Yʋʋm-sare

Wakat ninga, tõe n yaa toog tɩ d wʋm bũmb Biiblã sẽn yet võor sõma. Bɩ a Zeova tõeeme n pa leok d pʋʋsgã wa d sẽn da tẽed to-to wã ye. Woto tõe n kɩtame tɩ d maand sãmbse. D sã n pa bao d sãmbsã tɩɩm, tõe n kɩtame tɩ d tẽebã pãng booge, hal n wa sãam d zoodã ne a Zeova. (Zak 1:7, 8) Tõeeme meng n kɩt tɩ d wa pa le tẽed tɩ manegr n wat ye. Tʋm-tʋmd a Poll rɩka a sẽn saagd n na n wa paam bũmb ningã n mak ne baare. (Ebre. 6:19) Baar ning yell b sẽn gomd ka wã, yaa kut sẽn zɩs wʋsg b sẽn sogd sɛn bɩ wĩir noorẽ, tɩ be batayo pʋgẽ. Sob-kãseng sã n wa yik mogrã zugu, b lobgd-a-la koomã tẽngre, t’a kɩt tɩ sobgã pa tõe n peng batayo wã n tɩ fão kug-bedr sẽn be koomã pʋgẽ ye. La yaa sɛnnã sẽn sog batayo wã sã n pa kao la baarã tar yõodo. Wa tẽng-n-piisim sẽn tõe n sãam baar sɛnnã, sãmbsã me tõe n booga d tẽebã pãnga. Namsg sasa, ned sẽn maand sãmbs tõeeme n wa pa le tẽed t’a Zeova na n pidsa a pʋlemsã ye. D sã n pa le tar tẽebo, d pa na n le tẽed manegr me ye. Ned a woto pa tõe n paam sũ-noog baa bilf ye. w21.02 30 s. 14-15

A Abrahaam ne a zakã rãmb sẽn wa n yit Uurã t’a tog n da yɩɩda yʋʋm 70. (Sɩng. 11:31–12:4) A vɩɩmda fu-rotẽ na maan yʋʋm koabga, n da gilgd Kanaã soolmã pʋgẽ. A Abrahaam sẽn wa n na n maan kaalmã t’a tara yʋʋm 175. (Sɩng. 25:7) A Zeova ra pʋlma a Abrahaam t’a na n kɩtame t’a yagensã soog tẽng ning a sẽn gilg n gesã, la a pa paam n yã pʋlengã pidsg la a ki ye. A leb n pa paam n yã galʋ-tẽngã sẽn lugli, rat n yeel tɩ Wẽnnaam Rĩungã ye. Baa ne rẽ, b yeelame t’a Abrahaam ‘vɩɩmdame n kaoose, la a paama sũ-noogo.’ (Sɩng. 25:8) Baa ne a Abrahaam sẽn mao ne zu-loees wʋsgã, a kell n talla tẽeb sẽn yaa kãn-kãe, la a ra gũud a Zeova pʋlemsã pidsg ne sũ-noogo. Bõe n sõng-a t’a tõog toogo? Bala, a vɩɩmã tõre, a Zeova kogl-a lame, la a ges-a wa a zoa (Sɩng. 15:1; Eza. 41:8; Zak 2:22, 23) Wa a Abrahaam, tõnd me gũuda galʋ-tẽngã sẽn tar yẽbgr meng-mengã. (Ebre. 11:10) La tõnd yẽ pa gũud a meeb ye. Bala Wẽnnaam Rĩungã lugla saasẽ yʋʋmd 1914, hal n zoe n dig a bɛɛbã fãa n yiis be. (Vẽn. 12:7-10) D gũudame masã t’a wa soog tẽngã gilli. w20.08 4-5 s. 11-12

Yɩl n tõog n kelg d taabã neere, rẽnda d tall sik-m-menga, la sũ-mare. Bʋʋm waoog sẽn kɩt tɩ d segd n modg n maand woto. Ad a tãabo: Pipi, na n sõng-d lame tɩ d ra yɩt tao-tao n kaood d taabã bʋʋd ye. Yiibu, na n kɩtame tɩ d wʋmd d tẽed-n-taasã tagsa la b manesem kẽer võore, tɩ sõng-d tɩ d maneg n kʋmd-ba. La tãabo, d sã n kelg d tẽed-n-taag neere, tõe n sõng-a lame t’a bãng bũmb kẽer a mengã zugu. Wakat ninga, yell tõe n namsd-d lame, la yaa d sã n wa gom ne ned la d yaoond n bãng d yellã vɩʋʋgo. D tẽed-n-taas kẽer nengẽ, b sẽn wub-b to-to wã, b minundã, la yɛl a taab kɩtame tɩ yaa toog tɩ b gom ne neda, n togs-a yell sẽn namsd-b to-to. Tõe n kaoosame tɩ d tẽed-n-taag yaool n wa bas a yam n gom ne-do, la yaa a sã n maan woto la d na n tõog n bãng sẽn sɩd be a sũurẽ. D sã n dɩk a Zeova togs-n-taar n tall sũ-mare, d tẽed-n-taasã na n basda b yam n togsd tõnd sẽn be b sũurẽ. La b sã n wa pelg b pʋg n na n gom ne-do, d segd n kelg-b-la neere. w20.04 15-16 s. a 6-7

Zĩmã nong n bee zĩig ning koomã sẽn yaa sõma ne-bã, la zĩig ning b sẽn tõe n paam dɩɩb sõma. Zĩm-yõgd tõe n yika wakat ning fãa a sẽn dat bal n tɩ yõg zĩm bɩ? Sẽn na n yɩl n bãng tɩ zĩmã yõgb tara wakate, daar a ye, saam-biig sẽn be ko-sʋk tẽng n bool misioneer t’a wa tɩ b tɩ yõg zĩma. Misioneerã yeel-a lame yaa: “D seg taab beoog yibeoog wakat a wɛ.” Tɩ saam-biigã leok-a yaa: “Fo pa wʋmd yɛlã võor ye. D segd n kẽnga wakat ning sẽn zems ne zĩmã, la pa wakat ning sẽn zems ne tõndã ye.” Woto me, a Zeezi wakatẽ wã, karen-biisã sẽn wa n lebg koe-moondb n yõgd neb wa b sẽn yõgd zĩmã to-to wã, b ra kẽnda nebã sẽn beẽ, la wakat ning b sẽn na n mik-ba. Wala makre, a Zeezi karen-biisã ra moonda wẽnd-doogẽ wã, zʋɩf-rãmbã karen-dotẽ, zak-zaka, la raasẽ. (Tʋʋ. 5:42; 17:17; 18:4) Tõnd me segd n bao n bãnga wakat ning d koe-moonegã zĩisẽ nebã sẽn be b zagsẽ, wall zĩis nins d sẽn tõe n paam-bã. D segd n toeemda zĩis nins d sẽn moondã, la wakat ning d sẽn moondã me, sẽn na yɩl n paam neb wʋsgo.—1 Kor. 9:19-23. w20.09 4 s. a 8-9

