Sa-sika

Tõe t’a Zeezi ra gomda Rom sodaas nins sẽn ka a nusã la a naoã ra-lukã zugã yelle. A Zeezi pa bas tɩ b sẽn maan-a kɛgrã kɩt t’a lebg sũ-to-neda, wall a tall sũ-kẽk ye. (1 Pɩy. 2:23) Wa a Zeezi, tõnd me segd n sakd n kõta d taabã sugri. (Kol. 3:13) Neb kẽere, baa d roagdb meng tõe n tugda beem ne tõndo, b sẽn pa wʋmd d sẽn tẽed bũmb ninsã, la d sẽn vɩ to-to wã võorã. B tõe n yag-d-la ziri, n ning-d yãnd neb a taab taoore, n sãam d sɛbã, bɩ n yeel meng tɩ b na n maan-d-la yelle. D pa segd n tall sũ-kẽk ne-b ye. D pʋd n tõe n kosa a Zeova t’a vẽneg b yamã, tɩ b wa bãng sɩdã. (Mat. 5:44, 45) Wakat ninga, tõe n yɩɩ toog wʋsg tɩ d sak n kõ sugri, sẽn yɩɩd fãa sã n mikame tɩ b maan-d-la kɛgr wʋsgo. La d sã n bas tɩ sũ-toogã la sũ-kẽkã tall pãng d sũurẽ wã, d maanda d meng wẽnga. (Yɩɩn. 37:8) D sã n kõ ned sugri, wilgdame tɩ d yãka yam n pa na n bas tɩ b sẽn maan-d wẽngã kɩt tɩ d lebg sũ-to-ned ye.—Efɛ. 4:31, 32. w21.04 8-9 s. a 3-4

Ned y sẽn nong la b yiis tigingã pʋgẽ bɩ? Woto sãamda sũur hal wʋsgo. Tags-y n ges-y a Zeova sũur sẽn sãam to-to, malɛgs kẽer sẽn da naag a zakã rãmb sẽn wa n bas a tũubã. (Ziid 6) Leb-y n tags-y n ges-y a sũur sẽn sãam to-to, Israyɛll nebã sẽn da yaa a nin-buiid a sẽn nong wʋsgã sẽn kɩɩs-a naoor wʋsgã. (Yɩɩn. 78:41) Y tõe n kɩsa sɩd tɩ d saasẽ Ba wã sẽn nong-dã me sũur sãamdame, ned y sẽn nong sã n wa bas a tũubu. A mii y sũ-sãangã sẽn ta zĩig ninga. A sẽn yaa nimbãan-zoɛtã yĩnga, a na n gesame tɩ y paam raood kengr la sõngre. Bi-ribl bɩ bi-pugl a roagdb sẽn nong wʋsg sã n wa bas a Zeova tũubu, naoor wʋsgo a roagdbã tagsdame tɩ b ra segd n maana b sẽn tõe fãa n kell n sõng b biigã t’a ket n tũud a Zeova. Saam-biig a ye yeelame: “Mam da ningda m meng taale. M sã n da kẽ yʋng fãa, gõeem kae ye. Saam-bi-poak a ye me maoo ne zu-loe-kãng buudu, b sẽn wa n yiis a bi-ribl tigingã pʋgẽ wã. A yeelame: “Mam da tagsda wakat fãa tɩ bũmb la m maan tɩ pa zemse. Mam da yetame tɩ m pa maan m sẽn tõe fãa n sõng m biigã t’a nong a Zeova ye.” w21.09 26 s. a 1-2, 4

Kẽer tagsdame tɩ Wẽnnaam nin-buiidã pa tõe n zãms nebã Biiblã, b sẽn pa paam dipolom-dãmb tũudum lekoll-bɛd pʋsẽ wã yĩnga. La b segd n bao n bãnga b sẽn wʋm bũmb ningã sã n yaa sɩda. Yaa woto la Evãnzill gʋlsd a Luk yãk yam n maane. A modgame n na n “vaees bõn-kãens fãa.” A ra ratame tɩ neb nins sẽn na n karem a sɛbã “kɩs sɩd tɩ bũmb nins” b sẽn bãng a Zeezi zugã yaa sɩda. (Luk 1:1-4) Pĩnd wẽndẽ zʋɩf-rãmb nins sẽn da be Beere wã me maana wa a Luki. B sẽn wʋm koe-noogã a Zeezi zug pipi wã, b vaeesa Biiblã babg ning b sẽn da gʋls ne Ebre wã n na n bãng b sẽn togs-b bũmb ningã sã n yaa sɩda. (Tʋʋ. 17:11) Woto me, d segd n dɩka Wẽnnaam nin-buiidã sẽn zãms tõnd bũmb ningã n mak ne Gʋls-sõamyã sẽn yetã. Sẽn paase, d segd n bao n bãnga a Zeova nin-buiidã sẽn maan bũmb ning yaoolem wakatã. D sã n bao n bãng yɛlã vɩʋʋg sõma, d pa na n bas tɩ nebã sẽn yet bũmb ninsã, wall d sẽn wʋmd bũmb ninsã tiis-d ye. w21.05 3 s. a 7-8

Ned bee yãmb tigingã pʋgẽ y sẽn tõe n bool y zakẽ, n maan-a sãand bɩ? Wakat kẽer n be, tɩ d tẽed-n-taag sã n paam n na n zĩnd ne-do, bɩ na n yɩ-a noog wʋsgo. Tigã wakate, tõe n yɩɩ toog ne kẽer tɩ b zĩnd ne b zakã neb sẽn pa a Zeova Kaset rãmbã. Yʋʋmdã ray kẽer me, tõe n yɩɩ toog wʋsg ne sãnda, wala makre, yʋʋmdã daar ning b nin-nongr sẽn maan kaalmã. D sã n baood sẽk n zĩndid ne d tẽed-n-taas nins sẽn be yell a woto buud pʋgẽ wã, wilgdame tɩ d ‘geta b yell sõma.’ (Fili. 2:20) Bũmb wʋsg n tõe n wa kɩt tɩ kiris-ned getẽ t’a yaa a yembre, t’a sũur sãamdẽ. La d ra tol n yĩm t’a Zeova mii rẽ fãa ye. Wakat ninga, a tũnugda ne d tẽed-n-taasã, n kõt tõnd sẽn yaa tɩlɛ ne-dã. (Mat. 12:48-50) Tõnd me tõe n wilga a Zeova tɩ d sũur nooma ne d sẽn paam n be tigingã pʋgẽ wã, n maand d sẽn tõe fãa n teend d tẽed-n-taasã. Baa d sẽn tõe n wa getẽ tɩ d yaa d yembr tɩ d sũur sãamdẽ wã, d pa tol n yaa d yembr ye. A Zeova bee ne-d wakat fãa. w21.06 13 s. 18-20

