Sigri

Vɩɩmã pa nana ne pʋg-kõorã baa-baa. Tõe t’a maooda ne a pãng fãa, sẽn na yɩl n paam bũmb nins sẽn yaa tɩlɛ ne a vɩɩmã. A maaga a yĩng n kolg ligdã koglg a yembre, n solg n ning ligd-koeems a yiibu. Tõe t’a sẽn sagl ligdã, pa tol n maan bʋrg meng ye. A Zeezi bãnga ligd ning a sẽn ning koglgã pʋgẽ wã sõore. Yaa lɛpta a yiibu. Wakat-kãnga, ligd-bõonesã sʋka, rẽ n da yaa bilf n yɩɩda. Pʋd n pa sek n tõe n da yirg a yembr sẽn da yaa liuul ning ligd sẽn yaa nana n yɩɩdã ye. Pʋg-kõorã sẽn maan bũmb ningã yɩɩ a Zeezi noog wʋsgo. Rẽ n so t’a bool a karen-biisã n togs-b pʋg-kõorã sẽn maanã. A yeelame: “Pʋg-kõ-kãngã sẽn yaa naong soabã ningame n yɩɩg neb nins fãa sẽn ning ligd kogendẽ wã.” Rẽ poore, a paasame: “B fãa [sẽn yɩɩd fãa ra-kã-rãmbã] yãka ligd ning b sẽn paam tɩ sek n kellã pʋgẽ n ningi, la yẽ sẽn yaa naong soabã, a ninga a sẽn tarã zãnga, a sẽn teeg bũmb ning n na n vɩɩmdã fãa.” (Mark 12:43, 44) Pʋg-kõ-kãngã sẽn yaa wẽn-sakdã sẽn kõ a ligdã zãng baraarã, wilgame t’a rɩka a vɩɩmã n ning a Zeova nugẽ t’a ges a yelle.—Yɩɩn. 26:3. w21.04 6 s. 17-18

A Zeezi sẽn wa n be tẽngã zugã, a talla yam-sõng koe-moonegã wɛɛngẽ, la a ra rat t’a karen-biisã me kell n tall yam-sõng tʋʋm-kãng wɛɛngẽ. (Zã 4:35, 36) A Zeezi sẽn wa n be ne a karen-biisã, b ra moonda koɛɛgã ne yẽesem. (Luk 10:1, 5-11, 17) La b sẽn wa n yõk a Zeezi n kʋ wã poore, a karen-biisã yẽesmã booga wakat bilf pʋgẽ. (Zã 16:32) A vʋʋgrã poore, a yeel-b lame tɩ b kell n nang pãng ne koɛɛgã moonego. A sẽn wa n kẽng saasẽ wã poore, a karen-biisã kell n moona koɛɛgã ne yẽesem wʋsgo, hal tɩ b bɛɛbã yẽgem n yeel goam nins sẽn be rũndã daar vɛrse wã pʋgẽ wã. Yaa a Zeezi n wilg pipi kiris-nebã b sẽn segd n moon koɛɛgã to-to. La a Zeova ninga tʋʋmdã barka, hal tɩ neb wʋsg sak n kelg koɛɛgã. Wala makre, yʋʋmd 33 Pãntekotã daare, sẽn zems neb 3 000 n deeg lisgu. (Tʋʋ. 2:41) Rẽ poore, karen-biisã sõor da tara paasgo. (Tʋʋ. 6:7) Ne rẽ fãa, a Zeezi pĩnd n togsame tɩ yaoolem wakatã, neb sõor sẽn yɩɩd rẽ hal zĩig sẽn zãr n na n sak n kelg koe-noogã.—Zã 14:12; Tʋʋ. 1:8. w21.05 14 s. a 1-2

Yãmb ket n tẽra daar ning y sẽn bãng tɩ bũmb ning y sẽn zãmsd Biiblã pʋgẽ wã yaa sɩdã bɩ? Y tagsame tɩ nebã fãa na n saka bũmb nins y sẽn bãng la y tẽedã. Y ra kɩsa sɩd tɩ Biiblã sẽn yet bũmb ningã na n sõnga nin-kãensã tɩ b vɩɩmã tall bark masã menga, la kɩt tɩ b saagdẽ me tɩ b na n wa paama vɩɩm sẽn tar barka. (Yɩɩn. 119:105) Rẽ n so tɩ y ra togsd y sẽn bãng bũmb ninsã y zo-rãmbã la y roagdbã ne yẽesem. La baasa wãna? B wʋsgã pa sak n tẽ yãmb sẽn togs-b bũmb ningã, hal tɩ ling-yã. Nebã sã n pa sak n kelg koɛɛgã d sẽn moondã, pa segd n ling-d ye. A Zeezi wakatẽ wã, nebã wʋsg pa sak n kelg-a, baa ne a sẽn da maand yel-soalma, tɩ wilgdẽ tɩ yaa Wẽnnaam n teend-a wã. Wala makre, a Zeezi vʋʋga a Lazaare. Yɩɩ yel-solemd a Zeezi bɛɛbã meng sẽn da pa tõe n kɩɩse. Baa ne rẽ, zʋɩf-rãmbã tũudmã taoor dãmb pa sak n deeg t’a Zeezi la Mesi wã ye. B pʋd n baoome n na n kʋ a Zeezi ne a Lazaar fãa.—Zã 11:47, 48, 53; 12:9-11. w21.05 2 s. a 1-2

