Yʋʋm-sare

Etiyopi nin-naabã sɩd ra segl n saa lisg reegr yĩng bɩ? Etiyopi raoã “ra kẽnga Zerizalɛm n tɩ waoog Wẽnnaam.” (Tʋʋ. 8:27) A ra yaa bu-zẽng neda, la a tuubame n sak Zʋɩf-rãmbã zãmsgo. Sãmbg kae t’a zãmsa Biiblã babg ning b sẽn da gʋls ne Ebre wã, n bãng a Zeova. Baa ne rẽ, a ra tʋll n bãng n paasame. A Filip sẽn wa n seg nin-naabã sorã zugã, a ra karemda no-rɛɛs a Ezayi seb-pindmã. (Tʋʋ. 8:28) A ra tʋllame n bãng bũmb a taab n paase. A yii hal Etiyopi n kẽng Zerizalɛm wẽnd-doogẽ wã, n na n tɩ waoog a Zeova. A Filip sõnga Etiyopi raoã t’a bãng bũmb sẽn da tar yõod wʋsgo, wala makre, Mesi wã sẽn sɩd yaa ned ninga. (Tʋʋ. 8:34, 35) A sẽn da nong a Zeova ne a Bi-riblã to-to wã pãng paasame. Rẽ kɩtame t’a maan bũmb sẽn tar yõod wʋsgo. A yãka yam n na n deeg lisg n lebg a Zeezi karen-biiga. A Filip sẽn yã tɩ raoã ra segl n saame wã, a lis-a lame. w23.03 8-9 s. a 3-6

D sã n yaa ned sẽn pa togsd sɩda, d pa tõe n ta a Zeova yam ye. (Yel. 6:16, 17) Yaa sɩd tɩ rũndã-rũndã, nebã wʋsg getame tɩ ziri yagb pa wẽng ye. La a Zeova yẽ nifẽ, yaa wẽnga. (Yɩɩn. 15:1, 2) Dẽnd d segd n zãaga d meng ne goam sẽn tolg n yaa ziri. La pa rẽ bal ye. D segd n zãaga d meng me ne goam sẽn pa sɩd zãnga. D segdame me n zãag d mens ne wɩdga. (Yel. 25:23; 2 Tes. 3:11) Y sã n wa getẽ tɩ sõsg lebga wɩdga, bɩ y wẽnemd sõsgã tɩ lebg goam sẽn kengd raoodo. Sẽn mik tɩ d vɩɩ dũni neb wʋsg sẽn gomd gom-põaas la gom-dẽgdã, d segd n modgame tɩ d goamã noom a Zeova. D sã n modgd n na n gomd goam sẽn yaa sõma koɛɛgã mooneg sasa, tigissã sasa, la d sã n wa sõsd ne neb a taabã, a na n ninga d modgrã barka. A Zeova sã n wa sãam dũni-kãngã, na n lebga nana tɩ d tũnugd ne d no-goamã n pẽgd-a.—Ziid 15. w22.04 9 s. 18-20

D sã n tags a Zeova ne a Zeezi sẽn nong-d to-to wã zugu, kɩtdame tɩ d me rat n wilg tɩ d nong-b lame. (1 Zã 4:10) D sẽn mi t’a Zeezi kii tõnd yĩngã kɩtdame tɩ d sẽn nong yẽ ne a Zeova to-to wã pãng paasdẽ. Tẽn-tʋmd a Poll sẽn yeel Galat kiris-nebã bũmb ningã wilgdame t’a ra mii rẽ, la t’a sũur nooma ne rẽ. A yeel-b lame yaa: “Wẽnnaam Bi-riblã . . . nonga maam n kõ a meng mam yĩnga.” (Gal. 2:20) Ne a Zeezi kũumã sẽn yɩ maoongã maasem, a Zeova taka yãmb n wa a nengẽ tɩ y lebg a zoa. (Zã 6:44) Y sẽn mi t’a Zeova yãa bũmb sẽn yaa sõma y sũurẽ wã, la t’a yaoo yaood sẽn yaa kãseng wʋsg sẽn na yɩl tɩ y paam a zoodã, y sũur pa noom sɩda? Rẽ pa kɩt tɩ y maneg n nong a Zeova ne a Zeezi sɩda? D segd n soka d mens yaa: ‘Nonglem-kãng kɩtame tɩ m segd n maan bõe?’ D sẽn nong Wẽnnaam la Kiristã kɩtdame tɩ d wilgdẽ tɩ d nonga d taabã.—2 Kor. 5:14, 15; 6:1, 2. w23.01 28 s. a 6-7

Biiblã sõngdame tɩ Wẽnnaam daabã sẽn yaa a nin-buiidã “naag taab yam a yembr n tũ” yẽ wã paamd pidsgu. A Zeova kɩtame tɩ b gʋls Biiblã babs kẽere, tɩ yaa sik-m-mens rãmbã bal n tõe n wʋm a võore. (Luk 10:21) Ned sẽn be zĩig ning fãa tõe n paama Biiblã n karme. La yaa sik-m-mens rãmbã bal n sɩd wʋmd a goamã võore, la b tũud a sẽn yetã. (2 Kor. 3:15, 16) Bũmb toor-toor n be Biiblã pʋgẽ n wilgdẽ t’a Zeova yamã ka to ye. Yaa sɩd t’a Zeova zãmsda a nin-buiidã fãa sẽn naag taabã ne a Gomdã maasem. La a tũnugda ne a Gomdã me n zãmsd d ned kam fãa yembr-yembre, la a belsd tõndo. D sã n karemd Biiblã, d yãtame tɩ d ned kam fãa yell paka a Zeova. (Eza. 30:21) Y pa mi n karem vɛrse, tɩ yaa wa b gʋls-a-la yãmb yĩng sɩda? B yaool n gʋlsa Biiblã neb milyõ-rãmb yĩnga. Dẽnd maana wãn tɩ y sẽn karem bũmb ningã kell n zems ne yãmb sẽn da ratã bal kɛpɩ? Bala, soab ning sẽn kɩt tɩ b gʋls Biiblã yamã ka to ye.—2 Tɩm. 3:16, 17. w23.02 4-5 s. a 8-10