A Zeezi kell n talla yam-sõng n da ket n moond koɛɛgã, baa neb kẽer sẽn da pa kelgd-a wã. Bõe yĩnga? A ra mii sɩdã sẽn na n naf nebã to-to wã, n da rat n maan a sẽn tõe fãa n sõng neb wʋsg tɩ b sak Rĩungã koɛɛgã. A leb n da miime tɩ neb kẽer sẽn pa sak n kelg-a sɩngrẽ wã tõe n wa sak n kelga kaoosg zugẽ. Pʋd n yɩɩ woto ne a zakã neb kẽere. A Zeezi sẽn moon koɛɛgã yʋʋm a tãab la pʋɩ-sʋkã fãa sasa, a ma-biig baa a ye pa sak n lebg a karen-biig ye. (Zã 7:5) La a vʋʋgrã poore, b lebga kiris-neba. (Tʋʋ. 1:14) D pa tõe n zoe n bãng ãnd dãmb n na n wa sak n tũ a Zeova ye. Neb kẽer kaoosda wʋsg n yaool n wa sak n tũ a Zeova. Baa neb nins sẽn pa sakd n kelgd tõndã nee d yel-manesmã sẽn yaa sõma wã la d yam-sõngã, tɩ rẽ me tõe n wa kɩt tɩ b “waoog Wẽnnaam.” w21.05 18 s. 17-18

A Zeezi sẽn wa n be tẽngã zugã, a kõo a karen-biisã tʋʋmd sẽn tar babs a yiibu. A yeel-b lame tɩ b moon Rĩungã koe-noogã, la a wilg-b b sẽn tõe n maan rẽ to-to. (Luk 8:1) Wala makre, a wilga a karen-biisã b sẽn tõe n maan to-to, nebã sã n kelg Rĩungã koe-noogã wall b pa sak n kelge. (Luk 9:2-5) Sẽn paase, a wilgame t’a karen-biisã na n moona koɛɛgã neb wʋsgo, la zĩis wʋsgo, bala a yeelame tɩ na n yɩɩ “kaset buud fãa yĩnga.” (Mat. 24:14; Tʋʋ. 1:8) Sẽn paase, a yeela a karen-biisã tɩ b zãms nebã tɩ b sak bũmb nins fãa yẽ sẽn yeelã. A Zeezi yeelame tɩ tʋʋm-kãngã sẽn fãagd yõyã ra na n kell n kẽnga taoore, n ta tõnd wakatã, rat n yeel tɩ “hal tɩ ta dũniyã saabo.” (Mat. 28:18-20) A Zeezi sẽn vẽneg a Zã t’a yã bũmb ningã pʋgẽ, a wilga vẽeneg t’a karen-biisã fãa segd n sõnga nebã tɩ b bãng a Zeova sõma.—Vẽn. 22:17. w21.07 2-3 s. a 3-4

Rũndã-rũndã, neb wʋsg yaa rat-m-ye rãmba, la b tar wags-n-taar yam. Wala makre, omdafɛɛr tõe n maana a sẽn na maanega, n na n lʋɩ a taabã taoore, baa sã na n waa ne yelle. Ɛspoorã wags-taab sasa, ned tõe n pogla a wags-n-taag ne pʋ-toogo, sẽn na yɩl n lʋɩ taoore. Karen-biig me tõe n maana zãmb ɛgzame sasa, sẽn na yɩl n paam n kẽng inivɛrsite-bedrẽ. D sẽn yaa kiris-nebã, d miime tɩ yel-manesem a woto pa sõma ye. Bala rẽ naaga Biiblã sẽn boond tɩ “yĩngã tʋʋmã.” (Gal. 5:19-21) Rẽ yĩnga, a Zeova Kaset rãmb kẽer tõe n tara wags-n-taar yam tigingã pʋgẽ n yaool n pa miẽ bɩ? Woto yaa sokr sẽn tar yõod wʋsgo. Bala wags-n-taar yam sã n be tigingã pʋgẽ, tõe n kɩtame tɩ nebã pa le zemsd taab ye. D leb n na n yãa Pagb la rap n zĩnd pĩnd wẽndẽ n da yaa wẽn-sakdba, n pa bas tɩ wags-n-taar yam kẽ-b ye. B mak-sõngã tõe n sõng-d lame. w21.07 14 s. 1-2

Nonglem-kãsengã kɩtdame tɩ d maan bũmb n sõng neb nins sẽn koms raoodã. Rũndã-rũndã, saam-biis la saam-bi-pogs wʋsg modgdame n sõngd b tigingã neb nins sũy sẽn sãame, bɩ sẽn koms-b raoodã. B nonga b tẽed-n-taasã, n dat n maan b sẽn tõe fãa n sõng-ba. (Yel. 12:25; 24:10) Yaa woto la tẽn-tʋmd a Poll sagl tõnd tɩ d maane. A yeelame: “Tõnd kota yãmb tɩ y . . . bels sũ-sãoong rãmbã, tɩ y sõng neb nins sẽn ka pãngã, la tɩ y maan sũ-mar ne nebã fãa.” (1 Tes. 5:14) Naoor wʋsgo, bũmb d sẽn tõe n maan tɩ sõng saam-biig bɩ saam-bi-poak sẽn koms raoodo, yaa d sẽn na n maag d yĩng n kelg-a, la d wilg-a tɩ d nong-a lame. A Zeova sũur nooma ne bũmb nins y sẽn maand n sõngd a nin-buiidã a sẽn nong wʋsgã. Yel-bũn 19:17 yetame: “Sẽn sõngd-a nimbãan-ned pengda Sẽn-Ka-Saabo, la bãmb na n dola yẽnda.” w21.11 10 s. 11-12

