Sɩpaolgo

Tõnd sẽn pa mi bũmb fãa a Zonaas zugã, tõe n kɩtame tɩ d ning-a taale, n yeel t’a yɩɩ ned b sẽn pa tõe n teege, la kɩɩsda. A Zeova meng a toor n tʋm-a t’a tɩ taas Niniiv nebã bʋ-kaoor koɛɛga. La a Zonaas zãgsame. A tɩ kẽe batayo sẽn dabd zĩig sẽn zãr ne Niniivi, n na n ‘zãag ne a Zeova.’ (Zon. 1:1-3) Sã n da yaa yãmb n tʋm-a t’a zãgse, y ra na n leb n kõ-a-la tʋʋmd sɩda? Tõe tɩ y pa na n le kõ-a ye. La a Zeova yãa bʋʋm sẽn sek a na le tʋm-a. (Zon. 3:1, 2) A Zonaas pʋʋsgã pʋgẽ, a wilga a sẽn sɩd yaa ned ninga. (Zon. 2:2, 3, 10) Sãmbg kae t’a Zonaas pʋʋsa a Zeova naoor wʋsgo. A pʋʋsg a yembr sõngda tõnd tɩ d bãng t’a ra yaa nin-sõngo. Baa ne a sẽn zãgs tʋʋmdã n zoe wã, a pʋʋsgã wilgdame t’a ra yaa sik-m-meng soaba, sõm-mita, la ned sẽn dat ne a sũur fãa n sak a Zeova. Dẽnd a Zeova bee bʋʋm la a sẽn pa ges a Zonaas manesmã. A leoka a pʋʋsgã, la a bas t’a kell n yɩ a no-rɛɛsa. Woto wilgdame tɩ tara yõod tɩ kãsem-soab fãa “kelg n tɩg” n yaool n sagl neda. w20.04 15 s. a 4-6

Pipi kiris-nebã saka bũmb nins fãa b sẽn zãms-bã, la b teeg vʋʋsem sõngã sõngr n na n wʋm Wẽnnaam Gomdã võor sõma. B maana vaeesgo, n na n ges bũmb nins b sẽn zãms-bã sã n tika Gʋls-sõamyã zugu. (Tʋʋ. 17:11, 12; Ebre. 5:14) B pa tik b tẽebã nonglem ning sẽn da be b sʋkã zug bal ye. Leb n pa bãmb ne b tẽed-n-taasã tũud-n-taarã sẽn da noomã yĩng bal la b ra tũud a Zeova ye. B tẽebã ra tika ‘bãngr’ hakɩɩkã b sẽn paam Wẽnnaam zugã. (Kol. 1:9, 10) Sɩdã sẽn be Wẽnnaam Gomdã pʋgẽ wã pa toeemd ye. (Yɩɩn. 119:160) Wala makre, d tẽed-n-taag sã n beeg-do, bɩ a maana yel-wẽnde, rẽ pa kɩtd tɩ sɩdã toeem ye. D sã n wa paam zu-loeese, sɩdã pa toeemd ye. Rẽnd segdame tɩ d bãng Biiblã sẽn yetã sõma la d kɩs sɩd tɩ yaa sɩda. Tõnd tẽebã sẽn tik Biiblã sẽn yetã zugã na n yɩɩ wa baar sẽn kɩ, n sõng-d tɩ d yals kãn-kãe makr wakate. w20.07 9 s. a 6-7

A Zeezi getame tɩ d sẽn maand bũmb nins n kõt a ba-biisã sẽn paam vʋʋsem sõngã zaeebã, yaa yẽ la d maand n kõtẽ. (Mat. 25:34-40) Sẽn yɩɩd fãa, d sã n kẽesd d meng sõma n sõngd nebã tɩ lebgd a Zeezi karen-biisi, d sõngda sẽn paam-b zaeebã. Yaa tʋʋm-kãng la a Zeezi kõ a karen-biisã. (Mat. 28:19, 20) Yaa ne “piis a taabã” sõngr bal la Kiristã ba-biisã na n tõog n moon koɛɛgã sẽn yaa tʋʋm-kãseng b sẽn tʋmd dũniyã gill zugã. (Zã 10:16) Yãmb sã n naaga piis a taabã, bɩ y bãng tɩ y sã n wa moond koɛɛgã, y pa wilgd bal tɩ y nonga sẽn paam-b zaeebã ye. Y wilgdame me tɩ y nonga a Zeezi. Sẽn paase, d sã n yãkd d ligdã n teend siglgã tʋʋmã, d paamda a Zeova ne a Zeezi zoodo, bala bãmb n get tʋʋm-kãens yelle. (Luk 16:9) Wala makre, d tõe n kõo ligd n teel tʋʋmdã b sẽn tʋmd dũniyã gill zugã, tɩ b tõog tɩ koe-noogã ta zĩ-zãrsẽ, tɩ b tõog n me siglgã rot la b ges b yell sõma, la b tõog me n sõng d tẽed-n-taas nins sabab-wẽns sẽn paamã. D leb n tõe n kõo ligd n sõng ne tõnd mengã tigingã depãens-rãmbã, la d sõngd neb nins sẽn dat sõngrã.—Yel. 19:17. w20.04 24 s. 12-13

Rɩtg rĩmã sẽn pa “tol n waoog a yaab-rãmbã wẽnnaam-dãmbã,” a sɩd pidsa bãngr-gomdã. Wãn to? Iniyõ Sovietik raab sẽn da yaa a sãam tũudmã, a makame n na n gɩdg tũudmã siglsã la b tʋʋmã. Rẽ n so tɩ goosneemã ra zoe n yiis noor yʋʋmd 1918 tɩ b sɩng kambã zãmsg lekoll-dãmbẽ wã tɩ Wẽnd kae ye. Wãn to la rɩtg rĩmã “waoog tẽms nins sẽn gũbg ne lals wẽnnaamã”? Iniyõ Sovietik yiisa ligd wʋsg n na n paas a sodaarã pãnga, la a maan zab-te-bɛd wʋsg n na n paas a soolmã pãnga. Rɩtg rĩmã ne goabg rĩmã fãa wa n tigma zab-te-bɛd sẽn tõe n kʋ neb milyaar-dãmba! Rɩtg rĩmã ne goabg rĩmã naaga taab n maan bõn-kãseng a ye. B lugla ‘sãoong bõn-wẽngã’ sẽn yaa Nasiõzĩni wã.—Dãn. 11:31, Wẽnnaam Sebre, 1983. w20.05 6-7 s. 16-17

