Tʋʋlgo

Pa tõnd mengã n dat tɩ nebã kisg-d ye. D pa baood tɩ nebã kisg-d d tẽebã yĩng tɩ d maan sũ-noog ye. Sã n yaa woto, bõe yĩng tɩ d tõe n maan sũ-noogo, b sã n wa kis-du? Ad bʋʋm a tãabo: Pipi, d sã n tõogd toogo, d tata Wẽnnaam yam. (1 Pɩy. 4:13, 14) Yiibu, d tẽebã lebgda sõma n yɩɩd pĩndã, t’a pãngã me paase. (1 Pɩy. 1:7) La tãabo, d na n wa paama keoor yõod sẽn pa tõe n bãng n bilgi. Yaa vɩɩm sẽn kõn sa. (Rom. 2:6, 7) A Zeezi vʋʋgrã poor bilfu, tʋm-tʋmdbã paama sũ-noog ning yell a sẽn da gom ne-bã. B sẽn wa n pãb-b la b kõ-b noor tɩ b ra le moon koɛɛgã, b kɩdma sũ-noogo. Bõe-yĩnga? “Bala, b paamame tɩ b nams-b a Zeezi yʋʋrã yĩnga.” (Tʋʋ. 5:40-42) B ra nonga b Zu-soabã, n yɩɩd b sẽn yɛɛsd b bɛɛbã kisgrã. B moona koɛɛgã n pa tol n base, n wilg tɩ b tara nonglem. D tẽed-n-taas wʋsg ket n maanda a Zeova raabã ne b sũy fãa, baa ne zu-loeesã. B miime t’a Zeova pa na n yĩm b tʋʋmdã, la nonglmã b sẽn wilg a yʋʋrã yĩngã yell ye. w21.03 25 s. 18-19

Kiris-neb nins sẽn paam zaeebã pa rog n zoe n saagdẽ n na n tɩ vɩɩmd saasẽ ye. Yaa a Zeova n yãk-ba. B tagsda b saagrã yelle, n pʋʋsd rẽ yĩnga, la b yãgd n na n wa tɩ paam b keoorã saasẽ. B pa mi b yĩngã sẽn na n lebg to-to saasẽ wã ye. (Fili. 3:20, 21; 1 Zã 3:2) La baa ne rẽ, b yãgdame n na n paam n tɩ naag sẽn paam-b zaeebã fãa saasẽ Rĩungã pʋgẽ. Piis a taabã saagdame n na n wa vɩɩmd tẽngã zug wakat sẽn kõn sa, tɩ woto yaa bũmb ninsaal fãa sẽn tʋll n paame. B gũuda wakat ning b sẽn na n wa paam n sõng n tʋm n kɩt tɩ dũniyã gill lebg arzãnã. B gũuda ne b sũur fãa, wakat ning b sẽn na n wa tõog n me b roto, n sel tɩɩse, la b wub b kambã tɩ b tar laafɩ hakɩɩka. (Eza. 65:21-23) B gũudame n na n wa tõog n gilg n ges tãmsã, wetã, mogrã, la b sẽn na n tõog n zãms bũmb wʋsg a Zeova sẽn naanã fãa zugã. La sẽn yɩɩd fãa, b sũy nooma wʋsgo, b sẽn mi tɩ b zoodã ne a Zeova na n maneg n paasame wã. w21.01 18-19 s. 17-18

Babilon sodaasã sẽn sãam tẽngã, nebã ra loogd n getame la b yetẽ: ‘Tẽn-kãngã yaa . . . zĩ-vɩʋʋg tɩ ned wall rũng ka leb n be beenẽ,’ la “t’a paa Kalde rãmbã nugẽ.” (Zer. 32:43) Na maan yʋʋm 200 a Zowɛll bãngr-gomdã togsg poore, a Zeova kɩtame tɩ no-rɛɛs a Zeremi me pĩnd n togs bũmb a to zab-kãng wɛɛngẽ. A Zeova yeelame t’a na n maaga a yĩng n gẽes Israyɛll neb nins sẽn tʋmd tʋʋm-wẽnsã, n yõg-b fãa gilli. Ad a sẽn yeele: “Mam na n tʋma neb wʋsg tɩ b wa yõg-b wa ned sẽn yõgd zĩm. Dẽ poore, m na n kɩtame tɩ neb wʋsg rig bãmb n yiis tãmsã fãa ne kunkuba fãa zutu. . . Mam na n dola bãmb b kongrã ne b yel-wẽnã naoor a yiibu.” Israyɛll neb nins sẽn pa tek yamã pa na n tõog n solg mogrã pʋgẽ wall weoogẽ wã tɩ Babilon sodaasã pa paam-b ye.—Zer. 16:16, 18. w20.04 5 s. 12-13

Sodom sãoongã sasa, a Lot ra maanda maas-maas ne a Zeova sakre. D tõe n tagsame t’a Lot ra maanda a toog kae ne a Zeova sẽn yeel-a wã, la t’a pʋd n yaa tõata. La a Zeova pa bas a Lot sõngr ye. A zoee a nimbãanega. Woto yĩnga, malɛgsã “gãda a Lot nugã, la b gãd a pagã ne a kom-pugli a yiibã nusi, n tɛ-b n yiis tẽngã.” (Sɩng. 19:15, 16) A Zeova sẽn kʋm a Lotã tog n yaa bʋʋm wʋsg yĩnga. Tõe t’a Lot sẽn da pa rat n yi a zakẽ wã yaa a sẽn da zoet neb nins sẽn da be tẽngã kɩremsã yĩnga. Yɛl a taab me n da yɛgd-a. A ra tog n miime tɩ rĩm-dãmb a yiib n da lʋɩ sũud bogd sẽn da be long sẽn pẽ Sodom pʋsẽ. (Sɩng. 14:8-12) A sẽn da tar pag ne kambã, a tog n da maanda yɩɩr b yĩnga. Sẽn paase, a sẽn da yaa arzɛk soabã, tõe t’a ra tara zag-neer Sodom. (Sɩng. 13:5, 6) Yaa sɩd tɩ woto fãa pa bʋʋm sẽn sek a Lot na zags n pa tũ a Zeova sẽn yeel-a wã tao-tao ye. La a Zeova pa ges a Lot kongrã ye. A pʋd n ges-a-la wa nin-tɩrga.—2 Pɩy. 2:7, 8. w20.04 18 s. 13-14