Maand-y y sẽn tõe fãa, n kẽnd tigissã n pa vaandẽ ye. Y na n paama zãmsg sẽn na n keng y raoodo, la y paam me n bãng y tẽed-n-taasã sõma. Yõg-y zood ne tigingã neb y sẽn tõe n dɩk yam b nengẽ, baa yaa neb yʋʋm sẽn yɩɩd yãmba, bɩ sẽn pa yãmb buudã neba. Biiblã tẽegda tõnd tɩ yam bee “nin-kẽembã” nengẽ. (Zoob 12:12) Sẽn kʋʋl-bã me tõe n zãmsa bũmb wʋsg neb nins yʋʋm sẽn pa ta bãmbã nengẽ. A Davɩɩd yʋʋmã ra pa kolg a Zonatã, la rẽ pa gɩdg tɩ b pa yɩ zo-rãmb hakɩɩk ye. (1 Sãm. 18:1) B sõnga taab n kell n maan a Zeova raabã, baa zu-loe-kɛgems pʋsẽ. (1 Sãm. 23:16-18) Saam-bi-poak a ye yʋʋr sẽn boond t’a Irina zakã ned baa a ye pa tũud a Zeova ye. A yeelame: “D saam-biisã tõe n sɩd lebga wa d roagdba, d ba-bi-rap la d ba-bi-pogs meng-menga. D sã n wa rat sõngre, a Zeova tõe n tũnuga ne-b n sõng-do.” Y zo-rãmbã rat n kenga y raood la b sõng-yã. La rẽnda yãmb wilg-b y sẽn dat tɩ b maan n sõng-yã. w21.06 10-11 s. a 9-11

A Zeezi rɩka makr n gom rĩm ne a yamb yelle. Yambã ra tara rĩmã sam-kãseng a sẽn da pa tol n tõe n yao, tɩ rĩmã bas samdã taale. Rẽ poore, yambã yemb-taag n da tar a samd sẽn pa zem baa fʋɩ, t’a zãgs t’a kõn bas samdã taal ye. Rĩmã wa n kɩtame tɩ b kẽes yemb-kãngã sẽn pa tar nin-bãan-zoeerã bãens roogo. Yambã manesem pa nams yẽ bal ye. Namsa a taabã me. Pipi, yambã namsa a yemb-taagã, a sẽn tall-a n “tɩ kɩt tɩ b pag bãens roogo, n gũud a sẽn na n wa tõog n yao a samdã.” Yiibu, yembs a taabã “sẽn yã rẽ wã, b sũy sãama wʋsgo.” (Mat. 18:30, 31) Woto me, tõnd yel-manesem tõe n namsa d taabã. Ned sã n sãam d sũur tɩ d zãgs tɩ d kõn kõ-a sugri, tõe n baasa wãna? Pipi, d sãamda a soabã sũuri, d sẽn zãgs tɩ d kõn kõ-a sugri, n gind-a la d pa le rat n wilg-a d nonglmã yĩnga. Yiibu, tigingã neb sã n neẽ tɩ laafɩ pa le be tõnd ne nin-kãng sʋka, sãamda b sũuri. w21.06 22 s. 11-12

Wẽnnaam naana ninsaal a meng wẽnego. A Sʋɩtãan ratame tɩ ninsaalbã tʋmd raglem tʋʋma. A Nowe wakatẽ wã, Wẽnnaam sẽn yã tɩ ‘ninsaalbã wẽngã lebga wʋsg dũniyã zugã,’ b “sũur sãama ne b menga, bãmb sẽn maan ninsaal n ning dũniyã zugã, la bãmb sũur sãama wʋsgo.” (Sɩng. 6:5, 6, 11) La wakat-kãng tɛk n tãag rũndã, yɛlã yolsame bɩ? Yaa vẽeneg tɩ ayo. A Sʋɩtãan sẽn ne tɩ yoobã yɛlã piuugame wã noom-a-la wʋsgo. Wala makre, rap ne rap la pagb ne pagb sẽn kẽed ne taabã. (Efɛ. 4:18, 19) A Sʋɩtãan sã n tõog tɩ ned sẽn tũud a Zeova maan yel-wẽnde, a sũur manegd n noomame. Dũniyã sẽn be a Sʋɩtãan nugẽ wã yĩnga, ‘ninsaal tõee a to n maand-a wẽnga,’ la pa rẽ bal ye. Ninsaalbã pa get tẽngã la rũmsã yell wa a Zeova sẽn datã ye. (Koɛ. 8:9; Sɩng. 1:28) Bãngdb kẽer wilgame tɩ ka la yʋʋm a wãna, ninsaalbã tʋʋm na n kɩtame tɩ tɩɩs la rũms sẽn ta bãmb milyõ menem tẽngã zugu. w21.07 12 s. 13-14

Neb kẽer ket n ningda b mens taale, yel-wẽnd b sẽn da maan pĩndã yĩnga. B ket n tagsdame t’a Zeova pa tol n tõe n kõ-b sugri, baa b sã n kos sugr la b bas b tʋʋm-wẽnsã. Sã n yaa woto ne yãmba, y sã n tẽeg t’a Zeova nonga neb nins sẽn tũud-a wã ne nonglem-kãsenga, na n sõng-y lame tɩ y ket n tũud-a ne sũur-kaset sẽn yaa sõma tɩ y sũur noomẽ. Bala “a Bi-ribl a Zeezi zɩɩmã pekda tõnd n yiisd yel-wẽnd buud fãa.” (1 Zã 1:7) Y sũur sã n sãamd yel-wẽnd y sẽn maan pĩndã yĩnga, bɩ y tẽeg t’a Zeova tʋllame n kõ yel-wẽn-maandb nins sẽn tek yam n kot sugrã sugri. D ges yɩɩn-gʋlsd a Davɩɩd sẽn yeel bũmb ninga, tɩ wilgd t’a Zeova nonglem-kãsengã ne a sugrã lokda taabã. A yeelame: “Sẽn-Ka-Saab nonglmã b zoɛtbã yĩngã zãntlem yaa wa yĩngrã ne tẽngã sẽn zãnt ne taab to-to wã. Yaang ne nin-taoor sẽn zãr ne taab to-to wã, Sẽn-Ka-Saab zãagda tõnd ne d beegrã me a woto.”—Yɩɩn. 103:11, 12. w21.11 5-6 s. 12-13

