Tʋʋl-nifu

Yãmb namsda y sẽn maood ne zu-loe-kɛgeng yĩng bɩ? Tõe tɩ tigingã ned n maan bũmb tɩ sãamd y sũuri. (Zak 3:2) Pa rẽ bɩ y karen-bi-taas wall y tʋmd-n-taas n yaand yãmba, y sẽn tũud a Zeova wã yĩnga. (1 Pɩy. 4:3, 4) Bɩ tõe tɩ yaa y zakã rãmb n dat n gɩdg yãmb tɩ y ra kẽnd tigissã, bɩ n da gom y tẽebã yell ne y taabã ye. (Mat. 10:35, 36) Yell ning sã n namsd-y wʋsgo, y yam la y bas a Zeova tũubu. La y tõe n kɩsa sɩd tɩ sẽn wa n yaa zu-loɛɛg ning fãa taoore, a Zeova na n kõ-y-la yam la pãng tɩ y tõog n mao ne-a. A Zeova kɩtame tɩ b gʋls neb kibay a Gomdã pʋgẽ. Yaa neb sẽn pa zems zãng sẽn mao ne zu-loe-kɛgemse. Woto yaa sẽn na yɩl tɩ d rɩk yam b kibayã pʋgẽ. Yaa woto la a Zeova kɩt tɩ tʋm-tʋmd a Poll gʋlse. Kiba-kãensã kareng kengda d raoodo, la kɩt tɩ d tõe n saag tɩ manegr n wate. Sẽn na yɩl n dɩ b nafa, Biiblã kareng bal pa sek ye. D segd n basame tɩ Biiblã sẽn yetã kẽ d sũyã la a toeem d tagsa wã. w21.03 14 s. a 1-2

Yãmb tagsg ne neb nins y sẽn taasd koe-noogã yaa wa kood sẽn bɩ n ta kẽebg bɩ? Sã n yaa woto, bũmb a tãab la y na n maan tɩ wilg rẽ vẽenega. Pipi, yãmb na n moonda ne yãgbo. Kẽebg wakat pa kaoosd ye. Dẽnd y pa segd n sãam sẽkã ye. Yiibu, y sũur na n nooma ne nebã sẽn sakd n kelgd koe-noogã. Biiblã yeelame tɩ ‘nebã kɩdemda tigsg wakate.’ (Eza. 9:2) Tãabo, y na n getame tɩ ned buud fãa tõe n wa lebga a Zeezi karen-biiga. Woto na n kɩtame tɩ y modgd n toeemd y sẽn gomd bũmb ning yellã tɩ zemsd ne sẽn noom ned fãa. Tõe t’a Zeezi karen-biis kẽer ra tagsdame tɩ Samari nebã pa tol n tõe n lebg a karen-biis ye. La a Zeezi yẽ ra pa tagsd woto ye. A pʋd n da get-b-la wa neb sẽn tõe n wa lebg a karen-biisi. Tõnd me segd n geta neb nins d sẽn taasd koɛɛgã woto. Rẽ wɛɛngẽ, tʋm-tʋmd a Poll kõo tõnd mak-sõngo. A ra baood n bãngda a sẽn moond-b rãmbã sẽn tẽed bũmb ninsi, a ra baood n bãnga sẽn noom-bã, la a ra get-b wa neb sẽn tõe n wa lebg a Zeezi karen-biisi. w20.04 8-9 s. a 3-4

D pa segd n ges ned yel-manesem n kao a bʋʋd ye. D tog n maana d sẽn tõe fãa n bao n bãng bũmb ning sẽn tar-a. Yaa a Zeova a ye bal n wʋmd tõnd yɛlã võor sõma. Rẽ n so tɩ d segd n kos-a t’a sõng-d tɩ d get nebã wa yẽ sẽn get-b to-to wã, la d bãng d sẽn tõe n maan n wilg tɩ d kʋmd-b lame. D pa tõe n tags tɩ segdame tɩ d kʋmd d tẽed-n-taas kẽere, la d bas n pa kʋmd sãnda ye. B fãa maooda ne a Zonaase, a Eli, a Agaar la a Lot zu-loeesã buudu. Noor wʋsgo, bãmb n bao yɛlã n kõ b mense. Togs sɩdã, ned kae sẽn zɩ n bao yell n kõ a meng ye. Dẽnd a Zeova bee bʋʋm la a sẽn dat tɩ d kʋmd d taabã. (1 Pɩy. 3:8) D sã n sakd a Zeova, d sõngdame tɩ zems-n-taarã sẽn be a nin-buiidã sʋkã pãng paasdẽ. Woto wã, d manesmã ne d taabã pʋgẽ, bɩ d modg n wilgd tɩ d nand-b lame, n kelgd-b neere, n baood n bãngd-b sõma la d kʋmd-ba. w20.04 18-19 s. 15-17

A Zeova sakrã wɛɛngẽ, a Zeezi n kõ mak-sõng sẽn ka to. Bũmb sẽn tar yõod d sẽn tõe n maan n wilg tɩ d sakda a Zeova, yaa d sẽn na n maand d sẽn tõe tɛk n tũud a Zeezi naoã neere. (Zã 8:29) Sẽn na yɩl n ket n kẽnd sɩdã pʋgẽ, d segd n kɩsa sɩd tɩ yaa a Zeova la Wẽnnaam ning sẽn yaa sɩd soabã, la tɩ bũmb nins fãa a sẽn togs Biiblã sẽn yaa a Gomdã pʋgẽ wã yaa sɩda. D segd n kɩsa sɩd me tɩ yaa a Zeezi la Mesi ning b sẽn da pʋlem t’a watame wã. Rũndã-rũndã, neb wʋsg sãmbda sã n sɩd yaa a Zeezi la Wẽnnaam yãk t’a yaa a Rĩungã Rĩmã. A Zã keoog-d lame tɩ d gũus tɩ “bɛlgdb wʋsg” n be, la tɩ b tõe n wa belga neb nins sẽn pa segl n sa n na n wilg bũmb nins Biiblã sẽn yet a Zeova ne a Zeezi zugã. (2 Zã 7-11) Ad a Zã sẽn yeele: “Ãnda n yaa zirẽ-be-nedã n zʋʋg ned ning sẽn kɩɩsd t’a Zeezi pa Kiristã?” (1 Zã 2:22) Yaa Wẽnnaam Gomdã zãmsg bal n tõe n sõng-d tɩ d ra bas tɩ b belg-d ye. Yaa d sã n maand rẽ me la d na n bãng a Zeova ne a Zeezi. (Zã 17:3) Yaa rẽ fãa poor masã la d na n kɩs sɩd tɩ d bee sɩdã pʋgẽ. w20.07 21 s. a 4-5

