Zĩ-likri

D sẽn tẽed bũmb ninsã la d sẽn zãmsd nebã bũmb ninsã fãa tika Wẽnnaam Gomdã zugu. Baa ne rẽ, neb wʋsg pa sakd n kelgd tõndo, b sẽn get tɩ d sẽn tũud Wẽnnaam to-to wã pa naag ne yel-maandɩ wʋsgã yĩnga. Sẽn paase, d sẽn zãmsd nebã bũmb ninsã pa zems ne bãmb sẽn dat n wʋmã ye. Bõe la d tõe n maan n da wa bas n pa le tẽed a Zeezi? Tẽn-tʋmd a Poll ra yeela Rom kiris-nebã tɩ “bũmb ning ned sẽn wʋmã n wat ne tẽebo, la bũmb ning ned sẽn wʋmã tũuda ne koɛɛg ning sẽn gomd Kirist yellã.” (Rom. 10:17) Dẽnd yaa d sã n zãmsd Gʋls-sõamyã la d tẽebã paamd pãnga, la pa d sẽn na n kẽesd d meng tũudum yel-maandɩ sẽn pa zems ne Biiblã sẽn yetã pʋgẽ, baa yel-maandɩ-kãens sã n noomame la tar yamleoogo. D segd n modgame n tall tẽeb sẽn tar pãnga, sẽn tik bãngr hakɩɩk zugu, bala “tẽeb sã n kae, ned pa tõe n ta Wẽnnaam yam ye.” (Ebre. 11:1, 6) Rẽ wã, d pa baood n yã yel-solemd sẽn yit saasẽ, n yaool n sak n deeg tɩ d bãnga sɩdã ye. D sã n maag d yĩng n zãms Biiblã sẽn yet bũmb ninsã sẽn paasd tẽeb pãngã, rẽ seka na sõng-d tɩ d bãng tɩ d bee sɩdã pʋgẽ, n pa le maand sãmbs ye. w21.05 4-5 s. 11-12

Tẽn-tʋmd a Poll maoo ne zu-loees wʋsgo. Sẽn yɩɩd fãa, a ra rata a Zeova sõngre, b sẽn wa n pãb-a, n lob-a kug la b kẽes-a bãens roogã. (2 Kor. 11:23-25) A Poll mengã sak n deegame tɩ wakat ninga a ra segd n maoo ne tags-kɛga. (Rom. 7:18, 19, 24) A ra maooda ne bãag sẽn yaa wa “gõaag yĩngã pʋgẽ,” n da rat ne a sũur fãa tɩ Wẽnnaam kɩt tɩ sa. (2 Kor. 12:7, 8) A Zeova kõo a Poll pãng t’a kell n moon koɛɛgã, baa ne zu-loees nins fãa a sẽn da maood ne wã. Tags-y n ges-y a Poll sẽn tõog n tʋm tʋʋm ninsã. B sẽn wa n kẽes-a roog Rom tɩ sodaag gũud-a t’a pa tõe n yi wã, a kell n taasa neb wʋsg koe-noogã ne yẽesem, baa goosneemã nebã. (Tʋʋ. 28:17; Fili. 4:21, 22) Sẽn paase, a taasa rĩmã gũudb wʋsg koɛɛgã, la neb nins fãa sẽn da wat n get-a wã. (Tʋʋ. 28:30, 31; Fili. 1:13) Wakat kãng me, Wẽnnaam vẽnega a Poll t’a gʋls lɛta a yiib sẽn ket n nafd kiris-neb hakɩɩkã hal ne rũndã. w21.05 21 s. a 4-5

Wuk-m-mengã kɩtame tɩ rĩm a Ozɩyas pa sak n kelg neb a taab saglse, la a maan bũmb a sẽn da pa tar sor n na n maane. A Ozɩyas yɩɩ ned sẽn da tʋm tʋʋm sẽn nafde. A tõoga zab wʋsgo, a mee tẽns wʋsgo, la a ra tar pʋt wʋsg me. A Zeova “rag n sõngd-a lame.” (2 Kib. 26:3-7, 10) Biiblã yeelame: “La yẽnda sẽn wa n mik t’a pãngã lebga wʋsgã, yẽnda wuka a meng tɩ wa ne a sãoongo.” A Zeova ra pĩnd n yeelame tɩ yaa maan-kʋʋdbã bal n tar sor n na n yõog wisd wẽnd-doogã pʋgẽ. La rĩm a Ozɩyas wuka a meng n kẽng wẽnd-doogẽ wã n tɩ yõog wisdu. A Zeova sũur pa yɩ noogo, t’a lob ra-kãngã sẽn yaa wuk-m-meng soabã wãoodo. (2 Kib. 26:16-21) Wuk-m-mengã tõe n wa kɩtame tɩ tõnd me lʋɩ bẽdg ning a Ozɩyas sẽn lʋɩ wã pʋgẽ bɩN-ye, toeeme, tõnd sã n tags tõnd meng yell wʋsgo. N-ye tõeeme, d sã n tagsd d mengã yell tɩ loog noore. Bɩ d tẽeg tɩ minim ning fãa d sẽn tare, la tʋʋmd ning fãa d sẽn paam tigingã pʋgẽ yaa a Zeova n kõte. (1 Kor. 4:7) D sã n yaa wuk-m-meng soaba, d pa tar yõod a Zeova nifẽ ye. w21.06 16 s. a 7-8

A Zeezi ra miime tɩ pa wakat fãa la a karen-biisã na n paam tɩ b koe-moonegã wom biis woto ye. Neb ka tɛkã a Zeezi karen-biisã sẽn moonã, d pa mi b sʋkã neb nins sẽn wa n sak n lebg kiris-nebã sõor ye. Karen-biisã ra segd n bãngame tɩ pa nebã sẽn na n kelgd-b yĩng bal la b segd n maan sũ-noog ye. B pʋd n segd n maana sũ-noog n yɩɩda, b sẽn mi t’a Zeova sũur nooma ne b sẽn tʋmd wʋsgã. D sã n maand d sẽn tõe fãa n moond koe-noogã la d zãmsd nebã Biiblã, wilgdame tɩ d ‘bʋta vʋʋsem sõngã yĩnga.’ Woto rat n yeelame tɩ d basdame tɩ Wẽnnaam vʋʋsem sõngã sõngd tõnd d vɩɩmã pʋgẽ. A Zeova wilgame tɩ d sã n pa “koms raood n base,” d na n wa paama vɩɩm sẽn kõn sa, d tõog n sõnga ned t’a wa lebg a Zeezi karen-biiga, n dɩk a meng n kõ Wẽnnaam, tɩ d pa tõog me.—Gal. 6:7-9. w21.10 26 s. a 8-9