Bũmb a ye tõnd sẽn tõe n maan n paam a Zeezi zoodo yaa tõnd sẽn na n sak n tũ yɛlã sẽn sigl to-to tigingã pʋgẽ wã. A Zeezi sẽn yaa tigingã taoor soabã yãka neb tɩ b get d yelle. D sã n sakd n tũud nin-kãensã sẽn yetã, tõnd ne yẽ zoodã pãng paasdame. (Efɛ. 4:16) Wala makre, rasma noorã, d modgdame n na n ges tɩ tigimsã tõogd n dɩt Rĩungã rot yõod sõma. Rẽ n so tɩ b rɩk tigims kẽer n fãoog taaba. Woto kɩtame tɩ siglgã tõog n kẽgs ligd wʋsgo. Yɩɩ tɩlɛ ne d tẽed-n-taas sãnda tɩ b toeem bũmb kẽere, n tõog n sak toeengã. Tõe tɩ b maana yʋʋm wʋsg b pĩnd tigingã pʋgẽ, hal n da tar zood sõma ne b tẽed-n-taas nins sẽn be be wã. La masã, b kos-b lame tɩ b toeem tiginga. Yaa vẽeneg t’a Zeezi sũur noomame, a sẽn ne nin-kãensã sẽn maand sɩd ne-a, n sakd toeengã. w20.04 24 s. 14

Rɩtg rĩmã ne goabg rĩmã ket n wagsda taaba, tɩ b ned kam fãa rat n soog dũniyã. Wala makre, dũni gill zabr a yiib-n-soabã poore, rɩtg rĩmã sẽn yaa Iniyõ Sovietikã ne a poorẽ dãmbã wa n tara pãng Erop tẽns wʋsg zutu. Rẽ kɩtame tɩ goabg rĩmã maan sodaar kaool b sẽn boond tɩ Otã (OTAN) ne tẽns wʋsgo. Rɩtg rĩmã ne goabg rĩmã ket n yiisda ligd wʋsg n wagsd taab zab-teedã baoob wɛɛngẽ. Rɩtg rĩmã ne goabg rĩmã zaba taab ne sɩlem, tɩ ned fãa ra teend tẽns nins sẽn yaa a to wã bɛɛbã. Yaa tẽns sẽn be Afiriki, Aazi la Ameriklatin. Yʋʋmã noorã, Risi ne a poorẽ dãmbã paama pãng wʋsg dũniyã gill zugu. B leb n tũnugda ne ordinatɛɛr-dãmb n zabd ne goabg rĩmã. Rĩm-kãens ninga taab taale, tɩ ned fãa yetẽ t’a to wã tũnugda ne ordinatɛɛr-dãmbã la ẽntɛrnetã n sãamd a to paoong la a naam. La rɩtg rĩmã ket n zabda ne Wẽnnaam nin-buiidã, wa a Dãniyɛll sẽn da pĩnd n togsã.—Dãn. 11:41. w20.05 13 s. a 5-6

“Pag tõe n yĩma biig ning a sẽn yẽsemdã yell sɩda?” No-rɛɛs a Ezayi wakatẽ wã la a Zeova ra sok woto. A wẽneg n leokame yaa: “Baa yẽnda sã n tõe n yĩm a yelle, mam kõn tol n yĩm fo yell ye.” (Eza. 49:15) A Zeova pa wae n makd a meng ne biig ma ye. La so-kãnga wã, a maana woto. A rɩka makr ne nonglem la yĩn-sidg ning sẽn be biig ne a ma sʋkã, n na n sõng a nin-buiidã tɩ b bãng yẽ sẽn nong-b to-to wã. Saam-bi-poak yʋʋr sẽn boond t’a Yasmin yeelame: “F sã n yẽgd f biiga, nonglem la yĩn-sidg ning sẽn be foo ne biigã sʋkã wat n lebga bũmb sẽn kaoosd f yõor tɛka.” Ma-rãmbã fãa la bal wʋmda a gomdã võore. Baa yaa ned a ye bal n wa n bas n pa le tigimd ne a tẽed-n-taasã, la a pa le moond koɛɛgã, a Zeova miime. Wʋsg sẽn da bas tigissã kẽnd la koɛɛgã mooneg wat n le sɩnga tigissã waoongo, tɩ d reeg-b ne sũ-noogo! A Zeova ratame tɩ b lebg n wa a nengẽ. Tõnd me raab yaa woto.—1 Pɩy. 2:25. w20.06 18 s. a 1-3

Pa paoong fãa la d tõe n yã ne nif ye. Togs sɩdã, nif pa tõe n yã bõn-sõma nins sẽn tar yõod n yɩɩdã ye. A Zeezi sẽn wa n sõsd ne nebã tãngã zugã, a wilgame tɩ saasẽ paoongã yõod yɩɩda tẽng zug ka paoongã hal zĩig sẽn zãre. Rẽ poore, a paasame: “Fo paoongã sẽn be zĩig ninga, yaa be la fo sũurã me na n zĩndi.” (Mat. 6:19-21) D sã n nand bũmb wʋsgo, d sũurã na n kɩtame tɩ d bao-a. D sã n baood yʋ-noog Wẽnnaam nifẽ, rẽ la d ‘bĩngd d paoongã saasẽ.’ A Zeezi wilgame tɩ paoong a woto pa tol n tõe sãame, ned pa tõe n zu-a me. Tʋm-tʋmd a Poll sagl-d lame tɩ d ket n “get . . . bũmb nins nin sẽn pa ne wã.” (2 Kor. 4:17, 18.) Bõn-sõma nins d sẽn na n paam Wẽnnaam dũni-paalgã pʋgẽ wã naaga bũmb nins nin sẽn pa ne wã. D wilg tɩ d sũur nooma ne bõn-sõma kãens nin sẽn pa ne wã. w20.05 26 s. a 1-2