D sẽn yaa kiris-neb hakɩɩkã, d nonga a Zeova ne d sũy fãa. D ratame n maand d sẽn tõe fãa a Zeova tũudmã pʋgẽ. Sẽn na yɩl n tõog n maan woto, d segd n yãka d sẽn dat n maan a Zeova tũudmã yĩnga. Wala makre, n modg n bɩɩs zʋg-sõma, n modg n zãms bũmb sẽn na n paas d minimã, wall n baood d sẽn tõe n maan n sõng neb a taabã. Bõe yĩng tɩ d segd n tʋll n wɩng ne a Zeova tũubu? Pipi, yaa d sẽn dat n noog d saasẽ Ba wã sũurã. A Zeova sũur noomame, a sã n neẽ tɩ d tũnugda ne d minimã la d bãngrã n tʋmd a tʋʋmdã wʋsgo. Sẽn paase, d ratame n paam n sõng d tẽed-n-taasã. (1 Tes. 4:9, 10) Baa d sẽn kaoos sɩdã pʋgẽ to-to, d fãa tõe n maneg n wɩnga ne a Zeova tũubu. w22.04 22 s. a 1-2

Ka la bilfu, dũniyã politik siglsã na n wa zaba ne Babilon-kãsengã, sẽn yaa ziri tũudmã fãa sẽn naag taaba. Rẽ n na n yɩ to-kãsengã sɩngre. Woto na n kɩtame tɩ neb wʋsg wa sɩng a Zeova tũub bɩ? Ayo. Vẽnegr sak a 6 pʋd n wilgdame tɩ wakat-kãnga, neb nins sẽn pa tũud a Zeova wã na n baoo koglg dũni-kãngã politikã la leebgã sigls nengẽ. Biiblã pʋgẽ, b maka sigls-kãens ne tãmse. Sẽn mik tɩ nin-kãensã pa na n sak n teel Rĩungã, Wẽnnaam a Zeova na n ges-b-la wa kɩɩsdba. (Luk 11:23; Vẽn. 6:15-17) Sɩd-sɩdã, to-kãsengã sasa, a Zeova nin-buiidã manesem na n yɩɩ toor fasɩ ne neb a taabã. Bãmb bal n na n ket n yaa neb sẽn be tẽngã zug n tũud a Zeova, la sẽn zãgs n pa teend “we-rũngã.”—Vẽn. 13:14-17. w22.05 16-17 s. a 8-9

Wẽnnaam nin-buiidã pa tog n taasd nebã ‘Rĩungã koe-noogã’ bal ye. (Mat. 24:14) B segdame me n teel tʋʋmd ning malɛgsã sẽn tʋmdã. B goma tʋʋm-kãng yell Vẽnegr sak a 8-10 pʋgẽ. Malɛgsã moonda tood wʋsg sẽn na n sig neb nins sẽn kɩɩsd Wẽnnaam Rĩungã zugu. Dẽnd d tõe n yeelame t’a Zeova Kaset rãmbã moonda koɛɛga, sẽn wõnd “sapɩlem ne bugum,” n wilgd tɩ Wẽnnaam na n wa kaoo a Sʋɩtãan dũniyã sigls toɛy-toɛyã bʋʋdo. (Vẽn. 8:7, 13) Nebã segd n bãngame tɩ dũniyã saab kolgame, n toeem b yel-manesmã n wa tõog n põs a Zeova sũ-puugrã daare. (Sof. 2:2, 3) La pa koɛɛg sẽn noom neb wʋsg ye. Koe-kãng taasg baooda raoodo. To-kãsengã sasa, bʋ-kaoor koɛɛgã d sẽn na n taas nebã na n maneg n nams-b lame n yɩɩda.—Vẽn. 16:21. w22.05 7 s. 18-19

Mams-y roagdb sẽn yaa kiris-neb sã n wa paam biiga. Tõe tɩ yaa hal sẽn kaoos la b sɩng n kelgd sõss sẽn gomd kambã wubr yelle. La masã, sõs-kãens pʋsẽ saglsã na n talla yõod wʋsg ne-b n tɩ yɩɩda. B paama biig masã n na n wubi. Sɩd yaa tʋʋmd sẽn pa nana! Yɛl kẽer sã n wa toeem d vɩɩmã pʋgẽ, Biiblã sagls kẽer manegd n talla yõod wʋsg ne-do. Yaa rẽ me n kɩt t’a Zeova Kaset rãmbã karemd Wẽnnaam Gomdã wa b sẽn da yeel Israyɛll rĩm-dãmbã tɩ b maanã, la b bʋgsd a zug b “vɩɩmã tõr fãa.” (Tõo. 17:19) Roagdba, bãng-y tɩ y sẽn yaa kiris-nebã, y tara tʋʋm-kãseng sẽn tar yõod wʋsgo, sẽn yaa y sõng y kambã tɩ b bãng a Zeova. Y pa rat bal n sõng y kambã tɩ b bãng a Zeova ye. Y ratame me n sõng-b tɩ b wa nong-a ne b sũy fãa. w22.05 26 s. a 2-3

