Sɩpaolgo

Bũmb wʋsg la a Zeova maand n sõngd tõndo. A tõe n sõng-y lame tɩ y tõogd y sũuri, ned sã n wa namsd yãmb y sẽn moond koɛɛgã yĩnga. A tõe n sõng-y lame me tɩ y tẽeg vɛrse-rãmb sẽn zemse, n sõs b zug ne ned sẽn dat n kelg koɛɛgã. A leb n kõt-y-la pãng tɩ y ket n moond koɛɛgã, baa nebã sã n pa rat n kelge. (Zer. 20:7-9) A Zeova leb n kɩtame tɩ d bãng t’a yaa sõmblem soaba, a sẽn sõngd tõnd tɩ d paamd minim koɛɛgã mooneg pʋgẽ wã yĩnga. Kiris-nebã vɩɩm la b tʋʋmã tigsg sasa, b wilgda tõnd d sẽn tõe n tɩʋʋs sõsg to-to, tɩ d tõe n tũ rẽ d sã n wa moond koɛɛgã. Sã n yaa pipi la woto d sẽn dat n mak bõn-paalle, d tõe n maanda rabeem bilfu. La d sã n sɩd mak n gese, d yãta vẽeneg tɩ womda biisi. Tigissã la tigis-kãsemsã sasa me, b sagenda tõnd tɩ d mak manesem-paal d sẽn zɩ n tũnug ne n moon koɛɛgã. D tõe n maanda rabeem, la d sã n sɩd make, a Zeova na n ninga barka. w21.08 27 s. a 5-6

Lɛtr ning tẽn-tʋmd a Poll sẽn tool Korẽnt kiris-nebã pʋgẽ, a kõ-b-la sagls sẽn tar pãnga. A sẽn tool-b lɛtrã poore, a tʋma a Tɩt b nengẽ. La a sũur yɩɩ noog wʋsgo, a sẽn wa n bãng tɩ b sak n tũu a saglsã. (2 Kor. 7:6, 7) Kãsem-dãmbã tõe n dɩka a Poll togs-n-taare, n mi n be ne b tẽed-n-taasã. Bũmb a ye sẽn tõe n sõng-b tɩ b maan rẽ yaa b sẽn na n wat tigissã pĩnda, n paamd n sõsd ne b tẽed-n-taasã sõma. Naoor wʋsgo, f tõe n sõsa ne f tẽed-n-taag minit a wãn pʋgẽ bal n keng a raoodo. (Rom. 1:12) Kãsem-soab sẽn dɩkd a Poll togs-n-taar tũnugda ne Wẽnnaam Gomdã n kengd a tẽed-n-taasã tẽeb la b raoodo, la a sõngd-b tɩ b bãng tɩ Wẽnnaam nong-b lame. A modgdame n pẽgd-ba. Kãsem-soab sã n wa na n sagl neda, a saglgã segd n tika Wẽnnaam Gomdã zugu. A sẽn dat tɩ b sak n deeg a saglgã yĩnga, saglgã segd n yɩɩ takɩ, la ne bʋgsem.—Gal. 6:1. w22.03 28-29 s. 11-12

Rũndã-rũndã, a Zeova kõta a nin-buiidã “pãng ning sẽn yɩɩd ninsaal rẽndã,” tɩ b ket n tũud-a ne b sũy fãa. Wala makre, d paamda pãng ne pʋʋsgã maasem. Efɛɛz rãmb 6:18 wã pʋgẽ, tẽn-tʋmd a Poll sagla tõnd tɩ d pʋʋs Wẽnnaam “sasa buud fãa.” Wẽnnaam na n kelga d pʋʋsgã, n kõ-d pãnga. “Wakat ninga zu-loeesã mi n lim-d lame, hal tɩ d pa mi d sẽn na n pʋʋs a Zeova n togs-a bũmb ning ye. La a Zeova ratame tɩ d pʋʋs-a, baa sã n yaa toog ne-d tɩ d togs-a d tagsgo, la d wilg-a sẽn be d sũurẽ wã. (Rom. 8:26, 27) A tũnugda ne Biiblã me n kõt-y d pãnga. A Poll paama pãng la belsg ne Gʋls-sõamyã maasem. Tõnd me tõe n paama woto. (Rom. 15:4) D sã n karemd Wẽnnaam Gomdã la d bʋgsd a zugu, a Zeova tõe n tũnuga ne a vʋʋsem sõngã n kɩt tɩ d bãng d sẽn karemd bũmb ningã sẽn tõe n sõng-d to-to vẽenega.—Ebre. 4:12. w21.05 22 s. a 8-10

D pa reemd ne koɛɛgã mooneg la nebã zãmsgã sẽn yaa tʋʋmd a Zeezi sẽn kõ-dã, baa ne d sẽn segd zu-loees sẽn tõe n kɩt tɩ d pa tõog n tʋm tʋʋmdã wa d sẽn datã. D tõeeme n wa pa le tõe n tʋm tʋʋmdã wʋsg wa d sẽn datã ye. Wala makre, koe-moondb kẽer yʋʋm vẽsgame, wall b laafɩ wã pa waoog ye. Yaa woto me ne yãmb bɩ? Sã n yaa woto, bãng-y tɩ d tõe n tũnuga ne telefõnnã bɩ ne ẽntɛrnetã n zãms nebã Biiblã sõma. Woto, y tõe n zĩnda yir n zãms ned Biiblã nana-nana. La pa rẽ ye. Neb kẽer rat n zãmsa Biiblã, la b pa tar sẽk wakat ning saam-biisã sẽn yãk n moond koɛɛgã ye. La tõe tɩ b tara sẽk yibeoog pĩnda, bɩ zĩigã sẽn wat n zʋʋge. Yãmb tõe n zãmsa ned Biiblã wakat-kãensã bɩ? A Zeezi zãmsa a Nikodɛm ne yʋngo, la yaa wakat-kãng n da zems ne a Nikodɛm.—Zã 3:1, 2. w21.07 5 s. 10-11

