Tʋʋlgo

“Piis” nins yell a Zeezi sẽn gom Matiye 25:31-36 pʋgẽ wã makda nin-tɩrs nins sẽn vɩ dũniyã saab wakate, n saagdẽ n na n wa vɩɩmd wakat sẽn kõn sa tẽngã zugã, rat n yeel tɩ piis a taabã. Bũmb wʋsg la b maand n teend Kiristã ba-biis nins sẽn ket tẽngã zugã. Sẽn yɩɩd fãa b sõngd-b lame n tʋmd tʋʋmd ning sẽn yaa moon koɛɛgã dũniyã gill zug la sõng nebã tɩ b lebg a Zeezi karen-biisã. (Mat. 24:14; 28:19, 20) Yʋʋmd fãa, Tẽegrã daar sã n wa ket semen a wãna, piis a taabã sõngda Kiristã ba-biisã n pʋɩ sɛb dũniyã gill zugu, n na n bool nebã tɩ b wa naag-b n maan Tẽegrã. B sõngdame me n ges tɩ b tõog n maan Tẽegrã tigimsã fãa pʋsẽ dũniyã gill zugu. Piis a taabã sũy noomame, b sẽn paam n maand woto fãa n teend Kirist ba-biisã. B miime t’a Zeezi getame tɩ bũmb nins fãa b sẽn maand n sõngd a ba-biisã sẽn paam zaeebã, yaa yẽ mengã la b maand n sõngdẽ.—Mat. 25:37-40. w22.01 22 s. 11-12

Tõnd sã n tall a Zeezi zʋg-sõma wã buudu, la a manesmã sẽn da yaa to-to ne nebã, wala makre, a sẽn zoe wãoor nimbãanegã, a sẽn kʋm pag sẽn da bẽed bã-kɛgengã, la a sẽn zoe neb nimbãaneg b neb sẽn maan kaalem yĩngã, d rɩkda a Zeova me togs-n-taare. (Mark 1:40, 41; 5:25-34; Zã 11:33-35) D sã n modgd n dɩkd a Zeova togs-n-taare, tõnd ne yẽ zoodã pãng me na n paasdame. D sã n tũud a Zeezi naoã, na n kɩtame tɩ d ra bas tɩ bũmb nins sẽn be dũni-kãngã pʋgẽ wã tiis-d ye. Yʋng ning b sẽn na n yõk a Zeezi wã, a yeelame yaa: “Mam tõoga dũniyã.” (Zã 16:33) A ra rat n yeelame t’a pa bas tɩ dũniyã nebã sẽn tagsd to-to wã, b magbã la b tʋʋm-tʋmdɩ wã tõog-a ye. A Zeezi pa tol n yĩm bũmb ning yĩng b sẽn tʋm-a tẽngã zugã ye. Rat n yeel tɩ n kɩt t’a Zeova yʋʋrã paam waoogre. La tõnd yẽ? Dũni-kãngã pʋgẽ, bũmb wʋsg n be n tõe n tiis-du. La wa a Zeezi, d sã n lʋɩɩsd a Zeova raabã taoor d vɩɩmã pʋgẽ, tõnd me na n “tõoga” dũniyã.—1 Zã 5:5. w21.04 3-4 s. a 7-8

Tẽn-tʋmd a Poll ra mii a Zeezi sẽn pʋlem tɩ ‘ned ning fãa sẽn tẽed yẽ na n paama vɩɩm sẽn ka sɛtã.’ (Zã 3:16; Rom. 6:23) Yaa vẽeneg t’a Poll ra naaga neb nins sẽn da tẽed a Zeezi maoongã. A ra kɩsa sɩd t’a Zeova na n kõo yel-wẽn-maandb nins fãa sẽn tekd yam n kot sugrã sugri. (Yɩɩn. 86:5) A Poll leb n da tẽedame tɩ Wẽnnaam nong-a-la hal wʋsgo, bala a tʋma a Zeezi t’a wa ki yẽ yĩnga. Ges-y a Poll sẽn yeel bũmb ning Galat rãmb 2:20 wã baasgẽ tɩ kõt bas-m-yamã. A yeelame tɩ ‘Wẽnnaam Bi-riblã nonga maam n kõ b meng mam yĩnga.’ A Poll pa tags tɩ yẽ yaa nin-wẽnga, hal tɩ Wẽnnaam pa tõe n nong-a ye. A pa yeel yaa: ‘Mam mii a Zeova sẽn nong m tẽed-n-taasã võore. La m pa tẽed t’a tõe n nonga maam ye.’ A Poll tẽega Rom kiris-nebã tɩ “tõnd sẽn da ket n yaa yel-wẽn-maandba, Kirist kii tõnd yĩnga.” (Rom. 5:8) Ad Wẽnnaam sẽn nong tõnd to-to wã sɩd pa tar koak ye! A Poll ra kɩsa sɩd zãng tɩ Wẽnnaam nonglmã tara pãnga. A ra mii Wẽnnaam sẽn maan sũ-mar to-to ne Israyɛll nebã. w21.04 22 s. a 8-10

Y sã n wa zãmsd ned Biiblã, bɩ y sõng-a t’a wa nong a Zeova. Wãn to la y na n sõng-a? Bao-y segb n gomd a Zeova zʋg-sõma wã yell ne-a. Sõng-y-yã-a t’a bãng t’a Zeova yaa Wẽnnaam sẽn yaa sũ-noog soaba, sẽn sõngd neb nins sẽn nong-a wã. (1 Tɩm. 1:11; Ebre. 11:6) Wilg-y-yã-a t’a sã n tũud bũmb nins a sẽn zãmsdã, na n naf-a lame, la tɩ woto wilgdame t’a Zeova sɩd nong-a lame. (Eza. 48:17, 18) Y karen-biigã sẽn nong a Zeova to-to wã sã n tar paasgo, a na n tʋll n toeema bũmb kẽer a vɩɩmã pʋgẽ. Yaa tɩlɛ tɩ Biibl karen-biig modg n yaool n wa tõog n deeg lisgu. Yaa tɩlɛ ne Biibl karen-biis kẽer tɩ b sak n bõn b paoongo. Tõe n yɩɩ tɩlɛ ne karen-biis wʋsg tɩ b bas b zo-rãmb sẽn pa nong a Zeova. Kẽer zags rãmb sẽn pa nong a Zeova Kaset rãmbã na n daag-b lame n base. A Zeezi pʋlmame tɩ neb nins sẽn na n kell n tũ yẽ wã pa na n wa maan b bãngẽ ye. A Zeova na n keo-b lame, n kɩt tɩ b paam n naag a nin-buiidã sẽn yaa wa zak a ye neba, n nong taabã.—Mark 10:29, 30. w21.06 4 s. a 8-9

