Sigri

Koe-moondbã segd n wilgame tɩ b karen-biisã yell sɩd pak-b lame. Ges-y-b wa neb sẽn na n wa lebg y tẽed-n-taase. Pa nana ne-b tɩ b bas zo-rãmb nins b sẽn da tar dũniyã pʋgẽ wã, n toeem bũmb wʋsg b vɩɩmã pʋgẽ n tũ a Zeova ye. Koe-moondb nins sẽn tar minimã sõngda b karen-biisã, tɩ b yõgd zood ne tigingã neb nins sẽn tõe n sõng-b tɩ b paam zood sõma ne a Zeova wã. Rẽ masã, karen-biisã paamd n naaga Wẽnnaam nin-buiidã sẽn tõe n keng b raood la b paas b tẽebã pãngã, tɩ b sũy noomẽ. D ratame tɩ karen-biig fãa neẽ t’a yaa tigingã neda. D ratame me tɩ karen-biig fãa yã tɩ tõnd yaa wa zak a ye neb sẽn nong taaba, tɩ rẽ kɩt t’a rat n naag-do. Rẽ na n kɩtame tɩ yɩ nana ne-a t’a bas a zo-rãmb nins sẽn pa sõngd-a t’a nong a Zeova wã. (Yel. 13:20) A pĩnd zo-rãmbã sã n daag-a n base, a na n bãngame t’a tõe n paama zo-rãmb hakɩɩk a Zeova siglgã pʋgẽ.—Mark 10:29, 30; 1 Pɩy. 4:4. w20.10 17 s. 10-11

D sã n dat n paam zood sõma ne a Zeova, yaa tɩlɛ tɩ d lebg a Zeezi zoa. Bõe yĩng tɩ d yet woto? Bũmb a yiib yĩnga. Pipi, a Zeezi yeela a karen-biisã yaa: “Ba wã meng nonga yãmba, bala yãmb nonga maam.” (Zã 16:27) A leb n yeelame yaa: “Ned baa a ye pa wat Ba wã nengẽ tɩ pa mam maasem yĩng ye.” (Zã 14:6) D sã n dat n paam zood sõma ne a Zeova, n yaool n pa reng n lebg a Zeezi zoa, yaa wa ned sẽn dat n kẽ roog pʋgẽ n yaool n pa rat n tũ rignoorẽ wã ye. A Zeezi goma rẽ yell a makr a ye pʋgẽ, n yeel tɩ yẽ yaa “yãgrã noore, piisã yĩnga.” (Zã 10:7) Yiib-n-soaba, a Zeezi rɩkda a Ba wã togs-n-taar kɛpɩ. A yeela a karen-biisã yaa: “Ned ning sẽn yã maam, a yãa Ba wã me.” (Zã 14:9) Dẽnd bũmb d sẽn tõe n maan n wa bãng a Zeova sõma, yaa d sẽn na n bao n bãng a Zeezi vɩɩmã sẽn yɩ to-to wã. D sã n bãng a Zeezi sõma, d na n maneg n nong-a lame. Tõnd ne a Zeezi zoodã sã n paamd pãnga, d na n maneg n nonga a Ba wã me. w20.04 21-22 s. a 5-6

Bãag n kɩt tɩ y pa le tõe n yiki, wall y kẽnda ne puus-puus bɩ? Yãmb rũmã zabdame, wall y ninã pa le ne sõma bɩ? Sã n yaa woto, y na n tõogame n kell n naag sẽn yaa-b kom-bɩɩs n tar keelmã, n zoe zoeesã bɩ? Sãmbg kae tɩ y na n tõogame! Neb wʋsg yʋʋm sẽn vẽsge, la koms-rãmb n ket n tũud vɩɩmã sore. Pa ne b meng pãng la b tõogd n maand woto ye. B kelgda tigissã ne telefõn wall video-rãmb maasem, n paamd pãng a Zeova nengẽ. B taasda logtoɛɛmbã la neb nins sẽn wat n get-bã koɛɛgã. Baa y sã n pa le tõe n tʋm a Zeova tʋʋmã wʋsgo, ra n tol-y n bas-y tɩ rẽ koms y raoodo, n tagsdẽ tɩ y pa le tõe n zoe vɩɩmã zoees ye. A Zeova nonga yãmba, y sẽn tẽed-a, la bũmb nins fãa y sẽn maan a tũudmã pʋgẽ na maan yʋʋm wʋsgã. Yaa masã meng la y rat a sõngr n tɩ yɩɩda, la a pa na n tol n daag-y n bas ye. (Yɩɩn. 9:11) A na n pʋd n kolga yãmb n paase. w20.04 29 s. 16-17

Bõe zug la y tõe n sõs ne ned sẽn tar tũudum? Bao-y bũmb yãmb ne a soabã fãa sẽn tẽeda, n sõs rẽ zugu. Tõe t’a tẽedame tɩ Wẽnnaam yaa a yembre, wall a sak n deegame t’a Zeezi kiime n na n fãag ãdem-biisã, pa rẽ bɩ a tẽedame tɩ d vɩɩ dũni sẽn pid ne wẽnem pʋgẽ, la tɩ ka la bilfu na n saame. Tik-y bũmb yãmb y yiibã fãa sẽn tẽeda, n sõs ne-a Biiblã zug noog-noogo. Kẽer tara b tũudum, la pa bũmb nins fãa b sẽn zãmsd-bã la b tẽed ye. Dẽnd baa y sã n bãng ned tũudum, bɩ y bao n bãng a mengã sẽn tẽed bũmb ninsã. Saam-biig sẽn yaa misioneer wilgame tɩ neb kẽer yetame tɩ b tẽedame tɩ Wẽnnaam yaa mens a tãabo, la b yaool n pa sak n deeg tɩ Ba wã ne Biigã la vʋʋsem sõngã naaga taab n yaa Wẽnnaam-yɛng ye. A paasame: “M sã n bãng tɩ pa bũmb nins fãa b sẽn zãms a soabã la a tẽeda, sõngd-m lame tɩ m bãng n sõs ne-a bũmb d fãa sẽn tẽed zugu.” Woto wã, baood-y n bãngd-y nebã sẽn sɩd tẽed bũmb ninsã. Rẽ, wa tʋm-tʋmd a Polle, yãmb tõe n “lebga bũmb fãa neb buud fãa yĩnga.”—1 Kor. 9:19-22. w20.04 10 s. a 9-10