A Moyiiz sẽn zãms Israyɛll nebã bũmb ningã paasa b tẽebã pãng la keng b raoodo, wa sa-koom sẽn manegd tɩɩs to-to wã. Wãn to la tõnd me tõe n maan tɩ d sẽn zãmsd nebã to-to wã naf-b woto? D sã n wa moond koɛɛgã zak-zak wall zãma sʋka, d tõe n talla Biiblã n wilg nebã Wẽnnaam yʋ-peellã sẽn yaa Zeova wã. D tõe n kãab-b-la sɛba, la d wilg-b video-rãmb la bũmb a taab sẽn be tõnd sɩtã pʋgẽ, n gomd a Zeova yelle. D tʋʋmã zĩigẽ bɩ lekollẽ wã, wall d sã n wa togd sore, d tõe n paama segb n gom d Wẽnnaamã d sẽn nongã yelle, n wilg a sẽn sɩd yaa a soaba. D tõe n wilg-b-la bõn-sõmã nins a Zeova sẽn na n maan n kõ ãdem-biisã. Rẽ tõe n sõng-b lame tɩ b bãng t’a Zeova sɩd nonga ninsaalbã wʋsgo. D sã n sõngd nebã tɩ b bãngd sɩdã d Ba wã zugu, kɩtdame t’a yʋʋrã paamd waoogr n paasdẽ. D sõngda nebã tɩ b bãng tɩ b zãms-b-la ziri wʋsg Wẽnnaam zugu. Bũmb pa be d sẽn tõe zãms nebã tɩ naf-ba, la keng b raood n ta bũmb nins sẽn be Biiblã pʋgẽ wã ye.—Eza. 65:13, 14. w20.06 10 s. a 8-9

D sã n wa segd n sõng ned sẽn dat n lebg n wa a Zeova nengẽ, zʋg-sõma bʋs la d tog n bɩɩse? D tõe n dɩka yam a Zeezi yel-bũnd a ye pʋgẽ. A goma bi-ribl sẽn yi n bas a ba zak yelle. D ges yam ning d sẽn tõe n dɩk yel-bũndã pʋgẽ. (Luk 15:17-24) Biigã wa n baas n teka yam, n lebg n wa a ba wã zakẽ. A sẽn wa n watẽ wã, a ba wã wudgame n seg-a, n mobg-a, tɩ wilg t’a nong-a lame. Biigã sũur-kasetã ra ningd-a-la taale, t’a tagsdẽ tɩ pa zems tɩ b le bool yẽ tɩ raoã bi-ribl ye. Biigã sẽn pelg a pʋg n togs sẽn be a sũurẽ wã, a ba wã kʋma a nimbãanega. Rẽ poore, ba wã maana bũmb takɩ n na n sõng biigã t’a bãng t’a ket n yaa a biig a sẽn nonge. Sẽn na yɩl n wilg rẽ vẽenega, ba wã kɩtame tɩ b maan kibs biigã sẽn tek yamã yĩnga, la a kɩt tɩ b yelg-a fu-neere. A Zeova yaa wa biigã ba wã. A nonga d tẽed-n-taas nins sẽn bas-a wã, n dat tɩ b lebg n wa a nengẽ. Tõnd sã n dɩk a Zeova togs-n-taare, d tõe n sõng-b lame tɩ b lebg n wa a nengẽ. La rẽnda d tall sũ-mare, la d kʋm b nimbãanega, la d tall nonglem. w20.06 25-26 s. a 8-9

A Zeezi yeelame tɩ neb kẽer na n saka sɩdã “ne sũ-noogo,” la tɩ b sã n wa paam makre, b tẽebã na n komsame. (Mat. 13:3-6, 20, 21) Tõe tɩ b pa bãng tɩ sẽn tũud-b a Zeezi wã na n paama zu-loees ye. (Mat. 16:24) Tõe me tɩ b tẽedame tɩ f sã n yaa kiris-neda, f pa na n tol n paam zu-loeese, la tɩ f na n paama bark woo bark bala. La dũni-kãngã sẽn yaa wẽngã pʋgẽ, zu-loees pa tõe n pa zĩnd ye. D yɛlã tõe n wa toeemame, tɩ d sũ-noogã booge. (Yɩɩn. 6:7; Koɛ. 9:11) D tẽed-n-taasã fãa la bal wilgdame tɩ b kɩsa sɩd tɩ b bee sɩdã pʋgẽ. Bõe yĩng tɩ d yet woto? Bala, baa yaa b tẽed-n-taag n beeg-ba, wall a maana sẽn pa segde, b pa basd tɩ rẽ koms b tẽebã ye. (Yɩɩn. 119:165) Baa makr pʋgẽ, b tẽebã pa komsd ye. A pãngã pʋd n paasdame. (Zak 1:2-4) Yãmb me tog n modgame n paam tẽeb sẽn tar pãng woto. w20.07 8 s. a 1; 9 s. a 4-5

Nand tɩ y sɩng Biiblã karengo, pʋʋs-y-yã a Zeova t’a sõng-y tɩ y bãng y sẽn tõe n tũ bũmb ning y sẽn na n karmã to-to. Wala makre, y sã n data saglg sẽn na n yɩl n tõog n mao ne zu-loɛɛg ninga, bɩ y kos a Zeova t’a sõng-y tɩ y paam sagls a Gomdã pʋgẽ, tɩ sõng-y tɩ y bãng y sẽn na n maanega. (Fili. 4:6, 7) A Zeova naana ninsaal t’a tõe n mams bũmb toor-toor a yamẽ. Y sã n dat tɩ Biiblã kibar yɩ vẽeneg y yamẽ, bɩ y mams yɛlã sẽn yɩ to-to wã, la y ning y meng ned ning yell b sẽn gomdã zĩigẽ. Mams-y y yamẽ n yã bũmb nins a soabã sẽn yã wã. La a sẽn tall manesem ning yellã taoorã, bɩ yãmb me modg n tall manesem kãnga. Rẽ poor bɩ y bʋgse. Bʋgsg rat n yeelame tɩ f tags f sẽn karmã zug neere, la f ges f sẽn tõe n tũ rẽ to-to f vɩɩmã pʋgẽ. Kɩtdame tɩ f bãng tagsa wã sẽn yekd taab to-to, tɩ sõng-f tɩ f wʋm f sẽn karemdã võor sõma. D sã n karem Biiblã n pa bʋgse, yaa wa d sẽn na n tar zẽ-biisi, n pa naag-b taab n dʋg ye. Bʋgsgã yaa wa d sẽn na n naag zẽ-biisã fãa taab n dʋge, sẽn na yɩl n bãng a noosmã. w21.03 15 s. a 3-5

