wilg tɩ b ninga kiris-nebã taal zãma sʋka, n kẽes-b bãens roogo, la b fã-ba. (Ebre. 10:32-34) Wa neb a taabã, pipi kiris-nebã me maoo ne naongo, la bãase.—Rom. 15:26; Fili. 2:25-27. w21.02 26-27 s. a 2-4

Kiris-ned sã n modgd n paasd a tẽebã pãnga, bũmb kae a Sʋɩtãan bɩ a poorẽ dãmbã sẽn tõe n maan n tõog t’a pa le kẽn sɩdã pʋgẽ ye. (2 Zã 8, 9) Dũniyã sẽn kis tõndã pa segd n ling-d ye. (1 Zã 3:13) A Zã tẽega tõnd tɩ “dũniyã tõr bee wẽng soabã nugẽ.” (1 Zã 5:19) Dũniyã saab sẽn tar kolgrã yĩnga, a Sʋɩtãan sũ-yikrã tara paasgo. A tũnugda ne sɩlem buud toor-toor n zabd ne tõndo, wala makre yoobã, la ziri nins sɩdã kɩɩsdb sẽn yelgdã. La a zabda ne tõnd vẽeneg-vẽeneg me. Wala makre, a kɩtdame tɩ b namsd tõnd ne wẽnem, d tũudmã yĩnga. A Sʋɩtãan miime tɩ wakat ning a sẽn tar n na n mak n gɩdg koe-moonegã, wall n koms d tẽebã pa le waoog ye. Rẽnd pa lingr la b sẽn gɩdg tõnd koe-moonegã tẽns kẽerã ye. Baa ne rẽ fãa, d tẽed-n-taasã sẽn be tẽn-kãens pʋsẽ wã tõogda toogo. B mak-sõngã wilgdame tɩ baa wẽng soabã sẽn wa ne yell ning fãa d zugu, d tõe n kell n maana sɩda, n tõog-a! w20.07 24 s. 12-13

A Zeova ra ratame tɩ ninsaalbã vɩɩmd wakat sẽn kõn sa tẽngã a sẽn naan tɩ yaa neerã zugu. La a Ãdem ne a Awa kɩɩsa b Ba wã, tɩ rẽ kɩt tɩ b pa le tõe n vɩɩmd wakat sẽn kõn sa ye. Rẽ waa ne kũum bãmb ne b kambã la b yagensã zugu. (Rom. 5:12) Bõe la a Zeova maan yel-kãngã wɛɛngẽ? Tao-tao bala, a wilga a sẽn na n maan to-to n fãag ninsaalbã. (Sɩng. 3:15) A Zeova sakame t’a Biig a Zeezi na n ki tɩ yɩ maoongo, sẽn na yɩl t’a Ãdem kambã la a yagensã wa paam b mens ne yel-wẽndã la kũumã. A ra tõeeme masã n kõ ned kam fãa sor t’a yãk a sã na n maana yẽ raabã n wa paam vɩɩm sẽn kõn sa. (Zã 3:16; 1 Kor. 15:21, 22) D tõe n yeelame t’a Zeova sã n wa na n kɩt t’a Biig a Zeezi vʋʋg neb milyõ-rãmbã, a pa na n naag-b fãa n vʋʋg wakat-yɛng ye. Bõe yĩnga? Bala dũniyã neb sõor na n tiig n lebga wʋsgo, tɩ wa ne zũnd-zãnd menga. La a Zeova yaool n zɩ n maan bũmb ne zũnd-zãnd ye. A miime tɩ sẽn na yɩl tɩ laafɩ zĩndi, yaa tɩlɛ tɩ bũmb fãa sigl sõma.—1 Kor. 14:33. w20.08 14 s. 3; 15 s. a 5

Biibl karen-biig segd n bãngame tɩ d sẽn zãmsd-a Biiblã yaa d sẽn dat n sõng-a t’a wa lebg a Zeova Kaset soabã yĩnga. Bilf-bilfã, Biibl karen-biig sẽn yaa pʋ-peelem soab wat n tõog n deega lisgu. Pipi, a na n nonga a Zeova, la a tẽed-a. (Zã 3:16; 17:3) Karen-biigã na n paama zood sõma ne a Zeova la ne tigingã neb me. (Ebre. 10:24, 25; Zak 4:8) A wat n basa a minim-wẽnsã, n tek yam n kos sugri. (Tʋʋ. 3:19) A tẽebã na n wa kɩtame t’a gomd a sẽn tẽed bũmb ninsã yell ne nebã. (2 Kor. 4:13) Rẽ masã, a na n dɩka a meng n kõ a Zeova, la a reeg lisg n wilg rẽnda. (1 Pɩy. 3:21; 4:2) Ra-kãng yaa sũ-noog raar ne nebã fãa. Karen-biigã sã n modgdẽ n na n wa reeg lisgu, bɩ y pẽg-a sõma, la y keng a raood t’a kell n wɩng ne rẽ maanego. w20.10 17-18 s. 12-13