D tõe n gũu beoog-daarã ne bas-m-yam, bala a Dãniyɛll ne a Zã fãa wilgame tɩ neb nins sẽn tũud a Zeova ne a Zeezi wã na n põsa to-kãsengã sasa. A Dãniyɛll yeelame tɩ sẽn na n põs-bã ‘yʋy na n gʋlsa sebrã pʋgẽ.’ Wãn to la d tõe n paam tɩ b gʋls d yʋʋr seb-kãng pʋgẽ? D segd n wilgda vẽeneg tɩ d tẽeda a Zeezi sẽn yaa Wẽnnaam Pe-bilã. (Zã 1:29) Segdame tɩ d reeg lisgu, n wilg tɩ d rɩka d meng n kõ Wẽnnaam. (1 Pɩy. 3:21) Sẽn paase, d segd n wilgame tɩ d teenda Wẽnnaam Rĩungã, n maand d sẽn tõe fãa n na n sõng neb a taabã tɩ b bãng a Zeova. Yaa masã la d segd n maneg n kɩs a Zeova ne a siglgã sɩda. Yaa masã me la d segd n teel Wẽnnaam Rĩungã. D sã n maan woto, Wẽnnaam Rĩungã sã n wa na n sãam rɩtg rĩmã la goabg rĩmã, d na n paama fãagre. w20.05 16 s. 18-19

A Ãdem ne a Awa ra mii a Zeova yʋʋrã, la b ra mi bũmb ka tɛk sẽn tar yõod wʋsg a mengã zugu. B ra miime tɩ yaa yẽ la Naandã, soab ning sẽn kõ-b vɩɩmã, zĩ-neer tɩ b vɩ a pʋgẽ, la a lugl b kãadmã tɩ zems zãngã. (Sɩng. 1:26-28; 2:18) La rẽ yĩnga, ne b sẽn da tõe n tags tɩ zemsã, b na n kell n bʋgsa a Zeova sẽn maan bũmb nins fãa n kõ-bã zug bɩ? B na n kell n bao n nonga a Zeova n paasdẽ, la b kell n wilg me tɩ b sũur nooma ne-a bɩ? Wẽnnaam bɛ wã sẽn wa n mak-bã, sogs-kãensã leoorã lebga vẽenega. A Sʋɩtãan tũnuga ne waaf n sok a Awa yaa: “Sɩd-sɩdã, rẽ yĩnga, Wẽnnaam yeela yãmb tɩ y ra rɩ tɩɩsã fãa sẽn be zẽedã zĩigẽ wã biis sɩda?” (Sɩng. 2:16, 17; 3:1) A Sʋɩtãan sokrã naaga ne ziri Wẽnnaam zugu, t’a Awa sɩng masã n tagsd wẽng Wẽnnaam zugu. Wẽnnaam yaool n da yeelame tɩ b tõe n dɩɩ tɩɩsã fãa biisi, sã n pa tɩɩg a ye bala. (Sɩng. 2:9) Rẽnd a Sʋɩtãan sokrã pʋgẽ, a golma sɩdã. A maaname tɩ yaa wa Wẽnnaam pa kõat ye. Tõe t’a Awa ra sokda a meng yaa: ‘Bõn-sõng la Wẽnnaam solgd n pa rat tɩ m paam bɩ?’ w20.06 3-4 s. a 8-9

Neb kẽer n bas a Zeova tũubu, b tẽed-n-taag sẽn maan bũmb tɩ zabd-b yĩnga. Tʋm-tʋmd a Poll meng wilgame tɩ wakat ninga, d tõe n sɩd ‘wa tara yell’ ne d tẽed-n-taaga. Tõeeme meng tɩ b maan-d-la kɛgre. Wakat kãng tɩ d sã n pa gũusi, d wat n talla sũ-kẽka. Sũ-toog sã n tar neda, tõe n wa kɩtame t’a lak a meng ne a Zeova nin-buiidã. A Pablo yaa d tẽed-n-taag sẽn be Amerikdisiid. rõd-a lame t’a maana sẽn pa segde, tɩ rẽ kɩt tɩ b reeg tʋʋmd a sẽn da tar tigingã pʋgẽ. A manesem yɩɩ wãna? Ad a sẽn yeele: “Yika m sũur wʋsgo. Bilf-bilfã, m wa n zãaga m meng ne tigingã.” Nina me sã n da maana yel-wẽn-kãsenga, a sũur-kasetã tõe n ket n namsd-a lame, hal t’a tagsdẽ tɩ Wẽnnaam pa tõe n le nong yẽ ye. Baa a sã n da teka yam n kos sugr tɩ b sɩd kõ-a sugri, a tõe n ket n tagsdame t’a pa le yaa nin-tɩrg n sek a na naag Wẽnnaam nin-buiidã ye. Yãmb tagsg yaa wãn ne d tẽed-n-taas nins sẽn be yell a woto pʋgẽ wã? w20.06 19 s. a 6-7

D segd bãnga yɛl sẽn tõe n wa sãam d tẽebã, la d maan bũmb n gil-ba. (Ebre. 5:14) Wala makre, d segd n maana gũusgu, filim-dãmbã la reemã yãkr wɛɛngẽ. Naoor wʋsgo, b wilgda yoob yɛl televiziõ wã pʋgẽ, la filim dãmb kẽer pʋsẽ. Woto yaa bũmb Wẽnnaam sẽn kisi. Ned sã n get bõn-kãensã, pa tõe n pa sãam a tẽebã ye. Rẽ n so tɩ d segd n zãag d meng ne reem la filim-dãmb nins sẽn tõe n kɩt tɩ bilf-bilfã, bɩ d wa pa le nong Wẽnnaamã. (Efɛ. 5:5, 6) D leb n segd n bãnga sɩdã-kɩɩsdbã sẽn yelgd ziri ninsã sẽn tõe n wa ne yell ningã, wala makre, b tõe n yelga kibay sẽn pa sɩd d saam-biisã zugu, wall a Zeova siglgã zugu. (1 Tɩm. 4:1, 7; 2 Tɩm. 2:16) Kiba-yood a woto tõe n sãama d tẽebã. D pa segd n bas tɩ kibay a woto belg tõnd ye. Bõe-yĩnga? Bala, yaa “neb nins tagsa sẽn yaa wẽns zãngã, n yaa neb sẽn pa mi sɩdã” n yelgd kibay a woto buudu. B raabã yaa b wa ne ‘kɩɩsg la no-koɛɛma.’ (1 Tɩm. 6:4, 5) B ratame tɩ d tẽ b tẽn-kãnemã, n pa le kɩs d saam-biisã sɩd ye. w20.09 29 s. 13, 15