A Poll ra tõe n tẽega pĩndã yelle, n tags t’a sã n da pa lebg kiris-ned sẽn tar yẽesem, woto t’a pa be bãens roogẽ ye. A ra tõe n yika a sũur ne Aazi soolmã rap nins sẽn da raag-a n basã, wall a pa le kɩs a zo-rãmbã baa a ye sɩd ye. La a Poll pa maan bõn-kãensã baa a ye. Baa ne a Poll sẽn da mi tɩ b na n kʋ-a lame wã, a pa yĩm bũmb ning sẽn tar yõod n yɩɩdã ye: Yaa a Zeova yʋʋrã sẽn na n paam waoogrã. A ra ket n tagsda a sẽn tõe n maan n keng neb a taabã raoodo. A teega a Zeova, n da pʋʋsd-a wakat fãa. A pa tags a zo-rãmb nins sẽn daag-a n basã yell wʋsg ye. A wilgame t’a sũur nooma ne a zo-rãmb nins sẽn kell n teel-a la b maan bũmb toor-toor n sõng-a tɩ wilg tɩ b nong-a lame wã. Sẽn paase, a Poll ra ket n zãmsda Wẽnnaam Gomdã. (2 Tɩm. 3:16, 17; 4:13) Sẽn yɩɩd fãa, a ra kɩsa sɩd zãng t’a Zeova ne a Zeezi nong-a lame. B pa tol n daag-a n bas ye. A ra mii vẽeneg tɩ b na n keo-a lame, a sẽn kell n maan sɩd ne-bã yĩnga. w21.03 18 s. 17-18

Yʋʋmd 100 soabã poore, kiris-neb ne yʋʋrã sõor wa n yɩɩda kiris-neb hakɩɩkã. Nin-kãens ra zãmsda nebã yɛl sẽn pa sɩd Wẽnnaam zugu, la b ra solgd sɩdã sẽn be Wẽnnaam Gomdã pʋgẽ wã. Wakat kãng n tãag yʋʋmd 1870 wã, Wẽnnaam da pa tar neb sull sẽn sigl tẽng zug ye. Kiris-neb ne yʋʋrã b sẽn mak ne nadensã piuugame n pid zĩig fãa, tɩ lebg toog tɩ b bãng kiris-neb hakɩɩkã n welge. (Mat. 13:36-43) Bõe yĩng tɩ rẽ bãngr tar yõodo? Wilgdame tɩ Dãniyɛll 11 wã sẽn gomd rɩtg rĩmã la goabg rĩmã pa rĩm-dãmb sẽn dɩ naam sẽn sɩng yʋʋmd 100 soabã poor n tãag yʋʋmd 1870 tɛkã ye. Wẽnnaam ra pa tar neb sull sẽn sigl tẽng zug b sẽn tõe n nams ye. Baasgo, d tõe n yeelame tɩ rɩtg rĩmã la goabg rĩmã ra na n wa lebg n puka yʋʋmd 1870 wã poor bilfu. Wãn to la d mi rẽ? w20.05 3 s. a 5

A Zowɛll pĩnd n togsame tɩ sʋy n na n sũ taab n wa Israyɛlle, tɩ b yẽnã ne b yɛyã yaa wa gɩgmã rẽnda, la tɩ b na n wãba tɩɩsã la moodã fãa sẽn be tẽngã pʋgẽ wã. (Zow. 1:4) Na maan yʋʋm wʋsgo, d wilgame tɩ bãngr-gom-kãngã bilgda a Zeova nin-buiidã sẽn moond koɛɛgã ne yẽesem to-to wã, n yaa wa sʋy sẽn sũ taab tɩ bũmb pa tõe n gɩdg-b ye. D ra tagsdame tɩ ne koɛɛgã mooneg maasem, b sãamda “tẽngã,” rat n yeel tɩ neb nins sẽn sakd tũudmã taoor dãmbã. La d sã n yaool n karem bãngr-gomdã gill n tags a zug sõma, d bãngdame tɩ d segd n toeema d sẽn wʋmd a võorã to-to wã. Ges-y a Zeova sẽn yeel t’a na n maana sʋyã sẽn sũ taabã bũmb ningã. A yeelame: ‘Mam na n diga yãmb nug-rɩtg bɛɛbã [sʋyã] tɩ b zãag ne-yã.’ (Zow. 2:20) Sã n mikame tɩ sʋyã sɩd makda a Zeova Kaset rãmbã sẽn sakd a Zeezi noorã n moond koɛɛgã, la b sõngd nebã tɩ b lebgd a karen-biisã, bõe yĩng t’a Zeova na n yeel t’a na n dig-b lame n zãage? (Eze. 33:7-9; Mat. 28:19, 20) Dẽnd a Zeova sẽn na n dig a soab n zãagã pa a nin-buiidã sẽn sakd-a wã ye. Yaa bũmb bɩ ned sẽn dat n maan a nin-buiidã wẽnga. w20.04 3 s. a 3-5