Daar a ye, a Zeezi ne a karen-biisã ra yɛɛ wʋsgo, b sẽn da gilg n moon koɛɛgã yĩnga. B ra baooda zĩig n na n vʋʋse, la neb kʋʋng n wa b nengẽ. Kʋʋngã nimbãaneg yõka a Zeezi, la a “sɩngame n zãmsd-b bũmb wʋsgo.” Bala a ninga a meng kʋʋngã zĩigẽ. A ra neeme tɩ b namsda wʋsgo, la b rat tɩ b sõng-b tɩ b bãng tɩ manegr n wate. Rẽ kɩtame t’a Zeezi ra rat n sõng-ba. Yaa woto me rũndã-rũndã, baa sã n wõnda nebã tara sũ-noog b vɩɩmã pʋgẽ. B wõnda wa piis sẽn meneme, n pa tar pe-kɩɩm sẽn na n ges b yell ye. Tʋm-tʋmd a Poll bilgame tɩ neb a woto pa mi Wẽnnaam, la b pa mi tɩ manegr n wat me ye. (Efɛ. 2:12) D sã n tags tõnd moonegã zĩigẽ nebã sẽn pa mi Wẽnnaamã yelle, nonglem la nimbãan-zoeerã kɩtdame tɩ d rat n sõng-ba. La bũmb d sẽn tõe n maan tɩ sõng-b n yɩɩda, yaa d sẽn na n bao n zãms-b Biiblã. w21.07 5 s. a 8

Rat-m-ye soab yaa wuk-m-meng soaba. Sũ-ki-ned pa baood bũmb nins a taabã sẽn tarã bal ye. A pʋd n datame n deeg b sẽn tarã n sooge. Vẽenega, ned sã n maand sũ-kiir ne neda, a kisa a soabã. Rat-m-yembrã la sũ-kiirã yaa zʋg-wẽns d sẽn tõe n dɩk n mak ne esãens-rẽgd b sẽn na n sui sɩlg pʋgẽ. Sɩlgã na n wa lʋɩ n pusgame. Woto me, ned tõeeme n sɩng n tũud a Zeova, la a sã n yaa wuk-m-meng soab la sũ-ki-neda, a na n wa lʋɩɩme. (Yel. 16:18) A wat n basa a Zeova tũubu, n wã a meng la a wã neb a taaba. D sã n tũ saglg ning tʋm-tʋmd a Poll sẽn kõ wã, na n sõng-d lame tɩ d ra yɩ rat-m-ye rãmb ye. A yeelame: “Da maan-y baa fʋɩ ne no-baoodem wall ne wilg-m-meng ye. La bɩ y ned kam fãa sik a menga, n tagsdẽ t’a taabã yɩɩda yẽ.”—Fili. 2:3. w21.07 15-16 s. a 6-8

Neb kẽer tagsdame tɩ tũudum hakɩɩkã neb segd n tõe n leoka sogsg buudã fãa, baa sogsg nins Biiblã sẽn pa leokdã. Rẽ yĩnga, nebã sẽn tagsd woto wã zemsame bɩ? D ges tẽn-tʋmd a Poll sẽn yeel bũmb ninga. A yeela a tẽed-n-taasã tɩ b ‘mak bũmb fãa n gese.’ La a yeel-b lame me tɩ bũmb wʋsg võor la a ra pa wʋmde. (1 Tes. 5:21) A yeelame: “Tõnd tara bãngr sẽn pa pid zãnga.” La a paas yaa: “Bala yaa ne nen-gɛtg maasem la tõnd get rũndã-rũndã n ne pulum-pulmi.” (1 Kor. 13:9, 12) Dẽnd pa bũmb fãa võor la a Poll ra wʋmd ye. Yaa woto me ne tõndo. A ra mii bũmb nins sẽn yaa tɩlɛ ne ned fãa t’a bãng Wẽnnaam zugã. A sẽn da mi bũmb ninsã ra seka a na kɩs sɩd t’a sẽn tẽed bũmb ninsã yaa sɩda. Bũmb a ye d sẽn tõe n maan n maneg n kɩs sɩd tɩ d bee tũudum hakɩɩkã pʋgẽ, yaa d sẽn na n ges a Zeezi sẽn wilg tũudum hakɩɩkã sẽn segd n yɩ to-to wã, n dɩk rẽ n mak ne a Zeova Kaset rãmbã sẽn maand to-to rũndã-rũndã wã. w21.10 18-19 s. a 2-4

Sẽn kʋʋl-bã, bãng-y tɩ y kẽesa y sẽkã fãa a Zeova tʋʋmdã pʋgẽ, tɩ y pa maan woto me, bũmb wʋsg n be y sẽn tõe n maan n sõng neb a taabã. Wãn to? Maan-y sũ-noog ne y yɛlã sẽn yaa to-to masã wã, n baood bũmb a taab y sẽn dat n wa maane, la y tagsd bũmb nins y sẽn tõe n maanã yelle, n yɩɩd y sẽn pa tõe n maanã. Rĩm a Davɩɩd ra rata ne a sũur fãa n me roog a Zeova yĩnga. La a Zeova sẽn wa n yeel a Davɩɩd tɩ yaa a biig a Salomo n na n me roogã, a saka a Zeova sẽn yeelã n teel tʋʋmdã ne a sũur fãa. (1 Kib. 17:4; 22:5) A Davɩɩd pa tags tɩ yaa yẽ bal n zems ne tʋʋmdã, a sẽn da get t’a Salomo yaa ‘bi-bilfu, n nan pa mi bũmbã’ yĩng ye. (1 Kib. 29:1) A Davɩɩd ra miime tɩ yaa a Zeova sã n ning tʋʋmdã bark la na n tõoge, la pa be ne neb nins sẽn lʋɩt tʋʋmdã taoorã minim la b yʋʋm ye. Wa a Davɩɩde, d tẽed-n-taas nins sẽn kʋʋlã ket n wɩngda ne a Zeova tũubu, baa ne b tʋʋmã sẽn mi n toeemã. B kɩsa sɩd t’a Zeova na n ninga kom-bɩɩs nins sẽn tʋmd tʋʋm nins bãmb sẽn da tʋmd pĩndã barka. w21.09 9 s. a 4; 10 s. a 5, 8