Tʋm-tʋmd a Poll rɩka koɛɛgã moonegã ne nebã zãmsgã n mak ne koobo, n wilg tɩ d pa segd n bʋtẽ bal ye. A tẽega Korẽnt kiris-nebã yaa: “Mam selame t’a Apolos zãgs koom . . . Yãmb yaa Wẽnnaam pʋʋg b sẽn koode.” (1 Kor. 3:6-9) Tõnd sẽn tʋmd ‘Wẽnnaam pʋʋgẽ’ wã, d sã n wa moond koɛɛgã, yaa wa d sẽn bʋt bõn-buudu. La d sã n wa zãmsd nebã Biiblã, yaa wa d sẽn zãgsd koom. La d miime tɩ yaa Wẽnnaam n kɩtd tɩ bõn-buudã bɩtẽ, rat n yeel tɩ yaa yẽ n takd nebã n wat a nengẽ. D sẽn paam n moond koɛɛgã la d zãmsd nebã Biiblã yaa zu-zẽkr tɛkẽ. Yaa tʋʋmd sẽn kõt-d sũ-noog hakɩɩka. Tʋm-tʋmd a Poll sõnga neb wʋsg Tesalonik tɩ b lebg a Zeezi karen-biisi. A wilga a sũ-noog ne rẽ, n yeel yaa: “Ãnd dãmb n yaa tõnd saagre, wall d sũ-noogo, pa rẽ bɩ d sũ-noog maanfo, tõnd Zu-soab a Zeezi taoor b waoongã wakate? Sɩd-sɩda, pa yãmb la? Hakɩɩka, yãmb n yaa tõnd ziir la d sũ-noogo.”—1 Tes. 2:19, 20; Tʋʋ. 17:1-4. w21.07 3 s. a 5; 7 s. 17

A Zeova taka tõnd ned kam fãa n wa a nengẽ. (Zã 6:44) Tags-y n ges-y rẽ sẽn dat n yɛɛlga. A Zeova sẽn maag a yĩng n fees neb milyaar-dãmbã fãa sẽn be dũniyã zugã sũyã, a yãa bũmb sẽn tar yõod wʋsg yãmb nengẽ. A yãame tɩ y yaa pʋ-peelem soaba, la tɩ y tõe n wa nong-a lame. (1 Kib. 28:9) A Zeova mii yãmba, n wʋmd y yɛlã võore, la a nong yãmba. Woto sɩd kengda raoodo! Yãmb yell sɩd paka a Zeova hal sõma. Y tẽed-n-taasã me yell pak-a lame. Sẽn na yɩl n wʋm rẽ võore, a Zeezi rɩka a Zeova n mak ne pe-kɩɩma. Piis koabg sʋk tɩ pesg a ye sã n meneme, bõe la pe-kɩɩmã na n maane? A na n “basa pis-wɛ la a wɛ wã tãensã zutu, la a kẽng n tɩ gẽes sẽn menem-a wã.” Pe-kɩɩmã sã n wa yãnd pesgã sẽn da menemã, a pa yikd a sũur ne-a ye. A na n kɩdma sũ-noogo. Woto wilgda tõnd bõe? Tigingã ned fãa tara yõod a Zeova nifẽ. A Zeezi yeelame: “M Ba sẽn be saasẽ wã pa rat tɩ baa kom-bõon-kãensã nin-yend sãam ye.”—Mat. 18:12-14. w21.06 20 s. a 1-2

D sã n tags d sẽn saagd n na n wa paam bũmb nins ka la bilfã, n paas Wẽnnaam sẽn nong tõnd ne nonglem-kãsengã yelle, kɩtdame tɩ d maneg n nong a Zeova, tɩ tõnd ne yẽ zoodã pãng me paasdẽ. (Rom. 8:38, 39) Sõng-da tõnd tɩ d rɩkd a Zeezi togs-n-taare. (1 Pɩy. 2:21) Tẽegrã sã n wa ket rasem a wãna, d karemda Biiblã kibay sẽn gomd a Zeezi sẽn maan bũmb nins a kũumã sẽn wa n ket semen a wãnã, kibay sẽn gomd a kũumã yelle, la a vʋʋgrã me yelle. Tẽegrã daar zaabre, sõsgã b sẽn wɛgsdã tẽegda tõnd t’a Zeezi nong-d lame. (Efɛ. 5:2; 1 Zã 3:16) D sã n karem kibay sẽn gomd a Zeezi mak-sõngã yell la d bʋgs a zugu, sõngda tõnd tɩ d rat n kell n kẽn “wa bãmb sẽn kẽn to-to wã.” (1 Zã 2:6) Kɩtdame tɩ d rat n kell n pa Wẽnnaam nonglmã pʋgẽ. (Ziid 20, 21) D paada Wẽnnaam nonglmã pʋgẽ, d sã n maand d sẽn tõe fãa n sakd-a, n waoogd a yʋʋrã, la d noogd a sũuri. (Yel. 27:11; Mat. 6:9; 1 Zã 5:3) D sẽn maand Tẽegrã sõngd-d lame tɩ d maneg n dat tɩ d sẽn vɩ to-to daar ne a to fãa wã tat a Zeova yam, tɩ yaa wa d sẽn yet a Zeova yaa: ‘Mam dat n paa fo nonglmã pʋgẽ wakat fãa yĩnga!’ w22.01 23 s. 17; 25 s. 18-19

