Sẽoogo

Yaa a Zeova n kɩt tɩ b yiisd yel-wẽn-maandbã tigingã pʋgẽ. Yaa ned ning sẽn bas a Zeova tũubã sõngr yĩnga, la neb a taabã me neer yĩnga. B sã n wa yiis ned tigingã pʋgẽ, neb kẽer tõe n tagsame tɩ pa zems ye. La d tẽeg tɩ naoor wʋsgo, nin-bãmbã buudã pa sakd n togs bũmb kẽer sẽn pa sõma sẽn maan-a yel-wẽndã zug ye. Yaa d sak n deeg bal tɩ d pa mi yɛlã fãa vɩʋʋg ye. Rẽ wã, y segd n kɩsa sɩd tɩ kãsem-dãmb nins sẽn zĩnd bʋ-kaoorã sull pʋgẽ wã maana b sẽn tõe fãa n tũ Biiblã sẽn yetã, la b kao bʋʋdã ‘a Zeova yĩnga.’ (2 Kib. 19:6) Kãsem-dãmbã sã n yiis ned y sẽn nong tigingã pʋgẽ tɩ y teel b yam-yãkrã, tõe n sõnga a soabã t’a lebg n wa a Zeova nengẽ. A Elizabɛt yeelame: “D sẽn da segd n lak d meng ne d bi-riblã yɩɩ toog wʋsg ne-do. La a sẽn wa n lebg n wa a Zeova nengẽ wã, a sak n deegame tɩ b sẽn da yiis-a tigingã pʋgẽ wã zemsame. A wa wilgame tɩ sõng-a lame t’a rɩk yam. w21.09 28-29 s. 11-12

Tags-y pʋg-kõorã yelle. Sãmbg kae t’a ra nongẽ lame n kõ a Zeova tɩ yɩɩg woto. La a maana a sẽn tõe. A kõo a Zeova a sẽn da tar tɩ yaa sõma n yɩɩdã. A Zeezi me bãngame t’a kũunã tara yõod wʋsg a Ba wã nifẽ. Yam-bʋg la d tõe n dɩk kiba-kãngã pʋgẽ? A Zeova sũur noomame, d sã n kõ-a bũmb ning d sẽn tar tɩ yaa sõma n yɩɩdã, rat n yeel tɩ d sã n maand a raabã ne d sũurã fãa la ne d sɩɩgã fãa. (Mat. 22:37; Kol. 3:23) A Zeova sã n neẽ tɩ d maanda d sẽn tõe fãa, a sũur nooma wʋsgo. Yaa woto me ne d sẽn maand d sẽn tõe fãa n kẽesd d sẽkã la d pãngã a Zeova tũubã pʋgẽ wã, koe-moonegã la tigissã kẽndã sẽn naage. Wãn to la y tõe n tũ kiba-kãngã sẽn gomd pʋg-kõorã yellã sẽn zãmsd tõnd bũmb ningã? Tags-y neb takɩ yelle, neb sẽn tõe n dat tɩ b sõng-b tɩ b bas b yam tɩ b modgrã tata a Zeova yam. Tõe tɩ yaa saam-bi-poak sẽn kʋʋle, sẽn ningd a meng taal bɩ sẽn tagsd t’a ka yõodo, a sẽn pa le tar keelem bɩ pãng n tõe n moon koɛɛgã wa pĩndã yĩnga. w21.04 6 s. 17, 19-20

A Zeova mii wakat ning sẽn zems t’a sãam dũni-wẽn-kãngã wã. A sũ-marã kɩtame tɩ b paam n tigimd kʋʋn-kãseng sẽn yaa neb milyõ-rãmb sẽn naag taab n tũud-a la b pẽgd-a. B fãa sũy nooma a Zeova sẽn tõog toog n kaoose, hal tɩ b wa roge, n wa nong-a la b rɩk b meng n kõ-a wã. Neb milyõ-rãmb sã n wa tõog toog n tãag saabã, na n lebga vẽeneg t’a Zeova sẽn tall sũ-marã pa yɩ zaalem ye. Baa ne a Sʋɩtãan sẽn wa ne sũ-sãams la namsgã, a Zeova ket n yaa “Wẽnnaam sẽn yaa sũ-noog soaba.” (1 Tɩm. 1:11) Tõnd me tõe n kell n maana sũ-noogo, n gũud wakat ning a Zeova sẽn na n kɩt t’a yʋʋrã paam waoogre, n wilg tɩ yẽ n segd n yɩ yĩngr la tẽng Naaba, la a kɩt tɩ wẽnemã la zu-loeesã fãa sa wã. Bɩ d kell n yãk yam n tõogd toogo, la d keng d pelse, d sẽn mi tɩ d saasẽ Ba wã me tõogda toogã. w21.07 13 s. 18-19

A Zeezi wakatẽ wã, neb wʋsg pa tẽ-a ye. Sã n yaa ne bãmba, ra yaa ra-wãad sẽn yaa naong soab biig bala. Sẽn paase, a ra yita Nazarɛte, sẽn tog n da yaa galʋ-tẽn-bil nebã sẽn da pa nande. Baa a Natanayɛll sẽn wa n lebg a Zeezi karen-biigã ra yeela sɩngrẽ wã tɩ “bõn-sõng tõe n yii Nazarɛt sɩda?” Tõe tɩ yaa bãngr-gomd ning sẽn be Miise 5:1 n da be a yamẽ. Beenẽ b pĩnd n togsame tɩ Mesi wã na n doga Betlehɛm, la pa Nazarɛt ye. No-rɛɛs a Ezayi ra pĩnd n togsame t’a Zeezi bɛɛbã ra na n maana b toog kae ne Mesi wã ‘zãmaanã’ yɛla. (Eza. 53:8) Nin-kãensã sã n da maag b yĩng n vaees yɛlã sõma, b ra na n bãngame t’a Zeezi roga Betlehɛm, la t’a yaa rĩm a Davɩɩd yagenga. (Luk 2:4-7) Rẽ wã, zĩig ning a Zeezi sẽn dogã kell n zemsa ne bãngr-gomd ning sẽn be Miise 5:1 pʋgẽ wã. Yellã la bʋg masã? Nebã ra yɩta tao-tao n kaood bʋʋdo, n pa reng n bao n bãng yɛlã vɩʋʋg ye. Rẽ n so tɩ b pa sak n tẽ a Zeezi ye. w21.05 2-3 s. a 4-6