Bũmb d sẽn tõe n maan n da wa “kɩt tɩ saam-biig lak n lʋɩ” yaa d sẽn na n modgdẽ tɩ sã n tõe fãa, bɩ d mi n bas tɩ b maan bũmb nins sẽn noom-bã, la d ra baood wakat fãa tɩ b maan tõnd sẽn datã ye. (Rom. 14:19-21; 1 Kor. 8:9, 13) Woto n na n wilg tɩ d yaa toor ne sẽn zoet-b zoees sɩd-sɩdã, tɩ ned fãa modgd n dat n paam keoorã tɩ yɩ yẽ a ye tãa rẽndã. B mens yell bal n pak-b n tɩ yɩɩda. Kɩtame tɩ b mi n wẽdgd b taabã n na n paam n lʋɩ taoore. Tõnd yẽ nengẽ pa woto ye. D pa wagsd taab ye. (Gal. 5:26; 6:4) D sẽn datã yaa d sõng neb wʋsg wa d sẽn tõe tɛka, tɩ d naag taab n baas zoeesã n paam keoorã sẽn yaa vɩɩm sẽn ka sɛtã. Rẽ n so tɩ d modgd n tũud saglg ning Wẽnnaam sẽn vẽneg a Poll t’a kõ wã. A yeelame: “Ra bao-y y mens nafr bal ye. Bao-y y taabã nafr me.”—Fili. 2:4. w20.04 28 s. 10; 29 s. 12

Kiris-neb bãmb milyõ-rãmb sẽn yaa pagb la rap n na n “põs to-kãsengã” n vɩɩmd dũni-paalgã pʋgẽ. Nin-kãensã sẽn na n põsã na n yãa neb milyõ-rãmb sẽn da maan kaalem sẽn na n vʋʋgã, tɩ yɩ kaset tɩ b tõoga kũumã. Tags-y n ges-y d sũ-noogã sẽn na n yɩ kãseng to-to wakat-kãngã. (Tʋʋ. 24:15) Neb nins fãa sẽn na n kell n maan sɩd ne a Zeova wã na n tõoga kũumã, d yaab a Ãdem beegrã sẽn wa ne wã. B na n tõog n vɩɩmda wakat sẽn kõn sa. Kiris-ned fãa sẽn vɩ rũndã-rũndã segd n wilgame, t’a sũur nooma ne goam nins a Poll sẽn taas Korẽnt kiris-nebã kũum vʋʋgrã wɛɛngẽ hal tɩ kengd raoodã. D tara bʋʋm n na n wilg tɩ d saka a Poll sẽn sagl tõnd tɩ d tall “tʋʋm wʋsg Zu-soabã tʋʋmdã pʋgẽ” wã. (1 Kor. 15:58) D sã n kell n tʋm tʋʋm-kãng ne yẽesem la ne d sũur fãa, d na n wa paama sũ-noog wʋsgo. Wakat kãnga, d sũ-noogã na n yɩɩga bũmb ning fãa d sẽn tõe n mams d yamẽ wã. Na n yɩɩ vẽeneg tɩ d sẽn tʋm wʋsg Zu-soabã yĩngã pa yɩ zaalem ye. w20.12 13 s. 16-17

Ges-y bãngr-goam nins sẽn be Ezekɩyɛll 38:10-23; Dãniyɛll 2:43-45; 11:44–12:1; la Vẽnegr 16:13-16, 21 wã. Wõnda bãngr-gom-kãensã sẽn gomd bũmb nins yellã yaa a yembre. Sã n yaa rẽ, ad yɛlã sẽn na n pʋg taab to-to. To-kãsengã sɩngr poore, sasa n na n zĩnd tɩ “dũniyã gill rĩm-dãmbã” lagem taaba. (Vẽn. 16:13, 14) Biiblã boonda tẽnsã sẽn na n lagem taab woto wã tɩ “Goog tẽng sẽn be Magoog soolem pʋgã.” (Eze. 38:2) B na n zaba ne Wẽnnaam nin-buiidã, n bao n sãam-b zãnga. Tʋm-tʋmd a Zã goma sasa kãng yelle, n yeel tɩ sapɩlem-bɛd n na n ni Wẽnnaam bɛɛbã zut wa saaga. Tõe tɩ sapɩlem-kãens makda bʋ-kaoor koe-toaag a Zeova nin-buiidã sẽn na n moonã. Tõe tɩ yaa koe-kãng n na n yik Goog sẽn yit Magoogã sũur t’a wa zab ne Wẽnnaam nin-buiidã. A raabã pʋd n yaa a menes-b zãng dũniyã zugu.—Vẽn. 16:21. w20.05 15 s. 13-14