Ãnd dãmb n tõe n kẽes b toogo, n bao d tẽed-n-taas nins sẽn bas a Zeova wã? Yaa tõnd ned kam fãa: Kãsem-dãmbã, so-pakdbã, a soabã zak rãmba, la tigingã koe-moondbã fãa. Yãmb tara y zoa wall y roagd sẽn bas a Zeova bɩ? Yãmb moona koɛɛgã zak-zaka, wall zamã zĩigẽ n seg ned sẽn da tũud a Zeova n wa bas bɩ? A soabã sã n sakame n na n kõ y tigingã kãsem-dãmbã a telefõn nimero, y tõe n deeg n tɩ kõ-b lame. Kãsem-soab yʋʋr sẽn boond t’a Toma yeelame: “Pipi, m sokda m tẽed-n-taasã n bãng b sã n mii ned sẽn bas a Zeova, la a soab sẽn be zĩig ning masã. Wakat ning me, m sokda koe-moondbã n gese, ned n da tũud a Zeova n wa base, tɩ b tẽr a yell bɩ? M sã n wa kẽng n na n tɩ kaag d tẽed-n-taag sẽn bas a Zeova, m sokda a kambã la a roagdb a taabã yelle. Neb kẽer sẽn bas a Zeova ra wata tigissã ne b kambã. Tõe meng tɩ b kambã ra lebga koe-moondba. D tõe n sõnga bãmb me tɩ b lebg n wa a Zeova nengẽ.” w20.06 24 s. a 1; 25 s. a 6-7

Tẽng zug bõn-naandsã fãa sʋka, yaa ninsaalbã bal n tõe n tẽeg yɛl sẽn loog yelle, n dɩk yam n bãng n vɩɩmde. Kɩtame tɩ d tõe n bãng n tũ noy sẽn yaa sõma n yɩɩda, la d rems d tagsgã la d vɩɩmã. (1 Kor. 6:9-11; Kol. 3:9, 10) Sɩd me, d tõe n kibla d sũur-kasetã, tɩ sõngd tõnd tɩ d tõogd n bãngd sõma ne wẽng n bakdẽ. (Ebre. 5:14) D tõe n bao n bãnga d sẽn tõe n wilg to-to tɩ d nonga d taabã, la tɩ d kʋmda b nimbãanega. D tõeeme me n bao n dɩk a Zeova togs-n-taar tɩrlmã wɛɛngẽ. Bũmb a ye d sẽn tõe n maan n wilg tɩ d sũur nooma ne d sẽn tar pʋ-tẽerã, yaa d sẽn na n modgd n tẽegd a Zeova sẽn zoe n sõng tõnd la a keng d raood to-to wã. Woto na n kɩtame tɩ d maneg n bas d yam t’a na n sõng-d-la beoog sẽn wat me. (Yɩɩn. 77:13; 78:4, 7) Bũmb a to me d sẽn tõe n maane, yaa d sẽn na n tẽegd bõn-sõma nins neb a taabã sẽn maan n kõ-dã, la d wilgd tɩ d sũur nooma ne rẽ. Bãngdbã mikame tɩ ned sã n yaa sõm-mita, a sũ-noogã manegd n paasame. w20.05 23 s. 12-13

Tags-y n ges-y a Moyiiz manesem sẽn yɩ to-to, a sẽn wa n be tãng bokẽ, n wa ne a Zeova ziirã sẽn pɩʋʋgd a taoorã. Étude perspicace des Écritures sebrã yetame tɩ “nand t’a Zeezi wa tẽng zugu, ninsaal zɩ n yã bũmb sẽn sek waoogr la yɛɛsg wa a Moyiiz sẽn yã wã ye.” A Moyiiz wʋma koɛɛga, la tog n yaa malɛk koɛɛga. Ad koɛɛgã sẽn yeele: “Zeova, Zeova, Wẽnnaam sẽn yaa nimbãan-zoɛta, la sõmblem soaba, sũur sẽn pa yikd tao-tao, la sẽn pid ne maan-neer la sɩda, sẽn wilgd zãmaan tusa a nonglem, la sẽn kõt tudgr ne beegr la yel-wẽnd sugri.” (Yik. 33:17-23; 34:5-7, MN) Tõe t’a Moyiiz sã n da pʋt Wẽnnaam yʋʋrã, a tẽegda a sẽn yã wã. Dẽnd pa lingr la a Moyiiz sẽn wa n yeel Israyɛll nebã sẽn yaa Wẽnnaam nin-buiidã goam nins sẽn be rũndã daar vɛrse wã pʋgẽ wa ye. D sã n tagsd a Zeova yʋʋrã yelle, d segd n bʋgsa a sẽn yaa Wẽnnaam ning buudã zug me. D segd n tagsa a zʋg-sõma wã yelle, wala makre, a pãn-kãsengã, a yamã, a tɩrlmã la a nonglmã. D sã n tagsd a zʋg-sõma kãensã la a taab yelle, na n kɩtame tɩ d maneg n waoogd-a.—Yɩɩn. 77:12-16. w20.06 8-9 s. a 3-4

A Zeezi yeelame tɩ yaa a karen-biisã sẽn na n nong taab la nebã na n bãng tɩ b sɩd yaa a karen-biisi. (Zã 13:34, 35) La d sã n dat tɩ d tẽebã tall pãnga, bũmb a taab n yaa tɩlɛ. Tõnd tẽebã pa segd n tik nonglem ning sẽn be kiris-neb hakɩɩkã sʋkã zug bal ye. Bõe yĩnga? D rɩk makr wa d tẽed-n-taaga, tõe meng tɩ yaa kãsem-soab wall so-pakda, sẽn na n maan yel-wẽn-kãsenga, pa rẽ bɩ tigingã ned sẽn na n beeg yãmba, wall a lebga sɩdã kɩɩsda, n yetẽ tɩ tõnd a Zeova Kaset rãmbã pa be sɩdã pʋgẽ ye. Yɛl a woto sã n wa maane, na n sãama yãmb sũur tɩ y bas a Zeova tũub bɩ? Ad d sẽn tog n gãde: Y tẽebã sã n pa tik yãmb ne a Zeova zoodã zugu, a pa na n tall pãng ye. Y sẽn nong a Zeova ne a nin-buiidã to-to wã tõe n sõng-y lame tɩ y bɩɩs y tẽebã n paase. La yaa tɩlɛ me tɩ y zãms Biiblã neere, n bao n wʋm y sẽn zãmsdã võore, la y maan vaeesg sõma siglgã sɛbã pʋsẽ, hal n wa kɩs sɩd tɩ y sẽn bãngd bũmb nins a Zeova zugã yaa sɩda. Yãmb mengã segd n kɩsa sɩd tɩ Biiblã sẽn yet a Zeova zugã la sɩda.—Rom. 12:2. w20.07 8 s. a 2-3