Yãmb sã n mak y meng ne tigingã neb a taabã, y tõeeme n pa le neẽ tɩ y tara yõod ye. Tigingã neb kẽer tõe n tara minim nebã zãmsg wɛɛngẽ, tɩ sãnda mi bũmb siglg sõma, bɩ b yaa pe-kɩɩmb sẽn mi neb belsgo. Tõe tɩ y tagsdame tɩ y pa maand sõma wa nin-kãensã ye. Rẽ wilgdame tɩ y yaa sik-m-meng soaba. (Fili. 2:3) La yaa y maan gũusgu. Yãmb sã n nong n makd y meng ne neb nins sẽn tar minim wʋsgã, na n komsa y raoodo. Y pʋd n tõe n wa tagsda wa tʋm-tʋmd a Poll sẽn yeelã, tɩ y pa tol n tar y zĩig tigingã pʋgẽ ye. A Zeova ra kõo pipi kiris-neb kẽer tõog tɩ b tõe n maan yel-soalem ne vʋʋsem sõngã maasem, la pa kiris-nebã fãa n paam tõ-kãng ye. (1 Kor. 12:4-11) La b ned kam fãa ra tara yõod a Zeova nifẽ. Rũndã-rũndã, tõnd pa tar tõog n tõe n maan yel-soalem ne vʋʋsem sõngã maasem ye. La yɛlã pa toeem ye. Baa d minimã sã n yaa toor-toore, d fãa tara yõod a Zeova nifẽ. w20.08 23 s. 13-15

Y sã n pʋʋs a Zeova n kos raood la pɛl-kɛgenga. A na n leoka y pʋʋsgã, la a pa na n tol n bas-y ye. (Tʋʋ. 4:29, 31) A na n sõngda yãmb wakat fãa. Tags-y a sẽn sõng yãmb to-to tɩ y mao ne zu-loeesã, la a sẽn kõ yãmb pãng tɩ y toeem bũmb kẽer y vɩɩmã pʋgẽ wã. Yaa vẽeneg tɩ soab ning sẽn sõng a nin-buiidã tɩ b pasg mog-miuugã tõe n sõnga yãmb me tɩ y lebg Kiristã karen-biiga. (Yik. 14:13) Kell-y n tall-y bas-yard wa yɩɩn-gʋlsdã. A sẽn togs gomd ning sẽn yaa rũndã daarã vɛrse wã wilgda rẽ. A Zeova leb n tõe n sõnga ned sẽn sɩng koɛɛgã mooneg paalem, t’a paam raoodo. Ad saam-bi-poak a ye kibare. A yʋʋr la a Tomoyo. A sẽn wa n sɩng koɛɛgã moonegã, kʋɩleng ning a sẽn kogs pipi wã, zakã soab yiime n yeel-a yaa: “Mam pa rat n yã a Zeova Kaset rãmbã ka ye!” La a lebs n pag kʋɩlengã. A Tomoyo yeela a tũud-n-taagã yaa: “Fo wʋma a sẽn yeelã bɩ? M pa yã n yaag m noor meng la a sẽn tol n bãng tɩ m yaa a Zeova Kaset soaba. M sũurã nooma wʋsgo!” A Tomoyo lebga wakat fãa so-pakd masã. w20.09 6 s. 13-14

