Sẽoogo

Wẽnnaam sẽn naan-d tɩ d tõe n gomã, yaa kũun sẽn wilgd t’a sɩd nong-d lame. Pa yã n kaoos la ninsaalbã tʋm ne kũun-kãng tɩ pa zems ye. A Sʋɩtãan belga a Awa. Rẽ n kɩt tɩ ninsaalbã lebg yel-wẽn-maandba, la neb sẽn pa zems zãnga. (Sɩng. 3:1-4) A Ãdem me pa tʋm ne kũun-kãng tɩ zems ye. Bala a goma goam n ning a pagã taale, la baa a Zeova menga. Yaool n da yaa yẽ la yellã soaba. (Sɩng. 3:12) A Kayẽ me sẽn wa n kʋ a yao a Abɛllã poore, a yaga ziri a Zeova taoore. (Sɩng. 4:9) Rũndã-rũndã, yaa toog tɩ d paam filim-dãmb sẽn pa tar gom-dẽgdo. Lekoll-dãmbẽ wã la tʋʋmã zĩisẽ, nebã nong n gomda gom-dẽgdo. D sã n pa maan gũusgu, d sẽn wʋmd gom-dẽgd wakat fãa wã tõe n wa kɩtame tɩ d sɩng n gomd goam sẽn pa sõma. Yaa vẽeneg tɩ d sẽn yaa kiris-nebã, d ratame n ta a Zeova yam. Dẽnd d pa na n zãag d mens ne gom-dẽgdã bal ye. D pʋd n na n modgame n tũnugd ne d no-goamã n pẽgd d Wẽnnaamã. w22.04 4 s. a 1-3

A Zeezi ra tara tagsg sẽn zems arzɛgsã wɛɛngẽ. A sũurã ra nooma ne rɩɩbã la rãamã a sẽn da paamdã. (Luk 19:2, 6, 7) Daar a ye, a kɩtame tɩ koom lebg divẽ sẽn yaa sõma wʋsgo. Rẽ n yɩ a pipi yel-solemde. (Zã 2:10, 11) Sẽn paase, a kũumã daare, a ra yerã fuug ligd sẽn yaa toog wʋsgo. (Zã 19:23, 24) La a Zeezi ra pa get tɩ arzɛkã n tar yõod n yɩɩd a vɩɩmã pʋgẽ ye. A yeelame tɩ d sã n deng n bao Rĩungã, a Zeova na n gesame tɩ d paam bũmb nins sẽn yaa tɩlɛ ne-dã. (Mat 6:31-33) Neb wʋsg tũu sagls nins a Zeova sẽn kõ ligdã wɛɛngẽ wã, tɩ naf-b wʋsgo. D gom saam-biig a ye sẽn yaa rakõore, t’a yʋʋr boond t’a Dãniyɛll yelle. A yeelame: “M sẽn wa n yaa bi-bɩɩga, m yãka yam n na n lʋɩɩs a Zeova tũudmã yɛl taoor m vɩɩmã pʋgẽ.” A Dãniyɛll sẽn pa gĩd a vɩɩmã ne bũmb wʋsgã, a tõog n kẽesa a sẽkã ne a minimã siglgã tʋʋm wʋsg pʋgẽ. A paasame. “A Zeova kɩtame tɩ m paam sũ-noog wʋsg ligdã sẽn da pa tõe n kɩt tɩ m paame.” w22.05 21-22 s. a 6-7

D sã n zãmsd Biiblã wakat fãa, la sɛb nins siglgã sẽn yiisdã, wilgdame tɩ d sũur nooma ne d sẽn bãng sɩdã. Baa ne d sẽn kaoos sɩdã pʋgẽ to-to, bũmb wʋsg n ket d sẽn tõe n bao n bãnge. Sebr zãmsg baooda modgre, la pa sẽk sãoong ye. Pa nebã fãa n nong sebr kareng la a zãmsg ye. A Zeova yet-d lame tɩ d “kell n bao” n wʋm Biiblã goamã võor sõma n paase. (Yel. 2:4-6) D sã n modgd n maand woto, na n naf-d-la wakat fãa. Saam-biig a ye yʋʋr sẽn boond t’a Koore yeelame t’a sã n wa karemd Biiblã, a yalsd n tagsa vɛrse fãa zugu. Ad a sẽn yeele: “M karemda vɛrse fãa tẽngr not-rãmba, vɛrse-rãmb a taab sẽn tõe n sõng tɩ b wʋm vɛrse wã võor sõma, la m maan vaeesg a taab n paase. . . . Woto sõngda maam tɩ m paam n bãng bũmb wʋsgo.” Yaa woto la d maand n zãmsd Biiblã tɩ pa woto me, d sã n baood sẽk n modgd n zãmsd Biiblã, d wilgdame tɩ d sũur nooma ne d sẽn bãng sɩdã.—Yɩɩn. 1:1-3. w22.08 17 s. 13; 18 s. 15-16

A Zeezi sẽn wa n be tẽngã zugã, a goma bũmb nins a Ba wã sẽn naanã yelle, n na n sõng a karen-biisã tɩ b bãng-a sõma. D ges bũmb a ye a sẽn wilg a karen-biisã. A Zeova wilgda nebã fãa a nonglem. A Zeezi sẽn wa n be tãngã zug n zãmsd nebã, a goma wĩndgã la saagã yell ne a karen-biisã. Neb wʋsg pa nong n tagsd bõn-kãensã yell ye. La b yaool n yaa tɩlɛ d vɩɩmã yĩnga. A Zeova ra tõe n kɩtame tɩ neb nins sẽn pa tũud-a wã pa paam bõn-kãensã ye. La a nonglmã yĩnga, a kɩtdame tɩ saagã la wĩndgã tat nebã fãa. (Mat. 5:43-45) A Zeezi goma rẽ yelle, n wilg a karen-biisã t’a Zeova ratame tɩ d nong taaba. D sã n wa get wĩndgã sẽn lʋɩt tɩ d sũur noome, wall saag sẽn ni tɩ zĩigã bʋke, d tõe n tagsa a Zeova sẽn nong nebã fãa wã yelle. A sẽn maand woto wã tõe n sõng-d lame tɩ tõnd me nong d taabã, n taasd ned buud fãa koɛɛgã n pa bakdẽ ye. w23.03 17 s. a 9-10