Biiblã leb n gomda neb sẽn paam bark yelle, b sẽn sak n deeg sagls yĩnga. Wala makre, a Zoob. Baa ne a sẽn da nong Wẽnnaam la a rat n ta a yamã, a ra pa zems zãng ye. Yɛlã sẽn wa n loog-a wã, a gomame n pa gũus ye. A paamame t’a Eliyu ne a Zeova sagl-a vẽenega. A Zoob manesem yɩɩ wãna? Ad a sẽn yeele: “Mam goma m sẽn ka mi . . . Rẽ kɩtame tɩ mam lebsd m noor poorẽ, la m maand m bãngẽ n zĩ tomẽ ne tompeglmẽ.” (Zoob 42:3-6, 12-17) A Zoob sẽn sak n deeg a Eliyu saglgã, baa ne a Eliyu yʋʋmã sẽn da pa ta-a wã, wilgdame t’a ra yaa sik-m-meng soaba. (Zoob 32:6, 7) Sik-m-mengã tõe n sõng-d lame me tɩ d sak n deeg saglga, baa d sã n wa getẽ tɩ pa zems ne tõnd yɛlã sẽn yaa to-to wã, wall tɩ sẽn sagl-a tõndã yʋʋm pa ta-do. D fãa ratame n bɩɩsd vʋʋsem sõngã biis n paasdẽ, la d paasd d minimã koɛɛgã mooneg la nebã zãmsg pʋgẽ. w22.02 11 s. a 8; 12 s. 12

Tigingã ned fãa segd n sõngame tɩ nonglem la laafɩ zĩnd tigingã pʋgẽ, tɩ ned ra wa getẽ t’a yaa a yembre, tɩ sãamd a sũur ye. Tõnd tʋʋm-tʋmdɩ wã la d no-goamã tõe n kenga d taabã raoodo. Bõe la y tõe n maan n sõng d tẽed-n-taas nins sẽn yaa b ye b zakã neb sʋk n tũud a Zeova wã, tɩ b bãng tɩ tigingã neb nong-b lame? Yõg-y zood ne neb nins sẽn wa tigingã pʋgẽ paalmã. D reegd-b sõma, n pʋʋsd-b noog-noogo. (Rom. 15:7) La rẽ bal pa sek ye. D sẽn dat yaa d wa lebg b zo-rãmb hakɩɩka. Rẽ wã, d wilg nin-paalsã tɩ d nand-b lame, la tɩ b yell sɩd pak-d lame. D bao n bãng zu-loees nins b sẽn maood ne wã, la d gũus n da wa sok-b sogsg n na n bãng yɛl sẽn pa pak-d ye. Tõe n yɩɩ toog ne kẽer tɩ b sak n togs-d sẽn be b sũurẽ. Woto wã, yɩta sõma tɩ d ra pẽdg-b n dat tɩ b gom ye. D sok-b sogsg ne yam, la d maag d yĩng n kelg b sẽn na n leok to-to wã. Wala makre, d tõe n sok-b lame n gese wãn to la b bãng sɩdã. w21.06 11 s. 13-14

D sũur nooma d sẽn paam n naag d tẽed-n-taasã n tũud a Zeova, n yaa “yãgr a yembre,” n tar “pe-kɩɩm-yɛngã.” Organisés pour faire la volonté de Jéhovah sebrã neng 165 yetame: “Zems-n-taar sẽn be yãmb ne y tẽed-n-taasã sʋkã sẽn nafd yãmbã, y segd n modgame tɩ baa fʋɩ ra sãam-a ye.” Rẽ n so tɩ d segd n “modg n get d saam-biisã wa a Zeova sẽn get-b to-to wã.” Tõnd fãa yaa ‘kom-bõones’ sẽn tar yõod wʋsg a Zeova nifẽ. Yaa woto la yãmb me get y tẽed-n-taasã bɩ? A Zeova nee bũmb nins fãa y sẽn maand n na n sõng-b la y ges b yellã, t’a sũur noom ne rẽ. (Mat. 10:42) D nonga d tẽed-n-taasã. Woto wã, “bɩ d modg n da tol n maan bũmb sẽn tõe n kɩt tɩ saam-biig lak n lʋɩ wall a bʋdg ye.” (Rom. 14:13) D getẽ tɩ d saam-biisã yɩɩda tõndo, la d sakd n kõt-b sugr ne d sũur fãa. Bɩ d ra bas tɩ neb a taabã manesmã kɩt tɩ d lak n lʋɩ ye. D pʋd n yãk yam, n “baood bũmb nins sẽn wat ne laafɩ wã, la bũmb nins sẽn sõngd tɩ d fãa tẽebã pãng paasdẽ wã.”—Rom. 14:19. w21.06 24 s. 16-17

D sã n maagd d yĩng n bʋgsd sagls nins Wẽnnaam sẽn tũnugd ne a Gomdã la a siglgã n kõt-dã zug la d tũudẽ, bilf-bilfã, d na n wa tõog n bɩɩsa Kirist zʋg-sõma wã buudu. Sẽn paase, d na n maneg n bãnga Wẽnnaam sõma. A Zeezi wẽe yel-bũnd n wilg tɩ Rĩungã koɛɛgã d sẽn moondã yaa wa bõn-buud fĩ-fĩi d sẽn bʋt sũ-tɩrs rãmbã sũyẽ, tɩ wa bund n yit bilf-bilfu. A yeelame: ‘Bõn-buudã bundame n yit n bɩtẽ, la ka-koaadã pa mi rẽ sẽn maand to-to ye. Bilf-bilfu, pʋʋgã womda biis a toore. Pipi, kaaf n yita, n wa ning pʋga, n wa baas ne ka-zug sẽn kog sõma.’ (Mark 4:27, 28) A Zeezi wilgame tɩ wa bõn-bɩtg sẽn bɩt bilf-bilfã, ned sã n sak Rĩungã koɛɛgã, a tẽebã me bɩta bilf-bilfu. Wala makre, d Biibl karen-biig sã n wa paamd zood sõma ne a Zeova, d yãta vẽeneg t’a sɩngda bũmb wʋsg toeeng a vɩɩmã pʋgẽ. (Efɛ. 4:22-24) La d segd n tẽegame tɩ yaa a Zeova n kɩtd tɩ bõn-buudã sẽn yaa fĩ-fĩi wã bɩt a sũurẽ wã. w21.08 8-9 s. a 4-5

