Sig-noya

Hal a Zeezi yãadmẽ, a yãka yam n na n sak a roagdbã. A zɩ n kɩɩs a roagdbã noore, n tagsdẽ tɩ yẽ bãngrã yɩɩd-b lame ye. A Zeezi sẽn da yaa bi-kãsengã, yaa vẽeneg t’a ra pa reemd ne tʋʋmd ning a sẽn segd n tʋm a zakã neer yĩngã ye. Sãmbg kae t’a modgame n zãms a ba wã nug-tʋʋmdã, sẽn na yɩl n sõng n ges a zakã rãmb yelle. Tõe t’a Zeezi roagdbã togs-a-la a rogmã sẽn yɩ yel-solemdã, la Wẽnnaam koe-taasdbã sẽn da togs-b bũmb ning yẽ zugã. (Luk 2:8-19, 25-38) A Zeezi pa ges tɩ b sẽn togs-a wã bal sekame ye. A baoome n na n zãms Gʋls-sõamyã a toore. Bõe yĩng tɩ d tõe n yeel t’a Zeezi ra zãmsda Wẽnnaam Gomdã sõma? A sẽn wa n ket n yaa biigã, “a sẽn da wʋmd yɛlã võor sõma wã, n paas a sẽn da leokd to-to wã ra lingda” Zerizalɛm karen-saam-dãmbã. (Luk 2:46, 47) Baa a sẽn wa n tar yʋʋm 12, rẽ t’a zoe n zãmsa Gʋls-sõamyã, n mi hakɩɩk t’a Zeova la a Ba.—Luk 2:42, 43, 49. w20.10 29-30 s. 13-14

D sẽn tẽed a Zeezi vʋʋgrã n kɩt tɩ d saagdẽ tɩ sẽn ki-bã na n wa vʋʋgame wã. A Poll sẽn wa n gomd kũum vʋʋgrã yellã, a goma bũmb a tãab yelle. 1) “Kiristã kii tõnd yel-wẽnã yĩnga.” 2) ‘B mum-a lame.’ 3) ‘Rasem a tãab-n-soabã daare b vʋʋg-a-la wa Gʋls-sõamyã sẽn wilgã.’ (1 Kor. 15:3, 4) A Zeezi kũumã, a mumbã la a vʋʋgrã yõod yaa bõe ne tõndo? No-rɛɛs a Ezayi ra pĩnd n goma Mesi wã yelle, n yeel tɩ b na n “yiisa bãmb dũni nin-vɩɩs sʋka,” la tɩ b na n “tuu bãmb yaoog nin-wẽnsã yaad sʋka.” La pa tek woto bal ye. A Ezayi yeelame me tɩ Mesi wã na n “deega neb wʋsg yel-wẽna.” A Zeezi sɩd pidsa gom-kãngã, a sẽn ki tɩ yɩ maoong n dol d yel-wẽnã. (Eza. 53:8, 9, 12; Mat. 20:28; Rom. 5:8) Rẽnd a Zeezi kũumã, a mumbã la a vʋʋgrã yaa kaset meng-meng tɩ d tõe n saagame tɩ d na n wa paama d mens ne yel-wẽnã la kũumã, la d paam n le vɩɩmd ne d neb nins sẽn maan kaalmã. w20.12 2-3 s. a 4-6; 5 s. 11

Tʋm-tʋmd a Poll ra nong n moonda zʋɩf-rãmbã karen-dotẽ wã. Wala makre, Tesalonik karen-doogẽ wã, a “sõsa [ne zʋɩf-rãmbã] Gʋls-sõamyã wɛɛngẽ vʋʋsg ray a tãabo.” (Tʋʋ. 17:1, 2) A Poll ra basa a yam n moond karen-doogẽ wã. A ra yaa zʋɩfe. (Tʋʋ. 26:4, 5) A ra mii zʋɩf-rãmbã yɛl sõma. Rẽ n so t’a bas a yam n taasd-b koɛɛgã. (Fili. 3:5) Bɛɛb n wa n yik n namsd a Polle, tɩ yɩ tɩlɛ t’a zoe n yi Tesalonik n kẽng Beere, n wa yi be n kẽng Atɛn. Beenẽ me, “a ra sõsda karen-doogẽ wã ne Zʋɩf-rãmbã, la ne neb a taab sẽn tũud Wẽnnaam.” (Tʋʋ. 17:17) La a sẽn wa n moond raagẽ wã, neb nins sẽn da kelgd-a wã ra yaa toore. B sʋkã neb kẽer da yaa filozof-rãmba, la bu-zẽms sẽn da tagsd t’a Poll koɛɛgã yaa “zãms-paalga.” B yeela a Poll yaa: “Fo bilgda tõnd bũmb kẽer d sẽn zɩ n wʋme.”—Tʋʋ. 17:18-20. w20.04 9 s. a 5-6

Y sã n maood ne pãn-komsem bɩ y ra tags tɩ y ka võor ye. D tẽeg tɩ tõnd ned baa a ye pa tõe n yɩ tɩrg zãng Wẽnnaam nifẽ ye. Yaa tɩlɛ tɩ d fãa paam tɩ Wẽnnaam maan d lohorem. La ne a Zeezi kũumã sẽn yɩ rõndã maasem, a sɩd maan-d-la lohorem meng-menga. (Efɛ. 1:7; 1 Zã 4:10) D tõe n paama raood kengr d tẽed-n-taasã sẽn yaa wa d zak nebã nengẽ. D sã n wa sõsd ne-ba, b na n kelg-d-la neere, n keng d raoodo. (Yel. 12:25; 1 Tes. 5:14) D gom saam-bi-poak a Zoy sẽn yit Nizeria wã yelle. A maooda ne raood komsgo. Ad a sẽn yeele: “M tẽed-n-taasã sã n da kaẽ, m da na n kẽe yɛ? B sẽn be wã yaa kaset t’a Zeova leokda m pʋʋsgã. Ne nin-kãensã maasem, mam bãnga m sẽn tõe n maan n keng neb a taabã raoodo.” La d segd n tẽegame tɩ pa wakat fãa la d tẽed-n-taasã tõe n bãng tɩ d rata raood kengr ye. Rẽ n so tɩ d segd n yɩ pipi n kolg d tẽed-n-taag tẽeb sẽn bɩ, n gom ne-a d zu-loɛɛgã yell n paam t’a sõng-do. w20.12 23-24 s. a 7-8