Kom-bɩɩse, tõe n yɩɩ toog ne neb nins sẽn bãng yãmb tɩ y ra yaa kambã, tɩ b get yãmb masã wa neb sẽn bɩ. La y tõe n kɩsa sɩd t’a Zeova getame tɩ zʋʋg nif sẽn ne wã. A mii yãmb sõma, la y sẽn tõe n maan bũmb ninsã. (1 Sãm. 16:7) Paas-y zood ning y sẽn tar ne Wẽnnaamã pãnga. Yaa woto la a Davɩɩd maan-yã, a sẽn maag a yĩng n ges bũmb nins a Zeova sẽn naanã. A Davɩɩd bʋgsa rẽ zugu, n bãng Naandã sõma n paase. (Yɩɩn. 8:4, 5; 139:14; Rom. 1:20) Bũmb a to y sẽn tõe n maane, yaa y sẽn na n bao a Zeova sõngre, sẽn na yɩl n paam pãnga. Wala makre, y karen-bi-taasã kẽer yaand-y lame, y sẽn yaa a Zeova Kaset rãmbã yĩng bɩ? Sã n yaa woto, bɩ y pʋʋs a Zeova t’a sõng-y tɩ y tõog n mao ne zu-loe-kãngã. Rẽ poore, bɩ y tũ sagls nins sẽn be a Gomdã pʋgẽ wã, d sɛb nins sẽn tik Biiblã zugã, la video-rãmbã pʋsẽ wã. Y sã n yã a Zeova sẽn sõng-y tɩ y tõog n mao ne yell fãa, y manegd n kɩs-a-la sɩd n paase. Sẽn paase, neb a taabã sã n yã tɩ y teega a Zeova, b na n kɩs-y-la sɩd n paase. w21.03 4 s. a 7

Zo-rãmb hakɩɩk nong n sõsda ne taaba, tɩ ned fãa togsd a tagsgo. Tõnd ne a Zeova zoodã me yaa woto bɩ? N-ye! A Zeova gomda ne tõnd ne Biiblã maasem, n wilgd tõnd a sũur tagsgo. D sã n wa pʋʋsdẽ, d gomda ne-a, la d tõe me n togs-a d tagsg la sẽn be d sũurẽ. A Zeova sẽn yaa d zo-nongrã, a pa kelgd d pʋʋsgã bal ye. A leokdame me. Wakat ninga, a leokda tao-tao. La wakat kẽere, rẽnda d ket n tar pʋʋsg yell ning wɛɛngẽ. Baasgo, d tõe n basa d yam t’a sẽn na n leok sasa ninga, la a sẽn na n leok to-to wã na n zemsa kɛpɩ. Yaa vẽeneg tɩ Wẽnnaam sẽn na n leok to-to wã tõe n yɩɩ toor ne tõnd sẽn tẽedã. Wala makre, a tõeeme n pa yãk zu-loɛɛgã, n yaool n kõ-d yam la pãng tɩ d “tõog toogo.”(1 Kor. 10:13) Bõe la d tõe n maan n wilg tɩ d sũur nooma ne pʋʋsgã sẽn yaa kũun sẽn tar yõod wʋsgã? Yaa d sẽn na n ‘pʋʋsd-a wakat fãa,’ wa a sẽn sagl-dã.—1 Tes. 5:17. w20.05 27-28 s. a 7-8

Neb sã n zoet zoees sẽn zãagd zĩiga, ned fãa geta a taoor sẽn na yɩl n da wa lak n lʋɩ ye. La nina tõe n wa kala a to, wall a kẽ bok pʋga. Baa a sã n lʋɩ, a tikd n yikame n kell n wɩng ne zoeesã. Pa bũmb ning sẽn n kɩt t’a lʋɩ wã yell la a na n tagsdẽ ye. A na n tagsda a sẽn na n zoe zoeesã n baase, n tõog n paam keoorã. D zoeesã pʋgẽ, d tõe n laka naoor wʋsgo. D mi n tudga d no-goam wall d tʋʋm-tʋmdɩ pʋgẽ. D tẽed-n-taasã sẽn naag tõnd n zoetẽ wã me mi n maana bũmb tɩ sãam d sũuri. La pa segd n ling tõnd ye. D fãa yaa neb sẽn pa zems zãnga. Sẽn paase, yaa sor sẽn yaa sẽka, sẽn dabd vɩɩmã zĩigẽ wã la d fãa tũuda. Dẽnd d tõe n wa kala d to n lʋɩ. A Poll yeelame tɩ wakat ninga, ned tõe n tara “yell ne a to” (Kol. 3:13) La pa bũmb ning sẽn kɩt tɩ d lak n lʋɩ wã yell la d segd n tagsdẽ ye. D tagsd keoorã sẽn be taoorã yelle, n kell n wɩng ne zoeesã. D sã n bas tɩ d sũurã yiki, hal tɩ d maand sũ-kẽk n pa rat n le yiki, d pa na n tõog n baas zoeesã, n wa paam keoorã ye. Sẽn paase, yãmb mengã tõe n lebga kug-lakdg n kõ y tẽed-n-taasã sẽn maood n dat n kell n tũ sor sẽn yaa sẽkã. w20.04 26 s. a 1; 28 s. a 8-9

No-rɛɛs a Dãniyɛll gomda ninsaalbã goosneema-rãmb toor-toor sẽn nams wall b soog Wẽnnaam nin-buiidã yelle. A mak-b-la ne bõn-naandg kãseng sẽn maan ne bũmb toor-toore. Bõn-naandgã naoã sẽn maan ne kut la yagd sẽn kalem taabã makda yaoolem goosneemã. Yaa Gãrãnd Bertayn ne Etazĩni sẽn naag taab n yaa dũni gill pãn-soaadã. Bãngr-gom-kãngã wilgdame tɩ Wẽnnaam Rĩungã sã n wa na n sãam ninsaalbã goosneema-rãmbã fãa, na n mikame tɩ bãmb n ket n yaa dũni gill pãn-soaada, n dɩt naam. Tʋm-tʋmd a Zã me goma dũni gill pãn-soaadb toor-toor sẽn nams wall b soog a Zeova nin-buiidã yelle. A Zã maka goosneema-kãens ne we-rũng sẽn tar zut a yopoe. We-rũngã zug a yopoe soabã makda Gãrãnd Bertayn ne Etazĩni sẽn naag taab n yaa dũni gill pãn-soaadã. Rẽ tara yõodo, bala b pa gom zug a to yell ye. Kirist ne a saasẽ tãb-biisã sã n wa na n sãam we-rũngã tõre, na n mikame t’a zug a yopoe soabã ket n dɩta naam.—Vẽn. 13:1, 2; 17:13, 14. w20.05 14 s. 11-12