Pag ne a sɩd segd n nonga taab la b waoogd taaba. (Efɛ.5:33) Biiblã yeta tõnd tɩ d nang pãng ne kũun n yɩɩd reegre. (Tʋʋ. 20:35) Bõe n na n sõng pag ne a sɩd tɩ b wilgd tɩ b nonga taab la b waoogd taaba? Yaa sik-m-mengã. Sik-m-mengã sõnga kiris-neb wʋsg tɩ b paam sũ-noog b kãadmã pʋgẽ n paase. Wala makre, pʋg-sɩd a ye yʋʋr sẽn boond t’a Ɛstivɛn yeelame: “Y segd n naagda taab n tʋmd ne yam a yembre, sẽn yɩɩd fãa, zu-loees sã n wa beẽ. Y pa na n sokdẽ tɩ ‘bõe n na n naf maam n yɩɩd?’ ye. Y pʋd na n sokdame tɩ: ‘Bõe n na n naf tõnd n yɩɩda?’” A pagã yʋʋr la a Ɛstafani. Yẽ me tagsda woto. Ad a sẽn yeele: “Ned kae sẽn dat n zĩnd ne ned sẽn zabd ne-a wakat fãa ye. Mo-yõsr sã n wa beẽ, d baoodame n na n bãng yellã yẽgre. Rẽ poore, d pʋʋsdame, n maan vaeesgo, la d yẽs ne taab n bao yellã tɩɩm. D baoodame n na n welg yellã lakae, d pa zabd ne taab ye.” Kãadmã pʋgẽ, ned fãa sã n pa tagsdẽ t’a sãoo a to wã, sɩd na n naf-b lame. w20.07 3-4 s. a 5-6

Ad yam ning d sẽn tõe n dɩk tʋm-tʋmd a Poll mak-sõngã pʋgẽ: A Zeova tũubã pʋgẽ, d ra teeg d meng pãng bɩ d tõod ye. Ne ninsaal tagsgo, a Poll da tara bʋʋm n na n wuk a meng la a teeg a menga. B wub-a-la Tars sẽn da yaa Rom soolmã porvẽns a yembr na-tẽngã. Tars tẽngã ra tara arzɛgs wʋsgo. Inivɛrsite-kãseng n da be be, hal t’a yʋʋrã ra yi. A Poll ra karem n zãagame. A ra paamame t’a Gamaliyɛll sẽn yaa Zʋɩf-rãmbã tũudum taoor soab b sẽn da waoogd wʋsgã yɩ a karen-saamba. (Tʋʋ. 5:34; 22:3) Wakat n zĩnd t’a Poll da yaa nin-kãseng Zʋɩf-rãmbã sʋka. (Tʋʋ. 26:4) Baa ne rẽ, a Poll ra pa teeg a meng ye. Yɩɩ ne sũ-noog la a Poll bas bũmb nins sẽn da kɩt t’a yaa nin-kãseng dũniyã rãmb nifẽ wã. Sɩd me, a ra wa n geta bõn-kãens sẽn wõnd yaa zu-zẽkr bũmbã wa “sagdo.” (Fili. 3:8) A Poll sẽn lebg Kiristã karen-biigã, a paama zu-loees wʋsgo. A meng buudã neb ra kis-a lame. (Tʋʋ. 23:12-14) Baa ne a sẽn da yaa Rom tẽng-n-biigã, Rom nebã pãb-a lame la b ning-a bãens roogo. (Tʋʋ. 16:19-24, 37) Sẽn paase, a Poll ra miime t’a tara pãn-komsem, tɩ yɩl n maan sẽn yaa tɩrg ra yaa toogo. (Rom. 7:21-25) La a pa bas t’a bɛɛbã bɩ yẽ mengã pãn-komsem kɩt t’a bas Kiristã tũub ye. A ra pʋd n “maanda sũ-noog pãn-komsem pʋgẽ.” Bõe yĩnga? Bala yaa a sẽn wat n ka pãng sasa la a yãt Wẽnnaam pãngã a vɩɩmã pʋgẽ.—2 Kor. 4:7; 12:10. w20.07 16 s. a 7-8

Rũndã-rũndã, d segd n kell n wɩnga ne koe-moonegã n da bas ye. A Zeezi pĩnd n togsame tɩ koɛɛgã na n mooname n zãage, la tɩ hal a kũumã poor menga, a karen-biisã na n moon-a lame n kaoose. A Zeezi kũumã poore, a karen-biis kẽer leba zĩmã yõgb tʋʋmdẽ. A vʋʋgrã poore, a maana yel-solemd t’a karen-biis kẽer paam zĩm zembala. A tũnuga ne segb-kãng n wilg-b tɩ b tʋʋmdã sẽn yaa yõg neb wa b sẽn yõgd zĩmã to-to wã yõod yɩɩda tʋʋmd buudã fãa. (Zã 21:15-17) Sẽn wa n ket bilf bal t’a Zeezi rʋ saasẽ, a yeela a karen-biisã tɩ koe-moonegã a sẽn sɩngã na n wa zʋʋga Israyɛll todsã n zãage. (Tʋʋ. 1:6-8) Yʋʋm a wãn poore, a Zeezi vẽnega tʋm-tʋmd a Zã, t’a yã bũmb ning sẽn na n wa maan “Zu-soabã daarã.” Vẽnegrã pʋgẽ, a Zã yãa bũmb sẽn yaa yel-solem-kãsenga. A yãa Malɛk sẽn tar “koe-noog sẽn ka sɛt” b sẽn da moond “neb sẽn yit buud toɛy-toɛy pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.” (Vẽn. 1:10; 14:6) Dẽnd yaa vẽeneg t’a Zeova raab ne tõnd rũndã-rũndã yaa d kẽes d toog koe-noogã b sẽn moond dũniyã gill zugã pʋgẽ, hal n tãag tʋʋmdã saabo. w20.09 9 s. a 5

