Wao-fugdgu

A Zeova ratame t’a nin-buiidã fãa sũy yɩ noogo. A pẽe tõnd ned kam fãa. D sũy sã n wa sãame, wall yaa d raood n komse, a neeme. (Yɩɩn. 145:18, 19) Bɩ d tẽeg a Zeova sẽn ges no-rɛɛs a Eli yell to-to wã. Ra-kãngã sẽn da maand sɩd ne a Zeova wã vɩɩmda wakat sẽn yɩ toog wʋsg Israyɛlle. Bɛɛb sẽn tar pãng la sẽn kɩɩsd Wẽnnaam n da tolg n namsd a Zeova nin-buiidã, hal n da baood a Eli n na n kʋ. (1 Rĩm. 19:1, 2) Tõe tɩ bũmb a to me sẽn da namsd a Eli, yaa a sẽn da tẽed t’a Zeova no-rɛɛsdbã sʋka, yaa yẽ a ye bal n da ket n vɩ wã. (1 Rĩm. 19:10) A Zeova maana bũmb tao-tao n na n sõng a Eli. A tʋma malɛk t’a tɩ keng a no-rɛɛsã pɛlga, t’a bãng t’a pa a yembre, la tɩ neb wʋsg sẽn da yaa wẽn-sakdb n ket Israyɛlle. (1 Rĩm. 19:5, 18) A Zeezi maaga a yĩng n wilg a karen-biisã tɩ b na n paama tẽed-n-taas sẽn na n lebg wa b zak rãmba. (Mark 10:29, 30) A Zeova sẽn yaa d saasẽ Ba wã pʋlmame t’a na n sõnga neb nins sẽn dat n tũ-a wã.—Yɩɩn. 9:11 w21.06 8-9 s. a 3-4

Neb wʋsg pa sakd n kelg tõndo, bala d sɛbã sẽn tik Biiblã zugã wilgda tũudmã sẽn zãmsd nebã bũmb nins tɩ yaa ziri wã. Wala makre, tũudmã taoor dãmb zãmsda b nebã tɩ Wẽnnaam sɩbgda nin-wẽnsã bugum yiri. B tũnugda ne zãms-kãngã sẽn yaa ziri wã n na n soog nebã. A Zeova nin-buiidã sẽn tũud Wẽnnaam sẽn yaa nonglmã wilgda nebã tɩ zãms-kãnga yaa ziri. Tũudmã taoor dãmb leb n zãmsda nebã tɩ ninsaal tara sɩɩg sẽn pa kiidi. Tõnd wilgda nebã tɩ yaa sẽn da tũud-b wẽn-faadã n tẽed woto, la tɩ sã n mik tɩ b sẽn tẽedã yaa sɩda, dẽnd pa tɩlɛ tɩ kũum vʋʋgr zĩnd ye. Baa ne tũudum wʋsg sẽn zãmsd nebã tɩ bũmb fãa yaa Wẽnd pʋlengã, tõnd yẽ wilgda nebã tɩ ned fãa tõe n yãka yam n tũ Wẽnnaam. Tũudmã taoor dãmb manesem mi n yaa wãna? Naoor wʋsgo, b sũyã yikdame! D sã n nong sɩdã, d segd n saka Wẽnnaam sẽn yet bũmb ningã. (Zã 8:45, 46) Tõnd yẽ pa na n maan wa a Sʋɩtãan ye. D na n kell n gãda sɩdã kãn-kãe. D pa na n tol n maan bũmb sẽn pa zems ne d sẽn tẽed bũmb ninsã ye. (Zã 8:44) Wẽnnaam ratame t’a nin-buiidã ‘kisg sẽn yaa wẽnga,’ la b kell n ‘gãd sẽn yaa sõma wã kãn-kãe’ wa a Zeezi sẽn maanã.—Rom. 12:9; Ebre. 1:9. w21.05 10 s. 10-11

D sã n wa mik tɩ d lebga wuk-m-meng soab bɩ rat-tɩ-loog soaba? D tõe n toeemame. Tẽnm-tʋmd a Poll yeelame tɩ neb nins a Sʋɩtãan sẽn ‘yõg vɩɩsã’ tõe n põs n yii bẽd-kãngã pʋgẽ. (2 Tɩm. 2:26) D da tol n yĩm t’a Zeova pãng yɩɩda a Sʋɩtãan ye. D sã n sak a Zeova sõngrã, d tõe n põsa bẽdg ning fãa a Sʋɩtãan sẽn na n bẽd tõndo. Vẽenega, d pa segd n bao n põs a Sʋɩtãan bẽdsã bal ye. D pʋd n segd n bao n gil-b lame. Yaa ne Wẽnnaam sõngr bal la d tõe n tõoge. Rẽ wã, bɩ y pʋʋsd daar fãa n kot a Zeova t’a sõng-yã, tɩ y ges zʋg-wẽn-kãensã sã n pa zoe n kɩt tɩ y tagsa wã la y yel-manesmã pa le yaa sõma zãng ye. (Yɩɩn. 139:23, 24) Maan-y y sẽn tõe fãa n da tol n lebg wuk-m-meng bɩ rat-tɩ-loog soab ye. Yaa sẽn na maan yʋʋm tusa la a Sʋɩtãan yaa tãoosa. La ka la bilfu, b na n sẽb-a lame, n wa baas n sãam-a. (Vẽn. 20:1-3, 10) D yãgdame tɩ daar-n-kãng ta. La nananda, bɩ y ket n gũusd ne a Sʋɩtãan bẽdsã. Modg-y n da tol n lebg wuk-m-meng la rat-tɩ-loog soab ye. Yãk-y yam ne y sũur fãa, n ‘kɩɩs a Sʋɩtãana, t’a na n zoe n zãaga yãmba.’ w21.06 19 s. 15-17