Ned sã n maand sũ-noog ne a “sẽn tar bũmb ningã,” la ne a sẽn tõe n maan bũmb ning masã meng tɩ zems ne a yɛlã sẽn yaa to-to wã, a paamda sũ-noog wʋsgo. La ned sã n nong n tagsd bũmb a sẽn dat n paam yelle, t’a sẽn baood bũmb ningã yɩɩd a pãnga, a pa tol n tõe n paam sũ-noog ye. Woto wilgda tõnd bõe? D sã n dat n paam sũ-noogo, d segd n tagsda bũmb nins d sẽn zoe n tarẽ wã yelle, la pa bũmb nins d sẽn pa tõe n paamã yell ye. Rẽ yĩnga, y sɩd tõe n maana sũ-noog ne bũmb nins y sẽn zoe n tarẽ wã bɩ? Neb wʋsg tagsdame tɩ woto pa tõe, bala ninsaalbã nong n dat n zãmsa bõn-paal maanego. La yaool n tõeeme. D tõe n sɩd maana sũ-noog ne bũmb nins d sẽn ‘zoe n tarẽ wã.’ Wãn to? Sẽn na yɩl n bãng rẽ, bɩ d tags a Zeezi yel-bũnd ning sẽn be Matiye 25:14-30 wã sẽn gomd talã-rãmbã yellã zugu, n ges rẽ sẽn tõe n sõng-d to-to tɩ d paam sũ-noog tʋʋmd ning d sẽn zoe n tʋmdẽ wã pʋgẽ n paase. w21.08 21 s. a 5-6

A Zeova sõngda neb nins ‘sũy sẽn sãamã.’ Pa kãsem-dãmbã bal n tõe n sõng d saam-biis la saam-bi-pogs nins sũy sẽn sãamã ye. Tõnd fãa me tõe n maana woto. Bũmb d sẽn tõe n maan n keng b raoodo, yaa d sẽn na n wilg-b tɩ b yell sɩd pak-d lame. A Zeova ratame tɩ d sõng-b tɩ b bãng t’a sɩd nong-b-la wʋsgo. (Yel. 19:17) Sẽn paase, d sõngda d saam-biisã la d saam-bi-pogsã, d sã n yaa sik-m-mens rãmba, la d pa maand wa d yɩɩda d taabã ye. D pa segd n maand wa d yɩɩda d taabã, bala tõe n kɩtame tɩ b wa maand sũ-kiir ne-do. D pʋd n segd n talla d minimã la d bãngrã n keng d taabã raoodo. (1 Pɩy. 4:10, 11) D sã n ges a Zeezi sẽn tall manesem ning ne a karen-biisã, tõe n sõnga tõnd tɩ d bãng d manesem sẽn segd n yɩ to-to ne d taabã. A Zeezi yɩɩ nin-kãseng sẽn ka to. La baa ne rẽ, a ra yaa “sũ-maasem soab la sik-m-meng soaba.” (Mat. 11:28-30) A sã n da zãmsd nebã, a ra tũnugda ne gom-biis la makr võor wʋmb sẽn yaa nana, tɩ ra kẽed sik-m-mens rãmbã sõma.—Luk 10:21. w21.07 23 s. 11-12

D segd n modgame n sõsd ne d tẽed-n-taas nins sẽn kʋʋlã. B tõeeme n pa le ne sõma, n pa le tõe n kẽn tʋʋll-tʋʋlle, la b pa tõe n gom tɩ yi sõma ye. La baa ne rẽ, b ket n dat n tʋma a Zeova tʋʋmdã wʋsgo. Sẽn paase, b tara “yʋ-sõng” a Zeova nifẽ. (Koɛ. 7:1) Tẽeg-y bũmb ning sẽn kɩt tɩ b tar yõod wʋsg a Zeova nifẽ wã yelle. Ket-y n wilgd-y tɩ y nand-b-la wʋsgo. Maan-y wa a Eliize. A Eli sẽn wa n dat n loog n bas-a wã, a Eliize kell n pẽdgame t’a na n paa ne-a. A yeela naoor a tãab fãa yaa: “Mam kõn pa ka n bas yãmb ye!” (2 Rĩm 2:2, 4, 6) Maagd-y y yĩng n sokd sẽn kʋʋl-bã sogsgo, n wilg-b tɩ b yell pak-y lame. (Yel. 1:5; 20:5; 1 Tɩm. 5:1, 2) Y tõe n sok-b lame yaa: “Y sẽn wa n yaa bi-bɩɩgã, bõe n sõng yãmb tɩ y kɩs sɩd tɩ y bãnga sɩdã?” “Wãn to la yɛl nins y sẽn yã wã sõng tɩ yãmb ne a Zeova zoodã pãng paase?” “Bõe n sõng-y tɩ y kell n tall y sũ-noogã a Zeova tʋʋmdã pʋgẽ?” (1 Tɩm. 6:6-8) Rẽ poor bɩ y kelg-b neere, b sã n wa leokd yãmba. w21.09 5 s. 14; 7 s. 15