Bõe la d tõe n maan masã menga, n segl d mens yɛl nins sẽn watã yĩnga? Segd n kɩtame tɩ d sẽn tar bũmb ninsã sek-do, la d maan sũ-noogo, d sẽn tar zood ne a Zeova wã yĩnga. D sã n bao n bãng Wẽnnaam sõma, d na n maneg n basa d yam t’a tõe n kogl-d lame, Goog sẽn yit Magoogã sã n wa na n zab ne-do. Rũndã daar vɛrse wã goamã wilgda bũmb ning sẽn kɩt t’a Davɩɩd ra teeg a Zeova wã. A Davɩɩd ra minim n teegda a Zeova. La a Zeova zɩ n bas n pa sõng-a ye. A sẽn wa n yaa bi-bɩɩga, daar a ye a kẽngame n na n tɩ zab ne a Goliat sẽn da yaa Filisti nin-wobg la zabr gãndaoogã. Nand t’a Davɩɩd zab ne-a, a yeel-a lame yaa: ‘Rũndã, a Zeova na n kɩtame tɩ m tõog-fo.’ (1 Sãm. 17:46) Rẽ poore, a Davɩɩd sẽn wa n be na-yirã n sõngd a Sayullã, a Sayull maka naoor wʋsg n na n kʋ-a. La a Zeova ra “bee ne a Davɩɩde.” (1 Sãm. 18:12) A Davɩɩd sẽn da mi tɩ pĩndã a Zeova sõng-a lame wã yĩnga, a ra kɩsa sɩd t’a na n kell n sõng-a-la a zu-loeesã pʋgẽ. w22.01 6 s. 14-15

Sẽn yaa bũmb ning fãa la a Zeova maanda, baa kaoosda, a maagda a yĩng n wa baas-a. A sẽn maand woto wã yaa a yʋʋrã waoogr yĩnga, la neb a taabã nafr yĩnga. Wala makre, d ges a Zeova sẽn maneg tẽngã bilf-bilf to-to, hal tɩ ãdem-biisã wa tõe n vɩɩmd a zugu. Biiblã goma a Zeova sẽn naan tẽngã to-to wã yelle, n yeel t’a ‘tẽega wĩir n mak’ tẽngã, t’a ‘tebenda a yẽbgrã t’a yasẽ,’ la t’a ‘tilga a soakã zĩigẽ kugrã.’ (Zoob 38:5, 6) A pʋd n dɩka sẽk n maag a yĩng n tags a tʋʋmdã yelle. (Sɩng. 1:10, 12) Tags-y n ges-y malɛgsã manesem sẽn yɩ to-to, b sẽn yã bũmb nins fãa a Zeova sẽn naanã. B sũyã tog n yɩɩ noog wʋsgo. Bala, b sɩngame n “kaasd ne sũ-noogo.” Rẽ wɛɛngẽ, yam-bʋg la d tõe n dɩke? A Zeova rɩka yʋʋm tusa n na n naan bũmba fãa. La a sẽn maag a yĩng n ges bũmb nins fãa a sẽn naanã, a yãame tɩ “yaa sõma hal wʋsgo.”—Sɩng. 1:31. w21.08 9 s. a 6-7.

A Zeezi yel-bũndã pʋga, rao n da segend a meng n na n tog sore. Nand t’a looge, a boola a tʋm-tʋmdb a tãab n kõ b ned kam fãa talã, n yeel-b tɩ b tall n maan leebgo. A gesa b ned kam fãa yɛl sẽn yaa to-to wã, n kõ pipi soabã talã a nu, yiib-n-soabã talã a yiibu, la tãab-n-soabã talã a yembre. Pipi soabã ne yiib-n-soabã rɩka ligdã b sẽn deegã n tʋm ne b sũy fãa, tɩ b zu-soabã paam yõodo. La tʋm-tʋmd a tãab-n-soabã pa maan baa fʋɩ ne ligdã b sẽn kõ-a wã ye. Rẽ n so t’a zu-soabã rig-a tʋʋma. Wa pipi tʋm-tʋmdã, tʋm-tʋmd a yiib-n-soabã me gesame tɩ tʋʋmd ning b sẽn kõ-a wã tara yõod wʋsgo, t’a tʋm ne a sũur fãa a zu-soabã yĩnga. A tʋma ne talã a yiibã n paam talã a yiib yõod n paase. A zu-soabã keo-a-la a sẽn tʋm sõma wã yĩnga. A sũur pa yɩ noog ne-a bal ye. A pʋd n pẽg-a lame, n kõ-a tʋʋm n paase. w21.08 21 s. a 7; 22 s. a 9-10

A Zeova ket n maanda sũ-mar wʋsg yaoolem wakatã sasa. A pa rat tɩ ned baa a ye sãam ye. (2 Pɩy. 3:9) A kõo nebã fãa weer tɩ b tõe n tek yam. La a sũ-marã na n talla tɛka. Neb nins sẽn zãgs n pa na n teel Wẽnnaam Rĩungã me na n paama yell ning a Farawõ sẽn paame, a Moyiiz wakatẽ wã. A Zeova yeela a Farawõ yaa: “Mam sã n dag n kɩtẽ tɩ bã-wẽng yõk fo nebã, woto tɩ fo menemẽ-la dũniyã zugu. La mam basa foom tɩ f vɩɩmde, sẽn na n yɩlẽ tɩ fo yãnd mam pãngã, la tɩ mam yʋʋr saag dũniyã fãa pʋgẽ.” (Yik. 9:15, 16) Dũniyã nebã fãa na n wa bãngame tɩ yaa a Zeova a ye la Wẽnnaam sɩd-sɩdã. (Eze. 38:23) Tẽn-digimdg ning rũndã daar vɛrse wã sẽn gom a yellã na n kɩtame tɩ neb nins sẽn pa sak n deeg t’a Zeova n tar sor n dɩ naamã paam sãoong wakat fãa yĩnga, wa sẽn yɩ to-to ne a Farawõ wã. w21.09 18-19 s. 17-18

