Tʋʋl-nifu

A Zeezi wilgame t’a nonga tõnd hal wʋsgo, a sẽn sak n kõ a vɩɩmã tõnd yĩngã. (Zã 15:13) D pa tol n tõe n yao n dol a Zeova ne a Zeezi, bũmb ning b sẽn maan n wilg tɩ b nong-d lame wã yĩng ye. La d tõe n wilga ne d sẽn vɩ to-to daar fãa wã, tɩ d sũur nooma ne b sẽn maan bũmb ning tõnd yĩngã. (Kol. 3:15) Sẽn paam-b zaeebã sũur noom wʋsg ne a Zeezi kũumã sẽn yɩ yaoodã. Bala, kɩtame tɩ b saagdẽ n na n tɩ vɩɩmd saasẽ. (Mat. 20:28) B sẽn tẽed Kirist kũumã sẽn yɩ maoongã yĩnga, a Zeova geelg-b-la wa nin-tɩrse, n boond-b t’a kamba. (Rom. 5:1; 8:15-17, 23) Piis a taabã me sũy nooma wʋsgo, a Zeezi kũumã sẽn yɩ yaoodã. B sẽn tẽed Kirist kũumã sẽn yɩ maoongã yĩnga, b tara yʋ-noog Wẽnnaam taoore, la b saagdẽ me n na n wa “põs to-kãsengã sasa.” (Vẽn. 7:13-15) Sẽn paam-b zaeebã ne piis a taabã wilgdame tɩ b sũy nooma ne Kirist kũumã sẽn yɩ yaoodã, b sẽn naagd n maand Tẽegrã yʋʋmd fãa wã. w22.01 23 s. 14-15

Bũmb ning b sẽn tik n na n kʋ a Zeezi wã n da zabd-a n yɩɩda. Bala b rõd-a lame t’a yaa wẽn-tʋʋsa, rat n yeel tɩ ned sẽn pa waoogd Wẽnnaam wall a yʋʋrã baa bilf ye. (Mat. 26:64-66) Rẽ ra namsd-a-la wʋsgo, hal t’a ra rat t’a Ba wã kɩt t’a gil yel-kãngã sẽn yaa paoogrã. (Mat. 26:38, 39, 42) B ra segd n kaa a Zeezi ra-luk zugu, sẽn na yɩl tɩ zʋɩf-rãmbã paam b mens ne kãab-wẽnga. (Gal. 3:10) Sɩngrẽ wã, b ra pʋlmame tɩ b na n tũu Wẽnnaam tõogã, la b pa maan woto baa bilfu. Dẽnd kãab-wẽngã ra bee b zugu, tɩ b leb n da segd ne kũum me, b sẽn yaa a Ãdem yagensã yĩnga. (Rom. 5:12) Wẽnnaam Tõogã pʋgẽ, b ra wilgame tɩ ned sã n da maan yel-wẽnd sẽn segd ne kũum, b tog n kʋʋ a soabã. Rẽ poore, b ra tõe n yagla a kũumã ra-luk zugu. (Tõo. 21:22, 23; 27:26) Dẽnd b sẽn ka a Zeezi ra-luk zugã kɩtame tɩ buud ning sẽn pa sak-a wã meng tõe n wa paam n dɩ a maoongã nafa. w21.04 16 s. a 5-6

Mams-y n ges-y a Zeezi yaoolem daarã tẽngã zugã sẽn yɩ to-to. Rom sodaasã pãb-a-la ne wẽnem. (Mat. 26:52-54; Zã 18:3; 19:1) B pãb-a-la ne kalwaas sẽn bugd yĩngã nemse. Rẽ poore b kɩtame t’a palg ra-luk sẽn zɩs wʋsg a poorã sẽn da sĩind zɩɩmã zugu. A Zeezi sɩngame n vuud ra-lukã n debd zĩig ning b sẽn na n tɩ ka-a wã. La b kɩtame tɩ rao sẽn da yas beenẽ reeg raoogã n tʋke. (Mat. 27:32) A Zeezi sẽn ta zĩig ning b sẽn na n kʋ-a wã, sodaasã kaa a nusã ne a naoã raoogã zugu. A Zeezi zɩslmã kɩtame tɩ põent-rãmbã ra yãsgd a sãmpoagã n paasdẽ. A zo-rãmbã sũur da sãamame, t’a ma wã ra yãbda. La zʋɩf-rãmbã taoor dãmbã yẽ ra laad-a lame. (Luk 23:32-38; Zã 19:25) Yɩɩ toog woo toog n kaoos lɛɛr-dãmba. A sũurã ne a fulfuudã ra yõbgame, t’a vʋʋsgã ra lebgd toog n paasdẽ. Nand t’a Zeezi ki, a pʋʋsa a Zeova a yaoolem pʋʋsgo, n wilg t’a tõog n kell n maana sɩd n tãag a yõor tɛka. Rẽ poore a sulga a zugu, n ki. (Mark 15:37; Luk 23:46; Zã 10:18; 19:30) Ad sɩd yɩɩ kũum sẽn yɩ toog wʋsgo, sẽn wogle, la sẽn yɩ paoogr menga! w21.04 16 s. a 4

A Zeezi goma kaool a yiib yell ne a tẽn-tʋmdb nins sẽn kell n maan sɩd ne-a wã. Yaa kaool-paalgã, ne Rĩungã kaoolã. (Luk 22:20, 28-30) Kaool-kãensã paka sore, t’a tẽn-tʋmdb 11 wã, n paas neb sõor bilf bal na n paam n kẽng saasẽ n tɩ yɩ rĩm-dãmb la maan-kʋʋdba. (Vẽn. 5:10; 14:1) Yaa sẽn paam-b zaeeb n ket tẽngã zugu, n naag kaool-kãensã a yiibã pʋgẽ wã bal n tõe n wãb burã la b yũ divẽ wã Tẽegrã sasa. A Zeova kɩtame tɩ b saagd n na n wa tɩ vɩɩmd saasẽ, n pa le tõe n ki tɩ b gomd yĩng põogr ye. Sɩd me, b na n tɩ naaga a Zeezi Kirist ne neb 144 000 sʋk neb nins sẽn zoe n be saasẽ wã n dɩ naam. La sẽn yɩɩd fãa, b na n paam n yãa a Zeova mengã. (1 Kor. 15:51-53; 1 Zã 3:2) B mii vẽeneg tɩ b segd n kell n saka a Zeova n tãag b kũum.—2 Tɩm. 4:7, 8. w22.01 21 s. a 4-5