A Aaza yeela nin-buiidã tɩ yaa a Zeova n ‘kõ bãmb vʋʋsg zĩigã fãa.’ (2 Kib. 14:5, 6) A Aaza pa tags tɩ bãanã wakat yaa sasa b sẽn na n vʋʋs ye. A pʋd n sɩngame n na n me tẽnse, lalse, gasdo, la a vigl kʋɩlense. A yeela Zida nebã tɩ tẽngã fãa zĩi bãane. A Aaza ra rat n yeelame tɩ bõe? A ra rat n yeelame tɩ bɛɛb sẽn kae wã yĩnga, nebã tõe n gilgda tẽns nins Wẽnnaam sẽn kõ-b tɩ b soogã pʋgẽ, n metẽ tɩ gɩdgr kae ye. A yeela nebã tɩ b modg n dɩ bãanã wakat yõodo. A Aaza tũnuga ne bãanã wakat n paas a tãb-biisã pãnga. (2 Kib. 14:7) Woto rat n yeelame t’a ra pa teeg a Zeova bɩ? Ayo. A Aaza ra miime tɩ yẽ sẽn yaa rĩmã, yaa yẽ n segd n sõng nebã tɩ b segl b mense, n wa tõog n mao ne zu-loeesã. A ra miime tɩ Zida tẽngã bãanã pa na n kaoos wakat fãa yĩng ye. La sɩd yɩɩ woto. w20.09 15 s. a 4-5

Kãsem-soab tõe n wa tagsdame t’a tara sor n tõe n lugl noy sẽn na yɩl n kogl tigingã neba. La zĩis kẽer wɛɛngẽ, kãsem-soab ne zak-soab zu-sobend yaa toor wʋsgo. Wala makre, a Zeova yãka kãsem-dãmbã tɩ b tõe n yɩ bʋ-kaoodba, la a kõ-b sore, tɩ b tõe n yiis bɛɛgdb nins sẽn pa tekd yam n kot sugrã tigingã pʋgẽ. (1 Kor. 5:11-13) La a Zeova kõo zak-soben-dãmbã zu-sobend a sẽn pa kõ kãsem-dãmbã. Wala makre, a kõo zak soab sore, t’a tõe n lugl noy la a kɩt tɩ b tũ rẽ a zakã pʋgẽ. (Rom. 7:2) Wala makre, zak soab tara sor n na n yãk lɛɛr ning kambã sẽn segd n wa zakẽ, tɩ ra zʋʋg rẽndã ye. A leb n tara sor n na n kibl a kambã, b sã n pa sak n tũ no-kãnga. (Efɛ. 6:1) Sãmbg sẽn ka be, zak soab sẽn nong a zak rãmb na n deng n yẽsa ne a pagã, n yaool n lugl noy a zakã rãmb yĩnga. Bala, b yiibã lebga “yĩng a yembre.”—Mat. 19:6. w21.02 16-18 s. 10-13

Biiblã sẽn yet bũmb ningã sɩd yaa wa paoongo. Bala yaa sik-m-mens rãmbã, rat n yeel tɩ neb nins ‘sẽn tar yam ning sẽn zemsã’ bal la a Zeova vẽnegd tɩ b bãngd rẽ. (Tʋʋ. 13:48) Nin-kãensã sakda tʋm-tʋmd sẽn tũud sɩd la sẽn tar yamã a Zeova sẽn tũnugd ne rũndã-rũndã n get a nin-buiidã yellã. (Mat. 11:25; 24:45) D pa tõe n bãng Biiblã sẽn yet bũmb ningã d toor ye. La d sã n paam n bãng rẽ, a yõodã yɩɩda bũmb fãa. (Yel. 3:13) D leb n paamame t’a Zeova kõ-d noor tɩ d sõng neb a taabã tɩ b bãng Biiblã sẽn yet bũmb ning yẽ mengã zugu, la a raabã. (Mat. 24:14) Koɛɛgã d sẽn moondã tara yõod wʋsgo, bala sõngda nebã tɩ b lebgd a Zeova zakã neba, la kɩtdẽ me tɩ b tõe n wa paam vɩɩm sẽn kõn sa. (1 Tɩm. 4:16) D moonda koɛɛgã wʋsg tɩ yaa bilf me, d tʋmda tʋʋmd sẽn tar yõod n yɩɩd tʋʋmd buudã fãa. (1 Tɩm. 2:3, 4) Dẽnd d sẽn paam n yaa Wẽnnaam tʋmd-n-taasã yaa zu-zẽkr tɛkẽ!—1 Kor. 3:9. w20.09 26-27 s. a 4-5