A Zeova naana tõndo, tɩ d tõe n yãk d toorẽ yam. D tõe n yãka d sẽn dat n maan vɩɩmã pʋgẽ. D sã n yãk yam n na n tũ d Wẽnnaamã sẽn nong-dã, a sũur nooma ne rẽ. (Yɩɩn. 84:11; Yel. 27:11) D sẽn tõe n yãk d toorẽ yamã yĩnga, d tõe n yãka yam n maan bõn-sõma wʋsgo. D sã n yãk yam n lʋɩɩsd d taabã raab taoore, d rɩkda a Zeezi togs-n-taare. Daar a ye, a Zeezi ne a tʋm-tʋmdbã ra yɛɛ wʋsgo. B kẽnga zĩig sẽn yaa sɩddd n na n tɩ vʋʋse. La b pa paam n vʋʋs ye. Neb kʋʋng n wa b nengẽ, n da rat t’a Zeezi zãms-b bũmb wʋsgo. La a Zeezi sũur pa yik ye. B nimbãaneg pʋd n yõk-a lame. Bõe la a maan-yã? A “sɩngame n zãmsd-b bũmb wʋsgo.” (Mark 6:30-34) Wa a Zeezi, tõnd me sã n dɩkd d pãngã la d sẽkã n sõngd d taabã, waoogda d saasẽ Ba wã.—Mat. 5:14-16. w21.08 3 s. a 7-8

A Zeova pa rat tɩ bũmba fãa yaa yembr ye. A sẽn naan ninsaalbã la bũmb a taabã tɩ b yaa toor-toorã wilgda rẽ vẽenega. Ninsaal fãa yaa toor ne a to. A Zeova pa na n tol n dɩk yãmb n mak ne y taabã ye. A feesda y sũurã, n mi yãmb sẽn sɩd yaa ned ningã. (1 Sãm. 16:7) Sẽn paase, a mii yãmb sẽn tõe n maane, y sẽn pa tõe n maane, la b sẽn wub yãmb to-to wã. A pa na n kos-y tɩ y maan bũmb y sẽn pa tõe ye. D segd n dɩka a Zeova togs-n-taare, n get d mensã wa yẽ sẽn get tõnd to-to wã. Woto, d wilgdame tɩ d tara “yam-sõngo,” n pa getẽ tɩ ned sãoo tõndo, wall tɩ d sãoo d taabã ye. (Rom. 12:3) D tõe n dɩka yam neb a taabã mak-sõngã pʋgẽ. Wala makre, tõe tɩ d mii saam-biig bɩ saam-bi-poak sẽn tar minim wʋsg koɛɛgã mooneg pʋgẽ. (Ebre. 13:7) D tõe n gesa a sẽn maand to-to wã, tɩ sõng-d tɩ d paas d mengã minim koɛɛgã mooneg pʋgẽ. (Fili. 3:17) Rɩk yam ned mak-sõng pʋgẽ yaa toor fasɩ ne rɩk f meng n mak ne a soabã. w21.07 20 s. a 1-2

Y sã n maag y yĩng n ges rũmsã, tɩɩsã la ãdsã, na n sõng-y lame tɩ y maneg n kɩs sɩd tɩ Naand n be. (Yɩɩn. 19:2) Y sã n nong n get bõn-kãensã n bʋgsd b zugu, y na n maneg n kɩsa sɩd t’a Zeova la Naandã. Y sã n wa get bũmb nins a Zeova sẽn naanã, bɩ y maag y yĩng n bao n bãng rẽ sẽn wilgd tõnd bũmb ning d Naandã zugu. (Rom. 1:20) Wala makre, wĩntoogã tʋʋlmã la a vẽenemã yaa tɩlɛ bõn-vɩɩsã yĩnga. La wĩntoogã tara vẽenem buud a sẽn tʋrsde, tɩ pa sõma ne bõn-vɩɩsã ye. Yaa tɩlɛ tɩ ninsaalbã paam tɩ b kogl-b ne vẽenem-kãnga. Sɩd me, a Zeova kogenda tõnd ne rẽ. Wãn to? A naana tẽngã t’a tar pemsem buud b sẽn boond tɩ ozonn sẽn gũbgd tẽngã, n kokd vẽenem-kãng tɩ pa tat ninsaalbã ye. Wĩntoogã vẽenem-kãngã sã n paamd pãnga, ozonnã me pãng paasdame. Y sã n bʋgs rẽ zug neere, y pa ne tɩ yaa Wẽnnaam sẽn yaa d Naanda, la sẽn yaa yam-kãseng soabã n kɩt tɩ woto maandẽ sɩda? w21.08 17 s. a 9-10

Ned sã n wa reeg lisgu, d segd n kell n nong-a lame la d nand-a. (1 Zã 4:20) Wãn to la d tõe n maan rẽ? Bũmb a ye d sẽn tõe n maane, yaa d sẽn na n sak n deeg t’a tara yam-sõngo. Wala makre, a sã n wa maan bũmb tɩ d pa wʋmd a võore, d pa na n tags tɩ yaa ne yam-wẽng ye. D pʋd n na n wilgame tɩ d waoogd-a lame, n tagsdẽ t’a yɩɩda tõndo. (Rom. 12:10; Fili. 2:3) Maand-y nebã fãa neere, la y kʋmd b nimbãanega. D sã n dat n wa naag a Zeova zakã neb wakat sẽn kõn sa yĩnga, d segd n tũuda a Gomdã sẽn yet bũmb ningã. Wala makre, a Zeezi yeelame tɩ d maand nebã fãa neere, la d kʋmd b nimbãanega, baa d bɛɛbã menga. (Luk 6:32-36) Woto maaneg tõeeme n pa nana ye. Sã n wa yaa woto, d segd n talla a Zeezi tagsgã la a manesmã buudu. D sã n maand d sẽn tõe fãa n sakd a Zeova la d rɩkd a Zeezi togs-n-taare, d wilgda d saasẽ Ba wã tɩ d rat n yɩɩ a zakã ned wakat sẽn kõn sa yĩnga. w21.08 6 s. 14-15