B ra kaa bi-bees a yiib n yɛgl a Zeezi. (Luk 23:40, 41) B nin-yend yeela a Zeezi yaa: “Yãmb sã n wa be y Rĩungã pʋgẽ bɩ y tẽeg mam yelle.” (Luk 23:42) A Zeezi sẽn mi t’a Ba wã yaa nimbãan-zoɛtã, a togsa gomde, tɩ raoã sẽn yaa bi-bɛɛg n da be ra-lukã zug n dat n ki wã bãng tɩ manegr n wate. (Yɩɩn. 103:8; Ebre. 1:3) A Zeova tʋlla ne a sũur fãa n kõ tõnd d yel-wẽnã sugr la a zoe d nimbãanega, sã n mikame tɩ d maanda d bãngẽ ne d tʋʋm-wẽnsã, la d tar tẽeb tɩ d tõe n paama d yel-wẽnã sugr a Zeezi Kirist maoongã maasem yĩnga. (1 Zã 1:7) Tõe n yaa toog ne neb kẽer tɩ b sak n deeg t’a Zeova tõe n kõ-b-la b yel-wẽnã sugri. Sã n mi n yaa woto ne yãmba, ad bũmb sẽn tõe n sõng-yã: Nand t’a Zeezi ki, a zoee bi-bɛɛgã b sẽn da ka a sɛɛgẽ wã nimbãanega, tɩ yaool n yaa ned sẽn da nan sɩng bal n wilgdẽ t’a tẽeda a Zeezi. Rẽ wã, a Zeova kõn zoe neb nins sẽn maand sɩd ne-a wã nimbãaneg n yɩɩd sɩda?—Yɩɩn. 51:3; 1 Zã 2:1, 2. w21.04 9 s. a 5-6

A Zeezi sẽn kell n maan sɩd ne a Zeova n tãag a kũumã, a pidsa bũmb wʋsgo. Pipi, a wilgame t’a Sʋɩtãan yaa ziri-yagda. A Zeezi wilgame tɩ ninsaal sẽn zems zãng tõe n kell n saka a Zeova zãng-zãnga, baa ne a Sʋɩtãan sẽn na n maan-a bũmb ninga. Yiibu, a Zeezi kõo a vɩɩmã n na n dol tõnd yel-wẽnã. A kũumã sẽn yɩ maoongã kɩtame tɩ ninsaalbã sẽn pa zems zãngã tõe n yɩ tɩrs Wẽnnaam nifẽ, la b saagd n na n wa paam vɩɩm sẽn kõn sa. Tãabo, a Zeezi wilgame t’a Zeova n zems ne yɩ yĩngr la tẽng Naaba. Sẽn paase, a roka taal ning fãa sẽn da be a Ba wã yʋʋrã zugã. Bɩ d vɩɩmd daar fãa wa yaa d yaoolem daar d sẽn na n kell n maan sɩd ne a Zeova. Woto, baa d sã n na n ki, d tõe n yeelame: “Zeova, mam maana m sẽn tõe fãa n kell n tall m burkĩndã, n wilg t’a Sʋɩtãan yaa ziri-yagda, la m waoog f yʋʋrã, n wilg tɩ foo n zems ne yɩ yĩngr la tẽng Naaba!” w21.04 12 s. 13-14

B rõda a Zeezi t’a tʋma tʋʋm-wẽnga, n kao a bʋʋd n ning-a taale. Rẽ poore, b yaal-a lame, n nams-a ne wẽnem la b ka-a ra-luk zugu. B kaa a nusã ne a naoã ne põent-rãmba. A sã n da rat n vʋʋs fãa, wall a rat n gom fãa, ra zabda wʋsgo. La ra yaa tɩlɛ t’a gome, bala a ra tara koɛɛg sẽn tar yõod wʋsg n na n taase. A Zeezi yaoolem goamã sɩd sõnga tõnd tɩ d bãng bũmb wʋsg sẽn tar yõodo. D yãame tɩ d segd n kõta d taabã sugri, la d bas d yam t’a Zeova me na n kõ-d-la sugri. D sẽn tar tẽed-n-taas tɩ d yaa wa zak a ye neb sẽn dat n sõng tõndã yaa zu-zẽkr menga. La d sã n dat sõngre, d segd n kos-b lame. D miime tɩ sẽn wa n yaa zu-loɛɛg ning fãa, a Zeova na n sõng-d lame tɩ d tõog toogo. D leb n yãame tɩ tara yõod tɩ d vɩɩmd daar fãa wa yaa d yaoolem daar d sẽn na n maan sɩd ne a Zeova, n kɩs sɩd tɩ d vɩɩmã bee a nugẽ, tɩ bũmb pa tõe n maan-a ye. w21.04 8 s. a 1; 13 s. 17