Rao sẽn yaa kiris-ned segd n waoogda a paga. (1 Pɩy. 3:7) Woto baoodame t’a ges a yell sõma. Wala makre, rao waoogda a paga, a sã n wilgdẽ t’a nand-a-la hal wʋsgo. A pa na n kos-a t’a maan bũmb a sẽn pa tõe ye. Yaa vẽeneg me t’a pa na n dɩk-a n mak ne pagb a taab ye. Pag manesem na n yɩɩ wãna, a sɩdã sã n makd-a ne pagb a taaba? Saam-bi-poak a ye yʋʋr sẽn boond t’a Rooza sɩdã pa tũud a Zeova ye. A nong n dɩkda a Rooza n makd ne pagb a taaba. A gom-kãsã sãamda a Rooza sũuri, la kɩt t’a tagsdẽ tɩ ned baa a ye pa nong-a ye. Ad a Rooza sẽn yeele: “Mam datame tɩ b tẽegd maam wakat fãa t’a Zeova sɩd nand-m lame.” Rao sẽn yaa kiris-ned yẽ waoogda a paga. A miime tɩ rẽ paasda yẽ ne a pagã zems-n-taare, la kɩtdẽ me tɩ yẽ ne a Zeova zoodã kell n tall pãnga. Rao sẽn nong a pag pẽgd-a lame, n kɩtdẽ t’a bãng t’a nong-a lame, la t’a nand-a lame. w21.07 22 s. a 7-8

Ned sã n tool-y bũmb y sẽn dat ne y sũur fãa tɩ y gũudẽ tɩ pa wat tao-tao, y sũur pa na n sãam sɩda? La y sã n wa bãng tɩ toollã sẽn nan pa ta yãmbã yaa bʋʋm-tɩrg yĩnga, y pa na n talla sũ-mar n kell n gũ sɩdã? Yel-bũn 13:11 wã wilgda bũmb ning sẽn kɩt tɩ d segd n tall sũ-marã. Be b yetame yaa: ‘Arzɛk sẽn paam wakat-yɛng menemda tao-tao, la sẽn paamd-a arzɛk bilf-bilf fɩɩgda a paoongo.’ Vɛrse-kãngã sõngda tõnd tɩ d bãng bõe? Yam soab maagda a yĩng n maand bũmb fãa ne sũ-mare, la wat n baasa neere. Yel-bũn 4:18 wã yetame tɩ “nin-tɩrsã sor wẽnda wa sõor sẽn pukdi, t’a vẽenemã paasdẽ, hal n wa ta wĩnto-sʋka.” Gom-kãensã wilgda a Zeova sẽn vẽnegd a nin-buiidã a raabã to-to wã. Yaa bilf-bilf la a vẽnegd-ba. Vɛrse-kãngã leb n sõngda tõnd tɩ d bãng kiris-ned sẽn toeemd bũmb kẽer a vɩɩmã pʋgẽ to-to, la a paasd yẽ ne a Zeova zoodã. Yɩlẽ tɩ ned wa paam zood sõma ne a Zeova, tõe n kaoosame. w21.08 8 s. a 1, 3-4

Dũni-kãngã saab sẽn ta n sa wã, d tara tʋʋm wʋsg n segd n tʋme. (Mat. 24:14; Luk 10:2; 1 Pɩy. 5:2) D fãa ratame n maand d sẽn tõe fãa a Zeova siglgã pʋgẽ. Neb wʋsg modgame n moond koɛɛgã sõma n paasdẽ. Kẽer rat n wa lebga so-pakdba, t’a taab rat n wa tʋmd Betɛllẽ wã, bɩ n tɩ naag sull ning sẽn gilgd n met siglgã rotã. Saam-biis wʋsg me modgdame, n na n wa lebg kãsemb-sõngdb wall kãsem-dãmba. (1 Tɩm. 3:1, 8) A Zeova sũur tog n nooma wʋsgo, a sẽn ne a nin-buiidã sẽn modgd n tũud-a ne b sũy fãa wã. (Yɩɩn. 110:3) Yãmb sũur sãamame, y sẽn nan pa paam tʋʋmd ning y sẽn dat a Zeova siglgã pʋgẽ wã yĩng bɩ? Sã n yaa woto, bɩ y pʋʋs a Zeova n togs-a yellã sẽn namsd-y to-to wã. (Yɩɩn. 37:5-7) Sẽn paase, kos-y sagls saam-biis tẽeb sẽn bɩ nengẽ, n bãng y sẽn tõe n maan to-to n tũ Wẽnnaam sõma, la y maan y sẽn tõe fãa n tũ b saglsã. Y sã n maan woto, y na n wa paama tʋʋmd ning y sẽn datã. w21.08 20 s. a 1; 21 s. a 4

Pʋg-kõorã a Ann ra tara yʋʋm 84, la a ra “pa viigd wẽnd-doogẽ wã ye.” A sẽn da “kẽnd tigissã n pa vaandẽ” wã yĩnga, a Zeova ning-a-la barka, n kɩt t’a paam n yã a Zeezi sẽn da yaa bi-pɛɛlgã. (Luk 2:36-38) Rũndã-rũndã, wẽn-sakdb wʋsg sẽn kʋʋl yaa mak-sõng kom-bɩɩsã yĩnga. D sã n maag d yĩng n sõs ne-ba, la d kelg-b neer b sã n wa togsd bũmb nins b sẽn maan a Zeova siglgã pʋgẽ tɩ kõ-b sũ-noogã, na n kenga d raood wʋsgo. D tẽed-n-taas nins sẽn kʋʋlã tara yõod wʋsg a Zeova nifẽ, la a siglgã pʋgẽ. B yãa bũmb toor-toor sẽn wilgd t’a Zeova sɩd teenda a siglgã, la t’a ningda bãmb mengã barka. B rɩka yam b kongr wʋsg pʋgẽ. Y segd n get-b-la wa “yam bulga,” la y rɩk yam b mak-sõngã pʋgẽ. (Yel. 18:4) Y sã n maag y yĩng n bao n bãng-b sõma, y tẽebã pãng na n paasame. w21.09 3 s. a 4; 4 s. a 7-8; 5 s. 11, 13

