Bõn-bɩʋʋngo

A Zeezi wakatẽ wã, neb kẽer pa ges t’a sẽn da zãmsd nebã sõma wã sekame ye. B ra rata sẽn yɩɩd rẽ. La a sẽn zãgs t’a kõn maan yel-solemdã b sẽn kosã, b pa sak n deeg tɩ yẽ la Mesi wã ye. (Mat. 16:4) Bõe la Gʋls-sõamyã yeta? No-rɛɛs a Ezayi goma Mesi wã yelle, n yeel yaa: “Yẽnda ka na n kelem wall zẽk a koɛɛg ye. Ned kõn wʋm yẽnda koɛɛg soay zut ye.” (Eza. 42:1, 2) A Zeezi ra moonda koɛɛgã, n pa baood n wilg a meng ye. A pa me wẽnd-do-bɛda, a ra pa yeelgd fut sẽn wilgd t’a yaa tũudum taoor soaba, bɩ n da rat tɩ nebã boond-a ne waoogr yʋy ye. B sẽn wa n kaood a Zeezi bʋʋdã, a pa bao n na n maan yel-solemd n noog rĩm a Erood sũur ye. (Luk 23:8-11) Yaa sɩd t’a Zeezi maana yel-soalem kẽere, la sẽn da pak-a n yɩɩd yaa koe-noogã moonego. A yeela a karen-biisã tɩ ‘yaa bõn-kãng yĩng la a wa-yã.’—Mark 1:38. w21.05 4 s. a 9-10

D baooda neb nins fãa “sẽn tar yam ning sẽn zems ne vɩɩm sẽn ka sɛtã.” (Tʋʋ. 13:48) Sẽn na yɩl n sõng nin-kãensã tɩ b lebg a Zeezi karen-biisi, d segd n sõng-b lame 1) tɩ b wʋm bũmb nins b sẽn zãmsd Biiblã pʋgẽ wã võore, 2) tɩ b kɩs sɩd ne rẽ, la 3) tɩ b tũ rẽ b vɩɩmã pʋgẽ. (Kol. 2:6, 7; 1 Tes. 2:13) Tigingã nebã fãa tõe n sõnga Biibl karen-biisã. Yaa b sẽn na n kõ-b mak-sõng n wilg tɩ b nong-b lame, tɩ b sã n wa tigissã me bɩ b reeg-b sõma. (Zã 13:35) Biibl karen-saambã me segd n dɩka sẽk wʋsg la a modge, n sõng karen-biigã t’a bas tẽeb la minim-wẽns “sẽn vigl kãn-kãe” a sũurẽ wã. (2 Kor. 10:4, 5) Yɩl n sõng ned t’a wã tõog n maan woto tõe n kaoosa kiisi, t’a yaool n wa tõog n deeg lisgu. La rẽ sɩd seka modgre. w21.07 3 s. a 6

Yãmb kɩsa sɩd t’a Zeova Kaset rãmbã sẽn zãmsd nebã Biiblã to-to wã, la b sẽn tũud Wẽnnaam to-to wã bal n tat a yam bɩ? Tẽn-tʋmd a Poll ra kɩsa sɩd zãng t’a sẽn tẽed bũmb ninsã yaa sɩda. (1 Tes. 1:5) Pa rẽ sẽn da kõt-a sũ-noog bal yĩng ye. A ra maagda a yĩng n zãmsd Wẽnnaam Gomdã sõma. A ra kɩsa sɩd tɩ “Gʋls-sõamyã tõr yaa Wẽnnaam n vẽneg tɩ b gʋlse.” (2 Tɩm. 3:16) Bõe la a Poll bãng Gʋls-sõamyã pʋgẽ? A yãa kaset sẽn wilgd vẽeneg t’a Zeezi n yaa Mesi ning b sẽn da pĩnd n togs t’a watame wã. Yaool n yaa kaset-kãens la zʋɩf tũudmã taoor dãmb sẽn yãk yam n pa sak n tẽ wã. Nin-kãensã ra yetame tɩ b zãmsda nebã sɩdã Wẽnnaam zugu, la b yaool n da maanda yɛl kẽer Wẽnnaam sẽn kisi. (Tɩt 1:16) A Poll pa maan wa bãmb ye. A pa yãk a sẽn na n tẽ Wẽnnaam Gomdã pʋgẽ, la a sẽn pa na n tẽ ye. A yãka yam n na n zãms nebã Wẽnnaam Gomdã, la a tũ “Wẽnnaam daabã fãa.”—Tʋʋ. 20:27. w21.10 18 s. a 1-2

Tõnd sẽn send la d zãgsd koomã, d pa segd n yĩm tɩ yaa Wẽnnaam n kɩtd tɩ bɩtẽ ye. (1 Kor. 3:6, 7) Ninsaalbã fãa tara yõod wʋsg a Zeova nifẽ. A kɩtame tɩ d naag a Bi-riblã, n tigimd neb sẽn yit buud toɛy-toɛy pʋsẽ nand tɩ dũni-kãngã saab ta, tɩ woto sɩd yaa zu-zẽkr meng-menga. (Aaze 2:7) D tõe n dɩka koɛɛgã mooneg n mak ne tʋʋmd sẽn fãagd yõya. Tõnd yaa wa neb b sẽn tʋme, tɩ b na n tɩ fãag neb sẽn be sãnem bokẽ tɩ bokã sirg tɩ b pa tõe n yi ye. Tõe tɩ yaa neb a wãn bal la d na n tõog n fãage, la tʋʋmdã d fãa sẽn na n tʋmã tara yõod wʋsgo. Yaa woto me ne koɛɛgã d sẽn moondã. D pa mi neb nins d sẽn na n tõog n fãag a Sʋɩtãan dũni-kãngã pʋgẽ wã sõor ye. La a Zeova tõe n tũnuga ne tõnd ned kam fãa n sõng-ba. Saam-biig a Ãndereyas sẽn be Bolivi wã yeelame: “Ned sã n zãms Biiblã hal n wa reeg lisgu, yaa neb wʋsg modgr yĩnga.” Bɩ tõnd me kell n tall yam-sõng a woto koɛɛgã moonegã wɛɛngẽ. D sã n maan woto, a Zeova na n ning-d-la barka, la d na n paama sũ-noog wʋsg koɛɛgã mooneg pʋgẽ. w21.05 19 s. 19-20