D sã n tũud a Zeezi naoã, d na n wa paama vɩɩm sẽn kõn sa wã. Bi-bɩɩg sẽn yaa ra-kãagrã sẽn wa n sok a Zeezi tɩ bõe la a segd n maan n wa paam vɩɩm sẽn kõn sa wã, a Zeezi leokame yaa: “Wa tũ maam.” (Mat. 19:16-21) A Zeezi yeela zʋɩf-rãmb nins sẽn da pa tẽed tɩ yẽ la Kiristã yaa: ‘Mam piisã pʋgda maam. Mam kõta bãmb vɩɩm sẽn ka sɛta.’ (Zã 10:24-29) D wilgdame tɩ d tẽeda a Zeezi, d sã n tũud a zãmsgã, a goamã la a mak-sõngã. D sã n maand woto, d na n kell n paa vɩɩm sẽn kõn sa wã sor zugu. (Mat. 7:14) Nand tɩ d tõog n tũ a Zeezi naoã neere, yaa tɩlɛ tɩ d reng n bao n bãng-a. Bao n bãng a Zeezi pa raar a ye tʋʋmd ye. D segd n ket n baood n bãngda bũmb wʋsg a Zeezi zugu, rat n yeel t’a zʋg-sõma wã, a tagsa wã, la a sẽn kõ noy ninsã. Baa d sẽn kaoos sɩdã pʋgẽ to-to, d segd n ket n baood n bãngda a Zeova la a Zeezi me. w21.04 4 s. a 9-10

Tõe tɩ wakat n da mi n zĩnd tɩ tẽn-tʋmd a Poll sã n tẽeg a pĩnd vɩɩmã yell bɩ ra namsd-a. A yeelame tɩ yẽ yaa “yel-wẽn-maandbã taoor soaba,” la rẽ pa lingr ye. (1 Tɩm. 1:15) Nand t’a bãng sɩdã, a ra kẽnda tẽng-tẽng n namsd kiris-nebã, n yõgd kẽer n kẽesd bãens rotẽ, la a sakdẽ tɩ b kʋʋd sãnda. (Tʋʋ. 26:10, 11) Tags-y n ges-y a Poll manesem sẽn da tõe n yɩ to-to, a sã n da seg bi-bɩɩg sẽn yaa kiris-neda, a sẽn da sak tɩ b kʋ a roagdbã. A Poll ra maanda a bãngẽ ne a kongrã, la a ra miime tɩ sẽn loog loogame. A sak n deegame tɩ Kirist kii yẽ yĩnga, la a yeel yaa: “Wẽnnaam barkã maasem yĩnga, mam yaa m sẽn yaa bũmb ningã.” (1 Kor. 15:3, 10) Yam-bʋg la y tõe n dɩke? Sak n deeg tɩ Kirist kii fo yĩnga, la tɩ rẽ kɩtame tɩ f tõe n paam zood sõma ne a Zeova. (Tʋʋ. 3:19) Sẽn tar yõod Wẽnnaam nifẽ yaa bũmb ning d sẽn maand masã wã, la d sẽn na n maan beoogã. La pa tʋʋm-wẽns nins d sẽn tʋm pĩndã ye.—Eza. 1:18. w21.04 23 s. 11

Zʋɩf-rãmb wʋsg ra tagsdame tɩ pa tɩlɛ tɩ Mesi wã ki ye. La ges-y b sẽn da pĩnd n togs bũmb ning Gʋls-sõamyã pʋgẽ wã. B ra yeelame: “Bãmb rɩka b meng n kõ kũum, la b sõda bãmb n naag tʋʋm-beed rãmbã. Dẽ, bãmb deega neb wʋsg yel-wẽna, la bãmb kẽe sʋk n paas zabrã koangdbã yĩnga.” (Eza. 53:12) Dẽnd zʋɩf-rãmbã ra ka bʋʋm n na n zãgs tɩ b kõn tẽ a Zeezi, b sẽn ka-a ra-luk zug wa yel-wẽn-maandã yĩng ye. Rũndã-rũndã, d sã n bao n bãng yɛlã vɩʋʋgo, d pa na n bas n pa le tẽed a Zeezi. A Zeezi sẽn wa n sõsd ne nebã tãngã zugã, a pĩnd n yeela a kɛlgdbã tɩ neb kẽer na n ‘rõd-b-la ne wẽng buud fãa.’ (Mat. 5:11) Rõd-kãensã fãa yita a Sʋɩtãan nengẽ. Yaa yẽ n pirsd nebã tɩ b kãnegd neb nins sẽn nong sɩdã. (Vẽn. 12:9, 10) D pa segd n kelg nebã sẽn yet bũmb ning n na n dõd tõndã ye. D pa segd me n bas tɩ b ziri wã kẽes-d rabeem, la koms d tẽebã ye. w21.05 11 s. 14; 12 s. 16

Sõng-y Biibl karen-biigã t’a teeg a Zeova. A Zeezi yeela a karen-biisã t’a Zeova na n sõng-b-la a sẽn nong-bã yĩnga. (Mat. 10:19, 20, 29, 30) Tẽeg-y karen-biigã t’a Zeova na n sõnga yẽ me. Y sã n wa pʋʋsd ne-a, bɩ y gom bũmb nins a sẽn yãk yam n na n maanã yelle, tɩ sõng-a t’a teeg a Zeova. A Frãnsiszɛk sẽn be Poloyn wã yeelame: “Mam karen-saambã ra mi n gomda bũmb nins m sẽn yãk yam n na n maanã yell a pʋʋsg pʋgẽ. M sẽn yã t’a Zeova leoka a pʋʋsgã, tao-tao bala, ma-me sɩnga pʋʋsgo. Mam wa n sɩnga tʋʋm paalem, n da rat tɩ b kõ-m sor tɩ m kẽng tigissã la tigis-kãsenga, la m sɩd yãame t’a Zeova sõng-m lame.” Tõnd Biibl karen-biisã yell paka a Zeova hal wʋsgo. A nee koe-moondbã sẽn maand modgr nins n na n sõng nebã tɩ b lebg a zo-rãmbã, la a nong-b-la rẽ yĩnga. (Eza. 52:7) Baa y sã n pa tar ned n zãmsd-a Biiblã, y tõe n yãagda koe-moondb n tɩ zãmsd b karen-biisã Biiblã, tɩ sõng-b tɩ b wa tõog n deeg lisgu. w21.06 7 s. 17-18