Ned sã n zãms Biiblã n sak a sẽn yetã, la a taasd neb a taabã a sẽn bãng bũmb ningã, a Zeova sũur noomame. (Yel. 23:15, 16) A Zeova sũur tog n nooma wʋsgo, a sẽn ne a nin-buiidã sẽn moond koɛɛgã la b zãmsd nebã Biiblã ne yẽesmã. Wala makre, baa ne bã-longdgã sẽn zĩnd dũniyã gill zug yʋʋmd 2020 wã, d zãmsa Biiblã ne neb milyõ 7 705765, tɩ rẽ sõng neb tus 241994 tɩ b rɩk b mens n kõ a Zeova n deeg lisgu. Nin-kãensã sẽn lebg a Zeezi karen-biisã me na n zãmsa neb a taab Biiblã tɩ bãmb me wa lebg a Zeezi karen-biisi, tɩ d sõorã paase. (Luk 6:40) Sãmbg kae tɩ d sẽn sõngd nebã tɩ b lebgd a Zeezi karen-biisã nooma a Zeova wʋsgo. D sẽn sõngd nebã tɩ b lebgd a Zeezi karen-biisã yaa tʋʋm-saalga. La ne a Zeova sõngre, tõnd me tõe n kẽesa d toog n sõng Biibl karen-biisã tɩ b wa nong a Zeova. Rẽ yĩnga, d pa tõe n yãk yam n na n modg n sɩng Biibl zãmsg baa yaa ne ned a ye sɩda? D sã n tũnugd ne segb buud fãa n sokd nebã n get b sã n dat n zãmsa Biiblã ne-do, d tõe n paam n sɩnga Biiblã zãmsg ne ned hal tɩ ling-du. w21.07 6-7 s. 14-16

Rĩm a Davɩɩd kibarã pʋgẽ, d yãta zʋg-sõng a to sẽn kʋʋl-bã sẽn segd n bɩɩse. Yaa b sẽn na n yɩ kõatba. A Davɩɩd yãka a mengã laogo, n na n teel wẽnd-doogã meebã. (1 Kib. 22:11-16) D sã n wa pa le tar pãng n tõe n sõngd n met siglgã roto, d tõe n ket n kõta ligd wa d sẽn tõe tɛka, sẽn na yɩl n teel tʋʋmdã. Sẽn paase, d tõe n sõnga kom-bɩɩsã tɩ b rɩ minimã d sẽn paamã yõodo. D gom tʋm-tʋmd a Poll me sẽn kõ mak-sõng ningã yelle. A boola a Tɩmote sẽn da yaa bi-bɩɩgã t’a wa naag-a misioneer tʋʋmdã pʋgẽ. Sẽn paase, a wilg-a-la a sẽn tõe n moon koɛɛgã la a zãms nebã to-to. (Tʋʋ. 16:1-3) A Poll sẽn zãms a Tɩmote wã sõng-a lame t’a wa tõog n moond koe-noogã sõma. (1 Kor. 4:17) A Tɩmote me ra zãmsda nebã wa a Poll sẽn zãms yẽ to-to wã. w21.09 12 s. 14-15

Yam-bʋg la d tõe n dɩk karen-biig a Apolos ne tʋm-tʋmd a Poll mak-sõngã pʋgẽ? B yiibã fãa ra mii Gʋls-sõamyã sõma. B ra yaa neb yʋy sẽn yi, la karen-saam-dãmb sẽn tar minim. Sẽn paase, b fãa sõnga neb wʋsg tɩ b lebg a Zeezi karen-biisi. La b baa a ye ra pa get a to wa a wags-n-taag ye. (Tʋʋ. 18:24) Bala kaoosg zugẽ, a Apolos sẽn wa n yi Korẽntã, a Poll sagl-a lame t’a le leb beenẽ. (1 Kor. 16:12) A Apolos tʋma ne a minimã tɩ zemse. A moona koe-noogã, la a keng saam-biisã tẽebo. D tõe n kɩsa sɩd t’a Apolos ra yaa sik-m-meng soaba. Bala, b pa yeel Biiblã zĩig baa a ye t’a Apolos sũur yikame, a Akila ne a Pirsill sẽn wa n peeg-a n tɩ “maneg n wilg-a Wẽnnaam sorã sõma” wã ye. (Tʋʋ. 18:24-28) Tʋm-tʋmd a Poll ra mii tʋʋm-sõma nins fãa a Apolos sẽn da tʋmã. La a ra pa yɛɛsd nebã na n wa tags t’a Apolos sãoo yẽ ye. A Poll sẽn taas Korẽnt tigingã saglg ningã wilgdame t’a ra yaa sik-m-meng soaba, ned sẽn mi tɩ pa bũmbã fãa la a tõe n maane, la ned sẽn pa dem-dem ye.—1 Kor. 3:3-6. w21.07 18-19 s. 15-17