Tʋm-tʋmd a Poll sẽn wa n be Rommã, a Zeova tũnuga ne a tẽed-n-taasã naoor wʋsg n sõng-a. Wala makre, a Aristark ne a Luk sẽn yaa a Poll zo-rãmb hakɩɩkã yãka yam n na n tũ-a n kẽng Rom. B gẽnega b yõyã, n na n yãag-a, baa ne Biiblã sẽn pa wilg t’a Zeezi yeel-b lame tɩ b na n taa Rom ne laafɩ wã. Yaa kaoosg zugẽ, b sẽn wa n paam zu-loees so-toakã sasa wã la b bãng tɩ b na n põsame. B sẽn wa n ta Sɩdõ sẽn be mogrã noorã, a Zilyuus kõo a Poll “sor t’a kẽng a zo-rãmbã nengẽ n paam tɩ b sõng-a.” (Tʋʋ. 27:1-3) Rẽ poore, b sẽn wa n ta Puteoli, a Poll ne a zo-rãmbã ‘yãa saam-biisã, tɩ b kos-b tɩ b pa ne-b rasem a yopoe.’ Kiris-nin-kãensã sẽn da be be wã sẽn ges a Poll ne a zo-rãmbã yell neerã, sãmbg kae t’a Poll ra togsd-b-la kibay sẽn kengd raoodo, hal tɩ ra kõt-b sũ-noog wʋsgo.—Ges-y Tʋʋm 15:2, 3. w20.11 15-16 s. 15-17

Roagdba, tũnug-y ne y no-goamã la y tʋʋm-tʋmdɩ wã n sõng y kambã tɩ b bãng tɩ y nonga a Zeova ne y sũur fãa. Bãng-y tɩ kũun sẽn tar yõod y sẽn tõe n kõ y kambã, yaa y sẽn na n sõng-b tɩ b wa nong a Zeova. La bũmb y sẽn tõe n zãms-b tɩ naf-b n yɩɩd yaa y sẽn na n sõng-b tɩ b ket n wɩngd ne Biiblã zãmsgo, pʋʋsgã, tigissã kẽnde, la koɛɛgã moonego. (1 Tɩm. 6:6) Yaa sɩd tɩ y segd n sõnga y kambã tɩ b paam teed nins sẽn yaa tɩlɛ ne-bã. (1 Tɩm. 5:8) La tẽeg-y tɩ yaa y kambã sã n tar zood sõma ne a Zeova la na n sõng-b tɩ b wa põs dũni-kãngã sãoongã sasa n kẽ dũni-paalgã pʋgẽ, lakae pa b sã n tar arzɛk ye. (Eze. 7:19) D sẽn ne tɩ roagdb wʋsg bãngd n yãkda yam b zagsã rãmb yĩngã noom-d lame. Naoor wʋsgo, kamb nins sẽn paam wubr a woto wã kelld n talla b minim-sõma wã b sẽn zãmsã, la baa kaoosg zugẽ b pa maand b bãngẽ ye.—Yel. 10:22. w20.10 28-29 s. 10-11

Wakat n zĩnd tɩ tʋm-tʋmd a Pɩyɛɛr yeel bɩ n maan bũmb n wa maand a bãngẽ. Wala makre, a Zeezi sẽn wa n yeel a tʋm-tʋmdbã tɩ b na n namsa yẽ la b kʋ-a wã, a Pɩyɛɛr peeg-a lame n leb kɛɛnga, n togs-a goam nins sẽn yaa rũndã daar vɛrse wã. (Mat. 16:21-23) A Zeezi remsa a Pɩyɛɛr tagsgã. Neb kʋʋng n da wa n na n yõk a Zeezi, la a Pɩyɛɛr yɩɩ tao-tao n kɛ maan-kʋʋdb kãsmã tʋm-tʋmd a ye tʋbre. (Zã 18:10, 11) So-kãngã yɛsa, a Zeezi remsa tʋm-tʋmd a Pɩyɛɛr tagsgã. Sẽn paase, daar a ye, a Pɩyɛɛr wuka a meng n yeel tɩ baa tʋm-tʋmdb a taabã sã n bas a Zeezi, yẽ kõn tol n maan woto a bada. (Mat. 26:33) La baa a sẽn da kɩs a meng sɩd tɩ loog noorã, a wa n baas n zoee ninsaala, n kɩɩs hal naoor a tãab t’a pa mi a Zu-soabã ye. La a Pɩyɛɛr sũur sãamame, hal t’a yi “yɩng n yãb wʋsgo.” (Mat. 26:69-75) Tõe t’a tagsame t’a Zeezi pa na n tol n kõ-a sugr ye. La a Pɩyɛɛr pa bas tɩ sũ-sãangã koms a raood hal t’a bas a Zeova tũub ye. A kongrã poore, a kell n naaga tʋm-tʋmdb a taabã n da tũud a Zeova.—Zã 21:1-3; Tʋʋ. 1:15, 16. w20.12 20 s. 17-18