D sã n maand d bãngẽ ne yel-wẽnd d sẽn da maan pĩndã, wall d sẽn maan masã, rẽ bal pa sek ye. D tog n maana sẽn yɩɩd rẽ. Bũmb a Zeova sẽn get n bãng a sã n na n kõo ned sugri, yaa a soabã sã n wẽnemdame n bas bũmb nins a sẽn da maand pĩndã tɩ pa sõma wã fasɩ, la a vɩ tɩ zemsd ne a Zeova sẽn dat to-to wã. (Eza. 55:7) A tog n toeema a yam-tagsgã fasɩ, tɩ zems ne a Zeova sẽn get yɛlã to-to wã. (Rom. 12:2; Efɛɛ. 4:23) A segdame me n yãk yam n bas a tags-wẽnsã la a tʋʋm-wẽnsã. (Kolo. 3:7-9) Sẽn yɩɩd fãa, yaa d sã n tẽed Kiristã kũumã sẽn yɩ maoongã la d na n paam t’a Zeova tik rẽ n kõ-d sugri, la a yẽes d yel-wẽnã. A Zeova sã n neẽ tɩ d maanda d sẽn tõe fãa n na n toeem d yel-manesmã, a na n sɩd tika rẽ n kõ-d sugri.—1 Zã 1:7. w22.06 6 s. 16-17

A Ãdem ne a Awa sẽn kɩɩs a Zeova wã tɛka, ninsaalbã maanda taab pãnga. (Koɛ. 8:9) Wala makre, nebã tũnugda ne b naamã n namsd b taabã. Nin-wẽnsã tʋmda nen-kɛglem tʋʋma, lekoll-dãmbẽ wã, karen-biis kẽer tʋʋda b karen-bi-taase, la b bugsd-ba. Neb kẽer pʋd n namsda b zakã rãmb ne wẽnem. Dẽnd ãdem-biisã sẽn zoet taabã pa lingr ye. Wãn to la a Sʋɩtãan tũnugd ne ninsaal zoeesã n na n paam-do? A Sʋɩtãan tũnugda ne ninsaal zoeesã n na n kɩt tɩ d bas koɛɛgã moonego, bɩ n pa maand bũmb kẽer a Zeova sẽn dat tɩ d maan ye. A kɩtame tɩ goosneemã kẽer gɩdg d tʋʋmdã, la b namsd tõnd d tũudmã yĩnga. (Luk 21:12) A Sʋɩtãan dũniyã pʋgẽ, neb wʋsg yelgda kibay sẽn pa sɩd a Zeova Kaset rãmbã zugu, la sẽn sãamd b yʋʋre. Neb nins sẽn tẽed kiba-kãensã wã tõe n yaand-d lame, wall n namsd tõnd vẽeneg-vẽenega. (Mat. 10:36) A Sʋɩtãan sɩlmã linga tõnd bɩ? A bada. Bala a sɩng n maanda woto hal pipi kiris-nebã wakatẽ.—Tʋʋ. 5:27, 28, 40. w22.06 16 s. 10-11

“Neb wʋsgã” b sẽn na n zãms tɩ b tũ tɩrlem sorã yaa ãnd dãmba? Yaa sẽn na n vʋʋg-bã, ne sẽn na n põs-b Armagedõ zabrã sasa wã, n paas kamb nins sẽn na n dog dũni-paalgã pʋgẽ wa. Yʋʋm tusrã sã n wa sa, rẽ tɩ sẽn be-b dũniyã zugã fãa lebga neb sẽn zems zãnga. D segd n tẽegame tɩ ned sã n wa zems zãnga, pa rat n yeel t’a na n paama vɩɩm sẽn kõn sa wã tɩlɛ ye. Tẽeg-y-yã a Ãdem ne a Awa yelle. B ra zemsa zãnga, la ra yaa tɩlɛ tɩ b kell n wilg tɩ b sakda a Zeova n yaool n paam vɩɩm sẽn ka sɛtã. La bʋko, b pa kell n sak a Zeova ye. (Rom. 5:12) Yʋʋm tusrã poore, nebã fãa na n lebga neb sẽn zems zãnga. B sẽn zems zãngã, b na n kell n teela a Zeova naamã wakat fãa yĩng bɩ? Bɩ kẽer na n maana wa a Ãdem ne a Awa, n kɩɩs a Zeova baa ne b sẽn zems zãngã? Wãn to la d na n paam sogs-kãensã leoore? w22.09 22-23 s. 12-14

Yãmb sã n get yɛlã sẽn yaa to-to dũniyã gill zugã, yaa toog ne-y tɩ y tẽ tɩ manegr n wat bɩ? Zagsã pʋsẽ, nebã pa le nong taab wa pĩndã ye. Neb wʋsg lebgda nen-kɛglem dãmba, la rat-m-yembr dãmba. Yaa toog ne neb wʋsg tɩ b kɩs b taoor dãmbã sɩda. La yel-kãensã fãa tõe n sõng-y lame tɩ y bas y yam tɩ manegr n wate. Bõe yĩng tɩ d yet woto? Bala nebã yel-manesmã sẽn yaa to-to wã kell n zemsa ne b sẽn da pĩnd n togs Biiblã pʋgẽ tɩ na n yɩɩ to-to “yaoolem wakatã.” (2 Tɩm. 3:1-5) Yaa bãngr-gomd sẽn pidsd kɛpɩ tɩ ned ka tõe n kɩɩs ye. Leb n yaa kaset t’a Zeezi Kirist lebga Wẽnnaam Rĩungã rĩma. Pa bãngr-gom-kãngã bal n gomd Wẽnnaam Rĩungã yell ye. Bãngr-gom-kãensã fãa yekda taaba, la tɩ wakat ning a Zeova sẽn yãk n na n welg yɛlã ta n saame. w22.07 2 s. a 1-2