No-rɛɛs a Ezayi yeelame tɩ woto yaa wa b sẽn ‘yẽsemd buud a taab bĩisim.’ (Eza. 60:5, 16) Pagb la rap sẽn tar minim toor-toorã sẽn wat a Zeova siglgã pʋgẽ wã sõngrã maasem yĩnga, d tõog n moonda koɛɛgã tẽns 240 pʋsẽ, la d yiisd sɛb buud-goam tusr la zak pʋsẽ. Dũni-kãngã saabã sẽn kolgã, dũniyã tẽnsã rigimdgã kɩtame tɩ lebg tɩlɛ tɩ nebã yãk b sẽn na n maanega. Rẽ yĩnga, b na n teela Wẽnnaam Rĩungã bɩ, bɩ yaa dũniyã goosneema-rãmbã la b na n teele? Yaa ned fãa n segd n yãk a sẽn na n maanega. Baa ne a Zeova nin-buiidã sẽn sakd b tẽngã goosneema-rãmbã noyã, b pa kẽesd b toog baa bilf dũni-kãngã politikã yɛlẽ ye. (Rom. 13:1-7) B miime tɩ yaa Wẽnnaam Rĩungã bal n na n wa ne ãdem-biisã zu-loeesã tɩɩm. Rĩung-kãng pa dũniyã rẽnd ye.—Zã 18:36, 37. w21.09 17-18 s. 13-14

Ned y sẽn nong sã n wa bas a Zeova tũubu, tara yõod tɩ y modg n kell n tall raoodo, la y kengd y zakã neb a taabã me raoodo. Wãn to la y tõe n maan rẽ? Sẽn na yɩl tɩ y tẽebã kell n tall pãnga, karemd-y Wẽnnaam Gomdã wakat fãa la y bʋgsd a zugu, la y kẽnd tigissã me n pa vaandẽ ye. Saam-bi-poak a ye yʋʋr sẽn boond t’a Zoana ba wã ne a tão wã fãa wa n basa a Zeova tũubu. Ad a Zoana sẽn yeele: “Mam sã n wa karemd a Abigayill, a Ɛstɛɛr, a Zoob, a Zozɛf wall a Zeezi kibar Biiblã pʋgẽ fãa, m yamã gãandeda bãane. B mak-sõngã kengda m raoodo, la sõng-m tɩ m tall tagsg sẽn yaa sõma. Y sũur sã n wa sãam wʋsgo, bɩ y ra bas a Zeova pʋʋsg ye. Kos-y d saasẽ Ba wã sẽn nong-dã t’a sõng-y tɩ y ges yellã wa yẽ sẽn get-a to-to wã, la a ‘zãms-y la a wilg-y sor ning y sẽn tog n tũ’ wã. (Yɩɩn. 32:6-8) Yaa sɩd tɩ tõe n yɩɩ toog tɩ y bãng n togs a Zeova y sẽn tagsde. La bãng-y t’a Zeova mii yellã sẽn namsd-y to-to wã sõma. A ratame tɩ y pelg y pʋg n gom ne-a.—Yik. 34:6; Yɩɩn. 62:8. w21.09 28 s. a 9-10

Yʋʋmd 32 Pakã poore, tẽn-tʋmd a Pɩyɛɛr ne a Zak la a Zã yãa bũmb sẽn yɩ yel-solemd tɛkẽ. Daar a ye, b ra bee tãng sẽn yaa lug-lug zugu. Tõe tɩ yaa Hɛrmo tãngã zugu. La a Zeezi tedga b taoore, t’a “nengã yãgd wa wĩntoogã, t’a zugẽ futã yãgd wa vẽenem.” (Mat. 17:1-4) Tẽn-tʋmdbã wʋma Wẽnnaam sẽn yeel yaa: “Yãoã yaa mam Bi-ribla, mam sẽn nong a soabã. A taa mam yam. Kelg-y-yã-a.” Rẽ poore, tẽn-tʋmdb a tãabã sẽn da vɩ to-to wã wilgame tɩ b kelga a Zeezi. D rat n dɩka b togs-n-taare. D sũur noomame, a Zeova sẽn tũnugd ne a Zeezi Kirist sẽn yaa “tigingã zu-soabã” n wilgd tõnd sor ne nonglmã. (Efɛ. 5:23) Wa tẽn-tʋmd a Pɩyɛɛr ne a Zak la a Zã, bɩ tõnd me yãk yam n kelg a Zeezi. D sã n maand woto, d na n paama bark wʋsg masã menga, la ka la bilfu, d na n paama sũ-noog sẽn kõn sa. w21.12 22 s. a 1; 27 s. 19

Kiris-ned n da be Korẽnt tigingã pʋgẽ, n yood ne a baaba paga. Tẽn-tʋmd a Poll yeela Korẽnt kiris-nebã tɩ b yiis-a tigingã pʋgẽ. Raoã sẽn maan bũmb ningã kɩtame tɩ tigingã neb kẽer ra pa le tar yam-sõng ye. Bala, sãnda pʋd n da pa get tɩ yaa yel-wẽn-kãseng ye. (1 Kor. 5:1, 2, 13) Kaoosg zugẽ, a Poll yãame tɩ ned ning b sẽn da yiis ned ning tigingã pʋgẽ wã sɩd teka yam n kos sugri. A Poll yeela kãsem-dãmbã yaa: “Yãmb segd n kõ-a-la sugr ne yamleoogo, la y bels-a.” A Poll paasame tɩ yaa sẽn na yɩl “t’a sũurã ra sãam wʋsg t’a koms raood ye.” Dẽnd tẽn-tʋmd a Poll zoee ra-kãngã sẽn tek yam n kos sugrã nimbãanega. A ra pa rat tɩ sũ-sãangã loog raoã t’a koms raood zãnga, hal tɩ kɩt t’a pa kos sugr ye. (2 Kor. 2:5-8, 11) Kãsem-dãmbã rɩkda a Zeova togs-n-taare, n wilgd nimbãan-zoeere. B kibinda neda, sã n mikame tɩ yaa tɩlɛ, la bʋʋm sã n beeme tɩ b tõe n zoe a nimbãanega, b zoeta a nimbãanega. Sã n pa rẽ, woto pa wilgd nimbãan-zoeer ye. Na n yɩɩ wa a sẽn maan bũmb ningã pa wẽng ye. w21.10 11-12 s. 12-15