Gom-kãngã tẽegda tõnd bũmb d sẽn pa tõe n kɩɩse: Wa vɩɩmã sẽn yit Wẽnnaam nengẽ wã, nonglmã me yita a nengẽ. Wẽnnaam sɩd nonga tõndo! A nonglmã kɩtame tɩ d yam gãe, tɩ d sũur noomẽ, tɩ bũmb me pa paoog-d ye. Sã n yaa ne kiris-nebã, wilg tɩ d nonga d taabã pa yam-yãkr ye. Yaa noor d sẽn segd n tũ. (Mat. 22:37-40) D sã n wa bãng a Zeova sõma, tõe n lebga nana tɩ d tũ pipi noorã. Sẽn yɩɩd fãa, a Zeova zemsa zãnga, n get tõnd yell ne bʋgsem la ne nonglem. La yiib-n-soab noorã tũub tõe n yɩɩ toog ne-do. Bõe yĩnga? Bala d tẽed-n-taasã d sẽn be ne wakat fãa wã me pa zems zãng ye. Wakat ninga, b tõe n maana bũmb wall b yeel bũmb tɩ kɩt tɩ d tẽed tɩ b pa nong tõnd ye. A Zeova miime tɩ yell a woto buud tõe n paam-d lame. Rẽ n so t’a vẽneg Biiblã gʋlsdb kẽer tɩ b kõ sagls takɩ sẽn sõngd tõnd tɩ d bãng bũmb ning sẽn kɩt tɩ d segd n nong taabã, la d sẽn segd n wilg to-to tɩ d nong-b lame. Tʋm-tʋmd a Zã naaga Biiblã gʋlsdb-kãens sʋka.—1 Zã 3:11, 12. w21.01 8 s. a 1-2

D nan sɩnga a Zeova tũub wall d tũud-a-la na maan yʋʋm wʋsgo, d ned kam fãa segd n soka a meng yaa: ‘M maoodame n pa rat n bas t’a Sʋɩtãan tõog tɩ m pa kell n tũ a Zeova ne m sũur fãa bɩ?’ Wala makre, tele wã bɩ ẽntɛrnetã pʋgẽ, y sã n wa yã imaaz sẽn tõe n nek pag ne rao lageng tʋlsem, y maanda wãna? Y sã n pa gũusi, y tõe n wa yeta y meng tɩ filmã bɩ imaazã y sẽn getã pa tolg n yaa pornogarfi ye. La rẽ yĩnga, pa a Sʋɩtãan n dat n tũnug ne rẽ n kɩt tɩ y ra le sak a Zeova ne y sũur fãa sɩda? Imaaz-kãng tõe n yɩɩ wa lar ned sẽn dat n tall n bok raoog sẽn yaa bedre. A na n kɛɛda raoogã ne larã bilf-bilfu. Tarẽ-n-tarẽ, larã wat n kẽe zulunga, n bok raoogã. Rẽ yĩnga, imaaz-rãmb nins sẽn tõe n nek pag ne rao lageng tʋlsmã b sẽn wilgd tele wã bɩ ẽntɛrnetã pʋgẽ wã pa tõe n yɩ wa larã noor sɩda? Baa bõn-kɩdg sẽn wõnd pa tõe n maan ned baa fʋɩ tõe n wa kɩtame t’a maan yel-wẽnd n kɩɩs a Zeova, n pa le tũud-a ne a sũur fãa ye. Woto wã, ra bas-y tɩ tags-yood kẽ y sũurã pʋgẽ ye. Ket-y n zoet-y a Zeova yʋʋrã ne y sũur fãa! w20.06 11-12 s. 14-15

Sẽn pa le moond-b koɛɛgã, la b pa le kẽnd tigissã ratame tɩ d sõng-b la d keng b raood n kaoose. Sũ-sãangã tõe n yaa wʋsg ne-ba, wa a Zeezi sẽn wilg yel-bũnd ning pʋgẽ a sẽn dɩk makr ne biig sẽn yi n bas a ba zakã. (Luk 15:17-24) Naoor wʋsgo, b sẽn da leb a Sʋɩtãan dũniyã pʋgã kɩtame tɩ b tẽebã koms wʋsgo. Yaa tɩlɛ tɩ d sõng-b tɩ b tẽebã le paam pãnga. A Zeezi sẽn wẽ yel-bũndã n gom pesg sẽn menem yellã, a wilgame tɩ pe-kɩɩmã sẽn yã pesgã, a rɩk-a lame n palg a bãgdẽ, n tall-a n lebg n wa bãgrẽ wã. Pe-kɩɩmã ra zoe n dɩka sẽk wʋsg n gẽes pesgã. Yɩɩ yaams me. La a bãngame bal tɩ yaa tɩlɛ t’a rɩk-a, bala pesgã ra pa tõe n le kẽn a toor n wa bãgrẽ wã ye. (Luk 15:4, 5) Wakat ninga, yɩl n sõng neb kẽer sẽn bas a Zeova tɩ b mao ne bũmb ning sẽn kɩt tɩ b pa le tũud-a wã, tõe n yɩɩ tɩlɛ tɩ d bao sẽk wʋsgo, tõe n waa ne yaams me. La ne a Zeova vʋʋsem sõngã, a Gomdã la bũmb nins siglgã sẽn yiisdã maasem, d tõe n sõng-b lame tɩ bãmb ne a Zeova zoodã le paam pãnga. Rẽ wã, b sã n kos yãmb tɩ y zãms ned a woto Biiblã, bɩ y sak ne yamleoogo. w20.06 28 s. 14-15