Kibay wʋsg n be n wilgd tɩ malɛgsã sõngda tõnd koe-moonegã pʋgẽ, sẽn na yɩl tɩ d tõog n yã neb nins sẽn da bas a Zeova, n dat ne b sũur fãa n lebg n wa a nengẽ wã. (Vẽn. 14:6) Wala makre, a Silviyo sẽn be Ekowatɛɛrã ra pʋʋsa ne a sũur fãa, n kos a Zeova t’a tʋm ned t’a wa sõng-a t’a lebg n wa a nengẽ. A sẽn wa n ket n pʋʋsdẽ, a wʋma b sẽn kogs a kʋɩlengã. Yaa kãsem-dãmb a yiib n wa n na n kaag-a. Yɩɩ ne sũ-noog la b sɩng a sõngre. D sã n sõng ka-pãng rãmbã tɩ b lebg n wa a Zeova nengẽ, d paamda sũ-noog wʋsgo. A Salvadoor yaa so-pakd sẽn modgd n sõngd sẽn da bas-b a Zeova wã. Ad a sẽn yeele: “Wakat ninga, m sã n tags sẽn da bas-b a Zeova n lebg n wa a nengẽ wã yelle, m daagda nintãm sũ-noogã yĩnga. M sã n tags t’a Zeova lebg n yiis-b-la a Sʋɩtãan dũniyã pʋgẽ, la tɩ ma-me naagame n sõnge, noom-m-la wʋsgo.” Yãmb sã n basa a Zeova, y tõe n kɩsa sɩd t’a ket n nong-y lame. A Zeova gũuda yãmb lebgre, n na n deeg-y ne sũ-noogo. w20.06 29 s. 16-18

A Zeova sẽn yaa d Karen-saamb sẽn ka to wã, a kɩtame tɩ b gʋls neb kibay a Gomdã pʋgẽ n na n zãms-do. (Eza. 30:21) D sã n bʋgsd Biiblã kibay nins sẽn gomd neb sẽn tall zʋg-sõma wala sik-m-mengã yelle, d rɩkda yam. D sã n leb n bʋgs bũmb ning sẽn paam neb nins sẽn pa tall zʋg-sõma a woto wã zug me, d rɩkda yam. (Yɩɩn. 37:37; 1 Kor. 10:11) Tags-y n ges-y bũmb ning sẽn paam rĩm a Sayullã. Sɩngrẽ wã, a ra yaa bi-bɩɩg sẽn yaa sik-m-meng soaba. A ra pa get t’a sãoo a taabã, a ra pa tẽed t’a zemsa ne naam me ye. (1 Sãm. 9:21; 10:20-22) La tarẽ-n-tarẽ, a wa n lebga wuk-m-meng soaba. A zʋg-wẽngã puka a sẽn lebg rĩmã poor bilfu. Daar a ye, a gũu a Sãmwɛll n wa getẽ t’a kaoosdame, n maan maoong sẽn yõogd bugum, n yaool n da pa tar sor n na n maan rẽ ye. Woto kɩtame t’a Zeova sũur pa le noom ne-a, t’a reeg naamã n bas-a. (1 Sãm. 13:8-14) D sã n dɩk yam kiba-kãngã pʋgẽ, n gũusd n da wa maan bũmb d sẽn pa tar sor n na n maane, wilgdame tɩ d yaa yam soaba. w20.08 10 s. 10-11

Yaa sɩd tɩ ne Kiristã maasem, a Zeova kõo a tigingã “kũun sẽn yaa rapa.” (Efɛ. 4:8) “Kũun sẽn yaa rapã” sʋka, d tõe n sõdga siglgã taoor lʋɩtb sull nebã, siglgã taoor lʋɩtb sullã sõngdbã, filiyall-dãmbã taoor lʋɩtb sull nebã, tigims sull yel-gɛtbã, siglgã lekoll karen-saam-dãmbã, tigingã kãsem-dãmbã, la kãsemb-sõngdbã. Yaa ne vʋʋsem sõngã maasem la b yãk saam-bi-kãensã fãa tɩ b get a Zeova piisã sẽn tar yõod wʋsg a nifẽ wã yelle, la b kengd tigingã neb tẽebo. (1 Pɩy. 5:2, 3) Yaa ne vʋʋsem sõngã maasem la b yãkd saam-biisã tɩ b tʋmd tʋʋm toor-toor siglgã pʋgẽ. Yĩngã wil toor-toor wala nusã la naoã tʋmdame tɩ nafd yĩngã tõre. Woto me, saam-biis nins b sẽn yãk ne vʋʋsem sõngã maasmã tʋmda wʋsg tɩ nafd tigingã gilli. B pa baood ziir ye. B pʋd modgdame n kengd b saam-biisã raood la b tẽebo. (1 Tes. 2:6-8) D pʋʋsda a Zeova barka, nin-kãensã sẽn lʋɩɩsd b taabã raab taoor la b tar minimã yĩnga! w20.08 21 s. a 5-6