D sã n wa tagsdẽ t’a Zeova pa leok d pʋʋsg zĩig pʋgẽ, d manesem segd n yɩɩ wãna? A Zak yeelame tɩ d segd n ‘kell n kosa Wẽnnaam’ n da bas ye. A Zeova sũur pa na n sãam ne-do, d sã n ket n kot-a t’a kõ-d yam ye. A pa n ning-d taal me ye. D sã n pʋʋs d saasẽ Ba wã n kos-a t’a kõ-d yam tɩ d tõog n mao ne d zu-loeesã, a na n kõ-d-la “ne yamleoogo.” (Yɩɩn. 25:12, 13) A nee d namsgã, n kʋmd tõndo, la a rat n sõng-d ne a sũur fãa. Hakɩɩka, rẽ yaa bʋʋm sẽn sek d na maan sũ-noogo. La wãn to la a Zeova kõt tõnd yam? Yaa ne a Gomdã maasem. (Yel. 2:6) Sẽn na yɩl n paam yam-kãngã, d segd n zãmsda Wẽnnaam Gomdã, la sɛb nins sẽn tik Biiblã zug siglgã sẽn yiisdã. La d pa segd n zãmsd Biiblã n na n paam bãngr bal ye. D segd n tũu sagls nins Wẽnnaam Gomdã sẽn kõtã me. A Zak yeelame: “Bɩ y yɩ Wẽnnaam gomdã sakdba, la y ra yɩ a kɛlgdb bal ye.” (Zak 1:22) D sã n tũud Wẽnnaam Gomdã saglse, d na n maneg n yɩɩ neb sẽn baood laafɩ, sẽn maand bũmb fãa ne yam, la sẽn pid ne nimbãan-zoeere. (Zak 3:17) Zʋg-sõma kãensã sõngda tõnd tɩ d tõog n mao ne zu-loɛɛg buud fãa, tɩ d sũ-noogã me pa sa ye. w21.02 29 s. 10-11

Biibl karen-biig na n bɩɩ tao-tao n wa tõog n deeg lisgu, a sã n paam tigingã neb a taabã sõngre. Koe-moond fãa tõe n sõngame tɩ tigingã neb sõor paase. So-pakd a ye yeelame: “B yetame tɩ tẽng tõr n wubd biiga, la yaa woto me ne d sẽn sõngd nebã sẽn na n yɩl tɩ b lebg a Zeezi karen-biisã. Yaa tiging tõr n sõngd ned t’a wa sɩdã pʋgẽ.” Yɩlẽ tɩ biig wa bɩ n lebg kãsma, tũuda ne a zakã rãmba, a zo-rãmbã la a karen-saam-dãmbã sõngre. Yaa b sã n kengd biigã raoodo, n zãmsd-a bũmb wʋsg sẽn tar yõod la b na n sõng-a ta wa tõog n bɩ. Woto me, koe-moondbã tõe n sagenda Biibl karen-biisã, n kengd-b raood la b kõt-b mak-sõngo, tɩ sõng-b tɩ b wa tõog n deeg lisgu. (Yel. 15:22) Bõe yĩng tɩ koe-moond sẽn zãmsd ned Biiblã segd n maan sũ-noogo, neb a taabã sã n sõngd a Biibl karen-biigã? Bala yaa toog ne nin-yend t’a tõog n sõng a Biibl karen-biig t’a tẽebã bɩ. w21.03 8 s. a 1-3

Kiris-nebã fãa, kom-bɩɩsã la kãsembã segd n modgame n da maan wa b tũuda a Zeova n yaool n solgd n maand wẽng ye. Tʋm-tʋmd a Zã wilgame tɩ d pa tõe n kẽnd sɩdã pʋgẽ, la d tʋmd raglem tʋʋm ye. (1 Zã 1:6) D sã n dat n ta Wẽnnaam yam wakat fãa, d pa segd n yĩm t’a nee tõnd sẽn maandã fãa ye. Baa nebã sã n pa ne tõnd sẽn maandã, baa fʋɩ pa solg a Zeova nifẽ ye. (Ebre. 4:13) D segd n zãaga d meng ne dũniyã rãmb sẽn tagsd to-to yel-wẽnã wɛɛngẽ wã. A Zã wakatẽ wã, sɩdã kɩɩsdb ra yetame tɩ ned tõe n yãka yam n maand yel-wẽnde, la a kell n tall zood ne Wẽnnaam. Rũndã-rũndã, nebã me tagsda woto. Neb wʋsg yetame tɩ b tẽeda Wẽnnaam, la b yaool n pa sakd a sẽn yet bũmb ning yel-wẽnã wɛɛngẽ wã, sẽn tɩ yɩɩd fãa pag ne rao lagengã wɛɛngẽ wã ye. A Zeova sẽn yet tɩ yel-manesem ning yaa yel-wẽndã, bãmb yetame tɩ rẽ bee ne ned fãa, tɩ yaa ned kam fãa yam-yãkre. w20.07 22 s. a 7-8

Yãmb me gomd n sõngda y saam-bi-pogsã bɩ? D rɩk makre. Saam-bi-poak n tar sɩd sẽn pa tũud a Zeova ye. Pagã nong n wata tigissã retaare. La sẽn sa ne a sẽn looge. Koe-moondb a taabã gũus n gesame t’a pa nong n wat ne a kambã ye. B sokda b meng bõe yĩng t’a pa na n modg n kos a sɩdã t’a sak t’a wat tigissã ne kambã, tɩ rẽ kɩt tɩ b ningd-a taale. La b sẽn pa mi wã yaa tɩ pagã yaool n maanda a sẽn tõe fãa. A pa tar sor n maand a sẽn date, a leb n pa tar noor kambã zug ye. Yãmb sã n wʋm tɩ neb wɩt saam-bi-poak a woto buudu, bõe la y tõe n maane? Y sã n gom n pẽg saam-bi-poakã, la y togs nebã a sẽn maand bũmb nins tɩ sek pẽgrã, tõe n kɩtame tɩ b pa le wɩd-a ye. Kãsem-dãmbã me modgd n sõngda saam-bi-pogsã. B miime t’a Zeova rata woto. (Zak 1:27) B rɩkda a Zeezi togs-n-taar n yaa wʋmdba, n pa dem-dem ye. (Mat. 15:22-28) Woto, b sõngda saam-bi-pogsã tɩ b bãng t’a Zeova sɩd nong-b lame. w20.09 24-25 s. 17-19