Koronaviriisã bã-longdgã sasa, d paama sagls tigissã maaneg la koɛɛgã mooneg wɛɛngẽ. Tao-tao bala, d sɩngame n maand tigissã la tigis-kãsemsã ne videokõnferãns maasem. Sẽn paase, koe-moonegã ra lebga ne lɛta la telefõn maasem. A Zeova ninga d modgrã barka. Filiyall-dãmb wʋsg pʋgẽ, b yãame tɩ koe-moondbã sõor paasa wʋsgo. Neb wʋsg paama kibay sẽn kengd raoodo. Tõe tɩ neb kẽer ra tagsdame tɩ bã-longdgã sasa, siglgã ra maanda gũusg tɩ loog noore. La bilf-bilfã, b wa n bãngame tɩ saglsã ra zemsame. D sã n bʋgs a Zeezi sẽn wilgd-d sor ne nonglem to-to wã zugu, d basda d yam tɩ sẽn wa n yaa a soab fãa, a Zeova ne a Bi-ribl-nongrã na n kell n sõng-d lame.—Ebre. 13:5, 6. w22.07 13 s. 15-16

D sẽn segd n pẽgd a Zeova d pʋʋsgã pʋgẽ wã sẽn yãk a toogo, d segdame me n pʋʋs-a barka, bõn-sõma nins a sẽn kõt tõndã yĩnga. Wala makre, d tõe n pʋʋsa a Zeova bark a sẽn naan fɩlɛɛr-dãmbã tɩ b yaa kulɛɛr toor-toorã yĩnga, d sẽn paamd rɩ-nood buud toor-toorã, la d sẽn tar zo-rãmb hakɩɩk yĩnga. D saasẽ Ba wã sẽn nong-dã kõ-d-la bõn-kãensã fãa la bũmb a taab n paase, sẽn na yɩl tɩ d paam sũ-noogo. (Yɩɩn. 104:12-15, 24) Sẽn tar yõod n tɩ yɩɩda, d tõe n pʋʋsa a Zeova barka, a sẽn kõt tõnd bũmb wʋsg d tẽebã kengr yĩngã, la a sẽn kɩt tɩ d saagdẽ tɩ manegr n watã yĩnga. D sã n pa gũusi, d tõe n yĩmame n pa pʋʋs a Zeova barka, bũmb nins fãa a sẽn maand n kõt-dã yĩng ye. Bõe n tõe n sõng-y tɩ y ra yĩmi? Y tõe n baoo sebr n gʋls bũmb kẽer y sẽn pʋʋs a Zeova n kose, la y gũus n ges a sẽn leokd y pʋʋsgã to-to wã. Rẽ poore, bɩ y pʋʋs-a barka, a sẽn leok y pʋʋsgã yĩnga.—Kolo. 3:15. w22.07 22 s. a 8-9

D sã n zãmsd Biiblã woto bala, pa sek ye. D sã n dat tɩ naf-d sõma, d segd n tũuda bũmb nins d sẽn zãmsdã d vɩɩmã pʋgẽ. Yaa d sã n maand woto la d na n paam sũ-noog hakɩɩka. (Zak 1:25) Bõe la d tõe n maan n bãng d sã n sɩd tũuda d sẽn zãmsd bũmb ningã? Yaa d sẽn na n fees d meng n gese, bõe la d maand tɩ yaa sõma, la bõe la d maand tɩ pa sõma n segd n demse. Tẽn-tʋmd a Poll goma rẽ yell n yeel yaa: “Baa d sẽn bɩ to-to fãa, bɩ d kell n kẽn sõma woto.” (Fili. 3:16) Tags-y n ges-y nafa nins d sẽn paamde, d sã n ‘ket n kẽnd sɩdã pʋgẽ.’ D paamdame tɩ d vɩɩmã lebg sõma, la pa rẽ bal ye. D noogda a Zeova ne d tẽed-n-taasã sũur me. (Yel. 27:11; 3 Zã 4) Rẽ n so tɩ d segd n wilg tɩ d sũur nooma ne d sẽn paam n be sɩdã pʋgẽ wã, la d maand d sẽn tõe fãa n tũud bũmb nins d sẽn zãmsdã. w22.08 18-19 s. 16-18

Wãn to la kãsem-dãmbã tõe n wilg tɩ b nonga a Zeova la a Zeezi? Bũmb a ye b sẽn tõe n maan tɩ tar yõod wʋsg yaa b sẽn na n get a Zeezi piisã yell neere. (1 Pɩy. 5:1, 2) A Zeezi goma rẽ yell vẽeneg ne tẽn-tʋmd a Pɩyɛɛre. A Pɩyɛɛr sẽn kɩɩs naoor a tãab t’a pa mi a Zeezi wã poore, a tʋlla ne a sũur fãa n wilg t’a nonga a Zeezi. A Zeezi vʋʋgrã poore, a soka a Pɩyɛɛr yaa: “Sɩmo, a Zã biiga, fo nonga maam bɩ?” D tõe n kɩsa sɩd t’a Pɩyɛɛr da na n maana a sẽn tõe fãa n wilg t’a nonga a Zu-soabã. A Zeezi yeela a Pɩyɛɛr yaa: “Rɩlg mam pe-bi wã.” (Zã 21:15-17) A Pɩyɛɛr kell n gesa Zu-soabã piisã yell hal n tãag a yõor tɛka, tɩ wilgdẽ t’a ra nonga a Zeezi. Kãsem-dãmba, bõe la y tõe n maan n wilg tɩ goam nins a Zeezi sẽn togs a Pɩyɛɛrã tara yõod ne-yã? Yaa y sẽn na n kẽnd n kaagd y tẽed-n-taasã wakat fãa n kengd b raoodo, la y maand y sẽn tõe fãa sẽn na yɩl n sõng sẽn bas-b tigissã kẽndã tɩ b lebg n wa a Zeova nengẽ. Woto, y wilgdame tɩ y nonga a Zeova ne a Zeezi wʋsgo.—Eze. 34:11, 12. w23.01 29 s. 10-11