A Zãmbatiis karen-biisã sẽn bãng t’a Zeezi karen-biisã pa loet noorã, ling-b lame. A Zeezi wilgame tɩ yẽ sã n ket n vɩ fãa, pa tɩlɛ tɩ b loe noor ye. (Mat. 9:14-17) Baa ne rẽ, fariziẽ-rãmbã la neb a taab sẽn da kis a Zeezi ning-a-la taale, a sẽn da pa tũud bãmb rog-n-mikã la b minundã yĩnga. B sũyã yika ne-a, a sẽn yãk yam n na n sãoog bãad-dãmb vʋʋsg raarã. (Mark 3:1-6; Zã 9:16) B ra yetame tɩ b tũuda noy nins Wẽnnaam sẽn gãneg vʋʋsg raarã wɛɛngẽ wã, n yaool n da koosd teed wẽnd-doogẽ wã ra-kãnga, n pa get tɩ yaa wẽng ye. A Zeezi sẽn ning-b taal rẽ yĩngã, b sũyã yika wʋsgo. (Mat. 21:12, 13, 15) Neb nins a Zeezi sẽn taas koɛɛgã zʋɩf-rãmbã karen-doogẽ wã Nazarɛtã me sũy yikame, a sẽn tẽeg-b yɛl kẽer Israyɛll nebã sẽn da maan pĩndã, la a tik rẽ n wilg tɩ b yaa rat-m-yembr dãmb la neb sẽn pa tar tẽebã. (Luk 4:16, 25-30) Neb wʋsg pa sak n kelg a Zeezi, a sẽn pa maan bãmb sẽn da tagsd t’a na n maaname wã yĩnga.—Mat. 11:16-19. w21.05 5-6 s. 13-14

Bũmb a ye a Zeova sẽn maan n keoogd tõnd ne wuk-m-mengã la rat-tɩ-loogã, yaa a sẽn kɩt tɩ b gʋls neb sẽn lʋɩ bẽd-kãens pʋgẽ kibay tɩ d tõe n dɩk yam rẽ pʋgẽ wã. D sã n wa gomd rat-tɩ-loog yelle, d tẽegda a Sʋɩtãan yelle. A sẽn da yaa a Zeova malɛkã yĩnga, a ra paamame t’a Zeova kõ-a tʋʋm-kãsemse. La a ra ratame tɩ yɩɩd woto. A ra ratame tɩ nebã waoogd yẽ wa Wẽnde, tɩ yaool n yaa a Zeova bal n segd ne waoogr a woto. A Sʋɩtãan datame tɩ d yɩ wa yẽnda. Rẽ n so t’a rat tɩ d tẽ tɩ d sẽn tar bũmb ninsã pa sek ye. A sẽn mak n na n maan woto pipi, yaa a sẽn wa n tɩ gom ne a Awa wã. Ne nonglem, a Zeova kõo a Awa ne a sɩdã rɩ-nood wʋsgo, rat n yeel tɩ “tɩɩs nins fãa sẽn be zẽedã pʋgẽ wã biisi.” A ye bal la a yeel tɩ b ra rɩ a biisã ye. (Sɩng. 2:16) Baa ne rẽ, a Sʋɩtãan belga a Awa t’a tags t’a segd n dɩɩ tɩɩg ning biis b sẽn gɩdg tɩ b ra rɩ wã. A Awa wa n pa le nand bũmb nins a sẽn tarã ye. A wa n data sẽn zʋʋg rẽ. D mii yel-kãngã sẽn baas to-to. A beega Wẽnnaam n wa baas n ki.—Sɩng. 3:6, 19. w21.06 14 s. a 2-3; 17 s. a 9

A Zeova sẽn da rat yaa a Ãdem ne a Awa rog kamba, la b ges tẽngã yell neere. A Ãdem ne a Awa sã n da sak n tũ a Zeova sẽn dat tɩ b maanã, bãmb ne b yagensã fãa ra na n kell n yɩɩ a zakã neb wakat sẽn kõn sa yĩnga. A Zeova sẽn naan a Ãdem ne a Awa to-to tɩ b na n naag a zakã nebã ra wilgdame t’a nand-b-la wʋsgo. Yɩɩn-sõamyã 8:5, MN wã pʋgẽ, a Davɩɩd goma a Zeova sẽn naan ninsaal to-to wã yell n yeel yaa: “Yãmb naan-a lame tɩ kellẽ bilf t’a ta malɛgsã. Yãmb kõ-a-la ziir la neerem.” Yaa sɩd t’a Zeova pa naan ninsaalbã tɩ b pãngã, b yamã la b minimã ta malɛgsã ye. (Yɩɩn. 103:20) La a naan-b lame tɩ “kellẽ bilf” tɩ b ta malɛgsã sẽn tar pãng wʋsgã. Bʋko, a Ãdem ne a Awa kɩɩsa a Zeova, tɩ kɩt tɩ b ra pa le yaa a zakã neb ye. B sẽn kɩɩs a Zeova wã waa ne zu-loees wʋsg b yagensã zugu. La a Zeova raabã pa toeem ye. A ratame tɩ neb nins sẽn na n sak yẽ wã yɩ a kamb wakat sẽn kõn sa yĩnga. w21.08 2-3 s. a 2-4