D sã n yãk bũmb n na n maan a Zeova tũudmã pʋgẽ, d vɩɩmã tallda barka. La d sẽn yãk yam n na n maan bũmb ningã segd n zemsa ne tõnd mengã minimã la d yɛlã sẽn yaa to-to wã, la pa ne neb a taabã rẽnd ye. Sã n pa rẽ, d sũur na n sãamame, tɩ d koms raoodo. (Luk 14:28) Yãmb sẽn tũud a Zeova wã, y yaa toor fasɩ ne a zakã neb a taabã sẽn yaa toor-toor me wã, la y tara yõod wʋsg a nifẽ. A Zeova sẽn tak yãmb n wa a nengẽ wã, pa a sẽn get tɩ y sãoo y taabã yĩng ye. Yaa a sẽn fees y sũurã n yã tɩ y yaa sik-m-meng soaba, ned sẽn na n sak a zãmsgã la a sak n toeemã. Bãng-y tɩ y sã n maand y sẽn tõe fãa n na n kell n tũ-a, a sũur nooma wʋsg ne rẽ. Yãmb sẽn tõogd toog la y ket n sakd a Zeova wã wilgdame tɩ y tara “sũur sẽn yaa sõma wʋsgo.” (Luk 8:15) Bɩ y ket n maand yãmb sẽn tõe fãa a Zeova tũudmã pʋgẽ. Woto, y na n tõog n maana sũ-noog ‘y meng yĩng bala.’—Gal. 6:4. w21.07 24 s. 15; 25 s. 20

B sã n wa maand tõnd kɛgre, naoor wʋsgo yaa tɩlɛ tɩ d tall sũ-mare, n kell n gũ tɩ yellã wa welge. Wala makre, Kãsem-dãmbã sã n wa bãng tɩ ned n maan yel-wẽn-kãseng tigingã pʋgẽ, b pʋʋsda a Zeova n kos-a “yam ning sẽn yit yĩngrã,” sẽn na n yɩl n tõog n bãng yellã vɩʋʋg sõma wa yẽnda. (Zak 3:17) B raabã yaa b sõng yel-wẽn-maandã t’a bas “sor ning a sẽn da tudg n dɩkã,” sã n mik tɩ b tõeeme. (Zak 5:19, 20) Sẽn paase, b ratame n maan b sẽn tõe fãa n kogl tigingã, la b bels neb nins sũy sẽn sãam yellã yĩngã. (2 Kor. 1:3, 4) La ned sã n wa maan yel-wẽn-kãseng tɩ kãsem-dãmbã segd n kao bʋʋdo, b segd n deng n bao n bãnga yellã vɩʋʋgo, la woto tõe n dɩka sẽka. Rẽ poore, b na n pʋʋsame, la b maag b yĩng n tik Biiblã saglsã n kibl a soabã tɩ pa “loog noor ye.” (Zer. 30:11, MN) La kãsem-dãmbã pa yɩt yãg-yãg n kao bʋʋd ye. Kãsem-dãmbã sã n welgd yɛlã tɩ zemsd ne a Zeova noyã, yaa tigingã neb fãa nafr yĩnga. w21.08 11 s. 12-13

A Boaaz ra kĩi ne a Naomi sɩdã. Kom n wa n zĩnd Israyɛlle, t’a Naomi ne a sɩdã n paas b kom-dibli a yiibã yik n tɩ zĩnd Moaab. B sẽn wa n be be wã, a Naomi sɩdã maana kaalem. A kom-dibli a yiibã kẽe kãadem, la zu-bʋko, bãmb me wa n maana kaalem. (Rut 1:3-5) Yel-be-kãngã sãama a Naomi sũurã hal wʋsgo. A komsa raood wʋsgo, tɩ rẽ kɩt t’a ra tagsdẽ tɩ yaa a Zeova n namsd-a. Ges-y a sẽn yeel bũmb ning a sũ-sãangã wɛɛngẽ. A yeelame: ‘Zu-soabã nug zɩsga mam zugu.’ “Zu-soabã monga maam bʋʋm, Pãng-Soab a Wẽnd sɩbga maam.” (Rut 1:13, 20, 21) A Zeova miime tɩ “weoogr tõe n kɩtame tɩ yam soab tʋm wa gãeenga.” (Koɛ. 7:7, MN) A kɩtame t’a Rut nong a Naomi ne nonglem-kãsenga. A Rut maaga a yĩng n sõng a sɩdã ma ne bʋgsem t’a sũ-sãangã booge, la a bãng t’a Zeova ket n nong-a lame. w21.11 9 s. a 9; 10 s. 10, 13

D sã n zoe n maanda d sẽn tõe fãa a Zeova tũudmã pʋgẽ, rat n yeelame tɩ d pa segd n le maan modgr n paas bɩ? A bada. D tõe n yãka yam n modg n wa lebg koe-moond wall karen-saamb sẽn tar minim, la d sõngd d tẽed-n-taasã. D na n wa tõog n maana woto, d sã n tall yam, n sikd d mens n sõngd d taabã, la d pa lʋɩɩsd d mensã raab taoor ye. (Yel. 11:2; Tʋʋ. 20:35) Bõe la y tõe n yãk yam n maan a Zeova tũudmã pʋgẽ? Kos-y-yã a Zeova t’a sõng-y tɩ y bãng y sẽn tõe n maan tɩ zems ne y pãngã. (Yel. 16:3) Y tõe n modgame n lebg sõngr so-pakd wall wakat fãa so-pakda, n tɩ tʋmd Betɛllẽ wã, bɩ n tɩ naag sull sẽn gilgd n met siglgã roto. Y tõeeme me n zãms buud-gomd a to sẽn na yɩl n moon koɛɛgã n paase, wall n yik n tɩ moon tẽng a to. w21.08 23 s. 14-15