No-rɛɛs a Dãniyɛll kell n yɩɩ sik-m-meng soaba, la a ra baood wakat fãa t’a Zeova wilg-a sore. A Zeova sẽn wa n tũnug ne a Dãniyɛll n vẽneg a Nebukadnezaar a zãmsdã võorã, a pa wẽ a yãoog n yeel tɩ yaa ne a meng tõog ye. A pʋd n sika a meng n wilg tɩ yaa a Zeova n vẽneg-a t’a bãnge, la tɩ yaa yẽ n tog ne pẽgrã. (Dãn. 2:26-28) Woto wilgda tõnd bõe? D tẽed-n-taas sã n nong n pẽgd tõnd d sẽn wɛgsd sõssã to-to wã yĩnga, wall d sã n paamdame tɩ d koe-moonegã womd biisi, d segd n tẽegame tɩ yaa a Zeova la d tog n pẽg rẽ yĩnga. D segd n sika d meng n sak n deeg tɩ sã n pa ne a Zeova sõngre, d pa tõe n maan bõn-kãens ye. (Fili. 4:13) D sã n maand woto, d rɩkda a Zeezi togs-n-taare. A Zeezi kell n teega a Zeova. (Zã 5:19, 30) A zɩ n bao n na n deeg naam a Ba wã nengẽ ne pãng ye. Filip rãmb 2:6 yeelame t’a Zeezi “pa bao n na n deeg Wẽnnaam zĩiga, n yetẽ tɩ b zema Wẽnnaam ye.” A Zeezi sẽn yaa sakdã, a ra miime tɩ pa bũmb fãa la a tar sor n na n maane, a leb n da sakda a Ba wã naamã. w20.08 11 s. 12-13

Neb kẽer sẽn tũud vɩɩmã sore maooda ne yɛl neb a taabã sẽn pa mi. Y sã n maooda ne zu-loees sẽn kɩt tɩ y pa le tõe n tʋm a Zeova tʋʋmã wa pĩndã, tɩ y yaool getẽ tɩ nebã pa wʋmd y yɛlã võore, a Mefibosɛt kibarã tõe n kenga y raoodo. (2 Sãm. 4:4) A ra yaa koamsa, tɩ rĩm a Davɩɩd me tall tagsg sẽn pa zems a zugu. Baa ne rẽ, a pa lebg sũ-to-ned ye. A pʋd n da maanda sũ-noog ne bõn-sõma nins sẽn maan a vɩɩmã pʋgẽ wã. A wilgame t’a sũur nooma ne bõn-sõma nins a Davɩɩd sẽn maan n kõ-a wã. (2 Sãm. 9:6-10) Dẽnd a Davɩɩd sẽn wa n kao a Mefibosɛt bʋʋd kɛgrã, a Mefibosɛt pa yik a sũur ye. A pa bas t’a Davɩɩd kongrã kɩt t’a lebg sũ-to-ned ye. A pa ning a Zeova taal me rẽnda yĩng ye. A Mefibosɛt sẽn da rat bal yaa a maan a sẽn tõe fãa n teel rĩm ning a Zeova sẽn yãkã. (2 Sãm. 16:1-4; 19:24-30) A Zeova kɩtame tɩ b gʋls a Mefibosɛt kibarã Biiblã pʋgẽ tɩ d tõe n dɩk yam.—Rom. 15:4. w20.04 26 s. a 3; 30 s. 18-19

B tõe n yãka kẽer tɩ b yaa misioneer dãmba, zall so-pakdb bɩ wakat fãa so-pakdb tigingã pʋgẽ. B rɩkda b sẽkã fãa n moond koɛɛgã, n sõngd neb wʋsg tɩ b lebgd a Zeezi karen-biisi. Baa ne nin-kãensã sẽn yaa so-pakdb sẽn pa tar arzɛgsã, a Zeova ning-b-la bark wʋsg b vɩɩmã pʋgẽ. (Mark 10:29, 30) D nonga saam-bi-kãensã wʋsgo, tɩ d sũy me yaa noog b sẽn be tigingã pʋgẽ wã! Yaa saam-biis nins b sẽn yãk n bobl tʋʋma, la so-pakdbã bal n tar b zĩig tigingã pʋgẽ bɩ? Ayo! Koe-moond fãa tara yõod Wẽnnaam nifẽ, la tigingã pʋgẽ. (Rom. 10:15; 1 Kor. 3:6-8) Sɩd me, tigingã bõn-daab me yaa a sõng nebã tɩ b lebg tõnd Zusoab a Zeezi karen-biisi. (Mat. 28:19, 20; 1 Tɩm. 2:4) Tigingã nebã fãa, rat n yeel tɩ sẽn deeg-b lisg la koe-moondb nins sẽn nan pa reeg lisgã modgdame n lʋɩɩsd tʋʋm-kãngã taoor b vɩɩmã pʋgẽ.—Mat. 24:14. w20.08 21 s. a 7-8

Wa rũndã daar vɛrse wã sẽn wilgdã, d sã n wa segd zu-loeese, a Zeezi na n sõng-d lame. A goamã tõe n kenga tõnd raoodo. Bõe yĩng tɩ d yet woto? Bala daar ninga, yɛlã sɩd pa nana ne-d ye. Wala makre, ned d sẽn nong sã n maan kaalem, d sũ-sãamsã pa sat tao-tao ye. Tõe n kaoosa yʋʋma. Neb kẽer me maooda ne kʋʋlmã sẽn wat ne zu-loees ninsã. Daar ning me, sãnda sũy sãamda wʋsgo, b sẽn bẽed depresɩyõ, rat n yeel tɩ sũ-sãang bãagã yĩnga. Baa ne zu-loe-kãensã fãa, d paamda pãng n ket n tõogd toogo, bala d miime t’a Zeezi bee ne tõnd “daar fãa,” baa ray nins d sũy sẽn mi n sãam wʋsgã. (Mat. 11:28-30) Wẽnnaam Gomdã sɩd sõngda tõnd tɩ d bãng t’a Zeova teenda tõnd ne malɛgsã maasem. (Ebre. 1:7, 14) Wala makre, malɛgsã sõngda tõndo, d sã n wa moond ‘Rĩungã koe-noogã’ “neb sẽn yit buud toɛy-toɛy pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.”—Mat. 24:13, 14; Vẽn. 14:6. w20.11 13-14 s. a 6-7