Ra tags-y tɩ ned baa a ye pa tõe n wʋm y pãn-komsmã sẽn namsd-y to-to wã võor ye. Bala tõe n waa ne yelle. Tagsg a woto tõe n wa kɩtame tɩ y tagsdẽ tɩ y yellã pa tar tɩɩm, la tɩ y pa tõe n tõog y tʋls-wẽnsã ye. Biiblã wilgame tɩ tagsg a woto pa zems ye. Ad a sẽn yete: “Makr sã n wa wa, a na n tuka sor tɩ y tõog toogo.” Dẽnd baa d sã n maooda ne tʋls-wẽng sẽn tar pãng wʋsgo, d tõe n tõog-a lame. Ne a Zeova sõngre, d na n tõogame tɩ d tʋls-wẽnsã ra kɩt tɩ d maan sẽn yaa wẽng ye. Tẽegd-y wakat fãa tɩ d sẽn yaa ninsaalb sẽn pa zems zãngã, d pa tõe n pa wa tall tʋls-wẽns wakat ning ye. La y sã n wa tar tʋls-wẽnse, bɩ y yiis-a y yamẽ wã tao-tao wa a Zozɛf sẽn zoe tao-tao n zãag a meng ne a Potifaar pagã. (Sɩng. 39:12) Pa tɩlɛ tɩ y bas tɩ y tʋls-wẽnsã kɩt tɩ y maan sẽn yaa wẽng ye. w23.01 12-13 s. 16-17

Tɩrlmã yaa a Zeova zʋg-sõng a ye. (Tõo. 32:4) Ned sẽn yaa tɩrlem soab pa bakd neb ye. A Zeova pa tũusd neb ye. (Tʋʋ. 10:34, 35) B sẽn gʋls Biiblã buud-goam wʋsg pʋgẽ wã wilgda rẽ. A Zeova yeelame tɩ dũniyã saab wakate, “bãngr hakɩɩkã” sẽn be Biiblã pʋgẽ wã “na n lebga wʋsgo.” Neb wʋsg na n wʋma a võore. (Dãn. 12:4) Bũmb a ye sẽn kɩt tɩ bãngr hakɩɩkã lebgd wʋsgã, yaa b sẽn lebgd Biiblã ne sɛb sẽn tik Biiblã zugu, n ẽnpirimd-ba, la b pʋɩt nebã dũniyã gill zugã. A Zeova nin-buiidã yiisa Biiblã tõr wall a babs kẽere, sẽn yɩɩd buud-goam 240 pʋgẽ, tɩ ned fãa tõe n paam-a zaalem. Rẽ kɩtame tɩ buud toɛy-toɛyã fãa neb paamd n kelgd ‘Rĩungã koe-noogã,’ nand tɩ saabã ta. (Mat. 24:14) D Wẽnnaamã sẽn yaa tɩrlem soabã ratame n sõng ned buud fãa, t’a tũnug ne a Gomdã karengo, n bãng-a. Yaa a sẽn nong tõnd fãa wʋsgã yĩnga. w23.02 5 s. 11-12

Sãmbg kae tɩ y nonga tɩrlem. D sẽn pa zems zãngã yĩnga, d sã n pa gũusi, d tõe n wa saka dũniyã neb sẽn tagsd to-to tɩrlmã wɛɛngẽ wã nana-nana. (Eza. 5:20) Neb nins sẽn yet tɩ b yaa tɩrsã nong n yaa wuk-m-mens rãmba, neb sẽn wɩt b taaba, la neb sẽn tagsd tɩ b sãoo b taabã. Wẽnnaam pa nong ned sẽn tar manesem a woto ye. A Zeezi sẽn wa n be tẽngã zugã, a ninga tũudmã taoor dãmb taale, b sẽn da tagsd tɩ b yaa tɩrs ninsaalbã taoorã yĩnga. (Koɛ. 7:16; Luk 16:15) Ned sẽn maand bũmb nins a Zeova sẽn get tɩ yaa tɩrs pa tol n tagsd t’a sãoo a taabã ye. Tɩrlmã yaa zʋg-sõngo. Ned sẽn nong tɩrlem maanda sẽn yaa tɩrg Wẽnnaam a Zeova nifẽ. Biiblã pʋgẽ, b sã n wa gomd “tɩrlem” yelle, b gomda a Zeova noyã sẽn yaa sõma wʋsgã tũub yelle. w22.08 27 s. a 3-5

A Zeezi kɩsa a karen-biisã sɩda, baa ne b sẽn da mi n kongdẽ wã. (Zã 15:16) A Zak ne a Zã sẽn wa n kos a Zeezi n na n yɩ taoor dãmb a Rĩungã pʋgẽ wã, a Zeezi pa yeel tɩ b tũuda a Zeova ne yam-wẽnga, wall tɩ pa zems tɩ b le yɩ yẽ tẽn-tʋmdb ye. (Mark 10:35-40) Rẽ poore, yʋng ning b sẽn yõk a Zeezi wã, a karen-biisã fãa zoe n bas-a lame. (Mat. 26:56) Baa ne rẽ, a Zeezi kell n kɩs-b-la sɩda. A ra mii b pãn-komsmã sõma. La a kell n “nong-b lame n tãag a tɛka.” (Zã 13:1) A vʋʋgrã poore, a kõo a tẽn-tʋmdb 11 wã sẽn kell n maan sɩd ne-a wã tʋʋm-kãsemse, tɩ b na n lʋɩ taoor n sõngd nebã tɩ b lebgd a karen-biisi, la b ges b yell neere. (Mat. 28:19, 20; Zã 21:15-17) A Zeezi sẽn kɩs nin-kãensã sẽn pa zems zãngã sɩdã pa yɩ zaalem ye. Bala b fãa kell n tũu a Zeova ne b sũy fãa n tãag b yõor tɛka. A Zeezi sẽn kɩs neb sẽn pa zems zãng sɩdã yaa mak-sõngo. w22.09 6 s. 12