Yãmb sũur sãama wʋsgo, b sẽn yiis ned y sẽn nong tigingã pʋgẽ yĩng bɩ? La tigingã neb kẽer sã n gomd goam sẽn kɩt tɩ y tagsdẽ tɩ y ka võore, bõe la y tõe n maan tɩ sõng-yã? Bãng-y tɩ pa nebã fãa n na n gom goam sẽn na n yɩ-y noog ye. (Zak 3:2) D fãa pa zems zãng ye. Rẽ wã, neb kẽer sã n wa pa tar b sẽn yete, wall b sã n yeel bũmb tɩ sãam y sũuri, pa segd n ling-y ye. Tẽeg-y tʋm-tʋmd a Poll saglgã. A yeelame: “Bɩ y maand sũ-mar ne taaba, la y sakd n kõt taab sugr baa ned sã n wa tar yelle.” (Kol. 3:13) Ket-y n sõngd-y ned ning b sẽn yiis tigingã pʋgẽ wã zak rãmba. B ratame tɩ y wilg-b tɩ y nong-b lame la y keng b raoodo. (Ebre. 10:24, 25) Wakat ninga, ned b sẽn yiis tigingã pʋgẽ zak rãmb mikdame tɩ tigingã neb kẽer pa le baood bãmb zĩiga, tɩ yaa wa b yiisa bãmb me tigingã pʋgẽ. D pa segd n maan tɩ b wa tagsd woto ye. Sẽn yɩɩd fãa, d segd n pẽgda kom-bɩɩs nins sẽn tar roagd sẽn bas a Zeova tũubã, la d kengd b raoodo. w21.09 29 s. 13-14; 30 s. 16

Ned sẽn kʋʋl ne bi-bɩɩg sã n wa sõsd ne taaba, nafda b fãa. (Rom. 1:12) Y na n maneg n kɩsa sɩd t’a Zeova geta a nin-buiidã yelle, la y tẽed-n-taag ning sẽn kʋʋlã me na n bãngame t’a yell pak-y lame. A sũur na n yɩɩ noogo, a sẽn na n paam n togs yãmb a Zeova sẽn ning-a bark to-to wã. Neerem satame, la neb nins sẽn maand sɩd ne a Zeova wã neerem paasda yʋʋmd fãa a Zeova nifẽ. (1 Tes. 1:2, 3) Bõe yĩng tɩ d yet woto? Bala b sẽn sɩng n tũud a Zeova wã tɛka, b basame t’a vʋʋsem sõngã rems-ba, la a sõng-b tɩ b bɩɩs zʋg-sõma wʋsgo. D sã n baood n bãngd d tẽed-n-taas nins sẽn kʋʋl n tar yõod wʋsg a Zeova nifẽ wã, n nand-ba, la d rɩkd yam b nengẽ, d na n maneg n get-b-la wa neb sẽn tar yõod wʋsg a Zeova nifẽ. Kom-bɩɩsã sã n wilgdẽ tɩ b nanda sẽn kʋʋl-bã, tɩ sẽn kʋʋl-bã me wilgdẽ tɩ b sũur nooma ne kom-bɩɩsã, tigingã nebã tẽeb pãng paasdame. w21.09 7 s. 15-18

D segd n maana d sẽn tõe fãa n da yɩ neb sẽn yaa dem-dem ye. D modg n tall nimbãan-zoeer wʋsg wa tõnd Wẽnnaamã. (Efɛ. 2:4) Nimbãan-zoɛt pa kʋmd a taabã bal ye. A pʋd maanda bũmb n sõng-ba. Dẽnd d segd n gũusdame n getẽ ãnd-dãmb la d tõe n maan bũmb n sõng d zakã pʋgẽ, d tigingã pʋgẽ, la d sakã pʋgẽ. Yaa vẽeneg tɩ segb buud toor-toor n be d sẽn tõe n tũnug n wilg tɩ d yaa nimbãan-zoɛtba. Y mii ned sẽn dat belsg bɩ? Y tõe n maana bũmb takɩ n sõng-a, wala makre, n tɩ kõ-a rɩɩbo, bɩ n maan bũmb kẽer n sõng-a. Tõe me tɩ yaa kiris-ned b sẽn lebs n deeg tigingã pʋgẽ n baood zoa sẽn na n keng a raoodo. D leb n tõe n taasa neb a taabã Rĩungã koe-noogã sẽn kõt belsgã. (Zoob 29:12, 13; Rom. 10:14, 15; Zak 1:27) D sã n miẽ tɩ neb kẽer data sõngre, d na n yãa segb buud toor-toor d sẽn tõe n tũnug ne n wilg tɩ d zoeta b nimbãanega. D sã n wilgdẽ tɩ d yaa nimbãan-zoɛtba, d noogda Wẽnnaam sẽn yaa d saasẽ Ba wã sũuri, soab ning ‘nimbãan-zoeer sẽn yaa kãsengã.’ w21.10 13 s. 20-22

Yɩɩn-sõamyã 23 pʋgẽ, a Davɩɩd goma bũmb kẽer sẽn tar yõod wʋsg yelle. Wala makre, bõn-sõma nins a Zeova sẽn maan n sõng-a, a sẽn sak t’a yɩ a Pe-kɩɩmã yĩnga. A Zeova ra tallda a Davɩɩd n kẽnd “tɩrlem soay zutu,” la a ra teend-a noog wakat la toog wakat me. A Davɩɩd sak n deegame tɩ baa ne sẽn wõnd a Zeova ning-a-la “yam-maas zĩigẽ” wã, a ket n tõe n paama zu-loeese. A Davɩɩd ra tõe n komsa raood wakat ninga, tɩ yaa wa a sẽn kẽnd “tãng long sẽn yaa lik bida pʋga.” A ra na n talla bɛɛb me. La a Zeova sẽn da yaa a Pe-kɩɩmã yĩnga, a ra pa zoet “bũmb baa a yembr dabeem ye.” Wãn to la ‘bũmb pa tol n paoog’ a Davɩɩde? A paama bũmb nins fãa sẽn na n sõng-a t’a kell n tall zood sõma ne a Zeova wã. Sẽn na yɩl n paam sũ-noogo, ra pa tɩlɛ t’a paam teed wʋsg ye. A Davɩɩd maana sũ-noog ne a Zeova sẽn maan bũmb nins n kõ-a wã. Sẽn da pak-a n yɩɩd yaa a paam t’a Zeova ning-a bark la a kogl-a. A Davɩɩd sẽn yeel bũmb ningã sõngda tõnd tɩ d bãng tɩ d pa segd n lʋɩɩs laogã baoob taoor ye. w22.01 3-4 s. a 5-7