Kell-y n teeg-y a Zeova. A pʋlmame t’a na n ning-d-la barka, d sã n teeg-a la d maand d sẽn tõe fãa a tʋʋmdã pʋgẽ. Biiblã tara kibay sẽn gomd neb sẽn tʋm a Zeova tʋʋmdã ne b sũy fãa yelle. B wʋsg yɩɩ b sẽn maan bũmb n wilg tɩ b teega a Zeova wã poor la b yaool n paam t’a ning-b barka. Wala makre, yɩɩ a Abrahaam sẽn sak n yi n bas a yirã “baa a sẽn da pa mi a sẽn dabdẽ wã” poor la a Zeova ning-a barka. (Ebre. 11:8) Yɩɩ a Zakoob sẽn mao ne malɛkã poor la a yaool n paam a Zeova barkã. (Sɩng. 32:25-31) Israyɛll nebã sẽn wa n dat n kẽ kãabg tẽngẽ wã, yɩɩ maan-kʋʋdbã sẽn tabg Zʋrdẽ kʋɩlgã poor la nin-buiidã tõog n pasg kʋɩlgã. (Zoz. 3:14-16) Rũndã-rũndã me, a Zeova Kaset rãmb n teeg a Zeova n tõog n tʋm a tʋʋmdã wʋsg n paase, tɩ d tõe n dɩk b togs-n-taare. w21.08 29-30 s. 12-14

Yãmb a saam-biis la saam-bi-pogs nins sẽn kʋʋlã maana kaset ne a Zeova siglgã sẽn da tʋmd a tʋʋmã to-to pĩndã. La y sakame n toeeme, n na n tũ yɛlã sẽn yaa to-to masã wã. Yãmb a neb nins sẽn kʋʋle, n deeg lisg tɩ nan pa kaoosã me tara y sẽn tõe n maan n sõng kom-bɩɩsã. B sã n kelgd yãmb sẽn togsd-b yɛl nins y sẽn yã y vɩɩmã pʋgẽ wã, la yam ning y sẽn dɩk rẽ pʋgẽ wã, b sũy na n yɩɩ noogo. Y sã n “nong n kõtẽ,” n tũnugd ne bũmb nins y sẽn bãng y vɩɩmã pʋgẽ wã n sõngd y taabã, a Zeova na n ning-y-la bark wʋsgo. (Luk 6:38) Yãmb a neb nins sẽn kʋʋlã, y sã n nong n pẽnegd kom-bɩɩsã, y na n tõog n kenga taab tẽebo. (Rom. 1:12) Ned fãa tara bũmb sẽn tar yõod wʋsg a to wã sẽn pa tare. Sẽn kʋʋl-bã tara yam la minim b sẽn paam yʋʋm wʋsg pʋgẽ. Kom-bɩɩsã me tara pãnga, la keelem. Kom-bɩɩsã ne sẽn kʋʋl-bã sã n naagd taab n tʋmd wa zo-rãmba, kɩtdame tɩ d saasẽ Ba wã yʋʋr paamd pẽgre, tɩ tigingã me paamd barka. w21.09 8 s. a 3; 13 s. a 17-18

Bõe yĩng t’a Zeezi kũumã sẽn yɩ to-to wã pa yɩ zʋɩf-rãmb wʋsg noogo? B sẽn yã tɩ b kaa a Zeezi ra-luk zug wa bi-bɛɛg la yel-wẽn-maandã kɩtame tɩ b pa sak n tẽ tɩ yẽ la Mesi wã ye. (Tõo. 21:22, 23) Zʋɩf-rãmb nins sẽn pa tẽ a Zeezi wã pa sak n deeg t’a ra pa tar taale, tɩ b rõd-a lame, la tɩ b nams-a-la zaalem yĩng bal ye. Neb nins sẽn kao a Zeezi bʋʋdã pa kao bʋʋdã tɩrg ye. Zʋɩf-rãmbã bʋ-kaoodb sull ning sẽn tar noor n tɩ yɩɩdã yɩɩ yãg-yãg n tigim taaba. Rẽ me, b sẽn kao bʋʋdã to-to wã pa tol n zems ne bʋ-kaoorã noy ye. (Luk 22:54; Zã 18:24) Bʋ-kaoodbã ra segd n maaga b yĩng n kelg nebã sẽn yet bũmb nins n na n ning a Zeezi taalã, la b pa maan woto ye. Bãmb mensã baoo ‘bũmb n na n dõd a Zeezi n paam n kʋ-a.’ (Mat. 26:59; Mark 14:55-64) A Zeezi sẽn wa n vʋʋgã poore, bʋ-kaood-kãensã sẽn pa maand sẽn yaa tɩrgã kõo Rom sodaas nins sẽn da gũud a Zeezi yaoogã “wanzuri ligd wʋsgo,” tɩ b sã n wa sok yaoogã sẽn yaa vɩʋʋgã võor bɩ b yag ziri.—Mat. 28:11-15. w21.05 11 s. 12-13

A Zeova ra tõe n sãama dũniyã, sẽn yaa wakat ning fãa. La a sẽn maand sũ-marã sõngda tõnd hal wʋsgo. A Ãdem ne a Awa yagensã fãa rogdame n yaa neb sẽn pa zems zãnga. Baa ne rẽ, a Zeova nong-b lame la a get b yelle, la a pʋlem me t’a na n sãama dũni-wẽn-kãngã. (1 Zã 4:19) La a yãka wakat n na n sɩd maan woto. Rẽ yĩnga, a Zeova sẽn nong tõnd woto wã pa segd n kɩt tɩ tõnd me maan d sẽn tõe fãa n tõog toog sɩda? Tõog-toogã wɛɛngẽ, a Zeova n kõ mak-sõng sẽn ka to. A Zeezi rɩka a Ba wã togs-n-taare, n tõog toogo. A Zeezi sẽn wa n be tẽngã zugã, a saka yaalgo, paoogre, la a reeg toog ra-luk zug tõnd yĩnga. (Ebre. 12:2, 3) Sãmbg kae t’a Zeova sẽn tõogd toogã, sõnga a Zeezi tɩ yẽ me tõog toogo. Tõe n sõnga tõnd me tɩ d tõog toogo. w21.07 12-13 s. 15-17