D moonda koɛɛgã, bala nebã ‘namsdame la b pa tar ned sẽn get b yelle,’ tɩ rẽ kɩt tɩ b rat ne b sũy fãa n bãng Wẽnnaam Rĩungã. (Mat. 9:36) A Zeova ratame tɩ nebã buud fãa paam bãngr hakɩɩk sɩdã zugu, n wa paam fãagre. (1 Tɩm. 2:4) D sã n tags koɛɛgã mooneg sẽn tõe n fãag nebã to-to wã yelle, kɩtdame tɩ d rat ne d sũy fãa n tʋm tʋʋm-kãnga. (Rom. 10:13-15; 1 Tɩm. 4:16) Sẽn paase, d segd n tara tʋʋm-teed sẽn zems ne d koɛɛgã moonego, la d mi d sẽn tõe n tʋm ne-b to-to. A Zeezi kõo a karen-biisã sagls takɩ. A wilga b sẽn segd n zã bũmb ninga, b sẽn tog n moon zĩig ninga, la b sẽn na n yeel bũmb ninga. (Mat. 10:5-7; Luk 10:1-11) Rũndã-rũndã, a Zeova siglgã kõt-d-la koe-moonegã tʋʋm-teedo, hal tɩ sõngd-d wʋsgo. Sẽn paase, b zãmsda tõnd d sẽn tõe n tʋm ne te-kãensã to-to. Woto sõngda tõnd tɩ d tar bas-m-yam la minim, n tõe n moon koɛɛgã sõma.—2 Tɩm. 2:15. w20.09 4 s. a 6-7, 10

Mams-y n ges-y tʋm-tʋmd a Zã sũ-noogã sẽn yɩ to-to, a sẽn wa n wʋm tɩ neb nins a sẽn da sõng tɩ b bãng sɩdã ra ket n maanda a Zeova raabã ne b sũy fãa wã! B ra tara zu-loees wʋsgo, t’a Zã ra maood n na n keng b tẽebã. A ra get-b-la wa a kamba. Woto me, tõnd kambã, wall neb nins d sẽn sõng tɩ b bãng sɩdã sã n dɩk b mens n kõ a Zeova, n ket n tũud-a, d sũy yaa noogo. (3 Zã 3) Yʋʋmd 98 wã sẽnes la a Zeova vʋʋsem sõngã kɩt t’a Zã gʋls lɛta a tãabo. Lɛta-kãensã yaa sẽn na n sõng kiris-nebã tɩ b tʋll n kell n tall tẽeb ne a Zeezi, la b kell n kẽn sɩdã pʋgẽ. Zirẽ-be-karen-saamb-dãmbã zãmsgã sẽn da rat n sãam tigimsã neb tẽebã ra yaa bũmb sẽn pak a Zã wʋsgo. (1 Zã 2:18, 19, 26) Nin-kãensã sẽn yaa sɩdã kɩɩsdbã ra yetame tɩ b mii Wẽnnaam, la b yaool n da pa sakd a noyã ye. w20.07 20 s. a 1-3

D kɩsa sɩd ne koɛɛg ning d sẽn moondã. Rẽ n so tɩ d rat n maan d sẽn tõe fãa tɩ neb wʋsg wʋm koe-kãnga. D tẽeda pʋlems nins sẽn be Wẽnnaam Gomdã pʋgẽ wã. (Yɩɩn. 119:42; Eza. 40:8) D yãa Biiblã bãngr-goam wʋsg sẽn pidsi. D yãa nebã vɩɩm sẽn lebg sõma to-to, b sã n wa sɩng n tũud Biiblã saglsã. Woto fãa kɩtame tɩ d maneg n kɩs sɩd tɩ Wẽnnaam Rĩungã koe-noogã yaa koɛɛg ned buud fãa sẽn segd n wʋme. Sẽn paase, d tẽeda a Zeova, bala koɛɛgã d sẽn moondã yita a nengẽ. D tẽeda a Zeezi me sẽn yaa soab ning Wẽnnaam sẽn yãk t’a yaa a Rĩungã Rĩmã. Sẽn wa n yaa zu-loɛɛg ning fãa la d segda, a Zeova na n kell n yɩɩ tõnd zĩ-soalgdga, la d pãng zĩiga. (Yɩɩn. 46:2-4) Sẽn paase, d mii vẽeneg t’a Zeezi bee saasẽ, n tũnugd ne pãng la zu-sobend ning a Zeova sẽn kõ-a wã n get koe-moonegã yelle. (Mat. 28:18-20) Tẽebã leb n sõngda tõnd tɩ d kɩs sɩd t’a Zeova na n ninga d modgrã barka. Wakat ning menga, barkã yɩɩgda d sẽn da tẽedã. w20.09 12 s. 15-17

Wakat ninga, saam-bi-pogsã tõe n datame tɩ ned gom n sõng-b yɛl kẽer wɛɛngẽ. (Eza. 1:17) Wala makre, pʋg-kõor wall pag kãadem sẽn kao tõe n data ned sẽn na n gom n sõng-a, t’a paam sor n maand bũmb kẽer a sɩdã sẽn da maande. Saam-bi-poak sẽn kʋʋl tõe n datame tɩ ned sõng-a, t’a tõog n gom ne logtoɛɛmba. Saam-bi-poak me sẽn yaa so-pakda, n leb n tar tʋʋm a taab a Zeova siglgã pʋgẽ tõe n datame tɩ ned gom n sõng-a, sã n mikame tɩ neb a taab n wɩt-a t’a pa wae n yit koe-moonegã wa so-pakdb a taabã ye. D gom a Zeezi mak-sõngã yelle. A Zeezi ra yɩta tao-tao n gomd n sõngd pagb nins sẽn yaa wẽnd-sakdbã, nebã sã n da pa wʋmd b yel-manesem kẽer võore. Wala makre, a Mart sũur sẽn wa n pa yɩ noog ne a Maari wã, a Zeezi gom n sõnga a Maari. (Luk 10:38-42) Daar a to me, a Zeezi gom n sõnga a Maari, neb kẽer sẽn wa n sãbs-a n yeel t’a yam-yãkrã pa yɩ sõma wã. (Mark 14:3-9) A Zeezi wʋma a Maari yel-manesmã võore, hal n pẽg-a. A pʋd n togsa bãngr-gomd rẽ wɛɛngẽ, n yeel “tɩ b sẽn na n moon koe-noogã dũniyã zĩig ning fãa,” b na n goma pʋg-kãngã sẽn maanã yelle. w20.09 24 s. 15-16