Bũmb toor-toor la zak soab tõe n maane, n wilg t’a yaa sik-m-meng soaba. Wala makre, a pa na n gũudẽ t’a pagã ne a kambã maand bũmb fãa tɩ zemsd kɛpɩ ye. A kelgda a zakã neb tagsgo, baa sã n mikame tɩ b sẽn tagsd bũmb ningã yaa toor ne yẽ rẽndã. Sẽn paase, rao sẽn tar sik-m-meng sakdame n tʋmd zakã pʋgẽ tʋʋma, baa sakã rãmb sã n getame tɩ tʋʋm-kãensã yaa pagb tʋʋma. La woto tõeeme n pa yɩ nana ye. Bõe yĩnga? Ad saam-bi-poak a ye yʋʋr sẽn boond t’a Rasɛll sẽn yeele: “Mam sẽn yit zĩig ningã, rao sã n sõngd a pag n pɛgd laas bɩ n pɩɩgd zakã, a yagsã ne a buudã neb tõe n tagsdame t’a pa rao meng-meng ye. B na n tagsdame tɩ yaa a pagã n so-a.” Yãmb sẽn be zĩig ningã nebã sã n tagsda woto, bɩ y tẽeg t’a Zeezi waasa a karen-biisã nao, baa ne nebã sẽn da get tɩ yaa yamb tʋʋmdã. Rao sẽn get a zak yell sõma pa baood tɩ nebã pẽg-a ye. A sẽn dat yaa a pagã ne a kambã sũur yɩ noogo. w21.02 2 s. a 3; 4 s. 11

D sẽn tõe n tẽeg sẽn loogã yellã yaa Wẽnnaam kũuni. La baa d vɩɩmã sã n da yaa sõma pĩndã, dũni-paalgã pʋgẽ vɩɩmã na n yɩɩ sõma n yɩɩda. Neb a taab tõe n maan-d-la bũmb tɩ sãam d sũur wʋsgo. La d sã n sak n kõ sugri, d na n tõog n kell n tũu a Zeova ne d sũur fãa. D sã n ningd d meng taal tɩ loog nugu, tõe n kɩtame tɩ d pa tũud a Zeova ne sũ-noog ye. Wa tʋm-tʋmd a Polle, d tog n kɩsa sɩd t’a Zeova kõ-d-la sugri. (1 Tɩm. 1:12-15) D saagdame n na n wa vɩɩmd wakat sẽn kõn sa. Dũni-paalgã pʋgẽ, d pa na n le tags bũmb baa a ye sẽn da sãamd d sũur yell ye. Biiblã goma wakat-kãng yell n yeel yaa: “B kõn tol n leb n tẽeg sẽn zĩnd pĩndã yell ye.” (Eza. 65:17) Tags-y n ges-y: Tõnd sʋkã neb kẽer tʋma a Zeova tʋʋmdã hal n tãag b kʋʋlem wakate. La dũni-paalgã pʋgẽ, d fãa na n le paama keelem wa kom-bɩɩse. (Zoob 33:25) Dẽ wã, bɩ d yãk yam n da nong n tagsd sẽn loogã yell wakat fãa ye. D pʋd n tagsd beoogã yelle, la d maan d sẽn tõe fãa masã menga, n wa paam n vɩɩmd dũni-paalgã pʋgẽ. w20.11 24 s. a 4; 29 s. 18-19