Nonglem sẽn yaa kãseng tara yõod wʋsg a Zeova nifẽ. (Ooze 6:6) Ne no-rɛɛs a Miise maasem, Wẽnnaam yeela tõnd tɩ d “nong maan-neere,” sẽn dat n yeel me tɩ d nong d taabã ne nonglem sẽn yaa kãsenga. (Mii. 6:8) La nand tɩ d tõog n maan rẽ, d segd n deng n bao n bãnga nonglem sẽn yaa kãseng sẽn dat n yɛɛlga. Ned sã n nong a to ne nonglem sẽn yaa kãsenga, rat n yeelame t’a nong-a-la hal wʋsgo, n na n kell n nong-a wakat fãa n pa tol n daag-a n bas ye. B nong n tũnugda ne gom-bi-kãng n gomd Wẽnnaam sẽn nong ninsaalbã to-to wã yelle. Ninsaalbã me tõe n nonga b taabã woto. Nonglem sẽn yaa kãsengã wɛɛngẽ, a Zeova n yaa mak-sõng sẽn ka to. Yaa rẽ n so tɩ rĩm a Davɩɩd gom a Zeova yell n yeel yaa: “Yãmb nonglmã bee hal saasẽ, . . . yãmb nonglmã tara yõod wʋsgo.” (Yɩɩn. 36:6, 8) Wala a Davɩɩde, tõnd me sũur nooma wʋsg a Zeova sẽn yaa nonglem-kãseng soabã yĩng bɩ? w21.11 2 s. a 1-2; 3 s. a 4

A Zeezi sẽn yaa “bõn-naandsã fãa pipi soabã,” n paas malɛgs tus ka tɛkã naaga a Zeova zakã neba. (Kol. 1:15; Yɩɩn. 103:20) A Zeezi sẽn wa n be tẽngã zugã, a wilgame tɩ wẽn-sakdbã tõe n boola a Zeova tɩ b Ba. Daar a ye, a Zeezi ra wa n gomda a Zeova yell ne a karen-biisã, n yeel tɩ “m Ba sẽn yaa yãmb me Ba wã.” (Zã 20:17) D sã n wa rɩk d meng n kõ a Zeova n deeg lisgu, d naaga d tẽed-n-taasã n yaa wa zak a ye neba, n nong taaba. (Mark 10:29, 30) A Zeova yaa Ba sẽn nong a kamba. A Zeezi ratame tɩ d ges a Zeova wa yẽ me sẽn get-a to-to wã, rat n yeel tɩ wa Ba sẽn nong a kamba, t’a pẽnegr me yaa nana, la pa wa ned sẽn yaa dem-deme, tɩ yaa yẽ sẽn yeel bal n be ye. A wa n wilgd a karen-biisã b sẽn segd n pʋʋs to-to wã, a sɩnga pʋʋsgã n yeel yaa: “Tõnd Ba.” A ra tõe n yeelame tɩ d bool a Zeova tɩ “Sẽn-Tõe-Fãa wã,” ‘Naandã,’ bɩ “wakat sẽn ka sɛt Rĩmã.” (Sɩng. 49:25; Eza. 40:28; 1 Tɩm. 1:17) Woto fãa yaa naam yʋy sẽn zemse, la sẽn be Biiblã pʋgẽ. Baa ne rẽ, a Zeezi yeela tõnd tɩ d bool a Zeova tɩ d “Ba.” w21.09 20 s. a 1, 3

Rĩm a Manase me zãgsame t’a kõn kelg a Zeova sẽn tũnug ne a no-rɛɛsdbã n keoog-a wã ye. La a Zeova “kɩtame tɩ Asiiri tẽngã tãb-biis nanambsã wa zab ne bãmb n yõk a Manase, n gaag a lemdã ne leoose, n balg-a ne bãens n tall-a n kẽng Babilonde.” A Manase sẽn wa n be bãensã roogẽ Babilonnã, a maaga a yĩng n tags tʋʋm-wẽns nins a sẽn tʋmã zug neere. ‘A sika a mengã wʋsg a ba rãmbã Wẽnnaam taoore.’ A pʋd n maana sẽn yɩɩd rẽ. A ‘baoome n na n sigs a Zeova sẽn yaa yẽnda Wẽnnaamã sũuri.’ (2 Kib. 33:10-12) A Zeova wa n leoka a Manase pʋʋsgã. A yãame t’a sɩd toeemame, wã a pʋʋsgã sẽn da wilgdã. A Zeova sak n kelga a Manase, n kõ-a sugri, la a kɩt t’a le lebg rĩma. A Manase maana a sẽn tõe fãa, n wilg t’a sɩd teka yam n kos sugri. w21.10 4 s. 10-11

Ra lebga tɩlɛ t’a Akila ne a pag a Pirsill loog n bas zĩ-kãng b sẽn da mi sõma wã, n tɩ bao zak a to, la b le bao zĩig a to n sɩng b fu-rotã sẽeb sẽn da yaa b nug-tʋʋmdã. A Akila ne a Pirsill sẽn wa n be Korẽntã, b sɩnga tigingã neb sõngre, la b naag tẽn-tʋmd a Poll n keng b tẽed-n-taasã sẽn be be wã raoodo. B wa n yikame n kẽng tẽns koe-moondb raab sẽn yaa kãsenga. (Tʋʋ. 18:18-21; Rom. 16:3-5) B vɩɩmã tog n da tara barka, la noom-b wʋsgo. Rũndã-rũndã, sẽn kẽ-b kãadmã tõe n dɩka a Akila ne a Pirsill togs-n-taare, n lʋɩɩs Rĩungã tʋʋmã taoor b vɩɩmã pʋgẽ. Neb a yiib sã n wa baood taab n na n kẽ kãadem, yaa wakat-kãng la b segd n gom bũmb nins b sẽn magd n na n wa maan a Zeova tʋʋmdã pʋgẽ wã yelle. Pag ne a sɩd sã n naag taab n yãk b sẽn na n maan bũmb ning a Zeova tʋʋmdã pʋgẽ, b na n yãa a Zeova vʋʋsem sõngã sẽn sõngd-b to-to b vɩɩmã pʋgẽ.—Koɛ. 4:12. w21.11 17 s. 11-12