Yaa bõe la tẽn-tʋmd a Zã yã tɩ ling-a? Yaa pag sẽn zao we-rũng sẽn yaa miuugu. A yaa “pʋg-yood-kãsenga,” tɩ b boond-a tɩ “Babilon-kãsengã.” A yooda ne tẽngã rĩm-dãmba. (Vẽn. 17:3-5) Babilon-kãsengã makda bõe? D pa tõe n yeel tɩ pagã makda politik siglsã ye. Bala b yeelame t’a yooda ne dũniyã rĩm-dãmba, rat n yeel tɩ politikã taoor dãmba. (Vẽn. 18:9) A sẽn zao we-rũngã wilgdame t’a makdame n na n kɩt tɩ politikã taoor dãmb tũ yẽ raabo. Sẽn paase, d pa tõe n yeel tɩ pagã makda a Sʋɩtãan dũniyã ligdã baoob siglsã ye. B goma sigls-kãensã yell Vẽnegr sebrã zĩig a to, n bool-b tɩ “tẽngã toandbã.” (Vẽn. 18:11, 15, 16) Ziri tũudmã sɩnga pĩnd wẽndẽ Babilon tẽngẽ wã. Woto wã, Babilon-kãsengã makda ziri tũudmã fãa sẽn naag taaba.—Vẽn. 17:5, 18. w22.05 11 s. 14-16

Pag fãa mi n sokda a meng n getẽ a kambã sã n na n wa sak n tũu a Zeova. Roagdbã mii zu-loees nins kambã sẽn maood ne a Sʋɩtãan dũniyã pʋgẽ wã. Sẽn paase, pagb wʋsg wubda b kambã b yembre. Wʋsg me sɩdb pa tũud a Zeova ye. Pa neb nins pagb bɩ b sɩdb sẽn pa tũud a Zeova wã bal n getẽ tɩ yaa toog tɩ b tõog n sõng b kambã tɩ b wa tũud a Zeova ye. Baa ba wã ne ma wã fãa sã n tũuda a Zeova, tõe n yɩɩ toog ne-b tɩ b tõog n sõng b kambã tɩ b sak n tũ a Zeova. Sã n yaa woto ne yãmba, bɩ y ra maan yɩɩr tɩ loog noor ye. A Zeova na n sõng-y lame. Y tõe n sõsa ne roagdb kẽer sẽn tar minim, n bãng y sẽn tõe n tall tʋʋm-te-kãensã n zãms y kambã to-to. (Yel. 11:14) A Zeova tõe n sõng-y lame me tɩ y tõog n sõsd ne y kambã sõma. Pʋʋs-y-yã-a n kos-a t’a sõng-y tɩ y tõogd n sokd-b sogsg sẽn na n sõng-y tɩ y bãng sẽn be b sũurẽ.—Yel. 20:5. w22.04 17 s. a 4, 7; 18 s. a 9

D sã n bao n bãng Wẽnnaam Bi-riblã sõma n paase, na n sõng-d lame tɩ d maneg n nong a Zeova, bala a Zeezi rɩkda a Ba wã togs-n-taar kɛpɩ. (Ebre. 1:3) Y sã n karem Evãnzill-dãmb a naasã, y na n bãnga a Zeezi sõma. Y sã n nan pa yãk wakat n karemd Biiblã daar fãa, bõe yĩng tɩ y pa na n sɩng masã menga? Y sã n wa karemd Biiblã kibar sẽn gomd a Zeezi yelle, bɩ y bao n bãng a sẽn yɩ ned ning buudã. A ra yaa ned pẽnegr sẽn yaa nana, n da sakdẽ tɩ kambã wat a nengẽ. (Mark 10:13-16) A ra maandame t’a karen-biisã basd b yam ne-a, n da pelgd b pʋg n togsd-a sẽn be b sũurẽ. (Mat. 16:22) A Zeezi sẽn maan woto wã, a rɩka a Ba wã togs-n-taare. D tõe n pẽnega a Zeova me nana-nana pʋʋsg pʋgẽ. D sã n wa pʋʋsd a Zeova, d tõe n pelga d pʋg ne-a. D tõe n basa d yam t’a pa na n ning-d taal ye. A nong-d lame, tɩ d yell me pak-a.—1 Pɩy. 5:7. w22.08 3 s. a 4-5

A Zeova sẽn yaa d Naandã yĩnga, a mii bũmb fãa tõnd zugu. Tags-y n ges-y-yã: Neb ka tɛk n be tẽngã zugu. La a Zeova mii bũmb fãa b ned kam fãa zugu. (Yɩɩn. 139:15-17) A miime tɩ d roagdbã sẽn pa zems zãngã yĩng kɩtame tɩ d me pa zems zãng ye. A mii bũmb nins fãa sẽn maan d vɩɩmã pʋgẽ tɩ kɩt tɩ d yaa a soab rũndã-rũndã wã. A Zeova sẽn mi tõnd sõma woto wã kɩtame t’a zoet d nimbãanega. (Yɩɩn. 78:39; 103:13, 14) A Zeova wilgame t’a tʋllame n kõ-d sugri. A miime tɩ d yaab a Ãdem sẽn maan bũmb ningã kɩtame tɩ d fãa yaa yel-wẽn-maandb la kiidba. (Rom. 5:12) Bũmb kae tõnd mengã sẽn tõe n maan n põsg yel-kãnga, bɩ n sõng neb a taabã tɩ b põs ye. (Yɩɩn. 49:7-9) La d Wẽnnaamã sẽn nong-dã zoee d nimbãanega, n maan bũmb sẽn na yɩl tɩ d wa paam d mens ne yel-wẽndã la kũumã. Wa Zã 3:16 sẽn wilgdã, a Zeova tʋma a Bi-ribl sẽn ka to wã t’a wa ki tõnd yĩnga.—Mat. 20:28; Rom. 5:19. w22.06 3 s. a 5-6