Bõe n na n maan ka la bilfu? To-kãsengã sasa, a Zeova na n tũnuga ne manesem kãsems a yiib n fãag tõndo. Pipi, a sã n wa kɩt tɩ dũniyã rĩm-dãmbã na n sãam Babilon kãsengã sẽn yaa ziri tũudmã fãa sẽn naag taabã, a na n fãaga sẽn maand-b sɩd ne-a wã. (Vẽn. 17:16-18; 18:2, 4) Rẽ poore, a sã n wa na n sãam a Sʋɩtãan dũniyã sigls a taabã fãa sẽn ketã Armagedõ, a na n fãaga a nin-buiidã. (Vẽn. 16:14, 16) D sã n kell n tall zood sõma ne a Zeova, bũmb kae a Sʋɩtãan sẽn tõe n maan n sãam d wakat fãa yĩng ye. Pʋd n yaa yẽ la b na n sãam wakat fãa yĩnga. (Rom. 16:20) Rẽ wã, bɩ y yeelg zab-teed nins fãa Wẽnnaam sẽn kõt yãmbã n da yãk-b ye. Da bao-y n na n zab zabrã y yembr ye. Teeg-y y tẽed-n-taasã, la y tũud a Zeova noyã. Woto, y tõe n kɩsa sɩd tɩ y saasẽ Ba wã sẽn nong yãmbã na n paas-y-la pãnga, la a kogl-yã.—Eza. 41:10. w21.03 30 s. 16-17

Wãn to la d tõe n wilg tɩ d teega a Zeova? Yaa d sẽn na n sak n tũud bũmb nins a Zeova sẽn dat tɩ d maana. Biiblã pʋgẽ, kibay wʋsg n wilgd tɩ tara yõod tɩ d kell n pa sɩɩ la d teeg a Zeova. Y sã n wa karemd kiba-kãense, bɩ y ges bũmb ning sẽn sõng wẽn-sakdbã tɩ b kell n tall sũur pʋgẽ bãane, nebã sẽn wa n namsd-b b tũudmã yĩngã. Wala makre, zʋɩf-rãmbã bʋ-kaoodb sul-kãsengã sẽn wa n yeel tʋm-tʋmdbã tɩ b ra le moon koɛɛgã, b pa yɛɛs ye. B pʋd n yeela ne raood yaa: “Wẽnnaam n yaa naab ning tõnd sẽn segd n sakã, pa ninsaalbã ye.” (Tʋʋ. 5:29) Baa ne b sẽn pãb tʋm-tʋmdbã, b pa zoe rabeem ye. Bõe yĩnga? Bala b ra miime t’a Zeova ra bee ne-ba. A sũur da nooma ne-ba. Rẽ wã, b kell n moona koe-noogã n pa bas ye. (Tʋʋ. 5:40-42) B sẽn wa n dat n kʋ karen-biig a Etɩɛnnã, a yam da gãeeme, hal “t’a nengã ra yaa wa malɛk nenga.” (Tʋʋ. 6:12-15) Bõe yĩnga? Bala a ra kɩsa sɩd t’a Zeova sũur nooma ne-a. w21.01 4 s. 10-11

Woto wilgdame tɩ b tara sũur-kaset sẽn pa ningd-b taale, la tɩ b tata a Zeova yam. (Eza. 1:18) B yaa kiris-neb sẽn dɩk b mens n kõ a Zeova n deeg lisgu, n tẽed a Zeezi maoongã ne b sũy fãa, la b tar zood sõma ne a Zeova. (Zã 3:36; 1 Pɩy. 3:21) Woto kɩtame tɩ b tõe n yals Wẽnnaam geerã taoore, n ‘tũud-a ne b sũy fãa wĩndg la yʋng’ tẽngã zugu. (Vẽn. 7:15) Baa masã menga, bãmb n moond Rĩungã koɛɛg n yɩɩda, la b sõngd nebã tɩ b lebgd a Zeezi karen-biisi, n lʋɩɩsd Wẽnnaam Rĩungã tʋʋm taoor b vɩɩmã pʋgẽ. (Mat. 6:33; 24:14; 28:19, 20) Kʋʋn-kãsengã sẽn na n põs to-kãsengã sasa wã kɩsa sɩd tɩ Wẽnnaam na n kell n gesa b yelle, bala “sẽn zao-a geerã na n tẽega b fu-roogã bãmb zutu.” Piis a taabã sẽn da sɩng n gũud bũmb ning hal daar zãrã na n pidsame. Biiblã yetame: “[Wẽnnaam] na n yẽesa nintãm fãa ninsaalbã ninẽ.—Vẽn. 21:3, 4. w21.01 16 s. a 9-10