Y sã n maand y sẽn tõe fãa n na n tũ noor ning a Zeezi sẽn kõ tɩ d moon nebã koɛɛgã la d sõng-b tɩ b lebg a karen-biisã, y wilgdame tɩ y nonga Wẽnnaam. (1 Zã 5:3) Tags-y n ges-y: Yaa y sẽn nong a Zeova wã yĩng la y sẽn sak n moond koɛɛgã zak-zakã. Sɩngrẽ wã, no-kãngã tũub ra yaa nana ne-y bɩ? Tog n da pa nana ye. Yãmb sẽn ta ned zakẽ n na n taas koɛɛgã pipi wã, y sũurã ra pa kiuusd sɩda? Sãmbg kae tɩ y ra yɛɛsdame. La y ra miime tɩ yaa tʋʋm-kãng la a Zeezi rat tɩ y tʋme, la y saka tʋʋmdã. Tarẽ-n-tarẽ, koe-moonegã wa n lebga nana ne-yã. La yaa wãn to yẽ ne nebã zãmsgã? Y sã n tags rẽ yelle, y sũurã kiuusdame bɩ? Tõe tɩ yaa woto. La y sã n kos a Zeova t’a sõng-y tɩ y tõog y rabeemã la y tall raood n sɩng Biiblã zãmsg ne neda, a na n sõng-y lame tɩ y tʋll n sõng nebã tɩ b lebg a Zeezi karen-biisi. w21.07 3 s. a 7

Pĩnd wẽndẽ wã, b ra ningda yembsã bãnde, n na n wilg neb nins sẽn so-bã. Woto me, rũndã-rũndã, b na n wa ratame tɩ ned fãa reeg bãnd buud a nugẽ wã, wall a rĩirẽ wã. B na n wa ratame tɩ ned fãa wilg ne a tagsg la a tʋʋm-tʋmdɩ t’a teenda politikã siglsã. Rẽ yĩnga, d na n sakame tɩ b ning-d bãnde, la d teel goosneema-rãmbã bɩ? Neb nins sẽn pa na n sak n deeg bãndã na n paama namsgo. Vẽnegr sebrã yetame yaa: “Tɩ ned baa a ye ra tõog n da wall a koos bũmbu, sã n pa ned sẽn tar bãndã.” (Vẽn. 13:17) La Wẽnnaam nin-buiidã mii Wẽnnaam sẽn na n maan neb nins sẽn tar bãndã bũmb ninga, bãnd ning yell b sẽn gom Vẽnegr 14:9, 10 pʋgẽ wã. Wẽnnaam nin-buiidã yẽ pa na n deeg bãndã ye. Na n yɩɩ wa b gʋlsa b nugẽ wã tɩ ‘mam yaa a Zeova rẽnda.’ (Eza. 44:5) Yaa masã la d segd n modg n maan sɩd ne a Zeova ne d sũy fãa. Woto, a Zeova sũur na n yɩɩ noog ne d sẽn yaa yẽ rẽndã. w21.09 18 s. 15-16

Sẽn na yɩl n tõog n moon koɛɛgã sõma, d tõe n baoo sõngr neb a taabã nengẽ. Tẽn-tʋmd a Poll wilga a Tɩmote yẽ sẽn moond koɛɛgã la a zãmsd nebã to-to wã, la a sagl-a t’a maan woto me n sõng neb a taabã. (1 Kor. 4:17) Wala a Tɩmote, tõnd me tõe n paamame tɩ tigingã neb nins sẽn tar minim wʋsgã sõng-do. Sẽn paase d segd n pʋʋsa a Zeova n kos sõngre. Y sã n wa moond koɛɛgã fãa, bɩ y pʋʋs a Zeova n kos sõngre. Sã n pa tũ ne vʋʋsem sõngã sõngre, d ned baa a ye pa tõe n maan baa fʋɩ. (Yɩɩn. 127:1; Luk 11:13) Y sã n na n pʋʋs a Zeova n kos sõngre, bɩ y modg tɩ y goamã yɩ takɩ. Wala makre, kos-y-yã-a t’a sõng-y tɩ y paam ned sẽn tar yam-sõng n dat n kelg koɛɛgã. D segd n yãka wakat me n zãmsd Biiblã. Wẽnnaam Gomdã yetame tɩ d “kɩs sɩd tɩ Wẽnnaam daabã yaa sõma, tɩ sakda ne bãmba, la tɩ zemsa zãnga.” (Rom. 12:2) D sã n kɩsa sɩd tɩ d mii sɩdã Wẽnnaam zugu, d na n maneg n goma ne bas-m-yam, d sã n wa taasd nebã koɛɛgã. w21.05 18 s. 14-16

Tõe tɩ y ra maanda y sẽn tõe fãa n sõngd y Biibl karen-biiga, la y ra pelgd y pʋg n pʋʋsd a Zeova a yĩnga, t’a baas n ket n pa tũud a sẽn zãmsdã, tɩ wa lebg tɩlɛ tɩ y bas zãmsgã. Tõe me tɩ y zɩ n zãms ned Biiblã hal t’a wa reeg lisg ye. Sã n yaa woto, y na n ningda y meng taale, n tagsdẽ t’a Zeova pa ningd y koe-moonegã bark bɩ? A Zeova nifẽ bõe n wilgd tɩ ned koe-mooneg womda biisi? A Zeova geta tõnd sẽn wɩsgd d mens n tʋmdẽ wã, n neẽ tɩ d pa komsd raood n bas ye: A Zeova sũur nooma ne-do, d sã n moond koɛɛgã ne yẽesem d sẽn nong-a wã yĩnga, baa nebã pa sakd n kelgdẽ. A Poll yeelame: “Wẽnnaam yaa tɩrlem soaba, n pa na n yĩm yãmb tʋʋmdã ne y sẽn wilg tɩ y nonga bãmb yʋʋrã, y sẽn sõng nin-sõamyã wã la y ket n sõngd-bã ye.” (Ebre. 6:10) A Zeova tẽra d modgrã la d nonglmã, baa d sã n nan pa tõog n zãmsa ned Biiblã t’a wa reeg lisgu. Tõnd me tõe n tũu bũmb ning a Poll sẽn yeel rũndã daar vɛrse wã pʋgẽ wã. w21.10 25 s. a 4-6