D ratame tɩ d Biibl karen-biigã bãng tɩ d sẽn zãmsd-a bũmb ningã yita Biiblã pʋgẽ. (1 Tes. 2:13) D na n maana wãn t’a bãng rẽ? Yeel-y karen-biigã t’a gom bũmb ning a sẽn zãmsdã yell ne yãmba. Ra bilgd-y-yã-a Biiblã vɛrse-rãmbã võor wakat fãa ye. Mi n kos-y-yã-a t’a bilg yãmb vɛrse kẽer võore. Sõng-y-yã-a t’a bãng yẽ mengã sẽn tõe n tũ Biiblã saglsã to-to. A sã n karem vɛrse, bɩ y sok-a sogsg sẽn na n kɩt t’a togs a sẽn tagsd bũmb ning vɛrse wã zugu. (Luk 10:25-28) Wala makre, y tõe n sok-a lame yaa: “Vɛrse-kãnga sõnga foo tɩ f bãng bõe a Zeova zugu?” “Wãn to la fo sẽn bãng bũmb ningã tõe n sõng foo?” “Fo tagsg yaa wãn ne f sẽn bãng bũmb ningã?” Sẽn tar yõod n yɩɩdã pa karen-biigã sẽn na n bãng bũmb wʋsg ye. Yaa a sẽn na n nong a sẽn zãmsd bũmb ningã, la a tũudẽ. Tikd-y zãmsgã Biiblã zug sõma. Y sã n dat tɩ y zãmsgã minim paase, y segd n talla sik-m-menga. w20.10 15 s. a 5-6

D tõe n kɩsa sɩd tɩ wakat ning a Zeova sẽn yãk tɩ koe-moonegã na n yalsã pa na n vaal ye. Tẽeg-y bũmb ning sẽn maan a Nowe wakatẽ wã. A Zeova wilgame t’a maanda bũmb fãa tɩ zemsd a wakat kɛpɩ. A Zeova pĩnd n togsa sa-kãsengã niib raare, tɩ ra ket yʋʋm 120 tɩ daar-n-kãng ta. A sẽn yãk daarã, yʋʋm wʋsg poore, a yeela a Nowe t’a ka koom koglgo. A Nowe kell n tʋma ne yẽesem yʋʋm 40 bɩ 50, tɩ saagã yaool n na n ni. Baa ne nebã sẽn da pa kelgd-a wã, a kell n mooname n keoog-ba, hal n tãag a Zeova sẽn wa n yeel tɩ wakat taame t’a segd n kẽ koglgã pʋgẽ wã. Rẽ poore, a Zeova “paga koom koglgã” tɩ zems a wakat kɛpɩ. (Sɩng. 6:3; 7:1, 2, 16) Ka la bilfu, a Zeova na n kɩtame tɩ d bas koɛɛgã moonego. Rẽ poore, a na n sãama a Sʋɩtãan dũniyã, la a kɩt tɩ tɩrlem zĩnd dũni-paalgã a sẽn na n luglã pʋgẽ. La nand tɩ wakat-kãng ta, bɩ d rɩk a Nowe la neb a taabã sẽn pa bas b nus tɩ yɩ zaalmã togs-n-taare. Bɩ d kell n wɩng ne koɛɛgã moonego, n tall sũ-mare, la d kell n tẽ a Zeova la a pʋlemsã pidsgu. w20.09 13 s. 18-19

Zu-sobend sã n da kaẽ, a Zeova zakã ra na n yɩɩ zũnd-zãnde, tɩ sũ-noog me kae ye. Wala makre, ned ra ka na n bãng ãnd n segd n lugl noy la a lʋɩ taoor n kɩt tɩ b tũ no-kãens ye. Zu-sobendã Wẽnnaam sẽn luglã sã n yaa bõn-sõngo, bõe yĩng tɩ rũndã-rũndã, pagb wʋsg getẽ tɩ b sɩdbã weoogd-ba? Bala rap wʋsg pa tũud noy nins a Zeova sẽn gãneg zak pʋgẽ vɩɩmã wɛɛngẽ wã ye. B pʋd n yãka yam n na n tũud b buudã minung bɩ a rog-n-miki. Sẽn paase, b leb n wõrda b pagbã sẽn na yɩl n pids bãmb mensã tʋlsem. Wala makre, rao tõe n wõrda a paga, a sẽn dat t’a waoogd-a, bɩ a sẽn dat tɩ neb a taabã tags t’a yaa rao meng-mengã. A tõe n tagsame tɩ yaa sɩd t’a pa tõe n modg a pagã t’a nong-a, la t’a yaool n tõe n kɩtame t’a zoe-a. A sã n paam tɩ pagã zoet-a, a tõe n tũnuga ne rẽ n tar-a n lengdẽ. Tagsa la yel-manesem a woto pa waoogd pagbã wa sẽn segdã ye. Leb n kɩɩsda a Zeova sẽn datã vẽenega.—Efɛ. 5:25, 28. w21.02 3 s. a 6-7

Kiris-neb nins sẽn maand yɩɩrã tõe n paamame tɩ b yam gãande, b sã n pʋʋs a Zeova ne b sũy fãa n kos sõngre. A Zeova na n leoka b pʋʋsgã, n kõ-b a “laafɩ wã sẽn yɩɩd bũmb nins fãa ninsaalbã sẽn tõe n wʋm a võorã.” (Fili. 4:6, 7) A Zeova tõe n sõnga tõnd ne a vʋʋsem sõngã maasem tɩ d yɩɩrã booge. (Gal. 5:22) Y sã n wa pʋʋsd a Zeova, bɩ y pelg y pʋg n gom ne-a. Togs-y-yã-a y zu-loɛɛgã takɩ, la y wilg-a y tagsg yellã wɛɛngẽ. Y sã n wa pa tar y sẽn na n maan n welg y zu-loɛɛga, bɩ y kos a Zeova t’a sõng-y tɩ y ra maan yɩɩr tɩ loog ye. Y pʋʋsgã sã n yaa takɩ, y na n wa tõog n yãa a Zeova sẽn leok-y to-to vẽenega. Y sã n pa paam y pʋʋsg leoor tao-tao, bɩ y ra koms raood n bas ye. A Zeova pa rat bal tɩ y pʋʋsgã yɩ takɩ ye. A ratame me tɩ y ket n pʋʋsd-a n da bas ye.—Luk 11:8-10. w21.01 3 s. a 6-7