A Ãdem ne a Awa yãka yam n kɩɩs a Zeova. Dẽnd a sẽn kɩt tɩ b pa le yaa a zakã nebã zemsame. La b kambã ne b yagensã yẽ? A Zeova sẽn nong ninsaalbã yĩnga, a kɩtame tɩ b kamb nins sẽn na n yɩ sakdbã tõe n paam n yɩ a zakã neba. Yaa ne a Bi-ribl sẽn ka to wã maoongã maasem la a maan woto. (Zã 3:16) A Zeezi maoongã maasem yĩnga, Wẽnnaam yãka neb 144 000 sẽn maand sɩd ne-a tɩ b na n lebg a kamba. (Rom. 8:15-17; Vẽn. 14:1) Sẽn paase, neb milyõ-rãmb sẽn yaa wẽn-sakdb n maand Wẽnnaam daabã. B saagdame n na n wa lebg Wẽnnaam zakã neba. Na n yɩɩ yaoolem makrã sẽn na n zĩnd a Zeezi naamã sẽn na n kaoos yʋʋm tusrã saabẽ wã poore. (Yɩɩn. 25:14; Rom. 8:20, 21) Masã menga, b zoe n boonda a Zeova sẽn yaa b Naandã tɩ b “Ba.” (Mat. 6:9) Sẽn na n vʋʋg-bã me na n paam n bãnga a Zeova sẽn dat tɩ b maan bũmb ningã, tɩ sẽn na n sak-b n maan Wẽnnaam daabã me wa paam n naag a zakã neba. w21.08 5 s. 10-11

B ra kõo tẽn-tʋmd a Poll tʋʋmde, sẽn yaa koɛɛgã moonego. A tʋma tʋʋm-kãng n kaoose, n da get rẽ me wa bũmb sẽn tar yõod wʋsgo. A ra moonda zãma zĩisẽ, la “zak-zaka.” (Tʋʋ. 20:20) A ra tũnugda ne segb buud fãa a sẽn paame, n taasd nebã koɛɛgã. Wala makre, a sẽn da wa n gũud a tẽed-n-taasã Atɛnnã, a taasa koe-noogã nin-kãsemse, hal tɩ wom biisi. (Tʋʋ. 17:16, 17, 34) Baa b sẽn wa n ‘balg-a bãensã,’ a moona neb nins sẽn da be beenẽ wã. (Fili. 1:13, 14; Tʋʋ. 28:16-24) A Poll pa tol n sãam a sẽkã ye. A ra nong n boonda neb a taab tɩ b tũud-a n moond koɛɛgã. Wala makre, a sẽn wa n na n gilg pipi n moon koe-noogã, a kɩtame t’a Mark tũ-a. La a sẽn wa n na n gilg naoor a yiib-n-soabã, yɩɩ a Tɩmote n tũ-a. (Tʋʋ. 12:25; 16:1-4) Sãmbg kae t’a Poll modgame n sõng-b tɩ b bãng b sẽn tõe n lugl tiging to-to, b sẽn tõe n ges b tẽed-n-taasã yell to-to, la b sẽn tõe n paam minim to-to, nebã zãmsgã wɛɛngẽ.—1 Kor. 4:17. w22.03 27 s. a 5-6

Neb kẽer pa tẽed tɩ Naand n be, bala b yetame tɩ yaa bãmb sẽn ne wã bal la b tẽeda. La b yaool n sak n deegame tɩ bũmb b sẽn pa ne sɩd beeme, wala makre, pemsmã. Tẽeb ning yell Biiblã sẽn gomdã me tika kaset sẽn wilgd tɩ bũmb kẽer d “sẽn pa ne sɩd beeme.” (Ebre. 11:1) Yɩl n vaees n bãng rẽ baooda sẽk la modgre. La neb wʋsg yaool n pa rat n maan modgr a woto ye. Ned sẽn pa rat n maan vaeesg a toor n bãng rẽ wat n baas n yeelame bal tɩ Wẽnd kae ye. Siãnsã neb kẽer sẽn maan vaeesgã, b wa n sak n deegame tɩ Wẽnnaam n naan bũmb fãa Sɩngrẽ wã, b ra tẽedame bal tɩ Naand kae, b sẽn pa zãms-b inivɛrsiteẽ wã tɩ Wẽnnaam n naan bũmb fãa wã yĩnga. La masã, b bãnga a Zeova la b nong-a. D karem n zãagame tɩ d pa karem me, d fãa segd n modgame tɩ d sẽn tẽed Wẽnnaam to-to wã pãng paase. w21.08 14 s. a 1; 15-16 s. a 6-7

Wa d sẽn yã sõsg ning sẽn loogã pʋgẽ wã, a Zeezi wẽe yel-bũnd n gom biig sẽn menem yelle, n na n wilg a Zeova nimbãan-zoeerã sẽn ta zĩig ninga. Biigã wʋka a teed n yi a ba wã zakẽ, n tɩ tʋm “tʋʋm-dẽgd n sãam a paoongã.” (Luk 15:13) A wa n teka yam n bas tʋʋm-dẽgdã maanego, n sik a meng n lebg n wa a ba wã zakẽ. A ba wã manesem yɩɩ wãna? A Zeezi yeelame: “La a sẽn wa n ket n be yɩɩga, a ba wã yã-a lame t’a nimbãaneg yõk-a. A ba wã wudgame n tɩ mobg-a, la a mok-a sõma.” Ba wã pa ning a biigã yãnd ye. A pʋd n zoee a nimbãaneg n kõ-a sugri, n lebg n deeg-a ne sũ-noogo. Biig ning sẽn da menemã maana yel-wẽn-kãsenga. La a sẽn tek yam n kos sugrã yĩnga, a ba wã kõ-a-la sugri. A Zeezi yel-bũndã pʋgẽ, ba wã sẽn yaa nimbãan-zoɛtã makda a Zeova. A Zeezi wilgame t’a Zeova tʋllame n kõ neb nins sẽn maan yel-wẽnd n sɩd tek yam n kot sugrã sugri.—Luk 15:17-24. w21.10 8 s. a 4; 9 s. a 6