Tãoos sẽn dat bala, yaa a paam n yõk rũng ning a sẽn datã, wall a kʋ-a. A tõe n tũnuga ne bẽds buud toor-toore, wala makre, a Zoob ziri-be-zo-rãmbã sẽn gom b rãmb nins yellã a yembre. (Zoob 18:8-10) Wãn to la tãoos tõe n belg rũng t’a wa lʋɩ a bẽdgẽ? A maagda a yĩng n bao n bãng rũngã yel-manesem, a sẽn kẽnd zĩig ningã, a sẽn nong bũmb ninsã, la a sẽn tõe n tall bẽdg ning n bẽd rũngã n paame. A Sʋɩtãan yaa wa tãoos a woto buudu. A maagda a yĩng n bao n bãng d yel-manesem, d sẽn nong n kẽnd zĩis ninsã, la bũmb nins sẽn noom-dã. Rẽ poore, a baooda bẽdg sẽn na n ling-du, n saagdẽ tɩ na n yõk-d lame. La Biiblã yetame tɩ baa a Sʋɩtãan bẽdg sã n yõk-do, d tõe n yii a bẽdgã pʋgẽ. A leb n wilgda d sẽn tõe n maan t’a ra wa paam-d n yõk ye. A Sʋɩtãan bẽds a yiib me sẽn yõgd n tɩ yɩɩd yaa wuk-m-mengã la rat-tɩ-loogã. Sẽn na maan yʋʋm tusa, a Sʋɩtãan tõog n bẽda ninsaalbã ne zʋg-wẽn-kãensã n yõke. A yaa wa liuun-bẽt sẽn bẽt liuul ne tãooga, wall ne gãmbr n yõkdẽ. (Yɩɩn. 91:3) La pa tɩlɛ tɩ d bas t’a Sʋɩtãan yõk-d ye. Bõe yĩng tɩ d yet woto? Bala a Zeova vẽnega tõnd tɩ d bãng a Sʋɩtãan sɩlem toor-toorã.—2 Kor. 2:11. w21.06 14 s. a 1-2

D tẽed-n-taas nins sẽn kʋʋl n ket n tũud a Zeova wã tara yõod hal wʋsgo. Wẽnnaam Gomdã pʋgẽ, b maka nin-kãensã zoob-peendã ne maanfo. (Yel. 20:29) La d sã n pa gũusi, d tõe n wa getame tɩ b pa tar yõod wʋsg ye. Kom-bɩɩsã sã n sak n deeg tɩ sẽn kʋʋl-bã tara yõod hal wʋsgo, b na n paama bũmb yõod sẽn yɩɩd arzɛgs hal zĩig sẽn zãre. Sẽn kʋʋl-b n ket n tũud Wẽnnaam a Zeova ne b sũy fãa wã tara yõod wʋsg a nifẽ. A mii b sẽn sɩd yaa neb nins b sũurã pʋgẽ, la a nand-ba, b zʋg-sõma wã yĩnga. Sẽn kʋʋl-bã sẽn tũ a Zeova yʋʋm wʋsgã sã n dɩk yam la minim nins b sẽn paamã n sõng kom-bɩɩsã, noom-a lame. (Zoob 12:12; 32:9; Yel. 1:1-4) Sẽn paase, b sẽn tõogd toogã me noom-a lame. (Mal. 3:16) Yaa sɩd tɩ b paama zu-loees wʋsgo, la b tẽebã ket n tara pãnga. B sẽn saagd tɩ beoog na n yɩɩ neerã paama pãng n yɩɩd wakat ning b sẽn bãng sɩdã. Sẽn paase, a Zeova nong-b lame, bala b ket n moonda a yʋʋrã baa ne b sẽn kʋʋlã.—Yɩɩn. 92:13-16. w21.09 2 s. a 2-3

Yaa sõma tɩ d feesd d mens wakat-wakate. D tõe n soka d mens yaa: ‘Mam makda m meng ne m taabã n tagsdẽ tɩ m são-b lame bɩ? M tʋmda sõma tigingã pʋgẽ m sẽn dat n lʋɩ m taabã taoore, bɩ n wilg tɩ m são-b lame yĩng bɩ? Bɩ yaa m sẽn dat n ta a Zeova yam yĩnga? Biiblã yetame tɩ d ra bao n mak d meng ne neb a taabã ye. Bõe yĩnga? Bala d sã n tagsdẽ tɩ d sãoo d saam-biisã, d tõe n wa lebga wuk-m-meng soaba. D sã n getẽ me tɩ d taabã são-d lame, tõe n kɩtame tɩ d koms raoodo. (Rom. 12:3) D segd n tẽegame t’a Zeova sẽn tak tõnd n wa a nengẽ wã, pa d neerem yĩnga, d sẽn yaa gom-minim soab bɩ d yʋʋr sẽn yi yĩng ye. Yaa d sẽn tʋll n nong yẽ la d kelg a Bi-riblã yĩnga.—Zã 6:44; 1 Kor. 1:26-31. w21.07 14-15 s. a 3-4