D sũur nooma d sẽn paam n naag a Zeova zakã nebã. D maanda d sẽn tõe fãa n sakd zu-sobend ning a Zeova sẽn luglã. Biiblã wilgdame t’a Zeova nanda pagbã wa a sẽn nand rapã to-to wã. A wilgdame tɩ pipi kiris-nebã wakatẽ, a Zeova kõo pagb la rap vʋʋsem sõngã, tɩ b tõog n tʋm tʋʋm-kãsemse. Wala makre, b goma buud-goam toɛy-toɛya. (Tʋʋ. 2:1-4, 15-18) A Zeova zaee pagb ne rap ne vʋʋsem sõngã, tɩ b na n wa tɩ naag Kiristã n dɩ naam. (Gal. 3:26-29) Pagb ne rap fãa saagdame n na n wa vɩɩmd wakat sẽn kõn sa tẽngã zugu. (Vẽn. 7:9, 10, 13-15) A Zeova yãka pagb ne rap fãa tɩ b moond koe-noogã, la b zãmsd nebã Biiblã. (Mat. 28:19, 20) Wala makre, Tʋʋm sebrã pʋgẽ, b gomda pag a ye yʋʋr sẽn boond t’a Pirsill sẽn maan bũmb ningã yelle. Yẽnda ne a sɩd a Akila sõnga a Apolos sẽn da tar minim wʋsgã, t’a wʋm Biiblã gomd võor sõma.—Tʋʋ. 18:24-26. w21.02 14 s. a 1; 15 s. a 4

Kãsem-dãmba, sẽn yɩɩd fãa yãmb n segd n sõng koe-moondbã tɩ b paam minim koɛɛgã mooneg la nebã Biiblã zãmsgã wɛɛngẽ. Y sã n yãag koe-moond t’a na n tɩ zãms ned Biiblã, n tɩ ta t’a zoet yãnd n pa rat n maan zãmsgã yãmb taoore, bɩ y kos-a n lʋɩ taoor n zãms karen-biigã Biiblã. Nebã Biiblã zãmsgã wɛɛngẽ, bũmb wʋsg la kãsem-dãmbã tõe n maan n keng koe-moondbã raoodo. (1 Tes. 5:11) Baa d sã n nan pa tar ned n zãmsd-a Biiblã, d ket n tõe n sõnga neb a taab tɩ b wa reeg lisgu. D sã n segl d mens sõma, d tõe n sõnga Biibl karen-saamb Biibl zãmsg sasa, n yaool n pa gom wʋsg ye. D tõe n yõga zood ne Biibl karen-biisã, b sã n wa Rĩungã roogẽ. D leb n tõe n kõ-b-la mak-sõngo. Kãsem-dãmbã tõe n baoo sẽk n kengd Biibl karen-biisã raoodo, la b sõng koe-moondbã tɩ b paam minim, n pẽgd-b me tɩ kengd b raoodo. Hakɩɩka, d sã n mi tɩ d maana baa yaa bũmb bilf n sõng ned t’a wa nong d saasẽ Ba a Zeova, d sũ-noogã pa tõe n bãng n bilg ye. w21.03 13 s. 18-19

A Davɩɩd wilga a daar fãa vɩɩmã pʋgẽ t’a yaa ned b sẽn tõe n teege. Wala makre, a sẽn wa n yaa bi-bɩɩga, a ra gũuda a ba wã piis neere. Ra yaa tʋʋm sẽn da tõe n wa ne yell a zugu. Kaoosg zugẽ, a Davɩɩd yeela rĩm a Sayull yaa: “Mam sẽn gũud m ba wã piisã, gɩgemd bɩ rigd-n-yĩidg sã n wa yõk rũnga, mam digd-a lame n pãb n deeg rũngã a noorẽ wã. La a sã n dat n zab ne maam, mam gãta a lɛlmã n pãb-a n kʋ.” (1 Sãm. 17:34, 35) A Davɩɩd da getame t’a segd n kogla piisã. Kom-bɩɩsã rɩkda a Davɩɩd togs-n-taare, b sã n tʋmd tʋʋmd ning fãa b sẽn kõ-bã neere. A Davɩɩd sẽn wa n yaa bi-bɩɩga, a modgame n tall zood sõma ne a Zeova. Zood kãng ra tara yõod wʋsg ne a Davɩɩd n yɩɩd a raoodã, bɩ a sẽn da tar minim n tõe n wẽ kʋnd sõma wã. A Zeova ra pa a Davɩɩd Wẽnnaam bal ye. A ra yaa a zoa hakɩɩk me. Bũmb ning yãmb sẽn tõe n maan tɩ tar yõod n yɩɩda, yaa y sẽn na n modg tɩ yãmb ne y saasẽ Ba wã zood pãng paase. w21.03 3 s. a 4-5.