Rũndã-rũndã, tũudum taoor dãmb wʋsg maanda b sẽn tõe fãa n na n kɩt tɩ nebã ra bãng tɩ Wẽnnaam tara yʋ-peell ye. B yãka Wẽnnaam yʋ-peellã Biibl-dãmb nins b sẽn lebgã pʋgẽ. Wakat ning menga, b gɩdgda nebã tɩ b ra pʋd yʋ-kãng b egiliiz-rãmbẽ wã ye. Dẽnd yaa vẽeneg tɩ yaa a Zeova Kaset rãmbã bal n wilgd tɩ b sɩd waoogda Wẽnnaam yʋʋrã wa sẽn segdã, hal tɩ ned pa tõe n kɩɩs ye. Yaa tõnd bal n sõngd nebã tɩ b bãngd Wẽnnaam yʋ-peellã. Woto yĩnga, d maanda d sẽn tõe fãa n vɩ tɩ zemsd ne d yʋʋrã sẽn yaa a Zeova Kaset rãmbã. (Eza. 43:10-12) D yiisa Dũni-paalgã lebgre sẽn yɩɩd bãmb milyõ 240. Biibl-kãng pʋgẽ, d lebsa Wẽnnaam yʋ-peellã zĩis nins fãa Biiblã lɛbgdb a taabã sẽn yãgsã. D leb n yiisda sɛb ne buud-goam 1000 la zaka, sẽn tik Biiblã zugu, la sẽn sõngd nebã tɩ b bãngd Wẽnnaam yʋ-peellã. w21.10 20-21 s. a 9-10

D sẽn sõngd d tẽed-n-taas sẽn be raab pʋgẽ wã naaga bũmb nins d sẽn maand n tũud a Zeova wã. A Zeova ra pʋlmame t’a na n ninga Israyɛll neb nins sẽn sõngd naong rãmbã barka. (Tõo. 15:10) D sã n wa sõng d tẽed-n-taag sẽn be naong pʋgẽ fãa, a Zeova getame tɩ yaa wa d sẽn kõ yẽ kũuni. (Yel. 19:17) Wala makre, Filip kiris-nebã sẽn wa n tool a Poll sẽn da be bãens roogã kũunã, a yeelame tɩ “yaa wa bũmb sẽn tar yũ-noogo, la maoong sẽn tat Wẽnnaam yam.” (Fili. 4:18) Tags-y yãmb tigingã neb yelle, la y sok y meng yaa: ‘Ãnda la m tõe n sõnge?’ A Zeova sũur noomame, a sã n neẽ tɩ d rɩkda d sẽkã, d pãngã, d minimã, la d paoongã n sõngd d tẽed-n-taas nins sẽn be raab pʋgẽ wã. A getame tɩ rẽ naaga bũmb nins d sẽn maand n tũud-a wã. (Zak 1:27) Yɩl n tũ a Zeova wa a sẽn dat to-to wã baooda sẽka, la modgre. La pa yɩɩd d pãng ye. (1 Zã 5:3) Bõe yĩng tɩ d yet woto? Bala, d sẽn tũud a Zeova wã yaa d sẽn nong-a, la d nong d tẽed-n-taasã yĩnga. w22.03 24 s. 14-15

D sã n tagsd d tẽed-n-taasã sẽn maood ne zu-loees ninsã yelle, d na n tõog n wilgame tɩ d zoeta b nimbãanega. Wala makre, saam-bi-poak tõe n maooda ne bã-kɛgenga, n pa gomd a bãagã yell ne nebã ye. La sãmbg kae t’a sa n paam tɩ b sõng-a, a sũur na n yɩɩ noog wʋsgo. Rẽ yĩnga, a sã n paam tɩ b mi n sõng-a ne rɩɩb seglgo, bɩ ne a roogã yẽesgo, a sũur kõn yɩ noog sɩda? Tõe tɩ saam-biig tʋʋmd n sãame. Nand t’a paam tʋʋmd a to, d tõe n baoo ligd bilf n kõ-a t’a sembdẽ, la d da maan t’a bãng tɩ yaa tõnd mengã n kõ-a ye. D pa segd n gũ tɩ d tẽed-n-taasã wa kos sõngre, tɩ d yaool n na n wilg tɩ d kʋmda b nimbãaneg ye. Wa a Zeova d tõe n yaka yam n sõng-ba, nand meng tɩ b kos tõnd sõngre. A Zeova kɩtdame tɩ wĩntoogã zẽkd daar fãa, tɩ saagã me niida, n pa baood meng tɩ d kos-a rẽ ye. Saagã nafda neba fãa, baa nin-wẽnsã menga. A Zeova sẽn sõngd tõnd tɩ d paamd bũmb nins sẽn yaa tɩlɛ ne-dã wilgdame t’a sɩd nong-d lame. Hakɩɩka, d nonga a Zeova hal wʋsgo, a sẽn yaa kõat la maan-neer soabã yĩnga. w21.09 22-23 s. 12-13

Wẽnnaam yaa sug-kõata, a nonglem-kãsengã yĩnga. A Zeova sẽn yaa nonglem-kãseng soabã yĩnga, a sã n yã yel-wẽn-maand sẽn bas a tʋʋm-wẽnsã n tek yam n kot sugri, a kõt-a-la sugri. Ad yɩɩn-gʋlsd a Davɩɩd sẽn yeel a Zeova zugu: “B ka sɩbgd tõnd wa sẽn zems d yel-wẽnã ye. B ka lebsd tõnd wa sẽn zems d kongrã ye.” (Yɩɩn. 103:8-11) A Davɩɩd mengã ra mii ned sũ-sãang sẽn tõe n ta zĩig ninga, a soabã sũur-kasetã sã n ningd-a taale. La a bãngame me t’a Zeova “kõta sugri.” Bõe n kɩt t’a Zeova yaa sug-kõata? Rũndã daar vɛrse wã goam leokda sok-kãngã. Dẽnd wa a Davɩɩd sẽn yeel a pʋʋsgã pʋgẽ wã, a Zeova kõta neb nins fãa sẽn kot sugrã sugri, a sẽn nong-b ne nonglem-kãsengã yĩnga. D sũur sã n sãam yel-wẽnd d sẽn maan yĩnga, zemsame. Pʋd n yaa sõma. Tõe n sõng-d lame tɩ d tek yam, la d toeem d yel-manesmã. w21.11 5 s. a 11-12