Naoor wʋsgo, f sã n dat n yõg zood sõma ne neda, yaa tɩlɛ tɩ y paamd n maand bũmb kẽer ne taaba. Y sã n sõsd ne taaba, tɩ ned fãa togsd a to a sẽn tagsde, y wat n lebga zo-rãmba. La yɩl n paam n lebg a Zeezi zoa hakɩɩk pa nana ye. Bõe n kɩt tɩ pa nana? Bũmb a ye yaa tɩ d zɩ n yã a Zeezi ye. Pipi kiris-neb wʋsg me pa tol n yã-a ye. La ne rẽ fãa, tʋm-tʋmd a Pɩyɛɛr yeelame: “Baa yãmb sẽn zɩ n yã Kiristã, yãmb nonga bãmba. Baa yãmb sẽn pa ne bãmb nandã, yãmb baas n tẽeda bãmba.” (1 Pɩy. 1:8) Dẽnd baa d zɩ n yã a Zeezi, d tõe n paam n lebga a zoa hakɩɩka. Sẽn paase yaa tɩ d pa tõe n paam n gom ne a Zeezi ye. D sã n wa pʋʋsdẽ, yaa a Zeova la d gomd ne. Yaa sɩd tɩ d pʋʋsda ne a Zeezi yʋʋre, la pa a Zeezi la d gomd ne ye. A Zeezi pʋd n pa rat tɩ d pʋʋs-a ye. Bõe yĩnga? Bala, pʋʋsgã naaga bũmb nins d sẽn maand n waoogd Wẽnnaamã. A Zeova a ye tãa bal la d segd n waooge. (Mat. 4:10) Baa ne sẽn yaa woto wã, d tõe n wilgame tɩ d nonga a Zeezi. w20.04 20 s. a 1-3

Sã n yaa ne zoees ning tõnd sẽn zoetã, a Zeova pʋlmame tɩ sẽn na n baas-b zoeesã na n paama vɩɩm sẽn kõn sa saasẽ, wall tẽngã sẽn na n lebg arzãnã zugu. Pĩnd Gɛrɛs soolmẽ wã, zoɛtbã ra segd n maoo ne zu-loees wala yaamse, la toogo. B ned kam fãa sẽn da tõe n maan bal yaa a segl a meng sõma, la a teeg a yãoog pãnga. Tõnd me paamdame tɩ b zãmsd tõnd d sẽn segd n zoe d zoeesã to-to wã. La bũmb a to la tõnd tar n paase. D tõe n paamame t’a Zeova sõng-d ne a pãngã sẽn ka to wã. D sã n teeg-a, a pʋlmame t’a na n sõng-d lame tɩ d paam minim, la a kõ-d pãnga. Tʋm-tʋmd a Poll ra segd n maoo ne zu-loees wʋsgo. Nebã sẽn da tʋʋd-a la b namsd-a a tũudmã yĩngã sẽn yãk a toogo, a ra mi n getame t’a ka pãnga, la a ra segd me n mao ne zu-loɛɛg a sẽn bool tɩ “gõaag yĩngã pʋgẽ.” (2 Kor. 12:7) La a pa tags tɩ zu-loe-kãensã yaa bʋʋm sẽn sek a na bas a Zeova tũub ye. A pʋd n gesame tɩ yaa segb a sẽn paam n na n teeg a Zeova. (2 Kor. 12:9, 10) A sẽn tall yam-sõng a woto wã kɩtame t’a Zeova sõng-a a zu-loeesã fãa pʋgẽ. w20.04 29 s. 13-14

D sẽn yaa ‘tʋmd-n-taas’ ne a Zeova la a siglgã babg ning sẽn be saasẽ wã yaa paoong nif sẽn pa ne. (2 Kor. 6:1) D sã n wa moond koɛɛgã fãa, sɩd yaa woto. Ad a Poll sẽn yeel yẽ mengã la neb nins sẽn naag n tʋmd tʋʋm-kãngã wã wɛɛngẽ: “Tõnd yaa Wẽnnaam tʋmd-n-taase.” (1 Kor. 3:9) D sã n wa moond koɛɛgã, d yaa a Zeezi tʋmd-n-taas me. Tẽeg-y t’a Zeezi sẽn wa n kõ a karen-biisã noor tɩ b ‘sõng buud fãa neb tɩ b lebg a karen-biisã’ poore, a paasame: ‘Mam bee ne yãmba.’ (Mat. 28:19, 20) La malɛgsã yẽ? Ad d sẽn paam tɩ b sõngd tõnd tɩ d moond “koe-noog sẽn ka sɛt . . . neb nins sẽn be tẽngã zugã” sɩd yaa bark menga! (Vẽn. 14:6) D sẽn paamd sõngr sẽn yit saasẽ wã, bõe la d tõogd n maandẽ? D sẽn yelgd Rĩungã bõn-buudã, kẽer lʋɩta sũy sẽn wõnd zĩ-sõmsẽ, n bɩtẽ. (Mat. 13:18, 23) Ãnd n kɩtd tɩ Rĩungã bõn-buud kãensã bɩt n wom biisi? A Zeezi wilga rẽ rũndã daar vɛrse wã pʋgẽ. w20.05 30 s. 14-15

Rũndã-rũndã, neb milyõ-rãmb kãadem kaoome. Baa neb sẽn vɩ zag-yɛng pʋgẽ tõeeme n get taab wa sãamba. Ned a ye sẽn kõt zagsã rãmb sagls yeelame: “Ba-rãmbã ne ma-rãmbã la kambã fãa pa le sõsd ne taab ye. Lebga ordinatɛɛre, tablɛte, portaable, la ze-video-rãmb la b ned fãa tõgda.” A paasame: “Baa ne b sẽn vɩ zag-yɛng pʋgẽ wã, b pa mi taab sõma ye.” D pa rat n yɩ neb sẽn pa nong b taaba, wa neb wʋsg sẽn maand to-to rũndã-rũndã wã ye. Pa d zakã rãmb bal la d segd nong wʋsg ye. D pʋd n segd n nonga neb nins sẽn kĩ ne tõnd tẽebã pʋgẽ wã wʋsgo. (Rom. 12:10) D segd n nonga d tẽed-n-taasã hal wʋsgo, wa d sẽn nong d zakã nebã to-to wã. Yaa nonglem a woto buud la d segd n tall ne d tẽed-n-taasã, rat n yeel tɩ d saam-biisã la d saam-bi-pogsã. D sã n nong-b woto, d sõngdame tɩ d zems-n-taarã sẽn yaa bũmb sẽn tar yõod wʋsg tũudum hakɩɩkã pʋgẽ wã paasdẽ.—Mii. 2:12. w21.01 20 s. a 1-2