A Zeezi manesmã sẽn da yaa to-to ne a karen-biisã ra wilgda vẽeneg t’a yaa nin-sõngo, la t’a nong-b lame. A ra miime tɩ b minimã la b yɛlã yaa toor-toore. Dẽnd ned fãa ra tara a sẽn da tõe n tʋm tʋʋmd ninga, la a sẽn da tõe n maan koɛɛgã mooneg pʋgẽ me. Baa ne rẽ, a Zeezi wilgame t’a sũur nooma ne-ba, ned fãa sẽn da wɩsgd a meng n maand a sẽn tõe wã yĩnga. Makr ning a Zeezi sẽn dɩk n gom talã-rãmbã yellã wilgdame t’a sɩd da yaa wʋmda. Makrã pʋgẽ, tʋm-tʋmdbã zu-soabã kõo tʋm-tʋmdbã tʋʋm “wa sẽn zems ned kam fãa tõogo.” Tʋm-tʋmdb a yiibã sẽn tʋm sõma wã sʋka, a ye n paam yõod n yɩɩd a to wã. La b zu-soabã pẽga b yiibã fãa n yeel yaa: “Tʋm-tʋmd-sõng sẽn maand sɩda, yaa sõma!” (Mat. 25:14-23) A Zeezi manesem sẽn yaa to-to ne tõndã wilgdame t’a yaa nin-sõngo, la t’a nong-d lame. A miime tɩ d minimã la d yɛlã pa taab ye. La d sã n maand d sẽn tõe fãa, a sũur noomame. Tõnd me segd n dɩka a Zeezi togs-n-taare, n tall manesem a woto ne d taabã. w21.07 23 s. 12-14

Pa wakat fãa la a Davɩɩd tall nimbãan-zoeer ye. Wala makre, daar a ye, a Naball sẽn da yaa rao sẽn pa zoet ned nimbãanegã goma a Davɩɩd wẽnga, la a zãgs t’a pa na n kõ a Davɩɩd ne a nebã rɩɩb ye. A Davɩɩd sũurã puuga wʋsgo, t’a yãk yam n na n tɩ kʋ a Naball ne a zakã rap fãa. La a Naball pag a Abigayill ra yaa nin-sõngo, la sũ-mar soaba. Tao-tao bala, a bao rɩɩb n tɩ kõ a Davɩɩd ne a nebã, tɩ rẽ kɩt t’a Davɩɩd pa paam zɩɩm samd ye. (1 Sãm. 25:9-22, 32-35) Tẽeg-y t’a Davɩɩd sũur sẽn yik wʋsgã, a yeelame t’a Naball ne a zakã rap fãa segda ne kʋʋbo. Rẽ poore, a yeelame me tɩ rakãagr ning yell a Natã sẽn gomã segda ne kʋʋbo. A Davɩɩd yaool n da yaa nin-sõngo. Rẽ wã, bõe yĩng t’a yeel tɩ sẽn zuk-a pesgã segda ne kʋʋbo? Tẽeg-y yell ning a Davɩɩd sẽn maane, bilf nand t’a Natã wa a nengẽ wã. A Davɩɩd sũur-kasetã ra ningd-a-la taale. Ned sã n kaood a taabã bʋʋd ne wẽnem, wilgdame t’a pa tar zood sõma ne a Zeova ye. w21.10 12 s. 17-18; 13 s. 20

Rũndã daar vɛrse wã wilgdame tɩ d tõe n dɩka a Zeova sẽn yaa Sõng soab sẽn ka to wã togs-n-taare. D segd n yɩɩ sõamyã d yel-manesmã fãa pʋgẽ. La d sẽn pa zems zãngã yĩnga, tõe n wõnda yaa bũmb sẽn pa tõe. Tẽn-tʋmd a Pɩyɛɛr mengã konga naoor wʋsgo, la a kibarã wilgdame tɩ tõnd me tõe n lebga sõamyã. Neb wʋsg tagsdame tɩ ned sẽn yaa sõng yaa ned sẽn yeelgd tũudum fu-bɛda, t’a nengã gãneme, n pa be laad ye. Ned sẽn yaa sõng yaool n pa woto ye. B boonda a Zeova sẽn yaa sõng soabã tɩ “Wẽnnaam sẽn yaa sũ-noog soabã.” (1 Tɩm. 1:11) B yeelame tɩ neb nins sẽn tũud-a wã me yaa ‘sũ-noog rãmba.’ (Yɩɩn. 144:15, MN) A Zeezi wilgame tɩ neb sẽn ningd fu-bɛda, n dat n wilg nebã tɩ bãmb yaa nin-tɩrsã pa bũmb sẽn zems ye. (Mat. 6:1; Mark 12:38) Kiris-neb hakɩɩkã mii yɩ sõng sẽn dat n yɛɛlga, bala b mii Biiblã sẽn yet bũmb ning rẽ wɛɛngẽ. D miime t’a Zeova sẽn nong-d wʋsgã yĩnga, a pa na n yeel tɩ d maan bũmb d sẽn pa tõe ye. w21.12 2 s. a 1, 3

A Zeova sẽn kɩt tɩ d tõe n tũ-a wã naaga kũun nins a sẽn kõ-d tɩ yaa sõma wʋsgã. D wilgdame tɩ d nonga a Zeova, d sã n sakd a noyã. (1 Zã 5:3) A Zeezi sẽn kõ noor tɩ d sõng nebã tɩ b lebg a karen-biisi, la d lis-bã me naaga noy nins a Zeova sẽn dat tɩ d sakã. (Mat. 28:19) A leb n kõo noor tɩ d nong taaba. (Zã 13:35) A Zeova na n sakame tɩ neb nins sẽn tũud a noyã naag a nin-buiidã sẽn be dũniyã gill zug n yaa wa zak a ye nebã. (Yɩɩn. 15:1, 2) Wilg-y tɩ y nonga y taabã. Nonglmã yaa a Zeova zʋg-sõng ning sẽn yaa kãseng n tɩ yɩɩdã. (1 Zã 4:8) A Zeova wilgame t’a nong-d lame, nand meng tɩ d bãng-a. (1 Zã 4:9, 10) D sã n wilgdẽ tɩ d nonga d taabã, d rɩkda a togs-n-taare. (Efɛ. 5:1) Bõn-kãseng me d sẽn tõe n maan n wilg tɩ d nonga d taabã, yaa d sẽn na n sõng-b tɩ b bãng a Zeova tɩ nan ket n tõe. (Mat. 9:36-38) D sã n maand woto, b na n tõog n bãnga bũmb nins b sẽn segd n maane, n wa lebg Wẽnnaam zakã neba. w21.08 5-6 s. 13-14