Wẽnnaam vʋʋsem sõngã yaa kũun a to sẽn tar yõod wʋsgo. D sã n tags vʋʋsem sõngã sẽn maand bũmb ning rũndã-rũndã wã yelle, na n kɩtame tɩ d sũur maneg n noomẽ. A Zeezi sẽn wa n nan pa rʋ saasẽ wã, a yeela a karen-biisã yaa: “Vʋʋsem sõngã sã n sig yãmb zutu, yãmb na n paama pãnga, la y na n yɩɩ mam kaset rãmb . . . hal n tãag dũniyã zĩig ning sẽn zãr n yɩɩdã.” (Tʋʋ. 1:8) Ne vʋʋsem sõngã sõngre, sẽn zems neb milyõ a nii la pʋɩ-sʋk sẽn be dũniyã ween-vɩɩs a naasã n naag taab n tũud a Zeova. Sẽn paase, d paamame tɩ zems-n-taar be d sʋka, hal tɩ d yaa wa zak a ye rãmba. Bala, Wẽnnaam vʋʋsem sõngã sõngda tõnd tɩ d bɩɩsd zʋg-sõma wala nonglem, sũ-noogo, laafɩ, sũ-mare, maan-neere, sõmblem, tẽebo, sũ-bʋgsem, la yõk-m-menga. Yaa zʋg-sõma kãensã la ‘vʋʋsem sõngã biisi.’ (Gal. 5:22, 23) Ad vʋʋsem sõngã sɩd yaa kũun sẽn tar yõod wʋsgo! w20.05 28 s. 10; 29 s. 13

Bũmb wʋsg n kɩt tɩ d tagsd tɩ neb nins sẽn na n deeg sẽn na n vʋʋg-bã na n bãng-b lame. Wala makre, d sã n tẽeg neb nins a Zeova sẽn vʋʋg pĩndã yelle, wõnda a Zeova na n lebs n naana nebã tɩ b yalẽ wã, b goamã la b sẽn tagsd to-to wã yɩ wa sẽn da yaa to-to bilf nand tɩ b maan kaalmã kɛpɩ. Tẽeg-y t’a Zeezi maka kũumã ne gõeem, la a mak kũum vʋʋgrã ne ned sẽn nek a gõeemẽ. (Mat. 9:18, 24; Zã 11:11-13) Ned sã n nek a gõeemẽ, a yalẽ wã la a sẽn gomd to-to wã pa toeemde, a pʋ-tẽerã me pa menemd ye. D rɩk makr ne a Lazaare. A kiime n maan rasem a naase. Dẽnd a yĩngã ra sɩnga põogre. La a Zeezi sẽn vʋʋg-a wã, tao-tao bala, a ma-bi-pogsã bãng-a lame, t’a Lazaar me bãng-ba.—Zã 11:38-44; 12:1, 2. w20.08 14 s. a 3; 16 s. a 8

Sẽn paam-b zaeebã ne piis a taabã fãa yaa a ye a Zeova nifẽ. A pa get tɩ b yɩɩda taab ye. A getame tɩ b fãa tara yõod a nifẽ, t’a sẽn nong-b to-to wã zem taaba. Sɩd me, yaa a Bi-nongrã vɩɩm la a tall n yao n fãag sẽn paam-b zaeebã ne piis a taabã fãa. Bũmb sẽn yaa toor sẽn paam-b zaeebã ne piis a taabã sʋkã, yaa b saagrã bala. B fãa segd n kell n maana sɩd ne Wẽnnaam la Kiristã. (Yɩɩn. 31:24) D tẽeg t’a Zeova kõta ned fãa a vʋʋsem sõngã tɩ zems ne a soabã sẽn datã, la pa be ne a soabã paama vʋʋsem sõngã zaeeb bɩ a pa paam ye. A Zeova kɩtame tɩ ned ning fãa sẽn maand sɩd ne-a, saagd n na n wa paam bũmb sẽn yaa kãsenga. (Zer. 29:11) Kiristã kũumã tẽegr yaa segb tõnd ned kam fãa sẽn paame, n tõe n pẽg Wẽnnaam ne Kiristã, bũmb nins b sẽn maan n kõ-do, tɩ d tõe n wa paam vɩɩm sẽn kõn sa wã yĩnga. Sãmbg kae tɩ Tẽegrã n yaa tigsg ning sẽn tar yõod n yɩɩda, kiris-neb hakɩɩkã sẽn maande. w21.01 18 s. 16; 19 s. 19.

Sẽn kẽnd-b Tẽegrã sʋka, wʋsgã fãa saagdame n na n wa vɩɩmd tẽngã zugu. Sã n yaa woto, bõe yĩng tɩ b kẽnd Kiristã kũumã tẽegre? Yaa bũmb ning yĩng me sẽn kɩt tɩ neb kẽnd b zoa yi-kãadem kibsẽ wã. Yaa b sẽn dat n wilg tɩ b nonga pagã ne a sɩdã, la tɩ b teend-b lame wã. Woto me, piis a taabã sẽn kẽnd Tẽegrã, yaa b sẽn dat n wilg tɩ b nonga Kiristã ne sẽn paam-b zaeebã, la tɩ b teend-b lame wã. Leb n wilgdame tɩ b sũur nooma ne a Zeezi sẽn ki tɩ yɩ maoongo, tɩ b tõe n wa paam n vɩɩmd wakat sẽn kõn sa tẽngã zugã. Bũmb sẽn tar yõod wʋsg me sẽn kɩt tɩ piis a taabã kẽnd Tẽegrã, yaa sẽn na n yɩl n tũ a Zeezi sẽn kõ noor ningã. A Zeezi sẽn wa n na n sigl Soaalã zaabr dɩɩbã ne a tʋm-tʋmdb nins sẽn kell n maan sɩd ne-a wã, a yeel-b lame yaa: “Bɩ y maand woto n tẽegd mam yelle.” (1 Kor. 11:23-26) Rẽ n so tɩ kiris-neb sẽn paam vʋʋsem sõngã zaeeb sã n ket tẽngã zugu, piis a taabã na n ket n maanda Soaalã zaabr dɩɩbã. w21.01 17-18 s. 13-14