Tõnd ned kam fãa segd n wilgame t’a nonga a taabã, bala yaa d sẽn nong taabã n wilgd tɩ d yaa kiris-neb hakɩɩka. Yaa tɩlɛ me tɩ d paam “bãngr hakɩɩk la yam-vẽenem wʋsgo.” (Fili. 1:9) Sã n pa rẽ, “zãmsg buud fãa sẽn tar n kẽngd ka la ka” wã, n paas nebã ‘zãmbã la b sɩlmã,’ ne sɩdã kɩɩsdbã tõe n wa kɩtame tɩ d bʋdge. (Efɛ. 4:14) A Zeezi pipi karen-biisã wʋsg sẽn wa n bas a tũubã, tʋm-tʋmd a Pɩyɛɛr wilgame t’a kɩsa sɩd t’a Zeezi tara “vɩɩm sẽn kõn sa wã goamã.” (Zã 6:67, 68) Baa ne a Pɩyɛɛr sẽn da pa wʋm a Zeezi goam kẽer võor wakat kãngã, a kell n maana sɩd ne-a, bala a bãnga sɩdã Kiristã zugu. Yãmb me tõe n mao n maneg n kɩsa sɩd ne Biiblã sẽn yetã. Y sã n maan woto, y na n tõog n yalsa kãn-kãe makr wakate, la y sõng neb a taab me tɩ b tall tẽeb sẽn yaa kãn-kãe.—2 Zã 1, 2. w20.07 8 s. a 2; 13 s. 18

Sẽn na yɩl n sõng d tẽed-n-taasã tɩ b kell n pa sɩdã pʋgẽ, d segd n kʋmda b nimbãanega. (1 Zã 3:10, 11, 16, 17) Pa sẽn wat n noomẽ bal la d segd n nong taab ye. D segd n nonga taab baa zu-loees wakate. Wala makre, y tẽed-n-taag ned n maan kaalem, t’a rat belsgo, wall a rat tɩ b sõng-a ne bũmb ning bɩ? Bɩ y wʋmame tɩ sabab-wẽng n maane, tɩ d tẽed-n-taas bõn b sẽn tarã, wall b rat sõngr sẽn na yɩl n lebs n me b Rĩung rot bɩ b zags bɩ? Pa ne d no-goamã bal la d tog n wilg tɩ d nonga d tẽed-n-taasã la d kʋmd nimbãaneg wʋsg ye. Sẽn yɩɩd fãa, yaa ne d tʋʋm-tʋmdɩ wã. D sã n nong taaba, d rɩkda d Ba sẽn be saasẽ wã togs-n-taare. (1 Zã 4:7, 8) Bũmb a ye sẽn tar yõod d sẽn tõe n maan n wilg tɩ d nonga taab yaa d sẽn na n kõt taab sugri. Wala makre, ned sã n maan bũmb tɩ sãam tõnd sũuri, tɩ d kõ-a sugr la d yĩm a beegrã, yaa nonglem.—Kol. 3:13. w20.07 24 s. 14-15

D na n zãmsa sẽn na n vʋʋg-bã yembr-yembr Biiblã wa d sẽn maand to-to ne nebã rũndã-rũndã wã bɩ? B na n kɩtame tɩ b tɩ naag tigimsi, tɩ bãmb me paam minim n wa tõe n zãms sẽn na n vʋʋg-b bãmb poorã bɩ? Rẽnda d gũ n gese. La d sẽn mi bala, yaa tɩ Kirist naamã sẽn na n kaoos yʋʋm tusrã sã n wa sa, rẽ tɩ ‘dũniyã gill pida ne a Zeova bãngre.’ (Eza. 11:9) Ad tʋʋm wʋsg sẽn be yamleoog n na n zĩnd yʋʋm tusrã sasa! Kirist naamã sẽn na n kaoos yʋʋm tusrã sasa, a Zeova nin-buiidã fãa segd n toeema bũmb kẽer b vɩɩmã pʋgẽ, n tõog n ta a Zeova yam. Dẽnd b fãa sã n wa sõngd sẽn vʋʋg-bã tɩ b bas b manesem-wẽnsã, la b sak a Zeova noyã, b na n kʋmda b nimbãanega. (1 Pɩy. 3:8) Sãmbg kae tɩ neb nins sẽn na n vʋʋgã na n dat n zĩnda ne a Zeova nin-buiidã sẽn yaa sik-m-mens rãmbã. Bãmb me na n kell n ‘maana bũmb nins b sẽn segd n maan n wa paam fãagrã.’—Fili. 2:12. w20.08 16 s. 6-7

D sã n tũ tʋm-tʋmd a Poll saglgã vʋʋsem sõngã sẽn vẽneg-a t’a gʋlsã, la d fees d mengã tʋʋmã, d wat n bãngame tɩ d tara minim neb a taab sẽn pa tare. Wala makre, kãsem-soab tõeeme n pa tar minim n na n wɛgs sõsg sõma tigingã neb taoore, n yaool n tõe n sõng nebã sõma tɩ b lebg Kiristã karen-biisi. Bɩ tõe t’a pa ned sẽn mi bũmb siglg sõma wa tigingã kãsem-dãmb a taabã, tɩ tigingã koe-moondb yaool n miẽ t’a yaa kãsem-soab sẽn nong neba, tɩ b tõe n pẽneg-a n kos sagls sẽn yit Biiblã pʋgẽ n pa yɛɛs ye. Bɩ tõe tɩ yaa vẽeneg t’a yaa ned sẽn nong n deegd neb sãando. (Ebre. 13:2, 16) Tõnd sã n bãng tɩ d tara minim takɩ, d sũur na n nooma ne d sẽn tõe n maan bũmb ning n sõng tigingã. D pa na n wa rat me n maan sũ-kiir ne d saam-biis nins sẽn tar minim sẽn yaa toor ne tõnd rẽndã ye. Baa tõnd tʋʋmd sẽn yaa a soab tigingã pʋgẽ, d fãa segd n tʋll n tʋma d tʋʋmdã sõma n paase, la d paas d minimã. w20.08 24 s. 16-18