Tara yõod wʋsg tɩ d sak n tũ Wẽnnaam sẽn kõ noor tɩ d waoog d roagdbã. Tẽeg-y tɩ nand tɩ b yeel Maan-kʋʋr 19:3 pʋgẽ tɩ waoog f ba la f ma wã, b reng n yeelame yaa: “Yãmb segd n yɩɩ sõamyã, bala maam a Zeova sẽn yaa yãmb Wẽnnaamã yaa sõngo.” (Maan. 19:2) D sã n tags a Zeova sẽn kõ noor tɩ d waoog d ba la d ma wã yelle, d tõe n soka d meng yaa: ‘Rẽ yĩnga mam sɩd waoogda m roagdbã bɩ?’ Sã n mikame tɩ y pa waoogd-b wa sẽn segde, y tõe n yãka yam n maneg n waoogd-b sõma. Y pa tõe n toeem sẽn loogã ye. La y tõe n yãka yam masã menga, n na n nong n be ne-ba, la y sõngd-ba. Wala makre, y tõe n sõng-b lame tɩ b paam teed kẽer sẽn yaa tɩlɛ ne-ba, bɩ n sõng-b tɩ b ket n wɩngd ne a Zeova tũubu, wall n belsd-b la y kengd b raood sõma. Woto zemsa ne Maan-kʋʋr 19:3 saglgã. w21.12 4-5 s. 10-12

Rĩm a Davɩɩd maana yel-wẽn-kãsemse. Wala makre, a yoo ne a Batseba, la a kɩt meng tɩ b kʋ a sɩdã. (2 Sãm. 11:2-4, 14, 15, 24) A Davɩɩd sẽn maan yell ningã pa wa ne zu-loees yẽ mengã zug bal ye. Kɩtame t’a zakã rãmb me paam zu-loeese, a pagb a taabã me sẽn naage. (2 Sãm. 12:10, 11) Daar a to me, a Davɩɩd maana bũmb sẽn wilg t’a ra pa teeg a Zeova zãng-zãng ye. A kɩtame tɩ b sõd Israyɛll tãb-biisã, t’a Zeova yaool n da pa kõ-a sor t’a maan rẽ ye. La baasa wãna? Bã-longdg n kʋ Israyɛll neb sõor sẽn ta tus pis-yopoe. (2 Sãm. 24:1-4, 10-15) Yãmb tagsdame tɩ pa segd t’a Zeova kõ-a sugr bɩ? A Zeova yẽ pa tags woto ye. A gesa a Davɩɩd sẽn wilg a vɩɩmã fãa pʋgẽ t’a yaa wẽn-sakdã, la a sẽn sɩd tek yam n kos sugrã. Yaa rẽ n kɩt t’a Zeova kõ a Davɩɩd a yel-wẽn-kãsemsã sugrã. A Zeova ra miime t’a Davɩɩd nong-a-la ne a sũur fãa, n dat n maan sẽn yaa tɩrga. D Wẽnnaamã sẽn get d zʋg-sõma wã n yɩɩdã pa noom yãmb sɩda?—1 Rĩm. 9:4; Kib. 29:10, 17. w21.12 19 s. 11-13

A Zeezi wilgame t’a zoeta neb nins sẽn tar komslmã nimbãanega. Tẽeg-y koɛɛg ning a sẽn da tʋm tɩ b tɩ taas a Zãmbatiisã. A yeelame: “Zoens nin pugsdame masã, põy kẽndame, wãoob lebgda yɩlma, wʋms wʋmdame, kũ-rãmb vʋʋgdame.” Nebã sẽn yã yel-soalmã a Zeezi sẽn maanã, “b pẽga Wẽnnaam.” (Luk 7:20-22) Kiris-nebã rɩkda a Zeezi togs-n-taare, n wilgdẽ tɩ b zoeta sẽn tar-b komslmã nimbãanega. Rẽ n so tɩ d maand-b neere, n nand-ba, la d tar sũ-mar ne-ba. Yaa sɩd t’a Zeova pa kõ tõnd tõog tɩ d tõe n maan yel-soalem ye. La d paamame n tõe n taas neb nins sẽn yaa zoens tẽebã wɛɛngẽ wã bɩ sẽn yaa-b zoens sɩd-sɩdã koe-noogã, n sõng-b tɩ b bãng tɩ arzãnã pʋgẽ, ned pa na n le tar komslem, la tɩ nebã fãa na n tara zood sõma ne Wẽnnaam. (Luk 4:18) Koe-no-kãngã zoe n sõngda neb wʋsg tɩ b pẽgd Wẽnnaam. w21.12 9 s. a 5