D sã n kɩs sɩd t’a Zeova nong-d lame la t’a bee ne-do, a Sʋɩtãan pa na n tõog n kẽes d rabeem ye. Wala makre, sẽn gʋls-a Yɩɩll 118 soabã sega zu-loees sẽn kɩt tɩ ra pa nana ne-a baa bilfu. A bɛɛbã ra yaa wʋsgo, tɩ b sʋkã kẽer da yaa nin-kãsemse. (Vɛrse a 9, 10) Wakat kẽere, ra yaa toog wʋsg ne-a. (Vɛrse 13) Sẽn paase, a Zeova ra kibl-a-la sõma. (Vɛrse 18) Baa ne rẽ, a yeelame: “Mam pa na n zoe rabeem ye.” A ra miime tɩ baa ne a saasẽ Ba a Zeova sẽn kibl-a wã, a Zeova nong-a-lame. Yɩɩn-gʋlsdã ra kɩsa sɩd tɩ sẽn wa n yaa yell ning fãa n paam-a, a Wẽnnaamã sẽn nong-a wã na n sõng-a-la wakat fãa. (Yɩɩn. 118:29) D segd n kɩsa sɩd t’a Zeova nonga tõnd ned kam fãa. Woto na n sõng-d lame tɩ d tõog d rabeemã. D na n goma bãmb b tãab yelle: 1) D sã n yɛɛsda d pa na n tõog n ges d zakã rãmb yelle, 2) ninsaal zoeese, 3) kũumã rabeem. w22.06 15 s. a 3-4

D segd n modgame tɩ yaa a Zeova tũubã la d lʋɩɩsd taoore. A Zeova sẽn yaa d Naandã yĩnga, zemsame tɩ d tũ-a. (Vẽn. 4:11; 14:6, 7) Dẽnd d segd n modgame tɩ d sẽn tũud-a to-to wã yɩ wa a sẽn datã, rat n yeel tɩ n tũ-a “vʋʋsem sõngã sõngre, la ne sɩda.” (Zã 4:23, 24) D ratame tɩ Wẽnnaam vʋʋsem sõngã sõng-d tɩ d bãng n tũ Wẽnnaam tɩ zems ne Biiblã sẽn yetã. Baa b sã n gɩdga d tũudmã wall d tʋʋm kẽer tẽng ning d sẽn beẽ wã, d segd n kell n lʋɩɩsa tũudmã yɛl taoore. Masã menga, d tẽed-n-taas koabg la zak n be bãens roogo, b sẽn yaa a Zeova Kaset rãmbã yĩnga. Baa ne rẽ, b maanda b sẽn tõe fãa n ket n pʋʋsdẽ, n zãmsd Biiblã la b sõngd neb a taabã tɩ b bãngd Wẽnnaam la a Rĩungã! B sã n wa sãbsd tõnd wall n namsd tõnd d tẽebã yĩnga, d tõe n kell n maana sũ-noogo, n miẽ t’a Zeova bee ne-do, la t’a na n keo-d lame.—1 Pɩy. 4:14. w22.10 9 s. 13

A Zeova kõo sagls Yel-bũn sebrã pʋgẽ, tɩ d sã n tũud-b bɩ nafd-d wakat fãa. Bɩ d gom Yel-bũn sebrã pʋgẽ sagls a yiib bal yelle. Pipi kɩt-y tɩ y sẽn tarã sek-yã. Yel-bũn 23: 4, 5 sagenda tõnd yaa: “Ra nams f meng wʋsg n bao paoong ye. . . . Bala hakɩɩka, a na n pusa pɩgs wa sɩlg n yɩk n kuil yĩngri.” La rũndã-rũndã, naong rãmb la baa arzɛgs rãmb maanda b sẽn tõe fãa n na n paam ligd wʋsgo. Rẽ kɩtame tɩ naoor wʋsgo, b maand bũmb sẽn sãamd b yʋʋre, b zoodã ne neb a taaba, la b laafɩ wã menga. (Yel. 28:20; 1 Tɩm. 6:9, 10) Yiibu, reng-y n tags-y n yaool n gome. D sã n ka maan gũusgu, d no-goamã tõe n sãama d taabã sũuri. Yel-bũn 12:18 yetame: “Ned sẽn gomd n pa tagsdẽ goam yaa wa sʋʋg sẽn kõsd neda, la yam soab zɩlemd yaa wa tɩɩm sẽn sãoogde.” D sã n pa yelgd d taabã kong-bõonesã, na n sõngame tɩ laafɩ kell n zĩnd tõnd ne d taabã sʋka.—Yel. 20:19. w22.10 21 s. 14; 22 s. 16-17

A Ezekɩyɛll ra segd n wʋma koɛɛg ning a sẽn da tog n taas nebã võor sõma. Wẽnnaam goamã ra segd n kẽ-a-la sõma, tɩ kɩt t’a tʋll n taas nebã koe-kãnga. Rẽ poore, bũmb n maan hal tɩ ling-a. A sẽn wãb sebrã, yɩɩ ‘noog a noorẽ wã wa sɩɩdo.’ (Eze. 3:3) Bõe yĩnga? A Ezekɩyɛll sẽn da paam n na n gom a Zeova yʋʋr yĩngã ra noom-a-la wʋsgo. (Yɩɩn. 19:8-11) A ra getame t’a sẽn paam t’a Zeova yãk-a t’a na n yɩ a no-rɛɛsã yaa zu-zẽkr tɛkẽ. Rẽ poore, a Zeova yeela a Ezekɩyɛll yaa: “Kelg goam nins fãa mam sẽn togsd foomã, la f bĩng-b f sũurẽ wã.” (Eze. 3:10) A Zeova sẽn yeel woto wã, a ra ratame t’a Ezekɩyɛll bĩng goam nins fãa sẽn be seb-pindgã pʋgẽ wã a yamẽ, n bʋgsd a zugu. A sẽn maan woto wã, a tẽebã pãng paasame. A bãngame me t’a tara koɛɛg sẽn tar yõod wʋsg n na n taas nin-buiidã. (Eze. 3:11) A Ezekɩyɛll sẽn wʋm Wẽnnaam koɛɛgã võor sõma la a tẽ wã, a ra segla a meng n sa n na n tɩ tʋm tʋʋmd ning a Zeova sẽn kõ-a wã, hal n baas-a. w22.11 6 s. 12-14