A Zeova nonga a yʋʋrã, la a rat tɩ nebã fãa waoog-a. (Eza. 42:8) La yaa sẽn zems yʋʋm tus a yoob la woto b sẽn sãamd a yʋʋrã. (Yɩɩn. 74:10, 18, 23) Sɩnga a Sʋɩtãan sẽn wa n dõd Wẽnnaam n yeel t’a monga a Ãdem ne a Awa bũmbã. (Sɩng. 3:1-5) Wakat-kãng tɛka, b rõda a Zeova n yeel t’a mongda ninsaalbã bũmb nins sẽn sɩd yaa tɩlɛ ne-bã. A Zeezi sũur pa yɩ noog ne b sẽn sãam a Ba wã yʋʋrã ye. A Zeova bal n tar sor n na n yɩ yĩngr la tẽng Naaba. Sẽn paase, a sẽn dɩt a naamã to-to wã sõmblem ka to ye. (Vẽn. 4:11) La a Sʋɩtãan baoome n na n belg malɛgsã la ninsaalbã, tɩ b tags tɩ Wẽnnaam pa tar sor n na n dɩ naam ye. Ka la bilfu, a Zeova na n wa welga yellã vugri, wakat fãa yĩnga. Rẽ, nebã fãa na n bãngame tɩ yaa a Rĩungã bal n tõe n wa ne laafɩ la bãan tẽngã zugu. w21.07 9 s. a 5-6

Zak soab fãa sẽn dat yaa a modg t’a zakã rãmb paam rɩɩbo, fut la gãag zĩiga. Yãmb maooda ne ligd zu-loees bɩ? Sã n yaa woto, yaa vẽeneg tɩ pa nana ne-y ye. La baa y zu-loɛɛgã sẽn yaa to-to, y tõe n tũnuga ne rẽ n paas y tẽebã pãnga. Pʋʋs-y-yã a Zeova, la y karem a Zeezi goam nins sẽn be Matiye 6:25-34, la y bʋgs b zugu. Tags-y neb kẽer kibay sẽn wilgd tɩ d sã n lʋɩɩs a Zeova tʋʋmdã taoore, a na n gesame tɩ d paam sẽn yaa tɩlɛ ne-do. (1 Kor. 15:58) Y sã n maan woto, y na n maneg n kɩsa sɩd tɩ y saasẽ Ba wã sã n sõnga neb sẽn da maood ne yãmb zu-loeesã buudu, a na n sõnga yãmb me. A mii bũmb nins sẽn yaa tɩlɛ ne-yã, la a mi a sẽn tõe n sõng-y to-to tɩ y paam rẽ. Y sã n neẽ t’a Zeova sõngd-y lame, y tẽebã na n paama pãnga, tɩ y wa tõog n yals kãn-kãe yɛl nins sẽn watã taoore. w21.11 20 s. a 3; 21 s. a 6

Biiblã sẽn yet bũmb ning Kirist maoongã wɛɛngẽ wã sõnga kiris-neb wʋsg tɩ b tẽebã kell n tall pãnga. B ket n moonda koɛɛgã baa ne b sẽn namsd-bã, la b kell n mao ne zu-loees buud toor-toor hal n tãag b kʋʋlem wakate. Wala makre, d gom tʋm-tʋmd a Zã yelle. A kell n moona koɛɛgã n gom Kiristã la a maoongã yell n maan yʋʋm 60 la zaka. A sẽn wa n tar yʋʋm 90 la zaka, b ra get-a-la wa Rom soolmã bɛ, tɩ rẽ kɩt tɩ b yõk-a n kẽng Patmos sẽn yaa ko-sʋk tẽngã n tɩ pag-a bãens roogo. Bõe la a maan tɩ pa zemse? Yaa a ‘sẽn da gomd Wẽnnaam yell la a kõt kaset a Zeezi zugã yĩnga.’ (Vẽn. 1:9) A sɩd kõo mak-sõng tẽebã la tõog-toogã wɛɛngẽ! Sɛb nins Wẽnnaam sẽn vẽneg a Zã t’a gʋlsã pʋgẽ, a wilgame t’a nonga a Zeezi hal wʋsgo, la t’a sũur nooma ne a maoongã. A sɛbã pʋgẽ, a sẽn gom Kirist maoongã, bɩ a nafa wã yellã yɩɩda naoor koabga. (1 Zã 2:2) Dẽnd yaa vẽeneg t’a Zã sũur da nooma wʋsg ne Kirist maoongã. w21.04 17 s. a 9-10