Saam-biig a Joseph Rutherford wɛgsa sõsg gom-zug sẽn yaa “Kʋʋn-kãsengã,” yʋʋmd 1935 wã, tigis-kãseng sẽn zĩnd Wasĩnton D.C, Etazĩni soolmẽ wã. Sõsgã pʋgẽ, a wilga “kʋʋn-kãseng” ning yell b sẽn gomd Vẽnegr 7:9 pʋgẽ wã sẽn yaa neb ninsi. La wakat-kãnga, b ra tagsdame tɩ nin-kãensã me yaa sull a to sẽn na n kẽng saasẽ, la tɩ b tẽebã pãng pa ta pipi sullã ye. Saam-biig a Rutherford tika Biiblã n wilg tɩ kʋʋn-kãsengã pa na n tɩ vɩɩmd saasẽ, la tɩ yaa bãmb la Kiristã sẽn boond tɩ piis a taabã, sẽn na n põs “to-kãsengã” sasa n wa vɩɩmd tẽngã zug wakat sẽn kõn sa wã. (Vẽn. 7:14) A Zeezi yeelame: “Mam tara piis a taaba, sẽn pa yãg-kãngã piis ye. Mam segd n talla bãmb me n wa, la b na n kelga mam koɛɛgã. Na n yɩɩ yãgr a yembre, la pe-kɩɩm-yɛnga.” (Zã 10:16) Piis a taabã yaa neb sẽn maand sɩd ne a Zeova, n saagd n na n wa vɩɩmd wakat sẽn kõn sa arzãn pʋgẽ tẽngã zugu.—Mat. 25:31-33, 46. w21.01 14 s. a 1-2

Tõnd sã n dat n tõog toog n kell n moon koɛɛgã n baase, d segd n wõra d mense. (Mat. 28:19, 20) Ned pa rogd ne wõr-m-meng ye. Ninsaal fãa nonga tʋʋm nins sẽn yaa nana wã. La wakat ninga, bũmb nins sẽn tar yõod wʋsgã maaneg pa nana ye. Woto wã, d segd n wõrda d mense. Dẽnd d segd n paama sõngre, sẽn na yɩl n tõog n tʋm tʋʋm nins sẽn wõnd yaa toog ne-dã. La a Zeova tũnugda ne a vʋʋsem sõngã n sõngd tõndo. (Gal. 5:22, 23) Tʋm-tʋmd a Poll ra wõrda a menga. Sɩd me, a yeelame t’a ra “pãbda” a yĩngã, sẽn na yɩl n tõog n maan sẽn yaa tɩrga. (1 Kor. 9:25-27) A sagla neb a taabã tɩ b wõr b mense, la b maand bũmb fãa “wa sẽn segde, la ra yɩ ne zũnd-zãnd ye.” (1 Kor. 14:40) D segd n wõrda d mense, n tõog n ket n maand bũmb nins d sẽn segd n maan d tẽebã bɩɩsg yĩngã, wala makre, n moond koɛɛgã wakat fãa.—Tʋʋ. 2:46. w20.09 6-7 s. 15-17

Rũndã-rũndã, tẽns wʋsg pʋsẽ, d tõe n moona koɛɛgã tɩ gɩdgr kae ye. Yãmb sẽn vɩ tẽng ningã yaa woto bɩ? Sã n yaa woto, sok-y y meng yaa: ‘Bõe la m maand sasa kãnga?’ D sẽn vɩ yaoolem wakatã, d sũur noomame bala a Zeova nin-buiidã maneg n moondã koɛɛgã, la b zãmsd nebã n yɩɩd pĩndã. Rẽ wɛɛngẽ, tʋʋm wʋsg la d tõe n paam n tʋme. Yãmb sã n vɩɩ bãan wakate, bõe la y tõe n maan n dɩ a yõodo? (2 Tɩm. 4:2) Y tõe n tagsame n ges yãmb mengã bɩ y zakã ned sã n tõe n kẽesa a meng sõma koɛɛgã mooneg pʋgẽ n paase, wala makre, n lebg so-pakda. Masã pa wakat d sẽn segd n bao arzɛgs ye. Bala, d arzɛgsã pa na n tall yõod to-kãsengã sasa ye. (Yel. 11:4; Mat. 6:31-33; 1 Zã 2:15-17) Koe-moondb wʋsg zãmsa buud-gom-zẽnga, n na n paam n sõng neb a taab tɩ b bãng a Zeova. A Zeova siglgã yiisda sɛb la bũmb a taab buud-goam 1000 la zak pʋgẽ. w20.09 16 s. a 9-11

Soda-sõng maanda sɩda. A na n sak n zaba ne a sũur fãa n kogl neb a sẽn nonge, wall bũmb a sẽn nand wʋsgo. A Poll sagla a Tɩmote t’a bɩɩs wẽn-zoeere, rat n yeel t’a sak Wẽnnaam ne a sũur fãa. (1 Tɩm. 4:7) Yaa d sã n nong Wẽnnaam sõma la d na n tʋll n kell n wɩng ne a tũubu. (1 Tɩm. 4:8-10; 6:6) Soda-sõng segd n mongda a meng bũmb kẽere, a sã n dat n ket n tʋmd a tʋʋmdã sõma. A Tɩmote kell n tõog n tʋma a tʋʋmdã sõma, bala a sak n tũu a Poll sẽn sagl-a t’a zãag a meng ne tʋls-wẽnse, t’a bɩɩs zʋg-sõma, la t’a tigimd ne a tẽed-n-taasã. (2 Tɩm. 2:22) Woto baooda mong-m-menga. D sã n dat n zab ne d yĩngã tʋls-wẽnsã n tõoge, mong-m-meng yaa tɩlɛ. (Rom. 7:21-25) Sẽn paase, d sã n dat n ket n yeegd nin-kʋdgã la d yeelgd nin-paalgã, yaa tɩlɛ tɩ d tall mong-m-menga. (Efɛ. 4:22, 24) Tigsg daare, d sã n tʋm daarã tõr n sig tɩ yaa yaamse, yaa tɩlɛ tɩ d wõr d meng n tõog n kẽng tigsgã.—Ebre. 10:24, 25. w20.09 28 s. a 9-11