A Zeova sẽn yeel a tʋm-tʋmd a Zoob bũmb ninga wilgdame tɩ sẽn kõt-a a taabã sugri, na n paama a yel-wẽnã sugri. A Elifaaz, a Bildad ne a Zofaar sẽn yaa a Zoob zo-rãmbã ra wa n goma goam sẽn sãam a Zoob sũurã wʋsgo. A Zeova yeela a Zoob t’a pʋʋs b yĩnga. A Zoob sẽn maan rẽ wã, a Zeova ning-a-la barka. (Zoob 42:8-10) D sã n tar sũ-kẽka, d wãada d menga. D sã n tar sũ-kẽka, yaa wa d sẽn tʋk zɩɩb sẽn zɩs wʋsgo. A Zeova ratame tɩ d bas sũ-kẽka, n paam laafɩ. (Efɛɛ. 4:31, 32) A yeta tõnd tɩ d ‘bas sũ-yikri, la d bas sũ-puugri.’ (Yɩɩn. 37:8) D sã n tũ sagl-kãnga, nafd-d lame. D sã n tar sũ-kẽka, tõe n booga d yĩnsã laafi wã. (Yel. 14:30) D sã n tar sũ-kẽk ne neda, yaa tõnd mengã la namsd n yɩɩda, la pa sẽn beeg-a tõndã ye. Yaa wa f sẽn na n yũ pozõno, n dat tɩ kʋ sẽn beeg-a foo wã. Woto wã, d sã n kõt d taabã sugri, yaa tõnd mengã la d maand neer n yɩɩda. D paamdame tɩ d yamã gãe bãane, n tõe n ket n tʋmd a Zeova tʋʋmã. w22.06 10 s. a 9-10

D sẽn saagd tɩ manegr n watã yaa wa kut pugl sẽn kogend d yamã, tɩ d ra wa maan bũmb sẽn tõe n sãam tõnd ne a Zeova zoodã, wala makre, n tagsd d mengã yell bala. ( Kor. 15:33, 34) D sẽn saagd tɩ manegr n watã sẽn yaa wa kut puglã tõe n sõng-d lame tɩ d ra wa tags tɩ d pa tol n tõe n ta a Zeova yam ye. Tẽeg-y t’a Zoob zoa a Elifaaz togsa a Zoob goam a woto buudu. A Elifaaz yeelame yaa: “Ninsaal sẽn yaa kiidã yaa bõe n na n yɩ yɩlemde?” Rẽ poore, a goma Wẽnnaam yell n yeel yaa: “Ade! Yẽ pa kɩs sẽn yaa-b sõamyã sɩd ye. La baa saasã pa yɩlemd a nifẽ ye.” (Zoob 15:14, 15) Ad yaa zirẽ tɛkẽ! Tẽeg-y tɩ yaa a Sʋɩtãan n dat tɩ y tags woto. Y sã n tagsd woto, na n kɩtame tɩ y wa pa le tẽed tɩ manegr n wat ye. Woto yĩnga, zãag-y y mens ne zirẽ a woto buudu. Ra tol-y n maan-y sãmbs t’a Zeova ratame tɩ y wa paam n vɩɩmd wakat sẽn kõn sa, la t’a na n sõng-y lame tɩ y sɩd wa paam rẽ.—1 Tɩm. 2:3, 4. w22.10 25-26 s. a 8-10

A Sʋɩtãan ra ratame t’a Zoob tags t’a sẽn namsdã yaa a sẽn pa le tat a Zeova yam yĩnga. A Sʋɩtãan kɩtame tɩ sob-kãseng fug tɩ roog ning a Zoob kamb piigã sẽn da be a pʋgẽ n dɩtẽ wã lʋɩ n zãb-ba. (Zoob 1:18, 19) A kɩtame me tɩ bugum yi saasẽ n wa rɩ a Zoob rũmsã fãa la a tʋm-tʋmdbã sẽn da gũud rũmsã. (Zoob 1:16) Sẽn mik tɩ sobgã la bugmã yii saasẽ wã, a Zoob ra tagsdame tɩ ra yita a Zeova nengẽ. Woto kɩtame t’a tags t’a maana bũmb n sãam a Zeova sũuri. Baa ne rẽ, a pa tʋʋs a saasẽ Ba wã ye. A ra miime t’a Zeova ra maana bõn-sõma wʋsg n kõ-a. Dẽnd a ra yeta a meng t’a sã n saka sẽn yaa noogã, a segd n saka sẽn yaa toogã me. A yeelame yaa: “Bɩ a Zeova yʋʋrã kell n paam pẽgre.”—Zoob 1:20, 21. w22.06 21 s. a 7

A Zeezi togsa a karen-biisã goam nins sẽn be Zã 17:14. D nee bãngr-gomdã bab-kãngã sẽn paamd pidsg vẽenega, sẽn yɩɩd fãa yʋʋm koabgã sẽn loogã. Wãn to? A Zeezi sẽn lebg Wẽnnaam Rĩungã rĩm yʋʋmd 1914 poor bilf bala, a riga a Sʋɩtãan saasẽ. B lob-a-la tẽngã zugu, n na n wa sãam-a fasɩ ka la bilfu. (Vẽn. 12:9, 12) La a Sʋɩtãan pa zĩ sɩɩ n gũud rẽ ye. A sũurã puuga wʋsgo, t’a zabd ne Wẽnnaam nin-buiidã. (Vẽn. 12:13, 17) Rẽ n so t’a Sʋɩtãan dũniyã neb maneg n kis Wẽnnaam nin-buiidã. La d pa segd n zoe a Sʋɩtãan ne a poorẽ dãmbã ye. Tõnd me tõe n basa d yam wa tẽn-tʋmd a Polle. A yeelame: “Wẽnnaam sã n be ne tõndo, ãnda n tõe n tõog-do?” (Rom. 8:31) D tõe n kɩsa a Zeova sɩd zãng-zãnga. w22.07 18 s. 14-15