A Zeova ra yeela a nin-buiidã tɩ b wilg tɩ b nanda neb nins sẽn tar komslmã. Wala makre, a ra yeela Israyɛll nebã tɩ b ra kãab ned sẽn yaa wʋng wẽng ye. Kãabgã tõe n yɩɩ a sẽn dat n maan-a wẽnga, bɩ n gom goam sẽn pa sõma a zugu. Ned sã n da maan wʋng woto, yaa wẽng wʋsgo. Wʋng pa tõe n wʋm b sẽn yet bũmb ning a zugã ye. Woto kɩtame t’a pa tõe n leok ye. Sẽn paase, Maan-kʋʋr 19:14 pʋgẽ, d yãame tɩ Wẽnnaam yeela a nin-buiidã tɩ b “ra ning bẽdg zoang taoor t’a lak” n lʋɩ ye. Sebr a yembr wilgame tɩ pĩnd wẽndẽ wã, yaang sẽnes nebã ra namsda neb nins sẽn tar komslmã, la b ra maand-b pãng me. Tõe tɩ nin-wẽns kẽer ra rɩgenda bũmb ned sẽn yaa zoang taoor sẽn na yɩl t’a lak n lʋɩ n pogle, bɩ b sẽn dat n paam n la-a wã yĩnga. Wẽnem tek woto! Ne no-kãngã maasem, a Zeova sõnga a nin-buiidã tɩ b bãng tɩ b segd n zoee sẽn tar-b komslmã nimbãanega. w21.12 8-9 s. a 3-4

A Zakoob ra maanda yɩɩren tagsdẽ t’a kẽemã sũur ket n puugda ne-a. Rẽ n so t’a pʋʋs a Zeova ne a sũur fãa n togs-a yellã. Rẽ poore, a kɩsa kũun tɩ b na n tɩ kõ a Ezayu. (Sɩng. 32:10-16) Baasgo, bãmb b yiibã sẽn wa n seg taabã, a Zakoob yãka yam n maan bũmb n wilg t’a waoogda a kẽem a Ezayu. A yĩgimda a taoore. Pa vugr bɩ naoor a yiib bal ye. Yaa hal naoor a yopoe! A Zakoob talla sik-m-meng la waoogre, tɩ sõng tɩ laafɩ le zĩnd yẽ ne a kẽemã sʋka. (Sɩng. 33:3, 4) A Zakoob sẽn maan bũmb ning nand t’a seg a kẽem a Ezayu wã, la a sẽn wa n seg-a wã sõngda tõnd tɩ d bãng bõe? A Zakoob sika a menga, n kos a Zeova sõngre. Rẽ poore, a talla manesem sẽn zems ne a pʋʋsgã, n maan a sẽn tõe fãa tɩ laafɩ le zĩnd yẽ ne a kẽemã sʋka. A Zakoob sẽn wa n seg a Ezayu wã, a pa wẽ no-koɛɛm ne-a n na n bãng ãnd n tar bʋʋm la ãnd n ka bʋʋm ye. A sẽn da rat bal yaa laafɩ le zĩnd yẽ ne a kẽemã sʋka. D tog n dɩka a togs-n-taare?—Mat. 5:23, 24. w21.12 25 s. 11-12

Y sã n tags a Zeezi sẽn ki tõnd yel-wẽnã yĩngã, y tõe n yeelame yaa: ‘Mam pa zems ne waoogr a woto ye.’ Bõe yĩng tɩ y tõe n wa tags woto? D sũurã sẽn pa zems zãngã tõe n belg-d lame tɩ d tags tɩ d ka yõodo, bɩ tɩ pa segd tɩ Wẽnnaam nong-d ye. (1 Zã 3:19) Sã n wa yaa woto, d segd n tẽegame tɩ “Wẽnnaam yɩɩda tõnd sũyã.” Tõnd saasẽ Ba wã nonglmã la a sugrã yɩɩda tags-kɛg nins sẽn yit d sũurẽ wã hal zĩig sẽn zãre. D segd n modgame n sak n deeg t’a Zeova nong-d lame. Sẽn na yɩl n maan woto, d segd n nong n zãmsda Wẽnnaam Gomdã, n pʋʋsd-a wakat fãa, la d nong n be ne a nin-buiidã sẽn maand sɩd ne-a wã. Bõe yĩng tɩ bõn-kãensã maaneg tar yõod wʋsgo? Bala y na n bãngd a Zeova zʋg-sõma wã n paasdẽ. Y na n yãame t’a sɩd nong-y-la hal wʋsgo. Y sã n bʋgsd Wẽnnaam Gomdã zug daar fãa, na n sõng-y lame tɩ y tõogd n tagsd neere, n “rems yɛlã” y yamẽ wã la y sũurẽ wã.—2 Tɩm. 3:16. w21.04 23-24 s. 12-13

Sẽn na yɩl tɩ d tẽebã pãng paase, d pa segd n zãmsd Biiblã n na n paas d bãngr bal ye. D segd n bʋgsda bũmb nins d sẽn zãmsdã zugu. Rẽ wɛɛngẽ, d ges Yɩɩn-​sõamyã 77 soabã gʋlsdã sẽn maan bũmb ninga. A sũur da sãamame, bala a ra tagsdame tɩ yẽ ne Israyɛll neb a taabã pa le tat a Zeova yam ye. A ra maanda yɩɩr wʋsg rẽ poorẽ, hal t’a sã n kẽ yʋng bɩ a pa tõe n gũs ye. (Vɛrse a 3-9) Bõe la a maan-yã? A yeela a Zeova yaa: “Mam na n goma yãmb tʋʋmdã fãa yelle. Mam na n tagsa y tʋʋm-kãsemsã yelle.” (Vɛrse 13) Yaa vẽeneg tɩ yɩɩn-gʋlsdã ra mii a Zeova sẽn da maan bũmb ning a nin-​buiidã yĩng pĩndã. La baa ne rẽ, yɩɩrã kɩtame t’a ra sokd a meng yaa: “Wẽnnaam yĩma b nimbãan-zoeerã yell la? Dẽ yĩnga, bãmb sũ-yikrã kɩtame tɩ b nebã nimbãaneg ka leb n tar bãmb la?” (Vɛrse 10) Yɩɩn-gʋlsdã bʋgsa a Zeova tʋʋmã zugu, la a tags a sẽn da zoe a nin-buiidã nimbãaneg pĩndã me yelle. (Vɛrse 12) Woto sõng-a lame t’a bãng bõe? Yɩɩn-gʋlsdã wa n kɩsa sɩd t’a Zeova pa na n tol n daag a nin-buiidã n bas ye. (Vɛrse 16) w22.01 30-31 s. 17-18