A Abrahaam zakã rãmb paama zu-loe-kɛgemse. A pag a Saara a sẽn da nong wʋsgã ra pa tar dogem ye. Rẽ yɩɩ sũ-sãang ne-b n kaoos yʋʋm wʋsgo. A Saara wa n baas n dɩka a yem-poak a Agaar n kõ a Abrahaam sẽn na yɩl tɩ b paam kamb ne yẽ maasem. La a Agaar sẽn wa n tar a Ismayɛll pʋgã, a sɩngame n paoogd a Saara. Yellã wa n tolg n zẽname, hal t’a Saara rig a Agaar t’a yi zakẽ wã (Sɩng. 16:1-6) A Saara wa n dɩka pʋga, t’a Abrahaam paam bi-ribl n pʋd a yʋʋr t’a Izaak. A Abrahaam ra nonga a kom-dibli a yiibã fãa, a Ismayɛll ne a Izaake. La a Ismayɛll sẽn da namsd a Izaakã yĩnga, yɩɩ tɩlɛ t’a Abrahaam rig a Ismayɛll ne a Agaar tɩ b looge. (Sɩng. 21:9-14) Kaoosg zugẽ, a Zeova wa n yeela a Abrahaam t’a rɩk a Izaak n maan maoongo. (Sɩng. 22:1, 2; Ebre. 11:17-19) Yel-kãensã a yiibã fãa pʋgẽ, ra yaa tɩlɛ t’a Abrahaam kɩs sɩd t’a Zeova na n pidsa bũmb nins a sẽn pʋlem a kom-dibli wã wɛɛngẽ wã. w20.08 4 s. a 9-10

Mams-y n ges-y sũ-noog ning sẽn na n vʋʋg-bã sẽn na n paame, b sã n wa bas b pĩnd tʋʋm-wẽnsã n tũud Wẽnnaam noyã! Sẽn na n sak-b n toeemã na n paam n vɩɩmda wakat sẽn kõn sa. La a Zeova pa na n bas neb nins sẽn na n tõdg a raabã maanegã tɩ b wa ne zũnd-zãnd arzãnã pʋgẽ ye. (Eza. 65:20; Zã 5:28, 29) Wẽnnaam Rĩungã sã n wa so tẽngã, Wẽnnaam nin-buiidã fãa na n yãa Yel-bũn 10:22 goamã pidsgu. Be b yetame yaa: “Yaa Sẽn-Ka-Saab barkã n wat ne arzɛka, tɩ yɩɩr ka naag ye.” Ne a Zeova vʋʋsem sõngã sõngre, a nin-buiidã na n yɩɩ arzɛgs rãmb a tũudmã wɛɛngẽ, rat n yeel tɩ bilf-bilfã, b na n wa tõogd n dɩkda a Zeezi togs-n-taar kɛpɩ, hal n wa lebg neb sẽn zems zãnga. (Zã 13:15-17; Efɛ. 4:23) Daar fãa, b keelmã na n tara paasgo, tɩ b yel-manesmã me lebgd sõma n paasdẽ. Ad vɩɩmã na n sɩd yɩɩ noog wakat kãnga!—Zoob 33:25. w20.08 17 s. 11-12

D segd n ninga d yamẽ tɩ kiris-neb kẽer yãka yam n pa na n kẽ kãadem ye. Kẽer nongẽ lame n kẽ kãadem, la b nan pa paam ned sẽn zems ne-b ye. Sãnda yaa b pagã bɩ b sɩdã n maan kaalem. Sẽn yaa a soab fãa, tigingã ned tõe n soka a tẽed-n-taag bõe yĩng t’a pa kẽ kãadem, wall a bao n sõng-a t’a paam ned bɩ? D sã n bao n na n sõng d saam-biig bɩ d saam-bi-poak t’a yaool n pa kos-do, a manesem tõe n yɩɩ wãna? (1 Tɩm. 5:13) D sã n nand d tẽed-n-taas nins sẽn pa kẽ kãadmã, b sẽn tar zʋg-sõma yĩng la pa b sẽn pa kẽ kãadmã yĩnga, noom-b lame. D pẽg-b b wẽn-sakrã yĩnga, la d ra tagsd tɩ b yaa nimbãan-neb ye. D sã n maand woto, b pa na n toll n tags tɩ d yet-b lame tɩ: “Mam pa rat fo sõngr ye.” (1 Kor. 12:21) B na n bãngame tɩ d sɩd nand-b lame, la d getẽ tɩ b tara b zĩig tigingã pʋga. w20.08 29 s. 10, 14

Kaoosg poore, a Zeezi vẽnega a meng ne tʋm-tʋmd a Polle. (1 Kor. 15:8) A Poll (a Soll) ra wa n dɩka sor n dabd Damaase, n wa wʋm a Zeezi koɛɛga, la a yã a sẽn vʋʋg n be saasẽ. (Tʋʋ. 9:3-5) A Poll sẽn yã bũmb ningã me yaa kaset t’a Zeezi vʋʋgrã pa belgr ye. (Tʋʋ. 26:12-15) A Poll sẽn maan kaset ne bũmb ningã tõe n linga neb kẽere, bala wakat n zĩnd t’a ra namsd kiris-nebã wʋsgo. A Poll sẽn wa n kɩs sɩd t’a Zeezi sɩd vʋʋgame wã, a maana a sẽn tõe fãa n na n sõng neb a taabã tɩ b bãng rẽ. A sẽn wa n sõngd nebã sẽn na n yɩl tɩ b bãng t’a Zeezi ra kiime la t’a vʋʋgame wã, a reega pãbre, a kẽe bãens roogo, batayo me n sãam t’a ra be a pʋgẽ. (1 Kor. 15:9-11; 2 Kor. 11:23-27) A Poll ra kɩsa sɩd t’a Zeezi vʋʋgame, hal n da sak n na n ki rẽ yĩnga. Woto fãa pa kaset sẽn tõe n kɩt tɩ yãmb me kɩs sɩd t’a Zeezi vʋʋgame sɩda? Pa kɩtd me tɩ y maneg n tẽ tɩ sẽn ki-bã na n vʋʋgame sɩda? w20.12 3 s. a 8-10