D sã n sɩd nong d taabã, d na n tũnuga ne d tʋʋm-tʋmdɩ wã n wilg rẽ. (Ges-y Zak 2:17, 26.) Wala makre, a Zeova sɩd nong-d lame. (1 Zã 4:19) Biiblã pʋgẽ, a tũnuga ne goam sẽn be rasãnd n togs vẽeneg t’a nong-d lame. (Yɩɩn. 25:10; Rom. 8:38, 39) La d miime tɩ pa a sẽn yet bũmb ninsã bal n wilgd t’a nong-d lame ye. Yaa a sẽn maand bũmb ninsã me. A Zeova sakame t’a bi-nongrã nams la a ki tõnd yĩnga. (Zã 3:16) Rẽnd sãmbg kae t’a Zeova nong-d lame ye. D sã n sakd a Zeova ne a Zeezi, wilgdame tɩ d nong-b lame. (Zã 14:15; 1 Zã 5:3) A Zeezi kõo noor vẽeneg tɩ d nong taaba. (Zã 13:34, 35) D pa segd n wilg ne d no-goam bal tɩ d nonga d saam-biisã la d saam-bi-pogsã ye. D segd n wilga rẽ ne d sẽn maand bũmb ninsã me.—1 Zã 3:18. w21.01 9 s. a 6; 10 s. a 8

Neb nins sẽn paam vʋʋsem sõngã zaeebã saagdame tɩ b na n wa naaga a Zeezi n dɩ naam Wẽnnaam Rĩungã pʋgẽ. B na n paam n zĩnda ne a Zeezi, n yã-a ne b nifu, la b gom ne-a. (Zã 14:2, 3) Neb nins sẽn saagd tɩ b na n vɩɩmda tẽngã zug wakat sẽn kõn sa wã me na n paamame t’a Zeezi nong-ba, la a ges b yell sõma. Baa b sẽn pa na n yã a Zeezi ne b nifã, b na n yɩɩ a zo-rãmb hakɩɩka, tɩ b sũur noom ne vɩɩm sẽn kõn sa wã a Zeova ne a Zeezi sẽn kõ-bã. (Eza. 9:5, 6) D sã n sak n lebg a Zeezi zoa wa a sẽn yeelã, d paamda bark ka tɛka. Wala makre, masã menga d paamdame t’a nong-do, la a sõngd tõndo. D tõe n wa paam n vɩɩmda wakat sẽn kõn sa. La sẽn yɩɩd fãa, d sẽn yaa a Zeezi zoa wã na n kɩtame tɩ d paam zood sõma ne a Ba a Zeova. Zood kae sẽn zem woto ye. Dẽnd d sẽn paam n yaa a Zeezi zoa wã yaa zu-zẽkr meng-menga! w20.04 25 s. 15-16

Yaa Korẽnt kiris-neb sẽn da paam vʋʋsem sõngã zaeeb la tʋm-tʋmd a Poll sẽn tool a lɛtrã, neb sẽn da na n wa vʋʋg n kẽng saasẽ. Ra yaa kiris-neb ‘Wẽnnaam sẽn welg tɩ b yɩ yembr ne a Zeezi Kiristi, la b bool-b tɩ b lebg nin-sõamyã.’ A goma “neb nins sẽn ki Kirist pʋgẽ wã” me yelle. (1 Kor. 1:2; 15:18; 2 Kor. 5:17) A Poll lɛtr a to pʋgẽ, a yeelame tɩ neb nins sẽn ‘lebg yembr ne [a Zeezi] b sẽn ki a kũumã buudã yĩngã’ na n ‘lebga yembr ne [a Zeezi] b sẽn vʋʋg a vʋʋgrã buudã yĩng me.’ (Rom. 6:3-5) A Zeezi vʋʋgame n lebg malɛka, n kẽng saasẽ. Dẽnd na n yɩɩ woto me ne neb nins fãa sẽn be “Kirist pʋgẽ wã,” rat n yeel tɩ kiris-neb nins fãa sẽn paam vʋʋsem sõngã zaeebã. A Poll yeelame tɩ Kiristã “n yɩ pipi [bɩ, “dẽenem biisi,” notã] n vʋʋg neb nins sẽn ki wã sʋka.” (1 Kor. 15:20) A Zeezi n yɩ pipi n vʋʋg n lebg malɛka, la a paam vɩɩm sẽn kõn sa. w20.12 5-6 s. 15-16

Rũndã-rũndã, ned sẽn paam vʋʋsem sõngã zaeeb sã n maan kaalem, a vʋʋgda zĩig pʋgẽ n kẽng saasẽ. Tʋm-tʋm a Poll goam nins sẽn be 1 Korẽnt rãmb 15:51, 52 wã wilgda rẽ vẽenega. Kiristã ba-biisã sã n vʋʋge, b na n paama sũ-no-kãsenga. Biiblã wilgda tʋʋmd ning neb nins sẽn na n toeem “nif kamsg pʋgẽ” wã sẽn na n tʋm saasẽ wã. A Zeezi yeel-b lame yaa: “Ned ning sẽn na n tõog la sẽn na n tũ bũmb ning mam sẽn yeelã n tãag saabã, mam na n kõ-a-la tõog t’a soog buud toor-toorã, tõog wa a soab ning mam sẽn deeg m Ba nengẽ wã. Nin-kãng na n kɩɩma nebã ne kut rasaare, hal tɩ b wã n lebg peds wa tãnd laas sẽn wãad to-to wã.”—Vẽn. 2:26, 27. w20.12 12 s. 14-15

Tʋm-tʋmd a Poll sẽn bool a Zeezi tɩ “dẽenem biisã,” a ra rat n wilgame t’a Zeezi vʋʋgrã poore, neb a taab me n na n vʋʋg n kẽng saasẽ. Tʋm-tʋmdbã n paas neb a taab sẽn be “Kirist pʋgẽ” n na n pʋgl a Zeezi. (1 Kor. 15:18) Wakatã sã n ta, b na n vʋʋga wa a Zeezi n kẽng saasẽ. A Poll sẽn wa n gʋls Korẽnt kiris-nebã lɛtrã tɩ neb nins sẽn be “Kirist pʋgẽ wã” nan pa sɩng vʋʋgr n na n kẽng saasẽ ye. A Poll wilgame tɩ ra na n yɩɩ kaoosg zugẽ. A yeelame: “Na n yɩɩ ned kam fãa ne a wakate: Pipi yaa Kiristã. Rẽ poore, na n yɩɩ neb nins sẽn yaa Kirist rẽndã, la nin-kãens vʋʋgrã na n yɩɩ Kirist sẽn wat n wa wã” sasa. (1 Kor. 15:23; 1 Tes. 4:15, 16) Tõnd vɩɩ Kirist waoongã wakat b sẽn da pĩnd n togsã. Dẽnd tʋm-tʋmdbã ne kiris-neb a taab sẽn paam vʋʋsem sõngã zaeebã sẽn da zoe n ki wã ra segd n gũume n tãag Kiristã waoongã wakate, n yaool n paam b keoorã saasẽ, n ‘lebg yembr ne [a Zeezi] b sẽn ki a kũumã buudã yĩngã.’—Rom. 6:5. w20.12 5 s. 12; 6 s. 16-17