Ekip neb sã n zemsd taaba, n noom ne taaba, b tõe n tãoome n paame, n yɩɩd ned a ye sẽn pa zemsd ne a taabã. Yãmb tagsa wã la y tʋlsmã fãa sã n tika a Zeova raabã maanego, y sũurã na n yɩɩ wa ekip sẽn tãood n tõogdẽ. Tẽeg-y t’a Sʋɩtãan na n datame tɩ y ra tũ a Zeova ne y sũurã fãa ye. A ratame tɩ y tagsa wã la y tʋlsmã ra zems ne a Zeova noyã ye. La yãmb yẽ segd n nonga a Zeova ne y sũur fãa n tõog n maan a raabã. (Mat. 22:36-38) Ra tol-y n bas-y-yã a Sʋɩtãan t’a kɩt tɩ y sũurã pʋɩ ye. Pʋʋs-y a Zeova wa a Davɩɩde. A yeelame: “Kɩt-y tɩ mam zoe yãmb yʋʋrã ne m sũur fãa.” Yãk-y yam n tũ a Davɩɩd sẽn yeelã. Daar fãa, modg-y tɩ y sã n na n yãk yam fãa, yaa yel-bõones tɩ yaa yel-kãsems pʋsẽ, bɩ y wilg tɩ y waoogda a Zeova yʋ-sõngã ne y sũur fãa. Y sẽn yaa a Zeova Kaset soabã, y sã n maand woto, na n kɩtame t’a Zeova yʋʋrã paam waoogre. (Yel. 27:11) Woto, d fãa na n tõog n yeela wa no-rɛɛs a Miise tɩ d ‘na n kẽna ne d Wẽnnaam a Zeova yʋʋr wakat sẽn kõn sa.’—Mii. 4:5, MN. w20.06 13 s. 17-18

Rɩtg rĩmã ne dũniyã goosneema-rãmb a taabã sẽn na n naag taab n zab ne Wẽnnaam nin-buiidã na n puuga Sẽn-tõe-a-fãa wã sũuri, tɩ wa ne Armagedõ zabrã. (Vẽn. 16:14, 16) Wakat kãnga, b na n sãama rɩtg rĩmã ne tẽns a taabã fãa sẽn naag n yaa a Goog sẽn yit Magoogã, tɩ “ned ka be n na n fãag-a ye.” (Dãn. 11:45.) Dãniyɛll 12:1 wã pʋgẽ, b paasa bũmb a taab sẽn wilgd rɩtg rĩmã ne a poorẽ dãmbã sẽn na n paam sãoong to-to, la tõnd me sẽn na n paam fãagr to-to wã. (Dãn.12:1) Vɛrse-kãngã võor yaa bõe? A Mikayɛll yaa d Rĩm a Zeezi Kirist sẽn dɩt naamã yʋʋr a to. A Rĩungã sẽn lugl saasẽ yʋʋmd 1914 tɛka, a yaa Wẽnnaam nin-buiidã “gũuda.” Ka la bilfu, a na n “waame,” rat n yeel t’a na n wa sãama a bɛɛbã Armagedõ zabrã sasa. Zab-kãng n na n yɩ a Dãniyɛll sẽn bool tɩ “to-kãseng” buud sẽn zɩ n zĩndã yaoolem yelle. A Zã bãngr-gomd ning sẽn be Vẽnegr sebrã pʋgẽ wã boonda wakat ning sẽn na n tɩ baas ne Armagedõ zabrã tɩ “to-kãsengã.”—Vẽn. 6:2; 7:14. w20.05 15-16 s. 15-17

A Zozɛf sẽn wa n yaa yambã, tɩ b le wa kẽes-a bãens roogã, wakat-kãng fãa, a ra pa tar a sẽn na n maaneg yel-kãng wɛɛngẽ ye. La bõe n sõng a Zozɛf t’a pa koms raoodo? A ra pa nong n tagsd a sẽn pa le tõe n maan bũmb ninsã yell ye. A pʋd n da tʋmda tʋʋm nins b sẽn da kõt-a wã ne a sũur fãa. A ra getame tɩ yaa a Zeova sakrã n tar yõod n yɩɩd bũmba fãa. Rẽ n so t’a Zeova ning a Zozɛf tʋʋmã fãa barka. (Sɩng. 39:21-23) Woto wilgdame tɩ dũni-kãngã pida ne wẽnem, la tɩ nebã tõe n maan-d-la pãnga. Baa d tẽed-n-taag tõe n maana bũmb n sãam d sũuri. La a Zeova sã n yaa d pĩig bɩ d soondg zĩiga, d pa na n koms raoodo, wall d bas a tũub ye. (Yɩɩn. 62:7, 8; 1 Pɩy. 5:10) Tẽeg-y t’a Zozɛf ra zemsa yʋʋm 17, a Zeova sẽn wa n kɩt t’a zãms zãmsdã. Rẽnd a Zeova kɩsa kom-bɩɩs nins sẽn tũud-a wã sɩda. Rũndã-rũndã, kom-bɩɩs wʋsg n yaa wa a Zozɛfe. Bãmb me kɩsa a Zeova sɩda. B kẽer la b maan pãng n kẽes bãens roogo, b sẽn dat n kell n maan sɩd ne Wẽnnaamã yĩnga.—Yɩɩn. 110:3. w20.12 16 s. a 3; 17 s. a 5, 7