A Zak ra tikda Gʋls-sõamyã n zãmsd nebã. A talla Wẽnnaam Gomdã n sõng nebã, tɩ b bãng tɩ wakat fãa a Zeova keooda neb nins sẽn maand sɩd ne yẽ wa a Zoobã. A Zak tũnuga ne gom-biis võor wʋmb sẽn yaa nana, la a wʋg a goamã sõma n zãms nebã. A sẽn maan woto wã kɩtame tɩ yaa a Zeova la nebã ra pẽgda, la pa yẽ mengã ye. Yam ning d sẽn tõe n dɩke: D gomd goam võor wʋmb sẽn yaa nana, tɩ d sẽn yetã me tik Wẽnnaam Gomdã zugu. D sã n wa zãmsd nebã Biiblã, d pa segd n bao n na n wilg-b tɩ d tara minim ye. D segd n sõng-b lame tɩ b bãng t’a Zeova n mi bũmb fãa, la tɩ b yell pak-a lame. (Rom. 11:33) Yaa d sã n tikd d sẽn yet bũmb ninsã Gʋls-sõamyã zug wakat fãa la d na n tõog n sõng nebã tɩ b bãng rẽ. Wall tɩ d togs d Biibl karen-biisã tõnd sẽn da na n maan bũmb ninga, d sã n da be b zĩigẽ, d segd n sõng-b lame tɩ b bʋgs Biiblã kibayã zut neere, n bãng a Zeova tagsg la a raabã sẽn yaa a soabã. Woto na n kɩtame tɩ b sak n tũ b sẽn zãmsd bũmb ningã, b sẽn dat n ta a Zeova yam la pa tõnd yam yĩng ye. w22.01 11 s. a 9-10

Wẽnnaam pa rat bal tɩ d da maand d taabã wẽng ye. Kiris-ned sẽn dat n ta Wẽnnaam yam segd n nonga a to wa a menga. D ges a Zeezi sẽn yeel bũmb ninga, n wilg tɩ noor ning sẽn be Maan-kʋʋr 19:18 wã tara yõod wʋsgo. Daar a ye, fariziẽ n sok a Zeezi yaa: “Tõogã noyã sʋka, bʋg n yaa kãseng n yɩɩda?” A Zeezi leok-a lame tɩ “noor ning sẽn yaa kãseng n yɩɩdã, la pipi soabã” yaa tɩ f tog n nonga a Zeova ne f sũurã fãa, ne f sɩɩgã fãa, la ne f yamã fãa. Rẽ poore, a Zeezi tika Maan-kʋʋr 19:18 wã zug n yeel yaa: “Yiib-n-soabã wõnda yẽnda. A yetame: ‘Fo tog n nonga f to wa f menga.’ ” (Mat. 22:35-40) Bũmb ka tɛk la d tõe n maan n wilg tɩ d nonga d taabã. Bũmb a ye, yaa d sẽn na n tũ saglg ning sẽn be Maan-kʋʋr 19:18 pʋgẽ wã. B yeta be yaa: “Ra rok f sũur ye, la f ra tall sũur ne f tẽngã ned ye.” w21.12 10-11 s. 11-13

A Zeezi tẽega a nug n gãd tẽn-tʋmd Pɩyɛɛr n fãag-a. Tẽeg-y t’a Pɩyɛɛr ra tõogame n kẽnd koomã zugu, a sẽn wa n ket n get a Zeezi wã. La a sẽn ges sobgã, rabeem yõk-a lame, t’a sɩng bõrbo. (Mat. 14:24-31) D tõe n dɩka yam a Pɩyɛɛr kibarã pʋgẽ. A sẽn yi koom-koglgã pʋgẽ n sɩng koomã zug kẽnã, a ra pa tagsd tɩ rabeem na n yõk-a lame hal t’a sɩng bõrb ye. A raab ra yaa a kell n kẽn koomã zug n ta a Zu-soabã nengẽ. A ra segd n ket n geta a Zeezi n tõog n kẽn n ta a nengẽ, la a bas n gesa sobgã tɩ rabeem yõk-a. Rũndã-rũndã, tõnd me segd n talla tẽebo, n tõog n mao ne d zu-loeesã, wa a Pɩyɛɛr me sẽn da segd n tall tẽeb n tõog n kẽn koomã zugã. D sã n pa kell n teeg a Zeova la a pʋlemsã, d tẽebã pãng tõe n boogame, tɩ yaa wa d sẽn bõr d zu-loeesã pʋgẽ. Dẽnd baa d sã n tar zu-loees sẽn wõnd sob-kãsemse, d segd n kell n teega a Zeova la d kɩs sɩd t’a tõe n sõng-d lame. Wãn to la d tõe n maan rẽ? w21.12 17-18 s. a 6-7

Pʋʋsgã, Biiblã zãmsgã, la bʋgsgã naaga d tũudmã yɛl pʋgẽ. D sã n wa pʋʋsdẽ, d gomda ne d saasẽ Ba wã sẽn nong-​d wʋsgã. D sã n wa zãmsd Biiblã, yaa d sẽn dat n paam n “bãng Wẽnnaam” sẽn yaa yam-​kãseng soabã yĩnga. (Yel. 2:​1-​5) D sã n bʋgsd d sẽn zãms bũmb ningã zugu, d tagsda a Zeova zʋg-​sõma wã yelle, la d tẽegd bõn-​kãsems nins a sẽn na n maan tõnd yĩnga, la ãdem-​biisã fãa me yĩngã yelle. Pa d sã n dɩkd d sẽkã n maand woto la na n naf-​d n yɩɩd sɩda? D tʋʋmã sẽn waoogã, d maanda wãn n paam sẽk n maand bõn-​kãensã sẽn tar yõod n yɩɩdã? Sã n tõe bɩ y bao zĩig bʋʋr sẽn ka be. Yaa woto la a Zeezi maan-​yã. Nand t’a sɩng a koe-​moonegã, a maana rasem 40 weoogẽ wã. (Luk 4:​1, 2) Bʋʋr sẽn ka be beenẽ wã yĩnga, a tõog n pʋʋsa a Ba a Zeova la a bʋgs a sẽn da rat t’a maan bũmb ningã zugu. A Zeezi sẽn maan woto wã, yaa vẽeneg tɩ sõng-​a lame t’a wa tõog n yals kãn-​kãe, namsg nins a sẽn paamã taoore. w22.01 27-28 s. a 7-8