Tʋm-tʋmd a Poll ra gomda ned sẽn na n vʋʋg ne yĩng sẽn tõe n zĩnd saasẽ, rat n yeel tɩ ne “yĩng sẽn pa yĩn-nemse.” (1 Kor. 15:44) A Zeezi sẽn da wa n be tẽngã zugã, a ra tara ninsaal yĩnga. La a sẽn wa n vʋʋgã, a “lebga sɩɩg sẽn kõt vɩɩm,” n kẽng saasẽ. Kiris-neb nins sẽn paam vʋʋsem sõngã zaeebã me na n vʋʋga ne yĩng sẽn tõe n vɩɩmd saasẽ. A Poll yeelame: “Tõnd na n yɩɩ soab ning sẽn be saasẽ wã me wõnego, wa tõnd sẽn yaa soab ning b sẽn naan ne tomã wõnegã.” (1 Kor. 15:45-49) D bãng t’a Zeezi pa vʋʋg ne ninsaal yĩng ye. A Poll togsa rẽ vẽenega, sẽn wa n ket bilf t’a baas a goamã kũum vʋʋgrã wɛɛngẽ wã. A yeela vẽeneg yaa: “Yĩn-nems ne zɩɩm pa tõe n kẽ Wẽnnaam Rĩungã pʋgẽ” ye. (1 Kor. 15:50) Tʋm-tʋmdbã ne neb a taab sẽn paam vʋʋsem sõngã zaeeb pa na n vʋʋg ne yĩn-nems la zɩɩm sẽn tõe n põogã n kẽng saasẽ ye. w20.12 10-11 s. 10-12

Pipi kiris-nebã wakatẽ, Wẽnnaam vẽnega a Zeezi karen-biis kẽer tɩ b gom sẽn na n kẽng-b saasẽ wã vʋʋgrã yelle. Tʋm-tʋmd a Zã yeelame: “M nin-nongdse, tõnd yaa Wẽnnaam kamb masã, la b nan pa kɩt tɩ tõnd sẽn na n yɩ bũmb ningã lebg vẽeneg ye. La tõnd miime tɩ bãmb sã n wa vẽneg b menga, tõnd na n yɩɩ wa bãmba.” (1 Zã 3:2) Dẽnd sẽn paam-b vʋʋsem sõngã zaeebã pa mi sẽn na n yɩ to-to, b sã n wa vʋʋg n lebg malɛgs n tɩ be saasẽ ye. La b na n yãa a Zeova, b sã n wa paam b keoorã. Biiblã goma rẽ yell bilfu. Sẽn paam-b zaeebã na n zĩnda ne a Zeezi, a sã n wa na n kɩt “tɩ soolem-dãmbã fãa, naam la pãng fãa lebg zaalem.” Kũumã b sẽn bool tɩ “yaoolem bɛ” wã me naagame. Sẽn na n baase, a Zeezi ne a na-rɩt-n-taasã na n lebsa bũmb fãa a Zeova nugẽ, la b sulg b mens n sak-a. (1 Kor. 15:24-28) Ad sɩd na n yɩɩ sũ-noog wakate! w20.12 8 s. a 2

Kiris-neb nins sẽn maand sɩd ne Wẽnnaam n yaool n pa saagd n na n tɩ vɩɩmd saasẽ ne Kiristã me tara kũum vʋʋgrã saagre. Biiblã yetame tɩ tʋm-tʋmd a Poll ne neb nins sẽn na n vʋʋg n kẽng saasẽ wã naaga “dẽenem kũum vʋʋgrã.” (Fili. 3:11) Woto wilgdame tɩ kũum vʋʋgr a to n na n pʋgle. Rẽ sɩd zemsa ne a Zoob sẽn yeel bũmb ning a beoog-daarã wɛɛngẽ wã. (Zoob 14:15) “Neb nins sẽn yaa Kirist rẽndã” na n zĩnda saasẽ ne a Zeezi, a sã n wa na n kɩt tɩ soolem-dãmbã fãa, naam la pãng fãa lebg zaalem. Baa kũumã sẽn yaa “yaoolem bɛ” wã na n lebga zaalem. Yaa vẽeneg tɩ neb nins sẽn na n vʋʋg n kẽng saasẽ wã pa na n tol n le ki a bada. (1 Kor. 15:23-26) Neb nins sẽn saagd n na n wa vɩɩmd tẽngã zugã tõe n basa b yam tɩ manegr n wate, a Poll sẽn yeel bũmb ning rũndã daar vɛrse wã pʋgẽ wã yĩnga. Yaa vẽeneg tɩ ned sẽn pa nin-tɩrg pa tõe n kẽng saasẽ ye. Rẽnd yaa neb nins sẽn na n wa vʋʋg n vɩɩmd tẽngã zugã yell la b sẽn gomdã. w20.12 6-7 s. 18-19