Daar faa, d saasẽ Ba wã kõta tõnd d beegrã sugri. (Yɩɩn. 103:10-14) A Zeezi karen-biisã ra pa zems zãnga, n yaa koangdba. La baa ne rẽ, a ra kõt-b-la b kongrã sugri. A pʋd n yãka yam n sak n kõ a vɩɩmã tɩ yɩ maoongo, tɩ d tõe n paam d yel-wẽnã sugri. (1 Zã 2:1, 2) D sã n sakd n kõt d tẽed-n-taasã sugri, d na n maneg n nong-b lame. (Efɛ. 4:32) Wakat ninga, yɩl n kõ d taabã sugr tõeeme n pa yɩ nana ye. Woto baoodame tɩ d maan modgre. Saam-bi-poak a ye yeelame tɩ Gũusg Gasg a ye sõsg n sõng-a t’a tõog n maan woto. Sõsgã gom-zug ra yaa: “Kot-y taab sugri.” Ad a sẽn yeele: “Sõs-kãng pʋgẽ, b yeelame tɩ sak n kõ f to sugrã pa rat n yeel tɩ f mum f nin a manesem-wẽng taoore, wall f tags t’a sẽn maanã pa maneg n yaa wẽng ye. Rat n yeelame tɩ f segd n basa taale, n da tall sũ-kẽk ye.” D sã n sakd n kõt d tẽed-n-taasã sugri, d wilgdame tɩ d nong-b lame, la tɩ d rɩkda d saasẽ Ba a Zeova togs-n-taare. w21.09 23-24 s. 15-16

A Zeezi nonga sɩdã, rat n yeel tɩ sɩdã Wẽnnaam zugu, la Wẽnnaam daabã. A Zeezi sẽn da vɩ to-to wã ra zemsa ne a sẽn da tẽed bũmb ningã. La a sõnga neb a taabã tɩ b bãng a sẽn tẽed bũmb ninsã. (Zã 18:37) A Zeezi karen-biis hakɩɩkã me ra nonga sɩdã ne b sũy fãa. (Zã 4:23) Tẽn-tʋmd a Pɩyɛɛr pʋd n boola kiris-neb tũudmã tɩ “sɩdã sorã.” (2 Pɩy. 2:2) Pipi kiris-nebã sẽn da nong sɩdã ne b sũy fãa wã yĩnga, b zãaga b mens ne tũudum a taabã neb sẽn da yet bũmb ninsã, rog-n-migsã, la tagsa nins fãa sẽn pa zems ne sɩdã. (Kol. 2:8) Rũndã-rũndã me, kiris-neb hakɩɩkã modgdame tɩ b sẽn tẽed bũmb ninsã fãa, la b sẽn vɩ to-to wã zemsd ne a Zeova Gomdã, tɩ wilgd vẽeneg tɩ b “ket n kẽnda sɩdã pʋgẽ.” (3 Zã 3, 4) A Zeova Kaset rãmbã pa yetẽ tɩ b wʋmda bũmb fãa võor sõma Biiblã pʋgẽ ye. Wakat ninga, b sẽn bilgd Biiblã gomd ning võor to-to wã, wall b sẽn sigind yɛl kẽer to-to wã pa tolg n zems kɛpɩ ye. B sã n wa wʋm yɛl kẽer võor sõma n paas tɩ yaa tɩlɛ tɩ b toeem bumb kẽere, b toeemdame. w21.10 21-22 s. 11-12

Pĩnd wẽndẽ wã, b ra meta lalg n gũbg tẽnga, nin-buiidã koglg yĩnga. Woto me, a Zeova nonglem-kãsengã yĩnga, a kogenda tõnd ne bũmb nins fãa sẽn tõe n sãam tõnd ne yẽ zoodã. Sẽn paase, a Zeova nonglem-kãsengã yĩnga, a takda tõnd n pẽnegd a menga. (Zer. 31:3) Yɩɩn-gʋlsd a Davɩɩd leb n dɩka makre, n wilg Wẽnnaam sẽn kogend a nin-buiidã to-to wã. A yeelame: “Yãmb yaa mam pãng soaba, . . . Wẽnnaam sẽn nong maamã yaa mam pãng zĩiga.” A Davɩɩd goma a Zeova yell me, n yeel yaa: “Sẽn-Ka-Saab yaa mam maan-neer soaba. Bãmb yaa mam pãng zĩiga, la m zĩ-soalgdga, la m fãagda. Bãmb yaa mam gãongo, la m zĩ-lilldga.” (Yɩɩn. 59:18; 144:2) Bõe yĩng t’a Davɩɩd rɩk a Zeova nonglem-kãsengã n mak ne zĩ-soalgdg la pãng zĩiga? Bala d sẽn tũud a Zeova wã, sẽn yaa zĩig ning fãa la d be, a na n kogl-d lame tɩ baa fʋɩ ra sãam zood ning d sẽn tar ne-a wã ye. w21.11 6 s. 14-15

Daar a ye, a Zeezi ne a karen-biisã ra bee koom-koglg pʋgẽ n togd sore, tɩ sob-kãseng yik mogrã zugu. La a Zeezi tũnuga ne bũmb ning sẽn maanã n sõng-b tɩ b bãng tɩ b segd n talla tẽeb sẽn tar pãnga. (Mat. 8:23-26) Baa ne sobgã sẽn da fugd wʋsg tɩ ko-pɛmã zẽkd n kẽed koglgã pʋgẽ wã, a Zeezi ra maaga a yĩng n gõe. Rabeem kẽe a karen-biisã, tɩ b nek-a n kos-a t’a fãag-ba. La a Zeezi sok-b-la ne bʋgsem yaa: “Yãmb a tẽeb bilf rãmba, bõe yĩng tɩ yãmb yɛɛsd woto?” Yãmb me maooda ne zu-loees sẽn yaa wa “sob-kãseng” bɩ? Tõe tɩ y sẽn maood ne zu-loees ninsã yaa sabab-wẽng yĩnga. Tõe me tɩ yaa bã-kɛgeng n namsd yãmba, tɩ y koms raoodo, n pa mi y sẽn maandg ye. Y tõe n maanda yɩɩr wakat ninga, la ra bas-y tɩ yɩɩrã kɩt tɩ y pa teeg a Zeova ye. Pelgd-y y pʋg n pʋʋsd-a, tɩ y zoodã pãng paase. Bʋgsd-y bũmb nins a Zeova sẽn maan pĩndã n sõng yãmbã zugu. (Yɩɩn. 77:12) Y tõe n basa y yam t’a pa na n tol n daag yãmb n bas a bada. w21.11 22 s. a 7, 10