Kãsem-soab wall kiris-ned a to tẽeb sẽn bɩ tõe n sagl-d lame, bũmb d sẽn segd n dems wɛɛngẽ. Ned sã n wa tik Biiblã n na n sagl-do, a sẽn nong-d yĩnga, d segd n maaga d yĩng n kelg-a la d modg n tũ a saglgã. Togs sɩdã, ned sã n wa sagl-d vẽeneg-vẽenega, tõe n yɩɩ toog tɩ d sak n tũ. Tõe n yika d sũur menga. Bõe yĩnga? Bala d sẽn mi vẽeneg tɩ d pa zems zãngã, tõe n yɩɩ toog tɩ d sak tɩ ned sagl-do, bũmb d sẽn maan tɩ pa zems yĩnga. (Koɛ. 7:9) D tõe n dat n baoo pademse. D tõe n tagsame t’a sẽn sagl tõndã pa ne yam-sõngo, wall d getẽ t’a sẽn sagl-d to-to wã pa zems ye. D tõeeme meng n tik bũmb a sẽn maan tɩ pa sõma zugu, n yetẽ yaa: ‘A pa tar sor n na n wa sagl maam ye. Yẽ me tudgdame wɛ!’ Baasg zãnga, saglgã sã n pa noom-do, tõe tɩ d na n zãgsame, wall d tɩ bao sagls ned a to nengẽ, d sẽn saagd yẽ soab na n togs-d-la bũmb ning d sẽn dat n wʋmã yĩnga. w22.02 8-9 s. a 2-4

Vɩɩmã sẽn na n yɩ to-to dũni-paalgã pʋgẽ wã tõe n wa kɩtame tɩ yɩ toog tɩ d kell n kɩs sɩd t’a Zeova sẽn maand fãa yaa tɩrg bɩ? Wala makre, tẽeg-y bũmb ning sẽn maane, Israyɛll nebã sẽn wa n yi yembd Ezɩptã poor bilfã. B neb kẽer sɩnga yẽgengo, n le rat rɩɩb ning b sẽn da paamd Ezɩptã. B pʋd n sãbsa mannã a Zeova sẽn da kõt-bã. To-kãsengã saab poore, tõnd me tõe n wa tara manesem a woto bɩ? D pa mi tʋʋm nins fãa d sẽn na n tʋm n yɩlg tẽngã, la d maneg-a bilf-bilf t’a wa lebg arzãnã ye. Wõnda d na n tʋma tʋʋm wʋsgo. Tõe meng tɩ sɩngrẽ wã, vɩɩmã pa na n yɩ nana ne-d ye. La rẽ yĩnga, d na n saag n yẽgma bũmb nins a Zeova sẽn na n kõ-d wakat-kãnga yĩng bɩ? D sũur sã n zoe n noom ne bũmb nins a Zeova sẽn maand n kõt-d masã wã, d sũur na n maneg n yɩɩ noog ne bũmb nins a sẽn na n wa maan n kõ-dã. w22.02 7 s. 18-19

B sẽn yeel Zakari 8:23 bãngr-gomdã pʋgẽ tɩ “Zʋɩf” la “yãmbã” bilgda sull a ye neba. Yaa sẽn paam-b vʋʋsem sõngã zaeeb n ket tẽngã zugã. (Rom. 2:28, 29) “Neb sẽn gomd goam buud toor-toor pʋgẽ neb piigã” makda piis a taabã. B sẽn yeel tɩ b “na n gãda Zʋɩf a yembr fãa fuug noorã” wilgdame tɩ b na n kell n naaga sẽn paam-b zaeeb n ket tẽngã zugã ne b sũy fãa, tũudum hakɩɩkã pʋgẽ. Rẽ n so tɩ piis a taabã naagd sẽn paam-b zaeebã n maand Tẽegrã, tɩ wilgd tɩ b nong-b lame la b teend-b ne b sũy fãa. Sẽn paam-b zaeebã ne piis a taabã naagda taab n tʋmd ne yam a yembre, tɩ wilgdẽ t’a Zeova pidsda bãngr-gomd ning sẽn be Ezekɩyɛll 37:15-19, 24, 25 pʋgẽ wã. B goma raad a yiib yelle. “Zʋʋda” (buud ning pʋgẽ b sẽn da yãkd Israyɛll rĩm-dãmbã) raoogã makda sẽn saagd-b n na n tɩ vɩɩmd saasẽ wã, tɩ “Efrayim” raoogã makd sẽn saagd-b n na n wa vɩɩmd wakat sẽn kõn sa tẽngã zugã. A Zeova wilgame t’a na n lagma sul a yiibã taaba, tɩ b lebg “raoog a yembre.” Woto wilgdame tɩ b na n naaga taab yam a yembre, n tũud a Zeezi Kirist sẽn yaa b Rĩmã.—Zã 10:16. w22.01 22 s. a 9-10

A Zeezi goma neb sẽn kõt naong rãmb kũun yelle, la b maand b sẽn tõe fãa sẽn na yɩl tɩ nebã bãnge, la b pẽg-ba. Baa b sẽn da maand bũmb ningã sẽn yaa sõma wã, a Zeova sũur da pa noom ne-b ye. (Mat. 6:1-4) D tõe n yeelame tɩ d sɩd yaa nin-sõngo, d sã n maand sẽn yaa neer ne yam-sõngo. D tõe n soka d meng yaa: ‘Mam mii sẽn yaa sõma wã, la m sɩd modgd n maand rẽ bɩ? M maanda m taabã neer ne yam-sõng bɩ?’ Bala a Zeova yaa Wẽnnaam sẽn tʋmde, t’a vʋʋsem sõngã me yaa pãn-kãsenga. (Sɩng. 1:2) Dẽnd d segd n basame tɩ vʋʋsem sõngã bil fãa sõng-do, la a sɩd tõe n sõng-d lame. Wala makre, karen-biig a Zak yeelame tɩ “tẽeb me sã n pa lagem ne tʋʋma, a yaa kɩɩnga.” (Zak 2:26) Yaa woto me ne vʋʋsem sõngã biis a taabã fãa. D sã n bɩɩsd b fãa, wilgdame tɩ Wẽnnaam vʋʋsem sõngã sɩd sõngd-d lame. w22.03 11-12 s. 14-16