Rũndã-rũndã, a Zeova Kaset rãmb wʋsg la b namsda, b tũudmã yĩnga. Wala makre, sãnda bee tẽns b sẽn gɩdg d tũudmã tʋʋm kẽere, tɩ b mi n tall-b n kẽng “guvɛrneer-dãmb la rĩm-dãmb nengẽ,” tɩ yɩ kaset nin-kãens yĩnga. (Mat. 10:17, 18) A Zeova Kaset rãmb kẽer segda zu-loees a taaba. Baa ne goosneema wã sẽn pa gɩdg d tũudmã tẽns nins pʋsẽ b sẽn be wã, b zakã rãmb maanda b sẽn tõe fãa n dat tɩ b bas a Zeova tũubu. (Mat. 10:32-36) La naoor wʋsgo, b basd-b-la namsgo, b sã n wa bãng tɩ b pa tol n tõe tɩ b bas a Zeova tũub ye. Neb kẽer sẽn da namsd a Zeova Kaset rãmbã ne toolem pĩndã wa n lebga d tẽed-n-taas sẽn tar yẽesem. Rẽ wã, b sã n wa namsd yãmb y tũudmã yĩng bɩ y ra bas a Zeova tũub ye. Tall-y raoodo. A Zeova ne a vʋʋsem sõngã sẽn tar pãng wʋsgã bee ne-yã. Dẽnd y pa segd n zoe rabeem ye. w22.03 16 s. a 8

Biiblã wilgdame t’a Zeova kisa “tɩtaam-gesgo, ne zelemd sẽn gomd zĩrẽ goamã, la nus sẽn daagd bʋʋm soab zɩɩm.” (Yel. 6:16, 17) A leb n “kisa nin-kʋʋdbã ne zãmb dãmbã.” (Yɩɩn. 5:7) A pa nong yel-manesem-kãensã la tʋʋm-wẽn-kãensã baa bilfu. A sãama nin-wẽnsã a Nowe wakatẽ wã, b nen-kɛglem tʋʋmã sẽn da yaa wʋsgã yĩnga. (Sɩng. 6:13) Sẽn paase, a Zeova tũnuga ne a Malaki n wilg t’a kisa neb nins sẽn maand zãmb n kaood b kãadmã, tɩ b pagã bɩ b sɩdã yaool n pa maan baa fʋɩ wã. B sẽn tũud Wẽnnaamã pa tat a yam ye. A na n wa sãam-b-la b tʋʋm-wẽnsã yĩnga. (Mal. 2:13-16; Ebre. 13:4) A Zeova ratame tɩ d ‘kisg sẽn yaa wẽnga.’ (Rom. 12:9) Gom-bil ning sẽn yaa ‘kisgã’ bilgda f sẽn na n kis bũmb ne f sũur fãa n pa tol n dat n yã bõn-kãng ye. Dẽnd d pʋd n pa segd n bas tɩ bũmb nins a Zeova sẽn yeel tɩ yaa wẽngã wa d yamẽ meng ye. w22.03 4-5 s. 11-12

Ka la bilfu, d saasẽ Ba wã na n kɩtame tɩ d paam bark wʋsg ne a Rĩungã maasem. Neb nins sẽn ket n gũud a Zeova wã na n paama bark wʋsg masã menga, la dũni-paalgã sẽn watã pʋgẽ me. Wẽnnaam nin-buiidã sã n wa kẽ dũni-paalgã pʋgẽ, b pa na n tol n le mao ne yɩɩrã la zu-loees nins fãa b sẽn paamd rũndã-rũndã wã ye. Wẽgb buudã fãa na n saame. La toog me pa na n le zĩnd ye. (Vẽn. 21:4) Wakat kãnga, d pa na n le maand yɩɩr n gũud bũmb nins d sẽn datã ye. Bala, d na n paama rẽ hal tɩ seke. (Yɩɩn. 72:16; Eza. 54:13) Ad sɩd yaa bark tɛkẽ! Masã menga, a Zeova sõngda tõnd tɩ d tõogd n basd minim-wẽnse, la d bɩɩsd zʋg-sõma n na n wa tõog n vɩɩmd a Rĩungã pʋgẽ. Da koms-y raood n bas a Zeova tũub ye. Vɩ-noog n nan ket taoore! Sẽn mik tɩ manegr n watã, bɩ d kell n tall sũ-mar n gũ a Zeova t’a wa maan bũmb nins a sẽn pʋlem t’a na n maaname wã. w21.08 13 s. 17-19

Tẽn-tʋmd a Poll sẽn taas Zide kiris-nebã lɛt-kãngã wã poore, pa yã n kaoos la b bas b zagse, b tʋʋma, la b zakã neb sẽn pa tũud a Zeova, n “sɩng zoees n teesd tãensẽ wã.” (Mat. 24:16) Wakat-kãnga, sãmbg kae tɩ ra lebga tɩlɛ tɩ b sõng taaba. Sẽn deng rẽ, b sã n da zoe n sɩnga a Poll saglgã tũub n sɩd pʋɩt b sẽn tar bũmb ninsã ne taaba, na n yɩɩ nana ne-b zĩig ning b sẽn da yik n tɩ be wã. Wakat ninga, d tẽed-n-taag tõeeme n pa togs tõnd a sẽn dat tɩ d maan n sõng-a ye. Rẽ wã, yɩ-y ned pẽnegr sẽn yaa nana. Yaa vẽeneg tɩ y mii neb y tigingã pʋgẽ, sẽn sakd n sõngd b taabã wakat fãa. B pa rat n maan tɩ d wa tagsdẽ tɩ d namsd-b lame ye. D miime tɩ sẽn wa n yaa yell ning fãa, b na n dat n sõng-d lame, tɩ d rat me n tall b yam-sõngã buudu. w22.02 23-24 s. 13-15

Yʋʋma noorã, tigims la tigims sula wʋsg la b maneg n sigli. B sã n wa kos-d tɩ d tɩ naag tiging a to, tõe n yɩɩ toog tɩ d sak n loog n bas d zo-rãmb la d zakã rãmba. La rẽ yĩnga, a Zeova vẽnegda kãsem-dãmbã tɩ b bãng b sẽn na n kɩt tɩ koe-moond fãa kẽng tiging ning bɩ? Ayo. Woto tõe n kɩtame tɩ yɩ toog tɩ d sak n tũ b sẽn yeel tɩ d maan bũmb ningã. La a Zeova kɩsa sɩd tɩ kãsem-dãmbã na n bãng n yãka yam. Dẽnd tõnd me segd n kɩs-b-la sɩda. Kãsem-dãmbã sã n wa yãk yam n na n maan bũmbu, bõe yĩng tɩ d segd n teel b yam-yãkrã, baa pa noom-do? Bala d sã n maan woto, sõngdame tɩ zems-n-taar kell n zĩnd Wẽnnaam nin-buiidã sʋka. D fãa sã n sik d meng n tũ kãsem-dãmbã sẽn yãk yam ningã, nafda tigingã. (Ebre. 13:17) Sẽn yɩɩd fãa, d sã n sakd n tũud neb nins a Zeova sẽn yãk tɩ b get tõnd yellã sẽn yet tɩ d maan bũmb ninsã, d wilgda a Zeova tɩ d kɩs-a-la sɩda.—Tʋʋ. 20:28. w22.02 4-5 s. a 9-10