D sã n dat n maneg d tagsa wã, yaa tɩlɛ tɩ d pʋʋsdẽ, n zãmsd Wẽnnaam Gomdã la d bʋgsdẽ. Ket-y n maand-y woto, la y kos a Zeova t’a kõ-y pãnga. A vʋʋsem sõngã na n sõng-y lame, tɩ y tõog n da le rɩkd y meng n makd ne y taabã ye. A Zeova na n sõng-y lame me, tɩ y bãng y sã n yaa wuk-m-meng soab la sũ-ki-neda, la a sõng-y tɩ y tõog n yiis zʋg-wẽn-kãensã y sũurã pʋgẽ tao-tao. (2 Ki 6:29, 30) A Zeova mii sẽn be d sũurẽ. A leb n mii d sẽn maood ne zu-loees nins dũni-wẽn-kãngã pʋgẽ wã, la d mengã pãn-komsmã. A Zeova sẽn ne tɩ d maanda d sẽn tõe fãa n maood ne zu-loe-kãensa wã, kɩtame t’a maneg n nong-d n paase. A Zeova rɩka makr ne pag sẽn nong a biig to-to wã, n na n wilg yẽ sẽn nong tõnd to-to. (Eza. 49:15) D sẽn mi tɩ nonglem a woto buud n be tõnd ne a Zeova sʋka, a sẽn ne tɩ d maanda d sẽn tõe fãa n na n kell n tũ-a ne d sũur fãa wã kengda d raood wʋsgo. w21.07 24-25 s. 17-19

D tõe n paama sũ-noog wʋsgo, d sã n wɩsg d meng n tʋmd tʋʋm nins fãa d sẽn tar a Zeova siglgã pʋgẽ wã. Tʋmd-y koe-moonegã tʋʋmd wʋsgo, la y kẽesd y mens sõma tigingã tʋʋmã pʋsẽ. (Tʋʋ. 18:5; Ebre. 10:24, 25) Segend-y y mens sõma tigissã yĩnga, la y kõt leoor sẽn kengd raoodo. B sã n kõ-y sõsg Kiris-nebã vɩɩm la b tʋʋma tigsg sasa, bɩ y ges rẽ wa bũmb sẽn tar yõod wʋsgo. B sã n wa kos-y tɩ y sõng ne tʋʋmd ning tigingã pʋgẽ, bɩ y wilg tɩ y yaa ned sẽn maand bũmb fãa a wakate, la ned b sẽn tõe n teege. Ra tags-y tɩ tʋʋmd ning b sẽn kõ yãmbã yõod pa waooge, la tɩ pa baood tɩ y rɩk sẽk wʋsg n tʋm ye. Modg-y tɩ y minimã paase. (Yel. 22:29) Y sã n tʋmd a Zeova tʋʋmdã ne y sũur fãa, zood ning y sẽn tar ne-a wã pãng na n paasdame, tɩ y sũ-noogã me paasdẽ. (Gal. 6:4) Sẽn paase, na n yɩɩ nana ne-y tɩ y maan sũ-noog ne neb a taabã, b sã n wa kõ-b tʋʋmd yãmb sẽn da rat tɩ b kõ-yã.—Gal. 5:26. w21.08 22 s. 11

D sak t’a Zeova zãms-do, la d da yɩ wuk-m-mens rãmb ye. Wala bãag sẽn tõe n kɩt tɩ ned sũur pa le tʋmd sõma wã, wuk-m-mengã me tõe n kɩtame tɩ d pa sakd n tũud a Zeova sẽn zãmsd tõnd bũmb ninsã ye. Fariziyẽ-rãmbã basame tɩ b sũyã riglmi, tɩ b pa sak n deeg tɩ vʋʋsem sõngã bee ne a Zeezi la t’a yaa Wẽnnaam Bi-ribla, baa ne b sẽn da ne kaset sẽn wilgd rẽ vẽenegã. (Zã 12:37-40) Woto ra yaa yell meng-menga, bala kɩtame tɩ b pa na n paam vɩɩm sẽn kõn sa wã ye. (Mat. 23:13, 33) Tara yõod wʋsg tɩ d kell n bas tɩ Wẽnnaam Gomdã la a vʋʋsem sõngã sõng-d tɩ d toeem d yel-manesmã, d tagsa wã la d yam-yãkrã. A Zak sẽn da yaa sik-m-meng soabã yĩnga, a ra sakdame t’a Zeova zãmsd-a. Yaa a sẽn da yaa sik-m-meng soabã n kɩt t’a lebg karen-saamb sẽn mi neb zãmsg sõma wã. w22.01 10 s. a 7

D sã n tũ sagl-kãngã n kell n ‘wɩng ne pʋʋsgo,’ d tõe n basa d yam tɩ d saasẽ Ba wã kelgda d pʋʋsgã, la t’a na n leok-d lame. (Kol. 4:2) Baa d sẽn tõe n wa getẽ t’a Zeova kaoosdame n pa leokd d pʋʋsgã, a pʋlmame t’a na n leoka d pʋʋsgã tɩ zems a wakate. (Ebre. 4:16) Rẽ n so tɩ d pa segd n ning a Zeova taale, a sã n wa pa leokd d pʋʋsg tao-tao ye. Wala makre, yʋʋm wʋsg la woto neb wʋsg sẽn pʋʋsd n kotẽ tɩ Wẽnnaam Rĩungã wa sãam dũni-wẽn-kãngã. A Zeezi pʋd n yeelame tɩ d pʋʋs rẽ wɛɛngẽ. (Mat. 6:10) La ned sã n bas a Zeova tũubu, dũni-wẽn-kãngã sãoongã sẽn pa wa wakat ning yẽndã sẽn da tẽedã yĩnga, yaa yalemdo. (Hab. 2:3; Mat. 24:44) D sã n kell n gũ a Zeova, la d pʋʋsd-a n tall tẽeb t’a na n leok-d lame, yaa yam tʋʋmde. Dũni-wẽn-kãngã sãoongã na n waa wakat sẽn zems kɛpɩ. Bala a Zeova zoe n yãka daarã la wakatã. La na n yɩɩ raar sẽn kell n zems ne nebã fãa.—Mat. 24:36; 2 Pɩy. 3:15. w21.08 10 s. 10-11