Tõe tɩ d wɩngda ne a Zeova tũubu, la d maand d taabã neere. La tẽn-tʋmd a Pɩyɛɛr sagla kiris-nebã tɩ b maan bũmb a to me sẽn tar yõod wʋsgo. Nand t’a Pɩyɛɛr sagl-d tɩ d lebg sõamyã d yel-manesem fãa pʋgẽ wã, a yeelame: “Bɩ y segl y mens sẽn na yɩl n tʋm wʋsgo.” (1 Pɩy. 1:13) Yaa bõe tʋʋmd yell la a sẽn gomã? A Pɩyɛɛr yeelame tɩ kiris-neb nins sẽn paam vʋʋsem sõngã zaeebã, segd n moona “Soab ning sẽn bool” bãmbã “sõmblmã zĩig fãa.” (1 Pɩy. 2:9) Rũndã-rũndã, kiris-nebã fãa paamame n tʋmd tʋʋm-kãngã sẽn tar yõod wʋsgã. Bala yaa ne rẽ maasem la d sõngd nebã n tɩ yɩɩda. D sẽn paam n yaa nin-buiid sẽn yaa sõamyã, n moond koɛɛgã ne yẽesem wakat fãa la d zãmsd nebã Biiblã sɩd yaa zu-zẽkr bũmbu. (Mark 13:10) D sã n modgd n maand woto, d wilgdame tɩ d nonga d Wẽnnaamã la d taabã. D wilgdame me tɩ d rat n ‘lebga sõamyã’ d yel-manesem fãa pʋgẽ. w21.12 13 s. 18

Tẽn-tʋmd a Poll kell n talla yam-sõng a tẽed-n-taasã zugu. A ra miime tɩ ned sã n konge, pa rat n yeel t’a soabã yaa nin-wẽng ye. A ra nonga a tẽed-n-taasã, n da get b zʋg-sõma wã n yɩɩda. Sã n da wa yaa toog ne-b tɩ b maan sẽn yaa tɩrga, a pa ningd-b taal ye. A ra getame tɩ b tara yam-sõngo, la tɩ yaa sõngr bal la b rata. Tẽeg-y a Poll manesem sẽn yɩ to-to ne saam-bi-pogs a yiib sẽn da be Filip tigingã pʋgẽ. (Fili. 4:1-3) Yaa a Evodi ne a Sẽntiis. Wõnda b basame tɩ mo-yõs zĩnd b sʋka, tɩ kɩt tɩ b zoodã sãame. A Poll pa yɩ dem-dem ne-ba, bɩ n ning-b taal ye. A gesa b zʋg-sõma wã n tɩ yɩɩda. B ra yaa wẽn-sakdba, n da tũud a Zeova na maan yʋʋm wʋsgo. A Poll ra miime t’a Zeova nong-b lame. A sẽn da tar tagsg sẽn yaa sõma b zugã kɩtame t’a tõog n sõng-b tɩ b welg b mo-yõsã. A Poll sẽn da get nebã zʋg-sõma wã sõng-a lame t’a kell n tall a sũ-noogã, tɩ yẽ ne tigin-kãng nebã zood me ra ket n tar pãnga. w22.03 30 s. 16-18

A Zeova laafɩ wã na n kɩtame tɩ d yam gãande, la kɩt me tɩ d tall tagsg sẽn yaa sõma. Sɩd yɩɩ woto ne saam-bi-poak a ye yʋʋr sẽn boond t’a Luuz. Ad a sẽn yeele: “M mi n getame tɩ m yaa m yembre, tɩ sãamd m sũuri. Rẽ mi n kɩtame tɩ m tagsdẽ t’a Zeova pa nong-m ye. Sã n wa yaa woto, mam pʋʋsda a Zeova zĩig pʋgẽ n togs-a sẽn be m sũurẽ. Pʋʋsgã sõngda maam tɩ m yam gãande.” Wa saam-bi-poakã kibarã sẽn wilgdã, pʋʋsgã tõe n sõng-d lame tɩ d paam sũur pʋgẽ bãane. (Fili. 4:6, 7) D kɩsa sɩd t’a Zeova ne a Zeezi na n sõng-d lame, d ned sã n wa maan kaalem. D segd n moona koɛɛgã, la d zãms nebã Biiblã n wilg tɩ d zoeta b nimbãanega, wa Wẽnnaam a Zeova ne a Zeezi Kirist me sẽn zoet nebã nimbãanegã. Sẽn paase, d paamda belsgo, d sẽn mi t’a Zeova ne a Bi-ribl-nongrã mii d toogã sẽn ta zĩig ning la d pãn-komsmã, la tɩ b rat n sõng-d lame tɩ d tõog toogã. D gũuda wakat ning a Zeova sẽn ‘na n yẽesa nintãm fãa ninsaalbã ninẽ’ wã.—Vẽn. 21:4. w22.01 15 s. a 7; 19 s. 19-20

A Zeezi goma soay a yiib yelle. A yembr yaa ‘yalenga,’ t’a to wã yaa “sẽka.” (Mat. 7:14) Sor a tãab-n-soab kae ye. Yaa ned fãa n yãkd a sẽn na n tũ sor ninga. Rẽ maaneg tara yõod wʋsgo, bala yaa yõor yelle. Neb wʋsg n tũud “so-yalengã,” bala a zug kẽn yaa nana. Bʋko, wʋsg yãka yam n na n kell n pa so-kãng zugu, la b maand so-kãng nebã me sẽn maandã. B pa mi tɩ yaa a Sʋɩtãan n kɩt tɩ neb wʋsg tũud so-kãng ye. A yaool n dabda sãoong zĩigẽ. (1 Kor. 6:9, 10; 1 Zã 5:19) Sor a to wã yaa toor fasɩ ne “so-yalengã.” So-kãng yaa sẽka. La a Zeezi yeelame tɩ neb nins sẽn yãt-a wã sõor paoodame. Bala vɛrse ning sẽn pʋglã pʋgẽ, a Zeezi keooga a karen-biisã tɩ b gũus b mens ne zirẽ-be-no-rɛɛsdbã.—Mat. 7:15. w21.12 22-23 s. a 3-5