Tõe tɩ y sokda y meng yaa: ‘M maanda wãn n bãng t’a Zeova sɩd kõ-m-la sugri?’ Y sã n sokd y meng woto, pʋd n wilgdame t’a Zeova tõe n kõ-y-la sugri. Yʋʋm wʋsg sẽn looge, Gũusg Gasgã ra yeelame yaa: “Tõeeme tɩ d ket n yɩlemda d kongr naoor wʋsgo. Tõe tɩ yaa d sẽn nan pa tõog pãn-komsem d sẽn da tar nand tɩ d bãng a Zeova wã yĩnga. . . . Ra tags-y tɩ yaa yel-wẽnd a Zeova sẽn pa tol n tõe n kõ-y sugr ye. Yaa woto bal kɛpɩ la a Sʋɩtãan rat tɩ y tagse. Y sũur sẽn sãamd ne y mengã pʋd n wilgdame tɩ y pa nin-wẽnga, la t’a Zeova tõe n kõ-y-la sugri. Sik-y y menga, n ket n pʋʋsd Wẽnnaam sẽn na yɩl t’a kõ-y sugri, tɩ y paam sũur-kaset sẽn pa ningd-y taale, la a sõng-y me tɩ y ra le yɩlem y kongrã ye. Nand tɩ tʋm-tʋmd a Poll a lebg kiris-neda, a maana yel-wẽn-kãsemse. A Poll ra tẽra a sẽn tʋm tʋʋm-wẽns ninsã. (1 Tɩm. 1:12-15) La a ra getame t’a Zeezi kiime tɩ yɩ maoong n dol yẽ yel-wẽnã. Dẽnd a Poll ra pa ningd a meng taal tɩ loog nug ye. Sẽn da pak-a n yɩɩd yaa a maan a sẽn tõe fãa a Zeova tʋʋmdã pʋgẽ. w20.11 27 s. 14; 29 s. 17

A Sʋɩtãan tũnugda ne yɛl wʋsg n makd tõnd n dat tɩ d maan wẽnga. Tõnd manesem yaa wãn to ne rẽ? D tõe n wa tagsdame tɩ bõn-kãens pa tolg n yaa wẽns woto ye. Wala makre, d tõe n yeta d meng yaa: ‘B pa na n yiis-m tigingã pʋgẽ dẽ yĩng ye. Rẽnd pa tolg n yaa wẽng ye.’ La tagsg a woto yaa wẽng menga. Yɩta sõma tɩ d sok d meng yaa: ‘Rẽ yĩnga, a Sʋɩtãan pa makd n na n kɩt tɩ m da le sak a Zeova ne m sũur fãa sɩda? M sã n sak m tʋls-wẽnsã, m pa na n sãam a Zeova yʋʋr sɩda? M sã n maan bõn-kãnga, na n paasa mam ne a Zeova zoodã bɩ, bɩ na n kɩtame tɩ m zãag ne-a?’ Bʋgs-y sogs-kãensã zug neere. Pʋʋs-y a Zeova, n kos-a t’a kõ-y yam, tɩ y sɩd leok ne pʋ-peelem, n da wa belg y meng ye. D sã n maan woto, sɩd na n kogl-d lame. Na n sõng-d lame tɩ d yals kãn-kãe makr buud fãa pʋgẽ, wa a Zeezi sẽn kɩɩs a Sʋɩtãan n yeel-a wã yaa: “Sʋɩtãana, looge!” (Mat. 4:10) Tẽeg-y, tɩ y sã n pa tũud a Zeova ne d sũurã fãa, pa tar yõod ye. w20.06 12-13 s. 16-17

Tõnd sikda d meng n sakd n tũud a Zeova noyã, bala d miime tɩ wakat fãa yaa yẽ n mi bũmb ning sẽn yaa sõma ne tõnd n yɩɩdã. (Efɛ. 4:22-24) Sik-m-mengã kɩtame tɩ d lʋɩɩsd a Zeova raabã taoore, la d getẽ tɩ neb a taabã yɩɩda tõndo. Woto kɩtdame tɩ d tar zood sõma ne a Zeova la ne d tẽed-n-taasã. (Fili.2:3) La d sã n pa gũusi, a Sʋɩtãan dũniyã neb sẽn yaa wuk-m-mens rãmb la rat-m-ye rãmbã tõe n wa tõogame tɩ d lebg wa bãmba. Wõnda yel-kãngã n da yɛgd pipi kiris-nebã, bala tʋm-tʋmd a Poll ra yeela Rom kiris-nebã yaa: “Mam yeta yãmb ned kam fãa t’a ra tags t’a tara yõod wʋsg ye. La bɩ a tagsa wã yɩ tagsa sẽn wilgd t’a tara yam-sõngo.” A Poll sak n deegame tɩ d segd n nanda d menga. La sik-m-mengã na n kɩtame tɩ d tall tagsg sẽn zems d mengã zugu. w20.07 2 s. a 1-2

Rĩm a Aaza wakatẽ wã, bãanã wakat wa n saame. Tãb-biis kʋʋng n yi Etiopi n wa na n zab ne-ba. B sõorã ra yɩɩda milyõ. B taoor soabã yʋʋr da yaa a Zeera. A ra kɩsa sɩd tɩ yẽ ne a tãb-biisã na n tõoga Zida nebã. La a Aaza yẽ pa teeg a tãb-biisã sõor ye. A teega a Zeova. A pʋʋsa a Zeova n yeel yaa: “Sõng-y-do Sẽn-Ka-Saab sẽn yaa tõnd Wẽnnaam! Bala, tõnd teega yãmba, la yaa yãmb yʋʋrã yĩng la tõnd wa n na n zab ne kʋʋn-kãngã fãa.” (2 Kib. 14:10) Baa ne Etiopi tãb-biisã sõor sẽn da yɩɩd a Aaza tãb-biisã naoor a yiibã, a Aaza ra miime bal t’a Zeova pãngã ka to, la t’a tõe n fãaga a nin-buiidã. A Zeova sɩd sõnga a nin-buiidã, tɩ Etiopi tãb-biisã paam yãnde. (2 Kib. 14:7-12) Yaa sɩd tɩ d ned kam fãa pa mi yɛlã sẽn na n yɩ to-to ne-a beoog-daar ye. La d miime tɩ Wẽnnaam nin-buiidã sẽn tar bãan ning rũndã-rũndã wã pa na n kaoos ye. Sɩd me, a Zeezi yeelame tɩ yaoolem wakatã, “buudã fãa na n kisga” a karen-biisã.—Mat. 24:9. w20.09 17-18 s. 14-16