D tõe n dɩka sũ-kẽkã n mak ne nodre. Nodr ning yaa sãmpogr sẽn yaa bilfri, tɩ nodr ning me yaa sãmpogr sẽn yaa kɛgenga. Wala makre, d sã n wa wãad zẽ-biisi, sʋʋgã tõe n wãaga d nugã bilf bala. Tõe n zab-d-la wʋsgo, la vẽkembeoog bɩ rasem a yiib poore, d tõeeme meng n pa le tags sʋʋgã sẽn wãag-dã yell ye. Woto me, bũmb kẽer neb sẽn maan n sãam d sũur pa tolg n yaa wẽng wʋsg ye. Wala makre, d zoa tõe n yeelame bɩ n maan bũmb n pa gũus tɩ sãam d sũuri, tɩ d sak n kõ-a sugr nana-nana. La d nodrã sã n yaa kɛgenga, logtor tõe n sẽeme la a vil ne peende. La d sã n tar nodrã zagengo, a pa na n maag ye. A na n pʋd n yãngdame. Ned b sẽn beeg tõe n maanda bũmb sẽn wõnd woto. A tõe n ket n tagsda yellã sẽn nams-a to-to wã n pa basdẽ ye. La neb nins sẽn ket n tar sũ-kẽk n pa basdẽ wã maanda b mens wẽnga. Dẽnd sẽn são yaa d sẽn na n tũ saglg ning sẽn rũndã daar vɛrse wã pʋgẽ wã. w21.12 12 s. 15

Kãsem-soab sũur tõeeme n pa noom ne a tẽed-n-taag sẽn manegd a meng to-to wã, la a sẽn yeelgd fut ninsã ye. Sã n wa yaa woto, a tõe n soka a meng yaa: ‘Bũmb n be Biiblã pʋgẽ n wilgd tɩ m segd n sagla a soabã bɩ?’ Sẽn mik tɩ kãsem-soabã pa rat n togs a meng tagsgã, a tõe n soka kãsem-soab a to wall koe-moond tẽeb sẽn bɩ, n bãng yẽ me tagsgo. B tõe n naaga taab n lebg n ges bũmb ning a Poll sẽn yeel fu-yerdɩ wã la mengã manegr wɛɛngẽ wã. (1 Tɩm. 2:9, 10) A Poll wilgame tɩ kiris-ned fu-yerdɩ segd n zemsame, n pa hobragi, la pa kɩtd tɩ ned lak n lʋɩ ye. La a pa sõdg fut nins fãa d sẽn tõe n yeelg la d sẽn pa tõe n yeelg ye. A wilgame tɩ kiris-ned fãa tara sore, n na n yãk fut nins a sẽn dat n yeelge, sã n mikame tɩ pa kɩɩsd Biiblã noyã ye. Dẽnd kãsem-dãmbã segd n bao n bãnga a soabã sẽn yãkd yam n maand bũmb ninsã sã n wilgdame t’a yaa sik-m-meng soaba, la ned sẽn tar yam-sõngo. D bãng tɩ kiris-neb a yiib tẽeb sẽn bɩ yam-yãkr tõe n yaa toor-toore, tɩ fãa yaool n yaa sõma. D pa segd n modg d saam-biisã, tɩ b maan bũmb nins tõnd sẽn tẽed tɩ yaa sõma wã ye. w22.02 16 s. a 9-10

D segd n nonga d taabã ne nonglem-kãsenga. Wãn to la rẽ nafd tõndo? Bɩ d ges Biiblã sẽn leokd sok-kãngã to-to Yel-bũn sebrã pʋgẽ. B yetame: “Ra sak n bas maan-sɩd la pʋ-peelem ye. . . . Woto, Wẽnnaam ne nebã na n pẽga foom, la b suur na n yɩɩ noog ne-fo.” “Nin-sõng maanda a meng neere.” “Ned sã n baood tɩrlem la maan-neere, a na n paama vɩɩm.” (Yel. 3:3, 4; 11:17; 21:21) Yel-bũn sebrã vɛrse-kãensã wilgda bʋʋm a tãab sẽn kɩt tɩ d segd n nong d taabã ne nonglem-kãsenga. Pipi, yaa tɩ Wẽnnaam sũur nooma ne-do. Yiibu, nafda tõnd mengã. Wala makre, d paamda zood sẽn tar pãng wʋsg ne neb a taabã. Tãabo, d na n wa paama bark beoog-daare, la vɩɩm sẽn kõn sa. Dẽnd d tara bʋʋm sẽn seke, n na n tũ bũmb ning a Zeova sẽn yeelã. A yeelame yaa: “Maand-y taab neer la y zoet taab nimbãanega.” w21.11 8 s. a 1-2

Y pĩnd zu-loeesã, wall y sẽn maood ne zu-loees nins masã wã sã n wilgdame tɩ yaa wa y tẽebã pa tar pãnga, bɩ y ra koms raood ye. Ges-y rẽ wa segb y sẽn tõe n tũnug ne n paas y tẽebã pãnga. Pelg-y y pʋg n pʋʋs a Zeova, sẽn yɩɩd fãa zu-loe-kɛgems sasa. Bãng-y t’a Zeova tõe n tũnuga ne y zakã ned wall y zo-rãmb n sõng-yã. Y sã n bas t’a Zeova sõng-y tɩ y tõog n mao ne y zu-loeesã masã menga, y tõe n basa y yam t’a na n sõng-y lame tɩ y tõog n mao ne zu-loɛɛg ning fãa y sẽn na n wa sege. A Zeezi wilga a karen-biisã yɛl nins wɛɛngẽ b sẽn segd n modg tɩ b tẽebã tall pãngã. La a ra kɩsa sɩd t’a Zeova na n sõng-b lame tɩ b tõog n mao ne zu-loees nins fãa b sẽn na n segã. (Zã 14:1; 16:33) A ra kɩsa sɩd tɩ kʋʋn-kãseng n na n põs to-kãsengã sasa, b tẽebã sẽn tar pãngã yĩnga. (Vẽn. 7:9, 14) Yãmb na n wa naaga nin-kãensã y sã n modg masã meng tɩ y tẽebã pãng paase.—Ebre. 10:39. w21.11 25 s. 18-19