Hal pĩnd wẽndẽ wã, neb kẽer pa sak n kelg koɛɛgã Wẽnnaam nebã sẽn taas-bã ye. Wala makre, a Nowe yɩɩ “tɩrlem koe-moonda,” n moon koɛɛgã yʋʋm wʋsgo. (2 Pɩy. 2:5) Yaa vẽeneg t’a ra saagdame tɩ nebã na n sak n kelga koɛɛgã. La a Zeova pa wilg tɩ na n yɩɩ woto ye. Wẽnnaam sẽn wa n kõ a Nowe noor t’a ka koom koglgã, a pʋd n yeel-a lame yaa: “Fo na n kẽe koom koglgã pʋga, foom ne kom-dibli wã, la f pagã ne f bi-pagbã.” (Sɩng. 6:18) A Zeova sẽn wa n togs a Nowe koglgã bedrem sẽn segd n yɩ to-to wã, tõe t’a Nowe bãngame tɩ neb wʋsg pa na n sak n kelg koɛɛgã ye. Bala koglgã ra pa na n tõog n deeg b fãa ye. (Sɩng. 6:15) Wa d sẽn mi wã, baa nin-yend meng pa sak n kelg a Nowe ye. (Sɩng. 7:7) Rẽ yĩnga, a Zeova tagsame t’a Nowe pa moon koɛɛgã sõma bɩ? A bada! A Zeova sũur yɩɩ noog ne a Nowe. Bala a maana a sẽn yeel t’a maana bal kɛpɩ.—Sɩng. 6:22. w21.10 26 s. 10-11

Tags-y n ges-y a Rut tagsg sẽn yɩ to-to, a sẽn wʋm a Naomi gom-kãensa wã. A Rut ra maanda a sẽn tõe fãa n sõngd a Naomi. A ra naag-a lame n yãbe, n bels-a, la yãag-a n maan rasem wʋsgo. Baa ne rẽ, a Naomi yeelame: “Zu-soabã talla maam n lebg n wa ne nug-zaala.” Baa ne a Rut sẽn da yas ne a Naomi wã, a Naomi goamã ra wõnda a pa nand bũmb nins fãa a Rut sẽn maand n sõngd-a wã ye. A Rut sũurã tog n sãama wʋsgo. La baa ne rẽ, a kell n paa ne a Naomi. (Rut 1:3-18) Rũndã-rũndã, saam-bi-poak tõe n goma goam tɩ sãam d sũuri, baa ne d sẽn maand d sẽn tõe fãa n na n sõng-a wã. La d segd n modgame n da yik d sũur ye. D pa segd n daag d saam-bi-poakã sẽn be sõngr raab pʋgẽ n bas ye. D kos a Zeova t’a sõng-d tɩ d bãng d sẽn na n maan to-to n bels-a. (Yel. 18:24) Saam-bi-poak sẽn be sõngr raab pʋgẽ tõe n zãgsa d sõngr sɩngrẽ wã. La d sẽn nong-a, n dat n maan a neerã yĩnga, d na n maana d sẽn tõe fãa n sõng-a, n da raag-a n bas ye.—Gal. 6:2. w21.11 11 s. 17-19

Biiblã pʋgẽ, gom-bil ning sẽn yaa “sõngã” bilgda bũmb sẽn yaa yɩlgemd tũudmã wɛɛngẽ, bɩ bũmb sẽn yaa tɩrg yel-manesmã wɛɛngẽ. Gom-bilã leb n bilgda ned bɩ bũmb b sẽn welg toor Wẽnnaam tũubã yĩnga. Dẽnd d tõe n yeelame tɩ d yaa sõngo, d sã n tara yel-manesem sẽn yaa sõma, d sẽn tũud a Zeova to-to wã sã n tata a yam, la d sã n tara zood sõma ne-a. Tall zood sẽn yaa sõma ne Wẽnnaam sẽn yaa Sõng soabã tõe n wõnda bũmb sẽn pa tõe, sẽn yɩɩd fãa, d sã n tags bũmb ning Biiblã sẽn yet a Zeova sẽn yaa Sõng soabã zugã. A Zeova yaa sõng la yɩlgemd bũmb fãa pʋgẽ. Yaa malɛgs nins b sẽn boond tɩ serafẽ-rãmbã, sẽn yas Wẽnnaam geerã sɛɛgã sẽn yeel bũmb ningã n kɩt tɩ d mi rẽ. B kẽer ra zẽka b koees n yetẽ yaa: “Sõngo! Sõngo! Saasẽ pãng soabã yaa sõngo.” (Eza. 6:3, Wẽnnaam Sebre 1983) Yaa vẽeneg tɩ malɛgsã sã n dat n paam zood ne b Wẽnnaamã sẽn yaa sõngã, bãmb me segd n yɩɩ sõamyã. La b sɩd yaa woto. w21.12 3 s. a 4-5

Kom-bɩɩsã mi n dat n bãnga b sẽn na n maan tɩ b vɩɩmã wa tall barka. B karen-saam-dãmb la b zakã neb sẽn pa tũud a Zeova tõe n pẽdg-b lame n dat tɩ b karem n zãage, sẽn na yɩl n wa paam tʋʋmd sẽn yaood sõma. Kareng a woto yaool n kaoosda yʋʋm wʋsgo. La b roagdbã, ne tigingã neb a taab tõe n sagl-b lame, tɩ b kẽes b mens zãng a Zeova tʋʋmdã pʋgẽ. Bõe n tõe n sõng bi-bɩɩg sẽn nong a Zeova t’a bãng n yãk yam? A sã n karem Efɛɛz rãmb 5:15-17 wã la a bʋgs a zugu, na n sõng-a lame. A sã n karem vɛrse-kãensã, a tõe n soka a meng yaa: ‘“A Zeova raabã” yaa bõe? Bõe la m na n maan t’a sũur yɩ noogo? Bõe la m na n yãk yam n maane, n da sãam m sẽkã?’ Tẽeg-y tɩ “wakatã yaa wakat-wẽnga,” la tɩ ka la bilfu, a Sʋɩtãan dũniyã na n sãamame w22.01 27 s. a 5