Pe-kɩɩm-sõng miime tɩ pesg tõe n wa menemame. Rẽ n so tɩ pesg sã n meneme, pe-kɩɩmã na n gũusame n da maan bũmb sẽn na n nams-a n paas ye. Pĩnd wẽndẽ, neb n da maand a Zeova raabã n wa base, la a sõng-b lame tɩ b le tõog n maan a raabã. D ges a sẽn maan to-to n sõng-bã, la yam ning d sẽn tõe n dɩk rẽ pʋgẽ. A Zeova ra wa n tʋma no-rɛɛs a Zonaase, t’a zãgs tʋʋmdã n zoe. Baa ne rẽ, a Zeova pa yɩ tao-tao n bas-a ye. A sõng-a-la wa pe-kɩɩm-sõng sẽn sõngd a pesg to-to wã. A fãag-a lame, la a kõ-a raood t’a tõog n tɩ maan bũmb ning a sẽn tʋm-a t’a tɩ maanã. (Zon. 2:8; 3:1, 2) A wa n pʋd n tũnuga ne tɩɩg n sõng a Zonaas t’a bãng t’a nanda ned buud fãa yõor hal sõma. (Zon. 4:10, 11) Yam-bʋg la d tõe n dɩk rẽ pʋgẽ? Kãsem-dãmbã pa segd n yɩ yãg-yãg n bas ned sẽn pa le moond koɛɛgã, la a pa le wat tigissã ye. B pʋd n na n bao n bãnga bũmb ning sẽn kɩt t’a lak a meng ne Wẽnnaam nin-buiidã. A soab sã n wa lebg n wa a Zeova nengẽ, kãsem-dãmbã na n ket n wilgd-a lame tɩ b nong-a lame la b nand-a. w20.06 20-21 s. 10-12

Iniyõ Sovietik sẽn lʋɩ yʋʋmd 1991 wã, Wẽnnaam nin-buiidã sẽn da be tẽn-yalen-kãng pʋgẽ wã paama “sõngr bilfu,” rat n yeel tɩ lohorem wakate. Rẽ kɩtame tɩ b tõog n moon koɛɛgã tɩ gɩdgr pa zĩnd ye. Pa kaoos la koe-moondbã sẽn da be Iniyõ Sovietikã sõor zẽk n ta bãmb tus kobs ye. Bilf-bilfã, Risi ne a poorẽ dãmbã wa n lebga rɩtg rĩmã. Wa d sẽn wilg sõsg ning sẽn loogã pʋgẽ wã, sẽn na yɩl tɩ goosneema yɩ rɩtg rĩm bɩ goabg rĩma, rẽnda a pids yɛl a tãabo: 1) A segd n soogame, wall a nams Wẽnnaam nin-buiidã, 2) a tʋʋm-tʋmdɩ wã segd n wilgame t’a tara beem ne Wẽnnaam la a nin-buiidã, la 3) a segd n wagsa ne rĩm a to wã naamã poorẽ. Risi ne a poorẽ dãmbã zabda ne Wẽnnaam nin-buiidã, bala b gɩdga koɛɛgã moonego, la b namsd saam-biis la d saam-bi-pogs tus kobs sẽn be b soolmẽ wã. B tʋʋm-tʋmdɩ wã wilgdame tɩ b yaa a Zeova la a nin-buiidã bɛɛba. Sẽn paase, b wagsda ne Gãrãnd Bertayn la Etazĩni sẽn naag taab n yaa dũni gill pãn-soaadã. w20.05 12-13 s. a 3-4

D sẽn dat n sõng nebã tɩ b wa lebg a Zeezi karen-biisã yĩnga, d segd n modg zãms-b-la Biiblã sõma. Dũniyã gill zugu, neb milyõ-rãmb la d zãmsd Biiblã. D nonga d sẽn zãmsd nebã bũmb ning Wẽnnaam Gomdã pʋgẽ wã. La woto tõe n kɩtame tɩ d wa rat n gom rẽ yell wʋsgo. Ned sã n lʋɩ taoor Gũusg Gasgã zãmsg wall Tigingã Biibl zãmsg sasa, bɩ yaa ned la a zãmsd Biiblã, a pa segd n gomd wʋsg ye. Koe-moond sã n dat n tõog n tik Biiblã sẽn yetã n zãms neda, a segd n talla yõk-m-menga, n da bao n na n togs bũmb nins fãa a sẽn mi Biiblã vɛrse ning zugu, wall gomd ning wɛɛngẽ ye. (Zã 16:12) Tags-y n ges-y bũmb nins yãmb sẽn da mi y lisgã wakatã, la bũmb nins y sẽn mi masã wã. Tõe tɩ y lisgã sasa, y ra pa mi bũmb wʋsg Biiblã zug ye. (Ebre. 6:1) Kaoosa yʋʋm wʋsg tɩ y yaool n wa bãng bũmb nins y sẽn mi masã wã. Woto wã, bɩ y ra bao n na n zãms y karen-biigã bũmb fãa zĩig pʋgẽ ye. w20.10 14-15 s. a 2-4

A Zeova yãka roagdb sẽn yaa sõma wʋsgo, tɩ b na n wub a Zeezi. (Mat. 1:18-23; Luk 1:26-38) A Maari sẽn togs goam nins sẽn yit a sũurẽ tɩ b gʋls rẽ Biiblã pʋgẽ wã, wilgdame t’a ra nonga a Zeova la a Gomdã hal wʋsgo. (Luk 1:46-55) A Zozɛf me sẽn sak n maan a Zeova sẽn yeel-a t’a maanã, wilgdame t’a ra zoeta Wẽnnaam, n dat n ta a yam. (Mat. 1:24) Bãng-y t’a Zeova pa yãk roagdb sẽn yaa arzɛk rãmb tɩ b na n wub a Zeezi ye. Maoong ning a Zozɛf ne a Maari sẽn maan a Zeezi rogmã poorã wilgdame tɩ b ra yaa naong rãmba. (Luk 2:24) Tõe tɩ b ra pa gĩd b vɩɩmã ne bũmb wʋsgo, sẽn yɩɩd fãa sẽn mik tɩ b zakã neb sõor da paasdame, hal n da ta kamb a yopoe, bɩ sẽn yɩɩd rẽ wã. (Mat. 13:55, 56) A Zeova kogla a Zeezi ne yɛl kẽere, la a pa kogl-a ne zu-loeesã fãa ye. (Mat. 2:13-15) Wala makre, a ra tara ma-bi-taas sẽn da pa tẽed-a ye. Tags-y n ges-y a Zeezi sũur sẽn da tog n sãam to-to, a zakã neb kẽer sẽn pa sak n deeg sɩngrẽ wã tɩ yẽ la Mesi wã. (Mark 3:21; Zã 7:5) Sẽn paase, a Zeezi ba-wubdg a Zozɛf kaalmã nams-a lame. w20.10 26-27 s. a 4-6