D sã n karemd Wẽnnaam Gomdã daar fãa, d wilgdame tɩ d sũur nooma ne d sẽn paam n tar-a wã. D segd n yãka wakat n karemd Biiblã la d zãmsd-a, la d da karemd-a d sẽn wat n tar sẽk bal ye. D sã n modg n zãmsd Biiblã n pa vaandẽ, d tẽebã pãng na n paasdame. Tõnd pa wa dũniyã ‘yam dãmbã la bãngdbã’ ye. Tõnd tara tẽeb sẽn tik Wẽnnaam Gomdã zugu. (Mat. 11:25, 26) D sã n zãmsd Biiblã, d bãngda bũmb ning sẽn kɩt tɩ vɩɩmã pa lebd be tẽngã zugã, la a Zeova sẽn na n wa maan bũmb ning rẽ wɛɛngẽ. Rẽ wã, bɩ d modg tɩ d tẽebã kell n tall pãnga, la d sõng neb wʋsg wa d sẽn tõe tɩ b tẽ tɩ Naand n be. (1 Tɩm. 2:3, 4) Bɩ d ket n gũud wakat ning neb nins fãa sẽn be tẽngã zugã sẽn na n pẽg Wẽnnaam, n togs goam nins sẽn be Vẽnegr 4:11 pʋgẽ wã. B yeta be yaa: “Tõnd Wẽnnaam a Zeova, yãmb n zems tɩ reeg ziir la waoogre . . . bala yãmb n naan bũmb fãa.” w21.08 19 s. 18-20

Kãsem-dãmbã sẽn yaa pe-kɩɩmbã, b tʋʋmd me yaa b sagl b tẽed-n-taasã, sã n wa yaa tɩlɛ. B segd n modgame tɩ b sã n wa na n sagl neda, bɩ yɩ saglg sẽn zemse, la sẽn ‘kõt sũ-noogo.’ (Yel. 27:9) Kãsem-dãmbã nonga b saam-biisã la b saam-bi-pogsã. Rẽ n so tɩ ned sã n wa rɩk so-wẽnga, b sagenda a soab n wilg tɩ b nong-a lame. (Gal. 6:1) Nand tɩ kãsem-soab sagl neda, a segd n tẽega bũmb ning tẽn-tʋmd a Poll sẽn yeel nonglmã wɛɛngẽ wã. A yeelame: “Nonglem maanda sũ-mare, la a maand neere. . . . A pa komsd raood n bas ye. A tẽeda bũmb fãa, a saagda manegr bũmb fãa pʋgẽ, a tõogda toog bũmb fãa pʋgẽ.” (1 Kor. 13:4, 7) Vɛrse-kãensã tõe n sõnga kãsem-soabã, t’a tags bũmb ning sẽn kɩt t’a rat n sagl nedã, la a sɩd maan rẽ ne yam-sõngo. Ned ning kãsem-soabã sẽn dat n saglã sã n bãng t’a yell sɩd paka kãsem-soabã, na n yɩɩ nana t’a sak n deeg saglgã. w22.02 14 s. a 3; 15 s. a 5

A Zeova naana malɛgsã la ninsaalbã tɩ b ra zems zãng n pa tar zams ye. La malɛk ning sẽn lebg tõatã b sẽn boond t’a Sʋɩtãanã, belga a Ãdem ne a Awa sẽn da zems zãngã tɩ b kɩɩs a Zeova. Malɛgs la ninsaalb a taab me wa n lebga tõatba. (Ziid 6) A Zeova sũur sãamame, la a bee bʋʋm. Ne rẽ fãa, a tõoga toogo. A na n kell n tõoga toog n tãag wakat ning a sẽn yãk n na n sãam tõatbã fãa wã. Wakat kãnga, a Zeova ne neb nins sẽn maand sɩd ne-a wã sũy na n yɩɩ noogo, b sẽn pa na n le tõogd toogo, zu-loɛɛg sẽn pa na n le zĩnd dũni-kãngã pʋgẽ wã yĩnga. A Sʋɩtãan rõda a Zoob la neb nins fãa sẽn tũud a Zeova ne b sũur fãa wã, n yeel tɩ b sẽn tũud a Zeova wã, yaa rẽ sẽn nafd-bã yĩng bala. (Zoob 1:8-11; 2:3-5) A Sʋɩtãan ket n dõta nebã hal n tãag rũndã. (Vẽn. 12:10) La tõnd me tara d sẽn tõe n maan n wilg t’a yaa ziri yagda. Yaa d sẽn na n kell n tõog toog d zu-loeesã pʋsẽ, la d kell n maan sɩd ne a Zeova d sẽn nong-a wã yĩnga. w21.07 9 s. a 7-8

Tẽn-tʋmd a Poll rɩka makr sẽn tar pãnga, n wilg tɩ tara yõod wʋsg tɩ d toeem d yel-manesmã. A yeelame tɩ d segd n kaa d nin-kʋdgã “ra-lukã zugu.” (Rom. 6:6) Sẽn na yɩl n ta a Zeova yam, a Zeezi sakame tɩ b ka-a ra-lukã zugu. Tõnd me sã n dat n ta a Zeova yam, d segd n sak n basa yel-manesem la tʋʋm-tʋmdɩ nins fãa a Zeova sẽn kisã. Yaa d sã n maan woto la d na n paam sũur-kaset sẽn yaa sõma, la d wa paam vɩɩm sẽn kõn sa. (Zã 17:3; 1 Pɩy. 3:21) A Zeova pa na n toeem a noyã tɩ zems ne-d ye. Yaa tõnd n segd n toeeme, n tũ yẽ noyã. (Eza. 1:17-18; 55:9) Y segd n kell n maoo ne tʋls-wẽnsã, baa y lisgã poore. Kos-y-yã a Zeova sõngre, la y teeg a vʋʋsem sõngã n da teeg y meng pãng ye. (Gal. 5:22; Fili. 4:6) Sẽn na yɩl n tõog n yeeg nin-kʋdgã n da le yeelg-a, d segd n modga wʋsgo. w22.03 6 s. 15-17