A Zeova siglgã sã n wa toeem bũmb tɩ yaa toog tɩ d sake, bõe la d tõe n maan tɩ sõng-do? D sak n teel rẽ ne d sũur fãa. Israyɛll nebã sẽn wa n be we-rasempʋɩɩgẽ wã, Kehat buudã neb kẽer n da rɩkd kãabg koglgã n lʋɩ nin-buiidã fãa taoore. (Sõd. 3:29, 31; 10:33; Zoz. 3:2-4) Ra yaa zu-zẽkr tɛkẽ! La Israyɛll nebã sẽn wa n ta kãabg tẽngẽ wã, yɛlã toeemame. Ra pa le baood tɩ b rɩkd koglgã n toeemd zĩig wakat fãa ye. Dẽnd b baoo tʋʋm a taab n kõ Kehat buudã neba. (1 Kib. 6:31-33; 26:1, 24) B pa yeel zĩig baa a ye tɩ Kehat buudã neb yẽgmame, wall b kosame tɩ b kõ-b tʋʋm sẽn yaa toor zalle, b sẽn da tʋmd tʋʋm-kãensã buud pĩndã yĩng ye. Yam bʋg la d tõe n dɩke? A Zeova siglgã sã n wa toeem bũmbu, baa yaa d tʋʋmd la b toeem-yã, d segd n saka rẽ ne d sũur fãa. Sẽn wa n yaa tʋʋmd ning la b kõ-yã, bɩ y tʋm ne sũ-noogo. Pa y tʋʋmdã n kɩt tɩ y tar yõod a Zeova nifẽ ye. Yãmb sẽn sakd a Zeova wã noom-a lame n yɩɩd tʋʋmd ning fãa y sẽn tʋmd a siglgã pʋgẽ wã. w22.11 23 s. 10-11

A Onezifoor gẽesa tẽn-tʋmd a Polle, la a sẽn wa n yã-a wã, a baoo a sẽn tõe n maan n sõng-a. A Onezifoor gẽnega a yõore, sẽn na yɩl n sõng a Polle. Woto wilgda tõnd bõe? D pa segd n bas tɩ ninsaal zoeesã kɩt tɩ d bas n pa teel d saam-biis nins sẽn paamd namsg b tẽebã yĩngã ye. D tog n maana d sẽn tõe fãa n sõng-ba. (Yel. 18:24) B ratame tɩ d wilg-b tɩ d nong-b lame, la tɩ d teend-b lame. D gom Risi saam-biisã sẽn sõngd b tẽed-n-taas nins sẽn be bãens roogẽ wã yelle. B sã n wa na n kao b tẽed-n-taasã bʋʋdo, wʋsg kẽngda bʋʋdã zĩigẽ, n tɩ teel-ba. Woto wilgda tõnd bõe? B sã n wa sãam saam-biis sẽn lʋɩt d taoor yʋʋre, bɩ n kẽes-b bãens roog wall n namsd-ba, d pa segd n bas tɩ rẽ kẽes-d rabeem ye. Pʋʋsd-y b yĩnga, n sõngd b zakã rãmba, la y baood y sẽn tõe n maan n teel-ba.—Tʋʋ. 12:5; 2 Kor. 1:10, 11. w22.11 17 s. 11-12

Kãsem-dãmbã tʋʋmd me yaa b tik Biiblã n bels b tẽed-n-taasã la b keng b raood sabab-wẽng sasa. (1 Pɩy. 5:2) Sabab-wẽng sasa, b segd n deng n bao n bãnga b tẽed-n-taasã sã n põsame, b sã n tara rɩɩbo, futu, la gãag zĩiga. La baa kiis wʋsg poore, b na n ket n data belsg la raood kengre. (Zã 21:15) Saam-biig a Harold sẽn yaa filiyall a ye taoor lʋɩtb sull neda, la sẽn paam n sõs ne d tẽed-n-taas wʋsg sabab-wẽns sẽn namsã yeelame: “Sabab-wẽng poore, nebã sũ-sãangã kaoosda wʋsg n yaool n sa. B vɩɩmã tõe n wa lebgda wa sẽn da yaa to-to pĩndã, la b na n ket n tẽra b ned sẽn maan kaalem yelle, b sẽn bõn b paoongo, bɩ bũmb sẽn da nams-b wʋsg yelle. Rẽ fãa tõe n kɩtame tɩ b le tar sũ-sãamse. La woto pa rat n yeel tɩ b tẽebã paoodame ye. Yaa ninsaal meng n yaa woto.” Kãsem-dãmbã tũuda Biiblã sẽn yet tɩ: “Yãb-y ne neb nins sẽn yãbdã.”—Rom. 12:15. w22.12 22 s. a 1; 24-25 s. 10-11

A Zeova kõta tõnd a vʋʋsem sõngã, sẽn na yɩl n sõng-d tɩ d tõog n maan sẽn yaa tɩrga. D sã n wa zãmsd Biiblã, d sakdame tɩ Wẽnnaam vʋʋsem sõngã sõngd-do. D sã n kẽnd tigissã me, d paamda vʋʋsem sõngã sõngre. Tigissã sasa, d paamdame n be ne d saam-biisã la d saam-bi-pogsã sẽn modgd n maand sẽn yaa tɩrg wa tõndã. La woto sɩd kengda raoodo. (Ebre. 10:24, 25; 13:7) D sã n wa pʋʋsd a Zeova n kot-a t’a sõng-d tɩ d tõog n mao ne d pãn-komsem ninga, a kõta tõnd a vʋʋsem sõngã, tɩ d paam pãng n ket n maood ne d pãn-komsmã. Yaa sɩd tɩ bõn-kãensã fãa pa tõe n kɩt tɩ d tʋls-wẽnsã menem ye. La b na n sõnga tõndo, tɩ d ra wa bas tɩ tʋls-kãensã kɩt tɩ d maan sẽn yaa wẽng ye. D sã n yãka wakat takɩ n na n maand bũmb nins sẽn kɩt tɩ tõnd ne a Zeova zoodã pãng paasdẽ wã, tara yõod tɩ d ra bas tɩ vaale, la d ket n baood n na n maan sẽn yaa sõma. w23.01 11 s. 13-14