Y sã n yaa saam-biig sẽn deeg lisgu, y tõe n modgame n paas y minimã koɛɛgã mooneg la nebã zãmsgã pʋgẽ. Bõe yĩnga? Bala y sã n modg n bãng kareng sõma, n mi goama, n tõe n zãms neb sõma, tõe n nafa y kɛlgdbã. (1 Tɩm. 4:15) Modg-y n paas-y y minimã karengã la nebã zãmsg wɛɛngẽ sebrã pʋgẽ, b sõdga bũmb toor-toor y sẽn tõe n maan n paas y minimã nebã zãmsgã wɛɛngẽ. Modg-y n karem-y rẽ fãa la y tũ b sẽn yeelã. Y sã n zãms a yembr fãa n sa, bɩ y reng n mak rẽ zakẽ n gese, la y modg n tũ b sẽn yeel bũmb ningã, y sã n wa wɛgsd sõsga. Kos-y sagls sagend a to wã nengẽ, wall kãsem-dãmb a taab “sẽn tʋmd wʋsg koɛɛgã mooneg pʋgẽ, la nebã zãmsg pʋgẽ” nengẽ. (1 Tɩm. 5:17) Ra bao-y n na n tũ b sẽn yeel sebrã pʋgẽ tɩ y maanã bal ye. Ges-y y sẽn tõe n maan n sõng y kɛlgdbã tɩ b tẽebã paase, wall y sẽn tõe n sõng-b to-to tɩ b tũ b sẽn bãng bũmb ningã. Y sã n maand woto, yãmb ne bãmb fãa sũ-noogã na n paasdame. w21.08 24 s. 17

D sã n getẽ tɩ neb a taabã yɩɩda tõndo, d pa na n bao n wags ne neb nins sẽn wõnd b tara bãngr la minim n yɩɩd tõndã ye. D sũur pʋd n na n yɩɩ noog ne-ba. Sẽn yɩɩd fãa, b sã n tar b minimã n tʋmd a Zeova siglgã pʋgẽ n waoogd-a. D fãa sã n maand woto, na n kɩtame tɩ laafɩ la zems-n-taar zĩnd tigingã pʋgẽ. D sã n bɩɩs sik-m-menga, rat n yeel tɩ d sã n miẽ tɩ pa bũmb fãa la d tõe n maane, tõe n sõng-d lame tɩ d ra maan sũ-kiir ne ned ye. D sã n yaa sik-m-meng soaba, d pa na n bao n wilg tɩ d tara minim la bãngr n yɩɩd nebã fãa ye. D pʋd n na n bao n bãnga d sẽn tõe n dɩk yam neb nins minim sẽn yɩɩd tõndã nengẽ to-to. Wala makre, tags-y n ges-y saam-biig sẽn na n be tigingã pʋgẽ n mi sõss wɛgsg sõma. D tõe n sok-a lame n bãng a sẽn maand to-to n segend a sõssã. Saam-bi-poak sã n mi rɩɩb seglg sõma, d tõe n sõssa ne-a t’a sõng-d tɩ d paam minim n paas rɩɩbã seglg wɛɛngẽ. w21.07 16 s. a 8-9

Sõdb sebrã pʋgẽ, a Zeova ninga rao a ye taal n yeel tɩ b kʋ-a, a sẽn kẽng n tɩ wɩɩs raad vʋʋsg daarã yĩnga. Yʋʋm wʋsg rẽ poore, yiib Sãmwɛll sebrã pʋgẽ, a Zeova kõo rĩm a Davɩɩd sugri, baa ne a sẽn yo la a kʋ nedã. (Sõd. 15:32, 35; 2 Sãm. 12:9, 13) Woto tõe n kɩtame tɩ d sok d meng yaa: ‘Bõe yĩng t’a Zeova kõ a Davɩɩd sẽn kʋ ned la a yo wã sugri, n yaool n yeel tɩ b kʋ rao a ye wã, baa sẽn wõnd a sẽn maanã wẽnem pa ta a Davɩɩd sẽn maanã?’ Pa wakat fãa la Biiblã togsd yɛlã sẽn yɩ to-to wã zãng ye. D miime t’a Davɩɩd sɩd teka yam n kos sugri, a sẽn maan bũmb ningã yĩnga. (Yɩɩn. 51:4-6) La rao ning sẽn kɩɩs vʋʋsg daarã noorã yẽ? A sũur sãama ne a sẽn maan bũmb ningã bɩ? Sẽn deng rẽ, a ra zoe n kɩɩsa a Zeova noy bɩ? Rẽ yĩnga, b zoe n keoog-a lame t’a pa sak n deeg bɩ? Biiblã pa togs rẽ ye. La d sẽn zoe n mi bũmb ning a Zeova zugã seka d na kɩs sɩd t’a yaa ‘tɩrlem soab a sẽn maandã fãa pʋga.’—Yɩɩn. 145:17. w22.02 2-3 s. a 3-4