A Zeova pʋlmame t’a na n gesame tɩ d paam rɩɩbo, futu, gãag zĩiga, d sã n deng n baood a Rĩungã la d sakd a noyã sẽn yaa tɩrsã. (Mat. 6:33) Woto yĩnga, d pa na n tagsdẽ tɩ dũni-kãngã arzɛgsã na n kogl-d lame la kõ-d sũ-noog hakɩɩk ye. D miime tɩ yaa d sã n maand a Zeova raabã bal la d na n paam sũur pʋgẽ bãane. (Fili. 4:6, 7) Baa d sã n tar ligd n tõe n da teed wʋsgo, d segd n soka d meng n gese, rẽ yĩnga d na n sɩd paama sẽk la pãng n tall te-kãensã n tʋm la d ges b yell tɩ ra sãam sɩda? Rẽ yĩnga, d pa na n wa nong bũmb nins d sẽn tarã tɩ loog noor sɩda? Tẽeg-y tɩ Wẽnnaam kõ-d-la tʋʋmd tɩ d segd n tʋm a zakã pʋgẽ. Dẽnd d pa segd n bas tɩ bũmb tiis-d ye. Yaa vẽeneg tɩ d pa rat n yɩ wa rao ning sẽn yãk yam t’a pa na n tũ a Zeezi, a sẽn da nong bũmb nins a sẽn tarã tɩ loog noorã yĩnga. Woto kɩtame t’a pa tũ a Zeova, n paam n lebg a zakã ned ye.—Mark 10:17-22. w21.08 6 s. 17

Y sã n wa zãmsd Biiblã, segd n yɩɩ y sẽn dat n bãng a Zeova sõma n paas yĩnga. (Zã 17:3) Woto, y na n yãa a zʋg-sõma wã, zʋg-sõma nins y sẽn bãnge, y sẽn wa n tagsd bũmb nins a sẽn naanã zugã. Y sã n bao n bãng a Zeova zʋg-sõma wã, na n kɩtame tɩ y kɩs sɩd t’a beeme. (Yik. 34:6, 7; Yɩɩn. 145:8, 9) Y sã n bãngd a Zeova sõma n paasdẽ, y na n maneg n tẽed-a lame, n nong-a wʋsgo, tɩ zood ning y sẽn tar ne-a wã me pãng paasdẽ. Sõng-y neb a taabã tɩ bãmb me tẽ tɩ Wẽnnaam beeme. Ned yãmb sẽn taas koɛɛgã sã n sãmbda Wẽnnaam sã n beeme, tɩ y pa mi y sẽn na n leok-a to-to, y maanda wãna? Bao-y Biiblã vɛrse b sẽn wɛgs siglgã sɛbã pʋsẽ, n sõs rẽ zug ne-a. Y leb n tõe n kosa a Zeova Kaset soab sẽn tar minim t’a sõng-yã. A soabã sak n deega Biiblã sẽn yetã t’a pa sak me, y sẽn maan vaeesg n bãng bũmb ningã na n nafa yãmb mengã. Y tẽebã pãng na n paasame. w21.08 18 s. 14-15

Pa tɩlɛ tɩ d bas bũmb nins fãa sẽn noom tõndã, sẽn na n yɩl n ta a Zeova yam ye. (Koɛ. 5:18, 19) D sã n yãk yam n pa na n tʋm wʋsg a Zeova tʋʋmdã pʋgẽ, d sẽn pa rat n bas bũmb d sẽn nong yĩnga, d na n yɩɩ wa rao ning yell a Zeezi sẽn gom a yel-bũndã pʋgẽ wã. Raoã tʋmame n paam bũmb wʋsgo, la a ra maanda a toog kae ne Wẽnnaam. (Luk 12:16-21) D sã n wa tar zu-loeese, d pʋʋsda a Zeova n kos sõngre, la d maag d yĩng n tags n ges d sẽn na n maanega. (Yel. 3:21) Bũmb toor-toor la a Zeova maand n ningd tõnd barka. D sã n maand d sẽn tõe fãa sẽn na yɩl t’a yʋʋrã paam waoogre, d wilgd-a lame tɩ d sũur nooma wʋsgo, a sẽn ningd-d barkã yĩnga. (Ebre. 13:15) Wala makre, d tõe n modgame n moon koɛɛgã sõma n paase. Na n kɩtame tɩ d paam a Zeova barkã n paase. Daar fãa, bɩ d baood d sẽn tõe n maane, n ‘lemb n ges n bãng t’a Zeova sɩd yaa sõma.’ (Yɩɩn. 34:9) Woto, tõnd me tõe n yeela wa a Zeezi yaa: “Mam dɩɩb yaa m maan sẽn tʋm-a maamã raabo, la m baas b tʋʋmdã.”—Zã 4:34. w21.08 30-31 s. 16-19