A Zeezi sẽn da nong a Ba a Zeova ne a sũur fãa wã yĩnga, a monga a meng bũmb wʋsg a Ba wã yĩnga, la tõnd me yĩnga. (Zã 14:31) A vɩɩmã sẽn da yaa to-to tẽngã zugã wilgdame t’a nonga ninsaalbã hal wʋsgo. Daar fãa, a ra wilgdame t’a nonga nebã, la t’a zoeta b nimbãanega, baa sãnda sẽn da namsd-a wã. Bũmb sẽn tar yõod wʋsg a sẽn maan n wilg t’a nonga nebã, yaa a sẽn sõng-b tɩ b bãng Wẽnnaam Rĩungã. (Luk 4:43, 44) A Zeezi leb n wilgame t’a nonga Wẽnnaam la ninsaalbã ne a sũur fãa, a sẽn sak n nams la a ki kũ-toaag yel-wẽn-maandb nusẽ wã. A sẽn maan woto wã kɩtame tɩ d fãa tõe n wa paam vɩɩm sẽn kõn sa wã. D rɩka d meng n kõ d saasẽ Ba a Zeova n deeg lisgu, d sẽn nong-a wã yĩnga. Dẽnd wa a Zeezi, d segd n talla manesem sẽn yaa sõma ne d taabã, n wilg tɩ d nonga a Zeova. Tẽn-tʋmd a Zã yeelame tɩ “ned ning sẽn pa nong a saam-biig a sẽn ne wã pa tõe n nong Wẽnnaam a sẽn pa ne wã ye.”—1 Zã 4:20. w22.03 10 s. a 8-9

Baa ne d sẽn dat n pʋʋsd a Zeova la d karemd a Gomdã, yɩl n paam sẽk n maan woto mi n pa nana ye. Rũndã-rũndã, yɩl n paam sẽk yaa toogo. Rẽ kɩtame tɩ yaa toog tɩ d paam sẽk d tũudmã yɛl yĩnga. D nug-tʋʋma, d zakã rãmb yell gesgo, la tʋʋm a taab sẽn yaa tɩlɛ tõe n wa kɩtame tɩ d tagsd tɩ d pa le tar sẽk n na n pʋʋs bɩ n zãms Biiblã wall n bʋgs ye. Bũmb a to me n tõe n wa sãam d sẽkã. Wala makre, bũmb kẽer n be n pa tolg n yaa wẽnga, n yaool n tõe n dɩ sẽk ning d sẽn dɩkd n paasd tõnd ne a Zeova pãngã. D gom reemã yelle. D fãa sã n mi n paam n na n kok pemsem bilfu, noom-d lame. D sẽn dat n maan bũmb ning n kok pemsmã tõeeme n pa wẽng ye. La d sã n kẽes d sẽkã fãa pemsmã kokr pʋgẽ, d pa na n le tar sẽk wʋsgo, d tũudmã yɛl yĩng ye. D segd n tẽegame tɩ bũmb ning sẽn tar yõod n yɩɩdã pa reemã bɩ pemsmã kokr ye.—Yel. 25:27; 1 Tɩm. 4:8. w22.01 26 s. a 2-3

A Zeova sẽn wa n yeel Israyɛll nebã tɩ b nong b taabã, a ra pa rat n yeel tɩ yaa b tẽngã neb wall b buudã neb bal la b segd n nongẽ ye. A yeel-b lame me tɩ b nong neb nins sẽn yaa sãamb n be b sʋkã. D yãta rẽ vẽeneg Maan-kʋʋr 19:33, 34 pʋgẽ. Israyɛll ned ra segd n maana sãan neer wa a sẽn maand “tẽng-n-ned” neer to-to wã, la a “nong-a” wa a menga. Wala makre, tõogã ra wilgame tɩ Israyɛll ned ra segd n basame tɩ sãambã la naong rãmbã yiis kood a pʋʋgẽ. (Maan. 19:9, 10) Rũndã-rũndã me, kiris-nebã segd n wilgame tɩ b nonga sãambã. (Luk 10:30-37) Wãn to la d tõe n maan rẽ? Neb milyõ-rãmb n yik n tɩ vɩ tẽns a taaba. Tõe tɩ kẽer yaa d yagse. Yaa rap tɩ yaa pagb wall kamb me, d segd n wilgame tɩ d nand-b lame, la d waoogd-ba. w21.12 12 s. 16

D sã n teeg a Zeova masã menga, d na n maneg n kɩsa sɩd t’a tõe n fãag-d-la yɛl nins sẽn watã sasa. Yɩl n kos d tʋʋmd taoor soab sor n paam n kẽng tigis-kãsenga, wall n kos-a t’a boog d tʋʋmã tɩ d paam sẽk n kẽnd tigissã fãa la d moond koɛɛgã, baoodame tɩ d tall tẽeb la d tʋll n teeg a Zeova. La tʋʋmdã taoor soab sã n zãgse, n pʋd n yeel tɩ d bas tʋʋmdã, d maanda wãna? Rẽ yĩnga, d na n talla tẽeb t’a Zeova pa na n daag-d n base, la t’a na n kell n gesame tɩ d paamd sẽn yaa tɩlɛ ne-dã wakat fãa bɩ? (Ebre. 13:5) Neb wʋsg sẽn kẽes b mens zãng Wẽnnaam tʋʋmdã pʋgẽ tara kaset sẽn wilgd a Zeova sẽn sõng-b to-to, b sẽn wa n be raab pʋgẽ. A Zeova yaa sɩd soaba. A Zeova sẽn be ne-dã yĩngã, d ka bʋʋm n na n maan dabeem yɛl nins sẽn watã yĩng ye. D sã n lʋɩɩsd Wẽnnaam daabã taoor d vɩɩmã pʋgẽ, a pa na n daag-d n bas a bada. w22.01 7 s. 16-17