Rũndã-rũndã, d pa gũud t’a Zeova maan yel-solemd n kogl tõnd ye. La d kɩsa sɩd tɩ sẽn teeg-b a Zeova wã na n wa paama vɩɩm sẽn kõn sa, baa b sã n maan kaalem masã menga. Ka la bilfu, yɛlã na n kɩtame tɩ lebg toog tɩ d bas d yam t’a Zeova na n kogl-d lame. Goog sẽn yit Magoogã sẽn makd tẽns wʋsg sẽn lagem taabã sã n wa na n zab ne Wẽnnaam nin-buiidã, na n yɩɩ wa d vɩɩmã bee yell pʋgẽ. Wakat kãnga, d segd n basa d yam t’a Zeova tõe n fãag-d lame, la t’a na n sɩd maana woto. B nifẽ, tõnd na n wõnda piis sẽn pa tar pe-kɩɩm sẽn na n kogl-b ye. (Eze. 38:10-12) La d pa na n bob zab-teed ye. D pʋd n pa mi zabr ye. Tẽn-tẽnsã neb na n tagsame tɩ b na n zaba ne-d n tõog-d nana-nana. La b pa mi t’a Zeova malɛgsã na n zaba ne-b n fãag tõnd ye. Yaa d sẽn tar tẽebã yĩng n kɩt tɩ d mi rẽ. Tẽn-tẽnsã neb pa na n yã malɛgsã ye. Bala b pa tar tẽeb ne Wẽnnaam ye. Saasẽ tãb-biisã sã n wa yik n na n zab ne-b n fãag tõndo, na n yɩɩ lingr meng-meng ne-ba.—Vẽn. 19:11, 14, 15. w22.01 6 s. 12-13

D tẽed-n-taasã fãa tara yõod a Zeova nifẽ. Rẽnd b segd n talla yõod tõnd me nifẽ. D segd n tʋll n maana d sẽn tõe fãa n kogl-ba, la d ges b yelle. D sã n wa bãng tɩ d sãama d tẽed-n-taag sũuri, bɩ tɩ d beeg-a lame, d pa segd bal n yeel tɩ saam-biigã sũur yikda tao-tao, t’a segd n kõ-d-la sugri, n kell n bas yellã woto n pa welg-a ye. Bõe n tõe n wa kɩt tɩ ned getẽ tɩ b beeg-a lame? B sẽn wub kẽer to-to wã kɩtame tɩ b tagsdẽ tɩ b ka võor ye. Kẽer nan sɩnga a Zeova tũubu. B pa mi tɩ ned sã n beeg-ba, b segd n kõo sugr ye. Sẽn yaa to-to fãa, d segd n maana d sẽn tõe fãa tɩ laafɩ leb n zĩnd d sʋka. Sẽn paase, ned sũur sã n yikd tao-tao a taabã manesem yĩnga, rẽnd a sak n deeg t’a segd n modg n toeemame. A sã n maan woto, a na n paama sũ-noogo, la zems-n-taar na n zĩnda yẽ ne a tẽed-n-taasã sʋka. w21.06 21 s. a 7

A Zeezi wʋmda y yellã võore. D sã n wa be sũ-sãams pʋgẽ, n paam tɩ d zoa bels-do, noom-d lame. Sẽn yɩɩd fãa, a sã n zoe n maoo ne d yellã buudu. A Zeezi yaa zoa a woto buudu. D sã n wa koms raoodo, n dat sõngre, a wʋmda d yellã võore. A mii d pan-komsmã. La a na n gesame tɩ d paam sõngre, “d sẽn wat n dat sõngr wakate.” (Ebre. 4:15, 16) Wa a Zeezi sẽn sak tɩ malɛk sõng-a Gɛtsemane zẽedã zĩigẽ wã, tõnd me segd n tʋllame n sak t’a Zeova sõng-do. A Zeova tõe n tũnuga ne sebr a siglgã sẽn yiisi, video, sõsga, pa rẽ bɩ a kɩt tɩ kãsem-soab wall kiris-ned tẽeb sẽn bɩ wa kaag-do, n keng d raoodo. (Luk 22:39-44) A Zeova na n kõo yãmb a laafɩ wã, n keng d raoodo. D sã n pʋʋse, d na n paama “Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã.”—Fili. 4:6, 7. w22.01 18-19 s. 17-19

A Zeova maanda sẽn yaa tɩrg wakat fãa. La wakat ninga, tõe n yɩɩ toog tɩ d kɩs neb nins a sẽn yãk tɩ b lʋɩt tõnd taoorã sɩda. D tõe n sokda d mens sẽn lʋɩt-b tõnd taoorã sã n sɩd tũuda a Zeova sẽn datã, bɩ yaa bãmb mensã tagsgo. Togs sɩdã, d pa tõe n yeel tɩ d kɩsa a Zeova sɩda, d sã n pa kɩs neb nins a sẽn yãk tɩ b lʋɩt tõnd taoorã sɩd ye. Bala a Zeova kɩs-b-la sɩda. Rũndã-rũndã, a Zeova tũnugda ne “tʋm-tʋmd sẽn tũud sɩd la sẽn tar yamã” n get a nin-buiidã yelle. (Mat. 24:45) Wa sẽn da yaa to-to pipi kiris-nebã wakatẽ wã, rũndã-rũndã me, tʋm-tʋmdã geta Wẽnnaam nin-buiidã yell dũniyã gill zugu, la a wilgd tigimsã kãsem-dãmb b sẽn segd n maane. Kãsem-dãmbã me modgdame n sõngd tigimsã neb tɩ b bãngd b sẽn segd n maane. D wilgdame tɩ d kɩsa sɩd t’a Zeova sẽn maand fãa yaa tɩrga, d sã n sakd n tũud siglgã la kãsem-dãmbã sẽn yet tõnd tɩ d maanã. w22.02 4 s. a 7-8