Neb nins sẽn kʋʋl n yaa sik-m-mens rãmbã miime tɩ b yʋʋmã sẽn vẽsgdã, b pa le tõe n tʋm wʋsg wa pĩndã ye. Wala makre, tigims sull yel-gɛtbã. B yʋʋmã sã n wa ta 70, b kɩtdame tɩ b toeem tʋʋmde. Woto tõe n yɩɩ toog ne-ba. B sũy ra nooma wʋsgo, b sẽn da paam n gilgd n kaagd b tẽed-n-taasã. La b sak n deegame tɩ rẽnda b bas tʋʋm-kãng n kõ kom-bɩɩsã. Woto, b rɩkda Levi buudã neb sẽn zĩnd pĩnd wẽndẽ wã togs-n-taare. Levi buudã ned sã n da ta yʋʋm 50, a basda sɛk-roogã pʋgẽ tʋʋma. Ra pa tʋʋm-yɛng bal n da kõt-b sũ-noog ye. B ra maanda b sẽn tõe fãa n sõngd kom-bɩɩsã ne yẽesem, la b get rẽ wa zu-zẽkr bũmbu. (Sõd. 8:25, 26) Rũndã-rũndã me, tigims sull yel-gɛtb nins yʋʋm sẽn ta 70 wã pa le gilgd n kaagd tigimsã ye. La b ket n sõngda b tigimsã pʋsẽ saam-biisã, la b kengd b raoodo. w21.09 8-9 s. a 3-4

A Zeezi wẽe yel-bũnd sẽn kengd pɛlga, n gom biig sẽn menem yelle, tɩ be Luk 15:11-32. Biigã kɩɩsa a ba wã, n yi zakẽ wã n tog sor “n kẽng tẽn-zãrgẽ.” A tɩ tʋma tʋʋm-dẽgd beenẽ. La yɛlã sẽn wa n lebg toog ne-a wã, a tagsa a manesmã zug neere. A bãngame t’a sẽn wa n be a ba wã zakẽ wã, a vɩɩmã ra noomame. Sɩd me, a Zeezi yeelame tɩ ‘biigã yam wa n vẽnegame.’ A yãka yam n na n lebg n kul n tɩ kos a ba wã sugri. Biigã sẽn sak n deeg t’a sẽn yãk yam n maan bũmb ninsã pa sõma wã tara yõod wʋsgo. A ra segd n toeema a yel-manesmã. Biig ning sẽn da menemã wilgame t’a sɩd teka yam n kot sugri. Yel-bũn-kãngã pa kengd raood bal ye. Kibarã tõe n sõnga kãsem-dãmbã, b sã n wa rat n bãng ned sẽn maan yel-wẽn-kãseng sã n sɩd teka yam n kot sugri. w21.10 5 s. 14-15

Bõe n pa na n digimdi, bɩ n sãame? Tẽn-tʋmd a Poll yeelame: “Tõnd sẽn tog n paam Rĩung bũmb sẽn pa tõe n kɩt t’a rigimdã yĩnga, bɩ d ket n tʋmd Wẽnnaam tʋʋmdã ne wẽn-zoeer la ne rabeem tɩ ta b yam.” (Ebre. 12:28) Yaoolem tẽn-digimdgã sã n wa sa, Wẽnnaam Rĩungã bal n na n ketẽ. (Yɩɩn. 110:5, 6; Dãn. 2:44) Wakatã sẽn ketã pa le waoog ye. Nebã segd n yãka b sẽn na n maanega: B sã n yãk yam n kell n teel dũni-kãngã, b na n paama sãoongo. B sã n yãk yam n tũ a Zeova, la b maan b sẽn tõe n fãa n tek b vɩɩmã n maan a raabã, b na n wa paamã vɩɩm sẽn ka sɛta. (Ebre. 12:25) Ne koe-moonegã maasem, d tõe n sõnga nebã tɩ b bãng b sẽn na n maanega, yel-kãngã sẽn pa reem yellã wɛɛngẽ. Sẽn paase, d modg n da yĩm d Zu-soab a Zeezi sẽn yeel bũmb ningã ye. A yeelame: “Rĩungã koe-no-kãngã na n moona dũniyã tɛk fãa tɩ yɩ kaset buud fãa yĩnga. Yaa rẽ poor la saabã na n ta.”—Mat. 24:14. w21.09 19 s. 18-20

Kãsem-dãmba, sẽn yɩɩd fãa, yãmb n segd n bels y tẽed-n-taas nins b sẽn yiis b ned tigingã pʋgẽ wã. (1 Tes. 5:14) Keng-y b raood nand tɩ tigissã sɩnge, la tigissã poor me. Kẽnd-y n kaagd-b la y pʋʋsd ne-ba. Moond-y koɛɛgã ne-ba, la y mi n bool-b tɩ b wa naag yãmb n maan y zak pʋgẽ Biibl zãmsgã. Kãsem-dãmbã segd n kʋmda d tẽed-n-taas nins sũy sẽn sãamã, n nong-b la b wilgdẽ tɩ b yell pak-b lame. (1 Tes. 2:7, 8) A Zeova “pa rat tɩ ned baa a ye sãam ye. A ratame tɩ nebã fãa tek yam n kos sugri.” (2 Pɩy. 3:9) Baa ned maana yel-wẽn-kãsenga, a vɩɩmã ket n tara yõod Wẽnnaam nifẽ. Tags-y yaood-kãseng ning a Zeova sẽn yao tõnd ned kam fãa yĩngã yelle. Rat n yeel t’a sẽn kɩt t’a Bi-ribl-nongrã wa ki tɩ yɩ maoongã. A Zeova sõngda neb nins sẽn bas a tũubã, n dat tɩ b lebg n wa a nengẽ. A ratme tɩ b maan woto, wala a Zeezi yel-bũnd ning sẽn gomd biig sẽn menemã sẽn wilgdã.—Luk 15:11-32. w21.09 30-31 s. 17-19