A Sʋɩtãan ratame tɩ d lebg wuk-m-mens rãmba. A miime tɩ d sã n lebg wuk-m-mens rãmba, d na n yɩɩ wa yẽ, n kong vɩɩm sẽn ka satã. Rẽ n so tɩ tʋm-tʋmd a Poll yeel tɩ d gũus n da “wa wuk d menga, n wa paam taal ning b sẽn ning a Sʋɩtãanã ye.” (1 Tɩm. 3:6, 7) Yaa bũmb sẽn tõe n paam tõnd ned kam fãa, baa d nan sɩnga a Zeova tũub wall d tũud-a-la na maan yʋʋm wʋsgo. Wuk-m-meng soab yaa rat-m-ye soaba. A Sʋɩtãan datame tɩ d yɩ rat-m-ye rãmba, tɩ yaa d mengã yell bal n pak-do, la pa a Zeova, sẽn yɩɩd fãa, d sã n wa maood ne zu-loeese. Wala makre, b rõda yãmb bɩ, bɩ b maan-y-la kɛgre? A Sʋɩtãan sẽn nong yaa y sẽn na n ning a Zeova wall y saam-biisã taale. Sẽn paase, a ratame tɩ y tẽ tɩ yellã tɩɩm yaa y sẽn na n maand y yam, la y ra tũ sagls nins a Zeova sẽn kõ tõnd tɩ be a Gomdã pʋgẽ wã ye.—Koɛ. 7:16, 20. w21.06 15 s. a 4-5

A Zeova kõo no-rɛɛs a Aaze tʋʋmd sẽn tar yõod wʋsgo. A Aaze naaga neb nins sẽn yi Babilon yʋʋmd 537 sẽn deng a Zeezi rogmã n leb Zerizalɛmmã. Wẽn-sakdb-kãensã sẽn ta Zerizalɛmmã, pa yã n kaoos la b sɩng a Zeova roogã bɩ wẽnd-doogã yẽbgr ye. (Ɛsd. 3:8, 10) La bũmb n maane, n koms b raoodo. Neb nins sẽn da be be wã sẽn da namsd wẽn-sakdbã yĩnga, b komsa raood n bas roogã meebo. (Ɛsd. 4:4; Aaze 1:1, 2) Rẽ n so tɩ yʋʋmd 520 sẽn deng a Zeezi rogmã, a Zeova yeel a Aaze t’a keng nin-kãensã raoodo, tɩ b paam yẽesem n le kẽng taoor ne tʋʋmdã. (Ɛsd. 6:14, 15) Koɛɛg ning a Aaze sẽn taasã ra yaa sẽn na n sõng zʋɩf-rãmbã tɩ b maneg n tẽ a Zeova. A sẽn yeel-b tɩ “Saasẽ-Pãng-Soabã” ra na n kɩtame tɩ b bas b yam. A Zeova tara malɛgs tus ka tɛk sẽn yaa a tãb-biis sẽn sakd a noyã. Rẽ wã, zʋɩf-rãmbã ra segd n teega a Zeova, sẽn na yɩl n tõog tʋʋmdã. w21.09 15 s. a 4-5

Rũndã-rũndã, a Zeova Kaset rãmbã sẽn be dũniyã gill zugã nonga taaba, la b zemsd taab me. Tõnd yaa toor fasɩ ne tũudum a taabã neba. Bala d yaa wa zak a ye rãmba, baa ne d sẽn yit tẽns toɛy-toɛyã, tɩ d minundã me pa yembrã. D tigissã la d tigis-kãsemsã sasa, d yãta vẽeneg tɩ nonglem hakɩɩk sɩd bee d sʋka. Woto sõngda tõnd tɩ d maneg n kɩs sɩda, tɩ d sẽn tũud a Zeova to-to wã tata a yam. (Zã 13:34) Biiblã yetame tɩ d “nong taab wʋsgo.” (1 Pɩy. 4:8) Bũmb a ye d sẽn tõe n maan n wilg tɩ d nonga taab wʋsg yaa d sẽn na n kõt d taabã sugri, la d da get b kongrã ye. Sẽn paase, d baooda segb buud toor-toor n maand d tigingã nebã fãa neere, baa neb nins sẽn beeg tõndã. (Kol 3:12-14) D sã n nong taab wʋsg woto, wilgdame tɩ d sɩd yaa kiris-neb hakɩɩka. w21.10 22 s. 13-14

B sã n yiis ned sẽn maan yel-wẽnd n pa rat n tek yam n kos sugr tigingã pʋgẽ, tõe n sõng-a lame t’a toeem bɩ? N-ye! Neb kẽer sẽn da maan yel-wẽn-kãseng pĩndã yãame tɩ b sẽn yiis-b tigingã pʋgẽ wã zemsame, bala sõng-b lame tɩ b tek yam, n bas b manesem-wẽngã la b lebg n wa a Zeova nengẽ. (Ebre. 12:5, 6) D rɩk makre. Pe-kɩɩm n bãng ta pesg a ye n ka laafɩ. A miime tɩ sẽn na yɩl n tɩp a bãagã, a segd n yiis-a-la piis a taabã sʋka. Piisã yaool n yaa rũms sẽn nong n be ne taaba, tɩ b sã n welg-b bɩ tõe n nams-ba. Rẽ yĩnga, pe-kɩɩmã sẽn welg pesgã ne a taabã rat n yeelame t’a yaa nin-toaaga, bɩ ned sẽn pa tar nimbãan-zoeer bɩ? Yaa vẽeneg tɩ ayo. A miime t’a sã n bas pesgã a taabã sʋka, a bãagã na n long-b lame. Dẽnd a sẽn welg-a wã yaa piis a taabã fãa koglg yĩnga. w21.10 10 s. a 9-10

D sũy mooma wʋsgo, d sẽn paam n naag a Zeova zakã neb sẽn be dũniyã gill zugu, n nong taabã. D ratame tɩ neb wʋsg wa naag tõnd n tũ d Wẽnnaamã. D sẽn mi rẽ wã, d segd n maana gũusg n da wa maan bũmb sẽn na n sãam a Zeova nin-buiidã yʋʋre, wall d saasẽ Ba wã yʋʋr ye. D modgdame n zãad d mens sõma, sẽn na yɩl n paam tɩ nebã sak koe-noogã. Wakat ninga, neb kẽer tõe n sãbs-d lame, wall b pʋd n nams tõndo, d sẽn sakd d saasẽ Ba wã yĩnga. D sã n wa rat n gom d tẽebã yell ne ned n yɛɛsdẽ, bõe n tõe n sõng-do? D tõe n basa d yam t’a Zeova ne a Bi-riblã na n sõng-d lame. A Zeezi yeela a karen-biisã tɩ b ra maan yɩɩre, ne b sẽn na n gom to-to wall b sẽn na n maan bũmb ningã ye. Bõe yĩng tɩ d pa segd n maan yɩɩre? A Zeezi yeelame: “Sẽn gomd-bã pa yãmb bal ye. Yaa yãmb Ba wã vʋʋsem sõngã n tũnugd ne yãmb n gomda.”—Mat. 10:19, 20. w21.09 24 s. 17-18