Tʋm-tʋmd a Pɩyɛɛr ne a Zã gesame tɩ b sẽn nams bãmb b sẽn da tũud a Zeezi wã yĩngã yaa zu-zẽkre. (Tʋʋ. 4:18-21; 5:27-29, 41, 42) Karen-biisã ra pa tar bʋʋm n na n zoe yãnd ye. Kaoosg zugẽ, pipi kiris-nebã sẽn da yaa sik-m-meng rãmbã maana modgr wʋsg n na n sõng neb a taabã, n yɩɩd b bɛɛbã. Wala makre, vʋʋsem sõngã vẽnega kiris-neb kẽer tɩ b gʋls sɛb sẽn ket n sõngd neb milyõ-rãmba, la kɩt tɩ b tẽed manegre. La Rĩungã b sẽn da moondã zoe n luglame, la ka la bilfu, a na n dɩɩ naam ãdem-biisã fãa zugu. (Mat. 24:14) La politik pãn-soaad-kãseng ning sẽn nams kiris-nebã yẽ menema hal yʋʋm wʋsg masã, tɩ kiris-neb nins b sẽn da namsã yaool n be saasẽ, n yaa rĩm-dãmb masã. B bɛɛbã yẽ kiime, la baa b sã n wa vʋʋg me, yaa Rĩung ning kiris-nebã bãmb sẽn dag n kisgã sẽn da moondã n na n dɩ naam b zugu.—Vẽn. 5:10. w20.07 15 s. a 4

A Abrahaam ra kɩsa sɩd ne a Zeova pʋlemsã, hal tɩ ra yaa wa a nee ned ning b sẽn da na n wa zae wã, rat n yeel tɩ Mesi wã sẽn na n wa yɩ Wẽnnaam Rĩungã Rĩmã. Woto n kɩt t’a Zeezi yeel zʋɩf-rãmbã yaa: “A Abrahaam ra saagd n na n yãa mam daarã, tɩ rẽ kõ-a sũ-no-kãsenga. La a yãa ra-kãng t’a sũurã yɩ noogo.” (Zã 8:56) Yaa vẽeneg t’a Abrahaam ra miime t’a yagens n na n naag Rĩungã a Zeova sẽn da na n wa luglã. A sakame n na n gũ t’a Zeova wa pids pʋlengã. Bõe la a Abrahaam maan tɩ wilgdẽ t’a ra gũuda ‘galʋ-tẽngã,’ rat n yeel tɩ Rĩungã Wẽnnaam sẽn segl tɩ ra na n wa wã? Pipi, a Abrahaam pa tol n yɩ soolem baa a ye tẽng-n-biig ye. A ra yikd n toeemda tẽnga, la a yãk yam n pa na n teel ninsaalb naam ye. A leb n pa bao n na n lugl a toorẽ rĩung ye. A kell n saka a Zeova, la a ra gũud a sẽn na n wa pids a pʋlemsã. A Abrahaam sẽn maan woto wã, a wilgame t’a tẽeda a Zeova ne a sũur fãa. w20.08 3 s. a 4-5

A Zeova pʋlmame tɩ dũni-paalgã pʋgã, ned baa a ye pa na n yeel “t’a ka keem ye!” (Eza. 33:24) Dẽnd sẽn ki-bã na n vʋʋga ne yĩns sẽn tar laafɩ. La b pa na n zems zãng zĩig pʋgẽ ye. Sã n pa rẽ, b nebã tõeeme n pa bãng-b ye. Kirist naamã sẽn na n kaoos yʋʋm tusrã sasa, wõnda yaa bilf-bilf la ãdem-biisã na n lebg neb sẽn zems zãnga. Yaa yʋʋm tusrã poor la a Zeezi na n yaool n lebs a Ba wã Rĩungã. Rẽ tɩ Rĩungã tʋma a tʋʋmdã zãnga. Wala makre, a na n sõnga ãdem-biisã tɩ b fãa wa zems zãnga. (1 Kor. 15:24-28; Vẽn. 20:1-3) Mams-y n ges-y y sẽn na n deeg y neb nins sẽn na n vʋʋgã to-to wã! Sũ-noogã yĩnga, y na n yãbame bɩ, bɩ y na n laadame? Y sũur na n yɩɩ noog hal tɩ y yɩɩl n pẽg a Zeova bɩ? Sẽn be bala, y na n nonga a Zeova sẽn yaa d Ba sẽn get d yell neerã la a Biigã sẽn nong-dã ne y sũur fãa, bala yaa bãmb maasem yĩng la sẽn ki-bã sẽn vʋʋgdã. w20.08 16-17 s. a 9-10

Tʋm-tʋmd a Poll sagla kiris-nebã tɩ b ges b sã n pa tõe n kell n tũ a Zeova, n pa kẽ kãadem. (1 Kor. 7:8-9) Yaa vẽeneg t’a Poll ra pa get sẽn pa kẽ-b kãadmã wa neb sẽn pa ta sẽn kẽ-b kãadmã ye. Sɩd me, a Poll yãka a Tɩmote sẽn da yaa bi-bɩɩg n pa kẽ kãadmã, n kõ-a tʋʋm sẽn tar yõod wʋsgo. (Fili. 2:19-22) Dẽnd yaa vẽeneg tɩ d sã n dat n yãk saam-biig t’a lebg kãsem-soaba, pa sõma tɩ d tik a sẽn kẽ kãadem bɩ a sẽn pa kẽ kãadem zug bal ye. (1 Kor. 7:32-35, 38) A Zeezi bɩ a Poll zɩ n yeel tɩ yaa tɩlɛ tɩ kiris-ned kẽ kãadem wall a ra kẽ kãadem ye. Woto wã, bõe la d tõe n yeel kãadmã la rakõtã wɛɛngẽ? Yʋʋmd 2012 zĩ-likr kiuugã pipi daar Gũusg Gasgã sẽn leokd sok-kãngã to-to wã bee yamleoogo. B yeela be yaa: “D sẽn tõe n kẽ kãadmã, la d sẽn tõe n yãk yam n pa kẽ kãadmã yaa Wẽnnaam kũuni. . . . Sã n yaa ne a Zeova, ned sẽn pa kẽ kãadem pa segd get rẽ wa bũmb sẽn yaa yãnde, wall a bas tɩ rẽ sãam a sũur ye.” Woto yĩnga, d segd n nanda d tẽed-n-taas nins sẽn be tigingã pʋgẽ n pa kẽ kãadmã. w20.08 28 s. a 8-9