A Zeezi ra pa maand yɩɩr n tagsdẽ tɩ dũniyã saab wakate, koe-moondbã sõor na n paoogame ye. A ra miime tɩ yɩɩn-gʋlsdã sẽn da pĩnd n togs bũmb ningã na n pidsame. Yɩɩn-gʋlsdã ra yeelame yaa: “Daar ning fo sẽn na n lʋɩ f tãb-biisã taoor n kẽng zabrã, fo nebã na n kõo b mens ne yamleoogo.” (Yɩɩn. 110:3) Y sã n moond koe-noogã, y teenda a Zeezi la tʋm-tʋmd sẽn tũud sɩdã, n sõngd n pidsd bãngr-gom-kãngã. Yaa sɩd tɩ tʋʋmdã kẽngda taoore, la d segda zu-loees wʋsg me. Zu-loɛɛg a ye Rĩungã koe-moondbã sẽn segd yaa b sẽn paamd namsg b tũudmã yĩngã. Sɩdã kɩɩsdbã, tũudum taoor dãmba, la politikã taoor dãmb yelgda goam sẽn pa sɩda, d tʋʋmdã wɛɛngẽ. D zakã rãmba, d mitinsi, la d tʋmd-n-taasã sã n kelgd ziri kãensã, b tõe n dat n modg-d lame tɩ d bas a Zeova tũub la koɛɛgã moonego. Tẽns kẽere, b bugsda d saam-biisã, n yaand-ba, hal n mi n kẽes-b bãens roogo. w22.07 8 s. a 1; 9 s. a 5-6

A Zeova ratame tɩ d yãk wakat takɩ n zãmsd Biiblã n pa vaandẽ, la d bʋgsd d sẽn karemdã zugu. D sã n tũud d sẽn zãmsd bũmb ninsã, d tẽebã pãng paasdame, tõnd ne d saasẽ Ba wã zoodã me paamda pãnga. Woto kɩtdame tɩ d paam pãng n tõog n mao ne zu-loeesã. Sẽn paase, a Zeova kõta neb nins sẽn tẽed a Gomdã a vʋʋsem sõngã. Vʋʋsem sõngã tõe n kõo tõnd “pãng ning sẽn yɩɩd ninsaal rẽndã” tɩ d tõog n mao ne zu-loɛɛg buud fãa. (2 Kor. 4:7-10) Ne a Zeova sõngre, “tʋm-tʋmd sẽn tũud sɩd la sẽn tar yamã” yiisda sõssa, video-rãmb la mizigsi, sẽn tõe n sõng-d tɩ d tẽebã paam pãnga, la d kell n tall zood sõma ne a Zeova. (Mat. 24:45) A Zeova sõnga a nin-buiidã tɩ b nong taab la b belsd taab toog wakate. (2 Kor. 1:3, 4; 1 Tes. 4:9) D tẽed-n-taasã me tʋllame n sõng-d tɩ d kell n maan sɩd ne a Zeova d sã n wa maood ne zu-loeese. w22.08 12 s. 12-14

D sã n pẽgd d tẽed-n-taasã, b tʋʋm-sõma wã yĩnga b maneg n zemsd taaba, tɩ b nonglmã ne taabã me pãng paasdẽ. Wakat ninga, no-koɛɛm tõe n zĩnda kiris-neb tẽeb sẽn bɩ sʋka. A buud zĩnda tẽn-tʋmd a Poll ne a zo-nongr a Barnabaas sʋka. B wẽe no-koɛɛm a Mark poorẽ. A Poll ra pa rat t’a Mark le tũ-b n gilg n moon koɛɛgã, t’a Barnabaas ra rat t’a tũ. “Rẽ waa ne sũ-pu-kãseng bãmb sʋka,” tɩ ned fãa rɩk a sore. (Tʋʋ. 15:37-39) La a Poll ne a Barnabaas la a Mark fãa modgame tɩ laafɩ le zĩnd b sʋka. Kaoosg zugẽ, a Poll wilgame t’a Barnabaas ne a Mark maana yẽ neere. (1 Kor. 9:6; Kolo. 4:10, 11) Mo-yõsr sã n wa be tõnd ne tigingã ned sʋka, tõnd me segd n modgame n welg-a, la d ket n get a soabã sẽn maand tɩ yaa sõma n tɩ yɩɩdã. D sã n maand woto, sõngdame tɩ laafɩ la zems-n-taar kell n zĩnd tigingã pʋgẽ. w22.08 23 s. 10-11

D sẽn modgd n na n tũ a Zeova noyã sẽn yaa tɩrsã, d pa segd n makd d meng ne d taabã, n tagsdẽ tɩ d são-b lame ye. D segd n tẽegame t’a Zeova la “dũniyã fãa Bʋ-kaoodã.” (Sɩng. 18:25) A pa kõ-d sor tɩ d kao d taabã bʋʋd ye. Tẽeg-y a gom a Zozɛf sẽn da yaa nin-tɩrgã mak-sõngã yelle. A ra pa kaood neb a taabã bʋʋdo, baa neb nins sẽn maan-a wẽngã. A kẽem-dãmbã yõk-a lame n koos t’a lebg yamba, la b tɩ yeel a ba wã t’a kiime. Kaoosg zugẽ, a Zozɛf le wa n paam n bee ne a zakã rãmba. A ra lebga nin-kãsenga, n da tõe n kao a kẽem-dãmbã bʋʋd ne wẽnem, n dok a sũuri. Baa ne a Zozɛf kẽem-dãmbã sẽn da tek yam n kos sugrã, b ra yɛɛsdame t’a Zozɛf na n doka a sũur ne-ba. La a Zozɛf yeel-b lame yaa: “Ra maan-y rabeem ye. Mam bee Wẽnnaam zĩigẽ la?” (Sɩng. 37:18-20, 27, 28, 31-35; 50:15-21) A Zozɛf sak n deegame tɩ yaa a Zeova bal n tar sor n na n kao bʋʋdo. w22.08 30 s. 18-19