Yãmb zoe n tagsame tɩ y yaa y yembr bal n maood ne zu-loɛɛga, n pa tar ned sẽn na n sõng-y bɩ? Neb wʋsg zoe n tagsa woto, baa neb sẽn da tũud a Zeova pĩnd wẽndẽ wã. (1 Rĩm. 19:14) Yãmb sã n wa tagsd woto, bɩ y tẽeg a Zeova sẽn pʋlmã. A yeelame: “Mam pa na n loog n bas foom a bada, la m pa na n tol n daag-f n bas ye.” Dẽnd d tõe n yeela ne bas-m-yam yaa: “A Zeova yaa mam sõangda. Mam pa na n zoe rabeem ye.” (Ebre. 13:5, 6) Yaa tʋm-tʋmd a Poll n taas gom-kãensã a tẽed-n-taas sẽn da be Zide, yʋʋmd 61 wã sẽnese. A sẽn yeel bũmb ningã tẽegda tõnd goam nins sẽn be Yɩɩn-sõamyã 118:5-7 pʋgẽ wã. Wa yɩɩn-gʋlsdã, a Poll mengã yãa vẽeneg t’a Zeova yaa a sõangda, bala a sõng-a-la naoor wʋsgo. Wala makre, sẽn yɩɩd yʋʋm a yiib nand t’a gʋls a lɛtrã n tool Ebre kiris-nebã, a wa n togda sor ne batayo, tɩ sob-kãseng tek n yik mogrã zugu, hal t’a ra na n kiẽ. (Tʋʋ. 27:4, 15, 20) A Zeova maana bũmb toor-toor n sõng a Poll a so-toakã sasa, la baa sẽn deng rẽ. w20.11 12 s. a 1-2

Bõe yĩng tɩ d pa segd n ket n tagsdẽ tɩ d vɩɩmã ra yaa sõma pĩndã n yɩɩd masã? D sã n nong n tẽegd sẽn loogã yelle, d na n nong n tagsda sẽn yaa sõma wã yell bala, la d yĩm sẽn pa yɩ sõma wã. Wala makre, d gom Israyɛll nebã yelle. B sẽn yi Ezɩptã poor bala, b yĩma b vɩɩmã sẽn da yaa toog to-to beenẽ wã. Yaa rɩ-noodã b sẽn da rɩt be wã yell bal la b ra tagsda. B yeelame: “Tõnd da paamda zĩm zaalem la d paamd kõnkõmbr ne yoag la poaaro ne gãbdo, laee n dɩt Ezipt tẽnga.” (Sõd. 11:5, Wẽnnaam sebre, 1983) Rẽ yĩnga b sɩd da paamda rɩ-kãensã “zaalem” sɩda? Ayo. Ra pa nana ne Israyɛll nebã baa bilfu. Wakat-kãnga, b ra yaa yembs Ezɩpti, tɩ b ra namsd-b hal tɩ loogd noore. (Yik. 1:13, 14; 3:6-9) La b wa n yĩma to-kãensã fãa yelle, n da tʋll b pĩnd vɩɩmã yɛsa. B yãka yam n na n tags bõn-sõma wã b sẽn da paamd Ezɩptã yell n tɩ yɩɩda, n pa tagsd bõn-sõma nins a Zeova sẽn maan n kõ-b tɩ nan pa kaoosã yell ye. La a Zeova sũur pa yɩ noog ne-b ye.—Sõd. 11:10. w20.11 25 s. a 5-6

Wakat ninga, d tõe n tagsda d vɩɩmã sẽn yaa koɛɛg n ‘pid ne yɩɩrã’ yelle. (Zoob 14:1) Dẽnd d bee bʋʋm, d sẽn mi n koms raood wakat ningã. Pĩnd wẽndẽ wã, wẽnd-sakdb wʋsg me ra mi n komsa raood woto. Kẽer yeelame meng tɩ b sẽn kiid n são. (1 Rĩm 19:2-4; Zoob 3:1-3, 11; 7:15, 16) La b sẽn kell n kɩs a Zeova sɩdã, naoor wʋsgo a bels-b lame la a keng b raoodo. B sẽn gʋls b kibayã Biiblã pʋgẽ wã yaa sẽn na n keng d raoodo, la kɩt tɩ d rɩk yam. (Rom. 15:4) D gom a Zakoob biig a Zozɛfe yelle. A Zozɛf vɩɩmã tiig n toeema fasɩ. A ra pa le be ne a ba wã sẽn da nong-a wã ye. A ra lebga yamb b sẽn pa nande, n tʋmd Ezɩpt soda-naab sẽn pa tũud a Zeova zakẽ. (Sɩng. 37:3, 4, 21-28; 39:1) A Potifaar pagã rõda a Zozɛf t’a baoome n na n yõg-a. A Potifaar pa bao n na n bãng sã n yaa sɩd ye. A kɩtame tɩ b kẽes a Zozɛf bãens roogo, la b balg-a bãense. (Sɩng. 39:14-20; Yɩɩn. 105:17, 18) Sãmbg kae t’a Zozɛf ra bee bʋʋm n tõe n koms raoodo. w20.12 16-17 s. a 1-4