Nina tõe n tagsame t’a sã n pa rɩkd a sẽn pa so bala, a tũuda no-kãngã. La a yaool n tõe n maanda bũmb a taab sẽn wilgd t’a zuudame.Wala makre, lɛɛbd sã n tar zãmb-makdg n makd a teedã n wẽgd a raadensã, d tõe n yeelame t’a zuud-b lame. Maan-kʋʋr 19:13 wilgdame tɩ ned sã n pa maand pʋ-peelem a nug-tʋʋmdã pʋgẽ, yaa wagdem. B yeta be yaa: “Bɩ f ra wẽg f to” ye. Dẽnd ned sã n wẽgd a taabã a nug-tʋʋmdã pʋgẽ, yaa wagdem la fãabo. Yaa sɩd tɩ tõog a nii-n-soabã wilgame tɩ wagdem pa sõma ye. La vɛrse-rãmb a taab sẽn be Maan-kʋʋr sebrã pʋgẽ sõngda tõnd tɩ d bãng d sẽn tõe n wilg d sẽn maandã fãa pʋgẽ to-to tɩ d yaa pʋ-peelem dãmba. Tara yõod wʋsg tɩ d tags a Zeova sẽn yet bũmb ning pʋ-likã la wagdmã wɛɛngẽ wã. D tõe n soka d meng yaa: ‘Sẽn zems ne Maan-kʋʋr 19:11-13, bũmb la m maand m vɩɩmã pʋgẽ tɩ pa sõma bɩ? M nug-tʋʋmdã pʋgẽ, bũmb la m segd n dems bɩ?’ w21.12 9-10 s. a 6-8

Yãmb mengã pʋʋsgã pʋgẽ, bɩ y tags bũmb takɩ y sẽn maan daarã pʋgẽ tɩ pa sõma, la y kos a Zeova sugr dẽ yĩnga. Y sã n beeg tɩ beegrã yaa kãsenga, y segdame me n tɩ kos kãsem-dãmbã sõngre. B na n kelg-y lame la b kõ-y sagls sẽn yit Wẽnnaam Gomdã pʋgẽ. B na n naag-y lame n pʋʋse, n kos a Zeova t’a kell n sõng-y ne a Zeezi maoongã maasem tɩ y “paam laafɩ” tẽebã wɛɛngẽ. (Zak 5:14-16) Yɩta sõma me tɩ y bʋgs Kirist maoongã zugu. Tõe tɩ y sã n tags b sẽn nams Wẽnnaam Bi-riblã to-to wã, y sũur sãamdame. La y sã n bʋgsd maoong ning a sẽn kõ wã zugu, y na n maneg n nonga yẽ ne a Ba wã. Yʋʋmd fãa d manegd n wilgame tɩ d sũur nooma ne Kirist maoongã, d sẽn kẽnd a Zeezi Kirist kũumã tẽegrã, la d sẽn boond neb a taabã tɩ b wa naag-dã. A Zeova sẽn kɩt tɩ d tõe n sõng nebã tɩ b bãng a Bi-riblã sɩd yaa zu-zẽkre! w21.04 18-19 s. 13-16

Tẽeg-y a Zeezi manesem sẽn yɩ to-to, neb kʋʋng sẽn da wa a nengẽ tãng a ye sɛɛgẽ wã. A Zeezi ra pʋʋsa yʋngã tõre. Dẽnd a tog n da yɛɛ wʋsgo. La a sẽn yã kʋʋngã, b sʋkã naong rãmbã la bãad-rãmbã nimbãaneg yõk-a lame. A pa sãoog b bãasã bal ye. A sõsa ne-b sõma n kẽng b raoodo, hal t’a sõsgã buud zɩ n zĩnd ye. B boonda sõs-kãng t’a Zeezi tãng zug zãmsgã. (Luk 6:12-20)A Zeezi ra sakd n dɩkda a sẽkã n sõngd nebã. Mams-y n ges-y a Zeezi sũur sẽn sãam to-to, a sẽn wa n wʋm tɩ b fiuuga a zoa a Zãmbatiis zugã. Ad Biiblã sẽn yeele: “A Zeezi sẽn wʋm dẽ, b yii be n kẽ koom-koglg n kẽng zĩig neb sẽn pa beẽ sẽn na yɩl n yɩ b yembre.” (Mat. 14:10-13) La neb kʋʋng n deng-a zĩig ning a sẽn da rabdã. (Mark 6:31-33) A bãngame tɩ b ra rata sõngr la belsgo. La tao-tao bala, a maana bũmb n na n sõng-ba.—Luk 9:10, 11. w22.02 21 s. a 4, 6

D sã n wa bãng tɩ d maana bũmb tɩ sãam d tẽed-n-taag sũuri, bõe la d segd n maane? D segd n pelga d pʋg n pʋʋs a Zeova. D tõe n kos-a lame t’a ning d modgrã barka, tɩ d tõog tɩ laafɩ le zĩnd tõnd ne d tẽed-n-taagã sʋka. D segdame me n bao sẽk n fees d menga. D tõe n soka d meng yaa: ‘Mam yaa ned sẽn sakd n deeg a kongre, n sik a meng n kos sugri, la a modg tɩ laafɩ le zĩnd bɩ? Mam sã n yãk yam n na n modg tɩ laafɩ le zĩnd maam ne m tẽed-n-taag sʋka, a Zeova ne a Zeezi tagsg na n yɩɩ wãna?’ D sẽn na n leok sogs-kãensã to-to wã na n sõng-d lame tɩ d kelg a Zeezi, n sik d meng n tɩ sõs ne d tẽed-n-taagã, sẽn na yɩl tɩ laafɩ le zĩnd d sʋka. D sã n tɩ yã d tẽed-n-taag n na n welg yell sẽn be tõnd ne yẽ sʋka, d segd n talla sik-m-menga. (Efɛ. 4:2, 3) D segd n tɩ sõsa ne-a, n sigs a sũur n paam tɩ laafɩ le zĩnd d sʋka. Tẽeg-y tɩ y sẽn na n modg tɩ laafɩ le zĩnd yãmb ne y tẽed-n-taag sʋkã n tar yõod n yɩɩd y sẽn na n bao n bãng ãnd n tar bʋʋm la ãnd n ka bʋʋm.—1 Kor. 6:7. w21.12 26 s. 13-16