Rũndã-rũndã, neb sẽn kẽ kãadem la zags rãmb bee d tigimsã pʋsẽ. D tẽed-n-taas wʋsg me n be tigimsã pʋsẽ, n pa kẽ kãadem ye. D manesem segd n yɩɩ wãn ne sẽn pa kẽ-b kãadmã? D ges a Zeezi manesem sẽn yɩ to-to ne nin-kãensã. A Zeezi sẽn wa n moond koɛɛgã, a ra pa kẽ kãadem ye. A kell n yɩɩ rakõore, n kẽes a sẽkã fãa koɛɛgã mooneg pʋgẽ. A Zeezi zɩ n yeel tɩ yaa tɩlɛ tɩ kiris-ned kẽ kãadem wall a ra kẽ ye. La a yeelame tɩ kiris-neb kẽer na n yãka yam n pa na n kẽ kãadem ye. A Zeezi ra nanda sẽn pa kẽ-b kãadmã. A ra pa get nin-kãensã wa neb sẽn pa ta sẽn kẽ-b kãadmã, wall neb bũmb sẽn paoog ye. Wa a Zeezi, tʋm-tʋmd a Poll me sẽn wa n moond koɛɛgã, a ra pa kẽ kãadem ye. A Poll zɩ n yeel tɩ kiris-ned sã n kẽ kãadem yaa wẽng ye. A ra miime tɩ yaa ned kam fãa ne a yam-yãkre. w20.08 28 s. a 7-8

Tʋm-tʋmd a Zã vɩɩmd n kaoosame, la a paam me n tʋm tʋʋm wʋsgo. A maoo ne yɛl buud toor-toor sẽn da tõe n koms a tẽebã. Baa ne rẽ, a kell n maana a sẽn tõe fãa n tũ noy nins a Zeezi sẽn kõ wã, wala makre, a sẽn yeel tɩ d nong d tẽed-n-taasã. Woto kɩtame t’a Zã ra kɩs sɩd t’a Zeova ne a Zeezi nong-a lame, la tɩ b na n kõ-a-la pãng t’a tõog n mao ne zu-loɛɛg buud fãa. (Zã 14:15-17; 15:10) A Sʋɩtãan ne a dũniyã pa tõog n kɩt t’a Zã pa wa nong a tẽed-n-taasã, la a wilg rẽ ne a no-goam la a tʋʋm-tʋmdɩ ye.Wa a Zã, tõnd me vɩɩ dũni sẽn be a Sʋɩtãan sẽn kis nebã nugẽ. (1 Zã 3:1, 10) Yaa sɩd t’a ratame tɩ d ra le nong d tẽed-n-taasã ye. La a pa tõe rẽ, sã n pa tõnd n kõ-a sor ye. Bɩ d yãk yam n na n kell n nong d saam-biisã la d saam-bi-pogsã, la d wilg rẽ ne d no-goam, la d tʋʋm-tʋmdɩ. Woto, d sũur na n yɩɩ noog wʋsgo, d sẽn paam n naag a Zeova nin-buiidã sẽn yaa wa zak a ye nebã, tɩ d vɩɩmã me tall barka.—1 Zã 4:7. w21.01 13 s. 18-19

Dũni-kãngã sẽn be a Sʋɩtãan nugẽ wã kɩtame tɩ vɩɩmã yaa toogo, hal tɩ wakat ninga pa nana baa-baa. (2 Tɩm. 3:1) La d pa segd n yɛɛsdẽ, bɩ n maand yɩɩr ye. A Zeova mii yɛl nins sẽn namsd tõndã. A pʋlmame tɩ d sã n wa rat sõngre, a na n tebenda tõnd ne a nug-rɩtg sẽn tõogdã. (Eza. 41:10, 13) D sã n kɩs sɩd zãng-zãng t’a Zeova na n teela tõndo, d na n paama pãng Gʋls-sõamyã maasem yĩnga, n tõog n mao ne zu-loɛɛg buud fãa. D video-rãmbã, ne Biiblã kibay b sẽn karmã, n paas d sõss nins sẽn yit t’a gom-zugã yaa: ‘Tall-y b tẽebã buudã’ tõe n sõng-y lame tɩ Biiblã kibay yɩ vẽeneg y yamẽ. Nand tɩ y ges bɩ y kelg wall y karem kiba-kãensã, kos-y-yã a Zeova t’a sõng-y tɩ y yã sagls kibarã pʋgẽ y sẽn tõe n tũ. Ning-y y meng ned ning yell b sẽn gomd kibarã pʋgẽ wã zĩigẽ. Bʋgs-y wẽn-sakdb kãens sẽn maan bũmb ningã zug neere, la a Zeova sẽn sõng-b to-to tɩ b tõog n mao ne b zu-loeesã. Rẽ poor bɩ y tũ bũmb ning y sẽn bãngã. Pʋʋs-y-yã a Zeova bark a sẽn sõngd yãmbã, la y bao y sẽn tõe n maan to-to n keng y taabã raood la y sõng-ba, n wilg a Zeova tɩ y sũur nooma ne a sẽn sõngd yãmbã. w21.03 19 s. 22-23

Yãmb sã n kẽe kãadem, n magd n na n dog kamba, bɩ y sok y meng yaa: ‘D yaa sik-m-mens rãmba, neb sẽn nong a Zeova, hal t’a na n sak n yãk-d tɩ d ges bi-pɛɛlg yell sɩda?’ (Yɩɩn. 127:4) Yãmb sã n zoe n yaa roagda, bɩ y sok y meng yaa: ‘Mam sõngda m kambã tɩ b bãng tɩ b segd n tʋmda wʋsg bɩ?’ (Koɛ. 3:12, 13) ‘Mam maanda m sẽn tõe fãa n kogend m kambã ne bõn-wẽns nins sẽn be a Sʋɩtãan dũniyã pʋgẽ wã bɩ?’ (Yel. 22:3) Y pa tõe n kogl y kambã ne vɩɩmã yɛlã fãa ye. La y tõe n sõng-b-la bilf-bilf la ne nonglem, tɩ b wa tõe n bao sagls Wẽnnaam Gomdã pʋgẽ n tõog n mao ne vɩɩmã yɛla. (Yel. 2:1-6) Wala makre, y zakã ned sã n wa yãk yam n bas a Zeova tũubu, bɩ y sõng y kambã tɩ b bãng bũmb ning sẽn kɩt tɩ tar yõod wʋsg tɩ d kell n maan sɩd ne a Zeova wã, sã n yaa ne Biiblã. (Yɩɩn. 31:24) Pa rẽ bɩ ned b sẽn nong sã n maan kaalem, bɩ y wilg-b Biiblã vɛrse-rãmb sẽn tõe n sõng-b tɩ b tõog toogo.—2 Kor. 1:3, 4; 2 Tɩm. 3:16. w20.10 27 s. a 7