Wakat-bʋg la tõe n yɩ toog tɩ d kɩs kãsem-dãmbã sɩda? B sã n wa yiis ned tigingã pʋgẽ tɩ yaa d zoa meng-menga, d tõe n tagsame tɩ kãsem-dãmbã pa bao n bãng yɛlã fãa vɩʋʋgo, bɩ n sokd d meng b sẽn kao bʋʋdã to-to wã sã n sɩd yɩɩ wa a Zeova sẽn datã. La bõe n tõe n sõng tõnd tɩ d kell n tall tagsg sẽn zemse, kãsem-dãmbã yam-yãkrã wɛɛngẽ? D segd n tẽegame tɩ b sẽn yiisd yel-wẽn-maandbã tigingã pʋgẽ wã yaa a Zeova n kõ noore, la tɩ nafda tigingã tõre, la tõe n sõng ned ning b sẽn yiisã me. B sã n bas ned sẽn maan yel-wẽnd n pa tek yam tigingã pʋgẽ, tõe n yɩɩ sabab tɩ neb a taab me rɩk a naoore. (Gal. 5:9) Sẽn paase, tõe n kɩtame t’a pa bãng t’a sẽn maanã yaa wẽng wʋsg ye. A tõeeme me n pa ges tɩ yaa tɩlɛ t’a toeem a yel-manesmã la a tagsa wã, n le paam n ta a Zeova yam ye. (Koɛ. 8:11) D tõe n kɩsa sɩd tɩ kãsem-dãmbã sã n wa na n ges b sã n segd n yiisa ned tigingã pʋgẽ, b maanda rẽ ne b sũur fãa. w22.02 5-6 s. 13-14

Yɩta sõma tɩ d tall sũ-mar la bʋgsem, sẽn yɩɩd fãa, ned sã n wa pa rat n sak Biiblã saglse. Kãsem-soab sã n sagl ned t’a pa sak n deeg saglgã tao-tao, a segd n gũusame n da yik a sũur ye. A segd n pʋʋsa a Zeova, n kos-a t’a sõng ned ning a sẽn dat n saglã, la a sõng-a t’a bãng a sẽn sagend-a wã võore, n sak n tũ. Tõe t’a soabã na n datame tɩ b kõ-a weer t’a tags bũmb ning b sẽn yeel-a wã zugu. Kãsem-soab sã n tar sũ-mar la bʋgsem, ned ning a sẽn saglã na n tagsa saglgã zug n tɩ yɩɩda, la a pa na n get b sẽn sagl-a to-to wã ye. La yaa vẽeneg tɩ wakat fãa, saglgã segd n tika Biiblã zugu. Tẽeg-y tɩ d sẽn datã pa d saglsã nafd nebã bal ye. D ratame me tɩ b sũy yɩ noogo.—Yel. 27:9. w22.02 18 s. 17; 19 s. 19

Yaa tɩlɛ tɩ d gũ t’a Zeova wa leok d pʋʋsgo. D sã n wa pʋʋs a Zeova n kos-a pãng n na n mao ne zu-loɛɛg wall pãn-komsem, d tõe n getame t’a kaoosdame n pa leokd-d ye. Bõe yĩng t’a Zeova mi n pa leokd d pʋʋsgã fãa zĩig pʋgẽ? A geta d pʋʋsgã wa bũmb sẽn wilgd tɩ d sɩd tara tẽebo. (Ebre. 11:6) D sã n pʋʋs a Zeova n kos-a t’a sõng-d tɩ d ta a yam, t’a neẽ tɩ d maanda modgr rẽ wɛɛngẽ, noom-a lame. (1 Zã 3:22) D sã n kos a Zeova t’a sõng-d tɩ d tõog n bas bũmb d sẽn maand tɩ pa noom-a, d segd n talla sũ-mare, la d maan d sẽn tõe fãa n bas bõn-kãnga. A Zeezi wilgame tɩ Wẽnnaam tõeeme n pa leok d pʋʋsg zĩig pʋgẽ ye. Ad a sẽn yeele: “Bɩ y ket n kotẽ tɩ b na kõ-yã. Ket-y n gẽesd-y tɩ y na yã. Ket-y n kogsd-y kʋɩlengã tɩ b na pak n kõ-yã. Bala, sẽn kot-a fãa paamdame, sẽn gẽesd-a fãa yãtame, la b pakd n kõo sẽn kogsd-a kʋɩleng fãa.”—Mat. 7:7, 8. w21.08 8 s. a 1; 10 s. a 9-10

Sẽn na yɩl n kell n kɩs sɩd tɩ Naand n be, y segd n ket n zãmsda Wẽnnaam Gomdã. (Zoz. 1:8) Tags-y n ges-y bũmb nins fãa Biiblã sẽn pĩnd n togs tɩ pidsdẽ wã yelle, la a goamã sẽn pa kɩɩsd taabã me yelle. Y sã n maand woto, y na n maneg n kɩsa sɩd tɩ Naand sẽn tar nonglem la sẽn yaa yam-kãseng soab n naan tõndo, la tɩ yaa yẽ n kɩt tɩ b gʋls Biiblã. (2 Tɩm. 3:14; 2 Pɩy. 1:21) Y sã n wa zãmsd Wẽnnaam Gomdã, bɩ y maag y yĩng n ges a saglsã sẽn nafd to-to wã. Wala makre, Biiblã pĩnd n keooga tõnd hal daar zãr ne ligdã nonglem, n yeel tɩ wãada neda, la tɩ kɩtdame tɩ ned paam “tood wʋsgo.” (1 Tɩm. 6:9, 10; Yel. 28:20; Mat. 6:24) Dẽnd Biiblã sẽn keoogd tõnd tɩ d da nong ligdã yaa saglg sẽn yaa sõma wʋsgo. Yãmb nee Biiblã sagls a taab sẽn naf yãmb bɩ? D sã n tags sagls nins fãa sẽn be Biiblã pʋgẽ wã yelle, d yãta vẽeneg tɩ d saasẽ Ba wã mii sẽn yaa sõma ne-do, tɩ rẽ na n kɩt tɩ wakat fãa bɩ d tũud sagls nins a sẽn kõt tõndã. (Zak 1:5) Woto, d vɩɩmã na n maneg n yɩɩ noog n paase.—Eza. 48:17, 18. w21.08 17-18 s. 12-13