Sã n mikame tɩ y pa le tõe n kẽes y toog sõma koe-noogã mooneg la nebã zãmsgã pʋgẽ bãag yĩnga, y maanda wãna? Baa ne rẽ, y tõe n maana sũ-noogo. D gom rĩm a Davɩɩd ne a tãb-biisã yelle. Daar a ye, b tɩ zaba ne Amalɛk nebã, n lebs n deeg b zagsã rãmb la b teedã b sẽn da wa n wʋkã. B sʋka neb kobs-yi n da yɛ wʋsgo, tɩ b kɩt tɩ b pa n gũ teedã. B sẽn tɩ tõog zabrã, a Davɩɩd gesame tɩ b pʋɩ teedã tɩ b fãa sẽn paamã zem taaba. (1 Sãm. 30:21-25) Yaa woto me ne koɛɛgã d sẽn moond dũniyã gill zugã. Koɛɛgã mooneg wɛɛngẽ, tõe tɩ y pa le tõe n tʋm wʋsg wa pĩndã ye. La y sã n maand y sẽn tõe fãa, y tõe n kell n maana sũ-noog wʋsgo, ned sã n zãms Biiblã n wa reeg lisgu. A Zeova geta d modgrã la d yam-sõngã n keood tõndo. A leb n sõngda tõnd tɩ d tõe n maan sũ-noog ne bũmb ning fãa d sẽn tõe n maan koɛɛgã mooneg pʋgẽ wã. (Zã 14:12) D tõe n basa d yam tɩ d sã n pa koms raood n base, Wẽnnaam sũur na n yɩɩ noog ne-do. w21.10 28 s. 15-17

D sã n wa kʋʋndẽ, d tõe n wa maanda rabeem, n tagsdẽ tɩ d pa le tar yõod wʋsg a Zeova nifẽ, wa d bi-bɩɩlmẽ wã ye. Yaa sɩd tɩ d tõeeme n pa le tar pãng wa pĩndã ye. La d tõe n talla yam la minim ning d sẽn paamã n sõng kom-bɩɩsã, tɩ b wa sak n tʋm tʋʋm wʋsg a Zeova siglgã pʋgẽ. Sẽn kʋʋl-bã segd n talla sik-m-menga, b sã n dat n tõog n sõng kom-bɩɩsã. Sik-m-meng soab getame t’a taabã yɩɩda yẽnda. (Fili. 2:3, 4) Neb nins sẽn kʋʋl n yaa sik-m-mens rãmbã sak n deegame, tɩ tʋʋm-yɛng tõe n tʋma ne manesem buud toor-toore, tɩ fãa zems ne Biiblã noyã, n yaa sõma. Rẽ n so tɩ b pa baood tɩ nebã fãa maan wa bãmb sẽn da maand to-to pĩndã ye. (Koɛ. 7:10) Baa ne b sẽn tar minim wʋsg n tõe n taas kom-bɩɩsã, b sak n deegame tɩ “dũni-kãngã yɛlã tara toeengo,” la tɩ yaa tɩlɛ tɩ bãmb mengã toeeme, n sak n tʋmd ne manesem-paal masã.—1 Kor. 7:31. w21.09 8 s. a 1, 3

A Zeova pa na n tol n yeel a nin-buiidã tɩ b maan bũmb sẽn yaa wẽng ye. A yaa Sõng soab sẽn ka to. Bõn-paklg b sẽn maan ne sãnem n da tab maan-kʋʋdb kãsmã zu-vindgã zugu, tɩ gʋlsem be be n wilgd rẽ vẽenega. Bõn-paklg kãng zugu, b ra gʋlsame yaa: ‘Welga toor a Zeova yĩnga.’ (Yik. 28:36-38) Gʋlsmã sẽn da be maan-kʋʋdb kãsmã zu-vindgã zugã ra wilgda ned buud fãa t’a Zeova sɩd yaa sõngo. La tõe tɩ Israyɛll neb kẽer ra pa tõe n paam n yã gʋlsmã sẽn da be maan-kʋʋdb kãsmã zu-vindgã zugã, b sẽn da pa tõe n paam n kolg-a wã yĩnga. Woto rat n yeelame tɩ b ra pa mi bũmb ning sẽn gʋls zu-vindgã zugã bɩ? Ayo. Bala gom-kãens ra bee Tõogã pʋgẽ tɩ b ra karemd-a tɩ Israyɛll rapã, pagbã la kambã fãa ra kelgdẽ. (Tõo. 31:9-12) Y sã n da zĩndẽ be, y ra na n wʋma b sẽn yeel tɩ: “Mam yaa yãmb Wẽnnaam a Zeova. Yãmb segd n . . . lebga sõamyã, bala mam yaa sõngo.” “Yãmb segd n yɩɩ sõamyã mam yĩnga, bala maam a Zeova yaa sõngo.”—Maan. 11:44, 45; 20:7, 26, MN. w21.12 3 s. a 6-7

Neb kẽer tõe n maanda yɩɩr ne bũmb nins sẽn yaa tɩlɛ ne-bã. Tõe tɩ b vɩɩ tẽng neb wʋsg sẽn yaa naong rãmba, tɩ tʋʋm paoong me yaa toogo. Tõe tɩ yaa toog ne-b tɩ b paam ligd sẽn sek b na tõog n ges b zakã rãmbã yelle. Tõe me tɩ ned ning sẽn tʋmd n get zakã rãmb yellã maana kaalem, tɩ rẽ kɩt tɩ zakã rãmb pa le tõe n paam ligd n ges b mens yell ye. D pa segd n maand yɩɩr wʋsg ne d zu-loeesã ye. D pʋd n segd n teega a Zeova. D tẽeg t’a Zeova pʋlmame tɩ d sã n lʋɩɩs a raabã taoor d vɩɩmã pʋgẽ, a na n gesame tɩ d paam sẽn yaa tɩlɛ ne-dã. (Mat. 6:32, 33) A pidsda a pʋlengã wakat fãa. (Tõo. 8:4, 15, 16; Yɩɩn. 37:25) A Zeova sã n geta liuuli wã la fɩlɛɛr-dãmbã yelle, sãmbg kae tɩ d pa segd n maand yɩɩr ne d sẽn na n dɩ wall d sẽn na n yeelgã ye. (Mat. 6:26-30; Fili. 4:6, 7) Roagdbã getame tɩ b kambã paamd bũmb nins sẽn yaa tɩlɛ ne-bã b sẽn nong-bã yĩnga. Woto me, d saasẽ Ba wã sẽn nong a nin-buiidã yĩnga, a getame tɩ d paamd sẽn yaa tɩlɛ ne-dã. w21.12 17 s. a 4-5; 18 s. a 8