A Zeezi sũur sãamame, bala a ra miime tɩ zʋɩf-rãmb wʋsg pa na n sak Rĩungã koe-noogã ye. Woto yĩnga, b na n sãama Zerizalɛm, tɩ zʋɩf-rãmb nins fãa sẽn na n põs sãoongã sasa wã loog yembdo. (Luk 21:20-24) Bʋko, wa a Zeezi sẽn da yeelã, neb wʋsg pa sak n tẽ-a ye. Yãmb babgẽ wã, nebã sakd n kelgda Rĩungã koe-noogã bɩ? Sã n mikame tɩ yaa neb kar-kar bal n sakdẽ tɩ y zãmsd-b Biiblã, bõe la a Zeezi sẽn daag nintãmã tõe n sõng-y tɩ y bãnge? Ninsaalbã yell paka a Zeova. A Zeezi sẽn daag nintãmã tẽegda tõnd tɩ ninsaalbã yell paka a Zeova hal wʋsgo. “B pa rat tɩ ned baa a ye sãam ye. B ratame tɩ nebã fãa tek yam n kos sugri.” (2 Pɩy. 3:9) Rũndã-rũndã, d wilgdame tɩ d nonga d taabã, d sã n ket n modgdẽ sẽn na yɩl n sõng-b tɩ b wʋm Rĩungã koe-noogã.—Mat. 22:39. w22.01 16 s. 10-12

Y sã n bʋgsd a Zeova sẽn zoe n maan bũmb ning a nin-buiidã yĩngã zugu, la y tags bũmb nins a sẽn maan n sõng yãmbã me yelle, y tẽebã pãng na n paasdame. Sẽn tar yõod n tɩ yɩɩda, y na n maneg n nonga a Zeova. Zʋg-sõma wã fãa sʋka, nonglmã n na n sõng yãmb n yɩɩd tɩ y sakd a Zeova, n maand bũmb nins sẽn noom-a, la y tõogd toog zu-loees sasa. (Mat. 22:37-39; 1 Kor. 13:4, 7; 1 Zã 5:3) D sã n tar zood sõma ne a Zeova, bũmb ka be t’a yõodã ta rẽ ye. (Yɩɩn. 63:2-8) Tẽeg-y tɩ pʋʋsgã, Biiblã zãmsgã la bʋgsgã naaga d tũudmã yɛla. Wala a Zeezi, baood-y zĩig bʋʋr sẽn kae, n pʋʋsd a Zeova la y zãmsd Biiblã. Ra bas-y tɩ bũmb tiis-y ye. Kos-y-yã a Zeova t’a sõng-y tɩ y yam da yuusi, y sã n wa pʋʋsdẽ, bɩ n zãmsd Biiblã wall tigissã sasa. Y sã n modg masã meng sẽn na yɩl n da sãam y sẽkã, a Zeova na n ninga y modgrã barka, tɩ y wa paam n vɩɩmd wakat sẽn kõn sa dũni-paalgã pʋgẽ.—Mark 4:24. w22.01 31 s. 18-20

Naoor wʋsgo, yaa d sẽn tagsd bũmb nins yellã la d maanda. Rẽ n so t’a Zeezi yeel tɩ d zãag d meng ne tagsa sẽn tõe n wa kɩt tɩ d maan yel-wẽn-kãsengã. (Mat. 5:21, 22, 28, 29) D rat n taa d saasẽ Ba a Zeova yam, bɩ bõe? Dẽnd tara yõod wʋsg tɩ tags-wẽng sã n wa d yamẽ wã bɩ d yiis-a tao-tao. A Zeezi yeelame: “Bũmb ning fãa sẽn yit noorẽ wã yita sũurẽ.” (Mat. 15:18) Vẽenega, d no-goamã wilgda d sẽn sɩd yaa ned ninga. Rẽ wã, sok-y y meng yaa: ‘Sã n wa mik tɩ m sã n togs sɩda, m na n paama yelle, m baasd n togsa sɩd bɩ? M sã n kẽe kãadem, m gũusdame n da wa tall rolsem manesem ne rao wall pag a to bɩ? M zãagda m meng fasɩ ne gom-dẽgd bɩ? Ned sã n sãam m sũuri, m leokda a soab ne bʋgsem bɩ?’ Y sã n maag y yĩng n tags sogs-kãensã zugu, na n sõng-y lame. D sã n maan d sẽn tõe fãa n zãag d meng ne tʋya, ziri-n-beedo, la gom-dẽgdo, na n yɩɩ nana ne-d tɩ d tõog n yeeg nin-kʋdgã. w22.03 5 s. 12-14

Ned sẽn kot saglga, n pa gũud wakat fãa tɩ ned wa sagl-a paamda yam n yɩɩd ned sẽn pa kot saglga. Rẽ wã, nong-y n kot-y saglse. Wakat-bʋg la d tõe n kos sagls d tẽed-n-taag nengẽ? Ad makr a wãna: 1) Saam-bi-poak n kos koe-moond sẽn tar minim t’a yãag-a tɩ b tɩ zãms ned Biiblã. Rẽ poore, a soka koe-moondã yẽ me sẽn tõe n maan t’a minimã paase. 2) Saam-pi-poak sẽn pa kẽ kãadem n dat n da pãntalõ. A kosa saam-bi-poak a to tẽeb sẽn bɩ, t’a ges a sẽn dat n da a soabã sã n sakdame. 3) Saam-biig la b yãk t’a na n wɛgs a pipi sõsg zãma wã yĩnga. A kosa saam-biig sẽn tar minim sõssã wɛgsg wɛɛngẽ, tɩ sõsgã sasa bɩ a kelg neere, n wa tõog n kõ-a sagls tɩ yẽ me minimã paase. Baa saam-biig sã n sɩng n wɛgsda sõss hal yʋʋm wʋsgo, yɩta sõma t’a mi n kot sõngr a woto, la a tũud saglsã a sẽn paamdã.—Yel. 19:20. w22.02 13 s. 15-17