A Zeova tagsg yaa wãn to ne pagb la rap nins sẽn tũ-a ne b sũy fãa n maan kaalmã? A rata ne a sũur fãa n le yã-ba! (Zoob 14:15) Tags-y n ges-y a Zeova sẽn dat ne a sũur fãa to-to n le yã a zoa a Abrahaam. (Zak 2:23) Bɩ a Moyiizi, Wẽnnaam sẽn sõs ne a soab “neng ne nengã.” (Yik. 33:11) Leb-y n tags-y n ges-y a sẽn dat ne a sũur fãa to-to n leb n wʋm a Davɩɩd ne yɩɩn-yɩɩndb a taab sẽn da yɩɩnd yɩɩn-nood n pẽgd-a wã. (Yɩɩn. 104:33) Baa ne Wẽnnaam zo-kãensã sẽn maan kaalmã, a pa tol n yĩm b yell ye. (Eza. 49:15) A ket n tẽra b sẽn da yaa neb ninsã hal sõma. A na n wa vʋʋg-b lame, n le kelgd b sẽn pʋʋsd-a ne b sũy fãa wã, la a sakd bũmb nins fãa b sẽn na n maand n waoogd-a wã. Y nin-nongr sã n maana kaalem, y sẽn tagsd woto yellã tõe n bels-y lame la keng y raoodo. Kɩɩsgã sẽn zĩnd Edɛn zẽedã zĩigẽ wã tɛka, a Zeova ra miime tɩ yɛlã na n kengame n yaool n wa manege. A Zeova kisa wẽnemã, zãmbã la nen-kɛglem tʋʋmã sẽn be dũniyã zug rũndã-rũndã wã. w21.07 10 s. 11; 12 s. 12

D sã n nong d tẽed-n-taasã, d wilgdame tɩ d sũur nooma ne Kirist maoongã. Bõe yĩng tɩ d yet woto? Bala a Zeezi pa kõ a vɩɩmã tõnd yĩng bal ye. Yaa tõnd saam-biisã me yĩnga. A sẽn sak n ki b yĩngã, wilgdame tɩ b tara yõod wʋsg a nifẽ. (1 Zã 3:16-18) Yaa tõnd sẽn tar manesem ning ne d saam-biisã n wilgd tɩ d nong-b lame. (Efɛ. 4:29, 31–5:2) Wala makre, b sã n wa pa keeme, bɩ b sã n wa maood ne zu-loe-kɛgems wala sabab-wẽnse, d sõngd-b lame. La d tẽed-n-taag sã n wa maan bɩ n yeel bũmb tɩ sãam d sũuri, d manesem segd n yɩɩ wãn to? Yãmb nong n tara sũ-kẽk bɩ? (Maan. 19:18) Sã n yaa woto, bɩ y tũ sagl-kãngã: “Bɩ y maand sũ-mar ne taaba, la y sakd n kõt taab sugr baa ned sã n wa tar yell ne a to. A Zeova sẽn sak n kõ yãmb sugrã, yãmb me segd n maana woto.” (Kol. 3:13) Wakat ning fãa d sẽn kõ d saam-biig wall d saam-bi-poak sugri, d wilgda d saasẽ Ba wã tɩ d sũur sɩd nooma ne Kirist maoongã. w21.04 18 s. 12-13

Tõe tɩ d tʋmda a Zeova tʋʋmã wʋsgo, tõe me tɩ d sõnga neb wʋsg tɩ b modg n wa tõog n deeg lisgu. La d miime tɩ d sẽn tõog n maan bũmb ninsã fãa tũu ne a Zeova sõngre. A Apolos ne tʋm-tʋmd a Poll mak-sõngã leb n sõngda tõnd tɩ d bãng tɩ d sã n tar tʋʋm wʋsg tigingã pʋgẽ, d tõe n sõnga sõma tɩ laafɩ kell n zĩndi. D sũy nooma wʋsgo, d sẽn ne tɩ kãsem-dãmbã la kãsemb-sõngdbã modgdame tɩ laafɩ la zems-n-taar ket n be tigingã pʋgẽ wã. Bala b modgdame tɩ b saglsã fãa tikd Wẽnnaam Gomdã zugu. B pa baood n na n wilg tɩ b sãoo b taabã ye. B sõngda tigingã nebã fãa tɩ b sakd a Zeezi la b rɩkd a togs-n-taare. (1 Kor. 4:6, 7) Tõnd ned kam fãa tara minim la bãngr Wẽnnaam sẽn kõ-a. D tõe n getame tɩ tʋʋm nins d sẽn tʋmd tigingã pʋgẽ wã yõod pa waoog ye. D tõe n dɩka tʋʋm-bõones nins fãa d sẽn tʋmd sẽn na n yɩl tɩ laafɩ zĩnd tigingã pʋgẽ wã n mak ne gĩs-bõones wʋsg b sẽn tall n sẽ fuug tɩ sog sõma. Bɩ d modg n da tall wags-n-taar yam ye. D kell n yãk yam n maan d sẽn tõe fãa n sõng tɩ laafɩ la zems-n-taar zĩnd tigingã pʋgẽ.—Efɛ. 4:3. w21.07 19 s. 18-19