Ned wall y tẽed-n-taag zoe n maana bũmb tɩ sãam y sũur wʋsg bɩ? Wala makre, baa a Zozɛf ba-biisã sẽn nams-a wʋsgã, a pʋd n maana a sẽn tõe fãa n kell n tũ a Zeova. La a Zeova ning-a-la barka, a sẽn tall sũ-mar n kell n tõog toogã yĩnga. Kaoosg zugẽ, a Zozɛf wa n basa taal wẽng ning b sẽn maan-a wã yĩnga, la a tags bark nins a Zeova sẽn ning-a wã yelle. (Sɩng. 45:5) Wa a Zozɛfe, tõnd me sã n kell n paas tõnd ne a Zeova zoodã, la d gũudẽ t’a wa rems kɛgr ning b sẽn maan tõndã, d paamda belsgo. (Yɩɩn. 7:18; 73:28) Y sã n namsda b sẽn maan-y kɛgr wall yell a to yĩnga, bɩ y tẽeg t’a Zeova pẽe “sũ-sãang rãmbã.” (Yɩɩn. 34:19) A nonga yãmb y sũ-marã yĩnga, la y sẽn basd y yɛlã fãa ne-a wã yĩnga. (Yɩɩn. 55:23) A Zeova n yaa dũniyã fãa bʋ-kaooda. A nee yɛl nins fãa sẽn maandã. (1 Pɩy. 3:12) Y sã n wa maood ne yell y sẽn pa tõe n welge, y pa na n tall sũ-mar n gũ t’a wa welg sɩda? w21.08 11 s. 14; 12 s. 16

Tara yõod d vɩɩmã pʋgẽ tɩ d maand bũmb nins sẽn noom a Zeova wã. D segd n lʋɩɩsa sẽn tar yõod n yɩɩdã taoore. Wakat ninga, sẽn na yɩl n da sãam d sẽkã, yaa tɩlɛ tɩ d yãk bũmb a ye bũmb a yiib sʋk n maane, baa b yiibã fãa yaa sõma. Kibar ning sẽn gomd a Zeezi sẽn kẽng n tɩ kaag a Maari ne a Mart yellã sõngda tõnd tɩ d wʋm rẽ võore. A Mart sẽn da rat n deeg a Zeezi sãand sõma wã yĩnga, a ra segenda rɩ-nood wʋsgo. La a Maari yẽ tɩ zĩnda Zu-​soab a Zeezi sɛɛgẽ, n da kelgd a sẽn yet bũmb ningã. Yaa sɩd t’a Mart sẽn da maand bũmb ningã pa wẽng ye. La a Zeezi yeelame t’a Maari “yãka pʋɩɩr sẽn yaa sõma n yɩɩdã.” (Luk 10:38-​42, notã) Tõeeme tɩ kaoosg zugẽ, a Maari wa n yĩma rɩɩb ning b sẽn dɩ raar-​n-​kãnga. La d tõe n kɩsa sɩd t’a pa tol n yĩm bũmb ning a sẽn bãng a Zeezi nengẽ wã ye. Wala a Maari sẽn pa reem ne sẽk bilfã a sẽn paam n zĩnd ne a Zeezi wã, tõnd me pa segd n deem ne sẽk ning d sẽn paamd n paasd tõnd ne a Zeova zoodã pãngã ye. w22.01 27 s. a 5-6

Baa ne a Akaab sẽn sik a meng a Zeova taoorã, a sẽn maan bũmb ning rẽ poorã wilgdame t’a sɩd ra pa tek yam n kos sugr ye. A pa bao n na n menes a Baal tũudmã a soolmã pʋgẽ ye. Sẽn paase, a pa sõng neb a taabã sẽn na yɩl tɩ b tũ a Zeova ye. A Akaab kũumã poore, a Zeova wilga a tagsg sẽn da yaa a soab nin-kãngã zugu. Wẽnnaam no-rɛɛs a yeelame t’a yaa ‘nin-wẽnga.’ (2 Kib. 19:1, 2) Masã, tags-y n ges-y: A Akaab sã n da sɩd teka yam n kos sugri, yaa vẽeneg t’a Zeova no-rɛɛsã ra pa na n yeel t’a yaa nin-wẽnga, la ned sẽn kis a Zeova ye. Baa ne a Akaab sũur sẽn da sãam ne a yel-manesmã, yaa vẽeneg t’a ra pa sɩd tek yam n kot sugr ye. Yam-bʋg la d tõe n dɩk a Akaab kibarã pʋgẽ? A Eli sẽn wa n togs a Akaab t’a Zeova yeelame t’a na n sɩbga yẽ ne a zakã rãmbã, a Akaab sika a menga. Woto zemsame. La a sẽn maan bũmb ning rẽ poorã wilgdame t’a ra pa tek yam ye. Dẽnd pa ned sũur sẽn na n sãam ne a sẽn maan bũmb ningã bal la wilgd t’a sɩd teka yam n kot sugr ye. w21.10 3 s. 4-5, 7-8