Ned sã n pa baood n na n maan sẽn yɩɩd a pãnga, a yaa sik-m-meng soaba. Rẽ kɩtdame t’a tʋʋmã womd biisi, la a ket n tar sũ-noog me. D tõe n dɩka ned a woto n mak ne ned sẽn zao montɛɛr n dʋʋd tãnga. Yaa tɩlɛ t’a yãk vɩtɛɛs-rãmbã n booge, n yaool n tõog n dʋ tãngã. Baa ne a kẽnã tʋʋlem sẽn na n boogã, a na n ket n kẽngda taoore. Woto me, ned sẽn sak n deeg tɩ pa bũmba fãa la a tõe n maan mii wakat ning a sẽn segd n toeem tʋʋmde, la a boog a tʋʋmã sẽn na yɩl n ket n wɩngd ne a Zeova tũubu, la a sõngd neb a taabã. (Fili. 4:5) D ges a Barzɩlayi sẽn kõ mak-sõng ningã, rĩm a Davɩɩd sẽn wa n bool-a t’a wa zĩnd na-yirã. A zãgsame, a sẽn da yaa sik-m-meng soabã yĩnga. A Barzɩlayi ra tara yʋʋm 80. A sẽn da mi tɩ pa bũmba fãa la a tõe n maanã yĩngã, a yeelame tɩ yɩta sõma t’a Kimham sẽn da yaa bi-bɩɩgã reeg yẽ zĩiga. (2 Sãm. 19:36-38) Wala a Barzɩlayi, yaa ne sũ-noog la d tẽed-n-taas nins sẽn kʋʋlã sakd n basd tʋʋm kẽer n kõt kom-bɩɩsã. w21.09 10 s. a 6-7

Yaa toog ne yãmb tɩ y ges a Zeova wa Ba sẽn nong a kamb bɩ? Yaa toog ne tõnd sʋkã neb kẽere. D ba wã sã n da yaa nin-toaaga, tõe n yɩɩ toog ne-d tɩ d tags t’a Zeova yaa wa Ba sẽn nong a kamba. La d tõe n basa d yam t’a Zeova mii d sẽn tagsd to-to, la bũmb ning sẽn kɩt tɩ d tagsd woto wã. A ratame tɩ d yɩ a zoa. Yaa rẽ n so t’a yet tõnd a Gomdã pʋgẽ yaa: “Bɩ y kolg Wẽnnaam, la bãmb me na kolg yãmba.” (Zak 4:8) A Zeova nonga tõndo, la a wilgame me t’a na n yɩɩ d Ba. Ba sẽn ka to. A Zeezi tõe n sõnga tõnd tɩ d lebg a Zeova zoa hakɩɩka. A Zeezi mii a Zeova sõma, hal n dɩkd a togs-n-taar kɛpɩ. A pʋd n yeelame yaa: “Ned ning sẽn yã maam, a yãa Ba wã me.” (Zã 14:9) A Zeezi sẽn yaa wa d kẽemã, a wilgd-d-la d sẽn tõe n waoog d Ba wã to-to la d sak-a, d sẽn tõe n maan to-to n da sãam a sũuri, la d sẽn tõe n maan to-to t’a sũur yɩ noog ne-do. Sẽn yɩɩd fãa, a Zeezi vɩɩmã sẽn yɩ to-to tẽngã zugã wilga vẽeneg t’a Zeova yaa sõmblem la nonglem soaba. w21.09 21 s. a 4-5

A Zeova nin-buiidã yẽ naaga taab n tũud-a ne yam a yembre. A Zeova kõo kãsem-dãmbã tʋʋm-kãsenga. Yaa tɩ b ges tɩ tigingã kell n yɩ yɩlemde. Kiris-ned sã n wa maan yel-wẽn-kãsenga, a Zeova raab yaa kãsem-dãmbã ges nin-kãng sã n tõe n kell n paa tigingã pʋga. Rẽ wɛɛngẽ, bũmb wʋsg la b segd n maane. Wala makre, b segd n bao n bãnga a soabã sã n sɩd teka yam n kot sugri. A tõe n yeelame t’a sɩd teka yam. La rẽ yĩnga, a sɩd maanda a bãngẽ ne a sẽn maan bũmb ningã bɩ? A yãka yam n na n maan a sẽn tõe fãa n da le lʋɩ a yel-wẽndã pʋgẽ bɩ? Sã n mikame tɩ yaa tũud-n-ta-wẽns n kɩt t’a maan sẽn yaa wẽngã, rẽ yĩnga a sakame n na n lak a meng ne tũud-n-ta-kãens bɩ? Kãsem-dãmbã pʋʋsda a Zeova, n bao n bãng yellã vɩʋʋgo, n ges Biiblã sẽn yet rẽ wɛɛngẽ, la b ges a soabã tagsg sẽn yaa to-to ne a sẽn maan bũmb ningã. Rẽ poore, b na n bao n bãnga a sã n tõe n kell n paa tigingã pʋgẽ. La wakat ninga, b segd n yiis-a-la tigingã pʋgẽ.—1 Kor. 5:11-13. w22.02 5 s. 11-12

D sẽn deeg lisgã nan yaa rasem a wãn tɩ yaa yʋʋm wʋsg me, d fãa ratame n yɩ ned ning buud a Zeova sẽn nongã. Sẽn na yɩl n yɩ ned a woto buudu, d segd n gũusda ne d tagsa wã. Bõe yĩnga? Bala naoor wʋsgo, yaa d sẽn tagsd bũmb nins yellã la d maanda. Sã n yaa sẽn noom tõndã bal yell la d tagsd wakat fãa, d na n gomdame la d maand sẽn pa sõma. (Efɛ. 4:17-19) La d sã n tagsd sẽn yaa sõma yell wakat fãa, d no-goamã la d tʋʋmã na n nooma a Zeova. (Gal. 5:16) La d pa tõe n pa mi n tall tagsg sẽn pa sõma ye. La d tõe n yãka yam n pa maan wa d sẽn tagsdã ye. Nand tɩ d reeg lisgu, d segd n basa goam la tʋʋm-tʋmdɩ nins fãa a Zeova sẽn kisã. Rẽ yaa pipi bũmb sẽn tar yõod wʋsg d sẽn segd n maane, n tõog n yeeg nin-kʋdgã. La d sã n dat n ta a Zeova yam zãnga, d segdame me n yeelg nin-paalgã. w22.03 8 s. a 1-2