A Zeova nong-d lame la a get d yelle, wa a sẽn nong a Zeezi la a ges a yell to-to a sẽn wa n tʋm-a tẽngã zugã. (Zã 5:20) A sõnga a Zeezi t’a tẽebã paam pãnga, n keng a raood a sũur sẽn wa n sãame, la a sõng-a t’a paam bũmb nins sẽn yaa tɩlɛ ne a vɩɩmã. Sẽn paase, a Zeova togsa a Bi-riblã t’a nong-a lame, la t’a sũur nooma ne-a. (Mat. 3:16, 17) A Zeezi sẽn da tõe n teeg a saasẽ Ba wã sẽn nong-a wã yĩnga, kɩtame t’a ra pa get t’a yaa a yembr ye. Wa a Zeezi, tõnd me yãa bũmb wʋsg a Zeova sẽn maan n wilg t’a nong-d lame. Tags-y n ges-y. A Zeova sakame tɩ d lebg a zoa, la a kɩt tɩ d tar tẽed-n-taas sẽn nong-do, la b kengd d raood d sũy sã n wa sãame. (Zã 6:44) A Zeova kɩtame me tɩ d paamd bũmb nins sẽn yaa tɩlɛ d tẽebã kengr yĩngã, hal tɩ sekdẽ. Sẽn paase, a kɩtame tɩ d paamd bũmb nins sẽn yaa tɩlɛ ne d vɩɩmã. (Mat. 6:31, 32) D sã n tags a Zeova sẽn nong tõnd to-to wã yelle, d manegd n nong-a lame. w21.09 22 s. a 8-9

Nand tɩ y sɩng Biiblã zãmsg ne a Zeova Kaset rãmbã, y vɩɩmã ra yaa wãn to? D sʋkã neb wʋsg pa rat n le tẽeg rẽ yell ye. Tõe tɩ y yel-manesmã, la y sẽn da yaa ned ning buudã ra tika dũniyã nebã sẽn da get tɩ yaa sõma wall wẽngã zugu. Sã n yaa woto, dẽnd y ra “pa tẽed manegre, la y ra pa mi Wẽnnaam dũniyã pʋgẽ ye.” (Efɛ. 2:12) La y sẽn wa n zãmsd Biiblã, y bãngame tɩ y tara saasẽ Ba sẽn nong-y hal wʋsgo. Y bãngame me tɩ y sã n dat n ta a Zeova yam, la y paam me n naag a nin-buiidã n tũud-a, y segd n toeema y yel-manesmã, y tagsa wã, la y sẽn vɩ to-to wã. Y ra segd n modgdame n maand Wẽnnaam sẽn datã, la y zãagd y meng ne a sẽn kisã. (Efɛ. 5:3-5) A Zeova sẽn yaa d Naand la d saasẽ Ba wã, a tara sor n na n wilg neb nins sẽn tũud-a wã sẽn yaa wa a zakã nebã b yel-manesem sẽn segd n yɩ to-to. A ratame tɩ nand tɩ d wa reeg lisgu, bɩ d maan d sẽn tõe fãa n “yeeg nin-kʋdgã ne a tʋʋmã. w22.03 2 s. a 1-3

Piis a taabã sũy noomame, b sẽn paam n naagd n maand Tẽegrã, la b tagsd bũmb ning b sẽn saagd n na n paamã yellã. B gũuda Tẽegrã sõsgã ne b sũy fãa n na n kelge. Bala sõsgã sasa, b wilgda Kiristã ne a na-rɩt-n-taas 144000 sẽn na n maan bũmb nins n kõ wẽn-sakdbã, b naamã sẽn na n kaoos yʋʋm tusrã sasa. Neb nins sẽn na n tɩ rɩ naam saasẽ wã na n sõnga b Rĩm a Zeezi Kiristi, n kɩt tɩ tẽngã gill lebg arzãna, la b sõng wẽn-sakdbã tɩ b wa lebg neb sẽn zems zãnga. Neb milyõ-rãmbã sẽn naagd n maand Tẽegrã sã n tags Biiblã bãngr-goam kẽer sẽn na n wa paam pidsgã yelle, kõt-b-la sũ-noog meng-menga. Wala makre, Biiblã sẽn pĩnd n togs bũmb ning tɩ be Ezayi 35:5, 6, ne 65:21-23, la Vẽnegr 21:3, 4. B sã n mams b yamẽ, n ne bãmb ne neb nins b sẽn nongã sẽn be dũni-paalgã pʋgẽ, b sẽn saagd n na n wa paam bũmb ningã manegd n lebga vẽeneg b yamẽ, la b rat me n ket n maand b sẽn tõe fãa n da wa bas a Zeova tũub ye.—Mat. 24:13; Gal. 6:9. w22.01 21 s. a 5-7

A Zeezi sẽn ki tɩ yɩ maoongã, yɩɩ yaood a sẽn yao n na n deeg bũmb ning a Ãdem sẽn bõnã. (1 Kor. 15:22) Bõe yĩng tɩ rẽ yaa tɩlɛ ne-do? Bala noy nins a Zeova sẽn gãneg tɩrlmã wɛɛngẽ a tõogã pʋgẽ wã wilga tɩlɛ tɩ b segd n yaoo vɩɩm, vɩɩm yĩnga. (Yik. 21:23, 24) A Ãdem bõna a vɩɩmã sẽn zems zãngã. A Zeezi kõo a ninsaal vɩɩmã sẽn zems zãngã tɩ yɩ maoongo, tɩ zems ne Wẽnnaam tɩrlmã. (Rom. 5:17) Woto kɩtame t’a Zeezi lebg “ba sẽn paad wakat sẽn ka sɛta,” neb nins fãa sẽn tẽed a maoongã yĩnga. (Eza. 9:5; Rom. 3:23, 24) A Zeezi sakame n kõ a vɩɩmã sẽn zems zãngã tɩ yɩ maoongo, a sẽn nong a saasẽ Ba wã la a nong tõnd me wã yĩnga. (Zã 14:31; 15:13) Nonglem-kãng kɩtame t’a yãk yam ne a sũur fãa n na n kell n sak a Ba wã a vɩɩmã tõre, la a pids a raabã. A Zeezi sẽn kell n maan sɩd ne a Zeova n tãag a kũumã wilgda rẽ. Woto kɩtame t’a Zeova sẽn da rat tɩ ninsaalbã vɩɩm la tẽngã yɩ to-to sɩngrẽ wã na n pidsi. w21.04 14 s. a 2-3