Yãmb miime t’a Zeova tõe n tũnuga ne yãmb n leok ned pʋʋsg bɩ? Y yaa kãsem-soaba, kãsem-sõngda, so-pakd wall koe-moonda, a sɩd tõe n tũnuga ne yãmb n maan woto. Y yaa bi-bɩɩg wall y yʋʋmã vẽsgame, bɩ y yaa rao wall paga, a tõe n tũnuga ne yãmb n maan woto. Ned sẽn nong a Zeova sã n wa pʋʋs-a n kot sõngre, tõnd Wẽnnaamã tũnugda ne kãsem-dãmbã la neb a taab sẽn maand sɩd ne-a n ‘bels a soabã wʋsgo.’ (Kolo. 4:11) D sẽn paam t’a Zeova tõe n tũnug ne tõnd n sõng d tẽed-n-taasã noom-d-la wʋsgo! D tõe n sõnga d tẽed-n-taasã la d keng b raoodo, bã-longdg sasa, sabab-wẽng sasa, wall b sã n wa namsd-b b tẽebã yĩnga. D tõe n dat n sõnga d taabã, la tõe tɩ d zakã neb kẽer n ka laafɩ, wall b tara ligd zu-loees hal tɩ pa nana ye. Baa ne rẽ, d ket n dat n sõnga d tẽed-n-taasã. A Zeova sũur nooma d sẽn maand d sẽn tõe fãa n na n sõng-bã.—Yel. 19:17. w22.12 22 s. a 1-2

Nonglmã yaa tɩlɛ, d sã n dat n yɩ ned b sẽn tõe n kɩs sɩda. A Zeezi yeelame tɩ tõogã noyã sʋka, a yiib n yaa kãsems n yɩɩda. Yaa nong a Zeova, la nong f to. (Mat. 22:37-39) D sẽn nong a Zeova wã yĩnga, d rat n dɩka a togs-n-taare, n yɩ neb b sẽn tõe n kɩs sɩda. Wala makre, d sẽn nong d tẽed-n-taasã yĩnga, d pa rɩkd b yɛl n togsd neb a taab ye. D pa na n dɩk b yɛl n yelge, yɛl sẽn tõe n nams-ba, n ning-b yãnde, bɩ sẽn tõe n kɩt tɩ b paam toog ye. Sik-m-mengã me tõe n sõng-d lame tɩ d yɩ ned b sẽn tõe n kɩs sɩda. Kiris-ned sẽn yaa sik-m-meng soab pa baood wakat fãa n na n yɩ pipi n taas neb a taabã kibay, n wilg tɩ yẽ n mi yɛlã fãa ye. (Fili. 2:3) A pa maand tɩ nebã neẽ t’a mii yɛl neb a taab sẽn pa segd n bãnge, n tar n wukd a meng ye. Sẽn paase, d sã n yaa sik-m-meng soaba, d pa na n togsd nebã tõnd mensã tagsg yɛl kẽer wɛɛngẽ, tɩ b yaool n pa gomd rẽ yell Biiblã pʋgẽ, wall siglgã sɛbã pʋsẽ ye. w22.09 12 s. 12-13

Malɛk n yeel a Dãniyɛll tɩ wakat n wat tɩ Wẽnnaam nin-buiidã na n wʋm a Dãniyɛll sebrã bãngr-goamã võor sõma. La “Nin-wẽnsã baa a ye pa na n wʋm a võor ye.” (Dãn. 12:10) Yaa masã meng la d segd n wilg ne d tʋʋmã tɩ d pa naag nin-wẽnsã sʋk ye. (Mal. 3:16-18) A Zeova tigimda neb sẽn yaa yẽ mengã “rẽnda,” rat n yeel tɩ neb a sẽn nong wʋsgo. Yaa vẽeneg tɩ d rat n zĩnda nin-kãensã sʋka. Sɩd-sɩdã, bõn-sõma wʋsg n paamd pidsg masã menga. La bõn-sõma sẽn yɩɩd woto n na n paam pidsgu. Ka la bilfu, Wẽnnaam a Zeova na n sãama nin-wẽnsã fãa. Rẽ poore, d na n yãa a sẽn pʋlem a Dãniyɛll bũmb ningã pidsgu. A yeel-a lame yaa: “Fo na n wa yika wakatã saabẽ n deeg f pʋɩɩrã.” (Dãn. 12:13) Yãmb yãgdame n na n yã a Dãniyɛll la y nin-nongdsã sẽn maan kaalmã sẽn na n wa “yikã” bɩ? Sã n yaa woto, bɩ y maan y sẽn tõe fãa n kell n sak a Zeova. Rẽ, y tõe n basa y yam t’a na n gʋlsa y yʋʋrã vɩɩm sebrã pʋgẽ wakat fãa yĩnga. w22.09 24 s. 17; 25 s. 19-20

Gom-kãensã tog n kenga a Ezekɩyɛll raoodo. Bõe yĩnga? Sãmbg kae t’a tẽegame t’a Zeova ra yeela a Moyiiz ne a Ezayi me woto, a sẽn wa n yãk-b tɩ b na n lebg a no-rɛɛsdbã. (Yik. 3:10; Eza. 6:8) A leb n da miime t’a Zeova sõng-b lame tɩ b tõog n tʋm tʋʋmdã a sẽn kõ-bã, baa sẽn da pa nana wã. Dẽnd a Zeova sẽn yeel a Ezekɩyɛll naoor a yiib fãa t’a tʋmd-a lame wã, seka a na kɩs sɩd t’a Zeova na n teel-a lame. Sẽn paase, a Ezekɩyɛll sebrã pʋgẽ, naoor wʋsg la a yeel yaa: “A Zeova goma ne maam n yeele.” (Eze. 3:16) D yãtame t’a yeela naoor wʋsg me yaa: “A Zeova le goma ne maam n yeele.” (Eze. 6:1) Dẽnd yaa vẽeneg t’a Ezekɩyɛll ra kɩsa sɩd tɩ yaa a Zeova n tʋm-a. Sẽn paase, a Ezekɩyɛll ba wã ra yaa maan-kʋʋda. Dẽnd d tõe n yeelame t’a wilga a Ezekɩyɛll t’a Zeova ra togsda a no-rɛɛsdbã wakat fãa t’a na n sõng-b lame. Sɩd me, a Zeova goma ne a Zakoob, a Izaak la a Zeremi, n yeel b ned kam fãa yaa: “Mam bee ne foom.”—Sɩng. 26:24; 28:15; Zer. 1:8. w22.11 2 s. a 3