D sã n wa sõngd karen-biig sẽn na yɩl t’a wa tõog n deeg lisgu, d segd n talla sũ-mare. La wakat ninga, d segd n bao n bãnga a sã n sɩd rat n tũu Wẽnnaam a Zeova. Yãmb nee bũmb karen-biigã sẽn maande, tɩ wilgdẽ t’a sakda a Zeezi noyã bɩ? Bɩ a ratame bal n paam bãngr Biiblã zugu? Wakat fãa, bɩ y baood n bãngd y karen-biigã sã n ket n modgdame. Wala makre, a wilgdame t’a nonga a Zeova bɩ? A pʋʋsda a Zeova bɩ? (Yɩɩn. 116:1, 2) A nong n karemda Biiblã bɩ? (Yɩɩn. 119:97) A wata tigissã wakat fãa bɩ? (Yɩɩn. 22:23) A toeema bũmb wʋsg a vɩɩmã pʋgẽ tɩ wilgdẽ t’a tũuda a sẽn zãmsdã bɩ? A sɩngame n gomd bũmb nins a sẽn zãmsdã yell ne a zakã neb la a zo-rãmbã bɩ? (Yɩɩn. 9:2) Sẽn yɩɩd fãa, a rat n lebga a Zeova Kaset soab bɩ? (Yɩɩn. 40:9) Karen-biigã sã n pa maand bõn-kãensã baa a yembre, bɩ y maag y yĩng n bao n bãng a võore, la y sõs ne-a rẽ zug vẽeneg-vẽenega. w20.10 18 s. 14-15

A Zeezi saasẽ Ba wã bãngd n yãkda yam wakat fãa. A roagdb a Zozɛf ne a Maari me ra bãngd n yãkda yam. La a Zeezi sẽn wa n lebg kãsmã, yẽ n da segd n yãkd yam a toore. (Gal. 6:5) Wa tõndo, yẽ me ra tara sor n na n yãk yam n maan a sẽn date. A ra tõe n yãka yam n lʋɩɩs a mengã raab taoore. La a pa maan woto ye. A yãka yam n na n kell n tall zood sõma ne a Zeova. A Zeezi sẽn wa n bãng yẽ sẽn tar tʋʋmd ning a Zeova raabã pidsg pʋgẽ wã, a yãka yam n na n sak tʋʋmdã. (Zã 6:38) A ra miime tɩ neb wʋsg na n kisg-a lame. Tõe t’a sã n da tagsd rẽ yelle, sãamda a sũur wʋsgo. Baa ne rẽ, a kell n yãka yam n na n sak a Zeova. A Zeezi sẽn deeg lisg yʋʋmd 29 wã, bũmb ning sẽn da tar yõod ne-a n tɩ yɩɩd yaa a Zeova raabã maanego. (Ebre. 10:5-7) Baa ne a sẽn wa n be kũum ra-lukã zugã, a pa tol n bas a Ba wã raab maaneg ye.—Zã 19:30. w20.10 29 s. 12; 30 s. 15

Yãmb mii saam-biis bɩ saam-bi-pogs sẽn be yãmb tigingẽ wã, tɩ b sũyã sãam wʋsg b sẽn ka laafɩ, wall b sẽn maood ne zu-loees a taab yĩng bɩ? Tõe tɩ yaa ned b sẽn nong n maan kaalem. D sã n yã ned sẽn dat sõngre, d tõe n kosa a Zeova t’a sõng-d tɩ d yeel bɩ n maan bũmb n wilg tɩ d nonga a soabã, la tɩ d tagsda a yelle. Tõe tɩ yaa rẽ bal la a soabã ra rata, sẽn na yɩl n paam daoodo. (1 Pɩy. 4:10) D miime tɩ d tõe n talla raoodo, bala a Zeova bee ne-do. A tũnugda ne a Zeezi la malɛgsã n sõngd tõndo. Sẽn paase, sã n zems ne a Zeova raabo, a tõe n tũnuga ne neb sẽn tar zu-sobend n sõng-do. Tõnd sʋkã neb wʋsg tara kaset t’a Zeova tũnugda ne a vʋʋsem sõngã, n kɩtdẽ tɩ d tẽed-n-taasã sõngd tõndo. Rẽnd wa tʋm-tʋmd a Polle, d tara bʋʋm n na n yeel ne bas-m-yam yaa: “A Zeova yaa mam sõangda. Mam pa na n zoe rabeem ye. Ninsaal tõe n maana maam bõe?”—Ebre. 13:6. w20.11 17 s. 19-20

Tʋm-tʋmdbã ra tara kaset vẽeneg t’a Zeova bee ne-ba. A ra kõ-b-la tõog tɩ b tõe n maan yel-soalma. (Tʋʋ. 5:12-16; 6:8) La pa woto ne tõnd rũndã-rũndã ye. Baa ne rẽ, a Zeova sõngda tõnd ne a Gomdã maasem, tɩ d miẽ tɩ b sã n namsd tõnd d tũudmã yĩnga, a sũur nooma ne-do, la t’a vʋʋsem sõngã na n zĩnda ne-do. (1 Pɩy. 3:14; 4:14) Dẽnd d pa segd n maand yɩɩre, d sẽn pa mi d sẽn na n wa maan bũmb ning nams-toaag wakat yĩng ye. D segd n tagsda d sẽn tõe n maan masã menga, n maneg n kɩs sɩd t’a Zeova tõe n sõng-d lame la a fãag-do. D segd n kɩsa sɩd ne a Zeezi sẽn yeel bũmb ningã. A yeelame: “Mam na n kõo yãmb yam la m wilg yãmb y sẽn na n yeel bũmb ninga, tɩ y bɛɛbã pa tõog n leok tɩ bũmb ye.” A paasame yaa: “Yaa ne yãmb tõog-toogã la y na n fãag y vɩɩmã.” (Luk 21:12-19) D ra tol n yĩm me t’a Zeova tẽra neb nins sẽn maan sɩd ne-a n tãag b kũumã yell hal sõma ye. Woto yĩnga, a na n wa vʋʋg-b lame. w21.01 4 s. 12