Tõnd ned baa yembr pa rat tɩ b tʋ-a ye. La tõnd bɛɛbã sã n tʋ-do, tɩ d bas tɩ rẽ sãam d sũur tɩ loog nugu, tõe n komsa d raoodo. (Yel. 24:10) D bɛɛbã sã n tʋʋd tõndo, d manesem segd n yɩɩ wãna? Wa tʋm-tʋmd a Polle, tõnd “maanda sũ-noog . . . tʋy pʋsẽ.” Bõe yĩnga? Bala nebã sã n tʋʋd tõnd la b namsd tõndo, wilgdame tɩ d yaa a Zeezi karen-biis hakɩɩka. (1 Pɩy. 4:14) A Zeezi yeelame tɩ b na n namsa a karen-biisã b tũudmã yĩnga. (Zã 15:18-20) Yɩɩ woto ne pipi kiris-nebã. Bãmb wakatẽ wã, neb nins sẽn da sakd Gɛrk-rãmbã minimdã ra getame tɩ kiris-nebã ka yam, la b ka bark me. La Zʋɩf-rãmbã ra geta kiris-nebã wa ‘neb sẽn pa paam zãmsg la nin-talse.’ (Tʋʋ. 4:13) Kiris-nebã ra wõnda neb sẽn ka pãnga. B ra pa kẽed politikã la sodaarã yɛlẽ ye. Dẽnd b ra pa tar pãng nanambsã zugu, b ra pa tõe n zab n kogl b mens me. Sẽn paase, nebã ra pa nand-b ye. La rẽ yĩnga, pipi kiris-nebã basame tɩ nebã sẽn gomd b yell wẽngã kɩt tɩ b koms raood n bas bɩ? Ayo. w20.07 14-15 s. a 3-4

Tʋm-tʋmd a Zã ra nonga a tẽed-n-taasã hal tɩ b yell ra pak-a wʋsgo, t’a ra rat tɩ b tẽebã kell n tall pãnga. Lɛta a tãabã vʋʋsem sõngã sẽn vẽneg-a t’a gʋlsã wilgda rẽ vẽenega. D sẽn mi tɩ pagb la rap me sẽn paam vʋʋsem sõng zaeebo, n na n naag Kiristã n dɩ naamã yaa wa a Zã wã sɩd kengda d raoodo! (1 Zã 2:27) Bɩ d tũ sagls nins a sẽn kõ-dã ne d sũur fãa. Bɩ d yãk yam n na n kell n kẽn sɩdã pʋgẽ, n sakd a Zeova bũmba fãa pʋgẽ. Zãms-y-yã a Gomdã la y kɩs sɩd ne a sẽn yetã. Bɩɩs-y tẽeb sẽn tar pãng ne a Zeezi, la y zãgs ninsaalbã bãngrã bɩ filozofi wã, la bũmb nins sɩdã kɩɩsdb sẽn zãmsd nebã. Ra maan-y wa y tũuda a Zeova, n yaool n solg n maand wẽnga, la y ra bas tɩ nebã tõog tɩ y maan sẽn pa segd ye. Tũud-y-yã a Zeova noyã y yel-manesmã fãa pʋgẽ. Bɩ d sõng d tẽed-n-taasã tɩ b tẽebã kell n tall pãnga, n kõt sẽn beegd-b tõndã sugri, la d sõngd sẽn dat-b sõngrã. Rẽ, baa tõnd zu-loeesã sẽn yaa to-to fãa, d na n ket n kẽnda sɩdã pʋgẽ. w20.07 24-25 s. 15-17

A Zeova kɩtame tɩ ned ning fãa sẽn maand sɩd ne-a tar a zĩig a tigingã pʋgẽ. Baa ne d tʋʋmã sẽn yaa toor-toor tigingã pʋgẽ wã, d ned kam fãa tara yõod wʋsgo, n dat taab sõngre. Tʋm-tʋmd a Poll wilga vẽeneg t’a Zeova Kaset soab baa a ye pa tog n yeel a to tɩ: “Mam pa rat fo sõngr ye.” (1 Kor. 12:21) D sã n dat tɩ bãan la laafɩ kell n zĩnd tigingã pʋgẽ, yaa tɩlɛ tɩ d nand taab la d naagd taab n tʋmdẽ. (Efɛ 4:16) D sã n zemsd taab n tʋmdẽ, tigingã neb na n nonga taaba, tɩ b tẽebã pãng me paasdẽ. Yaa ne vʋʋsem sõngã maasem la b yãkd tigingã kãsem-dãmbã. La kãsem-soab fãa minim yaa toor ne a to. (1 Kor. 12:17) Kẽer sẽn lebg kãsem-dãmb nan pa kaoose, tɩ b minimã pa ta kãsem-dãmb a taabã ye. Sãnda pa le tõe n maan bũmb kẽere, b sẽn kʋʋl wall b laafɩ wã sẽn pa le waoogã yĩnga. Baa ne rẽ, kãsem-soab pa segd n yeel a to tɩ: “Mam pa rat fo sõngr ye.” Kãsem-soab fãa segd n tũu saglg ning a Poll sẽn kõ tɩ be Rom dãmb 12:10. w20.08 26 s. a 1-2; 27 s. a 4

A Zeova tũnugda ne a siglgã babg ning sẽn be tẽngã zugã, n sõngd tõnd sẽn na yɩl tɩ d ket n tũud vɩɩm sẽn kõn sa wã sore. A Zeova siglgã sã n wa lebs n bilg Biiblã gomd ning võore, wall b sã n wa kõ-d noya, sẽn segd la sẽn pa segdã wɛɛngẽ, d sakdame. La d manesem yaa wãna, b sã n wa toeem yɛl kẽer tɩ d getẽ tɩ yaa toog ne-do, wala makre, b sã n wa yãk yam n koos d Rĩung roogã? D sã n tẽegdẽ tɩ yaa Zeova la d tʋmd n kõtẽ, la tɩ yaa yẽ n wilgd a siglgã sore, d na n kell n talla d sũ-noogã. (Kol. 3:23, 24) Rĩm a Davɩɩd kõo mak-sõngo, a sẽn yãk ligd tɩ b na n me wẽnd-doogã. A yeelame: “Mam yaa ãnda, la mam nebã yaa ãnda rãmba, tɩ tõnd tõe n kõ kũun a woto ne yamleoogo? Bũmb fãa yita yãmb nengẽ, la bũmb nins tõnd sẽn kõt yãmbã fãa yaa yãmb n kõ tõndo.” (1 Kib. 29:14) Tõnd me sã n kõ ligdi, d kõta a Zeova bũmb sẽn yit yẽ nengẽ. Baa ne rẽ, a Zeova sũur nooma ne d sẽn dɩkd d sẽkã, d pãngã, la d tarmã n teend a tʋʋmdã.—2 Kor. 9:7. w20.11 22-23 s. 14-16