Yãmb sã n kʋʋlame, bɩ y kɩs sɩd t’a Zeova tẽra tʋʋm nins fãa y sẽn tʋm pĩndã yelle. Yãmb teela koe-moonegã ne y sũy fãa. Yãmb maoo ne yɛl wʋsgo. Kẽer yɩɩ yɛl sẽn sãam y sũur hal wʋsgo. Yãmb sakd n tũuda Biiblã noyã, la y pʋd n wilgdẽ tɩ no-kãens la sõma n yɩɩda. Y saka ne y sũy fãa n tʋm tʋʋm sẽn tar yõod wʋsg a Zeova siglgã pʋgẽ, la y sõng neb a taab tɩ b paam minim tʋʋm kẽer wɛɛngẽ. Y maana y sẽn tõe fãa n minim bũmb wʋsg b sẽn toeem a Zeova siglgã pʋgẽ. Y teela neb a taab sẽn kẽes b mens zãng a Zeova tʋʋmdã pʋgẽ. Wẽnnaam a Zeova nonga yãmb hal wʋsgo, y sẽn ket n maand sɩd ne-a wã yĩnga. A pʋlmame t’a pa “basd sẽn maand-b pʋ-peelem” ne-a wã ye. (Yɩɩn. 37:28) A yeta yãmb yaa: “Mam na n zãa yãmb hal n tãag y zoob-peend wakate.” (Eza. 46:4) Ra tags-y tɩ y sẽn kʋʋlã yĩnga, y pa le tar yõod a Zeova siglgã pʋgẽ ye. Y pʋd n tara yõod hal wʋsgo! w21.09 3 s. a 4

A Zeova yaa nimbãan-zoɛta, a yamã sẽn ka koakã yĩnga. Biiblã wilgdame tɩ “yam ning sẽn yit yĩngrã” ‘pida ne nimbãan-zoeere, n womd bi-sõma.’ (Zak 3:17) Wa ba sẽn nong a kamba, a Zeova me miime t’a nimbãan-zoeerã nafda a nebã. (Eza. 49:15) A Zeova sẽn zoet a nebã nimbãanegã yĩnga, a kɩtame tɩ b saagdẽ tɩ manegr n wate, baa ne b sẽn pa zems zãngã. Dẽnd a Zeova yamã sẽn ka koakã yĩnga, a zoeta d nimbãaneg wakat fãa, sã n mikame tɩ bʋʋm beeme. La a mii wakat ning me a sẽn pa segd n zoe d nimbãanega. A yamã sẽn yaa kãsengã yĩnga, a pa na n zoe yel-wẽn-maand nimbãanega, sã n mikame tɩ na n yɩɩ wa a soabã sẽn maanã pa wẽng ye. D rɩk makr wa ned sẽn tũud a Zeova sẽn na n yãk yam n maand yel-wẽna. Sã n wa yaa woto, bõe la d segd n maane? A Zeova togsa a Poll t’a yeel tigingã neb tɩ b “ra le maan tũud-n-taar” ne ned a woto ye. (1 Kor. 5:11) B yiisda yel-wẽn-maandb nins sẽn pa rat n tek yam n kos sugrã tigingã pʋgẽ. Woto tara yõod wʋsgo, bala yaa sẽn na yɩl n kogl tigingã neba, la wilg me t’a Zeova yaa sõngo. w21.10 9-10 s. a 7-8

D sẽn kõt ligd n teend Rĩungã tʋʋmã naaga bũmb nins d sẽn maand n tũud a Zeova wã. Israyɛll nebã ra pa segd n wa a Zeova taoor nug-zaal ye. (Tõo. 16:16) B ra segd n waa ne kũun sẽn zems ne b tarmã. Woto ra wilgdame tɩ b sũur nooma ne bũmb nins fãa a Zeova sẽn da maan n kõ-bã. Bõe la d tõe n maan n wilg tɩ d nonga a Zeova, la tɩ d sũur nooma ne bũmb nins fãa a sẽn maand n kõt tõndã? Bũmb a ye d sẽn tõe n maane, yaa d sẽn na n kõt ligd tigingã depãens-rãmbã yĩnga, la tʋʋmdã d sẽn tʋmd duniyã gill zugã yĩnga, tɩ zems ne d sẽn tarã. Tẽn-tʋmd a Poll goma rẽ yell n yeel yaa: “Ned sã n dat n kõ ne yamleoogo, kũunã tata Wẽnnaam yam, sẽn yɩɩd fãa a sã n kõ wa sẽn zems a sẽn tare, la pa wa sẽn zems a sẽn pa tar ye.” (2 Kor. 8:4, 12) A Zeova sũur nooma ne d sẽn kõt bũmb ningã, baa pa zem baa fʋɩ.—Mark 12:42-44. w22.03 24 s. 13

Kãsem-dãmbã pa tõe tɩ zu-loees nins fãa a Zeova Kaset rãmbã sẽn maood ne wã sa ye. Ne rẽ fãa, a Zeova ratame tɩ kãsem-dãmbã maand b sẽn tõe fãa n kengd a nin-buiidã raoodo, la b kogend-ba. Baa ne kãsem-dãmbã tʋʋm sẽn yaa wʋsgã, bõe la b tõe n maan n paam sẽk n sõngd b tẽed-n-taasã? Yaa b sẽn na n tũ tẽn-tʋmd a Poll mak-sõngã. A Poll ra nong n pẽgda a tẽed-n-taasã la a kengd b raoodo. Yɩta sõma tɩ kãsem-dãmbã rɩk a togs-n-taare, n nong b tẽed-n-taasã la b nand-ba. (1 Tes. 2:7) A Poll sõnga a tẽed-n-taasã tɩ b bãng t’a nong-b lame, la t’a Zeova me nong-b lame. (2 Kor. 2:4; Efɛɛ. 2:4, 5) A ra geta tigingã neb wa a zo-rãmba, n da nong n be ne-ba. A ra pelgda a pʋg n togsd-b bũmb ning sẽn kẽesd-a rabeem, la a pãn-komsmã, tɩ wilgdẽ t’a ra kɩs-b-la sɩda. (2 Kor. 7:5; 1 Tɩm. 1:15) La pa a Poll mengã yɛlã n da pak-a n yɩɩd ye. A pʋd n da rata ne a sũur fãa n sõng a tẽed-n-taasã. w22.03 28 s. a 9-10