Wakat bʋg la a Zak lebg a Zeezi karen-biiga? A Zeezi vʋʋgrã poore, “b vẽnega b meng ne a Zake, la b le vẽneg b meng ne tʋm-tʋmdbã fãa.” (1 Kor. 15:7) Yaa a Zeezi sẽn vẽneg a meng ne a Zak n sõs ne-a wã poor la a yaool n yãk yam n lebg a Zeezi karen-biiga. Tẽn-tʋmdbã sẽn wa n be yĩngr doog a ye pʋgẽ Zerizalɛm n gũudẽ tɩ vʋʋsem sõngã sig b zugã, rẽ t’a Zak ra bee be. (Tʋʋ. 1:13, 14) Rẽ poore, a Zak wa n paamame n lebg pipi kiris-nebã taoor lʋɩtb sull neda. (Tʋʋ. 15:6, 13-22; Gal. 2:9) Nand tɩ yʋʋmd 62 ta, Wẽnnaam vẽneg-a lame t’a gʋls lɛtre, n taas kiris-neb sẽn da paam vʋʋsem sõngã zaeebo. D saagdame n na n wa vɩɩmd tẽngã zug wall saasẽ, a lɛtrã nafda tõnd fãa rũndã-rũndã. (Zak 1:1) Zʋɩf-rãmbã kʋdemd yel-mit a ye yʋʋr sẽn boond t’a Zozɛf yeelame t’a “Ananias biig a Anas sẽn da yaa maan-kʋʋdb kãsmã n kõ noor tɩ b kʋ a Zake.” A Zak kell n maana sɩd ne a Zeova a yõor tɛka. w22.01 8 s. a 3; 9 s. a 5

Bũmb a ye rũndã daar vɛrse wã sẽn sõngd tõnd tɩ d bãng yaa tɩ d pa segd n gũ t’a Zeova kogl tõnd ne zu-loees nins sẽn makd d tẽebã ye. Wa b sẽn mak a Zeezi n tãag a kũumã, tõnd me segd n segla d mens n na n kell n maan sɩd ne a Zeova, baa sã n na n tũu ne d yõore. (Mat. 16:24, 25) La d tõe n basa d yam, t’a Zeova pa na n bas tɩ makr sẽn yɩɩd d pãng paam-d ye. (1 Kor. 10:13) Bũmb a to d sẽn bãnge, yaa tɩ wa a Zeezi, b tõe n namsa tõnd zaalem yĩng bala. (1 Pɩy. 2:19, 20) Nebã sẽn namsd tõndã pa d sẽn maan bũmb sẽn yaa wẽng yĩng ye. Yaa d sẽn pa maand wa dũniyã nebã, la d sẽn kõt sɩdã kasetã yĩnga. (Zã 17:14; 1 Pɩy. 4:15, 16) A Zeezi bãnga bũmb ning sẽn kɩt t’a Zeova bas t’a namsã. La wẽn-sakdb kẽer sẽn paam namsg soka b mens bõe yĩng tɩ Wẽnnaam bas tɩ yell a woto buud paam-ba. (Hab. 1:3) Tõnd Wẽnnaamã sẽn yaa nimbãan-zoɛt la sũ-mar soabã miime tɩ nin-kãensã pa neb sẽn pa tar tẽebo, la tɩ yaa neb sẽn dat belsg ning yẽ bal sẽn kõtã.—2 Kor. 1:3, 4. w21.04 11 s. a 9-10

A Zeova na n saka bũmb ning d sẽn maand n tũud-a wã sã mikame tɩ d modgdame n maand a raabã, n nong-a la d waoogd-a. D miime tɩ yaa yẽ la d segd n tũ, la d ratame me n maan d sẽn tõe tɛk tɩ d sẽn tũud-a to-to wã ta a yam. Bũmb a ye d sẽn maand n wilgdẽ tɩ d tũuda a Zeova yaa pʋʋsgã. Biiblã makda d pʋʋsgã ne wisdã b sẽn da segend sõma n yõogd sɛk-roogẽ wã, la b wa maand woto me wẽnd-doogẽ wã. Wisd-kãng ra tara yũ-noog sẽn noom Wẽnnaam. Woto me, d sã n pelgd d pʋg n pʋʋsd a Zeova, ‘tata a yam’ baa pʋʋsgã sã n yaa koɛɛg-koɛɛg bala. (Yel. 15:8; Tõo. 33:10) D sã n yeel a Zeova tɩ d nong-a lame la d pʋʋs-a barka, a sũur noomame. A ratame tɩ d pelgd d pʋg n togsd-a bũmb nins sẽn pak tõndo, la d sẽn dat bũmb ninsã. Woto yĩnga, nand tɩ d pʋʋs a Zeova, d tõe n deng n maaga d yĩng n tags bũmb nins d sẽn na n togs-a wã yelle. Y sã n maand woto, yaa wa y sẽn kõt y saasẽ Ba wã “wisd” sẽn tar yũ-noogo. w22.03 20 s. a 2; 21 s. a 7