D sẽn yaa a Zeova Kaset rãmbã, d pa get tɩ d sã n tõog tɩ neb wʋsg wa sak n tũud a Zeova la wilgdẽ tɩ d tʋʋmdã yãka neng ye. (Luk 8:11-15) D sã n ket n wɩngd ne koɛɛgã mooneg la d zãmsd nebã Biiblã, a Zeova nifẽ d tʋʋmdã yãkda nenga. Bõe yĩnga? Bala d sakd n maanda yẽ ne a Biigã sẽn yeel tɩ d maanã. (Mark 13:10; Tʋʋ. 5:28, 29) D leb n tara bʋʋm n na n wɩng ne d tʋʋmdã, bala, dũni-kãngã saab ta n saame. Wakatã sẽn ket tɩ d na n moon koɛɛgã sẽn fãagd yõyã pa le waoog ye. D ra bas n gũ nindaare, bɩ n tagsdẽ tɩ d segd n gũu wakat sẽn yaa sõma, n yaool n kẽes d toog tʋʋm-kãngã sẽn tar yõod wʋsgã pʋgẽ ye. Bɩ d modg masã menga, n tʋll n moon koɛɛgã ne yẽesem n paase, n zãmsd Biiblã sõma n paasdẽ, n modg n tall raoodo, la d wõrd d mense. Naag-y neb milyõ a nii la zakã sẽn moond koe-noogã, n paam sũ-noog ning a Zeova sẽn kõtã. (Nee. 8:10; Luk 5:10) Bɩ y yãk yam n kẽes y mens zãng koɛɛgã mooneg pʋgẽ, hal n tãag a Zeova sẽn na n wa yeel tɩ sekame. w20.09 7 s. 18-20

D da bas tɩ arzɛkã baoob tiis-d ye. “Arzɛkã tʋlsem” tõe n kɩtame tɩ d sẽn nong a Zeova la a Gomdã to-to wã booge, la kɩt me tɩ d pa le tʋll n sõng nebã tɩ b bãng Wẽnnaam Gomdã sẽn yetã ye. (Mat. 13:22) D sã n dat n kogl bũmb nins a Zeova sẽn kõ-dã, d segd n maana bũmb tao-tao, d sã n wa bãng tɩ yell n yɛgd tõndo. D tõe n deng bao n bãnga d sẽn na n maan bũmb ning takɩ, d sã n wa kẽ ẽntɛrnetã pʋgẽ, bɩ n get tele wall filim tɩ yoob yɛla, nen-kɛglem tʋʋma, wall sɩdã-kɩɩsdb sõsg tiig n puki. D sã n deng n segl d menga, d na n tõog n maana bũmb tao-tao n kogl d tẽebã, la d kell n pa yɩlemd a Zeova nifẽ. (Yɩɩn. 101:3; 1 Tɩm. 4:12) D segd n kell n talla bũmb ning a Zeova sẽn kõ tõnd tɩ yaa wa paoongã neere. Rat n yeel t’a sẽn sõng tõnd tɩ d bãng Biiblã sẽn yet bũmb ningã, la a sẽn kõ-d noor tɩ d sõng neb a taabã tɩ bãmb me bãng rẽ wã. Tõnd sã n maand woto, d sũur-kasetã pa na n ning-d taale, d vɩɩmã na n talla võore, d leb n na n paama sũ-noogo, d sẽn sõngd nebã tɩ b bãngd a Zeova wã yĩnga. w20.09 30 s. 16-19

Yãmb deega lisg bɩ? Sã n yaa rẽ, yãmb wilga zãma wã taoor tɩ y tẽeda a Zeova, la tɩ y tʋllame n zĩnd a siglgã pʋgẽ, n maand a raabã. Rũndã-rũndã, d sã n ges a Zeova sẽn wilgd a siglgã sor to-to wã, d nee a sẽn yaa Wẽnnaam ning buudã, a raabã, la a noyã. D gom a Zeova yel-manesem a tãab sẽn pukd vẽeneg a siglgã pʋgẽ yelle. Pipi, “Wẽnnaam pa tũusd ned” ye. (Tʋʋ. 10:34) Yaa nonglem yĩng la a Zeova rɩk a Biigã n kõ t’a yɩ “yaood ning sẽn da segd n yao n fãag ninsaalbã fãa” wã. (1 Tɩm. 2:6; Zã 3:16) A Zeova kɩtame t’a nin-buiidã moond koe-noogã neb nins fãa sẽn dat n kelgã, tɩ rẽ kɩt tɩ b tõogd n sõngd neb wʋsg sẽn na yɩl tɩ b wa paam vɩɩm sẽn kõn sa. Yiibu, a Zeova pa zũnd-zãnd Wẽnnaam ye. A yaa laafɩ Wẽnnaam. (1 Kor. 14:33, 40) Woto wã, a nin-buiidã sẽn tũud-a to-to wã me pa segd n yɩ ne zũnd-zãnd ye. Segd n yɩɩ ne laafɩ. Tãabo, a Zeova n yaa Karen-saam-kãsengã. (Eza. 30:21) Rẽ n so t’a siglgã maand a sẽn tõe fãa n zãmsd nebã Biiblã tigingã pʋgẽ, la koɛɛgã mooneg sasa. w20.10 20 s. a 1-3