Mi n yaa toog ne kãsem-dãmbã tɩ b bãng ned sẽn maan yel-wẽn-kãseng sã n sɩd teka yam n kot sugri. Bõe yĩnga? Bala kãsem-dãmbã pa tõe n bãng sẽn be ned sũurẽ ye. Rẽ wã, b modgdame n bao kaset sẽn wilgd vẽeneg tɩ sẽn maan-a yel-wẽndã maanda a bãngẽ ne a sẽn maan bũmb ninga. B segd n bao n bãnga sẽn maan-a yel-wẽndã yam-tagsgã, a tʋʋm-tʋmdɩ wã, la a yel-manesmã sã n wilgda vẽeneg t’a sɩd teka yam n kos sugri. Yɩl n t’a tõog n toeem yɛl kẽer n wilg t’a sɩd teka yam n kos sugr tõe n kaoosa wʋsgo. Yaa vẽeneg tɩ b na n yiisa nin-kãng kiris-neb tigingã pʋgẽ. Ned b sẽn yiis tigingã pʋgẽ sã n dat n wilg t’a sɩd teka yam n kot sugri, a segd n wata tigissã n pa vaandẽ, n tũud kãsem-dãmbã sẽn sagend-a t’a pʋʋsd wakat fãa la a zãmsd Biiblã. Sẽn paase, a segd n modgame n zãag a meng ne yɛl nins sẽn tõe n wa kɩt t’a le lʋɩ a yel-wẽndã pʋgẽ wã. A sã n modg n le paam zood sõma ne a Zeova, a tõe n basa a yam t’a Zeova na n kõ-a-la sugri, la tɩ kãsem-dãmbã na n lebs n deeg-a-la tigingã pʋgẽ. w21.10 6 s. 16-18

A Zeezi sẽn da nong Wẽnnaam wʋsgã yĩnga, a kell n tũu a Zeova ne a sũur fãa a sẽn wa n be saasẽ wã, la a sẽn wa n be tẽngã zugã me. (Luk 4:8) A yeela a karen-biisã tɩ bãmb me tũ a Zeova a ye tãa. A Zeezi la baa a karen-biisã pa tol n pʋʋs bõn-naands ye. Sẽn mik tɩ ned pa tõe n yã Wẽnnaam ne nifã, bũmb kae d sẽn tõe n maan tɩ sɩd wõneg-a baa yaa bilf ye. (Eza. 46:5) La rẽ yĩnga, d tõe n maana nin-sõamyã imaaz n wõgemded a taoor n pʋʋsdẽ bɩ? Tõod piigã a Zeova sẽn da kõ wã sʋka, a togsa rũndã daar vɛrse wã goam yiib-n-soab noorã pʋgẽ. Neb nins sẽn dat n ta Wẽnnaam yamã mii vẽeneg t’a pa rat tɩ d pʋʋs bõn-naands ye. Kʋdemd yel-mitb kẽer wilgame tɩ pipi kiris-nebã ra tũuda Wẽnnaam bala. Rũndã-rũndã, a Zeova Kaset rãmbã me manesem yaa wa pipi kiris-nebã. w21.10 19-20 s. a 5-6

A Zeezi pĩnd n keooga kiris-neb nins sẽn da be Zide wã tɩ wakat n wat tɩ ‘sodaas na n wa gũbg Zerizalɛm’ tẽngã. (Luk 21:20-24) Wakat kãng sẽn wa n ta wã, b ra segd n ‘sɩnga zoees n teesd tãensẽ wã.’ Yaa b sã n da zoe n yi tẽngã la b na n põse. La bũmb wʋsg la b ra segd n loog n base. Yʋʋm a wãn woto, Gũusg Gasgã ra goma sẽn yɩ to-to wã yelle, n yeel yaa: “B basa b pʋto, b zagse, n pa wʋk b roogã teed meng ye. B sẽn da kɩs sɩd t’a Zeova na n kogl-b lame la a fãag-bã yĩnga, b ra getame tɩ yaa a Zeova tũub n tar yõod n yɩɩd bũmba fãa.” Gũusg Gasgã paasame yaa: “Ka la bilfu, d na n paama makr sẽn na n wilg arzɛkã yõod ne tõnd sẽn ta zĩig ninga. Yaa bõn-kãensã n tar yõod ne tõnd n tɩ yɩɩd bɩ, bɩ sẽn pak tõnd n yɩɩd yaa d wa paam fãagre, d sẽn maand sɩd ne Wẽnnaamã yĩnga? Dũniyã saab sã n wa ta, tõe tɩ d na n maoo ne zu-loees ka tɛka, la d bõn bũmb wʋsg menga. D segd n segla d mens n na n maan bũmb nins fãa d sẽn segd n maanã.” w22.01 4 s. a 7-8

Israyɛll nebã sẽn wa n yi Ezɩptã poore, a Zeova vẽnega a meng ne a Moyiiz n togs-a yẽ yʋʋrã, la a zʋg-sõma kẽere. Ad a sẽn yeele: “Mam . . . yaa Wẽnnaam sẽn yaa nimbãan-zoɛta, la bark kõata. Mam sũur ka yikd tao-tao ye, la mam yaa nonglem soaba, la m maanda sɩda. La mam maanda sɩd hal tɩ ta zamaan tusri, n kõt neb sugr b beegrã ne b kɩɩsgã la b yel-wẽnã fãa yĩnga.” (Yik. 34:6, 7) A Zeova sẽn togs a Moyiiz a zʋg-sõma-kãensã sẽn be yamleoog hal wʋsgã, sõngda tõnd tɩ d bãng bũmb sẽn yaa toor zall a nonglmã wɛɛngẽ. Yaa bõe? A Zeova pa nonglem soab bal ye. A yaa nonglem-kãseng soaba. Sɩd me, vɛrse-rãmb a taab n be Biiblã pʋgẽ n wilgd rẽ. (Nee. 9:17; 13:22; Yɩɩn. 86:15; 103:8; Zow. 2:13) Yaa a Zeova yell bal la b gomd vɛrse-kãens pʋsẽ, la pa ninsaalbã ye. A Zeova sẽn gomd a mengã yell woto Biiblã pʋgẽ wã zemsame. w21.11 2-3 s. a 3-4