A Zeezi wilgame tɩ woto la d segd n deng n kos d pʋʋsg pʋgẽ. A gomdã võor yaa bõe? Gom-bil ning b sẽn lebg tɩ “paam waoogrã” rat n yeelame tɩ “maan tɩ yɩ yɩlemde, wall sõngo.” Tõe tɩ neb kẽer yeel yaa: ‘A Zeova yʋʋrã pa zoe n yaa yɩlemd la sõng la?’ Sẽn na yɩl n leoke, rẽnda d bao n bãng yʋʋr sẽn wilgd bũmb ninga. Yʋʋr pa gʋls-biis sẽn be sebr zug bɩ b sẽn boond noorẽ bal ye. Biiblã yetame: “Yʋ-noog n são arzegs wʋsgo.” (Yel. 22:1; Koɛ. 7:1) Bõe yĩng tɩ ned yʋʋr tar yõod wʋsg woto? Bala yʋʋr tẽegda neb a taabã tagsg sẽn yaa to-to a soabã zugu. Rẽnd pa yʋʋr sẽn gʋls to-to, wall b sẽn boond-a to-to wã la sard ye. Sẽn tar yõod n yɩɩdã yaa neb a taabã sẽn tagsde, bɩ b sẽn yet a soabã zugã. Nebã sẽn togsd yɛl sẽn pa sɩd a Zeova zugã, b sãamda a yʋʋrã. B sẽn maand woto wã, b ningd-a-la taal la b kãnegd-a. w20.06 3 s. a 5-7

D tõe n wa maanda yɩɩr wʋsg ne yɛlã, hal n pa le tõe n tags bũmb a to yell ye. Wala makre, d tõe n maanda yɩɩre, n tagsdẽ tɩ d pa na n paam ligd n ges d mens yelle, wall tɩ d na n lʋɩɩ bãag n pa le tõe n tʋme, bɩ tɩ d tʋʋmã na n sãamame. D leb n tõe n wa maanda yɩɩre, n tagsdẽ tɩ ned bɩ bũmb sã n wa rat tɩ d kɩɩs Wẽnnaam noyã, d pa na n tõog n yals kãn-kãe ye. Ka la bilfu, a Sʋɩtãan na n kɩtame tɩ neb nins a sẽn so wã zab ne Wẽnnaam nin-buiidã. Rẽ wã, d tõe n maanda yɩɩre, n pa mi d sẽn na n maan bũmb ning zab-kãng sasa ye. D tõe n sokda d meng yaa: ‘Rẽ yĩnga, m sã n maand yɩɩr yel-kãens yĩnga, yaa wẽng bɩ?’ D miime t’a Zeezi yeela a karen-biisã tɩ b “da le maan yɩɩr ye.’ (Mat. 6:25) Woto rat n yeelame t’a pa rat tɩ d maan yɩɩr baa fʋɩ yĩng bɩ? Ayo! Neb kẽer sẽn da tũud a Zeova pĩndã ne b sũy fãa pʋd n maoo ne yɩɩre, la ne rẽ fãa b ra ket n tata a Zeova yam. (1 Rĩm. 19:4) A Zeezi ra ratame tɩ d bas d yam. A ra pa rat tɩ d maand yɩɩr ne vɩɩmã yɛl tɩ loog noore, tɩ wa kɩt tɩ d pa le tõe n tũ a Zeova ne d sũy fãa ye. w21.01 2 s. a 4, 5

Rao sã n pa zã a zakã rãmb sõma, a tara taal a Zeova ne a Zeezi taoore. (1 Pɩy. 3:7) A Zeova n yaa a zakã sẽn be saasẽ la tẽngã zugã Zu-soaba. Rẽ wã, a tara sor n na n lugl noy sẽn wilgd a zakã rãmb sẽn segd n tall manesem ninga, la a tar sor me n na n ges tɩ b tũ no-kãense. (Eza. 33:22) A Zeezi sẽn yaa kiris-neb tigingã Zu-soabã me tara sor n na n lugl noy la a ges tɩ nebã tũ. (Gal. 6:2; Kol. 1:18-20) Wa a Zeova ne a Zeezi, zak soab sẽn yaa kiris-ned tara sor n na n lugl noy a zakã rãmb yĩnga. (Rom. 7:2; Efɛ. 6:4) La a zu-sobendã tara koaka. Wala makre, a noyã segd n tika Wẽnnaam Gomdã sẽn yetã zugu. (Yel. 3:5, 6) La zak soab pa tar sore, n na n lugl noy n dat tɩ neb sẽn pa naag a zakã rãmb tũ ye. (Rom. 14:4) Sẽn paase, a kambã sã n wa lebg bɛd n yi n bas zakã, b na n ket n waoogd-a lame, la a pa le tar sor n na n yɩ b zu-soab ye.—Mat. 19:5. w21.02 2-3 s. a 3-5

Bũmb a ye sẽn tar yõod zak soab sẽn tõe n maan n wilg t’a nonga a zakã rãmba, yaa a sẽn na n sõngd-b tɩ b paamd bũmb nins sẽn yaa tɩlɛ ne b vɩɩmã. La a segd n tẽegame tɩ yaa a sẽn na n sõng-b tɩ b paam zood sõma ne a Zeova n tar yõod n yɩɩda. (Mat. 5:3) Baa ne a Zeezi sẽn wa n be ra-lukã zugã, a ra rata ned sẽn na n ges a ma a Maari yelle. Baa ne a Zeezi sẽn da be toog wʋsg pʋgẽ wã, a kosa tʋm-tʋmd a Zã t’a yõdg n ges a Maari yelle. (Zã 19:26, 27) Saam-biig sẽn yaa zak soab tõe n tara tʋʋm wʋsgo. A tʋʋmã zĩigẽ, a segd n tʋmda sõma, sẽn na yɩl t’a Zeova paam pẽgre. (Efɛ. 6:5, 6; Tɩt 2:9, 10) A tõe n tara tʋʋm a taab tigingã pʋgẽ me. Wala makre, ges tɩ tigingã neb paamd tẽeb la raood kengre, la a lʋɩ taoor koɛɛgã mooneg pʋgẽ me. Rẽ sẽn yãk a toogo, a segd n zãmsda Biiblã wakat fãa ne a pagã la a kambã. A zakã rãmb sũur na n yɩɩ noog wʋsg ne-a, a sẽn modgd woto tɩ b paamd bũmb nins sẽn yaa tɩlɛ ne b vɩɩmã, la a getẽ me tɩ b paamd tẽeb kengr la sũ-noogã.—Efɛ. 5:28, 29; 6:4. w21.01 12 s. 15, 17