D sok d meng yaa: ‘Rẽ yĩnga, mam kẽnda tigissã wakat fãa bɩ?’ D sã n kẽnd tigissã, d paamda pãng n ket maand a Zeova raabã, la d paamdẽ tɩ d saam-biisã kengd d raoodo. (Mat. 11:28) D le tõe n soka d meng yaa: ‘Rẽ yĩnga, mam karemda Biiblã wakat fãa bɩ?’ Yãmb sã n vɩɩ ne y zakã rãmba, yãmb yãka wakat zak pʋgẽ Biibl zãmsgã yĩng bɩ? Pa rẽ bɩ y sã n vɩɩ y ye, yãmb yãka wakat n zãmsd Biiblã n pa vaandẽ bɩ? Sẽn paase, y maanda y sẽn tõe fãa n moond koɛɛgã la y zãmsd nebã Biiblã bɩ? Bõe yĩng tɩ d segd n sok d meng sogs-kãensã? Biiblã yetame t’a Zeova feesda d tagsa wã la d sũyã. Dẽnd tõnd me segd n maana woto. (1 Kib. 28:9) D sã n yã tɩ d segd n toeema d magb kẽere, d yel-manesem, wall d tagsa, d segd n kosa a Zeova t’a sõng-d tɩ d tõog n toeeme. Yaa masã meng la d segd n segl d mens sõma, makr ning sẽn watã yĩnga. w20.09 19 s. 19-20

A Zeezi rɩka makr n wilg ned sẽn segd n maane, a sã n dat n lebg yẽ karen-biiga. A goma ned sẽn dat n me gasg yelle, la rĩm sẽn dat n kẽng zabr yelle. A Zeezi yeelame tɩ sẽn dat n me-a roogã segd n ‘deng n zĩnd n geelga ligd ning a sẽn segd n yiis’ tɩ sek roogã meebã, la tɩ rĩmã me segd n ‘deng n zĩnd n yẽsa ne a sagendbã,’ n bãng a tãb-biisã sã n na n tõoga zabrã. (Luk 14:27-32) Woto me, a Zeezi ra miime tɩ ned sã n dat n lebg a karen-biiga, a segd n deng n tagsa rẽ sẽn baood t’a maan bũmb ningã zug neere. Woto yĩnga, d segd n sagla d Biibl karen-biisã tɩ b sak tɩ d zãms-b Biiblã semen fãa. Yãmb sẽn yaa karen-saambã, y segd n segenda y meng sõma zãmsg fãa yĩnga.. Tags-y y karen-biigã yelle, la y ges y sẽn tõe n zãms-a rẽ nana-nana to-to t’a wʋm la a sak n tũ.—Nee. 8:8; Yel. 15:28. w20.10 7 s. a 5; 8 s. a 7

A Zeezi sẽn kõ noy ninsã yaa vẽenese. D segd n zãmsa nebã bũmb nins a sẽn yeelã. La bũmb sẽn tar yõod wʋsg la d pa segd n yĩmi. A Zeezi pa yeel tɩ: ‘Zãms-y bãmb bũmb nins fãa mam sẽn yeel yãmbã ye.’ Ad a sẽn yeelã: Zãms-y bãmb “tɩ b sak bũmb nins fãa mam sẽn yeel yãmbã.” Sẽn na yɩl n tũ no-kãngã sẽn yaa takɩ wã, d sã n wa zãmsd ned Biiblã, d pa segd bal n togsd-a a sẽn tog n maanã ye. D wilg-a a sẽn tog n maan rẽ to-to me. (Tʋʋ. 8:31) D sã n wa zãmsd nebã Biiblã, d wilgd-b-la Wẽnnaam sẽn dat tɩ d maan bũmb ningã. La d segd n maana sẽn yɩɩd rẽ. D segd n sõnga d Biibl karen-biisã tɩ b tũ b sẽn zãmsd bũmb ninsã b daar fãa vɩɩmã pʋgẽ. (Zã 14:15; 1 Zã 2:3) Ne tõnd mengã mak-sõngã, d tõe n wilga d karen-biisã b sẽn tõe n tũ Biiblã saglsã to-to lekollẽ wã, tʋʋmã zĩigẽ, wall pemsem-kokr sasa. D tõe n togs-b-la bũmb sẽn maan d vɩɩmã pʋgẽ, n sõng-b tɩ b bãng Biiblã saglsã tũub sẽn kogl-d to-to, bɩ rẽ sẽn sõng-d to-to tɩ d bãng n yãk yam. D sã n wa be ne d Biibl karen-biisã, d tõe n pʋʋsa a Zeova n kos t’a vʋʋsem sõngã wilg-b sore.—Zã 16:13. w20.11 2-3 s. a 3-5

A Zeezi karen-biisã paama zu-loeese. Wala makre, b ra pa tar Gʋls-sõamyã sɛb wʋsg ye. B leb n da pa tar sɛb sẽn bilgd Biiblã goam võor wa tõnd sẽn tar rũndã-rũndã wã ye. Sẽn paase, karen-biisã ra segd n moona neb sẽn gomd buud-goam toɛy-toɛya. Baa ne zu-loe-kãensã fãa, karen-bi-kãensã sẽn da tar yẽesmã tʋma tʋʋm-kãngã sẽn da wõnd pa tol n tõe wã. Bala sẽn zems yʋʋm 30 pʋgẽ bal tɩ b moona koe-noogã “dũniyã gill zugu.” (Kol. 1:6, 23) Rũndã-rũndã, a Zeova ket n wilgda a nin-buiidã sore, la a kõt-b pãng tɩ b maand a raabã. Sẽn yɩɩd fãa, a wilgda a nin-buiidã sor ne Biiblã a vʋʋsem sõngã sẽn vẽneg tɩ b gʋlsã maasem. Biiblã pʋgẽ, b gomda a Zeezi koe-moonegã yelle, la noor ning a sẽn kõ a karen-biisã tɩ b kell n tʋm tʋʋmd ning a sẽn sɩngã. (Mat. 28:19, 20) A Zeova pa tũusd neb ye. A pĩnd n togsame tɩ b na n moona koe-noogã “neb sẽn yit buud toɛy-toɛy pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.” (Vẽn. 14:6, 7) Dẽnd a ratame tɩ ned buud fãa wʋm Rĩungã koɛɛgã. w20.10 21 s. a 6-8