A Moyiiz me rɩka makre, n wilg t’a Zeova kogenda tõndo. (Yɩɩn. 90:1) Sẽn paase, a sẽn wa n kolg kũumã, a togsa gomd sẽn wilgd t’a Zeova kogenda a nin-buiidã. A yeelame: “Wẽnnaam sẽn-ka-sɛɛb yaa yãmb zĩ-kẽedga la b nusã sẽn be wakat fãa wã zãada yãmba.” (Tõo. 33:27, Wẽnnaam Sebre, 1983) B sẽn yeel tɩ “b nusã sẽn be wakat fãa wã zãada yãmbã” sõngda tõnd tɩ d bãng bõe a Zeova zugu? A Zeova sã n yaa tõnd zĩ-soalgdga, d yam gãee bãane. La wakat ninga d tõe n komsa raoodo, n tagsdẽ t’a Zeova pa tõe n yɩ d zĩ-soalgdg ye. Sã n wa yaa woto, bõe la a Zeova na n maan n sõng tõndo? (Yɩɩn. 136:23) A na n tẽega a nugu, n bels-d tɩ d le paam raoodo. (Yɩɩn. 28:9; 94:18) D miime tɩ d tõe n teega Wẽnnaam wakat fãa. Woto sõngda tõnd tɩ d bãng bũmb a yiib sẽn tar yõod wʋsgo. Pipi, yaa tɩ sẽn yaa zĩig ning fãa la d be, d tõe n paamame t’a kogl-do. Yiibu, yaa tɩ tõnd yell paka d saasẽ Ba wã sẽn nong-dã wʋsgo. w21.11 6 s. 15-16

A Zeezi ra miime tɩ b sã n wa maand a karen-biisã kɛgre, tõe n komsa b tẽebã. Sẽn na yɩl n sõng-b tɩ b tõog n yals kãn-kãe, a wẽe yel-bũnd tɩ be Luk sebrã pʋgẽ. A goma pʋg-kõor sẽn kẽng bʋ-kaood sẽn pa zoet Wẽnnaam nengẽ yelle, n tɩ pẽdg ne kosgo, sẽn na yɩl t’a kao bʋʋd tɩrga. A ra kɩsa sɩd t’a sã n kell n pẽdg ne kosgo, a na n paamame tɩ bʋ-kaoodã sõng-a. A wa n paamame tɩ bʋ-kaoodã sak n sõng-a. Yam-bʋg la d tõe n dɩk kiba-kãngã pʋgẽ? A Zeova pa nin-wẽng ye. Rẽ n so t’a Zeezi yeel yaa: “Pa vẽeneg t’a na n kaoo a nin-tũusdsã sẽn boond-a wĩntoog la yʋngã bʋʋd tɩrg . . . sɩda?” (Luk 18:1-8) Rẽ poore, a Zeezi paasame yaa: “Ninsaal Biigã sã n wa wa, a na n yãa tẽeb kãng tẽngã zug sɩda?” B sã n wa maand-d kɛgre, d segd n talla sũ-mar la d kell n yals kãn-kãe, tɩ wilg tɩ wa pʋg-kõorã, tõnd me tẽebã tara pãnga. D sã n tar tẽeb a woto buudu, d tõe n kɩsa sɩd tɩ sẽn yaa wakat ning fãa, a Zeova na n sõng-d lame. D segd n sak n deegame me tɩ pʋʋsgã sõngda wʋsgo. w21.11 23 s. 12; 24 s. 14

Kom-bɩɩse, y mi n tagsdame t’a Zeova noyã weoogd-y lame bɩ? Yaa woto la a Sʋɩtãan rat tɩ y tagse. A ratame tɩ y nong sẽn tũud-b so-yalengã sẽn maand bũmb nins tɩ wõnd b tara sũ-noog hakɩɩkã. A tõe n tũnuga ne y karen-bi-taasã sẽn maand bũmb ninsã, wall y sẽn get bũmb nins ẽntɛrnetã pʋgẽ wã, n kɩt tɩ y tags tɩ y bõna bũmb sẽn na n kõ-y sũ-noogo. A Sʋɩtãan ratame tɩ y tags t’a Zeova noyã kɩtame tɩ y pa tõe n paam n dɩ vɩɩmã yõod tɩ pid ye. La tẽeg-y t’a Sʋɩtãan pa rat tɩ neb nins sẽn tũud yẽ sorã bãng sorã sẽn tar n dabd zĩig ningã ye. (Mat. 7:13, 14) La a Zeova yẽ ratame tɩ y bãng tɩ y vɩɩmã na n talla barka, y sã n kell n pa sor ning sẽn dabd vɩɩm zĩigẽ wã zugu.—Yɩɩn. 37:29; Eza. 35:5, 6; 65:21-23. w21.12 23 s. a 6-7