Yaa sɩd tɩ Biiblã pa sebr sẽn kõt sagls laafɩ wã wall rɩɩbã wɛɛngẽ ye. La a wilgda tõnd a Zeova tagsg sẽn yaa a soab rẽ wɛɛngẽ. Wala makre, a sagend-d lame tɩ d ‘zãag d yĩngã ne bũmb ning fãa sẽn tõe n sãam’ d yĩnsã laafɩ wã. (Koɛ. 11:10) Biiblã gɩdga yão-beedã la rã-tɩgrã sẽn tõe n tũ ne d yõorã. (Yel. 23:20) A Zeova ratame tɩ d sã n wa yãk yam n na n dɩ wall d yũ rãam, bɩ d tall yõk-m-menga. (1 Kor. 9:25) D sã n tagsd neere, d na n tõogd n yãkda yam sẽn wilgd tɩ d sũur nooma ne vɩɩmã sẽn yaa Wẽnnaam kũunã. (Yɩɩn. 119:99, 100; Yel. 2:11) Wala makre, d na n maanda gũusg bũmb nins d sẽn dɩtã wɛɛngẽ. D sã n mi tɩ d sã n dɩ rɩɩb ninga na n kɩtame tɩ d bẽ, d na n gũusame n da rɩ rɩ-kãng ye. D wilgdame me tɩ d tara yam, d sã n gũsdẽ tɩ sekdẽ, n maand yĩn-wɩsgre, n modgd n yaa yɩlem wakat fãa, la d modg me tɩ d zakã yɩ yɩlemde. w23.02 21 s. a 6-7

D sã n wa karemd Biiblã, bõe n tõe n sõng-d tɩ d yã bũmb sẽn tõe n keng d tẽebã? D ges 2 Tɩmote 3:16, 17 sẽn yet bũmb ninga. Vɛrse-kãensã yetame tɩ “Gʋls-sõamyã tõr . . . yõodã yaa” 1) zãms neda, 2) wilg ned a kongre, 3) rems yɛla, la 4) kibl neda. Baa Biiblã sɛb nins d sẽn pa nong n karemdẽ wã tõe n nafa tõnd woto. Y sã n wa karemd Biiblã, bɩ y bao n bãng rẽ sẽn zãmsd yãmb bũmb ning a Zeova zugu, a raabã wɛɛngẽ, wall Wẽnnaam saglsã wɛɛngẽ. Bao-y n bãng-y Biiblã sẽn tõe n wilg ned a kongr to-to. Sẽn na yɩl n maan dẽ, ges-y vɛrse-rãmbã y sẽn karemdã sẽn tõe n sõng-y to-to tɩ y zãag y meng ne minim-wẽns la manesem-wẽnse, la y kell n maan sɩd ne a Zeova. Bao-y n bãng-y y sẽn tõe n tall bũmb nins y sẽn karemdã n rems yɛl to-to, wala makre, y sã n wa seg ned sẽn tar tags-kɛg koɛɛgã mooneg sasa. Ges-y vɛrse wã sẽn kibind yãmb to-to wã, la a sẽn tõe n sõng-y to-to tɩ y ges yɛlã wa a Zeova sẽn get-b to-to wã. Y sã n ning bõn-kãensã a naasã y yamẽ, na n sõng-y lame tɩ y sã n wa karemd Biiblã, bɩ y yã bũmb sẽn tõe n keng y tẽebã. w23.02 11 s. 11

Bãngr-gomd a to sẽn be Dãniyɛll sebrã pʋgẽ pĩnd n togsame t’a Zeezi na n lebga Wẽnnaam Rĩungã rĩm yʋʋm a yopoe baasgẽ. Rẽ yĩnga, d tõe n bãnga wakat ning a Zeezi sẽn lebg rĩmã bɩ? (Dãn. 4:10-17) “Wakat a yopoe” wã yell b sẽn gomd ka wã kaoosda yʋʋm 2 520. Yʋʋm-kãensã sõdg sɩnga yʋʋmd 607 sẽn deng a Zeezi rogmã, wakat ning Babilon nebã sẽn wa n sik yaoolem rĩm ning sẽn da rɩt naam Zerizalɛm a Zeova yʋʋr yĩngã a naamẽ wã. Baasa yʋʋmd 1914, wakat ning a Zeova sẽn kɩt t’a Zeezi lebg a Rĩungã rĩmã, la soab ning sẽn na n kao bʋʋdã. (Eze. 21:25-27) Wãn to la bãngr-gom-kãngã nafd tõndo? D sã n wʋmd bãngr-gomd ning sẽn gomd “wakat a yopoe” wã võor sõma, sõngda tõnd tɩ d maneg n kɩs sɩd t’a Zeova pidsda a sẽn yeel fãa tɩ zemsd a wakate. Wala a Zeova sẽn yãk wakat takɩ n sɩd lugl a Rĩungã, woto me, a na n gesame tɩ bãngr-goam a taabã fãa pids tɩ zems a wakate. Dẽnd a Zeova daarã “na n pidsa a wakatã bal kɛpɩ.”—Hab. 2:3. w22.07 3 s. a 3-5