Sẽn kẽ-b kãadmã tõe n dɩka yam, tẽn-tʋmd a Pɩyɛɛr ne a pagã mak-sõngã pʋgẽ. A sẽn seg a Zeezi wã, sẽn zems kiis a yoob n digd yʋʋmd poore, a ra segd n yãka yam n maan bũmb sẽn pa reem yell ye. A Pɩyɛɛr da yõgda zĩm, n paamd n get a meng la a zakã rãmb yelle. Dẽnd a Zeezi sẽn wa n yeel-a t’a bas a tʋʋmdã la a wa tũ yẽ wã, a ra segd n tagsa a pagã yelle, n yaool n yãk a sẽn na n maanega. (Luk 5:1-11) A Pɩyɛɛr yãka yam n na n tũ a Zeezi n gilgd n moond koɛɛgã. La d tõe n kɩsa sɩd t’a pagã teel-a-la a yam-yãkrã pʋgẽ. Biiblã wilgdame t’a Zeezi vʋʋgrã poore, a Pɩyɛɛr pagã tũ-a lame n moon koɛɛgã wakat bilfu. (1 Kor. 9:5) Yaa vẽeneg t’a sẽn da yaa pag sẽn kõt mak-sõngã yĩnga, kɩtame t’a Pɩyɛɛr tõog n bas a yam n sagl kiris-neb nins sẽn kẽ kãadmã. (1 Pɩy. 3:1-7) Yaa vẽeneg t’a Pɩyɛɛr ne a pagã fãa ra kɩsa sɩd ne a Zeova sẽn pʋlem t’a na n gesa b yelle, b sã n lʋɩɩs Rĩungã tʋʋmã taoor b vɩɩmã pʋgẽ wã.—Mat. 6:31-34. w21.11 18 s. 14

Tẽn-tʋmd a Poll ra nonga a tẽed-n-taasã. A ra tʋmda wʋsg sẽn na yɩl n ges b yelle. (Tʋʋ. 20:31) Woto kɩtame t’a tẽed-n-taasã me ra nong-a wʋsgo. Daar a ye, Efɛɛz tigingã kãsem-dãmb sẽn bãng tɩ b pa na n le yã a Pollã, “b fãa raaga nintãm wʋsgo.” (Tʋʋ. 20:37) Rũndã-rũndã, kãsem-dãmbã me nonga b tẽed-n-taasã hal wʋsgo, n maand b sẽn tõe fãa sẽn na yɩl n sõng-ba. (Fili. 2:16, 17) La bʋko, mi n pa nana ne-b ye. Bõe n tõe n sõng-ba? Kãsem-dãmbã sẽn tʋmd wʋsgã tõe n dɩka a Poll togs-n-taare. A Poll ra yaa ninsaal wa tõndo. A ra pa zems zãnga, tɩ wakat ninga yɩl n maan sẽn yaa tɩrgã ra yaa maoob ne-a. (Rom. 7:18-20) Sẽn paas me, a ra maooda ne zu-loees buud toor-toore. La a pa koms raood n base, bɩ n bas tɩ zu-loeesã kɩt t’a pa le tar sũ-noog ye. Kãsem-dãmbã sã n dɩkd a Poll togs-n-taare, b na n tõog n maoo ne zu-loees nins b sẽn segdã, la b ket n tũud a Zeova ne sũ-noogo. w22.03 26 s. a 1-2

Maan-kʋʋr 19:3 gomda vʋʋsg daarã tũub yelle. A Moyiiz tõogã tũub pa le yaa tɩlɛ ne kiris-nebã ye. Rẽ n so tɩ d pa yãk daar takɩ semennã pʋgẽ tɩ yaa d vʋʋsg daare, wa Israyɛll nebã ye. Baa ne rẽ, bũmb ning b sẽn da maand vʋʋsg daarã, la rẽ sẽn da nafd-b to-to wã tõe n sõnga tõnd tɩ d bãng bũmb wʋsgo. Vʋʋsg daarã ra yaa wakat b sẽn da basd b tʋʋmã, la b tags tũudmã yɛl yelle. Rẽ n so tɩ vʋʋsg raar fãa, a Zeezi ra kẽnd zʋɩf-rãmbã tigsg roogẽ n karemd Wẽnnaam Gomdã. (Yik. 31:12-15; Luk 4:16-18) Wẽnnaam sẽn yeel Maan-kʋʋr 19:3 pʋgẽ tɩ b “sak [yẽ] vʋʋsg rayã,” segd n kɩtame tɩ d baood sẽk daar fãa, n tagsd tũudmã yɛl yell n yɩɩda. Yãmb tagsdame tɩ y segd n maneg n tũu no-kãng sõma bɩ? Y sã n baood sẽk daar fãa n tagsd tũudmã yɛl yelle, y na n maneg n paama zood sõma ne a Zeova. La woto na n sõng-y lame tɩ y lebg sõamyã. w21.12 5 s. 13