Pa tʋm-tʋmd a Poll n yɩ pipi n gom kũum vʋʋgrã yell ye. A Zoob me goma rẽ yelle. A ra kɩsa sɩd tɩ Wẽnnaam na n wa tẽega a yelle, n vʋʋg-a. (Zoob 14:7-10, 12-15) Kiris-nebã sẽn tẽed bũmb ninsã fãa sʋka, “kũum vʋʋgrã” naaga “yẽbgr” bɩ “bũmb nins d sẽn zãms pipi” wã. (Ebre. 6:1, 2) A Poll sẽn gom kũum vʋʋgrã yellã bee 1 Korẽnt-rãmb sak 15 wã pʋgẽ. Sãmbg kae t’a Poll sẽn yeel bũmb ningã kenga pipi kiris-nebã tẽebo. A sẽn yeelã tõe n kenga tõnd me tẽebã, tɩ d kɩs sɩd tɩ kũum vʋʋgrã d sẽn tẽed hal sẽn kaoosã na n sɩd pidsame. Yaa a Zeezi Kirist sẽn vʋʋgã n kɩt tɩ d saagdẽ tɩ d neb nins sẽn ki wã na n wa vʋʋgame. A Zeezi vʋʋgrã naaga “koe-noogã” a Poll sẽn taas Korẽnt kiris-nebã. (1 Kor. 15:1, 2) A pʋd n yeelame tɩ kiris-ned sã n pa tẽed a Zeezi vʋʋgrã, a tẽebã yaa zaalem.—1 Kor. 15:17. w20.12 2 s. a 2-4

Bõe n sõng tʋm-tʋmd a Pɩyɛɛr t’a tẽebã le paam pãnga? Wala makre, a Zeezi ra pʋʋsa a Zeova n kos-a t’a sõng a Pɩyɛɛr t’a tẽebã ra koms zãng ye. A Zeova sɩd leoka a pʋʋsgã. Kaoosg zugẽ, a Zeezi vẽnega a meng ne a Pɩyɛɛre. La sãmbg kae tɩ ra yaa sẽn na yɩl n keng a raoodo. (Luk 22:32; 24:33, 34; 1 Kor. 15:5) Tʋm-tʋmdbã sẽn wa n kẽng n na n tɩ yõg zĩm n pa paam baa fʋɩ wã, a Zeezi vẽnega a meng ne-b beenẽ. Wakat-kãnga, a Zeezi kõo a Pɩyɛɛr weer t’a paam n wilg-a t’a sɩd ket nong-a lame. Dẽnd a Zeezi ra kõo a zo-nongr a Pɩyɛɛr sugri, hal n kõ-a tʋʋm n paase. (Zã 21:15-17) A Zeezi sẽn tall manesem ning ne a Pɩyɛɛrã wilgdame t’a sɩd yaa nimbãan-zoɛta, la t’a rɩka a Ba wã togs-n-taar kɛpɩ. Rẽ wã, d sã n wa konge, d pa segd n tags t’a Zeova pa na n tol n kõ-d sugr ye. D segd n tẽegame tɩ yaa a Sʋɩtãan n dat tɩ d tags woto. D pʋd n segd n maaga d yĩng n tags a Zeova sẽn nong tõnd la a mi d pãn-komsmã yelle, la d bãng t’a rata ne a sũur fãa n kõ-d sugri. Sẽn paase, neb a taabã sã n maan bũmb n sãam d sũuri, d segd n dɩka d saasẽ Ba wã togs-n-taare.—Yɩɩn. 103:13, 14. w20.12 20-21 s. 17-19

D tõe n dɩka yam neb nins sẽn pa kell n pa sɩɩ la b pa teeg a Zeova wã kibay pʋgẽ me. D sã n karem kiba-kãense, na n sõng-d lame tɩ d ra maan wa bãmb ye. A Aaza sẽn wa n paam zu-loeesã, a teega a Zeova. La kaoosg zugẽ, a pa bao a Zeova sõngr ye. A baoome n na n welg yɛlã a toore. (2 Kib. 16:1-3, 12) Nif gesg pʋgẽ, yaa wa a Aaza sẽn kos Siiri rĩmã sõngrã yaa yam tʋʋmde. La sõngrã pa naf-a n kaoos ye. A Zeova tũnuga ne no-rɛɛs n yeel-a yaa: “Fo basa Sẽn-Ka-Saab teegre, n tɩ teeg Siiri rĩmã. Woto yĩng kɩtame tɩ Siiri tãb-biisã na n põsg f nugẽ.” (2 Kib. 16:7) D segd n gũusame n da teeg d meng n na n welgd yɛlã d toore, n pa bao a Zeova sõngr ne a Gomdã maasem ye. Baa d sã n wa segd n welg zu-loɛɛg tʋʋll-tʋʋlle, d segd n basa d yam n teeg a Zeova, t’a na n sõng-d lame. w21.01 6 s. 13-15

Masã menga, a Zeova Kaset rãmb kẽer la komã namsda, b sẽn pa tar ligd n na n da rɩɩb la bũmb a taab yĩnga, wall zabã sẽn wa ne zu-loees b tẽngẽ wã yĩnga. Kẽer la b kẽes bãens roog b tẽebã yĩnga. La kʋʋn-kãsengã neb sũy noomame, bala b miime tɩ b sã n põs dũni-wẽn-kãngã sãoongã sasa, wakat fãa b na n paamda rɩɩb tɩ sekdẽ, la b paamd zãmsg sẽn yit a Zeova nengẽ. A Zeova sã n wa na n sãam a Sʋɩtãan dũniyã, n kɩt t’a sũ-puugrã sẽn yaa wa “tʋʋlg” sẽn yõogdã sig nebã zugu, a na n kogla kʋʋn-kãsengã. To-kãsengã poore, a Zeezi na n talla sẽn na n põs-bã n kẽng “vɩɩm ko-bunds zĩisẽ,” rat n yeel tɩ n sõng-b tɩ b paam vɩɩm sẽn kõn sa. (Vẽn. 7:17) Tags-y n ges-y-yã: Kʋʋn-kãsengã saagdame n na n wa paam bũmb sẽn yaa toor zalle. Neb milyaar-dãmbã sẽn vɩ wã sʋka, bãmb tõeeme n pa tol n ki ye. (Zã 11:26) Piis a taabã sẽn saagd n na n paamã yaa bõn-kãsenga, hal tɩ b pʋʋsd a Zeova ne a Zeezi bark rẽ yĩnga. w21.01 16-17 s. 11-12