D sũur nooma wʋsgo, d sẽn paam n yaa a Zeova Kaset rãmbã. Leb n yaa zu-zẽkr meng-menga. D sã n paam n sõng “neb nins sẽn tar yam ning sẽn zems ne vɩɩm sẽn ka sɛtã” tɩ b lebg tẽedba, d sũy nooma wʋsgo. (Tʋʋ. 13:48) A Zeezi karen-biisã sẽn wa n tɩ moon koɛɛgã n lebg n wa togs-a wã, vʋʋsem sõngã kɩtame t’a Zeezi “paam sũ-no-kãsenga.” (Luk 10:1, 17, 21) Tẽn-tʋmd a Poll yeela a Tɩmote yaa: “Gũus f meng wakat fãa, la f gũus ne f sẽn zãmsd nebã bũmb ningã.” A paasame yaa: “Bala fo sã n maand woto, f na n fãaga f meng la f fãag neb nins sẽn kelgd foomã.” (1 Tɩm. 4:16) Dẽnd d koe-moonegã fãagda yõyã. D gũusda d mens wakat fãa, d sẽn yaa Wẽnnaam Rĩungã poorẽ dãmbã yĩnga. D maooda wakat fãa me, n na n tall manesem sẽn na n kɩt t’a Zeova yʋʋrã paam pẽgre, la wilg me tɩ d kɩsa sɩd ne koe-noogã d sẽn moondã. (Fili. 1:27) D wilgdame tɩ d ‘gũusda ne d sẽn zãmsd nebã bũmb ningã,’ d sã n segend d mens sõma wakat fãa n yaool n yi koɛɛgã moonego, la d pʋʋsd a Zeova n kot a sõngre, nand tɩ d taas nebã koɛɛgã. w21.10 24 s. a 1-2

Ned sẽn “yeelg nin-paalgã” rɩkda a Zeova togs-n-taare. A bɩɩsda vʋʋsem sõngã biisã, la a basdẽ tɩ vʋʋsem sõngã sõngd-a t’a manegd a tagsa wã, a yel-manesmã la a tʋʋm-tʋmdɩ wã. Wala makre, a nonga a Zeova la a nin-buiidã. (Mat. 22:36-39) Ned a woto buud kelld n talla a sũ-noogã, baa a sã n maooda ne zu-loe-kɛgemse. (Zak 1:2-4) A yaa ned sẽn baood laafɩ. (Mat. 5:9) A maanda sũ-mare, la a tar bʋgsem ne neb a taabã. (Kol. 3:13) A nonga sẽn yaa sõma, la a maand rẽ. (Luk 6:35) A wilgda ne a tʋʋmã t’a tẽeda a saasẽ Ba wã ne a sũur fãa. (Zak 2:18) Ned sã n bao a noore, a tallda sũ-bʋgsem, la a yõkd a meng a sã n wa be makr taoore. (1 Kor. 9:25, 27; Tɩt 3:2) Sẽn na yɩl n yeelg nin-paalgã, d segd n bɩɩsa zʋg-sõma nins fãa sẽn be Galat rãmb 5:22, 23, la Biiblã zĩis a taabã. w22.03 8-9 s. a 3-4

Kãsem-dãmbã tõe n dɩka tẽn-tʋmd a Poll togs-n-taar n moond zak-zaka, la b modgd n tũnugd ne segb buud fãa b sẽn paame, n moond koe-noogã. (Efɛ. 6:14, 15) Wa a Polle, koɛɛgã mooneg sasa, kãsem-dãmbã tõe n sõnga neb a taabã tɩ b paam minim, wala makre kãsem-sõngdbã. (1 Pɩy. 5:1, 2) La kãsem-dãmbã pa segd n bas tɩ b tʋʋmã kɩt tɩ b pa le tar sẽk n moond koɛɛgã ye. (Mat. 28:19, 20) Sẽn na yɩl n paam sẽk n tʋmd b tʋʋma fãa, wakat ninga b pa segd n sak tʋʋm a taab ye. Naoor wʋsgo, b sã n pʋʋs la b tags neere, b mikdame tɩ b sã n sak tʋʋm kẽere, b pa na n le paam sẽk n maand bũmb nins sẽn tar yõod n yɩɩdã ye. Wala makre, b zak pʋgẽ Biibl zãmsgã, n moond koɛɛgã wʋsgo, wall n zãmsd b kambã koɛɛgã moonego. B tõe n basa b yam, tɩ b sẽn dat n paam sẽk n maand bũmb nins sẽn tar yõod n yɩɩdã nooma a Zeova. w22.03 27 s. a 4, 7; 28 s. a 8