Armagedõ sasa, pa tõnd n na n yãk a Zeova sẽn na n zoe a soab nimbãanega, la a sẽn pa na n zoe a soab nimbãaneg ye. (Mat. 25:34, 41, 46) D na n kɩsa sɩd t’a Zeova bʋ-kaoorã zemsame bɩ, bɩ d na n basa a tũub tɩ bala a sẽn yãk yam ningã pa noom-do? Vẽenega, d segd n maneg n kɩsa a Zeova sɩd masã menga, tɩ sõng-d tɩ d wa tõog n kɩs-a sɩd zãng-zãng beoog sẽn wate. Mams-y n ges-y d manesem sẽn na n yɩ to-to dũni-paalgã pʋgẽ, d sã n wa ne a Zeova bʋ-kaoorã sẽn wa ne nafa ninsã. Ziri tũudmã ne leebgã siglsã sẽn naag ne yão-beedã, n paas goosneema-rãmb sẽn weoog nin-buiidã la b nams-b na maan yʋʋm wʋsgã fãa pa na n le beẽ ye. Bãasã la kʋʋlmã pa na n le beẽ, d ned kõn le maan kaalem me ye. B na n paga a Sʋɩtãan ne a zĩn-dãmbã bog-zulung pʋgẽ yʋʋm tusri, tɩ b pa le tõe n nams ninsaalbã ye. Wakat-kãng tɩ b kɩɩsgã sẽn wa ne zu-loees ninsã fãa saame. (Vẽn. 20:2, 3) D sũur na n yɩɩ noog wʋsgo, d sẽn kell n kɩs sɩd t’a Zeova sẽn maand fãa yaa tɩrgã yĩnga. w22.02 6-7 s. 16-17

A Zeezi ra yɩta pipi n baood laafɩ, la a sagend neb a taabã tɩ b modg n welg b mo-yõsã. A sagla a karen-biisã tɩ b sã n dat tɩ b sẽn tũud a Zeova wã ta a yam, b segd n modgame tɩ laafɩ zĩnd bãmb ne b taabã sʋka. (Mat. 5:23, 24) Sẽn paase, a tẽn-tʋmdbã sẽn wa n wẽed no-koɛɛm n na n bãng ãnd n yaa kãseng bãmb sʋkã, a sõng-b lame n yɩlme, sẽn na yɩl tɩ b bas no-koɛɛmã. (Luk 9:46-48; 22:24-27) Sẽn na yɩl n yɩ ned sẽn baood laafɩ, d pa segd bal n pa baood zab ye. D segdame me n maand d sẽn tõe fãa sẽn na yɩl tɩ laafɩ kell n zĩnd tõnd ne d taabã sʋka, la d sõngd d tẽed-n-taasã tɩ b welgd b mo-yõsã. (Fili. 4:2,3; Zak 3:17, 18) D tõe n soka d meng yaa: ‘M sakame n na n mong m meng bũmb kẽer sẽn na yɩl tɩ laafɩ le zĩnd maam ne m taabã sʋk bɩ? Saam-biig bɩ saam-pi-poak sã n sãam m sũuri, m wukda ne-a bɩ? Maam ne ned moor sã n yõsge, m gũudame t’a wa kos-m sugr bɩ, bɩ m yɩta pipi n kẽng a nengẽ tɩ d welg yellã, baa m sã n tagsdame tɩ yẽ n ka bʋʋm?’ w22.03 10 s. 10-11

Hal sẽn kaoose, Biiblã pĩnd n togsame tɩ Wẽnnaam nin-buiidã na n “kõo b mens ne yamleoogo,” n sakdẽ t’a Zeezi wilgd-b sor tɩ b tʋmd a Zeova tʋʋmdã. (Yɩɩn. 110:3) Bãngr-gom-kãngã paamda pidsg rũndã-rũndã. Yʋʋmd fãa, a Zeova Kaset rãmbã rɩkda lɛɛr milyõ-rãmb n moond koe-noogã ne yẽesem. B moonda koɛɛgã ne yamleoogo, rẽ me b pa yaood-b ye. Sẽn paase, b sõngda b tẽed-n-taas nins sẽn dat sõngrã, la b kengd b raood la b tẽebo. Kãsem-dãmbã ne kãsem-sõngdbã me rɩkda lɛɛr-dãmb wʋsg n segend sõss b sẽn na n wɛgse, la b kẽnd me n kaagd b tẽed-n-taasã n kengd b raoodo. Bõe yĩng la a Zeova nin-buiidã sẽn tʋmd tʋʋm-kãensã fãa wã? Yaa b sẽn nong a Zeova la b nong b taabã me wã yĩnga. (Mat. 22:37-39) A Zeezi sẽn da lʋɩɩsd a taabã raab taoorã yaa mak-sõngo. D maanda d sẽn tõe fãa n na n dɩk a naoore. (Rom. 15:1-3) Neb nins sẽn dɩkd a togs-n-taarã na n paama nafa wʋsgo. w22.02 20 s. a 1-2

B ra rɩkda Israyɛll neb wʋsg tʋʋm pʋtẽ wã, n da kõt-b daarã tʋʋmd yaood zaabr fãa. Ned sã n da bas n pa yao a tʋm-tʋmda, na n kɩtame tɩ tʋm-tʋmdã pa paam ligd n tõog n ges a zakã rãmb yell daar-n-kãng ye. A Zeova yeelame: “Bala, yẽnda yaa naong soaba, la a ligdã yaa bõn-kãseng ne-a.” (Tõo. 24:14, 15; Mat. 20:8) Rũndã-rũndã, tʋm-tʋmdb wʋsg reegda yaood vugr bɩ naoor a yiib kiuug fãa, la pa daarã pʋgẽ ye. Baa ne rẽ, d ket n segd n tũu saglg ning sẽn be Maan-kʋʋr 19:13 pʋgẽ wã. Neb kẽer sẽn maand b tʋm-tʋmdbã bũmb ningã pa sõma ye. Bala b sẽn yaood-b to-to wã pa kolg ligd ning b sẽn da segd n yao-bã baa bilf ye. B miime tɩ nin-kãensã pa tar b sẽn maande, la tɩ b na n kell n sak n tʋma ne-ba, baa b na n yaood-b lame tɩ pa tat ligd ning b sẽn segd n yao-bã ye. Woto yĩnga, d tõe n yeelame tɩ b ‘basda b tʋm-tʋmdbã yaood b nengẽ.’ Kiris-ned sẽn dɩk ned tʋʋm segd n modgame n tũ sagl-kãngã. w21.12 10 s. a 9-10