Rĩm a Davɩɩd ra “nonga Sẽn-Ka-Saab tõogã.” (Yɩɩn. 1:1-3) A ra miime t’a Zeova fãagda sik-m-mens rãmbã, la t’a kisa wuk-m-mens rãmbã. Woto kɩtame t’a sak tɩ Wẽnnaam Gomdã rems a tagsa wã. A yeelame: “Mam pʋʋsda Sẽn-Ka-Saab sẽn yaa m sagendã barka. Baa yʋngo, mam sũ-bãngrã keoogda maam.” (Yɩɩn. 16:7) D sã n yaa sik-m-mens rãmba, d na n basame tɩ Wẽnnaam Gomdã rems d tagsa wã, tɩ ra wa kɩt tɩ d maan sẽn pa segd ye. Wẽnnaam Gomdã na n yɩɩ wa koɛɛg sẽn yet tõnd yaa: “Ad sorã, tũ-y-yã-a.” D sã n wa bʋdg n na n kẽng goabg bɩ rɩtgo, a na n keoog-d lame. (Eza. 30:21) D sã n kelgd a Zeova, na n naf-d-la hal wʋsgo. (Eza. 48:17) Wala makre, pa na n le yɩ tɩlɛ tɩ ned rems tõnd tɩ yãnd yõk-d zaalem ye. Sẽn paase, tõnd ne a Zeova zoodã na n maneg n paama pãnga, bala d na n yãa vẽeneg t’a yaa wa ba sẽn nong a kamba.—Ebre. 12:7. w20.11 20 s. a 6-7

Tõe tɩ Korẽnt kiris-neb kẽer ra tagsdame tɩ kũum vʋʋgr kae ye. (1 Kor. 15:12) Tõe me tɩ kẽer ra tagsdame tɩ kũum vʋʋgrã yaa makre, la pa sɩdem-sɩdem ye. Ne bãmba, ned sã n maand yel-wẽna, yaa wa a sẽn “ki,” la a sã n wa lebg kiris-neda, yaa wa a “vʋʋgame.” Sẽn yaa a soab fãa, b sẽn da yet tɩ kũum vʋʋgr kae wã, wilgdame tɩ b tẽebã yaa zaalem. Sã n mikame tɩ Wẽnnaam pa vʋʋg a Zeezi, dẽnd d pa tõe n paam d yel-wẽnã sugri, bala a Zeezi pa ki n dol tõnd yel-wẽnã ye. Dẽnd neb nins sẽn da pa tẽed kũum vʋʋgrã pa tar saagr tɩ manegr n wat ye. (1 Kor. 15:13-19; Ebre. 9:12, 14) Tʋm-tʋmd a Poll ra mii vẽeneg tɩ “Kirist vʋʋgame n yi kũ-rãmb sʋka.” Kirist vʋʋgrã ra yaa kãseng n yɩɩd vʋʋgr nins fãa sẽn deng rẽ wã, bala sẽn da vʋʋg-bã lebg n kiime. A Poll yeelame t’a Zeezi “n yɩ pipi n vʋʋg neb nins sẽn ki wã sʋka.” Rat n yeelame tɩ yẽ n yɩ pipi n vʋʋg n lebg malɛka, n leb n yɩ pipi ninsaalbã fãa sʋk n kẽng saasẽ.—1 Kor. 15:20; Tʋʋ. 26:23; 1 Pɩy. 3:18, 22. w20.12 5 s. 11-12

Pipi kiris-nebã wakatẽ, siglgã taoor lʋɩtb sull sẽn da be Zerizalɛmmã naaga taab n tʋm sẽn na yɩl tɩ zũnd-zãnd ra zĩndi, la tɩ laafɩ kell n zĩnd Wẽnnaam nin-buiidã sʋka. (Tʋʋ. 2:42) Wala makre, bãongã kõom yellã sẽn wa n yik yʋʋmd 49 wã, ne vʋʋsem sõngã sõngre, siglgã taoor lʋɩtb sull baoo yellã tɩɩm. Yel-kãngã sã n da kell n welg tigingã nebã, koe-moonegã ra tõe n yalsame. Baa ne tʋm-tʋmdbã ne kãsem-dãmbã sẽn da yaa zʋɩf-rãmbã, b pa bas tɩ zʋɩf-rãmbã rog-n-mikã, wall neb nins sẽn da gãd rẽ dem-demã tõog-b ye. B pʋd n baoo Wẽnnaam Gomdã la a vʋʋsem sõngã sõngre. (Tʋʋ. 15:1, 2, 5-20, 28) Baasa wãn to? A Zeova ninga b yam-yãkrã barka, tɩ kɩt tɩ laafɩ kell n zĩndi, tɩ koe-moonegã kẽng taoore. (Tʋʋ. 15:30, 31; 16:4, 5) Rũndã-rũndã, a Zeova siglgã tʋmda sẽn na yɩl tɩ zũnd-zãnd ra zĩndi, la tɩ laafɩ kell n zĩnd Wẽnnaam nin-buiidã sʋka. w20.10 22-23 s. 11-12

D yʋʋmã, d laafɩ wã, la yɛl a taab tõe n kɩtame tɩ b pa tõe n kõ-d tʋʋmd ning a Zeova siglgã pʋgẽ ye. Sã n wa yaa woto, d tõe n dɩka yam rĩm a Davɩɩd kibarã pʋgẽ. B sẽn wa n yeel-a tɩ pa yẽ la Wẽnnaam yãk t’a na n me wẽnd-doogã, tɩ yaool n yaa tʋʋmd a sẽn da rat n tʋm ne a sũur fãa wã, a kell n sakame n na n teel ned ning Wẽnnaam sẽn yãk t’a na n me roogã ne a sũur fãa. A Davɩɩd kõo sãnem la wanzuri wʋsg n teel tʋʋmdã. Ad sɩd yaa mak-sõng tɛkẽ! (2 Sãm. 7:12, 13; 1 Kib. 29:3-5) Yĩns ka laafɩ yĩnga, saam-biig a ye sẽn be Fãrens t’a yʋʋr boondẽ t’a Uug ra pa le yaa kãsem-soab ye. A ra pa le tõe meng n tʋm a zakã pʋgẽ tʋʋm-bõones ye. A yeelame: “Sɩngrẽ wã mam sũurã sãama hal wʋsgo, tɩ m da tagsdẽ tɩ m ka võor ye. La m wa n yãame tɩ tara yõod tɩ m sak n deeg tɩ bũmb wʋsg la m sɩd da pa le tõe n maane. Kɩtame tɩ m sũur da noom ne bũmb nins bal m sẽn tõe n maan n ket n tũud a Zeova wã. M yãka yam n pa na n koms raood n bas ye. Wa a Zedeyõ ne a rap kobs-tã wã sẽn da yɛ la b kell n zab zabrã n baasã, ma-me pa na n koms raood n bas ye.”—Bʋ. 8:4. w20.12 25 s. 14-15