Tẽns kẽere, nebã sã n paam tɩ b taas-b koe-noogã, b sũy noomame, tɩ b rat n bãng n paase. Kell n yaa rẽ bal la b ra gũuda! La tẽns a taaba, nebã pa baood n na n bãng Wẽnnaam wall Biiblã ye. Yãmb tẽngẽ wã, nebã manesem yaa wãn to ne koe-noogã? Sẽn yaa a soab fãa, a Zeova ratame tɩ d kell n moon koe-noogã, hal n tãag a sẽn na n wa yeel tɩ sekame. A Zeova zoe n yãka wakat ning koe-noogã mooneg sẽn na n wa yalsã. “Rẽ poor la saabã na n ta.” (Mat. 24:14) A Zeezi pĩnd n togsa yɛl nins sẽn na n wilg tɩ d bee yaoolem wakatã, la sẽn tõe n tiis a karen-biisã tɩ b bas koɛɛgã moonego. A sagla a karen-biisã tɩ b “kell n gũ.” (Mat. 24:42) Yɛl wʋsg sẽn tiis a Nowe wakatẽ nebã tɩ b pa kelg a Nowe keoogrã la d ne rũndã-rũndã me. (Mat. 24:37-39; 2 Pɩy. 2:5) Rẽ n so tɩ d rat n kell n wɩng ne koe-moonegã, sẽn yaa tʋʋmd ning a Zeova sẽn kõ-dã. w20.09 8 s. a 1-2, 4

A Sʋɩtãan “sũ-puugrã yaa kãsenga,” tɩ d sã n tagsdẽ t’a pa tõe n paam-do, d belgda d menga. (Vẽn. 12:12) Ka la bilfu, d fãa tẽebã na n paama makre. Pa na n le kaoos la to-kãseng zĩnd dũniyã gill zug ye. “A buud zɩ n zĩnd hal dũniyã sɩngr n tãag masã” ye. (Mat. 24:21) Wakat kãnga, d zakã neb tõe n wẽneg nams-d lame, tẽngã taoor dãmb me tõe n gɩdga d tʋʋmdã. (Mat. 10:35, 36) Rẽ yĩnga, wala rĩm a Aaza, tõnd ned kam fãa na n teega a Zeova, n paam t’a sõng-d la a kogl-d bɩ? (2 Kib. 14:10) A Zeova maanda bũmb toor-toor n na n sõng tõnd tɩ d tẽebã kell n tall pãnga, yɛl nins sẽn watã yĩnga. A tũnugda ne “tʋm-tʋmd sẽn tũud sɩd la sẽn tar yamã,” n kõt tõnd “rɩɩb wakat sẽn zemse,” n sõngd tõnd sẽn na yɩl tɩ d tẽebã kell n tall pãnga. (Mat. 24:45) La ned kam fãa segd n modgame t’a tẽeb ket n tar pãnga.—Ebre. 10:38, 39. w20.09 18 s. 16-18

Sã n zems ne a Zeova raabo, a tõe n tũnuga ne a vʋʋsem sõngã sẽn yaa pãn-kãsengã n kɩt tɩ neb sẽn tar zu-sobend maan yẽ sẽn date. Ninsaalbã tõe n tuu boko, n wẽnemd kʋɩlg koom t’a zoe n tees b sẽn datẽ. Woto me, a Zeova tõe n tũnuga ne vʋʋsem sõngã n wẽnemd nanambsã yam tɩ b maan bũmb sẽn zems ne a raabo. Sã n wa yaa woto, neb sẽn tar zu-sobend tõe n sakame n yãk yam n maan bũmb sẽn nafd Wẽnnaam nin-buiidã. (Ges-y Ɛsdras 7:21, 25, 26.) Bõe la d tõe n maane? D tõe n pʋʋsa “rĩm-dãmbã ne neb nins fãa sẽn tar naamã yĩnga,” b sã n wa segd n yãk yam bũmb ning wɛɛngẽ, tɩ tõe n sõng wall wa ne yell d tigissã la d koe-moonegã zugu. (1 Tɩm. 2:1, 2; Nee. 1:11) Wa pipi kiris-nebã sẽn maanã, tõnd me tõe n pʋʋsa d tẽed-n-taas nins sẽn be bãens rotẽ wã yĩng ne d sũy fãa.—Tʋʋ. 12:5; Ebre. 13:3. w20.11 15 s. 13-14

Yãmb mengã sã n zãms ned Biiblã t’a wa reeg lisgu, y sũ-noogã pa tõe n bãng n bilg ye. (1 Tes. 2:19, 20) Neb sã n deeg lisg n lebg a Zeezi karen-biisi, b yaa wa “sɛb sẽn pẽgd” tigingã nebã fãa, la pa neb nins sẽn zãms nin-kãensã Biiblã bal ye. (2 Kor 3:1-3) D gũus n gesame tɩ yʋʋm a naas pʋgẽ, sẽn ta neb milyõ 10 n zãmsd Biiblã kiuug fãa. Woto sɩd kõta sũ-noogo! Yʋʋm-kãense, sẽn yɩɩd neb tus 280 n deeg lisg yʋʋmd fãa n lebg a Zeova Kaset rãmba, la a Zeezi Kirist karen-biisi. A Zeova sã n ket n maand sũ-mar ne nebã, n kõt-b weer tɩ b tõe n lebg Kiristã karen-biisi, tõnd me ratame n maan d sẽn tõe fãa n sõng nin-kãensã tɩ b wa reeg lisg tao-tao. Bala wakatã sẽn ketã pa le waoog ye.—1 Kor. 7:29a; 1 Pɩy. 4:7. w20.10 6 s. a 1-2

Rĩm a Sayull pa sak n maan a Zeova sẽn yeelã ye. No-rɛɛs a Sãmwɛll sẽn gom ne-a rẽ wɛɛngẽ wã, a pa sak n deeg a kongrã ye. A pʋd n baoo padems n na n wilg t’a sẽn maanã pa wẽng wʋsgo, la a rɩk taalã n dogl neb a taaba. (1 Sãm. 15:13-24) Sẽn deng rẽ menga, a Sayull ra talla yel-manesem a woto buudu. (1 Sãm. 13:10-14) Bʋko, a basame t’a sũurã kɩt t’a lebg wuk-m-meng soaba. A pa rems a tagsa wã ye. Rẽ n so t’a Zeova ning-a taale, n daag-a n base. Sẽn na yɩl n dɩk yam a Sayull kibarã pʋgẽ, d segd n soka d meng yaa: ‘M sã n yã saglg Wẽnnaam Gomdã pʋgẽ, m baooda padems n pa na n tũ bɩ? Mam getame tɩ m sã n kɩɩse, pa wẽng bɩ? Mam sã n maan sẽn pa zemse, m rɩkda taalã n dogl neb a taab bɩ?’ D sã n leok sogs-kãensã baa yaa a yembr tɩ n-ye, wilgdame tɩ d segd n demsa d tagsa wã la d yel-manesmã. Sã n pa rẽ, d na n wa lebga wuk-m-meng soaba, t’a Zeova raag-d n base, tɩ d pa le yaa a zoa ye. w20.11 20 s. a 4-5