A Ezayi ra yaa no-rɛɛsa. La tõe t’a pagã me ra yaa no-rɛɛsa, bala b bool-a lame tɩ “no-rɛɛs poakã.” (Eza. 8:1-4) Dẽnd yaa a Zeova tũudmã tʋʋmã n da pak b yiibã n tɩ yɩɩda. Rũndã-rũndã, sẽn kẽ-b kãadmã me tõe n dɩka a Ezayi ne a pagã togs-n-taare, n maand b sẽn tõe fãa a Zeova tʋʋmdã pʋgẽ. B sã n naagd taab n zãmsd Biiblã bãngr-goamã, la b neẽ tɩ gom-kãensã pidsdame n pa vaandẽ, na n sõng-b lame tɩ b maneg n teeg a Zeova. (Tɩt 1:2) B tõe n tagsa b sẽn tõe n maan to-to, n sõng n pids Biiblã bãngr-goam kẽere. Wala makre, b tõe n sõngame n pids a Zeezi bãngr-gomd ning sẽn yet tɩ koe-noogã na n moona dũniyã tɛk fãa, nand tɩ saabã ta wã. Pag ne a sɩd sã n neẽ tɩ Biiblã bãngr-gomd ning paamda pidsgu, b na n maneg n dat n tʋma a Zeova tʋʋmdã sõma n paase. w21.11 16 s. a 9-10

A Zeezi ra ratame tɩ b ges a ma wã yelle. Wõnda wakat-kãng t’a ra lebga pʋg-kõore. A sẽn da nong a ma a Maari la a tagsd a yell wʋsgã yĩnga, a kɩtame t’a Zã na n ges a yelle, a sẽn mi t’a tõe n sõng-a lame t’a ket n tũud a Zeova wã yĩnga. Baraarã tɛka, a Zã lebga wa a Maari biiga, n ges a yell wa a ma-roaka. A Zeezi wilgame t’a nonga a Maari sẽn da yaa pʋg-sõng tɛkẽ wã hal wʋsgo. Sɩd me, a Maari gesa a Zeezi yell ne nonglem hal a rogmã tɛka, n le yals a sɛɛgẽ a kũumã wakate. Yam-bʋg la d tõe n dɩk a Zeezi goamã pʋgẽ? Nonglem ning sẽn be tõnd ne d tẽed-n-taasã sʋkã pãng tõe n yɩɩga nonglem ning sẽn be tõnd ne d zakã rãmb sʋkã. D sẽn kĩ ne b rãmbã tõe n namsa tõnd d tẽebã yĩnga, wall b pʋd n daag tõnd n base. La wa a Zeezi sẽn pʋlmã, d sã n kell n gãd a Zeova kãn-kãe la d ket n be a siglgã pʋgẽ, d na n paama sẽn yɩɩd d sẽn bõnã “naoor koabga.” Wʋsg na n lebga d kom-dibli, d kom-pugli, d ma-rãmb wall d ba-rãmb d sẽn nong wʋsgo. (Mark 10:29, 30) Yãmb tagsg yaa wãn to, y sẽn paam n be ne y tẽed-n-taasã tɩ y yaa wa zak a ye neba, b sẽn tar tẽebo, la b nong a Zeova la b taabã yĩnga?—Kol. 3:14; 1 Pɩy. 2:17. w21.04 9-11 s. a 7-8

Nonglem-kãsengã kɩtdame tɩ d maan tɩ yɩɩg d sẽn segd n maanã: Wa sẽn da yaa to-to pĩnd wẽndẽ wã, rũndã-rũndã me, saam-biis la saam-bi-pogs wʋsg yãka yam n wilgd b tẽed-n-taasã tɩ b nong-b-la ne nonglem-kãsenga, baa ne b sẽn zɩ n yã-bã. B sã n wʋm tɩ sabab-wẽng n maane, tao-tao bala, b baooda b sẽn tõe n maan n sõnge. Ned sã n wa tar ligd zu-loees tigingã pʋgẽ, tao-tao bala b baooda b sẽn tõe n maan n sõng a soabã. Wa pipi kiris-neb nins sẽn da be Masedoanã, b maandame tɩ yɩɩg b sẽn segd n maanã. B mongda b mens bũmb kẽere, n pʋd n kõ “tɩ yɩɩg b paoongã,” sẽn na yɩl n sõng b tẽed-n-taas nins sẽn be sõngr raab pʋgẽ wã. (2 Kor. 8:3) Rũndã-rũndã me, kãsem-dãmbã sã n bãng tɩ saam-biig bɩ saam-bi-poak n maan bũmb n sõng a taabã, b pẽgd-a-la sõma. B sẽn pẽgd-b woto wã sõngd-b lame tɩ b paam pãnga, n da koms raood n bas ye.—Eza. 32:1, 2. w21.11 11 s. 14; 12 s. 21

D fãa ratame tɩ b mi n sagl-do. Wakat ninga, d tõe n yãka yam n tɩ kos ned d sẽn nand saglga. Wakat ning me, d tẽed-n-taag sẽn dat d neer tõe n keoog-d lame, tɩ d rɩka “so-wẽng” sẽn na n wa kɩt tɩ d maand d bãngẽ. (Gal. 6:1) Sẽn na n baase, d sã n wa maan yel-wẽnde, b tõe n tũnuga ne saglg n kibl-du. Sẽn wa n yaa bũmb ning yĩng la b sagl-do, d segd n sak n deegame. Bala yaa d neer yĩnga, la pʋd n tõe n fãaga d yõore. (Yel. 6:23) Rũndã daar vɛrse wã yetame tɩ d ‘kɩll d tʋbr n kelg yam dãmb goama.’ Ned pa be n mi bũmb fãa ye. Neb n be tɩ b bãngr la b minim yɩɩd tõndo. (Yel. 15:22) Dẽnd d sã n sakd n kelgd saglse, wilgdame tɩ d yaa sik-m-meng soaba. Wilgdame me tɩ d sak n deegame tɩ pa bũmba fãa la d mi, la tɩ d rata sõngre, sẽn na yɩl tɩ d sẽn maandã yãk nenga. Rĩm a Salomo sẽn yɩ yam soabã yeelame yaa: “Sagendb sã n yaa wʋsgo, tõogr beeme.”—Yel. 15:22. w22.02 8 s. a 1-2