Wẽnnaam Gomdã bilgda pʋg-sõng sẽn yaa to-to wã, n yetẽ t’a geta a zak rãmb yelle, t’a raada pʋʋg la a get a yelle, la t’a mii leebg sõma. (Yel. 31:15, 16, 18) A pa yamba, n pa tar sor n togsd a tagsg ye. A sɩdã pʋd n kɩs-a-la sɩda, n sakd n kelgd a sẽn yetã. (Yel.31:11, 26) Rao sã n waoogd a pag woto, pagã na n sulgd n sakd-a-la ne sũ-noogo. Baa ne a Zeezi sẽn tõog n maan bõn-kãsemsã, a pa tags t’a Zeova zu-sobendã sakr yaa paoogr ne-a ye. (1 Kor. 15:28; Fili. 2:5, 6) Woto me, pag sẽn tũud a Zeezi mak-sõngã pa na n tags t’a sã n sakd a sɩdã zu-sobendo, yaa paoogr ne-a ye. A na n teenda a sɩdã, la pa a sẽn nong-a wã yĩng bal ye. Sẽn yɩɩd fãa, yaa a sẽn nong a Zeova la a waoogd-a wã yĩnga. La pag sẽn yaa kiris-ned sɩd sã n yeel-a t’a maan bũmb sẽn kɩɩsd Biiblã noyã, a pa na n sak ye. w21.02 11 s. 14-15; 12 s. 19

A Zeova nin-buiidã sẽn nong a Zeova wã yĩng sõngd-b lame tɩ b tõogd toog wakat fãa, b sã n namsd-b tẽebã yĩnga. Wala makre, zʋɩf rãmbã bu-kaoodb sull ning sẽn tar noor n yɩɩdã sẽn wa n yeel tʋm-tʋmdbã tɩ b bas koɛɛgã moonegã, b sẽn nong Wẽnnaamã yĩng kɩtame tɩ b yeel yaa: “Wẽnnaam n yaa naab ning tõnd sẽn segd n sakã, pa ninsaalbã ye.” (Tʋʋ. 5:29; 1 Zã 5:3) Rũndã-rũndã, goosneemã rãmb sẽn tar pãng namsda d saam-biis wʋsg ne wẽnem, la yaa b sẽn nong a Zeova ne nonglem hakɩɩkã yĩng n sõngd-b tɩ b tõogd toogo. D pa komsd raoodo, dũniyã sẽn kis tõndã yĩng ye. D pʋd n maanda sũ-noogo. (Tʋʋ. 5:41; Rom. 5:4, 5) Sẽn yɩɩd fãa, sã n yaa d zakã rãmb n namsd tõnd d tẽebã yĩnga, tõe n yɩɩ toog wʋsg tɩ d kell n tõog toogo. D sã n wa sɩng a Zeova tũubu, d zakã neb kẽer tõe n tagsdame tɩ b belga tõndo. Sãnda tõe n tagsame tɩ d zugã lebgame. (Ges-y Mark 3:21.) B tõe n namsa tõnd ne toom wʋsgo. La woto pa segd n ling-d ye. Bala a Zeezi yeelame: “Ned meng zak rãmb na n yɩɩ a bɛɛba.”—Mat. 10:36. w21.03 21 s. a 6-7

Biibl zãmsg sasa, karen-saambã ne karen-biigã sã n wa sõsda, bɩ y kelg neere. Rẽ la y na n tõog n bãng n kẽes y toogo. La y segd n tagsa neer n yaool m gome. Wala makre, y pa segd n gomd wʋsgo, wall n kʋʋgd karen-saambã goamã, bɩ n wẽnemd sõsgã n tees zĩig a to ye. Y tõe n goma koɛɛg-koɛɛg bala, bɩ n dɩk makr wall n sok sokre, tɩ sõng karen-biigã t’a wʋm zãmsgã võor sõma. Wakat ninga, y tõeeme n pa tar y sẽn na n paas ye. La y sã n pẽg karen-biigã, n wilg tɩ y sɩd nand-a lame, na n sõng-a-la wʋsg t’a tẽebã bɩ. Sã n zemsame, koɛɛg-koɛɛg bala y tõe n togsa karen-biigã y sẽn bãng sɩdã to-to, y sẽn tõog n mao ne zu-loɛɛg ning to-to, bɩ a Zeova sẽn sõng-y to-to y vɩɩmã pʋgẽ. (Yɩɩn. 78:4, 7) Tõe tɩ y sẽn na n yeel bũmb ningã na n zemsa kɛpɩ ne karen-biigã sẽn da ratã. Tõe n paasa a tẽebã pãnga, bɩ n keng-a raood t’a kell n modg n wa tõog n deeg lisgu. w21.03 10 s. a 9-10

Yaa ãnd sabab yĩng la d sẽn paamd tɩ koe-moonegã womd biisã? Lɛtr ning a Poll sẽn gʋls n tool Korẽnt tigingã pʋgẽ, a leoka sok-kãngã. Ad a sẽn yeele: “Mam selame t’a Apolos zãgs koom, la yaa Wẽnnaam n da kɩtd tɩ bɩtẽ. Rẽnd ned ning sẽn sendã pa baa fʋɩ, tɩ sẽn zãgsd-a koomã me pa baa fʋɩ ye. Sẽn yaa-a bũmbã yaa Wẽnnaam sẽn kɩtd tɩ bɩtẽ wã.” (1 Kor. 3:6, 7) D koe-moonegã sã n wom biisi, wa a Polle, yaa a Zeova la d segd n pẽg wakat fãa. Bõe ne bõe la d tõe n maan n wilg tɩ d sũur nooma d sẽn paam n yaa a Zeova, a Zeezi, la malɛgsã “tʋmd-n-taasã”? (2 Kor. 6:1) Yaa d sẽn na n baood segb buud fãa n taasd neb a taabã koe-noogã ne yẽesem. D sẽn ‘yaa Wẽnnaam tʋmd-n-taasã,’ d pa segd n bʋd sɩdã bõn-buud bal ye. D segd n zãgs-b-la koom me. Ned sã n wilg t’a nonga sɩdã, d rat n maana d sẽn tõe fãa n lebg n tɩ kaag-a, wall d kɩt tɩ ned a to tɩ kaag-a, n bao n sɩng Biibl zãmsg ne-a. D sã n ne a Zeova sẽn sõngd-a to-to t’a toeemd a sũurã la a yamã, d sũur noomame. w20.05 30 s. 14, 16-18