Tʋm-tʋmd a Zã evãnzillã pʋgẽ, a sẽn gom nonglmã yellã yɩɩda evãnzill-dãmb a tãabã sẽn ketã sẽn naag taaba. A sẽn gʋls bũmb ninsã wilgdame tɩ kiris-nebã sẽn maand fãa segd n yɩɩ ne nonglem. (1 Zã 4:10, 11) La kaoosame t’a Zã meng yaool n na n bãng rẽ. A Zã sẽn wa n yaa bi-bɩɩga, pa wakat fãa la a wilg t’a nonga a taabã ye. Wala makre, daar a ye, a Zeezi ne a karen-biisã ra togda sor n pasgd Samari n digd Zerizalɛm. Samari tẽn-bil a ye neb n zãgs tɩ b kõn deeg-b sãand ye. A Zã yeelame tɩ b kɩt tɩ bugum yi yĩngr n dɩ tẽn-kãng nebã fãa. (Luk 9:52-56) Daar a to me, a Zã maana bũmb sẽn wilgd t’a ra pa nong tʋm-tʋmdb a taabã ye. Yẽ ne a ma-biig a Zak pirsa b ma wã t’a kos a Zeezi t’a kɩt tɩ b paam naam zĩis a Zeezi sɛɛgẽ Rĩungã pʋgẽ. Tʋm-tʋmdb a taabã sẽn bãng a Zak ne a Zã sẽn maan bũmb ningã, b sũyã yika wʋsgo. (Mat. 20:20, 21, 24) La baa ne a Zã kongrã, a Zeezi kell n wilgame t’a nong-a lame.—Zã 21:7. w21.01 8-9 s. a 3-4

A Zeova sẽn yãkd yam n maand bũmb ninsã yaa neb a taabã nafr yĩnga. Wala makre, a sẽn yãk yam n naan bũmb fãa wã, pa a mengã nafr yĩng ye. Yaa a sẽn dat tɩ ninsaalbã paam sũ-noog b vɩɩmã pʋgẽ wã. Ned ra pa tõe n modg-a, t’a rɩk a Biigã n kõ n dol d yel-wẽnã ye. Yaa ne yamleoog la a maan dẽ. A Zeezi me sẽn da yãkd yam n maand bũmb ninsã yaa neb a taabã nafr yĩng n tɩ yɩɩda. Wala makre, a yãka yam n bas vʋʋsgo, sẽn na yɩl n zãms neb kʋʋngo. (Mark 6:31-34) Zak soab sẽn zãad a zak sõma miime tɩ bũmb a ye sẽn pa nana a sẽn segd n maandẽ, yaa bãngd n yãkd yam a zakã rãmb yĩnga. La a miime t’a pa segd n deem ne rẽ ye. A gũusdame t’a sã n na n yãk yam, bɩ ra tik bʋʋm-faad zugu, bɩ yẽ mengã tagsg zug ye. A pʋd n basdame t’a Zeova wilgd-a a sẽn segd n maane. (Yel. 2:6, 7) Woto, a na n tagsda sẽn na n naf neb a taabã, la pa yẽ mengã ye. (Fili. 2:4) Zak soab sã n modgd n dɩkd a Zeova ne a Zeezi togs-n-taare, a na n yɩɩ zak soab sẽn zãad a zak sõma. w21.02 7 s. 19-21

Rĩm a Aaza sẽn wa n yaa bi-bɩɩga, a ra yaa sik-m-meng la raood soaba. Wala makre, a sẽn wa n ledg a ba a Abiza n na n dɩ naamã, a kɩtame tɩ b menes bõn-naandsã pʋʋsg soolmã pʋgẽ. Sẽn paase, a yeela “Zʋʋda nebã tɩ b bao Sẽn-Ka-Saab sẽn yaa bãmb yaab-rãmba Wẽnnaamã, la b sak bãmb tõodã ne b noyã.” (2 Kib. 13:23-14:6) Etiopi rao a Zeera sẽn wa ne sodaas milyõ a yembr n na n zab ne Zida wã, a Aaza talla yam n bao a Zeova sõngre. A yeelame: “Sõng-y-do Sẽn-Ka-Saab sẽn yaa tõnd Wẽnnaam! Bala, tõnd teega yãmba.” A Aaza gom-kãensã sẽn tar pãngã wilgda vẽeneg t’a ra kɩsa sɩd t’a Zeova na n fãaga yẽ ne a nin-buiidã. A sɩd teega a saasẽ Ba wã, tɩ kɩt tɩ b “tõog Kuus nebã,” rat n yeel tɩ Etiopi nebã. (2 Kib. 14:7-11) Sãmbg kae tɩ y na n sak n deegame tɩ pa yɩ nana baa bilf ne a Aaza, sodaas bãmb milyõ sẽn wa n na n zab ne-a wã ye. A Aaza sẽn teeg a Zeova wã, a tõoga zabrã. w21.03 5 s. 12-13