D segd n kõta sugri. Woto pʋd n yaa bũmb sẽn segde. La rẽ tõeeme n pa yɩ nana ye. Tõe tɩ tʋm-tʋmd a Pɩyɛɛr me ra mi n getame tɩ woto maaneg pa nana ye. (Mat. 18:21, 22) Bõe n tõe n sõng-do? Pipi, tags-y n ges-y a Zeova sẽn kõ yãmb sugr wʋsg to-to wã. (Mat. 18:32, 33) D pa segd ne a sugrã ye. La baasgo, a kõta tõnd sugr ne yamleoogo. (Yɩɩn. 103:8-10) Woto wã, “tõnd me segd n nonga taaba.” Dẽnd sugrã kũun yaa bũmb sẽn yaa tɩlɛ. D segd n kõta d tẽed-n-taasã sugri. (1 Zã 4:11) Yiibu, maag-y y yĩng n tags sugrã kũun sẽn nafd to-to wã yelle. Woto tõe n sõnga sẽn beeg-a tõndã, n paas tigingã zems-n-taare, n kɩt tɩ d zoodã ne a Zeova pãng paase, la kɩt me tɩ d yam gãand bãane. (2 Kor. 2:7; Kol. 3:14) Sẽn na n baase, pʋʋs-y-yã a Zeova, soab ning sẽn dat tɩ d kõt taab sugrã. Ra bas-y t’a Sʋɩtãan sãam laafɩ ning sẽn be yãmb ne y tẽed-n-taasã sʋkã ye. (Efɛ. 4:26, 27) D sã n pa rat n lʋɩ a Sʋɩtãan bẽdgã pʋgẽ, yaa tɩlɛ tɩ d bao a Zeova sõngre. w21.06 22 s. 11; 23 s. 14

Daar a ye, a Davɩɩd ra zoetame n na n põsg a yõore, bala a Sayull sẽn da yaa Israyɛll rĩmã ra baood-a lame n na n kʋ. Kom sẽn wa n tar a Davɩɩde, a yalsa Noob tẽngã n kos bur a nu bala. (1 Sãm. 21:2, 4) Rẽ poore, yẽ ne a nebã zoeeme n tɩ solg tãng bokẽ. (1 Sãm. 22:1) Sɩnga wãn t’a Davɩɩd wa be yell a woto pʋgẽ? A Sayull ra maanda sũ-kĩir ne a Davɩɩde, bala neb wʋsg ra pẽgd-a lame, a sẽn da tõogd zab wʋsgã yĩnga. A Sayull ra miime me t’a Zeova raaga yẽ sẽn yaa Israyɛll rĩmã n base, a sẽn kɩɩs-a wã yĩnga, la a yãk a Davɩɩd t’a na n wa ledg-a n yɩ rĩma. (1 Sãm. 23:16, 17) La a Sayull n da ket n dɩt naam, n da tar tãb-biis wʋsgo, la neb ka tɛk sẽn da teend-a. Rẽ n so tɩ yɩ tɩlɛ t’a Davɩɩd zoe, sẽn na yɩl n põsg a yõore. Rẽ yĩnga, a Sayull ra tẽedame t’a tõe n gɩdga Wẽnnaam t’a pa tõog t’a Davɩɩd reeg naamã bɩ? (Eza. 55:11) Biiblã pa wilg rẽ ye. La d tõe n kɩsa sɩd t’a Sayull ra baooda yell bal n na n kõ a menga. Ned pa tol n tõe n zab ne Wẽnnaam n tõog ye! w22.01 2 s. a 1-2

A Zeezi tʋma wʋsg koɛɛgã mooneg pʋgẽ. A wilgame t’a nonga nebã, n da tũnugd ne segb buud fãa n zãmsd-b Wẽnnaam Gomdã. (Luk 19:47, 48) Bõe yĩng t’a ra maand woto? A Zeezi ra zoeta b nimbãanega. Wakat ninga, neb wʋsg ra watame n na n kelg a Zeezi goamã, hal tɩ yẽ ne a karen-biisã “ra pa tõe n paam n dɩ rɩɩb meng ye.” (Mark 3:20) Sẽn paase, daar a ye, a sakame n sõs ne ned ne yʋngo. Bala ra yaa wakat kãng n da zems ne nin-kãnga. Neb nins sẽn kelg a Zeezi sɩngrẽ wã wʋsg pa sak n lebg a karen-biis ye. La neb nins fãa sẽn kelg-a wã paamame t’a kõ-b kaset sõma. Rũndã-rũndã, d ratame n sõng neb wʋsg tɩ b paam n wʋm koe-noogã. (Tʋʋ. 10:42) Sẽn na yɩl n tõog n maan woto, d segd n toeema d sẽn moond to-to wã. D pa segd n moond wakat sẽn zems ne-d bal ye. D segd n sakd n toeemda d moonegã wakate, sẽn na yɩl n paam n taas koɛɛgã neb wʋsgo. D sã n maan woto, d tõe n basa d yam tɩ d noogda a Zeova sũuri. w22.01 17 s. 13-14

Rũndã-rũndã, yaa toog ne neb wʋsg tɩ b kɩs ned sẽn tar zu-sobend sɩda. B gũus n gesame tɩ goosneema-rãmbã la bʋʋdã zĩisẽ dãmb wae n bakda rakã-rãmbã la sẽn tar-b naamã n sõngdẽ, la b mongd naong rãmbã bʋʋm. Sẽn paase, tũudmã taoor dãmb kẽer manesem pa lebd be ye. Woto kɩtame tɩ neb kẽer pa le kɩs Wẽnnaam sɩd ye. Woto yĩnga, ned sã n wa sak n na n zãms Biiblã, d segd n sõng-a lame t’a kɩs a Zeova sɩda, la a kɩs neb nins a sẽn yãk tɩ b lʋɩt d taoorã me sɩdã. Pa sẽn nan zãmsd-b Biiblã bal n segd n kɩs a Zeova la a siglgã sɩd ye. Baa sẽn tũud-b a Zeova na maan yʋʋm wʋsgã segd n kell n ninga b yamẽ t’a sẽn maand fãa yaa tɩrg wakat fãa. Wakat ninga, yɛl kẽer tõe n kɩtame tɩ yaa toog tɩ d kell n kɩs a Zeova sɩd zãng-zãnga. w22.02 2 s. a 1-2