Baa ne a Ãdem ne a Awa sẽn maan yel-wẽnd tɩ kɩt tɩ b kambã la b yagensã lebg kiidbã, a Zeova sẽn da rat tɩ vɩɩmã yɩ to-to sɩngrẽ wã pa toeem ye. (Eza. 55:11) A ket n datame tɩ wẽn-sakdbã wa vɩɩmd wakat sẽn kõn sa. Ges-y-yã a Zeova sẽn yeel la a maan bũmb ning n na n pids a raabã. A Zeova pʋlmame t’a na n wa vʋʋga sẽn ki-bã, tɩ b paam n tõe n vɩɩmd wakat sẽn kõn sa. (Tʋʋ. 24:15; Tɩt 1:1, 2) A Zoob sẽn yɩ wẽn-sakdã ra kɩsa sɩd t’a Zeova sɩd ratame n vʋʋg sẽn ki-bã. (Zoob 14:14, 15) No-rɛɛs a Dãniyɛll ra miime tɩ ninsaalbã na n wa vʋʋgame n tõe n vɩɩmd wakat sẽn kõn sa. (Yɩɩn. 37:29; Dãn. 12:2, 13) A Zeezi wakatẽ wã, Zʋɩf-rãmbã me ra miime tɩ neb nins sẽn tũud a Zeova ne b sũy fãa wã na n wa paama “vɩɩm sẽn ka sɛtã.” (Luk 10:25; 18:18) A Zeezi goma pʋlen-kãng yell naoor wʋsgo. Sẽn paase, a sẽn wa n ki wã, a Ba a Zeova vʋʋg-a lame.—Mat. 19:29; 22:31, 32; Luk 18:30; Zã 11:25. w22.12 4-5 s. a 8-9

A Zeova yeta tõnd tɩ d kolg-a. (Zak 4:8) A ratame n yɩ d Wẽnnaam, d Ba la d zoa. A kelgda d pʋʋsgã, la a sõngd-d toog wakate. A leb n zãmsda tõnd ne a siglgã maasem la a kogend tõndo. D sã n pʋʋsd a Zeova n karemd a Gomdã la d bʋgsd a zugu, d na n tõog n kolg-a lame. D sã n maand woto, d na n maneg n nong-a-la ne d sũur fãa. D ratame n sakd a Zeova la d waoogd-a wa sẽn segdã. (Vẽn. 4:11) D sã n bãngd a Zeova n paasdẽ, d na n maneg n kɩsa yẽ ne a siglgã a sẽn lugl tɩ sõngd tõndã me sɩd n paase. A Sʋɩtãan modgda bilf-bilf n na n kɩt tɩ d wa pa le kɩs a Zeova ne a siglgã sɩd ye. La d tõeeme t’a ra tõog-d ye. D tẽebã sã n tar pãnga, la d sã n kɩs a Zeova sɩd zãng-zãnga, d pa na n wa bas Wẽnnaam ne a siglgã ye.—Yɩɩn. 31:13, 14. w22.11 14 s. a 1-3

Kiris-neb hakɩɩkã wʋsg sak n bõna bũmb wʋsgo, hal n gẽneg b yõor menga, b sẽn nong a Zeova sẽn yaa b naab sẽn ka to wã yĩnga. B yãka yam n na n kell n maan sɩd ne a Zeova. B yaa wa Ebre neb a tãabã sẽn kell n maan sɩd ne Wẽnnaam sẽn ka to wã, t’a fãag-b wʋng sẽn wɩng wʋsgã pʋgẽ wã. Yɩɩn-gʋlsd a Davɩɩd wilgame tɩ tara yõod wʋsg tɩ d kell n tall d burkĩndã. Ad a sẽn yeele: “A Zeova na n kaoo buud toɛy-toɛyã bʋʋdo. Zeova, kao-y mam bʋʋd wa sẽn zems m tɩrlmã, la wa sẽn zems m burkĩndã.” (Yɩɩn. 7:8) A leb n yeelame yaa: “Bɩ mam burkĩndã ne m tɩrlmã kogl-ma.” (Yɩɩn. 25:21) Bũmb ning sẽn tar yõod d vɩɩmã pʋgẽ n tɩ yɩɩdã yaa d kell n maan sɩd ne a Zeova. D sã n maan woto, d tõe n yeela wa yɩɩn-gʋlsdã. Ad a sẽn yeele: “Sũ-noog rãmb la neb nins sẽn kẽnd ne burkĩndã, sẽn sakd-b a Zeova tõogã.”—Yɩɩn. 119:1. w22.10 17 s. 18-19

A Zoob paam n goma bũmb wʋsg yell ne nebã. La yaa a Zeova sẽn gom bũmb ning yell ne-a wã n yɩ-a noog n tɩ yɩɩda. A Zeova goma bõn-kãsems a sẽn naan yell ne a Zoobe, n na n sõng-a t’a bãng t’a yaa yam-kãseng soaba, la t’a tõe n gesa a nin-buiidã yelle. Wala makre, a Zoob bãngame tɩ Wẽnnaam geta rũmsã yelle, la t’a tõe n gesa yẽ me yelle. (Zoob 38:39-41; 39:1, 5, 13-16) A sẽn bʋgs bũmb nins a Zeova sẽn naanã zugã, sõng-a lame t’a bãng bũmb wʋsg a Wẽnnaamã zugu. Tõnd me sã n maag d yĩng n ges bũmb nins Wẽnnaam sẽn naanã, na n sõng-d lame tɩ d bãng-a sõma n paase. La yɩl n paam n maan woto tõe n yɩɩ toog wʋsgo. Y sã n vɩɩ galʋ-tẽng pʋgẽ, tõe n yɩɩ toog tɩ y yã bũmb wʋsg a Zeova sẽn naane. Baa d sã n pa vɩ galʋ-tẽng pʋgẽ, tõe n yɩɩ toog tɩ d paam sẽk n ges a Zeova sẽn naanã. La d segd n baooda sẽka, la d modgd n bʋgsd bũmb nins a Zeova sẽn naanã zugã. w23.03 15 s. a 1-2