Yʋng ning sẽn deng a Zeezi kũumã, a ra tagsda zu-loees nins fãa a karen-biisã sẽn na n paamã yelle. A sẽn da nong a karen-biisã yĩnga, a pʋʋsa a Ba wã n kos-a t’a gũ-b “wẽng soabã yĩnga.” (Zã 17:14, 15) A Zeezi ra miime t’a sã n leb saasẽ, a Sʋɩtãan na n ket n zabda ne ned ning fãa sẽn na n dat n tũ a Zeova. Vẽenega, a Zeova nin-buiidã ra na n data koglgo. Yaa masã la d rat a Zeova koglg n yɩɩda. B riga a Sʋɩtãan t’a yi saasẽ n sig tẽngã zugu, “t’a sũ-puugrã yaa kãsenga.” (Vẽn. 12:12) A maana a sẽn na maaneg n kɩt tɩ neb kẽer namsd tõnd d tẽebã yĩnga, n tagsdẽ tɩ b ‘tʋmda Wẽnnaam tʋʋmde.’ (Zã 16:2) Neb a taab sẽn pa tẽed Wẽnnaam namsda tõndo, d sẽn pa maand wa dũniyã nebã yĩnga. La sẽn yaa to-to fãa, d pa zoet rabeem ye. Bõe yĩnga? Yaa rũndã daar vɛrse wã sẽn yet bũmb ningã yĩnga. w21.03 26 s. a 1, 3

A Zeova maanda bũmba fãa ne nonglem. (1 Zã 4:7, 8) A sẽn nong-dã yĩnga, a kɩtdame tɩ d paamd bũmb nins fãa sẽn yaa tɩlɛ ne-dã. A Zeova sẽn nong tõndã yĩnga, a yaoo yaoodo, n na n fãag tõndo. A Zeezi me nonga tõnd hal wʋsgo, hal n sak n kõ a vɩɩmã tõnd yĩnga. (Zã 3:16; 15:13) Bũmb kae sẽn tõe n gɩdg a Zeova ne a Zeezi, tɩ b pa wilg tɩ b nonga neb nins sẽn maand sɩd ne-bã ye. (Zã 13:1; Rom. 8:35, 38, 39) Woto me, sẽn yaa bũmb ning fãa la zak soab maanda, segd n yɩɩ ne nonglem. Bõe yĩng tɩ rẽ tar yõod wʋsgo? Tʋm-tʋmd a Zã yeelame: “Ned ning sẽn pa nong a saam-biig [bɩ a zakã rãmb] a sẽn ne wã pa tõe n nong Wẽnnaam a sẽn pa ne wã ye.” (1 Zã 4:11, 20) Sẽn yɩɩd fãa, rao sẽn nong a zak rãmb la a rat n dɩk a Zeova ne a Zeezi togs-n-taar na n sõngda a zakã rãmb tɩ b paamd bũmb nins sẽn yaa tɩlɛ b tẽebã kengr yĩngã, la a sõngd-b tɩ b paamd rɩɩb la futu, tɩ b yam gãe bãane, la b tar sũ-noogo. (1 Tɩm. 5:8) A na n zãmsda a kambã a Zeova noyã, la a kibind-ba. Sẽn paase, a na n modgdame t’a yam-yãkr fãa waoogd a Zeova, la nafd a zakã rãmba. w21.02 5 s. 12-13

D saasẽ Ba a Zeova sẽn nong-dã mii yɛl nins sẽn paam tõnd pĩndã, la d tags-kɛgã sẽn namsd tõnd to-to wã. A nee d zʋg-sõma wã, baa tõnd mengã sã n tagsdame tɩ d pa tar ye. (1 Zã 3:19, 20) Ned sẽn maood n na n bas minim-wẽng sẽn kɩ yẽg wʋsg tõe n le lʋɩɩ minun-kãng pʋgẽ, hal t’a sũur sãam wʋsgo. D sã n ning d meng taal yel-wẽnd d sẽn maan yĩnga, pa wẽng ye. (2 Kor. 7:10) La d pa segd ning d meng taal tɩ loog noore, n tagsdẽ tɩ d ka võor baa bilfu, la t’a Zeova pa tol n tõe n kõ-d sugr ye. Woto yaa tags-kɛgre, sẽn tõe n kɩt meng tɩ d bas a Zeova tũubu. D pʋd n segd n pʋʋsa a Zeova n kos-a t’a kõ-d sugri. (Eza. 1:18) A sã n yã tɩ y sɩd teka yam n kot sugri, a na n kõ-y-la sugri. Sẽn paase, y segd n baoo kãsem-dãmbã sõngre. B na n talla sũ-mar ne-yã, n sõng-y tɩ y tẽebã le paam pãnga.—Zak 5:14, 15. w20.12 23 s. a 5-6

A Zeezi ra waoogda pagbã, la a nand-ba. A ra pa maand wa fariziẽ-rãmbã sẽn da paoogd pagbã, la b pʋd n pa gomd ne-b zãma sʋka, tɩ b pa sokd b sõs ne-b Gʋls-sõamyã zugã ye. Wala makre, a ra sõsda Wẽnnaam Gomdã yel-zulumsã zug ne pagb la rap fãa. (Luk 10:38, 39, 42.) A ra sakdame tɩ pagb tũud-a tɩ b gilgd n moond koɛɛgã. (Luk 8:1-3) A sẽn yeel pagb tɩ b tɩ taas tʋm-tʋmdbã tɩ yẽ vʋʋgame wã, a waoog-b lame me. (Zã 20:16-18) Tʋm-tʋmd a Poll tẽega a Tɩmote t’a waoog pagbã. A Poll sak n deegame tɩ yaa a Tɩmote yaab-poakã ne a ma wã n yɩ pipi n zãms a Tɩmote “Gʋls-sõamyã.” (2 Tɩm. 1:5; 3:14, 15) A Poll lɛtr ning a sẽn gʋls Rom kiris-nebã pʋgẽ, a pʋʋsa saam-bi-pogse, n sõdg b yʋyã takɩ. A yãa tʋʋmd ning saam-bi-pogsã sẽn tʋm koe-moonegã pʋgẽ wã, la a wilg me t’a nanda b tʋʋmdã.—Rom. 16:1-4, 6, 12; Fili. 4:3. w21.02 15 s. a 5-6