Y ket n tẽrame tɩ y sẽn wa n dat n lebg a Zeova Kaset soabã, rabeem bilf n da tar-y bɩ? Tõe tɩ y ra yetame tɩ y pa na n tol n tõog n moon koɛɛgã zak-zak la zãma sʋk ye. Tõe me tɩ y ra maanda rabeem, y zakã rãmb bɩ y zo-rãmbã sẽn da tõe n nams yãmbã yĩnga. Sã n yaa woto, y wʋmda y karen-biigã sẽn yɛɛsdã võore. A Zeezi yeelame tɩ neb kẽer tõe n sɩd maanda rabeem yɛl a woto buud yĩnga. La a yeela a karen-biisã tɩ b ra bas tɩ rabeemã kɩt tɩ b bas a Zeova tũub ye. (Mat. 10:16, 17, 27) Sõngd-y Biibl karen-biigã bilf-bilfu, t’a gomd a tẽebã yell ne a taabã. Tõe t’a Zeezi sẽn wa n tʋm a karen-biisã tɩ b tɩ moonã, b ra yɛɛsda bilfu. La a sõng-b lame n wilg-b zĩig ning b sẽn segd n moone, la koɛɛg ning b sẽn segd n moonã. (Mat. 10:5-7) Wãn to la y tõe n dɩk a Zeezi togs-n taare? Sõng-y karen-biigã t’a bãng a sẽn tõe n moon koɛɛgã wakat ninga. Wala makre, sok-y-yã-a n ges a sã n mii neda, t’a soab sã n paam tɩ b wilg-a bũmb takɩ Biiblã sẽn yet bɩ na n naf-a. Rẽ poore, bɩ y sõng-a t’a bãng a sẽn na n togs bũmb ningã, la a sẽn na n togs rẽ nana-nana to-to. w21.06 6 s. 15-16

Yʋʋmd 2015 wã, tẽn-digimdg n zĩnd Nepall soolmẽ wã. Ad neb kẽer sẽn põs tẽn-digimdgã sasa sẽn yeele: “Minit a wãn pʋgẽ bala, butik-bɛdã la etaas-kʋdã sɩnga siigri.” “Zĩig fãa, nebã ra maanda rabeem. Neb wʋsg yeelame tɩ tẽn-digimdgã pa yɩɩg minit a yiib ye. La sã n yaa ne maam, yaa wa kaoosa wʋsgo.” Rũndã-rũndã menga, tẽn-digimdg buud n maande. A Zeova digimdeda dũniyã tẽnsã fãa. No-rɛɛs a Aaze yeelame yaa: “Maam a Saasẽ-Pãng-Soabã yetame: ‘Keta bilfu, keta bilf bala, tɩ mam kɩt tɩ saasẽ la tẽng rigimdi.’” (Aaze 2:6) A Aaze sẽn gom tẽn-digimdg ning yellã pa tẽn-digimdg sɩd-sɩd sẽn sãamd tẽng ye. Pʋd n yaa tẽn-digimdg sẽn nafd neba. A Zeova mengã yeta tõnd yaa: ‘Mam na n kɩtame tɩ tẽnsã fãa rigimdi. B na n wʋka laog nins fãa sẽn tar yõodã n wa, la mam na n kɩtame tɩ ro-kãngã pid ne ziiri.’ w21.09 14 s. a 1-3

Sẽn na yɩl n paam zood sõma ne neda, d segd n sõsda ne taab wakat fãa, la ne pʋ-peelem. Yaa woto me ne zood ning tõnd sẽn tar ne a Zeova wã. D sã n pʋʋs a Zeova n togs-a d tagsgo, la yɛl nins sẽn pak-dã, d wilgdame tɩ d kɩs-a-la sɩda, la tɩ d miime t’a nong-d lame. (Yɩɩn. 94:17-19; 1 Zã 5:14, 15) Nong-y n be-y ne y zo-rãmb nins sẽn maand sɩd ne a Zeova wã. B yaa kũun a Zeova sẽn kõ-do. (Zak 1:17) D saasẽ Ba a Zeova wilgame t’a nand-d lame, a sẽn kɩt tɩ d tar saam-biis la saam-bi-pogs tɩ d yaa wa zak a ye neba, n wilgd wakat fãa tɩ b nong-d lame wã. (Yel. 17:17) Tẽn-tʋmd a Poll lɛtr ning a sẽn gʋls n tool Kolos kiris-nebã pʋgẽ, a goma kiris-neb kẽer sẽn da sõng-a yelle, n yeel tɩ b ‘belsda yẽ wʋsgo.’ (Kol. 4:10, 11) Baa a Zeezi meng ra rata a zo-rãmb sẽn yaa malɛgs la ninsaalb sõngre, hal t’a sũur da noom ne a sẽn paam tɩ b sõng-a wã. (Luk 22:43) D sã n dɩk d yell bɩ d zu-loɛɛg n togs kiris-ned tẽeb sẽn bɩ, pa rat n yeel tɩ d ka võor ye. Pʋd n yaa bũmb sẽn tõe n kogl-do. w21.04 24-25 s. 14-16

Y tẽed-n-taag sã n maan bũmb tɩ namsd yãmb wʋsgo, bõe la y segd n maane? Maan-y y sẽn tõe fãa tɩ laafɩ kell n zĩnd y sʋka. Pʋʋs-y-yã a Zeova n togs-a sẽn be y sũurẽ. Kos-y-yã-a t’a sõng sẽn beeg-a yãmbã, la a sõng-y tɩ y ges a soabã zʋg-sõma wã n yɩɩda, zʋg-sõma nins sẽn kɩt t’a Zeova nong-a wã. (Luk 6:28) Y sã n pa tõe n bas taale, tags-y y sẽn na n maan to-to n tɩ gom ne-a n welg yellã. Yaa sõma tɩ wakat fãa bɩ y ning y yamẽ tɩ saam-biigã sẽn sãam y sũurã pa ne pʋ-toog ye. (Mat. 5:23, 24) Y sã n wa gomd ne y saam-biigã, bɩ y ra tol n dɩk yam-wẽng n dogl-a ye. La a sã n pa rat n bao laafɩ? Bɩ y “ket n maand sũ-mar” ne-a, la y ra koms raood n bas ye. (Kol.3:13) Sẽn yɩɩd fãa, ra tall-y sũ-kẽk ne-a ye. Bala woto tõe n sãama yãmb ne a Zeova zoodã. Ra tol-y n bas-y tɩ baa fʋɩ kɩt tɩ y lak n lʋɩ ye. Woto, y wilgdame tɩ y nonga a Zeova n yɩɩd bũmb fãa.—Yɩɩn. 119:165. w21.06 23 s. 15