Kom-bɩɩse, yãk-y y sẽn na n tũ a soabã. Y segd n bao n bãnga a Zeova sẽn yaa Wẽnnaam ningã, a raabã sẽn yaa a soaba, la y sẽn tõe n maan a raabã to-to. (Rom. 12:2) Rẽ, y na n tõog n yãka yam n maan bũmb ning sẽn yaa sõma n tɩ yɩɩdã, rat n yeel tɩ n tũ a Zeova. (Zoz. 24:15) Y sã n karemd Biiblã daar fãa la y zãmsd-a n pa vaandẽ, y na n maneg n nonga a Zeova, la y tẽebã me pãng na n paasame. Yãk-y yam n lʋɩɩs a Zeova raabã taoore. A Sʋɩtãan dũniyã neb yetame tɩ yaa f sã n tall f bãngrã n tʋm n bao f meng nafr la f na n paam sũ-noogo. La sɩd-sɩdã, neb nins sẽn teeg arzɛgsã paamda ‘tood wʋsgo.’ (1 Tɩm. 6:9, 10) Y sã n sak a Zeova la y yãk yam n lʋɩɩs a raabã taoore, y vɩɩmã na n talla barka, la y na n ‘tõog n tʋma ne yam.’—Zoz. 1:8. w20.10 30-31 s. 17-18

Pipi kiris-nebã wakatẽ, koɛɛg ning a Zeezi sẽn moonã kɩtame tɩ ãdem-biisã tẽ tɩ manegr n wate. A kõo a karen-biisã noor tɩ b kell n tʋm tʋʋmd ning a sẽn sɩngã, n moon koɛɛgã “hal n tãag dũniyã zĩig ning sẽn zãr n yɩɩdã.” (Tʋʋm 1:8) La b ra pa tõe n tʋm tʋʋmdã ne b meng pãng ye. Ra yaa tɩlɛ tɩ b paam vʋʋsem sõngã sõngre, rat n yeel tɩ “sõangd” ning a Zeezi sẽn pʋlem-bã. (Zã 14:26; Zaka. 4:6) Yɩɩ yʋʋmd 33 Pãntekotã daar la a Zeezi karen-biisã paam vʋʋsem sõngã. Ne vʋʋsem sõngã sõngre, tao-tao bala b sɩnga koɛɛgã moonego, la pa yã n kaoos la neb tusa sak koe-noogã ye. (Tʋʋ. 2:41; 4:4) La nebã sẽn wa n yik n namsd karen-biisã, b pa zoe rabeem n bas koɛɛgã mooneg ye. B pʋʋsa a Zeova n yeel yaa: “Sõng-y y yembsã tɩ b kell n moon yãmb gomdã ne raoodo.” Rẽ poore, b paama vʋʋsem sõngã n da ket n “togsd Wẽnnaam gomdã ne raoodo.”—Tʋʋ. 4:18-20, 29, 31. w20.10 21 s. a 4-5

Bõe n kɩt tɩ d tõe n kɩs sɩd t’a Zeova sɩd vʋʋga a Zeezi? Neb wʋsg n yã a Zeezi a vʋʋgrã poore, n kõ kaset ne rẽ. (1 Kor. 15:5-7) B sʋkã, ned ning yell tʋm-tʋmd a Poll sẽn gom pipi yaa a Pɩyɛɛr (a Sefas). Karen-biis sull n wilg t’a Pɩyɛɛr sɩd yãa a Zeezi a vʋʋgrã poore. (Luk 24:33, 34) Sẽn paase, tʋm-tʋmdb “piig la a yiibã” yãa a Zeezi a vʋʋgrã poore. Rẽ poore, Kiristã “vẽnega b meng ne saam-biis kobs-nu la zak wakat-yɛnga.” Tõe tɩ yaa b sẽn da wa n tigim taab Galɩle, tɩ b gomd rẽ yell Matiye 28:16-20 pʋgẽ wã. Sẽn paas me, a Zeezi ‘vẽnega a meng ne a Zake,’ sẽn yaa a ma-biiga, sẽn da pa tẽed sɩngrẽ wã t’a Zeezi la Mesi wã. (Zã 7:5) A Zak sẽn yã a Zeezi a vʋʋgrã poorã, a sak n deegame masã tɩ yẽ la Mesi wã. A Poll sẽn wa n gʋls Pipi Korẽnt-rãmb sebrã yʋʋmd 55 wã, rẽ tɩ neb wʋsg sẽn da maan kaset ne a Zeezi vʋʋgrã ra ket n vɩɩme. Rẽ wã, sẽn da pa kɩs-a sɩd t’a Zeezi vʋʋgame ra tõe n tɩ soka nin-kãensã. w20.12 3 s. a 5, 7-8