A Zeezi yeelame tɩ “tẽn-digimd-kãsems” la sabab-wẽns a taab na n zĩnda dũniyã zugu, nand tɩ saabã ta. (Luk 21:11) A yeelame me tɩ ‘noyã kɩɩsg na n talla paasgo.’ Nin-kʋʋrã, nen-kɛglmã la terorismã wilgda rẽ vẽenega. (Mat. 24:12) A Zeezi zɩ n yeel tɩ yaa sẽn pa tũud-b a Zeova wã bal la yel-kãensã na n paam ye. A Zeova Kaset rãmb wʋsg n pʋd n namsde, sabab-wẽns yĩnga. (Eza. 57:1; 2 Kor. 11:25) A Zeova pa na n maan yel-solemd tɩ sabab-wẽng ra paam-d ye. La a na n kõ-d-la bũmb sẽn na n sõng-d tɩ d kell n tall sũur pʋgẽ bãane. D sã n segl d mens sõma, rẽ na n yɩɩ nana ne-do. La rẽ yĩnga, woto rat n yeelame tɩ d pa teeg a Zeova bɩ? Pa woto ye. D sã n segl d meng sabab-wẽng yĩnga, wilgdame tɩ d kɩsa sɩd t’a Zeova tõe n gesa d yelle. Bõe yĩng tɩ d yet woto? Bala Wẽnnaam Gomdã sagenda tõnd tɩ d segl d mens yel-beed yĩnga. w22.12 18 s. a 9-10

A Zozɛf sẽn wa n ket bãens roogẽ wã, a Zeova kɩtame t’a Farawõ sẽn yaa Ezɩpt rĩmã zãms zãmsd a yiib sẽn da namsd-a wʋsgo. A sẽn wa n bãng t’a Zozɛf tõe n bilga a zãmsdã võorã, a tʋmame tɩ b tɩ tall-a n wa. Ne a Zeova sõngre, a Zozɛf tõog n bilga a Farawõ a zãmsdã võore. A Farawõ sũurã yɩɩ noog ne a Zozɛf sẽn yeel-a t’a maan bũmb ningã. A sẽn bãng t’a Zeova ra bee ne a Zozɛfã, a yãk-a lame t’a na n lʋɩ taoor n ges rɩɩbã yell Ezɩpt soolmã fãa pʋgẽ. (Sɩng. 41:38, 41-44) Rẽ poore, kom-kãseng n zĩnd Ezɩpt la Kanaã sẽn yaa tẽng ning a Zozɛf zakã rãmb sẽn da be wã. Masã, a Zozɛf paamame n tõe n kogl a zakã rãmba, tɩ buud ning pʋgẽ Mesi wã sẽn na n dogã ra menem ye. Yaa vẽeneg tɩ yaa a Zeova n kɩt t’a Zozɛf ra paamd tõogr a sẽn da maandã fãa pʋgẽ. A Zeova kɩtame t’a Zozɛf ba-biisã mag-wẽngã lebg bũmb sẽn sõng t’a raabã paam pidsgu. w23.01 17 s. 11-12

Ned sẽn gũusd a meng gũusd n geta bũmb ning fãa sẽn tõe n sãam yẽ ne a Zeova zoodã, la a modgd n zãagd a meng ne bõn-kãense. Woto, a kelld n paada Wẽnnaam nonglmã pʋgẽ. (Yel. 22:3; Ziid 20, 21) Tẽn-tʋmd a Poll keooga kiris-nebã tɩ b gũus b mense. Wala makre, a yeela kiris-neb nins sẽn da be Efɛɛzã yaa: “Bɩ y kell n gũus neer ne yãmb sẽn kẽnd to-to wã tɩ ra yɩ wa neb sẽn ka yam ye. Bɩ y yɩ wa yam dãmba.” (Efɛɛ. 5:15, 16) A Sʋɩtãan baooda wakat fãa n na n sãam tõnd ne a Zeova zoodã. Rẽ n so tɩ Biiblã sagend tõnd tɩ d “kell n bao n bãng a Zeova raabã sẽn yaa a soaba,” sẽn na yɩl t’a Sʋɩtãan sɩlmã baa a ye ra tõog-d ye. (Efɛɛ. 5:17) Sẽn na yɩl n bãng n yãk yam sẽn yaa sõma, d segd n bao n bãnga “a Zeova raabã sẽn yaa a soaba.” D maanda woto, d sã n karemd Wẽnnaam Gomdã wakat fãa la d bʋgsd a zugu. D sã n bãngd a Zeova raabã n paasdẽ, la d modg n tall “Kiristã yamã buudu,” na n sõng-d lame tɩ d ket n kẽnd wa “yam dãmba,” baa Biiblã sã n pa kõ noor vẽeneg-vẽeneg bũmb d sẽn dat n maan wɛɛngẽ. (1 Kor. 2:14-16) w23.02 16-17 s. a 7-9