Y tõe n basa y yam tɩ y na n le wa yãa y neb nins sẽn maan kaalmã. A Zeezi sẽn daag nintãm la a bels a zo-rãmbã sũy sẽn da sãam wʋsgã, yaa kaset t’a rata ne a sũur fãa n vʋʋg neb nins sẽn maan kaalmã. (Zã 11:35) Y tõe n sõnga sẽn be-b sũ-sãams pʋgẽ wã. A Zeezi pa naag a Mart ne a Maari n yãb bal ye. A kelg-b lame me, la a bels-ba. (Zã 11:25-27) Tõnd me tõe n maana woto ne neb nins sũy sẽn sãamã. Saam-biig a ye yʋʋr sẽn boond t’a Dan, n yaa kãsem-soab n be Ostrali yeelame: “Mam pagã kaalmã poore, mam da rata sõngre. Saam-biis wʋsg ne b pagb ra bee ne maam wĩndg la yʋngo, n kelgd-ma. B ra basdame tɩ m bilgd-b m sũ-sãangã sẽn ta zĩig ninga. B ra pa get me tɩ m sẽn daagd nintãmã yaa yãnd bũmb ye. B maana bũmb takɩ me n sõng-ma. Wala makre, b ra pekda m mobillã, b ra kẽnd n daada zẽ-biis la bũmb a taab n wat n kõt-ma, la b segendẽ, sã n wa mik tɩ m pa tar pãng n tõe n maan rẽ fãa ye. Naoor wʋsgo, b ra naagda maam n pʋʋsdẽ. B wilgame tɩ b sɩd yaa zo-rãmb hakɩɩka, la saam-biis d sẽn tõe n teeg ‘yel-pakr wakate.’”—Yel. 17:17. w22.01 16 s. a 8-9

A Zeova rata tõnd neere. (Yel. 4:20-22) A sã n wa tũnug ne a Gomdã wall siglgã sɛba, pa rẽ bɩ d saam-biig tẽeb sẽn bɩ n sagl-do, wilgdame t’a nong-d lame. (Ebre. 12:9, 10) D ges saglgã n tɩ yɩɩda, la d da ges b sẽn sagl-d to-to wã ye. Wakat kẽere, d tõe n getame saglgã pa yɩ sõma ye. Yaa vẽeneg tɩ d sã n na n wa sagl neda, d segd n maana d sẽn tõe tɩ saglgã reegr yɩ nana. (Gal. 6:1) La sã n wa yaa tõnd la b sagle, d segd n kelga saglgã neere, baa b sẽn sagl-d to-to wã pa noom-do. D tõe n soka d meng yaa: “Baa m sũur sã n pa noom ne b sẽn sagl-m to-to wã, b sẽn yeel-m bũmb ningã pa gõaag zug sɩda? Rẽ yĩnga, m pa tõe n zʋʋg a soabã pãn-komsmã la m dɩk yam a saglgã pʋgẽ sɩda?” D sã n modg n get saglg fãa sẽn tõe n naf-d to-to wã, yaa yam tʋʋmde. w22.02 12 s. 13-14

A Zeova miime tɩ yɩl n wa tõog n bas tags-wẽnsã la minim-wẽnsã, baooda sẽk la modgre. (Yɩɩn. 103:13, 14) A Zeova tũnugda ne a Gomdã, a vʋʋsem sõngã la a siglgã n kõt tõnd yam la pãnga, la a sõngd tõnd tɩ d tõe n toeem d sẽn yaa ned ning buudã. Tall-y Biiblã n fees y meng sõma. Wẽnnaam Gomdã yaa wa nen-gɛtga. A tõe n sõng-y lame tɩ y fees y tagsa wã, y no-goamã, la y yel-manesmã. (Zak 1:22-25) A Zeova rat n sõng-y-la wakat fãa. Yẽ n tõe n sõng yãmb n yɩɩda. Bala a mii sẽn be y sũurẽ. (Yel. 14:10; 15:11) Rẽ wã, bɩ y nong n pʋʋsd-a la y zãmsd a Gomdã daar fãa. Kɩs-y sɩd t’a Zeova noyã sõmblem ka to ye. A Zeova sẽn dat tɩ d maan bũmb ninsã fãa nafd-d lame. Neb nins sẽn tũud a Zeova noyã sũur nooma ne b mense, b vɩɩmã tara võore, b tara sũ-noog hakɩɩk me.—Yɩɩn. 19:9-13. w22.03 4 s. a 8-10

D sẽn met siglgã rot la d manesd-bã, naaga bũmb nins d sẽn maand n tũud a Zeova wã. Biiblã wilgdame tɩ sɛk-roogã tiibã ne a teedã maanegã ra yaa tʋʋm sẽn yaa sõng a Zeova nifẽ. (Yik. 36:1, 4) Rũndã-rũndã me, a Zeova getame tɩ Rĩungã rot la siglgã rot a taabã meeb yaa tʋʋmd sẽn yaa sõng a nifẽ. Saam-biis la saam-bi-pogs wʋsg kẽesda b sẽkã ro-kãensã meeb pʋgẽ. D sũur nooma ne b sẽn maand woto n teend Rĩungã tʋʋmã. Yaa vẽeneg tɩ b kẽesda b toog koe-moonegã pʋgẽ me. Kẽer pʋd n tõe n wa rat n lebga wakat fãa so-pakdba. B sã n wa kos n na n lebg so-pakdb tɩ mik tɩ bũmb pa gɩdg-ba, kãsem-dãmbã tõe n saka tʋʋll-tʋʋlle, tɩ wilg tɩ b teenda meebã tʋʋmde. D tara minim rotã meeb wɛɛngẽ tɩ d pa tar me, tõnd ned kam fãa tõe n sõng n zãa Rĩungã roto, la d ges tɩ b yɩ yɩlma. w22.03 22 s. 11-12