D sã n wa ka laafɩ, sẽn yɩɩd fãa d sã n maood ne bãag sẽn kaoos ne-do, tõe n lebga toog tɩ d tall tagsg sẽn zemse. Sã n wa yaa woto, bɩ y kos a Zeova sõngre. Yaa sɩd tɩ rũndã-rũndã, a Zeova pa maand yel-soalem n sãoogd tõnd bãasã ye. La a belsda tõnd la a kõt-d pãng tɩ d tõogd toogo. (Yɩɩn. 94:19) Wala makre, a tõe n kɩtame tɩ d tẽed-n-taag sõng-d ne d zakã tʋʋm-bõonese, bɩ n tɩ ra d teed n wa kõ-do. A tõe n kɩtame me tɩ d tẽed-n-taas wa pʋʋs ne-do. A tõeeme me n kɩt tɩ d tẽeg bũmb sẽn be a Gomdã pʋgẽ n tõe n keng d raoodo. Wala makre, Biiblã sẽn wilg tɩ dũni-paalgã pʋgẽ d na n zemsa zãnga, tɩ bãasã la tood buud fãa me sa wã. (Rom. 15:4) D tõe n komsa raoodo, d sẽn pa tõe n moon koɛɛgã wʋsg laafɩ kaalem yĩnga. Wala makre, logtoɛɛmbã ra gãnega saam-bi-poak a Lorɛll sẽn yit Etazĩni wã masĩn pʋgẽ n maan yʋʋm 37, tɩ ra sõngd-a t’a vʋʋsdẽ. A ra bẽeda kãnsɛɛre, b maan-a-la woperasɩyõ kãsemse, a ra tara yĩn-gãong bãag me. Baa ne zu-loe-kãensã, a pa bas koɛɛgã mooneg ye. A ra moonda logtoɛɛmbã ne neb nins sẽn da wat n get-a a zakẽ wã. A tõog n sõnga sẽn yɩɩd neb 17 tɩ b lebg a Zeova Kaset rãmba. w20.12 24 s. a 9; 25 s. 12

Tʋm-tʋmd a Poll da rata sõngre. Yʋʋmd 56 sẽnese, kʋʋng n veo-a Zerizalɛm wẽnd-doogẽ wã n yi yɩnga, n bao n na n kʋ-a. Vẽkembeoogã, b sẽn tall-a n kẽng Sãnedrẽ wã taoorã, bɛɛbã ra rat n tɛ-a lame n tõse. (Tʋʋ. 21:30-32; 22:30; 23:6-10) Wakat kãnga, tõe t’a Poll ra sokda a meng yaa: ‘Mam na n tõog n yalsa kãn-kãe namsg a woto taoor n tãag dabʋre?’ Bõe sõngr la a Poll paam-yã? Yʋng ning b sẽn yõk a Pollã, “Zu-soab” a Zeezi yalsa a sɛɛgẽ n yeel-a yaa: “Keng f pɛlga! Bala, fo segd n kõo kaset Rom me wa fo sẽn kõ kaset n gom mam yell sõma Zerizalɛmmã.” (Tʋʋ. 23:11) Ad woto sɩd kenga a raoodo! A Zeezi pẽga a Polle, a sẽn kõ kaset ning Zerizalɛmmã yĩnga. A leb n wilgame t’a Poll na n taa Rom ne laafɩ, n kõ kaset beenẽ me. A Poll sẽn paam raood kengr woto wã, a tog n da basa a yam wa biig sẽn be a ba nusẽ. w20.11 12 s. a 1, 3; 13 s. a 4

Tõnd sẽn saagd n na n wa paam bũmb ning ne Rĩungã maasmã “yaa wa baar tõnd sɩɩsã yĩnga,” n tõe n kɩt tɩ d yals kãn-kãe baa yel-pakr wakate. Tagsd-y a Zeova sẽn pʋlem tɩ wakat n na n wa zĩnd tɩ tags-kɛgã fãa sa wã yelle. (Eza. 65:17) Mamsd-y y yamẽ y sẽn be dũni-paalgã pʋgẽ, tɩ zu-loees baa a ye le kaẽ ye. (Mii. 4:4) Y sã n gomd rẽ yell ne y taabã, na n kɩtame tɩ y maneg n kɩs sɩd tɩ na n pidsame. Maand-y y sẽn tõe fãa n moond koɛɛgã la y sõngd nebã tɩ b lebgd a Zeezi karen-biisi. Woto, y na n ‘tõog n kɩsa sɩd ne bũmb nins y sẽn saagd n na n wa paamã, n tãag saabã.’ (Ebre. 6:11) Dũni-kãngã sẽn debd a saabã, d na n paamda zu-loees wʋsg sẽn tõe n kɩt tɩ d maand yɩɩre. D na n tõog n maoo ne zu-loe-kãense, d sã n kell n pa sɩɩ n teeg a Zeova, la d ra teeg d mens ye. D wilg ne d tʋʋm-tʋmdɩ wã tɩ d tẽeda a Zeova sẽn yeel bũmb ningã. A yeelame: “Yaa y sã n kell n pa sɩɩ la y teeg maam, la y na n paam pãnga.”—Eza. 30:15, MN. w21.01 7 s. 17-18

Bãng-y tɩ Zak 5:11 wã goma a Zeova nonglmã sẽn yaa wʋsgã yell n naag ne a nimbãan-zoeerã. (Yik. 34:6) Bũmb a Zeova sẽn maand tɩ wilgdẽ t’a zoeta d nimbãaneg yaa a sẽn kõt-d beegrã sugrã. (Yɩɩn. 51:3) Biiblã pʋgẽ, nimbãan-zoeer pa tek sugr kũun bal ye. Nimbãan-zoeer yaa yĩn-sidg ning ned sẽn paamde, a sã n yã ned sẽn be yel-pakr pʋgẽ tɩ kɩt t’a rat n sõng-a wã. A Zeova wilgame tɩ yĩn-sidg ning a sẽn tar tɩ kɩt t’a rat n sõng tõndã pãng yɩɩda rogem yĩn-sidg ning sẽn be pag ne a biig sʋkã. (Eza. 49:15) D sã n wa be yel-pakr pʋgẽ, a Zeova nimbãan-zoeerã kɩtdame t’a rat n sõng-do. (Yɩɩn. 37:39; 1 Kor. 10:13) D wilgdame tɩ d zoeta d saam-biisã la d saam-bi-pogsã nimbãanega, d sã n sakd n kõt-b sugr la d pa tar sũ-kẽk ne-ba, b sã n wa maan bũmb tɩ sãam d sũuri. (Efɛ. 4:32) Sẽn yɩɩd fãa, yaa d sã n sõngd d saam-biisã b toogã pʋgẽ la d wilgd tɩ d zoeta b nimbãanega. Woto, d rɩkda a Zeova togs-n-taar nonglmã wɛɛngẽ, bala yẽ n kõ mak-sõng sẽn ka to rẽ wɛɛngẽ.—Efɛ. 5:1. w21.01 21 s. a 5