A Zeezi sẽn yã namsg ning fãa wã yĩnga, ko-yũud wʋsg n da segd n tar-a. A ra ratame tɩ b kõ-a koom t’a yũ. A Zeezi ra pa get t’a sã n togs yell sẽn namsd-a yaa pãn-komsem ye. Bɩ tõnd me maan wa yẽ. Tõe tɩ naoor wʋsgo, d nongẽ lame n da togsd neb a taabã d sẽn dat sõngr ninsã ye. La sã n wa mik tɩ d rata sõngre, d segd n kosa neb a taabã n da yɛɛs ye. Wala makre, d sã n kʋʋlame wall d yaa koamsa, d tõe n kosa d zoa t’a rɩk-d n kẽng tɩ d tɩ ra teedo, bɩ n tall-d n kẽng logtor-yiri. D sũur sã n sãamame wall d sã n komsa raoodo, d tõe n kosa kãsem-soab bɩ d zoa sẽn yaa kiris-ned tẽeb sẽn bɩ t’a maag a yĩng n kelg-do, wall t’a togs-d “gom-noog” tɩ keng d pɛlga. (Yel. 12:25) D tẽeg tɩ d tẽed-n-taasã nong-d lame, la tɩ b rat n sõng-d-la “yel-pakr wakate.” (Yel. 17:17) La b pa tõe n bãng sẽn be d sũurẽ ye. B tõeeme n pa bãng tɩ d rata sõngre, sã n pa d togs-b lame ye. w21.04 11-12 s. 11-12

Tõnd sʋkã neb wʋsg yɛl sã n wa toeeme, pa nana ne-b ye. Neb kẽer da kẽesa b mens zãng a Zeova tʋʋmdã pʋgẽ n kaoos yʋʋm wʋsgo, tɩ b wa kɩt tɩ b toeem tʋʋmde. Yɩɩ tɩlɛ tɩ sãnda me bas tʋʋmd b sẽn da nong wʋsgo, b yʋʋmã sẽn vẽsg yĩnga. Sã n wa yaa woto ne-do, d sũur pa tõe n pa sãam ye. D sã n get yɛlã wa a Zeova sẽn get-b to-to wã, d yɛlã sã n wa toeeme, d sũur pa na n sãam ye. A Zeova maanda bõn- kãsems rũndã-rũndã. Tõnd paamame n yaa a tʋmd- n- taase, tɩ yaa zu- zẽkr meng- menga. (1 Kor. 3:9) A Zeova sẽn nong tõnd to-to wã pa toeemd ye. Dẽnd b sã n wa kɩt tɩ d toeem tʋʋmd a Zeova siglgã pʋgẽ, bɩ d da sidgd wakat fãa n sokd d meng bõe yĩng la b sẽn kɩt tɩ d toeem tʋʋmdã ye. Da le tagsd-y “wakat sẽn loog poorẽ wã yell ye.” Kos-y-yã a Zeova t’a sõng-y tɩ y tags toeengã sẽn na n naf-y to-to wã yelle. (Koɛ. 7:10) Kell-y n tall-y yam-sõngo. Woto, baa d yɛlã sã n wa toeeme, d na n kell n talla sũ-noogo, la d kell n maan sɩd ne a Zeova. w22.03 17 s. 11-12

Ãnd dãmb la a Zeova wilgd a nonglem-kãsengã? Biiblã wilgdame tɩ d tõe n nonga bũmb wʋsgo. Wala makre, “koobo,” “reezẽ rãam ne rɩ-noodo,” “remsgo,” “bãngre,” bɩ “yam.” (2 Kib. 26:10; Yel. 12:1; 21:17; 29:3) La yaa ned bal la f tõe n nong ne nonglem-kãsengã. Pa ne ninsaalbã fãa la a Zeova wilgd a nonglem-kãsengã ye. Yaa ne neb nins sẽn tar zood sõma ne-a wã bala. Wẽnnaam maanda sɩd ne a zo-rãmbã wakat fãa. A pʋlem-b lame tɩ b beoog na n yɩɩ neere. Sẽn paase, a na n kell n nong-b-la wakat fãa. A Zeova wilgame t’a nonga ãdem-biisã fãa. Daar a ye, a Zeezi yeela rao a ye yʋʋr sẽn boond t’a Nikodɛm yaa: “Wẽnnaam nonga dũniyã [rat n yeel tɩ ãdem-biisã fãa] hal wʋsgo, n kõ a Bi-ribl sẽn-ka-to wã sẽn na yɩl tɩ ned ning fãa sẽn tẽed yẽ ra sãame, la a paam vɩɩm sẽn ka sɛta.”—Zã 3:1, 16; Mat. 5:44, 45. w21.11 2 s. a 3; 3 s. a 6-7

Vɩɩmã yaa toog dũni-kãngã pʋgẽ. La tõe tɩ d na n wa maoo ne zu-loees sẽn yaa toog n yɩɩd woto. (Mat. 24:21) D sɩd gũuda wakat ning yel-kãensã fãa sẽn na n sa fasɩ n pa tol n le zĩndi, tɩ d pa na n le tẽr b yell me wã. (Eza. 65:16, 17) Vẽenega, d segd n modgame n ket n tõogd toog n paasdẽ. Bõe yĩnga? Bala a Zeezi yeelame: “Yaa ne yãmb tõog-toogã la y na n fãag y vɩɩmã.” (Luk 21:19) D sã n tags neb a taabã sẽn tõogd toog zu-loees nins pʋsẽ wã yelle, tõe n sõnga tõnd tɩ d ket n tõogd toog n paasdẽ. Ãnd n kõt mak-sõng sẽn ka to tõog-toogã wɛɛngẽ? Yaa Wẽnnaam a Zeova. Woto linga yãmb bɩ? Y sã n bʋgs rẽ zug neere, pa na n le ling-y ye. Dũniyã bee a Sʋɩtãan nugẽ. Yaa rẽ yĩng la a sẽn pid ne zu-loees wʋsgã. A Zeova tõe n kɩtame tɩ zu-loeesã sa zĩig pʋgẽ. La a gũudame n na n maan rẽ beoog-daare. (Rom. 9:22) La nananda, d Wẽnnaamã tõogda toogo, n gũud tɩ wakat-kãng ta. Bɩ d gom yɛl a wɛ yelle. w21.07 8 s. a 2-4