Naoor a wãn la y yẽesd y roogã? Tõe tɩ y sẽn wa n na n kẽ y roogẽ wã paalmã, y maaga y yĩng n pek-a la y yẽes-a sõma. La y sã n wa bas n pa le yẽesd-a, bõe n na n maane? Yaa vẽeneg tɩ wubsgã la sagdã na n le kẽe roogã zĩig fãa tao-tao. Y sã n dat tɩ y roog kell n yɩ yɩlemde, y segd n yẽesd-a-la wakat fãa. Woto me, d segd n modgame n manegd d tagsa wã la d tʋʋm-tʋmdɩ wã sẽn na yɩl tɩ kell n zems ne a Zeova raabã. Yaa vẽeneg tɩ nand tɩ d reeg lisgu, d maana d sẽn tõe fãa n toeem bũmb wʋsg d vɩɩmã pʋgẽ, sẽn na yɩl n “yɩlg d mens n yiis rẽgd buud fãa sẽn yaa yĩngã rẽnd la sɩɩgã rẽnda.” (2 Kor. 7:1) La masã, d segd n tũu tẽn-tʋmd a Poll saglgã sẽn yet tɩ d ‘segd n ket n manegda d tagsa wã tɩ lebgd paalsã.’ (Efɛɛ. 4:23) Dũni-kãngã nebã tagsa wã la b tʋʋm-tʋmdɩ wã sẽn yaa wa wubsg la sagdã tõe n dẽgma tõnd tao-tao. D sã n pa rat n bas tɩ dũniyã rẽgem tõndo, la d kell n tat a Zeova yam, segdame tɩ wakat fãa bɩ d manegd d tagsa wã, d tʋʋm-tʋmdɩ wã la d tʋlsmã. w23.01 8 s. a 1-2

Tags-y n ges-y a Zeezi sẽn da zãmsd nebã to-to wã. A ra nong n togsda Gʋls-sõamyã goamã ne zugu. Wõnda a Zeezi lisgã sasa, Wẽnnaam sẽn wa n zae-a ne a vʋʋsem sõngã, a lebg n tẽega a vɩɩmã sẽn da yaa to-to saasẽ wã. Goam nins a sẽn togs a lisgã poorã, la goam kẽer a sẽn togs bilf nand t’a ki wã ra yita Gʋls-sõamyã pʋgẽ. (Tõo. 8:3; Yɩɩn. 31:5; Luk 4:4; 23:46) Yʋʋm a tãab la pʋɩ-sʋkã a Zeezi sẽn zĩnd tẽngã zugã, naoor wʋsgo a karma Wẽnnaam Gomdã zãma sʋka, la a bilg a võore. (Mat. 5:17, 18, 21, 22, 27, 28; Luk 4:16-20) Yʋʋm wʋsg nand t’a Zeezi sɩng koɛɛgã moonego, a karma Wẽnnaam Gomdã, la a kelg a kareng naoor wʋsgo. Sãmbg kae t’a Maari ne a Zozɛf sã n da wa sõsda, b goam kẽer da yita Gʋls-sõamyã pʋgẽ. (Tõo. 6:6, 7) Sẽn paase, Vʋʋsg daar fãa, a Zeezi ra tũuda a zakã rãmb n kẽnd Zʋɩf-rãmbã zãmsg roogẽ wã. (Luk 4:16) Beenẽ, a tog n da maagda a yĩng n kelgd Gʋls-sõamyã karengã. w23.02 8 s. a 1-2

Bũmb wʋsg n kɩt tɩ d segd n nong a Zeova. Wala makre, yãmb bãngame tɩ vɩɩmã yita yẽ nengẽ, la tɩ “kũun sẽn yaa sõma buud fãa, la kũun sẽn zems zãng buud fãa yita yĩngri.” (Yɩɩn. 36:9; Zak 1:17) Sɩd me, bõn-sõma nins fãa d sẽn paamdã yita d Wẽnnaamã sẽn yaa kõata, la sẽn nong-dã nengẽ. A Zeezi sẽn ki tɩ yɩ maoongã yaa kũun sẽn ka to a Zeova sẽn kõ-do. Bõe yĩng tɩ d yet woto? Tags-y n ges-y zems-n-taar ning sẽn be a Zeova ne a Bi-riblã sʋkã. A Zeezi yeelame tɩ ‘Ba wã nonga yẽ,’ la tɩ yẽ me “nonga Ba wã.” (Zã 10:17; 14:31) Yʋʋm ka tɛkã b sẽn be ne taabã, b zems-n-taarã tara paasgo. (Yel. 8:22, 23, 30) Tags-y n ges-y a Zeova sũur sẽn sãam to-to, a sẽn sak t’a Bi-riblã nams la a ki wã. A Zeova nonga ninsaalbã wʋsgo, yãmb me sẽn naage, hal n sak t’a Bi-riblã a sẽn nongã wa ki tɩ yɩ maoongo, tɩ kɩt tɩ yãmb ne nebã fãa tõe n wa paam n vɩɩmd wakat sẽn kõn sa. (Zã 3:16; Gal. 2:20) Bũmb nins sẽn kɩt tɩ d nong a Zeova wã sʋka, yãoã la kãseng n yɩɩda. w23.03 4-5 s. 11-13

D segd n zãaga d mens ne sɩdã-kɩɩsdbã sẽn yet bũmb ninsã. A Zeezi ninga Pɛrgam tigingã neb kẽer taale, b sẽn da wat ne welsg b tẽed-n-taasã sʋkã yĩnga. (Vẽn. 2:14-16) A pẽga Tiyatiir tigingã neb nins sẽn da zãagd b mens ne a “Sʋɩtãan yel-solgdsã,” la a sagl-b tɩ b ‘gãd sɩdã kãn-kãe.’ (Vẽn. 2:24-26) Kiris-neb nins sẽn da sɩng zãmsg nins sẽn yaa ziri wã tũubã ra segd n teka yam n kos sugri. La tõnd yẽ rũndã-rũndã? D segd n zãaga d mens ne zãmsg nins fãa sẽn kɩɩsd Biiblã sẽn yetã. Sɩdã kɩɩsdbã tõe n “wõnda wẽn-sakdba,” la b yaool n “pa vɩ wa wẽn-sakdb ye.” (2 Tɩm. 3:5) D sã n zãmsd Biiblã sõma, yɩta nana tɩ d tõog n bãng ziri zãmsgã, la d zãag d meng ne rẽ. (2 Tɩm. 3:14-17; Ziid 3, 4) D segd n modgame tɩ d sẽn tũud a Zeova to-to wã tat a yam. D sã n wa maan bũmb tɩ kɩt tɩ d sẽn tũud a Zeova to-to wã pa le tat a yam, d segd n demsa yɛlã zĩig pʋgẽ.—Vẽn. 2:5, 16; 3:3, 16. w22.05 4 s. a 9; 5 s. 11