A Zeezi sẽn wa n be tẽngã zugã, a ra nong n sõsda ne neb buud toor-toore. A naaga arzɛgs rãmb la nin-kãsems n dɩ. A ra rɩkda sẽk wʋsg me n sõsd ne naong rãmbã la nimbãan-dãmbã. Sẽn paase, a ra kʋmda neb nins b sẽn da get wa “yel-wẽn-maandbã.” Neb kẽer sẽn da tẽed tɩ b yaa tɩrs b mens nifẽ zãgsame n pa tẽ a Zeezi, a goamã la a tʋʋm-tʋmdɩ wã yĩnga. B soka a Zeezi karen-biisã yaa: “Bõe yĩng tɩ yãmb naag yõor-yaood dɛɛgdbã la yel-wẽn-maandbã n dɩtẽ la y yũuda?” La a Zeezi leok-b-la ne rũndã daar vɛrse wã goamã. (Luk 5:29-31) Nand tɩ Mesi wã wa, no-rɛɛs a Ezayi ra pĩnd n togsa hal daar zãr tɩ nebã pa na n sak n tẽ-a ye. Ad a sẽn yeelã: “Nebã paoog-b lame, b bas-b lame, . . . bãmb lebga wa soab ning nebã sẽn wẽnemd b nens n base, b paooga bãmba, la tõnd dag n ka nand-b ye.” (Eza. 53:3) “Nebã” ra na n zãaga b mens ne Mesi wã. Dẽnd zʋɩf-rãmbã sẽn da be pipi kiris-nebã wakatẽ wã ra segd n bãngame tɩ nebã ra na n zãgsa a Zeezi. w21.05 8-9 s. a 3-4

Pipi kiris-neb kẽer ra maasa ne saglsã tũubu. (Zak 1:22) Kẽer ra bakda rakã-rãmbã n sõngdẽ. (Zak 2:1-3) Ra yaa toog ne neb a taab me tɩ b tõog b zɩlemdã. (Zak 3:8-10) Kiris-nin-kãensã ra maooda ne zu-loe-kɛgemse, la baasgo, a Zak pa koms raood n bas b sõngr ye. Ne bʋgsem, a togs-b-la b sẽn segd n maan bũmb ninsã vẽenega, la a sagl neb nins sẽn da rat sõngrã tɩ b kos tigingã kãsem-dãmb tɩ b sõng-b tɩ b toeeme. (Zak 5:13-14) Yam ning d sẽn tõe n dɩke: D tall tagsg sẽn yaa sõma nebã zugu, la d da baoodẽ tɩ b maan sẽn yɩɩd b pãng ye. Tõe tɩ yaa toog ne neb wʋsg d sẽn zãmsd Biiblã tɩ b tũ a saglsã. (Zak 4:1-4) Tõe n kaoosame tɩ b yaool n wa tõog n bas b minim-wẽnsã, la b bɩɩs zʋg-sõma. D segd n talla raoodo, n togs d Biibl karen-biisã bũmb nins b sẽn segd n toeem b vɩɩmã pʋgẽ wã. D segd n talla yam-sõngo, n kɩs sɩd t’a Zeova na n taka sik-m-mens rãmbã n wa a nengẽ, la t’a na n kõ-b-la pãng tɩ b tõog n toeem bũmb nins b sẽn segd n toeem b vɩɩmã pʋgẽ wã.—Zak 4:10. w22.01 11 s. 11-12

Neb nins fãa sẽn tũud a Zeova wã modgdame n na n dɩk a togs-n-taar nimbãan-zoeerã wɛɛngẽ. Bõe yĩnga? Bʋʋm a ye yaa t’a Zeova pa kelgd neb nins sẽn pa zoet b taabã nimbãanegã pʋʋsg ye. Tõnd ned baa a ye pa rat t’a Zeova zãgs n pa kelg d pʋʋsg ye. Rẽ n so tɩ d modgd n pa rat n yɩ neb sẽn pa mi nimbãan-zoeer ye. D pa rat n yẽd d tʋb n pa kelg d tẽed-n-taag sẽn namsd ye. Wakat fãa d segd n sakd n kelgda “nimbãan ned kɛlenga.” Sẽn paase, d maanda d sẽn tõe fãa n na n tũ Biiblã sagl-kãngã: “Ned ning sẽn pa tar nimbãan-zoeere, b na n kaoa a bʋʋd n pa zoe a nimbãaneg ye.” (Zak 2:13) D sã n sik d meng n sak n deeg tɩ d sɩd ratame tɩ b zoe d nimbãanega, na n sõng-d lame tɩ d me yɩ nimbãan-zoɛtba. B sã n lebs n deeg ned sẽn tek yam n kos sugr tigingã pʋgẽ, d segd n zoee a soabã nimbãaneg n tɩ yɩɩda. Biiblã tara kibay sẽn tõe n sõng-d tɩ d bɩɩs nimbãan-zoeere, la d da wa yɩ nin-toos ye. w21.10 12 s. 16-17

Yʋng ning b sẽn yõk a Zeezi wã, rat n yeel t’a koe-​moonegã sẽn wa n digd a saabẽ wã, a baoo zĩig bʋʋr sẽn ka be, n tɩ bʋgs la a pʋʋs a Ba wã. Yɩɩ Gɛtsemane zẽedã zĩigẽ. Beenẽ, a Zeezi togsa a karen-​biisã bũmb sẽn tar yõod wʋsg pʋʋsgã wɛɛngẽ. B sẽn wa n ta Gɛtsemane zẽedã zĩigẽ wã tɩ zĩigã zʋʋga wʋsgo. Tõe tɩ yʋn-​sʋk ra loogame. A Zeezi keooga a tẽn-​tʋmdbã tɩ b “gũ,” la a bas-​b n loog n na n tɩ pʋʋse. (Mat. 26:37-​39) A sẽn wa n pʋʋsdẽ wã, b yõd n gũsame. A Zeezi sẽn lebg n wa n mik tɩ b gõeeme wã, a le keoog-​b lame tɩ b ‘kell n gũ, la b pʋʋsd wakat fãa.’ (Mat. 26:40, 41) La a bãngame tɩ b sũyã ra sãama wʋsgo, la tɩ b ra yɛɛme. A Zeezi kʋm-​b lame, bala a yeelame tɩ “yĩngã ka pãng ye.” A Zeezi leb n tɩ pʋʋsa naoor a yiib-​n-​soaba, n le wa mik t’a karen-​biisã gõeeme, la b pa pʋʋsdẽ wa a sẽn da sagl-​bã ye.​—Mat. 26:42-​45. w22.01 28 s. 10-11