Biiblã tara kibay sẽn wilgd neb sẽn pa zems zãng sẽn wilg tɩ b nonga taab wʋsgo. Wala makre, a Zonatã ne a Davɩɩd kibarã. Biiblã yetame: “A Zonatã yamã kẽ a Davɩɩde, t’a nong-a wa a menga.” (1 Sãm. 18:1) A Zeova ra yãka a Davɩɩd t’a na n wa ledg a Sayull n lebg rĩma. Rẽ kɩtame t’a Sayull ra tar sũ-kẽk ne a Davɩɩde, n mak n na n kʋ-a. La a Sayull biig a Zonatã pa naag a ba wã n bao n na n kʋ a Davɩɩd ye. A Zonatã ne a Davɩɩd pʋlma taab n na n kell n yɩ zo-rãmba, la b teend taab wakat fãa. (1 Sãm. 20:42) Nonglem ning sẽn da be a Zonatã ne a Davɩɩd sʋkã ra yaa nonglem hakɩɩka. Bala d sã n tags n gese, bũmb wʋsg n da tõe n kɩt tɩ b pa yɩ zo-rãmb ye. Wala makre, a Zonatã ra yɩɩda a Davɩɩd ne yʋʋm 30. A Zonatã ra tõe n yeelame t’a toog kae ne a Davɩɩde, tɩ bala a yʋʋm pa kolg yẽ, a minim me pa ta yẽ ye. Baa ne rẽ, a Zonatã pa ges a Davɩɩd wa ned sẽn ka võor ye. w21.01 21-22 s. a 6-7

A Zeezi yeela a karen-biisã tɩ b na n paama sũ-noog hakɩɩka. La a pĩnd n togsa neb nins sẽn nong yẽ wã tɩ b na n paama zu-loees me. (Mat. 10:22, 23; Luk 6:20-23) D sẽn yaa Kiristã karen-biisã, d sũy yaa noogo. La d tagsg yaa wãna, d zakã neb wall goosneemã sã n wa namsd tõnd d tũudmã yĩnga, pa rẽ bɩ d karen-bi-taas wall d tʋmd-n-taas sã n wa pẽdgd tõnd n dat tɩ d maan sẽn yaa wẽngã? D sã n tags woto fãa yelle, tõe n kɩtame tɩ d maand yɩɩre. Neb wʋsg pa tagsd tɩ b sã n wa paamd namsg b tũudmã yĩnga, seka b na maan sũ-noog ye. La Wẽnnaam Gomdã yaool n yeta tõnd vẽeneg tɩ yell a woto buud pʋgẽ, bɩ d maan sũ-noogo. Wala makre, karen-biig a Zak yeelame tɩ sã n wa yaa woto, d pa segd n maan yɩɩr tɩ loog ye. D pʋd n segd n kɩdma sũ-noogo. (Zak 1:2, 12) A Zeezi me yeelame tɩ d maan sũ-noogo, baa b sã n wa namsd tõnd d tũudmã yĩnga. (Mat. 5:11) A Zeova kɩtame t’a Zak gʋls lɛtr n tool kiris-nebã, n kõ-b sagls takɩ, n na n sõng-b tɩ b kell n maan sũ-noogo, baa ne b sẽn da maood ne zu-loeesã. w21.02 26 s. a 1-2; 27 s. a 5

A Tɩmote tẽed-n-taas kẽer pa wilg tɩ b nanda b sẽn paam n yaa Wẽnnaam tʋmd-n-taasã ye. Wala makre, a Demas, a Fizɛll, a Ɛrmozɛn, a Imene ne a Alɛgsãndr la a Filɛt. (1 Tɩm. 1:19, 20; 2 Tɩm. 1:15; 2:16-18; 4:10) Wõnda nin-kãensã tẽebã ra tara pãnga, la b wa n pa le get tɩ bũmb nins b sẽn bãngã tara yõod wʋsg ye. Bõe la a Sʋɩtãan maand sẽn na yɩl tɩ d bas bõn-sõmã nins a Zeova sẽn kõ tõndã? D gom a sɩlem kẽer yelle. A tũnugda ne reemã, pemsmã kokr la kibayã b sẽn yelgd ne televiziõ wã la ne ẽntɛrnetã maasmã, n kɩtdẽ tɩ d sẽn nong bũmb ninsã, d sẽn tagsd bũmb nins yellã, la d yel-manesmã kɩt tɩ d wa pa le nong a Zeova, bɩ n tũud a noyã ye. A leb n tũnugda ne d taabã sẽn mi n pẽdgd tõnd n dat tɩ d kɩɩs a Zeova wã, bɩ namsgã, sẽn na yɩl tɩ d bas koɛɛgã moonego. A leb n belgda tõndo, n dat tɩ d kelg sɩdã-kɩɩsdbã “bãng-feedã,” tɩ kɩt tɩ d bas a Zeova tũubu. D sã n pa maand gũusgu, bilf-bilfã d tõe n wa basa a Zeova tũubu.—1 Tɩm. 6: 21. w20.09 27 s. a 6-8

Y zoa wall y zakã ned n maan bũmb tɩ sãam y sũur bɩ? Sã n yaa woto, y sã n lebg n ges rĩm a Davɩɩd biig a Absalom kibarã, na n sõng-y lame. A Absalom zãmba a ba wã, n bao n na n deeg a naamã. (2 Sãm. 15:5-14, 31; 18:6-14) Ning-y kibarã y yamẽ, la y togs a Zeova b sẽn maan-y bũmb ningã sẽn namsd-y to-to. (Yɩɩn. 6:7-9) Rẽ poore, mams-y y yamẽ n ges a Davɩɩd sũur sẽn saam to-to yel-kãensã fãa sẽn paam-a wã. A ra nonga a Absalom, la a ra kɩsa a Ahitofɛll me sɩda. Baa ne rẽ, b yiibã fãa zãmb-a lame. B sãama a sũur hal wʋsgo, la b bao meng n na n kʋ-a. A Davɩɩd ra tõeeme n pa le kɩs a zo-rãmb a taabã sɩda, n tagsdẽ tɩ bãmb me teenda a Absalom. A ra tõeeme n tags a meng yell bala, n zoe n yi tẽngã yẽ a yembre. A ra tõe n komsa raood n base. La a pa maan bõn-kãensã baa a yembr ye. A pʋd n pʋʋsa a Zeova n kos sõngre. A kosa a zo-rãmbã me sõngre. A yɩɩ tao-tao n na n tũ bũmb ning a sẽn yãk yam n na n maanã. La baa ne a Davɩɩd sũur sẽn da sãam wʋsgã, a pa lebg sũ-to-neda, n pa le kɩs ned baa a ye sɩd ye. A kell n teega a Zeova la a zo-rãmbã me. w21.03 15 s. a 7-8; 17 s. a 10-11