Zak soab segdame n maand gũusgu. A pa segd n kẽes a sẽkã zãng a tʋʋmdã pʋgẽ n na n ges a zakã rãmb yelle, hal n pa le tõe n ges tɩ b tẽebã pãng paase, la a ges me tɩ b paam sũ-noog ye. A segd n zãmsd-b-la Wẽnnaam noyã. A Zeova zãmsda tõnd a noyã la a kibind tõndo, d mensã neer yĩnga. (Ebre. 12:7-9) A Zeezi zãmsda a karen-biisã Wẽnnaam noyã ne nonglem, wa a Ba wã. (Zã 15:14, 15) A sagend-b lame, la yaa ne nonglem. (Mat. 20:24-28) A miime tɩ d yaa neb sẽn pa zems zãnga, n wae n tudgdẽ. (Mat. 26:41) Zak soab sẽn dɩkd a Zeova ne a Zeezi togs-n-taar tẽegdame t’a pagã ne a kambã pa zems zãng ye. A pa ‘yikd a sũur wʋsg’ ne-b ye. (Kol. 3:19) A pʋd n tũuda Biiblã noor ning sẽn be Galat rãmbã 6:1 wã, n modgd n na n dems-b ne bʋgsem, n tẽegdẽ tɩ yẽ mengã pa zems zãng ye. Wa a Zeezi, a miime tɩ yaa ne a mak-sõngã maasem la a tõe n zãms a zakã rãmb tɩ yɩ sõma n yɩɩda. w21.02 6-7 s. 16-18

Ne Kirist maoongã maasem, a Zeova raa tigingã neb fãa yembr-yembr vɩɩm, la neb nins fãa sẽn na n tall tẽeb ne a Zeezi wã vɩɩm. (Mark 10:45; Tʋʋ. 20:28; 1 Kor. 15:21, 22) Rẽnd zemsame t’a Zeova yãk a Zeezi sẽn kõ a vɩɩmã ãdem-biisã yĩngã t’a yɩ tigingã Zu-soaba. A Zeezi sẽn yaa d Zu-soabã, a tara sor n na n lugl noy tõnd ned kam fãa yembr-yembrã, zagsã, la tigingã fãa yĩnga, la a kɩt tɩ d tũ-ba. (Gal. 6:2) La pa noy bal la a Zeezi lugund ye. A geta tõnd ned kam fãa yell neere, la a nong-do. (Efɛ. 5:29) Saam-bi-pogsã wilgdame tɩ b waoogda Kiristã, b sã n tũud sagls nins rap nins a sẽn yãk tɩ b lʋɩt taoorã sẽn kõtã. Saam-biisã sã n waoogd saam-bi-pogsã la b nand-ba, b wilgdame tɩ b wʋmda zu-sobendã võor sõma. Tigingã neb fãa sã n wʋmd zu-sobendã võor sõma la b sakd-a, kɩtdame tɩ laafɩ zĩnd tigingã neb sʋka. La sẽn yɩɩd fãa, rẽ na n waa ne pẽgr n kõ d saasẽ Ba a Zeova sẽn nong-dã. w21.02 18-19 s. 14-17

A Davɩɩd ne a tãb-biisã sẽn wa n zoet n na n põsg a Sayullã, b ra basa b zagsã rãmb n na n tɩ zabe. A Davɩɩd ne a tãb-biisã sẽn wa n loogã, bɛɛb n wa n kẽ tẽngã n yõg b zagsã rãmb n tall-b n loog yembdo. A Davɩɩd ra tõe n yeelame tɩ yẽ sẽn tar minim wʋsg zabr pʋgẽ wã yĩnga, a mii a sẽn tõe n maan n tɩ fãag a zakã rãmb yembdã pʋgẽ. La a pa maan woto ye. A baoo a Zeova sõngre. A Davɩɩd soka a Zeova yaa: “Mam sã n pʋgl nin-bãmbã, mam na n paam-b lame bɩ?” A Zeova yeela a Davɩɩd t’a kẽnge, la a wilg-a t’a bas a yam t’a na n tõoga a bɛɛbã. (1 Sãm. 30:7-10) Yam-bʋg la y tõe n dɩk yel-kãnga pʋgẽ? Reng-y n kos-y sagls n yaool n yãk yam n maan bũmbu. Kom-bɩɩse, kos-y y roagdbã saglse. Y leb n tõe n goma ne tigingã kãsem-dãmb sẽn tar minim, n paam saglse. A Zeova kɩsa kãsem-dãmbã sɩda. Yãmb me tõe n kɩs-b-la sɩda. A Zeova get-b-la wa “kũun” a sẽn kõ tigingã. (Efɛ. 4:8) Y sã n tall b tẽebã buudu, la y kelgd sagls nins b sẽn kõt yãmbã, na n naf-y-la wʋsgo. w21.03 4-5 s. 10-11

A Zeezi yeelame tɩ d sã n pa tũud d sẽn zãmsd bũmb ningã, d yaa wa ned sẽn me a roog bĩisr zugu. Nin-kãng tʋma wʋsg zaalem yĩng bala. Bala saagã sã n ni ne pãng tɩ koomã pid zĩig fãa, roogã na n lʋɩɩme. (Mat. 7:24-27) Woto me d sã n pʋʋse, n mams kibarã d yamẽ la d bʋgse, n yaool n pa tũ d sẽn bãngã, d modgrã fãa yaa zaalem. D sã n wa paamd makr bɩ namsg d tẽebã yĩnga, d tẽebã pa na n tall pãng wʋsg ye. La d sã n zãmsd Biiblã la d tũud d sẽn bãngã, kɩtdame tɩ d yam-yãkrã yaa sõma n yɩɩda. D paamda sũur pʋgẽ bãane, la tẽeb sẽn tar pãng me. (Eza. 48:17, 18) Sẽn na yɩl n kell n sak a Zeova namsg sasa, d segd n teeg-a lame, n pʋʋsd-a, la d ket n zãmsd Biiblã wakat fãa n pa vaandẽ ye. D leb n segd n tẽegda wakat fãa tɩ bũmb a ye sẽn tar yõod d sẽn segd n maane, yaa d sẽn na n sõng t’a Zeova yʋʋrã paam waoogre. D tõe n kɩsa sɩd t’a Zeova pa na n tol n bas-do, la tɩ bũmb kae ned sẽn tõe n maan n kɩt t’a Zeova pa le nong-d ye.—Ebre. 13:5, 6. w21.03 15 s. a 6; 18 s. 20