Sɩd tek yam n kos sugr pa d sẽn na n sak n deeg bal tɩ d sɩd maana yel-wẽnde, n maand d bãngẽ ye. D segd n toeema d yam-tagsgã la d tʋʋm-tʋmdɩ wã. Wala makre, d segd n basa tʋʋm-wẽngã la d modg n tũ a Zeova noyã la a saglsã. (Eze. 33:14-16) Sẽn tar yõod n yɩɩd yaa d modg n le paam zood sõma ne a Zeova. D sã n wʋm tɩ d zoa meng-meng n maan yel-wẽn-kãsenga, bõe la d segd n maane? D sã n bao n solg yellã n pa togs kãsem-dãmbã, d pa wilgd tɩ d rata d zoa wã neer ye. (Yel. 5:21, 22) D pʋd n pa tõe n solg yel-wẽndã ye. Bala a Zeova neeme. D sõngda d zoa wã, d sã n wilg-a tɩ kãsem-dãmbã rat n sõng-a lame. La a sã n zãgs t’a pa na n tɩ togs kãsem-dãmbã, d segd n tɩ togsame, tɩ wilg tɩ d sɩd rata a neere. Woto tara yõod wʋsgo, bala a sã n pa paam kãsem-dãmbã sõngr n tõog n tek yam n kos sugri. w21.10 7 s. 19-21

Tõnd fãa segd n dɩk a Zeezi togs-n-taar n sõngd b taabã. Biiblã yeelame t’a Zeezi sakame “n lebg wa yamba.” (Fili. 2:7) Yamb bɩ tʋm-tʋmd-sõng maanda a sẽn tõe fãa n na n noog a zu-soabã sũuri. D sẽn yaa a Zeova yembs la d sõngd d tẽed-n-taasã me wã yĩnga, sãmbg kae tɩ d ratame n kell n yɩ wa tʋʋm-teoog a Zeova sẽn tõe n tall n sõng d tẽed-n-taasã. Sok-y y meng yaa: ‘Mam yaa ned sẽn tʋll n dɩk a sẽkã la a pãngã n sõng a taabã bɩ? B sã n wa rat neb sẽn na n sõng n pɩɩs tigis-kãseng zĩig bɩ n maneg Rĩung roogo, m yɩta tao-tao n tɩ sõng bɩ?’ Wala makre, tõe tɩ y nee bũmb y sẽn segd n maneg tɩ yɩ sõma n paase, tɩ raab yaool n kae ye. Sã n wa yaa woto, bɩ y pelg y pʋg n pʋʋs a Zeova. Togs-y-yã-a sẽn be y sũurẽ, la y kos-a t’a kõ-y “raab la tõog sẽn na yɩl tɩ y maan sẽn noom bãmbã.”—Fili. 2:13. w22.02 22-23 s. a 9-11

A Zeezi ra yaa nin-sõng la wʋmda, baa sã n wa pa nana ne-a, tɩ wilgdẽ t’a yaa maan-neer soabã. (Mat. 11:28-30) Wala makre, daar a ye, Fenisi pag n kos-a t’a sãoog a biiga. Sɩngrẽ wã, a Zeezi zãgsa pagã kosgã. La a sẽn wilg t’a tẽebã tara pãngã, a Zeezi maan-a-la neere, n sãoog a biigã. (Mat. 15:22-28) Baa ne a Zeezi sẽn da maand nebã neerã, a ra pa basd n pa sagend-b ye. A ra togsda neb nins a sẽn nongã sɩd n pa zoe b nif ye. Wala makre, a Pɩyɛɛr sẽn wa n dat n gɩdg-a t’a ra maan a Zeova raabã, a kibl-a-la karen-biis a taabã taoore. (Mark 8:32, 33) A sẽn maan woto wã ra pa sẽn na n ning a Pɩyɛɛr yãnd ye. Ra yaa sẽn na n sõng-a t’a rɩk yam, la sõng karen-biis a taabã tɩ b bãng tɩ b pa segd n wukd b mens ye. Yaa vẽeneg tɩ yãnd bilf yõka a Pɩyɛɛre, la a Zeezi sẽn kibl-a wã naf-a lame. D sã n sɩd yaa maan-neer soaba, wakat ninga d segd n togsa d taabã sɩd n da zoe b nif ye. Y sã n wa maand woto bɩ y rɩk a Zeezi togs-n-taare, tɩ y sẽn na n yeel bũmb ningã tik Wẽnnaam Gomdã zugu. w22.03 11 s. 12-13

D sẽn pẽgd a Zeova wã, naaga bũmb nins d sẽn maand n tũud-a wã. (Yɩɩn. 34:2) D pẽgda a Zeova, d sã n wa gomd a tʋʋmã la a zʋg-sõma wã yelle. D sũur sã n noom ne a Zeova la d na n tõog n yã bõn-sõma toor-toor a sẽn maande, n pẽg-a. D sã n bao sẽk n bʋgs bõn-sõma nins fãa a Zeova sẽn maan n kõ-dã zugu, d na n yãa bʋʋm sẽn sek d na pẽg-a. Sẽn yɩɩd fãa, d sã n wa moond koɛɛgã, yaa segb d sẽn paam n na n “kõt Wẽnnaam pẽgr maoong wakat fãa, rat n yeel tɩ kaset d sẽn kõt bãmb yʋʋrã yĩng ne d no-bɩmsã.” (Ebre. 13:15) Nand tɩ d pʋʋs a Zeova, d rengd n tagsa bũmb nins d sẽn na n yell-a wã yelle. Woto me, nand tɩ d yi koɛɛgã moonego, yɩta sõma tɩ d reng n tags bũmb ning yell d sẽn na n gom ne nebã. D ratame n maan d sẽn tõe fãa tɩ d “pẽgr maoongã” yɩ sõma wʋsgo. Rẽ n so tɩ d moond koɛɛgã ne yẽesem. w22.03 21 s. a 8